\id JHN - Namiae NT [nvm] -Papua New Guinea 2004 (web 2014) 
\h JON 
\toc1 Jon 
\toc2 Jon 
\toc3 Jon 
\mt1 JON  
\imt1 Jonon Vuak Amur  
\ip Jon fu e be fur e tuer (12) Jesuna oknum vuak fuon faimoin. Tavan uruvana fu buna besum oinon ijefuon Jesu ik fuon fu reoino iji fun gavknum vuak fuon fu nijaidiamo iji faimoin. Regavo bu Mak ga Metiu ga Rukbi suar buon ur isoikoga Jon fu rad buk igi isoin. Revo vuak iji fu Godon Kaven Akai ijar vierafemakoga fu isoin. Fu vuak iji isoimga no vuak ijefuon azan ijia no uri ma vierafen. Revo vuak iji Jon fu anerene isoinma iji fu Kurais fu Godon ruakno kuainma fu iji isoin. Regavo Jon fu madu Jesu fu ire ka sumakin iji rena e bu oiserdiainva ijin kuain. Fu ijia isoikin no ijia da giame amarigia vierafero Jesu fu ma Godon Farifro no ijeg vierafekro fu iji isoin. Regavo ja Jonon buk fu isoinma iji dakva ja gaga Jesu fu ma karivako ijefuon gireg ma ijin. Regavo fuiji fu bred ga do ma iji no iknum ma karivakfuon ijin. Regavo fu e iji maf-sif mukoi samuagdiamo ijekin ijefuon fu no mukoi samuagduok. Revo fu unam no God Asoij iji fino ijia vakfuon ijin. Ga fu kainuvuon ga E Bomana nuvuon ijin.  
\iot Jonon vuak kafokafo fu isoinma ijin  
\io1 \ior 1:1-18\ior* Vuak igi Jesu fu izia rokga bu moikigia nafenva ijin.  
\io1 \ior 1:19-51\ior* Jon e do ruardiamo ijiga e iji bu amur Jesuon vuak fai vo renva ijin.  
\io1 \ior 2:1–12:50\ior* Jesu fu samakaf kekome e fok ijiebuon nifak ijia ik reoinma ijin.  
\io1 \ior 13:1–19:42\ior* Jesu fu tavan fuon radkma iji fu Jerusarem guf ijia ga ar samaij ijia oinma ijin.  
\io1 \ior 20:1–21:25\ior* Jesu fu guame una uri e vuak fuon faivo iji biediainma ijin.  
\c 1  
\s1 Jesu fu ruainma ijin  
\p
\v 1 Ik amur God fu moikigi ba amarenma ijia Vuak Iji fun ijia fusik fine ruain. Regavo Vuak Iji fu Jesur Godk fin ga Jesu fu Godk bu besum.  
\v 2 Ik amur ijia Jesu fun Godk fin.  
\v 3 God fu Jesuon if ijia ga daro fuon ijia ire fok amardiain.  
\v 4 Regavo Jesu fu ma karivako ijin ijefuon fur sanainma ijin abe e fok miain.  
\v 5 Jesu fu sanainma iji abe moikigi nakinma ijia rokga e moikigia ise reoijo iji buba abe unain.   
\p
\v 6-7 Ijegreare God fu e Jon kuavo e vuak fuon abe oinon iji kuamga fu sanainma ijefuon vuak iji abe moikigia ruain. Jon fu uri moikigia e fok sanainma ijefuon kuardiamga bu vuak fuon iji mukoi faime ma vierafekro fu ruain.  
\v 8 Jon fu sanainma iji fu bakin gavo fuim e iji sanainma iji ruakreno ijefuon vuak iji abe amur e iji kuardiame ruain.  
\v 9 Jesu fur fu ma sanainma iji ga fur moikigia e fok sanainma fuon iji abe nijaidiain.   
\p
\v 10 Areme Jesu fun ema igegrene moikigia oin. God fu Jesuon azan ijia moikigi amaren. Regavo e fok buba fu mukoi game ma vierafen.  
\v 11 Fu moik fuon ijia rokga efuon iji bu fuba oimarknum afen.  
\v 12 Regavo e roin bu fu ma vierafene bu fu oijmame afevga fu daro miamga bu Godon afijaf ren.  
\v 13 Bu Godon afijaf renva ijefuon maiji Godri Kaven fuon iji kege bu uniafdiain ijefuon bu ema ijiebuon afijaf bakin gavo bu Godon afijaf.  
\v 14 Areme Vuak iji fun ema rene tavan ivuankbe nona besum moikigia oin. Fu Asoifuon kaf gufia fino ijefuon Farif besum ijin ga fuon sanainma asoifuon fu abe mainma iji non gain. Jesu fu unam ma ijiga Godon ma ijekma oin.   
\p
\v 15 Jon fu e ijefuon kuaimoin. Fu kume, Na e ijefuon kuardiame kia, E iji fu rad jajie rok ga fur fu ma e ikin fu na asidien. Ijefuon maiji naiji bu rad nafedien gavo fuiji fun usuibe fun Godk ijia fi ruain.  
\v 16 Godon maiji zarainma fu kanafu nainma iji fu tavan bog vajuoknum ifejduom.  
\v 17 Regavo God fu akai fuon abe Mosis mama fur abe no kuarduin ga Godon oijmiamo ijiga fuon ma iji fun kege Jesu vajama fur kege no vajuin.  
\v 18 Regavo God fu erar gainma bakin. Fun Farifuon iji fuk God renma ga fu tavan bog fusik fino ijar Godon vuak iji abe e fok kuardiain.   
\s1 Jon e iji e do ruardiaoinma ijin  
\r (Metiu 3:1-12; Mak 1:1-8; Ruk 3:1-8)  
\p
\v 19 Areme e Jiusbuon e mamkanuk ai Jerusarem karinva bu e Godon isuf baroijo iji abevo e Rivait iji kiavga bu va Jon kua, Aiji a erano kuain.  
\v 20 Bu ijeg kuavga Jon fuba vuak kafo kuardiain revo fuka vuak ma ijesugin samakaf kuardiame kia, Naiji na e iji God fu kuamga fu arime e fok igin karauniakro roko iji bano kiain.  
\v 21 Fu ijeg kuardiamga e iji bu uri Jon kua, Regavo aiji a era? A e Eraija ki a erano kuain? Bu ijeg kuavga Jon fu una kia, Naiji na e Eraija bano kiain. Fu ijeg kiamga bu una kua, Regavo a e Godon vuak vierafene kuaimon ijino kuain. Bu ijeg kuavga Jon fu una kia, Naiji na e Godon vuak faime vierafene kuaivo iji bano kiain.  
\v 22 Fu ijeg kiamga bu una kua, Regavo aiji a era? Regavo if on iji era ga a irerag reoinon iji kuarduoga no una e gafi bu no kuova no ruainva iji kuardiafno kuain.   
\p
\v 23 Bu ijeg kuavga Jon fu uri e be usuibe Godon vuak vierafene kuaimon e Asaia ijefuon vuak ijia bijame ijeg kuardiain. Fu kia,  
\q1 Naiji na e be fu ai moikum namo ijia fine kume, E Bomana ijefuon unam iji mukoi arir amarekega fu rokno kumeno ijino kiain.   
\p
\v 24-25 Ijegreare e iji vuak abe oijo iji e Ferisis bu kiavga bu Jon fino ijia ruainva iji bun useme Jon kua, A kume a e iji God fu kuamga fu ruainma iji bakin ga a e Eraija bakin ga madu a e iji Godon vuak vierafene kuaimon iji bano kumen. Regavo a irerafuon e do ruardiamno kuain?  
\v 26 Bu ijeg kuavga Jon fu una roin kia, Na ja kege doma ijesugin ruardia gavo e be jaba vierafenva iji fu jana ijia manin.  
\v 27 E iji fu rad jajie rok revo naiji naba aresredo na diak surif fuon fu samo naba kuniairumdakno kiain.  
\v 28 Regavo ire fok renma iji fu ai Betenino kuavo do Jodan irif gara tavan ajiemo Jon fu e do ruardiainma ijia ijeg ren.   
\s1 God e iji fu abe nuvuifuon isuf baroinma ijin  
\p
\v 29 Areme afarma Jon fu gak Jesu rokga fu game uri kia, Ni gafia gaf! E iji fu nuvuifuon vajai fian abene vajai fuon abe isuf barokfuon iji fu gafa roko gaf. Regavo e iji God fu abe e fok ijiebuon isuf baroga fur e fok moikigia ise reoijo iji karauniakfuon.  
\v 30 Na e ijefuon na iji kuardiame kia, E be fu rad jajie rokon kiain. Regavo fuiji fuka ma e ikin gavo naiji na bakin. Ijefuon maiji fuiji fun usuibe Godk ijia fin gavo na bu rad nafedien.  
\v 31 Na e iji naba mukoi vierafen. Regavo nam e iji do ruardiaga e fok ai Isrer karinva iji bu fu mukoi vierafekva ijefuon na iji ijeg ren.   
\p
\v 32 Areme Jon fu izeg Godon Kaven fu gainma iji e fok kuardiame kia, Na ga varur gufia Godon Kaven be fu um guaf igeg arime Jesuon nigen ijia finan na gainvano kiain.  
\v 33 Fu ijeg kuardiame kia, Na um iji nan gain gavo naba fu mukoi game vierafen. Regavo fu God e iji na kiema na e do ruardiavo ijar kie, A do ruardiaknum gaga Kaven Akai fu um igeg arime e befuon nigen ijia kunaiga ro e ijar Kaven Akai iji kege ja uniafdidiakno kiain.  
\v 34 Regavo iji fuka ma na ni nun ijia gainva ijefuon e iji fu ma Godon Farifno kiain.   
\s1 E iji bu ik anej ijia Jesuon vuak fainva ijin  
\p
\v 35-36 Areme afarma Jon fun una Jodan do ijia e vuak fuon faivo nokarok (2) na ijia oinon ijia fu gak Jesu ni fuon ijia ruvaka fu gain. Fu game uri e nokarok (2) iji kia, E iji God fu abe nuvuifuon isuf barokfuon iji gafijarno kiain.  
\v 37 Fu ijeg kiamga e Jonon vuak faivo nokarok (2) iji bu vuak iji faime bun Jesu fu vako ijia jame vain.  
\v 38 Bu ja vakga Jesu fu giame una dakaroime kia, Ja irerag abekuai rokno kiain. Fu ijeg kiamga bu kua, Rabai a izia fine ruainmano kuain? (Revo vuak Rabai ijefuon anej ma iji e nijaidiamon).  
\v 39 Bu ijeg kuavga Jesu fu una kia, Ni ro gafno kiain. Regavo tavan iji fu ve nakisrenma ijefuon e nokarok (2) iji bun Jesuna vake ar fu fino ijia usem game funa ijia karine ve nakin.   
\p
\v 40 Regavo e nokarok (2) iji bu Jonon vuak iji faime uri Jesu ja vainva ijia e be if fuon iji Edru e Saimon Fitaon uviaij ijin.  
\v 41 Areme e Edru fun migegare va uviaifuon Saimon Fita bieme kua, Uviainu no e iji fu no karaunuokfuon e Kurais e iji God fu visu kuinma iji non bienvano kuain.  
\v 42 Areme Edru fun Saimon afeme Jesu fino ijia ruain. Bu ijia rokga Jesu fu uri Saimon nikajame kua, E gari a Saimon e Jonon farif. Regavo aiji rad bu Kifasno kuakno kuain. (Revo if Kifas ko Fita ijefuon ma iji Mun Ikin. Ijefuon maiji rad fuon ma vierafeno iji fuka gigikin rega e fok Jesu ma vierafejo iji fur kudiej igeg biukudiak).   
\s1 Jesu fu Firif ko Natanior kumena bu fu jainva ijin  
\p
\v 43 Areme afarma Jesu fun ai Gareri ijia vakro vierafeoino ijia fu e Firif nisaime kua ni na jajiemne kuain.  
\v 44 Regavo Firif fu ai Betsaidano kuavo ijia ruain. Regavo Saimon ko Edru bu madu bu ar ijekor.  
\v 45 Regavo Firif fun madu e Natanior nisaime kua, No e iji usuibe Mosis ga e iji Godon vuak vierafene kuaivo iji bu buk akaij ijia isoime kuai fu ruakno kuainva iji non bien. Regavo e iji Jesu fu Josofon farif ga fu ai Nasaretkor.  
\v 46 Fu ijeg kuardamga Natanior fu una e Firif kua, Ar ukak Nasaret aikin iji fun irerag ma be fu ijia rekma iji fuka ma bano kuain. Fu ijeg kuamga Firif fu kua, Anim nosik va gafia keko koikon gamne kuain.   
\p
\v 47 Areme Jesu fu gak Natanior fu samaij ijia vakga fu uri kua, E gari fu ma e Isrerko buon uifarif revo fu e ir kufuikin bano kuain.  
\v 48 Rega Natanior fu uri Jesu kua, A izeg unam nun na kuaim kegoijo iji gieme vierafenmano kuain. Fu ijeg kuamga Jesu fu una roin kua, Firif fu rad kuamga a uri fu ja ruain revo naiji na amur gafi in anej a finma ijia na on izeg a vierafenma ga a e izekin iji nan gainvano kuain.  
\v 49 Fu ijeg kuardamga Natanior fu uri kua, E vuak nijaidiamon aiji a Godon Farif ga madu a e Isrerkobuon E Bomanano kuain.  
\v 50 Fu ijeg kuardamga Jesu fu una kua, A na ma vierafenma ijefuon maiji na a kua a vek gafi in anej ijia fino ijia na ga vierafenvano kuainva ijefuon a na ma vierafen. Regavo ire igi na iviakma kuardavo ijesugin bakin gavo rad na ire sumakin uruvana rega a giakno kuain.  
\v 51 Areme Jesu fun dakaroime kia, Vuak igi naka ma kuardiavno faif rad ja kaf gufi asoinun fu fino ijefuon vien fu dajaga anera fuon bu ijia ajie fuon vaknum una arime Godon Farif igi nun roga ja giak.   
\c 2  
\s1 Bu ai Keina ijia sanamikuai iro inva ijin  
\p
\v 1-2 Naki nokarok (2) barko bu ai Keina Gareri guf ijia sanamikuai iro bomana be ijga Jesuon asiej iji fu ijia vain. Regavo Jesu ga e vuak fuon faivo iji bu madu bu iro iji sarekuai kiavga bun ijia vain.  
\v 3 E uruvana bun iro iji iknum do be bu kua vuain no kuavo iji iknum ijegre vake vuain iji fun barekoga Jesuon asiej iji fun uri Jesu kua, E iji bu do vuain iji bun i barenvano kuain.  
\v 4 Fu ijeg kuamga Jesu fu uri kua, Asienu a irerafuon na nijaidie ga kuardiem? Ire fok nan vierafen ga tavan nun na anerene ik nun rekfuon iji fuba ruainmano kuain.  
\v 5 Fu ijeg kuardamga Jesuon asiej iji fun una e iji ire karme e fok vajiaoijo iji kia, Jesu fu irerag kuardiaga ni ire iji fu kuardiamo iji mukoi faime refno kiain.   
\p
\v 6 Regavo ar iji bu karine duok ijo samaij ijia bu saror mamkanuk imut roin ga nikit (6) besum ijeg bu kege ijia nain. E Jius bu akai buon bu nainva ijia bu vierafe bu imut do sokva God fu oimaik. Ijefuon bu saror iji kege ar ijia nain. Saror iji buka mamkanuk ijefuon bu do uruvana jiaga buka irtoijev.  
\v 7 Jesu fun e iji bu duok nifie e iji vajiaoijo iji kiamga bu rokga fu kia, Ni saror igi karme do jiafno kiain. Fu ijeg kiamga bun saror fok karme do jiava buka irtoije baren.  
\v 8 Areme fun una kia, Nin do iji kafo jiame va e gafi iro igi inma iji samuamo iji vajafno kiain.  
\v 9-10 Fu ijeg kiamga bu do iji kafo veseme va e iro iji samuamo iji vajava fu kege ine faik do iji fun ma vuain. E iji iro samuamo iji fu vuain iji bu izia kege ruainva iji fuba giain. Regavo bun e iji do iji veseme vainva ijieb vuain iji fu izia ruainma iji bur mukoi vierafen. Areme e iro iji samuamo iji fun e iji sanamivo iji abevo e fok kiamga bu isuar kariko fun uri Jesu kua, No unam nuvuon no rejo iji fu be. No amur no do vuain ma ijar ijknum e fok vajiame rad noson vuain ise iji ijo. Regavo aiji a vuain ma iji a abe abede fine radkma ijia abe e fok no vajuinmano kuain.   
\p
\v 11 Rega Jesu fu amur anerene darokma ire sumakin fu kege e fok nijaidiainma iji fu ai Keinan Gareri guf ijia ijeg ren. Ar ijia fu fuon sanainma iji abe e fok nijaidiamga e vuak fuon faivo fok bu ijia game fu ma vierafen.  
\v 12 Bu ijegrene Jesu ga asiefuon ijigam uviaifijaf ijigam e vuak fuon faivo iji bun uri vake ai Kafoniam ijia useme naki sibank ijia karin.   
\s1 Jesu fu Godon Ar ijia aru vainma ijin  
\r (Metiu 21:12-13; Mak 11:15-17; Ruk 19:45-46)  
\p
\v 13 Areme e Jiusbuon tavan iji bu kua Fasovano kuavo bu iro ine una saifijaf iji bu ai Ijift ijia vajai fian abeknum e ijiebuon ikreoija God fu karauniainma iji vierafejo iji fun samairen. Ijefuon Jesu fun Jerusarem aji vain.  
\v 14 Fu va Jerusarem kekome Godon ar ijia arume gak e uruvana bu ijia arume maf-kau ga maf-sif ga um iji kege isufuon una e kafobuon kimej. Regavo fu giak e roin bu fata ijia karine mon dame vajuonamiv.  
\v 15 Fu giame uri ire be isua igekin ka gigikin iji abe dab fanuf fok bu kege ijia aru karine kimejo iji fijiama bu usem subin. Bu usem subi vakga fu uri e ijiebuon fata iji bu karine mon dame vajuonamivo iji kam karoime mon buon kam uduim kozen.  
\v 16 Areme fu uri e iji karine um kimejo iji kia, Um jon iji kare usem vaf. Ja erar kiaga ja Asoinun ijefuon ar igi abe maket akar igeg amarvno kiain.  
\v 17 Jesu fu ijegrega e vuak fuon faivo iji bu migegare Godon vuak iji bu usuibe buk akaij ijia bu isoinva iji vierafen. Regavo vuak iji fu ijeg kuai,  
\q1 O God ar on ijia bu vuak ma iji kuaiknum sirimamejor iji oinun fuka mian igeg naino kuain.   
\p
\v 18 Jesu fu ijegrega e Jiusbuon e mamkanuk iji bu migegare una duna be kua, Ni ire sumakin be rega no ijia game vierafero a daro namo ijefuon a ivia no kuriairega no usem vakno kuain.  
\v 19 Bu ijeg kuavga Jesu fu una kia, Ja Godon ar bomana igi bujakorekva na naki nokbek (3) guf ijia na una sa barekno kiain.  
\v 20 Fu ijeg kuardiamga bu una kua, Ar igi no juaivasia uruvana foti siks (46) ijeg akozme ar iji sa baren revo a izeg naki nokbek (3) ijia una sakno kuain.  
\v 21 Rega Jesu fu Godon ar ijefuon kuainma bakin revo fu vajai fuon ijefuon bijame kuaima e Jius iji buba fain.  
\v 22 Regavo rad Jesu fu guame naki nokbek (3) barga fu uriga e vuak fuon faivo iji bu vuak fuon iji fu Godon ar ijia bija kuainma iji vierafen. Areme bu ijia una Jesuon vuak fu kuainma ijiga Godon buk akaij iji ma vierafen.   
\p
\v 23 Jesu fu Jerusarem ijia tavan bu kua Fasovano kuavo ijia iro iji bu ijo ijia fu fiknum ire sumakin uruvana reoga e fok bu iji giame bu fu ma vierafen.  
\v 24-25 Regavo Jesu fu e uruvana ijiebuon oij iji fun giain ijefuon fu erar una ema ijiebuon unam bu kegoijo ijin Jesu nijaikma bakin. Rega fun oibuon giainma ijefuon fuba bu ma vierafene fuon ma iji abe samafrediama bu gain.   
\c 3  
\s1 Jesu fu Nikodimas vuak nijainma ijin  
\p
\v 1-2 E Ferisi be if fuon iji Nikodimas revo fu e Jiusbuon e bomana be ijar naki be naki ijia vake Jesu fino ijia kekome kua, E Nijaidiamon no vierafega Godri a kuamga a e fok no nijaiduokro ruain. Fu erar ire sumakin darokma fok a reoino ijekin rekma bakin gavo fun e iji tavan bog Godk oinon ijar ire sumakin igi a reoinon ijekin kafokafo rek.  
\v 3 Fu ijeg kuamga Jesu fu una kua, Vuak igi na ma kuardavo fai erar fu vierafega fu e iji God fu oibuon iji samuagdiamo ijiena mazikma iji fuka God kuaga fu Kaven Akai abe unafdak. Kaven Akai iji fu oifuon ijia fine daro maga fu am ukak igeg nafene una unam iviamkor ijia amarigia kege vakfuon.   
\p
\v 4 Fu ijeg kuardamga Nikodimas fu vuak iji fuba mukoi faime vierafenma ijefuon fu una Jesu kua, E iji bun e mamkanuk renva iji bu izeg una am ukakna rene asiefijaf defok ijia arime bu una nafediakno kuain.  
\v 5 Fu ijeg kuardamga Jesu fu una kua, Vuak igi na ma kuardav. Erar fu vierafe fu e iji God fu oibuon iji samuagdiamo ijiena mazikma e iji fuka God kuaga fu daro fuon ijia do ijiga Godon Kaven ijefuon azan ijia oifuon iji somdaga fu una e iviamkor rek.  
\v 6 Regavo am iviamkor iji bu ema ijieb nafejo revo kaven iviamkor iji fu Godri koikfuon abe e iji unafdiak.  
\v 7 Ijegvo e fok bu una am ukakna igeg nafekfuon iji na kuardainva ijefuon ab vuak iji faime oiserdak.  
\v 8 Regavo ni igia fai buibur iji fu ufime roko ijigam fu ufime vako iji no gavo bakin ga nom vua fuon ijesugin faiv. Buibur iji fu ufimo ijeg Godon Kaven iji fu e besubesum ijiebuon oij ijia ikreno iji no izeg gakva bakin.  
\v 9 Jesu fu ijeg kuardamga Nikodimas fu vuak iji fuba mukoi faime vierafen ijefuon fu una madu Jesu kua, Vuak igi a kuardiemo iji na izeg vierafek?   
\p
\v 10 Fu ijeg kuardamga Jesu fu kua, Aiji aka e Isrerkobuon e vuak nijaidiamon e bomana be revo a vuak igi na kuardavo iji aba mukoi faim.  
\v 11 Vuak fok no kuaimoijo iji noka kufuimejo bakin no irerag no vierafenva ijiga giaoinva no iji abe ja kuardiav. Regavo ja vek vuak nuvuon jaba mukoi faime reoij.  
\v 12 Regavo iviakma na moik igefuon vuak iji abe kuardaga aka ba ma vierafen ijefuon na varur gufefuon vuak iji ja kuardiakva jaka ba una ma vierafek.  
\v 13 Regavo fu erar varur gufia ajie vainma bakin revo fun Ema buon Farif iji God fu kuamga fu ari ruainma e ijar una varur gufia ajie vain.   
\p
\v 14 Regavo Mosis fu ai moikum namo ijia ire be bu abe tabar igeg amarme abe kaf ijia ajie kiraga e adagin bu iji gavo ijia bu madiain. Ijegvo Ema buon Farif igi nak madu bu abe kuros kaf ijia kaniega na guak.  
\v 15 Ijefuon erar fu kuros kaf ijia na guavo iji gieme ma vierafekma fu unam ma karivako iji abek.  
\v 16 God fu e fok moikigia oijo iji oijmiainma ijefuon fu Farifuon besum iji kuamga fu ari ruain. Ijefuon erar fu Farifuon iji ma vierafekma e iji fuba guak gavo fum tavan bog unam ma karivako iji abe ijia fivak.  
\v 17 God fu Farifuon iji kuamga fu e fok moikigia ise reoijo ijiebuon ise iji kege mazim giakafa ruainma bakin gavo fum bu karauniakafa ruain.   
\p
\v 18 Regavo erar fu Godon Farif iji ma vierafekma God fuba rad ise fuon fu renma iji giame duna kafo kuak. Regavo erar fu Godon Farif iji ba ma vierafenma iji God fun ise fuon giame vierafedo rad fu duna kafo kuak. Ijefuon maiji fu Godon Farif besum iji fuba ma vierafen.  
\v 19 Regavo Godon sanainma iji fun moikigia e fok ise reoijo ijiebuon ise iji kege mazim giakafa ruain. Regavo e fok bu sanainma iji areme una unam nakinma iji oijmainva ijefuon e fok bu ire ise fok reoin.  
\v 20 Regavo erar fu ise reoinon iji fu sanainma iji fu ma uzam. Ijefuon fuba una sanainma ijia ruak. Ijefuon maiji fun ise fok reoido fu una sanainma ijia ruakrega ise fuon fu samafrekro fuka mukoi jum.  
\v 21 Regavo erar fu unam ma ijesugin reoinon iji fu una sanainma ijia ruakro fuba juk. Ijefuon maiji ire fok fu reoinon iji fu God fu oimaikfuon ijia reoin.   
\s1 Jon fu Jesuon vuak abe kuardiamoinma ijin  
\p
\v 22 Jesu fu ijeg kuardiame fun e vuak fuon faivo ijiena e Judiakobuon ar ijia vain. Fu va ijia tavan sibank ai Judia ijia e ijiena fiknum bu aferdia do ruardiain.  
\v 23 Regavo tavan besum ijia e Jon fuk fu ai be bu kua Ainon kuavo Sairim samaij ijia fin. Fu ijia fiko e fok bu ijia vako fu aferdiame do ruardiam. Ijefuon maiji ar Ainon ijia fuka do uruvana ijia ruvako ijefuon fu ijeg ren.  
\v 24 Regavo Jon iji fu reoinma iji buba abe dibur unainva ijia fu ijeg reoin.   
\p
\v 25 Ijegrekoga e Jonon vuak faivo roin bu e Jius be ijiena unam izeg bu e Jiusbuon unam ijia e kege do ruardiavo ijefuon dab bui kuaime sigunamin.  
\v 26 Bu dab kuaime siguba areme va usem Jon kua, E nijaidiamon a e be fu osik do Jodan garainak ijia oinma iji abe vierafen? E iji a fuisina kuarduinma iji fu iviakma e uruvana do ruardiaga e fok bun una fuon vak.   
\p
\v 27 Bu ijeg kuardavga Jon fu una kia, Fu erar daro fuon ijia ire ijekin kafo reokma bakin gavo fun Godri kuakma fu moikigia ire ijekin iji reok.  
\v 28 Regavo jan koikjo nana oknum faikoga na kuai, Naiji e iji God fu kuamga fu moikigia ari ruainma iji bano kuain. Regavo naiji na ur unam fuon amarme moikigia ruain gavo fu rad jajie rokno kiain.  
\v 29-30 Regavo ni faif e be fu farifuon ijar bara abekro fuifuon unam amaren gavo fu faifai farifuon fun bara abenma fai fuka bomana oimarek. Unam besum ijeg ga naiji na e iji fu ruakreno ijefuon unam iji amare ruain. Regavo iviakma na fai e iji fun ruain ijefuon naka bomana oimadien. Ijefuon maiji fur fu e ikin reke ga naiji na e ukakbe rek.   
\s1 E iji fu kaf gufia ari ruainma ijin  
\p
\v 31 E iji fu kaf gufia ari ruainma iji fuka e bomana revo ire fok fur asidiain revo fur ire fok samuagdiamon. Regavo e iji bu moikigia nafenva iji fu e moik igekor ijefuon vuak fuon fok fu kuaimoino iji fu moik igefuon kuaimoin.  
\v 32 Regavo e iji kaf gufia ari ruainma iji fu vuak fok fu fainma ijiga ire fok fu giainma iji abe e moikigia karinva iji kuardiain. Regavo e iji bu vuak fuon buba mukoi faime igav.  
\v 33 Regavo erar fu vuak fuon iji mukoi fainma iji fu ma vierafero God fu maro fu ijeg vierafen.  
\v 34 Regavo e iji God fu kuamga fu ari ruainma iji fu vuak God fu kuardainma ijesugin abe e fok kuardiam. Ijefuon maiji Godri Kaven fuon darokin iji fu daknum vajamo bakin.  
\v 35 Regavo God Asoij iji fu Farifuon mukoi oijmamo ijefuon ire fok fu Farifuon iji kuaga fu samuagdiam.  
\v 36 Regavo erar fu Farifuon iji ma vierafekma e iji fu unam ma karivako iji abek. Regavo erar fu Farifuon ijefuon vuak iji ba mukoi faime igakma e iji fu unam ma karivako iji fuba abekfuon. Regavo Godon ziemo iji fuka tavan bog fusik navak.   
\c 4  
\s1 Jesu fu bara be ai Sameriako ijek vuak kuainma ijin  
\p
\v 1 E Ferisis iji bu faik e uruvana buka una Jesuon vuak faivknum una fuon vakok fu aferdiame do ruardiako Jon bu arevo bu iji fain.  
\v 2 Regavo Jesu fu koikfuon ba e iji kege do ruardian revo bu e vuak fuon faivo ijieb e iji aferdia do ruardiav.  
\v 3 Jesu fu faik e Ferisis iji bu vuak iji abe kuaimoijga fun ai Judia areme una madu uri Gareri ijia vain.  
\v 4 Regavo Jesu fu ai Gareri fu vainma iji ur fu ai Sameria ijia kekomevo ijar Gareri vakro ijeg vierafene vain.  
\v 5 Ijefuon Jesu fu roke ai be Sameria guf iji bu kua Saikano kuavo ijia kekoin. Regavo ai Saika fu moik ivuankbe Jekaf fu abe farif fuon Josof mainma iji samaij ijia.  
\v 6 Regavo ai Saika ijia Jekafon do be fu moik guf ijia nafuinma bu jiavo iji fu ijia. Ijefuon Jesu fu unam jiamana roke tavan uk manino ijia fu aimamga fu do iji irif ijia fin.   
\p
\v 7 Jesu fu do irif ijia figa bara Sameriako be fu do jiakafa rokga fu uri bara iji kua, Do be jia mie na ijno kuain.  
\v 8 Regavo e Jesuon vuak faivo fok bun ar ijia duok ikfuon iji kimekuai vakoga fu fuonkua ijeg ren.  
\v 9 Jesu fu bara iji dofuo kuamga bara iji fu una kua, Aiji a e Jius ga naiji na bara Sameriako ijefuon a irerafuon na dofuo kiemno kuain. (Bara iji fu Jesu ijeg kuainma ijefuon maiji e Jius buba e Sameriakona besum afuime karioijo).  
\v 10 Ijefuon Jesu fu una kua, A irerag God fu vajamo ijiga e igi erar igia fine a dofuo kuamo iji mukoi vierafebatie a fu kuaga fur do ma iji jiame a mak. Ijefuon maiji fur do iji bu ine tavan bog ijia ma karivako iji abe una a mak.  
\v 11 Jesu fu ijeg kuardamga bara iji fu una kua, E Bomana do igi nafuinma iji fuka mako dibuor gamia revo a baket bakin. Ijefuon a izer do iji bu ine ijia ma karivako iji jiak.  
\v 12 Regavo no sainuvuon Jekaf fu mako igi rume arema do iji fu ijia nafuimga afijaf iji abevo fanuf fuon fok bu do ijia iknum oin. Regavo aiji a vierafero ar e bomana ga Jekaf fu e ukakbero a ijeg vierafene kuaim.   
\p
\v 13-14 Bara iji fu ijeg kuardamga Jesu fu una roin kua, Erar do mako igia nafuinma igi jia ikma fuka rad una do kafak. Regavo erar fu do igi nar jia mavo iji abe ikma rad fuba una do kafak. Ijefuon maiji do iji nar jia miainva iji fu tavan bog oijon guf ijia navak revo do ijar ja ifejdiaga ja unam ma karivako iji abek.  
\v 15 Jesu fu ijeg kuardamga bara iji fu una kua, E Bomana ni do iji a kuaimon iji iviakma jia miega na abe ij. Naka tavan bog mako igia do jiakok fuka isediem ijefuon ni do iji a kuaimon iji jia miega na inkin rad naba una do kafiekno kuain.   
\p
\v 16 Fu ijeg kuamga Jesu fu kua, Ni una va baru on iji afeme una igi na fijo igia rokne kuain.  
\v 17 Rega bara iji fu una kua, Naiji na baru bano kuain. Rega Jesu fu una kua, A kie a baru kafo bano kienma iji aka ma kuardiem.  
\v 18 Regavo a amur baru imut roin (5) ren gavo iviakma baru iji a fusik fino iji fu ma baru on bakin. Regavo iviakma na kuavga a kie a baru bano kienma iji an ma kuardienmano kuain.   
\p
\v 19 Jesu fu ijeg kuardamga bara iji fu kua, E Bomana na gaga aiji a e iji Godon vuak vierafene kuaimon ijin.  
\v 20 Regavo e Sameriako saifnuvuon bu usuibe uruor igia ajieme Godon sirimameknum dua urukafame aroivo. Regavo ja e Jius iji ja kuai Godon ar no sirimameknum aroikfuon iji fu Jerusarem ijiano kuaiv.  
\v 21 Fu ijeg kuamga Jesu fu una kua, Ni vuak igi na kuardavo igi ma vierafe tavan abekma noba una uruor igia ga ai Jerusarem ijia karine Godon sirimameknum fu aroik.  
\v 22 Regavo ja e Sameriako iji ja erafon sirimamejo iji jaba mukoi vierafeknum sirimamej. Regavo e Jius noiji no erafon sirimameknum aroivo iji non mukoi vierafen. Ijefuon maiji God fu e fok karauniakfuon iji fu e Jius ijia kuamga fu ari ruain.  
\v 23 Regavo e iji bu kaven ma vierafeknum Godon sirimameknum fu aroikva ijefuon tavan iji fu vek gavo na ma kuardav ire iji bun iviakma igijar rej. Ijefuon God fu e ijeg sirimamejo fu iji vierafeknum nisaidiam.  
\v 24 Regavo God fu e Kaven ijefuon erar fu Godon sirimamekma fuka kaven fuon ijekma oi ma vierafeknum sirimamek.   
\p
\v 25 Jesu fu ijeg kuardamga bara iji fu una kua, Na e iji fu e fok karauniakfuon God fu kuaga fu ari ruakfuon if fuon Kurais iji nan vierafen. Ijefuodo fu rad ruakma fur ire fok amarigia kuarduok.  
\v 26 Fu ijeg kuardamga Jesu fu una kua, E iji God fu kuaga fu ruakfuon iji nan iga ruainva iviakma nar igi osik manine vuak kuaivno kuain.   
\p
\v 27 Bu ijeg kuaivo ijia e Jesuon vuak faivo iji bu vainva iji bun una ijia usen. Bu usem gak Jesu fu bara ijek vua kuaimga buka oiserdiain. Buka oiserdiain gavo buba una bara iji kua, A irerag abekro vierafen? Regavo madu buba una Jesu kua, A irerafuon bara ijek vuak kuaimno kuain? Buka rubdiamga bu ijia irem giain.  
\v 28-29 Bu irekoga bara iji fun do iji fu jiainma iji dab ijia abedeme una va ar ijia e fok kia, E be fu ire fok na nuriet reoinva iji fuka visu kuardiema na fain. Ijefuon na vierafe e iji fu kafu Kurais Godri kuamga fu ari ruainma ijino rua no gak vakno kiain.  
\v 30 Bara iji fu ijeg kuardiamga e fok bun ar iji areme una Jesu fino ijia fu gak vain.   
\p
\v 31 Ijegrekoga e Jesuon vuak faivo iji bun uri Jesu soisoime kua, E vuak nijaidiamon duok kafo ine kuain.  
\v 32 Bu ijeg kuavga fu una kia, Duok nun iji na ine daro abe oijo iji jaba mukoi vierafenvano kiain.  
\v 33 Fu ijeg kuardiamga e vuak fuon faivo iji bu isuar una bui kuai, E iji fu kafu e kafob duok kege ro vajainvano kuain.  
\v 34 Bu una bui ijeg kuaivga Jesu fun giame una kia, Na ire iji na bijame kuardiavo iji na Asoinun ire iji fu vierafenma iji igame vo ik fuon iji fu na kuardiema na ruainva iji ka re barek.  
\v 35 Fu ijeg kuardiame uri vuak be ijeg bijame kuardiain. Ja kuai no asam nokarok ga nokarok (4) barekma no juar masikno kuaiv. Regavo ni juar garia giaf ire fok buka du barme masikfuon samuain.  
\v 36 Ijefuon e iji fu juar masime kanafu ai mukor ijia naga bu tavan bog ijia naoimvakfuon iji fun Godri kimen. Ijefuon vo e iji uij dajaimo ijiga e uij kanafumo iji bu gia e uruvana bu una oi karoime una unam ma karivako iji kegoi bu giakva buka oimarek.  
\v 37 Regavo vuak iji bu kuaivo iji fuka ma e be fu uij dajaiko be fu masim.  
\v 38 Na ja kiavno nin va juar iji jaba menva ijia ire duinva iji masif. Regavo juar iji bu e roinb menva iji ja ijia ire ma iji duinva ijin masime karfno kiain.   
\p
\v 39 Areme e Sameriako iji ar ijia karinva roin bu una Jesu ma vierafen. Ijefuon maiji bara iji fu kia, Fu ire fok na nuriet reoinva iji kuardienmano kiain.  
\v 40 Ijefuon e Sameriako bu usem soisoime kua, Nika nona igia fine kuavga fu naki nokarok (2) una ijia buna fin.  
\v 41 Fu buna ijia fiknum vuak nijaidiamga e uruvana buka tavan ijia una fu ma vierafen.  
\v 42 Areme bu una usem bara iji kua, No ivia noka fu ma vierafen ijefuon maiji non koiknuvuon vuak fuon ma iji fu kuarduomo non fain. Regavo no vuak a kuarduinma ijefuon no iji fu ma vierafejo bakin. Gavo fuiji fu ma e moikigia oijo iji karauniakfuon ijin.   
\s1 Jesu e bomana be ijefuon am iji fu adam abenma iji keunainma ijin  
\p
\v 43 Jesu fu naki nokarok (2) barekoga fun una madu uri gafia Gareri ajie vain.  
\v 44 Regavo Jesu fu koikfuon e vuak fuon faivo kuardiame kia, E iji Godon vuak vierafene kuaimon iji e aiko fuon iji buba fu akaime vuak fuon amarigia faime igakno kiain.  
\v 45 Regavo tavan ijia fu vake Gareri kekomga e iji karinva iji buka fu oimardame afen. Bu oimardainva ijefuon maiji bu Jerusarem ijia tavan Fasova iro iji iknum oimarkuai vainva ijia bu fu gain. Bu koikbuon ni buon ijia ire sumakin kafokafo fu rena bu giain ijefuon bu fu afen.   
\p
\v 46 Ijefuon Jesu fun tavan be una madu vake ai Keinan moik Gareri guf ijia kekoin. (Revo ar iji fu ur ijia do iji abe una do vuain bu ijo iji amarenma ijin). Regavo ai Kafoniam ijia e gaman ijiebuon ikreno be ijefuon am ijar ka adam ma bomana be aben.  
\v 47 E iji fu ijia fine Jesu fu ai Judia areme una Gareri ruainma fu iji fain. Ijefuon fu va kuaga Jesu fu farifuon iji adam abene fuka guakreno ijin keunakro fu ijeg vierafene vain.  
\v 48 Fu vake gafia keko kuamga Jesu fu una kua, Ja e fok ja vierafe naka ire sumakin mukor kafo uruvana rega ja ijia giame ijar una na ma vierafekuai ja ijeg vierafenvano kiain.  
\v 49 Jesu fu ijeg kuardamga e bomana iji fu una kua, E Bomana e-e nika nosik vakne revo a saroikma farinun iji fuka guak.  
\v 50 Fu ijeg kuardamga Jesu fu una kua, Na vierafe farifon iji fuba guakgavo fu una maikno ni una vakne kuain. Fu ijeg kuardamga e bomana iji fu Jesuon vuak ijin abe ma vierafene fun una ai fuon ijia vain.   
\p
\v 51 E bomana iji fun una vakgame efuon ikrejo roin bu vuak abe roke unam ijia fu bieme usem kua, Amon adam abenma iji fun mainmano kuain.  
\v 52 Bu ijeg kuardavga e bomana iji fu tavan ivez farifuon fu una mainma ijefuon kiamga bu una kua, Fu niar tavan una gura manino ijia fu una urinmano kuain.  
\v 53 Ijefuon e bomana iji fu ijia una vierafero Jesu fu tavan besum ijia fu una kua, Farifon iji fun una urikno kuainma fu iji vierafen. Ijefuon fu aganfuon ijiena tavan ijia una Jesu ma vierafen.  
\v 54 Jesu fu Judia oinevo fu una Gareri roko ijia fu unam sumakin nokarok (2) ijin rena bu giain.   
\c 5  
\s1 Jesu do irif ijia e adagin be keunainma ijin  
\p
\v 1 Tavan sibank barekoga Jesu fun una Jerusarem ijia e Jius bu afuime iro buon be ijo ijia vain.  
\v 2 Regavo ai Jerusarem ijia vien bomana be bu kua Sif Vieno kuavo iji samaij ijia do be fu ijia nafuin. Regavo do iji nafuinma iji bu e Ibrukobuon isama ijia bu kua Betesdano kuavo. Do iji nafuinma irif ijia bu ar kafo sa ameoine aren.  
\v 3 Ijefuon e adam abejo ga e diak ise ga e ni zuriaigin ga vajai garenva uruvana bu ar ijefuon banad ijia naoiga do iji fu katiga bu gakuai bu iji samua naoiv.  
\v 4 Ijefuon maiji Godon anera iji bu tavan kafokafo do ijia ari dab kativ. Regavo e adagin erar fu amur migegare do iji fu katime areke fu ijia arime una ajiekma e iji adam fuon irerag fu abeno iji fuka migegare barek.  
\v 5 Ijefuon e be ijia namo iji fuka juaivasia uruvana adam abenma ijar ijia nam.  
\v 6 Ijefuon Jesu fu keko e iji namo iji gain. Fu game vierafega e iji fuka usuibe adam abenma ijar ijia nam. Ijefuon Jesu fu uri kua, A vierafe adam on iji fube migegare madakno kuain?   
\p
\v 7 Fu ijeg kuardamga e adagin iji fu una roin kua, E Bomana na erar na aferdieme imuikie do guri katimo ijia uniega na do ruaikva bakin. Na do guri fu ik katimo ijia na ruaikafie urijo iji bun e roinb amur asidie ruaigame naiji na ijia arevno kuain.  
\v 8 Fu ijeg kuardamga Jesu fu uri kua, Ni uri suf on iji ke matome vakne kuain.  
\v 9 Fu ijeg kuamga migegare e ijefuon adam iji fuka maimga fu uri suf fuon iji ke matome una ai fuon ijia vain.  
\p Regavo e adagin iji Jesu fu kuamga fu suf ke mato vainma iji fu tavan Sabat (Satade) iji e Jius bu isuar karine Godon sirimamejo ijia fu ijeg ren.  
\v 10 E Jiusbuon e mamkanuk roin bu usem e iji game kua, Ivia tavan Sabat (Satade) igi fu akai no isuar karijo revo suf iji a ke matom roko iji fuka ba maren. Ijefuon maiji akai nuvuon ijia no tavan iji no isuar karijo ijia ire kafo noba kege ok. Regavo suf on guraiji a abe oinon iji aka akai nuvuon iji dab tuasenmano kuain.  
\v 11 Bu ijeg kuardavga e adagin iji fu una kia, Na e iji fu amardienma ijar kie ni suf on iji ke mato vakne kiemga ijefuon na iji suf ke rokno kiain.  
\v 12 Fu ijeg kuardiamga bu kua, Regavo e iji erar a kuamga a suf ke mato kunaim rokno kuain?  
\v 13 Bu ijeg kuardaga e adagin iji fu e iji fu amardainma iji fuba mukoi vierafen. Ijefuon maiji buka e uruvana ijia afuinva ijefuon Jesu fun e kafar ijia sauin.  
\v 14 Ijegreare Jesu fu rad una Godon ar bomana bu sirimamejo ijia e iji fu amardainma iji bieme kua, Eko vajat on guraiji fuka una madain ijefuon rad ab una madu ise rek. Regavo a una adamene ise rekma ire ka ma ise be fu una vajat on ijia rega a gakno kuain.   
\p
\v 15 Jesu fu ijeg kuardame vakoga e iji fun va e Jiusbuon e mamkanuk iji kuardiame kia, E iji fu Jesur na amardienmano kiain.  
\v 16 Ijefuon e mamkanuk iji bun va unam iji Jesu fu renma ijefuon bu uri vuak ise kafokafo fuisina kuain. Ijefuon maiji e adagin iji fu tavan Sabat (Satade) akaij iji e Jius bu isuar karine God oimardavo ijia amardain.  
\v 17 Bu ijeg kuaivga Jesu fu giame uri kia, Asoinun iji fu tavan bog ikreno ijefuon nak na ikrejno kiain.  
\v 18 Jesu fu vuak ijeg kuainma ijefuon e Jiusbuon e mamkanuk iji buka uruvana deajidiamga bu uri Jesu kanakuai vierafen. Ijefuon maiji fu akaij iji bu isuar karine God oimardavo iji bu abedenva ijesugin abe tuasenma bakigavo fu madu kuai fu God Asoifuon ijek bu besumno kuainma ijefuon bu ijeg ren.   
\s1 God fu Farifuon Jesu daro mainma ijin  
\p
\v 19 Ijefuon Jesu fu una roin kia, Vuak igi naka ma kuardiavo mukoi faif. Na Godon Farif na irerag na reoijo iji nam nar oinun igia vierafene reoijo bakin. Regavo nam irerag Asoinun ijar rega na giavo na ire ni besum ijesugin reoij.  
\v 20 Ijefuon maiji Asoij iji fu Farifuon iji oijmamo ijefuon fu uri ire fok fu reoinon iji Farifuon kuardako fu ren. Regavo fu uri ire ma mamkanuk kafo madu igekin iji nijaidie na rega ja giekva jaka oiserdiak.  
\v 21 Asoinun iji fu e bu aoivo iji fu kiaga bu una uri oijo ijeg ga Farifuon nak na e iji bu aoivo iji na koiknun e iji na vierafenva iji kiaga bu una uri karik.  
\v 22 Regavo Asoinun iji fu koikfuon e moikigia ise reoijo ijiebuon ise iji kege mazim giaknum duna kiamo bakin. Regavo ire iji fun una na kuardiega nar e moikigia ise reoijo ijiebuon ise iji fine giaknum duna kiak.  
\v 23 Regavo na ijegrega e fok bu Asoinun iji bu aroivo ijeg bu una na abe arordiek. Ijefuon eraneb buba arordievo iji bu Asoinun iji fu na kiema na ari ruainva iji buba aroiv.   
\p
\v 24 Ijefuon naka ma kuardiav eraneb vuak nun igi igieme una e iji fu na kiema na ruainva iji fu ma vierafekva e iji bu unam iji ma karivako iji abek. Fu ijegrenki rad God fuba una ise fuon iji kege mazim giame duna kafo kuaknum dab arafirak. Regavo fun koikfuon una madu guakfuon unam iji fun dajame una unam ma karivakfuon ijia ruain.  
\v 25 Regavo vuak igi na ma kuardiav tavan iji fun samairen gavo fu iga ruaido e gami aoinva iji bu Godon Farif na i nun igi faik revo eraneb bu faikva bu una ma karivak.  
\v 26 Asoinun iji fu unam ma karivako ijefuon anej ijin. Unam besum ijeg Farifuon fu na abe unam ma karivako anej iji amaren.  
\v 27 Regavo fun Godri daro miedo na fine e moikigia ise rejo iji kege mazim giame duna kafokafo kiak ijefuon maiji na Ema buon Farif.  
\v 28-29 Ijegvo jab vuak igi na kuardiavo ijefuon uri oiserdiavo. Tavan iji fun samairedo e gami mako ijia uniainva iji bu i fuon iji faikva bu mako ijia una usem ruak. Bu mako buon ijia una usemvo e iji bu ma kegoinva iji bu una ijia karivak revo e iji bu isema kegoinva iji bu una uri vajaifian abek.   
\s1 E iji bu Jesuon vuak iji abe kuaimoijo ijin  
\p
\v 30 Regavo na moikigia ire be irerag daro nun ijia reoijo iji fuka ma bakin. E moik igiebuon ise iji na kege mazim giavo iji na Asoi nun ijar kuardieko na faime ijia reoij ijefuodo iji naka ma ijefuon rej. Ijefuon maiji na nun vierafenva ijia reoijo bakin revo nan e iji fu kiema na ruainva ijefuon vierafenma na ijesugin jame reoij.  
\v 31 Regavo na koiknu uri kiak vuak nun igi na kuardiavo iji fuka mano kiakva ja izeg vuak nun iji abe ma vierafekva bakin.  
\v 32 Regavo Godri nuisina una e roin kuardiamo iji na vierafega vuak irerag fu kuardiamo iji fuka ma.  
\v 33 Jar e iji kiavga bu va e Jon fino ijia usem nuisina kuavga fuba una vuak kufui ijia kuardiain. Regavo fuka uri samakaf vua ma iji nuisina kuardiain.  
\v 34 Vuak igi na Jon fu nuisina kuainma na iji visu kuardiaikin ja ijia ma vierafekva God fu tavan radkma ijia ja karauniak.  
\v 35 E Jon vuak fu kuardiame ruainma iji fu ikuosaij abe baroina fu sanamga fu abe ruainma igekin. Fu sanainma iji abe rokga ja tavan ivuankbe ijesugin oimardain.   
\p
\v 36 Jon vuak iji fu nuisina kuardiainma iji fum sibank kuardien gavo iviakma ire sumakin ka darokin igi na rejo ijar fuka ma bomana. Ire mamkanuk sumakin igi na rega ja gievo iji ik iji Asoinun iji fu na vajienma ijin. Ja ire iji na rejo iji giakva ja ijia una ma vierafero naiji Godri kiema na ruainvaro.  
\v 37-38 Regavo madu Asoinun iji fu na kiema na ruainva iji fuk fu nuisina fun kuardiain. Ja i fuon iji jaka ba fain gavo uikinik fuon iji jaba gain gavo ja e iji fu na kiema na ruainva iji jaba ma vierafen. Regavo madu vuak fuon jaba kege oijon ijia nain.  
\v 39 Ja vierafe ja Godon vuak bu usuibe isoinva iji amarigia dakva ja unam ma karivakfuon iji ja ijia abekuai ja ijeg vierafen. Regavo vuak fok bu kuaime isoinva iji bu nuisina isoin.  
\v 40 Regavo ja nun roga nar ifejdiaga ja ma karivakfuon iji jaka uzav.   
\p
\v 41-42 Na ema jar na dab arordiekro na iji vierafenva bakin. Revo madu ja naka samakaf giain. Na giamga ja Godon oijmiamo iji jaba abe oijon ijia abeden.  
\v 43 Naiji na Asoinun ijefuon daro ga if fuon ijia ruain gavo ja oijon fok ijekma vuak nun igi ja mukoi faime abejo bakin. Regavo ja e be fum daro ga if fuon ijia ga vuak fuon iji dab ja kuardiabatie jaka amarigia vuak fuon iji faime fu kuardiamo iji igame keok.  
\v 44 Ja una joi nidoinamikuai ja iji vierafen gavo Godri fu ja nidosiakfuon iji jaba bomana vierafene uri ijef ren. Ja ijegrejo ijia ja izeg una na ma vierafek?   
\p
\v 45 Regavo jab vierafero nar ise jon igi ja reoijo ijin giame una Asoinun iji kuardakro jab ijeg vierafek. Regavo fu Mosison akaij iji ja dab ma vierafeoijo ijar ise jon ke mazim giak.  
\v 46 Ja akaij iji fu abe miainma ja iji ma vierafeoijobatie ja madu una na ma vierafek. Ijefuon maiji vuak fok fu isoime kuainva iji fu nuisina kuain.  
\v 47 Regavo ja vuak fuon fu isoinma iji jaba abe ma vierafeoijo iji ja izeg una vuak nun igi abe ma vierafek?   
\c 6  
\s1 Jesu e faiv taosen (5,000) ijeg duo vajiainma ijin  
\r (Metiu 14:13-21; Mak 6:30-44; Ruk 9:10-17)  
\p
\v 1 Jesu fu vua kuardiame fun vanag abe una do Gareri (if fuon be bu kua Taibiriasno kuavo iji) irif gara vain.  
\v 2 Fu ijia vakga e ka uruvana bu unam sumakin ka darokin iji fu e adagin fu karauniaga bu una madiamo iji gainva ijefuon bu iji jame vain.  
\v 3-4 Jesu fun e vuak fuon faivo ijiena uruor be ajie vake makaf ijia usem ijia karin. Regavo iji fun e Jiusbuon iro Fasova iji bu ijo iji samairenma ijia bu ijeg ren.  
\v 5 Rene Jesu fu una dakaroim gia buka e uruvana javga fu una Firif kua, Buka e uruvana rok revo a vierafe duok iji no izia kimene vajiaga bu ikno kuain.  
\v 6 Jesu fu izegrekfuon iji fun vierafen gavo fum Firif oifuon fu izeg vierafenma iji gakafa fu ijefuon vuak ijeg kuardain.   
\p
\v 7 Fu ijeg kuardamga Firif fu una roin kua, E guri buka e uruvana ijefuon a mon ka ma uruvana kege bred uruvana kimene vajiaga bu ikva iji madu na vierafe fuka ba aresremano kuain.  
\v 8-9 Fu ijeg kuardamga Edru e Saimon Fitaon diar ijar uri Jesu kua, Na am ukakbe fu bred ukakna imut roin (5) ga kijum nokarok (2) ijeg ke roka na gain. Regavo iji na vierafe fu izeg e fok bu iga fu defiakma bano kuain.   
\p
\v 10 Bu ijeg kuardavga Jesu fu una kia, Ni e fok kiaga bu moik ijia ari karifno kiain. Regavo ar iji bu irenva iji fu garas mukoi name aren ijefuon bu ijia ari kariga e uruvana iji vainva ijia e baru ijesugin buka e faiv taosen (5,000) ijeg.  
\v 11 Jesu fun uri bred am ukak iji fu kege vainma iji kege uri kaf gufia kuniaime Godon sirimamene kege vajiamga bu kege una e fok iji vajiain. Ijegreare fun una madu kijum iji kege amur fu renma ijegrene kege e iji vajiamga bu ija buka defiain.  
\v 12 Bun defiamga Jesu fun uri e vuak fuon faivo iji kia, Duok ukur iji kafo jab nisek nika amarigia kanafufno kiain.  
\v 13 Fu ijeg kuardiamga bun uri bred ijiga kijum ukur iji bu ija defiamga bu nainva iji karme una ter tuer (12) ijeg anusen.   
\p
\v 14 Jesu fu tavan ijia ire sumakin iji rena e uruvana bu game kuai, E iji fun ma e iji fu Godon vuak vierafene kuaimon iji fu ruakno kuainma ijarno kuain.  
\v 15 Regavo Jesu fun giamga e iji bu fu dab Kin buon rekuai ejafavga fu uri fuonkua uruor ijia ajie vain.   
\s1 Jesu fu do azan ijia vuim vainma ijin  
\p
\v 16 Rene fun tavan nakisrega e Jesuon vuak faivo iji bun uruor iji areme una do Gareri irif ijia ari vain.  
\v 17 Bu ari usem vanag abe una ai Kafoniam nak vain. Regavo iji fuka tavan nakinma ijia bu vanag abe do ijia vain revo Jesu fuba ijia buna.  
\v 18 Regavo buibur bomana ijar ijia ufiko do iji fuka bomana foin.  
\v 19 Regavo e vuak fuon faivo iji bunka vanag abe do uf garia vainva ijia bu gak Jesu fu do azan ijia bu biediakro rokga bu game buka uruvana igia juin.  
\v 20 Bu juvga Jesu fu giame kia, Na narno jab jukno kiain.  
\v 21 Rega bun una oimarknum fu afeme vanag ijia uname migegare vanag iji fu do irif iji bu vako ijia kekoin.   
\s1 E iji bu uri Jesu nisainva ijin  
\p
\v 22 Areme afarma e iji do irif gara fu bred ga kijum vajiama bu inva ijieb uri Jesu nisain. Bu vanag iji fu besum do irif ijia namo iji bun e Jesuon vuak faivo ijieb abe vaka bun gain revo Jesu fuba buna vanag ijia ajiema bu gainva ijefuon bu fu nisain.  
\v 23 Regavo vanag ai Taibiriasko iji bu roke do irif ar iji Jesu fu bred kege Godon oimarme kege una e fok vajiama bu inva ijia usen.  
\v 24 Ijefuon bu uri gak e iji Jesuon vuak faivo ijiga Jesu bu baga bu uri vanag iji bu ik usem naoivo ijia ajieme bun Jesu nisaim ai Kafoniam ijia vain.   
\s1 Jesu fu bred iji bu ine tavan bog ijia karivakfuon ijin  
\p
\v 25 Bu nisaim vake do gara ijia bieme kua, E Nijaidiamon a izeg igia ruainmano kuain.  
\v 26 Bu ijeg kuavga Jesu fu kia, Naka ma kuardiav ja na nisaidie ruainva ijefuon maiji ja bred na vajiava jaka uruvana inva ijefuon ja iji nisaidieme ruain. Regavo ja unam iviamkor sumakin na reja ja gienva ijefuon nisaidie ruainva bakin.  
\v 27 Jab uri juar ja duok abedeme ikfuon ijesugin vierafek. Ijefuon maiji duok iji bu tavan rad bu barek. Regavo ni uri daro jon iji kege ire iji ja ine tavan bog ijia karivakfuon ijin vierafene ijefuon ik reof. Regavo ire iji Ema buon Farif igi nar ja vajiakfuon. Ijefuon maiji God Asoij ijar na abe unam igi na reoijo ijefuon marme uniemga na ruainvano kiain.   
\p
\v 28 Fu ijeg kuardiamga bu una kua, Regavo ik iji God fu vierafe no rekfuon iji no irerag iji rekno kuain?  
\v 29 Bu ijeg kuardavga fu kia, Ik iji God fu vierafe ja rekfuon iji ja e igi fu kiema na ari ruainva igi na ma vierafek.  
\v 30-31 Fu ijeg kuardiamga bu una kua, Regavo a ire sumakin be a irerag iji rega no ijia game una a ma vierafek? Regavo Godon buk akai bu usuibe isoinva ijia bu kuai, Mosis fu ai moikum namo ijia bred mena fum kaf gufia ari rokga fu kege e saifnuvuon iji vajiama bu invano kuain. Izeg bu ai moikum namo ijia vasiaordiamga bu bred mena fum kaf gufia arimga bu kege in. Ijefuon vo abe ire sumakin be ijekin iji rega no ijia game una a ma vierafek?   
\p
\v 32 Bu ijeg kuardavga Jesu fu una kia, Naka ma kuardiav bred iji Mosis fu ai moikum namo ijia bred kege saifjon iji vajiamga bu inva iji fu bred ma iji bakin. Regavo bred iji asoinun fu iviakma vajiamo ijar fu bred ma.  
\v 33 Ijefuon bred ma iji fu e ijar arime e moikigia oinva iji ifejdiaga bu ijia ma karivak.  
\v 34 Fu ijeg kuardiamga bu uri kua, E bomana nika ivia anerene tavan bog bred ijekin ijesugin vajuoke no ijno kuain.   
\p
\v 35 Bu ijeg kuardavga Jesu fu uri kia, Naiji na bred iji ja ine tavan bog ijia ma karivakfuon ijin. Erar fu nun ruakma e iji fuba vasia guak. Regavo erar fu na ma vierafekma e iji fuba do kafak.  
\v 36 Ijefuon igia faif iviakma na giamga ja irerag na reoijo iji jaka giev revo na giamga jaka ba una na ma vierafej.  
\v 37 Regavo na e iji Asoinun ijar oibuon iji ke karoiga bu enun rekva naba bu rotkuriak.  
\v 38 Ijefuon maiji kaf gufia na ari ruainva iji nam nar nun vierafenva ijia reokro ruainva bakin na e iji fu kiemga na ari ruainva ijar irerag fur vierafeno na ijesugin reok.  
\v 39 Regavo Asoinun iji fu kiemga na ruainva ijefuon fuon fu vierafenma ijeg na e iji Asoinun ijar oibuon iji ke karoiga bu e nun rejo iji kafo naba uniakok. Regavo na tavan iji ire fok moikigia bu barekva na ijia e iji bu aoinva na kia bu una uri unam ma ijia ma karivak.  
\v 40 Regavo Asoinun ijar vierafenma iji erar Farifuon na gieme una na ma vierafekva bu unam ma ijia ma karivak. Bu ijegrenki tavan radkma ijia bu aoikva na kiaga bu una uri unam ma ijia ma karivakno kiain.   
\p
\v 41 Fu ijeg kuardiamga e Jius iji bun ijefuon uri vuak iji dab bui musikuain. Ijefuon maiji fu kia, Naiji na bred iji kaf gufia ari ruainma ijino kiain.  
\v 42 Bu kuai, E iji fu Jesu e Josofon farif iji non vierafenva ijin. No eofijaf iji non giavo gavo fu irerafuon kuai naiji na kaf gufia ari ruainvano kuaim?   
\p
\v 43 Bu vuak iji dab bui siguvga Jesu fu giame una kia, Vuak iji ja dab joi musikuaivo iji aref.  
\v 44 Fu erar izeg koikfuon giriesame una na ma vierafekma bakin. Revo fun Asoinun iji fu kiemga na ruainva ijar e ijiebuon oij iji kege karoiga bu ijia na ma vierafek. Bu na ma vierafekva na tavan radkma ijia bu aoikva na kia bu una uri ijia ma karivak.  
\v 45 Regavo usuibe e iji bu Godon vuak vierafene kuaivo bu isoinva iji bu ijeg kuai, E fok bu Godri koikfuon nijaidiakno kuain. Ijegvo eraneb bu Asoinun ijefuon vuak iji faivknum unam fuon ma iji mukoi vierafekva e iji bu nun ruak.  
\v 46 Regavo e be fu erar Asoinun iji gainma bakin. Regavo fun e iji God fu kuamga fu ari ruainma ijar fuonkua gain.  
\v 47 Ijefuon naka ma kuardiav eraneb ja na ma vierafekva ja unam ma karivako iji abek.   
\p
\v 48 Naiji na bred ma iji ja ine tavan bog unam ma ijia ma karivakva ijin.  
\v 49 Saifjon iji bu ai moikum namo ijia bred mena kuavo iji igavo buka aoim baren.  
\v 50 Regavo bred iji kaf gufia ari ruainma iji fuka mukor ga nibe ijefuon eraneb bu bred iji ikva bu aoikva bakin.  
\v 51 Ijefuon naiji na bred ma iji fu kaf gufia ari ruainma ijin. Erar bred ijin ikma fuba guakgavo fuim una unam ma karivako iji abek. Regavo bred iji vajai surif nun igin. Na vajai surif nun iji abe e fok moikigia oinva iji mia bu inki bu unam ma iji abe ijia ma karivak.  
\v 52 Jesu fu ijeg kuardiamga E Jius iji bun vuak ijefuon una bui musikuain. Bu kuai e iji fu izeg vajai surif fuon iji abe muoga no ikno kuain.   
\p
\v 53 Bu ijeg kuaivga Jesu fu una kia, Naiji na ma kuardiavo igia faif ja Ema buon Farif ijefuon vajai surif ijiga kavuan iji ba ikva ja izeg unam ma karivako iji abekva bakin.  
\v 54 Regavo eraneb kavuan nun ijiga surif nun iji ikva bu unam ma karivako iji abedo na tavan radkma ijia bu aoikva na kia bu una uri ijia ma karivak.  
\v 55-56 Ijefuon maiji vajai surif nun ijiga kavuan iji bu kaven nuvuon ijiebuon duok ma. Ijefuon erar kavuan nun ijiga surif nun iji ikma na oifuon ijia fioga fuiji fu nosik besum fiok.  
\v 57 Asoinun iji fum ijia fino ijar na kiemga na ari ruain revo fum ijia vek fino ijefuon na vek fij. Ijefuon gavo eraneb bu vajai surif nun ijiga kavuan nun iji ikva na vek fijo ijefuon bu ijia karivak.  
\v 58 Regavo bred iji na kuardiavo iji fu kaf gufia ari ruainma ijin. Regavo fun bred iji saifjon iji bu ai moikum namo ijia inva ijekin bakin. Saifjon iji bu ai moikum namo ijia bred mena kuavo iji ine rad bu aoin gavo bred igi na kuardiavo iji fu ijekin bakin. Eraneb bred ijin ikva buba aoikno kiain.  
\v 59 Regavo vuak igi Jesur ai Kafoniam ijia ar iji bu afuime vuak kuaivo ijia aru mani vuak nijaidiamon ijia fu ijeg kuardiain.   
\s1 Vuak iji ma karivako ijin  
\p
\v 60 E Jesuon vuak faivo iji bu vuak iji faime una bui kuai, Vuak iji fuka gigikin fu erar vuak iji faime ma iji vierafekma bano kuain.   
\p
\v 61 Bu ijeg dab bui siguvga Jesu fun giame uri kia, Ja vuak iji na kuardiainva iji jaka dab oi kafokafo vierafen ijefuon ja jon izeg ja na ma vierafejo iji jan arekuai ja ijeg vierafen?  
\v 62 Regavo ja Ema buon Farif iji fu una ar fu ari ruainma ijia ajie vakma ja izeg rek?  
\v 63 Unam ma iji ja abe ijia ma karivako iji fun besum ja Godon Kaven Akai abega fur oijon samuagdiakma ja ma karivak revo jam ema jar koikjo daro jon ijia ma karivakva iji ja izegrekva bakin. Revo vuak igi na kuardiainva iji na Kaven Akai ijefuon vuak iji kuardiain. Vuak ijar ja ifejdiaga ja unam ma karivako iji abek.  
\v 64 Regavo e guri roin na giamga jaka ba vuak iji abe ma vierafenvano kiain. Regavo Jesu iji fu kuainma iji fuka uria ijia eraneb bu fuba ma vierafekfuon iji fun giain. Regavo madu eraneb bu fu abe una e ise rejo iji miakfuon iji fun giame vierafenma ijefuon fu ijeg kuain.  
\v 65 Fu ijeg kuardiame kia, Na ijefuon ja kia fu e be erar fum koikfuon una na ma vierafekma bakin. Rega fun Asoinun ijar koikfuon e ijefuon oij iji abe dakaroiga fu ijia una na ma vierafekno kiain.   
\p
\v 66 Jesu fu ijeg kuardiainma ijefuon e vuak fuon faivo roin bu una funa okfuon iji bun uzain.  
\v 67 Ijefuon Jesu fu uri e vuak fuon faivo tuer (12) ijeg kia, E roin bun na are vain gavo jak jab na areme vakuai vierafekvano kiain?  
\v 68-69 Jesu fu ijeg kuardiamga Saimon Fita fu uri kua, E Bomana iviakma no ma vierafega a onkua aka e akai Godri kuamga a ruain. Revo vuak ma iji ma karivako iji ar kuarduoga no faiv gavo no a unako vakva no una e be erafon vakno kuain.   
\p
\v 70 Fita fu ijeg kuardamga Jesu fu una kua, E guri tuer (12) iji na nar koiknu kega ja nana oin gavo iji ja oijo ijia e besum fu kaven iseno kiain.  
\v 71 Regavo iji fu kiainma iji fu Judas e Saimon Iskarioton farif ijefuon kuain. E iji fuka vuak fuon faimo be gavo fuka tavan rad Jesu abe una e ise reoijo iji miak ijefuon fu iji kuain.   
\c 7  
\s1 Jesu ga uviaifijaf ijin  
\p
\v 1 Areme Jesu fun ai Gareri ijia oknum e iji vuak nijaidiaoin. Regavo fu una ai Judia ijia fuba oin ijefuon maiji Jius e mamkanuk iji bu fu kanakuai samuame karinva ijefuon fuba ijia vuak nijaidiain.  
\v 2-3 Regavo ai Judia ijia bu tavan iji e Jius bu usuibe ai moikum namo ijia busame ijia karioinva iji vierafekuai iro ijo iji fun samairen. Ijefuon Jesuon uviaifijaf iji bun uri Jesu kua, Ar igi a oinon iji arega ni una uri gamia Judia vakne. A ijia va ire sumakin igi a reoinon iji roin ijia regakva e vuak on faivo iji bu ire sumakin a reno iji gak.  
\v 4 A igia sauime fikma e ar iror fok bu izeg a ma vierafekva bakin. Ijefuon vierafe e fok bu a game ma vierafekva ni uri una gamia Judia e uruvana bu afuime iro ijo ijia va ire sumakin iji rega bu gavno kuain.  
\v 5 Vuak iji e uviaifijaf ijieb ijeg Jesu kuardain gavo bu madu Jesu buka ba ma vierafen.   
\p
\v 6 Ijefuon Jesu fu uri una kia, Tavan kafokafo e iji bu iro ikuai afuivo ijia ja tavan kafo vak ga tavan kafo ja arekva iji fun maren. Regavo iviakma naiji na tavan nun iji fuba abedo naba vak.  
\v 7 E moikigia oinva iji ja bu ziegafiakva bakin revo bu na ziegafieknum dab arafiriek. Ijefuon maiji na unam ise bu kegoijo iji na samakaf visume kuardiavo ijefuon bu na ijeg rek.  
\v 8 Ijefuon ni jar iro ijia vaf revo naiji naba vuak. Ijefuon maiji tavan nun iji fuba abenmano kiain.  
\v 9 Fu ijeg kuardiame fun ijia areme Gareri ijia naki sibank fin.   
\s1 Jesu fu iro ijia vainma ijin  
\p
\v 10 Areme Jesuon uviaifijaf iji bun Judia ijia iro iji bu inva ijia vakga Jesu fu rad isuar sauime jajia vain.  
\v 11 Fu vakgame e Jius e mamkanuk iji bu iro ijia karinva iji bu uri Jesu nisaimoknum e iji afuinva iji kia e iji fu izerkiga nijaiduofno kiain.  
\v 12 Regavo e iji afuinva ijia e roin bu fuisina isuar karine bui kuai e iji fuka e mano kuaiv. Regavo e roin bu kuai e iji fuka e uruvana aferdiame una unam ise ijia nijaidiamno kuain.  
\v 13 Bu dab ijeg fuisina kuaimoin revo buba abe uruvana kuaime samafren ijefuon maiji bu e Jius e mamkanuk iji juin.   
\p
\v 14 Rene iro iji bun ine rirkinenva ijia Jesu fun Godon ar ijia aru manine e iji vuak anerene nijaidiam.  
\v 15 Fu ijeg nijaidiamga Jius e mamkanuk iji bu gava buka oiserdiamga bu kuai, E iji fu Godon buk akaij ijia vuak akaij iji buba abe fu nijain revo fu izeg vuak ma iji mukoi vierafenmano kuain.   
\p
\v 16 Bu ijeg kuaivga Jesu fu una kia, Vuak igi na kuardiavo iji fu nun bakin revo vuak iji fun God Asoij iji fu kiema na ari ruainva ijefuon vuak.  
\v 17 E be erar fu Godon vierafenma ijia kegoino e ijar vuak igi na abe kuardiavo iji fur giek. Fu giega na vuak nun nar vierafenva iji abe kuardia vo na Godon vuak abe kuardiavga iji fur gieme vierafek.  
\v 18 Regavo e be erar fum vuak fuon fur vierafeno iji abe kuardiaoino iji fu fuon aroinamikro fu iji vierafen. Regavo erar fu vierafe e iji fu kuamga fu ruainma iji abe aroikro fu ijeg vierafeno e iji vuak fuon fu kuaimon iji fuka ma ijesugin ga kufui kafo ijia fuka bakin.  
\v 19 Mosis fuka akai uruvana kege ja vajiain gavo e fok guri ja karinva ijia e besum fu erar akaij iji mukoi igiainma bakin. Regavo ja irerafuon ja na kaniekuai nisaidievno kiain.  
\v 20 Jesu fu ijeg kuardiamga e iji bun uri kume, E gafi ka kaven ise ijar niroinma gafi a erar a kanakvega a iji kuaimno kumen.   
\p
\v 21 Bu ijeg kuardavga fu una kia, Na ire sumakin besum tavan iji ja isuar karine Godon sirimamejo ijia reja ja gieva jaka oiserdiain.  
\v 22-23 Regavo iviakma ja Mosisri akaij iji surif kania ufu anf navo iji miainma ijefuon ja ijin ijeg keg. (Regavo unam iji bu saifjon ijieb ijeg kege ruain revo Mosis akai fu rad isoime ke vajiain). Ja am ukakna ijiebuon surif iji ja kania ufu anf navo iji fu tavan akaij iji guf ijekma ja iji jaika vierafekva bakin. Ijefuon vo ja irerafuon e adagin gafi na tavan iji ja isuar karine God sirimamejo ijia amarva fu mainma ijefuon una oij isema na vierafeknum jaka ziemoij.  
\v 24 Ebuo ise iji ja giame kuaikva iji isuar irerag bu rejo iji anej ma iji amarigia giame kuaikfuon. Regavo iji jam uri irerag bu rejo iji giame una ise buon ijefuon kuaivo iji fuba maren.   
\s1 E iji God fu kuamga fu ari ruainma ijin  
\p
\v 25 Fu ijeg kuardiamga e Jerusaremko iji bu uri bui kuai, E iji kafu e igi e mamkanuk bu kanakuai nisaimoijo ijin.  
\v 26 Bu fu kanakuai kuaimoij revo fuba jum fuka uri e fok ijiebuon nifak ijia manine vuak kuaim. Rega madu e mamkanuk iji buba una vuak fuon gari roib kuardav. Bu kafu vuak fuon iji faime vierafega e iji fun ma e iji God fu kuamga fu ruainma ijarga buba una vuak fuon gari roib kuardav.  
\v 27 No e gari fu e izekor iji non vierafen gavo tavan rad God e iji fu kuaga fu ruakno kuainma iji fu ruakma fu erar izia fu ruainma iji mukoi game vierafekma bano kuain.   
\p
\v 28-29 Jesu fu vek Godon ar bomana bu sirimamejo ijia manine vuak kuardiamo ijia bu ijeg kuaivga fu kume, E fok guri karinva gurie ja na e izekin ga na izia ruainva iji jaka ba vierafen. Naiji nam nar igia ari nun na vierafenva ijia reokro ruainva bakin. Regavo God iji fu kiema na ruainva iji fuka God ma ga fu e kufuikin bakin. Regavo fuiji ja game vierafenva bakin gavo nar fu nan vierafen. Ijefuon maiji na fur kiema na fu fino ijia ari ruainvano kuain.   
\p
\v 30 Fu ijeg kuardiainma ijefuon e roin bu fu kunaim dibur unakuai vierafen. Regavo bu imut buon ijia kafo buba vajai fuon niriain. Ijefuon maiji tavan fuon ma iji bu fu kanakfuon iji fuba ruain.  
\v 31 Bu ijeg ren gavo e iji afuinva ijia buka e uruvana una fu ma vierafene isuar bui kuai, E iji bu usuibe kuai fu ruakno kuainva iji fu ruakma fute ire sumakin ka uruvana kafo e gari fuba renma iji asime rekno kuain.   
\s1 Bu e Godon ar bomana iji juo karijo iji kiavga bu Jesu tokuai ruainva ijin  
\p
\v 32 Bu fuisina vuak ijeg kuaivga e Ferisis ijiga e mamkanuk Godon isuf baroijo iji bu e juo karijo roin kiavga bu Jesu tokuai vain.  
\v 33 Bun vake gafia usevga Jesu fu uri kia, Naiji nam asam sibank igia oine nan una God e iji fu kiema na ruainva ijefuon vak.  
\v 34 Na ijia vakva jaka uri na nisaidiek revo ja giekva bakin. Ijefuon maiji ja ar na vako ijia jaba vuakno kiain.  
\v 35 Fu iji kuardiamga e Jius bu vuak iji faime una bui kuai, E iji fu ar fu izia vakredo fu vaga noba gak? Fu kafu uri e Grikbuon mai ijia e Jius iji bu kari vainva ijia E Grik iji vuak nijaidia vak?  
\v 36 Fu kuai fu vakma no fu nisaik revo noba fu biek. Regavo madu no ar fu fino iji noba vakno kuainma ijefuon anej ma iji irerag?   
\s1 Do iji bu ine ma karivako ijin  
\p
\v 37-38 Tavan bomana be bu iro ine barekrejo ijia Jesu fu uri uruvana igia aramajiame kume, E be erar do kafakma ni nun roga na do jiamavno kumen. Ijefuon maiji usuibe Godon buk akaij ijia bu isoinva iji bu ijeg isoi, Eraneb bu na ma vierafekva do iji fu bu ifejdiaga bu ma karivako iji fu oibuon ijia abesek.  
\v 39 Regavo Jesu vuak iji fu do ijefuon kuainma iji fu Godon Kaven iji bu eraneb ma vierafene abekfuon fu ijefuon kuain. Regavo tavan ijia bu Godon Kaven buba aben. Ijefuon maiji Jesu fuba guame una uri sanainma fuon kaf gufia vain.   
\s1 E iji bun dab atame roinroin renva ijin  
\p
\v 40 Areme e fok afuinva ijia e uruvana roin bu Jesu vuak iji fu ijeg kuainma iji faime kuai, E iji no vierafe fu ma e iji Godon vuak faime una e roin kuardiamo ijarno kuain.  
\v 41 Regavo e roin bu kuai, E iji fu God e iji fu kua fu ruakno kuainma ijar. Regavo roin bu kuai, E iji God fu kua fu ruakfuon iji fu ai Gareri guf ijia fu ruakma bano kuain.  
\v 42 Regavo Godon buk akaij iji bu usuibe isoinva ijia fu ijeg nijaiduin. E iji God fu kuai fu ruakfuon iji fun e Devidon uifarif ijia ruak. Regavo e iji fu ai Betriem e Devid fu fino ijia nafekno kuain.  
\v 43 Ijefuon bu Jesuon vuak iji ijeg kuaime dab ata roinroin rene bui sigunamin.  
\v 44 E roin buka deajidiamga bu Jesu kunaim tokuai vierafen gavo vajai fuon iji buba kafo niriain.   
\p
\v 45 Areme e Godon ar juo karijo iji bu Jesu tokuai ruainva iji bun ijia areme una va e mamkanuk Godon isuf baroijo ijiga e Ferisis gafi bu karinva ijia usen. Bu usevga bu uri kia, Ja irerafuon e iji no kiava ja vainva iji jaba tom afem ruainvano kiain?  
\v 46 Bu ijeg kuardiavga e Godon ar juo karijo iji bu una roin kia, E iji no afekuai vain gavo no usem vuak fuon iji fu kuaimon iji faiva fuka oiseraduin. Vuak fuon iji fuka vuak sumakin e bu igia kuai no faivo bakin fu ijin kuaimga no ijia are ruainvano kiain.  
\v 47 Bu ijeg kuardiavga e Ferisis iji abevo e mamkanuk iji bu una kia, Ja kafu e ijefuon vuak fuon ijar oijon iji fun kam karoidiain.  
\v 48 Ja vierafega e Ferisis ijiga e mamkanuk igi roin buba una fu ma vierafev?  
\v 49 E iji nigen ka ba mukoi vierafejo iji bu kafu e Mosison akaij iji buba jajiav ijefuon bu uri e ijin ma vierafej. Bu ijegredo rad God fu bu kam unam ise ijia arafiriakno kuain.   
\p
\v 50-53 Bu ijeg kuaivga Nikodimas e iji fu tavan be naki ijia ro Jesuk fine vuak kuainma ijar uri kia, No akai nuvuon ijia kuainma iji noka amur e iji no kege vajai fian vajiakrejo ijiebuon vuak irerag bu isema rejo ijefuon anej ma iji faikfuon. Regavo rad ijar no bu kege vajai fian vajiakva iji fu markno kiain. Nikodimas fu ijeg kuardiamga e mamkanuk ijiga e Ferisis iji bu madu uri kua, A ijeg kuaimdo ak a kafu e Garerikor. Ni Godon buk akaij iji bu usuibe isoinva ijia dame ga. A ijia dame gabatie a ga e iji fu Godon vuak vierafene kuaimon iji fu ai Gareri ijia ruakma bano kuain.   
\c 8  
\s1 Bara iji fu ebuon baru turainma ijin  
\p
\v 1 Areme e fok bun una ar buon ijia vakga Jesu fu roin una uruor be Orivs kuavo in oriv ijesugin nainma ijia ajie vain.  
\v 2 Fu ijia vainma suok ijia fun una Godon ar bu sirimamejo makaf ijia ruain. Fu ijia rokga e uruvana bu biom fu dab kirakuravga fu ijia arifine e iji vuak nijaidiain.  
\v 3 Fu ijia vuak nijaidiakoga e Ferisis roin ga e Mosison akai nijaidiavo iji roin bu bara be fu baru turamon iji afeme ijia ruain. Bu ijia usem kuava fu e fok ijiebuon nifak ijia manin.  
\v 4 Fu maniga bu uri Jesu kua, E nijaidiamo no gaga bara gari fuka bara befuon baru turamga no iji game afem ruain.  
\v 5 Regavo akai nuvuon iji Mosis fu abedema iji bara ijeki iji no mun tuame kaniaga bu aoik revo iji a izeg vierafenmano kuain?  
\v 6 Regavo vuak iji bum ijeg kuardaga are Jesu fu uri ijia vuak isema kuardiaga bu rad fu tokuai ijefuon bu ijeg kuardain. Regavo Jesu irerag bu rejo iji fun vierafen ijefuon fu daime imut fuon ijia sakin ijia isoin.   
\p
\v 7 Bu duna ijeg ireme Jesu kuardavga fu uri ninuime kia, E guri ja irenva ijia e besum erar fu vierafega fu ise be fuba regakva nin amur uri mun guri kege bara gari kanafno kiain.  
\v 8 Fu ijeg kuardiame vo fu una madu daime imut fuon ijia sakin ijia isoin.  
\v 9 Fu isoikoga e iji bu vuak iji faime bun isuarigia besubesum vakga Jesu ko bara ijek bu ijia areme vain. E makin ijieb amur vako e roin iji bu rad vain.  
\v 10 Bu vako Jesu fu uri ninuime una bara iji kua, E guraiji irenva kafo bube vek ise on ijefuon kuaime kanakuai irenvano kuain?  
\v 11 Jesu fu ijeg kuamga bara iji fu una kua, E iji bun vabarenvano kuain. Fu ijeg kuamga Jesu fu kua, Nak naba a arafirak. Ijefuon a vakma ab una ise ijekin kafo rekno kuain.   
\s1 Jesu fu moik igefuon sanainma ijin  
\p
\v 12 Ijegreare Jesu fu una madu e Ferisis iji kuardiame kia, Naiji na e moikigia oijo ijiebuon sanainma ijin. Eraneb bu na kegoijo ijeg bu rad nun ijia mimatame kegokva buba nakinma ijia ok. Regavo madu buka sanainma nun iji fu tavan bog ijia navako iji abekno kiain.  
\v 13 Fu ijeg kuardiamga e Ferisis iji bu uri kua, A ijeg kuaimon iji no vierafe aka kufuimen. A vuak on a vierafenma a iji dab no kuarduom ijefuon no vierafe vuak on iji fuka ma bano kuain.  
\v 14 Bu ijeg kuardavga Jesu fu kia, Na vuak nun igi na koiknu kuardiavo iji na koiknu vierafega naka ma kuardiav. Ijefuon maiji na izia ruain ga madu na izia vakfuon iji nan vierafen gavo jaiji jaka ba vierafen.  
\v 15 Regavo ema igi jar jon izeg ja karine una e kafobuon ise iji ja giavo iji jaka isema rej. Ijefuon maiji jaba amarigia vierafeknum ise buon iji giav. Regavo na nunkua na iviakma e kafobuon ise iji na ijeg giavo bakin.  
\v 16 Regavo na ebuon ise kafo giame kuaikva iji na aresredo na ijeg rek. Ijefuon maiji nam nar ebuon ise iji giavo bakin revo na Asoinun fu na kiema na ruainva iji na fusik ise iji giav.  
\v 17 Regavo madu bun usuibe buk akaij ijia ijeg isoi, E nokarok (2) bu e mamkanuk ijiebuon nifak ijia ireme vuak ni besum abe kuaikva vuak buon buka ma ijesugin kuaik.  
\v 18 Regavo vuak nun igi na kuardiaoijo iji naka ma kuardiav. Regavo madu Asoinun fu na kiema na ruainva iji fuk vuak irerag fu nuisina kuardiamo iji fu ma kuardiamno kiain.   
\p
\v 19 Jesu fu ijeg kuardiamga e iji bu uri kua, Regavo Asoion fu izer fino iji nijaiduomne kuain. Bu ijeg kuavga Jesu fu kia, Ja na jaba ma vierafenva ijefuon ja Asoinun iji jaba vierafen. Revo ja na ma vierafebatie ja Asoinun iji madu ma vierafekno kiain.  
\v 20 Jesu fu Godon ar bomana guf ijia aru mavua be bu mon God vajavo iji savo ijia manine vuak ijeg kuardiain. Fu ijia manine vuak ijeg kuardiain gavo buba uri fu kanain vo ire kafo fuon ren. Ijefuon maiji tavan fuon fuba aben ijefuon bum karine vuak fuon ijesugin fadain.   
\s1 Ja ar na vako ijia jaba vuak  
\p
\v 21 Areme Jesu fu una madu kia, Naiji na oinevo nan vak. Na vakva ja uri na nisaidiek revo jaka ise jon ijekma mukoi aoik ijefuon ja ar na vako ijia jaba vuakno kiain.  
\v 22 Ijefuon Jius e mamkanuk iji bu kuai, E iji fu kuai ja ar na vako ijia jaba jajie vuakno kuainma iji fu irerafuon ijeg kuaim? Fu kafu fui kananamikafa fu ijefuon ijeg kuain.  
\v 23 Jesu fu ijeg kuardiame una kia, Jaiji ja e moik igekor gavo naiji na e kaf gufekor. Regavo madu jaiji ja e moik igekor ga naiji na e moik igekor bakin.  
\v 24 Ijefuon na iji kuardiame kia jaka ise jon ijekma mukoi aoik. Jaba ma vierafero naiji na e iji God fu kuai fu ruakno kuainma jaba ijeg vierafekva jaka ise jon ijekma mukoi aoik.  
\v 25 Jesu fu ijeg kuardiamga bu uri kua, Regavo aiji a erar iji ni samakaf kuarduoga no faivno kuain.  
\p Bu ijeg kuavga fu kia, Na ik vuak na kuardiainva ijia naiji na era iji nan kuardiain.  
\v 26 Na e moikigia ise jon iji ja reoijo iji fine giaknum ga ijefuon ja kuardiakva iji fuka uruvana. Regavo e iji fu na kiema na ruainva iji vuak fuon fuka ma. Ijefuon na e moikigia oinva ijin irerag fu kuardienma na ijesugin abe kuardiavno kiain.  
\v 27 Jesu fu Asoifuon ijefuon fu ijin kuardiain revo e iji buba mukoi fain.  
\v 28 Ijefuon fu uri kia, Tavan iji ja Ema ijiebuon Farif iji abe uri kaf ajiekva ijia ja ma vierafek. Ja vierafero naiji na e iji God fu kua fu e fok karaunia ruakno kuainma ijinro ja ijeg vierafek. Rega ja ijia vierafero irerag igia na reoknum kuardiaoinva iji na nun vierafenva ijia kuardiaoijo bakin. Regavo na Asoinun irerag fu nijaidienma na ijesugin kuardiaoijoro ja ijeg vierafek.  
\v 29 Regavo Asoinun iji fu kiema na ruainva iji fuba na unieko vain. Ijefuon maiji tavan bog irerag na reoijo iji na fu oimarkfuon ijia reoijno kiain.  
\v 30 Fu ijeg kuardiamga e roin bu Jesu vuak iji fu kuardiainma iji faime buka una fu ma vierafen.   
\s1 Vuak ma ijar ise iji bu no tomduinva ijia karaunuok  
\p
\v 31 Ijefuon Jesu fun uri e Jius iji bu fu ma vierafenva iji kia, Ja vuak nun iji na nijaidiavo iji faime igiekva ja ma e vuak nun faivo iji rek.  
\v 32 Ja vuak ma abe ma vierafega vuak ma ijar ise jon bu ja tomdiainva ijia karauniakno kiain.  
\v 33 Jesu fu ijeg kuardiamga bu uri kua, Noiji no e Eburamon uifarif ijefuon e be fuba no aferduome kam irerag fu vierafenma ijesugin kuoga no faime renva bakin. Regavo a irerafuon kuai, No ma iji abe ma vierafekva ma ijar ise nuvuon iji bu no tomduinva ijia karaunuokno kuain.   
\p
\v 34 Areme Jesu fu uri kia, Vuak igi naka ma kuardiav eraneb bu ise reoijo iji bun ise ijar aferdiaga bu una fuifuon ikrej.  
\v 35 Regavo ni igia fai. Ja ise ijar tavan bog ja samuagdakma iji ja izeg oimarknum dazme karikva bakin.  
\v 36 Regavo ja Godon Farif ijar fu ise jon bu ja tomdiainva ijia karauniakma iji ise jon iji fu izeg una ja tomdiakva bakin.  
\v 37 Ja e Eburamon uifarif iji nan vierafen gavo jaka na kaniekuai oij. Ijefuon maiji ja vuak nun igi na nijaidiavo iji jaba mukoi faime abej.  
\v 38 Regavo madu na Asoinun irerag fu nijaidienma na ijin abe kuardiav gavo jaiji ja vek una asoijon Setan irerag fu nijaidiainma ja ijin rejno kiain.   
\p
\v 39 Fu ijeg kuardiamga bu uri kume, No asoinuvuon iji fu Eburamno kumen. Bu ijeg kumejga Jesu fu uri kia, Ja Eburamon afijafbatie ja irerag fu reoinma iji jak ja ijeg rek.  
\v 40-41 Regavo iji jaka bakin ja vek una na kaniekuai vierafen. Ijefuon maiji na vuak ma iji God fu kuardienma ijin na abe kuardiainva ijefuon ja iji kaniekuai vierafen. Regavo e Eburam fuba ijeg ren revo iji ja rejo iji ja asoijon Setan fu reoinma ja ijegreoijno kiain. Fu ijeg kuardiamga bu uri kua, Noino am oij bakin revo no Asoinuvuon iji fun God fuonkua revo noino ma afijafno kumen.   
\p
\v 42 Bu ijeg kuardavga Jesu fu uri kia, Ja God fu ma Asoi jonbatie ja na oijmiek. Ijefuon maiji fur na kiema na ruainva ivia na nifak jon igia manij. Na ari ruainva iji nam nar daro nun ijia ruainva bakin revo fun Godri kiema na ruain.  
\v 43 Regavo irerafuon ja vuak igi na kuardiavo iji jaba mukoi faiv? Jaba faivo ijefuon maiji jaba vuak faikuai ijefun rej ijefuon ja vuak asur ma nun iji jaba mukoi faiv.  
\v 44 Ja asoijon Setan e kaven ise ijin ijefuon ja uri asoijon ijefuon fuon fu vierafeno ijia reokuai vierafen. Ik anej ijia fuiji fuka e kaniaga bu aoivo gavo fuba una vuak ma iji jame unam ma ijesugin reoin. Ijefuon maiji fu oifuon ijia fu vuak ma iji vierafene ijia reoino bakin. Fu vuak kufui kuaimon ijefuon maiji fu e ir kufuikin ga madu fuiji fu e kufuimeoijo ijiebuon asoij.  
\v 45 Vuak igi naka ma kuardiavo ijefuon jaba una na ma vierafej.  
\v 46 Regavo ni erar uri ise be na irerag iji reja fu gienma ijia kuardie na faiv. Regavo ja vierafega na vuak ma kuardiaga ja irerafuon ba na ma vierafev.  
\v 47 Regavo erar fu vierafega fun Godon e renma iji fur Godon vuak igi na kuardiavo iji fu mukoi faim. Regavo jaiji ja Godon e bakin ijefuon ja vuak fuon igi na kuardiavo iji jaba mukoi faivno kiain.   
\s1 Jesu ko Eburam  
\p
\v 48 Areme e Jius iji bu uri kua, Regavo a vierafega igi no kuai a iji a e Sameritenko ga madu a kaven ise ijar a niroinmano kuainva iji kafu no ma kuainvano kuain.  
\v 49 Bu ijeg kuardavga Jesu fu kia, Naiji kaven ise ijar na niroikienma bakin. Naiji na Asoinun iji abe aroiv revo jaiji ja na arordievo bakin.  
\v 50 Naiji na koiknu nun sanainma iji abe aroikafie vierafejo bakin revo fun e besum fur fine nun sanainma iji abe arordiem. Regavo madu fur fine e fok no kege besum name guom.  
\v 51 Ijefuon na ma kuardiav erar vuak nun igi mukoi faime igiakma e iji fuba guak.   
\p
\v 52 Jesu fu ijeg kuardiamga e Jius iji bu uri kua, Iviakma no samakaf gainva iji no vierafe aiji aka kaven ise ijar a nirokain. E Eburam ga e Godon vuak vierafene kuaivo iji bun aoim baren revo a una kuaimon erar vuak nun igi faime igiekva buba aoik.  
\v 53 A vierafe Eburam fu e buze gavo ar a e ikin? Eburam fun guain revo madu e Godon vuak vierafene kuaivo iji bun aoim baren. Revo aiji a era aikido a vuak ijeg kuaimno kuain?   
\p
\v 54 Bu ijeg kuardavga fu kia, Na uri koiknu nun sanainma iji abe aroikva iji na vierafe fuba marek. Regavo e iji fu nun sanainma iji abe arordiekfuon iji fun Asoinun e iji ja kume fuka God jonno kumejo ijar fuonkua arordiek.  
\v 55 Jaiji ja Asoinun iji jaba vierafen ga nar na fu vierafen. Revo na ivia igia kiak na fu naba vierafenvano kiakva iji na ja kuaivo ijeg naka vuak kufui kuardiak. Regavo na fu nan vierafen revo vuak fuon iji na igiav.  
\v 56 Regavo asoijon Eburam fu tavan iji bu na nafediekfuon fu iji gakro uruvana vierafen. Regavo fu ma vierafega na moikigia roko ijefuon fu tavan iji gainma igeg fu ma vierafene bomana oimarenmano kiain.   
\p
\v 57 Fu ijeg kuardiamga bu uri kua. A juaivasia on iji fu bomana bakigavo a kume na Eburam nan gainvano kumen.  
\v 58-59 Bu ijeg kuardavga fu kia, Vuak igi na ma kuardiav Eburam bu rad nafen gavo naiji nan ur ijia firuainvano kiain. Fu ijeg kuardiamga e Jius iji bu vuak iji vierafega buba aresren. Ijefuon bu uri mun tuame Jesu kanakrejga fu Godon ar bomana iji areme fun keko vain.   
\c 9  
\s1 Jesu e ni zuriaigin iji amarenma ijin  
\p
\v 1 Ijegreare Jesu fu oine e be ni zuriaigin nafenva fu fino iji fu keko gain.  
\v 2 Regavo e vuak fuon faivo iji bu uri Jesu kua, E nijaidiamon a vierafe e guri ni fu zuriainma iji fu ise fuon fu renma ijar ki fu eofijaf ijiebuon ise ijar fu ni zuriainmano kuain.  
\v 3 Bu ijeg kuardavga fu kia, E guri fu ni zuriainma iji fu ise fuon ijiga eofijaf ijiebuon ise ijar fu ni zuriainma bakin. Regavo ni fuon iji fu ijeg zuriainkin rad fu una ni naraga e fok bu ijia Godon daro iji fu izeg ikreno iji gakuai fu ijefuon ni zuriain.  
\v 4 Ijefuon noka migegare tavan igi fu vek sanainma igia no e iji fu kienma na ruainva ijefuon ik ijin rekfuon. Regavo no saroike fu tavan nakikma fu erar izeg naki ikrekma bakin.  
\v 5 Regavo na vek moikigia oijo ijefuon naiji na moik igefuon sanainma ijino kiain.   
\p
\v 6-7 Fu ijeg kuardiame uri juvit foine abe sakin ijekma ujumujume abe e iji ni zuriainma ijefuon niom ijia azimdain. Areme fu uri kua, Ni va do Sairom bu kuavo iji nafuinma ijia uikinik on abe do ijia somne kuain. (Revo vuak Sairom ijefuon anej ma iji, Fu kuama fu ruain). Ijefuon e ni zuriaigin iji fun va do iji Jesu fu kuainma ijia uikinik fuon iji abe ijia somga ni fuon iji fun una naramga fun una ar vain.   
\p
\v 8 Fu una vakga kaifijaf ijigam e roin bu ur fu ni zuriaigin fu e ire nimdiamon bu gainva vo fu una ni narainma ijefuon bu uri kuai, E iji fu kafu e ni zuriaigin iji fu unam ijia oknum ire nimdiamo ijarno kuain.  
\v 9 Regavo e roin bu kuai, Iji furno kuain. Regavo roin bu usem kuai, E iji fu e be gavo uikinik fuon iji fu e ni zuriaigin iji aikino kuain. Bu ijeg dab bui kuaivga e iji ni narainma iji fu kia, Na e ni zuriaigin iji ja ur gienva iji narno kiain.  
\v 10 Fu ijeg kuardiamga e iji bu uri kua, A ni on iji a irerag abega fu una naraimano kuain?  
\v 11 Bu ijeg kuardavga e iji ni narainma iji fu kia, Na e be bu kua Jesuno kuavo ijar sakin numume niom nun ijia azirdien. Fu azirdieme kie, Ni va do Sairom kuavo ijia ruaimne kiemga na va do ijia uikinik nun iji do ijia ruaivga ni nun iji fu una naraimano kiain.  
\v 12 Fu ijeg kuardiamga bu uri kua, Regavo e iji fu izerkino kuavga fu kia, Na e iji fu ni nun iji amardieme fu una izeg vaka naba gainvano kiain.   
\p
\v 13 Rega bun e iji ni narainma iji afeme una e Ferisis ijiebuon vain.  
\v 14 Regavo tavan iji Jesu fu e ni zuriaigin ijin sakin numume ni fuon iji amarema fu una ni narainma iji fu tavan iji e Jius bu isuar karijo ijia fu ijeg ren.  
\v 15 Ijefuon e Ferisis iji bun madu una usem e iji fu izeg ni fuon iji fu una narainma ijefuon kuardain. Bu kuavga fu kia, E iji fu sakin ijia numume ni nun ijia azirdieme areko na do ruaivga ni nun iji fu una naraimano kiain.   
\p
\v 16 Fu ijeg kuardiamga e Ferisis roin bu vuak iji faime bu una kuai, E iji fu tavan iji no isuar karine Godon sirimamejo ijefuon akaij iji fuba jam. Ijefuon no vierafe e ijegreoino iji fu Godon ruainma bano kuain. Regavo e roin bu kuai, E ijeg ise reoino iji fu izeg ire sumakin ijekin iji rekno kuain. Bu ijeg kuaime dab ata roinroin ireme bui musikuain.  
\v 17 Ijefuon e Ferisis iji bu una e iji kua, A kuo na Jesur ni nun iji amardiama na una ni naraivano kuin. Regavo a e iji fu ijeg redainma iji a izeg vierafenmano kuain. Bu ijeg kuavga fu kia, Na vierafe e iji fu e Godon vuak vierafene kuaimon ijino kiain.   
\p
\v 18-20 Fu ijeg kuardiain gavo e Jiusbuon e mamkanuk iji bu e iji bu ni zuriaigin nafegavo fu una ni narainma iji bu vek ba ma vierafen ijefuon bu una eofijaf iji kiava bu aferdia ruain. Bu rokga e mamkanuk iji bu uri kia, Am igi fube amjon? Ja iviakma igia kuok non ijeg ni zuriaigin nafenvano kuokva nin fu izegrega ni fuon iji fu una narainma ijin kuarduo no fai. Bu ijeg kuardiavga eofijaf bu kia, Am guri fu farinuvuon no ni zuriaigin nafenva ijin no vierafen.  
\v 21 Regavo erar izegrega fu ni narainma iji noba vierafen. Regavo madu fu erar ni fuon iji amarema fu una narainma iji noba gain. Revo fu am ukak bakin ijefuon ni kuaga fu koikfuon vuak ma iji kuardiamno kiain.  
\v 22 Regavo eofijaf iji bu Jiusbuon e mamkanuk iji juinva ijefuon bu ijeg kuardiain. Ijefuon maiji e Jiusbuon e mamkanuk iji bun ur kuai, Erar bu kuaik Jesu fu e iji God fu kuamga fu ruainma ijino kuaikma e iji bu kuriairega bu rad buba una ar iji e Jius bu afuime vuak kuaivo ijia aru vakno kuain.  
\v 23 Ijefuon e ni zuriaigin ijefuon eofijaf iji bu kuardiavga bu kia, Fu am uka bano ni kuaga fu koikfuon izeg fu ni narainma iji kuardiamno kiain.   
\p
\v 24 Ijefuon e Jius iji bun madu una e ni zuriaigin iji fu ni narainma ijin kua, No vierafe e iji fu ni on iji amardainma iji fuka ise reoino ijefuon a iviakma Godon if ijia kurame vuak iji ka visume kuarduomne kuain.  
\v 25 Bu ijeg kuardavga e iji fu kia, E iji naba gain kafu ise reoino kafu bakin. Regavo naiji na ni nun igi fu ur zuriain revo iviakma na una ni narainva na ijesugin vierafenvano kiain.  
\v 26 Fu ijeg kuardiamga bu kua, Regavo e iji fu a irerag redain vo fu izegredamga ni on iji fu una narainmano kuain.  
\v 27 Bu ijeg kuardavga fu kia, Vuak iji nan amur ja kuardievga nan kuardian revo jaka ba fain. Ja irerafuon una madu faikuai vierafej? Jakafu jak ja una e vuak fuon faivo iji rekuai vierafenvano kiain?  
\v 28 E iji fu ni narainma iji fu vuak ijeg kuardiamga bu uri musikuame kua, Noiji no e Mosison vuak faivo gavo ar a e ijefuon vuak faimno kuain.  
\v 29 No usuibe God fuka samakaf Mosis kuardaga fu faimo ijar no vierafe fu ma. Regavo e iji a kuaimo iji fu izia ruainma iji noka ba vierafenvano kuain.   
\p
\v 30 Bu ijeg kuardavga e iji fu uri kia, Vuak iji ja kuaivo iji na faiga fuka oiserdiem. Fu izia ruainma iji jaka ba vierafen revo fur ni nun igi abe naradien.  
\v 31 Regavo non vierafe God fun e ijeg ise reoijo iji vuak buon fu faimo bakin. Regavo fu e guri bu tavan bog fuon sirimameknum ga irerag fu vierafenma ijia reoijo fu vuak buon iji faimon.  
\v 32 Regavo ik anej moikigi amarenva ijia e be fuba ijeg e ni zuriaigin iji amardiamga bu una ni narainva bakin.  
\v 33 Regavo e iji na kuaivo iji fuba Godon ruainmabatie fu izeg ire sumakin ijekin iji rekma bano kiain.  
\v 34 E iji una ni narainma iji fu ijeg kuardiamga bu una kua, E guri ka vek ijia ise ijekma nafenva gure a vierafe a no nijaiduokreno kuain. Bu ijeg kuardame ka kuriaireme dakara dab makaf ijia akozva fu ar iji bu afuime vuak kuaivo iji areme keko vain.   
\p
\v 35 Rene rad Jesu fu Jiusbuon e mamkanuk iji bu izeg e iji fu amarenma iji bu fu fak renva iji fain. Ijefuon fu tavaibe una e iji bieme kua, Abe Ema buon Farif iji na ma vierafenmano kuain.  
\v 36 Jesu fu ijeg kuardamga e iji fu una kua, Ni e iji era iji kuardiega na fu ma vierafejno kuain.  
\v 37 E iji fu ijeg kuardamga Jesu fu kua, E iji an gainma ijin. Fur iviakma igi manine osik vuak kuaimno kuain.  
\v 38 Jesu fu ijeg kuardamga e iji fu uri Jesu ato same kurituamajame kua, E Bomana iviakma nan a ma vierafenvano kuain.  
\v 39 Fu ijeg kuardamga Jesu fu kua, Na moikigia na ari ruainva iji na e iji bu Godon unam buba gavo iji ifejdiaga bu gakuai na iji ruain. Regavo madu e iji bu vierafero bu Godon unam bun gavno kuain revo buka ba gavo iji ifejdiaga bu una ise buon samakaf giame vierafekro na iji ruain.   
\p
\v 40 Jesu fu vuak ijeg e iji kuardamga e Ferisis roin bu ijia irevado bu vuak iji faime una Jesu kua, A ijeg kuaido no kafu ni zuriaigino kuain.  
\v 41 Bu ijeg kuardavga Jesu fu kia, Ja ni zuriaiginbatie ja ise iji jaba rekfuon revo ja kuai no ni zuriainva bano kuaivo ijefuon ise jon iji fu vek ijeg namo kiain.   
\c 10  
\s1 Maf-sifbuon fak ijia bijame kuainma ijin  
\p
\v 1 Areme Jesu fu kuardiame kia, Naka ma kuardiav e iji fu maf-sif ijiebuon vien iji bu amarenva iji fu aregavo fum maikava ijia ajie urame aru vako iji fun e niesamo ga madu fu e kaniamon.  
\v 2 Regavo e iji fu maf-sif buon vien ma ijia arume vako ijar fu ma e maf-sif samuagdiamon.  
\v 3 Fu vaga e iji vien samuamo iji fu vien iji dajadaga fu arume maf-sif fuon ijiebuon if ijia kumeko bu faime usem jaga fu aferdiame keko makaf ijia vak.  
\v 4 Fu aferdia keko amur kiaknum vako bu ijia jav. Ijefuon maiji bun ir fuon iji mukoi faime vierafen.  
\v 5 Regavo bu e be buba ja vak ijefuon maiji bu ir fuon bu faivo bado bu faikva buka subinai vak.  
\v 6 Jesu fu vuak iji abe bija ijeg kuardiain gavo e iji bu vuak iji fu kuainma ijefuon maiji buba mukoi faime vierafen.   
\s1 Jesu fu e maf-sif mukoi samuagdiamo ijin  
\p
\v 7-8 Areme Jesu fu una kuardiame kia, Na ma kuardiav na iji na maf-sif ijiebuon vien ijin. E iji roin bu amur ruainva iji bu e niekin ga madu bu e kaniavo. Regavo buiji e maf-sif samuagdiavo bakin ijefuon maf-sif iji bu ir buon iji buba fain.  
\v 9 Regavo naiji na vien ma ijin. Erar fu nun ruakma fu vien ma ijia arume ar nun ma ijia vak. Fu aru ruaknum vo una keko va duok ma iji ijknum ijeg rek.  
\v 10 Regavo e niekin iji fum niesaknum vo maf-sif iji kam arafiriaknum kaniakafa fu iji rok. Regavo naiji na ruainva iji na ma karivako iji abe miaga ja abenkin jam tavan bog ijia oimarknum ma karivakro na iji ruain.   
\p
\v 11 Ijefuon maiji na e maf-sif mukoi samuagdiamo iji nar oimarknum maf-sif nun ijiebuon guak.  
\v 12 E iji fu maf-sif fuon bakin gavo fum e ijieb kuaga fu samuagdiamo iji fu monfuon ikreno ijefuon fuba mukoi samuagdiak. Ijefuodo fu siroij iji maf-sif jakiamo ijar ruakma fuka jume kovak. Fu vake siroij iji fu urame maf-sif iji jakiame buaseknum kam arafiriakva bu subinaime dab tata vak.  
\v 13 E iji bu kuaga fu maf-sif samuagdiamo iji siroij ruakva fuka kovak. Ijefuon maiji maf-sif iji bu fuon bado fuba amarigia maf-sif iji mafardiame samuagdiak.   
\p
\v 14-15 Regavo naiji na e maf-sif mukoi samuagdiavo. Asoinun iji na fun vierafen gavo nak na Asoinun iji nan vierafen. Unam besum ijeg maf-sif nun iji na bun vierafen gavo nak bu nan vierafen. Ijefuon na oimarknum buifuon guakafie vierafen.  
\v 16 Maf-sif roin bu nun revo bu tata oij ijefuon iviakma buba fak uf igia oij. Ijefuon na vierafe maf-sif iji naka aferdia roga bu besum ireke na nunkua samuagdiake bu ir nun ijesugin faik.  
\v 17 Asoinun iji fu na oijmiemo ijefuon maiji naka koiknu buifuon guakafie vierafen. Na guainkin rad fu kiega na una uri ijia fivak.  
\v 18 Naiji fu erar na dab kaniekma bakin. Regavo naka koiknu vajai nun igi abe ijia nijaidiaga bu kanie na guak. Na e darokin ijefuon bu kaniega na guame rad na daro nun ijia una urik. Regavo iji fun Asoi nun iji fu kiema na ruainva ijar na ijegrekfuon fu iji kuardienmano kiain.   
\p
\v 19 Rega e Jius iji bun madu Jesu vuak iji fu ijeg kuardiainma ijefuon bun dab bui kuaime dab ata roinroin ren.  
\v 20 E uruvana roin bu kuai, E iji kafu kaven ise ijar niroin kafu nigen iseren. Regavo ja irerafuon vuak fuon iji faikuai dab uruvana vierafejno kuain.  
\v 21 Regavo roin bu kuai, E kaven ise niroinma iji fu izeg vuak ijekin kuaimokma bakin. Regavo fu madu izeg e ni zuriaigin iji amardiaga bu una ni narakva bano kuain.   
\s1 E Jius bu Jesu nuigafainva ijin  
\p
\v 22 Areme tavan iji ve damo ijia e Jius fok bun una Jerusarem ijia afuin. Bu Godon ar bomana vien iji bu dajainva ijefuon tavan ijia oimardaknum iro bomana be in.  
\v 23 Bu ijegrejo ijia Jesu fu Godon ar bomana ijefuon makaf be bu kua Soromonon banadno kuavo ijia arume oin.  
\v 24 Fu ijia oga e Jiusbuon e mamkanuk roin bu game usem fu manino ijia irem ameoine kua, A ivez son amarigia kuarduoga no a oinon ijefuon anej ma iji vierafek? No if on iji a era ga madu a erar kuaga a ire sumakin kafokafo reoinon iji noka ba vierafen. Ijefuon a vierafega a Godri kuamga a ruainmaga nika samakaf kuarduoga no faiv?   
\p
\v 25-26 Bu ijeg kuardavga fu kia, vuak iji naka ur kuardiain gavo jaka vek ba ma vierafej. Na Asoinun ijefuon daro ijia na ire sumakin iji rej. Ijefuon ja ire iji na rejo ijia giame una na ma vierafekfuon revo iji jaka bakin. Ijefuon maiji jaiji maf-sif nun bakin.  
\v 27 Maf-sif nun iji nan vierafen ijefuon na kiakva bu ir nun iji faime una na jajiek.  
\v 28 Bu jajie roga na unam ma karivako iji abe miainkin buba aoigavo bu ijia ma karivak. Regavo e kafo buba maf-sif nun iji na samuagdiavo iji kafo imut nun ijia kuniai turame aferdia usem vakva bakin.  
\v 29-30 Ijefuon maiji asoinun iji maf-sif iji fu kege vajienma iji fuka darokin ga fur ire fok asidiain. Ijefuon fu erar fu asime maf-sif fuon iji kafo imut fuon ijia kuniai turame aferdiame usem vakva bakin. Ijefuon asoinun ijek irerag no rejo iji fuka besumno kiain.   
\p
\v 31-32 Jesu fu ijeg kuardiamga e iji bun una madu mun tuame kanakrejga fu kia, Na ire sumakin uruvana ka mukor iji ni jon ijia reoija jan gien. Regavo ja vierafe ire sumakin iji na reja ja gienva iji irerag ijar fuka isediaga ja iji kaniekuai reoijno kiain.  
\v 33 Fu ijeg kuardiamga bu kua, No ire ma sumakin uruvana a renma ijefuon kanakrejo bakin. Regavo ar koikon Godon if iji abe buze imo ijefuon no iji ijeg rej. Aiji a ema igi no aikin gavo aka koikon dab God aikin amaremno kuain.  
\v 34 Bu ijeg kuardavga Jesu fu uri kia, Usuibe buk iji bu vuak akai isoinva ijia God fu vuak be e igi nuvuifuon kuaima bu isoinva iji bu ijeg isoin. God e igi no fu kuo jaiji moik igefuon godno kuin.  
\v 35 Regavo vuak iji bu isoinva iji no vierafe fuka ma fu izeg barekma bakin fu ijia navak. Ijefuon God fu e iji bu vuak fuon ma iji faivo iji fu kia, Ja moik igefuon godno kiain.  
\v 36 Regavo naiji na asoinun ijar na fu vierafen ijefuon fu kiema na moikigia ruain ga ja irerafuon kie a Godon if iji abe buzemno kiev. Ja kafu igi na kia naina Godon Farifno kiainva ijefuon ja ijeg rej.  
\v 37 Regavo ja giega na Asoinun ijefuon ik iji naba kegoijga ja ijefuon naba ma vierafekva iji fun ijin.  
\v 38 Regavo ja giega na asoinun ijefuon ik iji nan reoin gavo jaba na ma vierafejgakva nin ire sumakin iji na rejo ijia gieme una na ma vierafef. Ja ijegrekva ja ijiason una ma vierafero asoinun ijek irerag no rejknum kuaivo iji no besum ro ja ijeg vierafekno kiain.   
\p
\v 39 Jesu fu ijeg kuardiamga e iji bun una madu kunaim tokrejga fu giame isuar ar iji areme vain.  
\v 40 Fun Jerusarem areme una madu do Jodan vajame gara ar iji e Jon fu e do ruardiamo ijia fiokafa vain.  
\v 41-42 Fu ijia vako e uruvana bu biom fuon ruaknum kua, E Jon fu ire sumakin kafo fuba rena no gain revo vuak irerag fok fu e garefuon fu kuarduinma iji fuka mano kuain. Areme e ka uruvana bu ijia una fu ma vierafene kuai, E iji fu ma e iji God fu kuai fu ruakno kuainma ijino kuain.   
\c 11  
\s1 Rasaras fu guainma ijin  
\p
\v 1 Regavo ai Beteni ijia e Rasaras kuavo ijar adam ka bomana aben. Regavo ai Beteni iji fu bara Mata ko Merik buon mai.  
\v 2 Regavo Meri iji bara iji fu oir udi mukoi urino iji fu abe Jesuon diak ijia useme some nigen fuon jau ijia abe fidainma ijin. Bara ijefuon makin e Rasarasno kuavo ijar adam aben.  
\v 3 Fu adam abene fuka guakvega makifijaf ijieb uri Jesu vuak nijame kume, E Bomana kaion a oijmamo iji fuka adam bomana abenmano kumen.  
\v 4 Bu vuak ijeg Jesu nijavga fu faime uri e vuak fuon faivo iji kia, E Rasaras fu adam aben ga na vierafe fu guame una uriga e bu ijia izeg Godon daro fu ikreno iji game una fu abe aroivknum vo Farif fuon igi na arordiekno kiain.   
\p
\v 5-6 Regavo Jesu fu Mata ga Meri ga makin fuon Rasaras iji fuka bomana oijmiamo. Ijefuon Rasaras fu adam abenma ijefuon vuak iji bara nokarok (2) bu nijainva iji fun fain gavo fuba ijia vain fu magaga una madu naki nokarok (2) ijia fin.  
\v 7 Fu ijia fine rad fu una e vuak fuon faivo iji kia, Ruano una ai Judia vakno kiain.  
\v 8 Fu ijeg kuardiamga bu una roin kua, E Nijaidiamo ai Judia a una vakveno iji e Jius iji bu nito igem bu mun tuame kanakveja a ijefuon uri igia ruain. Regavo iji aba vierafe gavo a una madu ijia vakafa vierafenmano kuain.  
\v 9 Bu ijeg kuardavga fu kia, Tavan iji fuka jaoijmanak manine sanam. Ijefuon e iji fu tavan ijia oinon iji fuba arikanak ijefuon maiji fu moikigi fu sanainma ijia oin.  
\v 10 Regavo fu naki oinon iji fuka dia kam ire kafo nizukiak. Ijefuon maiji ire sanamo be fu bado fu izeg ai ni nisaime okma bakin.  
\v 11 Jesu vuak ijeg kuardiame uri e vuak fuon faivo iji kia, Kainuvuon Rasaras fu ninaido na vakva na saga fu una urikno kiain.  
\v 12 Fu ijeg kuardiamga e vuak fuon faivo iji bu una roin kua, E Bomana Rasaras fu ma ninaikma iji no vierafe fu una urikno kuain.   
\p
\v 13 Regavo Jesu fu Rasaras fun ma guainma ijefuon fu iji vierafene kuain. Regavo e vuak fuon faivo iji bu vierafero fu ma ninainmaro bu ijeg vierafen.  
\v 14 Ijefuon Jesu fu uri ka visu kuardiame kia, E Rasaras fun ma guain.  
\v 15 Regavo magoi noba ijia kariko fu guainma ijefuon iji fun maren. Fu ijeg guaga na va gafia kua fu una uriga ja ijia game una na ma vierafekno uri no fu gak vakno kiain.  
\v 16 Ijegreare e Tomas e iji bu kua Fuatkaru nafenvano kuavo ijar uri kia, E fok roga no enuvuon E Nijaidiamo guriena vainkin no funa besum aoikno kiain.   
\s1 Jesu fu ma karivako ijiga aoime una urijo ijin  
\p
\v 17 Regavo Rasaras fun guamga bu abe mako ruinva iji naki nokarok ga nokarok (4) barko ijia Jesu fu Beteni ijia kekoma bu vuak iji kuardain.  
\v 18-19 Regavo ai Beteni fu Jerusarem samaij ijia ijefuon e Jius uruvana bu bara Mata ko Merik giakuai ijia ruain. Bara nokarok (2) iji bu makibuon guainma ijefuon buka oifian abenva ijefuon e iji bu bara iji ifejdiakuai ijia ruain.   
\p
\v 20 Regavo Mata fu oifian abeknum fino ijia bu kua Jesu rokno kuava fu faime fu kekome unam gafia biekafa vain. Fu vako Meri fu vek ar gafia e ijiena fin.  
\v 21 Regavo Mata fun kekome va Jesu bieme kua, E Bomana a igia finobatie makin nun iji fuba ijeg guak.  
\v 22 Regavo ivia na vierafega a fuifuon irerag a God kuardakma fu rekno kuain.  
\v 23 Mata fu ijeg kuardamga Jesu fu kua, Makin on iji fun guain gavo na vierafe fu una uri okno kuain.  
\v 24 Fu ijeg Mata kuardamga fu kua, Na vierafe tavan radkma iji ruakma ijia makin nun iji fu una uri fivakno kuain.   
\p
\v 25 Areme Jesu fu madu una Mata kua, Naiji na ma karivako ijiga aoime una urijo ijin. Regavo erar fu na ma vierafekma iji fu guak revo kaven ijia fu una ijia fivak.  
\v 26 Regavo erar fu nivek fine na ma vierafeno e iji fu ijia ma fivak. Ijegvo a vuak igi na kuardavo iji abe faime ma vierafen?  
\v 27 Jesu fu ijeg kuardamga Mata fu kua, E Bomana na vierafega aiji a Godon Farif. E iji bu kuai fu moikigia ruakno kuainva ijino kuain.   
\s1 Jesu fu nirainma ijin  
\p
\v 28 Mata fu Jesu ijeg kuardame fun va ar gafia kekome isuar Meri kuardame kua, E iji E Nijaidiamo iji fun ruainma gafaija oifuon kiemno kuain.  
\v 29 Fu ijeg kuardamga Meri fun migegare kekome Jesu biekafa vain.  
\v 30 Regavo Jesu fuba ar ijia kekoin revo fu vek unam gami Mata fu bienma ijia manin.  
\v 31 Ijefuon Meri fu migegare kekome fu biekafa vakgame e Jius iji bu fu samua karinva iji bu gak fu vakga bu uri dab arafirin. Bu vierafero kafu gami makifuon ijefuon mako vien ijia niraikafa vakoro bu usem jain.   
\p
\v 32 Meri fu vake gami Jesu fu manino ijia kekome uri ato same kua, E Bomana a igia fibatie makin nun fuba ijeg guak.  
\v 33 Regavo Jesu fu uri Meri ga e Jius iji bu niraivo iji giama fuka bomana oifiain.  
\v 34 Ijefuon fu uri kia, Ja surif fuon iji ja abe izia mako ruinvano kiain. Fu ijeg kiamga bu kua, E Bomana no abe gafia mako ruinvano ni ro gamne kuain.  
\v 35-36 Areme Jesu fuka oifiaima fu ijia niraimga e Jius iji ruainva bu ijia gain. Bu game una bui kuai, Ni garia gaf fuka Rasaras oijmamo ijefuon fu iji niraimno kuain.  
\v 37 Bu ijeg game kuaiko e roin bu kuai, Fu ur e ni zuriaigin iji amarema fu una ninarain. Regavo igi fuka igia fikin fu Rasaras ifejdaga fu una urikdo fuba igia fimano kuain.   
\s1 Rasaras fu una urinma ijin  
\p
\v 38 Areme bu Jesu afeme vake mako iji Rasaras bu uname mun dab vien iji bijuinva ijin nijain. Bu nijaivga fu kekome mako iji gama fuka bomana oifiain.  
\v 39 Ijefuon fu kia, Mun guri ja dab mako vien guri bijuinva ijin biom gareg abedefno kiain. Jesu fu ijeg kuardiamga bara Mata e iji guainma ijefuon makin ijar una roin kua, E Bomana Rasaras no dab unainva iji fuka naki nokarok ga nokarok (4) baren. Ijefuon no mun guri biom abedekva fuka udi ise rikno kuain.  
\v 40 Mata fu ijeg una kuardamga Jesu fu kua, Nabe amur kua a ma vierafekma Godon sanainma iji a gakno kuain?   
\p
\v 41 Areme e iji bun uri mun iji dab biom ken ijia abeden. Bu abedevga Jesu fun gafeg varur gufia nikajaknum sirimamene kua, Asoinun na on sirimamega a faimo ijefuon na bomana on oimarev.  
\v 42 Na tavan bog on sirimamene a irerag na kuardavo iji a faimon. Regavo igi na sirimamejo ijefuon maiji na e igi irenva ijiebuon na iji sirimamej. Na on sirimamega a faime irerag na kuardavo iji rega bu ijia game una ma vierafero naiji ar kiema na ruainvaro bu ijeg vierafek.  
\v 43 Jesu fu ijeg sirimamene barme uri e iji bu unainva iji uruvana igia nizume kuai, Rasaras una keko ro.  
\v 44 Jesu fu ijeg kuamga e iji bu dab ugon ijia anume unainva iji fu una ijekma kekoin. Fu anugma una keko rokga Jesu fu uri kia, Ugon gari ja dab anudainva iji iramdafno kiain.   
\s1 E iji bu Jesu kanakuai vierafenva ijin  
\r (Metiu 26:1-5; Mak 14:1-2; Ruk 22:1-2)  
\p
\v 45 Areme e fok bu Mata ko Merik giakuai ruainva iji bu Jesu ire sumakin iji fu renma iji game buka una fu ma vierafen.  
\v 46 Regavo e roin bu Jesu ire iji fu rena bu gainva ijin una va e Ferisis iji kuardiain.  
\v 47 Ijefuon e Ferisis ijigam e mamkanuk Godon isuf baroijo iji bun e mamkanuk roin ijiena afuime vua kuain. Bu kuai, No e iji fu ire sumakin ka mamkanuk iji fu reoinon iji no fu abe izeg rek?  
\v 48 No ire iji fu reoinon iji no game areke fu vek ijegreokma e uruvana buka una fu ma vierafek. Regavo madu e Romko buon e mamkanuk bu iji giakva bu uri ar bomana nuvuon igi no sirimamejo iji keduokfuon. Regavo madu buka uri enuvuon fok kam arafiriakno kuain.   
\p
\v 49 Bu ijeg kuain gavo e Kaiafasno kuavo iji fu ijia fin. Regavo madu fu juaivasia ijia fu e Godon isuf baroino ijiebuon e bomana ijefuon fu uri kia, E gurie jaka ire kafo ba mukoi vierafej.  
\v 50 Ijefuon na vierafe e besum fu e fok nuvuifuon guakma iji fu marek. Regavo no areke e Romko bu uri moik nuvuon fok keduokva fuka ba marek.  
\v 51 Regavo e Kaiafas vuak iji Jesu fu e Jius ijiebuon guakfuon iji fu kuainma iji fum fur vierafene kuainma bakin. Fuiji fu juaivasia ijia fu e Godon isuf baroino e bomana be ijefuon vuak iji fu ma ijefuon fu ijeg kuain.  
\v 52 Regavo fu madu e Jius ijesugin buifuon kuainma bakin. Regavo fuka Godon afijaf fok eraneb bu dab atase ar iror igia karioinva ijin aferdiame agan besum rekafa fu iji vierafene kuain.   
\p
\v 53 Ijefuon e Jius ijiebuon e mamkanuk iji bu tavan ijia vuak iji faime bun anerene uri Jesu kanakuai vuak kuaime ujuinamin.  
\v 54 Ijefuon Jesu ai Judia fu oinma iji fuba una e ijiebuon nifak ijia oin. Regavo ar iji fu ijia areme una uri ai mai Ifrem ai moikum namo samaij ijia e vuak fuon faivo ijiena ijia fikafa vain.   
\p
\v 55 Regavo tavan Fasova iji e Jius bu iro ijo iji fun samairega e fok bun ar buon iji areme una iro ijefuon kanafume samuakuai bu una Jerusarem ijia besum afuin.  
\v 56 Bu ijia afuiknum ijegrejo ijia bu Godon ar ijia arume besum afuim karine Jesu nisain. Bu fu nisaimoknum uri bui kuai, Ja vierafega Jesu fube iro igia ruak?  
\v 57 E Ferisis ijiga e Godon isuf baroijo iji bu ijegrejknum uri e iji kuardiame kia, Iviakma ar iji e Jesu fu fino iji erar game vierafekma ni migegare una kuarduoga no e iji kunaim abe tofno kiain.   
\c 12  
\s1 Bara ijar ire ka ma mukor Jesuon renma ijin  
\r (Metiu 26:6-13; Mak 14:3-9)  
\p
\v 1 Areme tavan Fasova iji bu iro ijo iji fun samairen. Ijefuon Jesu fun una vake ai Beteni e Rasaras fino ijia kekoin. Revo e Rasaras iji e iji fu guamga Jesu fu keunama fu una urinma ijin.  
\v 2 Fu una ijia vako e iji bu ijia Jesu oimardame fuifuon duok amare vajain. Regavo Rasaras fu ijia Jesuk fiko makifuon Mata fu duok karme vajiain.  
\v 3 Jesu fu duok ino ijia bara Meri fu kekome do be bu in nadno kuavo ijefuon gireg safik ijia amarenva fuka udi mukor urino iji abe keko ruain. Fu abe keko Jesuon diak ijia usemdame nige jau fuon ijia abe fimdain. Regavo do iji buka mon ka ma bomana ijia kimejo revo bara iji fuba iji vierafen gavo fuka dab uruvana uduime Jesuon diak somdain. Fu ijegreko ire ijefuon udi ijar ar iji bu karine duok ijo iji fuka raren.   
\p
\v 4-5 Regavo e Judas e Jesuon vuak faimo gavo madu fu tavan rad Jesu abe e ani iji miaga bu kanakfuon e ijar uri Meri kua, Ire udikin mukor guraiji a abe usenma iji aka abe abedekin abe mon kimene e sinuom bakin ijin kafo vajiakfuon gavo a irerafuon abe una ijegrenmano kuain.  
\v 6 Regavo e Judas vuak iji fu ijeg kuainma iji fu e sinuom bakin iji mukor ifejdiamo ijefuon fu iji kuainma bakin. E iji fu e niekin ijefuon fu kamui mon kenma iji fur samuaknum koikfuon ijia kafo niesamoinon.  
\v 7 Areme Jesu fu uri kia, Ja bara igi fu nuifuon ire igi fu reno iji jab bijuk. Fu tavan iji na guaga fu abe azirdikfuon fu ijin iviakma mimatam.  
\v 8 E iji sinuom bakin iji bu tavan bog bu igia jana ok revo naiji na tavan bog jana igia okva bano kiain.   
\p
\v 9 Regavo tavan besum ijia e Jius iji bu faik Jesu fu ai Beteni ijia oina bu fain ijefuon e fok bu ijia vain. Bu Jesu fuonkua gakuai vainva bakin gavo bu madu e Rasaras fu guama Jesu fu kuamga fu una urinma bu iji gakuai vain.  
\v 10 Ijefuon Jius e mamkanuk iji bu madu Rasaras kanakuai Jerusarem ijia kari kuaime ujuinamin.  
\v 11 Ijefuon maiji fu guama Jesu fu keunama fu una urinma ijia e Jius uruvana bu ebuon mamkanuk iji arega bu una Jesu ma vierafen.   
\s1 Jesu Jerusarem aru vakga e uruvana bu fu oimardainva ijin  
\r (Metiu 21:1-11; Mak 11:1-11; Ruk 19:28-40)  
\p
\v 12 Areme afarma e uruvana Jerusarem ijia tavan Fasova iji bu iro ikuai ruainva ijieb Jesu fu ijia Jerusarem roko iji fain.  
\v 13 Ijefuon e fok bu uri anam kiak mukiene unam gafia Jesu biekuai vain. Bu usem vaknum uruvana biumavknum kume, No Godon oimarek. Godri e Isrerko buon Kin iji fu ma E Bomana ijefuon if ijia roko iji fuon oimardakno kumen.  
\v 14 Areme Jesu fun buk akaij ijia usuibe bu isoime kuainva ijeg fun fanuf be bu kua maf-donkino kuavo ijefuon azan ijia ajie fine Jerusarem vain. Regavo vuak iji bu ijeg isoi,   
\q1
\v 15 E mai Zaionko iji E Kin jon iji fu maf-donki uka iviamkor azan ijia ajie fine rokno jab jukno kuain.   
\p
\v 16 Regavo e Jesuon vuak faivo iji bu unam kafokafo e iji bu Jesu fak rejo iji bun giain revo buka ba mukoi vierafen. Bu vake ijiason bu Jesu kanava fu guamga Godri kuamga fu una unam sanainma ijia uriga bu ijia vierafen. Bu vierafero vuak gami bu usuibe buk akaij ijia isoime kuainva iji bu fuifuon kuainva ijefuon bu fu abe ijegredainvaro bu ijeg vierafen.   
\p
\v 17 E iji bu ni buon ijia ireme gako Jesu fu Rasaras bu unainva ijia kuamga fu una uri keko roka bu gainva ijieb vuak ijin dab kuaime iravain.  
\v 18 E fok bu unam sumakin darokin iji fu renma iji fainva ijefuon bu usem unam gafia Jesu biekuai vain.  
\v 19 E Ferisis roin bu oknum iji giame kuai, Jam garaiji giaf. E fok buka biom fu ma vierafeknum dab arafiri vak. Regavo noiji no izegrenva ijefuon no bu ijia areme una fu dab arafiri vakno kuain.   
\s1 E Grik roin bu Jesu nisain  
\p
\v 20 Regavo e Griko roin bu Jerusarem ijia tavan Fasova iro iji bu ikrejo ijia sirimamekuai ruain.  
\v 21 Ijefuon bu usem e Firif ai Besaida Gareri guf ijia ruainma ijin bieme kua, No Jesu gakuai vierafenvano kuain.  
\v 22 Bu ijeg kuavga Firif fun va Edru kuame busik bun vake Jesu fino ijia usem e iji bu kuardiainva ijeg fu kuardain.  
\v 23 Bu ijeg kuardava Jesu fu una roin kia, Tavan iji God fu Ema buon Farif iji abe fuon izeg fu kege ruainma ijefuon aroime kuaga fu fuon sanainma ijia fikfuon iji fun igijar.  
\v 24 Regavo vuak igi naka ma kuardiavno faif. Ire ufien sunin besum fu vek an ijia kira sairekma iji fu izeg una madu moik ijia arime una uruvana tavuakma bakin. Regavo ufien iji fu saireme una dabuiko moik ijia arikma ijar fuka uruvana tavuak.  
\v 25 Regavo erar fu moikigia tavan bog fuon vierafenma iji oijmaknum kegokma rad fu una izeg unam ma karivako iji abekma bakin. Regavo erar fu moikigia tavan bog una e roin vierafeknum oijmiame ifejdiaokma fu rad unam ma fivako iji abek.  
\v 26 Erar vua nun faimo rekafa vierafekma iji nika uri igi na kegoijo ijeg matieme keof. Regavo e vua nun faivo iji bu ar izer na fijo iji buk bu ijia karivak. Regavo asoinun iji fu gia eraneb bu na jajievo iji fu bu kege arordiakno kiain.   
\s1 Jesu vuak fu guakfuon ijin kuardiainma ijin  
\p
\v 27 Fu ijeg kuardiame uri e vuak fuon faivo iji kia, Iviakma oinun fun ma bijukuriem ijefuon na izeg rek? Naba una asoinun kuak a tavan iji na vajai fian abekrejo iji ab kuaga fu nun rokno kuak? Regavo na ijeg una Asoinun kuakva iji fuba maren. Ijefuon maiji na tavan iji na ijeg vajai fian abekrejo iji biekro na ijefuon moikigia ari ruain.  
\v 28 Areme fu una Asoifuon sirimamene kua, Asoinun ni e fok nijaidiaga bu if on iji abe aroivno kuain. Areme bu faik God fu varur gufia ijeg kume, Na if nun sanainma iji nan usuibe abe e fok nijaidiain. Regavo iviakma na una madu if nun sanainma iji abe nijaidiaga bu game abe arordiekno kumen.  
\v 29 Regavo e fok samaij ijia irenva bu vuak iji faime una bui kuai fu varur kumeno kuain rega roin bu kuai fu anerak vuak kuainmano kuain.  
\v 30 Bu dab ijeg kuaivga Jesu fu kia, Vuak iji kaf gufia fu kuaima ja fainva iji fu nuifuon bakigavo fu e fok joifuon kuain.  
\v 31 Regavo ivia tavan igi fu e moikigia oijo ijiebuon tavan God fu ise buon iji ke mazim giak. Regavo e moik igefuon e bomana Setanon daro iji dab datuai fu ajuarek.  
\v 32 Regavo tavan iji bu na kanieme abe urikva ijia na e fok aferdiaga bu una nun ruakno kiain.  
\v 33 Regavo Jesu ijeg fu kuainma iji fu tavan iji bu rad fu dab kuros ijia kanaga fu guakma ijefuon fu vuak iji kuardiain.   
\p
\v 34 Fu ijeg kuardiamga e fok bu una roin kua, Akai nuvuon ijia fu kuai E iji God fu kuaga fu moikigia ari ruakno kuainma iji fuba guak ga fu ijia fivakno kuain. Regavo a izegrenma ijefuon a kume, Ema buon Farif fu guaga bu abe kaf ajiekno kuaim. Regavo Ema buon Farif iji a kuaimon iji fu erar ga fu izerkin?  
\v 35 Bu ijeg kuardavga Jesu fu una roin kia, Ve igi fu sanainma iji fuka ijia tavan bog saname vakma bakin ijefuon ivia tavan igi fuba nakin gavo fu vek sanainma ijia mukoi keof. Ijefuon maiji e be erar ga fu naki oinon iji fuka ba ni nisaiknum vierafene oin.  
\v 36 Ijefuon iviakma Kurais naiji na sanainma ijin. Ijefuon jaka vek igi na jana oijo ijia ja amarigia na ma vierafenkin ja una sanainma ijefuon e rekno kiain.  
\v 37 Jesu fu ire ma sumakin fok e Jius ijiebuon nifak ijia rene nijaidiain gavo bu giame buka ba una fu ma vierafen.  
\v 38 Ijefuon maiji bu izeg e Asaia e Godon vuak vierafene kuardiamo bu usuibe buk akaij ijia isoinva ijekma riarekafa ijefuon bu ijeg ren. Regavo vuak iji e Asaia fu kuainma iji bu ijeg isoi,  
\q1 E Bomana eraneb vuak igi no kuardiainva iji faime ma vierafen? Revo madu E Bomana ijefuon daro iji fu eranebuon nifak ijia samafrene ikrega bu gak?   
\p
\v 39-40 Bu ijeg isoinva ijefuon e iji buba fu ma vierafen. Ijefuon maiji fu madu vuak be madu ijeg kuai,  
\q1 Godri e ijiebuon niom iji kam zuriadiain ga madu nigen buon iji ba kam samafrediain. Fu ijegrediaikin buba ni narame nisaik ga madu buba mukoi vierafek. Regavo madu bu una nun roga na karauniakfuon iji buba vierafen.   
\p
\v 41 E Asaia vuak iji fu ijeg kuainma iji fum ur nimamaime Jesuon sanainma iji gainma ijefuon fu vuak iji vierafene isoin.   
\p
\v 42 Regavo tavan ijia e Jius ijiebuon e mamkanuk roin buka una Jesu ma vierafen. Regavo bu una e Ferisis iji juinva ijefuon bu izeg Jesu bu ma vierafenva iji buba samakaf kuain. Ijefuon maiji bu vierafero e Ferisis ijieb sos iji bu vako iji kuriairekvaro bu iji vierafen.  
\v 43 Fu Godri bu kam nidosiame arordiakfuon iji buba vierafen revo buimve una ema ijieb bu kam arordiakfuon bu ijin vierafen.   
\s1 Jesuon vuak ijieb no kam arafiruokfuon ijin  
\p
\v 44 Areme Jesu fu uri uruvana igia kuardiame kia, Erar fu na ma vierafeno iji fu nunkua vierafeno bakin gavo fu e iji fu na kiema na ruainva ijin madu ma vierafen.  
\v 45 Regavo e iji erar fu na giemo iji fu madu asoinun iji fu na kiema na ruainva iji gam.  
\v 46 Naiji na sanainma ijin abe moikigia ruain ijefuon eraneb bu na ma vierafejo iji bu nakinma ijia kariokva bakin gavo bu sanainma nun ijia kariok.  
\v 47-48 Regavo eraneb bu na nuigafieme vuak nun ma iji ba faime igievo e iji fu fine una ise fuon iji giakfuon iji fu ijijar. Revo na ruainva iji na e moikigia ise reoijo iji ke mazim giakafie ruainva bakin gavo nam ise buon ijia karauniakafie ruain. Ijefuon vuak nun ma iji fok na kuardiainva ijieb tavan radkma iji ruakma bur una dakaroim ise buon iji giak.  
\v 49 Regavo na vuak kufui kuardiavo bakin ijefuon maiji na vuak nun na vierafenva ijin abe kuardiavo bakin. Regavo vuak irerag fok na kuardiavo iji fun Asoinun iji fu kiema na ruainva ijefuon vuak na iji abe ja kuardiav.  
\v 50 Regavo na vierafe vuak irerag fu kuainma vuak ijieb ifejduoga no unam ma ijia ma karivak. Ijefuon vuak na kuardiavo iji naka Asoinun ijefuon vuak fu kuardienma na iji abe kuardiavno kiain.   
\c 13  
\s1 Jesu e vuak fuon faivo iji diak somdiainma ijin  
\p
\v 1-2 Areme tavan Fasova iji e Jius bu iro ijo iji fun samairen. Ijefuon Jesu fu vierafero tavan iji fu moikigia oinon iji fun abedo fu una Asoifuon ijefuon vakro fu ijeg vierafen. Fu tavan bog fu moikigia oinma ijia fu e iji bu fu ma vierafejo iji oijmiame roke ka tavan radkma ijia ruain.  
\p Ijefuon Jesu fu naki be e vuak fuon faivo ijiena fine duok ino ijia Setan fu Judas e Saimon Isekarioton farif iji biesuakafa fu oifuon ijia arin. Ijefuon fu Jesu abe e ani iji miakafa vierafen.  
\v 3 Regavo Jesu fu vierafero ire fok fun asoifuon ijar kege daro fuon rotit ijia nadain ga madu fur kuamga fu moikigia ari ruaido fu madu una Asoifuon fino ijia vakro fu iji vierafen.  
\v 4 Ijefuon fu ari fino iji fu areme uri ugon be fu azan abesenma iji daja abedeme uri taver abe viej fuon ijia kirain.  
\v 5 Fu kirame fun uri dis ijia do jiame e vuak fuon faivo ijiebuon diak iji sodiame taver abe safik fimdiain.  
\v 6 Fu ijegredia roke e Saimon Fita fino ijia keko diak sodakvega fu uri kua, E Bomana a irerafuon diak nun sodiemno kuain?   
\p
\v 7 Fu ijeg kuama Jesu fu una roin kua, A iviakma ire igi na rejo iji aba vierafen revo ason rad ijar a gieme una na vierafekno kuain.  
\v 8 Fu ijeg kuardain gavo Fita fu una madu kua, A iviakma igia ga rad a diak nun igi sodiekma iji naka ma isediemno kuain. Fu ijeg kuamga Jesu fu una kua, Na diak on iji ba sodakva iji aiji a e vuak nun faimo bano kuain.  
\v 9 Jesu fu ijeg una Saimon Fita kuamga fu kua, E Bomana a diak nun igi sodiekveno ijefuon nika diak nun ga imut ga nigen nun ijekma sodiemne kuain.  
\v 10 Fu ijeg kuardamgavo Jesu fu una kua, Erar fu amur do fok ruainma iji fuka maren. Fu vajai fuon muin iji fuka soin ijefuon fuba una do ruaik. Regavo fu do ruaikafa vierafekma fu diak ijesugin ruaik. Ijegvo e guri ja fun maradiain revo e besum fuba maren fu vek muigin kiain.  
\v 11 Jesu vuak iji fu kuardiainma ijefuon maiji fu e iji erar rad fu abe una e ani iji miaga bu kanakfuon iji fun vierafen. Ijefuon fu iji kia, E fok ja fun maradiain gavo e besum fuka muigino kiain.   
\p
\v 12 Areme Jesu fun e vuak fuon faivo iji diak somdia barme fun ugon fuon fu daru abedenma iji abe una abesme una ar fu fino ijia ari fine kia, Ja iviakma ire guri na renva iji jabe gieme vierafen?  
\v 13 Ja na kie, E Nijaidiamo ga E Bomana kievo iji na vierafe fun maren ijefuon maiji na ijefuon ruain.  
\v 14-15 Na E Bomana jon ga E Nijaidiamo jon revo naka uri diak jon iji somdiain. Ijefuon iviakma ire guri na renva iji na rene ja nijaidiain. Ijefuon jak ijeg koikjo kege una e ukakna rene uri e roin oijmiaknum ifejdiaf.  
\v 16-17 Regavo vuak igi naka ma kuardiavo faif. E iji fu e bomana befuon ikreno iji fu izeg una e iji fu fuifuon ikreno iji asime fur e bomana rekma bakin. Regavo madu e iji fu figa e be kuaga fu vuak abe va e be kuardamo iji fu izeg una e iji fu kuaga fu vuak abe vako iji asime e bomana rek? Regavo ja uri vuak igi na kuardiava ja fainva iji abe mimatame kegokva jaka oimarknum karik.   
\p
\v 18 Regavo vuak igi na kuardiavo iji na e fok ja faikfuon na iji kuardiavo bakin. Nan amur ijia oijon fok nan gia baren ijefuon na iji ja ken. Regavo na vierafero vuak iji bu usuibe buk akaij ijia isoime kuai, E iji fu nosik duok ioinon ijar una na ziegafiekno kuainma iji fuka riarekro na iji kuain.  
\v 19 Naka vek igia kuardiaga ja faime vierafekin rad ire iji fu rega ja ijia game vierafero naiji na e iji bu kuai fu ruakno kuainma ijinro ja ijeg vierafek.  
\v 20 Regavo vuak igi naka ma kuardiav, Erar e iji na kiaga bu vuak nun ma iji abe kuardiaoijo iji oijmiaknum aferdiamo iji bu madu na oijmieme aferdiev. Regavo madu e iji bu na oijmieme aferdievo iji bu madu Asoinun iji fu na kiema na ruainva iji oijmame afev.   
\s1 Jesu fu irerab rad fuon rekfuon iji kuardiainma ijin  
\r (Metiu 26:20-25; Mak 14:17-21; Ruk 22:21-23)  
\p
\v 21 Jesu fu vuak ijeg manine kuardiagak fuka oi bijukurakrega fuka uri samakaf visu kuardiame kia, Naka ma kuardiav, E guri ja karinva ijia e besum fu na abe una e ani iji miakno kiain.  
\v 22 Fu ijeg kuardiamga e vuak fuon faivo bu vuak ijin dab vierafega fuka ba aresren. Vuak iji Jesu kafu erafon kuainma iji buka ba vierafen ijefuon bu uri bui ganamin.  
\v 23-24 Regavo e vuak fuon faimo be fu oijmamo iji fuka samaij ijia Jesuk fin. Ijefuon e Saimon Fita fu e iji ni riajama fu gamga fu kua, Kam ar ijia kuaga fu erafon kuaga fu kuarduo no faivno kuain.  
\v 25 Fu ijeg kuamga e iji fu Jesuon samaij ijia fino iji fu biom Jesuon navaivknum kua, E Bomana a vuak iji a kuaimo iji a erafon kuaimno kuain?   
\p
\v 26 Rega Jesu fu una kua, A e iji na bred abe vuain guria abesme abe e iji maga a ijia game vierafekno kuain. Areme fu uri bred abe vuain ijia abesme abe e Judas Iskarioton Saimon farif ijin main.  
\v 27 Jesu fu bred iji abe e Judas mamga Setan fuka ijia migegare Judason oij ijia vuak ise vierafe main. Regavo Jesu fu uri kua, Ni migegare irerag a vierafenma iji rene kuain.  
\v 28 Areme e fok fata ijia afuime kari duok ijo iji bu Jesu fu irerafuon vuak ijeg Judas kuardainma ijefuon maiji buka ba vierafen.  
\v 29 Regavo e Judas fu mon buon fok fur samuagdiamo ijefuon bu vierafero kafu kuaga fu mon ijia kafo kege una va duok kafo kimekafa kuainmaro bu ijeg vierafen. Regavo be kafu kuaga fu mon ijia kafo kege una va e sinuom bakin iji vajiakro bu ijeg vierafen.  
\v 30 Ijefuon Jesu fu bred buin iji abe e Judas mama fuba uzain gavo fu uri abe in. Regavo tavan iji fun ve nakin gavo madu ise iji fun rekreno ijefuon fu ijeg ren.   
\p
\v 31 Judas fu vakga Jesu fu uri ijeg kia, Iviakma Ema buon Farif ijefuon sanainma iji fun samafren. Ijefuon Godon sanainma iji fu Jesuon azan ijia abe e igiebuon nifak ijia samafren.  
\v 32 Regavo Godon sanainma iji fu Jesur abe e fok nijaidiakma God fuk madu fu daro fuon ijia Jesuon sanainma iji abe e fok iviakma nijaidiak.  
\v 33 Uviaifnu na vierafe na tavan uruvana naba jana ok. Ijefuon jaba na giekva jaka uri na nisaidiek. Regavo ur na e Jius e mamkanuk iji na kuardiainva ijeg jak na kia ja ar na vako iji jaba jajie vuak.  
\v 34 Regavo ni vuak iviamkor be na kuardiakrejo igi faif. Ni jon oijmanamif. Izeg na ja oijmia ruainva ijegvo jasik una jon ijeg oijmanamif.  
\v 35 Ja jon oijmanamikva e iji bu ja giame vierafero jaiji ja ma e vuak nun faivro bu ijeg vierafekno kiain.   
\s1 Jesu fu Fitar rad fekfuon fu kuainma ijin  
\r (Metiu 26:31-35; Mak 14:27-31; Ruk 22:31-34)  
\p
\v 36 Jesu fu ijeg kuardamga e Saimon Fita fu una roin kua, E Bomana ar iji a izia vakafa kuaimno kuain? Saimon Fita fu ijeg kuardamga Jesu fu una kua, A iviakma ar na vako iji aba jajie vuak. Regavo ason rad ar na vako a ijia vuakno kuain.  
\v 37 Fu ijeg kuardamga Saimon Fita fu kua, E Bomana na iviakma naka oifuon guame ar a vakreno ijia vakro vierafen gavo a irerafuon na arekno kuain?  
\v 38 Saimon Fita fu ijeg kuardamga Jesu fu una roin kua, A nuifuon guakno kienma iji a ma kuardiem ki a kufuimen? Vuak igi naka ma kuardavo ni fai, Ivia naki kukoro fuba kumenma ijia e bu nuisina una a kuakva a tavan nokbek (3) feme kiak e iji ja kuaivo iji naba gainvano kiak.   
\c 14  
\s1 Jesu fu unam iji Godon vako ijin  
\p
\v 1 Areme Jesu fu uri kia, Jab uruvana vierafeknum oifian abek ni God ma vierafeknum vo na ma vierafef.  
\v 2 Regavo ar gufi asoinun fu fino iji fuka ar guf uruvana ijefuon na vakva na ar jon kafo amardiak. Regavo asoinun ijefuon ar guf iji fuba uruvanabatie na vuak igi naba biesiame kuardiak revo fuka ma uruvana ijefuon na ijin ja kuardiav.  
\v 3 Na amur ajie va gufia kekome ar jon amarme na una ja aferdia ijia vaga ja nana karik. Ja va ar na fijo ijia jak ja ijia karik.  
\v 4 Regavo ar iji na vako ijefuon unam iji jan vierafedo ja ijia jajieme vuak.   
\p
\v 5 Jesu fu ijeg kuardiamga e Tomas fu uri kua, E Bomana no ar a vakreno iji noba gain ga no izeg unam iji vierafene ja vuakno kuain.  
\v 6 Fu ijeg kuamga Jesu fu una kua, Naiji na unam ma iji ga vuak ma iji ga ma karivako ijin. Ijefuon unam ma iji Asoinun fu fino ijia vakfuon iji fu unam be a izeg vakma bakin gavo fun duadok nun ijia vak.  
\v 7 Jesu fu ijeg kuardiame kia, Ivia jan na gieme mukoi vierafen revo rad ja madu ijeg Asoinun game fu mukoi vierafek. Regavo iviakmaigia jan fu mukoi vierafen ga madu jan fu gainvano kiain.   
\p
\v 8 Jesu fu ijeg kuaimga e Firif fu uri Jesu kua, E Bomana no Asoion iji gakuai vierafenvano ni nijaiduoga no ga fu oimaduomno kuain.  
\v 9 Fu ijeg kuamga Jesu fu una roin kua, Firif! Na tavan uruvana na jana oin gavo jaka vek naba gieme mukoi vierafen. Regavo erar fu na gienma iji fu Asoinun fun gain. Regavo ja irerafuon na kie, Ni Asoion nijaiduo no gavno kiev?  
\v 10 Regavo Firif a na giemo ijefuon ni ma vierafero naiji na Asoinun ijek fioijo ga Asoinun fu nosik tavan bog fioino kuain. Areme Jesu fu uri e vuak fuon faivo iji kia, Vuak fok na kuardiavo iji nam nar kuardiavo bakin revo vuak iji fu Asoinun ijefuon vuak. Ijefuon ik irerag na reoijo iji fu Asoinun fu nosik fioino ijar duadok nun ijia ik fuon iji ren.   
\p
\v 11 Regavo ni vierafef. Naiji na Asoinun ijek fioijo ga Asoinun fu nosik fioin. Regavo naiji jaba ma vierafekva ni ik fuon na reoijo ijia giame una na ma vierafef.  
\v 12 Regavo vuak igi na ma kuardiavno ni amarigia faif. Erar fu na ma vierafekma fu ik iji na reoijo iji fuk ijeg reok. Regavo iji fuka ma rad na una Asoinun fu fino ijia vakva e iji bu iviakma nuifuon ik ukakna reoijo iji bu rad ik mamkanuk kafo nuifuon rek.  
\v 13 Regavo irerag kafo ja if nun ijia kiekva na migegare ifejdiak. Na ijegrekva e fok bu ire iji na reoijo ijia gieme bu una Asoinun iji oimardame dab aroik.  
\v 14 Regavo ja na ire kafo fuon ja if nun ijia kiekva na oi marknum ifejdiak.   
\s1 Godon Kaven Akai fu abe unafduokafa kuinma ijin  
\p
\v 15 Ja na mukoi oijmiekva nika vuak nun fok mukoi faime igiame reof.  
\v 16 Ja ijegrekva na Asoinun kuaga fu e iji ja ifejdiakfuon iji abe ja unafdiak.  
\v 17 Regavo e iji fu ja ifejdiakfuon iji Godon Kaven Akai ma iji fur ja ifejdiaga ja tavan bog Godon ma iji giaknum karivak. Regavo e moikigia ise reoijo iji buba oimarknum Kaven Akai iji abek. Ijefuon maiji bu fu buba gak ga madu buba mukoi vierafek. Regavo fuiji jan mukoi vierafen ijefuon maiji jan ni jon ijia fu gain ga fu jana tavan bog fiknum oin.   
\p
\v 18 Regavo ja naba uniako vaga ja jonkua kariok ga na una ja karinva ijia ruak.  
\v 19 E moikigia ise reoijo iji bu tavan sibank ijesugin bu na buba giek revo jaiji ja una na giek. Ijefuon maiji na guame una uri ijia fivako ijefuon jak ja ijia karivak.  
\v 20 Ijefuon tavan iji abekma ja ijia gieme vierafero naiji na Asoinun ijek fioga ja nana karioij ijefuon maiji na oijon ijia fij.  
\v 21 Erar fu vuak nun fok na kuardiavo iji mukoi faime igiamo e iji fu tavan bog na oijmiem. Regavo e iji na mukoi oijmiemo iji Asoinun fu e iji mukoi oijmak ga nak na e iji mukoi oijmaknum na koiknu abe fu samafredaga fu na giek.   
\p
\v 22 Jesu fu vuak iji kuaim barko vo e Judas e iji fu Jesu abe e Jius iji miainma iji bakigavo e Judas be ijar uri Jesu kua, E Bomana a izegredo a nuvuon ruaga e iji moikigia ise reoijo iji a arekno kuain?  
\v 23 Fu ijeg kuamga Jesu fu una roin kua, Erar fu na mukoi oijmiekma fu vuak nun iji mukoi faime igiak. Regavo erar fu ijegreno iji Asoinun fu e ijin game oijmak ga na Asoinun ijek tavan bog no e ijiena oifuon ijia kariok.  
\v 24 Regavo erar fuba na mukoi oijmiekma e iji fu vuak nun fuba mukoi faime igiak. Ijefuon vuak iji ja faiko na kuardiainva iji fu vuak nun bakin gavo vuak fok fu Asoinun gufi fu kiema na ruainva ijefuon vuak.   
\p
\v 25 Na vuak fok nan vek moikigi na jana oijo ijia nan kuardiain.  
\v 26 Regavo e iji fu ja ifejdiakfuon iji Godon Kaven Akai ijar ga iji fu Asoinun ijar if nun ijia kuaga fu ari jon ruak. Regavo fur ire fok nijaidiaknum ifejdiaga ja vuak fok na kuardiainva iji jaba rumdiagavo ja mukoi vierafeknum ok.   
\p
\v 27 Nan vakrej ijefuon na daro mia ja afurvene oimarknum kariok. Revo ijeg afurvene karijo ijekin be ja moikigia biekva bakin ijefuon jab uruvana oifian abeknum juk.  
\v 28 Nan kuardiava jan fain, Na kia na ja unia vainki na una ruakno kiain. Regavo ja na mukoi oijmiekva ja nun oimareke na Asoinun fu fino ijia vak ijefuon maiji Asoinun ijar fu na asidien.  
\v 29 Na vuak fok nan amur kuardiain gavo ire ma iji bu rad rega ja ijia giame una ma vierafek.  
\v 30-31 Naba jana uruvana fine vuak kuaik ijefuon maiji Setan e iji moikigi samuamo iji fun rok. Setan fu daro nun fu asikma bakin. Regavo e moikigia oinva ijieb ma vierafero naiji Asoinun iji oijmavo ijefuon na irerag fu kuardiemo na iji mukoi igiame reoij. Jesu fu vuak ijeg kuardiame kia, Ni uriga no ar igi no karinva iji areme vakno kiain.   
\c 15  
\s1 Jesu fu in of ijekino kuainma ijin  
\p
\v 1 Jesu naiji na in of ijekin ga Asoinun fu juar iji samuamon.  
\v 2 Fu giega in kiak nun kafo buba sunin kiraiga fu kaniafu korek. Regavo kiak iji sunin kiravo iji fuka amarigia nidosiame amarega bu sunin uruvana kirak.  
\v 3 Regavo vuak nun na kuardiainva ijar ise jon fun fikordiama jan una maradiain.  
\v 4 Ijefuon ja tavan bog nana besum karioke na jana tavan bog oijon ijia fiok. Regavo in kiak fu izeg koikfuon sunin kirakma bakin gavo fu of fuon ijia bijakma fu sunin kirak. Regavo ja tavan bog ba nana besum kariokva jaba sunin kirak.   
\p
\v 5 Ijefuon naiji na in of ijin ga jaiji ja in kiak nun igekin. Ijefuon erar fu tavan bog nosik besum oin rega na fusik oifuon ijia tavan bog fiokva e iji fu in iji sunin uruvana kiramo ijin. Regavo na jana ba fiokva ja izeg amarigia sunin kiriakva bakin.  
\v 6 Regavo eraneb buba nana besum kariokva e iji fu in kiak bu kaniafu kozega bu sairvo ijeg bu kaniafu kozega bu sairek. Regavo madu in kiak buba sunin kiravo iji bu kaniafume mian naino ijia kozega bu naoime barek. Ijegvo erar fuba nosik fiokma Asoinun juar iji samuamo fu e ijekin iji kege mian naino ijia kozega bu naoime barek.  
\v 7 Regavo ja tavan bog nana karioknum ga vuak nun iji igiekva ja ire kafo vierafene kiekva God fu ifejdiak.   
\p
\v 8 Regavo eraneb ja e vuak nun faivo ijegrene uri oijmanamiknum ifenami vo unam ma ijekin iji reokva iji ja in iji fu sunin uruvana kiramo ijeg rek. Ja unam ma ijekin iji ja rejo ijia e bu Asoinun ijefuon if iji abe nidoime aroik.  
\v 9 Regavo Asoinun fu na oijmiemo ijeg na una ja oijmiav ijefuon ni uri izeg na ja oijmiavo ijeg jon oijmanamime kariof.  
\v 10 Na Asoinun ijefuon vuak iji mukoi faime igavo ijefuon na fuon oijmiamo ijia tavan bog biduame firok. Unam besum ijeg jak ja vuak nun mukoi faime igiekva ja nun oijmiamo ijia biduame karivak.   
\p
\v 11 Na vuak igi ja kuardiaikin ja tavan bog nun oimarvo iji abe oijon ijia abedega oimarvo nun ijar tavan bog oijon ijia name rarek.  
\v 12 Ijefuon nika izeg na ja oijmiainva ijeg tavan bog jon oijmanamiknum kariof.  
\v 13 Regavo igia fai e be erar fu kaifijaf ijiebuon guakma iji fuon fu e oijmiamo iji fuka ma bomana.  
\v 14 Ja irerag na kuardiavo ja ijia reokva jaiji ja ma kaifnun.  
\v 15 Regavo naba ja kia jaiji ja enun ikrejo kiak. Ijefuon maiji e iji fu e befuon ikreno iji fu e bomana fuon irerag fu vierafene reoinon iji fuka ba vierafen. Regavo naiji na e ijekin bakin gavo naiji na vuak irerag fok Asoinun fu kuardienma iji nan ja kuardia baren. Ijefuon naba kia ja enun ikrejo kiak. Regavo na ja kiakva na kaifnun kiak.  
\v 16 Regavo jaiji jam jar nun ruainva bakin gavo nar ja kenvano ni va tavan bog if nun ijia unam ma ijesugin kegokfuon. Ja ijegrenki ja ire kafofuon if nun ijia Asoinun kuakva fu ifejdiak.  
\v 17 Regavo na una madu kia, Nika jon mukoi oijmanamiknum kariof.   
\s1 E ise reoijo moikigia oinva ijieb e Jesuon vuak faivo ijiena nibijainva ijin  
\p
\v 18 E ise rejo moikigia oinva ijieb ja ziegafiame nibijiakva ni vierafero amur bu na ziegafie vo rad bu ja ziegafiavro.  
\v 19 Ja e moikigia ise reoijo ijiebuon unam iji abe buna okva buka oijmiame ja aferdia kam unam buon ijia vak. Regavo jaiji ja e moikigia ise reoijo ijiebuon e bakin. Ijefuon nar ja kega ja e ijekin ijiebuon unam iji nuigafiain. Ijefuodo e moikigia ise reoijo iji buka ja ziegafiak.  
\v 20-21 Ni vuak iji na amur kuardiainva iji vierafef, E iji e befuon ikreno iji fuba efuon bomana iji asim e bomana rek. Ijefuon bu na abe arafirienva ijeg bu ja kege arafiriak. Regavo bu vuak nun mukoi faime igiabatie buk bu vuak jon mukoi faime igiak. Bu ire ise fok jon rek ijefuon maiji ja enun ga madu bu e iji fu na kiema na igia ari ruainva iji buba mukoi vierafen.  
\v 22 Regavo naba ari moikigia vuak igi abe kuardiabatie e ise reoijo iji bu izeg ise iji mukoi giame vierafekva bakin. Regavo iviakma Jesu nar arime unam ma ga ise iji nan kuardiain ijefuon bu izeg una kuaik no ise iji noba mukoi giainva ijefuon noba giaga renvano kuaikva bakin.   
\p
\v 23 Regavo erar fu na ziegafiemo iji fu Asoinun iji ziegafam.  
\v 24 Naba ari moikigia ire sumakin e bu rejo bakin iji rebatie e iji buba ise bu reoinva ijefuon vajai fian abek. Regavo nan arime buna oknum ire sumakin uruvana reko bun gien gavo bu uri na abevo Asoinun iji no fusik ziegafuv.  
\v 25 Regavo Godon buk akaij ijia bu isoime ijeg kuai, Bu vuak ma ijefuon na ziegafienva bano kuain. Regavo iji bu kuainva iji fun riaren ijefuon bu ijeg ren.   
\p
\v 26 Regavo e iji fu ja ifejdiakfuon iji fu Asoinun fino ijia ruak. Regavo e iji Kaven Akai fu Godon ma iji abe samafreoino ijin. Nar Asoinun kuaga fu Kaven Akai iji abe ja uniafdiak rega Kaven Akai ijar vuak nun iji abe nuisina ja kuardiak.  
\v 27 Regavo madu jar vuak nun abe e roin kuardiak ijefuon maiji ja ik anej ijia ja nana oknum unam nun fok jan gie baren.   
\c 16  
\p
\v 1 Regavo naiji nan vakvej ijefuon na vuak igi kuardiaga ja uri giriesame ma vierafeknum kegok.  
\v 2 Regavo ja e Jiusbuon ar bu afuime vuak kuaivo ijia aru vakva bu kuriaireme rotkuriak. Regavo tavan abekma bu e igi ja oijo ijia be kanaga fu guak. Regavo bu ijegrekva bu vierafero bu Godon ik rejoro bu ijeg vierafek.  
\v 3 Bu na abevo Asoinun iji buba ma vierafen ijefuon bu ire ise ijekin iji jon rek.  
\v 4 Regavo vuak igi na kuardiavo ijefuon vake tavan abega bu ire ise iji jon rekva ja vierafero vuak iji nan kuardiainvaro ja ijeg vierafek.  
\s1 Kaven Akai ijefuon ik fu reno ijin  
\p Ik anej iji na jana oinva ijia vuak ijekin kafo naba kuardiain ijefuon maiji na vek jana besum oij.  
\v 5 Regavo iviakma na una e iji fu na kiema na ruainva ijefuon vakrej revo jaba na kie, A izia vakreno kiev?  
\v 6 Regavo iviakma na koiknu kuardiavo iji jaka oifiadiam.  
\v 7 Regavo na ma kuardiav, Na joifuon na magoi vakrej revo naba vakva Godon Kaven Akai iji fu ja ifejdiakfuon iji fuba ruak. Regavo na vakva nar Kaven Akai iji kuaga fu jon ruak.   
\p
\v 8 Regavo Kaven Akai iji fu ruakma fu e moikigia oinva iji nijaidiaga bu unam ise iji bu reoijo iji koikbuon giak. Regavo madu fur nijaidiaga bu una unam ma ijia ja vak. Regavo fur tavan iji God fu una ise nuvuon kege mazim guokafa roko iji kuardiaga bu vierafek.  
\v 9-10 Bu moikigia ise reoijo ijefuon buba na ma vierafeknum vo unam ma iji gak. Ijefuon maiji nan una Asoinun ijefuon vado jaba una na giek.  
\v 11 Regavo madu Kaven Akai fu ruakma fu e fok moikigia ise reoijo ijiebuon ise iji ke mazim giame samakaf nijaidiaga bu vierafek. Ijefuon maiji e moikigi samuamo iji God fun amur ise fuon giain.   
\p
\v 12 Na vuak uruvana kuardiakafie vierafen gavo fuka uruvanado ja izeg vuak nun fok faime mukoi vierafeokva bakin.  
\v 13 Regavo Kaven Akai fu ruakma fur ja aferdiame una Godon unam ma ijiga vuak ma ijesugin nijaidiaga ja ijia ja vak. Regavo Kaven iji fuba daro fuon ijia vuak fuon fu vierafenma iji abe ja kuardiak gavo vuak fok fu Godon faimo ijesugin abe ja kuardiaknum vo irerag fu rad rekreno iji fur kuardiaga ja faime vierafek.  
\v 14-15 Kaven Akai iji fu vuak nun fok nar kuardavo fu iji abe ja kuardiaga e fok bu nun sanainma iji abe aroiknum oimareok. Ire fok Asoinun fu samuagdiaknum fu reoinon iji bu nun ijefuon Kaven Akai fu ruakma fu vuak nun fok kafo madu kuardiakno kiain.   
\s1 Oimarvo ga oifian abejo ijin  
\p
\v 16 Jesu fu ijeg kuardiame uri kia, Tavan ukakbe barga rad jaba na giek revo tavan ukakbe barga son ijar ja una na giekno kiain.  
\v 17 Fu ijeg kuardiamga e roin vuak fuon faivo iji bu uri una bui kuai, Vuak iji kafu irerafuon ijeg kuarduom? Fu kuo, Tavan ukakbe barga rad noba fu gak rega madu tavan ukakbe barga noson una fu gak. Regavo fu madu kuo fun una Asoifuon ijefuon vakno kuin.  
\v 18 E iji vuak fuon faivo iji bu uri kua, Tavan ukakbe barko kuinma iji fu irerafuon ijeg kuarduin? No vuak iji fu kuaimon iji noka ba mukoi fainvano kuain.   
\p
\v 19 Regavo Jesu fun vek ijia giame vierafega bu vuak ijefuon una duna kuakuai vierafejga fu uri kia, Na kia ja tavan ukakbe jaba na giek rega tavan ukakbe barekma ja una na giekno kiainva ijefuon ja iji dab una joi siguv.  
\v 20 Na ma kuardiav ja niraiknum oifian abek gavo e iji moikigia ise reoijo iji bu iviakma bu oimarek gavo jaiji jaka oifiadiak. Regavo tavan rad oifian iji ja abejo ijia ja una oimarek.  
\v 21 Regavo na vuak be bijame kuardiakrejo ni faif. Bara be fu am iviamkor iji nafekreno iji fuka oifian aben ijefuon maiji fuka vajai fian bomana abek revo am iji fun nafekma fu vajai fian fuon fuba una uruvana vierafek. Regavo fuka una uruvana oimarek ijefuon maiji amfuon iji fun nafe moikigia unain.  
\v 22 Bara iji fu renma ijeg iviakma ja ijeg rekvej. Ja iviakma oifian abej gavo rad na una ja biediakva jaka oimarek revo madu rad jon oimarevo iji fuka tavan bog jana navak.   
\p
\v 23 Tavan iji na kuardiavo iji ruakma ja una na ire kafofuon kiekva bakin. Regavo vuak igi na iviakma kuardiakrejo iji ni mukoi faime vierafeof. Rad ja koikjo irerag ja vierafenva iji Asoinun iji if nun ijia kuakva fu vajiak.  
\v 24 Regavo usuibe jaba ire kafofuon Asoinun iji if nun ijia kuain. Regavo iviakma ni if nun ijia kuaf. Ja kuakva fu ifejdiaga ja tavan bog oimarknum karivak.   
\s1 Jesu fu e vuak fuon faivo iji visu kuardiainma ijin  
\p
\v 25 Regavo vuak fok na kuardiainva iji na bijiame kuardiaoin. Regavo tavan abekma naba una vuak kafo bijiame kuardiak. Regavo naka ir nun ijia Asoinun ijefuon vuak iji abe samakaf visume ja kuardiak.  
\v 26-28 Regavo tavan iji na kuardiainva iji ruakma ja koikjo if nun ijia God kuardak gavo naiji naba una joifuon fu kuardak. Ijefuon maiji Asoinun iji fun mukorigia ja oijmiamo ijefuon ja kuakva fu ifejdiak. Fu ja oijmiamo ijefuon maiji ja na oijmieme ma vierafero naiji na Godon Farif ga fur kiema na ari ruain. Regavo iviakma nan moikigi areme una Asoinun ijefuon vak.   
\p
\v 29 Areme e vuak fuon faivo iji bu uri Jesu kua, No gaga a vuak iviakma a kuarduomo iji aba bijiame kuarduom rega vuak fok aka ma samakaf visu kuarduom. Ijefuon fu erar una a duna kafokafo kuakma bakin.  
\v 30 Iviakma no gaga aka ire fok vierafen vo emabuon vierafe iji an amur giame vierafeno. Ijefuon no ma vierafe a ma Godon ruain.   
\p
\v 31 Bu ijeg kuardavga Jesu fu kia, Iviakma jaba ma vierafej?  
\v 32 Tavan iji fu roko iji fun iviakma ruain ijefuon ja subinai ar jon ijia tata vaga na ja ijia unieko vak. Regavo naiji na nunkua bakin na vek Asoinun ijek oij.  
\v 33 Na vuak igi na kuardiavo ijefuon maiji ja tavan bog nana karivakva ja afuime ok. Regavo e moikigia ire ise reoijo ijieb jon ire ise kafokafo rega jaka vajai fian abek. Regavo ni vierafe moik igefuon ise iji nar asin ijefuon jab zazaik revo nika giriesaf.   
\c 17  
\s1 Jesu fu e vuak fuon faivo ijiebuon sirimamenma ijin  
\p
\v 1 Jesu fu vuak iji kuardia barme fu uri gafeg kaf gufia nisaiknum kua, Asoinun tavan iji na guame vo una urikfuon iji fun ruain. Ijefuon ni on sanainma iji abe miega e bu izeg na guame una urikrejo iji gieme una if on dab aroik.  
\v 2 Ar na abe daro mienma ijefuon na moikigia e fok samuagdiav. Regavo e iji a kege na vajienma iji nar aferdiame una unam ma karivakfuon iji abe miak.  
\v 3 Regavo unam ma karivako iji fu ijeg. E bu una a vierafe a God ma besum ijia fino iji ga na Jesu Kurais iji ar kiema na ruainva bu ijeg ma vierafekva bu unam ma karivako iji abek.  
\v 4 Na on sanainma iji nan abe e moikigia karinva iji nijaidia ga madu ik on fok a kiema na ruainva iji nan re baren.  
\v 5 Asoinu ni iviakma nifak on ijia sanainma on iji abe miemne. Regavo sanainma on iji usuibe a moikigi aba amarenma ijia na osik besum fikna a mienma ijin abe una miemne.   
\p
\v 6-7 Na vuak oisina nan e moikigia ise reoijo ijiebuon kafar ijia e iji a karema bu oi karoime una e a ma vierafenva iji kuardiain. E iji bu eon ga ar bu kege una na vajien. Bu vuak on bu mukoi faime igavo ijefuon iviakma bu ma vierafero ire fok na reoijo iji fu on rokoro bu ijeg vierafej.  
\v 8 Regavo na vuak on a kuardienma iji nan abe bu kuardiavga bu vuak on mukoi fain ga bu ma vierafega naiji na ma ar kiema na moik igia ari ruain.   
\p
\v 9 Ijefuon ivia na buifuon sirimamej. Na e fok moikigia ise reoijo ijiebuon sirimamejo bagavo na e iji a kege na vajienma ijiebuon sirimamej.  
\v 10 Ijefuon maiji enun iji bu eon ga eon iji bu e nun. Regavo e nun fok na aferdiainva iji bu if nun abe bomana rej.  
\v 11 Regavo ivia nan moikigi areme una on vuak revo e vuak nun faivo iji bu moikigia karik. O Asoinun E Akai ni if on a abe na mienma ijefuon daro ijia bu samuagdiaga na osik no besum karinva ijeg bu agan rene besum karivak.  
\v 12 Na igia buna oinva iji na if on a abe mienma ijefuon daro ijia bu samuagdiain. Ijefuon e besum (1) fuba a nuigafame vain regavo fun e besum ijar fuon vierafenma ijia fu a nuigafame vainma ijefuon maiji fu buk on akaij ijia bu isoinva iji riarekafa fu iji a nuigafame vain.  
\v 13 Regavo iviakma nan una on vuak gavo na vek igi na buna moikigia oijo ijia na vuak fok kuardiaikin oimarvo nun iji fuba barek gavo fuka tavan bog oibuon ijia name rarek.  
\v 14 Na vuak on abe bu miavga bu abe e fok kuardiaknum mimatame kege nijaidiain gavo e moikigia karinva ijieb bu ziegafiame vuak buon buba mukoi fain. Ijefuon maiji na e vuak nun faivo ijiena no e moik igeko bakin.   
\p
\v 15 Ijefuon na sirimamene a kuaga a bu aferdiame moikigi areme vakma bakin gavo nam a kua, Ni bu mukoi samuagdiaga e moikigia ise reoijo iji buba biesiame aferdia una unam ise ijia vak.  
\v 16 Regavo na e moik igeko bakin ijeg buk bu e moik igeko bakin.  
\v 17 Regavo vuak on iji fu ma ijesugin ijefuon ni unam ma iji nijaidiaga bu tavan bog ana akai rene karivakfuon.  
\v 18 A na abe moikigia unienma ijeg na bu kege moikigia uniav.  
\v 19 Regavo na buifuon na vajai nun abe isuf baroine oifuon ikredo buk bu e akai rene oifuon ikrek.   
\p
\v 20 Regavo na buonkua buifuon sirimamejo bakin gavo na e iji bu vuak buon mukoi faime una na ma vierafejo ijiebuon sirimamej.  
\v 21 Na sirimamega bu agan besum igegrene kariok. O Asoinun na osik no besum karinva ijeg ni bu aferdiaga bu nona agan besum rek. A bu aferdia agan besum rekma e moikigia karinva iji bu ma vierafero naiji na ma ar kiema na moikigia ruainvaro bu ijeg vierafek.  
\v 22 Na sanainma on iji a abe na mienma iji nan abe bu miain. Na sanainma iji abe miaga bu izeg na osik no besum karinva ijeg bu besum karik.  
\v 23 Na iji na buna tavan bog oin ga aiji a tavan bog nosik oin. Ijefuon no tavan bog no besum okva e fok moikigia ise reoijo iji bu una ma vierafero na ma ar kiema na moikigia ruainvaro bu ijeg vierafek. Regavo bu madu vierafero a na oijmiemo ijeg a bu oijmiamro bu ijeg vierafek.   
\p
\v 24 O Asoinun ar e iji kege na vajien ijefuon na vierafe bu nana ar na fikfuon ijia vak revo bu ijia nun sanainma a abe na mienma bu iji gak. Ijefuon maiji a ik anej a moikigi ba amarenma ijia an na oijmien ijefuon a on sanainma ijin abe mien.  
\v 25 Asoinun ma ijesugin kegoino e iji moikigia karioijo iji bu a buba mukoi vierafen gavo na a nan mukoi vierafen. Regavo madu e vuak nun faivo iji buk bu ma vierafega ar na kiema na moikigia ruain.  
\v 26 Na vuak on nan abe bu kuardiava bu fain gavo na vek vuak on abe kuaimok. Na vuak on abe kuaimoga on oijmiemo iji a abe na mienma iji fu tavan bog buna nak ga na tavan bog buna ok.   
\c 18  
\s1 Bu Jesu kunaime toinva ijin  
\r (Metiu 26:47-56; Mak 14:43-50; Ruk 22:47-53)  
\p
\v 1 Jesu fu ijeg sirimame barme fun uri e vuak fuon faivo ijin aferdiame do Kidron isof iji garainak ijia vain. Regavo ar iji bu vainva iji bu in ga sinar ni kafokafo bu oinva ijia Jesu fu e vuak fuon faivo ijiena ijia vain.  
\v 2 Regavo Judas e iji fu Jesu abe una e ani iji miakfuon iji fu ar iji bu vainva iji fun vierafen. Ijefuon maiji Jesu fu tavan uruvana e vuak fuon faivo ijiena va juar ijia kari vuak kuaimoinevo una rokdo fun vierafen.  
\v 3 Ijefuon e mamkanuk Godon isuf baroijo ijiga e Ferisis ijieb e juo karijo ijiga e bijaivo iji kafo kege Judas uniafdava fu aferdia ijia vain. E uruvana fu aferdiainma iji bun juaf magu abeko ikuosaij saname bun Jesu nisaime ar ijia vain.  
\v 4 Regavo Jesu fu unam fok bu izeg fuon rekvejo iji fun giame vierafen. Ijefuon e iji bun fu nisaime vakga fu biom bu roko ijia vaknum kia, E gari jua magu abe roko garie ja era nisaime rokno kiain?   
\p
\v 5 Fu ijeg kiamga bu una roin kua, No e Jesu ai Nasaretko iji nisaim rokno kuain. Bu ijeg kuardavga fu kia, E iji ja nisaim roko iji na igijano kiain. Regavo Judas e iji fu Jesu abe una e ani iji miainma iji fu e ijiena ruainma fu ijia manin.  
\v 6 Areme Jesu fu uri kia, Na e iji ja nisaimoijo iji na igano kiamga ir vuat fuon ijar e fok vajiama buka una nuink dijen.  
\v 7 Areme Jesu fu madu kia, E garie ja era nisaim rokno kiain? Fu ijeg kiamga bu kua, No Jesu e Nasaretko iji nisaimoijno kuain.  
\v 8 Regavo Jesu fu una kia, Na ik ja rokga na ijia kia na e iji na igijano kiain gavo jaka ba fain. Jan ma na nisaidieoijga ni e nun guri roin kiaga bu vafno kiain.  
\v 9 Regavo vuak iji fu ijeg kuardiainma ijefuon ma iji fu vierafe vuak gafi fu amur Asoifuon sirimame kua, Asoinun na e iji a kege na vajienma iji naba nuigafiakno kuainma iji fuka riarekafa fu ijefuon ijeg kuardiain.   
\p
\v 10 Regavo Saimon Fita fu kaki be ka uikin jaoijmana iji dab kunaim manido fu uri ijia dab e be e bomana Godon isuf baroino ijefuon ikreno iji ada maink fuon iji kana daturain. Regavo e ijefuon if iji Markas.  
\v 11 Areme Jesu fu una Fita kua, Ire iji a reno iji fuba marenmano kaki on iji abe una suaf fuon ijia abese. A vierafero Asoi nun iji fu vajai fian igi na abene vajai fian abekfuon iji fu vierafenma iji fuba nun rekro a ijeg vierafenmano kuain.   
\s1 Jesu bu afem Anason vainva ijin  
\p
\v 12 Areme e iji bijaivo ijigam e bomana buon bu samuagdiamo ijigam e Jius roin iji bun Jesu kunaim tome afem e Anason ar ijia vain.  
\v 13 Regavo e Anas fu e Kaiafason ajuam revo madu Kaiafas fu juaivasia iji fuiji fu e Godon isuf baroino e bomana be.  
\v 14 Regavo madu e Kaiafasri ur ijia e Jius iji kia, Fu e besum ijar e fok nuvuifuon guakma fuka markno kiain.   
\s1 Fita bu Jesuon kuava fuka fenma ijin  
\r (Metiu 26:69-70; Mak 14:66-68; Ruk 22:55-57)  
\p
\v 15 Bun Jesu afeme Anas e bomana Godon isuf baroino ijefuon ar ijia aru vakga Saimon Fita ko e Jesuon vuak faimo iji fu jame ijia vain. Regavo e Anas fu e Jesuon vuak faimo be iji fun vierafen ijefuon e iji fuka arume gami bu vuak kuaivo ijia vain.  
\v 16 Regavo Fita fuba guf ijia aru vain gavo fu va vien bu aruvo ijia manin. Ijefuon e Jesuon vuak faimo be iji fu aru vainma ijar una kekome ro bara vien samua manino iji kuame Fita afem una guf ijia vain.  
\v 17 Bu aru vakga bara vien iji manino iji fu uri Fita game kua, Eko na vierafe ak a e gumi bu tom afem aru vainva ijefuon e vuak faimo be. Bara iji fu ijeg kuardamga Fita fuka juin ijefuon fu una roin kua, Naka ma bakin.  
\v 18 Buka iduadiainva ijefuon e iji bu e bomana Godon isuf baroijo ijiebuon ikrejo iji abevo e Godon ar bomana iji juo karijo iji bun mian jame ijia iruame iren. Ijefuon Fita fun va ijia e ijiena mian irua manin.   
\s1 E bomana Godon isuf baroino ijar Jesu duna kuardainma ijin  
\r (Metiu 26:59-66; Mak 14:55-64; Ruk 22:66-71)  
\p
\v 19 E Bomana Godon isuf baroino iji fun uri Jesu vuak fuon fu e nijaidiaoino ijiga e vuak fuon faivo iji fu aferdiame oino ijefuon duna kafokafo kuardain.  
\v 20 Fu ijeg kuardamga Jesu fu una roin kua, Na tavan uruvana naka e fok ijiebuon nifak ijia vuak nun na ijia kuardiaoin. Na ar ukakna jon iji ja ijia aru afuim vuak kuaivo ijigam madu Godon ar bomana iji e Jius abevo e Jius bakin iji bu tavan bog ijia afuim sirimamejo na ijia arume vuak nijaidiaknum kuardiaoin. Regavo na vuak kafo naba isuar sauim kuardiaoin.  
\v 21 Ijefuon a duna kafokafo iji a irerafuon na kuardiem? A duna ijeg kuardiekafa vierafekma ni e guraiji bu vuak irerag na kuaimoijo bu fainva ijin kiaga bur a kuardav.   
\p
\v 22 Jesu fu ijeg e bomana iji kuardamga e Godon ar bomana iji juo karijo be fu samaij ijia manido fu uri Jesu uikinik ijia kanaknum kua, E igi a erar kuaga a vuak ijeg una e bomana gari kuardamno kuain.  
\v 23 Fu ijeg kuardamga Jesu fu una kua. Regavo a vierafega a ijia mani faiko na vuak ise irerag iji e bomana gari kuardaiga ni e fok vuak irerag na kuainva iji kuardiamne. Regavo a vierafega vuak irerag nar kuainva iji na ma ijefuon kuaivga a irerafuon na kanienmano kuain.  
\v 24 Areme Anas fun kiamga bu Jesu afem una Kaiafas fino ijia vain. Regavo Jesuon ij iji bu kege nuink kiriainva iji buba iradain gavo bu ijekma afem vain.   
\s1 Fita bu Jesuon kuava fuka una madu fenma ijin  
\r (Metiu 26:71-75; Mak 14:69-72; Ruk 22:58-62)  
\p
\v 25 Regavo Fita fu vek e roina mian iruame manin ijefuon e iji funa irenva ijieb uri kua, E gure aiji no vierafega a e gufefuon vuak faimon beno kuain? Bu ijeg kuavga Fita fuka oi bijukurain ijefuon fu migegare uri kia, Naka ma bakin.  
\v 26 Regavo e be e bomana Godon isuf baroino ijefuon ikreno iji fu ijia manin. Regavo e iji fu e gami Fita fu naki gamia kaki dab ada kana daturava ijefuon agan be. Ijefuon e ijar uri Fita game kua, Na vierafe ak uikinik on iji na naki gamia Jesuk gainvano kuain.  
\v 27 Fu ijeg kuardamga Fita fu madu una kua, Na e iji ja kuaivo iji naka bagainvano kiako kukoro fu migegare ijia kumen.   
\s1 Jesu bu afem Fairet fino ijia vainva ijin  
\r (Metiu 27:1-2, 11-14; Mak 15:1-5; Ruk 23:1-5)  
\p
\v 28 Areme bu suok tavan ik gamia abaisako Jesuon e ani iji bun Kaiafason ar ijia Jesu afem una usem Fairet e Romkobuon e bomana ijefuon ar ijia vain. E Jius roin bu Jesu afem vainva iji buba ar guf gami e uruvana bu kot rejo ijia aru vain revo bum makaf ijia karin. Bu karinva ijefuon maiji bu ise iji amarigia agoinkin bu iro Fasova buon iji ikuai ijefuon buba aru vain.  
\v 29 Ijefuon Fairet fu keko kia, E gufi ja afem nun ruainva iji fu irerag renma ijefuon ja iji afem ruainvano kiain.  
\v 30 Fu ijeg kuardiamga bu uri kume, No fu noba masok afem ruakva bagavo fu koikfuon isema renma ijefuon no iji afem on ruainvano kumen.  
\v 31 Bu ijeg kumejga Fairet fu kia, Na fu abe izegrekfuon iji naba gainvano ni koikjo afem abe akai jon iji ja abedenva ijia vierafene refno kiain. Fu ijeg kuardiamga bu una kume, Noim nor e kege kaniaga bu aoikva iji fuka akaino kumen.  
\v 32 Regavo iji bu Jesu dab ijegrenva iji fun izeg Jesu fu vek ijia unam izekin ijia e iji bu fu dab arafiriaga fu vajai fian abe guakfuon fu kuainma ijekma riarekafa bu ijeg ren.   
\p
\v 33 Areme Fairet fun una ar guf ijia arume Jesu kua, Aiji a vierafe a e Jiusbuon Kin ijino kuain?  
\v 34 Fu ijeg kuardamga Jesu fu una roin kua, A duna iji a kuardiemo iji am ar vierafene kuardiem ki bu eb nuifuon kuardava a fainma ijefuon a duna ijeg kuardiemno kuain?  
\v 35 Fu ijeg kuardamga Fairet fu uri kua, Regavo a vierafega naiji e Jius? Bu eon ijiga Jius e mamkanuk ijieb a aferda nun ruain. Ijefuon a irerag iji ren?  
\v 36 Fu ijeg kuardamga Jesu fu uri kua, Na e mamkanuk moik igeko bu e fok moikigia oijo iji bu samuagdiavo ijeg na bakin. Regavo na moik igefuon e bomanabatie ivia e vuak nun faivo iji bu na mafardieme una e igi ja na aferdie abe e Jius miakrejo ijiena bijaikfuon. Regavo ar nun fu moikigia bano kuain.  
\v 37 Jesu fu ijeg kuardamga Fairet fu una kua, A ijedo na vierafe a E Bomana be? Fu ijeg kuardamga Jesu fu una roin kua, A kie a e bomana beno kiem? Regavo moikigia bu nafedieva na ari ruainva iji na vuak ma iji abe e moikigi oinva iji kuardiakva bu ijefuon nafedien. Erar fu vuak nun iji mukoi faikma fu enun rek.  
\v 38 Fu ijeg kuardamga Fairet fu una madu kua, Regavo vuak ma iji irerag? Areme Fairet fun una madu kekome e Jius makaf ijia karinva iji kia, E gufi ja afem nun ruainva iji ise fuon naba gaivado naba abe arafirik.  
\v 39 Regavo usuibe unam jon iji ja e bu dibur ijia kariga ja kege ijegrejo iji ja tavan Fasova iji roko ja ijia kiega nar e iji kafo karauniav. Ijefuon ja vierafega fu mardo na e Jiusbuon Kin iji keunaga fu vakno kiain.  
\v 40 Fu ijeg kuardiamga e fok buka una roin biumavknum kume, No Jesu no iseduom revo no vierafe a e Barabas keuna fu vakno kumen. (Revo e Barabas fu e niekin be fu dibur ijia fino ijin).   
\c 19  
\s1 E iji bu Jesu dab kuros kanakuai kumenva ijin  
\p
\v 1 Ijefuon Fairet fun e bijaivo iji kiamga bun Jesu afem makaf ijia useme dab fijain.  
\v 2 Bun fijame e bijaivo ijieb kiej kanaufu atevme abe Jesuon nigen ijia abesdain. Areme bun madu uri ugon kavuan ka mukor abe iruafdain.  
\v 3 Bu usem varaimeknum biesuame kua, No vierafe e igi fu e Jiusbuon e bomana fu tavan bog ijia fivako kuaime uikinik ijia kanain.   
\p
\v 4 Bu dab ijegreko Fairet fu una madu keko ro e makaf gufi karinva iji kia, Ni gaf na e gumefuon ise be naba gain ijefuon na afem roga ja koikjo gak.  
\v 5 Jesu fu kiej iji bu ateve abesdainva ijigam ugon kavuan igekin iji bu abe iruadainva ijekma fu keko ruain. Areme Fairet fu uri kia, E iji na kiavo iji igijano ni gafno kiain.  
\v 6 Fu ijeg kuardiamga e mamkanuk Godon isuf baroijo ijigam e Godon ar juo karijo iji bun Jesu fu keko rokga bu game buka biumame kume, Abe kuros kana abe kuros kanafno kumen. Bu ijeg kumejga Fairet fu uri kia, Ni koikjo abe kuros kanaf. Na ise fuon kafo naba giaido naba abe arafirik.  
\v 7 Fairet fu ijeg kuardiamga e Jius fok buka uri kume, No akai nuvuon ijia e ijekin iji no kania bu aoivno kuain ijefuon no vierafe fuka guak. Ijefuon maiji fu koikfuon kuai, Naiji Godon Farifno kuain.   
\p
\v 8 Areme Fairet fu vuak iji faima fuka uruvana igia juin.  
\v 9 Ijefuon fu una ar ijia aru kekome Jesu kua, Regavo aiji a izia ruainmano kuain? Fu ijeg kuardamga Jesu fuba una roin kuardain.  
\v 10 Areme Fairet fu una madu kua, A na aba kuardiekma ni vierafe naiji daro bomana abedo na kiaga bu keunak vo baga na kia bu abe kuros kanak.  
\v 11 Fairet fu ijeg kuardamga Jesu fu una roin kua, A kie na daro bomana abenvano kiem revo a onkuabatie daro ijekin iji a izeg abekma bakin. Regavo fun Asoinun gufar daro ijin mainma ijefuon a daro ijin aben. Ijefuon e iji fu kiama bu na abe una igia on ruainva iji fuka ise ma bomana iji renmano kuain.  
\v 12 Fu ijeg kuamga Fairet fu vuak ijin faima fuka ba aresren ijefuon fu una unam be fu izegrene Jesu keunaga fu vakfuon iji nisain. Regavo e Jius iji buka una uri kuriaikuriaiki kume, A e guraiji keuna fu vakma aiji a gaman Sisaon kai bakin. E be erar fu kuai, Na e Kin beno kuaikma e iji fu Sisaon e anino kumen.   
\p
\v 13 Regavo Fairet fu vuak iji bu kuardavo iji faime uri Jesu afem keko makaf ijia ar iji e bu kot faivo ijia ruain. Fairet fun kekome fata iji e mamkanuk bu karine kot faivo ijia arifin. (Regavo ar iji fu fata ijia arifinma iji e Ibrukobuon isama ijia bu kua Gabatano kuavo).  
\v 14 Tavan iji iro ikrejo iji fu niar igeg ga ivia tavan fun uokaf abekreno ijia Fairet fu uri e Jius iji kia, E igi manino iji fu e Kin jon no kiain.  
\v 15 Fu ijeg kuardiamga e fok buka uruvana igia una madu kume, Kana kana abe kuros kana fuka guamno kumen. Ijefuon Fairet fu una kia, Ja vierafega fube maredo na joifuon e Kin jon iji dab kuros kanakno kiain. Fu ijeg kuardiamga e mamkanuk Godon isuf baroijo iji bu una kume, No e Kin iji fu no samuagduomo iji fun Sisa fuonkua.  
\v 16 Bu ijeg kumeja Fairet fun Jesu abe e azikeoijo iji miamga bu abe kuros kanakuai vain.   
\s1 Jesu bun dab kuros kanainva ijin  
\r (Metiu 27:32-44; Mak 15:21-32; Ruk 23:26-43)  
\p
\v 17 Areme Jesu fun kekome kuros fuon abe dabeme uruor iji fu E Nigen An Igekino kuavo ijia vain. (Regavo uruor iji bu vainva iji e Ibrukobuon isama iji bu Gorogotano kuavo).  
\v 18 Bun afem vake uruor ijia usem dab kuros kanain. Rene bu madu e nokarok (2) kam Jesu bu kanainva iken ijia roinroin kaniain.  
\v 19 Regavo Fairet fun vuak be isoime abe Jesuon kuros buin ijia kanain. Regavo vuak iji bu ijeg isoi, E igi Jesu ai Nasaretko fu e Jiusbuon Kin ijino kuain.  
\v 20 Bu vuak isama nokbek (3) e Ibrukobuon ga Reten ga Grik ijiebuon isama ijia isoin. Regavo uruor iji bu Jesu abe kuros kanainva iji fu Jerusarem mai samaij ijia. Ijefuon e Jius uruvana bu ijia oijo iji bu vuak iji bu daoijo.  
\v 21 Fairet fu vuak ijeg isoimga e Jius ijiebuon e bomana Godon isuf baroino ijar una kua, Vuak gari a isoime kuai e Jiusbuon e Kin ijino kuainma iji aregavo kua, E igi fu kuai naiji e Jius ijiebuon Kin ijino kuainma ijeg isoin.  
\v 22 Fu ijeg kuardamga Fairet fu una kua, Irerag na kiavga bu isoinva iji fun mardo fu ijeg navakno kuain.   
\p
\v 23 E bijaivo iji bun Jesu abe kuros kaname bun uri ugon fuon fok bu ruinva ijin ke ata nokarok ga nokarok (4) name karme buon vajuinamin. Areme bun madu ugon be ni besum siguinva fu azan ijia abesmo ijin jafene aben.  
\v 24 Bun abe bui kuai, Ugon igi noba abe bujagavo no kas abe akozga erar abega no gakno kuain. Regavo ijeg bu kenva iji bu Godon vuak bu usuibe buk akaij ijia isoime kuainva ijekma aresrekro bu ijeg ren. Regavo vuak iji bu ijeg isoi,  
\q1 Bu ugon nun iji kam bukik vajuinamime uri ugon nun mukor iji abekuai kas abe akozekno kuain.   
\p
\v 25 Bu ijegrekoga kuros iji bu Jesu abe kanainva anej samaij ijia e Jesuon asiej Meri ga uviaifuon be e Kirofason barak Meri ga Meri Megdarin iji bu ijia iren.  
\v 26 Jesu fu una nese gia asiefuon ga e vuak fuon faivo be fu mukoi oijmiamo iji bu ijia iren. Ijefuon fu asiefuon iji kua, Bara gume e guraiji fu farifono ni mukoi samua.  
\v 27 Areme fu una dakaroim e vuak fuon faimo iji kua, Bara guraiji fu asieono ni mukoi samuamne kuain. Areme e Jesuon vuak faimo iji fu tavan ijia bara iji abe asiefuon kuame afem ar fuon ijia fikafa vain.   
\s1 Jesu guainma ijin  
\r (Metiu 27:45-56; Mak 15:33-41; Ruk 23:44-49)  
\p
\v 28 Areme Jesu fu vierafe ire fok fu moikigia rekro ruainma iji fun rene baren ga madu vuak iji bu buk akaij ijia isoime kuainva iji fuka riarekafa fu kume, Na do kafiem.  
\v 29 Regavo kuros manino anej ijia bu ire vuain ise be jiame ijia abeden. Ijefuon Jesu fu ijeg kumega bu uri atebu ijia abe do vuain ijia abesme abe in ijia bijame abe Jesuon ir ijia azirdain.  
\v 30 Jesu fu vuain iji sira ine areme kume, Fun barenmano kumene ijia kurij ajuareme guain.   
\s1 Jesuon ken bu juaf dab bijainva ijin  
\p
\v 31 Areme rad e Jius iji bu vierafe bu Fairet kuaga fu kiaga bu va e iji kuros kaniainva ijiebuon masian iji kaniatuase bu migegare aoiga bu jafe arikuai bu ijeg vierafen. Bu ijeg vierafenva ijefuon maiji tavan iji fu Fraide bu ire kanafuinkin niar iji fuka tavan Sabat (Satade) e Jius bu isuar karine God sirimamek. Ijefuon surif buon bu areke bu ijia kiriakva fuka ma iserek.  
\v 32 Ijefuon e bijaivo iji bun va gafia usem e nokarok (2) iji bu kege Jesuna kuros kaniainva ijiebuon masian iji kania tuasen.  
\v 33 Bu ijegreare una usem Jesu ga fun guainmaga buba masian fuon iji kania tuain.  
\v 34 Bu areko e bijaivo be fu uri juaf iji fu kunainma ijia dab Jesuon ken ijia bijako migegare kavuan ijiga do iji bu ijia arin.  
\v 35 Regavo e iji fu ire fok bu rejo fu ni fuon ijia giainma ijar vuak igi dab isoiga ja dame jak ma vierafekuai fu iji isoin. Regavo vuak irerag fu isoime kuainma iji fuk vierafega vuak iji fuka ma.  
\v 36 Regavo ire iji bu ijegrenva iji fu buk akaij ijia bu isoime kuai,  
\q1 An fuon be buba kana datok kuainva ijekma riarekafa fu ijin ren.   
\p
\v 37 Regavo madu buk kafar be ijia bu isoinva fu kuai,  
\q1 E iji bu ken ijia bijainva iji e uruvana bu gakno kuain.   
\s1 Jesu bu abe mako ruinva ijin  
\r (Metiu 27:51-61; Mak 15:42-47; Ruk 23:50-56)  
\p
\v 38 Bu ijegre barme rad Josof e Arimatiako ijar Jesuon surif jafe arikafa va Fairet kuain. Regavo Josof fu e be Jesu ma vierafeno. Regavo fu e Jius e mamkanuk iji jume fu isuar sauim ren. Regavo Fairet fun Josof kua ni Jesuon surif jafene kuamga fu jafene abe vain.  
\v 39 Regavo e Nikodimas e iji fu ur naki Jesu gak vainma ijar ire aros ga mer ire udi mukoi urino bu e aoiga bu azirdiaga surif buon iji buba muturevo iji kege Josofk vain. Regavo ire iji bu kege vainva iji afik buon bu teti kirogrem (30kg) ijeg.   
\p
\v 40 E Jiusbuon unam izeg bu e kege anume ke uniavo ijeg Josof ko Nikodimas bu ire udikin iji bu kege vainva iji ugon ijia azime Jesuon surif jafene abe ari anuin.  
\v 41 Regavo ar iji Jesu bu abe kuros kanainva iji ar iji bu in ga sinar oinva samaij ijia kanain. Regavo munua tit iviamkor be e ijia uniavo bakin iji fu ar iji bu in ga sinar oinva guf ijia.  
\v 42 Regavo tavan iji e Jius bu isuar karine God sirimamejo iji udam ijia ga madu munua tit iji fu samaij ijia ijefuon bu uri Jesuon surif iji abe munuag ijia unain.   
\c 20  
\s1 Jesu fu una urinma ijin  
\r (Metiu 28:1-8; Mak 16:1-8; Ruk 24:1-12)  
\p
\v 1 Areme Sade suok tavan ik abaisako ijia bara Meri Megdarin fun vake mako gafi bu Jesu abe uname mun abe bijukurainva ijia kekoin. Fu ijia kekome ga mun iji bu abe vien bijuinva iji bun dab biom ken garia abeden.  
\v 2 Fu iji game fun una kukum vake Saimon Fita ga e Jesuon vuak faimo be fu oijmamo iji bu karinva ijia kekoin. Fu kekome kia, E Bomana nuvuon ijefuon surif fuon gafi bu unainva iji no vaga fu bado kabu dab izeg abedenva noka ba gainvano kiain.   
\p
\v 3 Fu ijeg kuardiamga Saimon Fita ga e Jesuon vuak faimo be iji bun usem kukum mako gafi amarigia gakuai vain.  
\v 4 Bu kukubija vain gavo Fita fu saroiko e be ijar amur asim vake mako gafia kekoin.  
\v 5 Fu kekome ba gafi mako guf ijia aru vain revo fum makaf ijia manine amainko ugon iji bu Jesu anuinva iji giain.  
\v 6-7 Fu ijeg manine gamo ijia Saimon Fita fu rad jame vake ijia kekome ka asim mako guf gafia aruin. Fu ijia aru gak ugon iji bu Jesu anuinva ijesugin bu ijia naoiv. Regavo ugon be iji bu abe Jesuon nigen anuinva iji fuk ijia nam. Ugon iji bu Jesuon vajat iji anuinva iji fu fuibe nako ga be iji bu abe nigen anuinva iji fu ba irasen revo fum vek izeg ur bu anuinva fu ijeg ijia nam.  
\v 8 Areme e be iji fu amur kukum vainma iji fuk fun rad jame aru ugon iji bu naoivo giame fu ijia ma vierafero Jesu fun una urinmaro fu ijeg vierafen.  
\v 9 Fu ma vierafen gavo e Jesuon vuak faivo roin bu izeg Godon vuak iji bu usuibe buk akaij ijia bu isoime kuai fu guame madu una urikno kuainma iji bu vek ba ma vierafen.  
\v 10 Bu iji game bun usem una ar vain.   
\s1 Jesu fu Meri Megdarin bienma ijin  
\r (Metiu 28:9-10; Mak 16:9-11)  
\p
\v 11 Regavo Meri fu vek mako vien ijia manine niraim.  
\v 12 Fu ijia mani niraiba una mako ijia amainko gak anera nokarok (2) ugon abaikin sainva ijieb gafi mako guf iji Jesuon surif fu nainma ijia karij. Anera be fu Jesu fu nainma ijefuon diak ijia fiko be fu nigen ijia fin.  
\v 13 Bu ijia karijga Meri fu amainko giamga bu uri kua, Bara gafe a irerafuon ijia manine niraimno kuain. Bu ijeg kuavga fu kia, Na e Bomana nun ijefuon surif fuon igi bu dab izia abedenva naka ba vierafenva ijefuon na iji niraivno kiain.   
\p
\v 14 Meri fu ik ijeg una kaven dakin iji kuardiame una dakaroim ga Jesu fu iji Meri fu manino samaij ijia manina fu gain. Fu Jesu gain revo fuba amarigia vierafen.  
\v 15 Areme Jesu fu uri kua, Bara gure a irerafuon niraim. A era nisaime niraimno kuain? Fu ijeg kuamga Meri fu vierafero fu e juar samuamo ijar ro fu una kua, E-e a vierafega e surif igi ar abe va izer abedega ni nijaidiega na va abejo kuain.  
\v 16 Meri fu ijeg kuamga Jesu fu una kua, Merino kuain. Jesu ijeg kuamga Meri fu ijia faime una dakaroim e Ibrukobuon isama ijia kua, Raboni. (Revo vuak Raboni ijefuon maiji e nijaidiamon.)  
\v 17 Meri fu ijeg kuamga Jesu fu una kua, Naba una Asoinufuo vain revo na vek ijefuon ab na niriadiek. Regavo ni una va e vuak nun faivo gafi vuak nun igi abe kuardiamne. Va kia naiji nan una Asoinun ga Asoijon ga madu God nun ga God jon ijefuon vakno kia.  
\v 18 Fu ijeg kuamga Meri Megdarin fun una va gafia kekome e Jesuon vuak faivo iji E Bomana fu una uri fu bienma ijin kuardiame kia, Vuak igi fur koikfuon kuardienmano kiain.   
\s1 Jesu fu amur una e vuak fuon faivo ijin biediainma ijin  
\r (Metiu 28:16-20; Mak 16:14-18; Ruk 24:36-49)  
\p
\v 19 Areme Sade tavan besum ijefuon nakifuon ijia e Jesuon vuak faivo fok bun ar buon vien fok bijume bun isuarigia guf ijia karin. Ijefuon maiji bu e Jiusbuon e mamkanuk iji juinva ijefuon bu ijeg ren. Bu isuar karinva ijia Jesu fu migegare iji bu karinva uf ijia manine uri kia, Na vierafe afuime karijo iji fu janano kiain.  
\v 20 Fu ijeg kuardiame fun uri imut tat fuon iji bu kaniainva matan ijiga ken bu bijainva ijin kege nijaidiain. E Bomana fu vajai matan iji kege e vuak fuon faivo iji nijaidiamga bu game vierafero fu ma Jesuro buka oimaren.  
\v 21 Areme fu una madu kia, Afuime karijo iji fu jana. Na Asoinun fu kiema na ari ruainva ijefuon na ja kiavno ni usem ar iror igia vafno kiain.  
\v 22 Jesu fu ijeg kuardiame fun uri ivuat fuon vajiaknum kia, Kaven Akai igi na vajiavo ijin kef.  
\v 23 Ja e kafobuon ise iji giame arekva God fuk ise jon iji fu giame arek. Regavo ja ise buon iji jaba giame arekva God fuk ise jon iji fuba giame arekno kiain.   
\s1 Jesu fu una Tomas bienma ijin  
\p
\v 24 Tavan iji Jesu fu una e vuak fuon faivo iji fu biediainma ijia e Tomas if fuon be bu kua e fuatkaruk nafenva Didimasno kuavo iji fuba buna ijia fino ijia Jesu fu biediain.  
\v 25 Ijefuon fu vainma una rokga e Jesuon vuak faivo bu uri kua, Tomas no kariga Jesu fu igia ajie roka no gainvano kuain. Bu ijeg kuardavga Tomas fu uri una kia, Na koiknu imut nun igia kege imut tat fuon iji ikok bu kaniainva matan ijia unia ga madu na imut nun igia abe ken fuon iji bu bijainva matan ijia kunaikva nason ma vierafekno kiain.   
\p
\v 26 Areme vuik besum (1) barko e Jesuon vuak faivo fok bun una madu gire ijia besum afuim karin. Regavo tavan ijia Tomas fu buna besum ijia fin. Bu vien fok buka bijume karinva ijia Jesu fu migegare iji bu karinva uf ijia manine uri kia, Na vierafe afuime karijo iji fu janano kiain.  
\v 27 Fu ijeg kiame una dakaroim Tomas kua, Naiji nan ma una urin ijefuon uri imut on iji kege imut tat matan nun ijia uniame gia. Areme madu imut on iji akozme ken nun igi bu bijienva matan igia kuniem giamne. A matan ijia giame una ma vierafekgavo a nonamimo iji aremne kuain.  
\v 28 Fu ijeg kuamga Tomas fu uri kua, Na vierafega aiji aka ma E Bomana nun ga madu aka ma God nuno kuain.  
\v 29 Fu ijeg kuardamga Jesu fu una kua, A vierafe an ni on ijia gienma ijefuon a na ma vierafen? Regavo eraneb buba ni buon ijia gien gavo bum na ma vierafejo iji na bu ma rediakno kuain.  
\v 30 Jesu fu e vuak fuon faivo ijiebuon nifak ijia fu oknum ire sumakin ka mamkanuk uruvana kafo madu reoin revo ire iji roin buba buk igia isoin.  
\v 31 Regavo unam sumakin roin fu kegoinma igia bu isoinva iji bu e igi joifuon isoin. Jar dame giame ma vierafero Jesu fu ma Godon Farif ga Godri kuamga fu moikigia ari ruainmaro ja ijeg vierafekuai bu iji isoin. Regavo jon izeg ja fu ma vierafejo ijia ja tavan bog ma karivakno kiain.   
\c 21  
\s1 Jesu fu una e vuak fuon faivo roin do Gareri irif ijia biediainma ijin  
\p
\v 1 Ijegreare Jesu fu una madu tavan besum e vuak fuon faivo roin do Taibirias irif ijia biediain. Regavo fu izeg keko biediainma iji fu ijeg.  
\v 2 Fu Saimon e Fitano kuavo ijigam Tomas e iji bu kua Didimasno kuavo ijigam e Natanior ai Keinan Gareri guf ijekor ijigam e Zebedion afijaf nokarok (2) ijiga madu e vuak fuon faivo nokarok (2) ijiena bu besum ijia afuim karin.  
\v 3 Bu besum karinva ijia Saimon Fita fu uri kaifijaf roin kia, Na do daturaiko nafuinma gamia ugie abe kijum arafiriak vakno kiain. Fu ijeg kiamga kaifijaf iji bu uri kua, Nodua no vierafe no ana vakno kuain. Ijefuon bun ari vanag abe kijum nisaim vain. Bu naki bog arafirin gavo kijum besum be buka ba ken.   
\p
\v 4 Bu do ovake tavan ik gamia abaisamo ijia Jesu fu do irif gura ijia manina bu gain. E vuak fuon faivo bu fu gain revo buba vierafero fu Jesuro buba ijeg vierafen.  
\v 5 Regavo Jesu fu uri kia, E nivek gari ugie iji ja kijum arafiriaoinva iji jabe kafo karaivano kiain. Fu ijeg kuardiamga bu kua, No kijum besum be noka ba kenvano kuain.  
\v 6 Areme fu una kia, Jaka naki bomana arafirin gavo nin ugie jon iji dakarame una vanag gufa ij maink ijia oine kijum kafo karafno kiain. Fu ijeg kiamga bun ugie iji dakarame abe una vanag maink gufa ijia oin. Bu oine una dakara ga buka izeg dakarakva bakin. Ijefuon maiji kijum ijar ugie iji fuka irtoijen.   
\p
\v 7 Areme e Jesuon vuak faivo be Jesu fu oijmiamo iji fu unam sumakin iji game una Saimon Fita kua, Na vierafe e gari mani vuak kuarduomo iji fu E Bomana ijarno kuain. Regavo Fita fu ugon fuon be fu azan abesmo iji fu daru abedega rotit ijesugin abesoido fu ijeg kuamga fu uri ugon iji abe abesme furiko do ijia akozen.  
\v 8 Fu do ijia vaja vakoga e Jesuon vuak faivo roin bun vanag ugie iji kijum karainva ijekma dakarame irif garia vain. Ijefuon maiji bu samai do irif ijia oijo ijefuon bu migegare una irif ijia vain.  
\v 9 Bu ijia ari usem vaknum ga duok bred ijiga kijum ijieb mian naine mareg ijia naoiva bu giain.  
\v 10 Bu iji giame Jesu fu uri kia, Kijum ja karainva iji kafo ke ruafno kiain.   
\p
\v 11 Fu ijeg kiamga Fita fu una vanag ijia ajieme e Jesuon vuak faivo iji ifejdiame ugie iji bu kijum karainva ijin dakarame dab iror ijia abeden. Kijum ugie ijia karainva iji buka uruvana vuan adred fifti tiri (153) ga ka mamkanuk ijesugin revo ugie iji fuba bujain.  
\v 12 Areme Jesu fu uri kia, Igia ruaf no duok igi ijno kiain. Fu ijeg kiamga e vuak fuon faivo buba una kua a erarno kuain. Regavo bun vierafega fun E Bomana ijar ijefuon bu ijia aren.  
\v 13 Bu ijia areko Jesu fu uri bred iji dab tuaseme vajiaoine una madu kijum iji dab una ijeg buame vajiain.  
\v 14 Regavo Jesu fu guame una uri uikinik fuon fu abe una e vuak fuon faivo nijaidiainma iji fu amur tavan nokarok (2) biediamevo una igi be biediain.   
\s1 Jesu fu una Fita vuak kuardainma ijin  
\p
\v 15 Bun kari duok i barme Jesu fu uri Saimon Fita kua, Saimon e Jonon farif gure on a na oijmiemo iji fuba e guri roin bu na oijmievo iji asidiainmano kuain. Fu ijeg kuamga Saimon Fita fu una kua, E Bomana nun na a oijmavo iji an gieme vierafenmano kuain. Fu ijeg kuamga Jesu fu una kua, Saimon Fita maf-sif nun ijesugin amarigia samuagdiamne kuain.  
\v 16 Areme Jesu una madu kua, Saimon Fita e Jonon farif gure abeka na mukoi oijmiem ki a bano kuain? Fu ijeg kuamga Saimon Fita fu una kua, E Bomana nun na a oijmavo iji an gieme vierafenmano kuain. Areme Jesu fu una kua, Maf-sif nun ijesugin mukoi samuagdiamne kuain.   
\p
\v 17 Areme Jesu fu tavan radkmaiji una kua, Saimon Fita e Jonon farif gure abe na mukoi oijmien ki a bano kuain? Regavo Fita fuka uruvana oifiain ijefuon maiji Jesu fu tavan nokbek (3) kua abe na oijmienmano kuain. Fu ijeg kuamga Fita fu kua, E Bomana nun a ire fok an gia vierafen. Ijefuon izeg na a oijmavo iji an samakaf gieme vierafenmano kuain. Fu ijeg kuamga Jesu fu una kua, Maf-sif nun iji mukoi samuagdiamne.  
\v 18 Jesu fu ijeg kuardame vuak be ijeg bijame Saimon Fita kuardame kua, A vek e nivek iji aka kekome ar izia a vakro vierafeno a ijia vak. Regavo a vake eoreno iji a ij kozega bu e roinb sinuom sadame imutkedame aferda ar aba ijia okafa vierafema ijia vakno kuain.  
\v 19 Jesu vuak iji fu ijeg bija kuardiainma iji fu Saimon Fita fu izeg rad guaga Godon if bu abe aroime nidoikfuon fu iji kuardiain. Jesu fu ijeg kuardiame uri Saimon Fita kua, Ijefuon a unam iji na kegoinva ijia ak makai nun ijia jajieme kegoine kuain.   
\s1 Jesu ga e vuak fuon faimo be fu oijmamo ijin  
\p
\v 20 Areme Saimon Fita fu dakaroim ga e Jesuon vuak faimo be fu oijmamo iji fu rad ja roka fu gain. (Regavo e iji fu ur bu Jesuna naki radkma ijia duok iko fu tuame Jesuon navaime kua, E Bomana e iji erar a abe una e ani iji miakreno kuainma ijar.)  
\v 21 Saimon Fita fu e ijar jamga fu dakaroim Jesu kua, E Bomana revo e gami roko iji fuiji fu izegrekno kuain?  
\v 22 Fu ijeg kuamga Jesu fu una roin kua, Fuiji na ivia kuak a ni igia oke na una rokno kuaibatie na ijeg rek. Regavo a irerafuon iji abe bomana vierafen? Ijeg a vierafeno iji arega igi na kegoijo iji makai ijia jak ijeg mimatame kegoine kiain.  
\v 23 Fu ijeg kiama e Jesu ma vierafejo bu vuak iji e Jesuon vuak faimo besum iji fuba guakfuon fu kuainma iji fain. Regavo Jesu fuba kua e iji fuba guak gavo fu ijia fivakno kuain gavo fu kua, Na vierafe fu ijia nivek fike na una ruakbatie na ijegrek ga a irerafuon iji abe bomana vierafemno kuain.  
\v 24 E Jesuon vuak faimo iji fu kuainma e ijar vuak fok bu buk igia isoime kuainva iji fur ni fuon ijia giain. Regavo madu fu vuak iji abe e roin nijaidiaknum ga fur abe buk igia isoin. Ijefuon no vierafe vuak irerag fok fu igia isoinma iji fuka ma.   
\s1 Vuak radkma ijin  
\p
\v 25 Areme Jesu fu madu ire ka ma uruvana kafo madu ren. Regavo ire fok buka abe buk igia isoibatie no vierafe e ar iror fok bu izeg vuak iji abe isoim barekva bakin.