\id 2TI Wubuy New Testament 
\h 2 Timothy 
\toc1 2 TIMOTHY  Ana-wubiba na-Paul-inyung 
\toc2 2 Timothy 
\mt1 2 TIMOTHY  
\mt2 Ana-wubiba na-Paul-inyung  
\ip Nubagi-yung na-Paul ni-yandharrgini anaani ana-lhaawu nigawi-wuy naa-mijgalmini-wuy, na-nimuwaj-jung Timothy. Naagi-yung na-Paul ni-burri ana-Rome-duj, ni-radbidhi anubagu. Nigaayung na-Timothy ni-burri anubani-rruj ana-lhal ana-Ephesus. Na-Paul nu-magaa, ani-lhaay yungguyung andhurrg, marri waari ani-lhuṉdhangi niga.  
\c 1  
\s1 Na-Paul anaani-yung ni-yandharrgina ana-lhaawu.  
\p
\v 1 Ngaya-waj nga, yaani Paul. Ngaya anaani ngawu-lhaawu-yarrijgina-yinyung na-Christ-inyung na-Jesus. Niga-waj yamba God ni-wijangani aadanu, nguynju yungguyung nga-magina anubani-yung-jinyung ana-wiri-yinyung, anubani-yung ngarrani-lhalamayaa ngagurru, niga yamba na-Christ Jesus.   
\p
\v 2 Nugawi-wuy aadanu Timothy. Nagang nu-ngu-burraa nguynju ngayawi-nyinyung na-wirrinyung, marri ngaya ngunu-ngaynbandii.  
\p Na-God na-Baba marri na-Jesus Christ ngagurri-nyinyung na-Buunggawa, wuguṉi ambi-walgaṉmana, marri ambi-man.galagana, marri ambi-lhamaamura-gang.   
\s1 Na-Paul nu-warraarriwana na-God.  
\p
\v 3 Malgarrawindi nga-yambina na-God-guy, miyn.ngu marri arrarra, marri ngunu-yangayii nagang, marri nganu-warraarriwana niga. Naagi-yung na-God anaani nganu-yandhurrbangana, nguynju yaga warruburru-yung warra-mi…yn-ngambara wurru-waṉbini-yinyung. Marri ngaya nga-lhaal-maaḻang-bindiyung anaani.   
\p
\v 4 Ngaya anaani nga-wijangayii nagang nuṉḏuguni, marri ngunu-ngaynbandii nandaangarra-ngu-burraa ngijang, ngunu-ngaynbandii windiyung, miyn.ngu marri arrarra. Nguynju yadhu anubani-yung nganggaḻaaḻarrang.  
\v 5 Ngaya nga-wijangayii anaani, nagang nu-ngu-jambarrgiiyn-bindiyung, yijgubulu. Ana-wulhu-wulhurr nagang ngarrubagi-yung ngarra-nganggur ngarra-Lois, ngi-jambarrgini yijgubulu-windiyung. Nga nugawi-nyinyung nga-rriibi ngarra-Eunice, ngigaayunggaj ngi-jambarrgini. Ngaya anaani nga-marrbuy, nugaayung nu-ngu-jambarrgina maaḻamburrg, wudani-yung-jii aadanu.   
\p
\v 6 Wudani-yung-gala nga, ngijang ngunu-magana anaani. Anubani-yunggaj, niga na-God nini-yayn ana-lhuḏ. Anubani-yumbaa, ngaya-waj marri wurru-ragaani-yinyung, nurru anaani nirri-burriyn ana-marang nugawi-rruj a-yinag-duj. Anaani ana-yimbaj, yagi numbarandhalabi anaani ana-lhuḏ. Bawu-wiri-gayn anaani-yung.  
\v 7 Nagang nu-marrbuy, niga na-God nganiini anubani ana-Maṉngulg Mawurr. Anubani-yung waari ngambanggu-wan-galaalagang, ngarrangguuyii arrawindi ana-lhuḏ, marri ngarraa-ḏamarr-ngu-burraa, marri ngurru-waḏbirr.   
\p
\v 8 Wudani-yung-gala nga, yagi anubani nundaambuli. Bamba-magana na-Buunggawa-yinyung. Marri yagi nundaambuli ngayawi-nyinyung, nga-radbidhii yamba anaani. Nagang ba-yamana nguynju yaga ngayawi wubani-yung-jii, nga-radbidhii anaani, nugaayung ba-yamana, nandaanggarra-ḻibi-ḻibawaynjina, nanggu-lhagaṉmana, nagawaa yamba narra-magana anaani ana-mamanunggu ana-lhaawu. Na-God ani-maṉmani nagang aadanu.   
\p
\v 9 Yigaj! Ngagurru ngaani-wiri-gayn anaani, marri ngaanii-gaḏangi nigawi-nyinyung-mirri maṉngulg lhaawu, nguynju yadhu ngaambu-maṉngulg ngaambu-burraa. Yagu wiiya ngurru-waṉbini ana-maaḻamburrg, yagu anu…bani-yunggaj, waari-waj anaani ana-lhal anggu-maṉdhini, anubani-yung niga ni-wijangani, ngarrani-walgaṉmaa yagu yamba na-Christ na-Jesus-inyung niga.  
\v 10 Marri ana-yimbaj, anaani ngarrani-bajiyini ngagurru, marri ngunu-nani na-Christ Jesus ngagurri-nyinyung ngarrani-wiri-gayn-jinyung. Anubani-yung niwu-jadugayn ana-ngawij marri niwu-warrarra-gayn anubani ana-wiri, aadanu yagi wiij-guldhi, yagi wu-ngawi. Aadanu ngarrani-yiyini wubani a-mamanunggu a-lhaawu wugurru.   
\s1 Ba-wijangayii anubani-yung ana-maaḻamburrg ana-lhaawu.  
\p
\v 11 Aadanu ana-mamanunggu ana-lhaawu, aadanu ngaya ngarra-magana-yinyung. Na-God ngani-lharrgang, marri ngawu-rajaarrijgana ana-lhaawu, ngaya ngawu-lhaawu-yarrijgina-yinyung anaani, marri ngarra-marrbuy-wana, anubani ana-lhaawu.  
\v 12 Wudani-yung-gala nga, anaani ngaya ngaarragayii, marri nga-radbidhaa. Yagu waari ngaya ngandaambulang, ngaya yamba nga-marrbuy nubagi-yung nganaa-ngu-jambarrgiiyn. Ngaya nga-marrbuy anaani, niga ngambani-waṉagana ngaya, marri anubani anaarrawindi-lhangu nganu-warriini-yinyung ngaya, nigawi-wuy, wurrugu marri yiibagi-rruj yii-waḻirr, aniigiyn-maynji niga.   
\p
\v 13 Nagang aadanu Timothy, ba-wijangayii anubani-yung ana-maaḻamburrg ana-lhaawu, anubani-yung ngunu-magaa-yinyung. Baaṉbina wubanila-yung-galawaj. Baandha-wuguuguni ba-jambarrgina, marri bambaa-ḏamarr-ngu-burraa-wugij, yagi nu-muḏaḏbi. Niga na-Christ na-Jesus ani-burraa nugawi-rruj aadanu.  
\v 14 Anu…bani-yunggaj, ngaya anaani ngunu-yayn anubani aniijgubulu ana-lhaawu. Nagang baandha-wuguuguni bawu-rangarrii, anubani ana-lhaawu. Marri anubani ana-Maṉngulg Mawurr wu-burraa-yinyung nugawi-rruj, marri anubani anggu-maṉmani nagang.   
\p
\v 15 Nagang nu-marrbuy, warraarrawindi-lhangu aadani-rruj ana-lhal ana-Asia aadanilu-wala wuu-ngarra-biḻibiḻingiyn, aḏaba ngambiirruyn, ari ngambiindirriyn. Naawiṉi-yung na-Phygelus marri na-Hermogenes, naawiṉi-yung wini-yamaa, ngambiirruyn ngaya.   
\p
\v 16 Wugurraayung warruburru-yung naaynbajung-jinyung na-Onesiphorus-jinyung warra-mijgalgur-yung, ambani-man.galagana na-Buunggawa, niga yamba na-Onesiphorus ngani-maṉdhiyn malgarrawindi. Naagi-yung waari aniimbulangi, wiiya ngaya anaani-yung nga-lhuganda-radbidhii anaani.  
\v 17 Naagi-yung ni-waliyn anaani-rruj ana-lhal ana-Rome, nga naagi-yung nganiigalhaga-lharrmangi anaani-rruj, wurrugu marri bani-yung ngani-lhangarrmayn.  
\v 18 Na-Buunggawa anu-man.galagang nubagi-yung, ngarrubagi-rruj ngarraaḻirr, aniigiyn-maynji niga. Marri nagang aadanu nu-marrbuy-windiyung, wubani a-lhal a-Ephesus, naagi-yung malgarrawindi ngani-maṉmangi ngaya anaani.   
\c 2  
\s1 Ba-lhara-wugij andhurrg, yagi nundhuṉdhi.  
\p
\v 1 Nagang aadanu Timothy, ngayawi-nyinyung nigi. Aadanu ba-waḏa-waḏaḏ, niga yamba na-Jesus nani-walgaṉmana nagang.  
\v 2 Nu-marrbuy, anubani-yumbaa nga-magini bagu warraarrawindi-rruj warra-wurru-wurruj, marri ngambi-yaynjangani. Aadanu ana-lhaawu, aadanu bamba-magana warruburru-yung-guy warra-waḻya-waḻya-wuy warraambaḻaman-guy, wurru-jambarrg-jinyung, nguynju yungguyung warraawurru-yung ambarra-magana yungguyung warra-mulung-aynbaj-guy, ambarra-yiyina wugurru.   
\p
\v 3-4 Nagang ba-wijangayii warruburru-yung-jinyung wurru-wiynji-wiynjina-yinyung. Warruburru-yung waari amburru-wijangang anaaynbaj. Wugurru wurru-wiynjina angaḏajung, wunu-yandhurrbangana-wugij na-buunggawa-yung, ambunu-waḻaaḻarrijgana yungguyung niga.  
\p Yuga nagang nu-marrbuy? Nagang nuynjamana nguynju warruburru-yung-jii wurru-wiynji-wiynjina-yii, nagang yamba nunaa-mijgalmina na-Jesus Christ. Ari aladi anggu-waṉina nugawi-wuy, anggiijamana nguynju wu-waṉina nurri-wuy anaani. Yagu wiiya aadanu, ba-lhara-wugij andhurrg, yagi nundhuṉdhi.   
\p
\v 5 Yagu ba-wijangayii aanda-yinyung. Warraaynbaj-maynji warrubawi-yung ambu-wayamani anaanda-mirri, yagi-maynji warrubawi-yung wurru-wayami maaḻamburrg, wu-yamana anaani-rruj ana-lhaawu-runggal, warrubawi-yung yagi wirri-mi ana-bayarra.   
\p
\v 6 Yagu ba-wijangayii, warrubawi-yung waanaanuynjungana-yinyung amburru-mijgalmina-maynji, marri anubani-yung anggu-warra-lharang. Anubani-yung amburru-ragaana, amburru-mani, anaani wiij-maṉdhiyn.  
\p Yuga nagang nu-marrbuy? Nagang ba-mijgalmina maaḻamburrg-galawaj, yagi nundhuṉdhi aadanu.  
\v 7 Danu ba-wawanggina anaani-rruj ngaya anaani nga-yambina, marri na-Buunggawa ani-marrbuy-wana nagang, anaarrawindi-lhangu.   
\p
\v 8 Ba-marrbuy, naagi-yung na-Jesus Christ anubani-rruj ni-ḻaḻagiiyn ana-ngawij-gala. Niga na-David-jinyung warru-mandag. Danu nga, ngaya ngarra-magaa anaani ana-mamanunggu ana-lhaawu wugurru.  
\v 9 Wudani-yung-gala nga, ngaya anaani aḏaba ngaarragayii marri nga-lhuganda-radbidhaa, nguynju yaga warrubawi-yung waamaamajaa-yii yaga. Yagu anaani ana-lhaawu na-God-jinyung warraaynbaj yagi anaani wirri-radbu wugurru.   
\p
\v 10 Wudani-yung-gala, nga-wijangayii anaani wiij-maṉdhina, nguynju yungguyung warruburru-yung na-God ni-wajbarini-yinyung, warruburru-yung ambani-wiri-gang, marri amburru-burraa anubani-rruj wu-milhiynjina-rruj anggu-wuguuguni, yagu yamba na-Christ Jesus-inyung niga.   
\p
\v 11 Ana-lhaawu anaani yijgubulu-windiyung.  
\q1 Ngagurru-maynji ngurraanggarra-ngawiiyn-maynji na-Jesus, anubani-rruj ngaambaanggarra-ngu-burraa,  
\q2 ngaambu-wiri-mana.   
\q1
\v 12 Marri ngaambu-lhara-maynji andhurrg,  
\q2 ngaambu-burraa nigawi-rruj, ngaambaanggarra-ngu-buunggawa-mana.  
\q1 Yagu ngaanaandirrii-maynji niga,  
\q2 nigaayung ngaambaniindirrii ngagurru.   
\q1
\v 13 Yagi-maynji anubani-yung ngurru-jambarrgi,  
\q2 yagu anubani ni-jambarrg-bugij, yagi niiynbijgi niga.   
\s1 Ngagurru ngaambu-mijgalmina maaḻamburrg-galawaj na-God yungguyung.  
\p
\v 14 Nagang Timothy, danu bamba-magana-wugij, anaani anaarrawindi-lhangu ngana-magana-yinyung. Bamba-dhi-maṉdhii, marri bamba-magana, na-Buunggawa wani-nayii wugurru. Bamba-magana, amburru-muḏaḏbang, yagi wurru-wundangi, aadani-yung-jinyung aaynba-gaynbaj-jinyung a-lhaawu. Anubani ana-wundangij aniijiijung, waari ambanggu-maṉmang wugurru, yagu ari ambanggu-jadugana warruburru-yung wurraawanggina-yinyung wugurru.   
\p
\v 15 Nagang aadanu, ba-lhaal-maaḻang, anubani-yung ba-yiynjang na-God-guy, banaa-mijgalmina. Na-God-maynji anubani-yung ani-rawumana-maynji, marri ba-lhara ba-waḏa-waḏaḏ. Marri yagi anubani nundaambuli. Anubani-yung bamba-marrbuy-wana maaḻamburrg aniijgubulu-yinyung ana-lhaawu.  
\v 16 Warruburru-yung warra-mulung-arrgi-yung wurru-yambiynjina arrbidi, wurru-yaal-ngaḻa-ngaḻij wugurru. Anubani-rruj yagi nuṉḏumi, marri yagi barra-magi. Warruburru-yung yamba wurru-yarramana na-God-gala wugurru.   
\p
\v 17 Wiijamana anaani. Anaaji-maynji ana-waṉja-rruj-maynji, ani-waṉja-walgang nubagi-yung na-rulul, anubagi ani-warradii ani-runggal-wina, anubani anggu-wuḻang anubani aladi-windiyung anggu-waṉiyn, anggu-rajaarrang. Dani-yung nga, wiijamana anubani anaaladi ana-lhaawu wugurru.  
\p Nubiṉi na-Hymenaeus marri na-Philetus wini-yamaa wudani-yung-jii.  
\v 18 Anubani wini-wiḻibiḻingini aniijgubulu-wala. Dani wuguṉi wini-wijangani, dani yaga wuu-ngawina nga wuu-ḻaḻagina, wu-jadugiiyn aḏaba, wiijamana warruburru wurru-ngawina amburru-wuguuguni. Warra-mulung-arrgi-yung dani-yung wurru-jambarrgini, yagu dani-yung wurru-ramarr-ruwi-ruwina wugurru.   
\p
\v 19 Yagu wugurraayung na-God-jinyung warra-wurru-wurruj yagi wuu-yarrami. Anaani yamba ana-lhaawu wu-yamana nguynju yaga amudami-yung-jii ama-ṉuga-yii ma-ṉuga-murrgulhaa, dani yaga wirri-dhidii yaga, nga waari waaladi-wi. Anaani wu-yamana ana-lhaawu, \it (Numbers 16:5) “Na-Buunggawa ni-marrbuy warruburru-yung nigawi-nyinyung.” \it* Marri, “Warrubawi-yung-maynji ambi-waṉagana-maynji anubani-yung ana-muwaj na-Buunggawa-yinyung, marri ambu-yaarri anubagala anaalaaladi-wala.” Dani-yung ana-lhaawu wu-yamana.   
\p
\v 20 Nagang ba-wijangayii anaani. Anubani-yung-maynji ana-runggal ana-wumurrng, ma-burraa bagu mana-gaṉdharra amaaynba-gaynbaj-jinyung. Mana-mulung-arrgi-yung ma-mamanunggu-windiyung, ma-maṉdhini a-ṉuga-ngalngalngaluj-jii wuṉuga-yii, marri a-silver-yinyung. Yagu magurraayung manaaynbaj waari ama-mamanunggu-magaa, ma-maṉdhini a-rangag-gala marri wuṉuga-wala. Anaani ngurraaṉbaaṉbina aaynba-gaynbaj-gala.   
\p
\v 21 Nagang nu-marrbuy? Ngagurru anaani warra-Christian, ngurru-yamana nguynju yaga amudamu ama-gaṉdharra-yii. Ngagurru-maynji ngaambu-ngalngalijgiiyn, marri ngaambu-yaarri-maynji anaaladi-wala, anubani-yung ngaambu-yamana nguynju yaga amudami ama-mamanunggu ama-gaṉdharra-yii. Nubagi na-Buunggawa ngambani-maṉngulg-gana ngagurru, marri ngaambu-mijgalmina maaḻamburrg-galawaj nigawi yungguyung.   
\p
\v 22 Nagang aadanu aadanila-wala aniij-gaynba-gaynbaj-jinyung aniij-galaaladi, ba-yaarri anubagala, anubani aniij-galaaladi warruburru-yung-jinyung warra-mijgulmurr wirri-ngaynbandii-yinyung. Nagang baaṉbina maaḻamburrg-galawaj marri ba-jambarrgina marri bambaa-ḏamarr-ngu-burraa warra-wurru-wurruj marri ba-lhamaamura ba-burraa. Nugawaj marri burru-yung wunaa-gaḏii-yinyung na-Buunggawa, wurru-lhaal-maaḻang-jinyung.   
\p
\v 23 Yagu wugurraayung warra-mulung-arrgi-yung wurru-wundaa-wugij, wurru-yambiynjina yij-galaaladi-yinyung marri wurru-yilg-balii. Nagang yagi anubuguni nuṉḏumi barra-warubaj-gi. Nagang yamba nu-marrbuy, anubanila-wala warruburru-yung amburru-wundaa runggal-windiyung wugurru.  
\v 24 Marri nu-marrbuy, nagang-maynji ba-burraa banu-yandhurrbangana-yinyung na-Buunggawa, nagang yagi numbundangi. Nagang bamba-man.galagana warraarrawindi-lhangu marri ari bamba-marrbuy-wana maaḻamburrg, marri ba-lhambaamburrg ba-burraa aadanu.  
\v 25 Wugurraayung wurru-wundaa-yinyung, nagang bamba-magana, wurrugu, wunyugunyig bamba-dhi-maṉdhii. Nguynju yungguyung na-God ari ambani-walgur-wana warruburru-yung, marri amburru-wurrij-biḻibiḻingiyn, marri bani-yung ari amburru-marrbuy-mang aniijgubulu-yinyung wugurru.   
\p
\v 26 Ana-wulhu-wulhurr anubani-yung na-baḏirrnya-yung anaani wani-waṉagaa nguynju yaga wani-dhidangi-yii, wu-yamaa. Niga-waj yamba wani-yambini, marri wunu-yandhurrbangaa. Yagu ari aḏaba anubanila-wala amburru-yarramana na-baḏirrnya-yung-gala wugurru.   
\c 3  
\s1 Warraarrawindi amburru-waṉbina aladi windiyung.  
\p
\v 1 Nagang Timothy, anaani ba-marrbuy windiyung. Anubani-rruj wu-dhaag-mana-rruj, runggal windiyung magarrangaynji ama-waṉiyn.  
\v 2 Warra-wurru-wurruj warruburru-yung wugurraajbaj amburru-ngaynbandiina. Marri ambirrii-ḏamarr-ngu-burraa anu-ṉuga. Marri amburru-lhama-lhamina marri amburraarra-yamawaynjina. Marri waari warra-yandhurrbi nga-rriibi-yung yagu na-ninyarra-yung. Marri waari wurru-yami, “yuu, nga,” warraaynbaj-guy wugurru. Marri amburru-lhaguḻa-maaḻang-gina, marri amburru-waṉbina yij-galaaladi windiyung wugurru.  
\v 3 Waari warraa-ḏamarr-ngu-burrangi warraaynbaj-guy. Anubani-yung amburru-wurrij-gaḏaaḏigaynjina marri amburraaladi-yamawaynjina. Waari anubagu ana-lhirribala wurru-wurrij-dharri. Marri amburru-wiynji-wiynjina amburraandha-wuguuguni wugurru. Anubani-yung ambirri-wurrij-bangana anubani-yung anaambaḻaman.  
\v 4 Marri warruburru-yung ambarra-dhaayurrii, waari wirriijanga-yangi, marri amburru-lhama-lhamina windiyung. Marri ambirri-ngaynbandii arrawindi windiyung, ambanggu-wurrij-gaḻaaḻarrijgana, marri waari wunaa-ḏamarr-ngu-burrangi na-God.  
\v 5 Wurraan-jamana yingga wurru-waṉbina maaḻamburrg-galawaj, yagu waari amburru-jambarrgang na-God-jinyung ana-lhuḏ. Nugaayung aadanu, ba-burraa warruburru-yung-gala, malanganyanay.   
\p
\v 6 Warrubujujung wugurru wurru-yaarri wubani-waj a-wumurrng-guy, anubani-yung-maynji warra-yambina ana-lhaawu warra-maṉaṉung-guy, wurru-bilwilwiluj, warruburru-yung waa-dhaayurrijgana, yanggaḻij. Warruburru warra-maṉaṉung, wurru-wijangayii wurru-waṉbina aladi, marri wurraambulii-windiyung. Marri wirri-ngaynbandii-wugij aynba-gaynbaj-jinyung yij-galaaladi.  
\v 7 Yagu warra-yaynjangayii warra-mulung-aynbaj-guy, yagu yagi wurru-marrbuy-mi aniijgubulu-yinyung.   
\p
\v 8 \it (Exodus 7:11)\it* Yagu nagang nu-marrbuy, anu…bani-yunggaj naawiṉi-yung na-mirarra-yumbaa marri na-Moses wurru-yang-guḏuwuḏiynjini, na-ni-muwaj-baa na-Jannes marri na-Jambres wuguṉi. Wubani-yung-jii, warruburru-yung warra-wurru-wurruj wuu-yang-guḏuwuḏiynjina aniga-yung aniijgubulu. Wugurri-nyinyung yaga ana-yinag anubani-yung waalaaladi-wina marri wuu-yamana yaga yigaj wuu-jambarrgina, yagu wiijanggaḻij.  
\v 9 Yagu yagi wuu-lhuḏ-ḏumi, wugurru yamba wuu-yilg-balii. Warraarrawindi-lhangu aadanu ambarra-nayii. Yagu anaani wiijamana wu…bani-yunggaj warra-nani naawiṉi-yung wuguṉi-yunggaj wanggu-nani yalga-yalgaṉbuj.   
\s1 Mana-magarrangaynji ama-waṉina ngagurri-wuy ngurru-jambarrgina-wuy.  
\p
\v 10 Nagang aadanu Timothy, nu-marrbuy anaani nga-magina-yinyung anubani-yung ana-lhaawu, nimba-nani ngaya ngaaṉbini-yinyung. Marri nimba-nani nga-yaminggarrini anaani nga-burraa, marri ngayawi-waj anaani. Marri nimba-nani anaani nga-jambarrgina-yinyung, marri anaani nga-lhambaamburrg. Marri ngarraa-ḏamarr-ngu-burraa warra-wurru-wurruj, marri nga-lhara nga-waḏa-waḏaḏ. Aadanu nimba-nani.  
\v 11 Marri barra-nani warruburru warra-mulung-aynbaj ngambi-wungarri-dhijgaa, marri anubani-yung ngaarragayii anaani. Marri nimba-nani ngaya, anubani-yung mana-magarrangaynji ma-waṉini ngayawi-wuy, anubani-rruj ana-lhal Antioch, marri anaaynbaj Iconium marri anaaynbaj Lystra. Warruburru-yung ngambi-wungarri-dhijgaa windiyung, yagu malgarrawindi niga na-Buunggawa ngani-maṉmangi ngaya.   
\p
\v 12 Anaani ngunu-magana nugawi-wuy. Warraaynbaj-maynji warrubawi-yung ambunu-garrindharrmani na-Jesus Christ, marri ambu-burraa-maynji maaḻamburrg-galawaj, warruburru-yung warra-mulung-aynbaj ambarra-wungarri-dhijgana wugurru.  
\v 13 Marri wugurraayung warruburru-yung warraalaaladi marri warruburru-yung amburraaṉbina-yinyung aniijanggaḻij-jinyung, anubani aḏaba amburraalaaladi-wina-wugij, runggal-windiyung. Warraawurru-yung yijanggaḻij amburru-yambina warra-mulung-aynbaj-guy, ambarra-dhaayurrii wugurru. Marri wugurraayung ambarra-dhaayurrii wugurri-wuy, wugurraayunggaj.   
\s1 Ana-mamanunggu ana-lhaawu ngambanggu-maṉmani ngagurru.  
\p
\v 14 Yagu nugawaj aadanu Timothy, bawu-waṉagana-wugij ana-mamanunggu ana-lhaawu, nu-marrbuy-mana-yinyung marri aadanu-yinyung nu-ngu-jambarrgini-yinyung, yijgubulu windiyung. Nu-marrbuy yanga-yangi warruburru-yung nimbi-magaa-yinyung nagang.  
\v 15 Nu-marrbuy anubani ana-wubiba ana-maṉngulg, nu-marrbuy anubani-yung, anubani-yunggaj numbirrig-gaj. Ana-wubiba anubani-yung anggu-marrbuy-wana. Nguynju yungguyung ba-jambarrgina na-Jesus Christ nga dagu ani-wiri-gana nagang.   
\p
\v 16 Na-God ni-ngayn.gaani wubani-wuy wubiba-wuy, anaarrawindi-lhangu, marri niwu-maṉdhangi wu-wiri, aadanu wu-waṉini na-God-gala. Aadanu mamanunggu marri ngarranggu-marrbuy-wana ngagurru anaani. Ngarranggu-magana ngaambu-waṉbina-yinyung anaaladi, nguynju yungguyung ngaambu-dhi-maṉdhina. Aadanu anggu-wuguuguni ngambanggu-bajiyina anubani ana-maaḻamburrg ngaambu-waṉbina-yinyung.  
\v 17 Anubanila-wala ana-wubiba-wala, ngagurru ngaambu-burraa na-God-jinyung, ngagurru ngaambu-burraa maaḻamburrg marri ngaambu-waṉbina maaḻamburrg-bindiyung anaarrawindi-lhangu ngagurru.   
\c 4  
\s1 Na-Timothy ani-dhi-maṉdhina niga.  
\p
\v 1 Nagang Timothy, baawanggina. Na-God marri na-Christ na-Jesus wini-burraa yaaji. Na-Christ niga wani-nguynju-nguynjijgana-yinyung warrubawi-yung wu-wiri-yinyung marri wu-ngawina-yinyung. Marri nigaajbaj ngaambani-bajiyiyn, marri niga na-Runggal-yung. Aadanu nu-marrbuy.  
\p Wudani-yung-gala nga, ngaya ngunu-magana.  
\v 2 Bamba-magana, bawu-rajaarrangijgana ana-lhaawu, yagi nu-muḏaḏbi, ba-lhaal-maaḻang. Wiiya warruburru-yung waari nimbi-yaynjangi, yagu nagang bamba-magana-wugij. Ba-yambina nguynju warruburru-yung ambi-ngu-jambarrgina yungguyung. Bamba-dhi-maṉdhii, bamba-magana maaḻamburrg-galawaj warra-wurru-wurruj. Ba-wuguuguni baaṉbina, ba-lhambaamburrg windiyung marri bamba-maga-magana, yagi nu-muḏaḏbi anaaḻagaḻa.   
\p
\v 3 Yagu anaani ngunu-magana nugawi-wuy. Aḏaba wiij-barubaj-mana, warraaynbaj-maynji warrubawi-yung ambarra-magana aniijgubulu, warra-wurru-wurruj warruburru-yung waari warra-yaynjangi. Anubani-yung warruburru-yung ambirri-yaynjangayii anubani ana-lhaawu ambirri-ngaynbandii-yinyung, bani-yung-bugij ana-lhaawu. Nguynju yaga wudanu yaga wurru-waraṉḏirirrii, wurraaḻaaḻina. Wudani-yung-gala, ambarra-lhangarrmang warrubawi-yung warra-marrbuy-wana-yinyung, ari bawa-yung ambarra-magana anubani-yung ana-lhaawu.  
\v 4 Warruburru-yung yaga amburru-marra-marraana, anubanila-wala aniijgubulu-wala. Marri warruburru-yung amburru-wawanggina yijanggaḻij wugurru.   
\p
\v 5 Yagu nagang aadanu Timothy, ba-yaal-waḏbirr. Wiiya warra-mulung-aynbaj warruburru-yung ambi-wungarri-dhijgana, yagu ba-wuguuguni-wugij ba-lhara andhurrg. Bamba-magana-wugij aniij-mamaaḻang ana-lhaawu, anggu-wuguuguni ba-mijgalmina na-God-jinyung. Marri bawu-jadugang-bindiyung bawu-dhaambungiwana aadanu.   
\p
\v 6 Anaani ngunu-magana nugawi-wuy. Wiij-barubaj-mana aḏaba anaani ngambiimana, nga-ngawang, marri ngayawi-nyinyung mana-wulang ama-burraa nguynju yaga anubani anu-gargayag, wirri-wadbarrwina-yinyung wubani-rruj a-bulugi-rruj, wurruumana-yinyung nigawi yungguyung na-God, anaani wu-yamana wugurru.   
\p
\v 7 Ngaya anaani nga-mijgalmini angaḏajung nigawi yungguyung na-God. Nguynju yaga anda nga-wayamangi, maaḻamburrg-galawaj nga-wayamangi, anubanila-wala aḏaba wiiya, nga-burrangayn. Anaarrawindi-lhangu anubanila-wala nga-jambarrgiiyn, ngawu-waṉagana, ngaya anaani.  
\v 8 Na-God niwu-waṉagana bayarra, ngayawi yungguyung, anaani wiijamana, ngani-maaḻamburrg-gana. Niga na-Buunggawa ngambani-nguynju-nguynjijgana maaḻamburrg, ngagurru anaani. Niga marri ngambaniiyn ngaya anubani ana-bayarra ngarrubagi-rruj ngarraaḻirr. Yagu waari ngaya-wugij-magaa. Wugurraayunggaj warruburru-yung warraarrawindi amburru-waḻaaḻarrii-yinyung niga yamba ani-rabalang, burru-yung ambaniiyn anubani-yung ana-bayarra, warraarrawindi-lhangu.   
\s1 Wu-dhaag-mana-yinyung ana-lhaawu.  
\p
\v 9 Timothy, anubani-yung baarraalgaalgurmani, ba-yaarri ngayawi-wuy, anggiij-dhamun.gurrg.  
\v 10 Niga yamba na-Demas nganiirruyn ngaya aḏaba, niga yamba niwu-ngaynbandii aani a-lhal. Aḏaba ni-yanggi yuuguni Thessalonica-wuy. Nigaayung na-Crescens ni-yanggi Galatia-wuy. Nigaayung na-Titus ni-yanggi Dalmatia-wuy.  
\v 11-12 Nigaayung na-Tychicus nganu-lharrgang Ephesus-guy. Ngaya nga-wiri-wiri nga-burraa aḏaba. Naagi Luke-bugij niiniinggarra-ngu-burraa. Banu-lhangarrmang na-Mark banaagijgiyn, nimbiniinggarra-yaarri ngayawi-wuy. Naadagu ngani-yandhurrbangana yamba yij-mamaaḻang-jinyung niga.  
\v 13 Ba-yaarri-maynji aadajilu, bama-waṉagana dajilu yaaḻi, daju ngamaarruyn-jinyung ma-burri, a-lhal-uj Troas. Na-Carpus daju nima-waṉagana. Marri bawu-waṉagana wubiba aadajilu, marri dajilu yaga mulung-arrgi-yung wubiba wugurru.   
\p
\v 14 Nigaayung na-Alexander naadagu ngu-waḻa-waḻii-yinyung yii-yiiḻi-yii, naadagu nima-maṉdhangi runggal magarrangaynji ngayawi yungguyung. Yagu na-Buunggawa anaa-gaagijgina niga, anubani-yung ni-waṉbini-yinyung.  
\v 15 Baarranggana nubagi-yung, na-maragarrijung, baagarra-garranggina. Niga yamba ni-wij-galadi-wayn windiyung ana-lhaawu nurri-nyinyung anaani.   
\p
\v 16 Ana-wulhu-wulhurr, anubani-yung ngambi-yambiḻibiḻingaani, warraaynbaj waari ngambambi-maṉmangi, warraarrawindi-lhangu ngambiirruyn. Yagu ngaya nganu-yandhawiwana na-God, yagi yadhu wanii-gaagijgi wugurru.  
\v 17 Anubani-yung, niga na-Buunggawa ni-lhaay bagu ngayawi-rruj, marri bani-yung ngani-waḏa-waḏaḏ-gayn. Bani-yung marri ana-mamanunggu ana-lhaawu ngawu-rajaarrijgaa. Nguynju yadhu warraa…rrawindi warra-Gentile bani-yung aḏaba wurraawanggini. Na-Buunggawa yamba yaagi yamba, waari anubuguni ngambambi-lharrgandi anubani-wuy ana-ngirri-ngirri-wuy ngaya.   
\p
\v 18 Ngaya nga-marrbuy, niga na-Buunggawa ngambani-maṉmani anubanila anaarrawindi-wala aniij-galaaladi-wala marri ngambani-wiri-gang, ngambani-yarrijgina wubani-wuy a-wumala-wuy, ni-buunggawa-mana-yinyung. Aadanu wiij-maṉdhina, ngaanu-warraarriwana niga yamba ni-milhiynjina anggu-wuguuguni, yijgubulu windiyung.   
\s1 Na-Paul ani-yambina wiiyaw.  
\p
\v 19 Nugawaj danu nga bamba-magana ana-lhaawu, nuguṉi-wuy ngarra-Priscilla marri na-Aquila, marri warruburru-wuy warra-mijgalgur-yung na-Onesiphorus-jinyung.   
\p
\v 20 Niga naagi-yung na-Erastus ni-burri wubani-rruj a-lhal a-Corinth-duj. Niga nganaarruyn na-Trophimus, ni-lhangurrngang yamba, wubani a-lhal Miletus.   
\p
\v 21 Nagang aadanu ba-yaarri bagala, raga-ragij-gaj ba-yaarri manubama-maynji ama-lhanguyn-jarbani mana-mariga. Nigaayung na-Eubulus danu-waj ni-yandharrgina lhaawu nugawi-wuy. Marri na-Prudens marri na-Linus marri ngarra-Claudia marri warruburru-yung warra-minilharri-yung yaani nurru-burraa-yinyung wugurru.   
\p
\v 22 Niga na-Buunggawa nimbiniinggarra-ngu-burraa nagang, marri nugurraayung nambani-walgaṉmana aadanu.   
\mte1 Wiiya.