\id 2TI - Namiae NT [nvm] -Papua New Guinea 2004 (web 2014) 
\h 2 TIMOTI 
\toc1 2 Timoti 
\toc2 2 Timoti 
\toc3 2Ti 
\mt1 2 TIMOTI  
\imt1 2 Timotion Vuak Amur  
\ip Fas igi For fu mai Rom ijia dibur fiknum isoime una Timoti nijainma ijin. Fu Jesu Kuraison vuak iji abe kuardiaoga bu ijefuon dab dibur unain. Timoti fu For ifejdame busik besum ikreoij revo madu fu e iji God ma vierafejo mai Efisis karinva ijiebuon e bomana iji fur ren. Ijefuon For fu Timoti kua fu Kuraison vuak iji abe kuaimokma fuba jukno kuain. Regavo madu fu kua fuka Kuraison e bijaimo ma iji rene samuaknum vuak ma ijefuon vajai fian abeno kuain. Fu madu Timoti vuak nijaime kua fuka e ma rene vo ma vierafene Jesuon ik iji rekno kuain.  
\iot 2 Timotion vuak kafokafo fu isoinma ijin  
\io1 \ior 1:1-3\ior* Timoti fu ma vierafega For fu oimarenma ijin.  
\io1 \ior 1:4–2:13\ior* Timoti fuba uzagavo fuka giriesame ma vierafeknum ik fuon rekma iji fu marek.  
\io1 \ior 2:14-26\ior* Izeg Jesu Kuraison e ik mukoi reno rekfuon ijin.  
\io1 \ior 3:1-9\ior* Tavan radkma ijia e ijiebuon ise iji fuka ma bomana iserekfuon ijin.  
\io1 \ior 3:10–4:5\ior* For fu ik iji Timoti fu rekfuon iji kuardainma ijin.  
\io1 \ior 4:6-22\ior* For vuak fuon rad fu kuardiainma ijiga fu anadiainma ijin.  
\c 1  
\p
\v 1 Timoti farinun na e For Godon vierafenma ijia na afasor rene Jesu Kuraison vuak nijaidiaoijo nar fas igi isoin. Regavo vuak iji na kuardiavo iji no Jesu Kuraisna besum rene ma karivakfuon na iji kuardiavo nar fas igi isoim nijav.  
\v 2 Regavo Timoti farinun na a oijma vo God Asoi ga Jesu Kurais E Bomana nuvuon ijieb tavan bog on oifian abeknum vo ma redame mukorigia samuagdaga a afuime fiokfuon.   
\s1 For fu Timoti fu ma vierafeknum Godon ikrekfuon kuardainma ijin  
\p
\v 3 Na Godon oimarme saifnun bu renva ijeg na oinun ijekma fuifuon ikrej. Regavo na nakikmazak nun na sirimamejo na tavan uruvana a vierafe vo Godon oimarev.  
\v 4 Na a uname vakga a niraime nido on fu arinma iji nan vierafen ijefuon na tavan uruvana a gakro vierafen. Regavo na vua a gakva oinun fu oimarvo ijar irtoijek.  
\v 5 Na on a ma vierafeno iji nan vierafen. On a ma vierafeno iji fu sat on Rois ko asieon Iunesbuon oij ijia amur nainma ijar una oion ijia nam.  
\v 6 Ijefuon na iviakma una kuardaga a daro iji God fu tavan iji na imut nigen abedekoga fum efkin mainma iji abe ikrega fuka darokin rekfuon.  
\v 7 Na vuak iji na kuardavo ijefuon maiji God fuba Kaven fuon no jukfuon iji vajuin. Regavo fu Kaven darokin iji vajuo no giriesa ireme e fok oijmiaknum vo ijieb ifejduoga no nuvuon samuanamikfuon iji vajuin.   
\p
\v 8 Ijefuon ab E Bomana nuvuon ijefuon vuak iji fu e fok ifejdia karauniamo iji kuardiakafa juk revo na fuon ikrejo ijefuon na dibur fijo iji ab gieme juk. Regavo nika igi na vajai fian abejo ijeg ak Godon daro ijia vuak fuon ijefuon vajai fian abene.  
\v 9 Fur no karaunuome kumega no e akai rene karij. Regavo no ire ma be renva ijefuon fu no kumenma bakin revo fum fuon vierafenma ijia ga fuon ma iji fu no vajuomo ijia no kumen. Regavo fuon ma iji fu no vajuinma iji fu Jesuon duadok ijia amur ik anej ijia vajuin.  
\v 10 Regavo iviakma Jesu Kurais e iji fu no karaunuok ruainma ijar abe samafren. Regavo fu samafrene nijaiduinma iji fu aoivo ijefuon daro iji abe akozen rega Godon vuak ma iji nom sanainma ijia karivakfuon iji abe nijaiduin.   
\p
\v 11 Regavo God fu na imut bijieme daro miega na vuak fuon ma iji abe kuardiaknum nijaidiame e aferdiaga bu Godon e rej.  
\v 12 Regavo na vuak ijefuon na ire igi kafokafo vajai fian abej. Ijefuon maiji na Jesu Kurais e iji na ma vierafejo iji nan vierafen. Regavo na vierafe ik iji na Godon vuak ma iji abe kuaimoijo fu mienma iji fu imut tat fuon ijia ma name vake tavan rad fu una ruak.  
\v 13 Irerag na mimatame nijaidava a fainma iji kege kuniaime samuagdiamne. Regavo giriesame God ma vierafeknum e fok oijmiamne revo ire nokarok (2) iji no Jesu Kuraisna besum rejo ijia no karev.  
\v 14 God fu a ma vierafe a vuak ma iji fu vajainma iji kege Kaven Akai oinuvuon ijia karinva ijefuon daro ijia samuagdiak.   
\p
\v 15 Regavo an vierafe e fok God ma vierafejo igi Esia guf ijia karinva ijigam e Faijeras ko Emogenis iji na bun uzam vain.  
\v 16 Regavo na vierafe E Bomana iji fu e agan uruvana Onesiforason iji fu ma rediak ijefuon maiji fu e-e fur tavan bog na vajai fian abejo fu ifejdien. Regavo na bu tofdieme dibur unienva iji fuba gieme jum.  
\v 17 Regavo fu Rom kekome migegare vajai fiaigma na nisaidieme vuake na fijo ijia keko biedien.  
\v 18 Regavo fun E Bomana ijar tavan fuon fu vierafenma fu una ruakfuon ijia e iji fu fuon oifian abene ma redakfuon. Ijefuon maiji fu izeg ai Efisis ijia tavan izeg ifejdienma iji ar gain ijefuon an mukorigia vierafen.   
\c 2  
\s1 E Jesu Kuraison ikrejo ijin  
\p
\v 1 Regavo farinu ni Jesuon daro iji fu no vajuomo iji abe giriesame fuifuon ikrene.  
\v 2 Vuak iji na e uruvana bu gieko na nifak buon ijia kuardava a fainma iji abe e iji zazaivo bakin iji kuardiaga bur giriesa abe e roin nijaidiak.   
\p
\v 3 Regavo uri afikin igi no abejo iji fateroin abe e bijaivo bu bijaime vajai fian abejo ijeg Jesu Kuraison vuak iji abe e roin nijaidiaknum vajai fian abene.  
\v 4 Regavo e bijaimo fu ikreno iji fu e bomana fuon fu samuamo ijar oimaikafa fu mukorigia ikreno revo fuba ik kafo kege ijekma mazim rekfuon.  
\v 5 Ijegvo ni aikejo iji vierafe. E be fu bor kanamo iji fu akaij ijia jame mukorigia aikekma fu rad ire be abek. Regavo fuba mukorigia akaij iji jakma fuba ire be abek.  
\v 6 Regavo madu e iji fu giriesame juar fuon migegare meno e ijar amur juar fuon masik.  
\v 7 Vuak na bijiame kuardiainva iji vierafe ijefuon maiji E Bomana ijar fu ire fok na kuardiainva iji ifejdiaga ja vierafekfuon.   
\p
\v 8 Godon vuak ma iji na e fok kuardiavo iji e Jesu Kurais Devidon uifarif fu guame una urinma ijefuon vuak no vierafeknum ikref.  
\v 9 Na Godon vuak iji na nijaidiavo ijefuon vajai fian abejo iji nan roke buin igi e bu kege tofdiame dibur uniavo ijia ruain. Regavo Godon vuak iji buba abe tome abeden revo bu vek ar iror ijia nijainamiv.  
\v 10 Ijefuon na e iji God fu kenma ijiebuon fateroin ijia nar uruvana vajai fian abej. Na ijeg vajai fian abekin buk bu Jesu Kurais fu karauniaga bu nona unam ma karivako iji abekfuon.  
\v 11 Vuak igi fu ma,  
\q1 No do ruainva ijia no unam usuikor iji non kanava fu Jesuk guain ijefuon no una uri funa karik.   
\q1
\v 12 No vajai fian abejo ijia giriesame irekva tavan rad no ire uruvana samuagdiakfuon. Regavo noba fu abekva iji fuk no fuba kekfuon.   
\q1
\v 13 Regavo noiji no e nuigikin rene ba vuak fuon igav revo fuiji fu vek e nui bakin rek ijefuon maiji fu kufuimeno bakin.   
\s1 E Godon ikreno iji Godri abe nidoik  
\p
\v 14 Vuak iji na amur kuardainva iji tavan bog e iji a samuagdiamo iji kuardiamne. Regavo ni una Godon if ijia kuardia kia ir ijia musikuaivo iji fu ma bakin. Ijefuon maiji e iji bu vuak iji faivo iji vuak ijar bu ifejdiamo bakin revo fu bu kam arafiriam.  
\v 15 Regavo nika koikon giriesame Godon nifak ijia ikrega fu on a izeg mukor igia ikreno fu iji gakma fu oimaikfuon. Regavo fu vierafega ar vuak fuon ma iji abe mukorigia samuame nijaidiamo ijefuon a God ga e fok ijiebuon nifak ijia a jukma bakin.  
\v 16 Regavo vuak kufuij ga vuak ise ijia buba a aferdaga a God maiji unakome aibe vakfuon. Regavo e vuak kufui nijaidiavo vuak ijeg bu kuaivo iji ni mukorigia agordiamne.  
\v 17 Vuak bu nijaidiavo iji bu matan igi bu vajai surif iji bu muture arume vako ijekin. Ijefuon e iji bu vuak iji faivo buon bu ma vierafejo iji buka arafiriav. Regavo e nokarok (2) iji vuak kufui nijaidiavo iji Aimenas ko Firetas.  
\v 18 E ijieb vuak ma iji game vain. Regavo bur e kafobuon ma vierafejo iji kege arafiriame vuak kufuimene kia Jesu fun una ro e iji aoinva iji aferdiame vainmano kiain.  
\v 19 Regavo Godon tuar gigikin mun ijekin iji fu abe sainma iji fu vek mukorigia manin. Ijefuon maiji Godon e iji bu ma vierafejo iji bu tuar ijekin. Regavo God fu efuon ijiebuon tuar ijia fu ijeg isoime kuai E Bomana iji fu vierafe eraneb bu efuon renva iji fun vierafen. Regavo madu vuak be fu ijeg isoime kuai, E fok eraneb bu kuai no E Bomana ma vierafejo kuaivo iji buka unam ise kafo iji mukorigia agordiafno kuain.   
\p
\v 20 Regavo igia faif ar bomana guf ijia sinuom ijia naoivo iji bu ire gord ijiga sirva ijia amardiainva ijesugin ijia naoivo bakin. Revo bu madu ire kafo in ijia amardiainva ijiga moik ijia amardiainva ijieb ar guf ijia besum naoivo. Regavo ire roin bu ire gord ijiga sirva ijia amardiainva iji bu unam ma ga tavan ma ijia kege ire kafo rekuai nain. Regavo ire in ga moik ijia amardiainva iji bu kafut numukuai nain.  
\v 21 Regavo e be fu ise fuon iji koikfuon God kuardaga fu game arekma e iji fu ire saror iji bu kafut rieme abe use kozegavo una muinbaki abedevo ijeg ren. Unam besum ijeg bu fu abe una unam ma iji ire gord ga sirva bu ikrejo ijeg ikrekfuon. Ijefuon maiji fuiji fu maturai ga e bomana ijefuon nifak ijia fu e mukor ijefuon fu ire ma kafo fu rek.   
\p
\v 22 Regavo Timoti ni unam ise iji am mumogana bu rejo ijin agordiamne. Regavo giriesame maturaivo ijigam ma vierafejo ijigam oijmanamivo ijigam afuim karijo ijieb kege oion ijia name maturaime E Bomana iji kuaga fu ifejdak.  
\v 23 Regavo vuak isekma kufuime kuaivo iji agordiamne ijefuon maiji ijieb musikuaivo iji anerek.  
\v 24 Regavo e iji E Bomana ijefuon ikreno iji fuba e roina musikuaimo revo fuka e fok oijmiaknum adumaduigin vuak nijaidiakfuon.  
\v 25 Regavo e roin eraneb bu vuak fuon ba faikva fuka oi mafaime vuak kuardiakfuon. Regavo ma vierafe Godri oibuon kege karoiga bu una unam ma iji vierafekfuon.  
\v 26 Regavo buka Godon unam ma iji vierafekgavo Setanon unam iji fu vajai fian abekfuon ijar kiaga bu igame jaga fu kege dibur igeg uniainma iji areme usem vakfuon.   
\c 3  
\s1 Ire ise iji bu tavan radkma ijia rekfuon ijin  
\p
\v 1 Regavo igi vierafef. Tavan radkma iji Jesu fu una ruakma ijia ire ise ni kafokafo bu rek.  
\v 2 E uruvana buka uri vajai buon iji uruvana oijmiame uri mon bomana oijmiaknum koikbuon kam e mamkanuk rene aroikarak. Regavo vuak buon bu kuaivo iji buba e roin ifejdiaknum vo eofijaf igiak revo buka oifiaigma oknum oibuon ijia buka ire ma kafo vierafekva bakin.  
\v 3 Regavo buka e roin oijmia vo buon oifian abekva bakin. Regavo e kafobuon ise iji buba giame arek revo madu buka kufuimene e kafobuon vuak kuaik. Regavo buka tavan bog nigaraiknum karik ga buka fanuf taraiko igeg ura oknum unam ma kafo bu oijmiavo bakin.  
\v 4 Regavo fu kaifuon ijek vuak besum kuaim iganamik gavo rad fu una vuak ise fuisina kuaik. Regavo ka zabarene ire mijem keok vo ka aroikarame fuonkua vierafek. Regavo buka ire moikigia oimareoijo iji uruvana oijmiak revo bu Godon unam iji buka oijmiakva bakin.  
\v 5 Bum vajai buon iji kege va guriguri rek revo oibuon ma iji buba Godon daro iji abek. E ijegreoijo iji mukorigia giame agordiaf.  
\v 6 E ijieb e kafobuon ar ijia ajie bara iji ise buon ijieb kam anu kuniainva iji bu izeg arekfuon iji buba mukoi vierafeknum samuagdiak. Regavo e iji vuak kufuimeoijo ijieb una bu ifejdiame samuagdiaknum vuak iviamkor buon iji nijaidiak.  
\v 7 Bara iji bu tavan bog Godon vuak ma iji izeg fu e fok karauniamo iji gakuai nisain revo buba bien.  
\v 8 E Jenes ko Jebres bu Mosis nui mainva ijeg e iji vuak kufui nijaidiavo iji buk bu Godon ma iji buba biek. Ijefuon maiji oibuon buka isema vierafen revo bu Godon vuak ma iji ma vierafejo bakin.  
\v 9 Regavo buba ijegrene tavan jaoijmana vak. Ijefuon maiji e uruvana bu giamga bu e Jenes ko Jebres bu vierafenva ijeg isema vierafen.   
\s1 Timotion vuak radkma iji fu ijia giame jakfuon ijin  
\p
\v 10 Regavo Timoti aiji a e iji na amur kuardainva ijekin bakin. Revo vuak nun fok na nijaidiavo ijiga unam nun na fine roko iji an vierafen. Regavo madu an izeg na ma vierafejo ijiga na adumaduigin oijo ijiga e oijmanamivo iji an vierafen. Regavo madu an daro nun iji na tavan bog giriesame nuibakin ikreoko e bu vuak ise nuisina kuaime arafiriega na vajai fian abejo iji an gieme vierafen.  
\v 11 Ire iji bu ai Entiok ga Aikoniam ga Ristura ijia nun rokga na uruvana vajai fian abenva iji naba zazaivga Jesu fu ifejdieme keunien.  
\v 12 Ijegvo e uruvana eraneb bu Jesuon if ijia Godon unam ma iji abekva e bu buisina vuak ise kuaim arafiriaga bu vajai fian abek.  
\v 13 Regavo e iji ise reoijo iji bu ise ukaknak iji kam biom mamkanuk rejknum e kafo vuak kufuimene kuardiaknum vo koikbuon arafirinamiv.   
\p
\v 14 Regavo aiji nika Godon vuak ma iji bu nijaidiainva iji mukorigia giriesame vierafe. Ijefuon maiji a e iji bu nijaidiainva iji an koikon giame vierafen.  
\v 15 Regavo a vek am ukakbe ijia Godon vuak bu usuibe isoinva iji bun nijaidain. Vuak iji bu nijaidiainva ijieb e iji bu Jesu Kurais ma vierafejo iji fu ijeg karauniak.  
\v 16-17 Vuak fok bu buk akaij ijia isoinva iji Godri vajiama bu isoin. Ijefuon vuak ma ijesugin abe e roin nijaidiakfuon. Regavo e vuak kufuimeoijo ga ire ise reoijo iji kuriairega bu arek. Regavo e iji bu God ma vierafejo iji ifejdia nijaidiaga bu mukoi vierafene e damuigin rene ik kafokafo mukoi vierafene rekfuon.   
\c 4  
\s1 For fu Timoti ejafame kuardaga fu Godon vuak ma iji abe kuaimokfuon ijin  
\p
\v 1 Na God ko Jesu Kurais e iji fu tavan rad e fok igiebuon ise ga ma bu reoinva iji faikfuon ijefuon if ijia na kuavno nika ire no kuardavo igi rene.  
\v 2 Nika tavan bog Godon vuak iji abe tavan ise ga tavan ma ijia e nijaidiame aferdia arir uniamne. Regavo kuriaireknum adumaduigin soisoime mukorigia vuak iji kuardiame samua.  
\v 3 Tavan iji ruakma e uruvana buka vuak ma iji uzame buba mukoi faikfuon. Regavo buka una vajat ijefuon ire iji bu vierafenva iji kegokfuon. Regavo bu madu e iji vuak kufui nijaidiaoijo ijiebuon vaga bur vuak irerag bu faikuai vierafejo iji nijaidiakfuon.  
\v 4 Regavo bu Godon vuak ma iji uzame una vuak suar iji faikuai vierafekfuon.  
\v 5 Regavo Timoti aiji ire kafo bu on rekva iji aka koikon samuanamik. Regavo unam ise kafokafo bu on roga a vajai fian abeno ijia ni oi mafaime vajai fian abene. Regavo nika Godon vuak iji abe e nijaidia vo ik iji E Bomana fu mainma iji kege mukorigia samuaknum reoine.   
\p
\v 6 Regavo naiji na tavan iji e Romko bu na abe kaniekfuon iji fun ruain ijefuon na moikigi na fioijo iji nan ijia arev.  
\v 7 Na God ma vierafene fu igame roke iviakma nan eoren. Regavo e iji fu kukumo ijeg nan mukorigia daromene kukume ruain. Regavo Godon vuak ma iji nan abe ma vierafeknum nijaidia ruain.  
\v 8 Regavo iji na daromene mukoi kukuinva ijefuon maiji ire ma be fun na samuagdie nam. E Bomana maturainma iji fu fine ise nuvuon kege mazim guokfuon ijar unam ma iji sanainma ijia ma karivako iji abe tavan radkma ijia miek. Regavo fu abe nunkua miekma bakin revo fu kege e iji bu oibuon ijekma bomana fu ruakfuon bu samuavo iji vajiak.   
\s1 Vuak nun radkma ijin  
\p
\v 9 Regavo Timoti ni koikon giriesame rad migegare vuakne.  
\v 10 Ijefuon maiji e Kuresens fu ai Garesia vakga Taitas fuk fun ai Darmesia ijia Godon vuak nijaidiame vain. Regavo Dimas fu ire moik igefuon oijmiamo ijefuon fu na unieme fun ko ai Tesaronaika vain.  
\v 11 Regavo iviakma Ruk fu fuonkua fu vek nosik fin. Ijefuon a ruakma Mak afeme roga fur ifejdieme ik igi rekfuon.  
\v 12 Regavo e Taisikas nan kuava fun ai Efisis vain.  
\v 13 Regavo a igia ruakma ugon nun na azan abesvo iji na ai Troas e Kafason ar ijia abedeme ruainva iji abedie vo buk nun ijigam fefa iji na isoim nainva iji kedie ro.   
\p
\v 14 Regavo e Arekseda e iji fu ajan ijia kege ire kafo amardiamo iji fuka ire ise uruvana nun redo Godri ijefuon fu abe vajai fian mak.  
\v 15 Ijefuon fu mukorigia agordamne ijefuon maiji fu vuak Kuraison no nijaivo iji fu darokma uzam.   
\p
\v 16 Regavo amur bu na abe kotreja ijia e kafo buba na ifejdieme vuak kuaik ruain. Ijefuon na vierafe God fu ise buon iji fu giame arekfuon.  
\v 17 Regavo E Bomana iji fu na ifejdieme daro miemga na Godon vuak maiji fok kuardiain. Na kuardiava e Jius bakin mai Rom ijia ar kotrejo guf ijia karinva iji bu vuak iji fain. Bu faivga God fu e iji bu na kaniekuai vierafenva ijia keunien.  
\v 18 Regavo God fu tavan bog ire ise fok kafokafo nun roko ijia keunienmo. Ijefuon fu aferdieme ar varur iji fu samuamo ijia vak. Na tavan bog sirimamega e fok ar iror igia oinva iji bu fu abe aroik. Mare.   
\p
\v 19 Regavo Frisira ga Akuira ga e fok bu e Onesiforason ar ijia karinva iji na bu anadian.  
\v 20 Regavo e Erastas fu vek mai Korint ijia fin. Regavo e Trofimas fu adam abeno ijefuon na vek ai Maritas ijia uname ruain.  
\v 21 Regavo tavan bomana dakreno ijefuon ni migegare ruake tavan iji fu rad dam. E Iuburus ga Fudens ga Rinas ga Kurodia ga e God ma vierafejo ar igia karijo bu a anadain.  
\v 22 Na vierafe Godon Kaven fu kaven on ijek fike God fu ma rediame ifejdiaga ja mukorigia kari vakfuon.  
\p Fun ijin.