\id 1TI - Namiae NT [nvm] -Papua New Guinea 2004 (web 2014) 
\h 1 TIMOTI 
\toc1 1 Timoti 
\toc2 1 Timoti 
\toc3 1Ti 
\mt1 1 TIMOTI  
\imt1 1 Timotion Vuak Amur  
\ip Timoti fu ai Eisia guf ijia ruain. Regavo asoifuon iji fu e Grik ga asiefuon iji fu bara Jius. For fu una Eisia tavan rir ijia vuak kuardia vainma iji fu Timoti abekin fu ifejdame busik besum ikreok. Areme rad For fu uri Timoti kuamga fu e Efisisko iji God ma vierafejo iji samuagdiakafa vain. Regavo fas igia For fu Timoti vuak ju kuardame kua, Nika e iji vuak kufui nijaidiaoknum e iji ma vierafejo ijiebuon vierafe iji kam arafiriavo iji giamne kuain. Regavo madu fu Timoti kuardamga fu e iji ma vierafejo iji bu izeg Godon sirimameknum aroikfuon iji kuardain. Areme fu unam e sos samuavo bu unam ma ijia reokfuon iji kuardiain. Rene Timoti fu izeg e Tesaronaikako iji ma vierafejo ijiebuon Kuraison mukoi ik rekfuon iji kuardain.  
\iot 1 Timotion vuak kafokafo For fu isoinma ijin  
\io1 \ior 1:1-20\ior* Vuak ma ijesugin nijaidiakfuon ijin.  
\io1 \ior 2:1-15\ior* Godon ar sirimamejo ijia izeg God aroikfuon ijin.  
\io1 \ior 3:1-16\ior* E Godon ar samuavo iji bu izeg kariokfuon ijin.  
\io1 \ior 4:1-16\ior* Timoti fu izeg fioknum vuak nijaidiakfuon ijin.  
\io1 \ior 5:1-24\ior* Timoti fu unam ma ijia kegoknum e ma vierafejo iji nijaidiakfuon ijin.  
\io1 \ior 6:1-21\ior* Unam ma ijia ire ma iji kekfuon ijiga unam ma ijia God ma vierafene karikfuon ijin.  
\c 1  
\p
\v 1-2 Na For e iji Godri kieme daro miega na afasor renva iji nar fas igi isoin. Regavo na Jesu Kurais e iji fu unam iviamkor nuvuifuon amarekafa kuainma ijiga God e iji no karaunuinma ijieb kiega na vuak buon abe e fok kuardiav.  
\p Regavo fas igi na isoime Timoti a nijav. Regavo a Kurais ma vierafeno ijefuon aiji aka farinun igekin. Regavo na sirimamega God Asoi ga Jesu Kurais E Bomana ijieb tavan bog on oifian abene ma redame mukorigia samuagdaga a e iji God ma vierafejo ijia karinva ijiena afuime fiokfuon.   
\s1 E vuak kufuimeoijo iji vuak ju kuardiainva ijin  
\p
\v 3 Regavo Timoti na vierafe aka ai Efisis ijia fik. Regavo na amur na Mesedonia vakafie vuak gigikin na kuardame vainva ijeg na una soisoime kuardavo ni igia fi. Ijefuon maiji e roin bu vuak kufui iji Godon vuak ma iji ijekin bakin iji abe nijaidiavo ijefuon na vierafe a kuardiame kuriairega buka arekfuon.  
\v 4 Regavo nika kuardiaga bu vuak kufui iji buba faivknum vo saifijaf ijiebuon if fok buba kege uruv vierafekfuon. Regavo eraneb bu ijegreoijo iji bu tavan bog ire izar ma ga izar ise ijiebuon musikuaiv. Bu unam kufui iji reogavo Godon unam ma iji bu ma vierafekfuon iji bu ijia arev.  
\v 5 Regavo na vierafe aka kuriairega bu vuak kufui iji bu kuaivo iji buka aregavo oijmanamivo ijar abega fu oibuon ijia rarekfuon. Regavo oibuon fu maturaikma vierafe buon fu samafrega ma vierafejo buon iji fuka ma darokin rekfuon.  
\v 6 Regavo e roin bun unam ma iji na kuainva iji bun uzame una vuak ka ma bakin ijesugin vierafene kuaimoij.  
\v 7 Regavo bu Godon akaij iji e nijaidiakuai vierafen revo vuak buon bu kuaivo iji buba mukoi vierafej. Bu vuak kafo gigikin kuaimoin revo bu vuak ma iji buba mukoi vierafej.   
\p
\v 8 Regavo no vierafe God akaij iji fu Mosison duadok ijia muinma iji fu mado fu ise no rejo iji samakaf nijaiduomo ijefuon no una mukorigia karij.  
\v 9 Regavo no madu vierafega akaij iji fu e iji ma reoijo ijiebuon abedenva bakin ga fu e iji bu akaij iji abe tuaseme ba igame javo ijiebuon abeden. Regavo akaij iji bu e iji ba God ma vierafejo ijigam e iji unam ise kafokafo re ga ba maturaime karijo ijiebuon abeden. Regavo madu e iji buba ire ma iji God oimaikfuon ijia rejo ijigam e iji e kaniavo ijigam e iji bu eofijaf kaniaga bu aoivo ijiebuon akai igi God fu iji abeden.  
\v 10 Regavo madu akaij iji bu barubara fudainamiknum ise rekuai vierafejo ijiebuon abeden. Regavo efarif iji bu efarif roina unam ise rejo ijiga e roin kuniaime tome kevaga bu buifuon ikrejo ijigam vuak kufuimejo ijiebuon abeden. Regavo be iji kot guf ijia vuak ma kafo kege karoime kufuimega e bu dibur vako ijigam e kafo Godon akai ma iji kege tuaseknum ba igiame javo ijiebuon akai iji bu abeden.  
\v 11 Regavo vuak irerag akaij ijia fu kuainma iji fu Godon vuak ma iji na abe kuaimoijo ijefuon guf ijia nam. Regavo vuak ma iji fu God nuvuon sanainma ga ka e darokin ijar nijuin.   
\s1 Izeg God fu Foron oifian abe ma rediainma ijin  
\p
\v 12 Regavo na Jesu Kurais E Bomana ijefuon oimarev. Fu vierafega na ma vierafejo ijefuon fu daro mieme imut bijieme kie na fuifuon ikrekno kien.  
\v 13 Regavo amur naka vuak ise fuisina kuain ga efuon arafiriaknum ire ise buon ren revo fu na kie na fuifuon ikrekno kien. Regavo God fu na gieme ba afikin mien revo fu ise nun gieme aren. Ijefuon maiji naba Jesu Kurais vierafen ijefuon irerag na rejo iji naba vierafeknum ren.  
\v 14 Regavo Jesu E Bomana iji fu nun bomana oifian abene mukorigia ifejdieme ma redien. Regavo madu fu ma vierafejo ijiga kaifijaf roin oijmiakfuon iji kege vajien. Ijefuon tavan iji no una Jesuna besum rejo ijia ire iji bu nuvuon ruakfuon.   
\p
\v 15-16 Regavo vuak igi fuka ma ijefuon noka mukorigia faime ma vierafekfuon. Vuak iji igin Jesu Kurais fu moikigia ari ruainma iji fu e ise rejo iji karauniakafa ari ruain. Regavo e be nar amur ise uruvana rene e uruvana asidiain. Regavo God fu ise fok na amur renva ijefuon fuba arafirien. Na ise uruvana ren gavo fu fuon adumaduigin e ifejdiamo iji abe na nijaidien. Fu ijeg adumaduigin rega e roin bu game vierafero fu buon ijegrekuai kuaime buk bu God ma vierafene unam ma karivako ijin abek.  
\v 17 Regavo na sirimamene God aroiknum if fuon abe ajiek. Regavo fu E Bomana God ma iji no gavo bakin gavo fum tavan bog ijia fivak. Regavo na vierafe noka if fuon sanainma iji abe tavan bog aroime vakfuon.   
\p
\v 18 Timoti farinun na vuak be madu a kuardakrej. Regavo vuak iji fu ni besum e iji Godon vuak vierafene kuaivo bu ur oisina kuainva ijefkin. Regavo vuak igi bu oisina kuainva ijieb a ifejdame daro maga a Godon e ani Setank mukoi bijaik.  
\v 19-20 Regavo on a God ma vierafeno iji mukoi kunaim giriesaikin a unam fuon ma iji giame ijia jame kekfuon. Regavo e roin bu unam ma iji bu vierafejo iji bun uzain ijefuon buon bu ma vierafejo iji bun kam arafiriain. Regavo e nokarok (2) Aimenaias ko Areksada nan kege Setan vajaido fur kege arafiriame vaga bu ijia giame buba una Kuraison if abe jufdiakfuon ijia kuaimok.   
\c 2  
\s1 E God ma vierafejo iji buka e fok ijiebuon sirimamekfuon ijin  
\p
\v 1-2 Ijefuon Timoti vuak fok na kuardainva ijia vuak bomana besum iji sirimamejo ijin. Na bomana vierafega e fok God ma vierafejo iji buka duok fok bu tavan bog ine karikfuon iji bu sirimamene God kuardaknum vo fu vajiamo ijefuon una fuon oimarkfuon. Regavo kuardiaga bu e kafokafo ijiebuon sirimamekfuon. Regavo e mamkanuk nuvuon kafokafo moikigia no samuagduovo ijiebuon sirimamekin no tavan bog afuime isuar igia unam akaij iji God oimaikfuon ijia kariokfuon.  
\v 3-4 Regavo ijeg tavan roin e kafobuon sirimamejo iji fu unam mukor God fuka oimaimo. Regavo God e iji fu no karaunuinma iji fu madu vierafe e fok bu vuak fuon ma iji faime vierafega fu rad karauniakfuon.  
\v 5-6 Regavo vuak fuon ma iji igin God fu besum ijesugin fin. Regavo Kurais fu God roin rega ema roin renva rir ijia manin. Regavo fu koikfuon abe miamga bu abe kuros kanain ijefuon e fok fur karaunuin. Regavo ijar nijaiduomon iji God fu tavan ma ijia e besum kuamga fur e fok ijiebuon guame bu karauniain.  
\v 7 Regavo iji fu renma ijar nijaidiamo iji fu vierafe fu e fok karauniak. Ijefuon fu na kumega na afasor rene e Jius bakin iji vuak fuon ma iji nijaidiaga bu Jesu Kurais ma vierafekfuon. Regavo vuak irerag na kuardiavo iji na kufuimejo bakin revo na vuak ka ma iji kuardiav.   
\p
\v 8 Ijefuon e fok bu moik iror igia karinva iji bu sirimamekva iji na vierafe buka maturaime ij akaij ijia ise rejo bakin ijia ke ajieme sirimamek. Regavo efarif iji sirimamekfuon iji bu e roin ziegafiavo bakin revo bu God ma vierafega fu ifejdiak.  
\v 9-10 Regavo bara ijiebuon vuak bu izeg karikfuon iji na isediemo iji bu ugon e jufdiakfuon iji buba sak revo bum adumaduigin ugon sibank ma iji samokfuon. Regavo bara iji God ma vierafejo iji bu e kafokafo oijmia vo mardiaga e roin bu ijia giakfuon. Regavo nigen jau buon mukoi bijavo ijiga ugon mon mamkanuk kimenva iji savo iji fuba maren. Regavo ja jon amarenamikfuon iji ja oijon ijia amarenamime e roin oijmiakfuon.   
\p
\v 11-12 Regavo bara iji bu sos guf ijia isuar adumaduigin karine vuak faikva bu mukoi faime vierafekfuon. Regavo bara be fuba sos guf ijia uri baru iji asime vuak kafo kuaik.  
\v 13-14 Ijefuon maiji God fu Adam amur amareme rad Iv amaren. Revo Adam fuba Setanon ir faime ise ren revo fu bara Ivir Godon akaij iji dab tuasen.  
\v 15 Regavo God fu bara iji kege fuon sanainma ma ijia uniain ijefuon maiji bara ijar Jesu Kurais nafen. Regavo bu ma vierafeknum e fok oijmiaknum adumaduigin akai karikva God fu bu karauniak.   
\c 3  
\s1 E mamkanuk sos samuavo ijiebuon vuak ijin  
\p
\v 1 Timoti na vuak ma be kuardak. Efarif kafo ijia karinva bu vierafe bu sos iji samuakuai vierafekva iji na vierafe ik iji bu rekuai vierafenva iji fuka ik mukor.  
\v 2 Ijefuon erar fu ik iji rekafa vierafekma iji fuka unam arir maturame fikfuon vo fuka bara besum abekfuon. Regavo fuka koikfuon mukoi samuanamiga e fok bu fu agoik. Regavo madu fu e sumakin iji tavan bog oimarknum aferdiamo ga Godon vuak e iji mukorigia nijaidiamo.  
\v 3 Regavo e iji fuba do kugi uruvana ino ga migegare deajiga e kaniamo bakin. Regavo fuba e roina musikuaimon ga unam fuon fu mukoi afuiknum fioinon. Regavo madu e iji fuka mon ba bomana oijmiamo.  
\v 4 Regavo e be fu vierafe fu e bomana be rene sos samuakma fuka amur aganfuon gire besum karinva iji mukorigia samuagdiaknum afijaf nijaidiaga bu iganamiknum uguar faime fu mukoi agordak.  
\v 5 Regavo e iji fuba agan iji mukoi samuagdiakma fu izeg Godon e iji samuagdiak?  
\v 6 Regavo e iji fuka iviakma igef God ma vierafejo iji jab kuaga fu e bomana rene sos samuak. Ijefuon maiji fuka koikfuon abe aroikarame ajiega God fu abe afikin mak. Regavo God Setan fu izeg aroikarame koikfuon abe ajiemga fu abe arafirinma ijeg fu e iji abe arafirik.  
\v 7 Regavo madu e be fu e bomana rekafa vierafekma fuka unam ma ijia fine roko ijin abekin e God ma vierafejo bakin iji bu game mukoi vierafene agordak. Regavo fu unam fuon fu isema fioga Setan fu biesuame if fuon abe arafirikma fu bomana jumga ik fuon fu reno iji fu migegare iserek.   
\s1 E sos guf ijia ifejdiavo ijiebuon vuak ijin  
\p
\v 8 Regavo madu na una e sos guf ijia ifejdiavo ijiebuon vuak kuardiakrej. Regavo e iji buka vuak ma ijesugin kuaimoijknum vo unam buon bu karijo iji fuka marga e fok bu ijia giame bu agordiakfuon. Regavo buba do kugi iji uruvana ik ga mon ga sinuom kafokafo buonkua vierafene karek.  
\v 9 Regavo bum Godon vuak ma iji bu abe nijaidiainva iji abe oibuon ijia abedeme giriesame ma vierafekfuon. Regavo buon bu karijo iji buka vierafe buon iji jame karik.  
\v 10 Erar fu vierafe fu sos ijia ifejdiame ikrekma amur ja unam fuon fu ikreno iji ga unam fuon fu tavan bog fino ijia gakfuon. Fu unam nokarok (2) iji fun ma reoga ni abega fu sos ijia ifejdiak.  
\v 11 Regavo unam fu bara fuon ijek fuka unam mukorigia fioknum vo fuba ura oknum e kafobuon vuak kuaimoin ga fuka koikfuon samuanamiknum nuibakin ma vierafene ik fuon reno ijia abekfuon.  
\v 12 Regavo madu e iji sos ifejdiamo iji fuka bara besum abekfuon vo madu fu agbara fuon mukorigia samuagdiakfuon.  
\v 13 Regavo e iji bu mukorigia ikrekva e fok buka bu giame agordiakfuon. Regavo madu buon izeg bu Jesu Kurais ma vierafejo iji fuka ma darokin rekfuon.   
\s1 Godon vuak fu sauime vierafenma iji fu abe Jesu Kuraison duadok ijia nijaiduin  
\p
\v 14 Regavo Timoti na vierafe na rad a gak vuakfuon revo nakafu saroime vuak ijefuon fas igi na iji isoime nijiav.  
\v 15 Na isoime nijaikin a unam izeg Godon e iji bu buon samuanamiknum karioijo ijiena dame vierafekfuon. Regavo Godon agan iji bu God iji ijia fivako ijefuon sos. Regavo sos ijar Godon vuak ma iji bu nijaidiavo iji biduakfuon.  
\v 16 Regavo unam izeg e God ma vierafejo bu karijo ijeg karikfuon iji fuka unam ma ikin. Regavo unam iji fu Jesu Kurais fak nam.  
\q1 Kurais fu ema igeg moikigia ruain. Regavo Kaven Akai ijar nijaiduome kuo Jesu Kurais fu ma Godon Farifno kuin. Regavo anera fok bu fuon ma iji sanainma iji gain. Regavo e iji bu fu jaoinva ijieb vuak fuisina ar iror ijia kuardiain. Regavo e fok moikigia karinva bu fu ma vierafen. Fu una varur iji Asoifuon God samuamo ijia vain.   
\c 4  
\s1 E vuak kufui nijaidiavo ijiebuon vuak ijin  
\p
\v 1 Regavo fun Godon Kaven ijar fun samakaf vuak iji kuai, Tavan rad e roin bu Kuraison vuak ma iji nijaidiavo iji bu ijia arekfuon. Regavo bu kaven ise iji biesia vuak kufui nijaidiavo iji jajiame vakfuon.  
\v 2 Regavo kaven ise ijieb e iji biesiaga bu una e roin vuak kufui nijaidiak. Regavo vuak kufui bu nijaidiavo iji bu ise rejo iji buba vierafenva ijefuon buka ba juk.  
\v 3 Regavo e iji vuak kufuimene nijaidiavo ijieb nijaidiame kia, Bara savo ijigam duok kafokafo ijo iji fuka ba marenma jab ijeg rekno kiak. Regavo vuak iji fu ma bakin ijefuon maiji fun Godri ire fok fur amardiain. Ijefuon e iji eraneb bu God ma vierafe vo vuak fuon ma iji ma vierafejo iji bu duok iji oimarknum kege sirimamene ikfuon.  
\v 4-5 Ire fok God fu amardiainma iji bu mukordo ire besum jab uzak. Regavo duok fok nika kege Godon sirimamene oimarknum ikfuon. Ijefuon maiji Godon vuak ijiga Godon sirimamejo ijieb duok iji kege marev.   
\s1 Izeg e ma rene Jesu Kuraison rekfuon ijin  
\p
\v 6 Regavo Timoti a vuak iji na kuardavo iji kege uviaifnuvuon iji nijaidiakma a ma Jesu Kuraison ikreno. Regavo Godon vuak iji a ma vierafene nijaidiamo ijieb a ifejdaga a on a ma vierafeno ijia a e damuigin rekfuon.  
\v 7 Regavo suar usuikor iji ka ma daro bakin iji ijia aref. Regavo tavan bog nika daro on ijekma Kaven Akai ijefuon unam ijia uruvana mimataoikin a daro abek.  
\v 8-9 Ijefuon maiji vajai nuvuon fu daro abekafa no mimatame ire kafo rejo iji fu ma. Regavo Kaven ijefuon ijia mimatavo ijar kaven nuvuon ifejdiaga no Godon unam ma ijesugin jak. Regavo ijar ifejduoga no iviakma ma kariknum vo rad no ma karivak. Regavo vuak iji fuka ma ijefuon aka mukorigia faime vo ma vierafe jame kekfuon.  
\v 10 Ijefuon tavan bog no giriesame vajai fian abeknum ikrej ijefuon maiji no tavan bog God ijia fivako iji ma vierafen ijefuon no ijeg rej. Regavo fun Godri aresredo fu e fok eraneb fu ma vierafejo iji karauniakfuon.  
\v 11 Ijefuon Timoti vuak iji na kuardavo iji abe e iji nijaidia vo soisoime ejafiaga bu vuak iji jakfuon.   
\p
\v 12 Regavo ab arega e kafob a neseme e ukakbe ijeg gak revo mimatame ma rejo ijia kege nijaidiaga bu ma vierafene a oijmame agordak. Regavo unam iji a mimatame nijaidiakfuon iji nika vuak ma ijesugin kuardia vo unam mukorigia mimatame ke nijaidia. Revo madu e fok oijmia vo tavan bog God ma vierafekfuon. Regavo on a vierafeno iji fuka maturai vo arir vierafekfuon.  
\v 13 Regavo a vek na samuagdiemo ijia na vierafe a daro on fok ijekma Godon vuak iji sos guf e nifak ijia samakaf uruvana daknum vuak ijefuon ma iji e iji kuardiaknum nijaidiak.  
\v 14-15 Regavo amur aba anerene ik on rene vuak kuardiamo ijia e Godon vuak vierafene kuaimo be fu ik on a rekfuon iji fun kuardain. Regavo e mamkanuk roin bu imut nigen abedevga God fu ik on ijefuon daro main. Ijefuon daro iji God fu mainma iji ab rubdame nui girek revo ire iji nika mukor igia mimatame re. Regavo nika oion ijekma ikrega e fok bu ik on ma iji a mukorigia rene vako bu iji gak.  
\v 16 Regavo izeg a oino ijia ga vuak ma iji a nijaidiamon ijia mukorigia vierafeknum ire ijieb giriesa re vakne. Ijefuon maiji a ijegrekma e iji bu a fazdavo iji a ise buon ijia karauniaknum ga a koikon keunanamim.   
\c 5  
\s1 Bara amun ga e mamkanuk sos samuavo ijigam e ba monfuo ikrejo ijiebuon vuak ijin  
\p
\v 1-2 Regavo a emakin be fu ire be isema rega ab uruvana kuriaikuriaikin kuardamo revo nika oi mafaime isuar asoion igeg kuarda. Regavo am mumogana iji diaifarifon igeg ifejdiame samuagdiamne. Regavo bara barukin iji asieon a oijmiaknum agordiamo igeg ifejdiame samuagdia ga bara naise iji makifon ma igeg mukorigia ifejdiame samuagdiamne.   
\p
\v 3 Regavo e iji Kurais ma vierafejo iji kuardiaga bu bara amun iji e kafo ba samuagdiavo iji mukor igia oijmiaknum samuagdiakfuon.  
\v 4 Regavo bara amun iji fu amfuon roin ga saifijaf roin iji buka buon izeg bu ma vierafejo iji mimatame eofijaf iji mukoi oijmiaknum samuagdiakfuon. Regavo bu ijegrekva God fu oimarek.  
\v 5 Regavo bara amun ma be e bu samuagdiavo bakin iji fuka God ma vierafene tavan bog nakikmazak Godri ifejdakafa fu sirimameno.  
\v 6 Regavo bara amun be fu tavan bog unam ise iji vierafeknum reoino iji vajai fuon iji fuba guain revo kaven fuon iji fun guain.  
\v 7 Ijefuon na vierafe a e iji God ma vierafejo iji kuardiaga bu agan buon buna gire besum naoivo iji mukoi samuagdiakfuon. Bu mukorigia samuagdiaikin e kafo buba vuak ise kafo bara amun ijiebuon kuaikfuon.  
\v 8 Regavo e be fuba e uifarif fuon iji ga aganfuon ma iji samuagdiakma fu fuon ma vierafeno iji fuba ijia jame kegoin. Revo fuka e iji God ba ma vierafejo iji fur ma asidiain vo ma vierafe fuon iji fuka ma ise.   
\p
\v 9 Regavo bara amun be fu vierafe fu bara amun iji sos ijia ikrejo ijiena fikma iji fuka juaivasia siksti (60) ijeg asime vain revo baru besum jainma ijar ijeg rekfuon.  
\v 10 Regavo fuiji buka e fok ijieb fu ma vierafejo ijefuon maiji unam fuon fu reno iji fu ma ijia ren. Regavo unam ma iji roin am mukoi samuagdia ga e sumakin ifejdiaknum samuagdia vo adumaduigin Godon e iji ifejdiamo. Regavo madu Godon e iji vajai fian abejo iji oi fuon ma ijekma mukorigia ifejdiaknum vo unam ma kafokafo e kafobuon reno.   
\p
\v 11-12 Regavo bara amun roin eraneb nivek iji buba migegare bara amun sos ijia ikrejo ijiena rene ikrekuai vierafek. Ijefuon maiji bu rad efarif ma kafo giame una jajiakva bu Kurais nuigafame una vuak bu amur sos ijia ikrekuai kuainva iji kege tuasek. Regavo bu ijegrejo ijar bu koikbuon kege arafirinamiv.  
\v 13 Regavo madu bara amun nivek iji bu gire ijia ajie ari oknum ise kafo rejknum e kafobuon vuak kuaiknum e ise rejo ijiena besum karine vuak bu kuaivo iji ifejdiame kuaik. Regavo buka vuak ise iji e bu kuaikfuon bakin ijin kuaimoijo.  
\v 14 Ijefuon na vierafega bara amun nivek iji buka una baru jajiame am nafene ar samuakfuon. Regavo bu ijegrekva e ani nuvuon iji God ma vierafejo bakin bu vuak ise kafo buba e iji God ma vierafejo ijiebuon kuaik.  
\v 15 Na vuak iji kuardiavo ijefuon maiji bara amun roin bun usuibe karoime una Setan jain.  
\v 16 Ijefuon bara erar God ma vierafeno fu bara amun roin aganfuon ijia karijga nika mukoi samuagdiamne. Ja ijegrekva sos iji buba bara amun iji samuagdiakfuon revo sos iji fum bara iji ka ma amun e kafob samuagdiavo bakin iji samuagdiakfuon.   
\p
\v 17 Regavo ni e mamkanuk iji eraneb sos ik samuavo iji mukorigia kimene mon buon vajiaknum arordiaf. Regavo ni e mamkanuk kafo ijia bu tavan bog nui bakin Godon vuak iji mukorigia uruvana kuardiaknum nijaidiavo iji ka mukorigia kimejknum arordiaf.  
\v 18 Regavo Godon vuak iji usuibe isoinva ijia bu vuak nokarok (2) e iji sos guf ijia ikrega kimejo ijefuon kuain. Vuak amur iji fu bijame kuai,  
\q1 Ja kumun uij karkuai maf-kau afem vaga fu kumun jon utamoknum vo kumun roin ikma jab bijuk. Regavo vuak be iji fu kuainma iji E iji ikreno iji ja kimene mon fuon vajakfuon.   
\m
\v 19 Regavo e be fu kia e bomana sos samuamo be fu ise be renma kiaga jab uri fu fazdak. Regavo bu e nokarok (2) vo e nokbek (3) ijeg bu kuai e iji fu ise renma kuakva ni vuak buon fai.  
\v 20 Regavo e mamkanuk sos samuavo iji bu ise rekva ni kege e God ma vierafejo ijiebuon nifak ijia samakaf nijaidiame arir uniaga e roin bu ijia giame juvknum buk buba ire ijekin kafo rekuai vierafek.   
\p
\v 21 Regavo na a kuardame na Godon nifak ijia ga Jesu Kurais ga anera fuon akaij ijiebuon nifak ijia na kua ni una vuak igi na kuardavo iji mukorigia igiamne. Regavo ab e roinknum ijesugin vuak gigikin kuardiagavo kaifon iji soisoime kuardiak. Regavo nika e fok kege afuime besum vuak gigikin kuardiame aferdia unam arir ijia unia.  
\v 22 Regavo ja vierafe ja e kafo kega bu e mamkanuk rene sos ijia ikrekva jab migegarek. Regavo amur iji unam buon bu karijo iji giame ni son imut nigen namdiaga bu Kuraison ikref. Regavo a e be aba mukoi gain gavo am kuamga fu e bomana rene fu una ise rekma iji ar isema rene fu abenma ijefuon a ise fuon fateroin aben. Ijefuon iji game nika kekirame unam ma ijesugin rejknum maturaime fi.  
\v 23 Regavo ab do gaikin ijesugin ik revo nika do vuain ukakbe abe iga fu defok on iji ifejda vo madu fu adam a tavan bog abeno iji ifejdak.  
\v 24 Regavo ja e mamkanuk karvo iji mukorigia unam buon giaknum vierafef. Ijefuon maiji e kafobuon ise iji bu isuar sauime naoivo ijieb rad samafrek. Regavo e kafobuon ise iji bu migegare samafrega no giakfuon.  
\v 25 Unam besum ijeg unam ma iji buon bu rejo iji fuka samakafdo a giak. Regavo unam ma buon bu isuar sauime rekva rad buson samafrekfuon.   
\c 6  
\s1 E iji bu e kafobuon ba mon ikrejo ijin  
\p
\v 1 Regavo e iji God ma vierafejo eraneb bu mon abejo bakin gavo bum e kafobuon ikrejo iji buka daro mene ikreknum e mamkanuk buon agordiakfuon. Regavo bu tavan bog ijegrekva e roin bu Godon if ijiga Godon vuak iji no nijaidiavo iji buba abe vuak ise kuaime buzeik.  
\v 2 Regavo e iji bu e mamkanuk iji God ma vierafejo ijieb samuagdiavo iji buba vierafero e mamkanuk iji bu Kuraison if ijia bu uviaifijaf. Ijefuodo buba ziekno kuaime bu tavan bog buba nuibakin rene ikrekuai vierafej. Regavo buka giriesa daromene e mamkanuk buon ijiebuon ikrekfuon. Ijefuon maiji e mamkanuk iji bu God ma vierafeknum ebuon ikrejo iji oijmiav.  
\s1 Vuak kufuimene nijaidiavo ijin  
\p Regavo Timoti na vierafe a vuak igi nijaidia vo madu e iji darokma kuardiaga bu vuak iji mukoi igakfuon.  
\v 3-4 Regavo e roin bu vuak kufui kafo nijaidiaknum vuak ma iji E Bomana nuvuon Jesu Kuraison no nijaidiavo iji bu uzav. E ijegreoijo iji bu aroikaravo ijieb oibuon ijia irtoijen ijefuon bu ire kafo ba vierafeoij. Regavo bu vuak ukakna kafo ga vuak mamkanuk bakin iji kege mijum abene ijefuon musikuaiknum e kafobuon oi kege karoiga bu zienamiv. Regavo bu besum afuim karijo bakin gavo bu vuak ise kafokafo buon kuaiknum e kafo ire bu renva ijin kam kufuimene uruvana buisina vierafen.  
\v 5 Regavo e iji eraneb bu vuak kufui kafo kege mimatame kuardiavo iji bu tavan bog musikuaivo ijefuon maiji nigen buon bun karoime iseren ijefuon bu vuak ma iji irerag buba vierafen. Regavo buka ma isema vierafen ijefuon bu vierafe kuai bu God ma vierafekva iji bu emakin rene sinuom uruvana zaraikno kuaiv.   
\s1 Mon oijmiavo ijefuon vuak  
\p
\v 6 Regavo e be fu Jesu Kurais jakma Kuraisri oifuon fu vierafeno iji abe dakaroiga fu sinuom fu nainma iji fu vierafega fun siban aresredo fu oimaikfuon. Vuak igi fu vuak ma iji sinuom zaraikfuon ijin.  
\v 7 Regavo no bu nafeduova no moikigia ari ruainva iji ire kafo no ba kege ruain. Regavo no aoikva iji no ire kafo moikigia noba kege una vak.  
\v 8-9 Ijefuon no duok ijo kafo ga sinuom savo kafo naoikva iji fun siban aresren. Regavo noba sinuom uruvana karekuai vierafek. Regavo e iji bu sinuom uruvana karkuai vierafejo iji bu migegare arikaniaga bu ise rek vo buon bu ma vierafejo iji bu buzereme ga ise ijar bu aferdia arafiriakfuon.  
\v 10 Ijefuon noka mon oijmiakva noka unam ise uruvana biediakfuon. Regavo e roin eraneb bu sinuom zaraikfuon iji bomana vierafejo iji buon ma vierafejo iji bun uzame vain. Ijefuon bu unam vajai fian abejo uruvana bun kege una vajai buon ijia ruain.   
\s1 Timotion vuak fu ijia giaknum ire kafokafo reokfuon ijin  
\p
\v 11 Regavo Timoti aiji a Godon e ijefuon ire ise uruvana na iviakma kuardainva iji giame agordiamne revo giriesame darokma mimataga ire igi bu oion ijia ofrek. Ire iji maturaime akai karijo ijiga ma vierafejo ijiga oijmanamivo ijiga giriesame nuibakin tavan bog ikrejo ijiga adumaduigin oijo iji bu oion ijia ofrek.  
\v 12 Regavo nika e iji fu ire ma be abekafa giriesame kukumo ijeg nika Jesu Kurais ma vierafene unam fuon iji mukorigia jame reof. Regavo God fu a kumenma iji fu unam ma karivako iji makafa kuainma ijefuon aka vuak iji abe darokma kunaime vakne. Regavo on a Kurais ma vierafeno iji an e fok ijiebuon nifak ijia samakaf nijaidiain.  
\v 13 God ko Jesu Kuraisbuon nifak ijia na if buon ijia kuriame a kuardav. God e iji ire fok samuagdiako bu nakikmazak nivek karijo ijiga Jesu Kurais e iji Fairet fu vek fino ijia God fu kuamga fuba uzain gavo fu ire fok rene barenma ijiebuon if ijia na kurame a kuav. Ire fok God fu kuardaga iji igame re.  
\v 14 Regavo ire iji rejknum vo ab zazaime ise kafo rek rega giriesame unam ma ijesugin rega e iji bu vuak ise kafo oisina buba kuaik. Regavo fum ijeg navake tavan iji God fu abedenma ijia E Bomana Jesu Kurais fu una ruak.  
\v 15 Regavo fun Jesur daro abene ire fok samuagdiamo revo tavan iji fu ruakfuon iji fun Godri tavan iji abededo fur abe rega fu samafrekfuon. Regavo God iji Kin ka bomana kin ukakna kafo iji fur asidiain. Regavo madu fu E ka Bomana e mamkanuk kafo iji fur asidiain.  
\v 16 Fu fuonkua fu tavan bog ijia fine vak revo fuka ar ma sanainma e kafo samaij ijia vako bakin ijia fin. Regavo e be fuba God gain vo madu e besum moikigia oino iji fu God gakma bakin. Ijefuon na tavan bog sirimamega e fok bu if fuon abe ajiek revo daro fuon fu tavan bog ijia navak. Mare.   
\s1 E sinuom zarainva ijiebuon vuak ijin  
\p
\v 17 Regavo eraneb moik igefuon sinuom ijia uruvana zaraiga ni kiaga buba aroikarame sinuom buon bomana vierafek. Regavo buba ma vierafero sinuom buon ijieb ifejdiaga bu ma karivakuai kuaiv. Ijefuon maiji tavan iji sinuom buon fok bu barekfuon iji buba vierafen. Ijefuon kiaga bu buon bu ma vierafejo iji bu God e iji tavan bog ire iji no oimarknum karikfuon vajuomo iji mame vierafekfuon.  
\v 18 Regavo ni kiaga bu mukorigia reoknum vo unam ma iji ka uruvana reokfuon. Regavo ka e suaikin rene tavan bog e ifejdiakafa ijefuon rek.  
\v 19 Regavo bu ijegrejo ijefuon God fu ar ma iji varur gufia buifuon kanaufum. Ijefuon bu varur gufia vakva God fu vef ijefuon ar ma iji fu amarduinma iji miaga bu ijia ma karivakfuon.  
\v 20 Regavo Timoti Godon vuak ma iji fu nijaidainma iji mukorigia samuagdiamne. Regavo vuak kuaivo ijiga vuak ise ijefuon musikuaivo iji e bu kufuime kuai mano kuaivo iji mukorigia agordiaf.  
\v 21 Ijefuon maiji e roin bu iji uruvana vierafene ba rubdiavo ijefuon bu buon ma vierafejo iji bun uniakoin. Regavo na sirimamega Godri ma rediame ifejdiaga ja tavan bog oimarknum kariokfuon.