\id ROM - Namiae NT [nvm] -Papua New Guinea 2004 (web 2014) 
\h ROMENS 
\toc1 Romens 
\toc2 Romens 
\toc3 Rom 
\mt1 ROMENS  
\imt1 Romenson Vuak Amur  
\ip Buk igi fu Foron fas iji fu isoime e God ma vierafejo iji bu mai Rom ijia karinva iji nijiainma ijin. For fas igi fu vek ai Korint fino ijia fu isoime rad abe Fibi bara be God ma vierafeno iji mamga fur abe mai Rom ijia vain. Regavo mai iji fu ai Itari ijia ar iji e Romkobuo e bomana moik samuamo e Sisa fu fino ijin. Revo mai iji fuka ma bomana. For fu vierafe fuka e ijin amarigia kuardiame nijaidiaga bu vierafero e fok noka ise rejo. Ijefuon noba vierafero no ik nuvuon iji non mukoi reoijoro no ijeg vierafek. Regavo madu unam ma iji nuvuon no kegoijo ijia bu no karaunuokro noba ijeg vierafek. Regavo nom Jesu Kurais ma vierafekva Godri no kam ise nuvuon iji guome areke no e marek. For fu vierafe fuka va mai Rom ijia e iji ma vierafejo ijin ifejdiame vuak ma iji nijaidiaga bu una daro abekro fu iji vierafen.  
\iot Romens ijia vuak kafokafo fu isoinma ijin  
\io1 \ior 1:1-17\ior* For fas igi fu irerafuon isoinma fu ijin kuardiame nijaidiainma ijin.  
\io1 \ior 1:18–3:20\ior* Bara ga baru bu daro buon ijia giriesakva bu izeg ma karivako iji abekva bakin fu ijin kuardiainma ijin.  
\io1 \ior 3:21–4:25\ior* Unam ma karivako iji abekfuon iji fu ma vierafejo ijin.  
\io1 \ior 5:1–8:39\ior* Noka Kuraisna besum funa mazime unam iviamkor ma karivako ijia ifejdame kevakfuon ijin.  
\io1 \ior 9:1–11:36\ior* Tavan rad God fu e Isrerko iji kumega bu una fu ma vierafekfuon ijin.  
\io1 \ior 12:1–15:13\ior* E God ma vierafejo unam bu karijo ijin.  
\io1 \ior 15:14–16:27\ior* For fu e roin anadiame vuak fuon iji kuaim barenma ijin.  
\c 1  
\s1 For fas fu isoim e Romko nijiainma ijin  
\p
\v 1 Efnun fas igi For nar isoime e fok ja ai Rom guf ijia karinva iji ja nijiame anadiav. Naiji na Jesu Kuraison ik rejo revo fun usuibe Godri na abe unien. Ijefuon na e vuak fuon abe oijo be nar vuak fuon ma iji abe e roin kuardiav.   
\p
\v 2 Regavo Godon vuak ma iji iviakma na abe kuardiaoijo iji fun fur koikfuon usuibe e vuak fuon vierafene kuaivo ijiebuon oij ijia vierafe miama bun vuak iji abe e roin kuardiain. Regavo madu bun abe buk akaij ijia isoin.  
\v 3-4 Regavo vuak ma iji fu kuarduinma iji fu Farifuon ijefuon kuarduin. Farifuon Jesu Kurais fu E Bomana nuvuon ga fuiji fu ma ema ijieb moikigia nafen. Fuiji fu ma ema ga fu Kin Devidon agan ijia uinre ruain. Regavo fu guamga Godri kuamga fu una urin. Ijefuon fu una urinma ijia fu e fok no anf nijuin. No ijia game vierafero fu iji fu ma Godon Farif ga fu e darokin ga fu sanainma iji abe oinonro no ijeg vierafekro fu iji Godri kuamga fu una urin.  
\v 5 Jesu fu ire ma iji fu nun renma ijia fun na kienma ijefuon na fateroin ijia vuak fuon abe oij. Na vuak fuon abe e kuardiaga e fuon fok moikigia karinva bu Jesu ma vierafeknum vuak fuon ma iji igakfuon.  
\v 6 Ijefuon e fok ai Rom ijia karinva iji jak fu Godri ja aferdiainma ijefuon jaiji ja Jesu Kuraison e ren.   
\p
\v 7 Regavo fun Godri e fok ja ai Rom karinva iji oijmiame ja aferdia una e fuon ren. Ijefuon fas igi na isoime ja nijiav. Regavo na nun na sirimamejo ijia na vierafe God Asoinuvuon ga E Bomana Jesu Kurais bu tavan bog mardiaknum ifejdiaga ja afurve kariok.   
\s1 For fu e Romko iji giakafa uruvana vierafenma ijin  
\p
\v 8 Amur iji na joifuon Jesu Kuraison if ijia Godon oimarek. Ijefuon maiji jon ja izeg Jesu Kurais ma vierafejo iji e roin moikigia karinva iji bun faim baren.  
\v 9-10 Regavo God fun na gie na tavan bog sirimamejor na ja vierafej. Regavo fun giega naiji na oinun fok na God nun ijefuon ik rej ijefuon maiji na Farifuon ijefuon vuak ma iji abe e roin kuardiav. Na nun sirimamejo ijia naka ja vierafejo iji God fun gieme vierafen. Ijefuon na God kuaga fur radkma ijia fuon fu vierafeno ijia kiega na una ja giak vuak.  
\v 11 Na bomana vierafe naka una ja giakafa vierafen ijefuon maiji na ja ifejdiame besum God kuaga fu Kaven Akai fuon ijefuon daro maiji kafo ja vajiaga ja daro abeok.  
\v 12 Regavo vuak igi na kuaivo ijefuon maiji na vierafero no besum afuime nuvuon no ma vierafejo ijia nuvuon nijainami vo ifenamiga no daro abekro na vuak iji kuardiav.   
\p
\v 13 Regavo efnun ni vuak igi mukoi faime vierafef. Tavan bog naka una ja giakafa vierafen gavo ire kafokafo ijieb unam nun bijuv. Na vierafero naka izeg ur na e Jius bakin ijiebuon na renva ijeg na una madu jon rekafa vierafen. Na vierafe na Godon vuak ma iji abe ja kuardiaga rad fuka vuak ijar rarek ga vuak ijar ifejdiaga e fok ja Jesu ma vierafek.  
\v 14 Regavo God fu ik iji na mienma ijefuon na e fok kuardia ga vuak iji nijaidiakfuon. Ijefuon na e iji bu mai ma ijia karinva iji abevo e iji bu tarar karinva iji nijaidiak. Regavo madu na vuak iji abe e iji bu sikur rene vierafenva iji abevo e iji buba sikur rene vierafenva iji nijaidiak.  
\v 15 Ijefuon na bomana vierafe na Godon vuak ma iji abe e iji ja ai Rom guf ijia karinva iji kuardiak.   
\s1 Godon vuak ma iji fu ma darokin  
\p
\v 16 Naiji na ma vierafe Godon vuak ma iji fuka ma ga ka darokin. Ijefuon erar fu vuak iji mukoi faime Jesu ma vierafekma God fu e iji keunak. Regavo vuak iji bu e Jius ijieb amur fain revo e Jius bakin iji bu rad fain.  
\v 17 Regavo Godon vuak ma ijar fu no nijaiduoga no Jesu Kurais irerag fu nuvuifuon renma ijin abe ma vierafekva fu no karaunuoga no maturaik. Regavo vuak ijefuon iji bun buk akaij ijia isoinva iji bu ijeg isoi,  
\q1 E be erar fu Jesu ma vierafeno ijefuon God fu game keunainma e iji tavan rad fu unam ma ijia fivak.   
\s1 God e moikigi ise reoijo fu kege vajai fian vajiamo ijin  
\p
\v 18 E fok moikigia karinva bu ise uruvana reoin revo ise ijar unam ma iji Godon roko iji fu rarem. Ijefuon God fu varur ijia ziemo ijefuon e moikigia ise reoijo iji fu kege vajai fian vajiak.  
\v 19 God fu e iji kege vajai fian vajiamo ijefuon maiji Godon vuak ma iji bu faikfuon iji fu samakaf bun vierafen. Regavo madu fun Godri koikfuon vuak fuon abe mukoi samafrena bun gain ga vierafen regavo buba amarigia mimatame reoij.  
\v 20 Bu izeg daro fuon iji gakva bakin gavo bu ire fok kafokafo fu amardiainma bu iji giavo ijia bu vierafe God fuka e darokin. E fok Godon daro iji bun gav ijefuon rad fu una ise nuvuon ke mazim guokafa ruakma ijia e iji bu izeg sauiknum vuak ma iji bu kegoinva ijesugin kuardakva bakin.   
\p
\v 21 E iji God bun vierafen gavo bu fu aroiknum fu oimardabatie fuka marek. Regavo bu fu uzainva ijefuon nigen buon buba mukoi vierafen. Bu nigen buon buka ire kafo ijia naoivo bakin revo buka ma nakinma ijia oin.  
\v 22 Bu koikbuon kuai, No ma vierafene kegoijo kuaiv gavo buka ma kufuimej.  
\v 23 E iji bu God ma iji tavan bog ijia fivako iji buka uzame una ire kafo e imut ijia amardiainva bu iji ato same kam arordiav. Ire kafo bu emab kege fanuf ga um igeg amardiainva bu ijin kam arordiame aroifiriv.   
\p
\v 24 E iji bu ire ise iji rene God nuigafainva ijefuon God fu areko e iji bu una fudainamiknum ire ka ma ise iji bu oibuon ijia vierafenva iji reoin. Bu ijegrejknum una kaifijaf ijiena bukikum ire ise jukin ijin reoin.  
\v 25 Bu God ma iji bu uzagavo bu una ire kufui iji ma vierafen. Bu ire iji God fu amardiainma ijiebuon ik reknum bu kam name arordiain revo God ma iji fu ire fok amardiainma iji bu game ijia arev. Regavo bu God ma iji abe aroiv vo fuifuon ik rekva fuka markfuon.  
\v 26 E fok bu God ma iji bu nuigafame una unam ise ijekin renva ijefuon God fu bu magiako bu una unam ise kafokafo bu jufdiakfuon ijia reoin. Regavo bara iji bu amarigia baru buon giame jajiavo bakin gavo bu una bukikum unam ise iji rej.  
\v 27 Regavo efarif iji buk bu bara buon iji amarigia giame karvo bakin gavo bu unam ise iji rene una bukikum fudainamiv. Efarif iji bu unam ise bu jufdiakfuon ijia renva ijefuon bun koikbuon vajai buon iji kam vajai fian mian.   
\p
\v 28 God fu giamga e fok bu unam ma iji fu vierafenma iji buba javga fu arekoga e iji bu oibuon iji buba mukoi vierafene reoin. God fu bu arenma ijefuon ire ise iji bu vek ijia reoij.  
\v 29-31 Bu ijegrejo ijefuon ire ise fok bun nigen buon ijia naoiv. Regavo ire ise iji bu rejo iji bu e kaifijaf sinuom giame oijmiaknum moik igefuon ga vajai surif igefuon ise iji vierafej. Regavo bu e kafob ire roin rejo buka iji giame isuar buisina kuaiknum ga e kaniaknum e roin ziegafiaknum vuak kufui kuaiknum ire ka ma ise iji rekuai vierafej. Regavo madu bu kaifijaf musikiaknum ga e kafobuon vuak ise iji giame isuar kuaiknum God bu ma uzav. Bu kaifijaf roin kia, Jaiji ja ise rejo kiaknum buka aroikaraknum koikbuon if buon kam mamkanuk rej. Regavo madu bu tavan bog ire ise iviamkor kafo rekuai vierafe ga eofijaf igiavo bakin. Regavo buon vierafejo iji fuka ma ise ijesugin ga madu bu akai fok buba mukoi jajiav. Bu kaifijaf bu amarigia oijmiavo iji giame buon oifian abejo bakin.  
\v 32 Bun Godon akaij ijia fu kuai erar ire ise ijekin iji rekma fu guakno kuainma iji bun vierafen. Godon akaij iji bun vierafen gavo bu magaga una ise kafokafo iji reoij. Regavo madu bu buonkua ijegrejo bakin revo bu giamga e kafo bu ise kafo rejo bu kia, Iji fun marenmano kiav.   
\c 2  
\s1 God emabuon ise iji fu kege mazim giamo ijin  
\p
\v 1 Ijefuon efnun jab karine e kafobuon ise bu renva iji giame kiak jaka ise renvano kiak. Erar fu ijegrega iji nika are ijefuon maiji God fu una ruakma a izeg una God kuardakma bakin. Ijefuon erar a e kafobuon ise bu rejo iji giame kiaknum vo ak una ise besum iji reoinon iji an koikon on vajai fian manamim.  
\v 2 No vierafega God fu fuonkua daro namo ijefuon e iji bu ire ise ijekin rejo iji fur giame ke vajai fian vajiak.   
\p
\v 3 Regavo efnun ja e kafobuon ise bu rejo iji giame kiav revo jak ja ise besum iji reoijo ijefuon ni giame aref. Regavo a magaga e kafobuon ise iji giame kiakma iji God fu una ruakma a izeg ko sauikma bakin.  
\v 4 Regavo naba gain jakafu fuon fu ma rediamon ijigam fu ja oi bomana vierafeno ga madu ire ise kafo jon migegare reno bakin iji ja uzav. Regavo jan vierafen fuiji fu e ire ma ijesugin rediamon ijefuon fu ja aferdia una fuon roga ja oijon karoime una ma rekro fu iji vierafen.  
\v 5 Regavo jaba mukoi faime vierafej ijefuon ja koikjo Godon nifak ijia ise jon kam uruvana rej. Ijefuon tavan iji God fu fuon ma ijekma una e fokbuon ise bu renva iji giakma fu ise jon ijefuon ja kege uruvana vajai fian vajiak.  
\v 6 Ijefuon tavan iji God fu una ruakma eraneb bu unam fu vierafenma ijia kegoinva iji fu ire ma kafo una ef vajiak. Regavo eraneb bu buon vierafenva ijia kegoinva iji fu kam vajai fian vajiak.   
\p
\v 7 E kafo buka tavan uruvana mimatame unam ma ijia reoij. Bu tavan uruvana kaifijaf ga e kafokafo ifejdiaga God fu bu arordiaknum nidosiakro bu iji vierafen. E iji ijeg kegoijo iji God fu buon oimarmo ijefuon fu bu kege uniaga tavan rad bu ma karivak.  
\v 8 Regavo e roin bu vek buon vierafenva ijia reoij. Bu unam ma iji bu uzame una unam ise ijia reoij. E iji bu ijegreoijo iji God fu bu mukoi ziegafiame kam vajai fian vajiak.  
\v 9 Regavo e fok bu moikigia karine ise kafokafo reoijo iji God fu bu giak. Tavan rad God fu bu kege vajai fian vajiaga bu vajai fian abek. Regavo iji God fu ur e Jius iji kege ijeg vajai fian vajiake rad fu e Jius bakin iji kege vajai fian vajiak.  
\v 10 Regavo eraneb bu unam God fu oimarkfuon ijia kegoinva iji God fun giain. Ijefuon fu fuon afuimo ijiga sanainma iji kege bu arordiame vajiak. Regavo God iji fu rekma iji amur fu e Jius ijiebuon rene rad fu una e Jius bakin ijiebuon rek.  
\v 11 Ijefuon maiji God fu e fok fu kege besum name giamo ijefuon fu e Jius ijiga e Jius bakin iji fu kege besum name giak.   
\p
\v 12 Regavo e Jius bakin bu Godon akaij iji e Mosis fu minma iji buba aben. Regavo bu vek ise kafokafo reoijo ijefuon God fu ise buon bu rejo ijefuon bu kam vajai fian vajiak. Regavo e Jius iji bu akaij iji bun aben ijefuon bu ise kafo rejo iji God fu akaij iji bu kege tuasenva ijefuon fu tavan rad ise buon ke mazim giak.  
\v 13 Regavo e iji kafo bu vierafero bu Godon akaij iji fainva ijefuon bu Godon nifak ijia bun ma ijia kegoijoro bu ijeg vierafen. Regavo iji fuba maren. Regavo bu Godon akaij iji faime mimatame kegokva ijar bu Godon akaij iji amarigia jakfuon.   
\p
\v 14 E Jius bakin iji bu Godon akaij iji buba aben. Regavo bu tavan kafo bu buon vierafenva ijia jajiaoijori God fu fine giamga buka maren. Bu akai fuon iji buba fain gavo unam buon bu kegoijo iji fuka maren.  
\v 15 Regavo ire Godon akaij ijekin iji e Jius bakin iji bun amarigia oibuon ijia vierafenva ijefuon bu unam ma ijia reoij. Revo vierafe ijar oibuon ijia namo ijefuon bu unam ma ga ise bu rejo iji fu vierafe buon ijar nijaidiam.  
\v 16 Ijefuon Godon vuak ma iji na kuardiava ja fainva iji ire fok bu tavan iji God fu una roko ijia rek. Regavo tavan ijia God fu Jesu Kuraison duadok ijia e fok ijiebuon oij iji besubesum kege mazim giak.   
\s1 E Jius ijiga Godon akaij ijin  
\p
\v 17 Regavo iviakma vuak igi na e Jius iji kuardiav. Ja koikjo ja kuai no e Jiusno kuaiv. Regavo tavan uruvana ja Godon akaij ijia biduame kariknum kuai, Noiji Godon nifak ijia non unam ma ijia reoij ijefuon God fu no guome oimarkno kuain.  
\v 18 Regavo ja unam izeg God fu vierafe ja ijia kegokfuon iji jan koikjo vierafen. Regavo madu fun God akai fuon ijia nijaidiainma ijefuon ja unam ma iji ja kegokfuon iji jan vierafen.  
\v 19 Regavo jan vierafe jaiji ja e iji buba vierafenva iji aferdia una Godon ruak. Regavo madu e iji bu nakinma ijia karinva iji jar sanainma iji abe miav.  
\v 20 Regavo tavan uruvana jar e iji buba mukoi vierafene kegoijo iji nijaidiaknum e iji vek rubdiainva iji nijaidiav. Ja vierafero Godon akaij iji jan amarigia aben ijefuon vuak fok ja kuaivo iji ja vuak ma ijesugin kuaivro ja ijeg vierafej.   
\p
\v 21 Ja vuak ma iji e roin nijaidiav gavo jaiji ja irerafuon vek ise kafokafo reoij? Ja e roin kuardiame kia, Jab niesavo kiav gavo jaiji jabe niesav ki ja bakin?  
\v 22 Regavo ja e roin kuardiame kia, Jab e kafobuon bara turakno kiav gavo jaiji jabe e kafobuon bara turav ki ja bakin? Ja e kafo bu god kafokafo moikigia amardiame buon sirimamene vo arordiavo jaka kuriaireknum ziegafiav. Regavo jabe God kafokafo iji bu amardiainva ijiebuon ar ijia arume ire kafo niesav ki ja bakin?  
\v 23 Ja kuai, No Godon akaij iji non amarigia faime abenvano kuaiv. Regavo jak jabe Godon akai ke tuaseknum if fuon abe arafirivo ki ja bakin?  
\v 24 Igia fai buk akaij iji bu usuibe isoinva ijia bu ijeg kuai,  
\q1 E Jius iji jar unam ise kafokafo rejo ijefuon e Jius bakin bu iji giame una vuak ise kafokafo Godsina kuaivno kuain.   
\p
\v 25 Ja Godon akai amarigia igiakva iji surif jon bu kania ufume anf namdiainva iji fu maijekma ijefuon fu rad ja ifejdiak. Regavo ja akaij iji jaba mukoi igiakva anf iji bu namdiainva iji fu ma ijekma bakin.  
\v 26 Regavo e Jius bakin be fu vajai fuon ijia buba kana ufume anf abeden gavo fuka Godon akaij iji amarigia igiame kegokma God fu e iji game oimarek. God fu game vierafero e Jius bakin iji fu vajai fuon ijia anf namo igeg kegoinoro fu ijeg vierafek.  
\v 27 Ijefuon tavan iji God fu e fok ijiebuon ise iji kege mazim giakma ijia fu izeg e Jius iji ja unam isema kegoinva iji fu samakaf giak. Regavo e Jius bakin iji bu unam ma ijia kegoinva iji fuk samakaf giak. Ijefuon maiji e Jius iji ja vajai surif jon kania ufume anf nain revo jaba Godon akaij iji amarigia igiav. Revo e Jius bakin iji bu Godon anf kafo bu vajai buon ijia ba nain gavo bu Godon akaij iji buka amarigia igiav.   
\p
\v 28-29 Ijefuon e iji vajai surif buon kania ufume anf nainva iji bu ma e Jius bakin. Regavo e Jius ma iji fu e iji Godon Kaven ijar oifuon ijia amarema fu una e iviamkor renma ijar fu ma e Jius. Ijefuon maiji fu Godon akaij iji igiame vo Godon anf iji abe vajai fuon ijia abedenma bakin revo fu Godon Kaven iji abena fu oifuon ijia fin. Ijefuon e ijekin iji fu ema ijieb fu abe aroikva bakin gavo fu Godri tavan rad fu abe aroik.   
\c 3  
\p
\v 1 Regavo surif ja kania ufume anf igeg nainva iji fu ma irerag joifuon ren? Rega ni vierafe ja e Jius rekva iji fuon maiji fuka uruvanak.  
\v 2 Ijefuon ma be iji Godon akaij iji e Mosisri abe e Jius iji miain.  
\v 3 Regavo e Jius kafo buba Godon vuak ma iji amarigia vierafene abe oibuon ijia abedekva ja vierafe God fu izeg rek? Jab vierafero e iji bu vuak fuon ma iji buba mukoi vierafenva ijefuon God fu ire ma kafo fu rad buon rekno kiainma iji fu arekro jab ijeg vierafek.  
\v 4 Regavo jan vierafe e fok bu tavan uruvana bu kufui meknum e biesiav. Regavo Godon vuak kufui be a gakma bakin. Fuka ma bakin ijefuon maiji buk akaij iji bu usuibe isoinva ijia fu ijeg kuai,  
\q1 Tavan uruvana vuak on a kuaimon iji nika vuak ma ijesugin kuaimoga e fok bu gak. Regavo tavan kafo e roin bu ise on ijefuon a kuagakva ni vuak ma ijesugin kuardiaga bu game arekno kuain.   
\p
\v 5 E roin bu ijeg kuaiv ise nuvuon no rejo ijar e roin ifejdiaga bu Godon unam ma iji game vierafek. Ijefuon God fu irerafuon ise no renva ijefuon no vajai fian vajuok?  
\v 6 Bu ijeg kuaimoij gavo na vierafe God fu ma ijefuon no kam vajai fian vajuomon. Ijefuon maiji Godon unam fu reno iji fuka unam ma ijesugin ren. Regavo e iji bu vuak ijeg kufuimene kuaimoijo iji fu makma tavan rad God fu una ruakma fu izeg fine e fok igiebuon ise iji giak?   
\p
\v 7-8 Ijefuon e roin bu kuai, No vuak kufuime kuaiknum ise kafokafo rekva iji fun maren. Ijefuon e roin bu ise nuvuon no rejo ijia guome migegare vierafero Godon vuak iji fu ma ijesugin ro bu ijeg vierafek. Regavo vuak ijeg bu vierafene kuaimoijo iji fu makma God fu ise nuvuon no renva ijefuon no kam vajai fian vajuomon iji fuba maren? E roin bu ijeg vierafene kuaiv. Bu kuai, Rono ise kafokafo rega ise nuvuon ijar Godon if abe ajiemo kuaiv. Regavo vuak ijeg bu vierafene kuaivo iji fuka vuak kufui ga fuka ma bakin. Regavo e roin bu vierafero For nar vuak kufui ijekin vierafene kuaimoijoro bu ijeg vierafene vuak ise nuisina kuaiv. Revo na vierafe eraneb bu ijeg vierafene nuisina kuaimoijo iji Godri rad e iji kege vajai fian vajiak.   
\s1 E be erar Godon nifak ijia fu maturainma bakin  
\p
\v 9 Ijefuon ja izeg vierafej? Ja vierafega e Jius noiji Godon nifak ijia non maturain gavo e Jius bakin iji bu Godon nifak ijia buba maturain? Iji fuka bakin revo e fok no Godon nifak ijia noba maturain revo noka ise uruvana rej. E Jius abevo e Jius bakin iji no besum Godon nifak ijia noba maturain. Regavo vuak iji nan usuibe kuardia ga nijaidiava jan vierafen.  
\v 10 Regavo vuak ijefuon iji bun usuibe buk Sams ijia ijeg isoime kuai,  
\q1 E besum fuba Godon nifak ijia maturain.  
\v 11-12 E besum fuba ma vierafene Godon unam ma iji gakrok nisaimo bakin. Regavo e fok bun God nuigafame bun unam ise iji jaoij. Regavo e fok bu unam ma iji ba mimatame kegoijo ijia e besum fuka ma bakin.   
\q1
\v 13 Regavo ir vuat buon ijia e roin bu aoiv. Regavo vuak buon buka kufuij ijesugin kuaiv. Regavo vuak buon kufuij ijar tabar miarin igeg e roin jakiaga bu aoiv.   
\q1
\v 14 Bu ir buon buka vuak zievo ijesugin kuaiv.   
\q1
\v 15 Bu migegare e roin kam arafiriaga bu vajai fian abeknum vo kaniaga bu aoikuai vierafej.   
\q1
\v 16 Regavo tavan bog bu oijo iji bu e roin arafiriaga bu vajai fian abej.   
\q1
\v 17 Bu unam ma iji bu afuime karivakfuon iji buba mukoi vierafen.   
\q1
\v 18 Regavo madu buka ba God juvknum agoiv.  
\p Regavo vuak iji e igi nor ijegreoij ijefuon God fu usuibe ijeg kuaima bu buk akaij ijia ijeg isoinva ijin.  
\v 19 Ijefuon God fu akai fuon abe e Jius fok no nijuin. Regavo akai fuon iji noka ba amarigia igiame reoij. Ijefuon tavan iji God fu una e fok ijiebuon ise iji fu ke mazim giak ruakma ijia noiji no izeg sauim vo izeg fu kuardakva bakin. Ijefuon maiji no ma kegoijo kuakva noka kufuimek.  
\v 20 Regavo e fok no Godon akaij iji noba mukoi jaoij. Ijefuon fu erar Godon nifak ijia maturainma bakin. Ijefuon Godon akaij ijar dakaroim nijaiduoga e fok no game vierafero noiji no ise renvaro no ijeg vierafek.   
\s1 God izeg fu e karauniamo ijin  
\p
\v 21 Ur no Godon akaij iji faime ijia jaoin revo akai fuon fuba ifejduoma no Godon nifak ijia maturain. Regavo iviakma God fu una unam be ijia ise nuvuon no reoijo ijia karaunuome no kege una unam fuon ma ijia unuom. Regavo unam be iji God fu iviakma nuvuon reno iji fun usuibe akai fuon ijia kuarduin. Areme madu fun usuibe e vuak fuon vierafene kuaivo ijiebuon oij ijia vierafe vajiamga bun abe no kuarduin.  
\v 22-23 God fu e iji bu oibuon ijia Jesu Kurais ma vierafejo ijiebuon ise iji giame aregavo bu karauniame una unam fuon ma ijia uniain. Regavo e fok no Godon nifak ijia no besum. No kafokafo bakin ijefuon maiji e fok no ise uruvana reoijo ijefuon no Godon sanainma iji noba gain.  
\v 24 Noiji no ise reoij. Regavo God fu Jesu Kuraison if ijia ire fuon ma iji fum kege no vajuomo ijia fu no karaunuome una unam fuon ma ijia unuom. Regavo Jesu Kurais fu no karaunuinma ijefuon God fu if fuon ijia ire ma iji kege no vajuom.   
\p
\v 25 God fu Jesu Kurais kuamga fu e fok ijiebuon ise ijefuon guain. God fu vierafero Jesu Kurais fu guakma fur e fok ijiebuon ise bu reoijo ijia karauniakafa fu iji Jesu kuama fu guain. Regavo fun Jesur e fok ijiebuon unam amaren ijefuon erar fu Jesu Kurais ma vierafeno iji God fu ise fuon game arek. Regavo God fu unam iji fu kenma ijia fu fuon sanainma ga maturainma iji abe e fok no nijaiduin. Usuibe God fu oi dasume isuarigia fine e fok ijiebuon ise iji fuba amarigia giame kuaim.  
\v 26 Regavo iviakma igi e fok bu ise reoijo iji fu vajai fian vajiamo ijefuon maiji e iji bu ijia game vierafero God fu ma ijesugin reoinoro bu ijeg vierafek. Regavo God fu unam ijeg fu reno ijia fu unam fuon maum reno iji abe e fok nijaidiam. Ijefuon eraneb bu Jesu ma vierafejo fu e iji karauniame una unam fuon ma ijia uniam.   
\p
\v 27 Ijefuon no izeg vierafek? No vierafero no Godon akaij iji non amarigia igiavo ijefuon no nifak fuon ijia no maturainvaro no ijeg vierafene noka nuvuon aroinamiv. Regavo iji fu bakin ga no nuvuon izeg Jesu no ma vierafejo ijia no Godon nifak ijia no maturain.  
\v 28 Ijefuon no vierafe e fok bu Godon akaij iji amarigia igiavo ijefuon bu nifak fuon ijia maturainva bakin. Regavo bu buon izeg bu Jesu ma vierafejo ijia bu Godon nifak ijia bu maturain.   
\p
\v 29-30 Regavo ja izeg vierafej? Ja vierafega God fu e Jius ijesugin samuagdiaknum bu karauniam? Iji fu bakin revo fu madu e Jius bakin ijiebuon God. Ijefuon maiji e fok no e ni kafokafo bakin ijefuon fu e Jius abevo e Jius bakin iji fu kege besum samuagdiam. Fu e fok ijiebuon God ijefuon e Jius abevo e Jius bakin eraneb bu Jesu ma vierafejo iji bu nifak fuon ijia bu maturain. Ijefuon God fu karauniame ke unam fuon ma ijia uniak.  
\v 31 Regavo jab vierafero no Jesu ma vierafejo ijefuon no Godon akaij iji noba amarigia igiakro jab ijeg vierafek. Iji fuka bakin. Revo no Jesu ma vierafekva no madu Godon akaij iji amarigia igiak.   
\c 4  
\s1 Eburam fu ma vierafenma ijia bijame kuainma ijin  
\p
\v 1 Regavo ja vierafega sai nuvuon e Eburam fu usuibe God ma vierafenma iji fu no izeg nijaiduom?  
\v 2 E Eburam fu Godon nifak ijia fu ire ma kafo kegoinmabatie God fu game fuon ma iji abe fu makfuon. Regavo Eburam fu iji fu renma ijefuon fuba una koikfuon fuon aroinamin revo fum una God aroime if fuon iji abe ajien.  
\v 3 Ijefuon maiji bun usuibe Godon buk akaij ijia isoime kuai,  
\q1 E Eburam fu God irerag ma kafo fuon rekno kuainma iji fu abe ma vierafen. Fu Godon vuak iji ma vierafenma ijefuon God fu Eburam abe una unam fuon ma ijia unainmano kuai.   
\p
\v 4 Regavo e be fum miji a mon vajakma bakin. Regavo a ik fuon rekma fu iji a mon vajakfuon.  
\v 5 Unam besum ijeg vo erar fu ik kafo God fu oimaikfuon iji ba ren gavo fum Jesu ma vierafeno iji God fun game vierafen. Regavo madu eraneb bu unam ise kegoijo iji bu God iji fu e fok ijiebuon ise iji giame aremo iji ma vierafeno iji fun gia vierafen. Ijefuon tavan rad e ijekin iji God fuba vajai fian vajiagavo fu karauniak.  
\v 6 Regavo vuak ijefuon maiji fun usuibe e Kin Devidri kuai, Erar fu ire ma kafo God fu oimaikfuon iji reno bakin gavo fum God fu kuainma fu iji ma vierafekma Godri fu keunak.  
\v 7 Regavo Kin Devid vuak ijefuon maiji fu kuainma iji fu ijeg kuai,  
\q1 Erar fu ise rega God fu game arenma e iji fu oimarek. Regavo erafon ise iji fun Godri ga dazme abe sauinma e iji fu oimarek.  
\v 8 Regavo erafon ise iji E Bomana fu gain gavo fuba abe vajai fian makafa vierafenma e iji fu bomana oimarek.   
\p
\v 9 Regavo vuak iji e Devid fu usuibe kuainma iji ja izeg vierafek? Jab vierafero Devid vuak iji fu e Jius iji bu surif buon kania ufume Godon anf igeg nainva ijiebuon ijesugin kuainmaro jab ijeg vierafek. Regavo vuak iji fu kuainma iji fu e fok igi nuvuisina kuain. Regavo ur e Eburamon na kuardiainva ijeg na una kuardiakno ni faif,  
\q1 Eburam fu God ma vierafenma ijefuon God fu Eburam keuname abe unam fuon ma ijia unain.   
\p
\v 10-11 God fu ur e Eburam abe unam ma ijia unain. Areme rad Eburam fu surif fuon kana ufume Godon anf abeden. Ijefuon e Eburam fu anf ijia game vierafero ur fu God ma vierafenma ijefuon Godri fu abe unam ma ijia unainmaro fu ijeg vierafen. Ijefuon fun Eburamri fuonkua amur God ma vierafega Godri fu keuname abe unam fuon ma ijia unain. Ijefuon erar bu God ma vierafega fu karauniamo e ijieb bu ma e Eburamon uifarif.  
\v 12 Regavo e Eburam fu e Jius iji bu surif buon kania ufume Godon anf nainva ijiebuon asoij. Regavo e Jius iji buba vierafero buiji bu Godon anf iji nainva ijefuon bu e Eburamon uifarifro bu ijeg buba vierafek. Buiji bu Eburamon uifarif ijefuon maiji e Eburam fu Godon anf iji fuba abenma ijia fu izeg God ma vierafeknum fioinma iji e Jius iji buk bun ijeg reoij. Ijefuon bu e Eburamon uifarif.   
\s1 Ma vierafejo ijefuon duadok ijia ire iji God fu kiainma iji bu kenva ijin  
\p
\v 13 God fu usuibe e Eburam ga aganfuon fu kiainma iji fu ijeg kia ire fok moikigia naoivo iji na abe ja miakno kiain. Regavo e Eburam fu Godon akaij iji mukoi igiainma ijefuon God fu moikigi abe bu miainma bakin. Regavo fun e Eburamri God ma vierafega Godri fuon oimarknum keuname abe unam fuon ma ijia unain. Ijefuon God fu gaga Eburam fun maturaimga fu moikigi abe Eburam ga uifarif fuon iji miain.  
\v 14 Regavo e fok bu Godon akaij ijesugin igame kegoinvabatie no izeg unam fuon ma iji abek? No izeg God ma vierafek? Regavo madu God fu izeg ire ma iji fu vajuokno kuinma iji kege vajuok? Ijefuon no akaij ijesugin igakva bakin gavo no God ma vierafek.  
\v 15 Regavo Godon akaij iji fu namo ijefuon e fok bu akai fuon iji igiav. Regavo erar fu akaij iji kege tuasekma rad God fu e iji kege vajai fian vajiak. Regavo God fu akaij iji fuba nainmabatie e fok bu ise kafokafo bu reoijo iji bu izeg mukoi giame vierafekva bakin.   
\p
\v 16 Regavo eraneb bu Jesu ma vierafekva God fu vuak fu kuainma ijegrene e iji karauniame ke unam fuon ma ijia uniak. Regavo God e iji fu karauniamo iji fu e Jius ijesugin karauniamo bakin. Regavo fuka e fok bu e Eburam fu God ma vierafenma ijeg buk God ma vierafejo fu e iji karauniak. Regavo ni vierafe usuibe e Eburam fu God ma vierafenma ijefuon erar fuk iviakma God ma vierafenma e iji fu e Eburamon uifarif.  
\v 17 Noiji no e Eburamon uifarif ijefuon maiji God fun usuibe buk akaij ijia e Eburamon ijeg kuai,  
\q1 Aiji nan abe unainvado e ar iror igia oinva iji bu uifarif on rekno kuain.  
\p Ijefuon e Eburam fu Godon nifak ijia fu ma asoinuvuon ijefuon maiji fuka God ma vierafen. Ijefuon God iji fuka ma e darokin. Revo fur e iji aoivo iji kiaga bu una urij. Regavo madu ire fok no giavo bakin iji fur amardiain.   
\p
\v 18 God fu Eburam kua, Aiji nan abe unainvado e fok bu on uifarif rek. Ijefuon e Eburam fu God ma vierafene tavan bog fu vuak iji God fu kuainma iji vierafeoin. Eburam fun eoren ga God fu kua, Barakon fu am nafega vo rad uifarif on bu ire mujur iji a giamo ijeg uruvana rekno kuainma ijefuon Eburam fu vuak iji abe oi fuon ijia abedeme ma vierafeoin. Fu vierafero fu am be nafekro fu ijeg vierafene God ma vierafeoin.  
\v 19 Regavo e Eburam fun ma eoren gavo bara fuon Sera fuk fun ma barasren. Ijefuon bu izeg una am be nafene samuakva bakin. Regavo e Eburam fu God vuak iji fu kuainma ijar oifuon ijia namo ijefuon fu God ma vierafen. Fu vierafero bara fuon Sera fu am nafekro fu ijeg vierafen.  
\v 20 E Eburam fu fuon fu ma vierafeno iji fuba ruin ga madu God vuak iji fu kuainma iji fu abe kufui igeg vierafenma bakin. Regavo vuak iji fu abene vierafenma ijefuon fuon ma vierafeno iji fuka ma bomana ren. Eburam fu fuon ma vierafeno iji fu bomana rena fu game una God aroin.  
\v 21 Fu ma vierafero God irerag fu fuon rekafa kuainma iji fu rekro fu ijeg vierafen.   
\p
\v 22 Regavo e Eburam fu fuon izeg fu God ma vierafeno ijia God fu game keuna abe unam fuon ma ijia unain.  
\v 23-24 Regavo God fu e Eburam fuonkua keuname abe unam ma ijia unainma bakigavo fu madu e fok roin nodua karaunuome ke unam ma ijia unuok. Ijefuon erar fu ma vierafero God ijar E Bomana nuvuon Jesu fu guamga fur kuama fu una urinmaro fu ijeg vierafekma God fu e iji keuname abe unam fuon ma ijia unak.  
\v 25 Regavo God fu ise nuvuon no reoijo ijefuon E Bomana nuvuon abe e ani iji miama bu kanava fu guamga fu kuama fu una urin. Jesu Kurais fu una urinma ijefuon God fu no karaunuome ke una unam fuon ma ijia unuokfuon.   
\c 5  
\s1 Jesur no kege una Godon afijaf renma ijin  
\p
\v 1 No Jesu ma vierafenva ijefuon iviakma God fu E Bomana nuvuon Jesu Kuraison duadok ijia no kege una unam fuon ma ijia unuido no una funa besum afurvene karivak.  
\v 2-3 No Jesu Kurais ma vierafenva ijefuon fu unam nuvuon amarema no Godon unam ma iji gain. Regavo iviakma non Godon unam ma ijia funa karij. No bomana oimarev ijefuon maiji no vierafe God fu no aferduoga no tavan rad funa fuon sanainma ijia karivak. No ijesugin oimarvo bagavo no madu izeg no moikigia afikin abejo no ijefuon oimarev. Ijefuon maiji no afikin abejo no ijia game vierafero rad no God ma vierafeknum giriesame karivakro no ijeg vierafej.  
\v 4 Noka afikin abej gavo no vek God ma vierafejo ijefuon God fu iji guome oinuvuon ijia unam ma iji vierafe vajuoko no reoij. No unam ma ijia ijeg kegokva no ma vierafe God fu rad no amarigia samuagduokfuon.  
\v 5 No vuak iji ma vierafen ijefuon no oifiaduomo bakin. Ijefuon maiji God fu Kaven Akai fuon fun kege oinuvuon guf ijia uniafduin. Ijefuon no Kaven Akai ijia game vierafega God fu bomana no amarigia oijmuom.   
\p
\v 6 Usuibe no oinva ijia no daro abe koiknuvuon karaunianamikfuon unam iji fuka bakin. Regavo God fuka bomana no oijmuin ijefuon fu Jesu Kurais kuamga fu tavan ma ijia ise nuvuon ijefuon guain.  
\v 7 Regavo ni vierafe fu ebe erar fu Godon akaij iji mukoi igiamo ijefuon fu fuifuon guakma bakin. Regavo noba gain e be fu unam ma ijia kegoino ijefuon e be fu kafu iji game fuifuon guak. Unam iji fuka ma gigikin ijefuon e ise reoino iji fu erar fuifuon guakma bakin.  
\v 8 Regavo no madu usuibe noka vek ise reoin. Regavo God fuka bomana no oijmuinma ijefuon fu Jesu Kurais kuamga fu ise nuvuon ijefuon guain.  
\v 9 God fu Jesu Kuraison kavuan fu kuros ijia arinma iji abe ise nuvuon somduome karaunuin. Ijefuon tavan rad God fu Jesuon duadok ijia no fuba kege vajai fian vajuok.   
\p
\v 10 Ur no Godna noba afuime karin revo no e ani fuon ren. Regavo iviakma fun Farifuon Jesur nuvuofuon guame unam nuvuon amaren ijefuon no una Godna afuime karij. Regavo madu iviakma Jesu Kurais fu vek fino ijefuon fur daro fuon ijia tavan bog no samuagduokfuon.  
\v 11 Regavo ijesugin bakin gavo no Godon bomana oimarev. Ijefuon maiji fur Jesu Kuraison duadok ijia unam nuvuon amarema iviakma no funa afuim karioij.   
\s1 E Adamko Jesu Kuraisbuon unam no iji giak  
\p
\v 12 Ik amur ijia e besum ijar ise renma ijefuon ise iji fu e fok igiena moikigia nam. E Adamri ise iji ren ijefuon God fu Adam abe vajai fian mama fu ise fuon fu renma ijefuon guain. Regavo fun e besum ijar vuak abe e fok miainma ijefuon e fok bu moikigia vajai fian abeknum aoin.  
\v 13 Ur fun ise ijar moikigia nako e Mosis fu rad Godon akaij iji abe e fok kuardiain. Regavo Godon akaij iji fu rad ruain ijefuon e iji bu usuibe ise kafo rejo God fu giame ba kege vajai fian vajiain.  
\v 14 Godon akaij iji fuba ruainma ijia e iji Adamon uifarif iji bu karine roke e Mosison uifarif ijia ruainva iji God fuka bu vajai fian vajiama bu aoiknum kari ruain. E Adamri Godon akai bomana iji abe tuasenma ijefuon Godri fu abe vajai fian mama fu guain. Regavo Adamon uifarif iji bu Godon akai mamkanuk kafo buba kege tuasen revo bu akai ukakna kafo kege tuasen ijefuon God fu bu vajai fian vajiama bu aoin.   
\p
\v 15 Adam ko Jesu Kurais bu ema revo unam buon bu kegoinva iji fuka ma kafokafo. Ijefuon maiji Adam fu God ba igain gavo fu Jesur God igain. God fu akai besum abe Adam main gavo Adam fuba abe mukoi samuain. Regavo fun e besum ijar ise iji abe e fok miain ijefuon God fu e Adamon uifarif iji kege vajai fian vajiama bu aoiknum kari ruain. Regavo God fu fuon ma iji abe Jesu Kuraison duadok ijia e fok miain. Fun Jesu Kuraisri God igame fur fuonkua e fok igiebuon unam amarme Godon unam ma iji abe e fok miain.  
\v 16 E Adam fu ise iji abe e fok miain revo God fu e fok oijmiainma ijefuon fu fuon ma iji fum efkin abe e fok miain. Regavo e besum ijar ise besum iji renma ijefuon e bu ise fok rejga God fu bu kam vajai fian vajiama bu aoin. Regavo e fok buk ise reoin gavo Jesu fu guainma ijia God fu unam fuon ma iji fum efkin abe e iji miame kia, Ise jon fok fun baren ga iviakma na unam nun ma iji abe ja miavno kiain.   
\p
\v 17 Iji fuka ma e besum ijar vuak abe e fok miainma ijefuon e fok bu vajai fian abeknum aoin. Regavo ni vierafe e Jesu Kurais fur fuonkua ire ma iji e fok igiebuon rene e fok igiebuon unam iji amaren. Ijefuon God fu Jesu Kuraison duadok ijia izeg fu e fok ijiebuon ise fu giame aremo ijiga izeg fu e karauniame ke unam fuon ma ijia uniamo iji fum efkin kege e fok vajiain.   
\p
\v 18 Regavo e besum ijar ise besum iji renma ijefuon fur vuak abe e fok miama bu vajai fian abeknum aoin. Regavo Jesu Kurais fuk fu tavan besum efknum guainma ijia fu e fok karauniamga bu Godon unam ma iji abe tavan bog ijia ma kari vain.  
\v 19 Regavo fun Adamri Godon akaij iji ba igainma ijefuon fur vuak rene e fok miain. Ijefuon e fok bu moikigia ise reoin. Regavo madu fu Jesu Kuraisri fuonkua God irerag fu vierafenma ijia kegoinma ijefuon fur unam amaredo God fu e fok karauniame ke unam fuon ma ijia uniak.   
\p
\v 20 Regavo fu e Mosisri Godon akaij iji abe e fok no muin. Regavo no akaij iji game vierafega noka ise uruvana ren. Rega God fu e fok ijiebuon oifian abene ise buon giame arenma iji fuka ma bomana.  
\v 21 Ur noka ise uruvana reoko ise ijar no samuagduoknum aferduome una unam no aoikfuon ijia unuin. Regavo iviakma fun Godon ma reduomo ijar no samuagduomo ijefuon no Godon nifak ijia no maturain. Regavo madu no E Bomana nuvuon Jesu Kuraison duadok ijia no ma karivakfuon iji abek.   
\c 6  
\s1 Jesu Kurais duadok ijia no unam ma karivako iji abek  
\p
\v 1 Regavo ja izeg vierafej? Ja vierafero no vek adamene ise reokva God fu tavan uruvana nuvuon oifian abeknum ise nuvuon guome arekro ja ijeg vierafej?  
\v 2 Regavo iji fuka ma bakin. Unam usuikor nuvuon no usuibe reoinva iji bun e iji bu aoinva ijeg bun aoin. Ijefuon iviakma no irerafuon una ise kafokafo reoij?  
\v 3 Regavo jan koikjo vierafen do iji no Jesuon if ijia ruainva ijia non Jesuna besum ren. Ijefuon Jesu fu guainma iji no madu non funa besum aoin.  
\v 4 Regavo do iji no ruainva ijia non unam ise usuikor nuvuon no oijmiame kegoijo iji non Jesuna besum aoivga bu kege funa mako besum ruinva ijekin. Regavo fu Godri daro ga sanainma fuon ijekma fu Jesu Kurais kuama fu una urinma ijia fu no madu aferduome una unam fuon ma iviamkor no ma karivako ijia unuin.   
\p
\v 5 Regavo no Jesuna besum fu guainma ijeg no madu no aoivabatie no iji fu una urinma ijeg no madu no una urik.  
\v 6-7 Regavo non koiknuvuon vierafe unam nuvuon usuibe no kari ruainva iji bun Jesuna kuros ijia aoin. Ijefuon unam usuikor ijefuon daro iji fun Jesur mukorigia abe arafirin. Ijefuon iviakma fu ise nuvuon ijar una no samuagduokma bakin. Ijefuon maiji e guainma iji fu izeg una uri ise reokma bakin.   
\p
\v 8 Regavo unam usuikor nuvuon no kari ruainva iji bu Jesu Kuraisna besum aoivabatie no ma vierafero tavan rad no funa ma karivakro no ijeg vierafek.  
\v 9 Ijefuon maiji non vierafe Jesu Kurais fu guamga Godri kuama fu una urin ijefuon fuba una guak. Ijefuon Setanon daro iji fu Jesu asikma bakin.  
\v 10 Regavo Jesu fu guainma iji fum efknum guain ijefuon ise iji fu izeg una madu fuon rekma bakin. Regavo iviakma fun una uri unam God fu oimarekfuon iji abe Godk fin.  
\v 11 Ijefuon noka tavan bog vierafero unam usuikor nuvuon bun Jesuna aoivaro no ijeg vierafekfuon. Ijefuon iviakma no Jesuna besum rene unam fu renma iji no madu no ijegrejknum una unam God fu oimaikfuon ijia karivak.   
\p
\v 12 Iviakma noiji non Jesu Kuraisna agan besum ren ijefuon no giriesame vajai nuvuon koiknuvuon samuakfuon. Regavo noba zazaike ise iji fu oinuvuon ijia naoime tavan uruvana no aferduome una unam ise ijia vak.  
\v 13 Regavo madu noba zazaike vajai nuvuon roin bu ise reogavo noka giriesame vajai nuvuon samuagdiaga buka marme ok. Noiji non ise reoijga Godri no aferduome una unam fuon ma ijia unuin. Ijefuon no vajai nuvuon samuagdiavo kege God vajaga fur kege fuon fu vierafenma ijia ik fuon ma iji rek.  
\v 14 Jab zazaime tavan uruvana Setanon ir iji abene ise reok. Revo nika giriesame koikjo vajai jon samuanamif. Ijefuon maiji ja Godon akaij ijia bidua karinva bakin revo ja fuon ma iji fu vajuomo ijiga izeg fu nuvuon oifian abe ifejduomo no ijia biduame karij.   
\s1 Godon ik ma iji reokfuon ijin  
\p
\v 15 Regavo iviakma no Godon akaij ijia bidua karinva bakin. Gavo no fuon ma iji fu vajuomo ijia bidua karij. Ijefuon jab vierafero ja una ise rejknum karivakafa jab ijeg vierafek.  
\v 16 Regavo jan koikjo e bomana izin abekfuon iji jan vierafen. Ijefuon eraneb ja vierafe ja Setan igaga fur ja samuagdiakva iji jaka ise reknum aoik. Regavo eraneb ja vierafe ja God igame vo arega fur ja samuagdiame aferdia una unam ma karivako ijia uniakma iji ja koikjo vierafekfuon.   
\p
\v 17 Ja ur jan Setan igame ik fuon ise iji reoin. Regavo iviakma jan oijon fok Godon vuak ma iji faime una e iji bu Jesu Kuraison vuak abe ja nijaidiainva iji igiain. Ja ijegrejo ijefuon naka bomana Godon oimarev.  
\v 18 Iviakma fun Godri ja aferdiame ise jon ja renva iji areme una unam fuon ma ijia ruain. Ijefuon iviakma ja Setanon ik rejo bakin gavo ja Godon ik ma iji rej.  
\v 19 Na vuak igi na e mamkanuk ijiebuon ja ik rekva na ijia bijame kuardiav. Na vuak ijekin iji kuardiaga ja faime ma vierafekro na iji kuardiav. Regavo usuibe ja Jesu Kurais ba ma vierafenva ijia jaba vajai jon koikjo samuagdiain. Regavo jam vajai jon kege una unam ise kafokafo ijia reoin. Regavo iviakma ni arega God fu ja aferdia una unam fuon ma ijia uniaga ja ik fuon akaij iji reok.   
\p
\v 20 Ur ja Setanon unam iji abene jaka ik fuon ise kafokafo reoin ijefuon ja Godon unam ma iji jaba vierafene abe oijon ijia abedeva fur ja samuagdiain.  
\v 21 Regavo ja vierafe unam ise iji ja ur kegoinva ijefuon maiji ja irerag iji gain? Ire ma iji fuka bakin gavo kaven jon buka vajai fian abene aoin gavo ba Godna karikuai vain. Ijefuon iviakma ja una karoime unam ise iji ja kegoinva iji ga fuka mukorigia jufdiam.  
\v 22 Iviakma fun Godri ja karauniame oijon samuagdiamo ijefuon ja ise jon ja reoijo iji jan areme una ik fuon rej. Ijefuon iviakma ja e fuon akai rene unam fuon ma iji abe funa rad tavan bog ijia karivak.  
\v 23 Ja iviakma ise reoijo iji tavan rad ja unam ma iji abekva bakin revo kaven jon bum vajai fian abene aoik. Regavo bu aoikva buba Godna karivak. Regavo no Jesu E Bomana nuvuon ma vierafekva God fu duadok fuon ijia unam fuon ma karivako iji fum efkin abe muok.   
\c 7  
\s1 For fu barabaru sanamivo ijia bijame kuainma ijin  
\p
\v 1 Efnun iviakma vuak irerag na kuardiakrejo iji jan vierafen. Ijefuon maiji e uruvana ja emabuon akaij iji jan faime vierafen. Ijefuon e uruvana erar fu moikigia nivek fino iji fu akaij iji igame reoknum vake fu guamo ijia akaij iji fuba una fu samuak.  
\v 2 Regavo na akai besum ijia bijame kuaiga ja ijia vierafek. Bara be fu baru jakma baru fuon iji fu vek fino ijefuon fu akaij iji igame baru fuon ijek mukoi fivak. Regavo baru fuon iji fu guakma bara iji fu akaij iji fu igame una baru fuon ijek fu fioinma iji fun ijia arek.  
\v 3 Regavo bara iji baru fuon fu vek fino ijia areme una baru kafo turakma iji fu ise ren. Ijefuon e be fu bara iji kuak aiji ebuon baru turamo kuak. Regavo bara ijefuon baru iji fun guainma ijia bara iji fu una baru be jakma iji fu ise reno bakin. Ijefuon maiji baru fuon fun guain ijefuon fu una e iviamkor jain.   
\p
\v 4 Ijefuon efnun vuak igi iviakma na bijame kuardiainva iji jan ijeg ren. Regavo jaiji ja e iji fu guamga God fu kuama fu una urinma ijiena agan besum ren. Ijefuon iviakma Mosison akaij iji fu ja samuagdiamo bakin gavo fun Kuraisri ja aferdiame una Godon ik maiji fuifuon rek.  
\v 5-6 Usuibe no vek unam usuikor no oinuvuon ijia vierafenva no iji reoin. No tavan bog noka ire iji Godon akaij ijar kuriairemo iji noka vek adamene ijia reokuai vierafen. No unam ijeg kegoijo ijefuon God fuka no kam vajai fian vajuoko no vajai fian abene aoiv. Regavo iviakma fun Godri no ifejduomga no ise nuvuon ijefuon Jesu Kuraisna besum aoin. Ijefuon iviakma no Godon akai usuikor iji non ijia aren gavo no una Godon unam iviamkor Kaven Akai fuon fu reno no ijia keoij.   
\s1 Ise ijiga Godon akaij ijiebuon vuak ijin  
\p
\v 7 Regavo e roin no kuai Godon akaij iji fu iseno kuaiv revo fu ise bakin fuka ma. Ijefuon maiji ise rejo iji fu akaij ijar mukorigia nijaiduom. Regavo Godon akai be fu no muome kuo, Jab e kafobuon sinuom iji giame oi bomana vierafekno kuin. Regavo God fu akaij iji fuba muinmabatie no izeg ma vierafevo e kafobuon sinuom giame oi bomana vierafejo iji no ise rejoro no ijeg vierafek.  
\v 8 Regavo fu Godon akaij ijar ise fok no vierafene kegoijo ijiebuon unam amarduin. Ijefuon ise ijar oinuvuon iji kege una unam ise ijia jame ise uruvana rekuai vierafej. Regavo God fu Akai iji fuba abe no muinmabatie ise iji fuba oinuvuon ijia ikrek gavo fum guainma igeg rek.   
\p
\v 9 Ur na akaij ijefuon maiji naba mukoi vierafenva ijefuon na ma fi ruain. Regavo iviakma na akaij ijefuon anej ma iji nan gia baren. Ijefuon na koiknu vierafega oinun fun ise ijar rarenma ijefuon kaven nun fun guainma igekin.  
\v 10 God fu akai fuon muome vierafero no akai fuon mukoi faime igakva no ma karivakro fu ijeg vierafen. Regavo na akai fuon iji kege tuasenva ijefuon kaven nun fun guain.  
\v 11 Regavo madu fun akaij ijar unam amarenma ijefuon ise fok bu unam ijia jame oinun dab dakaroinva ijefuon iviakma kaven nun fun guainma igekin.   
\p
\v 12 Godon akaij iji fu abe muinma iji fuka akai ga ka maturainva ijesugin.  
\v 13 Regavo jab vierafero fu akaij iji maturainva ijar kaven nun dab arafirima fu guainmaro jab ijeg vierafek. Iji fu bakin. Regavo fun ise ijar kaven nun dab arafirima fun guain ga akaij ijar ise na renva iji kege samakaf nijaidiema na giame vierafen. Ijefuon no vierafe akaij iji fuka ma ijefuon maiji no akaij iji game una vierafega ise uruvana no reoijo iji buka ma ise ijesugin.   
\s1 Unam nokarok oinuvuon ijia ikrejo ijin  
\p
\v 14 Regavo non vierafe Godon akaij iji fu kaven nuvuon ijefuon akai. Regavo naiji na ema ijefuon tavan uruvana akaij iji naba igiav revo na nun vierafenva ijia reoij. Ijefuon ise iji fu tavan uruvana nosik name fur na samuagdiem.  
\v 15 Ijefuon ise ijar oinun abe dakaroiga ise kafokafo naba mukor vierafeknum rej. Na unam ma iji na vierafenva naba ijia reoij gavo na una unam ise iji na isediemo ijia reoij.  
\v 16 Na ise kafo naba rekro vierafen revo nam magaga ijia reoij. Ijefuon na rad una vierafega Godon akaij iji fu ma ga naiji na ise reoij.   
\p
\v 17 Ijefuon nam nar ise ijekin reoijo bakin revo fu ise iji tavan uruvana oinun ijia namo ijar kiega na ise ijekin iji reoij.  
\v 18-19 Na vierafega unam ma iji fuba oinun ijia namo ijefuon na unam ise iji reoij. Regavo unam ma iji na kegokfuon iji nan oi nun ijia vierafen gavo na zazaivo ijefuon naba mimatame reoij. Na unam ma iji nan vierafene gavo na una unam ise iji naba kegokro vierafenva na ijin reoij.  
\v 20 Na unam ise iji naba ijeg kegokro vierafen gavo naka magaga unam ise ijin reoij. Ijefuon na vierafe unam ise iji na nar kegoijo bakin revo fun ise iji tavan uruvana oinun ijia namo ijar kiega na unam ise ijekin ijin reoij.   
\p
\v 21 Ijefuon unam be oinun ijia ik reno iji na unam ma iji na kegokfuon iji na oinun ijia vierafen gavo ise iji fu oinun ijia namo ijefuon na una unam ise ijin reoij.  
\v 22 Regavo oinun guf ijia naka irerag God fu vierafenma na iji ma vierafene bomana oimarev.  
\v 23 Regavo na koiknu oknum vierafega unam nokarok (2) bu oinun ijia naoiv. Na vierafe naka unam ma ijesugin vakro vierafen gavo ise iji fuka giriesame na ivie dab una unam ise ijia vak. Ijefuon fu ise ijar na samuagdieko na unam ise ijin reoij.  
\v 24-25 Ijefuon iviakma naka oifian bomana abej. Na fuka ise ijar giriesame ivie dab una unam ise na guakfuon ijia vak. Ijefuon erar na turamdieme una aferdie unam ma ijia vak? Fu Jesu Kurais E Bomana nuvuon ijar na keunieme aferdie una unam ma ijia vak.  
\p Ijefuon na unam nun na izeg kegoinva na iji kuaiv. Na koiknu vierafe naka oinun fokma na Godon akaij iji mukoi igame unam ma ijia kegokro vierafen. Regavo vajai surif nun fu una akai ise be iji igame una unam ise ijia kegokro vierafen.   
\c 8  
\s1 Kaven Akai ijefuon daro ijia ma karivakfuon ijin  
\p
\v 1 Regavo no Jesu Kurais ma vierafenva ijefuon God fu no kege una unam fuon ma ijia unuin. Ijefuon eraneb bu Jesu Kuraisna agan besum renva iji God fuba bu kam vajai fian vajiak.  
\v 2 Ur fu ise ijar giriesame no aferduome una unam ise ijia vako no ijia jame ise reoinva ijefuon no vajai fian abeknum aoin. Regavo iviakma fun Godon Kaven Akai ijar daro fuon ijia no karaunuome ke una unam fuon ma iji iviamkor ijia unuin. Regavo Kaven Akai ijar daro fuon ijia ma karivako iji Jesuon duadok ijia abe muin.  
\v 3 God fu akai fuon abe no muin revo ise iji bu vek oinuvuon guf ijia naoiv. Ijefuon no izeg Godon akaij iji mukorigia abekfuon iji noba aresren. Regavo God fu karaunuokafa Farifuon besum iji kuama fu ema ise reoino igeg moikigia ari ruain gavo fu ise besum fuba ren. Regavo God fum areko Jesu fu ise nuvuon ijefuon vajai fian abene guain. Regavo Jesu iji fu guainma iji fun Godri ise nuvuon ijefuon abe isuf igeg baroin.  
\v 4 God fu vierafero fu Jesu abe isuf igeg baroga no ijia game vierafene akai fuon fok mukorigia igiakro fu ijefuon ijeg ren. Revo unam no Godon akaij iji igiakfuon iji no vajai surif nuvuon bu vierafenva ijia kegokva bakin. Regavo no Godon Kaven Akai iji fu vierafenma ijia kegokva no Godon akaij iji mukoi igiak.   
\p
\v 5 Regavo erar fu unam ise vajai surif fuon fu vierafenma ijia jame kegoino iji tavan uruvana fuka ise ijefuon daro ijia fioin. Revo erar fu una unam ma iji Godon Kaven fu vierafenma ijia kegoino e iji tavan bog fuka Kaven ijefuon daro ijia fioin.  
\v 6 A vajai surif on fu vierafenma ijar samuagdako a ijia ja kegoino iji an zuarunam ijia vak. Regavo a oion iji fu Kaven Akai ijar samuako a fu vierafenma ijia jame kegoino iji a Godon unam ma iji ga fuon kafaimo iji an aben.  
\v 7 Regavo erar oifuon iji fu vajai surif fuon iji fu vierafenma ijar fu samuako fu ijia jame kegoino e iji fu Godk nibijaim. Regavo e iji bu ijegreoijo iji bu Godon akaij iji buba mukoi vierafen ijefuon akai fuon buka izeg igiakva bakin.  
\v 8 E iji bu vajai surif buon ijieb samuagdiako bu ijia jajiame kegoijo e iji God fuba buon oimarek.   
\p
\v 9 Regavo jaiji ja vajai surif jon ijar ja samuagdiako ja ijia jame kegoijo bakin. Regavo ja Godon Kaven fu oijon ijia finoga iji jaiji jan fu vierafenma ijia reoij ijefuon unam ise iji jan rubdiame una unam ma ijia ruain. Regavo erar fu Jesu Kuraison Kaven fuba abenma e iji fu Jesuon e bakin.  
\v 10 Regavo eraneb ja Jesu Kuraison Kaven abe oijon ijia unainva iji kaven jon bu uria karij. Ijefuon maiji God fun ja karauniame ke una unam fuon ma ijia uniain. Regavo ise jon ja rejo ijar vajai surif jon bun Godon nifak ijia buka aoinva igekin.  
\v 11 Regavo Godon Kaven fu oijon ijia fikma na vierafe vajai surif jon bu aoikrejo iji Godri kiaga bu una urik. Ijefuon maiji God besum ijar Jesu fu guamga fu kuama fu una urin. Ijefuon fu Kaven fuon ijefuon duadok ijia ja kiaga ja una urik.   
\p
\v 12 Ijefuon efnun noba vajai surif nuvuon bu vierafenva ijia jajiame unam ise iji keok.  
\v 13 Regavo ja vajai surif jon bu vierafenva ijia jajiame unam ise iji kegokva rad ja vajai fian abene aoik. Regavo ja una Kaven Akai fu vierafenma ijia jame kegokva iji ja unam ise jon iji jan kaniava bun aoin. Ijefuon tavan rad God fu ja kiaga ja funa ma karivak.  
\v 14 Regavo erar fu Godon Kaven Akai ijar kuardako fu ijia jame kegoino e iji fu ma Godon farif.   
\p
\v 15 Regavo eraneb bu Godon Kaven Akai ijar oibuon ijia samuagdiako bu oijo e iji buba God game juk. Ijefuon maiji Kaven Akai ijar no aferduoma no una Godon afijaf ren. Ijefuon iviakma non una fu kua Ate Asoinuvuono kuav.  
\v 16 No vierafe no ma Godon afijaf ijefuon maiji Godon Kaven Akai fu oinuvuon guf ijia fine kaven nuvuon iji kuardiame kia, Jaiji ja Godon afijafno kiam.  
\v 17 Noiji no Godon afijaf ijefuon tavan rad God fu ire ma iji fu kege afijaf namdiainma iji kafo fu kege no vajuok. Regavo amur no uri Jesu Kurais fu vajai fian abenma no ijeg vajai fian abekva God fu ire ma iji fu kege Jesu Kurais namdainma iji kafo fu kege no vajuok. Regavo madu no fuon sanainma fateroin abekfuon.   
\s1 Tavan rad Godon afijaf iji bu fuon sanainma iji abekfuon ijin  
\p
\v 18 Na ma vierafega iviakma no ire kafokafo bu nuvuon rega no vajai fian abejo iji fum ma ukakbek. Regavo tavan rad God fu fuon ma iji ga sanainma iji fu kege no vajuokreno ijar fuka ma bomanak.  
\v 19 Regavo ire fok God fu amardiainma iji bu tavan iji God fu una afijaf fok kege samafrekfuon bu iji bomana vierafeknum samuav.  
\v 20 Ijefuon maiji bu usuibe tavan iji samuain revo God fu fuon vierafenma ijia ire fuon fok kam arafiriain ijefuon maiji bu ise uruvana ren. Regavo ire fok God fu amardiainma iji buba ijeg arafiriakro vierafen. Regavo fun Godri fuon vierafenma ijia fu ire fuon fok kam ijeg ren.  
\v 21 Regavo God fun usuibe vierafega tavan rad ire fuon fok fu amardiainma iji fuba kege arafiriagavo fum karauniak. Regavo fu vierafe ire fuon fok bu arafiriaknum muturvo iji bu arek. Bu arega fu fuon sanainma iji fu abe afijaf miainma ijeg fu abe una buk miaga bu dazme ma karivak.   
\p
\v 22 Regavo ire fok God fu amarme nainma iji bu vek afikin abeknum vajai fian abej. Bu iviakma bu bara iji fu am nafekro vajai fian abeno bu ijeg vajai fian abe rok.  
\v 23 Regavo bu Godon ire iji fu amardiainma ijesugin vajai fian abejo bakin. Regavo e fuon igi no Kaven Akai fuon anf igeg amur aben ga rad no ire ma kafo kekfuon iji no madu noka ijeg vajai fian abeknum samuak. No samuaikin Godri no aferduo una afijaf rene vajai surif nuvuon iviamkor vajuoga no kege ijia ma karivak.  
\v 24 No ire ijin ijeg vierafene samuavo ijefuon God fu no karaunuom. Regavo irerag no vierafeknum samuavo iji no ni nuvuon ijia gaivabatie no irerafuon ma vierafene samua karikva bakin. Revo e be fu ire be fun game abenma iji fu irerafuon fine ire iji vierafene samuakma bakin.  
\v 25 Regavo ire kafo no ni nuvuon ijia giavo bakin iji no ma vierafene samuakva iji noka oi mafaime samua karik.   
\p
\v 26 Regavo madu nuvuon vierafejo iji fuka ma zazaikin revo fu Godon Kaven Akai ijar no ifejduom. No ijeg Godon sirimamekfuon iji noka ba vierafen revo fu Kaven Akai ijar nuvuifuon Godon sirimamen. Vuak iji Kaven fu God kuardakreno iji fuka ir afisen ga fuka vajai fian abeknum nuvuifuon God soisoime kuardam.  
\v 27 Regavo God fu e fok ijiebuon oij iji fun gia ga Kaven Akai ijefuon vierafenma iji fun gain. Regavo Kaven Akai iji fuk fu ire fok God fu rekro vierafeno iji fun vierafen. Ijefuon fu Godon e ijiebuon fateroin ijia fur God soisoime kuardamon.   
\p
\v 28 Regavo non vierafe eraneb bu God oijmav ga eraneb fu kege uniainma bu fuon vierafenma ijia kegoijo iji fu ire ma iji buon ren. Revo ire ma ga ise iji buon roko iji fu ma ijefuon ijeg ren.  
\v 29 Regavo e iji God fu usuibe kege unianma iji fun fur kiainmado rad bu Farifuon ijekin rek. E iji bu Godon afijaf reke ga Farif fuon ijar fu e amuifarif rek.  
\v 30 Regavo e iji God fu usuibe kege uniainma iji fun kumenma ijefuon fu bu ken. Regavo madu e iji God fu kumenma iji fun karauniame ke una unam fuon ma ijia uniain. Regavo e iji God fu kege una unam fuon ma ijia uniainma iji bun fuon sanainma iji abe funa karij.   
\s1 God fu Jesu Kuraison duadok ijia fuon oijmiamo abe muinma ijin  
\p
\v 31 Vuak fok na kuardiainva iji na izeg God ire uruvana fu nuvuon reno na iji kuardiain. Ijefuon ire iji ja izeg vierafen? Revo God fu nona ren ijefuon e ise reoijo iji buba no aferduome una unam ise ijia vak.  
\v 32 Ijefuon maiji God fu Farifuon iji ba abe muin gavo fu kuamga Farifuon fu ise nuvuon ijefuon guain. God fu Farifuon besum iji fu abe no muin. Ijefuon fu madu ire fuon ma iji fuba kege raren gavo fum kege no vajuok.  
\v 33 Noiji fun Godri kege unuinma ijefuon fu erar una no guome kuo ja ise rejno kuokva bakin. Regavo madu fun Godri ise nuvuon no renva iji guome fu no aferduo una unam fuon ma ijia unuin.  
\v 34 Regavo fu erar una guome ise nuvuon no renva ijefuon kuokma bakin. Ijefuon maiji fu Jesu Kuraisri nuvuifuon Godon sirimamen. Fun Jesu Kurais e iji fu ise nuvuon ijefuon guamga God kuama fu una uri ij maink fuon ijia fino ijar ise nuvuon no renva ijefuon God soisoime kuardam.   
\p
\v 35 Jesu Kurais fu no bomana oijmuinma ijefuon fu erar no aferduo una garef be unuokma bakin. No tavan kafo no afikin ga vajai fian abej. Regavo madu noiji no Jesu Kuraison e ik rejo ijefuon e kafo bu nuvuisina kuaiknum nuvuon iserekfuon. Regavo tavan kafo noka duok bakin rene sinuobatekfuon. Regavo madu tavan kafo e buka kanuoga no aoikfuon. Ire ise ijekin uruvana buka nuvuon ruakfuon revo bu ijieb no kege Jesu Kuraison oijmuomo iji areme una garef be vakva bakin.  
\v 36 Regavo ire ise fok bu nuvuon roko iji bun usuibe Godon buk akaij ijia ijeg isoime kuai,  
\q1 God noiji no oifuon ik rejo ijefuon tavan bog e bu no ziegafuok vo no kanuokuai vierafen. Noiji bu maf-sif bu kania bua ijo ijeg bu no kam ijegreoijno kuain.   
\p
\v 37 Regavo bu ire ise fok iji nuvuon roko ijieb no kege Jesu Kuraison oijmuomo iji areme una garef be vakva bakin. Regavo Jesu Kurais fu no oijmuomo ijefuon fu daro muoga no giriesame ire ise fok bu nuvuon roko iji no kege gareg korken.  
\v 38-39 Na ma vierafega Godon oijmuomo iji fu tavan bog nona navakfuon ga fu erar abe gareg akozekma bakin. No nivek kari ga non aoinva iji Godon oijmuomo iji fu vek nona navak. Regavo Godon anera ijigam kaven darokin kafo buba God fu no oijmuomo iji abe gareg akozekva bakin. Regavo madu bu ire kafo iji bu iviakma rejo ga rad rekrejo ijieb God fu no oijmuomo iji abe gareg akozekma bakin. Regavo bu ire kafo varur gufia ga moikigia naoivo ijieb Godon oijmuomo iji abe gareg akozekva bakin. Regavo madu bu ire kafo Godri amardiainma ijieb fuon fu no oijmuomo iji abe gareg akozekva bakin. Godon oijmuomo iji fu tavan bog nona ijeg navak. God fu E Bomana nuvuon Jesu Kuraison duadok ijia fuka no bomana oijmuin. Ijefuon fu erar izeg God iji fu no oijmuomo iji abe gareg akozekma bakin.   
\c 9  
\s1 God ga e fuon fu ke uniainma ijin  
\p
\v 1 Efnun na vuak be madu kuardiakrej. Naiji na Jesu Kuraisk besum renva ijefuon vuak irerag na kuaivo iji na kufuimejo bakin. Na Kaven Akai iji fu oinun ijia ik reno ijefuon vuak irerag na kuaivo iji na kufuimejo bakin.  
\v 2 Na e nun Jiusbuon oifian ga vajai fian bomana abej. Ijefuon maiji bu nana ai besum ruain ga madu bu e uifarif nun. Regavo God fu Jesu Kurais kuama fu ise nuvuon ijia karaunuokro ruainma iji buba ma vierafene fu abe oibuon ijia unain.  
\v 3 Bu e nun gavo bu koikbuon Jesu Kurais bun nuigafainva ijefuon tavan rad God fu bu kam vajai fian vajiaga bu aoik. Na e nun Jiusbuon oifian bomana abejo ijefuon na vierafero God fu na abe arafirie vo abe garef be uniega na Jesu Kuraisk besum na mazinva fuka arekro na iji vierafen. Na vierafe God fuka na abe ijegrega e nun bu ijia gieme una God ma vierafek.   
\p
\v 4 God fun usuibe e Jius iji kege uniame fuon sanainma iji abe bu miain. Rene fu bu kia, Jaiji ja afnuno kiain. Regavo madu God fu buon bomana oimarenma ijefuon fu akai fuon abe miain. Rene fu unam ma iji bu izeg fu aroikfuon iji nijaidiame fu madu tavan rad bu ma karivakfuon iji abe miakno kiain. God fu ijeg kuardiain gavo e Jius iji buba fu igain.  
\v 5 E Jius iji buka e ikin Eburam ga Aisek ga Jekafbuon agan ijia uinvene ruain. Regavo madu Jesu Kurais e iji God fu kuama fu ari ruainma iji fuk fu agan besum ijia uinvene ruain. Jesu Kurais fuk fu God ga fu ire fok samuagdiamon. Ijefuon na vierafe noka tavan bog Jesu Kurais dab aroikfuon. Mare.   
\p
\v 6-7 Regavo God irerag fu e Jiusbuon rekro kuainma iji fu arekma bakin. Fu rek revo e Isrer roin ga e Eburamon uifarif ijia bu Godon e renva bakin. Regavo God fu usuibe e Eburam fu ijeg kua, Farif on Aisek kuaivo ijar e iji na usuibe imut tuainva ga bu kege uniainva iji nafekno kuain.  
\v 8 Regavo e Eburamon uifarif ijia e roin buba Godon afijaf rek. Revo fu e iji God fu usuibe bu kege uniainma ijesugin bu ma Eburamon uifarif rek.  
\v 9 Regavo usuibe God fu vuak be ijeg kuai,  
\q1 Na tavan iji na abedenva ijia una bara Sera kuaga fu am farif be nafekno kuain.   
\p
\v 10-13 Areme rad e Aisek fun uri ofrene bara fuon Rebeka kuavo iji aben. Regavo Rebeka fu am farif fuatkaruk nokarok (2) nafega God fu Rebeka ijeg kua, Na vierafe amon amur e Iso kuavo iji fu una uviaifuon diar e Jekaf kuavo iji nidoime vo fu agoikno kuain. Regavo vuak iji God fu Rebeka kuardainma iji bun usuibe buk akaij ijia ijeg isoime kuai, Na vierafe na e Jekaf fuonkua oijmak revo e Iso na ziegafakno kuain. Regavo God vuak iji fu kuainma iji bara Rebeka fuba am fuatkaruk iji nafenma ijia fu ijeg kuain. Regavo madu am nokarok (2) iji buba koikbuon uri unam ma ga ise iji giame vierafenva ijia God fu vuak ijeg amur buifuon kuain. Regavo e Iso ko Jekaf bu ire kafo ma renva ijefuon God fu bu kege uniainma bakin. Regavo fun Godri fuon vierafenma ijia fu e besum (1) oijmaga be fu ijia aren.   
\p
\v 14 Regavo no God e iji fu vierafene ke uniainma ijefuon noba kuaik. Ijefuon maiji fuiji fuka roinknum reno bakin.  
\v 15 Ijefuon maiji God fun usuibe e Jekafon uifarif ijiebuon e Mosis kua,  
\q1 Na e iji na kege uniainva na ijin ifejdiak. Regavo madu na e iji na kege uniainva na ijiebuon oifian abekno kuain.   
\p
\v 16 Ijefuon e iji God fu kege uniamo iji bum e ijieb buon vierafejo ijia ga giriesavo ijefuon God fu bu kege uniamo bakin. Revo fun Godri buon oifian abene e ijekin iji ifejdiam.  
\v 17 Regavo God fu usuibe buk akai bu isoinva ijia e bomana be ai Ijift samuamo if fuon Fero kuardainma iji fu ijeg kuai,  
\q1 Na a kuava a e ikin renma ijefuon maiji na daro nun abe a maga a abe e fok nijaidiaga bu ijia game vierafero naiji na e darokiro bu ijeg vierafek. Regavo madu ar vuak nun ma iji ga if nun bomana iji abe e fok nijaidiakno kuain.   
\p
\v 18 Ijefuon God fu fuon vierafenma ijia fu e kafo giame buon oifian abeknum ifejdiamon. Regavo e kafo fu giame oibuon kege karoiga bu dazme una Godon vuak faivo ma vierafejo bakin.   
\s1 Godon ziemo ijiga fuon ma rediamo ijin  
\p
\v 19 Regavo e kafo ja una na kiek, Fu Godri fuon vierafenma ijia no kege unuoknum no maguom. Regavo God fu ijegreno e igi fu erar Godon vierafe iji uzamo bakin. Regavo e igi bu oine ise kafo rejo God fu irerafuon ise buon giame kiaknum ke bu namdiak.  
\v 20 Regavo efnun ja vuak ijekin iji jaib una God kuardak. Regavo ni saror bu duok nifiejo iji vierafef. Saror fuba una e iji fu amarenma iji kuak, A irerafuon na abe ijeg amaremno kuak? Saror fu una ijeg kuakma bakin.  
\v 21 Regavo e iji saror amardiamo iji fu sakimug besum ijia abe fuon vierafenma ijia saror nokarok (2) amardiak. Saror be fu amarekin bu tavan bog duok nifie ik revo be fuka amarkin bu tavan mamkanuk ijesugin abe duok nifiek.   
\p
\v 22 Regavo God fuk fu e iji saror amardiamo fu ijeg ren. Fu fuon vierafenma ijia fu fine e Jius iji kege unam kafokafo buon ren. Ijefuon God fu fuon fu vierafenma ijia fu e iji ise renva iji uzain. Regavo madu fu e iji bu ise rega fu kam vajai fian vajiamo ijia fu daro fuon abe e fok nijaidiain. Regavo ni vierafe e iji bu Godon nifak ijia ise reoinva iji God fuka ma deajin ga fuka e iji kam arafiriakfuon. Regavo fuba ijeg ren revo fu vek afuime buna isuar fi ruain.   
\p
\v 23 God fu e iji ise renva iji fu afuime isuar buna finma ijefuon maiji fu fuon ma kediamon iji abe e Jius iji miakro fu ijefuon ijeg ren. Regavo fu madu vierafe fu fuon sanainma iji abe e igi no fu usuibe kege unuinma iji muokafa fu ijeg vierafen. Regavo madu fu nuvuifuon oifian abeknum fuon sanainma iji abe muokafa fu ijefuon nona isuar fin.  
\v 24 God ire iji fu rekma fu e igi no fu kege unuinma iji nuvuon rek. Regavo ire iji fu rekma fu e Jius ijesugin ijegrekma bakin revo fu e Jius bakin igi no madu ijeg rek.  
\v 25 Regavo buk e Osia fu isoinma ijia God fu ijeg kuai,  
\q1 E iji buba e nun renva iji na kiaga bu una e nun rek. Regavo e iji naba bu oijmiainva iji na kia nan ja oijmiavno kiak.   
\m
\v 26 Regavo madu buk besum ijia God fu e Jius bakin iji kia,  
\q1 Jaiji ja e nun bano kiainva iji fu una kia, Jaiji ja God iji tavan bog ijia fivako ijefuon afijaf renvano kiain.   
\m
\v 27 Regavo madu buk Asaia ijia fu madu e Isrerkobuon ijeg kuai,  
\q1 E Jius ai Isrer ijia karinva iji buka ire jier bu davo bakin ijeg uruvana rek. Regavo e sibank bu God ma vierafega God fu e ijesugin karauniak.  
\v 28 Regavo tavan iji fun samairen ijefuon fu e fok bu iserejo iji fu kam arafiriakno kuain.   
\m
\v 29 Regavo madu buk Asaia ijia vuak be fu madu ijeg kuai,  
\q1 God fuba nuvuon oifian abene ifejduinmabatie noiji noka ai Sodom ga Gomora God fu kam arafiriainma ijeg fu madu no kam ijeg arafiruokno kuain.   
\s1 E Isrerko bu God ba ma vierafenva ijin  
\p
\v 30 Ijefuon non ga e Jius bakin iji bu ur bu unam God fu e karauniame una ke unam fuon ma ijia uniamo iji buba nisaime aben revo iviakma bu unam iji bun aben. Ijefuon maiji bu ma vierafega Jesu fu ise buon ijefuon guain ijefuon God fu bu karauniame ke una unam fuon ma ijia uniain.  
\v 31 Regavo e Jius iji bu ur Godon unam ma iji abekuai giriesainva iji buba aben. Ijefuon maiji bu Godon akaij iji buba mukorigia igiain.   
\p
\v 32 Bu Godon unam ma iji buba abenva ijefuon maiji buba God ma vierafen. Regavo bum vierafero bu Mosison akaij iji mukoi igiavo ijefuon God fu buon oimarkro bu ijeg vierafen. Bu ijeg vierafeknum reoijo ijefuon God fu buk akaij ijia fu Jesuon ijeg kuai,   
\q1
\v 33 Na ai Jerusarem ijia e be abe mun igeg ijia ruabesek. Regavo mun ijar maniknum e uruvana diak nizukiaknum atog kaniak. Regavo erar fu mun iji ma vierafekma e iji fu tavan rad fuba oifian abekno kuain.   
\c 10  
\s1 E Isrerko bu Godon unam ma iji bun amasuainva ijin  
\p
\v 1 Efnun na oinun guf ijekma na e nun Jiusbuon Godon sirimamej. Na vierafero God fu bu karauniakro na iji fuon sirimamej.  
\v 2 Regavo na ma kuardiav e nun Jius iji buka Godon unam ma iji abekuai buka giriesame nisaiv. Regavo unam buon bu God nisaikfuon iji buka ba mukoi vierafen.  
\v 3 Bu unam ma iji God fu e karauniamo iji buba game aben gavo buka una unam buon bu vierafenva ijia reoij. Ijefuon bu Godon unam ma iji fu e karauniamo iji buba abekuai ijef ren.  
\v 4 Bu vierafero bu koikbuon giriesame mukorigia keojknum akaij iji igiaga God fu karauniakro bu ijeg vierafej. Regavo iji fuka ma bakin. Regavo bu Jesu Kurais ma vierafekva God fu bu karauniame ke una unam fuon ma ijia uniakfuon.   
\s1 God fuka e fok karauniakro vierafenma ijin  
\p
\v 5 Regavo unam iji God fu izeg e karauniame ke unam fuon ma ijia uniamo iji fun e Mosisri usuibe buk akaij ijia ijeg isoime kuai,  
\q1 Eraneb bu Godon akaij iji mukoi samuagdiame igiavo e iji bu tavan rad bum ijia ma karivak.   
\p
\v 6 Regavo unam izeg no ma vierafega God fu no karaunuome ke una unam fuon ma ijia unuokfuon iji bun usuibe buk akaij ijia ijeg isoime kuai,  
\q1 Jab oijon ijia vierafene kuai erar ajie vake varur gufia kekome Jesu Kurais afem ari roga fur no karaunuokno kuaik.   
\p
\v 7 Regavo madu jab oijon ijia vierafene kuai,  
\q1 Erar va zuarunam kekome Jesu Kurais afem roga fur no karaunuokno kuaik.   
\p
\v 8 Regavo Godon vuak ma iji fu e karauniakafa fu kuainma iji fu ja samaij ijija. Regavo vuak iji fun oijon ijia nam ga madu jan ir jon ijia kuaimoij. Regavo iviakma vuak igi no kuardiavo iji non e besum Jesu Kuraison vuak ijin abe ja kuardiav.  
\v 9 Ijefuon ja e fok ijiebuon nifak ijia ja kuai, Jesu fu E Bomanano kuaikva God fu ja karauniak. Regavo madu ja oijon guf ijia ma vierafero Jesu fu guain revo Godri kuama fu una urinmaro ja ijeg vierafekva God fu ja karauniak.  
\v 10 Ijefuon ja oijon ijia ma vierafekva God fu ja kege una unam fuon ma ijia uniak. Regavo madu ja ir jon ijia e fok ijiebuon nifak ijia kuai Jesu fu E Bomanano kuakva God fu ja karauniak. Ijefuon erar fu tavan bog ire nokarok (2) iji reoinon iji God fu e iji keunak.  
\v 11 Regavo buk akaij ijia vuak irerag bu Jesuon kuainva iji fuka ma ga vuak iji fu ijeg kuai,  
\q1 Erar fu Jesu ma vierafeno e iji fuba oifian abekno kuain.   
\p
\v 12 Regavo God fu e Jius ijesugin ifejdiamo bakin revo fu e Jius bakin iji madu giame ifejdiamon. God fu e fok ijiebuon E Bomana ijefuon e iji bu fu kumejo fuka ifejdiame ire ma ijesugin buon ren.  
\v 13 Ijefuon maiji God fu usuibe buk akaij iji bu isoinva ijia kuai,  
\q1 Erar fu E Bomana ijefuon if iji oifuon fok kuakma God fu e iji keunakno kuain.   
\p
\v 14 Regavo eraneb buba amur Jesu Kurais ma vierafekva bu izeg kuaiga fu faime ifejdiakma bakin. Regavo madu bu vuak fuon buba faikva bu izeg fu ma vierafekva bakin. Regavo e kafo bu Jesu Kuraison vuak iji buba abe kuardiakva bu izeg vuak iji faikva bakin.  
\v 15 Regavo God fuba e iji Jesuon vuak abe oijo iji kia bu vuak maiji abe usem vakva bu izeg vuak ma iji abe e roin kuardiakva bakin. Regavo e iji bun Jesu Kuraison vuak iji bun fain. Ijefuon maiji vuak ijefkin be bun usuibe buk akaij ijia isoime kuai,  
\q1 Magoido e iji roko iji bu Godon vuak ma iji abe rokno kuain.   
\p
\v 16 Regavo e uruvana buba Godon vuak ma iji faime abe oibuon ijia abeden. Regavo madu e Asaia fun gaga e uruvana bu Godon vuak ma iji buba abekrejga fu ijefuon buk akaij ijia vuak be ijeg isoime kuai,  
\q1 E Bomana no vuak on ma iji abe e roin kuardiain revo e uruvana buba vuak on faime ma vierafenvano kuain.   
\m
\v 17 Ijefuon e iji Godon vuak abe oijo bu Jesu Kuraison vuak iji abe e roin kuardiakva bu Godon vuak ma iji faik. Regavo bu Godon vuak ma iji faikva bu fu ma vierafek.   
\p
\v 18 Regavo E Isrerko iji kabu Jesu Kuraison vuak iji bun faime ma vierafen? Na vierafe bun usuibe fain. Ijefuon maiji bun usuibe buk akaij ijia isoime ijeg kuai,  
\q1 Bu Godon vuak fok bu nijaidiaknum kuardiainva iji bun abe kuaime ar iror fokigia oin. Regavo madu vuak iji bu abe kuaimoinva iji e aibe ijia karioinva iji bun faim barenvano kuain.   
\p
\v 19 Regavo vuak iji God fu kuainma iji fu e Isrerkobuon ijeg kuai, Ja unam nun na e karauniavo iji ja uzakva na una e Jius bakin iji ifejdiame karauniakno kuainma iji kabu vierafen ki bu bakin? Na vierafe vuak iji bun fain. Ijefuon maiji fun Mosisri usuibe ijeg kuai,  
\q1 God nar e Isrerko iji bu naba ma vierafejo ijefuon na una e Jius bakin iji bu na ma vierafejo bakin iji ifejdiame karauniak. Na ijeg karauniaga e Isrerko bu iji gia buka deajidiaga kabu ijiason una na ma vierafekno kuain.   
\p
\v 20 Regavo madu usuibe God fu e Asaia kuama fu vuak ijefkin be vierafe mama fu ijeg kuai,  
\q1 E Jius bakin iji bu naba nisaidienva iji bu na giek. Regavo madu e Jius bakin iji buba nana vuak kuaikuai vierafejo iji bu na giek.   
\p
\v 21 Regavo madu usuibe God fu e Isrerkobuon fu ijeg kuai,  
\q1 Na tavan jaoijor na e Isrerko iji imut tairene samuagdiain. Regavo buka na uzame una nun ire ise kafokafo renvano kuain.   
\c 11  
\s1 God fu vek E Isrerko oijmiamo ijin  
\p
\v 1 Ijefuon ja vierafe God fube e fuon Isrerko iji nuigafiain ki fu bakin? Iji fuka ma bakin! God fuka ba bu nuigafiain. Na ijeg kuardiavo ijefuon maiji nak na e Isrerko gavo madu na e Eburamon uifarif na e Bezimanon agan ijia uinvene ruain.  
\v 2 Regavo God fu e fuon fu usuibe kege nainma iji fuba bu nuigafiain. Regavo jan vierafe usuibe e Eraija fu e moik Isrer karinva iji buisina una God soisoime kuardainma iji jan vierafen.  
\v 3 E Eraija fu God ijeg kuai,  
\q1 E Bomana bu e on vuak vierafene kuaivo uruvana bun kaniain. Revo madu bu fata on no ijia isuf baroijo iji bun kam kania taosen. Regavo e iji vek a ma vierafejo iji na nunkua fij revo buka vek giriesame nak kaniekrej.   
\p
\v 4 E Eraija fu ijeg kuardamga God fu una roin kua,  
\q1 Na e seven taosen (7,000) ijeg na ke uniainva bu vek e nun. Revo e iji na kege uniainva iji na giamga bu god kufui Bar bu kuavo iji buba fuon ato same sirimamej.   
\p
\v 5 Regavo God usuibe fu renma ijeg fu iviakma e Jius sibank igi no fu fuon izeg fu ma rediamo ijia fu no kege unuin.  
\v 6 God fu fuon ma rediamo iji fu e fuon iji nijaidiame ke uniam. Regavo bu e ijieb buon izeg bu mukoi kegoijo fu iji giame ke uniamo bakin. Regavo God fu buon izeg bu mukoi kegoijo ijia giame ke uniamobatie fuon ma rediamo iji fuka markma bakin.   
\p
\v 7 Ijefuon non game vierafega e Isrerko uruvana bu unam ma iji God fu izeg e karauniamo iji bu giriesame nisaivo iji buka ba gain. Regavo fu e sibank kege uniama bu unam fuon ma iji game aben. Revo e Jius roin bun Godri vierafe buon iji fuka bijuin ijefuon bu Godon unam ma iji izeg fu e karauniamo iji buka ba gain.  
\v 8 Regavo e Jius iji bu unam ma iji ba gainva iji fun Godri usuibe buk akaij ijia ijeg kuai,  
\q1 Godri oibuon ga nigen buon bu vierafejo iji fun mukorigia bijuin. Ijefuon oibuon fuka rubdian ga madu nigen buon buka samafrenva bakin. Fu ni buon vajiain gavo ni buon buka taikin ijefuon unam ma iji buba mukoi gain. Fu ada bu vuak faikfuon iji kege vajiain revo buka vek ba mukoi faivknum rokno kuain.   
\m
\v 9 Regavo madu e Devid fu usuibe vuak besum ijefkin iji ijeg kuai,  
\q1 God fu ire ma iji uruvana vajiainma ijefuon bu iro ine oimarev. Bu vierafero God fun buon oimarmoro bu ijeg rej. Regavo bu iro ine utufutu abejo ijia God fu bu kam arafiriaga bu vajai fian abek.  
\v 10 Regavo Godri ni buon iji nufiaga bu Kaven Akai fuon ijefuon unam ma iji buba giak. Regavo madu bu ise rejo ijefuon fu ni buon bu kam vajai fian vajiaga bu tavan bog afikin abeokno kuain.   
\p
\v 11 Regavo ja vierafe e Jius buka ise uruvana rejo ijefuon God fuba bu mukorigia nuigafiain ki fu bakin? Na vierafe iji fuka bakin. Regavo bu ise renva ijefuon God fu una e Jius bakin iji ifejdiame karauniam. God fu ijegrega e Jius iji bu ijia una e Jius bakin ijiebuon unam ma iji bu rejo iji gia buka deajidiaga bu ijia una oi karoime Jesu Kurais ma vierafekfuon.  
\v 12 Regavo e Jius iji bu Jesu Kurais uzainva ijefuon God fuimve una e fok moikigia karinva iji karauniakfuon. Regavo e Jius iji bu una Jesu Kurais ma vierafekva God fuka e Jius abevo e Jius bakin iji madu ifejdiame unam fuon ma iji abe miak.   
\s1 God fu e Jius bakin iji karauniain  
\p
\v 13 Regavo vuak igi na una e Jius bakin iji ja kuardiakrej. Naiji fu Godri e Jius bakin iji joifuon kiema na uri jon ruain. Ijefuon na God ik irerag fu na kiema na ruainva na iji bomana vierafene rej.  
\v 14 Regavo na vuak ma iji abe jon ruainva ijefuon na vierafe enun Jius roin bu iji giekva buka deajidiak. Bu deajidiakva kafu bu una oi karoime Jesu ma vierafega God fu bu karauniak.  
\v 15 Regavo God fu e Jius iji fu uzainma ijefuon fu e fok moikigia karioinva iji karauniame aferdia una kaifijaf ren. Regavo naba gain God fu rad una e Jius iji ijegrekma kabu una e izekin rek? Na vierafe God fu una bu karauniakma buka e iji bu aoime una urijo igeg rek.   
\p
\v 16 Regavo Eburam ga e iji bu usuibe Godon vuak vierafene kuaivo iji bur Godon e rekva uifarif buon iji buk bu Godon e rek. Ijefuon na be bijame kuardiakno ni faif. In ijefuon gireg iji fuka ma rekma na vierafe in kiak iji buk buka ma rek.  
\v 17 Regavo madu igia fai. God fu e Jius iji fun uij kafo juar fuon ijia vit zubitrenva ijeg fun jafene ke koren. Regavo ja e Jius bakin iji ja fun Godri uij nita ijia irenva ijeg fu kege una juar fuon ijia oido ja mukoi tavuame irasek.  
\v 18 Regavo e Jius bakin igi jab uri koikjo kam ajieme una e Jius iji God fu uij vit zubitrenva ijeg jafene ke korenma iji neseme giak. Regavo e Jius bakin iji ja ijeg vierafene koikjo aroikaravga ni mukoi vierafef. Fu uij ijar moik iji ifejdamo bakin gavo fu moik ijar uij ifejdame safik maga fu mukorigia tavuame irasem. Ijefuon e Jius bakin iji jaiji ja uij igekin gavo e Jius iji bu moik igekido bur ja safik miaga ja mukoi tavuame irasek.   
\p
\v 19 Regavo naba gain jakafu kuaik God fu e Jius iji bu uij kafo bu vit zubitrenva ijeg fun jafene ke koren. Ijefuon God fu e Jius bakin iji fu uij nitako igeg kege una juar fuon ijia oido bur e Jius ijiebuon ar iji abekgavo jakafu ijeg vierafene kuain.  
\v 20 Ja ijeg vierafekva iji fun maren. Ijefuon maiji e Jius iji buba Jesu Kurais ma vierafenva ijefuon God fu bu nuigafiain. Revo e Jius bakin jaiji ja Jesu Kurais ma vierafenva ijefuon God fu ja kege una e Jius iji fu uzainva ijiebuon ar ijia uniak. Ja e Jiusbuon ar iji jar aben ijefuon jab uri koikjo aroikarak gavo nin juvknum of.  
\v 21 Regavo e Jius iji buka Godon uij vit mukoi tavuavo ijin gavo God fu uij ise igeg jafene ke koren. Regavo ja e Jius bakin iji jaiji ja uij nitako igekin ijefuon ja aroikaraknum ijeg ise rekva God fu jak jafene ke korek.   
\p
\v 22 Regavo ni vierafe God fuka e mukoi ifejdiaknum oijmiamo. Regavo madu tavan kafo fuka e kam arafiriaga buka vajai fian abeknum oifian abejo. Regavo God fu e Jius iji kam arafiriaga buka vajai fian abenva ijefuon maiji bu koikbuon fu nuigafainva ijefuon fu ijeg ren. Regavo e Jius bakin iji ja God ba uzain gavo jaka fu mukorigia oijmaknum ma vierafekva fu e besubesum ja mukorigia ifejdiaknum oijmiak. Regavo jaba ijegrekva fu uij iji fu jafene koremo ijeg fu madu ja kege korek.  
\v 23 Regavo e Jius iji bu una Jesu Kurais ma vierafekva God fu bu uij igeg kege una juar fuon ijia ok. Ijefuon maiji God fu e darokido fu aferdiaga bu una e fuon rek.  
\v 24 Regavo e Jius bakin iji ur jaiji ja Godon afijaf renva bakin. Regavo iviakma God ja fun kega ja una e fuon ren. E bu uij nitako ijia kege una juar ijia oijo bakin. Regavo God fu e Jius bakin iji fu unam ijegrene ire ma iji fu ur kege e Jius iji vajiainma ijeg fu ire ma iji kege una bu vajiam. Regavo e Jius iji buka uij ni mukor iji bu Godon juar ijia tavuavo igekin gavo fu Godri koikfuon uzame jafe ke koren. Regavo God fu vierafe fu una uij fuon fu jafe korenma iji kekro vierafekma fu samakaf ijia kege una juar fuon ijia oga bu una mukorigia tavuak.   
\s1 God fu e Isrerko fok karauniakfuon  
\p
\v 25-26 Efnun na vierafe ja vuak ma iji sauivkin igi na kuardiakrejo amarigia faikfuon. Na ijeg kuardiakin jab aroikarame vierafero jaiji ja e ma ga e Jius iji bu e isero jab ijeg vierafekfuon. E Isrerko uruvana buka oi karoime una ire ise kafokafo reoknum God uzaken. Bu ijeg vek ise reoke e Jius bakin iji God fu kege uniainma iji buka uruvana Godon ruakega rad God fuson ijar e Isrerko iji karauniak. Ijefuon maiji Godon buk akaij ijia bun usuibe ijeg isoime kuai,  
\q1 E iji e fok igiebuon ise ijia karauniakfuon iji fu Godri e fuon Isrerko ijia be kuaga fu ruak. Regavo e ijar e Jekafon uifarif fok bu unam ise ijia kegoijo iji karauniame aferdia una unam ma ijia uniak.  
\v 27 Na tavan ijia vuak iji na ur kia na rekno kiainva ijeg na ise buon giame arekno kuain.   
\m
\v 28 Regavo e Jius iji bu Godon vuak ma iji buba mukoi faikuai vierafenva ijefuon buiji bu Godon e ani ren. Regavo e Jius bakin iji jaka mukoi ken ijefuon God fu ire ma iji uruvana jon ren. Regavo God fu e Jius iji fu vek oijmiam. Fu vek oijmiamo ijefuon maiji fu saifarif iji fu vek ijia kia fu ire ma kafo vajiakno kiainma ijefuon fu vek e Jius iji oijmiam.  
\v 29 Regavo God fu oi dakaroime una kafokafo vierafeno bakin. Regavo fu vierafe fu ire ma kafo kege e kafo vajiakreno iji fum kege vajiam. Regavo madu fu vierafe fu e roin kega bu e fuon rekva iji fum kege uniam.   
\p
\v 30 Regavo ur e Jius bakin iji jaiji ja God igavo bakin. Regavo iviakma e Jius bu God buba igavo ijefuon God fuim una e Jius bakin iji jon oifian abene ise jon ja rejo iji giame areknum karauniam.  
\v 31 Unam besum ijeg God fu izeg jon oifian abene karauniamo ijeg fu rad una e Jius iji bu iviakma fu uzainva iji buon oifian abene karauniak.  
\v 32 Regavo God fu vierafe fu rad e fok ifejdiame karauniakro fu ijeg vierafene areko e fok bu unam ise iji reoin.   
\s1 God fuka e darokin ga fuon sanainma iji fuka ma bomana  
\p
\v 33 Barim God nuvuon iji sibe. Fuon izeg fu vierafene reno iji fuka ma ikin. Regavo madu ar fuon ijia ire ma iji buka ma uruvana ijia naoiv ijefuon fu erar daknum ga mimgiakma bakin. Regavo irerag fu rekro vierafeno ijiga unam izeg fu ire kafokafo reno iji no izeg giame vierafekva bakin.  
\v 34 Ijefuon maiji vuak ijefuon maiji bun usuibe buk akaij ijia isoime ijeg kuai,  
\q1 E Bomana fu vierafeno iji fu erar gain ga madu fu erar uguai kuardamo bakin.  
\v 35 Regavo fu erar E Bomana iji ire ma kafo vajainma ijefuon fu una roib ire ma kafo vajakno kuain?   
\m
\v 36 Regavo ire fok fu Godri amardiainma ijefuon bu daro fuon ijia ni uria kariko fu daro fuon ijia samuagdiam. Ijefuon ire fuon fok bu una if fuon iji dab aroik. Regavo na vierafe e fok buk bu tavan bog fuon sanainma iji dab aroik. Mare!   
\c 12  
\s1 Unam ma iji God fu vierafenma ijia karivakfuon ijin  
\p
\v 1 Efnun God fu unam kafokafo ijia oifian nuvuon guome ifejduomo. Ijefuon na ja soisoime kia, Ni oijon fok ka kege isuf igeg vo e akaij igeg God vajame fuifuon ikref. Regavo ja ijegrekva iji jan unam ma iji ja God aroikfuon ja iji rej. Ijefuon God fuka jon oimarek.  
\v 2 Regavo jab uri e kafo moikigia God ba ma vierafenva iji giame unam ise bu rejo ijeg kegok. Regavo nika arega fu Godri oijon kege karoiga ja una unam fuon ma iji vierafeokfuon. Fur oijon ijin kege karoiga ja koikjo irerag fu vierafeno ijesugin vierafene reoknum ga unam ma iji ja kegokfuon iji vierafek. Regavo madu ja irerag God fu oimaikfuon ja iji vierafene kegokfuon.   
\p
\v 3 Regavo God fu fuon ma iji fu abe na mien ijefuon na e besubesum ja kia, Jab aroikarame koikjo if jon kam ajiek rega nin isuar oi mafaime vierafeknum keof. Regavo fun Godri e besubesum oijon iji ja ma vierafekfuon iji kege vajiain ijefuon ni koikjo jon ja ma vierafejo iji giaknum keof.  
\v 4 Ijefuon ni igia fai e igi no vajai nuvuon fu besum revo vajai gurom fuka uruvana. Regavo vajai gurom uruvana bu besum afuime ik rejo bakin gavo buka ik ni kafokafo rejo.  
\v 5 Unam besum ijeg vo e iji no Jesu Kurais ma vierafejo iji noka e uruvana gavo no ik kafokafo rej. Regavo no vek vajai besum igekin ijefuon maiji no Jesu Kuraisna agan besum ren.   
\p
\v 6 Regavo God fun ik irerag kafokafo no mukoi kegokfuon iji fun kege e besubesum no vajuin. Ijefuon no Godon daro iji fu no vajuomo iji kege ik irerag fu no vajuinma iji reok. Ijefuon fu daro muome kuo jaka vuak nun abe e roin kuardiafno kuokma iji noka ijeg rek. No oinuvuon no ma vierafekfuon iji God fu vajuinma ijia vierafeknum vuak fuon abe e roin kuardiak.  
\v 7 Regavo fu daro muome kuo jani e roin nijaidiafno kuokma iji noka e nijaidiak. Regavo madu fu daro muome kuo jani e roin ifejdiafno kuokma iji noka e roin ifejdiak.  
\v 8 Regavo fu daro muome kuo jani e roin ejafiame kuardia bu ik buon mukorigia rejno kuokma iji noka ijeg rek. Regavo eraneb fu ja daro miame kia sinuom jon e roin vajiafno kiakma nika oijon ijekma vajiaf. Regavo eraneb fu ja daro miame kia ni e jon samuagdiafno kiakma nika giriesame bu mukorigia samuagdiaf. Regavo madu eraneb fu ja daro miame kia ni e kafobuon oifian giame ifejdiafno kiakma nika oimarknum ifejdiaf.   
\p
\v 9 Regavo madu igia fai ja e roin oijmiakva jab kufuimene oijmiak revo nika mukorigia bu oijmiaf. Regavo nika unam ise iji mukorigia giame nuigafiame una Godon nifak ijia unam ma ijesugin nikajiame keof.  
\v 10 Regavo jaiji jan Godna agan besum ren ijefuon nika mukorigia jon oijmanamif. Regavo madu nika kaifjon mukorigia agordiakfuon iji abe bomana vierafe of.  
\v 11 Regavo jab zazaik nika giriesame E Bomana ijefuon ik iji reof. Regavo madu nika oijon ga kaven jon ijekma E Bomana ijefuon ik iji reof.  
\v 12 Regavo ja ma vierafega God fu rad ire ma kafo jon rekma iji nika oimarknum samua kariof. Regavo madu ja oine unam kafokafo ijia vajai fian abekva jab ijefuon uruvana vierafek. Regavo nika tavan bog giriesame Godon sirimameknum kariof.  
\v 13 Regavo kaifjon kafo bu sinuom kafo karekuai ijefuon oifian abe oijoga nin on a nainma ijia kafo ke vajia. Regavo madu ni e iji bu aibino ijia roko iji oimarknum aferdia bu jana naoif.   
\p
\v 14 Regavo madu e roin bu ja arafiriame vuak ise joisina kuaivga ni God kua fu e ijiebuon ma redia gavo jab God kuaga fu bu kege arafiriak.  
\v 15 Regavo tavan iji e bu oimareoijo iji ni buna oimaref. Regavo madu tavan iji e bu oifian abejo iji ni buna oifian abef.  
\v 16 Regavo madu ni e fok ijiena afuim kariogavo jab aroikarak nika una e nui bakin rene ik ukakna roin iji oimarknum reof. Revo jab koikjo vierafero no e ma ga ire ma ijesugin reoijoro jab ijeg vierafek.   
\p
\v 17 Regavo igia fai e kafo bu ise kafo jon rekva jab una vef roin buon ise rekuai vierafek. Regavo nika tavan bog e fok ijiebuon nifak ijia ire ma ijesugin mimatame reof.  
\v 18 Regavo madu ni God daro fu miainma iji abe giriesame e iji bu ise rejo iji turamdiaf. Ja ijegrekva ja e fok ijiena afuim karik.  
\v 19 Regavo efnun e kafo bu ise kafo jon rekva jab una vef roin buon ise rekuai vierafek revo ni arega fu Godri e iji ziegafiame kam arafiriak. Ijefuon maiji God fun usuibe buk akai fuon bu isoinva ijia fu ijeg kuai,  
\q1 Erar fu ise kafo rekma God na e darokido nar una vef roin fuon ise rek.   
\m
\v 20 Ijefuon jab una ef roin ise rekuai vierafek. Regavo madu buk kafar be ijia fu ijeg kuai,  
\q1 Erar fu ja ziegafiamo iji fu vasiaguakma nika ire kafo una fu vajaf. Regavo madu fu do kafakma ni do jiame maga fu i. Ja ijegrekva e iji ziemo iji fu unam iji ja rejo iji game una ise fu renma iji vierafekma fuka juk.   
\m
\v 21 Regavo jab zazaiga e iji jon ise rejo ijieb rareme ja asidiak. Regavo nika jar giriesame una e iji bu jon ise rejo iji ma rediaga bu oi karoime ise bu rejo iji bu ijia aref.   
\c 13  
\s1 E mamkanuk moik kafokafo samuagdiavo iji igiakfuon ijin  
\p
\v 1 Regavo efnun igia faif e fok jaka e mamkanuk jon bu ja samuagdiavo ijiebuon ir abene bu igiaf. Ijefuon maiji fun Godri usuibe bu kege uniainma ijefuon bu ja samuagdiav. Regavo God fu daro iji fuba abe bu miainmabatie bu e mamkanuk rene no samuagduokva bakin.  
\v 2 Ijefuon eraneb bu e mamkanuk iji uzame vo vuak buon ba faivo iji buk God irerag fu rekafa vierafenma iji bu uzav. Regavo eraneb bu e mamkanuk iji uza vo vuak buon ba faivo iji bu koikbuon unam amarvo ijefuon e bu bu kam vajai fian vajiak.  
\v 3 Regavo God fu e mamkanuk iji fu kege uniainma iji bu e unam ma kegoijo ijieb bu giame jukva bakin. Regavo bu e iji ise kegoijo ijieb e mamkanuk iji giame juk. Ijefuon erar fu e mamkanuk fuon fuba giame juvknum vierafekma iji ni unam ma ijesugin reoine. Ja unam ma ijesugin kegokva e mamkanuk jon bu una ja kam arordia vo nidosiak.   
\p
\v 4 Regavo e mamkanuk iji bun Godri kege uniainma ijefuon bu ja mukoi samuagdiav. Regavo ja ise kafo rekva ni e jon mamkanuk iji giame juf. Ijefuon maiji buiji bu daro nado bu ise jon ja renva ijefuon ja kam vajai fian vajiak. Regavo e mamkanuk iji bun usuibe Godri kege uniainma ijefuon bu Godon ik rej. Ijefuon bu e iji ise rejo iji kege vajai fian vajiaga bu ijia giame vierafero God fu e ijekin iji fu ziegafiamoro bu ijeg vierafek.  
\v 5 Ijefuon ja e jon mamkanuk iji ja ma ijefuon bu igiak. Regavo ma be iji ja e mamkanuk jon jaba igiakva bu ja kam vajai fian vajiak. Regavo madu be iji jan vierafen e iji bu e mamkanuk jon ijefuon jaka bu igiak.   
\p
\v 6 Regavo e mamkanuk jon bu takes mon ijefuon ja kiakva ni mon kege takes ref. Ijefuon maiji e mamkanuk iji ja buon takes rejo iji fu Godri kege uniainma ijefuon bu fuifuon ikreknum ja samuagdiav.  
\v 7 Regavo e mamkanuk gaman ijia ik rejo ijieb mon ga ire kafo ja vajiainva bu ijefuon kiakva ni migegare una ef vajiaf. Ijefuon e takes abeoijo e roin bu ja monfuon kiakva ni migegare vajiaf. Revo igia fai naka ja soisoime kuardiavno jaka e mamkanuk jon fok agordiaknum bu nidosiame arordiaf.   
\s1 Tavan iji God fu e karauniakfuon iji fun samairenmano nika oijmanamif  
\p
\v 8 Ijefuon e kafo bu mon ga ire kafo kege ja vajiakva ni migegare una ef kege vajiaf. Regavo ire be iji ja tavan uruvana rekfuon iji nika e fok oijmiaf. Ijefuon maiji eraneb bu e fok mukorigia tavan uruvana oijmiakva bu Godon akaij iji bu igiavo iji fuka ijekma riarek.  
\v 9 Regavo ni vajai jon ja oijmiavo ijeg e fok oijmiaf. Ja ijeg jon oijmanamikva jab jon zienamiknum niesanamik. Regavo madu jab e kafobuon bara turaknum sinuom buon iji giame oi bomana vierafek. Revo God akai fuon fok fu kege Mosis vajainma iji fun akai besum izar akai fok fur okuriain. Regavo akaij iji vajai jon ja oijmiavo ijeg una e roin oijmiaf.  
\v 10 Regavo ja e roin ijeg mukoi oijmiakva jab ise kafo buon rekfuon. Ijefuon eraneb ja ijegreoijo iji ja Godon akai fok jan mukoi igiav.   
\p
\v 11 Regavo ja vuak fok na kuardiava jan ijegreoijo ijefuon ja ni nisuime karijo bakin. Ijefuon nika ijeg ni narame kariof ijefuon maiji tavan iji Jesu fu una ise nuvuon fok no moikigia reoijo ijia karaunuokafa roko iji fun samairen. No ik Jesu no ma vierafenva ijia no kuai tavan iji Jesu fu una ruakreno iji fun samairenmano kuain gavo iviakma ijar tavan iji fuka ma samairen.  
\v 12 Regavo tavan nuvuon moikigia no karine roko iji fun tavan irasekreno ijeg barek ren. Regavo tavan iji no una Jesu Kuraison sanainma iji gakrejo iji fun samairen. Ijefuon no unam ise fok e bu naki reoijo ijeg no reoijo iji noka kege gareg kozegavo una unam ma ijesugin keok. No ijeg kegokva noka e iji bu tavan iji bu bijaikuai jua magu buon kege samua karijo ijeg nok madu no samua karine ire ise fok Setan fu nuvuon rekafa roko iji rareknum karik.   
\p
\v 13 Regavo no uri Jesu Kurais fu una nuvuon ruainma igeg fuon sanainma ijia karikva fuka marek. Regavo jab uri do kugin iji ine nigen iserme duok uruvana ine jer foiknum barubara fudainamiknum unam ise kafokafo reok. Regavo madu jab uri oi isema vierafeknum joi bijaik.  
\v 14 Ja unam ise fok jab kegok gavo nika E Bomana Jesu Kurais abe ugon igeg vajai jon ijia abesef. Regavo jab ire ise uruvana vajai surif jon bu vierafenva ja kegoijo iji jab una kegok.   
\c 14  
\s1 Jab kaifjon ijiebuon ise iji giame kuaik  
\p
\v 1 Regavo e roin bu buon Jesu Kurais bu ma vierafejo ijia buka zazaivo ijefuon madu akaij iji buba igiaknum ga unam buon bu kegoijo iji buka kafokafo. No e ijekin iji bu buon vierafenva ijia kegoijo iji noba giame kuaik gavo noka oimarknum bu aferdia una nona agan besum rek.  
\v 2 E kafo bu buon vierafejo ijia buka duok uruvana ij gavo e roin bu buon vierafejo ijia bu zazatdiamo ijefuon bu duok roin ij gavo roin buba ij.  
\v 3 Ijefuon e iji duok uruvana ijo iji jab una e iji duok roin ba ijo iji giame kuaik. Regavo madu e iji duok roin buba ijo iji jab una kaifjon roin bu duok uruvana ijo iji giame kuaik. Ijefuon maiji God fu e iji bu duok uruvana ijo ijiga e iji bu duok roin ba ijo iji fu vek bu oimardiam.  
\v 4 Regavo jab e iji bu duok uruvana ijo ijiga e iji bu duok roin ba ijo iji giame arafiriak. Ijefuon maiji e iji bu joifuon ik rejo bakin revo bu God E Bomana buon ijefuon ik rej. Ijefuon fu koikfuon giamga bu isema rej o bu ma reoijo iji fur giame vierafek. Regavo fur e fuon ifejdiaga bu tavan bog fu ma vierafeknum mukorigia keok.   
\p
\v 5 Regavo madu e kafo bu vierafega fun marenma ijefuon bu tavan besum abe God aroiv. Regavo e roin bu vierafega fun marenma ijefuon bu tavan kafokafo bu God aroiknum oij. Regavo e besubesum no koiknuvuon irerag kafokafo no kegokva iji no koiknuvuon nigen nuvuon ijia vierafene keok.  
\v 6 Eraneb bu tavan besum abe God aroivo iji E Bomana fu oimaikfuon ijia rej. Regavo eraneb bu vierafega fun marenma ijefuon bu fanuf ijo iji bu E Bomana fu oimaikfuon ijia rejo ijefuon bu God oimardav. Regavo madu eraneb bu duok roin ba ijo iji bu E Bomana fu oimaikfuon ijia rej ijefuon bu una God oimardav.   
\p
\v 7-8 Regavo e fok moikigia oijo iji e besum be fu fuon vierafenma ijia oinon bakin. Regavo madu e be fu oine guamo iji fu fuon vierafenma ijia guamo bakin. Ijefuon ire nokarok (2) iji aoivo ijiga nivek karijo iji nom nuvuon vierafenva ijia rejo bakin gavo noka E Bomana fu vierafenma ijia rej.   
\p
\v 9 Jesu Kurais fu e fok aoinva ijiga nivek karinva ijiebuon E Bomana rekafa fu ijefuon guame una urin.  
\v 10 Ijefuon eraneb ja akai kafokafo igiavo iji jab uri kaifjon roin buba akai kafokafo igiavo iji giame arafiriak. Regavo madu eraneb ja akai kafokafo igiavo bakin iji jab kaifjon bu akai igiavo iji giame arafiriak. Ijefuon maiji e fok no tavan rad uri Godon nifak ijia irega fu fine ise nuvuon fok no reoinva ijin kege mazim giak.  
\v 11 No vierafega ire iji fu tavan rad rega no ni nuvuon ijia gak. Ijefuon maiji bun usuibe buk akaij ijia ijeg isoi,  
\q1 God naiji na nivek fido e fok bu nifak nun ijia ato same ise buon visume na kuardieknum kie God aiji a e fok igiebuon E Bomanano kiek.   
\m
\v 12 Ijefuon noiji no izeg sauikva bakin gavo noka Godon nifak ijia ireme ise nuvuon fok no renva ijin visume kuardak.   
\s1 Jab kaifjon roin biesiaga bu ise rek  
\p
\v 13 Regavo fun Godri ise nuvuon fok fine ke mazim guokreno ijefuon noba uri ise nuvuon ganamime kuaimokfuon. Regavo ni mukoi vierafe jab kaifjon ijiebuon unam ise iji kege nijaidiaga buk uri ijia jajiame ise rek.  
\v 14 Regavo naiji na E Bomana Jesu jaoijo ijefuon na ma vierafega God fu irerag fok no ikfuon iji fuka ma ijesugin amardiain. Ire fok bu ma ijesugin ga e kafo bu vierafega ire roin bu buifuon fu ise ijefuon buba ij. Regavo bu ijegrekva noba giame kiak.  
\v 15 Regavo ire kafo kaifjon roin buba ijo ja iji ikva iji ja unam bu oijmanamivo ijia kegoijo bakin. Regavo e kaifjon roin bu Jesu ma vierafejo iji bu duok roin buba ijo ja ijin ikva ja kaven buon kam arafiriav. Jesu Kurais fun besum joifuon guainma ijefuon ni mukorigia vierafeknum jon oijmanamif.  
\v 16 Regavo jab ire kafo bu ja oimardiakfuon iji rega e bu ijia giame una ja musikiak.  
\v 17 Ijefuon igia faif Godon unam ma iji no kegokfuon iji no duok iknum ga karokfuon iji fuka bakin. Regavo unam ma iji no kegokfuon iji noka Godon Kaven Akai iji kuaga fur oinuvuon ijia fine no samuagduok. Fu no samuagduoga no unam ma iji sanainma iji abe kaifnuvuon ijiena afuime oimarknum kari vak.  
\v 18 Regavo erar fu unam Jesu Kurais fu kuainma fu ijegrejknum kaifijaf roin oijmiakma e iji fu unam God fu oimarkfuon ijia reoin. Ijefuon e roin bu fuon oimarme fu agoik.   
\p
\v 19 Ijefuon ni roga no tavan bog mimatame unam ma ijesugin kegoknum e kaifnuvuon Jesu Kurais ma vierafejo ijiena afuim kariokfuon. Regavo madu ni roga no mimatame unam ma ijesugin reoinki kaven nuvuon bu ma karivakfuon.  
\v 20 God fu kaifjon ijiebuon nakikmazak irerag bu rekfuon iji fun vajiain. Ijefuon duok roin buba ijo iji jab giame kuaik. Revo ire fok fun Godri nuvuifuon amaren ijefuon noka ikfuon. Regavo jab duok iji kaifjon roin buba ijo ijin nifak buon ijia iok. Ja ijegrekva ja buon izeg bu ma vierafejo ijin kam arafiriak.  
\v 21 Regavo no magaga duok kafokafo iknum unam ise kafokafo kegokva noka kaifnuvuon ijiebuon buon izeg bu ma vierafejo iji kege arafiriak.  
\v 22 Jon ja ma vierafejo ijia ja unam kafo ire ijiebuon vierafejo iji ni jonkua oijon ijia arega God fu giam. Regavo e be fu oifuon ijia vierafega ire be fu reno iji fun maga fu reno iji fu oimarkfuon.  
\v 23 Regavo ja vierafega duok kafo ja ikfuon iji fu ise gavo ja magaga ikva iji God fuba oimaik. Ijefuon maiji jan vierafega duok iji fu ise revo ja ijo ijefuon ja ise rej.   
\c 15  
\s1 E roin oimardiagavo jab joi nidoinamik  
\p
\v 1 Eraneb no giriesame Jesu ma vierafejo iji noka uri kaifnuvuon ijiebuon afikin iji ifejdiame dasumdiak. No uri kaifnuvuon bu zazaivo unam izeg God fu oibuon ijia vierafe vajiama buba ijia kegoijo no iji ifejdiak. Regavo noba koiknuvuon uri unam ma ijesugin kege nuvuon oimarknum karivak.  
\v 2 Regavo e besubesum noka uri unam ma ijia kege kaifnuvuon roin Jesu ma vierafejo iji bu oimarkfuon ijia ifejdiaga bu buon Jesu ma vierafejo ijia buba zazaik.  
\v 3 No unam izeg Jesu Kurais fu kegoinma no madu no ijeg keok. Ijefuon maiji Jesu Kurais fuk fu God revo unam fu moikigia kegoinma iji fuba fuon fu oimarkfuon ijia vierafene reoin. Fuba ijeg ren gavo e ani ijieb fu arafirivga fu una Godon oimaren. Regavo vuak iji Jesu fu una God kuardainma iji bun usuibe buk akaij ijia isoime ijeg kuai,  
\q1 E ani iji bu a arafirainva iji bun na arafirienvano kuain.   
\p
\v 4 Usuibe vuak fok bu buk akaij ijia isoinva iji bu no nijaiduokuai isoin. Ijefuon no vuak iji dame vierafek. No vuak iji ma vierafekva vuak ijar no ifejduo vo ejafuoga noba zazaik. Revo no giriesame uri ma vierafero God fu tavan rad ire ma kafo nofak reduokro no ijeg vierafeknum zinunba ke vak.  
\v 5 Regavo na God iji fu fuon vierafenma ijia tavan bog no ifejduoknum ejafuoga no giriesame ma vierafejo ijefuon sirimamej. Na sirimamega fur fuon vierafenma ijia ja e besubesum oijon kege karoiga ja una oi besum ma vierafek. Ja oi besum vierafene unam izeg Jesu Kurais fu kegoinma jak ijeg keok.  
\v 6 Ja ijeg una agan besum rene oi besum vierafeknum vuak besumkuaim fainamikva iji ja God E Bomana Jesu Kuraison Asoij iji aroiknum if fuon abe ajiev.   
\s1 Godon vuak ma iji bu abe e Jius bakin iji kuardiainva ijin  
\p
\v 7 Regavo vuak uruvana na kuardiainva ijefuon vuak anej iji igin. Izeg Jesu Kurais fu oijmiame ja aferdia una aganfuon besum renma ijeg jak oijmiame kaifjon aferdia una jana agan besum ref. Ja unam iji Jesu Kurais fu kegoinma ja ijeg kegokva e roin bu unam jon ma iji giame una God nidoime fuon sanainma iji abe aroik.  
\v 8 Vuak na kuardiavo ijefuon maiji na kia, Jesu Kurais fu ari ruainma iji fu e Jius ijiena fioknum God izeg fu ma ijesugin vierafene kegoino fu ijin abe nijaidiakro ruain. Regavo God fu vuak be usuibe e Jius ijiebuon saifarif iji bu Godon vuak ijia e uguaikin renva iji nijaidiame kia, Fu e be kuaga fu vuak fuon ma iji abe buon ruakno kiain. Ijefuon Jesu Kurais fu Godon vuak iji abe markro vierafene ari ruain.   
\p
\v 9 Regavo madu Jesu Kurais fu ari ruainma iji fu e Jius bakin iji kiaga bu God aroikro fu iji ruain. Ijefuon maiji God fu tavan bog buon oifian abene ifejdiamo. Regavo irerag God fu e Jius bakin ijiebuon renma iji fun e Devid usuibe vuak be fu buk akaij ijia isoime una God kuardainma ijekma riaren. Regavo vuak iji e Devid fu kuainma iji fu ijeg kuai,  
\q1 Na vek e Jius bakin ijiena oknum on oimarme a dua urukafakno kuain.   
\m
\v 10 Regavo madu una buk kafar be ijia fu una ijeg kuai,  
\q1 E Jius bakin iji ni Godon e ijiena besum oimarfno kuain.  
\v 11 Regavo madu fu kuai, E Jius bakin iji ni E Bomana iji aroi ga e fok isama kafokafo kuaivo iji jak fu aroif.   
\m
\v 12 Regavo madu e Asaia fuk fu buk akaij ijia ijeg kuai,  
\q1 E Jesion agan ijia bu e be nafek. Regavo Godri e iji abe unaga fur e Jius bakin iji samuagdiak. Regavo e fok bu oibuon ijekma e iji ma vierafekno kuain.   
\p
\v 13 Na joifuon Godon sirimamej. Ijefuon maiji na vierafe God fur oijon ijia vierafe vajiaga ja kaifjon ijiena afuime oimarknum karivak. Regavo ja fu ma vierafejo ijefuon fu Kaven Akai fuon ijefuon daro ijia ifejdia vo samuagdiak. Fur samuagdiaga ja tavan uruvana ire ma ijesugin fu oijon ijia vierafe vajiaga ja oimarknum vierafek.   
\s1 For ik fuon fu renma ijin  
\p
\v 14 Regavo efnun na nunkua ma vierafega jan ire ma ijesugin e kaifjon ijiebuon rej. Regavo madu irerag kafokafo God fu kiainma iji jan mukoi vierafene rej. Regavo madu jan koikjo una kaifjon ijiena nijainamiv.  
\v 15-16 Na fas igia vuak kafokafo isoime darokma kuardiaga ja ire ma iji ja rejo jaba arek ga jaka giriesame ijeg revakfuon. Ijefuon maiji God fu fuon izeg fu e marediamo ijia fu na abe uniemado na fuifuon ik rej. Fu vierafe naiji naka e Jius bakin ijiena fioknum Jesu Kuraison vuak ma iji nijaidiak. Na ijegrenki e Jius bakin iji bu oi karoime una Godon ruak. Bu una roga Kaven Akai fu bu daro miaga bu Godon nifak ijia buka maturaikfuon.   
\p
\v 17 Regavo naiji na Jesu Kuraison e revo na Godon ik rene vuak fuon ma iji abe e Jius bakin iji kuardiavo ijefuon na Godon bomana oimarev.  
\v 18 Regavo na Jesu Kurais ik irerag fu mienma ijesugin abe darodarokin kuaik. Regavo ik iji fu mienma iji na e Jius bakin iji ifejdiaga bu una God ma vierafene igakfuon.  
\v 19 Ijefuon maiji vuak kafo na kuaim ga ire kafo na reoinva iji na Kaven Akai ijefuon daro iji abene ire sumakin kafo bu ur ba giainva iji reoin. Ijefuon na ai Jerusarem ijia uri vaknum Jesu Kuraison vuak ma iji abe mukorigia kuardia vake ai Iririkam ijia kekoin.   
\p
\v 20 Regavo na vierafe na unam ijekin ijia na Godon vuak ma iji abe kuardiaokro vierafen. Regavo igia fai na e iji bu ur ar sako ga e roin bu usem muja buon ijia savo ijeg naba rekro vierafen. Ijefuon na vierafe naka e iji bu ur ba Jesu Kuraison vuak iji fainva ijiebuon ar ijia oknum vuak ma iji abe kuardiak.  
\v 21 Na ijegrekro vierafen ijefuon maiji bun usuibe buk akaij ijia isoime ijeg kuai,  
\q1 E iji bu Jesu Kuraison vuak iji buba fainva iji bu Jesu irerag fu reno iji bu gak. Regavo e iji bu Jesu Kuraison vuak ma iji buba fainva iji bu vuak fuon mukoi faime ma vierafekno kuain.   
\s1 For fu una Rom vakro vierafenma ijin  
\p
\v 22 Naka una jon vuakro vierafen revo naba vuain ijefuon maiji na Godon vuak ma iji abe una madu e Jius bakin roin nijaidiav.  
\v 23-24 Regavo iviama ar uruvana bu Jesuon vuak ma iji bun faim baren. Regavo na juaivasia uruvana naka ja giakro vierafen ijefuon na vierafe na ai Sfen vako ijia na tavan sibank ijia jana fik. Na ijia jana fine oimadiega na ijarson ja ifejdiega na una ai Sfen vak.   
\p
\v 25 Na ja giakafie vierafen revo iviakma na una ai Jerusarem ijia vakvej. Na mon abe Jerusarem ijia Godon e iji miak vak.  
\v 26 E Jesu Kurais ma vierafejo ai Mesedonia karinva ijigam ai Akaia karinva iji bu oimarknum mon kafo afuin. Mon iji bu afuime Godon e roin ai Jerusarem ijia isema karinva iji nijiain.  
\v 27 Regavo iji bu renva iji bu koikbuon vierafene ijeg ren. Regavo e Jius God ma vierafejo ai Jerusarem karinva iji bu Godon vuak ma iji abe e Mesedoniako ijiga e Akaiako iji miain. Ijefuon e Jius bakin iji busik una e Jius iji isema karinva iji ifejdiame mon kafo nijiain.   
\p
\v 28 Ijefuon na vierafe naka amur mon iji e Jius bakin bu afuinva na iji abe ai Jerusarem ijia e Jius iji miame nason jon vuak. Na ai Sfen vako ijia na vua ja giame nason nakeko ai Sfen vak.  
\v 29 Regavo na vierafe na ja giak vuakva Jesu Kurais fu fuon ma iji uruvana joifuon vierafe vajiega na vua ja nijaidiaga ja jon amarigia oijmanamiknum kariokfuon.   
\p
\v 30 Regavo efnun na ja ejafiame kia, ni nana E Bomana nuvuon Jesu Kuraison if ijia ga Godon Kaven iji fu nakikmazak no ifejduoga no nuvuon oijmanamivo ijefuon daro iji abe Godon uruvana nuifuon sirimamef.  
\v 31 Ja na ifejdie nuifuon sirimamega e iji Godon vuak ma iji ba abenva bu ai Judia karinva iji buba ise kafo nun rek. Regavo madu ja sirimamega mon iji na abe e Jius iji bu ai Jerusarem ijia isema karinva iji ifejdiak vako iji bu oimarknum mon iji abekfuon.  
\v 32 Regavo ni nuifuon sirimamega God fu vierafe na ja giakro vierafekma na uruvana oimarknum ja giak vuakfuon. Ja ijegrekva na tavan sibank oimarknum jana fik.  
\v 33 Regavo na vierafe na Godon sirimamega fur tavan bog ja ifejdiaga ja mukorigia afuime kariok. Mare!   
\c 16  
\s1 For radkma fu anadiainma ijin  
\p
\v 1 Na vierafe na barak Foibe on kuardiaga ja vierafek. Bara iji fu kainuvuon be fuk God ma vierafeno gavo fu ai Sentria ijia e iji bu Jesu ma vierafejo ijiebuon ik ren.  
\v 2 Na bara ijefuon kuardiaga ja vierafekin ja oimarknum bara iji ja E Bomana ijefuon e ijeg afek. Regavo ja Godon e ijefuon ni Godon e igeg bara iji oimarknum afef. Regavo na vierafe ja irerag fok fu vierafekma iji jaka mukorigia ifejdakfuon. Ijefuon maiji bara iji fu e fok Jesu ma vierafejo iji ifejdiaknum ga madu nak fuka mukorigia ifejdiem.   
\p
\v 3-4 Na bara Frisira ko baru fuon Akuira iji anadiav. Bu nana Jesu Kuraison ikrejo ga buka unam bu aoikfuon ijia nuifuon vajai fian abej. Na buon bomana oimarev ijefuon maiji bu nunkua ifejdieva bakin gavo bu e Jius bakin iji bu besum afuime God aroivo iji madu mukorigia ifejdiain.  
\v 5 Regavo madu na e iji bu besum ar buon ijia afuime God aroivo iji anadiav.  
\p Regavo na e Efainitas na oijmavo iji anaiv. Fuiji fu ai Esia guf ijia fur amur Jesu Kurais ma vierafen.  
\v 6 Regavo madu na bara Meri anaiv. Ijefuon maiji fu jana besum oino ga madu fuka giriesame joifuon ik ren.  
\v 7 Na e Edronikas ko e Junias anadiav. E nokarok (2) bu aga aganun ga ur bu nana besum dibur karin. Regavo e afasor iji bu e nokarok (2) iji buk Jesuon ik mukorigia rejo iji bun giame vierafen. Regavo madu bun bur ur Jesu Kurais ma vierafen gavo naiji na rad Jesu ma vierafen.   
\p
\v 8 Na e nun Amfiriatas na oijmiavo iji anaiv. Regavo fuk fu Godon e.  
\v 9 Na e Ebanas fu nona Jesu Kuraison ik reno iji anaiv. Regavo madu na e Stakis na mukoi oijmavo iji anaiv.  
\v 10 Na e Aferis anaiv ijefuon maiji Setanri fu biesuain gavo fuka vek giriesame Jesu Kurais ma vierafen. Regavo madu na e Aristoburason agan iji anadiav.  
\v 11 Na e Erodion anaiv. Fuiji fu nosik no agan besum. Regavo madu na e Nasisason agan iji anadiav. Buiji bu E Bomana ijefuon e.   
\p
\v 12 Na bara Traifaina ko uviaifuon bara Traifosa iji anadiav. Bu E Bomana ijefuon ik rej. Regavo madu na e Fesis na oijmavo iji anaiv. Fuka giriesame E Bomana ijefuon ik reoin.  
\v 13 Na e Rufas anaiv. Fu iji fuka mukorigia Jesu Kurais E Bomana ijefuon ik reoin. Regavo madu na asiefuon anaiv. Ijefuon maiji fur asienun igeg na samuagdien.  
\v 14 Na e Asinkritas ga e Firegon ga e Emis ga e Fatrobas ga e Emas iji anadiav. Regavo madu na e iji Jesu ma vierafejo iji bu buna afuime God aroivo iji anadiav.  
\v 15 Na e Firorogas ga bara fuon Juria ga e Nerias ga makin fuon anadiav. Regavo madu na e Orimfas anaiv. Regavo e iji Jesu Kurais ma vierafejo bu buna besum afuime God aroivo na iji anadiav.  
\v 16 Regavo nika e iji bu Jesu ma vierafejo iji bu anainamivo ijeg oijon guf ijekma jon anainamiknum karif. Regavo e igi Jesu Kurais ma vierafejo bu igia besum afuime God aroivo iji bu ja anadiav.   
\s1 For vuak radkma fu e Romko nijaidiainma ijin  
\p
\v 17 Regavo efnun na vuak ejafiame kuardiavo ijefuon ni mukorigia samuanamiknum kariof. E ise roin jana karinva iji buka unam ja agan besum rene afuime karijo iji kam ataseme kafokafo reoij. Regavo madu buka giriesame oijon kam karoiga ja God uzakuai bu iji reoij. E ijieb bu vuak ma iji ja fainva iji kam arafiriame una vuak buon kufui iji nijaidiav. Ijefuon ni mukorigia e ijekin iji akariaknum of.  
\v 18 Regavo ni vierafe e ise ijekin iji buba E Bomana nuvuon Jesu Kuraison ik rekuai vierafen. Regavo bum vajai surif buon ijefuon vierafenva fok kegoknum oimarev. Regavo e ijekin iji bu vuak buon bu e biesiame soisoigin kuaivo ijia bu e iji buba ma vierafene kegoijo ijiebuon oij iji kam karoiv.   
\p
\v 19 Regavo igia fai e ar iror igia karine Jesu ma vierafejo iji bu izeg ja Godon vuak ma iji igavo iji bun faim baren. Ijefuon na irerag ja rejo ijefuon naka bomana Godon oimarev. Regavo vuak igi na isoime kuardiavo iji na vierafe jaka unam ma iji amarigia gia vierafene kegoknum ga ise iji amarigia agordiakro na iji vierafen.  
\v 20 Ijefuon ja ijegrekva God iji fu tavan bog e ifejdiako bu afuime karioijo ijar daro miaga ja uri giriesame Setanon daro iji abe gareg akozek. Regavo madu fu ifejdiaga jab e iji bu jana karine ise kafokafo kegoijo ijiebuon vuak iji igiak.   
\p
\v 21 Regavo Timoti e iji fu nosik ik besum reoino iji fu ja anadiain. Regavo madu aga aganun e Rusias ga e Jeson ga e Sosifata iji bu ja anadiain.   
\p
\v 22 Regavo na e Tetias nak na E Bomana ijefuon if ijia ja anadiav. Regavo fas igi na For kuardiekoga na isoime ja nijiav.   
\p
\v 23 Regavo e Gaias fuk fu ja anadiain. Na For na ar fuon ijia fioijo ga e uruvana bu Gaiason ar ijia besum afuime God aroiv. Revo e Erastas fuk fu ja anadiain. E iji mai igi no karinva ijefuon mon iji samuamo ijar ja anadiain. Regavo madu e Kuotas e be fu nona Jesu Kurais ma vierafeno iji fuk fu ja anadiain.   
\p
\v 24 Regavo na vierafe Godon marediamo iji fu tavan bog jana navak. Mare!   
\p
\v 25-26 No Godon oimarkfuon ijefuon maiji fu aresredo fur ifejdiaga ja jon ma vierafejo ijia jaka giriesame ok. Regavo vuak iji Jesu Kuraison vuak ma iji na abe e nijaidiaoijo ijar ijeg kuain. Regavo usuibe Godon vuak ma iji fuka ma sauime na ruain. Regavo iviakma vuak iji fun e Godon vuak vierafene kuaivo ijieb abe kuaime samafreja non gain. Regavo vuak iji e karauniakfuon iji fu Godri kuainma ijefuon noka vuak iji abe ar iror ijia kuaime samafrega e fok bu God ma vierafekfuon.   
\p
\v 27 Ijefuon ni roga no God iji aroiv. Fu fuonkua fu God ga fu fuonkua fu tavan bog ma ijesugin vierafene kegoin. Regavo no Jesu Kurais irerag fu renma ijefuon God abe aroik. Fun ijin. Mare.