\id 2CO - Namiae NT [nvm] -Papua New Guinea 2004 (web 2014) 
\h 2 KORINTIENS 
\toc1 2 Korintiens 
\toc2 2 Korintiens 
\toc3 2Ko 
\mt1 2 KORINTIENS  
\imt1 2 Korintienson Vuak Amur  
\ip For madu fas igi isoime e Korintko ai Mesedonia guf ijia karinva iji nijiain. Mai Korint fuka mai bomana be fu moik Akaia ko Gris guf ijia. For fu amur fas be fu isoime e Korintko iji nijiainma iji fu vuak gigikin kafo kuardian. Regavo rad fu vierafe fu e Taitas kuaga fur va ijia izeg bu karijo iji giame una ro fu kuardakro fu ijefuon kuama fu vain. Areme Taitas fu una ro For izeg E Korintko roin bu Foron vuak iji faime oi karoiknum vo madu izeg e roin bu daro fuon uzavo ijin For kuardain. Regavo una fas igia For fu isoinma ijia fu vuak nokarok ga nokarok (4) ka ma ijin isoin. Regavo vuak amur fu isoinma iji fu e iji bu oi karoinva ijiebuon oimarenma ijin. Regavo ura vuak be iji fu Jesu Kuraison vuak ma iji fu bu nijaidiakro vierafenma iji isoime nijaidiain. Revo ura vuak be iji fu e iji eraneb bu sinuom bakin karioijo iji mon kafo vajiakfuon iji isoime kuardiain. Regavo vuak radkma iji fu vuak fuon izeg fu ma e afasor renma fu ijin isoime kuardiain.  
\iot 2 Korintiens guf ijia vuak kafokafo fu isoinma ijin  
\io1 \ior 1:1-11\ior* For izeg fu e Korintko iji anadiainma ijin.  
\io1 \ior 1:12–2:13\ior* For izeg fu e Korintko bu For dab unam kafokafo ijia oifian main gavo fuka uria Godon vuak ma iji nijaidiakro vierafenma ijin.  
\io1 \ior 2:14–6:10\ior* For izeg fu e God ma vierafejo bu Godon unam iviamkor ijia kegokfuon kuardiainma ijin.  
\io1 \ior 6:11–7:16\ior* For izeg fu e Korintko buifuon reoinma ijin.  
\io1 \ior 8:1–9:15\ior* For izeg fu e sinuom bakin Jerusarem ijia karinva iji mon vajakfuon kuainma ijin.  
\io1 \ior 10:1–12:21\ior* For fu izeg e bu ma afasor rene ik reokfuon fu kuainma ijin.  
\io1 \ior 13:1–13:13\ior* For izeg fu e Korintko iji vuak fuon radkma iji nijaidiaknum anadiainma ijin.  
\c 1  
\p
\v 1 Na For e iji God fu fuon vierafenma ijia kiega na Jesu Kuraison afasor rene ikrejo iji nar e Timoti uviainuvuon ijek fas igi isoime ja nijiav. Fas igi no isoime e God ma vierafejo bu afuime ai Korint guf ijia karinva ijiga Godon e fok ai Gris guf ijia karinva iji nijiav.  
\v 2 No vierafe God Asoinuvuon ijiga E Bomana Jesu Kurais bu tavan bog ja ma rediaknum mukorigia samuagdiaga ja afuime kariokfuon.   
\p
\v 3 Na vierafe noka God nuvuon E Bomana Jesu Kuraison Asoij iji fu e mardiaknum oijmiame ifejdiamo ijefuon oimarek. Ijefuon maiji fur e iji bu oifian abeknum afikin biediavo iji tavan bog ifejdiam.  
\v 4 Fu ijeg tavan bog ifejduomo ijefuon nosik unam besum ijeg una e iji oifian abejo iji mukorigia tavan bog ifejdiakfuon.  
\v 5 No vierafe noka izeg Jesu fu vajai fian abenma no madu noka ijeg vajai fian abekfuon. Regavo madu Jesu fu vajai fian abega God fu ifejdainma ijeg God fu una Jesuon duadok ijia no dasumduome mukorigia ifejduom.  
\v 6 Regavo tavan iji no Godon vuak abe kuaimoijo iji noka vajai fian abej. Regavo vuak iji no abe kuaimoijo iji fun ja ifejdiame karauniamo ijefuon noka bomana oimarev. Regavo madu izeg no vajai fian abeko God fu ifejduomo ijeg nosik una ja ifejdiakfuon. No ja ifejdiaga ja giriesame irenki ja kabuaikabuaikin unam vajai fian abejo kafo bu jon roko ja iji biediakfuon.  
\v 7 Regavo kaifnun no ma vierafe ja uria giriesame karij. Regavo no vierafe unam izeg no vajai fian abejo iji jak jaka ijeg vajai fian abej. Regavo madu no vierafe izeg God fu no uruvana ifejduomo ijeg fu madu ja ifejdiam.   
\s1 Izeg no Esia ijia vajai fian abenva ijin  
\p
\v 8-9 Regavo kaifnun igia faif. No ai Esia ijia afikin iji no biediainva iji buka mamkanuk no izeg giriesame asusekfuon bakin no ijin biediain. No afikin iji biediame noka uruvana vajai fian abeknum vierafero non aoikro no ijeg vierafen. Regavo no vierafe noba aoikfuon ijefuon maiji no vierafe God fu e aoivo iji fu kiaga bu una urij. Regavo ire iji bu nuvuon rejo iji no daro nuvuon ijia biduakva bakin. Regavo noka Godon daro ijia biduakuai bu ijefuon nuvuon ren.  
\v 10-11 Regavo God fuka unam ni kafokafo no aoikfuon fu ijia karaunuin. Regavo madu fur tavan bog no karaunuomo ijefuon nok fu ma vierafej. Regavo jaka e uruvana no ifejduome Godon sirimamejo ijefuon God fu tavan bog no karaunuok. Regavo fu no mukorigia ifejduomo ijefuon e uruvana bu una nuvuifuon Godon bomana oimarkfuon.   
\s1 For unam iji fu dasume una be amarenma ijin  
\p
\v 12 No ire ijiebuon no bomana aroikaravo ijefuon no oinuvuon ijekma noka ma kuardiav. Regavo ik anej ijia ire igi no kuardiakrejo iji fu Godri ifejduomga ire fok no moikigia reoknum vo jon reoinva iji noka ma vierafeknum reoin. Regavo iji no renva iji no e moikigia oijo ijiebuon vierafenva ijia renva bakin. Revo ire fok no reoinva iji fun Godri no ma reduome daro muokoga no ire ijin reoin.  
\v 13-14 Regavo vuak igi no isoinva iji no vuak sauivkin iji isoivo bakin revo noka vuak iji ja samakaf dame faikfuon ijin isoiv. Ijefuon na vierafe ja izeg no ma afasor renva iji jan sibank fain revo rad ja vuak nuvuon fok faime vierafekfuon. Ja tavan afikin iji E Bomana Jesu Kurais fu una roko ijia ja vuak ma iji no nijaidiainva ijefuon nuvuon oimarme aroikarak. Regavo madu no izeg ja vuak no nijaidiavo ja faime jajiavo ijefuon noka jon oimarknum aroikarak.   
\p
\v 15-16 Na ijeg vierafenva ijefuon unam iji na igeg amaren. Na Mesedonia vako ijia na ja giame vainki una roko ijia na madu una giame ruakro na ijeg amaren. Regavo unam ijeg na rejo ijia ja na tavan nokarok (2) giekva ja una oimarknum daro abekfuon. Na ja giaga jar ifejdiega na unam nun amarme ai Judia vak.  
\v 17 Regavo ja vierafega unam iji naba vierafeknum amaren? Regavo be iji jakafu vierafero na ema moikigia oijo ijiebuon vierafenva ijia jame amaren. Ijefuon maiji e moikigia oijo bu ire kafo rekuai kuaivo iji bum ir ijia kuai keno kuaiv revo bu oibuon ijia bu rekuai vierafejo bakin.  
\v 18 Regavo God fu ire kafo rekafa kuaimon iji fu aremo bakin gavo fuka ren. Ijegvo nak na unam besum ijeg irerag na kuaivo iji naka rej.  
\v 19 Regavo na Sairas ko Timotina vuak iji no Godon Farif Jesu Kuraison kuardiainva iji no kufui kuardiainva bakin. Ijefuon Jesu Kurais irerag fu rekafa kuaimon iji fu aremo bakin gavo fuka ren.  
\v 20 Regavo God vuak fok fu rekro kuainma iji fun Jesu Kuraisri rega vuak fu kuainma iji fuka ijekma riaren. Ijefuon no vuak iji Jesu fu God igame ire fok renma no ijefuon God dab aroikfuon.  
\v 21-22 Regavo fun Jesur irerag fu nuvuifuon renma ijia fu no kege jana besum amarduoga no e darokin rene una efuon ren. Regavo fu Kaven Akai fuon iji kege oinuvuon ijia anf igeg naduoma no e fuon redo no ire ma iji God fu kuainma no ijin kekfuon.   
\p
\v 23 Regavo vuak igi na kuardiavo iji God fun gieme vierafenma ijefuon naka ma kuardiav. Na vierafe na una ai Korint vuakva naka afikin abe miak. Ijefuon na unam iji na ijia vuakfuon amarenva iji na areme una unam be amaren.  
\v 24 Regavo no jon izeg ja God ma vierafejo iji no nor samuagdiavo bakin ijefuon maiji no vierafe jon ja ma vierafejo ijia jaba zazaiv. Regavo ik igi no reoijo iji nom ja ifejdiaga ja oimarknum mukorigia ikrekfuon.   
\c 2  
\p
\v 1 Regavo amur na vuainva iji naka oifian abe miain ijefuon na vierafe naba una madu vua oifian abe miakfuon. Ijefuon unam iji na ja giakafie amarenva iji nan aren.  
\v 2 Na ja kege oifian miakva bu eraneb na ifejdiega na una oimarkva bakin revo jan jar jonkua ifejdiega na una oimarkfuon.  
\v 3 Ijefuon fas igi na amur isoim nijiav. Na vierafe jan jar na oimardiekfuon ijefuon na oifian abe miakva iji fuba maren. Ijefuon na vierafe ja amur afikin fok ka mukorigia asume amarega na vuakafie na iji vierafen. Ja ijegrenki na vuakva naka oimarke vo jak jaka oimarkfuon.  
\v 4 Regavo fas iji na isoim nijiainva iji na asoijon igeg na bomana oifiaigma ga nidokma isoime nijiain. Regavo iji na isoim nijiainva iji na jar game oifian abekfuon na ijefuon nijiainva bakin. Regavo nam izeg na ja oijmiavo ja iji game vierafekro na iji isoime nijiain.   
\s1 E ise reno iji giame arekfuon ijin  
\p
\v 5-6 Regavo igia fai e be fu jana ijia fino iji fu ire ise ukakbek reno jaka oifian abej. Regavo oifian iji fu abe na mienma bakin gavo fu abe ja miain. Ijefuon naba una vuak fuon iji uruvana kuaiga fu bomana jukfuon. Ijefuon maiji vajai fian iji e uruvana ja abe fu mainva iji fun siban.  
\v 7 Ijefuon ni iviakma ise fuon fu renma iji game dazegavo ifejdaga fu una jana besum fioinki fuba oifian bomana abene fuon fu ma vierafeno iji arekfuon.  
\v 8 Ja ijegreoinki fu izeg ja vek fu oijmavo fu iji giak.  
\v 9 Regavo madu amur fas iji na isoim nijiainva iji na vierafe na ja biesiame giamga ja ma ire fok na kuardiavo iji jan igieme kegoijo na iji giakafie na iji isoime nijiain.  
\v 10 Regavo ja e befuon ise iji game arekva iji nak na ise fuon game arek. Regavo na ise kafo giame arevo iji Jesuon nifak ijia na ma game arev. Regavo iji na rejo iji na e iji God ma vierafejo ja ijia karinva iji joifuon ijeg ren.  
\v 11 Na ijegrekva Setan fuba no asiduome ire kafo rene no biesuok. Ijefuon maiji no unam fuon izeg fu e biesiamo iji non mukorigia game vierafen.   
\s1 For fu tavan ivuankbe ai Troas ijia finma ijin  
\p
\v 12-13 Na ai Troas ijia Kuraison vuak ma iji abe nijaidiakro vuakga E Bomana Jesu Kurais fu e Troas ijia karinva ijiebuon oij iji kam karoimga buka vuak nun faikuai vierafen. Regavo ijia naka ba oi dasuin. Ijefuon maiji na uviainun Taitas naba bie vo fu vuak joisina kuardien. Ijefuon na e ijia karinva iji anadiame nan una ai Mesedonia ijia vain.   
\s1 Izeg no Kuraison duadok ijia unam ise uruvana asidiavo ijin  
\p
\v 14 Regavo noka Godon bomana oimare ijefuon maiji fun Jesur ise ijefuon daro iji fun asin. Ijefuon fu tavan bog daro fuon ijia e iji no fuifuon ikrejo iji ifejduoko no Jesuon vuak ma iji abe ar iror ijia nijaidiaoko e bu vuak iji faiv. Regavo vuak iji no abe kuardiavo iji fuka ire be udi mukor urino igeg udi uri ar iror ijia vak.  
\v 15 Ijefuon eraneb non Kuraisna besum mazinva iji noiji no Godon nifak iji noka ire be udi mukor urino igekin. Regavo ire udi iji bu e iji zuarunam ijia vako ijia irenva ijiga e iji bu unam ma karivako unam ijia irenva ijieb udi iji fain.  
\v 16 Regavo e iji buba God ma vierafejo ijieb udi iji faivo buka e aoivo ijiebuon udi ijeg fain. Regavo una e iji bu God ma vierafejo ijieb faivo iji buka udi mukor bu iji fain. Regavo vuak igi na kuardiava ja fainva iji erar fu aresredo fu Godon vuak fu udi mukor urino igekin iji abe e fok nijaidiakfuon?  
\v 17 No vierafe non aresren ijefuon maiji fun Godri no kema no e Jesuon ikrejo iji ren. Ijefuon noka mukorigia Godon vuak ma iji abe Godon nifak ijia e fok nijaidiav. Regavo e uruvana roin buka Godon vuak iji kege e uruvana nijaidiame mon uruvana karkuai vierafen gavo noiji no ijegrejo bakin.   
\c 3  
\s1 E iji bu unam iviamkor God fu abe marenma ijefuon ikrejo ijin  
\p
\v 1 Ja vierafega nobe una anerene nuvuon aroikarav? Regavo madu ja vierafe nobe e kafo kiaga bu ik nuvuon no mukorigia reoijo ijefuon fas isoime ja nijiak? Regavo madu ja vierafe nobe ja kiaga jar nuvuisina ik no reoijo ijefuon fas isoime e roin nijiak?  
\v 2 No fas ijeg noba vierafen revo jaiji jaka fas nuvuon igekin. Ja unam ise kafokafo ja reoijo iji jan nuigafiame una unam ma ijesugin reoij. Ijefuon e uruvana bu unam ma iji ja kegoijo ijia giame vierafero no ik mukor iji jon renvaro bu ijeg vierafek.  
\v 3 Ijefuon unam ma iji jon ja kegoijo ijia jaiji ja Kuraisri koikfuon fas isoinma igekin. Usuibe God fu mun azan ijia akaij iji isoime ke e Mosis vajain. Regavo iviakma Kurais fuba safir abe fefa azan ijia isoin revo fu God tavan bog ijia fine vako ijefuon Kaven Akai iji abe oijon ijia vuak fuon iji isoin.   
\p
\v 4 No vuak ijeg kuaivo ijefuon maiji no ma vierafega fun Godri no kega no afasor renva ijefuon ik no rejo iji fu oimarem.  
\v 5 Regavo ik igi no rejo iji no daro nuvuon ijia rejo kuaikva iji fuka ma bakin. Regavo ik fok fun Godri daro muome ifejduoko no ik fuon iji rej.  
\v 6 Regavo madu fun fur no ifejduoko no unam iviamkor iji God fu e karauniamo no ijin nijaidiav. Regavo unam usuikor Mosison akaij iji igame javo iji fu e karauniamo bakin. Regavo fuka e aferdiaga bu unam iji bu aoime zuarunam vako ijia vak. Regavo unam iviamkor iji tavan bog ijia ma karivako iji fu Kaven Akai ijar kege no vajuom.   
\s1 Unam iviamkor iji fuka ma mukor ijin  
\p
\v 7-8 Godon akai fuon usuikor iji fu mun fat ijia isoime Mosis vajama fu Godon sanainma ijekma kege ruain. Regavo sanainma iji fuka Mosison uikinik ijia abaikirame ire bivar bu abe tavan ijia karavo igeg iramo ijefuon e Isrerko buba uruvana nikajain. Regavo rad Mosison uikinik ijia sanainma iji fu migegare una baren. Regavo una unam iviamkor ijia Godon Kaven fu ikreno iji fuka ma bomana sanain ijefuon fuka akai usuikor ijefuon sanainma iji fuka ma asin.  
\v 9-10 Akai usuikor iji fu e kege vajai fian vajiavo iji fu Godon sanainma ijekma ruain. Regavo una unam iviamkor iji fu e kege maturaiga bu una Godon e rejo iji fuka akai usuikor ijefuon sanainma iji fu ma asin. Ijefuon akai usuikor iji fun mukorigia zubit ren.  
\v 11 Akai usuikor iji fum tavan ivuankbe Godon sanainma ijekma igia saname fun una baren. Regavo unam iviamkor iji fu tavan bog ijia navak ijefuon fuon sanainma ijar fuka ma bomanak.   
\p
\v 12-13 Regavo e Mosis fu ga uikinik fuon iji fu sanainma iji fun una baremga fu uri ugon abe uikinik fuon iji okurain. Ijefuon maiji fu vierafe e Isrerko buba gakro fu ijefuon ijeg ren. Regavo iviakma non ma vierafe Godon unam iviamkor iji fu e karauniamo iji fuka barekfuon bakin. Ijefuon noka vuak fuon ijin tavan uruvana abe darokma nijaidiaoij.  
\v 14 Mosis fu uikinik fuon ijesugin okurainma bakin gavo God fu madu e Isrerkobuon vierafejo iji fuka ma bijukuriain. Bu ijeg karine ruaido bu iviakma buk akai usuikor iji da vo vuak ijefuon maiji fuba samafren. Regavo iviakma e iji bu oi karoime una Kurais fuonkua ma vierafejo fur ire iji fu vierafe buon bijukuriamo iji ke vak.  
\v 15 Regavo madu eraneb bu iviakma Mosison akaij iji davo ire iji fu uria vuak ma iji okuram ijefuon vuak ma iji bu mukoi faivo bakin.  
\v 16 Regavo erar fu ise fuon iji nuigafiame oi dakaroime una E Bomana ijefuon ruakma fur oifuon iji fuba ma vierafeoino iji fu ugon igeg okurainma iji abe vak.  
\v 17 Regavo E Bomana iji na kuaivo iji fu Godon Kaven Akai besum ijin. Ijefuon erar fu Kaven Akai iji abega fu fusik fino e iji fu ire iji bu usuibe fu samuavo iji fun uniakome ruain.  
\v 18 Regavo noiji no oinuvuon iji non karoime una E Bomana iji vajain ijefuon ire iji fu oinuvuon iji okuruinma iji fun baren. Ijefuon e uruvana bun unam izeg no karioijo ijia God fu e izekin iji bun samakaf gav. Ijefuon fun Kaven Akai iji oinuvuon ijia ikreno ijar no kege una ka E Bomana iji aikin ren. Fur no kege una fu aikin ren ijefuon e uruvana bu nakikmazak nuvuon no karioijo ijia bu God fu e izekin bu iji giav.   
\c 4  
\s1 Godon daro iji fu vajai nuvuon zazaikin ijia ikreoino ijin  
\p
\v 1 Ijefuon fun Godri fuon izeg fu no oijmuome ma reduomo ijia fu ik igi no vuak fuon ma iji e nijaidiakfuon ijin vajuin. Ijefuon no unam kafokafo no biediame vajai fian abej revo noka magaga vek ikrej.  
\v 2 No e iji bu unam ise jufdiavo iji bu sauime kegoijo iji non nuigafiain ijefuon no una ijegreoijo bakin. Ijefuon noba una e biesiaknum Godon vuak iji kege karoime nuvuon vierafenva ijia e nijaidiak. Regavo madu no Godon nifak ijia vuak ma iji samakaf nijaidiavo ijia e uruvana buka no guome oimarev.  
\v 3 E iji buba oi karoime una Godon ruainva iji buka unam iji zuarunam vakfuon ijia irev. Regavo madu Godon vuak ma iji no nijaidiavo iji fu nigen buon ijia ba samafrediainma ijefuon buka ba vierafej.  
\v 4 Ijefuon maiji fun Setan e iji moik igefuon god ijar bu kam ada bijukuriain. Ijefuon bu Godon vuak ma iji bu faiv revo buka ba ma vierafeknum ga unam fuon ma iji ka mukor ijin gav. Fu kaven ise ijar nizuriaidiainma ijefuon bu Kurais fu e izekin ijefuon anej ma iji buka ba gav. Jesu fu God aikin iji Setan fun vierafenma ijefuon fu e iji bu Jesu mukorigia game vierafekfuon iji fuka uzamo ijefuon fu vierafe buon iji fuka mukorigia bijukuriam.   
\p
\v 5 Regavo vuak igi no nijaidiavo iji no if nuvuon kam ajievo bakin. Regavo noka Jesu Kurais fu E Bomana renma no vuak ijin abe nijaidiaoij. Regavo madu no izeg no Jesu Kuraison if ijia joifuon ikreoijo no iji nijaidiaoij.  
\v 6 Regavo Godri ik amur ijia vuak be ijeg kuai, Sanainma nun ijar ar iji fuka nakinma ijia sanakno kuain. Ijefuon God besum ijar vuak fuon ma iji abe oinuvuon ijia abededo fu tavan bog ijia na vak. Revo iji fu ijegreno iji fu no ifejduoga no fu e izekin iji no samakaf game vierafekuai fu iji ijeg ren. Fu sanainma fuon ijia fu e izekin iji fu Kuraison uikinik ijia no nijaiduoma non gain.   
\p
\v 7 God fu vuak fuon ma iji fu kege ema igi noka daro bakin iji oi nuvuon ijia nain. Ijefuon e uruvana bu tavan iji no Godon vuak ma iji abe e nijaidiavo ijia no ire kafokafo rejo bu ijia guome vierafero daro iji fu emabuon roko bagavo fu Godon rokoro bu ijeg vierafej.  
\v 8 Tavan uruvana e buka no kam vajai fian vajuome afikin uruvana kege no vajuov. Regavo unam uruvana bu nuvuon renva iji buba rareme ik no rejo ijin bijukuruin. No afikin iji bu irerafuon nuvuon rejo iji noba mukoi vierafen revo noba zazaime ijia aren.  
\v 9 Regavo tavan bog e ani nuvuon buka unam ise kafokafo nuvuon rega noka vajai fian abej. Regavo God nuvuon iji no fuka ba unuokoin. Fu tavan bog fuka vek nona ijefuon bu kanuovo iji noba aoiv.  
\v 10 Tavan iji no Godon vuak e nijaidiaoijo ijia no vierafero bu izeg Jesu bu kanava fu guainma ijeg buka kanuoga no aoikro no ijeg vierafen. Regavo ijeg no vajai fian abeoijo ijia noba aoin gavo noka vek karij. Ijefuon e bu ijia guovo bu vierafero Jesu fu oinuvuon ijia fino ijefuon fur no mafarduomoro bu ijeg vierafej.  
\v 11 Regavo noiji no Jesuon ikrejo ijefuon nakikmazak noka unam iji no migegare aoikfuon ijia karioij. No ijegreoijo ijia e uruvana bu vajai nuvuon igi bu aoivo ijia Jesuon daro ijiga unam fuon ma iji fu reno bu ijia giame vierafero God fu vek no samuagduomoro bu ijeg vierafek.  
\v 12 Ijefuon igia fai no ijegreoijo ijefuon e ani nuvuon buka kanuo no aoikuai bu ijeg vierafen. Regavo Kuraison vuak ma iji jan jar mukoi faiv. Ijefuon jan jar unam iji tavan bog ijia ma karivako iji jan jar rej.   
\p
\v 13 Regavo nuvuon izeg no ma vierafejo iji bun usuibe buk Sams ijia isoime kuai,  
\p Na ma vierafejo ijefuon na iji kuaivno kuain.  
\p Ijefuon noiji no Godon vuak iji no ma vierafejo ijefuon no darokma vuak fuon iji abe kuaimoij.  
\v 14 Regavo no vierafega God fu E Bomana Jesu keunama fu una urinma ijeg fu madu no karaunuoga no funa una urik. Fu ijegreare fu afeduoga no jana besum nifak fuon ijia irek.  
\v 15 Regavo madu ire fok no rene vajai fian abejo iji noka joifuon rej. No ijegrenki God fu fuon izeg fu e ma rediamo ijia fu e uruvana ifejdiaga bu oi karoime una efuon rek. Bu una efuon rejknum ga una fuon sirimamene oimarek.   
\s1 Ma vierafejo ijia biduame karikfuon ijin  
\p
\v 16 Regavo e uruvana buka una oi karoime God ma vierafejo ijefuon no ik iji no rejo iji noba arek. Regavo madu no vajai nuvuon fun eoraduome zazatuom revo Godon Kaven iji fu oinuvuon ijia fino ijar tavan bog kaven nuvuon iji kege una e iviamkor igeg amarduom.  
\v 17 Regavo iviakma igi no afikin abene vajai fian abejo iji fum tavan ivuankbe ijesugin. Regavo bun vajai fian ijieb ifejduoga no Godon ar sanainma ijia tavan bog ijia karivakfuon. Fu ar iji sanainma mukor ijar vajai fian igi no iviakma abejo iji fuka ma asin.  
\v 18 Ijefuon noba oinuvuon ijia uri ire iji no ni nuvuon ijia iviakma giavo ijia biduame karikuai vierafekfuon. Regavo noka ire iji no giavo bakin ijia biduame karikfuon ijin vierafek. Ijefuon maiji ire iji no iviakma giavo iji bu migegare barkfuon. Regavo ire iji no giavo bakin iji buka tavan bog ijia naoime vak ijefuon no ijia biduame karikfuon iji vierafek.   
\c 5  
\s1 Vajat iviamkor God fu vajuokfuon ijin  
\p
\v 1 Ijefuon no vajai nuvuon igi iviakma moikigia no karijo iji bu kanuoga no aoikva fu Godri una amarduok. Fur vajai nuvuon iji una amarduoga no vajat iviamkor ma iji varur gufia fu imut fuon ijia amardiainma no iji kekfuon. Regavo vajat iji fuka tavan bog ijia fivakfuon.  
\v 2 Regavo iviakma moikigia no karijo iji vajai nuvuon buka isediame aimiain. Ijefuon no vierafe no Godon ar varur ijia vaga fu ugon no savo ijeg vajai nuvuon iviamkor iji kege samduokfuon.  
\v 3 No ijia vaga fu vajai iviamkor iji kege samduokma ijia kaven nuvuon buba detabar ok gavo bu una ugon sainva igeg ok.  
\v 4 Regavo vajai nuvuon iji no moikigia karioijo iji noka afikin abene noka karine aduiv. No vajai nuvuon iji bu aoikfuon iji noba bomana vierafej. Ijefuon iviakma no vek moikigia karijo iji noka varur gufefuon vajat iji ke same karikuai no ijin vierafen. No ijegrenki vajai nuvuon iji buka una iviamkor rene tavan bog bu ijeg karivakfuon.  
\v 5 Regavo e iji unam iji kanafuinma iji fun Godri fuonkua ren. Fun Godri ijeg amarenma ijefuon fu Kaven Akai iji kege oinuvuon ijia anf nain. Ijefuon no ijia giame ma vierafero God vajai iviamkor fu vajuokno kuinma iji fu kege vajuokro no ijeg vierafek.   
\p
\v 6 No ijeg vierafejo ijefuon noka tavan uruvana giriesav. Regavo vajai nuvuon iji no iviakma kege moikigia karijo ijia noka E Bomana ijiena karijo bakin.  
\v 7 Regavo ire iji God fu nuvuon rekfuon iji no ni nuvuon ijia giavo bakin revo nom ire iji ma vierafeknum karioij.  
\v 8 No ma vierafejo ijefuon no aoikfuon iji no juvo bakin. Ijefuon no vierafe no ar moikigi areme una mai ma ijia E Bomana ijiena karikfuon no ijin ma vierafen.  
\v 9 No moikigia ga varur ijia karikfuon iji no bomana vierafejo bakin. Regavo ire iji no bomana vierafejo iji no irerag God fu oimaikfuon nom ijesugin reokuai no iji vierafen.  
\v 10 Ijefuon maiji tavan ijia e fok no Jesu Kuraison nifak ijia iregakva fu ire fok no renva iji kege mazim giakfuon. Rene Jesu fu e besubesum fuon izeg fu moikigia fioknum mukoi reoin vo fu isema kegoinma fu ijia giaknum kam vajai fian vajiaknum ga karauniak.   
\s1 Jesuon duadok ijia God kai rekfuon ijin  
\p
\v 11 Ijefuon no vierafe e fok bu Jesuon nifak ijia irekva buka bomana jukfuon. Ijefuon noka e fok soisoiga bu unam ma ijesugin kegokfuon no iji vierafen. God fu ire igi no reoijo iji fun vierafen ga madu jak jan unam izeg no kegoijo iji jan guome vierafen.  
\v 12 No koiknuvuon anerene aroikarame una if nuvuon iji kam ajievo bakin revo nom unam ma iji nuvuon iji kege ja nijaidiav. Ijefuon jasik una e iji bu buon ganamime aroikaragavo oibuon buka ma vierafejo bakin ijin samakaf nijaidiame kuardiakfuon. Revo madu ja unam ma iji izeg no karioijo ijin bu nijaidiakfuon.  
\v 13 Regavo ja vierafero vuak igi na kuardiavo iji nakafu na nigen iserenvaro ja iji vierafen? Regavo vuak iji nam Godon vuak ijin kuardiav. Ijefuon na nigen iserenva bakin gavo na ja ifejdiakafie na ijefuon kuaiv.  
\v 14 Jesuon oijmiamo ijar no kam ijegrega no vuak fuon iji abe e fok nijaidiaoij. Ijefuon maiji no vierafe fun e besum ijar nuvuifuon guame e fok no karaunuin. Ijefuon e fok no unam nuvuon usuikor no kegoijo iji bun Jesuna besum aoinva igekin.  
\v 15 Jesu fu e fok ijiebuon guame madu una urin. Ijefuon eraneb bu nivek karinva iji buba buon vierafenva ijia keok. Regavo buka Jesuon unam iji fu oimaikfuon ijia jame reoknum karikfuon.   
\p
\v 16 Ijefuon e iji no God ma vierafejo iji noba e moik igeko bu e uikinik ijia giame vierafejo ijeg noba rekfuon. No amur Jesu Kurais no dab ijeg ema igeg game vierafen revo iviakma no ma vierafega fuka ma E Bomana.  
\v 17 Regavo erar fu oi dakaroime Jesu ma vierafene una efuon reno iji fuka e iviamkor ren. Fu unam fuon usuikor iji fun abe akozen gavo iviakma fun una unam iviamkor iji anerene reoin.  
\v 18 Ire fok fu Godri Jesuon duadok ijia no e ani fuon iji fun kege una efuon ren. Ijefuon fu ik iji no vajuido no e ani fuon fok aferdiame una efuon rek.  
\v 19 Regavo vuak iji no abe e fok kuardiakfuon iji no Jesu Kurais fu e moikigia oijo ijiebuon ise iji abe kuros ijia guainma no iji kuardiakfuon. Ijefuon eraneb bu iviakma oi karoime una God ma vierafejo iji fu ise buon giame areknum karauniaga bu una efuon rej. Regavo iviakma no una funa besum renva ijefuon fu no kuoga no vuak iji abe e kuardiaoij.   
\p
\v 20 No Kuraison ik rejo ijefuon no fuon fateroin ijia vuak abe kuaimoij. Regavo vuak iji no kuaimoijo iji fu Godri ir nuvuon ijia ja kuardiamo igekin. Ijefuon no Jesuon fateroin ijia ja kuardiavno ni oijon ke karoime una God ma vierafef. Ja ijegrenki ja e ani fuon rejo iji ja areme una funa afuime karikfuon.  
\v 21 Jesu Kurais fu ise kafo ba ren gavo Godri ise nuvuon dab una vajai fuon ijia dabedain. Fu ise nuvuon abe dabedamga fu guaido fur no kam amarduoga no marme una fu aikin rek.   
\c 6  
\p
\v 1 Regavo efnun no jana besum Godna ikrej ijefuon no soisoime kiavno jab izeg God fu ja ifejdiame ma rediainma ijin abe nisek.  
\v 2 Ijefuon maiji Godon buk akaij iji bu usuibe isoinva ijia fu ijeg kuai,  
\q1 Na tavan iji na ja ma rediakro vierafenva ijia ja sirimamejo na iji faiv. Regavo madu tavan iji na e karauniavo ijia na ja karauniainvano kuain.  
\m Ijefuon mukorigia faif. Iviakma tavan igi fu Godon tavan iji fu ja ma rediaknum ga karauniakfuon ijin.   
\s1 For afikin kafokafo fu biediainma ijin  
\p
\v 3 Regavo noba ire ise kafo rega e binob ik nuvuon igi no rejo iji kam iserduok. Buba kuaik For fu Godon ikreno revo fu unam ise iji reoinon ijefuon noba Kuraison vuak iji fu nijaiduomo iji igakno kuaik.  
\v 4 Regavo noka unam fok kafokafo no rejo ijia nijaidiaga bu vierafero no Godon ikrejoro bu ijeg vierafekfuon. Ijefuon noka kabuaikabuaikin unam ise kafokafo gigikin bu nuvuon roko iji biediav.  
\v 5 Regavo unam gigikin kafokafo iji tavan roin noka duok ba iknum ga ni naoivo bakin. Regavo madu noka nuibakin rene vuak ma iji abe nijaidiaoij. Regavo tavan roin e bu vuak nuvuon faivo buka deajidiaga bu fijuoknum ga kanuoknum kam dibur unuov.  
\v 6 Regavo madu unam nuvuon no karioijo iji noka mukorigia maturaime karioknum mukorigia vierafene reoij. Regavo madu noka kabuaikabuaikin karioknum e fok mardiaknum oijmanamime karioij. Revo ire fok no reoijo iji noka e fok mukorigia oijmiaknum ga madu fun Godon Kaven Akai ijar ifejduoko no ijeg reoij.  
\v 7 Regavo madu no Godon daro ijia vuak fuon ma iji kuaivo bu ijia guov. Regavo madu unam nuvuon no mukorigia rejo iji fu ire magu nuvuon igekin ijefuon no ijia abe Godon vuak ijefuon bijaiv. No Godon vuak ijar magu ga darer igeg kege imut maink ga aizinan ijia kuniaime uri ise iji bu nuvuon roko iji rareknum oij.   
\p
\v 8 Regavo e roin bu no kam arafiruoga noka juv ga roin buka una no kam arorduov. Regavo e roin bu vuak ma iji nuvuisina kuain revo roin buka vuak ise iji nuvuisina kuaiv. Noka vuak ma iji dab kuardiav revo e roin bu kuai noka kufuimejno kuaiv.  
\v 9 No God nifak ijia noka e ikin kafo revo e moikigia oijo bu guo kuai noka e buzerno kuaiv. Regavo madu bu vierafero noiji noka ma aoinvaro bu ijeg vierafen revo no vek igijar e nivek karin. No buka kanuoga no vajai matan uruvana abej revo noka ba aoiv.  
\v 10 Regavo madu noka oifian abej revo tavan uruvana noka vek oimarev. Regavo madu noiji no e sinuom bakin revo no e uruvana non aferdiame Godon unam iviamkor ijia uniav. Regavo noka ma ire kafo bakin gavo Kaven Akai ijefuon sinuom ijia noka zaraiv.   
\p
\v 11 E Korintko kaifnuvuon no ma e Godon ikrejo ijefuon no oinuvuon ijekma vuak fok noka samakaf visume kuardiain.  
\v 12 No izeg no ja oijmiavo iji noba aren gavo jaiji ja no oijmiavo iji jan ijia aren.  
\v 13 Ijefuon iviakma jaiji na afnun igeg vuak kuardiav. Jaka izeg no ja oijmiame nijaidiainva ijeg oi karoime una no mukorigia oijmuof.   
\s1 E iji God ba ma vierafejo iji agordiakfuon ijin  
\p
\v 14 Regavo efnun igia fai. Jab e iji bu God ba ma vierafejo ijiena besum bienamime ikreok. Unam iji fuka ba marenmano jab ijeg rek. Regavo ni vierafef e ma reoino ijiga ise reoino iji bu besum kamavo bakin. Regavo madu sanainma ijiga nakinma iji bu besum naoivo bakin.  
\v 15 Jesu Kurais ko Setan bu oi besum vierafene kegoijo bakin. E iji God ma vierafeno ijiga e God ba ma vierafeno iji tavan bog buka oi besum vierafeknum afurvejo bakin.  
\v 16 Regavo madu e bu sirimamejo iji bu ar besum ijia God sirimameknum ga kaven ise iji sirimamejo bakin. Ijefuon maiji God fu oinuvuon ijia fino ijefuon oinuvuon buka ar akai fuon. Regavo vuak besum iji bun usuibe Godon buk akaij ijia ijeg isoime kuai,  
\q1 Na enun ijiena fioknum ga buna ok. Regavo madu na God buon rekega bu enun rekno kuain.   
\m
\v 17 Ijefuon E Bomana iji fu kume,  
\q1 E iji bu ise reoijo iji ni bu uniame usem ruafno kumen. Regavo ja unam ise kafokafo iji agordiame aibe ijia joi kafo karikva na oimarknum ja anadiame aferdiakno kuain.  
\v 18 Regavo madu E Bomana ka ma darokin iji fu ijeg kume, Ja ijegrekva na Asoijon rekega ja afnun rekno kumen.   
\c 7  
\p
\v 1 Ijefuon kaifnun vuak iji fu God Asoinuvuon ijar nona fikinuvo okfuon fu iji kuarduin. Ijefuon ire ise kafo bu vajai nuvuon ga kaven nuvuon iji kam arafiriame muimiavoga iji noka migegare kege koreme maturaime okfuon. Regavo madu noka God akaime mukorigia ise fok nuigafiame naiki kariokfuon.   
\s1 For fu oimarenma ijin  
\p
\v 2 Regavo no e roin ise kafo buon renva bakin ga madu no e kafo bu buon ma vierafejo iji kege arafiriainva bakin. Noba ja biesiame ire jon karekuai kam arafiriainva bakin.  
\v 3 Regavo igi na kuardiainva iji na ja jufdiakfuon na iji kuardiainva bakin. Regavo izeg na ja oijmiavo iji nan amur kuardiava jan fain. Ijefuon no aoi vo no nivek karijo ijia fu irerag ijar no kege atame kafokafo unuokma bakin.  
\v 4 Na oimarvo ijefuon maiji naka afikin ma uruvana biediain gavo jar na soisoime ifejdienva ijefuon naka oinun ijia bomana oimarev.   
\p
\v 5 No ai Mesedonia ijia no vuainva noka ba oi mafaime asu karin. Regavo noka vajai fian ga afikin uruvana ijia biediain. E ani nuvuon iji buka nona besum musikuai kuai vierafen. Regavo madu no vierafe jakafu vek God ma vierafej ki ja Jesu nuigafame una jon vierafenva ijia reoijo iji noba giain ijefuon noka bomana iji vierafej.  
\v 6 Regavo God nuvuon e oifiaigin iji dasumdiamo ijar no soisoime ifejduin. Ijefuon maiji e Taitas fu nuvuon ruainma iji noka bomana oimarev.  
\v 7 No fu fuonkua gavo no oimaduinma bakin gavo no madu izeg ja fu mukoi samuainva fu iji kuarduoma noka bomana oimaduin. Regavo madu fu kuarduome kuo jaka bomana na giekuai vierafenvano kuin. Revo madu jaka e iji bu ise rejo iji giame buon bomana oifian abejno kuin. Regavo tavan kafo e ani nun bu vuak nuisina kuaivo ja iji faime jaka na turamdiekuai vierafenvano kuin. Ja ijegreoijno kuinma ijefuon iviakma naka bomana oimarv.   
\p
\v 8-9 Regavo fas iji na isoi nijiainva iji fu tavan ukakbe oifian abe miain. Ijefuon na ik iji fainva ijia na ukakbe oifiadien. Regavo iviakma naka oimaren ijefuon maiji ja fas iji dame oifian abeknum unam ise ja reoijo iji areme una God ma vierafen. God fu vierafe ja ijeg oifian abenki ja ijia vierafene una unam ise ja kegoijo iji ja arekuai fu ijefuon ijeg ren. Ijefuon fas nun iji fun ma oifian abe ja miainma bakin.  
\v 10 Regavo God unam iji fu oifian abe muomo iji fu ijegrega no unam ise nuvuon ijia oi karoime una fu ma vierafekro fu ijin reduom. Fu ijegrene no karaunuomo ijefuon iji fun maren. Regavo unam ise iji no oi karoime una roko iji noba una madu ijia vakfuon. Regavo e iji eraneb moik igefuon unam ise ijia jajiavo buk oifian abej. Regavo oifian iji fu izeg bu mukorigia ifejdiakma bakin. Ijefuon maiji bu Jesu ma vierafene oi karoivo bado buka unam zuarunam vako ijia vak.  
\v 11 Regavo oifian iji fu Godri fuon vierafenma ijia kuamga fu jon ruain ijefuon jaka ik fuon iji mukorigia rej. Regavo ja vuak iji na fas ijia isoim nijiainva iji jaka bomana vierafe ga fuka deajidiain ga bomana jufdiain. Ijefuon ja unam ise iji na fas ijia isoime kuardiainva iji jaka nuigafiame ruain. Ja ire oifiaigin iji renma ijar ja ifejdiamga ja una na oijmieme nun ruain. Ja ijegrenva ijia ja una enun revo e ise iji fu jana oino iji jan dab vajai fian mame ruain. Regavo unam jon izeg ja renva ijar nijaiduomoni jan unam jon amareme una ruain ijefuon iviakma ise kafo ja fak buka bakin.   
\p
\v 12 Regavo fas iji na amur isoime nijiainva iji na e iji fu ise reoino ijiga e iji fu fine vajai fian abeno ijiebuon vuak ijesugin isoime nijiainva bakin. Regavo vuak bomana iji na vierafene abe samakaf isoime nijiainva iji ja Godon nifak ijia izeg ja no oijmuovo iji mukorigia game vierafekfuon.  
\v 13 No jon izeg ja no oijmuovo iji faiga fuka oimaduomga noka daromene ikreoij. Regavo no ijesugin oimarvo bakin gavo noka Taitas fu oimarknum ruainma no ijin gava fuka bomana oimaduin. E uruvana ja oifian fuon ja mukorigia ifejdainva ijefuon fu oimarknum rokga no madu noka bomana oimaduin  
\v 14 Regavo nan amur Taitas kuardame kuai naka bomana joifuon aroikaravno kuain. Regavo rad fu jon vuakga ja irerag na kuardiainva ijin rene oi karoime una God ma vierafeknum unam fuon ma iji ren. Regavo ni vierafe tavan bog vuak na ja kuardiavo iji na vuak ma ijesugin kuardiav. Ijefuon na Taitas fu rokga na game vierafega amur na joifuon aroikarainva iji na kufuimenva bakin revo na ga fuka maga na ijefuon aroikarain.  
\v 15 Fu vuakga jaka jume simariain revo ja magaga oimardaknum afen. Regavo madu jaka vuak fuon fu kuardiainma iji mukorigia igain. Ijefuon fuon izeg fu ja oijmiainma iji fuka vek iji vierafeknum oin.  
\v 16 Na iviakma na ja ma vierafene jon biduav ijefuon naka ma bomana oimarev.   
\c 8  
\s1 Mon karme ifenamivo ijin  
\p
\v 1 Efnun igi no ai Mesedonia guf ijia God fu izeg e iji fu ma vierafejo bu sos ijia afuime ikrejo iji marediame ifejdiako bu ikreoijo no iji kuardiakrejo ni faif.  
\v 2 Buka ma vajai fian abe ruain gavo God fuka bu marediamo ijefuon buka oimarknum ikrej. Buka e sinuom bakin gavo bum efkin oimarknum mon buon iji karame no vajuin.  
\v 3 Regavo naka ma kuardiav e iji bum koikbuon vierafene mon ka mamkanuk karme no vajuin. Regavo bu mon buon bu ikrene abejo iji buka asime ajie gafa ijia vajuin. Regavo iji bu renva iji bu e kafob kiava bu renva bakin revo bum buon vierafenva ijia ijeg ren.  
\v 4 Buka no soisoime kuo bu vierafe buka e sinuom bakin ai Judia ijia karine God ma vierafejo iji ifejdiakno kuin.   
\p
\v 5 Bu ijeg kuarduin revo buka irerag no vierafenva iji bu ma asiduome gafa ren. Amur iji buka koikbuon kege una isuf igeg God vajain. Areme bu kuai, God fu vierafenma iji no vuak irerag ja nijaiduinva iji igiame jajiame kegokno kuain.  
\v 6 Regavo unam iji mon karame e sinuom bakin iji vajiakfuon iji fu e Taitasri ai Korint ijia jana aneren. Ijefuon no soisoime kuaga fur koikfuon vua ijia unam ma iji fu anerenma iji ifejdiaga ja rene barekfuon.  
\v 7 Regavo jaiji ja unam kafokafo ja reoijo iji jaka mukorigia vierafeknum reoij. Jaka unam iji God ma vierafejo ijigam Godon vuak kuaivo ijigam jon izeg ja vierafene reoijo ijia jaka daro bomana aben. Regavo madu unam ma iji izeg ja oijon ijekma e ifejdiavo ijigam jon ja no oijmuovo iji buka biom mamkanuk ren. Ijefuon no madu soisoime kiavno ni unam izeg ja mon vajuinamivo ijia nika tavan bog ijeg mukorigia reof.   
\p
\v 8 Regavo igia fai na akai abedeme kia jaka e ifejdiavno kiavo bakin. Regavo nam izeg e God ma vierafejo ai Mesedonia ijia karinva ijieb e ifejdiavo na iji nijaidiav. Regavo iji na renva iji nam madu jon izeg ja e oijmiavo iji kafu na ma ijin gakafie na iji vierafene ren.  
\v 9 Ja E Bomana nuvuon Jesu Kurais fu ma rediamo iji jan vierafen. Regavo madu igia fai. Jesu Kurais fu Godon ar iji sanainma ijia fuka ire uruvana zarain revo fu ijia areme una nuvuifuon moikigia e sinuom bakin renma iji jan vierafen. Jesu Kurais fu vierafero fu ijegrenki ja una Godon unam ma iji reoijo ijia jaka sinuom zaraikro fu ijeg ren.   
\p
\v 10-11 Regavo na vierafe ja igi na kuardiakrejo ja ijeg rekfuon. Ja juaivasia barenma ijia jar e ifejdiakuai vierafe ga madu jar amur anerene mon kanafuin. Ijefuon ni mon iji ja kanafuinva iji buin iji kar baref. Ijefuon ni uri vuak iji ja amur kuai no e ifejdiakno kuainva ijin mimatame mon iji ja nainva iji kege ref.  
\v 12 Ja ire kafo e vajiakuai vierafekva ni vajiaga God fu oimarek. Regavo ja ire kafo baga iji ni aref. Ijefuon maiji God fun ire iji ja nainva fu ijesugin vierafen. Regavo una ire kafo jaba nainva iji fu bomana vierafeno bakin.   
\p
\v 13 No vierafe e iji bu ire iji ja vajiainva iji kege bu una e sinuom zaraike jaiji ja sinuom bakin rekfuon iji noba ijeg vierafen. Regavo no vierafe irerag fok ja rejo iji jaka buna besum afuim kariokuai no iji vierafen.  
\v 14 Ja iviakma sinuom iji ja zarainva ja ijia e foir iji ifejdiakfuon iji fuka siban aresren. Ja ijeg ifejdiaikin tavan rad bu ire kafo zaraikva busik una ire kafo ja vierafekva bur ifejdiame vajiakfuon. Ja ijegrekva ja buna besum sinuom afuim kekfuon.  
\v 15 Regavo vuak ijefuon iji bun usuibe Godon buk akaij ijia isoime ijeg kuai,  
\q1 E iji fu ire uruvana karmo iji ar fuon ijia buka ire uruvana naoivo bakin. Regavo e iji fu ire sibank karmo iji ar fuon ijia ire fuon iji fuka zaraik.  
\m (Revo vuak ijefuon ma iji E iji erar fu ire uruvana karmo iji fuka tavan bog e ikvajiamon ijefuon ire fuon iji fu sibank aresren. Regavo erar fu tavan bog ba ire karmo iji fu e kafob ire fu vajavo ijefuon fu siban aresrenmano kuain. Ijefuon roga no unam besum ijeg nuvuon ifenamiknum karinki noka besum afuime karikfuon).   
\s1 Bu Taitas kuava fu ai Korint ijia vainma ijin  
\p
\v 16 No Godon bomana oimarev ijefuon maiji fu Taitason oij ijia izeg nor vierafenva ijeg vierafe mama fu ja mukorigia oijmiame ifejdiakafa vierafen.  
\v 17 Ijefuon maiji fu ijia ja giak vuakfuon vuak iji no kuardavga fuka bomana oimarme abe maren. Regavo fun amur oifuon ijia una vua ja ifejdiakafa vierafen ijefuon no kuava fuka oimaren.  
\v 18 Regavo fu vuako ijia no e be fu God ma vierafeno jan vierafenva iji kuaga fu fusik vuak. E iji fuka God ma vierafeknum Godon vuak iji sos kafokafo ijia mukorigia kuaimon. Ijefuon e God ma vierafejo igia karinva iji bu fu ma vierafene agordav.  
\v 19 Bu fu agordavo ijefuon e igi God ma vierafejo iji bu kua, Aiji For ga e funa oijo iji ifejdiame buna mon iji no e sinuom bakin ai Jerusarem karinva iji ik vajainva iji kege va vajiafno kuain. Fu mon iji kar va vajiaga e roin bu ijia giame vierafero no e sinuom bakin ai Jerusarem ijia karijo iji ifejdiakro bu ijeg vierafej. Regavo madu irerag no rejo iji no E Bomana iji aroikfuon no iji rej.   
\p
\v 20 Ijefuon noka buna ik iji rene mon iji abe mukorigia samuaknum e ifejdiak. No ijegrenki e kafo buba kuai no mon dab isema ikrene kafo niesainvano kuaik.  
\v 21 No vierafe noka unam ma ijesugin rekuai vierafen. Noka unam ma iji E Bomana nuvuon fu oimaimo ijia rejknum ga madu ema oimardiavo ijia rekuai vierafen.  
\v 22 Ijefuon no madu kainuvuon be kuaga fu buna vuak. No unam kafokafo ijia kukma una fu biesuagain revo fuka tavan bog oimarknum e ifejdiakafa vierafen. Regavo iviakma fun ja ma vierafen ijefuon fu bomana ja ifejdiakafa vierafen.  
\v 23 Regavo e kainun Taitas fu nosik besum ikrene ja ifejdiamon. Revo e nokarok (2) kaifnuvuon bu funa vuako iji bu e God ma vierafejo igia karinva ijieb bu kega bu buon fateroin ijia vuak. Revo ik iji bu rene vuako ijia e kafo bu giame una Jesu Kurais dab oimardak.  
\v 24 Ijefuon izeg ja jon oijmanamivo ijin e iji vuako iji nijaidiaga e God ma vierafejo bu ijia giame vierafekfuon. Bu giame vierafero no joifuon aroikaravo iji no ma ijefuon aroikaravro bu ijeg vierafek.   
\c 9  
\s1 E God ma vierafejo iji roin ifejdiakfuon ijin  
\p
\v 1-2 Na vierafe a e God ma vierafejo ai Jerusarem ijia bu sinuom bakin karinva iji ifejdiakuai vierafen. Ijefuon na una vuak ijia kafo naba isoime kuardiak. Na joifuon naka aroikaraknum e ai Mesedonia karinva iji kuardiain. Na kia e ai Akaia ijia karinva iji bun juaivasia amur barenma ijia anerene e ifejdiakuai kanafuinvano kiain. Na ijeg kuardiavga e uruvana buk madu buka ifejdiakuai vierafen.  
\v 3 Regavo iviakma na e kaifnuvuon iji uniaga bu ijia vuak. Bu vuako ijia bu ire iji no joifuon aroikarainva iji bu ijia giakfuon. Regavo e ijieb ifejdiaga ja ire iji ja e ifejdiakfuon na kuardiainva iji kanafume samuakfuon.   
\p
\v 4 Regavo e kafo bu igia ai Mesedonia ijia nana ijia vuakva bu giamga jaba mukoi samuaigakva noka bomana jufdiakfuon. Ijefuon maiji nom vierafero jaka samuainro no ijeg vierafene kuardiainva ijefuon noka jufduokfuon. Ijefuon jaba samuakva jak jaka bomana jufdiakfuon.  
\v 5 Ijefuon na vierafe na kaifnuvuon igi kiaga bu amur ar jon ijia vuak. Bu ijia vuainki bu ja ifejdiaga ja mon uruvana ja e ifejdiakfuon kuainva iji kanafume samuake noson rad vuakfuon. Revo jaba samuainva ijia no vuakva ja uri migegare vajuokva iji no vierafe ja oimarknum vajuokva bakin.   
\s1 Oimarknum vajiavo ijin  
\p
\v 6 Regavo ni vuak igi na kuardiakrejo iji mukorigia faime vierafef. E iji fu juar uruvana meno iji fu juar uruvana masime duok uruvana karek. Regavo e iji fu juar sibank meno iji fu juar masime duok sibank karek.  
\v 7 Ijefuon erar fu e kafo ifejdiakafa vierafekma fuka fuon izeg fu vierafeno ijia mon e vajiakfuon. Regavo fub vierafero bu kiekievo ijefuon naka vajiakro fub ijeg vierafek. Ijefuon maiji God fu e iji erar fu oimarknum vajiamo iji bomana oijmak.  
\v 8 A ijeg rekma God fu tavan uruvana ire iji a nainma iji azan ijia kafo madu vajak. Fu vajaga a ire uruvana a vierafenma iji a ijia kenki tavan bog a una e roin ifejdiakfuon.  
\v 9 Regavo vuak ijefuon iji bun usuibe buk akaij ijia ijeg isoime kuai,  
\q1 E ma iji fu tavan bog oimarknum e iji sinuom bakin iji ifejdiam. Fu ijegreno ijefuon e bu unam ma iji fu reno ijefuon tavan bog fuifuon God oimardaokno kuain.   
\p
\v 10 Ijefuon Godri e iji juar meno iji uij vajaga fu oin. Regavo ire uij fu oino iji Godri ifejdiaga bu tavuame marknum duv. Unam besum ijeg Godri ire kafokafo iji fu vajiaga ja karvo ijefuon azan ijia una ire uruvana vajiaga ja una madu e kafo ifejdiakfuon.  
\v 11 Regavo God fu tavan bog ifejdiaga ja unam kafokafo ijia ire zarainki ja e ifejdiame efkin vajiakfuon. Ja ijeg efkin vajuinki nosik kege una e roin vajiaga bu kege una Godon oimarek.  
\v 12 Regavo ik iji ja rene Godon e iji sinuom bakin iji ja ifejdiavo iji fu ijesugin bakin. Regavo jak e uruvana aferdiafo ijefuon bu una Godon oimarev.  
\v 13 E uruvana bu ja rejo iji giame Godon oimarek. Ijefuon maiji ja Jesu Kuraison vuak ijesugin nijaidiavo bakin gavo jaka vuak ijin jame e uruvana ifejdiame sinuom jon iji buna vajuinamiv.  
\v 14 Ijefuon buka uruvana oimarknum joifuon sirimamek. Ijefuon maiji God fun ja mukorigia ma rediame ifejdiainma ijefuon ja iji una bu ifejdiav.  
\v 15 Ijefuon ni roga no besum God izeg fu no marduome Farifuon abe muinma ijefuon fuon bomana oimaref.   
\c 10  
\s1 For fu ik fuon fu reno iji mafainma ijin  
\p
\v 1 E roin bu kuai na tavan roin jana fijo iji naka vuak isuar kuaiv revo tavan iji naba jana fijo iji naka vuak ma gigikin ja kuardiavno kuaiv. Regavo na Kurais izeg fu oi mafaime kabuaikabuaikin renma na ijegrene vuak soisoigin ja kuardiakrej.  
\v 2 Na vierafe na vuakva na ja vuak gigikin kuardiakfuon iji naka ba ijeg vierafen. Regavo na vierafe na e iji bu kuaiv noiji no e moik igeko bu kegoijo no ijeg kegoijno kuaivo na e iji vuak gigikin kuardiak.  
\v 3 Regavo iji fun ma no moikigia karioij gavo no oinuvuon ijia no e God ba ma vierafejo bu moikigia karine bijaimoijo ijeg bijaimokuai vierafenva bakin.  
\v 4 Regavo madu sinuom iji no kege bijaimoijo iji bu e moik igeko bu kege bijaimoijo ijekin bakin. Regavo sinuom iji fu Godon sinuom fur kege daro miain. Ijefuon no iji kege ar iji Setan fu azi bume fino ijia vakva no buja korek.  
\v 5 Regavo no Godon sinuom bijaivo ijar kege e iji aroikarame vuak kufuimeknum Godon vierafe iji abe buzeivo ijiebuon vuak ijin kaniatuav. Regavo madu no Godon sinuom bijaivo iji kege e raremoknum e iji kega bu una oi karoime Jesu igame unam fuon iji jav.  
\v 6 Regavo amur iji no vierafe jaka vuak iji Jesu Kurais fu kuainma iji jan igiavoga ja iji no nijaiduokfuon. Ja nijaiduokva no e iji eraneb bu Godon vuak ma iji no nijaidiaga buba igiavo iji kege vajai fian vajiak.   
\p
\v 7 Regavo ja no guovo iji ja guoga noka e zazaikin ijefuon maiji ja vajai surif nuvuon azan ijesugin guov. Regavo ebe erar fu ijia kuaik naiji na Jesuon vuak abe kuaimoijno kuaikma iji ni vierafero fu ijeg kegoino iji no madu no ijegreoijoro fu ijeg vierafekfuon.  
\v 8 Regavo noka E Bomana daro fuon fu no vajuinma ijefuon bomana aroikarak. Regavo daro iji fu muinma iji no ja arafiriakva bagavo noka ja ifejdiako jaka daro abej. Ijefuon na daro iji fu miainma ijefuon naka oimarknum aroikarav.  
\v 9 Regavo fas igi na isoime nijiavo iji ja jukva na iji isoim nijiavo bakin.  
\v 10 E roin bu kuai Foron fas iji buka darokin ga fu vuak ma iji ijia isoinvano kuain. Regavo tavan iji fu nona igia fina iji fuka e ma ga vuak fuon fuka ma bakin.  
\v 11 Regavo buka vuak igi vierafekfuon. No jana ba ijia karinva ijefuon no vuak ijeg fas ijia isoime nijiav. Regavo no jana ijia karikva vuak irerag no darokma fas ijia isoinva iji no ijia ir nuvuon ijia mimatame nijaidiak.   
\p
\v 12 Regavo no vierafe noba e iji bu koikbuon kam ajievo ijiena besum ganamiknum karikfuon bakin. Buka koikbuon kege una buon mazim ganamiknum vierafejo iji no giamga fuka ba maren.  
\v 13 Regavo noiji noba ik nuvuon no rejo ijia aroikaravo uri buin ijia mujuikma aroikarak. Regavo nom ik nuvuon izeg God fu no e roin ifejdiaknum ga ja e Korintko iji ifejdiakfuon fu muinma no ijefuon aroikarakfuon. Regavo ik iji fu no vajuinma iji no ja ifejdiaga ja God ma vierafejo ijia ja e darokin rekfuon fu ijin vajuin.  
\v 14 Ijefuon fun mardo nor daro abene ja samuagdiak ijefuon maiji nor amur Jesu Kuraison vuak ma iji abe jon vuain.   
\p
\v 15 Regavo madu no e kafokafo ik bu rejo ijefuon aroikarakva bakin. Regavo nom ik nuvuon God fu muinma no jana rejo no ijesugin aroikarak. No vierafe ja jon izeg ja God ma vierafejo iji fuka ma gigikin rega ja e damuigin rene karikfuon.  
\v 16 Regavo rad no madu Godon vuak ma iji abe Korint asime moik kafo ijia kuardiame vak. Ijefuon maiji noba ar iji e kafob ur ikrenva ijia ikreknum una ik buon ijefuon aroikarak.   
\p
\v 17 Regavo vuak ijefuon iji bun usuibe Godon buk akaij ijia ijeg isoime kuai,  
\q1 Erar fu vierafe fu aroikarakma fuka E Bomana ijefuon ik iji fu renma ijefuon aroikarakno kuain.   
\m
\v 18 Ijefuon e iji erar fu koikfuon aroikaramo iji vuak fuon fu kuaimon iji fuka ma bakin. Regavo fu E Bomana ijar koikfuon e ijefuon oij ijia game abe aroikma ijar fu marek.   
\c 11  
\s1 For fu e iji vuak kufuime nijaidiavo ijiebuon kuainma ijin  
\p
\v 1 Efnun igia faif na vuak igi na kuaikrejo iji naka vuak ise kafo ijekma kuaikrej. Ijefuon e-e ni oi mafaime isuar kari faike na kuaikfuon.  
\v 2 Na God fu izeg ja bomana vierafeno ijeg nak naka ja bomana vierafej. Na vierafe na bara iji fu baru turamo bakin gavo fu baru besum ijesugin oi mame fivake jainma ijeg na ja kege e iji bu maturainva igeg Kurais vajakafie vierafen.  
\v 3 Regavo na vierafe e roin buka nigen jon iji kam arafiriadiaga ja Jesuon unam iji ja mukoi kegoijo iji jaka arekrejo ijefuon naka jufdiem. Usuibe tabar Setan fu bara Iv biesuamga fu unam ise iji ren. Regavo na jufdiemo iji e iji bu vuak kufuij iji bu nijaidiaoijo ijieb biesiakva ja Kuraison unam ma iji ja reoijo iji jan uzame vak.  
\v 4 Regavo vuak iji na ijeg kuardiavo ijefuon maiji tavan bog jaka oimarknum karine e kafokafo vuak kufui kafo bu kuardiavo jaka bu fazdiav. Regavo vuak bu kuardiavo iji bu Jesuon vuak na kuardiainva ijefkin iji kuardiavo bakin. Regavo bu kaven nibe ga vuak nibe ijin abe kuardiavo ja ijin faime jajiav. Regavo una Godon Kaven ma iji ga vuak fuon ma iji na kuardiainva iji jan ijia arev.   
\p
\v 5 Ja vierafe e iji bu ja vuak nijaidiaoijo iji buka e ma revo na vierafe bu na asidieme ma reoijo bakin.  
\v 6 Regavo jakafu ja vierafero vuak na kuaimoijo iji na isema kuaimoijoro ja ijeg vierafej. Regavo ni vierafe vuak nun na kuaimoijo iji naka vuak ma ijesugin vierafene kuaimoij. Regavo madu unam nuvuon kafokafo no kegoijo ijia non samakaf kege nijaidiain.   
\p
\v 7 Na Godon vuak ma iji abe ja nijaidiain gavo naba monfuon ja nimdiain. Na ijegrenva ijia na if jon kege mamkanuk revo naiji nam una e kabuaikabuaikin ren. Regavo ja vierafega unam iji na reoinva iji nabe isema reoin?  
\v 8 Regavo tavan iji na ijia jana fioknum Godon vuak abe kuardiaoinva iji bu e God ma vierafejo sos kafokafo ijia karinva ijieb ifejdien. Bur ifejdieme mon vajiekoga na una joifuon ik ren. Revo iji na renva iji naka mon buon iji niesame nui samuanamiknum una joifuon ikreoinva igeg na ijin ren.  
\v 9 Regavo kaifnun ai Mesedonia ijia vuainva ijieb ire kafo na vierafenva iji bur kege vuain. Ijefuon naba ja nimdiaknum afikin abe miak. Regavo na jon navaime finva bagavo na vierafega rad naba una ijeg rek.  
\v 10 Na Jesu Kuraison vuak ma iji fu oinun ijia ikreno ijefuon naka ma kuardiakredo naba rad una jon navaikfuon. Ijefuon vuak igi na aroikarame kuaivo iji fu e be erar ai Akaia igia fino ijar na bijukma bakin.  
\v 11 Regavo ja vierafega na irerafuon naba jon navaime fij? Ja vierafero nakafu ja naba oijmiavo ijefuon na ijegrejoro ja ijeg vierafej. Regavo na ijegrejo bakin naka ja uruvana oijmiavo iji fun Godri gieme mukoi vierafen.   
\p
\v 12 Na vierafe ik igi na mon bakin nam rejo iji naba arekfuon. Na magaga ijia ikrene vaga e iji bu kufuimene vuak nijaidiaoijo iji bu ijia giekfuon. Bu ijia gieme vierafero ik buon bu reoijo iji fu nuvuon ijekma mazinva bagavo bu aroikaravo iji bu ijia arekfuon.   
\p
\v 13 E iji bu ik buon bu reoijo ijefuon vuak kufuimene e biesiaoij. Bu ijeg kufuimeoknum kuai no afasor Jesu Kuraison vuak ma iji abe e nijaidiaoijno kuaiv.  
\v 14 Regavo unam ijeg bu rejo iji no oiserduomo bakin. Ijefuon maiji igia fai Setan ebuon bomana iji fuk fu una Godon anera sanainma ijegrekafa vierafekma iji fu rekfuon.  
\v 15 Ijefuon e iji bu Setanon ikreoijo iji bu koikbuon kege una e Godon ikrejo igeg kegokva jab giame oiserek. Bu ijegreoij gavo tavan radkma ijia irerag bu reoijo ijieb una bu kam arafiriak.   
\s1 For fu vajai fian abenma ijin  
\p
\v 16 Na vuak na amur kuardiainva na iji una kuardiakrejo ni faif. Ja e roin jab vierafero naiji na e iji bu vuak isema vierafeoknum aroikaraoijo ijekinro jab ijeg vierafek. Ja ijeg vierafekva ni e ijekin iji ja oimarknum vuak buon fazdiavo ijeg ni na oimardief. Ja oijon ijia ijeg vierafejo ni oi mafaime fazdieke na ukakbe aroikarak.  
\v 17 Regavo na vuak ijeg kuaime aroikaravo iji na E Bomana ijar kuardien vo vierafe miega na ijeg kuaivo bakin. Regavo vuak ijeg na kuaivo iji na e iji bu nigen iserenva bu kuaivo na ijeg kuaiv.  
\v 18 Regavo e uruvana buka e iji bu moikigia karine aroikaravo ijeg aroikarav. Ijefuon nak na ijeg aroikarakfuon.  
\v 19 Regavo ja vierafero ja e iji bu vuak mukorigia vierafejo ijekin ro ja ijeg vierafen. Ijefuon ja uri e vuak kufuimeoijo ijiebuon vuak iji jaka oimarknum faiv.  
\v 20 Ijefuon e kafo bu ja kiaga ja buifuon ikrejo iji jaka oi mafaime ik rediav. Regavo madu e kafo bu ja kam am ukakna igeg kiakiaga jaka oi mafaime uri buifuon ire kafokafo reoij. Regavo madu bu koikbuon kam e mamkanuk rene ja bu nikatet giaknum ga uikinik jon ijia kaniav gavo jaka oi mafaime ba una ijefuon rej.   
\p
\v 21 Regavo no unam ijekin kafo jon rekuai vierafebatie iji no ijeg rekfuon. Regavo noba ijegrekuai vierafen.  
\p Regavo e iji bu buon aroikaravo ijeg nak naka giriesame vuak besum ijefuon aroikarak. Regavo igi na iviakma kuaivo iji naka una e iji isema vierafene kuaimoijo na ijeg kuaiv.  
\v 22 Bu vierafekuai bu e Ibrukono kuaiv ga madu bu e Eburamon uifarif ga madu bu ai Isrer ijia ruainvano kuain. Regavo naiji nak na e Ibruko revo madu na e Isrerko ga e Eburamon uifarif ijefuon naka ik nun na rejo ijefuon aroikarak.  
\v 23 Bu ijegreoknum kuaivo iji ja vierafega bube ma Jesu Kuraison ikrej? Bu ma fuifuon ikrejbatie bu afikin igi na biediainva iji buk madu bu ijeg biediakfuon. Regavo bu bakin ijefuon bu ma e afasor bakin ga nar na ma Jesu Kuraison ikreoij. (Na vuak nun iji naka e vuak isema vierafene kuaivo ijeg kuaiv). Regavo nan nar tavan bog giriesame ik uruvana reoin. Na ijegreoko bu tavan uruvana na kanieknum dab dibur unievo na guakfuon ijia na una giriesain.  
\v 24 Regavo e Jius ijieb naki imut roin (5) aferdieme vajai nun dab teti nain (39) ijeg fijiemoin.  
\v 25 Regavo tavan nokbek (3) bu in ijia abe kanien. Regavo tavan besum (1) bu mun karme kanien. Bu vierafe buka kanie na guakro bu ijeg ren. Regavo tavan nokbek (3) na sisim ajieme saof azan ijia vakga sisim iji bu iseren. Regavo tavan be na una madu ijia vakga sisim fu iseremga na naki besum (1) ga tavan besum (1) ijeg na saof azan ijia jaraiganaoin.   
\p
\v 26 Regavo naka unam afikin uruvana biediame vajai fian abeknum oin. Regavo naka do uruvana firamo ijia baimoin ga madu e Jius ijigam e kafo ijieb na niedien. Na tavan uruvana na mai guf ijia juvknum oin ga madu ar iji e buba karinva na ijia oin. Regavo madu na saof uruvana foino ijia juvknum oin. Regavo madu naka e iji bu kuai bu God ma vierafejo kuaiv revo unam buon buka isema kegoijo na e ijiena juvknum buna oin.  
\v 27 Na tavan uruvana naka ik gigikin uruvana reoijo ijefuon tavan kafo naka ninaijo bakin. Regavo tavan uruvana naka do kafiem ga vasiaguamdiemo iji naka magaga ikreoin. Regavo tavan uruvana naka duok ga sinuom bakin ga ka ma iduadiem gavo naka magaga ijia ikreoin.  
\v 28 Na unam kafokafo na vajai fian abejo iji kafo nan kuardiain gavo roin bakin. Regavo ire iji na vajai fian abenva ijia na e iji bu vuak kufuimene nijaidiaoijo iji nan asidiain. Regavo ire afikin fok ijiebuon uf ijia ire ma bomana iji naka e iji God ma vierafejo ar kafo ijia karinva iji bomana vierafen.  
\v 29 Ijefuon tavan kafo e roin bu buon ma vierafejo ijia zazaivo nak na izeg bu rejo iji na vajai nun ijia faiva naka oifiadien. Revo tavan kafo e roin bu unam ise ijia arikaniaga bu una ise rejo na oinun ijia naka bomana ziev.   
\p
\v 30 Regavo na vierafe na aroikarakva iji na unam izia na giriesame ire kafo renva na ijefuon aroikarakva bakin. Regavo naka unam izia na zazainva ijefuon aroikarakfuon.  
\v 31 Regavo vuak igi na ijeg kuardiakrejo iji fu God E Bomana Jesu Kuraison Asoij ijar gienma ijefuon na kufuimekfuon bakin. (Revo God nuvuon fuka e darokin ijefuon na vierafe noka tavan bog fuon oimarkfuon).  
\v 32 Na ai Damaskas ijia fijo ijia e Kin Aretason rotit ijia ikrene e samuagdiamo ijar na dab dibur uniekafa vierafen. Ijefuon fu efuon juokarijo iji kiamga bu vien bu arume mai ijia vako ijia na samuagdieme iren.  
\v 33 Regavo e kaifnun ijieb na dab kamui bomana ijia abakarime dab fak bu kirainva tit ijia abesen. Bu ijia abesevga na irif ijia ari ko ruako e iji bu na tofdiekuai vien ijia irenva iji bu nisaidiega baga bu ijia aren.   
\c 12  
\s1 For fu nimamaime varur gufi gainma ijin  
\p
\v 1 Na aroikaravo iji fu ire ma be rekma bakin gavo naka magaga aroikarakfuon. Na aroikaravo iji na ire iji na nimamainva ijiga ire iji E Bomana Jesu Kurais fu nijaidienma na ijefuon aroikarak.  
\v 2-4 Na vierafe juaivasia fotin (14) barenma ijia e God ma vierafeno be fu varur kaf ijia ajie vain. (Revo iji fu vainma iji kafu nimamaime vain ga fu ema ijar koikfuon ajie vainma iji naba vierafen. Regavo unam iji fu Godri fuonkua game vierafen). Regavo na ma vierafe varur gufia Godon ar ma iji bu kua Faradaisno kuavo ijia fu vainma ijia fu ire kafo giaknum fain. Regavo ire iji fu fainma ijiga giainma iji fu izeg dab kuardiame nijaidiakma bakin. Revo madu fun Godri bijuido fuba e kuardiak.   
\p
\v 5 Na aroikarakva iji na ire ka mukor iji fu renma na ijefuon aroikarak. Regavo na una ire kafo ijiebuon aroikarakva iji nam ire kafo na izeg zazaivo na ijesugin aroikarak.  
\v 6 Regavo na koiknu aroikaravo iji na e vuak isema vierafejo ijekin bakin. Ijefuon maiji vuak nun na kuaivo iji naka ma ijesugin kuaiv. Regavo madu e bu na gieme dab bomana vierafekfuon iji naka isediem gavo bum ire iji na reoijo ijiga vuak na kuaivo ijesugin giame vierafekfuon.   
\p
\v 7 Regavo God fu vierafero nakafu ire ma iji varur ijia fu nijaidiema na giainva ijefuon aroikaravro fu ijeg vierafen. Ijefuon fu vajai fian abe mienma iji fu Setanri efuon kuamga fu na kanienma igekin. Fu ijegrega iji na aroikarakfuon iji na ijia arekro fu ijeg ren.  
\v 8 Ijefuon na tavan nokbek (3) E Bomana iji kuaga fur vajai fian igi abe vakro na iji sirimamene naka fu ejafain.  
\v 9 Na ijeg ejafavga E Bomana fu kie, Unam nun na e fok na ma rediavo iji fu afak fun aresren. Regavo a zazaimo ijia daro nun ijar a mukorigia dasumdamno kien. Ijefuon naka unam iji na zazaivo ijia aroikarakin Kuraison daro iji fu nun navak.  
\v 10 Ijefuon na zazaivo naka bomana oimarev. Regavo unam kafokafo ijia na vajai fian ga afikin biedia ga e kafob musikieme vuak ise kuardievo iji naka ijia daro abej. Regavo unam kafokafo ijia afikin iji na biediavo iji naka Jesu Kuraison fateroin ijia na biediav. Revo na afikin iji biediame zazaivo iji naka bomana oimarev ijefuon maiji Kurais fu ijia ifejdiega na daro abej.   
\s1 For fu e God ma vierafejo ai Korint ijia karijo ijiebuon bomana vierafenma ijin  
\p
\v 11 Na Kuraison afasor rene jana besum ikreoin gavo jaba na arordienva ijefuon na koiknu aroinamiv. Regavo e iji vuak kufuimene nijaidiavo iji bu kuai na e iseno kuaivo iji bukafu ma kuaiv revo vuak nun ga unam nun ijar fuka ma bu asidiain.  
\v 12 Na jana ijia finva ijia na afasor rene Godon ikrene unam sumakin ma iji ijia nijaidiava ja gieme vierafen. Regavo naka e kabuaikabuaikin rene nuibakin ikrekoga God fu ire sumakin kafokafo rene ja nijaidiain.  
\v 13 Regavo e God ma vierafejo bu sos kafokafo ijia karinva ire iji na buon renva ire besum iji na una igia jon ren. Regavo ire besum naba renva iji naba monfuon ja nimdiain ijefuon ni unam iji na isema renva iji gieme aref.   
\p
\v 14 Na ijia vuaka ja giainva iji na naki nokarok (2) ijia ja giain. Regavo iviakma igi na una madu kanafudo na ja giak vuakfuon. Na una ja giak vuako iji na vierafe naba una ire kafo ja nimdiakfuon ga na oijon ja izeg una Jesu vajavo na ijin giak vuak. Ijefuon maiji bu afijaf ijieb ire fok eofijaf bu vierafenva iji vajiavo bakin revo bu eofijaf ijieb ire fok afijaf bu vierafenva iji vajiav.  
\v 15 Ijefuon na vierafe na vajai nun abe vo ire fok nafak naoivo iji naka ja vajiak. Regavo na ja bomana oijmiakva jabe jasik una na sibank be oijmiek?   
\p
\v 16 E roin bu vierafero na kufuimene ja biesiaknum aferdiavoro bu iji vierafen. Regavo iviakma jan gieme vierafe na monfuon ja nimdia ga afikin kafo vajiavo bakin. Regavo madu naba vuak kufuime kuardiaknum biesiain.  
\v 17 Regavo madu jakafu ja vierafero e iji na kiava bu vuainva iji bu ja biesiame ire kafo kamaziakuai vuainvaro ja iji vierafen. Regavo iji na ijeg vierafene kiava bu vuainva bakin.  
\v 18 Regavo na Taitas soisoime kuava fu jon vuakrega no kainuvuon be kuava fu fusik vuain. Regavo Taitas fu vuainma ijia fuba ja biesiame ire kafo nimiaknum kamaziain? Na vierafe fu ijeg fuba ren revo fuka izeg na renva fuk fu unam besum ijeg jon ren. Ijefuon maiji no fusik no kaven ni besum ijar oinuvuon ijia ikreno ijefuon fu ijeg ren.   
\p
\v 19 Regavo jakafu ja vierafekuai noiji no tavan bog nifak jon ijia noka unam izeg no mukoi kegoijo ijin mafaivoro ja iji vierafen. Regavo iji noka ma bakin. Regavo vuak iji no kuaimoijo iji fu Jesur vierafe vajuoko no Godon nifak ijia ja kuardiav. Regavo jaiji jaka kaifnuvuon no oijmiavo ijefuon ire fok igi no kuaiknum reoijo iji no ja ifejdiaga ja e darokin rekuai no ijin rej.  
\v 20 Regavo na vierafe na ijia vuakva na giamga jaba unam ma ijia karijo na giakva naka ba oimarek. Regavo madu na vua ijia unam be jaba vierafenva iji rekva jaka ba oimarek. Regavo na vuakva nakafu jana musikuaime deajir abeknum vo zienamiknum ire iknisanamivo na iji giak. Regavo e roin ja atame tata kariknum bijaiknum ga jaka unam ma ijia ikreknum karikva bakin. Regavo madu ja koikjo kam e mamkanuk rejknum ga vuak ise kuaiknum ga e kafobuon vuak kufui iji kam ma igeg vierafene kuaivo na iji giak.  
\v 21 Regavo na tavan be una vua giamga ja uria unam ise iji amur ja karijo ijeg karigakva God nun iji fuka na oifian miega na nifak jon ijia jukfuon. Fu ijegregakva naka e iji bu usuibe unam ise reoinva iji buba areme una oi karoinva ijiebuon oifian abene niraik. Ijefuon maiji unam buon usuikor iji bu barabaru fudainamime unam ise rejo iji buba aren. Ijefuon naka bomana oifiadieme jufdiekfuon.   
\c 13  
\s1 Vuak radkma iji For fu ju kuardiaknum anadiainma ijin  
\p
\v 1 Efnun na amur tavan nokarok (2) giame vain ga iviakma igi na una madu giakafie rok. Regavo igi na una roko ijia e God ma vierafeno be fu ro kaifuon be God ma vierafeno ijefuon vuak be na kuardiekma iji na Godon vuak iji bu izeg buk ijia isoime kuainva na ijeg rek. Regavo vuak iji fu ijeg,  
\q1 Bu e nokarok (2) vo e nokbek (3) ijeg bu e befuon vuak iji izeg fu isema renma ijin ro na kuardiekva na e iji abe vajai fian mak.   
\m
\v 2 Na amur giame ruain ga ura rir iji na vuainva ijia na vuak kafo e iji ise reoijo iji nan ju kuardiain. Regavo iviakma igi na aibe igia fijo ijia na una madu fas igia isoime kuardiaga ja faik. Regavo tavan be na una jon vuako ijia e kafo eraneb bu unam ise reoijo iji na arordiakva bakin gavo naka kam vajai fian vajiak.  
\v 3 Regavo vuak ijeg na kuardiavo ijefuon maiji eraneb ja Jesuon vuak faikuai vierafekva ja ir nun ijia vuak na kuaivo ijia Jesuon vuak iji faikfuon. Jesu fu e iji ise reoijo iji kam ma vajai fian vajiamo iji fu zazaiknum rekma bakin. Regavo fuka e darokido fu daro fuon iji ja nijaidiakfuon.  
\v 4 Jesu bu abe kuros ijia kanavga fu ema igeg zazain gavo iviakma fuka Godon daro ijia una uri fin. Regavo noiji non Jesuna besum mazinva ijefuon fu kuros ijia izeg fu zazainma ijeg no madu noka zazaik. Ijefuon Godon daro iji no abenva iji noba migegare nijaidiain. Regavo no jana agan besum rene vuak fuon iji abe nijaidiavo ijia Godon daro iji fu oinuvuon ijia ikreknum ifejdiakfuon.   
\p
\v 5 Ijefuon nika koikjo mukorigia ganamiknum biesuanamiga jan jon izeg ja God ma vierafejo ijia navaime karijo iji giaf. Regavo jabe ma vierafega Jesu fu oijon ijia tavan bog fin? Ja tavan bog unam ma ijesugin reokva iji ja vierafero Jesu fuka oijon ijia finoro ja ijeg vierafekfuon.  
\v 6 Regavo noiji jan guome vierafega Jesu fu oinuvuon ijia fino ijefuon no afasor e ir kufuikin bakin.  
\v 7 No Godon sirimamega jab unam ise kafo rekfuon ga jaka unam God fu oimaikfuon ijesugin rek. Regavo no afasor igeg noba daro nuvuon ijin abe e nijaidiavo ijefuon e bu uri no musikuome ziegafuokva iji no bomana vierafekva bakin.  
\v 8 Regavo ja Godon vuak ma iji mukorigia igavo gakva na joisina vuak kafo naba kuardiak.  
\v 9 Regavo e bu vierafero ik igi no afasor rene reoijo iji noba mukorigia reoijno kuaikva iji no bomana vierafekva bakin. Regavo noka bomana oimarek e bu ja giamga jaka e darokin ga ja vuak ma iji igavo bu iji giakva iji fuka marek. Regavo no vek jon sirimamej ijefuon jaka jon ja ma vierafejo ijia ja e darokin rene God ma vierafekfuon.  
\v 10 Na jana naba fijo ijia na fas igi isoim nijiav. Na nijiaikin na vuako ijia naba una daromene ja kege kikekmiame vajai fian vajiak. Regavo na E Bomana daro iji fu mienma iji na abe jon izeg ja ma vierafejo iji arafiriakfuon bakin. Regavo jam jon ja ma vierafejo ijia e damuigin rekfuon.   
\s1 For fu anadiainma ijin  
\p
\v 11 Regavo kaifnun iviakma na ja anadiav. Irerag na kuardiainva ijesugin rene unam ma ijia maturaime oi besum vierafeknum afuime kariof. Ja ijegrekva Godon oijmiamo ijiga afuimo fuon iji fu tavan bog jana navak.  
\v 12-13 Ja tavan bog jon ja anainamivo iji nika mukorigia bog diaik igeg anainamif. Regavo e God ma vierafejo igia karijo iji bu ja anadiain.   
\p
\v 14 Na vierafe E Bomana Jesu Kurais fu tavan bog ja mardiak. Revo madu fu Kaven Akai ijefuon daro ijia samuagdiaga ja izeg God fu ja oijmiamo ijeg ja tavan bog jon oijmanamiknum karivak.