\id PHP - Namiae NT [nvm] -Papua New Guinea 2004 (web 2014) \h FIRIFIENS \toc1 Firifiens \toc2 Firifiens \toc3 Fir \mt1 FIRIFIENS \imt1 Firifienson Vuak Amur \ip Tavan iji For fu vek dibur finma ijia fu fas be isoime e ma vierafejo Firifai ijia karijo iji nijiain. Regavo ai Firifai iji fu mai ikin be ga fu Mesedonia guf ijia. Regavo fas iji fu isoinma iji fu e Firifaiko ijieb uri zinunba mon buon kege e Ifafrodaitas vajavga fu kege ro For vajainma fu iji isoin. Regavo tavan rir be For vuak ma iji abe vainma ijia fu fuon amur fu Firifai ijia vuak ma iji abe bu kuardiamga e roin bu vuak iji faime ma vierafen. Revo e ma vierafejo ai Firifai ijia karinva iji bu mon uruvana nainva bakin. Regavo buka uri zinunba e ma vierafejo Jerusarem ijia e sinuom bakin ijiebuon mon afuiknum vo madu For ifejdakfuon iji afuin. For fu dibur fin revo fuka bomana oimaren. Regavo madu fu vierafe e Firifaiko iji bu afikin roin biediakva buka oimarkfuon fu iji isoin. Regavo For fu bu kabuaikabuaikin ijia kariokfuon iji kuardiain. Regavo madu e iji vuak kufuimene nijaidiavo ijieb bu kikekemiga bu vajai surif buon kania ufukfuon vierafejo ijin ju kuardiain. Regavo madu fu vierafe buka Jesu aikin igeg kariokfuon iji ejafiame kuardiain. \iot For fu vuak kafokafo fu buk Firifiens isoinma ijin \io1 \ior 1:1-11\ior* E Firifaiko ijieb For oijmaknum ifejdainva ijefuon fu una buon oimarenma ijin. \io1 \ior 1:12-26\ior* Unam kafokafo iji bu Foron renva ijiga irerag fu reoinon iji fu kuardianma ijin. \io1 \ior 1:27–2:18\ior* E God ma vierafejo ijiebuon unam bu kegokfuon ijin. \io1 \ior 2:19-30\ior* Timoti ko Ifafrodaitas bu rad izegrekfuon For fu iji unam amardiainma ijin. \io1 \ior 3:1–4:9\ior* Unam maturainma ijiga e God ma vierafejo bu izeg karikfuon ijin. \io1 \ior 4:10-20\ior* For sinuom kafo bu efkin fu vajainva ijefuon buon oimarenma ijin. \io1 \ior 4:21-23\ior* Regavo rad fu bu anadiainma ijin. \c 1 \s1 For fas fu isoime e Firifaiko nijiainma ijin \p \v 1 Na For nar Timoti e iji no Jesu Kuraison ikreoijo nor fas igi isoin. \p No isoime Godon e iji ja mai Firifai ijia oi besum rene Jesu Kurais ma vierafejo ijigam e mamkanuk jon ijigam e iji bu e roin ifejdiavo iji ja nijiav. \p \v 2 No sirimamega God Asoinuvuon ijigam E Bomana nuvuon Jesu Kurais ijieb tavan bog ma rediame mukorigia samuagdiaga ja afuime karikfuon. \s1 For fu e Firifaiko iji buifuon God sirimamenma ijin \p \v 3 Tavan bog naka ja vierafejo ijefuon na joifuon God Asoinuvuon iji fuon oimarev. \v 4-5 Tavan bog na e fok joifuon na nun sirimamejo iji naka oimarknum sirimamej. Ijefuon maiji ja ik anej ijia Jesu Kuraison vuak ma iji na kuardiava ja faime uri na ire kafokafo nijieknum biduakienva iji ja vek rene rok. \v 6 Ja vuak iji faime ka abe ma vierafenva ijefuon na vierafe fu Godri unam ma iji jon renon iji fuba arek. Regavo fuka vek ijeg ifejdiaga ja unam ma ijesugin rejknum vake tavan radkma iji Jesu Kurais fu una roko ijia ire fok fur fok re barek. \p \v 7 Regavo jaiji naka tavan bog na oinun igia ja vierafeoijo iji fu mardo na ijeg ja vierafeknum fiok. Ijefuon maiji e fok ja nana ik ka mukor igi God fu abe na mienma iji ifejdiev. Ja dibur igi na fijo ijia ga madu na kekokva ijia na Godon vuak ma igi na mafaime abe kuaivo ijia jaka na ifejdien. Ijefuon e fok bu vuak iji faime uri giriesame vuak iji abe anu kunaime ma vierafe. \v 8 Regavo fun Godri fuonkua gieme vierafega izeg na ja oijmiavo iji fuka Jesu Kuraison oij ijia ruain. \p \v 9-10 Regavo igi fu nar nun na sirimamekafie vierafejo iji jon ja oijmanamivo iji fuka ofrene vak. Ja ijegrekva ja God fu e izekin iji ja ijia mukoi game vierafekfuon. Regavo ja ijia samakaf unam ise iji ga unam mukor iji ja giame unam ma ijesugin jajiame ke vakfuon. Regavo tavan radkma iji Kurais fu una roko ijia jab jukgavo jaka maturaime fu biek. \v 11 Regavo madu ja Jesuon daro ijefuon duadok ijia Godon unam ma ijia kegokva e bu ire ma iji ja e kafobuon rejo iji giame una Godon if iji dab aroik. \s1 For dibur fu finma ijar Godon vuak iji ifejdiamga fu bomana rene vainma ijin \p \v 12 Ijefuon efnun na vierafe ja vuak igi mukoi vierafekfuon. Vajai fian kafokafo igi na biediavo ijieb Godon vuak ma iji Jesuon fu kuainma iji bijukurainma bakin revo fu ifejdamga fu bomana rene vain. \v 13 Unam ijegrejo ijar e juo karijo uruvana ga e uruvana igia karinva bu unam igi nun renma iji bun gien. Bu gieme una ma vierafega na ma Kuraison ikreknum vuak fuon ma iji abe e nijaidiavo ijefuon na dibur fijro bu ijeg vierafen. \v 14 Vajai fian ijieb nun rejo ijefuon e Jesu ma vierafejo uruvana buka ba juv vo jufdiaknum Godon vuak ma iji dab kuaiv. \p \v 15 Regavo iji fuka ma e iji God ma vierafejo roin Kuraison vuak maiji una e roin nijaidiavo bu igi na ijegrejo ijefuon buka oi isema na vierafene una na ziegafiev. Ijefuon maiji God fu na ifejdiega e uruvana bu uri vuak nun iji faime una Jesu ma vierafej. Regavo e roin bu na oijmienva iji bu oi ma vierafene vuak maiji abe kuain. \v 16 Ijefuon maiji e iji buk vierafega na Kuraison vuak ma iji ma faivo ijefuon na ijegrejoro bu iji vierafene una na ifejdiev. \v 17 Regavo e iji ziemoijo iji bu Jesu Kuraison vuak ma iji buba abe ma vierafene e kuardiav. Regavo bum if buon iji kam biom ajieme e mamkanuk rekuai vierafejo iji bu vierafe bu dibur igi na fijo ijia buka una vajai fian kafo madu vajiekuai vierafen. \p \v 18 Regavo vuak iji bu nijaidiavo iji bu ma vierafene nijaidiav vo bu isema vierafeknum nijaidiavo iji naba bomana vierafen. Revo bum ma Jesu Kuraison vuak iji nijaidiakva iji naka oimarev. \v 19 Regavo naka oimarkfuon ijefuon maiji na ma vierafe Jesu Kuraison Kaven ijefuon daro ga jon ja nuifuon sirimamejo ijar afikin nun kafokafo na biediavo ijia keuniev. \v 20 Regavo nun bomana na vierafenva iji iviakma igi vo tavan bog ik nun igi na rejo ijia naba zazaik. Na gua vo na nivek fijo ijia naba juk gavo na bomana oimarknum oinun fok ijekma Kurais aroikfuon. \v 21 Regavo unam na vierafenva iji igin na vajai nun igi na abe moikigia fijo ijia ire fok na rejo iji naka Kurais aroikfuon iji rek. Regavo na vajai nun moikigi na fijo ijia guakva iji fuk fu maren. \v 22 Regavo na vek moikigia fikva iji naka ire uruvana Kuraison rek. Regavo naba vierafe ire nokarok (2) iji guakfuon ga nivek fikfuon iji izar fu ma bomana iji naba vierafen. \p \v 23-24 Na ire nokarok (2) ijieb na kunie roinroin iviev. Regavo na vierafe na vajaima moikigi na fijo iji naka areme Kuraisk fivakfuon. Ijefuon maiji ar iji na Kuraisk fikfuon ijar moikigi no karijo iji fuka asin. Regavo na ja ifejdiakfuon ijefuon na joifuon vek moik ijia nivek jana fiok. \v 25-26 Regavo iji naka ma vierafejo ijefuon na vierafe God fuba kiega naba guakgavo na nivek jana fikin na ja ifejdiakfuon. Ijefuon maiji na ja ifejdiaga ja giriesame vuak na nijaidiaknum kuardiavo iji ma vierafene e damuikin rek. Na vek jana fijo ijefuon jon izeg ja Jesu Kurais oimardavo iji fuka oijon ijia do igeg irtoijme ajie urakfuon. \s1 Godon vuak ma iji mafaikfuon \p \v 27 Regavo igia faif vuak ka ma bomana iji igin Jesu Kuraison vuak ma iji na nijaidiava ja fainva ijia kegoknum karivaf. Ja ijegreoinki na ijia vua giak vo naba ijia vuakva na oknum izeg jon ja unam ma ijin vek giriesame kegoijo na iji faik. \v 28 Ijefuon ka giriesame tavan bog uri vuak ma ijefuon mafaigavo jab uri e iji bu jana nigaraivo iji giame juk. Ja ijegrekva ja samakaf bu nijaidiaga bu ijia giame vierafega bu iji bu rad God fu bu kam uinituk. Regavo jaiji fun Godri karauniakafa fu ijeg vierafen. \v 29 Ijefuon maiji ja fun Godri vek ik amur ijia ja Jesu Kuraison ikrekfuon iji ken. Regavo ja fu ma vierafekva ijesugin bagavo ja madu fuifuon vajai fian kafokafo biediak. \v 30 Ijefuon iviakma jan nana azi ni besum ijia urav. Ja azi ni besum iji usuibe ijia na buna keva ja gienva iji na iviakma vek fine azi ni besum iji vek rejo iji jan faiv. \c 2 \s1 Jesu Kurais fu adumaduigin kegoinma iji mimataf \p \v 1 Ja Jesu Kurais ma vierafejo ijefuon Kurais fu ja daro miame oijmiame ja samuagdiako ja afuime karioij. Regavo jan Godon Kaven ijiena besum rene oijmanamiknum jon ifenamikuai vierafene rej. \v 2 Regavo ja unam ma iji jan rej ijefuon na ja ejafiame kia, Ire roin na oimarkfuon iji ja oi besum rene vo nigen besum vierafene besum oijmanamiv vo tavan bog ifenamikfuon. \v 3 Regavo jab uri ka aroikarame jonkua vierafeogavo e roin jab giame arek. Regavo ni isuar oi mafaime buna besum ganamime ifenamiknum kariof. \v 4 Regavo jab jonkua ik jon ja rejo ijesugin vierafegavo nika e roin vierafeknum vo izeg ja bu ifejdiakfuon iji vierafef. \v 5 Regavo oijon iji ka izeg Jesu Kurais fu vierafene kegoinma ijeg jak vierafene keof. \v 6 Regavo Jesu fu kegoinma iji fu ijeg keoin. \q1 Fuiji fu God ga bu busik buka besum ga fuba una asoifuok ar kaf iji bu karinva ijia fikafa vierafen. Regavo fum uri ire iji fu asoifuok samuagdiamo fok fuka nuigafiain. \v 7 Fuka koikfuon una am ukakbe rene una ema igeg moikigia nafen. Regavo fu ema igegrene e fok igiebuon ikreoin. \v 8 God fu vierafe Jesu fu guak ijefuon Jesu fu adumaduigin Asoi fuon igame vuak fu kuardainma iji rene vake bu dab kuros ijia kanava fu guain. \v 9 Fu guamga Godri kuama fu una urinma ijefuon fu dab aroime abe ka ar ma kaf ijia unain. Regavo fu madu if iji ka e fok ijiebuon if asidiainma iji abe fu main. \v 10 Regavo unam iji fun Godri vierafene amarenma ijefuon kaven fok kaf gufia karinva iji ga e fok moikigia ga aoime zuarunam karinva fok bu Jesuon if dab aroikafak. \v 11 Bu aroikafaknum sirimamene kuaiv Jesu Kurais fu ma E Bomana nuvuono kuaiv. Bu ijeg kuavo ijia buka God Asoij iji dab aroiv. \s1 Godon e iji jaka veni igeg moik fok sanaf \p \v 12 Ijefuon efnun Jesu Kurais fu asoifuon igainma ijeg na ijia jana fiko ja God igain. Regavo iviakma igi na ja uniame ruainva ijia nika God mukorigia igaf. Nika God agoiknum giriesame unam iji God oimaikfuon ijesugin ikrene vake barga ijar ja karauniak. \v 13 Ijefuon maiji fun Godri koikfuon oijon ijia ikreno ijefuon ja tavan bog irerag fu vierafe ja rekfuon ja ijin reoij. \p \v 14 Regavo ik fuon fok ja rekva jab vuak kafo ijefuon kuaiknum vo ik ijefuon musikuaiknum ikrek. \v 15-16 Ja ijegrekva iji jaka maturaime ok ga e buba ise kafo kege una ja namdiak. Regavo madu jaka maturaime Godon afijaf ijegreoga e iji tavan uruvana oi moik igefuon ise ijesugin reokuai vierafejo iji bu ja giak. Regavo jaka ikuosaij iji no kege nakinma ijia sana vako ijeg ja e ise rejo ijiebuon kafar ijia karikva iji ja ikuosaij ijeg sanaknum Godon vuak ma iji bu karauniakfuon iji nijaidiaf. Ja ijegrekva na ma ijefuon na tavan iji Jesu Kurais fu una roko ijia na joifuon aroikarak. Ijefuon maiji daro nun fok na akozme ik iji na renva iji fuba nisen. \p \v 17-18 Regavo jon ja ma vierafejo ijiga ik iji ja Godon rejo iji ja Godon isuf baroijo ijekin. Regavo bu na kaniebatie kavuan nun usekfuon ijar isuf jon ja baroinva iji fu ijar akum ijeg misoiga God fu oimaikfuon. Regavo na joifuon guakva iji naka nun na oimarvo iji jana ivajuinamik. Regavo jak na joifuon guakva iji jaka ijefuon nana besum oimarkfuon. Ijefuon maiji isuf nuvuon no baroinva iji God fun game oimaren. \s1 Timoti ko Ifafrodaitas ijiebuon vuak ijin \p \v 19 Regavo na vierafe naka Timoti kua fu vua ja giak revo iji fu E Bomana ijar ijeg vierafekma na kua fu vuak. Fu vuakma fur vuak jon izeg ja karijo ijin giame una ro kuardie na faikva na oimadiek. \v 20 E iji fu nosik oi besum rene noka bomana joifuon rej. \v 21 Regavo e uruvana roin bu una buon bu oimardiakfuon ijin reoijgavo Jesu Kuraison ik iji bu rega fu oimaikfuon iji bu vierafejo bakin. \v 22 Regavo e igi Timoti fu e ma ga fur ka am iji fu asoifuon ifejdamo ijeg fur ifejdiema na Godon vuak ma iji abe e roin nijaidiain. \v 23 Na vierafe fu vuakfuon revo na samuaga e bomana akai samuamo iji fu vuak nun izeg kuaiga na game son Timoti kuaga fu vuak. \v 24 Regavo na E Bomana ijar ijeg vierafe miekma nason rad koiknu vua giak. \p \v 25 Regavo e be Ifafrodaitas iji uviainuvuon God ma vierafeno ga fu nosik besum Godon vuak ma iji abe e roin nijaidiamon. Regavo madu fuka nosik daromene Godon vuak ma ijefuon mafaime e roina musikuaimon. Regavo madu fur afikin roin nun roko iji kafo fur dasumdiemon. E iji ja kariga kuava fu igi na fijo igia vo jon fateroin ijia ifejdiemo iji kuaga fu ja giak vuakro na iji vierafen. \v 26 Regavo e iji fuka ja giakafa uruvana vierafen. Regavo madu fuka uruvana oifiaim ijefuon maiji ja adam bomana iji fu abenma iji jan fain. \v 27 Regavo iji fuka ma Ifafrodaitas fu adam bomana abene fuka guain gavo Godri ifejdainma ijefuon fu una urin. Regavo God fu Ifafrodaitas fuonkua ifejdainma bakin gavo fu madu nak ifejdien ijefuon maiji fu guainbatie naka bomana oifiadiek. \p \v 28 Ijefuon na vierafe naka fu kuaga fu una vuaga ja una fu ga fu oimadiakega oifian nun fok fu barek. \v 29-30 Regavo na kua fu una ja giak vuakma ni Jesuon if ijia fu oimardaknum afef. Regavo e fu aikin ijin arordiame oimarknum aferdiaf. Ijefuon maiji fuka Kuraison ikrene fuka guainma ijia ga fu una urin. Regavo madu izeg jar na ifejdiekuai vierafejo iji fur jon fateroin ijia uri ifejdieme Kuraison ik ren. \c 3 \s1 Unam ma iji maturakfuon ijin \p \v 1 Ijefuon efnun ni E Bomana iji oimardaf. Regavo igia faif na vuak iji na amur isoim nijiainva iji madu kuardiakva fube afikin abe miak. Regavo vuak ijar ja samuagdiaga ja e iji bu ise rejknum ja biesiakfuon iji giame kekirakfuon. \v 2 Ijefuon e iji mukoi giavknum of ijefuon maiji e iji buka ise rejo. Buka maf kuriai iji bu e jakiavo ijegrene oknum ja biesia soisoime kia ja vajai surif jon kania ufukva ja Godon afijaf rekno kiavo iji agordiaf. \v 3 E ijekin iji agordiaf ijefuon maiji God fu vierafega buiji bu anf fuon ma iji abenva bakin. Regavo nor no ma anf fuon ma iji aben ijefuon maiji no Kaven Akai iji ma vierafene God sirimameknum vo madu Jesu Kurais ire fok fu nuvuifuon renma iji ma vierafeknum oimarev. Regavo noba ire kafo vajai surif nuvuon ijia reoijo iji kege ma vierafek. Ijefuon maiji ijeg no rejo iji noba Godon nifak ijia maturain. \p \v 4 Regavo ire iji no vajai surif nuvuon ijia reoijo iji nak na amur ijegreoin revo iviakma na una iji na ma vierafejo bakin. Revo erar fu iviakma irerag no vajai surif nuvuon ijia reoijo iji kege ma vierafekma ni faif. Ire ijekin iji nar ur mukorigia ja asidiame ire iji kege ma vierafeoin. \v 5 Ijegvo naiji bu nafedienva iji vuik besum (1) barko ijia bu vajai surif nun iji kanie ufu anf abedien. Regavo eofnun iji bu e Isrerko bu e Bezimanon uifarif ga saifnun iji bu ma e Ibrukor. Revo naiji na E Ferisi ijefuon maiji na Mosison akaij iji mukorigia vierafene reoin. Regavo madu na saifnuvuon ijiebuon akai ijigam unam usuikor buon iji bu nijaidienva iji naka mukorigia igiame ijia jajiain. \v 6 Na vierafero unam iji na renva iji fu ma God oimaikro na ijeg giriesame biom mukorigia reoin. Ijefuon na uri e iji Jesuon unam ma iji ja oijor iji naka ziegafiaknum kaniame vajai fian uruvana vajiain. Na vierafero na Mosison akaij iji mukorigia igiaga e kafob gieme vierafero na Godon nifak ijia na maturaivaro bu ijeg vierafekro na ijeg reoin. \p \v 7 Regavo ire iji na ur rejknum ijia biduame fi ruainva iji iviakmana vierafega ire iji buka ma bakin. Ijefuon maiji iviakma na Jesu Kurais abe vo unam fuon ma iji giain. \v 8 Ijefuon iviakma unam kafo ga ire fok na ur kegoinva iji naka rubdien. Na rubdiegavo naka oi besum izeg na Kurais E Bomana nun game ma vierafekfuon ijar fuka ma bomanak. Ijefuon na fuifuon ire fok na ur rejknum vierafenva iji na ire mutur igeg nuigafiagavo na una Kuraison unam ka ma ijesugin reoij. \v 9 Na ijia reokin naka fusik besum rek. Na iviakma maturainva iji na akai usuikor iji mukorigia igiainva ijefuon na maturainva iji fui bakin. Regavo nan vierafe fun Godri na gie naka fuon nifak ijia maturain ijefuon maiji na Kurais ma vierafejo ijefuon na maturain. \v 10 Na vierafe naka Kurais unam kafokafo fuon iji ka mukorigia giame vierafek. Regavo madu daro fuon iji fu abe mako ijia una urinma na vierafe naka daro besum ijin abe fuifuon ikrek. Regavo madu na God igavo ijefuon na vierafe naka izeg fu vajai fian kafokafo igia fu abenma ijeg nak na vajai fian kafo abek. Regavo fu guainma ijeg na vierafe unam usuikor nun fuk fu ijeg guak. \v 11 Na unam ijegreknum Godon ma iji mukoi vierafekin na guakva rad fu kie na una urik. \s1 Ma karivakfuon unam iji giriesame nisaikfuon ijin \p \v 12 Regavo iji na kuardiavo iji na unam fok nan re barenva bakin revo madu na Godon nifak ijia mukoi maturainva iji bakin. Regavo na uria unam izeg na Godon nifak ijia maturaikfuon na ijefuon vek giriesame arafiri rok. Naka giriesame unam fuon ma ijia reoikin na izeg fu vierafenma na ijeg maturaik. \v 13 Ijefuon efnun na vierafega na Jesu Kurais ire iji fu vierafenma iji naba bieme aben. Regavo besum iji na unam izeg usuibe na kegoijo iji nan rubdien. Regavo na Jesu Kuraison unam ma ijesugin kege vake izeg fu vierafenma na ijin biekafie na iji vierafene gavknum rok. \v 14 Ijefuon naka unam ma ijesugin mukorigia kege vake buin gami barvo ijia kekome ire ma iji kekfuon. Regavo ire ma iji Godri tavan rad na guame vaga fu izeg ik fu kumena na uri anerene Jesu Kuraison if ijia unam ma ijesugin kegoinva ijefuon fu ma karivakfuon iji abe na miek. \p \v 15 Ijefuon na vierafega e iji ja Godon Kaven ijekma oko jan e damuigin renva iji ja unam na reoijo jak ja ijeg rek. Regavo e roin eraneb ja unam nibe rekuai vierafekva fu Godri koikfuon ifejdiaga ja unam ma iji vierafekfuon. \v 16 Regavo no tavan bog unam ma iji no iviakma kegoijo no ijesugin kege mukorigia nikajiame re vak. \p \v 17 Ijefuon efnun na vierafe tavan bog jaka unam nun iji na kegoijo ja gienva ijeg reof. Regavo madu e roin ijia karinva iji bun unam izeg na kegoijo iji bun ijia jajiev ijefuon ni mukorigia unam bu rejo iji giaf. \v 18 Regavo e roin ijia oijo unam buon iji buka be. Regavo tavan bog na e ijiebuon naka kuardiava jan fain revo ivia na una madu nido nun igekma ja kuardiav. E uruvana ijia karijo ijiebuon unam bu kegoijo iji buka ma ise. E ijekin iji bu Godon vuak ma iji uzaknum Jesu kuros ijia fu guainma iji dab buzeiv. \v 19 Regavo bu ire iji bu jufdiakfuon iji tavan bog aroikarame reoknum vo ire moik igefuon iji uruvana vierafej. Regavo god buon iji bum vajai buon bu vierafe kegoijo ijin. Ijefuon bu aoikva buka ar iji ma ise mian naino ga vajai fian abejo ijia vak. \p \v 20 Regavo noiji no bu rejo ijegreoijo bakin ijefuon maiji no Godon e. Ijefuon no E Bomana nuvuon Jesu Kurais fu no karaunuinma iji fu varur ijia una ari afeduokafa roko no ijin samuaknum kariok. \v 21 Fu vajai surif nuvuon igi zazaikin ijin iviakma karinva iji kege una ka ma nibe amarduoga noka vajai izeg Jesu fu iviakma abe varur ijia fino iji abek. Regavo iji fu rekfuon iji fu daro fuon ka ma bomana fu ire fok samuagdiamo ijia abe rek. \c 4 \s1 For fu e Firifaiko bu izeg besum afuim karikfuon kuardiainma ijin \p \v 1 Ijefuon efnun na tavan bog ja oijmiavo ijefuon naka una ja giakro vierafen. Regavo naka unam jon izeg ja mukoi kegoijo ijefuon ka aroikaraknum jon oimarev. Ijefuon nika oi besum rene jon izeg ja God ma vierafejo ijia giriesame karif. \p \v 2 Regavo bara Euodia ko Sintiki e-e iji ja jon nigaraivo iji nika aref. Ja josik ja God besum iji ma vierafejo ijefuon ni una besum oimarknum afuime karif. \v 3 Regavo madu e kainun be fu nuibakin nosik besum ikreno iji na vierafe fu va bara iji nigaraivo iji ifejdiak. Ijefuon maiji bara iji bu darokma ifejdieme nana Godon vuak ma iji abe e roin kuardiain. Regavo madu e Kiremet ga e roin nana darokma ikreoinva iji buk Godon vuak ma iji abe e roin kuardiaoin. Ijefuon if buon iji bun Godon buk bu e if iji bu rad una ijia karivakfuon isoinva ijia isoin. \p \v 4 Regavo tavan bog nika E Bomana jon ja ma vierafejo ijefuon oimaref. Regavo na madu una kia nika E Bomana ijefuon oimaref! \v 5 Regavo madu unam izeg mukoi oi mafaime kegoijo ijin ijegreoga e bu giaf. Ijefuon maiji E Bomana fun una ruakreno ijefuon iji vierafef. \v 6 Regavo jab uri afikin kafo bu jon roko iji uruvana vierafekgavo nin jon ja sirimamejo ijia God irerag ja vierafenva iji kuardaf. Regavo ja sirimamejo ijia jaka tavan bog ire ma iji fu rediamo ijefuon oimardaf. \v 7 Ja ijegrekva Godon afuimo ka ma mukor ema bu vierafejo iji ma asidiainma ijar oijon ja vierafejo iji samuagdiak. Regavo ja oifian abekva fuon afuimo ijar ifejdiaga ja dasu karik. Ijefuon maiji ja Jesu Kurais ma darokma vierafej. \p \v 8 Vuak radkma iji kaifnun ja God ma vierafejo iji na ja kuardiakfuon iji nika unam ma ijesugin vierafe ga unam iji God oimaikfuon ijesugin ref. Regavo ire iji ja vierafejo iji vuak ma ijesugin vierafe ga ire iji ja nidosiavo ijiga ire maturainva ijesugin vierafef. Regavo barubara iserejo iji jab vierafejo vo ni unam e bu oimardiakfuon ga oimarkfuon ijesugin vierafef. \v 9 Ire iji na ir nun ijia nijaidiava ja fainva ijiga ire iji na reja ja gienva iji kege mimataf. Ja ire iji kege mimatakva God fu tavan bog ja ifejdiame samuagdiaga ja afuime karik. \s1 For fu e Firifaikobuon oimarenma ijin \p \v 10 Na E Bomana ijefuon bomana oimarev ijefuon maiji iviakma ja mimatame mon nijienva ijar nijaidiemon ja vek na vierafej. Regavo ja na vierafejo iji jaba rubdiav revo ja nijaidiekrega fu unam baga ja ijia aren. \v 11 Regavo vuak igi na kuardiavo iji ja na ifejdiekfuon na ijefuon kuardiavo bakin. Regavo na vierafega irerag na rejo iji fun aresren. \v 12 Na unam vasiakma oijo ga duok iknum oijo iji nan vierafen. Ijefuon ar kafokafo ijia vo tavan ise duok bakin ga tavan ma duok zaraimo iji na vek oimarknum oij. \v 13 Ijefuon na Jesu Kuraison daro ijia ire ma ga ire ise iji nun roko iji na oimarknum biediame vak. \p \v 14 Regavo ja afin nun iji ifejdienva iji fuka bomana maren. \v 15 Ja e mai Firifai ijia karinva iji jan vierafen. Na amur ijia Godon vuak ma iji abe nijaidiame ai Mesedonia areme vakga e sos roin buba ifejdien revo jar jonkua ja nana ikrene mon kafo jam roigin na vajien. \v 16 Regavo na vek ai Mesedonia guf mai Tesaronaika ijia finva ijia ja mon kafo kukma efkin nijieme ifejdien. \v 17 Iji ja ifejdienva na kuaivo iji jar ire kafo madu roigin nijiekafa na kuaivo bakin. Regavo na vierafe ja ire kafo roigin vajievo ijia ja Godon daro iji abekfuon. \p \v 18 Ire fok ja nijienva iji nan kein ijefuon ja iji vierafekfuon. Iviakma ire fok na vierafenva iji nan uruvana ken ijefuon maiji e Ifafrodaitas fu ire fok ja nijienva iji fur kege rokga nan kein. Revo ire iji ja renva iji fuka isuf ma iji fu udi uriga God fu oimaikfuon ja ijin ren. \v 19 Regavo God nun ijar Jesu Kuraison duadok ijia ire fuon ma iji varur gufia naoivo ijia ire izieb bu ja ifejdiakfuon fu ijin kege vajiaga ja ire kafo jaba vierafekfuon. \v 20 Regavo na vierafe e fok bu tavan bog God Asoinuvuon iji aroikfuon. Mare. \s1 Foron vuak radkma iji fu anadiainma ijin \p \v 21 Regavo na God ko Jesu Kuraisbuon e fok iji bu anadiav. Regavo madu e uviaifnun God ma vierafejo igia karinva iji buk bu ja anadiav. \v 22 E fok God ma vierafejo igia mai Rom karinva iji ga e iji Sisaon ar bomana ijia ikrejo iji ja anadiav. \p \v 23 Na sirimamega E Bomana Jesu Kurais nuvuon iji fu e fok jana fiknum tavan bog ma rediame samuagdiakfuon.