\id 2TH - 28/5/85 Larsen Orokaiva (Ehija dialect); changed backslash codes 3-mar-2003 by e.bibilo 
\h 2 Thessalonians 
\toc1 2 THESSALONIANS 
\toc2 2 Thessalonians 
\toc3 2 Thessalonians 
\mt1 2 THESSALONIANS  
\c 1  
\s1 Paul na da Thessalonia embomeni ta degi ahari kajena  
\p
\v 1 Eto na Paul te Silas te Timothy te aingeto ungotenau Mama God te ungotenau Bada Iesu Keriso te ta toho uho ekalesia da Thessalonica ta miheva amita degi ahari erevi ere kajihera,  
\v 2 eto ungotenau Mama God eto Bada Iesu Keriso na ungota degi peka te hondate ari te ikasora.   
\s1 Keriso na puvuto embota ari sirikasuja  
\p
\v 3 Eto dagota namei kamei, ungoembo God ta degi iji tapa osa ere ora amo ungota degi God humota ari eto osa mine ara ari na pajito peni vahai ere ova avoeto osa ere ora.  
\v 4 Eto ungota kitoho embona ungo kesira ore memenga te osaga te ere kogova, eto kogue amo God toae rate ke be ijie ngahia na heteto miheva avoeto dagona ke avo God ta ekalesia nei nei ta degi hande ue tunga javotoho ere ora  
\v 5 eto ke erevi tapa ai ta ere kogora amo God ta ari sirikari amo ke be pere eto amita tutumota amo ungo na God ta tihi jigari degi ta horeto iresova, eto osaga memenga ere kogova amo ke avoembo ere kogova.  
\v 6 Eto God na ari javotoho erevi aisuja amo enana ungo kesira uore osaga memenga kiagova avoembo amita degi amo God na osaga memenga mine ikau humbasora  
\v 7-8 eto ungo osaga ere kogova ungota degi eto dagota degi tunga jamo ari ikau humbuto jangu indie iresora. Eto Bada Iesu na amita Anera sovera te ji peri te amiga uhu i ta eto puvuto Bada Iesu ta duru javotoho amita ke agi ae embomeni amita degi hana kiari ikau kogue  
\v 9 pehari ta memenga iji datohota kogue iresora te Bada ta irari degi usasa te ai ta mane horasora.  
\v 10 Eto Iesu puvuresuja iji te amo amina amita ke be ari humota ari embomeni ta degi otohu ari te jakeka ari te ikau humbasora. Eto ungona dago ta ke hande ore ingito ke be ijieva avoeto ungona enanaga tapa degi ai ta asova.  
\v 11 Eto dago ari ainge avoembo ungo hotembihe iji tapa pari eagora. Eto God na vasiri be ikau humbuto irova ungo jage eto umbuna avoeto ungo avo humbari haite ava pari eagora. Eto God na amita sovera na ungota jo ta pure ururou ungona embo jajavotoho asi uje eto God humota be ava pari ere ora.  
\v 12 Eto ungo ainge aisova amina Bada Iesu ta javo avo dombo be ururou amina ungota degi ikasuja amo God eto Bada Iesu Keriso ta hondate ari na ari avo humbasova.   
\c 2  
\s1 Ari sapura ta keniga embo be  
\p
\v 1 Eto Bada Iesu Keriso na egerembeto puvuto ungotena tapa toreketo humbasuja amita ke be avo ano ingivujo. Eto nau namei kamei  
\v 2 embomeni na ke sokova na Bada ta iji mahu puvija ainge ijiore ingagova rate ke amo be mane avoeto ke avo ingovojo. Eto ke amo dagota pe na ari ke eagora eto ahari ta kajari ke eagora rate ke avo be hotembavojo.  
\v 3 Eto Bada ta iji puvuresuja amita kihita amo embo isapamane na God egikasora amita ijite amo ari sapura ari embo be avo puvuresuja. (Eto embo amina Satan memenga kesuja degi ai ta hana kesuja.)  
\v 4 eto God ke pepeni Sinena Purisa Ari Embo amina puvuto God jakeka ari donda tapa avo sapura ke ijie umo oenga embo peni vahai ke ijie donda tapa ta hamota hetasi uje ue God ta Temple Otohu aita horeto umo oenga God ke ijie arumbasuja.  
\v 5 Eto ungo be hotembevujo, na ungote mihie ke erevi tapa ehene ingihava.  
\v 6 Eto ari erevi mahu puvuraehija te ari vahai na ere haekihia amo ungo kiarira avoeto iji inonota amo Sinena Purisa Embo amina puvurou ungotena tapa kesora.  
\v 7 Rate ari sasapura aingeko amo mahu enda ta puvuto ore ungotena ere kogora rate simba ari embo mihia avoeto ari sapura amina pajito peni be mane aisuja te simba ari embo avo iji tutumota toto pahurou ari sasapura amo peni aisuja.  
\v 8 Eto pahurou Sinena Purisa Embo amo arahata koguroro Bada Iesu na puvuto amita sago kiari te hoenge te na Embo amo tau veasuja.  
\v 9 Eto Sinena Purisa Embo sapura puvuresuja amita ari amo Satan ta ari vahai avo kesora amo ari sovera neite neite amo be mane sokova avo ururou kogue embomeni na kito haha puha ara  
\v 10 ue embomeni peheto daroho irari degi ta osaga kesi pahora amo ari sasapura neite neite amina kihi humbasuja. Eto embo amuna pehasora amo God ta ke be avo osa ae avoeto God na mane orekasuja te pehasora.  
\v 11 Eto God na enana ta siro au ngahia ururoro God na Sinena Purisa Embo avo ikau puvuto ke sokova na ijirou ingihe mihima  
\v 12 God ke be ae rate ari sasapura uje isapamane eagora embomeni amite tapa hana kito peheto osaga kogue daroho iresora.   
\s1 God na ungo oreketo humbasuja  
\p
\v 13 Eto nau namei kamei ungo God na osa ere ua avoeto dago ungo embo iji tapa God osa eagora. Eto God na embo oreketo humbasuja amo ungo avo kihi Ahihi Otohu ta sovera na oreketo humbau God ta ke avo humota eagova avoeto amita embo ototohu aisova.  
\v 14 Eto God ta duru javotoho ungota degi hande ore ingihava amina ungo jage eto humbuto Bada Iesu Keriso ta usasa avo ikau hoteto humbasova.  
\v 15 Avoeto nau namei kamei, ke be amo pe na ahari na hande ore ingihava avo be jigito heteto irivujo.   
\p
\v 16 Eto ungotenau Bada Iesu Keriso te ungotenau Mama God amite na hamo ta sovera ari ikeoi humbuto ari javotoho avo puvuroja simba eagora  
\v 17 eto amina hamota sovera ari ikau humbuto ari javotohote ke javotohote avo iji tapa aisova.   
\c 3  
\s1 Dago avoembo pari evujo  
\p
\v 1 Eto dagota namei kamei ke tutumota amo Bada ta ke hande ore sigeto eneteto ere pahua amo ungona humbuheva ainge dombo embomeni na otohu ke ijie umbara dago ke hande ari embo avoembo pari evujo.  
\v 2 Eto ke nei amo embo nei uhoho na God ta ke amo ke be mane ke eagora avoeto God na embo sasapura ta ingeni ta oreketo umbaja dago embo pari evujo.  
\v 3 Eto Bada amo humota ari embo avoeto Sapura Embo peikihe ungo oreketo humbuto sovera ari ikau humbasova.  
\v 4 Eto ungo Bada na ere ua avoeto ungo humota ere ora avoeto dago ere kogora amo ke mahu eo ingito ere ovova eto ehako aisova.  
\v 5 Eto Bada na hondate ururou God ta osa ari avo be kogue Keriso ta hondate ari na pure mane toasova te kaiketo aisova.   
\s1 Kupi pegogo eagora amita ke  
\p
\v 6 Eto nau namei kamei ungo Bada Iesu Keriso ta javota ari erevi ava erera, amo ahe poekehere humbuheva avo ungota namei vahai na ambo ambo ae kupi pegogo ururou kito amo be tovujo oenga iroi.  
\v 7 Eto ungo kogova amo ungo daingeto iresova avo ahe kihira uera amo dago ungote mihie kupi pegogo ae  
\v 8 eto indari amo teho humbuto indae rate dago mine ikihe humbuto indimahara. Eto ungo osaga kiagova dago ungo embo mumete ijite pure ngahia uera.  
\v 9 Amita ke be amo dagota pure ta mine avoeto ungota undurari amo teho humbahera te ungota ahe kihira ainge ava eto ari ainge amo uera.  
\v 10 Eto ungote mihie ke peni erevi ungota degi ikihara amo “Pure ae embo na indari mane indesuja.”   
\p
\v 11 Eto dago ke nei eha ingera amo kupi pegogo embo amo ungote mihera amina pure be ue keko namei ta degi ta ke kaikari erera avo ingera.  
\v 12 Avoeto Bada Iesu Keriso ta javota erera amo embomeni amina ari enana ta avo simba ue ingeni pure eto ungo oenga indari umbara erera.  
\v 13 Eto nau namei kamei ungo ari javotoho asi ue kupi pegogo avojo.  
\v 14 Eto ke ahari ei ta ere kajihera amo embomeni nei uhoho ungote mihera amina agi ari uje ae ururoro kito amo tovujo oenga mihie me kiore.  
\v 15 Eto embo amo kitoho mane rate no namei rate ngahia na teho isembejo.   
\s1 Javotoho ari ta ke  
\p
\v 16 Eto Bada amo ungotenau peka humbari embo avoeto iji tapa te ari tapa te amita peka ikau humbuhurovo amina ungote iresuja.  
\v 17 Eto na Paul ingeni nau na ke erevi ere kajihena. Eto na Paul nanena ungo ere pekihena, eto nau ahari kajari tapa amita tutumota amo einge kajagona, amo kikiva ta hajire naura.  
\v 18 Eto Bada Iesu Keriso ta hondate ari amo ungote iresuja.