\id 1PE - Namiae NT [nvm] -Papua New Guinea 2004 (web 2014) \h 1 FITA \toc1 1 Fita \toc2 1 Fita \toc3 1Fi \mt1 1 FITA \imt1 1 Fitan Vuak Amur \ip Fas igi fu e Fitar isoime e iji God ma vierafejo bu dab ataseme ar kafokafo ijia karioinva iji nijiain. Regavo tavan iji Fita fu fas igi isoinma iji fu mai Rom fino ijia fu isoin. Regavo e iji Jesu Kurais ma vierafene fu javo iji buka unam ise kafokafo e Romko ijieb buon reko buka vajai fian aben. Ijefuon Fita fu vierafe fu bu ifejdiame daro miaikin buka uri giriesame irekafa fu iji vierafen. Regavo fas igia Fita fu madu vuak uguar uruvana isoin. Regavo vuak iji fu isoinma iji e akai igeg kariokfuon ijigam barubara bu izeg besum karikfuon ijigam Kuraison vajai fian abekuai vierafejo ijigam e iji Godon ar sirimamejo iji samuavo ijigam Jesu fu una rokon ijefuon vuak iji isoin. \iot 1 Fitan vuak kafokafo fu isoinma ijin \io1 \ior 1:1-12\ior* Jesu no ma vierafejo ijin. \io1 \ior 1:13-25\ior* Noka e akai igeg karikfuon ijin. \io1 \ior 2:1-10\ior* Jesu fu tuar ma iji no ijia biduame karijo ijin. \io1 \ior 2:11-17\ior* Godon ik rekfuon iji noka e ma rekfuon ijin. \io1 \ior 2:18-25\ior* Izeg Kurais fu vajai fian abenma ijin. \io1 \ior 3:1-7\ior* Barubara bu izeg besum afuim karikfuon ijin. \io1 \ior 3:8–4:19\ior* No Kuraison unam ijia kegokva iji no vajai fian abekfuon ijin. \c 1 \p \v 1 Na Fita e iji Jesu Kuraison afasor rene vuak fuon abe oijo iji nar fas igi isoime e iji ja God fu ik anej ijia vierafene ke uniainma iji nijiav. Regavo ar jon ma iji fu varur ijia revo jam moik ijia e kafobuon moik Fotunatas ga Geresia ga Kafadosia ga Esia ga Bitinia ijia karij. \v 2 God fu vek ik anej ijia ja vierafen ijefuon fu kege uniain. Ijefuon maiji fu vierafega jaiji fun Godon Kaven Akaij ijar ja ke e akairekin ja Jesu Kurais igak. Regavo kavuan fuon ijar kuros ijia joifuon usenma ijar ise jon fikordiain. Regavo God fu tavan bog ma rediame mukorigia ifejdiame samuagdiaga ja afuime kariokfuon. \s1 Unam ma karivako iji vierafeknum okfuon ijin \p \v 3 No God ga e Bomana Jesu Kuraison Asoij iji fuon bomana oimarek. Revo fuon fu no oijmuoknum ifejduomo iji fuka bomana ijefuon fu unam iviamkor no ma karivako iji abe muin. God fu Jesu guamga fu keunama fu una urin ijefuon no unam fuon iviamkor ijia jak. \v 4 Ijefuon maiji no vierafe tavan be no God ire ma kafo fu kaven nuvuon ijiebuon kaf gufia nainma no iji kek. Regavo ire iji fu kaf ijia namduinma iji bu izeg muture ga isere ga barekfuon bakin. \v 5 No fu ma vierafe ijefuon fu daro fuon ijia no mukorigia samuagduo vake tavan radkma ijia fu no karaunuo barek. \p \v 6 Ijefuon jaka ire ijiebuon oimarkfuon revo iviakma tavan ivuankbe igi ja ire kafokafo ijia ja vajai fian abejo iji jaka magaga oimarknum of. \v 7 Regavo ire iji bu oijon iji ja izeg ma vierafejo ijin biesiame giav. Ire gord iji fu ire ma gavo bu abe mian ijia baroine kafut kanaufuv revo tavan be fu iserme bakren. Regavo jon ja ma vierafejo iji fuka ma bomana ijefuon bu abe ijeg biesiame giak. Ijefuon maiji bu ijegrega jon ja ma vierafejo iji fu ijia navak. Regavo tavan iji Jesu fu una ruakma e fok moikigia oijo iji bu fu gak. Regavo tavan ijia oijon ja ma vierafejo iji fu vek gigikin God fu ja kege arordiame nidosdiak. \v 8 Ja Jesu Kurais jaba ni jon ijia gain revo jam fu oijmav. Revo madu ja ni jon ijia fu gavo bakin ga jam fu ma vierafejo ijefuon jaka oimadiamdo ja izeg una vuak ijefuon kuaikva bakin. \v 9 Ijefuon maiji jon ja ma vierafejo ijia God fu kaven jon iji karauniam. \p \v 10-11 Regavo e Godon vuak vierafene kuaivo ijieb bu God fu ja karauniakfuon iji abe kuaimoin. Bu ijeg kuaimoijknum karine kuai ire iji kafu ivez rek revo God fu izeg e fok karauniakfuon bu ijefuon uri giriesame nisaimoin. Bu ijegrejga Kuraison Kaven ijar unam izeg Kurais fu moikigia vajai fian abene gua vo rad fu una uri Godon sanainma ijia jakfuon iji nijaidiain. \v 12 Regavo Kaven Akai fu kia vuak ma iji fu usuibe kuardiainma iji fu tavan buon ijia rekma bakin gavo fu tavan jon ijia rekno kiain. Ijefuon iviakma vuak ma iji Kurais fu no karaunuinma iji e bu ja kuardiavo iji bu Kaven Akaij iji fu kaf gufia ari ruainma ijefuon daro ijia kuardiain. Regavo Godon kaven dakin iji buk bu vuak besum iji faikuai vierafen. \s1 God fu vierafe noka e maturai rekfuon ijin \p \v 13 Ijefuon jab oijon karoime una ire kafokafo vierafek revo ni oijon kanafume mukorigia Jesu fu una ro ja mardiakfuon iji mukoi vierafeknum kari vaf. \v 14 Regavo jaka Godon afijaf igeg nuibakin rene fu igaf revo jab una ire ise kafokafo ja vierafene reruainva iji una rek. \v 15 Ijefuon maiji God iji fu ja kege uniainma iji fuka maturain ijefuon jak jaka maturaime ire fok mukorigia keof. \v 16 Regavo madu Godon vuak iji fun buk ijia isoime kuai, \q1 Naiji naka maturain ijefuon jak jaka maturaime kegofno kuain. \p \v 17 Ijefuon igia faif God Asoijon kaf gufia fino iji ja fuon sirimamejo fu e igi oinuvuon iji kege besum name guokfuon. Fu guoga no ma reoin vo no isema reoijo fu iji guokfuon. Ijefuon tavan ivuank igi ja karikva iji ni e ar kafoko igeg mukorigia God juvknum agordaknum karif. \v 18 Regavo ik saifjon unam iji bu rejknum kari ruainva iji fuka ma bakin ijefuon izeg ja kari ruainva iji jan vierafen. Unam iji fuka ma bakin revo ja vierafero unam iji fu ja ifejdiame karauniakro ja ijeg vierafen. \v 19 Regavo iji fui bakin revo fuka Kuraisri kavuan fuon iji irerag igekin ijia abe ise jon iji ja renva ijia karauniain. Regavo Kurais bu maf-sif iviakma ofrenma fu vajai matan ga tat bakin iji e Jius bu kaniame ise bu renva ijefuon God isuf baroidavo ijekin. \v 20 Fun Godri vek ik anej ijia fu ire kafo fuba amardiainma ijia fu Jesu e karauniakfuon iji abe unain. Regavo Kurais fun iviakma tavan radkma igaijar joifuon roka jan gain. \v 21 Ja iviakma God mukorigia vierafe ijefuon maiji Kuraisri unam jon ma iji amaren. Regavo Kurais fu guamga Godri keunama fu una uriga fu dab aroime nidoin. Ijefuon iviakma oijon fok ja God fu rad una ro ifejdiakfuon ja iji ma vierafeknum karij. \p \v 22 Godon vuak iji tavan bog ijia navako ijar unam iviamkor ma iji abe miain. Regavo ja Godon vuak ma iji ja ma igain ijefuon oijon iji fun mukorigia amardo iviakma jan kaifjon bu God ma vierafejo iji oijmiav. Ijefuon iviakma ni oijon ga daro jon ijekma jon oijmanamif. \v 23 Regavo unam iviamkor ma iji fu unam iji eofjon iji bu abe miainva iji fu rad barekfuon ijekin bakin. Regavo unam iviamkor ma iji fu Godon ruainma ijefuon fu ijia navak. \v 24-25 Ijegvo Godon vuak iji bu usuibe buk ijia isoinva iji fu kuai, \q1 Ema iji bu moikigia oijo ijiebuon sanainma iji fu jaoikin bakin. Buon sanainma iji bu ire sinar iji bu tavan ukakbe iravo una anume asuiksame arivo igekino kuain. Regavo Godon vuak iji fuba sinar ijeg iravo una migegare sairek. Regavo fuka tavan bog ijeg navak. \p Regavo vuak ma igi ijia navakfuon iji fu vuak besum e iji bu Godon vuak abe kuaimoijo iji bu ja kuardiainva ijin. \c 2 \s1 Jesu fu tuar ma iji ijia na vako ijin \p \v 1 Regavo jaiji ja e iji bu Godon unam ma iji abe miainva ijekin ijefuon ire isekma iji ja reoijo iji aref. Regavo madu jab e roin biesiame vuak kufui kuardiak. Regavo madu oijon iji bu vek ise uruvana ijia naoike jab e roin biesia kia no ma reoijno kiak. Revo jab uri e kafobuon sinuom ijiebuon rieziak ga jab vuak ise iji kuaimok. \v 2-3 Regavo jan izeg E Bomana fu ja mardiainma iji jan game aben. Ijefuon izeg am ukakna bu mut buon muinbakin iji ikuai vierafejo ijeg vo ja e God ma vierafejo iji jak kaven jon iji bu Godon vuak ma iji mut igeg ikuai vierafekfuon. Ja mut ijekin iji kaven jon ijiebuon iji ikva kaven jon iji bu daro abe karikin rad ja mukorigia Godna karivak. \p \v 4 Jaka Jesuon ruaf. Fu tuar ma igekin gavo e fok bu fu uzame abe akozen. Regavo Godon nifak ijia fuka irera igekin ijefuon fu abe unain. \v 5 Ijefuon jak ja tuar ma ijin God fu ja kege ar iji Kaven Akai fuon iji fu ijia fivakfuon iji saf. Ijegvo e Jiusbuon e isuf baroijo bu Godon ar ijia arume isuf baroijo ijeg ja oijon iji kege Jesuon duadok ijia isuf igeg God vajaf. Ja ijegrekva God fu oimaikfuon. \v 6 Regavo Godon vuak bu usuibe buk akaij ijia isoinva iji fu kuai, \q1 Nan e bomana nun iji abe unaido fur enun fok samuagdiak. Regavo e bomana iji fu mun ga tuar iji fu ar uf iji kunaim girme manikfuon igekin. Regavo eraneb bu fu ma vierafekva buba juk revo bu Godon nifak ijia aroikaraknum oimarek. \p \v 7 Regavo e iji ja Kurais ma vierafejo iji fu irerag igekin ijefuon ja fu ma oijmav. Regavo e iji bu fuba ma vierafejo iji Godon vuak iji bu usuibe isoinva iji fu kuai, \q1 E iji bu mun ga tuar ijia ar savo bu vierafero tuar iji fu isero buba abe ar sain revo bu abe akozen. Bu ijeg ren revo iviakma fu Godri tuar iji abe ar uf ijia ru abesenma ijar ar iji kunaim girme manin. Regavo tuar iji fu kuainma iji fu Jesu Kurais E Bomana iji iviakma sos fok bu ijia fuon biduame karijo ijin. \p \v 8 Regavo madu Godon vuak iji fu kuai, \q1 Rad e roin bu tuar ijar nizukdiaga bu mukoi ari kaniakno kuain. \p Regavo vuak ijefuon anej ma iji e igi bu Godon vuak ma iji buba vierafene rejo iji bu ari kaniak. Ijefuon maiji God fu vierafenma iji fu bu kam vajai fian miakfuon. \p \v 9 Regavo e iji ja ma vierafejo iji ja Godon e rej. Regavo jar e iji bu isuf baroijo bu ikrejo ijeg e ma ijefuon ikrej. Regavo jaiji ja Godon e iji ja fuon ikrekuai fu kege uniainma ijin. Regavo madu God fu ja kege uniainmado jar e iji vuak fuon ma iji kuardiak. Revo fur e iji ja vek nakinma ijia karinva iji fur aferdiame una fuon ma iji sanainma ijia uniain. \v 10 Ur ja e ma bakin revo iviakma jan una Godon e ma ren. Regavo madu ur God fu jon oifian abene ifejdiainma bakin revo iviakma fuka ja oijmiaknum vo jon oifian abene ifejdiam. \p \v 11 Ijefuon kaifnun jaiji jam tavan ukakbe moikigia karik. Revo ar jon ma iji fu vek kaf gufia namo ijefuon na moik igefuon ire ise iji na ejafiame kiavo iji ni mukorigia agordiaf. Regavo ire ise iji bu e ani igekin bu jana bijaikva jon izeg ja God ma vierafejo iji fu kam arafiriak ijefuon nika ire ise iji agordiaf. \v 12 Regavo ja e iji bu God ba vierafenva ijiena okva ni unam ma ijesugin keof. E iji bu ja musikiaknum vo arafiriakva bu unam jon ma iji ja rejo bu iji giame God aroiknum vo rad God ma vierafek. \s1 E mamkanuk jon igiakfuon ijin \p \v 13-14 Ijefuon jaka e fok bu e roin samuagdiavo iji bu vuak kuardiavo iji igiaf. Ijefuon maiji E Bomana fu vierafe jaka ijeg rekfuon. Regavo e Kin iji fu e mamkanuk fok samuagdiamo ijigam e mamkanuk iji fu kege uniainma iji madu bu igiaf. Fu bu ke uniaga bu e iji eraneb ire ise reoijo iji ke vajai fian miagavo eraneb bu ma reoijo iji fu ke arordiame ire ma iji vajiakfuon. \v 15 God fu vierafenma iji ja bu igiaknum vo mukorigia kekfuon. Ja ijeg kegokva e iji bu nigen iserenva iji bu vuak ba mukoi vierafeknum kuaimoijo iji bu jon izeg ja mukorigia kegoijo iji giame buba vuak ise kafo joisina kuaimok. \v 16 Regavo e mamkanuk jon iji igiaknum vo jaka mukorigia ke turame nibe karif. Regavo jab jon ja ketura karijo iji kege una ise kafokafo rek revo jaka e Godon ikrejo ijeg karif. \v 17 E fok agordiavo ejon iji bu Kurais ma vierafejo iji oijmia vo God e darokin iji mukorigia agoiknum oimardaf. Regavo e Kin iji fu e mamkanuk iji samuagdiamo iji agoif. \s1 Kurais fu vajai fian abenma ijeg no madu noka vajai fian abekfuon ijin \p \v 18 Regavo e iji ja e mamkanuk iji bu ja samuagdiavo ijiebuon ikrejo iji vuak igi vierafef. E mamkanuk jon iji bu ja samuagdiavo iji bu e ma jon ijefuon irerag bu kuardiakva iji nika igiaf. Regavo e ma jon iji bu e ma vo bu ja mardiaknum vuak soisoigin kuardiakva iji igiaf. Regavo jab e ijekin ijesugin igiakgavo madu e ma iji bu ja isema vierafejo vo uri vuak gigikin kuardiakva ni iji madu igiaf. \v 19 Regavo bu uri ja musikia vo unam ise ja vajai fian abekfuon iji jon rega jaka vek magiaga God ma vierafeknum unam ma ijia revakva God fuka jon oimarek. \v 20 Regavo ja ise rega bu ke vajai fian miaga ja isuar vajai fian abekva bu irerafuon ja ke arordiak? Regavo ja ire ma ijesugin rega bu kam vajai fian miaga ja ijefuon isuarigia vajai fian abekva unam ijeg ja rejo iji Godon nifak ijia fuka ma mukor. \v 21 Regavo unam ijeg vajai fian abejo iji Godon unam iji fu ja miainma ijin. Regavo Kurais fu vajai fian abenma iji fu mimatame ja nijaidiain ijefuon jak uri diak makai fuon ijia jaf. \v 22-23 Fu ise kafo ba ren ga vuak kufui kafo ba kuain. Regavo e iji bu uri fu musikuame vuak ise kuardain gavo fuba una vef roin vuak ise ijeg kuardian. E iji bu uri ire ise uruvana fuon reja fu uri ijefuon vajai fian aben. Regavo fuba vef roin una ijeg buon rekafa vierafen revo fum afikin iji fu abe God e iji fu ise fok ke mazim giamo ijefuon imut tat ijia abeden. \v 24 Kurais fu ijegrenma ijia fu ise nuvuon ijefuon afin iji dab vajai fuon ijia dabme kuros ijia guain. Fu ijeg kuros ijia guainkin ja tavan bog ise iji ja rejo iji ja arega una ma karivakafa fu ijeg ren. Iji fu vajai fian abenma ijia fu unam jon iji ja una nivek karivakfuon iji amardiain. \v 25 Ur ja Kurais ba vierafenva ijefuon ja uri maf-sif bu tavan uruvana sauivo ijeg rej revo iviakma jan una karoim Kurais e iji fu kaven jon samuagdiamo ijefuon ruain. \c 3 \s1 Baru barabuon vuak ijin \p \v 1-2 Regavo bara iji jak barufjon iji mukorigia igiaf. Ja ijeg igiaikin barufjon iji eraneb bu Godon vuak ma iji ba ma vierafejo iji bu unam jon ma iji ja rejknum karijo ijia giame oibuon karoime una God ma vierafek. Regavo ja vuak kafo jab bu kuardiak revo nin God agoime unam jon ma iji izeg ja kariknum rejo ijia bu giak. \v 3 Regavo bara iji jab vierafero bu e kafob giakuai uri aroikarame nigen jon iji bijavo er rene ugon ma ni kafokafo sak. \v 4 Regavo ja jon amarkarakfuon iji ja oijon iji fu tavan bog ijia navakfuon ja iji vierafene amarkarakfuon. Jab uri vuak gigikin kuai vo zienamik revo jaka isuar kariof. Regavo bara iji fu ijegrekma kaven fuon iji fu Godon nifak ijia fuka irerag igekin rek. \v 5-6 Bara iji usuibe bu God ma vierafene akai oinva iji bu vajai buon ijia amarkarainva bakin revo buka oibuon ijia amarkaranamin. Ijefuon maiji buka barufijaf iji mukorigia oijmiaknum igiain. Bara be iji Sera bara ijar barufuon Eburam igame kua e bomanakno kuain. Regavo jaiji ja Seraon afijaf ijefuon barufjon bu ire kafo jon rega jab juk revo jaka ire ma ijesugin ref. \p \v 7 Regavo madu baru iji ja barafjon izeg samuagdiakfuon iji jan vierafen. Ijefuon ja barafjon ijiena karikva ni mukorigia buna vuak soisoigin kuaim oimarknum karif. Ijefuon maiji bu bara zazaikin revo baru iji jai bakin. Regavo be iji bu izeg ja Godon ma karivako iji ja abenva ijeg buk bu Godon ma karivako iji abek. Ja barafjon iji ijeg oijmiakva sirim jon iji ja Godon amejo iji fuba faime arek. \s1 Unam ma ijia vajai fian abejo ijin \p \v 8 Regavo igia faif e fok jaka oi besum rene bogdiaik igeg mukorigia oijmanamif. Regavo oi besum vierafene e kafobuon oifian abeknum karif. Regavo madu jaka adumaduigin oknum kaifjon roin ijin oij miame duok ivajuinamiknum karif. \v 9 Regavo e kafo bu ire ise kafo jon rekva jab una vef roin buon ise rek. Regavo bu vuak ka ma ise iji joisina kuaikva jab una ijeg vef roin kuardiak. Bu ijegrekva ni una buon oifian abene ifejdiame buifuon sirimamef. Ijefuon maiji ja Godon ire ma kafo kekfuon fu ijefuon ja karauniain. \v 10 Regavo Godon vuak iji bu usuibe buk ijia isoinva iji fu kuai, \q1 Erar fu mukorigia oimarknum fivakafa vierafekma e iji fuba vuak ise kafokafo kuai vo fuba vuak kufui kafo kuaimok. \v 11 Regavo madu erar fu vierafe fu oimarknum fiokma e iji fuba ire ise kafo e kafobuon revo fuka ire ma ijesugin reokfuon. Revo fu madu unam izeg fu kaifijaf kafona afuikfuon iji giriesame rekfuon. \v 12 Ijefuon E Bomana ijefuon ni iji fu e iji bu fu ma vierafene unam ma ijesugin reoijo fu iji fine gia vo sirim buon bu amejo iji faim. Regavo e iji bu ire ise rejo iji fu kege vajai fian miam. \p \v 13 Ijefuon ja giriesame uri ire ma ijesugin rekva erar ja kege vajai fian miak? \v 14 Regavo ja ire ma ijesugin rega e iji bu ja kege vajai fian miaga ja vajai fian abekva God fu jon oimarme ja mardiak. Ijefuon eraneb ire ise kafo jon rega jab ijefuon uruv vierafene uri oifian abek. \v 15 Regavo jaka oijon ijia Kurais E Bomana iji agoime ire fok fu kuardiamo iji igame reof. Regavo tavan kafo eraneb bu jon ja ma vierafejo ijefuon anej ma iji faikuai kiakva jaka samuaikin ja vuak ijefuon anej ma iji kuardiak. \v 16 Regavo ja kuardiakva ni isuar agordiame adumaduigin kuardia vo tavan bog ire ma ijesugin rejknum of. Ja ijegrekva e iji bu jana vuak ise ka gigikin kafo kuardiame ifjon iji kam iserekva iji bu una koikbuon juk. Ijefuon maiji ja Kuraison unam ma ijia jame reoij revo bur vuak kufui iji una joisina kuaiv. \v 17 Regavo ja ire ise kafo rene ijefuon vajai fian abekva iji ja koikjo ise renva ijefuodo iji fun ijin. Regavo ja ma ijefuon renva ijia ja una ijefuon vajai fian abekva iji fun Godri vierafe fuon ijia reno ijefuon iji fun maren. \p \v 18 Ja unam ijegrekva iji ja Kurais fu renma ja ijeg rej. Regavo Jesu e iji ire ise kafo fuon naoivo bakin iji fu e igi bu ise rejo ijiebuon ise iji fikorediakafa fu tavan besum efkin buifuon guain. Regavo fu guainma iji fu ja aferdiame una Godon ruakafa fu ijefuon guain. E moikigia oinva ijieb kanavga fum vajai fuon ijesugin guain revo Kaven Akaij ijar kuama fu una uri nivek fin. \v 19 Regavo madu Kaven Akaij ijefuon daro ijia Jesu fu va e iji aoinva ijiebuon kaven iji bu dibur karinva ijin izeg fu renma iji kuardiain. \v 20 E iji Jesu fu vuak kuardiainma iji fu e iji bu tavan iji Noa fu sisim sako bu Godon vuak iji uzainva fu e ijiebuon kaven iji kuardiain. Noa fu sisim bomana iji amarekoga e iji bu vek e rene karinva ijia bu Godon vuak iji buba igain revo God fuba migegare bu kam arafirian revo fu bu samuagdiain. Regavo rad bu e sibank e eit (8) ijeg vuak fuon iji igain ijefuon ve bomana fu dame do nafuima e iji buba do in. \v 21 Regavo e sibank iji bu do firamo ijar karauniama buba do inva iji fu do iji ja ruaiga fu ise jon ijia karauniamo ijia bijame nijaidiainma igekin. Regavo do iji ja ruainva iji fu doma igi ja ruaiga fu tat somo ijekin iji fu bakin. Regavo do iji ja ruainva ijar ja nijaidiainma iji ja fun daro iji Jesu Kurais fu guame una urinma ijar ja God fu vajai fian miakfuon iji jan daru abeden. Revo iji fu madu ja nijaidiamga ja una karoim Godon ruaknum vo kua fu oijon ijia ise ijin somdiakfuon. \v 22 Regavo iviakma Kurais fun kaf gufia Godon ij maink ijia ar bomana be abe fin. Fu ijia fikok Godon kaven dakin ijiga kaven mamkanuk kafo bu kaven roin samuagdiavo iji bu fu igav. \c 4 \s1 Izeg no Godon unam ma ijia kegokfuon ijin \p \v 1 E ise ijiebuon imut tat ijia Kurais fu vajai fian aben. Ijefuon ja unam besum iji fu vierafenma ijeg giriesame jak fu renma iji vierafek. Ijefuon maiji erar fu vajai fuon ijia vajai fian abekma fu una ise rekma bakin. \v 2 Ijefuon tavan iji ja moikigia karinva iji jab arekega ise ijar oijon fok rarek revo jaka God irerag fu vierafenma ijia rejknum karif. \v 3 Vuak igi na kuardiavo ijefuon maiji ire iji e bu Godon vuak kafo buba fainva iji bu rekuai vierafenva ijeg jab rek. Regavo jan usuibe ire igekin iji jan rene ruain. Ja uri barubara oknum e kafobuon bara turaknum jaka uri siroij igeg reoin. Regavo ja madu do kugin iji ine nigen iseren. Regavo ja iro ijo ijia jaka duok uruvana ine ijar defiamga ja ire kekfuon iji jaka nui girdiain. Regavo madu ja besum afuime do kugin ka uruvana ine moik ijia maf igeg jiekeoknum vo jaka uri god kafokafo bu e imut igia amardiainva ijiebuon sirimamej. \v 4 Regavo iviakma ire ise fok ja reoijo iji fuka baren. E iji bu Godon vuak kafo ba fainva iji bu tavan bog ire ise kafokafo ijeg rej. Regavo jaba una bu jajia bu giakva buka oiserdiak. Jaba unam iji bu kegoijo ijia jajiavo ijefuon bu ja vuak ise kuardiaknum vo God jon iji ja vierafejo iji abe kufui ik. \v 5 Regavo God fu iviakma samuaknum fine izeg bu rejo iji kege mazim giam. God e iji fu fine e nivek karinva iji abe vo e iji bu vuak fuon faime oinva ijiebuon ise iji ke mazim giakafa fin. Revo iji fu e fok moikigia oijo ijiebuon ise iji fine ke mazim giak. \v 6 Ijefuon Jesu Kurais fu vuak ma iji abe e iji bu usuibe ve dame do firama bu do ine aoinva ijiebuon kaven iji kuardiain. Bu vajai buon iji bun aoin revo bu Jesuon vuak iji faime ijia jakva kaven buon bu izeg God fu fioino ijeg kariokfuon. \p \v 7-8 Regavo efnun tavan iji ire fok moikigia naoivo iji bu barekfuon iji fun samairen. Ijefuon ni uri ni naraknum vo koikjon mukor samuanamikin ja giriesame Godon sirimameknum karik. Regavo ire ijia ka ma bomana iji nika mukorigia jon oijmanamif. Ja ijeg oijmanamikva ja kaifjon iji bu jon isema rekva ja magiaga una bu oijmiaknum karivak. \v 9 Regavo madu kaifjon iji oimarknum aferdiame ar jon ijia uniaf revo jab una ijefuon kuaik. \v 10 God fun daro kafokafo vajuoma no ik kafokafo reoij. Ijefuon noka daro iji fu e besubesum no vajuinma iji kege una e roin ifejdiakfuon. \v 11 Ijefuon erar a Godon vuak iji e roin kuardiaokma ni Godon daro ijia vuak fuon ma ijesugin kuardiamne. Regavo erar a e roin ifejdiakma ni daro fuon iji fu mainma ijin abe e iji ifejdiamne. Regavo ire fok ja ijegreokva e iji bu Jesuon if ijia God nidoik. Regavo na vierafe bu tavan bog Godon oimare ga fur daro fuon ijia ire fok samuagdiame vak. Mare. \s1 No Jesu Kuraison duadok ijia vajai fian abekfuon ijin \p \v 12 Ijefuon efnun vajai fian iviamkor iji mian ijeg jakuomo ni kafokafo bu jon roko iji bu ja biesiame giak roko ijefuon jab giaga fu oiserdiak. \v 13 Jaka unam izeg Jesu fu vajai fian abenma ijeg jak vajai fian abekva ni oimaref. Regavo ja ijegrekva rad tavan iji Jesu fu una ruakma ijia Godon sanainma iji fu samafrega jaka uruv oimarek. \v 14 Regavo e roin bu Jesu Kuraison if ijefuon ja musikia vo vuak ise kuardiakva nika oimaref. Ijefuon maiji Godon Kaven iji ka ma sanainma iji fu jana fin. \v 15 Regavo jab e kania bu aoik ga jab niesa ga jab unam ise iji rek revo madu jab uri e kafobuon ik iji rareme rek. Ja ijegrene uri ijefuon vajai fian abekva iji ja koikjon isema ren. \v 16 Regavo ja Jesuon e rejo ijefuon ja vajai fian abekva jab iji vajai fian abejo ijefuon jufabek revo jaka Godon oimarme vierafero no Jesuon if iji abenva ijefuon no ijeg vajai fian abenvaro. \p \v 17 Ijefuon tavan iji moikigia ire kafokafo no renva iji God fu guokfuon iji fun aneren. God fu efuon bu fu ma vierafejo iji unam buon kafokafo bu rejo iji fu amur giakfuon. Regavo God fu fine unam nuvuon kafokafo no rejo iji guokfuon iji fun iviakma nuvuon anerekma fu rad e iji bu Godon vuak iji bu kuardiaga buba faivo iji fuka unam ma ise ijia vajai fian abek. \v 18 Regavo Godon vuak bu usuibe isoinva iji fu ijeg kuai, \q1 God fu e iji bu if fuon ijia vajai fian abenva iji karauniakafa vierafen revo fuka ma gigikin gakma e iji buba ma vierafene ise reoijo iji bu izeg rek? \p \v 19 Ijefuon e iji bu vajai fian abejo iji fun God fu vierafenma ijin. Ijefuon unam ma iji ja rejo iji jab aregavo ka vajai jon ijiga oijon fok kege una God e iji fu ja amardiame samuagdiamo iji vajaf. \c 5 \s1 Fita fu e sos samuavo ijigam e sos ijia afuivo iji vuak kuardiainma ijin \p \v 1 Ijefuon na e mamkanuk sos akai samuavo iji na ja ejafiame kia. Nak na ejon bomana be nar Kurais fu vajai fian abenma iji gain. Regavo madu tavan iji fu una ruakma ijia God e bomana fuon ma iji sanainma ijigam daro iji fu kege e bu Kurais ma vierafejo iji nijaidiakma nak na ijia jana fateroin abek. \v 2 Regavo e iji sos samuavo iji ja e roin samuagdiavo iji mukorigia e iji fu maf-sif iji samuagdiamo ijeg jak Godon e iji samuagdiaf. Regavo jab vierafero bu eb kuardiaga ja ijesugin rekuai vierafejo revo jaka oijon ijia ma vierafene mukoi oi mafaime ref. Ijefuon maiji God fu vierafe jaka ijeg rekfuon. Ja e iji samuagdiakva jab oi isema vierafene mon ijesugin karkuaime ik iji rejo revo jaka oijon ijia ma vierafene mukorigia ik iji reof. \v 3 Jab koikjo kam e mamkanuk rejknum uri bu kam e ukakna igeg vierafek. Regavo jaka unam ma ijesugin nijaidiaga bu ijia giame buk ijeg reok. \v 4 Ja ijegrekva E Bomana iji fu ja e mamkanuk iji ja samuagdiamo iji fu tavan iji fu una ruakma fu izeg ja fuifuon mukorigia ikrenva fu iji giakma fu fuon sanainma ma iji fu barekfuon bakin iji abe miak. \p \v 5 Ijefuon e nivek iji e makin jon iji igiaf. Regavo jaka tavan bog adumaduigin oknum vo jon mukoi ifenamiknum of. Ijefuon maiji Godon buk iji bu usuibe isoinva ijia fu kuai, \q1 God fu e iji adumaduigin oijo iji fu mardiakgavo e iji bu aroikaraoijo iji fu nuigafiakno kuain. \m \v 6 Ijefuon jaka God E ma ka darokin iji fu tavan bog ja ifejdiaknum samuagdiamo ijefuon nifak ijia adumaduigin of. Ja ijegrenki tavan iji God fu vierafekma ijia fu ja kege e mamkanuk rek. \v 7 Ijefuon oifian jon fok kege una God vajaf. Ijefuon maiji fuka tavan bog ja vierafeknum samuagdiamo. \p \v 8 Regavo jab nitubaikgavo uri ni narame koikjo samuanamime nisaiknum karif. Ijefuon maiji fanuf raion ka ma kuriai e jakia bua ino iji fu vasiaguaga fu kurimoino ijegvo e ani jon Setan fu ijeg jon izeg ja Jesu ma vierafejo iji kam iserekafa oin. \v 9 Ijegvo jon izeg ja ma vierafejo iji jab arek jaka ijesugin vierafene gireknum vo Setan iji nuigafaf. Ijefuon maiji jan vierafe e kafo bu Jesu ma vierafejo ar iror igia karinva iji buk tavan kafo bu unam ise ijekin ijia vajai fian abej. \v 10 Ja tavan ukakbe vajai fian abe vo rad God iji fu tavan bog e mardiamo iji fu una ja kege ire fok ja vajai fian abene vajai fiaigma oinva iji amarediak. Regavo madu fu daro gigikin iji ja ijia girme irekfuon iji miaga ja rad izeg ja Jesu ma vierafejo iji jab arek. Regavo fun Godri ja kumedo ja una Kuraisna besum rega fu sanainma fuon ijia navako iji abe miakfuon. \v 11 Regavo na vierafe Godon daro iji fu ire fok samuagdiamo iji fu tavan bog ijia na vak. Mare. \p \v 12 Regavo efnun fas ukak igi na e Sairasri ifejdiema na isoin. Revo e Sairas fu uviainuvuon be fu God ma vierafeno. Regavo fas igi na isoime nijiavo iji na vierafe na ja ejafiame kuardiav. Revo vuak fok na isoinva iji izeg God fu e fok ma rediamo iji fu vuak ma ijesugin ijefuon na iji isoin. Ijefuon ni vuak iji kege ma vierafene darokma kuniaime karivaf. \p \v 13 Regavo e igi God fu jana besum ke uniainma bu ai Babiron igia karine Jesu ma vierafejo ijiga e be na ifejdiemo e Mak bu ja anadiain. \v 14 Ijefuon jaka e iji Kurais ma vierafejo bu anainamivo ijeg oijon guf ijekma anainamiknum karif. Regavo na vierafe God fu e iji ja ijia karine Jesu Kurais ma vierafejo iji ifejdiaga ja afuime karikfuon.