\id 1CO - 27/5/85 Larsen Orokaiva (Ehija dialect); changed backslash codes 3-Mar-2003 by E.Bibilo 
\h 1 Corinthians 
\toc1 1 CORINTHIANS 
\toc2 1 Corinthians 
\toc3 1 Corinthians 
\mt1 1 CORINTHIANS  
\c 1  
\s1 Paul na da Corinth embomeni ta degi ahari kihi kajena  
\p
\v 1 Na Paul God ta apostel ana God na engerekena amo namote ungotenau namei Sosthenes te  
\v 2 aingeto Iesu Keriso ta embo ototohu God ta ekalesia da Corinth ta miheva amita degi ungo pekihe ahari erevi ere kajihera. Eto ungote namote eto enda tapa embomeni te amuna Bada Iesu Keriso ta javota pari eagora avo ingeni jageni kogumbeto otohu ara God na jage eria.  
\v 3 Eto ungotenau Mamo God te Bada Iesu Keriso te na ungota degi peka te hondate ari te ikasora.   
\s1 Ahihi Otohu ta sovera ari  
\p
\v 4 Eto ungona Iesu Keriso ta degi hondate ari isapamane be umbeva avoeto na God ta degi osa mahainge eagona,  
\v 5 amo ungota degi God ta ke kiari te oje kahari javotoho te tapa inono eagova avoeto osa ere ona  
\v 6 eto Keriso ta ke hande ore tapa humbuheva  
\v 7 avoeto ungo Bada Iesu Keriso puvuresuja avo simba ue nei do toae Ahihi Otohu ta sovera ari tapa inono ta hande eto ere humbuhava  
\v 8 Eto amina jigou sovera eto mihirovo Bada Iesu Keriso ta iji puvuresuja amo ungota degi mane pehumba aisora  
\v 9 te God na ungo amita Meni Iesu Keriso ungotenau Bada amiga vahaita ava umbuna avoeto amina ungo mane toasuja te simba ue iresuja.   
\s1 Ekalesia na kaheketo boru mine jumba ea  
\p
\v 10 Eto nau namei kamei, nanena Bada Iesu Keriso ta javota erena, ungo kaheke kaheke eto boru mane jumbasova te jo vahai hotembari vahai eto irivujo.  
\v 11 Eto embo Chloe ta bande ta iragora embomeni na puvuto nau namei kamei ungo na boru jumbuhe irari ke ehere ingena  
\v 12 amo ‘Na Paul ta ke ambo ambo eagona,’ eto embo nei na, ‘Na Apollos ta ke ambo ambo eagona,’ eto embo nei na, ‘Na Cephas ta ke ambo ambo eagona,’ eto embo nei na, ‘Na Keriso ta ke ambo ambo eagona,’ ke ainge ijie miheve puvuto ehere ingena  
\v 13 te Keriso kaheke kaheke eto hande arote? Eto na Paul ungo embo na tehere sari uenete? Eto na Paul javo nau ta bapataito uevete? Ari aingeko avo irae bera  
\v 14 eto na ungo bapataito ae rate embo Crispus te Gaius te avo ingeni nau na bapataito uena avoeto na tunga javotoho ere ona  
\v 15 te ungona javo nau ta bapataito ari ke avo mane aisova  
\v 16 te embo Stephanas ta hatira ga tapa bapataito uena te nei uenete aere amo na kiaera.  
\v 17 Eto Keriso na na pambuto embo bapataito ana ke ae rate amita duru javotoho avo embo ta degi hande ana ikena. Eto enda embo ta kiari na ke avo hande ahena amo Keriso ta ji oreka amo sovera irae aehija.   
\s1 God ta kiari te sovera te amo Keriso ta degi kiagora  
\p
\v 18 Eto Keriso na ji oreka ta pehena amita ke avo pepehekari degi ta ere pahora amo sokova ke ijie urumbagora te ungotena God na umbuna embomeni amita degi amo God ta sovera ari ai ta humbagora.  
\v 19 Amita ke amo einge kajari mihia, “Eto na God nanena enda embo ta kiari amo haeketo humbuto gosukano irae aisuja,” ke ainge ena.  
\v 20 Amo enda ta kiari embo davore? Eto enda ta ke embo davore?  
\v 21 Eto enana ta ke tapa amo God na ehei ke be ambu ere ua. Amita be amo embomeni na God kesi ere uahera te God kiari inono ae eo God na amita kiari na Iesu ji oreka ta pehena amita ke avo hande eo embomeni nei uhoho na sokova ke ere nei uhoho na ingito God ke be ere, oreketo ere uhua.  
\v 22 Eto Judea embomeni sovera neite neite avo kihi kito ke be asi uje ere ora te enda nei embomeni na embo pepeni ta ke avo kihi ingito ke ta gamo avo kesi uje eagora  
\v 23 te ke hande ere ora amo Keriso ji oreka ta teo pehena amita ke avo ijiore Judea embomeni na ingihe sokova ke eagora eto enda nei embomeni na ingihe haha puha, eto urumbagora  
\v 24 rate God na siriketo ere uhua embomeni Judea embomeni te enda nei embomeni na God ta sovera te kiari te amo Keriso ta degi kiagora  
\v 25 amo Keriso na embo oreketo ji oreka ta pehena amo embo na sokova ke eagora te God ta kiari te sovera te amo embo ta kiari te sovera te aingeko mane rate pajire be ra.   
\p
\v 26 Eto nau namei kamei, ungo God na siriketo umbuna iji te amo ungota irari mo do aingere avo be hotembevujo. Eto ungo embo heriso amo kiari embopo eto donda embopo eto embo pepeni ta meniundi eto ungo isapamane manera.  
\v 27 Te God na enda ta kiari embopo te sovera embopo te avo me kiagora kiae embopo ivo ambu embopo te avo siriketo ere uhua.  
\v 28 Amo enda ta donda, enda embomeni na kogue sapura ke eagora avo God na humbuto jigama asi uje ere ua, amo enda ta embo pepeni na be ambu ara ari ainge amo ere ua.  
\v 29 Avoeto enda embo tapa na God ta tihi ta heteto, “Na, na” ijie dago embo pepenira ke ainge avo ari irae be ra.  
\v 30 Te God na ungo humbuto Iesu Keriso ta jo ta ikehei miheve ungota kiari te javotoho ari te otohu ari te ari sapura ombari te amo amina ere ua.  
\v 31 Avoeto ke einge kajari mihia, “Eto ungo jakeka asi eto kito amo Bada vahai avo jakeka evujo.”   
\c 2  
\s1 Iesu Keriso ji oreka ta teo pehena amita ke  
\p
\v 1 Eto nau namei kamei, eto na pambuto God ta ke ungota degi hande uena amo embo ta hotembari ke avo ae eto embo emo ke embo na eria ainge ara na ke ae  
\v 2 rate na ungote mihie amo Iesu Keriso ji oreka ta teo pehena amita ke avo pere ehene ingihava.  
\v 3 Amo na ivo embo ke ijie ke amo ae rate na embo teho avoeto joru te tapa ke amo ehene ingihava  
\v 4 eto ke hande ue oje kahihena amo ungo na ingihe embo ta hotembari javotohora ainge ijie sago kiagova ae rate Ahihi Otohu ta sovera na ke amo ene kogueva.  
\v 5 Amo embo ta hotembari avo humota ava ae rate God ta sovera avo ano kito humota ava ijiena.   
\s1 God ta Ahihi Otohu ta kiari  
\p
\v 6 Eto na God ta pure ari embo ototohu pepeni amita degi ke hande eagona amo kiari ke peni be avo eagona amo enda ta embo pepeni ta kiari amo enda ta irae aisuja avoeto amina  
\v 7 ae rate God ta ke peni ojikari avo enana ta degi hande eagona eto God na enda ae kihi ta amo ungotenanena ke avo ingiho God ta usasa ta toruera God na sirikena.  
\v 8 Eto ke avo enda ta tihi jigirikari embopo na ingito ingaesira ea te ke avo ingaehera amo Bada usasa te amo mane ji oreka ta taehera  
\v 9 ke ainge amo einge kajari mihia, “Eto God na God osari embomeni ta degi ari do asi sirikena amo tihi na kiae eto oje na ingae eto embo ta siro na hotembeto hambae,”  
\v 10 ke ainge avo mihia te eha oroho emo God ta Ahihi Otohu na eha oroho harikihoi ere kogora. Eto Ahihi Otohu amina jombure ue amo God ta ke hotembari peni ojikari amo ere kogua  
\v 11 eto ari amo erevira, embo ta hotembari jo ta amo embo nei na kiae rate ahihi amita oenga na tohota hotembari jo ta amo ere kogua ainge dombo embo na kiae rate God ta Ahihi na God ta hotembari jo ta amo ere kogua  
\v 12 eto embo ta ahihi avo ikae rate God ta Ahihi avo ungotenau jo ta ikehei horeto mihie God na ungotenau hande ikena amo amina harikeoi kiagora.  
\v 13 Avoeto ke hande eagora amo enda embo ta kiari manera te God ta Ahihi Otohu na uhu ta ke avo embo ta jo ta ijioi ingihe embo ta degi ke hande eagora.  
\v 14 Eto God ta Ahihi embo ta jo ta irae embo amina God ta ke avo ingito sokova ke ijie ganini eaguja amo uhu i ta ari avoeto embo amo ingari inono ae ra.  
\v 15 Eto embo Ahihi Otohu humbari embo amina ari tapa amo ingihe inono ta sirikaguja te embo Ahihi Otohu umbae embo amina embo nei ta ke ingeaguja amo ari haiteko mane avoeto tuha eto iraguja  
\v 16 amita ke amo einge kajari mihia, “Eto embo amuna Bada ta siro ta hotembari avo kiae avoeto Bada mane ahe poekahija,” ke ainge kajari mihia rate ungotenamo amo Keriso ta hotembari amo ungotenau jo ta mihia.   
\c 3  
\s1 God ta pure ari embomeni  
\p
\v 1 Eto nau namei kamei, na ungota degi pambuhena amo ungo God ta Ahihi humbari embopo ta degi God ta ke ngangahia avo ahena te ungo God ta kiari na pajirae rate Keriso ta degi meni isasaraho na arako ove kito toa.  
\v 2 Eto ungo indari be avo indari inono ae kito emi mu pere ikeo indieva te eha oroho emo ainge dombo indari be avo indari inono ae  
\v 3 enda ta ujeje ta ere pambuhova amo ungota degi boru jumbari isapamane be mihia avoeto erena.  
\v 4 Eto ungo na ‘Na Paul ta ambotani,’ eto ‘Na Apollos ta ambotani,’ ke ainge ereva amo enda embo ta ari avo ere ova.  
\v 5 Eto Apollos amunure? Eto Paul amunure? Embo amo teho Bada ta pure embo amita ke avo kaiha ururoro ungo na ingova siriketo ikena  
\v 6 eto na Paul na ji ve urari embo eto Apollos amo ji urea aita umo overekena te God na eoi ji amo pajiraguja  
\v 7 eto ji ve urari embo amo tehora eto umo overekari embo amo tehora te God na vahai au ji amo pajiresuja.  
\v 8 Eto ve urari embo te umo overekari embo te amo hotembari vahai na pure ere uma pure ta mine amo God na ikau humbasora  
\v 9 eto dago God ga tapa hevuketo pure amita avo ere ora avoeto ungo amo dagota pure mane rate God ta pure ra. Eto ungo amo God ta bande avoeto God na ere gerikihia.  
\v 10 Eto God na nau degi ta kiari javotoho ikena avoeto bande ta tutuvi hurukeo embo nei nei na tutuvi aita bande gerikihera avo be kogue gerikara uje ereona.  
\v 11 Amita be amo God na tutuvi ikena amo tutuvi nei irae rate Iesu Keriso vahai na heteto mihia.  
\v 12 Avoeto embo amuna tutuvi ai ta bande gerikasi uje aisuja amo ‘Gold’ retemo ‘Silver’ rete koro rete, ji rete, sasaha rete, ‘Rice’ vehu rete donda deina gerikasuja  
\v 13 amo Bada ta iji puvuresuja amo sapura rete javotoho re amo iji amikote kesuja amo sapura retemo javotohore amo ji vevere na au kesuja,  
\v 14 amo evekae iresuja embo amina amita pure ta mine amo humbasuja  
\v 15 te embo bande sapura gerikasuja amo evekau irae au teho iresuja, eto embo amo ji peri na joeketo evikihirou God na orekasuja te embo amo hamo pupuho te iresuja.   
\p
\v 16 Eto God ta bande Otohu amo ungora te God ta Ahihi Otohu amo ungota degi ta iraguja te ungo kiaerete?  
\v 17 Eto embo na God ta bande Otohu avo teto aimbasuja embo amo God na tau irae aisuja. Eto God ta bande amo Otohu ra eto ungo amo bande Otohu ra.  
\v 18 Eto umo oenga jandireketo no degi ta ke sokova aojo. Eto umo kiari embo ke erea te kiae embo sira eto God ta degi kiari umbaehea.  
\v 19 Amita be amo God na enda embo tapa amita kiari avo kogue enana ta ke avo huti ke eria amita ke amo einge kajari mihia, “God na eoi enda ta kiari embopo ta ke amo vage ta tarako eaguja.” ainge  
\v 20 eto ke nei amo, “God na enda embopo ta kiari avo kogue kiari be mane ke eaguja,”  
\v 21 avoeto ungo embo ambo ambo ari embopo na kogue na na avojo  
\v 22 eto amita be amo Paul rete Apollos rete Cephas rete enda donda rete vasiri te pehari te ari mahu rete eha puvuroute tapa amo ungota pure ari donda ra  
\v 23 eto ungo amo Keriso ta toho eto Keriso amo God ta tohora.   
\c 4  
\s1 Iesu Keriso ta Apostero  
\p
\v 1 Eto embona dago apostel ke asora amo Keriso ta pure ari embopo ke asora te God ta ke mahu ojikari avo simba ue hande are ikena.  
\v 2 Eto peni be amo dago ke simba ari embopo na Bada ta ke agi ue pure asora te  
\v 3 ungo rete eto pehumba embopo rete amite aingeto ari nau avo kogue na ganoka aisova amo na ke be mane asona eto ari amite namote tapa ari nau avo kogue ganoka mane eagona.  
\v 4 Rate nau jo na na oenga pehumba mane eagona te na pehumba embo rete pehumba embo mane re amo Bada na oenga pehumba eaguja.  
\v 5 Avoeto pure embo javotoho rete sapura re avo ungo na mane evivi javivi aisova te Bada na puvuto aisuja avo simba evujo. Eto Bada na ke tapa mume ta ojikari avo harikihe embo ta hotembari jo ta avo au araha ta kesora amo iji amikote embo ta ari avo God na kito jakeka aisuja.   
\p
\v 6 Eto nau namei kamei, namote Apollos te ta javota ke ereva avoembo ere kajihena te ungona “Na na” ijie Bada ta ke ta hamota ungota hotembari ke ga kajue ere ova amo sapura be avoeto ungo na be kiagova ke erevi ere kajihena, amo ungona embo nei peni embo nei isapa ke ereva avoeto haekihe ere kajihena  
\v 7 te ungo amuna embo pepeni avo ke ehei? Eto ungota degi ta do mihia amo ungo oenga ehevete? Ainge ae rate God ta ari avo eto ungota degi ikehija avoeto ungo oenga, “Na, na” ijie avojo.  
\v 8 Eto ungona kiari umbeve inono ehei dago toto uhu ta horeto ‘Kings’ ere ovete? Eto ungo ke be aheva amo dagota tapa ‘Kings’ ahera avo nau jo tapa na uje ere ona,  
\v 9 te na ere kogona amo God na ehei embomeni kihi pambuhore dago apostel avo embomeni sasari asora embopo amiga ambota ere pahora. Eto dago pambuhore uhu te enda te ta iragora embomeni te tapa amina dago kogue mihera.  
\v 10 Eto ungo na Keriso ta kiari tapa amo umbeve irae ehei dago avo kiae embopo ke erevete? Eto ungo embo pepeni sovera humbari embopo ke ijie dago sovera umbae embopo ke erevete?  
\v 11 Eto ungo be kivujo, dago apostels na umo beuje te indari beuje te bo perarari asuketo embo ta degi memenga te osaga te humbuto hari tumbuto mihovora  
\v 12 eto dago ingeni dagota na pure ngahia ere ora te embo na urumbihore mine avo javotoho ari embo ta degi ere ikihera amo memenga osaga ikihore jamo eto kogue mihera.  
\v 13 Eto embo na dagota javo uore sapura uoi amo osa ari ta ke avo mine eagora, eto ari ainge amo eagora te ihikarita eto puvuto eha emo embota sirivo kandue sasapura amo dagora.  
\v 14 Eto nau osa ari meniundi, na ke erevi ere kajihena amo ungo na me kiagova kajae rate kivujo  
\v 15 Keriso ta ke ahe poekari embopo amo 1,000 ainge ungota degi mihera te Keriso ta duru ungota degi hande uena te ungota mamahamane nei irae na vahai amo ungota mama ra.  
\v 16 Avoeto nau ahe kihira avo ungo ambo ambo evujo  
\v 17 eto ungo be kiagova na osa ari meni Timothy amo Bada humota ari meni avo ikano ungota degi pambuto na Iesu Keriso ta jo ta mihie irari nau do ainge ere ona avo pambuto au ingivujo, eto ke vahai aravo enda tapa ekalesia ta degi hande eagona.  
\v 18 Eto na ungota degi pambae iji koso mihene ungo embo nei nei na embo pepeni ke ijie, “Na, na” ereva  
\v 19 te Bada na uje au kito ungota degi sausau pambuto ungo siro embopo ta ke sokova avo ingito avo ungota degi sovera miheite iraere avo be kesona  
\v 20 eto God ta tihi jigari aita amo ke pere mane rate sovera te tapa mihia,  
\v 21 avoeto ungo oenga ungota jo sirikevujo, na ituha jigito pambuto ungota degi hana kiari ikanote mo teho osa ari te tunga jamo ari te na pambano?   
\c 5  
\s1 Eto Da Corinth ekalesia ta degi ari sapura vahai mihahija  
\p
\v 1 Eto embo na ijiore ingagona amo ungota degi ta ari sapura vahai mihia amo God kiae embomeni na ari sapura ainge amo mane ahera te ungo na ere ova amo embo vahai na mamo ta ae jimbuto mihia.  
\v 2 Eto ungo ari ainge avo kito osaga kiaeheva te ungona dago javotohora ke ainge ijie miheva te ungo do eto embo amo ohimbavo pambaja ae toheve mihei?  
\v 3 Eto hamo nau amo hoi ta mihia te ahihi nau avo ungote mihia avoeto pehumba eto embo amo ohimbehene mahu pambija.  
\v 4 Avoeto ungo Bada ta javota horukihirovo ahihi nau amo ungota degi iresuja avoeto Bada Iesu ta sovera na embo avo ohimbavo  
\v 5 Satan ta ingeni ta pambau amita hamo ta ujeje tapa avo tau irae au amita ahihi avo irirou God na Bada ta iji te oreketo humbasuja.   
\p
\v 6 Eto ari sapura erevi ungota degi mihia te ungona dago javotohora ijie haekae miheva amo sapura bera eto ‘Bread’ pajirari sivo isapa ikeore pajito peni vahai eaguja aingeko ari sapura emina pajito peni vahai be aisuja  
\v 7 avoeto Judea embona jarukari pondo ta ‘Bread’ ta pajirari sivo ikae teho indagora ainge dombo ungona ari sapura erevi be tovujo irae ai. Eto ungotenau jarukari ta pondo indesora amita o ‘Lamb’ amo Keriso avo mahu tehere pehehija.  
\v 8 Avoeto ungotena pondo indesora te ‘Bread’ mahu pajirari sivo ikagora avo ari sasapura te humote toto ‘Bread’ sivo ikae avo tunga javotoho na jo jamo jamo ari te ke be te na indie iresora.   
\p
\v 9 Eto na ahari mahu kajea aita, amo ungona tiha paiha embomeni ga umoro kamoro eagova avo kajea.  
\v 10 Rate God kiae embomeni na tiha paiha ue hamo ta ujeje sasapura ue pegene ue god ingeni na ove eto humotepain ari embopo avo ungo na toava ke ae ra te ungote enanate enda vahaita miheva avoeto ungona enana toto pambari inono ae ra  
\v 11 te ke kajea amo embo amuna, “Na Keriso ta toho,” ke ainge aisuja te embo amina tiha paiha rete uje sasapura rete god ingeni na ari avo humotepain eagoite embo ta javo ari sapura rete umo indito tihivi ari rete pegene ari rete embo aingeko avo be tovujo irae ai, eto embo aingeko amiga mane arumbeto indari indesova.  
\v 12-13 Eto ekalesia ae embomeni araha ta mihera amita ari amo na mane sirikagona te God na vahai sirikaguja te ungotena ekalesia embomeni tapa vahaita mihera amo ungotena oenga ari ungotenau avo sirikara einge kajari mihia, amo, “Ungota horukari ta embo sapura mihirou kito avo ohimbevu joru pambai,” ke ainge mihia avoeto evujo.   
\c 6  
\s1 Ganoka mine ara ari  
\p
\v 1 Eto ungo tapa amo Keriso ta embomeni rate ungota namei vahai amita degi pehumba ere ova te ungo na God kiae embomeni na koto ta sirikara ere harikiheva te do avoembo ungota ekalesia embomeni na ganoka ara enana ta degi pambuto ae re?  
\v 2 Eto ungo enda embomeni tapa ta ari avo sirikari ijite amo ungotena Keriso ta toho amina God kiae embomeni ta ari avo siriketo pehumba aisora amo ungo kiae ue ere ovete? Eto enda tapa ta ari amo ungona sirikasova te ungota jota ari, hotembari, puvaguja amo ungo oenga mane sirikavote?  
\v 3 Eto Anera te tapa amo ungotenanena sirikasora avoeto enda ta ari amo ungotena oenga sirikasora amo tehora  
\v 4 eto ke erena emo ungota degi ari do puvurou kito amo pambuto embo teho ungote mihia amita degi avo, amina sirikaehija amo tehora.  
\v 5 Eto ke erena amo ungona me kiagova erena, eto ungo Iesu ta embomeni amita degi osaga puvurou kito amo ungota kiari embo vahai amina sirikau tunga javotoho aisova, embo amo iraerete?  
\v 6 Eto ungo embo vahai na namei ta degi pehumba ere ova amo God kiae embomeni ta tihi ta ere ova.  
\v 7 Te ungota namei na ke sokova ijie ungota degi sapura ururou amo kito hotembeto toaeheva te ungona namei ta degi pehumba ue koto ta humbuto ere pambuhova  
\v 8 avo pere mane rate ungote tapa sapura ue namei ta degi ke sokova na ereva.   
\p
\v 9 Eto ungo ke emo mahu ingari eto kiarira amo ari sasapura embomeni na God ta usasa ta horeto hotari mane humbasora amo embo ga sesena sasapura ari te tiha pahia neite neite ari embomeni te god ingeni na ove eto humotepain ari embomeni te  
\v 10 pegene embomeni te donda humbasi ujeje peni vahai be embomeni te jai indito pipi-konene embomeni te embo nei ta javo ari sapura ari embomeni te ke sokova ijie donda humbari embomeni te eto ari aingeko embomeni amina God ta usasa ta mane be mane horeto hotari humbasora.  
\v 11 Eto ari aingeko amo ungona ere uaeheva te Bada Iesu Keriso ta javo ta God ta Ahihi Otohu na egenu embo jajavotoho eto Otohu ere ova.   
\s1 Ungota hamo te visi te na God otohu evujo  
\p
\v 12 Eto ungona, “Dago ari tapa neite neite aisora amo God na haekaera,” ke ainge ereveija amo ke be rate ari neite neite aisova te nei nei amita he ta nei do javotoho mane puvuresuja. Eto ke be amo na ari tapa avo aisona te nau hamo na na tihi jigesuja avo na uje aera.  
\v 13 Eto indari amo hini avoembo ikarira te iji puvuresuja iji te amo donda heriso amo God na au iraesuja. Eto ungotenau hamo amo tiha paiha ara ikae rate Bada ta toho aja ikena amo ungotenau jo aita iresi uje ere ua.  
\v 14 Eto God na Bada Iesu jiginu vasiri te erena ainge dombo ungotena amita sovera na jigou vasiri te erasora.  
\v 15 Eto hamo ungotenau amo Iesu ta hamo vahaira te ungo kiae ue ere ovete? Eto Iesu ta hamo avo embo na tiha evohu ga kaju aisuja amo tehorete? Teho manera,  
\v 16 te embo amuna tiha evohu ga kaju aisuja amo amite tapa vahai aisuja amita ke amo einge kajari mihia, “Eto enana heriso rate visi vahai aisora,”  
\v 17 te embo amuna Bada ga kaju aisuja amo amiga ahihi vahai aisuja.  
\v 18 Avoeto sesena sasapura te tiha te avo kito joru toto pambuvujo. Eto ari sasapura neite neite amo embo ta hamo araha ta rate nei sesena sasapura te tiha te amo hamo te visi te na eoi sapura eagora.  
\v 19 Eto God na no degi ta Ahihi Otohu hande ikena amo no hamo jota iraguja amo amita bande otohura te ungo kiae rete? Eto ungota hamo amo ungota toho mane  
\v 20 rate God na ombuto umbuna avoeto God ta toho avoeto ungota hamona God otohu evujo.   
\c 7  
\s1 Jimbari ta ke  
\p
\v 1 Eto ungona ahari ta kaeto eto ingari ke eheva amita ke be amo erevira, eto embo na evohu jimbae iresuja amo javotoho  
\v 2 rate enda ta tiha paiha isapamane be mihia avoeto embo vahai na evohu jimbasuja eto evohu na embo jimbasuja amo javotoho be ra.  
\v 3 Eto ivuna amita hamo ae ta degi ikasuja eto ae na amita hamo ivu ta degi ikasuja  
\v 4 eto ae na amita hamo avo amita toho ke ijie mane orasuja eto ivu na hamo amita avo amita ke ijie mane orasuja te ae ta degi ikasuja  
\v 5 eto pari asi uje eto amo ungo heriso jo vahai eto iji isapa ajirekasora amo javotohora te Satan na ungota jo suruha kito engekasuja avoeto ungo egerembeto jo vahai evujo.  
\v 6 Eto ke emo ungona ava ae rate ainge aehevete avoeto erena.  
\v 7 Eto embo tapa na ari nanena eagona ainge ara uje ereona te embo nei nei na amo God ta degi hande oenga ara humbagora.  
\v 8 Eto singa te kakara te jijimbukae amite evohu dodoru amita degi ke erevi erena eto na aingeko jimbae iresora amo tehora  
\v 9 eto jimbari ta uje peni vahai eto kito jimbasora amo tehora eto ke amita be amo jimbari ta hotembari amo jo ta kuru kuru eto avuei avo eto mane toasora te jimbasora.  
\v 10 Eto jimbuto mihera amita ke asona amo ke nau mane rate Bada ta ke avo asona ingivujo. Eto evohu na ivu mane toasuja  
\v 11 te toasuja amo embo eha mane jimbasuja te javotoho be amo ehako egerembeto ivu ga jo vahai eto peka humbuto iresuja. Eto nei amo ivu na ae mane toau pambasuja.   
\p
\v 12 Eto ke nei amo Bada ta ke mane rate ke nau avo asona ingivujo. Eto ungota namei ekalesia embo vahai amita ae amo God humota ae rate ivuga iresi uje aisuja amo ivuna mane toau pambasuja.  
\v 13 Eto ainge dombo ekalesia evohu vahai amita ivu amo God humota ae rate aega iresi uje aisuja amo ae mane toau pambasuja  
\v 14 te ae na God humota ere ua avoeto God na ae te ivu te tapa otohu ke aisuja eto ivuna God humota ere ua avoeto ae amo God humota ae rate God na ivu pere mane rate ivu te ae te tapa otohu ere ua. Eto ari ainge ae amo ungota meniundi amo tongopa te mane irae ahera, te enana te tapa otohu ra.  
\v 15 Eto embo evohu God kiae amina ivu rete ae na God humota eagora avoeto toto pambasi uje aisuja amo God ta ke pepeni amina enana pundurae avoeto toto pambasora amita be amo embomeni na jo ta osa ue peka ta irora God na jage eto umbuna.  
\v 16 Eto ivuna ae orekaute, ae na ivu orekaute avo sausau mane toasova te God ta uje avo be kivujo.   
\s1 Ungota irari ta hajire  
\p
\v 17 Eto Bada na ungota irari ta hajire avo hande eto humbuto irova ikena avo humbuto ambo ambo ue irivujo, eto ke erena emo ekalesia tapa ta degi hande eagona  
\v 18 eto God na jage eto umbuna iji te embomeni hamo kakamba ari embomeni amina mane ojikasora te teho iresora eto embo hamo kakamba ae hamo amo mane hamo kakamba aisora  
\v 19 amita be amo hamo kakamba ari amo tehorate God ta ke pepeni agi aisora avo peni bera  
\v 20 eto ungo God na jage eto umbuna iji te amo ungota ari aita irivujo.   
\p
\v 21 Eto umo embo nei ta pure embo kito mane osaga humbasoa te no tihi jigari na aravora au ingito araha ta pambujo  
\v 22 eto embo ta pure ari embo amo Bada na jage au puvuresuja amo Bada ta tihi ta pundurari embo mane aisuja, eto embo nei ta tihi jigari embo amo embo ta tihi ta embo dombo rate Bada na jage au puvuto Bada ta pure ari embo aisuja  
\v 23 eto ungo tapa amo Bada na ombuto umbuna avoeto ungo embo nei ta toho ke avojo.  
\v 24 Eto nau namei kamei, ungotena God na jage eto humbari iji te amo ari amo do aingere aita iresora.   
\s1 Singa te kakara te ta ke  
\p
\v 25 Eto kakara na do asora amo Bada na na ae ingae rate Bada ta jo ari na na hondate eaguja avo nau hotembari avo ano ingesova.  
\v 26 Eto iji ungotenau te emo iji ngahia be puvija avoeto ungo jimbae iresova amo tehora  
\v 27 te umo mahu jimbari kito amo mane toasoa eto jimbae amo mane jimbasi jombure asoa.  
\v 28 Rate ungo kivujo, ungo singa rete kakara rete ungo jimbasova amita sapura do irae rate jimbuto mihie osaga neite neite kesova avoeto erena.   
\p
\v 29 Eto nau namei kamei, na ke erena amo osaga kiari iji ngahia be puvuto ere hua avoeto ungo akate rate sove sove eto irivujo.  
\v 30 Eto ungo si ereva avo toto osaga ambu sira eto irivujo. Eto ungo tunga javotoho te miheva avo tunga osaga iji avo hotembihe irivujo. Eto ungo donda ombuto humbari embopo avo donda ambu embo jindeto irivujo.  
\v 31 Eto ungo enda embomeni ga pure ereova avo enana ta ari avo kito hamo avojo. Eto ke erena amo enda ta ari irae ere ua avoeto erena.  
\v 32 Eto ungo hotembari neite neite hotembagova uje ae ere ona. Eto embo akate ae amo Bada ta uje avo pere ere ua  
\v 33 te embo ae te amo enda ta ari ae ta uje te Bada ta uje te avo ere ua.  
\v 34 Amo hotembari heriso avo pere ere ua. Eto kakara amo hamo te ahihi te tapa na Bada ta pure avo pere ere ua te evohu ivu te amo enda ta ari daingeto au ivu tunga javotoho aisuja avo pere eaguja.  
\v 35 Eto ke erena emo ungota degi bouka ikasi ue ke ae rate ari javotoho puvuroja erena, amo ari neite neite na ungo mane peika tika eaguja Bada ta uje pere avo ue ihari kambari irova erena.   
\p
\v 36 Eto ke nei amo singa ta kerari kakara iji koso mihima hamo te visi te amita uje amo jimbari uje aisuja amo jimbasuja amo ari sapura iraera  
\v 37 te singa amita hamo ta ujeje toari inono kito amo hotembeto toto mane jimbasuja te teho iresuja ari ainge amo javotoho be ere ua.  
\v 38 Avoeto ke erena emo jimbasuja amo javotoho eto jimbae teho iresuja amo javotoho bera.   
\p
\v 39 Eto ivu vasirite irirou amita ae amo ke peni na pundurari avoeto ivu mane toasuja te ivu pehau embo eha jimbasi uje aisuja amo tehorate embo God kiae embo amiga mane jimbasuja te embo God humota ari embo amiga jimbasuja  
\v 40 te hotembari nau amo God ta Ahihi Otohu na eoi ingagona amo evohu amina jimbae teho doru eto iresuja amo tunga javotoho te iresuja.   
\c 8  
\s1 God sokova ingeni na ari amita degi pene ikagora amita ke  
\p
\v 1 Eto god sokova amita degi indari ikagora amo ungotenanena indorote mane indoro amita ke amo aisona te ungo ke erevi kivujo, eto embo ta degi kiari te osa arite iresuja amo javotoho rate osa ari irae kiari pere amo ‘Na, na,’ aisuja.  
\v 2 Eto embo amina, “Na kiari embo ra,” ainge aisuja te ari tapa amo kiaera,  
\v 3 eto God osa aisuja embo amo God na ere kogua.  
\v 4 Ke avo hotembihe indari god sokova amita degi ikagora amo indorote mane indoro avo ano ingivujo, eto embo na god ingeni na ove eto god ke eagora amo be ambura te God vahai avo mihia  
\v 5 eto enda tapa embomeni enda ta god sokova javo neite neite avo ‘Bada’ ke ijie jakeka eagora, rate god aingeko uhuta eto enda ta iraehera  
\v 6 amo God vahai donda tapa amita Mamo avo ungotenane ke be ahera, eto donda tapa amita degi puvuna amo amita degi iragora. Eto ungotenau Bada Iesu Keriso vahai avo mihia eto donda tapa amo amita degi puvuna avoeto ungotena amita degi vasiri humbagora.  
\v 7 Eto ke erena emo embo neite neite na kiaera te enana na God sokova avo mahu hamo ari avoeto ekalesia ta horari mihera amina indari god sokova amita hande ikari avo indie enana ta jo ta jopapa ue joru eagora.  
\v 8 Eto indari amina au mane God ta degi huresora, avoeto indari avo indesora eto toasora amo sapura rete javotoho amo mane puvuresuja.  
\v 9 Eto ungo God ta ke erevi humbuto sovera ari embopo indari sio indie mihirovo ungo ke be ingito kogo ae avoeto sovera irae embopo amina kito jopapa te tapa indie sapura ta veasora avo ungo be kivujo.  
\v 10 Eto ke erena emo ungo Keriso ta ke ingari embopo avoeto indari sio indagova avoeto ungota embo vahai na god sokova ta bande ta horeto namei kamei ga indari indirou embo eha jo suruha embo amo ari no avo kito “Namote tapa indesona,” ainge eto indesuja amo sapura ta veasuja amo ari no amina au veasuja avoeto be kivujo.  
\v 11 Eto Keriso na umote no namei te tapa humbau amita toho aja pehena  
\v 12 rate no kiari amina ehe no namei sapura ere ua amo no namei pere mane rate Keriso ta degi ari sapura ere oa.  
\v 13 Avoeto nau namei na kito sapura ta veaguja amina do ajirekari avo mane indesona te ajireketo mihima sari aisona.   
\c 9  
\s1 Paul na amita pure ta ke ena  
\p
\v 1 Na embo amuna peikaera. Na Keriso ta apostel ra eto na tihi nau na ungotenau Bada Iesu kia, eto na Bada ta pure eagona amita be amo ungona ere ova.  
\v 2 Eto embo nei na na kiagora amo apostel mane ke eagora te ungo miheva amo nau pure ta hajire ere kogova avoeto ungona na ere kogova amo apostel be ra.  
\v 3 Avoeto na pehumba ere ora embopo ta degi ke mine erena amo ungo avo kiagora erena.  
\v 4 Eto na Bada ta pure ue indari mane indesona ke ainge ererete?  
\v 5 Eto Bada ta eambopo te Peter te enana ta airi humbuto pahue pure ere ora amo dago na ari ainge amo mane ara ke ererete?  
\v 6 Eto Barnabas te namote tapa apostel be eto pure eagora te dagota ingeni vasiri eto pure ta mine umbarote?  
\v 7 Eto ke erena amo erevira, enda ta isoro embo ta koro pure nei irae rate gavana na ikeoi humbagora. Eto pure kovari embo na amita pure ta be avo humbaguja eto o ‘cow’ simba ari embona ‘cow’ ta emi mu avo indaguja.  
\v 8 Eto ke erena amo embo ta ke mane rate God ta ke pepeni kajari aita mihia amita ke avo erena  
\v 9 amo Moses na einge kajari mihia, “Eto o ‘cow’ na ‘wheat’ ve haito jasihirou amo ‘cow’ ta pe mane tigesova te tovujo indie pure ai.” Eto ke be amo God na o ‘cow’ rete embo re avo hotembihe enu?  
\v 10 Ke amo ungotena pure embopo avoembo ena, amo pure enda kovari embo te ve jukari embo te na enana ta pure amo indari pure amo eagora.  
\v 11 Eto ainge dombo dagona ahihi ta pure ue ungota degi donda ve urarako eagora te dagota pure ta mine ombari asari amo mane umbarote?  
\v 12 Eto embo nei nei na ungota degi pure ue mine ere humbuhora amo ungo ke nei do ae rate dago pure mahu ihikari embopo amo mine umbarote mane umbaro? Rate Keriso ta duru javotoho avo deina mane haekasuja avoeto mine humbari ta ke avo hotembeto ae toto beuje te tapa mihahera.  
\v 13 Eto temple ta pure ari embopo na temple jo ai ta pure ue indari humbuto indagora eto indari humbuto pene gaga ta iketo kaheketo humbuto indagora amo ungo kiagovete?  
\v 14 Eto God ta ke hande ari embopo na pure aita ue donda umbara Bada na ke ena.   
\p
\v 15 Eto namote tapa nau pure ta mine umbaehena avo toto mihovona amo ungota jo haperekau avo mane erena te embona nau degi ta donda nei do ikae asora amo na tunga javotoho te mihima peheto mine God ta degi umbasona.  
\v 16 Eto na God ta pure eagona amo uje nau na ae rate God ta uje avo enu pure ereovona avoeto, “Na, na,” mane aisona. Eto Bada na nau degi ta hajire ikaguja avoeto na pure mane toasona.  
\v 17 Eto na uje nau na pure erevi ahena amo mine umbaehena te nanena pure erevi ana ena  
\v 18 avoeto nau pure ta mine amo deire avo ano ingesova, amo erevira. Eto na Keriso ta duru javotoho ungota degi hande eagona amo na mine mane umbagona te ungona hande mine vahai umbava eagona avoeto tunga javotoho ari nau degi ta puvaguja.   
\s1 Paul amo embo tapa ta pure embora  
\p
\v 19 Eto na embo amuta pure ari embo mane rate ke hande ururono ingihe ambo ambo ara embo tapa ta pure embo eagona.  
\v 20 Eto Judea embomeni na ke ingihe ambo ambo ara namote tapa Judea embo eto mihena te na enana ta ke pepeni na pundurae rate enana pundurari embomeni na ke be ingora namote tapa pundurari iragona.  
\v 21 Eto enda nei embomeni Moses ta ke pepeni kiae embopo amina Keriso ta duru javotoho ingihe ambo ambo ara namote tapa Moses ta ke pepeni ingae na enana ga irarako eagona, eto God ta ke pepeni amo na ingae na irarako mane eagona eto Keriso ta ke agi ue iragona.  
\v 22 Eto God humota ue sovera umbae embomeni amiga na mihie sovera umbae uena amo embo nei uhoho na sovera umbara uena, eto embo ta ari tapa neite neite ngangahia tapa avo humbuto nei do hotembae enana ga mihie God ta ke hande uena.  
\v 23 Eto ari ainge eagona amita be amo embomeni na kito Keriso ta duru javotoho avo humbuhuro nanena ari jajavotoho neite neite humbasi eagona.   
\p
\v 24 Eto embo isapamane huhevasora te embo vahai amina dembeto siro kope humbasuja ainge dombo ungote tapa siro kope humbasi hotembeto inono ta huhevevujo  
\v 25 eto embo na sesena asi ue teho mane pambagora te kihi huheveto sovera humbuto ngahia eoi hamo eto sesena be ta pambagora. Eto enda ta siro kope sapura aisuja avo humbasi ue huhevagora te ungotena daroho irari ta siro kope avo humbasi ue pure eagora  
\v 26 eto nanena teho ahe kihira ue ae rate siro kope humbasi ue pure ngahia be na eagona.  
\v 27 Eto na embo nei ta ke hande ari embo rate huhevari ta simba ari embo ungotenau Bada na na kito sovera inono ae avoeto toaute mane toau avoeto hamota sovera ari humbasi huhevari ngahia be na eagona.   
\c 10  
\s1 Israel ta ohihi na sapura ea aingeko avojo  
\p
\v 1 Eto Israel embomeni ta ohihi na Moses ambo ambo ue degi ojagatambuta pahuo johi na ahurekenu pambuto eva ta puvuo eva eveketo kahetika eto degi enu pambua.  
\v 2 Eto enana ainge ea amo Moses ta ambotani ara johi te eva te na bapataito ena.  
\v 3 Eto enana amo uhu i ta indari te umo te avo indie ere pambuhahera.  
\v 4 Eto enana pahuo uhu ita koro peni amina ambo ambo ue pahunu koro aita umo puvuto vovunu kito india, eto koro peni amo Keriso ra.  
\v 5 Eto enana ari avo kito kiaesira uo God na kito tumo eto enana ta hamo avo teto enda ojagatambuta ihajara ena  
\v 6 eto enana ari sasapura ta ere pambuhahera avoeto ari ainge amo ena avoeto ungotenane na ari avo kito mane ara ena.  
\v 7 Eto god sokova ingeni na eto jakeka ere ijiahera ainge dombo ungona avojo, ke amo einge kajari mihia, “Enana arumbeto indari indito ereto god sokova avo jakeka ijie ja ere tivihahera,”  
\v 8 eto tiha paiha ue sesena sasapura avojo. Eto enana ainge uo God na embo tapa 23,000 ainge tenu pepehekea.  
\v 9 Eto ungona Bada God mane undupa aisova te enanana God ta degi undupa eo God na o koso o ikenu veto embo kakambukenu pepehekea.  
\v 10 Eto nei amo ungo evivi javivi avojo enana na evivi javivi uo God na embo tari Anera ikenu veto embo tenu pepehekea.  
\v 11 Eto ari ainge enana ta degi puvuna amo ungotena iji tutumota irari embomeni na kito ari aingeko mane ara kakajekea.  
\v 12 Embo amuna, “Na mane veasona te heteto iresona,” ainge aisuja te embo amina veona umo oenga simba aisuja. Avoeto ungo kogue irivujo.  
\v 13 Eto ari sapura ta engekari do puvuresuja amo nei mane rate embo tapa na kiagora vahai aravora te God na umo mane jeneambuaisuja te no sovera kito heka eto mane au sapura ta gamo na no sovera dembasuja rate God na sapura toto pambari degi siriketo au kesoa.   
\s1 God sokova ta pondo eagora amita ke  
\p
\v 14 Aravorate nau namei kamei, god sokova tapa avo be pe te tovujo.  
\v 15 Eto ungo kiari embopo hotembari embopo amo na ere kogona te ke erevi erena ungo oenga be hotembeto kivujo  
\v 16 eto javotoho ari ta aguhu humbuto God ta degi peketo indagora amo ungotena Iesu Keriso ta orosa amina vahai eagora, eto ‘Bread’ humbuto periketo indagora amo Keriso ta hamo avo indie vahai eagora.  
\v 17 Eto ungotena embo isapamane rate ‘Bread’ vahai avo indie ungotena hamo vahai eagora.  
\v 18 Eto enana Israel embomeni ta ari avo be kivujo. Eto enana na pene gaga ta indari iketo ehako humbuto indie pene gaga ta God amiga vahai ere ora.  
\v 19 Eto ke erena amo ingeni na ove eto god ke eagora amite eto indari god sokova amita degi ikagora amite tapa amo ke be manera  
\v 20 te God kiae embomeni na indari amita degi ikagora amo God be amita degi hande ikae rate ahihi sasapura amita degi ikagora avoeto na ungo ahihi sasapura amiga vahaita eagova ere haekihena.  
\v 21 Amo ungona Bada ta aguhu ta indie ehako ahihi sasapura ta aguhu ta mane indesova eto Bada ta pene gaga ta indie ehako ahihi sasapura ta gaga ta mane indesova.  
\v 22 Eto ungo na Bada ta sovera avo dembari ke ijie Bada undupa ereova ke ijie amo Bada ta aguhu ta indiue Satan ta aguhu ta indiue ainge ere ova amo undupa ta ari ra.   
\s1 Eto embo na amita uje pere mane hotembasuja  
\p
\v 23 Eto embo na ke einge eagora amo, “Na ke pepeni na pundurae avoeto ari tapa asona amo tehora” eto ke ainge amo ke be rate ari nei nei amita degi amo ari javotoho mane puvuresuja.  
\v 24 Eto embo amina amita ari avo pere mane hotembasuja te namei ta ari amite tapa hotembasuja.  
\v 25 Eto ari nei amo einge evujo, ungo ‘Market’ ta o humbasi pambuto kito amo mane eto ingari ke asova te teho umbuvujo amita be amo god sokova ta hande mahu ikari re te ungo segigi aisova.  
\v 26 Eto enda te enda ta donda tapa amo ungotenanena jigama ara Bada na ikena.  
\v 27 Eto embo nei God kiae na amita bande ta indova oru au pambuto amo ke nei do mane hotembasova te teho indivujo  
\v 28 eto embo nei na kito segigi ue, “O amo mahu god sokova ta hande ikari ra,” ainge au ingito amo harikasuja embo amita jo avo orekihie mane indesova.  
\v 29 Eto ungona indesova amo ungota jo ta osaga mane kesova te embo amita jo avo orekihie mane indesova  
\v 30 rate ungona ke einge hotembihevete ova “Na ke pepeni na pundurae embo rate doeto na embo nei ta jo kito orekihie mane indono? Eto na indari heva nau ta humbuto God peketo indagonate do avoembo embo na na pehumba aro?” ke ainge avo toto  
\v 31 indie gagihe embo nei na ungo kogue God osa ue jakeka ara evujo  
\v 32 eto Judea embo rete Greek emborete God ta ekalesia embo vahai amina ari no avo kito sapura ta veasuja avoeto ungona simba evujo.  
\v 33 Eto na ari nau amo meni isapa sira eto ururono embo nei na ari nau avo kito God ke be ijiroro God na kito oreketo umbaja eagona.   
\c 11  
\p
\v 1 Eto Keriso amo nau ahe kihira avoeto ambo ambo eagona ainge dombo na ungota ahe kihira avoeto na ambo ambo evujo.   
\s1 Eto ekalesia evohu na siro pohuketo Bada ta bande ta horasora  
\p
\v 2 Eto na ungo ahe poekihone kogueva avo inono ta ambo ambo eagova avoeto na ungo osa ere ona te  
\v 3 na ke erevi amo ungo be ingova uje ere ona amo Keriso amo embo ta siro avoeto amita kihi humbari embo ra. Eto evohu ta siro amo embo, eto Keriso ta siro amo God.  
\v 4 Eto embo na God ta degi pari asi rete God ta ke hande asi ue amo siro pohuketo aisuja amo amita siro embo Keriso avo Otohu ae ue aisuja.  
\v 5 Eto evohu na pari asi rete God ta ke hande asi ue amo siro pohukae teho aisuja amo amita siro embo avo otohu ae ue aisuja amo siro ohiketo pomaki eoi arako ereua  
\v 6 eto evohu na siro pohukari uje ae au kito amo evujo siro ohikau pomaki ai. Eto evohu amo ari ainge eto me kiari uje ae au kito amo ejo amita siro avo pohukai.  
\v 7 Eto embo amo God ta kiari vahai eto God ta sago kiari vahai aravora avoeto embo ta siro amo mane pohukasuja te evohu amo embota tombu vahai eto sago kiari vahai aravora.  
\v 8 Eto ke be amo God na embo evohu ta tembure na ae rate evohu avo embo ta tembure na ena.  
\v 9 Eto God na embo amo evohu avoembo ae rate evohu amo embo avoembo ena.  
\v 10 Avoeto ke erena amo embo amo evohu ta tihi jigari embo avoeto God ta Anera na ari avo kiagora evohu na siro pohukasuja.  
\v 11 Eto Bada ta tihi ta embo oenga evohu oenga ara God na ikae rate embote evohu te hondate mine ara, ara God na ikena,  
\v 12 eto evohu amo embota jota puvuna te evohu ta jota embo puvagora. Eto embote evohu te amo God ta degi ta eto puvagora.  
\v 13 Eto ungo oenga siriketo kivujo, evohu na siro pohukari irae God ta degi pari aisuja amo tehorete?  
\v 14-15 Eto ungotena ere kogora amo God na evohu ta siro hu koso ikena amo evohu ta siro pohukaja ikena avoeto ungotenanena evohu ta siro koso vahai avo kogue osa eagora te embo ta siro hu koso vahai kiagora amo me eaguja, avoeto ungo be hotembevujo.  
\v 16 Eto ungo embomeni nei nei na ke erevi eheketo kito uje ae asova te dago te eto God ta ekalesia te na dagota ari erevi amo uje eagora.   
\s1 Bada ta pondo  
\r (Matthew 26:26-29; Mark 14:22-25; Luke 22:14-20)  
\p
\v 17 Eto ke nei ano ingivujo, ungota ari nei vahai avo na kogue osa mane asona.  
\v 18 Eto ungo ekalesia ta horukari ta amo ari javotoho mane puvaguja eto na ijiore ingagona amo ungo ekalesia ta horukari ta amo kaheketo oenga ira ue boru jumbagova ke avo ehere ingena amo na ere hotembihena amo ke be ra.  
\v 19 Eto ungota embo nei uhoho amo degi javotoho ta pahora amo God na kito osa ere ua amo ungo embo ere kahekiheva amina kiagova ere ora.  
\v 20-21 Eto ke erena amo Bada ta Pondo horukari ta amo embo nei na indari egimbeto humbuto indaguja eto embo nei amo indari indae beuje na pehaguja eto embo nei amo umo indito tihivi eaguja ari ainge amo Bada ta Pondo manera  
\v 22 eto ungo beuje ururou indari te umo te indesova ungota bande amo iraerete? Eto ungona God ta ekalesia amo otohu manera ainge ijie donda ambu embopo na kiagora ari amo ere ovete? Eto ungota ari avo nanena kito jakeka ana ere ovete? Na ainge mane aisona te  
\v 23 na Bada ta degi humbuto ungota degi ahe poekihena ke amo erevira. Embo Judas na Bada Iesu isoro embo na umbara harikena amita mume amina  
\v 24 Bada Iesu na ‘Bread’ humbuto God peketo ingeketo ambotani ta ikihe ke einge ena, “Hamo nau erevi humbuto indavu, amo ungoembo ere ikihena, ungo erevi ue na hotembu hotembu evujo,” ainge enu indio irae enu  
\v 25 Iesu na aguhu humbuto enana ta degi ikihe ke einge ena, “Aguhu emo ke ikari eha ta orosa erevi humbuto indie na hotembu hotembu evujo,” ke ainge amo Bada na ena  
\v 26 avoeto eha oroho eto pambuto Bada ehako puvuresuja iji amita jota amo ‘Bread’ te aguhu te avo indie ungona Bada ta pehari avo hotembu hotembu ue ke be ereva.  
\v 27 Eto embo amuna amita jo sirikae rate Bada ta ‘Bread’ te aguhu te sio indesuja amo Bada ta hamo te orosa te amita degi urumbarako ere ua.  
\v 28 Eto embo amuna ‘Bread’ te aguhu te avo indesi ue amo amita jo avo siriketo indesuja te  
\v 29 embo amuna Bada ta hamo te orosa te avo hotembae ue sio humbuto indesuja amo God ta pehumba embo amita hamo ta puvuresuja.  
\v 30 Avoeto ungota degi embo ta ambure neite neite eto sovera ambu embopo eto embo nei pepehekagora.  
\v 31 Eto ungotenau ari sirikaehera amo God ta hana kiari ungotenanena mane kiaehera.  
\v 32 Eto Bada na ungotenau ari sapura ta hajire osaga iji isapa ikeoi kiagora amo enda embomeni na hana kiari peni vahai kesora avoeto tiumbeto pambara hana kiari isapa ikeoi kiagora.   
\p
\v 33 Avoeto nau namei kamei ungo Bada ta pondo indesi vahaita eto ungo oenga ohare mamare evujo.  
\v 34 Eto God na pehumba aisuja avo hotembeto embo amuna beuje ururou kito amo amita bande ta indesuja. Eto ke nei nei amo na ungota degi pambuto ano ingesova.   
\c 12  
\s1 Ahihi Otohu na sovera ari hande ikaguja  
\p
\v 1 Eto nau namei kamei, eto hande neite neite Ahihi Otohu na ikaguja amita ke be avo ungo na be kiagova uje ere ona.  
\v 2 Eto ungo God kiae irari iji te amo ungona god sokova ingeni na ove ari avo ke be ijie amita ambota ere pambuhaheva  
\v 3 avoeto ungo kogova amo embo amuna Iesu ta javo urumbasuja amo God ta Ahihi ta ke ingae embora eto embo na, “Iesu amo Bada God,” ke teho mane aisuja te God ta Ahihi Otohu na ijirou ingihe aisuja.  
\v 4 Eto God ta Ahihi Otohu amo vahai amina sovera ari neite neite hande ikerekeuja  
\v 5 eto Bada ta ke agi ue pure neite neite eagora te Bada amo vahai  
\v 6 rate God vahai amina embomeni ta jo ta pure uoi hajire oenga oenga kiagora.  
\v 7 Eto Ahihi Otohu na embo vahai vahai amita jota pure eaguja amo embo vahai vahai avoembo ae rate embo tapa avoembo eaguja  
\v 8 amita ari amo erevira, Ahihi Otohu na embo vahai ta sovera ari ikeoi humbuto God ta ke harikeoi kiagora eto embo nei amita degi sovera ari ikeoi embomeni ahe poekaguja  
\v 9 eto embo nei amita sovera ari ikeoi God humota eaguja eto embo nei ta sovera ari ikeoi humbuto embo kojaguja  
\v 10 eto embo nei ta sovera ari ikeoi humbuto ari tikambari neite neite uoi embomeni na kogue kore eagora eto nei amo oje kahaguja eto nei amina sovera ari ikeoi humbuto ahihi berete sokova re amo harikeoi embomeni na kiagora eto embo nei amo enda nei embomeni ta ke na ke hande eoi ingiora eto embo nei na enda nei embomeni ta ke ingito jandireketo hande eoi ingiora.  
\v 11 Eto sovera ari tapa erena erevi amo Ahihi Otohu vahai amina siriketo embo vahai vahai amita degi amita uje na hande ikaguja.   
\s1 Hamo ta timu hatirari ke  
\p
\v 12 Eto ungotena embo ta hamo amo hatu singi neite neite amina ari rate hamo amo vahaira. Eto ainge dombo ungotena embo isapamane amo Keriso ta hamo vahai amo erevira.  
\v 13 Ungotena Judea rete enda nei rete ke agi ari embo rete ke ikari embo rete tapa amo Ahihi vahai amina bapataito ehei Keriso ta jo ta horeto Ahihi Otohu vahai humbuto hamo vahai ere ora.  
\v 14 Eto hamo ta hatu singi vahai avo peni ke mane aisora amo erevira  
\v 15 eto utu na ke einge mane eaguja, “Na ingeni mane avoeto na hamo ta hatu singi manera,” eto ke ainge ijie hamo toto oenga mane pambasuja  
\v 16 eto oje na, “Na tihi mane avoeto na hamo ta hatu singi manera,” ainge aisuja te oenga irari inono aera.  
\v 17 Eto no hamo amo tihi vahai iresuja amina daingeto asavi ingo? Eto no hamo amo oje vahai iresuja avoeto daingeto donda ta mune, mune hembao?  
\v 18 Eto hamo ta hatu singi amo God na enana ta degi ta ikerekena avoeto pure ungota avo eaguja.  
\v 19 Eto ingeni isapamane na hamo aehija amo embo ta hamo be mane aehija  
\v 20 te hamo vahai amo hatu singi hajire neite neite amina hamo vahai ari  
\v 21 avoeto tihi na ingeni ta degi, “Na inono avoeto umo toto pambu,” ke ainge mane aisuja eto siro na utu ta degi, “Na inono avoeto umo toto pambu,” ke ainge mane aisuja  
\v 22 eto nei amo hamo ta donda ivo ambupu amina hamo ta pure peni be eaguja  
\v 23-24 eto hamo ta me kiari donda amo otohu ke ijie bo na ahurekagora eto ari ainge amina donda nei aingeko mane avoeto simba javotoho eagora. Eto God na hamo ta hatu singi vahaita siriketo iketo hatu singi nei nei pepeni mane avo simba javotoho ara ena.  
\v 25 Eto hamo ta hatu singi na jujune ke mane aisora te tapa inono inono ke ijie hondate mine ara ue iresora.  
\v 26 Eto donda vahai amina memenga kesuja amo hatu singi tapa amiga memenga kesora eto donda vahai avo osa ue peni ke ijiroro amo donda nei nei amina kito osa aisora.  
\v 27 Eto ungo amo Keriso ta hamo eto ungo embo vahai vahai amo hamo ta hatu singi neite neite aingeko  
\v 28 amina ekalesia ta pure neite neite ere ovova. Kihi amo God na apostero siriketo umbuna eto amita engihita amo peroveta ikena eto amita engihita amo ahe poekari embopo umbuna eto nei amo ari tikambari ta ari neite neite aisora amita pure ikena eto nei amo embo kojara pure ikena eto nei amo embo hondate ari ta pure ikena eto nei amo embo tihi jigora pure ikena eto nei amita degi ke neite neite amita kiari ikena.  
\v 29 Avoeto embo tapa amo apostero mane, peroveta mane, eto ahe poekari embopo manera. Eto enana tapa na ari tikambari rete o kore ari ta ari neite neite mane eagora  
\v 30 ambure embo mane kojagora enda nei ta ke na ke mane eagora eto ke mane jandirekagora.   
\s1 Osa ari ta ke  
\p
\v 31 Rate Ahihi Otohu ta sovera ari dombo be avo humbasi uje jo tapa na ikihe evujo. Eto ari vahai dombo be erevi ano ingivujo.   
\c 13  
\p
\v 1 Eto na ke ake embo be eto enda ta ke neite neite amite Anera ta ke te na ke hande ue embomeni osa ae ehena amo ajani teagora eto ji kevi ta teagora eto asavi pere eaguja aingeko ahena.  
\v 2 Eto na oje kahari ta sovera Ahihi Otohu ta degi umbaehena amo ke araha arahata eto ma ta ojikari te tapa embota degi oje kahaehena eto God humota peni vahai ue tiri ta degi ke amo degi nei ta kikiseto pambaehija te nau degita embo osa ari irae amo ari tapa ainge amo be ambu huti pere ahena.  
\v 3 Eto nau donda tapa humbuto vahai vahai donda ambu embo ta degi hande ikihe nau hamo te tapa ji ta ikano evekaja ikaehena te nau degita osa ari embota degi ae amo nau degita ari javotoho nei do mane puvuraehija.  
\v 4 Eto osa ari embo be amita ari amo eingera, iji koso embo simba eaguja, embo kito jo eaguja, embo nei ta donda kogue tumo mane eaguja, “Na, na,” ijie sarika mane eaguja, viso toro mane eaguja.  
\v 5 Namei otohu ae ke sapura mane eaguja, umo oenga mane hotembaguja, tumo sisire sausau mane eaguja, embo nei ta ari sasapura mane hotembaguja,  
\v 6 embo nei ta ari sapura kito tunga javotoho mane eaguja te ari javotoho be mo davore kito osa eaguja.  
\v 7 Eto osa ari embo na embo orekihe humota ue ari javotoho ambota puvuresuja ke ainge ijie mane toaguja te ngahia eto iraguja.  
\v 8 Eto osa ari amo eho mane irae aisuja te daroho iresuja. Eto embo ta oje kahari ke amo mihia rate irae aisi ere ua, eto ke neite neite kiari amo irae aisi ere ua, eto embo ta kiari isapamane amite tapa irae aisi ere ua.  
\v 9 Amita be amo ungotenau kiari te oje kahari te Ahihi Otohu ta degi humbagora te amo aemana umbae rate ambota  
\v 10 iji be avo inono ta puvuresuja kito amo ungotenane ke avo aemana kesora amo eingera.  
\v 11 Eto na meni isapa irari ijite nau ke te tunga te hotembari te amo meni isapa ta ari avo uena te na pajito embo ehena amo meni isapa ta ari amo mahu egikarira  
\v 12 eto ambota do puvuresuja amo umo jo ta aririvo kiarako ere ora te ambota iji be puvuresuja amo ungote tombu mine kia aisora. Eto na eha emo ke aemana kiae ra te ambota iji be puvuresuja amo God na nau jo ta do tapa ere kogua ainge dombo kiari nau amo inono au tapa aemana kiae ra te ambota iji be puvuresuja amo God na nau jo ta do tapa ere kogua ainge dombo kiari nau amo inono au tapa aemana kesona.   
\p
\v 13 Eto ari tapa nei heriso nei vahai amo eho mane irae aisora te iresora, amo humota ari te ambota ari javotoho do puvuroja simba ari te osa ari te amo eho mane irae aisora. Eto donda nei heriso nei vahai rate dombo be amo osa arira.   
\c 14  
\s1 Ahihi Otohu na hande ikaguja amita ke  
\p
\v 1 Eto donda tapa amita hamo ta amo embo osa ari avo aisi uje ue Ahihi Otohu ta sovera ari neite neite hande ikaguja avo humbasi uje evujo. Eto dombo be amo sovera ari humbuto God ta ke na embomeni oje kahasi uje evujo.  
\v 2 Eto ivivi ta ke hajire Ahihi Otohu na embo ta degi hande ikaguja avo embo na humbuto ke aisuja te ke ainge amo embo ta degi ae rate God ta degi aisuja, amita be amo embo amuna ingae rate God na vahai ingaguja. Eto ke ainge amo Ahihi Otohu ta sovera na ahihi ta ke ojikari avo eagora.  
\v 3 Rate embo na God ta ke na embo oje kahasuja amo embo na arahata ingito sovera ari humbuto tunga javotoho ue iresuja.  
\v 4 Eto embo na Ahihi Otohu ta hondate ari na ivivi nei na ke eaguja amo umo oenga sovera ari humbaguja, eto oje kahasuja embo amina ekalesia tapa ta degi sovera ari ikaguja.  
\v 5 Eto ungo tapa ivivi ta ke hajire nei Ahihi Otohu ta degi umbava uje ere ona te dombo be amo embo oje kahevujo. Eto ivivi nei na asoa amo isapa rate oje kahari ke asoa amo peni be avoeto ke ai ta amo ekalesia na sovera humbari haitera. Eto ivivi nei na ke aisuja embo amina ke avo jandireketo au embomeni ingito sovera ari humbasora.  
\v 6 Eto nau namei kamei ungo ke erevi be hotembevujo. Eto na Ahihi Otohu ta degi ivivi ta ke nei humbari embo avoeto ungota degi pambuto kiari eha ae ingae eto ahe poekae eto oje kahae avoeto ivivi ta ke nei na asona amo ungo ke be mane ingesova avoeto ungota degi ari javotoho mane puvuresuja.  
\v 7 Amo erevira, eto embo na isepuri kambuhe tunga neite neite eagora te tunga vahai kambasora amo ingari sapurara.  
\v 8 Eto embona huin javotoho husae aisuja amo embona ingito isoro arote toaro avoeto mana mana aisora.  
\v 9 Eto ainge dombo ungota ke embo tapa na ingari haiteko mane avo aisova amo pisara ainge embo ta ku ta pambasuja.  
\v 10 Eto enda embomeni ta ke neite neite mihia amo enana tapa amita ke amo be ambu iraera  
\v 11 eto na enda nei amita ke ingae aisona amita be amo na enda nei amo enda nei avoeto  
\v 12 eto aingeko amo ungo na ere ovova avoeto ungo Ahihi Otohu ta degi sovera ari hande eto humbasi eto kito ari deina ekalesia embomeni tapa hondate aisuja avo uje eto umbuvujo.   
\p
\v 13 Eto ari erena avoembo ivivi nei na ke aisuja embo amina ke avo jandireketo au ingora kiari humbasi pari aisuja.  
\v 14 Eto na pari ijie ivivi ta ke hajire nei na eagona amo nau ahihi na pari eaguja te hotembari nau amo be ambu eto iraguja.  
\v 15 Avoeto na do ano? Javotoho amo na ahihi na pari ue hotembari te tapa na pari aisona. Eto haveni aisona amo Ahihi na pere ae rate hotembari te tapa na aisona.  
\v 16 Eto nei amo ungo Ahihi na God jakeka ijirovo embo nei ungota ari kiae embo amina puvuto ungota osa ari avo ingito ari avo mahu kiae avoeto ke be mane aisuja.  
\v 17 Eto ke be amo ungo na God osa ue ereva te embo nei na ingito javotoho mane kesuja.  
\v 18 Eto Ahihi Otohu na nau degi ta ivivi ta ke hande ikena amo ungo na aheva aingeko mane, kaiketo jigama eagona avoeto God osa ere ona te  
\v 19 na ekalesia embomeni ta degi ke ivivi nei na ke isapamane aisona amo enana na mane ingito kogo aisora te ke heriso avo ke be na pere aisona amo ingari javotoho puvuresuja.   
\p
\v 20 Eto nau namei kamei, ungo meni isasaraho ta hotembari avo avojo te ari jajavotoho na embo ta ari evujo. Rate meni isasaraho ta ari nei javotoho eagora ainge avo humbaeheva amo enana na ari sasapura isapamane kiagora.  
\v 21 Eto God ta ke mahu kajari aita amo einge mihia, “Eto na enda nei embomeni ta ke avo ivivi hajire nei na nau enda embomeni emita degi ke hande aisona amo ingito ingarako aisora, ke ainge Bada God na eria,” ke ainge kajari mihia.  
\v 22 Avoeto ungo kogova amo ivivi hajire ingari nei amo God na God ke be ari embopo avoembo ikae rate God ke be ae embopo avo be kiagora ikena te oje kahari ke be amo God ke be ari embopo na sovera ari umbara ikena  
\v 23 avoeto ari avo kiae embopo eto God ke be ae embopo amina ungo vahaita horukagova degi ai ta horeto ungo tapa ivivi hajire neite neite na ke ijirovo ingito ungo kava ue ereva ke ainge aisuja  
\v 24 te ungona ke be na oje kahihe mihirovo amo embo amina ungota ke ingihe ari amita amo do aingekore avo eto God ta embomeni ta ke ingito  
\v 25 amita hotembari jo ta ojikari avo be ingito me kogue veto gombuto God jakeka ijie God amo ungota degi mihia ke ainge aisuja.   
\s1 Ekalesia horuketo simba ari amita ke  
\p
\v 26 Avoeto nau namei kamei, ungote ke tutumota mo do aro? Eto ungo vahaita horuketo amo ke deina embo tapa hondate eto avo ingoro avo ungo ke siriketo nununga evujo eto haveni rete ahe poekari ke rete oje kahari ke God na ikari humbari rete ivivi nei na ke hande eto ehako jandireketo ari ingari amite avo tapa nununga evujo.  
\v 27 Eto embo isapamane na ivivi ta ke amo mane aisora te embo heriso nei vahai amina ereto eue arumbihiroro ke jandirekari embo na ereto aro ingesora.  
\v 28 Eto ke amita jandirekari embo irae kito amo embo tapa ta degi ke amo mane aisuja te God ta degi aisuja.  
\v 29 Eto oje kahasora embopo tapa nei heriso rete nei heriso nei vahai ainge amina ke hande eue arumbihiroro embomeni na ingito kogo ara erena.  
\v 30 Eto ke hande ururou embo vahai amo arumbeto mihie ke ingihirou God ta degi hotembari amita degi puvurou ingihirou embo heteto ke eria avo toto arumbau embo amina ereto ke au ingesora.  
\v 31 Amita be amo oje kahari embopo tapa rate embo vahai vahai na ke hande ururoro embo tapa na ke eha avo ingihe sovera ari humbasora.  
\v 32 Eto oje kahari embo na ke sio mane eaguja te ahihi amita avo simba ue ke eaguja  
\v 33 eto God amo ke sio sao ijie o a ari ta God mane rate peka ta eto ari inono ta ari amita God ra. Eto God ta ekalesia embo ototohu amita horukari aita  
\v 34 amo evohu na ke mane aisora te jamopo eto iresora. Eto evohu ta ke ari aravora ae avoeto God ta ke kajari ta amo enana na do ara kajari mihia avo ara erena  
\v 35 eto enana ta eto ingari ke puvurou kito amo ungota bande ai ta ipone na ke be amo harikaro kesora. Eto erena amo ekalesia horuketo mihiroro evohu na ereto ke aisora amo aravora ae ra.   
\p
\v 36 Eto God ta ke amo ungo Corinth embomeni ta degi ta eto puvurari ke mane hotembasova eto nei God ta ke amo ungo oenga umbae  
\v 37 avoeto embo amuna na God ta hande humbari embo avoeto oje kahari embora ainge aisuja embo amina ke ere kajihena amo God na ungo ambo ambo ava ikihoi ere kajihena avo eto kesuja  
\v 38 avoeto ke erevi ke be ae aisuja embo ta ke avo ingovojo.  
\v 39 Avoeto nau namei kamei, sovera ari God ta degi hande eto humbuto embo oje kahasi uje evujo rate embomeni na ivivi ta ke hajire nei Ahihi Otohu ta degi hande eto humbagora avo mane haekasova te  
\v 40 ari tapa amo inono ta evujo.   
\c 15  
\s1 Keriso vasiri te erari amita ke  
\p
\v 1 Eto nau namei kamei, na duru javotoho ungota degi hande uena avo ungona hotembava ere kajihena, avo ungo na humbuto jigito miheva  
\v 2 eto duru javotoho ungota degi hande uena avo ungona ke be ijie mihirovo amina ungo orekasuja te ke avo ungona ke be ae aisova amo amina ungo mane orekasuja.  
\v 3 Eto na ungota degi ke hande uena amita jota ke peni amo ungotenau ari sasapura avoembo Keriso pehena amo God ta ke kajari avo enu inono ena  
\v 4 eto pehenu koveo iji heriso nei vahai irae enu God na jiginu vasiri te erena amo God ta ke kajari amiga inono ena  
\v 5 eto vasiri te ereto Peter ta degi kihi puvunu kina eto ambota amo apostel tapa ta degi puvunu kia  
\v 6 eto amita ambota amo ekalesia tapa 500 amita degi puvunu kia rate embomeni amo eha oroho emo mihera te nei uhoho amo pepehekehera.  
\v 7 Eto amita ambota amo James ta degi puvunu kina eto ambota amo apostel tapa na ehako kia  
\v 8 eto ambo be ta amo nau degi ta puvunu kia, amo nau aja na na iji nei te ingarako ena avo na ere kogona  
\v 9 avoeto apostel tapa amita ambo be ta amo namora avoeto na embo peni manera. Eto na God ta ekalesia ta degi osaga memenga ere ikihahena avoeto eha emo na apostel ere ona te me kogue mihena.  
\v 10 Rate na God ta hondate ari na pure erevi ere ona amo na ere kogona eto God ta hondate ari nau degita ikaguja amita be isapamane puvuto ere hua te apostel isapamane avo nane dembeto pure peni vahai ere ona rate amo sovera nau na ae rate God ta hondate ari na ere ona.  
\v 11 Eto dombo be amo namorete apostel nei nei rete amina God ta duru javotoho ungota degi hande ehere ingito ke be ereva.   
\s1 Ungotena peheto vasiri te erasora  
\p
\v 12 Eto dagona Keriso avo pehari ta eto erehija amita ke avo hande eragora te do eto ungo nei uhoho na embo pehari amo mane vasiri te ehako ere ora ke ereve?  
\v 13 Eto embo pehari vasiri te mane ereora avo ke be kito Keriso te tapa vasiri te mane eraehija  
\v 14 eto Keriso na vasiri te erae toaehija kito ke tapa hande ere ora erevi amo ke be mane eto ari do humota eagora amo tapa be ambu aehija.  
\v 15 Eto God na embo pehari mane jigou eraehija amo dagona Keriso vasiri te erari ke hande ue God ta ke avo sokova na ahera.  
\v 16 Eto erena emo ungo kogova amo embo pehari vasiri te erae ahera kito Keriso ta tapa vasiri te mane eraehija.  
\v 17 Eto Keriso vasiri te mane eraehija amo ungota humota tapa eagova aita hondate mane humbaeheva eto ainge dombo ungota sasapura ga tapa iraeheva.  
\v 18 Eto ainge dombo embo mamahu Keriso ta javota pepehekea amo pepeheketo pambuo irae ena.  
\v 19 Eto ungotenanena Keriso pere humota ere umakara peheto irae asora kito enda embomeni tapa ta tihita ungotena amo mu indoro aemo ta veasuja embomeni ra.  
\v 20 Aravorate ke be amo Keriso jiginu vasiri te erena amo ungotena vasiri te erasora avo amina kihi ahe kihira ena.  
\v 21 Eto embo vahai amita degi ta eto pehari avo embo tapa ta degi puvuna eto embo nei amita degi puvuna eto embo nei amita degi ta eto vasiri te erari avo embo tapa ta degi puvuto iraguja.  
\v 22 Amo Adam avo pehari ta puvuna te Keriso na ena avoembo embomeni vasiri te erasora.  
\v 23 Amo iji hekeri ta erasora, kihi amo Keriso na erena amita ambota amo Keriso puvuresuja eto ungotena Keriso ta jeka hoka amina iji amikote eresora.  
\v 24 Eto amita ambota iji ke kahari puvurou Keriso na enda ta tihi jigirikari embo pepeni te sovera neite neite tapa avo tau vovurou jeka hoka tapa amita avo humbuto God Mamo ta ingeni ta ikau humbuto amina tapa tihi jigesuja  
\v 25 rate Keriso amo embo dombo ue amita kitoho tapa tau karaun eto veto amita utu singi ta iresora  
\v 26 eto amita tutumo be ta amo pehari te tapa tau irae aisora.  
\v 27 Amita ke kajari amo, “Amina donda tapa amita utu hu ta ikau iriroro tihi jigesuja,” ke ainge avo kajari mihia te God vahai avo mane utu huta iresuja te  
\v 28 God na donda tapa humbuto Keriso ta hu ta ikau iriroro Keriso na uje amita na God ta huta irirou God vahai amina tapa be tapa amita hamota heteto irirou donda tapa amo amita jota iresuja.  
\v 29 Eto nei amo eto embomeni mahu pepehekari na vasiri te mane erasora kito do embo enana na hondate eto enana ta javota bapataito amo eagore?   
\p
\v 30 Eto dago vasiri te erae asora kito do embo Keriso ambo ambo ue hamo ta memesi kamesi kaiketo kiore?  
\v 31 Eto ungo nau ekalesia vahai embomeni na na kiagova amo ungotenau Bada Iesu Keriso ta pure eagona amo pehari nau amo hombekari be iraguja.  
\v 32 Eto na embo nei nei ainge da Ephesus eita mihie isoro o ga isoro ere uaehena te na peheto vasiri te erae asona kito amita he ta ari javotoho nei do mane huresuja te na evito peheto vasiri te ehako erae ahena kito eha emo pondo kando ue indie gagihe ere uma pehaetena.  
\v 33 Rate ungo ke aravo be hotembavojo. Eto ungo umoro kamoro sasapura ta aisova kito amina ungo tihi teto humbau sasapura ta veasova.  
\v 34 Avoeto ungota siro avo embo ta siro ainge jigama ue ari sasapura tovujo. Eto emore ungo me kiagova erena ungo nei uhoho amo God be kiae eagova.   
\s1 Ungotenau hamo eha amita ke  
\p
\v 35 Eto embo nei na einge aisora, “Daingeto embo pehari na vasiri te eraro? Eto hamo do ihe na egerembeto puvuroro?”  
\v 36 eto ungo kiae kiae ue ke emo eagovete? Eto ve kovasoa amo iji vahai amina mane erau kesoa te kihi peheto ambota erasuja.  
\v 37 Eto ve kovagora vahai avo mane kahumbagora te ‘Rice’ retemo ve nei amina eketo pajioi kahumbagora.  
\v 38 Eto ve amita hamo ta hajire do aingere amo God na uje amita na hajire ikaguja eto ve oenga oenga amita hamo oenga oenga ra.  
\v 39 Eto o visi amo hajire oenga oengara embo ta visi oenga o ta visi oenga eto di visi umo o visi te tapa amo hajire oenga oengara.  
\v 40 Eto nei amo hamo nei uhu ita mihera eto hamo nei enda ta mihera, eto hamo uhu ita iraguja amita sago kiari nei, eto enda ta hamo amo sago kiari nei ra.  
\v 41 Eto iji ta sago kiari nei hariga ta sago kiari nei eto kuro amo nei ra. Eto kuro kuro nei nei amita sago kiari amo oenga oenga ra.  
\v 42 Eto ke erena amo ungotena peheto vasiri te erasora amo aingeko dombo aisuja amo ungotenau hamo amo kovaro sari au hamo eha sari ari haite mane amina vasirite erasuja.  
\v 43 Eto hamo kovagora amo kimu masa aisuja te eha erasuja amo sago kiari donda ra. Eto kovagora amo ivo irae rate hamo sovera te amo erasuja. Eto kovagora amo enda donda rate vasiri te erasuja amo uhu i ta donda aisuja.  
\v 44 Eto enda ta hamo mihia avoeto amita aririvo amo uhu ta hamo amite tapa mihia  
\v 45 eto amita ke amo einge kajari mihia, “Eto embo kihi javo Adam amo vasiri te mihahija,” ke ainge mihia te Adam nei puvuna amo Keriso ra eto amo uhu ta vasiri eha humbuto puvuto ahihi ta vasiri ikari embora  
\v 46 rate uhu ta irari ahihi amo kihi mane rate enda ta irari amo kihi eto uhu ta irari amo ambotara.  
\v 47 Eto embo kihi puvuna amo enda embo rate ambota puvuna amo uhu i ta eto puvuna.  
\v 48 Eto enda ta iragora embomeni amo embo kihi Adam ta hajire vahai rate uhu i ta iresora embomeni amo uhu embo Keriso amita kiari hajire vahai aravora.  
\v 49 Eto ungote embo enda na ari amita tombu hajire vahai ue mihovora te ungote uhu i ta eto puvuna Embo amita kiari vahai ainge eto iresora.   
\p
\v 50 Eto nau namei kamei, na ke erena amo ungotenau hamo visi te orosa te amina God ta tihi jigari degi uhu ita horari haite mane ra amo sari ari donda avoeto daroho irari degi ta mane iresuja.  
\v 51 Avoeto na ke vahai oroho te mane ojikari avo ano ingivujo amo ungotena tapa mane pehasora te ungotena tapa saiveto sariketo hamo eha humbasora.  
\v 52 Amo iji ke kahari puvurou huin savari husihirou ungotenau sari ari hamo amo sariketo hamo nei daroho irari ta hamo aisuja, eto embomeni peheto mihera tapa amina vasiri te ereto daroho iresora.  
\v 53 Eto erena amo ungotenau hamo ta sari ari donda avo hoharo irae au daroho irari donda avo asukasora amo ehako mane pehasuja.  
\v 54 Eto ungotenau peheto sari ari hamo amo irae au daroho irari hamo avo irirou God ta ke einge kajari amita be puvurou kesora amo, “Embo ta pehari amita degi isoro eto dembehei irae ehija.  
\v 55 Avoeto pehari ta ivo ari amo davore? Amo embo ehako tari inono aera,” ke ainge kajari mihia.  
\v 56 Eto ari sasapura amina eoi embomeni ta ahihi pehagora amo God ta ke pepeni Moses ta degi ikena aita ivo ari humbuto embo ta ahihi teoi pepehekagora.  
\v 57 Eto ungotenau Bada Iesu Keriso peheto vasiri te erihe pehari ta degi isoro eto dembena avoeto God na Iesu ta ari amina ungotena pehari toto dembari embomeni ere ora avoeto ungote God osa ue jakeka are.   
\p
\v 58 Avoeto nau namei kamei, Bada ta pure erevi mane toasova te tuneketo heteto turieto pure erevi ue irivujo. Eto ungo kogova amo Bada ta pure aisova amo be ambu mane aisuja te ari javotoho ungota degi puvuresuja.   
\c 16  
\s1 Ekalesia ta hande ikasora amita ke  
\p
\v 1 Eto ungota koro siriketo humbuto God ta embomeni ta degi hande ikasova amita ke aisona. Eto enda Galatia ta ekalesia na do ara ijiena ainge dombo ungona evujo, amo  
\v 2 ungo ekalesia vahai vahai na ungo koro doinge hande ikari haite avo giu ari iji hekeri ta kaheketo oenga ikavo irirou na pambuto avo umbasona te iji amikote avo ungona mane sirikihirovo iresona.  
\v 3 Eto na ungota degi pambuto ungota embopo nei uhoho amo ungona siriketo humbasova amita embo amunure avo ahari ta harikasi kaeto ikihe koro ikano humbuto da Jerusalem ta pambuto ekalesia ai ta mihera amita degi hande ikasora.  
\v 4 Eto amo javotoho eto na pambasona kito namoga da Jerusalem ta pambasora.   
\s1 Paul na do asi sirikena  
\p
\v 5 Eto na enda Macedonia ta pure mane aisona te pesina ungota degi pambuto  
\v 6 ungota degi iji isapa porere mihie umoro aisora amo aita jajemo iji anote aisona amo na ungo toto degi dainge pambasona amo ungona embere avo pambasi uje ere ona.  
\v 7 Eto ungo kogova amo Bada na uje aisuja kito na ungota degi iji tuhaupa mane rate iji isapa porereko mihie umoro aisi uje ere ona,  
\v 8 te na da Ephesus ta mihimakara Pentecost iji puvuresuja.  
\v 9 Amo God na pe hirikehei ai ta pure aisona te aita amo kitoho embopo isapamane mihera te aravora, sove sove eto pure aisona.   
\p
\v 10 Eto embo Timothy na ungota degi puvurou kito amina mane joru neite neite aisuja avo kito kogo evujo, amina na ere ona ainge dombo Bada ta pure ere ua.  
\v 11 Avoeto embomeni na amita degi hini kambari eagora simba evujo. Eto amita pure au irae au ikevu tunga javotoho te tapa nau degi ta egerembai. Eto namote namei kamei nei uhoho te tapa na Timothy ei puvuroja simba ue mihera.  
\v 12 Eto ungotenau namei Apollos ungota degi namei kamei nei uhoho ga pambaja penunu ijiena te amina eha mane pambasi ke ngahia na ijija te iji nei javotoho puvurou pambasuja.   
\s1 Ke tutumo  
\p
\v 13 Eto ungo God humota ue ahe ivote heteto turieto sinderite irivujo.  
\v 14 Eto ari tapa osa ari na evujo.   
\p
\v 15 Eto ungo ari nei ava uje ere ona amo embo Stephanas te amita jeka hoka kivujo, amina enda Achaia aita kihi Iesu ambo ambo ea eto amina God ta embomeni ototohu kaiketo hondate ere ovora  
\v 16 avoeto ungona enana te embomeni nei aingeko amite avo hondate ava uje ere ona amo enana te enana ta pure hondate ari embomeni te tapa amita ke ambo ambo ava erena.  
\v 17 Eto embo Stephanas te Fortunatas te Achaicus na aingeto ei ta puvera avoeto tunga javotoho be ere ona amo ungota hondate amo enana na ereora avoeto tunga javotoho ereona.  
\v 18 Eto na osaga koguena te enanana osaga nau ehere irae ehei osaga ungota te tapa irae ehija avoeto embo aingeko amo osa vesa aheva.   
\p
\v 19 Eto ekalesia tapa enda Asia ta mihera amina ungo ere pekihera, eto embo Aquila te amita ae Prisca te ekalesia amita bande ta horukagora amite tapa na jo tapa na Bada ta javota ungo ere pekihera.  
\v 20 Eto namei kamei ei mihera amina ungo ere pekihera. Eto ungo ari otohu na mune tavo mine ara ue pekari mine ara evujo.   
\p
\v 21 Eto na Paul nanena ungo pekihe ingeni nau na javo nau ere kajihena-PAUL.  
\v 22 Eto embo vahai na Bada osa ae aisuja kito ohimbevu pe te pambai. MARANATHA Bada puvujo!  
\v 23 Eto Bada Iesu Keriso ta hondate ari ungota degi iroi.  
\v 24 Eto ungotena Iesu Keriso ta toho avoeto na ungo osa ere ona, Amen.