\id 2PE \h 2 Peter \toc1 2 PETER Ana-wubiba na-Peter-yinyung \toc2 2 Peter \mt1 2 PETER \mt2 Ana-wubiba na-Peter-yinyung \ip Nubagi-yung na-Peter ni-yandharrgina anaani ana-lhaawu, marri niwu-lharrgang warra-mulung-arrgi-wuy wurru-jambarrgini-yinyung-guy. Warra-mulung-arrgi-yung wurraawaḻii-yinyung warra-yiyini-yinyung wurru-yanggi wugurri-wuy. Na-Peter wani-magaa, waari ambarra-yaynjangani wugurri-wuy. Wugurru amburru-jambarrgini-wugij aniijgubulu ana-lhaawu na-Jesus-inyung wugurru. \c 1 \s1 Na-Peter anaani-yung ni-yandharrgina ana-lhaawu. \p \v 1 Ngaya-waj nga, yaani Peter. Ngaya anaani nganu-yandhurrbangana-yinyung na-Jesus Christ, marri nganaa-dhaawu-yarrijgina-yinyung niga. \p Marri anaani nga-warrarrii ana-wubiba nugurri-wuy, nurru-jambarrgina-yinyung. Nugurru aadanu nurru-jambarrgina nguynju nurri-yii anaani, marri anaani yij-mamaaḻang. Ngagurru anaani ngurru-jambarrgina, niga yamba na-God ngagurri-nyinyung, niga ni-waṉbini maaḻamburrg-waj ngagurri-wuy. Niga-waj nga, na-Jesus Christ nubagi ngarrani-wiri-gana-yinyung. \p \v 2 Ngaya anaani nga-jambarrgiiyn na-God nambani-walgaṉmana marri nambani-lhamaamura-gang nugurru, runggal-windiyung, nugurru yamba nurru-marrbuy niga na-God marri na-Jesus ngagurri-nyinyung na-Buunggawa. \s1 Na-God ngarraniigajij-majgaa. \p \v 3 Niga na-God ni-runggal-windiyung marri ni-mamanunggu niga. Marri niga ngarranii-gaḏangi nigawi-wuy. Marri niga na-Buunggawa ngarraniini anubani-yung anaarrawindi-lhangu ngagurri-wuy nigawi-nyinyung-mirri lhuḏ, ngagurru yamba ngurru-marrbuy niga. Nguynju yadhu ngaambu-waṉbina maaḻamburrg-waj, anubani-yung ngarrani-ngaynbandii-yinyung niga. \v 4 Wudani-yung-gala nga, niga na-God ngarrani-yayn ngagurru runggal-windiyung aniij-mamaaḻang-galawaj, anubani-yung ngarrani-lhalamayaa-yinyung wugurru. \p Yigaj! Warruburru-yung warra-wurru-wurruj anaani-rruj-jinyung ana-lhal-lhangu, wirri-ngaynbandii aladi-windiyung wugurru. Marri amburru-lhagarra-ngawina, marri amburru-lhaladina. Yagu nugurru aadanu nurru-yanggi warruburrala-wala, marri nugurru numburru-burraa na-God-jii aadanu. \v 5 Wudani-yung-gala nga, nugurru nuunaa-ngu-jambarrgina niga, anaani wiij-maṉdhiiyn. Yagu waari anaani-yung-bugij-magaa wugurru. Nugurru numburru-waṉbina angaḏajung, numburru-waṉbina maaḻamburrg-galawaj. Marri numburru-marrbuy-mana nigawi-nyinyung. \v 6 Marri numburru-dhi-maṉdhina aadanu. Marri numburru-lhara-wugij andhurrg. Marri numburru-waṉbina anubani-yung nani-ngaynbandii-yinyung niga na-God. \v 7 Marri numburru-walgur-waynjina nugurraajbaj, marri nugurru numburraa-ḏamarr-ngu-burrangijgaynjina aadanu. \p \v 8 Anaani-maynji anaarrawindi-lhangu numburru-waṉbina aniij-mamaaḻang, marri anggu-runggal-mana-maynji, nugurru numburru-waṉbina-wugij maaḻamburrg-galawaj aadanu, nguynju yadhu numburru-marrbuy-mana ngagurri-nyinyung na-Buunggawa na-Jesus Christ, runggal-windiyung. \p \v 9 Yagu warrubawi-yung-maynji waari wurru-waṉbi anubanila-yung-galawaj, wugurru waari wirri-ni ana-maaḻamburrg, wugurru anubani ambu-wawuynmani marri ambu-warandhalabang, anubani-yung wu-mamarriynjini anubani-yung-gala aniij-galaaladi ana-nungguḏaaba wugurru. \p \v 10 Murruyung-gaang, niga na-God nanii-gaḏangi, marri ni-wajbarini nugurru. Numburru-wan-garrarr, nguynju anubani-yung ana-lhaawu na-God-jinyung anggu-burraa yijgubulu-windiyung wugurru. Nugurru-maynji numburru-waṉbina anaani, nugurru yagi nurru-yarrami nigawi-wala aadanu. \v 11 Marri niga nambani-walgur-wana-windiyung nugurru, nigawi-wuy ana-lhal, anubani anggu-wuguuguni, anubani ana-lhal nigawi-nyinyung na-Buunggawa na-Jesus Christ, nubagi ngarrani-wiri-gana-yinyung. \p \v 12 Nugurru aadanu nurru-marrbuy anaani anaarrawindi-lhangu, marri nugurru nurru-waḏa-waḏaḏ nurru-jambarrg. Yagu ngaya anaani ngambuguuguni nganamba-marrbuy-wana nugurru aadanu. \v 13 Ngaya ngaaḻamin-jamana anaani wiij-maṉdhiiyn, ngaya nganamba-marrbuy-wana nugurru, ngaya nga-wiri-waj anaani-rruj a-wubulu. \p \v 14 Ngaya nga-marrbuy mal-dhamun.gurrg nganggarruyn ana-wubulu, nguynju-waj na-Buunggawa na-Jesus Christ ngani-bajiyini ngaya. \v 15 Marri ngaya anaani nga-mijgalmina angaḏajung, nguynju yadhu, wurrugu marri, nga-ngawang-maynji, nugurru numburru-marrbuy-wugij anaani anaarrawindi-lhangu. \s1 Na-Peter marri na-James marri na-John wunu-nani na-Jesus-inyung ana-lhuḏ. \p \v 16 Anubani-yung nurru anaani ngana-magaa nugurru anubani-yung ana-lhuḏ na-Buunggawa-yinyung na-Jesus Christ, marri anubani-yung aniigiyn-jinyung wurrugu. Nurru anaani waari naambu-wawaḻang, nurri-nyinyung ana-lhaawu yijgubulu-windiyung wugurru. Nurru yamba nuunu-nani na-Jesus-inyung ana-lhuḏ, nurri-yinyung-mirri mana-bagaḻang. \p \v 17 Ngaya-waj marri na-James marri na-John, nurru anaani nurraawanggiyn ana-yang na-God-jinyung. Na-God nu-runggal-waa na-Jesus, marri anubani wu-milhiynjini wu-burri anubagu. Na-God ni-yamayn, \it (Matthew 17:5) “Naagi ngayawi-yinyung na-nigi, marri ngaya nganaa-ḏamarr-ngu-burraa niga. Marri ngaya nga-wurrij-maaḻang nigawi-nyinyung.”\it* Dani-yung ni-yamayn na-God, \v 18 marri nurru anaani nurraawanggini anubani-yung nani-jang-jung, wubanila-wala aarrwar-wala, nurru nurraanggarra-ngu-burri na-Jesus, manubami-rruj ma-ḻandhirrngindi-rruj mana-ṉuga mana-maṉngulg. \p \v 19 Wudani-yung-gala, ngagurru anaani ngurru-jambarrgina ana-lhaawu warruburru-yung-jinyung wunaa-ja-jambini-yinyung na-God anubani-yunggaj. Marri ngurru-marrbuy, anubani ana-lhaawu yijgubulu wugurru. Nugurru aadanu nimbirri-yandhurrbangana ana-lhaawu maaḻamburrg-galawaj, anaani wiij-maṉdhina. Anaani ana-lhaawu, nguynju yaga wu-lhalmbaarri-yinyung anaa-ngududumaj-baj, nguynju yaga ngarra-baṉumbil angi-ḻaḻagiiyn nugurri-rruj aandhiri, marri ngarraaḻirr angi-waṉiyn ngamugijgaj, wu-yamana. \p \v 20 Nugurru aadanu numburru-marrbuy anaani aniij-ḏunggal, warruburru-yung wunaa-ja-jambini-yinyung wirriirrarrangi ana-lhaawu ana-wubiba-rruj, marri ngagurru waari ngurru-wijangi anubani-yung-jinyung, ngagurraaj-baj-bugij anaani. \v 21 Warruburru-yung wunaa-ja-jambini-yinyung, wurru-yambini ana-lhaawu, yagu waari warra-wurru-wurruj-gala. Anubani ana-Maṉngulg Mawurr wanggu-yarrijgina wugurru, marri wurru-yambina ana-lhaawu na-God-gala. \c 2 \s1 Warruburru-yung wurraawaḻii-yinyung warra-yiyina-yinyung. \p \v 1 Anubani-yunggaj, warruburru-yung wurraawaawaḻangi-yinyung wunaa-ja-jambini-yinyung, wurru-burri wugurri-rruj na-God-jinyung warra-wurru-wurruj. Nguynju-waj, ana-malg-jimbaj, mulung-arrgi-yung wurraawaḻii-yinyung amburru-rabalii nugurri-rruj aadanu. Warraawurru-yung nambambi-magana aladi lhaawu, midaarrgaj wugurru. Marri warruburru-yung wurru-lhaabina na-Buunggawa na-Jesus, nubagi-yung wani-bayarra-gayn-jinyung niga. Yagu wugurru ambuu-jadugiiyn ngalbaḻang, amburru-waṉbina wugurraajbaj. \p \v 2 Yagu arraarrawindi ambarra-yandhurrbangana wugurru, marri amburru-waṉbaaṉbina aladi-windiyung. Nguynju yadhu warra-mulung-arrgi-yung amburru-yambina aladi anubani-yung-jinyung aniijgubulu-yinyung wugurru. \p \v 3 Warraawurru-yung wurraawaḻii-yinyung warra-yiyina-yinyung, wugurru wurru-murruwanjii, marri amburraawaḻii nugurri-wuy, wirri-ngaynbandii yamba nugurri-nyinyung anu-ṉuga. Anu…bani-yunggaj, waarrarrini warruburru-yung-jinyung. Anaani ana-wubiba ngarranggu-magana, na-God warruburru-yung ambani-jadugang. Anaani ana-lhaawu, yijgubulu wugurru. \p \v 4 Nugurru numburraawanggina anaani. Anu…bani-yunggaj, mulung-arrgi-yung ana-angel wu-waṉbini aladi wugurru. Niga na-God, waari ani-waḻamin-dharrgandi wugurru anggu-warrgarrga-magaa anubanila-wala anaaladi-wala. Niga ni-lharrgang wugurru, ni-burriyn wugurru ama-gara-rruj waangamudangi-rruj, marri ni-radbini wugurru. Wurrugu marri, anubani ani-nguynju-nguynjijgang anubani ana-angel. \p \v 5 Nugurru numburraawanggina. Niga na-God niwu-jadugayn ana-lhal anubani-yunggaj, anubani-yung niga nima-lharrgang mana-ngugu ana-lhal-wuy marri warraarrawindi-wuy warraalaaladi warra-wurru-wurruj. Niga waari ambani-maṉmangi wugurru. Yagu nigaaj-bugij Noah, na-God nu-maṉmangi, nubagi-yung yamba wani-magaa ana-maaḻamburrg ana-lhaawu. Marri warra-7 warra-mulung-arrgi-yung warra-mijgalgur-yung nigawi-rruj, na-God wani-maṉmangi wugurru. \p \v 6 Marri nugurru numburraawanggina, warruburru-yung warra-wurru-wurruj wurru-burri-yinyung ana-wumurrng ana-Sodom marri ana-Gomorrah, anubani-yunggaj. Wugurru wurru-waṉbaaṉbini anaalaaladi, marri niga na-God niwu-jadugayn ana-wumurrng, niwu-nangaa, wugurru wu-ngarrgan-mayn. Wudanila-yung-galawaj, niga ngarrani-bajiyina ngagurru, warruburru-yung wurru-waṉbina-yinyung aniij-galaaladi, warruburru-yung ambani-burrang a-ngura-rruj, wugurraayunggaj. \p \v 7 Yagu nugurru numburraawanggina nigawi-nyinyung na-Lot, nubagi-yung na-maaḻamburrg-jung na-waḻyinyung. Niga na-God nu-maṉmangi na-Lot anubanila-wala ana-wumurrng. Niga na-Lot ni-wurrij-galadi-wiiyn-bindiyung, anubani-yung-jinyung aynba-gaynbaj-jinyung anaalaaladi, warruburru-yung warraalaaladi warra-wurru-wurruj wurru-waṉbini-yinyung wugurru. \v 8 Wiiya na-Lot ni-maaḻamburrg, yagu niga ni-burri warraalaaladi-rruj warra-wurru-wurruj ngarraaḻirr-lhangu. Niga ni-wurrij-galadi-wiiyn-bindiyung, yagu yamba anaarrawindi-lhangu anaaladi, niga niwu-nani-yinyung marri ni-wawanggini-yinyung. \p \v 9 Yigaj! Na-Buunggawa ni-wuguuguni wani-maṉmani warruburru wunu-warraarriwana-yinyung niga, anubanila-wala ana-wungarri-wala. Marri niga ni-wuguuguni wani-waṉagana warraaladi-yinyung, marri ambani-jadugang wugurru, anubani-yung ambani-nguynju-nguynjijgana-yinyung ngarraaḻirr. \p \v 10 Marri niga ambani-guldhang-bindiyung, warruburru-yung wurru-waṉbina-yinyung anaaladi-yinyung, wurru-ngaynbandii yamba anaarrawindi-lhangu wugurraajbaj, marri waari anubani-yung ambunu-yandhurrbang na-Buunggawa. \p Marri ngijang, warraawurru-yung wurraaladi-yamawana anaarrawindi ana-mamanunggu ana-angel, warruburru-yung yamba wurru-lhama-lhamina marri wurru-runggal-wina wugurraajbaj. \p \v 11 Yagu nugurru aadanu numburru-wijangayii, anubani-yung anaarrawindi ana-angel. Anubani-yung waṉagana wu-waḏa-waḏaḏ marri runggal lhuḏ wugurru. Yagu wugurru waari lhajbiyn anaaynbaj ana-angel, waari aladi-yamawang wugurru, raga-ragij na-Buunggawa-rruj. \p \v 12 Yagu warraawurru warraalaaladi wugurru wirriiladi-yamawana anaarrawindi-lhangu. Wiiya wurru-maḻaḻadi anubani-yung, yagu wirriiladi-yamawana-wugij. Marri wurru-waṉbina anubani-yung aynbaj, yagu waari amburru-wijangang. Warruburru nguynju yaga yii-jarrangu-yii marri a-bulugi-yii, wu-ngarra-jaarri yaga yigaj arrbidi yuuguni yaanuwuy. Marri warraawurru-yung amburru-jadugina, nguynju yaga wu-mun-bulal-wulal-yii wugurru. \v 13 Warraawurru-yung wurru-waṉbaaṉbini anaalaaladi, yagu niga na-God ambaniigagijgiyn wugurri-wuy. \p Ngaya ngana-magana nugurri-wuy. Warraawurru-yung wurraawaḻii-yinyung warra-yiyina-yinyung, wurru-waṉbaaṉbina-wugij anaalaaladi, wugurri-nyinyung-mirri ana-ngun.gu, marri wurru-waṉbina arrarra-waj. \p Nugurru-maynji aadanu nurru-nguyii aynjaabu, warruburru-yung warraalaaladi wurru-yaarri nugurri-wuy, anubani-wuy ana-marrya-wuy. Warruburru-yung wirriij-galadi-wana anubani-yung. Warruburru-yung wurru-rangarrina wugurraajbaj, marri wurru-yilg-baliyn marri wurru-wan-gaagidhina. \p \v 14 Warraawurru-yung warra-waḻya-waḻya wurru-ba-dhawiwijgina warraarra-nayii warra-maṉaṉung, nguynju yadhu amburraaynji-yarramang wugurru. Wurru-waṉbaaṉbina aladi, waari amburru-muḏaḏbang wugurru. Wugurraayung warra-maṉaṉung wurru-binyil-binyilg-mana, yagu warraawurru-yung warra-waḻya-waḻya warra-mangi, wurraaladi yamba. Marri wurru-murruwanjii wurraandha-wuguuguni wugurru. Na-God anaani ambani-jadugang wugurru. \p \v 15 Nugurru nurru-marrbuy, anubani-yunggaj, niga na-Balaam na-niwiyayung na-Beor-yinyung. Niga ni-waṉbini anaaladi, niga yamba niwu-ngaynbandangi-windiyung anu-ṉuga. Warraawurru-yung wurraawaḻii-yinyung wurru-waṉbina nguynju nigawi-yii. Nguynju yaga wirrimaarruna mana-mamanunggu-yinyung manaadi, marri wunu-garrindharrmani niga na-Balaam. \p \v 16 Yagu niga na-Balaam, nigawi-nyinyung ana-dunggi wu-yambini, nguynju warra-wurruj-jii wugurru. Ninggu-magaa na-Balaam, niga ni-wan-gaagidhu, yagu wugurru ninggu-lhambang niga. \p \v 17 Warraawurru-yung wurraawaḻii-yinyung wurru-yamana nguynju yaga a-ngajal-yii waar-ngarina, yagu a-wuuji-yii wu-lhaladina ana-wuwalulu wu-waṉina-maynji. Marri warruburru-yung wurru-yaarri wubani-wuy aa-ngududumaj-guy. Anubani-yung anaa-ngududumaj wugurraa yungguyung, marri amburru-burraa yadhu bagu. \p \v 18-19 Wugurru wurru-lhama-lhamina marri wurru-yambina runggal lhaawu. Wurru-yambina warruburru-wuy wurru-jambarrgina-wuy mal-dhamun.gurrg. Warraawurru-yung wurru-yarramana warra-mulung-arrgi-yung-gala warruburru-yung wurru-waṉbina-yinyung aladi. Yagu warruburru-yung wugurru wurraawaḻii-yinyung warra-lhalamayana wugurru, “Nugurru numburru-warrgarrga” wurru-yamana, “Wiiya, nugurru numburru-waṉbina anaarrawindi-lhangu numburru-ngaynbandii-yinyung,” wurru-yamana. Yagu wugurraayung wurraawaḻii-yinyung wurru-radbidhaa wugurru, anubani yamba anaaladi wu-buunggawa-mana wugurri-wuy. \p \v 20 Wugurru wurraawaḻii-yinyung, anubani-yunggaj wurru-burri wurru-warrgarrga anubani-yung-gala anaaladi ana-lhal-yinyung, wugurru yamba wurru-jambarrgini ngagurri-nyinyung na-Buunggawa marri ngarrani-wiri-gana-yinyung na-Jesus Christ. Yagu wugurru-maynji amburraagiyn anaaladi-wuy anaarrawindi-lhangu marri amburru-radbidhaa, warraawurru-yung amburraaladi-windiyung, waari-yinyung nguynju ana-raga-ragij-gaj wugurru. \p \v 21 Wugurru-magaa waari amburru-jambarrgini-magaa, dani-yung wiij-maṉdhiyn wugurru. Yagu warraawurru-yung wurru-jambarrgini, anubani ana-lhaawu ana-maaḻamburrg-jinyung. Wurrugu, warraawurru-yung wurru-wiḻibiḻingiyn anubanila-wala ana-guḏu-guḏu-yinyung ana-lhaawu, anubani-yung wurraawanggini-yinyung wugurru. \p \v 22 Anaani wiijamana, nguynju-waj anaani ana-lhaawu ana-wubiba-rruj wu-yamana, \it (Proverbs 26:11) “Nguynju yaga waa-ḻandhurrg wu-ngaynjina marri anubani-yung ana-warrgaḏ wirri-nguyii waagina wugurri-wuy.”\it* Marri “anubani-yung ana-bigi-bigi waagina marri wu-warrbina amaaḻnga-rruj.” Dani-yung nga, wu-yamana ana-wubiba, warruburru-yung wurraawaḻii-yinyung wurru-yamana wudani-yung-jii. \c 3 \s1 Na-Jesus aniigiyn niga. \p \v 1 Ngayawi-nyinyung guwaj-gaang, anaani wiij-bulawaa-wala waarrarrina ngaya nga-warrarrangi nugurri-wuy, anamba-maṉmani yadhu nugurru nugurri-nyinyung nurru-wijangayii-yinyung, numburru-dhi-maṉdhina nugurru aadanu. \p \v 2 Ngaya ngana-ngaynbandii nugurru nimbirri-yangayii anaani ana-lhaawu warra-maṉngulg-jinyung wunaa-ja-jambini-yinyung na-God anubani-yunggaj. Marri nimbirri-yangayii ana-lhaawu ngagurri-nyinyung-jinyung na-Buunggawa, nubagi ngarrani-wiri-gana-yinyung. Niga nani-magaa nurru anaani nurru-lhaawu-yarrijgina-yinyung anaani, marri nurru ngana-magaa nugurri-wuy. \p \v 3 Anaani ana-lhaawu wiij-ḏunggal, ngaya ngana-magana-yinyung. Anaani wu-dhaag-mana-rruj, na-Jesus aniigiyn lhaalhag niga. Warra-wurru-wurruj anaani amburru-ngarrmana nugurri-wuy, wugurru anaani amburru-burraa amburru-waṉbina aladi-yinyung, anaarrawindi-lhangu wugurru wurraarra-ngaynbandii-yinyung wugurru. \v 4 Warraawurru-yung anaani amburru-yambina, “Na-Jesus ngarrani-lhalamayaa aniigiyn. Ajiga niga? Ngagurri-nyinyung warra-mijgalgur wurru-ngawiiyn, yagu anaarrawindi-lhangu wu-warra-ngu-burraa-wugij, wu-yamana nguynju anu…bani-yunggaj-jii, na-God niwu-majgaa-wala wugurru.” Dani-yung amburru-yambina. \p \v 5 Yagu wugurru wirriigaminij-gaandirrii, anubani-yung-gaj niga na-God ni-yambini ana-lhaawu, marri wu-maṉdhini anaarrwar marri ana-lhal, wu-maṉdhini anaa-gugu-wala marri mana-lhagayag, marri anaa-gugu-mirri. \p \v 6 Marri nguynju-waj, mana-ngugu ma-waṉiyn marri jadugayn ana-lhal. \p \v 7 Marri nguynju-waj, anaani ana-lhaawu na-God-jinyung wu-yamana, anaani anaarrwar marri ana-lhal anggu-warra-ngu-burraa-wugij, yingga niga na-God ambani-nguynju-nguynjijgana warra-wurru-wurruj. Marri aḏaba warraarrawindi-lhangu waari-yinyung na-God-jinyung, wugurru amburru-jadugiiyn, marri anaarrawindi-lhangu anggu-warra-ngu-jadugina ngura-mirri wugurru. \p \v 8 Yagu guwaj-gaang, warraaynbaj-maynji ambu-yamana na-Jesus waari niigi, nugurru numburru-marrbuy anaani. Ngagurri-nyinyung-jinyung na-Buunggawa, ngiiynjaabugij ngarraaḻirr ngi-nguynju 1000 manaarmag-jii, marri 1000 manaarmag wu-nguynju ngiiynjaabugij ngarraaḻirr-yii wugurru. \p \v 9 Nugurru yuga nurru-marrbuy? Wiiya warra-mulung-arrgi-yung wurraan-jamana, yingga na-Buunggawa ni-wurrugurrij ni-waṉbina-yinyung anubani-yung niga ngarrani-lhalamayaa-yinyung ngagurru. Yagu niga waari ani-wurrugurrij-magaa. Niga ni-lhambaamburrg, niga waari wani-ngaynbandi warraaynbaj wu-jadugi, yagu niga wani-ngaynbandii warraarrawindi warra-wurru-wurruj ambirriij-garruyn aniij-galaaladi-wala wugurru. \p \v 10 Yagu ngana-magana nugurri-wuy. Ngubindi na-Buunggawa aniigiyn, yagu ngurru-maḻaḻadi lhal-ngargu aniigiyn, anaani wu-nguynju, ngurru-maḻaḻadi lhal-ngargu warrubawi-yung wurraamaamajaa-yinyung ambu-waṉiyn ngagurri-wuy a-wumurrng. Marri ana-wumala anaani anggu-jadugiiyn, runggal-mirri ana-yang wugurru. Marri anaarrawindi-lhangu wugurru anaani anggu-nagina a-ngura-rruj. Marri ana-lhal marri anaarrawindi-lhangu anaani anggaaṉibiyn wugurru. \p \v 11 Wudani-yung-gala nga, yangi numburru-waṉbina aadanu? Nugurru numburru-burraa numburru-maṉngulg marri numbunu-warraarriwana na-God. \v 12 Nguynju-waj nugurru numburraambu-narrina marri numbunaa-garranggana angi-waṉiyn-jinyung ngarraaḻirr na-God-jinyung. Ngarrubagi-rruj ngarraaḻirr ana-wumala anaani anggu-nagina ngura-mirri marri anaarrawindi-lhangu wugurru anaani anggu-bujbujgaynjang anggu-murrmbulang wugurru. \p \v 13 Yagu na-God ngarrani-lhalamayaa ngagurru, marri ngagurru ngirri-rangarrii anu-gadhuwa ana-wumala marri ana-lhal, anaani-rruj ngagurru ngaambu-burraa maaḻamburrg-galawaj. Ngagurru ngurru-wurrij-dhaḻagina wugurru. \p \v 14 Gurru-waj, nugurru nuunu-rangarrii-waj, numburru-waṉbina angaḏajung, nguynju nugurru yagi yungguyung nirri-waṉagi anaaynbaj anaaladi. Marri nugurru numburru-lhamaamura na-God-guy. \p \v 15 Numburru-marrbuy nugurru, ngagurri-nyinyung na-Buunggawa ni-lhambaamburrg, marri ngarrani-rangarrii ngagurru. Wudani-yung-gala nga, ngurru-wiri ngagurru. Anaani wiijamana, ngagurri-nyinyung naa-murruyung na-Paul nani-magaa nugurru. Anaani ngagurru nguunaa-gurrij-ngu-burraa niga, marri niga ni-yina-mamaaḻang, na-God yamba nu-yayn nigawi-wuy. \v 16 Niga ni-warrarrangi anaani ana-lhaawu, anaani wu-nguynju anaani anaarrawindi ana-wubiba ni-warrarrangi-yinyung niga. \p Yagu arrgi-yung na-Paul-yinyung ana-lhaawu wu-miḏaamimi ana-wubiba-rruj, marri mulung-arrgi-yung wurru-maḻaḻadi-yinyung marri waari-yinyung amburru-jambarrgiyn-jinyung, wugurru wirriij-jurrurrugana aladi-waj, anaani ana-lhaawu na-Paul-inyung. Wugurru nguynju-waj wirriij-jurrurrugana aladi-waj, anaarrawindi-lhangu ana-wubiba na-God-jinyung, yagu wurru-jadugaynjini wugurraajbaj. \p \v 17 Gurru-waj, nugurru nurru-marrbuy anaani. Marri nugurru numburru-dhi-maṉdhina, yagi narra-yandhurrbi warruburru warraalaaladi-yinyung warra-wurru-wurruj. Yagi nurraawanggi aladi lhaawu wugurri-nyinyung. Nugurru numburru-jambarrgina-wugij, numburraandha-wuguuguni, yagi nurru-yarrami nugurru. \p \v 18 Yagu nugurru nurru-marrbuy na-Buunggawa na-Jesus Christ, nubagi ngarrani-wiri-gana-yinyung, niga ngarrani-walgaṉmana ngagurru. Nugurru numburru-marrbuy-wugij, ngubindi-windiyung, niga ni-runggal. \p Ngagurru anaani ngaanu-warraarriwana niga, anaani ana-yimbaj marri anggu-wuguuguni-yinyung. Yijgubulu. \mte1 Wiiya.