\id 3JN - sw tanna 
\h 3 JON 
\toc1 3 Jon 
\toc2 3 Jon 
\mt1 3 Jon  
\mt2 Nəkwəkwə yame Jon rɨmɨrai yame ramor kɨsisər kɨn  
\imt1 Nəgkiarien kupən ye nəkwəkwə e 3 Jon  
\ip \bd ?Pa rɨmɨrai nəkwəkwə e? \bd* Aposol Jon rɨmɨrai nəkwəkwə e.  
\ip \bd ?Rɨmɨrai ramvən kɨmi pa?\bd* Rɨmɨrai ramvən kɨmi Gaeas e in yamehuə kɨrik kape niməhuak, kɨni in rɨrkun Jon.  
\ip \bd ?Narəyen rɨmnhawor pən iran mɨne nɨpɨg rɨmɨrai?\bd* Ye nɨpɨg a, nəmhajoun mɨnə kape niməhuak kamhavən ikɨn pɨsɨn pɨsɨn mɨnə, mɨshajoun. Narmamə yamə mɨne kɨmɨsərɨg nəgkiarien kapəriə kɨmnhavəhsi-pən nəvɨgɨnien kɨmi əriə, mhavəhsi-pən napɨrien kɨmi əriə, mɨsasitu irəriə.  
\ip \bd ?Rɨmɨrai nəkwəkwə e tuk naha?\bd* Gaeas, in yermamə kɨrik yame ramasitu ye nəmhajoun yamə mɨne kaseriwək ikɨn pɨsɨn pɨsɨn mɨnə. Jon rɨmnərɨg nəvsaoyen kɨrik ye norien huvə kape Gaeas, kɨni rɨmɨrai nəkwəkwə e mə tukrɨvəh-si haktə nərɨgien kafan.  
\c 1  
\s1 Jon rɨmə nəkwəkwə e ramvən kɨmi Gaeas  
\pi1
\v 1 Gaeas, ik piak keikei kɨrik. Yo, elda\x - \xo 1:1 \xt 2 Jon 1:1\x* kape niməhuak, yakamrai nəkwəkwə e kɨmik. Yakorkeikei əfrakɨs ik.  
\v 2 Piak keikei, yakwɨrkun mə kafam nɨmraghien ye nɨmrɨ Kughen in rhuvə əmə, kɨni yakaməhuak mə takəsanɨn mamərɨg huvə əmə yerkim, kɨni narəyen m-fam kafam tukrhuvə.  
\v 3 Rɨkik rɨmnagien nɨpɨg yɨmnərɨg nəməhuak mɨnə tɨksɨn kɨmnhauə masəsaov kɨn kafam narer-tɨm-tɨm-ien tuk nəfrakɨsien, mhani mə nakamrɨpɨn ye nəriwəkien ye nəfrakɨsien.\x - \xo 1:3 \xt 2 Jon 1:4\x*  
\v 4 Yakərɨg mə kwajikovə mɨnə kafak kaseriwək ye nəfrakɨsien, rɨkik ragien mapita narɨmnar m-fam.   
\s1 Gaeas ramor wok huvə kɨrik  
\p
\v 5 Piak keikei, ik nakərer əutən tuk naha nhagɨn yame nakamor kɨmi nəməhuak yamə mɨne kamhaurə tuk ik, nar apnapɨg mə iriə yepsɨpɨs mɨnə.\x - \xo 1:5 \xt Rom 12:13; Hib 13:2\x*  
\v 6 Iriə khauə ye niməhuak e, masəvsao kɨn kafam norkeikeiyen. Kɨni nɨpɨg iriə tukamhavən ye kapəriə swatuk, rhuvə mə takasitu irəriə\x - \xo 1:6 \xt 1 Kor 16:11; 2 Kor 1:16\x* ye norien yame Kughen rorkeikei.  
\v 7 Meinai iriə kaseriwək tuk nɨni-ərhavyen Nəgkiarien kape Yesu Kristo. Masarkurao, mərɨg nəmə khapəh nɨsəhuakien khapəh nɨsasituyen irəriə.  
\v 8 Ror məkneikɨn mə kɨtawə tukasəkeikei mɨsasitu irəriə, mə kɨtawə tukhavəh kwermɨtawə mɨnə kɨrikianə tuk nɨni-ərhavyen nəfrakɨsien.   
\s1 Diotrefes mɨne Demetrius  
\p
\v 9 Yakwərai-ta nəkwəkwə kɨrik kɨmi niməhuak kafam, mərɨg kwən e Diotrefes, in rorkeikei pɨk mə tukrɨvəhsi-haktə atuk in mə in yemehuə kɨrik, kɨni mɨpəh nətərɨgien kɨn ətawə.  
\v 10 Tukmə yakurə, kɨni jakəvsao atuatuk kɨn norien kafan, yame in raməsiwən-apsapɨs kɨn nɨniyen nɨkartawə. Kɨni marə mor mɨn nar has kɨrik mɨn, mɨpəh neighanien kɨn nəməhuak mɨnə khavən iman ikɨn. Mamni-əhu mɨn narmamə yamə mɨne kɨsorkeikei mə tukseighan kɨn nəməhuak mɨnə khavən iməriə ikɨn mə tukhapəh nɨseighanien kɨn, kɨni mher-yerhav kɨn əriə ye niməhuak.   
\p
\v 11 Piak keikei, takpəh nɨsɨgovɨnien norien has kape narmamə; mərɨg taksɨgovɨn norien huvə kape narmamə. Meinai narmamə yamə mɨne kasor norien huvə, iriə e kwajikovə mɨnə kape Kughen.\x - \xo 1:11 \xt 1 Jon 2:29\x* Mərɨg narmamə yamə mɨne kasor norien has, iriə kɨseinein əgkəp Kughen.   
\p
\v 12 Mərɨg kwən a Demetrius,\x - \xo 1:12 \xt 1 Tim 3:7 \x* narmamə m-fam kasəgnəgɨn in. Kɨni kafan norien ramhajoun mə iriə kasəfrakɨs. Kɨni kɨmawə mɨn yaksəgnəgɨn in, kɨni nakɨrkun mə yakamhani əfrakɨs.\x - \xo 1:12 \xt Jon 19:35; 21:24\x*   
\s1 Nəgkiarien infamien  
\p
\v 13 Yakmə jakni-pre nəgkiarien mɨnə tɨksɨn mɨn tuk ik, mərɨg to yakpəh nɨvəhyen pen mɨrai-pən kɨn ye pepa.  
\v 14 Yakmə jakurə məm ik, kawəgkiar atuatuk kɨmi ərau mɨnə.   
\p
\v 15 Pəh takamarə ye nəmərinuyen.\x - \xo 1:15 \xt Rom 1:7; Efes 6:23\x*  
\p Ik mɨnə tɨksɨn ikɨn e kamhani-pre rhuvə kɨmik. Kɨni takni-pən rhuvə tuk kɨtawə mɨnə tɨksɨn aikɨn a kɨrikianə kɨrikianə.