\id REV stc-67REV-Nat.sfm, Revelation, Natqgu (Santa Cruz) STC, Daniel Boerger, 11/07/2007 
\ide UTF-8
\h Nzaelwapxngr 
\toc3 Nzaelwapxngr 
\toc1 Nzaelwapx-krbz Jiszs Mz Jon Da Kcng Tqyc-kapq-pnzng 
\toc2 Nzaelwapxngr 
\mt1 Nzaelwapx-krbz Jiszs Mz Jon Da Kcng Tqyc-kapq-pnzng  
\imt1 Natq Ngr Nzaplxtqngr Mz Nzaelwapx-krbz Jiszs Mz Jon Da Kcng Tqyc-kapq-pnzng  
\ip Mc ‘Natq Ngr Nzaplxtqngr Mz Nrpakxmrlz Kx Yr Jon.’ Yrle buk lc mz mzlir yiz 90—97 AD mz nibr Nrpakxmrlz. Aposol Jon yrbzle letz lc mz dzbe lrmakxtr kcng rlimz mz provins kc Esia, tzmnclzbzng mz nzaclve-krde, murde pibz Jiszs bade mz nzobq-rmwiblengr. Suti drtwrde nzapqtr-krbzle nabz leplz mz nztu-amqngi-krdr mz mzli r nzakxpungr. Murde nzxplrkr Gct myaszpxle nzxplrkr Setzn, x sa na-aovxio-atwrnr-ngrde Setzn badr enqmi r Gct amrlx, mzli kc nakrlz-zpwx-ngrbzle mzli kc tqyrlq Gct.  
\ip Mz nzobq-rmwible-krde lcng, Jiszs aelwapx-ngrbzle mz Jon kzdung da kx naprtzng, mz nzycmne-ebzpxngr kxkqlu. Kxnzrlxngiting drtwrdr tresz'tiu mz drtwr ngr kzdung da mz buk lc, murde rblx nzrkrlzngr. A' kzdung da nzopx-angidrng. Mz nzmu-krde lcde, kzdung mzli yokaetipxkr drtwr ngrdr, x kzdung mzli trtingr. Dckrlzdeng 17-18, nzycmnetr-ngrdr gzpman kxdrka'ngr kc navzm na-aclvele nrlc atwrnrngr. Gzpman lc apule srlx, murde batrpzle mz leplz nzrlasz-krdr Gct x nzvz-nqblq-krdr nqmq krde kxtrka. X nzyrlq drtqde “Bxbilon” nqmq krde lc tqtrka. Murde mzli kc bqnc, lr Bxbilon nzaovxiolr lr Jiu x nzbatrpzlr badr nzngini-krdr kxnzawz-nrbalqng. X nzbatr-kzpzlr nzangio-krdr gct ngrdrng, da kc tqwai nzmc-krgule mz Buk sc Daniel. A' mz buk lc, Bxbilon drtwr ngrde gzpman ngr Rom mz mzli nyz Jon. X drtwr ngrde kz kx gzpman kx na-apule Rom sa navzm. X mz gzpman lc, Enqmi Kxetu ngr Kraes sa na-aclve-atwrnr-ngrde nrlc. Nzrpi-ngrbz “Mrlx Kc Tqdrka'ngr Kc Kai.”  
\ip Jon yr-kzle kzdung nabz kx nzngr-ngrdr Heven. Nabz lcng amrlx nangr-ngrgu mz #123 mz Buk Ngr Nzangiongr.  
\iot Jiszs Kxnzmcpx Myapxbz Mz Buk Lc  
\io1 Aelwapx-ngrde zluli rde. \ior [dckrlzde 1]\ior*  
\io1 Aclvele dzbe lrmakxtr nedeng mz nrlc. \ior [2—3]\ior*  
\io1 Nide Nei Sip kc tznibq x lu-mop, x nzangio kxnzrlxngiting amrlx. \ior [4—5]\ior*  
\io1 Nzayrplapxngr amrlx mz yiz kcng rlimz tzrpibz Mzli r Nzkxpungr Kxtrka-zlwz. \ior [6—19]\ior*  
\io1 Jiszs yzlu-mou-ngrmle mz Jerusalem kxmrna, murde na-aclvele nrlc mz nzngini-krde King r king amrlx. \ior [19—22]\ior*  
\c 1  
\p
\v 1 Ninge Jon, kxnzawz ne Jiszs. Krlcng da kx naprtilzng kx aelwa-ngrm Jiszs bange. Rlr-ngrbz Gct mz Jiszs da lcng tqycpe pipz nzprtz-krmlr, mz nzvz-nqblq-krde me pnz drtwrde, murde na-aelwa-ngrbzle mz kxnzawz nedeng. X Jiszs atwzlr-ngrmle dq enjrl nede bange, murde nayokaetipxmle bange drtwr ngr da lcdeng.  
\v 2 Mz nzmu-krde lcde, sc tqyropex da amrlx kcng tqmcxng x tqxlrxng. Krlcng natq Gct x nrpa angidr ngr Jiszs Kxnzmcpx.  
\v 3 Namrlzbz mz doa kx rlwxpxle natq lcng tqyrox mz buk lc. X namrlz-kzpz mz leplz kcng tzxlrlr x tzyrlq-angidrlr natq lcng. Murde sa nakrlz-angidrlr da lcng amrlx mzli kc tqycpe pipz nzprtz-krmlr.   
\s1 Jon Ryrbz Mz Dzbe Lrmakxtr Mz Taon Rlimz Mz Esia Provins  
\p
\v 4-5 Ninge Jon, ryrbo bamu nimu dzbe lrmakxtr kcng mz taon rlimz mz Esia Provins.  
\p Krka'-ngrne kx zmrlzkxmyalz x nzmnc-zpwxngr na-avzom Gct, Mqngrkxtr x Jiszs Kxnzmcpx bamu. Gct kc tqmnc mzli ka, x tqmnc zvz, x sa navzm. X Mqngrkxtr kc tqmnc mz tron kc tqwxbungr Gct x nzwz-krdeng kcng rlimz. X Jiszs Kxnzmcpx kc tqrpipx angidr natq Gct, x doa kx nzatulz-kaip mz nzbzngr, a' trpengr nzbz-krde. X nide kc tqaclvele king amrlx mz nrlc tulvzo. \x + \xo 1:4-5 \xt Sam 89:27; Nzyrplapxngr 14:5, 25; Jeremaea 42:5; Rom 8:29; 1 Korint 15:20-22; Filipae 2:9-11; Kolosia 1:18; Hibru 12:23; Nzaelwapxngr 17:14; 19:16\x*  
\p Jiszs Kxnzmcpx lc mrlzti-zvzle nigu, x aopxpebzle drtqgu mz zmatq ngr alwx rgung mz nzbzo-krmle mz kros.  
\v 6 X ata-lxblrtrle nigu mz dzbede kc esz', murde nawztrpzku mz Gct Trtede, kc tqngi King rgu, mz nzngini-krgu pris nedeng. Takitrde nzglqlz-zvzngr nide mz nzetukr zmatq ngrde, kc tqvzpe tqvzpe. Eu, angida. \x + \xo 1:6 \xt Nzrlaszngr 19:6; Asaea 61:6; 1 Pita 2:5, 9; Rom 12:1; Hibru 13:15\x*   
\p
\v 7 Jiszs sa navzom natuom mz dcbz. X sa namc leplz amrlx ngr nrlc tulvzo, nidr badr leplz kcng tzrbatrpzng nzrluplxtingr nrkrdrtq Jiszs mzli kc. X leplz amrlx mz nrlc sa namwxlrng x nayrni-zlwzng. Me tutr-ngrde lape! Eu, angida. \x + \xo 1:7 \xt Daniel 7:13; Sekaraea 12:10-11; Matiu 24:30; Jon 19:37; 1 Tesalonika 4:17\x*   
\p
\v 8 Rpi Yawe kx, “Ninge Gct kc tqrninr, kc tqmnc mzli ka, x tqmnc zvz, x sa navzm. Ninge nou da amrlx x kx ayrkrpx da amrlx.” \x + \xo 1:8 \xt Nzrlaszngr 3:14; Asaea 44:6; 48:12; Nzaelwapxngr 1:8, 17; 2:8; 21:6; 22:13\x*   
\s1 Jiszs Kxnzmcpx Opx Mz Mz Jon Apule Mrlx Leplz  
\p
\v 9 Ninge Jon, x prtrku mz dzbede kc esz' mz nztu-amqngi-krgu kxmule-esz' nzaetqbz drtqgu murde mnclzbzku mz Jiszs mz nzngini-krde King rgu. Nzadwatrlr ninge presin mz trmctu Patmos, murde yapwxtipx-zvzx natq Gct x Nrpa ngr Jiszs.  
\v 10 Mz kzdq Sade mrlc, zmatq ngr Mqngrkxtr prsrle ninge, x obq-rmwiblex. Mzli lcdepwz xlrkixle mz nibrnge kzdq natq Kraes kxetu apule nzyrnikr trpu.  
\v 11 Rpile kx, “Yro mz buk da amrlx mcqng, x atwzlr-ngrbz buk lcde mz Esia Provins mz dzbe lrmakxtr mz taon rlimz seleng: Efiszs, Simrnz, Prgamzm, Taeatira, Sadis, Filadelfia x Laodisea.”   
\p
\v 12 Kx lxlvrkimc kc mq mz nzmc-krnge kc tqycmnem bange, mcx da rlimz kx ngi gol kxwxbuo-ngrm lam. \x + \xo 1:12 \xt Sekaraea 4:2-6\x*  
\v 13 X mz mzlirdr, kzdq ncblo, kx apule Mrlx Leplz, kq nzkq kxboi, x lunyao-ngrde kc da kx apule gol. \x + \xo 1:13 \xt Daniel 7:13; 10:5\x* \fig Mcx da rlimz kx ngi gol kxnzwxbuo-ngrm lam.|alt="138 lampstand" src="138-BK00154b.tif" size="COL" loc="REV 1:12" copy="Horace Knowles revised by Louise Bass" ref="1:12" \fig*  
\v 14 Nqngi narde prkitxpx apule nqbya ngr nrc. X mzte nzapulr nalzpq nyr. \x + \xo 1:14 \xt Daniel 7:9\x*  
\v 15 X nanycde kz nzapulr nzpnaprkr bras kc tzayrleni mz nyr x sc tzalqtipe. X nzokr natqde apule nzyrpukr nrc. \x + \xo 1:15 \xt Esikel 1:7, 24; 43:2; Daniel 10:6\x*  
\v 16 X malele mz mqde kxrtc vri rlimz, x lvcpxm mz naode kc toki r vea kxmalc nrlarde rlilr, x nzyzlrkr rtrlrmzte apule nzlulikr nepi mzli kc bea. \x + \xo 1:16 \xt Asaea 11:4; 49:2; 60:1; Daniel 10:6; Malakai 4:2; Matiu 13:43; 17:2; Efiszs 6:17; Hibru 4:12\x*   
\p
\v 17 Kx mcx kc nide, rtco-lzbq-ngrbo mz nanycde apux ncblo kx bz, mz nzangio-krnge nide. A' mqde kxrtc bxtrple ninge x rpimle bange kx, “Bzkq mwxlrq. Ninge kx rtwayz x ninge kx rmnr-ngrbz. \x + \xo 1:17 \xt Asaea 44:6; 48:12; Nzrlaszngr 33:20; Asaea 6:5; Esikel 1:28; 3:23; 43:3; 44:4; Daniel 8:17-18; 10:7-10; Matiu 17:7; Aposol 9:3-4; Nzaelwapxngr 1:8; 2:8; 21:6; 22:13\x*  
\v 18 Ninge nou nzlungr. Bzx mzli kc ena, a' nzlupe-mou-krmc lc mzli ka tqvzpe tqvzpe. Lolvzx zmatq ngr nzrlvxngr x nzrbqtrngr naonrx ngr mrnyz mqngr leplz kxnzbzpeng. \x + \xo 1:18 \xt Matiu 16:16; Jon 1:1-3; 6:57; 14:6; Hibru 2:14; 3:12; 9:14; 10:31; 12:22\x*  
\v 19 Yro da kcng tqmcqng, tqprtilzng mzli ka, x da kcng naprtilzng mz nibrde.  
\v 20 Drtwr ngr vri lcng rlimz tqmalex mz mqnge kxrtc x da rlimz kx ngi gol kxwxbuo-ngrm lam nidr sele. Vri kcng rlimz drtwr ngrdr kxnzaclvelr dzbe lrmakxtr mz taon kcng rlimz, x da rlimz kx ngi gol kxwxbuo-ngrm lam, drtwr ngrdr dzbe lrmakxtr mz taon lcng rlimz.”   
\c 2  
\s1 Letz Nangi Sc Dzbe Lrmakxtr Kc Efiszs  
\p
\v 1 Jiszs sc tqycmnem bange, mz nzngini-krde ncblo kc tqapule Mrlx Leplz. Rpi-mople kx nayrbz dq natq mz kxaclvele dzbe lrmakxtr kc mz taon kxetu Efiszs. Rpibzle kx, \fig Dzbe lrmakxtr kcng rlimz tzmncng Esia.|alt="139 map of 7 churches" src="139-map.pdf" size="COL" loc="REV 2:1" copy="SIL" ref="Nzaelwapxngr 2:1" \fig*  
\pmo “Krlcng natqnge, ninge kc tqrmale vri kcng rlimz mz mqnge kxrtc x ninge kc tqayox mz mzlir da rlimz kx ngi gol kxwxbuo-ngrm lam.   
\pm
\v 2 Krlzpex nqmq krmu, nimu lr Efiszs. Wz-katoamu x tu-amqngi-zvzamu mz nzvz-nqblq-krmamu ninge. Krlz-kzx kx pxtxpx-ngrnamu leplz kcng nqmq krdr tqtrka. X obqplxtrpeamu ncblo kcng tzrpilr nidr kxnzakrlzng ne Kraes, a' trtingr. X rmctitrpzmu kx nzpokiang, x nqmq krdr rngidrlvz-ngrbzmu mz leplz kx bzkq nzvz-nqblqlr.  
\v 3 Krlzx nztu-amqngi-zvz-krmu mz nrlarde nyznge. X kxmule-esz' nzatrkatilr nimu, a' nzrlxngiti-krmu trbaou mz nzvz-nqblq-krmu ninge.  
\v 4-6 Eu, x mrlz kz nzpxtxpx-krmu nqmq kr leplz kcng tzvz-nqblqlr nzalvztrkr Nikolas, da kc tqwai-kzx mz nzpxtxpx-krngele.  
\pm “A' da kx trmrlztr-ngrpwzu drtwrnge bamu nide sele. Trmrlzti-lzbqpewamuu da kc tqwaisr-lzbq-ngrnamu mzli kc tqlxngiti-ate-ngrnamu ninge. Nadcpx zvz mz drtwrmu mrkc tqesakingr nzvz-rbr-krmu. Drtwrmu nayzlum mz alwx ngrmung, x nqmq krmu na-apule mzli kc tqlxngiti-ate-ngrnamu ninge. Nzmu drtwrmu kx tryzlupleu, ninge la navzmc bamu x nakatxx dzbe lrmakxtr nyzmu mz nzmnc-krmamu bange, mz nzkatx-krnge da kx wxbuo-ngrm lam kc tqngi gol mrkc tqtulz-ngrmle mz mzlirmu. Murde trvz-nqblq-angidrpewamuu ninge. \x + \xo 2:4-6 \xt Matiu 24:12\x*   
\pm
\v 7 “Abzamu nzyrlq-angidr-krmu natq lcng tqpibz Mqngrkxtr mz dzbe lrmakxtr lcng. Murde mrlx kx aovxiole mz nzvec-krdr badr zmatqng kxtrka, sa narlr-ngrbo bade nzngq-krde Nranc ngr Nzlungr Kxmrna kc tqtu Me Mncngr Gct.” \x + \xo 2:7 \xt Nou 2:9; Nzaelwapxngr 22:2\x*  
\pmc Delape. Ninge \sig Jiszs. \sig*   
\s1 Letz Nangi Sc Dzbe Lrmakxtr Kc Simrnz  
\p
\v 8 X Jiszs nzngini-krde ncblo kc tqapule Mrlx Leplz, rpi-mople bange kx nayr-kzpo dq natq mz kxaclvele dzbe lrmakxtr kc mz taon Simrnz. Rpibzle kx,  
\pmo “Krlcng natqnge, ninge kxrtwayz x kxrmnr-ngrbz, ninge kc tqbz mzli kc ena, a' mzli ka lupe-mopwc'. \x + \xo 2:8 \xt Asaea 44:6; 48:12; Nzaelwapxngr 1:8, 17; 21:6\x*   
\pm
\v 9 Krlzpex nzetqkr drtqmu, nimu lr Simrnz. X kxmule-esz' tr-rngiscmuu trau, a' mz nrlarde nyz Gct nginimu kz bcnyr angidr mz nzrlxngiti-krmu. Krlzpe-kzx nzrpikitikr leplz kcng tztulrtr-lzbq-ngrdr nzngini-krdr lr Jiu. A' trnzngini-angidru leplz kcng tqmcpxng Gct, murde nidr dzbede kc tzangiolr Setzn. \x + \xo 2:9 \xt Jon 8:44-47; Rom 2:28-29; Filipae 3:3\x*  
\v 10 Bzkq mwxlramu mz da trka naprtilzbzng bamu. Kzdq la mzli, enqmi rmung sa nalolvzlr nimu x na-adwatrlr nimu mz presin mz nzabzpxngr nzrlxngiti-krmu, murde nzvz-nqblqlr drtwr Setzn. X naetqti drtqmu zbq nzpnu naesz'. A' abrtrpa'mu drtwrmu bange, kxmule-esz' nznibqlr nimu. Murde mz nibrde, sa nakabo bamu nzlungr kxmrna, nangi da kxmrlz kx vzpxm mz nzrlxngiti-krmu.   
\pm
\v 11 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng. Murde krkcng tzaovxiong mz nzvec-krdr badr zmatqng kxtrka, trnabzpeung mz nzbzngr kxrmnr-ngrm mzli kc Gct na-ayrplapx-ngrde lr nrlc kcng tzvz-rbrng.” \x + \xo 2:11 \xt Nzaelwapxngr 20:14; 21:8\x*  
\pmc Delape. Ninge \sig Jiszs. \sig*   
\s1 Letz Nangi Sc Dzbe Lrmakxtr Kc Prgamzm  
\p
\v 12 X Jiszs nzngini-krde ncblo kc tqapule Mrlx Leplz rpi-mople bange kx nayr-kzpo dq natq mz kxaclvele dzbe lrmakxtr kc mz taon Prgamzm. Rpibzle kx,  
\pmo “Krlcng natqnge, ninge kc tqrngisc toki r vea kxmalc nrlarde rlilr.   
\pm
\v 13 Krlzx mrla tqmnc-ngrnamu mrkc tqaclve Setzn. A' nimu lr Prgamzm vz-nqblq-angidramu ninge, x abrtr-angidrmamu drtwrmu bange. Trmwxlrwamuu nzpipx-krmu nzabrtr-krmamu drtwrmu bange, kxmule-esz' Antipas nznibq mz taon nyzmu kc tqaclve Setzn. Antipas lc aelwa-ngrbzle vz-nqblqle ninge mz nzycmne-krde x nzale-krde da.   
\pm
\v 14 “A' da kxpipz kx trmrlztr-ngrpwzu drtwrnge bamu nidr seleng. Kzdung nimu sc tzvz-nqblqlr nzalvztrkr Profet Balam. Mzli kc bqnc alvztrle King Balak kc Moab nzesabrti-krde lr Israel murde nataong mz alwx. X pibzle badr nzmu-krdr dakxnzng kx ngi blz nzkabz mz mqngr drka' kxnzlz, x aprtrle nidr mz nzrmwimingr doa kx trngiu krnalzdr. X mzli ka kzdung nimu nzvz-nqblqlr nqmq krde. \x + \xo 2:14 \xt Nzkqlu-krdr 22:5, 7; 25:1-3; 31:16; Lou Kcpwz 23:4\x*  
\v 15 X kzdung nimu sc tzvz-nqblq-kzlr nzalvztrngr kxtrka sc dzbede ne Nikolas.  
\v 16 Tekqtramu nqmq krmu lcng tqtrka! Nzmu kx trtekqtrwamuu nqmq lcng, sa napwrkilvc-ngrnamu ninge mz nzota-krgr badr leplz lcng, mz toki r vea kc tqmalc nrlarde rlilr tqlvcpxm mz naonge.  
\v 17 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng. Murde mrlx kx aovxio mz nzvec-krdr badr zmatqng kxtrka, sa nakabo bade dakxnzng nange kxmrna kc tzrpibz ‘mana kc tqyc-kapq.’ X mz nzabrtzlvz-krnge nide sa naka-kzpo bade rplz kxprki kx yctrngr drtqde kxmrna. X drtq kxmrna lc, trgalr kxrkrlz, a' krlz txpwz ncblo kc tqrngisc rplz lcde.” \x + \xo 2:17 \xt Asaea 62:2; 65:15; Jon 6:48-50\x*  
\pmc Delape. Ninge \sig Jiszs. \sig*   
\s1 Letz Nangi Sc Dzbe Lrmakxtr Kc Taeatira  
\p
\v 18 X Jiszs nzngini-krde ncblo kc tqapule Mrlx Leplz rpi-mople kx nayr-kzpo dq natq mz kxaclvele dzbe lrmakxtr kc mz taon Taeatira. Rpibzle kx,  
\pmo “Krlcng natqnge, ninge Mrlx Gct kc mzke' tqapule nalzpq nyr, x nanyonge apule bras kc tzalqtipe.   
\pm
\v 19 Krlzpex nqmq krmu, nimu lr Taeatira kx lxngiti-txpwzmu ninge. Murde sc tqvz zvz nzmrlzti-lzbq-krmu x nzokatr-etr-krmu. X krlz-kzx kx kxmule-esz' nzaetqbz drtqmu, a' tu-amqngi-lxblr-zvzamu. X aleamu da kx myaszpxpele mzli kc tqlxngiti-ate-ngrnamu ninge.  
\v 20 “A' da esz' kx trmrlztr-ngrpwzu drtwrnge bamu. Murde rlr-ngrbzmu mz olvz kc tqapule Jesebel kc bqnc, nzmncbe-krbzle bamu mz nzapokiati-krde nimu kx nide profet ne Gct. Leplz nzkqlupeng kx ycpxpe nzalvztr-krde mz nzrpi-krbzle badr nzrmwimi-abeane-krdr doa kx trngiu krnalzdr x nzmu-krdr dakxnzng kx ngi blz nzkabz mz mqngr drka' kxnzlz. \x + \xo 2:20 \xt 1 King 16:31; 21:25-26; 2 King 9:22, 30\x*  
\v 21 Kapebo mz olvz lc mzli r nztekqtr-krde nqmq ngr drtwrde, a' pxtxpx-ngrde x sc tqvz zvz nzrmwimi-abeane-krde doa kx trngiu krnalzde.  
\v 22 Mz da lcng tqtrka, sa na-amnc-zvzbo nide mz nelvq mz zyagox kxtrka, nidr badr krkcng tzprtrpeng mz alwx ngrde, nzmu kx trnztekqtrlru nqmq nr drtwrdr.  
\v 23 X sa namilxtxobo doa kcng tzvz-nqblq-zvzlr nide. Murde kxnzrlxngiting mz taon amrlx nakrlzlr kx \qt obqplxtix nabz leplz x nzvzkr nardr.\qt* X sa na-ayzlu-ngrbo bamu mz nzvz-nqblq-krde da kx aleamu. \x + \xo 2:23 \xt Job 34:33; Sam 7:9-10; 26:2; 62:12; 139:1; Nzyrplapxngr 24:12; Asaea 40:10; 59:18; 62:11; Jeremaea 17:10; Matiu 16:27; 25:31-46; Rom 2:6; 2 Korint 5:10; Galesia 6:7-8; 2 Timoti 4:14; Nzaelwapxngr 2:23; 20:13\x*   
\pm
\v 24-25 “A' kzdu nimu lr Taeatira trnzvz-nqblqlru nzalvztrkr Jesebel lc. X trprtrpwzmuu mz da kc tzrpibz ‘da kx yc-kapq sc Setzn.’ X napibo bamu kx trtxpnzngr natq mou kx nayrlqamu, a' lolvz-amqngiamu nzlxngiti-krmu ninge, da kc tqwai nzlolvz-zvz-krmule, navz navz mzli kx nayzlu-ngrmc.  
\v 26-27 Murde zmatq kcpwz tqkam Trtenge bange, sa nakabo mz mrlx kx aovxiole mz nzvec-krdr badr zmatqng kxtrka, x nzyrlq-angidr-krde natqnge navz navz nakrlzbzle nzyrkrpxkr nrlc. \qt X sa nakabo bade zmatq ngr nzaclvengr neidu amrlx mz nrlc tulvzo. Sa na-aovxiole mrnyzdr mz nzxplr-krde, kc na-apule bz kc tqrniglc botol.\qt* \x + \xo 2:26-27 \xt Sam 2:8-9; Asaea 30:14; Jeremaea 19:11; Nzaelwapxngr 12:5; 19:15\x*  
\v 28 X mz nzaelwapxngr nzaovxio-krde, sa naka-kzpo bade paglxnrlc, kc tqngi rkx ngr zbq kxmrna nyz Gct. \x + \xo 2:28 \xt Luk 1:78; 2 Pita 1:19; 1 Jon 3:2; Nzaelwapxngr 22:16\x*   
\pm
\v 29 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng.”  
\pmc Delape. Ninge \sig Jiszs. \sig*   
\c 3  
\s1 Letz Nangi Sc Dzbe Lrmakxtr Kc Sadis  
\p
\v 1-2 X Jiszs nzngini-krde ncblo kc tqapule Mrlx Leplz rpi-mople bange kx nayr-kzpo dq natq mz kxaclvele dzbe lrmakxtr kc mz taon Sadis. Rpibzle kx,  
\pmo “Krlcng natqnge, ninge kc tqrngine Mqngr ne Gct kc nzwz-krdeng rlimz x rngine kz vri kcng rlimz.  
\pm Krlzpex nqmq krmu, nimu lr Sadis kx trtakitrkaple mz nzobqkr Gct rnge. Nzrpilr kx lubeamu, a' trtingr, murde bz-angidrpeamu. Dwalzmamu! Axplrtiamu nzlu-mqglq-krmu, murde ycpe pipz nzyrkrtxpx-krbzle. \x + \xo 3:1-2 \xt Nzaelwapxngr 1:4-5, 16\x*  
\v 3 Mzpu naobqpx zvz x natekqtramu nqmq ngr drtwrmu. Murde ma tqprkilvc-ngrnamu ninge nzapu-krnge ncblo kxpnada. Trnakrlzwamuu mzli kc navz-ngrmc. Bzkq mrbrtr mz drtwrmu da kcng tqmrlz tzpibz bamu x tqxlramu. X yrlq-angidramu natq lcng. \x + \xo 3:3 \xt Matiu 24:42-44; Mak 13:33-37; Luk 12:39-40; 1 Tesalonika 5:2-4; 2 Pita 3:10; Nzaelwapxngr 16:15\x*   
\pm
\v 4 “A' nimu kxpipz mrkc Sadis kx lrpz scdr trblqkiu, sa nakqamu lrpz kxprki mzli kc navz-lxblr-ngrgu murde takitrde nimu.   
\pm
\v 5 “Mrlx kx aovxiole nzvec-krdr badr zmatqng kxtrka, sa nakq lrpz kxprki na-apule lr Sadis lcdeng, x trnakapxpwc'u drtqde mz Buk ngr Nzlungr. A' napipxbo mz Trtenge x enjrl nedeng kx ni-angidrde doa nenge. \x + \xo 3:5 \xt Nzrlaszngr 32:32-33; Sam 69:28; Matiu 10:32; Luk 12:8; Nzaelwapxngr 20:12\x*   
\pm
\v 6 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng.”  
\pmc Delape. Ninge \sig Jiszs. \sig*   
\s1 Letz Nangi Sc Dzbe Lrmakxtr Kc Filadelfia  
\p
\v 7 X ncblo kc tqapule Mrlx Leplz rpi-mople bange kx nayr-kzpo dq natq mz kxaclvele dzbe lrmakxtr kc mz taon Filadelfia. Rpibzle kx,  
\pmo “Krlcng natqnge, ninge kc tqtr-esz'ngr x tqngi da angidr. Lolvzx ki sc King Devet, kc drtwr ngrde kx rngiscnge zmatq ngr nzrlvxngr naonrx kx trpnzngr kx rkrlz nzrbqngr, x zmatq ngr nzrbqngr naonrx kx trpnzngr kx rkrlz nzrlvxngr. \x + \xo 3:7 \xt Job 12:14; Asaea 22:22; 40:25; Habakuk 3:3; Mak 1:24; Jon 6:69\x*   
\pm
\v 8 Krlzpex nqmq krmu, nimu lr Filadelfia. Kxmule-esz' trnipwamuu kxnzetung, a' yrlq-angidramu natqnge x trtxpnzngr nzrpi-krmu kx trkrlzwamuu ninge. Delc, naonrx se tqlvxpxbo bamu, naonrx kx trpnzngr kx rkrlz nzrbqtrngr.  
\v 9 “Lalztqmamu bange. Dzbe leplz kcng tzangiolr Setzn tzrpilr nidr lr Jiu, a' nzpokia-ngrdr. Sa navzmimc nidr mz nzavzo-lzbq-krbzlr bamu, murde nakrlzlr kx mrlzti-zlwzx nimu. \x + \xo 3:9 \xt Asaea 45:14; 60:14\x*  
\v 10 X sa na-arlapxbo nimu mz da kcng tqtrka naprtzbz mz leplz amrlx mz nrlc mz nzayrplapxngr nidr, murde mz nzyrlq-angidr-krmu natqnge, tu-amqngi-zvzamu kxmule-esz' nzaetqbz drtqmu. \x + \xo 3:10 \xt Matiu 10:22; 24:13; Mak 13:13; Rom 2:7; 1 Timoti 4:16; 2 Timoti 2:10-12; Hibru 10:36; Jemes 1:12\x*  
\v 11 Mzli trnzboi-krdeu x sa nayzlupe-mopwc'. \x + \xo 3:11 \xt Nzaelwapxngr 22:7\x* Lolvz-amqngiamu nzlxngiti-krmu ninge murde ma tzangqngutilr, x sc tr-rtwzpewamuu da kxmrlz mz nzaovxio-krmu mz nzvecngr.   
\pm
\v 12 “Murde mrlx kx aovxio mz nzvec-krdr badr zmatqng kxtrka, nide kx navzmibo mz Gct rnge na-apule nctrpou ngr Mangr-nzangiongr kxmrna, x trtxpengr nzdwasz-krdele. X nayrtrpo bade drtq kxmrna lcde seng tq. Drtq kx ayrnrngr drtq mzteadau nyz Gct, Jerusalem kxmrna kc tqvzom Heven. Murde Jerusalem kxmrna nangi mrnyzde. X drtq krali drtq Gct rnge, murde nide doa ne Gct. X drtq kratq drtqnge kxmrna, murde ni-kzde doa nenge. \x + \xo 3:12 \xt Asaea 62:2; 65:15\x*   
\pm
\v 13 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng.”  
\pmc Delape. Ninge \sig Jiszs. \sig*   
\s1 Letz Nangi Sc Dzbe Lrmakxtr Kc Laodisea  
\p
\v 14 X Jiszs nzngini-krde ncblo kc tqapule Mrlx Leplz rpi-mople bange kx nayr-kzpo dq natq mz kxaclvele dzbe lrmakxtr kc mz taon Laodisea. Natq lc nide sele.  
\pmo “Krlcng natqnge, ninge kc tqapux natq lc tqngi ‘angida’ murde ninge kc tqrngi-batrpz da amrlx mz nzvz-nqblq-krde me pnz drtwr Gct. X ni-kznge ncblo angidr kc tqrpipx-angidrpe natqdeng. X ninge nou da amrlx kcng tqwzngr Gct. \x + \xo 3:14 \xt Nzyrplapxngr 8:22\x*   
\pm
\v 15 Krlzpex nqmq krmu. Krlzx kx trvz-nqblqwamuu ninge mz drtwr kxpq o drtwr kxbao. A' na-aoti drtwrmu me navz-nqblqkiamule, murde drtwrmu napqtrpz o nabaotrpz. Bzkq drtwrmu li.  
\v 16 A' mz nzngini-krmu ncte lxblr mz da amrlx x pq-lrpiamu, sa nabyapx-ngrne nimu na-apule lue kxtrka.  
\v 17 “Rpiamu kx nimu bcnyrng, x rngiscpemu da amrlx kcng tqsuti drtwrmu. A' trkrlzwamuu kx mz nrlarde nyz mqngrmu x nabzmu tatxpxamu mz da amrlx mzli ka. Mz nzobqkr Gct, nimu leplz kxdrka'ngr, kxnzyc mz drtwr, kxtrnzrngiscung, kx mzpu mwi x ycblqamu.  
\v 18 Rlr-ngrmamu bange nzka-krbo bamu da kx na-atubqtile nimu mz nzobqkr Gct. Rlr-ngrmamu bange nzxpe-krbo alwx ngrmu mz nzbz-krnge, na-apule kx xpeamu gol. Delc nanginimu bcnyr angidr mz nzrmcti-krmu nzlungr kxboi. X apxitr-lzbq-ngrnamu lrpznge kxprki ngr nztubq-esz'ngr-krnge, murde drtqmu ma tqmya mzli kc navz-ngrmc. Murde mzli lc naoliqti-angidramu ninge. X rlr-ngrmamu bange nzaelwa-lzbq-krbo bamu, murde nakrlz-angidramu ninge na-apule luekxpiz kx ngi tolo kx nakitramu mz mzpu mz nzobq-angidr-krmu.  
\v 19 Krkcng tqmrlzti-zlwzxng krlzx nzlclvz-krbo badr da, x nzayrplapxngr nidr. Mz nzmu-krde lcde, drtwrmu nayzlu, x napqtitr drtwrmu ninge. \x + \xo 3:19 \xt Nzyrplapxngr 3:12; Hibru 12:6\x*  
\v 20 Murde ninge la tqtutrp yz mz naonrx nyzmu, tqabctrpo mz nzaenzli-krnge nzvzmitr-krmu ninge. Doa kx xlrle natqnge x lvxpxmle naonrx bange, sa nadwatrpo ma nyzde mz nzmu-lxblr-krgr ncdr.  
\v 21 “Mrlx kx aovxio mz nzvec-krdr badr zmatqng kxtrka, sa na-awxbuox nide mz tron mz nzwxbu-krgr badr mz nzaclvengr. Da kc tqwaix mz nzaovxio-krnge mz nzvec-krgr badr zmatqng kxtrka, x wxbupekr ncdr Trtenge mz nzaclvengr.   
\pm
\v 22 “Abzamu nzyrlq-angidr-krmu natq lcng tqpibz Mqngrkxtr mz mz dzbe lrmakxtr lcng.”  
\pmc Delape. Ninge \sig Jiszs. \sig*   
\c 4  
\s1 Jon Mcle Nzangiongr Gct Heven  
\p
\v 1 Mz nibr nzxlr-krnge letz lcng, obq-rmwible-moux x opx mz mzke' kc naonrx kx obq Heven. X sc tqxlr-moux natq Kraes kc etu tqapule nzyrnikr trpu, tqycmne-kaip ena bange. X rpi-mople kx, “Vzdzm mrka, murde na-aelwa-ngrbo bam da kx naprtilzmqng mzli lc navzm.”  
\v 2 X mzli lcpwz, Mqngrkxtr sc tqprsrpe-moule ninge. X mcx kc tron Heven, x wxbuom kc Kxetu elr. \x + \xo 4:2 \xt Asaea 6:1; Esikel 1:26-28; 10:1\x*  
\v 3 X Kxetu kc tqwxbuom mz tron lcde, mzte apule nzyaglqkr rplz kx opx, x nzpnaprkr rplz kxpc. X o-ngalelvzle tron nrpc' kx nilz rde apule rplz kx mqbq.  
\v 4 X mc-kzx tron nzpnu-li-nrade-pwx (24) nztu-ngalelvzlr tron nyzde, x kxnzaclveng nzpnu-li-nrade-pwx nzwxbuomqng elr, nzkq-lxblrng lrpz kxprki, x nzabx-lxblrng mz kraon kx ngi gol.  
\v 5 X mclz-kzx nzaglqpz'tikr bzlrpc x xlrlzx nzyrputipxkr bzlrmei mz tron. X mrkc tqlxlvrkipx tron woutrpz elr lam rlimz, rkx ngr Mqngrkxtr ne Gct kc nzwz-krdeng rlimz. \x + \xo 4:5 \xt Nzrlaszngr 19:16; Esikel 1:13; Sekaraea 4:2\x*  
\v 6 X yctr-kzpz kc elr da kx apule prla kx ngi dzpq kx otxpx. \x + \xo 4:6 \xt Esikel 1:5-10, 22; 10:14\x* X nztu-ngalelvzlr nrlar tron kcng pwx krkcng tzlung kcng pwx. X mztr kqlu kxnzobqpx-kaing x kxnzobqpxng mq.  
\v 7 X krkcng tzlung, kx ayrnrngr apule laion, krali apule nei kzu kxncblongr, kratq mzte apule mz ncblo, x krapwx apule lr kc tqlvcpe. \fig Lr kc tqlvcpe.|alt="141 eagle" src="141-abbi025.tif" size="COL" loc="REV 4:7" copy="SIL" ref="4:7" \fig*  
\v 8-10 Kxnzlung lcng pwx nabxdr esz'mz lxblr, x nrkrdrtqdr yrlwr-ngalelvz mztr x wai-kzle nabz nabxdrng. Nzglqlzlr x nzangiolr x nzawibzng mz Kxetu kc tqwxbuom mz tron, tqlu-zvzpe. X mz nrlckxngrlx x mz nrlckxbq tresakiu nzngr-krdr kx,  
\q1 \qt “Yawe, Gct kc tqrninr,\qt*  
\q1 \qt Drtqmq tr-esz'ngr.\qt*  
\q1 Nimq kc tqmnc mzli ka,  
\q1 X tqmnc zvz, x sa navzm.” \x + \xo 4:8-10 \xt Esikel 1:18; 10:12; Asaea 6:2-3\x*  
\p X mzli lcdepwz, kxnzaclveng kcng nzpnu-li-nrade-pwx nzrweobzng zpr mz Kxetu kc tqwxbuom mz tron, tqlu-zvzpe. Nzkaobzlr kraon ngr nardr mrkc tqlxlvrkipx tron, x sc tzngrpeng.  
\v 11 Nzrpibzlr kx,  
\q1 “Yawe, nipem Gct rgr.  
\q1 X takitrde nim  
\q1 Nzrglqlzngr, nzangiongr,  
\q1 X nzrpipxngr zmatq ngrm.  
\q1 Murde wz-ngrn doa amrlx,  
\q1 X da amrlx mz nrlc.  
\q1 X mz nzwz-krmqleng  
\q1 Nzmnc-krdr x nzyc-krdr,  
\q1 Nzvz-nqblqlr me pnz drtwrm.”   
\c 5  
\s1 Nei Sip Kc Heven  
\p
\v 1 Zbz mcx kc skrol kx apule lrpzu kxboi kxnzbu. X male Kxetu kc tqwxbuom mz tron mz mqde kxrtc. X skrol lc nzyr nrlarde rlilr. A' nzbupe x nzabli-kzo-ngrde nrlc rlimz mz kadol kx apule bq lr nounc. \x + \xo 5:1 \xt Esikel 2:9-10; Asaea 29:11\x* \fig Zbz mcx kc skrol kx apule lrpzu kxboi kxnzbu.|alt="140 scroll" src="140-scroll-BB.tif" size="COL" loc="REV 5:1" copy="Birney Boyd." ref="5:1" \fig*  
\v 2 X mcx kc enjrl kx matq-esz'ngr, x sc tqetumipe nate nzrpi-krde kx, “?Neke takitrde nzrniglcngr kadol lcng rlimz murde nakawxpxle skrol lc?”  
\v 3 A' trpnzngr kx nzrmcti Heven, mz nrlc, x mrnyz mqngr kxnzbzpeng kx takitrde.  
\v 4 Sc tqyrnitx-zlwzpex.  
\v 5 A' kzdq kxnzaclve lcng rpimle bange kx, “Bzkq yrniq! Mcpwz! Laion ngr Neidu lr Judz. Ncblo kxmatq kc tqngi melrmqde King Devet, x aovxiopele nzvecngr. Sa naniglcle kadol lcng rlimz murde narkawxpx skrol lc.” \x + \xo 5:5 \xt Nou 49:9; Asaea 11:1, 10\x*   
\p
\v 6 Zbz mcx kc Nei Sip tutrpz mrkc tqlxlvrkipx tron, x kxnzlung kcng pwx x kxnzaclveng kcng nzpnu-li-nrade-pwx (24) nztu-ngalelvzlr nide. Nei Sip kc opxm kx nznibqpe. X tutrpz bade dxpa' rlimz kx ngi rkx ngr zmatq ngrde. X mzte rlimz kz, rkx ngr Mqngrkxtr ne Gct kc nzwz-krdeng rlimz, kx atwzlrpx-ngrde mz nrlc tulvzo. \x + \xo 5:6 \xt Asaea 53:7; Sekaraea 3:9; 4:10\x*  
\v 7 Nei Sip sc tqvzpebz mz Kxetu kc tqwxbuom mz tron x otibzle skrol kc tqmalele mz mqde kxrtc.  
\v 8 X mzli lcpwz, kxnzlung kcng pwx x kxnzaclveng kcng nzpnu-li-nrade-pwx nzrtco-lzbq-ngrbzng mz Nei Sip nzglqpx-krdrle. X nzrtaplxsrng gita x dis kx ngi gol yrbu lxblr mz bqlr nc ninz, krlcng nzkrka'kr leplz neng Gct. \x + \xo 5:8 \xt Sam 141:2\x*  
\v 9-10 Zbz sc tzngr-ngrdr kc nabz kxmrna, mz nzrpi-krdr kx,  
\q1 “Nipem ncblo kx rtwz skrol la,  
\q1 X takitrde nim,  
\q1 Nzrniglcngr kadol ngrdeng  
\q1 X nzrkawxpx-kzngr.  
\q1 Nim blz kx nznibqng.  
\q1 Mepyr ngrm yrleo.  
\q1 Xpetrle leplz neng Gct.  
\q1 Leplz lcng nzprpxmqng mz nou, natq, drtc', x  
\q1 Neidu amrlx mz nrlc. \x + \xo 5:9-10 \xt Sam 33:3; 98:1; Asaea 42:10\x*  
\b  
\q1 “Nim kx rvzmimqng leplz lcng amrlx,  
\q1 Nidr kxnzprpxmqng  
\q1 Mz nou, natq, x neidu, x drtc' amrlx  
\q1 Mrka mz nrlc tulvzo,  
\q1 Murde nangini-ngrdr  
\q1 Pris neng Gct rgu,  
\q1 Mz nzwztr-krbzlr bade.  
\q1 X nidr kx na-aclveng ncdr mz nrlc,  
\q1 Mz nrlc tulvzo, eu.” \x + \xo 5:9-10 \xt Nzrlaszngr 19:6\x*   
\p
\v 11 Zbz obq-mopwc' x xlrx nzngrkr siu ngr zbo ngr enjrl kx rblx nzrlwxngr. X enjrl lcng nzyrlwr-ngalelvzlr tron, mrkc nzmnc-kzng kxnzlung kcng pwx x kxnzaclveng kcng. \x + \xo 5:11 \xt Daniel 7:10\x*  
\v 12 X natr kc tqetupe mz nzngrngr kx,  
\q1 “Nimq Nei Sip kc tznibq,  
\q1 X takitrde nim  
\q1 Nzrpipxngr zmatq ngrmq,  
\q1 Nzkrlz-angidr-krm,  
\q1 Kx nim angidr bcnyr, x xplr-esz'ngrn.  
\q1 X takitrde nim kz  
\q1 Nzrglqlzngr, nzangiongr,  
\q1 X nzrglqpxngr zvz.”   
\p
\v 13 Zbz xlr-moux krkcng lu amrlx, kxmule-esz' Heven, mz nrlc, mrnyz mqngr kxnzbzpeng, prla, x nrlc atwrnrngr, a' nzngrpx-lxblr-ngrdr mz nzrpi-krdr kx,  
\q1 “Kxetu rgr, kc tqngi Nei Sipq,  
\q1 X Gct kc tqwxbuom mz tron,  
\q1 Naglqpxkr nimu, na-amatqkr nimu,  
\q1 Na-awi-ngrbzkr bamu.  
\q1 X napipxkr zmatq ngrmu  
\q1 Kx myalz-esz'ngr.  
\q1 Me tutr-ngrde lape!  
\q1 Na-angiokr nimu, naglqlzkr nimu,  
\q1 Tqvzpe tqvzpe! Eu!”   
\p
\v 14 X kxnzlung kcng pwx nzrpibzlr kx, “Eu, angida!” X kxnzacvleng kcng nzrtco-lzbqng mz nzangiongr.   
\c 6  
\s1 Hcsi Kxprki Drtwr Ngrde Nzaovxiongr  
\p
\v 1 Zbz mcx Nei Sip nzrniglc-krde kadol ngr skrol kc kai. X xlrx nznetxpx-zlwzkr kxnzlung kc kai, x nate etu apule bzlrmei, rpile kx, “Vzm!”  
\v 2 Obq-mopwc', x mcx kc hcsi kxprki, x mrlx kc tqwxbuom elr rmale popz' x nipna, x nzalaobz kc kraon mz narde. \x + \xo 6:2 \xt Sekaraea 1:8; 6:2-6\x* Nzwxbuo-krmle kc mz hcsi apule ncblo kx aovxiope mz nzvecngr x naprpx mou mz nzaovxiongr mz kzdq kz nzvecngr.   
\s1 Hcsi Kxpc Drtwr Ngrde Nzvecngr  
\p
\v 3 Zbz mc-moux Nei Sip kc nzrniglc-krde kadol krali, x xlr-kzx kxlu krali nzrpi-krde kx, “Vzm!”  
\v 4 Zbz vzpx-mop kc hcsi kxpc. Mrlx kc tqwxbuom elr nzkabz kc bade toki r vea kxetu x zmatq ngr nzrkatx-krde nrwx mz nrlc, murde na-apqtrpzle drtwr leplz mz nzota-krdr x nznibq-lzbq-krdr. \fig Nzkabz toki r vea mz mrlx kc tqwxbuom mz hcsi kxpc.|alt="142 warrior on horse with sword" src="142-CO01488b.tif" size="COL" loc="REV 6:4" copy="David C. Cook" ref="6:4" \fig*   
\s1 Hcsi Kxbotapz' Drtwr Ngrde Nztaokr Dzbi  
\p
\v 5 Zbz Nei Sip kc niglc-kzle kadol kratq. X kxlu kratq rpi-kzle kx, “Vzm!” Obqbo x mcx vzpxm kc hcsi kxbotapz'. \x + \xo 6:5 \xt Sekaraea 1:8; 6:2-6\x* X ncblo kc tqvone elr adole mz mqde kc skel mz nzpipx-krde narncbr ngr dakxnzng.  
\v 6 Zbz xlrx kc natq vzpxm mz mzlir kxnzlung kcng pwx, rpibzle mz ncblo lc kx, “Rlr-ngrbo bam nzyrlq-krm narncbr kxlqlwx zlwz mz bxli r flawa wit kxesz' o bxli r raes kxtq, murde vea kcng mz nrlc nzayctxdr nzpengr dakxnzng. A' bzkq odatiq nounc olivi x nqvi lr grep!”   
\s1 Hcsi Kxkupya Drtwr Ngrde Nzbzngr  
\p
\v 7 Zbz Nei Sip sc tqniglcpe-kzle kadol krapwx, x xlrbo kxlu krapwx rpi-kzle kx, “Vzm!”  
\v 8 Obqbo, x mcx vzpxm kzdq hcsi kxkupya. \x + \xo 6:8 \xt Sekaraea 1:8; 6:2-6; Esikel 14:21\x* X mrlx kc tqwxbuom elr, drtqde ‘Nzbzngr.’ X mrlx kx drtqde ‘Mrnyz Mqngr Kxnzbzpeng’ vzbz mz nibrde. Gct rlr-ngrbzle badr zmatq ngr nznibqti-krdr leplz kxkqlu ngr nrlc mz vea, mz dzbi, mz zyagox, x mz animol kzpetong.   
\s1 Nznibqkr Kxnzrlxngiting  
\p
\v 9 Zbz niglc kz Nei Sip kc kadol kranzlvqn. Obqbo x mcx kc olta. X mz nabz olta lcde, mcx mqngr leplz kcng tznibq-ngrdr nzrpipx-krdr Nrpa ngr Jiszs.  
\v 10 X etumi natqdr nzrpi-krdr kx, “Yawe kc tqrninr, tr-esz'ngrn, x yrlq-angidrq natqm. ?Memule tqasa-ngrn nzayrplapx-krm lr nrlc kcng tznibqtilr nigr?”  
\v 11 Mz nibrde sc tzataplxsrpeng lrpz kxprki, x nzrpibz badr kx, “Mzlemung kcng tzwztr-kzpzng mz Kxetu, sc tznibqtibeng nidr, da kc tzwaisr-ngrdr nimu mzli kc. A' aenzlipwzmu ena, murde trkrlzkapzle me nangi bz ngr leplz kcng nanibqng.”   
\s1 Zngya Ngr Drtwr Gct Krlzbzle Nrlc Tulvzo  
\p
\v 12 Zbz mc-moux Nei Sip kc nzrniglc-krde kadol kraesz'mz. X vzm kc nengq kxetu, x nepi botapz' x temz pctx atwrnrngr apule mepyr. \x + \xo 6:12 \xt Nzaelwapxngr 11:13; 16:18; Asaea 13:10; Joel 2:10, 31; 3:15; Matiu 24:29\x*  
\v 13 X vri ngr bongavz nztatio-lxblrng mz drtc', nzapulr nra nc kxpo kc tqrlxom mz nzayclwztikr nenq kxetu nrladrng. \x + \xo 6:13 \xt Asaea 34:4\x*  
\v 14 X bongavz kz nzmrbr-krde apule nqni kc tzbutr x sc tzkatxpe. X newz badr trmctu amrlx nzaprszpxng nidr me nzwxbu-ngrdrng.  
\v 15 X leplz kxtrnzrlxngitiung amrlx mz nrlc, kxmule-esz' king amrlx, kxnzetung, kxnzaclveng ncblo ngr vea, bcnyrng, kxnzrngiscng zmatq badr leplz txneng, kxnzawz-nrbalqng, x kxdrtqdr opxng, leplz lcng amrlx sa namnc-kapqpxmqng mz butqbr x mz nabz newz. \x + \xo 6:15 \xt Asaea 2:19-21\x*  
\v 16 X sa nanemi-lzbzlr mz newzng x butqbrng, mz nzrpi-krdr kx, “Talvzom nigr, x amnc-kapqbz nigr mz mz Kxetu kc tqwxbuom mz tron x mz zngya ngr drtwr Nei Sip. \x + \xo 6:16 \xt Hosia 10:8; Luk 23:30\x*  
\v 17 Murde mzli ka sc tqkrlzpebzle Mzli Kxmatq nyz Gct ncdr Nei Sip, x trpnzngr kx narlapx mz nzayrplapx-krdr nigr.” \x + \xo 6:17 \xt Joel 2:11; Malakai 3:2\x*   
\c 7  
\s1 Leplz Ne Gct Kcng Siu-trtqki-esz'-nzpnu-pwx-nrade-pwx (144,000) Narlapxng  
\p
\v 1 Zbz obq-rmwible-moux, x mcx enjrl nzpwxng taplxsr bute' ngr nrlc, nzrpwa'-ngrdr nenq kcng pwx mz nrlc, murde nenq ma tqwq mz drtc', nounc, x prla. \x + \xo 7:1 \xt Jeremaea 49:36; Daniel 7:2; Sekaraea 6:5\x*  
\v 2 Zbz mc-kzx kzdq kz enjrl vzdzm Heven vzkimle me prkilzm nepi. X malele kc da kx nayrlq-ngrbz rkx mz leplz, nzaelwapxngr kx nzngineng Gct kc tqngi nou nzlungr. X etumibz nate nzkqle-krbzle mz enjrl kcng pwx tqrka-neba Gct zmatq ngr nzodatingr drtc' x prla.  
\v 3 Rpibz enjrl kc kx, “Bzkq odatiamu ena drtc', prla, x nounc, nakrlz-zpwxbzle nzyrkrpxkr nzryrlq-krbzkr rkx ngr Gct rgu mz rtrlrmz kxnzawz-nrbalq nedeng.”  
\v 4 X nzpim bange me nakrlzbz nzkqlukr leplz ne Gct kcng nartwzng rkx ngrde. Kxnzlxngiting kcng tzprpxmqng mz neidu lr Israel nakrlzbzle siu-trtqki-esz'-nzpnu-pwx-nrade-pwx (144,000).  
\v 5-8 Leplz lcng siu-trtqki-esz'-nzpnu-pwx-nrade-pwx (144,000) taplxsr neidu lr leplz kcng Israel nzpnu-esz'-nrade-li (12). Murde neidu lcng amrlx nzrngine-lxblrng siu-nzpnu-esz'-nrade-li (12,000) kx nzrtwzng rkx ngr Gct. Drtq neidu lcng nidr seleng,  
\tr
\tc1 Judz 
\tc2 Simion 
\tr
\tc1 Ruben 
\tc2 Livae 
\tr
\tc1 Gad 
\tc2 Isaka 
\tr
\tc1 Asz 
\tc2 Sebyulon 
\tr
\tc1 Naftzli 
\tc2 Josip 
\tr
\tc1 Manase 
\tc2 Benjamin  
\s1 Zbo Ngr Leplz Kxetu Neng Gct  
\p
\v 9 Mz nibrde, obq-rmwible-moux, x mcx kc zbo ngr leplz kxetu-esz'ngr. Nzkqlu-zlwzng x trpnzngr kx yatrpz nzrlwxngr. Nzprpxmqng mz nou, natq, neidu, x drtc' amrlx mz nrlc. Nztutrpeng mrkc tqlxlvrkipx Nei Sip mz tron. Nzkq-lxblrng lrpz kxprki x nzrmale-lxblrng nabx nc paam mz nzabrtz-krdr.  
\v 10 Zbz sc tzetumipe natqdr nzrpi-krdr kx, “Nzarlapxngr vzpxm mz Gct rgr kc tqwxbuom mz tron, nimu ncdr Nei Sip.”  
\v 11 Zbz enjrl kcng amrlx tztu-ngalelvzlr tron mrkc tzmncng kxnzaclveng kcng x kxnzlung kcng pwx, sc tzrtco-lzbqng mrkc tqlxlvrkipx tron mz nzangio-krdr Gct.  
\v 12 Nzrpilr kx, “Eu, angida! Angiokr nim, awibzkr bam, glqlzkr nim, x amatqkr nim. Pipxkr nzyrplapx-krm, nzxplr-krm, x zmatq ngrm, tqyc tqyc. Eu, angida!”   
\p
\v 13 Zbz kzdq kxnzaclveng kcng rpimle bange kx, “?Neke lcng tzkqng lrpz kxprki, x nzvzkimlr drlve?”  
\v 14 A' ayzlu-ngrbo natqde kx, “Kxetu, nim kx rkrlz.” X rpi-mople bange kx, “Krlcng leplz kx nzvzpxmqng mz Mzli r Nzkxpungr Kxtrka-zlwz. X mzli ka nztapzopelr lrpzdr mz mepyr ngr Nei Sip, murde naprkitxpxpeng. \x + \xo 7:14 \xt Daniel 12:1; Matiu 24:21\x*  
\v 15 Delc tztutr-ngrbzlr mrlc tqlxlvrkipx tron nyz Gct mz nzangio-krdr nide mz Mangr-nzangiongr nyzde Heven, ngrlx x mz nrlckxbq. X Gct kc tqwxbuom mz tron, sa namnc-zvzng badr mz nzaclve-krde nidr.  
\v 16 X trtxpengr nzbrtale-krdr x nzbrlxkzkr drtwrdr, x trtxpengr nrkrdrtqdr nzyrlxkr nzulr nepi, nyr x kzdung kz da.” \x + \xo 7:16 \xt Asaea 49:10\x*  
\v 17 Murde Nei Sip kc tqtavau mrkc tqlxlvrkipx tron, sa na-aclvele nidr na-apule ncblo kxaclvele sip nedeng x namailzle nidr mz aulz ngr lue ngr nzlungr. X Gct sa naycpqpxbzle drlemztr amrlx, murde naesakingr nzvzkr drtwrdr. \x + \xo 7:17 \xt Sam 23:1-2; Esikel 34:23; Asaea 25:8\x*   
\c 8  
\s1 Nzrniglckr Nei Sip Kadol Krarlimz  
\p
\v 1 Mzli kc tqniglcngr Nei Sip kc kadol krarlimz, lr Heven amrlx nzmnc-nabutxng mzli kxpipz trkrlzpwzleu nabz-nepi kxesz'.  
\v 2 Zbz mcx nar enjrl kcng rlimz tztutrpzng mrkc tqlxlvrkipx Gct, x nzkabz badr trpu rlimz.   
\p
\v 3 X kzdq mou enjrl vzm tutr mz olta kc tzwzngr mz gol, tqtutrpz mrkc tqlxlvrkipx tron. X malele kc baol kx ngi gol, kx nayclz-ngrm bqlr nc ninz kxngc. X nzka-mopwz bade kcng bqlr nc ninz, kx nakamibzle nzkrka'kr leplz ne Gct amrlx mz olta. \x + \xo 8:3 \xt Emos 9:1; Nzrlaszngr 30:1, 3\x*  
\v 4 X mz nzglalzkr enjrl kc baol ngr bqlr nc ninz kc, zsikapu ngr bqlr nc ninz kxmnrte mrlz sc tqvzmilz lxblr nzkrka'kr leplz neng Gct, vzdz x krlzlzbzle Gct.  
\v 5 Mz nibrde enjrl kc glaole kc baol ngr bqlr nc ninz kc, tekatrle mz nyr ngr olta x rtco-ngrde mz nrlc. X mzli lcdepwz bzlrpc tqpctipx, bzlrmei tqyrputipx x nrlc tqycngrlr atwrnrngr mz nengq. \x + \xo 8:5 \xt Livae 16:2; Esikel 10:2; Nzrlaszngr 19:16\x*   
\s1 Trpu Kc Kai Drtwr Ngrde Nzatrkatingr Drtc'  
\p
\v 6 Zbz enjrl kcng rlimz tzrtaplxsrng trpu, sc tzoliqpeng nzvxu-krdrleng.   
\p
\v 7 Mzli kc enjrl kc kai tqvxutrle kc trpu nede, muli-aes x nyr rlxlvzmi mepyr nzrtco-ngrm mz drtc' apule tewa kxdc. Mz nzmu-krde lcde, nctq drtc' kxetu, vzmi nounc x nabr yrkrtxo mz nyr amrlx. \x + \xo 8:7 \xt Nzrlaszngr 9:23-25; Asaea 28:2; Esikel 38:22\x*   
\s1 Trpu Krali Drtwr Ngrde Nzatrkatingr Prla  
\p
\v 8 Zbz enjrl krali vxutrle trpu nede, x kzdq da kx apule newz kxetu kxngc nzrtcongr prla. X nctq prla kxetu nzlrtipxlr mepyr.  
\v 9 X dalr nctq prla lc amrlx nzbzting x lcsu amrlx mz prla lc nzodating. \x + \xo 8:9 \xt Sekaraea 13:8-9\x*   
\s1 Trpu Kratq Drtwr Ngrde Nzatrkatingr Lue  
\p
\v 10 Zbz enjrl kratq vxutr-kzle trpu nede. X vri kxetu taom mz bongavz apuneomle kx ngxlu, x tao mz nctq lue kxkqlu, x aulz kxkqlu. \x + \xo 8:10 \xt Asaea 14:12\x*  
\v 11 X drtq vri lcde ‘Kxpiz,’ murde apule lue lr nc rtc kxpiz. X lue kxkqlu lcng nilwzdr piz, x leplz nzkqlung kx nzbz-ngrdr nzrmnq-krdr lue lcng tqpiz. \x + \xo 8:11 \xt Jeremaea 9:15\x*   
\s1 Trpu Krapwx Drtwr Ngrde Nzatrkatingr Dalr Bongavz  
\p
\v 12 Zbz enjrl krapwx vxutr-kzle trpu nede. X nctq nepi, temz x vri nzatrkating amrlx, murde ncte lcng nabzting. Mz nzmu-krde lcde, kzdq nctq ngrlx tryzlr-ngru, x kxmule lcpwz mz nrlckxbq. \x + \xo 8:12 \xt Asaea 13:10; Esikel 32:7; Joel 2:10, 31; 3:15\x*   
\p
\v 13 Mz nibrde obq-mopwc' x mcx nzlvctxlzkr kzdq lr mrkc wq, x sc tqnemipele nzrpi-krde kx, “Nimu lr nrlc na-aclvetioamu. Murde mzli kc enjrl kcng tq navxutr-mou-ngrdr trpu nedr, nzayrplapxngr kxtrka-esz'ngr lang tq sa navz-kzpzng bamu.”   
\c 9  
\s1 Trpu Kranzlvqn Drtwr Ngrde Nzatrkatingr Leplz  
\p
\v 1 Zbz enjrl kranzlvqn kc tqvxutrpele trpu nede. X mcx kzdq vri kx taopem Heven mz nrlc. Nzkabz mz vri lc tqtaom kc ki kx nalvxlz-ngrde naonrx ngr gq kc trpnzngr noude. \fig Nzkabz bade kc ki kx nalvxlz-ngrde naonrx ngr gq kc trpnzngr noude.|alt="143 old key" src="143-OKY001.tif" size="COL" loc="REV 9:1" copy="SIL" ref="9:1" \fig*  
\v 2 Kx lvxlzle kc gq kc, zsikapu kxbotapz' mapunelzmle apule zsikapu ngr trmami, x amrbrtxde zyzlr ngr nepi, x awx-nzlo-atwrnr-ngrde bongavz. \x + \xo 9:2 \xt Nou 19:28\x*  
\v 3 X vzpxm mz zsikapu kc kionabr nzyrkromqng mz nrlc. X nzkabz badr zmatq ngr nzrtq-krdr leplz apupwzle nalx. \x + \xo 9:3 \xt Nzrlaszngr 10:12-15\x*  
\v 4 Nzpibz badr kx bzkq nzatrkatilr nabr, nounc, x lxbi. A' nzrlrtx-ngrpwz badr nzatrkati-krdr leplz kcng rkx ngr Gct tryctru mz rtrlrmztr. \x + \xo 9:4 \xt Esikel 9:4\x*  
\v 5 Trnzrlr-ngrpwzu mz kionabr lcng nznibq-krdr leplz, a' nzaetq-zlwz-ngrbzlr drtqdr mz temz kxnzlvqn. X zvetq kxetu lc na-apule zvetq ngr nzrtqkr nalx.  
\v 6 Mz nabz temz lcng nzlvqn, leplz kcng drtqdr tqetq sa nartangrtilr kzdq da kx nabz-ngrdr, a' trtxpnzngr nzrmcti-krdrle. X nzsutitx zlwz drtwrdr nzbzngr, a' trtxpnzngr nzbz-krdr. \x + \xo 9:6 \xt Job 3:21; Jeremaea 8:3\x*   
\p
\v 7 Mc-kzx kionabr lcng nzapulr hcsi kx nzoliqng mz nzvo-krdr mz vea. X nardr lao-lxblr-ngrm da kx apule kraon kx ngi gol, x nardr apule nar ncblo. \x + \xo 9:7 \xt Joel 1:6; 2:4-5\x*  
\v 8 Nqnginardr boi apule nqnginar olvz, x nqngidr malc apule nqngi laion.  
\v 9 X nzkq-ngrdr temz ngr lomrdr da kx nzwzngr mz aian kc tqyrputrngr nipna. X natq nzyrklzkr nabxdr apule natq sariot kcng tzvomi-ani-txpwzlr hcsi mz nzvecngr.  
\v 10 X dxpa' krdr kcng tqtutr mz nqglqdr nzapulr dxpa' kr nalx. X mz dxpa' krdr dekc tqyctrngr zmatq ngr nzrtq-krdr leplz mz temz kxnzlvqn.  
\v 11 Nzrngineng king kx aclvele nidr, krlcde enjrl kc tqngi kxetu r gq kc trpnzngr noude. X drtqde mz lr Jiu \tl Abadon\tl*, x drtqde mz lr Grik \tl Apolion\tl*, drtwr ngrde \em Kxoda.\em*   
\p
\v 12 Nzayrplapxngr kxtrka-esz'ngr kc kai, dela tqyrkrpxpe. A' nzayrplapxngr kxtrka-esz'ngr li lang tzvzbepqng.   
\s1 Trpu Kraesz'mz Drtwr Ngrde Nzrnibqngr Leplz  
\p
\v 13 Enjrl kraesz'mz vxutrle trpu nede. X xlrx kc natq vzpxm mz nctq bute' kcng pwx mz olta kc tqngi gol tqtu mrkc tqlxlvrkipx Gct. \x + \xo 9:13 \xt Nzrlaszngr 30:1-3\x*  
\v 14 Rpibzle mz enjrl kraesz'mz kx, “Aopxpebz drtq Enjrl kcng pwx tzatolvangr mz lue kc etu drtqde Yufretis, mzli ka.”  
\v 15 Zbz sc tqaopxpebzle drtq enjrl kcng pwx, murde nanibqtilr nctq leplz kxetu mz nrlc. Enjrl lcng nzaenzli-ngrdr nabz nepi, zbq, temz, x yiz lcdepwz murde na-atutr-ngrdr nzwz-krdr lc.  
\v 16 X nzpim bange leplz ngr ami kxnzvo mz hcsi krlzbzle obu-trtqki-li (200 milion).  
\v 17 X mz nzobq-krnge opx mz mzke' hcsi kcng, x kxnzwxbuomqng badr. Nzkq-ngrdr temz ngr lomrdr da kx nzwzngr mz aian, pc apule nyr, blu apule zsikapu, x plc apule rplz salfz. Nar hcsi kcng nzapulr nar laion x naodrng tqrpnapx-ngrm nyr, zsikapu x salfz kxngc. \f + \fr 9:17 \ft Mz Nzryrngrkxtr mzli kang kqlu rplz salfz drtwr ngrde nzodatingr mz nzayrplapxkr Gct leplz. Mc Sam 11:6, Asaea 30:33; 34:9, Esikel 38:2 x Nzaelwapxngr 9:17; 14:10; 19:20; 20:10 x 21:8. \f*   
\m
\v 18 Mz nzayrplapxngr lcng tq, nyr, zsikapu x salfz kxngc kcng tzrpnapxm mz naodr, nznibqtilr leplz kxnzkqlung mz nrlc.  
\v 19 Hcsi lcng mrkc tqmalcnepx mz nqglqdr apule nar ningidoe, x nzrmakx-ngrdr leplz. Mz nzmu-krde lcde, zmatq ngr nzaetq-krdr drtq leplz yctr mz naodr x nqglqdr kz.   
\p
\v 20 A' leplz amrlx kcng trnzbzung mz nzayrplapxngr lcng, tresakiu nzangio-krdr drka' x mqngr drka' kxnzlz kx nzwzngr mz gol, silvz, bras, rplz x dapunc. X da lcng amrlx trpnzngr da kx nzmclr x nzxlrlr, x trnzvzne-kzung. A' trnzaxtxlru da lcng tzwz-ngrdr mz mqdr. \x + \xo 9:20 \xt Sam 115:4-7; 135:15-17; Daniel 5:23\x*  
\v 21 X trnzaxtx-kzlru nzrnibq-krdr, nzycmne-krbzlr mz drka', nzrmwimi-krdr doa kx trngiu krnalzdr, x nzpnangr da.   
\c 10  
\s1 Skrol Kxtopwz  
\p
\v 1 Zbz obq-rmwible-moux, x mcx kc enjrl kxmatq vzom Heven. Ngrlelvz dcbz apule lrpz kx kq-ngrde, x narde ngrlelvz nrpc'. Mzte luli apule nepi, x nanycde nzapulr nctrpou kx ngc-zli nyr.  
\v 2 Enjrl lc malele kc skrol kxnzyr kx nzkawxpxpe. Nanycde kxrtc atuole prla x kxmc atuole mz drtc'.  
\v 3 X yrlqbzle kc natqde kxetu, kx apule nzkclwzkr laion kxetu. Zbz xlrlzx kc natq Heven, apule bzlrmei kxetu x ayzlu-ngrbzle natq enjrl nzwrde rlimz.  
\v 4 Mzli kc tqayzlu-ngrbzle natqde, sc tqoliqtipex nzryrongr natqde kcng rlimz. A' mzli lcdepwz, kzdq natq Heven rpiomle kx, “Yrlq-kapq natq kcng rlimz, bzkq yroq.”   
\p
\v 5 Zbz enjrl kc nanycde tqtuo kc prla x tuo kc mz drtc', glalzle mqde kxrtc Heven. \x + \xo 10:5 \xt Nzrlaszngr 20:11; Lou Kcpwz 32:40; Daniel 12:7; Emos 3:7\x*  
\v 6 X esalz-ngrde drtq Gct kc nzlu-krde tqyc tqyc, x tqwz-ngrde bongavz, drtc', prla, x da kznikeng amrlx ycpxmqng elr. \x + \xo 10:6 \xt Nzrlaszngr 20:11\x* X sc tqrpipe enjrl lcde kx, “Mzli r nzaenzlingr yrkrpxpe.  
\v 7 Murde mzli kc enjrl krarlimz navxutr-ngrde trpu nede, drtwr Gct kx yc-kapq kc tqpipx-pnzbzle mz profet nedeng kcng tzwztrpzng bade, sa natutrpe.”   
\p
\v 8 X nide kc tqycmneom Heven, xlr-moux nate, rpimle bange kx, “Vz x rtrngztibz skrol kc tzkawxpx mz mq enjrl kc nanycde tqtuo kc prla x kzdq tqtuo mz drtc'.” \x + \xo 10:8 \xt Esikel 2:8—3:3\x*  
\v 9 X vzbo mz enjrl kc, sc tqrlxtipebo skrol kc topwz. Rpimle bange kx, “Twz x ngq. Sa naxngibzme mz naom nilwzde nzmrlz-krde apule hane. A' mzli kc navzope-ngrde mz nelzm, nelzm kc tqrlvqkrkxpe.”  
\v 10 Rtrngztibo skrol kc topwz mz mqde. Sc tqngqpex, x da zpwx, nzmrlzkr nilwzde mz naonge apule hane. A' mz nibr nzlwzo-krngele, nelznge kc tqrlvqkrkxpe.  
\v 11 Zbz sc tzrpipe-mop bange kx, “Napipx-mouq natq Gct lcng tqycmnetr-ngrde drtc', leplz, natq x king kang kqlu.”   
\c 11  
\s1 Profet Ne Gct Kcng Li  
\p
\v 1 Zbz, mz nibrde nzkam kc bange neni kxboi apule dapunc ngr nzanengr, x nzrpim bange kx, “Tulzm, x vz mz nzanengr Mangr-nzangiongr Yawe x olta ngrde, x rlwx leplz kcng tzangiopxmqng elr. \x + \xo 11:1 \xt Esikel 40:3; 42:20; Sekaraea 2:1-2\x*  
\v 2 A' yrlqtxpx nrlarde makoa kcng yz, bzkq aneqng, murde nzkapebz mz leplz kxtrnzrlxngitiung kcng narnzlvzolr Jerusalem, navz nakrlzbzle yiz tq x ncte kc. \x + \xo 11:2 \xt Luk 21:24\x*  
\v 3 Sa na-atwzlr-ngrbo profet nenge kcng li tzpxing lrpz ngr nzvzkr drtwr. X sa nayapwxtipxlr natq Gct mz nabz yiz tq x ncte kc.” \f + \fr 11:3 \ft  \+em 11:2\+em* Mz nzplzpxkr Jon zbq lcng, kzdu mzli pipxle yiz tq x ncte kc, kzdu mzli pipxle temz nzpnu-pwx-nrade-li (42), x kzdu mzli pipxle zbq kcng siu-esz'-trtqki-li-nzpnu-esz'mz (1,260). A' yro-txpwzkr ‘yiz tq x ncte kc,’ murde drtwr ngr mzli lcng tq kx namu-txpwzlr esz'. Mc kz Nzaelwapxngr 11:6, 12:6, 14, 13:5. \f*   
\p
\v 4 Profet lcng li nzapulr nounc olivi kcng li, x da li kcng nzwxbuo-ngrm lam, tqtutr mrkc tqlxlvrkipx Gct, Kxetu kc tqaclvele nrlc. \x + \xo 11:4 \xt Sekaraea 4:1-14\x*  
\v 5 Nzmu kzdq doa rpile na-atrkatile nidr, nyr sa navzpxm mz naodr mz nzodati-krde nide. X kxnamu-kzle lc nzbzkr doa kznike rpile na-atrkatile nidr.  
\v 6 X nzrngiscng zmatq ngr nzrpwa'-krbzlr mz bongavz nzdckr tewa, murde tewa ma tqdc mzli lc tzryapwxpx-ngrdr natq Gct, mz yiz lcng tq x ncte kc. X nzrngisc-kzng zmatq ngr nzale-krdr lue nzlrtipx-krdr mepyr, x zmatq ngr nzatrkati-krdr lr nrlc mz zyagox kznikeng nasuti drtwrdrle. \x + \xo 11:6 \xt 1 King 17:1; Nzrlaszngr 7:14-21; 1 Samwel 4:8; Luk 4:25; Jemes 5:17\x*   
\p
\v 7 Mzli kc tqyrkrpxpengr profet lcng nzyapwxti-krdr natq Gct, Mrlx Kc Tqdrka'ngr tqdwalzm mz gq kc trpnzngr noude, sa naotang badr. Sa na-aovxiole nidr x nanibqleng. \x + \xo 11:7 \xt Daniel 7:7, 21; Nzaelwapxngr 13:5-7; 17:8\x*  
\v 8 X namz ngrdr sa nayrbqtxng mz lrpzki kx nzvzkitr leplz kxkqlu mzteadau Jerusalem, mrkc tztqlvztrngr Kxetu rdr mz kros. Mzteadau lc nzycmne-ebzpxngr drtq ‘Sodom’ o ‘Ijipt,’ murde lr Jerusalem trnzlxngiti-kzlru profet ne Gct da kc tzwai lr Sodom x lr Ijipt trnzrlxngiti-krdru. \x + \xo 11:8 \xt Asaea 1:9-10\x*  
\v 9 Zbz leplz ngr nou, natq, neidu, x drtc' amrlx naobqlvzolr namz ngrdr, zbq natq x ncte kc. X trnarlrpx-ngrdru nzryrtzmqngr namz ngrdr.  
\v 10 X lr nrlc sa na-abrtz-zlwz-ngrdr nzxlr-krdr nzbzkr profet lcng nzling. X sa nartrngzbzng nzmungr x narka-etrng da, murde profet lcng nzling kc tzaetqbzlr drtq lr nrlc.   
\p
\v 11 Mz nibr nzyrbqtikr namz ngrdr zbq tq x ncte kc, Gct sa na-atulz-mople nidr mz nzbzngr mz nzvxutr-krbzle nzlu-krde badr. X kx namc leplz kxnzkqlung nztulz-mou-krmlr mz nzbz-krdr, namwxlr-zlwz-ngrdr. \x + \xo 11:11 \xt Esikel 37:5-14\x*  
\v 12 X mz nibrde, sa naxlrlz profet kcng nzling Heven kzdq natq kxetu, narpiomle kx, “Vzdzmamu mrka!” X mzli lcde, sa naobqlvzlzngr leplz kcng tzmwati drtwrdr nidr, nzvzdz-krdr Heven mz nabz dcbz. \x + \xo 11:12 \xt 2 King 2:11\x*  
\v 13 X mzli lcpwz, nengq kxetu sa navz-kzp mz nzodati-krde kzdq nctq Jerusalem x nabzng mz nengq lcde leplz siu-rlimz (7,000). X leplz kcng tzlu-txpwzng namwxlr-zlwzng x naglqlzlr Gct kc Heven.   
\p
\v 14 Nzayrplapxngr kxtrka-esz'ngr krali delc tqkapupxpe, a' se tqvz-nqblqpe-kzp nzayrplapxngr kxtrka-esz'ngr kratq.   
\s1 Trpu Krarlimz Drtwr Ngrde Nzaclve-angidrkr Gct Nrlc  
\p
\v 15 Zbz enjrl krarlimz kx vxutrle kc trpu nede, kzdung natq kxetung Heven nzrpilr kx, “Zmatq ngr nznginingr King mz nrlc ycbz mz Kxetu Gct rgu ncdr Kxnzmcpx nede. X Gct sa tqaclve mzli ka x nzaclve-krde tqyc tqyc!” \x + \xo 11:15 \xt Nzrlaszngr 15:18; Daniel 2:44; 7:14, 27; Asaea 9:7\x*  
\v 16 Zbz kxnzaclveng kcng nzpnu-li-nrade-pwx (24) tzwxbuong mz tron mrkc tqlxlvrkipx Gct, nzrtco-lzbqng mz drtc', x nzangiolr Gct.  
\v 17-18 Nzrpilr kx,  
\q1 “Kxetu rgr, Gct kc tqrninr,  
\q1 Kc tqmnc mzli ka,  
\q1 X tqmnc pnz. Awi-ngrbzkr bam,  
\q1 Nztwzpe-krm zmatq ngrm,  
\q1 X nipem King r nrlc ka.  
\q1 A' lr mrkzbleng ngyati  
\q1 Drtwrdr nimq murde  
\q1 Nzkaputr-krm mzli r nzayzlu-krbzme  
\q1 Da mz leplz kxnzbzpeng.  
\b  
\q1 “X mzli r nzrka-krbzme  
\q1 Da kxmrlz mz profet  
\q1 Kcng tzwztrpzng bam, badr leplz nemqng  
\q1 Amrlx kcng tzamrluelr nim,  
\q1 Kxmule-esz' kxnzetung o leplz txneng.  
\q1 X krlzpe-kzpzle mzlir  
\q1 Nzrmilxtxo-krm  
\q1 Krkcng tznibqtilr  
\q1 Leplz nemqng mz nrlc ka.” \x + \xo 11:17-18 \xt Sam 2:1-2; 110:5; 115:13\x*   
\p
\v 19 Zbz Mrkc Tqtr Mangr-nzangiongr Gct Heven nzlvxpx, x Bokis kc Tqyclz-ngrm Nzesz'tikr Drtwrdr Badr Leplz Nedeng, sc tzmcpe elr. Mzli lcde bzlrpc tqpctipx, bzlrmei tqyrputipx, nrlc ycngrlr atwrnrngr mz nengq, x muli-aes kxetuting tqvztiom apule tewa kxdc. \x + \xo 11:19 \xt Nzaelwapxngr 8:5; 16:18, 21\x*   
\c 12  
\s1 Olvz Kc Tqngi Israel X Doa Nede Kc Tqngi Mevalu  
\p
\v 1 Zbz kzdq rkx kxmatq prpxm mz bongavz. X mcx kc olvz kq lrpz kx apule nepi, x tuo-ngrmle temz x ngrlelvzle narde vri nzpnu-esz'-nrade-li (12) apule kraon ngr narde.  
\v 2 Olvz lc yr x tangqgx mz nzetqtikr drtqde nzrmika-krde.   
\p
\v 3 Zbz kzdq rkx kxmatq prpx-mop mz bongavz. Krlcde mepwz kxpc kxetu, narde rlimz, taplxsr kraon kxtopwzting, x scde dxpa' kxetu nzpnu-esz'. \x + \xo 12:3 \xt Daniel 7:7\x* \fig Mepwz kxpc, narde rlimz.|alt="144 dragon" src="144-dragon.tif" size="COL" loc="REV 12:3" copy="Birney Boyd." ref="12:3" \fig*  
\v 4 Mepwz lcde nqglqde iplro-ngrmle vri ngr bongavz kxnzkqlung mrka mz drtc'. X vzbz mz olvz kc, sc tqtu-pz'litrpebzle doa kc namikale, murde nangqde. \x + \xo 12:4 \xt Daniel 8:10\x*  
\v 5 Olvz kc rmika x nede doa ncblo. A' doa ne olvz kc trngqu Mepwz kc murde nzglqlz-rlrubz mz Gct mrkc tqwxbu-ngrde mz tron. Nide kc na-aclvele leplzng amrlx mz zmatq kx xplr-esz'ngr, \qt na-apule bz kc tqrniglc botol.\qt* \x + \xo 12:5 \xt Sam 2:9; Asaea 66:7\x*  
\v 6 X olvz kc sc tqdwatrpe lzke, me oliqtibz Gct mz nzmncpx-krmle elr mz yiz kcng tq x ncte kc. \x + \xo 12:6 \xt Nzaelwapxngr 11:2\x*   
\s1 Enjrl Nzaovxiolr Drka' Neng Setzn  
\p
\v 7 X vea kxetu kc tqprtzpe Heven, Narenjrl Maekol badr enjrl nedeng nzvecng badr Mepwz. X Mepwz badr enjrl nedeng nzotang badr. \x + \xo 12:7 \xt Daniel 10:13, 21; 12:1; Jud 9\x*  
\v 8-9 Mepwz kxetu kc tqngi kz ningidoe ngr nrlanc kc bqnc, tzrpi-kzpz ‘Nar Drka'’ x ‘Setzn.’ Nide enqmi r leplz murde tqpibqle leplz x tqesabrtile leplz ngr nrlc atwrnrngr. Nzvecng x Mepwz badr enjrl nedeng sc tzaovxiopeng Maekol badr enjrl nedeng. X trnzrlrpe-ngrpwzu nzmnc-krdr mou Heven. Nzrtcmipxngr enjrl nedeng Heven x nztaomqng mz nrlc, mz nzngini-krdr drka'. \x + \xo 12:8-9 \xt Nou 3:1; Luk 10:18\x*   
\p
\v 10-12 Mz nibrde, xlrx kc natq kxetu Heven, rpile kx, \x + \xo 12:10-12 \xt Job 1:9-11; Sekaraea 3:1\x*  
\q1 “Gct rgu sa na-arlapxle  
\q1 Leplz nedeng mzli ka.  
\q1 Sa natwzpele zmatq ngrde,  
\q1 X nangipe King mz nrlc.  
\q1 Kxnzmcpx nede twzpele zmatq ngrde,  
\q1 X Setzn kc tqpibqtitr-  
\q1 Zvzbzle kztegung  
\q1 Mz mz Gct rgu,  
\q1 Nzrtcpxpengr Heven.  
\b  
\q1 “A' kztegung nzaovxiopelr  
\q1 Nide mz zmatq ngr mepyr  
\q1 Ngr Nei Sip. X nimu lr Heven  
\q1 Na-abrtz-zlwzamu.  
\q1 A' nimu lr nrlc ka  
\q1 Na-aclvetioamu.  
\q1 Nar Drka' vzopebz bamu.  
\q1 Drtwrde ngya zlwz murde nzmnc-krde  
\q1 Mrla mzli trnaboiu.”   
\s1 Mepwz Nzotang Badr Olvz Kc X Doa Nedeng Amrlx  
\p
\v 13 Kx glxpe Mepwz kc nzrtco-ngrm nide mz nrlc, sc tqmaneutinepele lxede doa kc.  
\v 14 A' olvz kc lvctr-ngrde mrnyzde mrkc lzke nabx lr kxetu li kx nzkabz bade. X namncpx-ngrmle mrkc nakrlzbzle yiz kxtq x ncte kcng, murde namnc-rlrubz mz Mepwz kc. \x + \xo 12:14 \xt Daniel 7:25; 12:7\x* \fig Lr kc tqlvcpe.|alt="147 eagle" src="147-Nab076.tif" size="COL" loc="REV 12:14" copy="SIL" ref="12:14" \fig*  
\v 15 Zbz Mepwz kc sc tqbyape-ngrbzle lue kxkqlu mz nibr olvz kc, murde natwz nubla ngrde x trpnzngr nzrlapx-krde.  
\v 16 A' drtc' okatrle olvz kc. Amzpxle naode x mnqle nubla ngr lue kc tqbyapxngr Mepwz kc yrkrtxo.  
\v 17 Zbz Mepwz kc sc tqngyatipe drtwrde olvz kc, x sc tqvzpe mz nzvec-krdr badr kzdung kz doa nedeng, kcng tzvz-nqblqlr Loukxtr sc Gct, x tzlxngitilr natq angidr kcng tqpipx Jiszs.   
\c 13  
\s1 Mrlx Kc Tqdrka'ngr Kc Kai Tqngi Enqmi Kc Etu Ngr Kraes  
\p
\v 1 Zbz obq-rmwible-moux, x Mepwz sc tqtupe mepz prla tqaenzlipxpe. X mcx Mrlx Kc Tqdrka'ngr kx vzdzm prla. X nzyrtr-lxblrng mz narde rlimz drtq kx bletipx-lxblrng kx nzxtrnga-ngrdr Gct. X scde dxpa' nzpnu-esz', taplxsr kraon kxtopwz. \x + \xo 13:1 \xt Daniel 7:3-25; 11:6\x*  
\v 2 Mrlx Kc Tqdrka'ngr tqmcx apule trputi kzpeto kxetu. Drkrvi ngr nanycde boi x malc apule drkrvi ngr nanyc kzdq kz animol kzpeto. X nzxplrkr naode apule nao laion x nqngide malc. X rngisc zxplr, kraon x zmatq kx aprcbz Mepwz bade.  
\v 3 Opxm kx kzdq nar Mrlx Kc Tqdrka'ngr lcde nzataki pnz x ycpwz pipz nzbz-krde. A' mztitrpe x bzmrde sc tqyctxtr alo. Kx nzmclr Mrlx Kc Tqdrka'ngr, lr nrlc amrlx nzkctitxpxlr x sc tzvz-nqblqpelr natqde.  
\v 4 X nzangio-kzlr Mrlx Kc Tqdrka'ngr, mz nzrpi-krdr kx, “Trpnzngr kx rtakitr nzxplrkr Mrlx Kc Tqdrka'ngr. X trpnzngr kx yatrpz mz nzota-krdr ncdr murde na-aovxiole nide.” X nzangio-kzlr Mepwz murde nzaprc-krbzle zmatq mz Mrlx Kc Tqdrka'ngr.  
\v 5 Mrlx Kc Tqdrka'ngr napivxitiole Gct mz nzglqpx-lzbq-krde mz nzycmne-krde. A' zmatq lc nzrlrtx-ngrpwzlrle bade yiz tq x ncte kc.  
\v 6 Sc tqpibqtipele x tqlcbqtipele Gct, drtqde, me mnc-ngrde x lr Heven amrlx.  
\v 7 Nzrlr-ngrbz bade nzota-krdr badr leplz neng Gct x na-aovxioleng. X kxnzvzpxmqng mz nou, natq, neidu, x drtc' amrlx nzmnclzbzng mz zmatq ngrde.  
\v 8 Leplz mz nrlc tulvzo sa na-angiolr Mrlx Lc Tqdrka'ngr, krkcng drtqdr trnzyrou mz Buk ngr Nzlungr sc Nei Sip kc tznibq. A' kxnzrlxngiting kcng drtqdr tzyro elr abzo mzli kc tqwzngr Gct nrlc, trtxpnzngr Mrlx Lc Tqdrka'ngr. \x + \xo 13:8 \xt Sam 69:28\x* \f + \fr 13:8 \ft Setzn mncpx-ngrmle Mrlx Kc Tqdrka'ngr Kc Kai. \f*   
\p
\v 9 Abzamu nzyrlq-angidr-krmu natq lcng navzm.  
\v 10 doa kx pnzpe drtwr Gct napresin, sa napresin. X kx pnzpe drtwr Gct nanibq mz toki r vea, sa nanibq mz toki r vea. Mz nzmu-krde lcde, mzli kc naprtz-ngrbz da lcng bamu, tu-amqngiamu mz nzrlxngiti-krmu x abrtrpzmu drtwrmu mz Gct. \x + \xo 13:10 \xt Jeremaea 15:1; 43:11\x*   
\s1 Mrlx Kc Tqdrka'ngr Krali Tqngi Profet Kxpokia  
\p
\v 11 Zbz mc-moux kzdq kz Mrlx Kxdrka'ngr kx vzdzm mz drtc'. Dxpa' krde li kxtopwz apule dxpa' kr Nei Sip, a' nzycmne-krde xplr apule nzycmnekr mepwz.  
\v 12 Mrlx Kc Tqdrka'ngr lc tutrpz mz krkc kai x zmatq ngrde apupwzle zmatq ngr krkc kai. X rtulrtr-ngrbzle mz lr nrlc amrlx nzangio-krdr Mrlx Kc Tqdrka'ngr kc kai tqyctrngr bzmr kxsqki.  
\v 13 Mrlx Lc Tqdrka'ngr krali, na-aletile rkx kxkqlu. Krlzle nzavzo-ngrm nyr bongavz mzli kc tzobqngr leplz kxkqlu.  
\v 14 Nzrlr-ngrbz mz Mrlx Kc Tqdrka'ngr krali nzaletr-krbzle rkx mz mz Mrlx Kc Tqdrka'ngr kc kai. X mz nzale-krde rkx lcng, esabrti-ngrde leplz kxkqlu mz nrlc. Krkc Krali pibzle badr nzrlz-krdr mqngr Krkc Kai tzataki mz toki r vea a' sc tqlupe mou, murde leplz na-angiolr nide mz mqngr kxnzlz lc.  
\v 15 X nzrlr-ngrbz mz Mrlx Kc Tqdrka'ngr krali nzvxutr-krbzle mz nao mqngr Mrlx Kc Tqdrka'ngr kc kai tzlzlr, murde naycmne, x nanibqtile leplz kcng trnzangiolru nide.  
\v 16 Mrlx Kc Tqdrka'ngr krali rtulrtr-ngrbzle mz leplz txneng, kxnzetung, bcnyrng, nra-nzlung, kxnzawz-nrbalqng x kx drtqdr opx nzyctrkr rkx mz mqdr kxrtc o mz rtrlrmztr.  
\v 17 Trpnzngr kx naxpe x na-amwa da, kx tr-rtwzkale rkx lc tqngi drtq Mrlx Kc Tqdrka'ngr kc kai o nabz kx ngi rkx ngr drtqde.  
\v 18 X nabz lcde trtqki-esz'mz-nzpnu-esz'mz-nrade-esz'mz (666). Doa kx drtwrde aotr-angidrbzle mz nabz lc, nide kx narmc drtwr ngr nabz sc Mrlx Lc Tqdrka'ngr, murde ngi nabz sc kzdq ncblo. Drtwrmu na-aotr-angidrbzmu mz da lcng murde naglx-angidramu nide mzli kc navzm.   
\c 14  
\s1 Kxnzrlapxpeng Sc Tzngrpe-ngrdr Kc Nabz Kxmrna.  
\p
\v 1 Mz nibrde, obq-rmwible-moux, x mcx Nei Sip kc nztuo-krmle mz Newz Saeon kxmqngi, nidr badr kxnzrlapxpeng kcng siu-trtqki-esz'-nzpnu-pwx-nrade-pwx (144,000). X drtq Nei Sip x drtq Trtede nzyrtr-pnzbz mz rtrlrmztr. \x + \xo 14:1 \xt Esikel 9:4\x*  
\v 2 X xlrx kc nzngrngr Heven, nate etu-esz'ngr apule nzyrpukr nrc x bzlrmei. X nzngrngr lcde tqxlrx nzyrlvi-krde apu-kzle nzyrnikr nqvi r gita kxkqlu.  
\v 3 Leplz kcng siu-trtqki-esz'-nzpnu-pwx-nrade-pwx (144,000) nzngr-ngrdr kc nabz kxmrna mrkc tqlxlvrkipx Gct, badr kxnzlung kcng pwx, x kxnzaclveng kcng nzpnu-li-nrade-pwx (24). Nabz lc tzngr-ngrdr trpnz-moungr kx ryatitr nzrngrngr, a' ngi txpwz krkcng tzxpetrpeng mz lr nrlc.  
\v 4 Trnzvz-nqblqlru nqmq kr lr nrlc, a' nidr leplz kx nzalqti-lzbqng mz nzapu-krdr ncblo o olvz kxnzmnc-kamelr. X nzvz-nqblq-zvzlr Nei Sip drlve ke vzkile. Leplz lcng xpetrpeng Gct mz lr nrlc, murde nayrlqpx-bekang mz nzwztr-krbzlr mz Gct x Nei Sip, da kc tqwai nzyrlqpx-beka-ngrbz mz Gct x Nei Sip nra nounc kcng ayrnrngr.  
\v 5 Trnzpokiaung x nqmq krdr tubqbz mz nzobqkr Gct. \x + \xo 14:5 \xt Szfznaea 3:13\x*   
\s1 Nrpa Kxmrlz Tqycpe Tqycpe  
\p
\v 6 Zbz mcx kc enjrl kx lvc mrkc wq mzlilxlr, x rlem nrpa kxmrlz kc tqycpe, tqycpe mz lr nrlc, x mz nou, natq, neidu, x drtc' amrlx. Nrpa lc nrpa ngr nzaclve-angidrkr Gct.  
\v 7 X rpibzle mz nate kxetu mz leplz amrlx kx, “Amrlueamu Gct x glqpxamu nide, murde mzli r nzayzlu-krbzle da mz leplz dekape. Mzli lc sa nakabzle da kxmrlzting mz leplz kcng tztubq-esz'ngrng x sa na-ayrplapxle leplz kcng tzpxtxpx-ngrdr nzyrlq-angidr-krdr natqde. Mz nzmu-krde lcde, na-angioamu Gct kc tqwz-ngrde bongavz, drtc', prla, x aulzng.”   
\p
\v 8 Zbz mc-moux kc enjrl krali lvc-nqblqmle enjrl kc kai, x rpile kx, “Taon kc etu, apule Bxbilon kc bqnc, kc tqrngisc zmatq kx xplr, tzmilxtxo. Nzmnckr lr Bxbilon trka. X nzangio-krdr drka' apule nzabeati-krdr nzrmwimingr, murde trnzngida-zpwxung mz nzangio-krdr Gct angidr. Leplz mz nrlc tulvzo nzaxvctr-lzbqbzng mz alwx ngrdr x opxm kx alukurnr-ngrng waen. Mz nzmu-krde lcde, Gct sa na-ayrplapxle leplz lcng amrlx.” \x + \xo 14:8 \xt Asaea 21:9; Jeremaea 51:8\x*   
\p
\v 9-10 X mc-moux kc enjrl kratq lvcm mz nibr krkcng nzling. X etumi nate nzrpi-krde kx, “Doa kx angiole Mrlx Kc Tqdrka'ngr kc kai x mqngrde kc tzlz x nzyrtr-kzpz mz rtrlrmzte o mz mqde kxrtc rkx ngrde, sa na-ayrplapx Gct mz nztutr-krbzlr mz Nei Sip badr enjrl kxnzmatqng. Zngya ngr drtwrde sa naxplr-esz'ngr mz nzayrplapx-krde leplz lcng. Sa na-aetqti-zlwzbzle drtqdr x sa naodati-atwrnr-ngrng mz nyr kxpq-esz'ngr ngr rplz salfz kxngc. \x + \xo 14:9-10 \xt Nou 19:24; Matiu 5:22; 8:12; 10:28; 13:42, 50; 18:9; 22:13; 24:51; 25:30; Mak 9:47-48; Luk 13:28; 16:24; Jud 7; Nzaelwapxngr 9:17; 19:20; 20:10; 21:8\x*  
\v 11 Trpnzngr nzyrkrpxkr nzetqkr drtqdr, krkcng tzangiolr Mrlx Kc Tqdrka'ngr x mqngrde kc tzlz, x tztwzlr rkx ngr drtqde. Nzetqkr drtqdr vztx alo, ngrlx x mz nrlckxbq, murde zsikapu ngr nzngckr nrkrdrtqdr tqvzpe tqvzpe.” \x + \xo 14:11 \xt Asaea 34:8-10\x*  
\v 12 Drtwr ngrde kx nimu leplz neng Gct, kcng tzyrlq-angidrlr natqde x tzvz-nqblq-zvzlr Jiszs, na-abrtrpzmu drtwrmu bade mz nzaenzli-krmu, murde sa na-ale Gct nike pipxle.   
\p
\v 13 Mz nibrde, xlr-moux kc natq Heven, rpimle bange kx, “Yro natq lcng. Abzope mzli ka, sa namrlzbz mz leplz kcng tznibqting murde nzlxngitilr Kxetu rgu.” Rpi Mqngrkxtr kx, “Eu, da angidrtx! Murde nzetqkr drtqdr kx vzpxm mz nzwztr-krbzlr mz Kraes sa nayrkrpxpe, x Gct sa narkabz badr nzmnc-zpwxngr x da kxmrlzting mz nzwztr-krbzlr bade, kxmule-esz' nike prtzbz badr.”   
\s1 Nzayrlwr-lxblrngr Lr Nrlc Apule Nzrkqtrngr Nra Nounc  
\p
\v 14 Mz nibrde, obq-rmwible-moux, x mcx kc dcbz kxprki. X mz dcbz lcde, wxbuom kc ncblo elr apule Jiszs, Mrlx Leplz. Laom mz narde kc kraon kx ngi gol x malele kc toki kxka x malc. \x + \xo 14:14 \xt Daniel 7:13\x*  
\v 15 Zbz, mcx kc enjrl vzpxm Mangr-nzangiongr, x mz nate kxetu rpibzle mz ncblo kc tqwxbuom mz dcbz kx, “Mzli ka mzli r nzayrlwr-lxblrpengr leplz kxnzmrlzng ngr nrlc, da kc tqwai nzrkqtrngr nra nounc kxnzmrlz mz toki mzli kc nabrpe-ngrdr. Mz nzmu-krde lcde, ayrlwr lxblr leplz kxnztubqng ngr nrlc.” \x + \xo 14:15 \xt Joel 3:13; Matiu 13:30, 39-43\x*  
\v 16 Zbz mrlx kc tqwxbuom mz dcbz yrlqbzle toki kxka scde mz nrlc, x leplz kxnztubqng amrlx nzyrlwrtr-lxblr-pnzng.   
\p
\v 17 Zbz, mc-moux kzdq kz enjrl kc tqvzpxm Mangr-nzangiongr Heven. Enjrl lc male-kzle kc toki kxka kxmalc. \fig Enjrl lc malele kc toki kxka kxmalc.|alt="145 curved sharp knife - sickle" src="145-sickle01.tif" size="COL" loc="REV 14:17" copy="SIL-PNG" ref="14:17" \fig*  
\v 18 X enjrl kc tqaclvele nyr ngr olta vzpxm mz olta. Rpibzle mz enjrl kc tqrmale toki kxka kxmalc kx, “Mzli ka mzli r nzayrlwr-lxblrpengr leplz ngr nrlc tulvzo kcng tzaleng alwx, da kc tqwai nzrkqtrngr nra grep mz toki mz mzli r nzrnzbrtiongr.”  
\v 19 Murde leplz kcng tzaleng alwx nzapulr nra grep. X enjrl kc tqayrlwr-lxblrle leplz lcng, apule ncblo kc tqrlakipx nra grep mz toki scde. X leplz lcng sc tzayrplapx-zlwzpeng mz zngya ngr drtwr Gct kc tqtubq-esz'ngr, apule nzrtcongr nra grep mz da kxetu kx narnzbrtio-ngrdr mz nzwz-krdrleng murde nangi lue.  
\v 20 Mzli kc tzrnzbrtiongr nra grep, lue lr nra grep kxpc yrlepx zlwz. X mz nqmq lcpwz, Gct sa na-ayrplapxle leplz ngr nrlc kcng tzaleng alwx. Sa na-apule kx rnzbrtiole nidr, x mepyr ngrdr kxpc nayrlepx kz na-apule nzyrlepxkr lue lr nra grep. X me nakrlzbz nubla ngr mepyr ngrdr takitr kilomita kx trtqki-tq (300) x nzboo-krde krlzmle nabx ncblo, murde nzayrplapxkr Gct kxnzaleng alwx sa naetu-esz'ngr. \x + \xo 14:20 \xt Asaea 63:3; Nzyrningr 1:15\x* \f + \fr 14:20 \ft Nzboikr nubla ngr mepyr lc apule mrka Santz Krus krlzbzle Santz Ana o Santa Krus krlzbzle Tikopia. \f* \fig Mzli kc tzrnzbrtiongr nra grep, lue lrde kxpc yrlepx zlwz.|alt="146 winepress" src="146-G085.tif" size="COL" loc="REV 14:20" copy="SIL-PNG" ref="14:20" \fig*   
\c 15  
\s1 Nzayrplapxngr Kxnzrmnr-ngrbzng Kcng Rlimz Tzoliqting Heven  
\p
\v 1 Mz nibrde, mc-moux rkx kxmatq mz bongavz x kctipx-zlwzx. Enjrl nzrlimzng nzkabz badr nzayrplapxngr rlimz. kxnzrmnr-ngrbzng. Murde mzli kc nayrkrpx-ngrbz nzayrplapxngr lcng, zngya ngr drtwr Gct kc tqyrkrpxpe-kzpz.  
\v 2 X mc-kzx prla kx apule dzpq kx rlxlvzmi nyr. X leplz kcng tzaovxiolr Mrlx Kc Tqdrka'ngr, murde trnzangiolru mqngrde kxnzlz x nzpx-ngrdr nzrtwz-krdr rkx ngr drtqde. Nztu-aepztrng mz prla lc x nzrmale-lxblrng gita kx kabz Gct badr.  
\v 3-4 X nzngr-ngrdr nabz ngr nzmyalz-esz'ngrkr Gct mz nzarlapx-kai-krde leplz nedeng mz kxnzawz nede Mosis, x mz Nei Sip kc ate. \x + \xo 15:3-4 \xt Nzrlaszngr 15:1\x* Nzrpilr kx,  
\q1 “Yawe, Gct kc tqrninr,  
\q1 King abzo mzli kc bqnc  
\q1 Krlzmle mzli ka, nzwz-krmqng myapx-  
\q1 Esz'ngr x kctipxkrng.  
\q1 Nqmq krmqng da angidr,  
\q1 X tubq-esz'ngr.  
\q1 Leplz nzamrluelr nim.  
\q1 X trpnzngr kx napxtxpx-ngrde  
\q1 Nzglqlz-krde nqmq krm.  
\b  
\q1 “Nim txpwz kxtr-esz'ngr,  
\q1 X nzamrluelr nim.  
\q1 Trpnzngr leplz kx napxtxpx-ngrde  
\q1 Nzglqlz-krde nqmq krm.  
\q1 Murde nqmq krmqng kxtubq,  
\q1 Lr nrlc amrlx sa navzmqng  
\q1 Mz nzangio-krdr nim.  
\q1 Murde aelwapxpe-ngrn nqmq krmqng kxtubq,  
\q1 Tubq-esz'ngr, eu.” \x + \xo 15:3-4 \xt Jeremaea 10:7; Sam 86:9\x*   
\p
\v 5 Mz nibr nzngr-krdr, obqlzbo x mcx Mrkc Tqtr-esz'ngr mz nabz Tentkxtr nzlvxpxpe Heven. \x + \xo 15:5 \xt Nzrlaszngr 38:21; 40:1-33; Aposol 7:44; Hibru 8:5\x*  
\v 6 X nzvzpxmqng elr enjrl kcng rlimz tzrka-nebang nzayrplapxngr kcng rlimz. Enjrl lcng nzkqng amrlx ngrdr nzkq kxprkitxpx, x nzlunyao-ngrdr kc da kx apule gol.  
\v 7 Zbz kzdq kxnzlung kcng pwx twzbzle baol rlimz kx ngi gol ataplxsr-ngrde enjrl kcng rlimz. X Gct kc tqlu zvz, sa nalva-puliole mz nrlc zngya ngr drtwrde na-apule baol lcng nayrbu-lxblrng mz nzayrplapx-krdeng.  
\v 8 Mrkc Tqtr lvabqtx atwrnrngr zsikapu kx vzpxm mz zluli x zmatq ngr Gct. X trtxpnzngr kx navztr Mrkc Tqtr, navz navz nakrlz-zpwxbzle nzyrkrpx-krbz nzayrplapxkr Gct lcng rlimz tztwzm enjrl lcng rlimz. \x + \xo 15:8 \xt Nzrlaszngr 40:34; 1 King 8:10-11; 2 Be Ngrdr 5:13-14; Asaea 6:4\x*   
\c 16  
\s1 Nzayrplapxngr Kcng Rlimz Narmnr-ngrbzng  
\p
\v 1 Zbz xlrx kc natq Gct kx xplr Mrkc Tqtr, rpibzle mz enjrl kcng rlimz kx, “Vzamu, x odati-atwrnr-ngrnamu dalr nrlc mz zngya ngr drtwrnge, na-apule baol ngr lue kxpq kc tzpulilvztiongr da, x blo atwrnrngr.”   
\s1 Baol Kc Kai Drtwr Ngrde Kxsqki Kxtrka  
\p
\v 2 Enjrl kc kai vz x puliole baol scde mz nrlc. X kxsqki kxtrka apule naasake x nranrpqdo dwatibzle leplz kcng tztwzlr rkx ngr Mrlx Kc Tqdrka'ngr, nzangiolr mqngrde. \x + \xo 16:2 \xt Nzrlaszngr 9:9-11\x*   
\s1 Baol Krali Drtwr Ngrde Nzatrkatingr Prla  
\p
\v 3 Zbz enjrl krali puliole baol scde prla. X prla yrnclvz apule mepyr ngr ncblo kxbz. X dalr prla amrlx nzbzting. \x + \xo 16:3 \xt Nzrlaszngr 7:17-21\x*   
\s1 Baol Kratq Drtwr Ngrde Nzatrkatingr Lue  
\p
\v 4 Zbz enjrl kratq puliole baol scde mz lue x aulzng, x lue amrlx nzlrtipxlr mepyr. \x + \xo 16:4 \xt Sam 78:44\x*  
\v 5 X xlrx enjrl kc tqaclvele lue amrlx, rpibzle mz Gct kx, “Gct, nim txpwz kxtr-esz'ngr, mncq mzli ka x mnc-zvzq mzli kc. X nzayrplapx-krm lcng tqtubq-esz'ngr.  
\v 6 Murde leplz lcng tznibqtilr profet x leplz kxnztr nemqng mz nzayrle-krdr mepyr ngrdr. Mz nzmu-krde lcde, ayzlu-mou-ngrbzme badr mz nzlrtipx-krme lue pqdr mepyr x rka txpwzme mqdr mepyr. X me tubqki nzxpengr nidr delape.”  
\v 7 Zbz xlr-moux natq leplz kcng tznibqti vzpxm mz olta, nzrpilr kx, “Kxetu rgr, nim Gct kc tqrninr. Awitxpe mz nzayrplapx-krm krkcng tznibqtilr nigr! Murde drtwr kcng tqyrlqpeq rsakrlrngr x tubq zvz.” \x + \xo 16:7 \xt Sam 19:9; Nzaelwapxngr 6:9-10; 19:2\x*   
\s1 Baol Krapwx Drtwr Ngrde Nzpqkr Nzulr Nepi  
\p
\v 8 Zbz, enjrl krapwx twzle baol scde x pulilvzle nepi murde nzulr lr nepi na-apqle ncblo, x nrkrdrtqdr nabxuting.  
\v 9 X mzli kc tzbxuti-ngrdr mz nzulr nepi, nzpibqtilr Gct kc tqatwzlr-ngrm nzayrplapxngr lcng. A' nzpxtxpx-ngrdr nztekqtr-krdr nqmq nr drtwrdr murde naglqpxlr nide.   
\s1 Baol Kranzlvqn Drtwr Ngrde Mrnyz Mrlx Kc Tqdrka'ngr Kc Kai Wx-nzlotx Atwrnrngr  
\p
\v 10 Zbz enjrl kranzlvqn twzle baol scde x puliobzle mz tron nyz Mrlx Kc Tqdrka'ngr kc kai. X mztea amrlx kcng tqaclve Mrlx Kc Tqdrka'ngr wx-nzlotx atwrnrngr. X leplz ngr mztea lcdeng tzmakitilr nalzpqdr murde nzetq-zlwzkr drtqdr etunepxpe mou. \x + \xo 16:10 \xt Nzrlaszngr 10:21-22\x*  
\v 11 X sc tzpibqti-zlwzpelr Gct kc Heven mz nzetqkr drtqdr x kxsqki rdr, a' nzpxtxpx-ngrdr nzesakingr nzalengr alwx.   
\s1 Baol Kraesz'mz Drtwr Ngrde Nzpzkr Lue Yufretis  
\p
\v 12 Zbz enjrl kraesz'mz puliole baol scde mz Lue Yufretis, x lue lc etu pzlz-pnzm, murde narlr-ngrbz mz king r me prkilzm nepi nzkawimio-krmleng ami nedrng. \x + \xo 16:12 \xt Asaea 11:15-16; Josua 3:13-17\x*  
\v 13 X mcx drka' kxnztrkang nztqng, nzapulr teblika. Dwapxm kc mz nao Mepwz, dwapxm kc mz nao Mrlx Kc Tqdrka'ngr kc kai, x dwapxm kc mz nao Profet Kc Tqpokia, (kc tqngi kz Mrlx Kc Tqdrka'ngr krali).  
\v 14-16 Drka' lcng nztqng nztrka-zlwzng, x nzrngiscng zmatq ngr nzalrtingr da. Sc tzayrlwr-lxblr-ngrdr king amrlx ngr nrlc me esz', drtqde ‘Newz Magedon,’ mz nzngini-krdr ami kxesz' kxetu. Mz Mzli Kxmatq lc, Gct kc tqrninr sa naotang badr Mepwz, Mrlx Kc Tqdrka'ngr, x Profet Kc Tqpokia badr ami nedr. \x + \xo 16:14-16 \xt 2 King 23:29; Sekaraea 12:11; Matiu 24:43-44\x*  
\p X mz nzycmnekr Jiszs mz nzyzlu-krmle, rpile kx,  
\pm “Ninge la nayzlu-mopwc' mz nrlc. X nzvz-krmc na-apule nzvz-krm ncblo kx pna da kx trnzoliqtiu. A' sa namrlzbz mz doa kx oliqtile nzvz-krmc, na-apule ncblo kx obq zvz x yrlqbzle lrpzde mz nzaenzli-krde nzvz-krm kztede. Nzmu naoliqtiq mzli kc navz-ngrmc, drtqm trnamyatrpwzu mz mz leplz, mz nzapu-krm ncblo kxycblq mz nzvzne-krde.”   
\s1 Baol Krarlimz Drtwr Ngrde Nzodatingr Da Kxkqlu  
\p
\v 17 Zbz enjrl krarlimz puliole baol scde mzlilxlr. X natq Gct vzpxm mz tron kc Mangr-nzangiongr, etumi nate nzrpi-krde kx, “Kapupxpe!”  
\v 18 X mzli lc bzlrpc tqpctipx x bzlrmei tqyrputipx x nengq kxetu-esz'ngr aycngrlrle nrlc atwrnrngr. Krlc nengq kx myatxpxpebz. Trgalr nengq kxetu kxmule lc abzo mzli kc tzwzngr ncblo, krlzmle mzli ka.   
\p
\v 19 A' Gct trmrbrtru mz drtwrde alwx ngr leplz ngr taon kc etu tqapule Bxbilon kc bqnc. X ayrplapx-zlwzle nidr mz nzxplrkr zngya ngr drtwrde. Mz nzmu-krde lcde, taon kc etu glqwitxpx ncte tq, x taon mz nrlc tulvzo nzodating amrlx. \x + \xo 16:19 \xt Asaea 51:17\x*  
\v 20 X mzli lcpwz trmctung x newzng amrlx nzmrbrlzmqng mz nengq kc etu.  
\v 21 X muli-aes kx etuting kz rlxom mz bongavz nztabqlr leplz. Nzmrlepu-lxblrkr ncte kxesz' takitr kilo kx nzpnu-nzlvqn (50). A' leplz sc tzpibqti-zlwzlr Gct mz nzrlxo-krm muli-aes, murde nzayrplapx-krde trka-zlwzbz badr. \x + \xo 16:21 \xt Nzrlaszngr 9:23\x*   
\c 17  
\s1 Nzycmne-ebzpxngr Srlx Kc Drtwr Ngrde Taon Kc Etu Rom  
\p
\v 1 Mz nibrde, kzdq enjrl kcng rlimz tzrngiscng baol kcng rlimz, vzm bange x rpimle kx, “Navzki, murde na-aelwa-ngrbo bam nzayrplapxkr Gct taon kc etu tqapule Bxbilon kc bqnc. Taon lc tqyc mz mzlir lue kxkqlu. X lr taon lcng nzprszpxlr Yawe Gct angidr mz nzangio-krdr kx trngiu Gct angidr. Nzapulr olvz kxyrlz kc tqprszpxle ncblo ngrde angidr mz nzrmwimi-abeane-krde ncblo kzbleng. \x + \xo 17:1 \xt Jeremaea 51:13\x*  
\v 2 X king amrlx mz nrlc nzaxvctr-lzbqbzng mz alwx ngr nzrprszpxngr Gct angidr. X leplz amrlx ngr nrlc nzpxtxpx-kz-ngrdr Gct. Opxm kx nzalukurnrngr nzrmnqngr, mz nzaxvctr-lzbq-krbzlr kz badr king rdr.” \x + \xo 17:2 \xt Asaea 23:17; Jeremaea 51:7\x*   
\p
\v 3 Zbz mz zmatq ngr Mqngrkxtr, enjrl lc sc tqvzmitrpele ninge lzke. Mcx mrlcde olvz kc tqngi srlx, krlc taon kc etu tqapule Bxbilon. Olvz lc wxbuom mz Mrlx Kc Tqdrka'ngr kc kai, tqpctx, x narde rlimz, x dxpa' krde nzpnu-esz'. X nrkrdrtqde nzyr-ngaleti drtq kx nzrnzlvzongr Gct.  
\v 4 X olvz lcde kq nzkq kxlqlwx x kala ngrde prpol x pc. X rlu kz da kx nzwzngr mz gol, prl x rplz kxlqlwxng. X malele kc kap kx nzwzngr mz gol, kx yrbulzm mz waen kxngangr x kxblqki kx vzpxm mz nzrtrngz-abeane-krde da kx myangr drtq mz nzangio-krde drka'. \x + \xo 17:4 \xt Jeremaea 51:7\x*  
\v 5 X mz rtrlrmzte kz nzyrtr elr drtq kx drtwr ngrde yc kapq, rpile kx,  
\b  
\pc \sc Bxbilon kc etu,\sc*  
\pc \sc lxede srlx amrlx,\sc*  
\pc \sc x nou da kxdrka'ngr\sc*  
\pc \sc x da kxmyangr drtq amrlx mz nrlc\sc*.   
\b  
\p
\v 6 X mcx kx olvz lcde abrtz-zlwz-ngrde nzrnibqti-krde leplz kxnztr neng Gct, kcng tznibqti-ngrdr murde nzrpipx-krdr Nrpa ngr Jiszs. Opxm kx olvz lc alukurnrngr nzrmnq-krde mepyr ngrdr. Kx mcx olvz lc pwrkilvctx-ngrne.   
\s1 Drtwr Ngr Srlx Kc Tqngi Rom X Mrlx Kc Tqdrka'ngr Kc Kai  
\p
\v 7 Zbz sc tqrpipem enjrl kc bange kx, “?Nike tqpwrkilvc-ngrn olvz lc? Olvz lc x Mrlx Kc Tqdrka'ngr tqvone-ngrde nzapulr nzycmne-ebzpxngr. X sa nayokaetipxbo bam drtwr ngrde.  
\v 8 Mrlx Kc Tqdrka'ngr tqmcq, lu mzli kc kai, a' trlupeu mzli ka, x mzli trnaboiu sa navzdzm mz gq kc trpnzngr noude. X sa nao-zlile lrpzki kx vztr mz nzodatingr nide. Lr nrlc kcng drtqdr tryclzpuu mz Buk ngr Nzlungr, yzuo pnz mzli kc Gct tqwz-ngrde nrlc, sa nakctipxlr Mrlx Kc Tqdrka'ngr tqlu mzli kc kai a' trlupeu mzli ka mz nzyzlu-kr-mople. Murde mz drtwrdr krlc ngi rkx kxmatq.” \x + \xo 17:8 \xt Daniel 7:7; Sam 69:8; 2 Tesalonika 2:3\x*   
\p
\v 9 X rpi-mop enjrl kc bange kx, “Drtwrm na-aotr-angidrbzme mz da kcng napibo bam mz nzkrlz-krmleng mzli kc naprtz-ngrdr. Mrlx Kc Tqdrka'ngr narde rlimz. Narde lcng drtwr ngrdr newz nzrlimzng, newz ngr taon kc etu mrkc tqmncngr srlx kc.  
\v 10 X nar kcng rlimz drtwr ngrdr kz king rlimz kx na-aclvelr taon nyzde lc etu. King lcng nzlvqn nzaclvepeng, x king kraesz'mz kc tqaclvele mzli ka. Zbz krarlimz sa na-aclve-kzle taon kc etu kalr. X mzli kc navz-ngrmle, namncti-txpwzle mzli namrbcnepwz.  
\v 11 Kzdq king mz king lcng rlimz na-aclve mou. Sa nanginide king krartqmz. Krlc Mrlx Kc Tqdrka'ngr tqlu mzli kc kai, a' mzli ka trlupeu. X nao-zlile lrpzki kx vztr mz nzodatingr nide.   
\p
\v 12 “Dxpa' lcng nzpnu-esz', drtwr ngrdr king r mrkzbleng nzpnu-esz' kx trnzprtrkang mz nzaclvengr. A' king lcng sa narngiscng zmatq ngr nzaclve-krdr badr Mrlx Kc Tqdrka'ngr mzli kc navzm. X nzaclveti-txpwzlr mzli trnaboiu na-apupwzle nabz nepi kxesz'. \x + \xo 17:12 \xt Daniel 7:24\x*  
\v 13 X king lcng nzpnu-esz' drtwrdr sa naesz'ti x nakaobzlr nzxplr-krdr x zmatq ngrdr mz Mrlx Kc Tqdrka'ngr.  
\v 14 X sa nartwzng vea badr Nei Sip x leplz nedeng. Leplz nede lcng tqkqleleng x tqmcpxleng x nzvz-nqblq-zvzlr nide. X Nei Sip lc sa na-aovxiole Mrlx Kc Tqdrka'ngr x king kcng, murde nide Kxetu r kxnzetung amrlx, x King r king amrlx.”   
\p
\v 15 Zbz rpi-mop enjrl kc bange kx, “Mcpeq lue kcng tzesotrpzng mrkc tqmncngr srlx kc. Lue lang drtwr ngrde leplz ngr natq x drtc' amrlx mz nrlc x zbo ngr leplz kxetu.  
\v 16 X king kcng nzpnu-esz' badr Mrlx Kc Tqdrka'ngr, sa natrkati nivz lrdr taon kc etu tqapule srlx kc. Sa nakatxpxmlr mz taon lc da kxmrlzting kcng tqlqlwx amrlx, mz nzapu-krde kx na-aycblqtxdr srlx kc. X sa na-atrkatitx-zlwzlr nide mz nzapu-krde kx nzngqdr ncvr drtqde, x na-ayrkrpxlr nide mz nzangc-krdrle mz nyr.  
\v 17 Na-alelr da lc murde Gct kx ryrlqtrpz drtwr mz nabzdr. Murde navz-nqblqlr me pnz drtwrde, mz nzesz'tikr drtwr king kcng nzpnu-esz', mz nzkao-krbzlr zmatq ngr nzaclvengr scdr mz Mrlx Kc Tqdrka'ngr. Murde na-aclveng navz navz mzli kx tutrngr natq Gct amrlx nzatutr-ngrdr.  
\v 18 “X olvz kc drtwr ngrde taon kc etu tqapule Bxbilon kc bqnc, kc tqaclve-zpwxle king amrlx mz nrlc.”   
\c 18  
\s1 Gct Odatile ‘Bxbilon’ Kc Tqngi Taon Kc Etu Rom  
\p
\v 1 Mz nibr da lcng, mc-moux kc enjrl kx vzom Heven. Enjrl lc rngisc zmatq kxetu x nrlc yzlr-atwrnrngr mz zluli rde.  
\v 2 X sc tqnemipele nzrpi-krde kx, “Bxbilon kc tqngi srlx kc etu, tzodatipe, eu nzodatipe. Taon kc etu mzli ka ngipe me nzmnc-ngrdr drka', drka' kzpetong, x da kxtrka amrlx kx nzlvcneng mz bongavz kx nzapulr palc x kqba. \x + \xo 18:2 \xt Asaea 13:21; 21:9; 34:11-15; Jeremaea 50:39; 51:8, 37\x*  
\v 3 X lr taon kc nzprszpxpelr Gct angidr x nzangiolr kx trngiu Gct angidr. Nzapulr olvz kxyrlz kc tqprszpxle ncblo ngrde mz nzrmwimi-abeane-krde ncblo kzbleng. Leplz amrlx badr king rdr nzaxvctr-lzbqbzng mz alwx ngrde, mz nzapu-krdr ncblo kcng tzrmnq-zlwzng. X ncblo kxnzatatrpqng trau mz nzamwa-krdr da mz nrlc, nidr bcnyr kxnzrngisc-zlwzng. Murde nzamwang da kx naesatxpxngr drtwr leplz ngr taon lc, mz nzngini-krdr kxnzrkcmnz-zlwzng x kxnztrkibr-zlwzng.” \x + \xo 18:3 \xt Asaea 23:17; Jeremaea 51:7\x*   
\p
\v 4 Zbz, xlr-moux natq Gct Heven, rpile kx, “Leplz nengeng, dwaszpeamu lr taon lcng, ma tqaxvctr-lzbq-kzpzmu mz alwx ngrdrng, x ma tqprtr-kzamu mz nzayrplapxngr nidr. \x + \xo 18:4 \xt Asaea 48:20; Jeremaea 50:8; 51:6, 9, 45\x*  
\v 5 Murde alwx ngrdrng kqlu-esz'ngr, x nqmq krdr trtxpnzngr nzmrbrtr-krde mz drtwrnge. \x + \xo 18:5 \xt Nou 18:20-21; Jeremaea 51:9\x*  
\v 6 Ayzlu-mopwzmu badr nikeng nzale-kaipzlr bamu. A' mz nzayzlu-krbzmuleng badr, nangi nqvi lxblr mz nikeng nzalepebzlr bamu. Nzaetqngr drtq kc tzkabzlr bamu nangi nqvi kz nzxplr-krde x kabzmu nzetqkr drtqdr. \x + \xo 18:6 \xt Sam 137:8; Jeremaea 50:15, 29\x*  
\v 7 Leplz ngr taon kc, mz drtwrdr nzmyapx-esz'ngrng x trpnz-moungr kx apule nidr, x trpnzngr da kxtrka kx naprtzbz badr. Nzapulr srlx kc tqglqpx-lzbq mz nzrpi-krde kx, ‘Ninge Kwin mzli ka.’ A' nimu leplz nengeng, rtulrtr-ngrbzmu bade nzavzo-lzbq-krde. X srlx kc mz drtwrde abrtz zvz kz, mz nzrpi-krde kx, ‘Trnipc'u kxabzo kx yrni x drtwrde vz.’ A' kabzmu bade nzyrningr x nzvzkr drtwr.  
\v 8 Taon lc sa naodati mz nyr murde ninge Kxetu Gct kc tqrninr-esz'ngr sa na-ayrplapxx nide mz nzatrkati-krnge nide mz zyagox, nzyrningr, x dzbi mz zbq kx esz'txu. \x + \xo 18:8 \xt Asaea 47:7-9\x*   
\p
\v 9 “King mz nrlc kcng tzprtrng badr mz alwx ngr nzprszpx-krdr Gct x alwx ngr nzrkcmnzngr x nztrkibrngr, sa namclr zsikapu ngr nzngckr taon lc. X nayrni-ngrdr nzbz-krde, murde da kxmrlzting kcng tzkcmnz-zlwz-ngrdr sc tzodatipeng.  
\v 10 Sa natubzng rlru mz nzmwxlrti-krdr nzaxvctr-lxblr-krbzlr mz nzodatingr taon kc. X narpilr kx, ‘Rlr, rlr, nim taon kc etu tqapule Bxbilon kc bqnc, kc tqngi-bcnyrlr x matq. Nzodati-aningr nim apule bzlrpc kc tqpcpx.’” \x + \xo 18:10 \xt Esikel 26:16-17\x*   
\p
\v 11 Zbz rpi mou Gct kx, “X kxnzamwang da sa nayrning x navzti drtwrdr nide, murde trpengr kx naxpebz da lcng tzamwatilr. \x + \xo 18:11 \xt Esikel 27:12-36; Asaea 23:14\x*  
\v 12 Murde nzamwati-pnzng da kxkqlu lcde seleng: da kxnzlu nzwzngr mz gol, silvz, prl, x rplz kxlqlwxng, lrpz kxnzkqngr kxprki, kxprpol, kxpc x kx ngi silk. X nzamwati-kzng trprpa ngr nounc kx nzapulr nc bq, x da kx nzlz mz nounc kxlqlwx, bras, aian, rplz kxlq nzrpibz ‘mabol’ x mz nqngi elefant nzrpibz ‘aevri.’ \fig Nqngi elefant nzrpibz ‘aevri.’|alt="148 elephant" src="148-EAG00620.tif" size="COL" loc="REV 18:12" copy="SIL" ref="18:12" \fig*  
\v 13 X nzamwati-kzng bqlr nounc kx bletipxng, x tolo kx mnrte mrlz zlwz, x da kx na-amrlzle dakxnzng kx nzapulr ba x riya. X nzamwati-kzng dakxnzng kx nzapulr wit x flawa ngrde, waen, tolo ngr nra nounc olivi, x kzu, sip, hcsi, x sariot ngr vea. X nzamwati-kzng leplz kxnzawz-nrbalqng.   
\p
\v 14 “Eke Bxbilon! Da kxmrlz kcng tqsuti drtwrm yrkrpxpebz, x da kcng tqngi-bcnyrlr-ngrn x nzobq-ngrbz tqmrlzvxiting mrbrtipeng. X trpengr nzngisc-krmleng.  
\v 15 Ncblo kcng tzaleng da tqangi-bcnyr-ngrdeng, sa natubzng rlru mz zmwxlr, murde ma tzodati-kzng. Ncblo lcng sa nayrning x drtwrdr navz.  
\v 16 X narpilr kx, ‘Rlr, rlr, nim taon kc etu, mzli kc kqq lrpz kxlqlwx x kxprpol x kxpctxpx scmqng. X rluq kz da kx nzwzngr mz gol, prl, x rplz kxlqlwx.  
\v 17 A' da lcng tqmrlz scmqng amrlx nzodati-aningr apule bzlrpc kc tqpcpx.’  
\p “Mzli lc, kapten, kxnzwzng mz lcsu, kxnzalilvcmqng lcsu, x leplz kx nzmabzng prla amrlx, sa natutr-kzpqng rlru.  
\v 18-19 X mzli kc namc-ngrdr nzvzdzkr zsikapu ngr nyr kc tqangcle taon kc, sa nanemilr mz nzyrni-krdr nzrpi-krdr kx, ‘Esae! Trpnz-moungr taon mz nrlc ka kx narsakrlrng ncdr taon kc etu. Rlr, rlr, taon kc etu! Leplz amrlx kcng tzrngiscng lcsu angi-bcnyrlr-ngrng mz dztumqng. A' nim la tzodati-anipe mzli ka tqapule bzlrpc kc tqpcpx.’ X sa nakilvztilr nardr drtc' mz nzvzkr drtwrdr.  
\v 20 Mz nzmu-krde lcde, abrtzamu nimu lr Heven, nimu badr aposol, x profet, x leplz nengeng amrlx, murde odati-ngrne nide mz nikeng alebzleng bamu.” \x + \xo 18:20 \xt Lou Kcpwz 32:43; Jeremaea 51:48-64\x*   
\p
\v 21 Mz nibr nzycmnekr Gct lc, kzdq enjrl kx xplr kalzmle kc rplz kxmrlepu, rtco-ngrde prla, x rpile kx, “Kxnamu nzodatingr taon lc etu delc, murde mzte namrbrtx alo.  
\v 22 Trpengr natq gita, ncblei, x trpu, x trpengr nzngrngr kx naxlrtr-kz-mopwz elr. Trpengr ncblo kx namabzng elr. X trpengr kx narbing kai elr.  
\v 23 Bxbilon trpengr lam kx nayzlrpx-ngrm bam, x trpengr ncblo x olvi kx nayrlzpx-mop bam. Nzodatingr nim vzpxm mz ncblo nemqng, kxnzetung kcng tznginidr bcnyrng mz nrlc. Murde nzesabrtilr leplz ngr mrkcng kqlu mz nzmrlzba-krdr dztumqng myaszpxle nzmrlzti-krdr Gct, apule kx rwitiq nidr dabo nem. \x + \xo 18:23 \xt Asaea 24:8; Jeremaea 7:34; 16:10; 25:10\x*  
\v 24 Eu Bxbilon, x nzodati-kzp murde ayrleq mepyr ngr profet x leplz kxnztrng ne Gct, badr mepyr ngr leplz neng Gct mrka mz nrlc kx nznibqting.” X krlc nzyrkrpxpekr nzayrplapx-rmnrkr Gct kcng rlimz.   
\c 19  
\s1 Leplz Ngr Heven Nzglqpxlr Gct  
\p
\v 1 Mz nibr nzodatingr Bxbilon, xlrx nzmalqkr zbo ngr leplz kxetu Heven. Nzrpilr kx, “Awi Yawe! Naglqpxku Gct rgu kc tqngi nou nzrlapxngr, tqrngiscde zluli x zmatq.  
\v 2  \qt Murde drtwr kcng tqyrlqpeq rsakrlrngr x tubq zvz.\qt* \x + \xo 19:2 \xt Sam 19:9\x* X ayrplapx-ngrde srlx kc nzrbatr-krbzle mz lr nrlc nzprszpx-krdr Gct angidr, \qt x sc tqayzlubzle bade mz nzvz-nqblq-krde nibqti-krde kxnzawz nedeng.\qt* \x + \xo 19:2 \xt Lou Kcpwz 32:43; 2 King 9:7; Sam 19:9; Asaea 34:10\x*  
\v 3 Awi Yawe! Naglqpxku Gct! Mzli ka taon kc tqvz-nqblqle nqmq kr srlx lc sc tqngcpe, x \qt zsikapu rde nzvzdz-krde la, tqvzpe tqvzpe.\qt*” \x + \xo 19:3 \xt Asaea 34:10\x*  
\v 4 Zbz kxnzaclveng kcng nzpnu-li-nrade-pwx (24) x kxnzlung kcng pwx nzyrngzong, x nzangiolr Gct kc tqwxbuom mz tron, nzrpilr kx, “Delape! Awi Yawe! Naglqpxku Gct!”   
\p
\v 5 Zbz kzdq natq vzpxm mz tron, rpile kx, “Glqpxamu Gct rgu, nimu amrlx kcng tzwztrpzng bade x tzamrluelr nide, kxmule-esz' nimu ncblo kxnzetung o ncblo txneng.” \x + \xo 19:5 \xt Sam 115:13\x*  
\v 6 Zbz xlr-moux kc natq kx apule nzycmne-katokr zbo ngr leplz, x apu-kzle nzyrlekr me talipx ngr lue, x apu-kzle nzyrpupxkr bzlrmei. Nzrpilr kx, “Awi Yawe! Naglqpxku Gct! Murde Kxetu Gct kc tqrninr, nide txpwz King r leplz amrlx. \x + \xo 19:6 \xt Esikel 1:24; Sam 93:1; 97:1; 99:1\x*  
\v 7 Drtwrgu naelalzm x na-abrtz-zlwzku, x naglqlzku Gct. Murde krlzpebzle mzli r nzyrlzkr Nei Sip. X olvz kxmnc-kamelr kc nayrlztile oliqti-lzbqpe.  
\v 8 Nzkapebz bade nzkq-ngrde kc lrpz kxlqlwx kxprki x aglqpz'.” Olvz lc drtwr ngrde leplz kxnztrng ne Gct, x lrpz kxprki lc drtwr ngrde da kxtubq-esz'ngr kcng tzaleting.   
\p
\v 9 Mrlz, rpi-mop enjrl kc bange kx, “Yro natq lcng. Sa namrlzbz mz leplz kcng tzaveating mz nzprtr-krdr mz nzyrlzkr Nei Sip. Zpwxtx! Krlcng natq Gct.” \x + \xo 19:9 \xt Matiu 22:2-3; Luk 14:15-24\x*  
\v 10 Zbz ninge kc tqrweopebo zpr mz enjrl lc, a' rpimle bange kx, “Bzkq! Angio txpwz Gct! Murde wztr-kzpo bade Gct, apu-kzx nim x kztemqng kcng tzabrtr-zvzbzlr drtwrdr mz Nrpa ngr Jiszs Kxnzmcpx. X nrpa lc tqngi nou da amrlx kcng tzpipxlr profet.”   
\s1 Nzvz-krm Kraes  
\p
\v 11 Zbz obq-rmwible-moux, x mcx nzobqkr naonrx ngr Heven, x mcx kzdq hcsi kxprki. X Kraes kc tqwxbuom elr nzrpibz ‘Kx brti drtwr’ x ‘Kx atutr zvz natqde.’ Drtwr kcng tqyrlqpeq x nzrtwz-krde vea rsakrlrngr x tubq zvz. \x + \xo 19:11 \xt Esikel 1:1; Sam 2:9; 96:13; Asaea 11:4\x*  
\v 12 Mzte apule nqngi nyr, x narde lao-ngrm kraon kxkqlu. X nzyrtrpz kc bade drtq, a' nide txpwz kx rkrlz drtwr ngr drtq lc, x trpnz-moungr leplz kxrkrlz kz. \x + \xo 19:12 \xt Daniel 10:6\x*  
\v 13 Mz nzmu-krde lcde, drtqde nzrpibz Natq Gct. X nzkq kc tqkq-ngrde bxlvz zlwz mz mepyr.  
\v 14 X ami ngr leplz ne Gct nzvo-nqblqlr mz hcsi kxprking, x nzkq-lxblrng nzkq kxlqlwx kxprki x pnapr.  
\v 15 X ncblo kc tqrmailz lvcpxm mz naode kc toki r vea kxmalc kx naota-ngrde mz nzaovxio-krde lr drtqbrng amrlx. \qt X na-aclvele nidr mz zmatq kx xplr-esz'ngr na-apule bz kc tqrniglc botol.\qt* \x + \xo 19:15 \xt Sam 2:9\x* X na-apusr-ngrde nidr nra grep kcng tqrnzbrtile, mz zngya ngr drtwr Gct kc tqrninr. \x + \xo 19:15 \xt Asaea 63:3; Joel 3:13\x*  
\v 16 X nzyrtr mz nzkq scde mrkc tqyc-zbztr dcdrade, drtq lcde sele:  
\pc \sc King r king amrlx\sc*  
\pc \sc x Kxetu r kxnzetung amrlx.\sc*   
\s1 Vea Kxetu  
\p
\v 17 Mz nibrde mc-moux kc enjrl, tu mrkc tqrpnakim nepi. X mz nate kxetu, sc tqkqlepele utc ngr wq amrlx, rpibzle kx, “Vzmamu x yrlwr-lxblramu mz nzmungr kxetu kc tqrtrngztibz Gct. \x + \xo 19:17 \xt Esikel 39:17-20\x*  
\v 18 Vzmamu x ngqnamu namz ngr leplz amrlx, kxmule-esz' king, kxnzetung rdr ncblo ngr vea, ncblo ngr vea, kxnzawz-nrbalqng, kx drtqdr opx, kxnzetung, leplz txneng, x kxnzvoneng mz hcsi badr hcsi nedrng.”   
\p
\v 19 Zbz mc-moux Mrlx Kc Tqdrka'ngr kc kai badr king kxkqlu ngr nrlc ka x ami nedrng, nzata-lxblrtipx-lzbq-ngrdr nzota-krdr badr Kraes kc tqwxbuom mz hcsi lc, x ami nedeng.  
\v 20 Zbz sc tzlolvzpelr Mrlx Kc Tqdrka'ngr tzadwatrng mz presin ncdr Profet Kxpokia, kc tqaletrpz rkx mz mz Mrlx Kc Tqdrka'ngr. X mz rkx lcng, dekc tqesabrti-ngrde leplz kcng tztwzlr rkx ngr Mrlx Kc Tqdrka'ngr, x nzangiolr mqngrde. Mrlx Kc Tqdrka'ngr ncdr Profet kc Tqpokia, nzrtco-amrnangr mz Dxbu Nyr kx nzulrde rbq, x ngc mz rplz salfz. \x + \xo 19:20 \xt Nzaelwapxngr 9:17\x*  
\v 21 X ami nedrng nznibqting mz toki r vea kc tqlvcpxm mz nao ncblo kc tqvone mz hcsi. X utc amrlx nzmuti-krdr nelzdr krlc angidr mz ncvrdr.   
\c 20  
\s1 Yiz Siu-esz' (1,000)  
\p
\v 1 Mz nibr Kxnzmcpx nzaovxio-krde Mrlx Kc Tqdrka'ngr, obq-rmwible-moux, x mcx kc enjrl kx vzom Heven, malele ki ngr gq kc trpnzngr noude x sen kxetu kxmrlepu.  
\v 2 Enjrl lc aovxiole Mepwz kc etu, tzrpi-kzpz ‘Nar Drka'’ x ‘Setzn’ kc tqngi kz ningidoe ngr nrlanc kc bqnc. X otibzle Mepwz lc, x bxtile sen kc, murde nayrbqtile yiz siu naesz' (1,000). \x + \xo 20:2 \xt Nou 3:1\x*  
\v 3 X rtco-ngrde mz gq kc trpnzngr noude. Apqbrobzle naonrx ngrde x amqngitxde, murde navz navz nakrlz-zpwxbzle yiz kcng siu-esz' x tqesabrti-moupele lr drtqbrng kc ate. X mz nzvz-nqblq-krde me pnz drtwr Gct, mzli lc drtqde sa na-aopxbz mzli kxpipz.   
\p
\v 4 Zbz obq-rmwible-moux, x mcx kcng tron kxkqlu Heven, x nzwxbuopemqng elr kxnzrlxngiting amrlx murde nzaprcbz badr zmatq ngr nzaclve-krdr badr Kxnzmcpx yiz siu-esz' (1,000). X mc-kzx mrlcde mqngr krkcng tzlakitipxbz nardr, x krkcng amrlx tznibqng mz nzrpipx-krdr Nrpa ngr Jiszs x natq Gct, x krkcng trnzangiolru Mrlx Kc Tqdrka'ngr kc kai x mqngrde kxnzlz, x trnzyrtrpwzu rkx ngr Mrlx Kc Tqdrka'ngr mz rtrlrmztr o mz mqdr. Krkcng tzrlxngiting amrlx nzlupe-moung mz nzaclve-krdr badr Mevalu Kxnzmcpx. \x + \xo 20:4 \xt Daniel 7:9, 22; 1 Korint 6:2-3\x*  
\v 5 Leplz lcng tzlxngitilr Jiszs, nidr dalr nztulz-mou-ngrm kc kai. A' kxnzbzng amrlx kcng trnzlxngitilru Jiszs, sa na-atulz-kz-mop Gct nidr mz nzbz-krdr mz nibr yiz kcng siu-esz'.  
\v 6 Sa namrlzbz mz leplz kcng tqatulz-mopqng Gct mz nzbzngr kc kai, murde nidr leplz neng Gct. X trnartco-ngru nidr mz Dxbu Nyr kc tqngi nzbzngr kxrmnr-ngrm. X nidr kx nangi pris ne Gct ncdr Mevalu Kxnzmcpx, x na-aclvetilr badr Mevalu yiz siu-esz'.   
\s1 Nzaovxiongr Setzn  
\p
\v 7 Mz nibr yiz lcng siu-esz' (1,000), mzli kc tqatulz-mou-ngrm Gct kxnzbzng amrlx kcng trnzlxngitilru Jiszs, Setzn sc tzavzpxpem mz presin.  
\v 8 X sa naprpx mz nzesabrti-mou-krde leplz mrkcng amrlx mz nrlc tulvzo. X sa navzmi-lxblrmqng Setzn mz nzvecngr, x nzkqlu-krdr na-apule drta' ngr prla. Sa na-apulr ngrlrvea kc drtqde Gog, badr lr Magog kcng tzrnzlvzo-zvzlr Gct. \x + \xo 20:8 \xt Esikel 38:2, 18\x*  
\v 9 Sa namnc-ngalelr mzteadau kc tqmrlzti Gct mrkc tzmncngr leplz nedeng. A' nyr sa navzom Heven naodatile nidr.  
\v 10 Zbz Setzn kc tqesabrtile lr nrlc, sa nartcongr mz Dxbu Nyr kx nzulrde rbq x ngc mz rplz salfz. \x + \xo 20:10 \xt Nzaelwapxngr 9:17\x*  
\m Dxbu kc tzrtcope-kaingr Mrlx Kc Tqdrka'ngr ncdr Profet kc Tqpokia. X sa na-aetq-zlwzbz drtqdr mz nrlckxngrlx x nrlckxbq, tqyc tqyc.   
\s1 Nzrpipxngr Kxrmnr-ngrm Mz Krkcng Tztubqng X Krkcng Tzvz-rbrng  
\p
\v 11 Zbz obq-rmwible-moux, x mcx Gct nzwxbuo-krm mz tron kxetu kxprki. X opxm kx drtc' ncdr bongavz nzdwaszlr nide, x trnzmc-pnzung. \x + \xo 20:11 \xt Daniel 7:9-10\x*  
\v 12-13 X mc-kzx leplz amrlx kcng tzbzpeng, kxnzbzng prla x kxnzmncng mrnyz mqngr kxnzbzpeng, leplz kxnzetung x leplz txneng. Leplz amrlx lcng nztutrpzng mrkc tqlxlvrkipx tron. Zbz Buk ngr Nzlungr, mrkc tzyrongr drtq leplz kcng naprtrng mz nzlungr kxboi, nzkawxpx. X kzdung kz buk nzkawxpx kz, kx nzpipxlr da amrlx kcng tqrtrngztibz doa kxesz' mz nzmnc-krde. X Gct kc tqwxbuom mz tron sc tqayzlupe-ngrbzle da mz leplz mz nzvz-nqblq-krde buk lcng.  
\v 14 Trpengr kx rngisc zmatq ngr nzrnibqngr x nzatwzlrngr leplz mz mrnyz kxnzbzpeng. Murde krkcng tzrngiscng zmatq lcng, nzrtctiope-ngrng mz Dxbu Nyr krlc tqngi nzbzngr kxrmnr-ngrm.  
\v 15 X krkcng drtqdr trnzyrou mz Buk ngr Nzlungr, nzrtco-ngrng mz Dxbu Nyr. X leplz lcng mrlc nzlakipx-lzbqpeng badr Gct, tqyc tqyc.   
\c 21  
\s1 Bongavz Kxmrna X Drtc' Kxmrna  
\p
\v 1 Zbz obq-rmiwble-moux, x mcx kc bongavz kxmrna x drtc' kxmrna, kx trpnzngr prla ngrde. Bongavz kc kai ncdr drtc' nzmrbrpeng. \x + \xo 21:1 \xt Asaea 65:17; 66:22; 2 Pita 3:13\x*  
\v 2 X mcx mzteadau kxtr, Jerusalem kxmrna, prpxpem Heven mrkc tqmncngr Gct, x sc tqvzom. Mzteadau lc tqtr nzoliqtipe x mzte lqngi, apule olvz kx nayrlz kc tzaoliq mz nzyrlz-krdr ncdr ncblo ngrde. \x + \xo 21:2 \xt Asaea 52:1; 61:10\x*  
\v 3-4 X xlrx kc natq kxetu aepztr mz tron, rpile kx,  
\q1 “Ma nyz Gct ycpebz mz krkcng  
\q1 Nanginidr leplz nedeng.  
\q1 Sa namncpeng badr.  
\q1 X Gct esz'-krde sa nanginide Gct rdr.  
\q1 Drlemztr amrlx sa naycpqpxbzle.  
\q1 Trpengr kx drtwrde navz,  
\q1 Kx nayrni, kx nabz,  
\q1 Kx drtqde navetq.  
\q1 Dalr mzli kc mrbrpe.” \x + \xo 21:3-4 \xt Esikel 37:27; Livae 26:11-12; Asaea 25:8; 35:10; 65:19\x*   
\p
\v 5 Zbz sc tqrpipem Gct kc tqwxbuom mz tron bange kx, “Yro natq lcng, murde da angidr lcng x sa natutrng. Mzli ka atubqtipe-moux da amrlx!  
\v 6 Eu, kapupxpe! Murde ninge nou da amrlx x kx ayrkrpx da amrlx, x ninge kz kx ryzutr da amrlx x kx nzamrbrtx mou. Sa naka-nrbalqbo mz leplz kcng drtwrdr tzbrlxkzng, lue kx yrlelzm mz vaulz ngr nzlungr kxmrna, murde nalu-moung. \x + \xo 21:6 \xt Asaea 55:1; Jon 4:10\x*  
\v 7 Sa nakabo da lcng mz leplz kcng tzaovxiong mz nzvec-krdr badr zmatqng kxtrka. X sa nanginibo Gct rdr, x sa nanginidr doa nengeng. \x + \xo 21:7 \xt 2 Samwel 7:14; Sam 89:26-27\x*  
\v 8 A' krkcng tzmwxlrtilr nzbz-krdr mz nzvz-nqblq-krdr Jiszs, nzesablqtilr nide, x nzprszpxlr nide mz nzangio-krdr gct kx trngiu Gct angidr, nzrnibqng, nzrmwiming doa kx trngiu krnalzdr, nzrngineting dabo, nzangiong mqngr drka' kxnzlz, x nzpokiang. Leplz lcng sa nartco-ngrng mz Dxbu Nyr kc tqngc mz rplz salfz. \x + \xo 21:8 \xt Nzaelwapxngr 9:17\x* Krlc nzbzngr kxrmnrngr, x leplz lcng nzlakipx-lzbqmqng bange, tqyc tqyc.”   
\s1 Jerusalem Kxmrna  
\p
\v 9 Enjrl kcng rlimz mzli kc nzkabz badr nzayrplapxngr kx nzrmnr-ngrmqng rlimz. Zbz kzdq nidr vzm bange rpimle kx, “Vzm, murde na-aelwa-ngrbo bam Olvz r Nei Sip kc tqyrlz ate.”  
\v 10 X enjrl kc sc tqvzmilzpele ninge, mz zmatq ngr Mqngrkxtr, mz kzdq newz kxetu x vzdz wq. Sc tqaelwapx-ngrmle bange Jerusalem, mzteadau kxtr kc tqvzpxm mz Gct Heven. \x + \xo 21:10 \xt Esikel 40:2\x*  
\v 11 X zluli r Gct aglqpz'ngr Mzteadau lc apule rplz daemon kc tqlqlwx-esz'ngr x nzopx-krde apule dzpq.  
\v 12 X ngrlelvz drkq kx xplr x vzdz wq. X naonrx ngrde nzpnu-esz'-nrade-li (12), naonrx kcng taplxsr enjrl kxnzaclveng x nzataplxsr nzryrtrngr drtq neidu lr leplz ne Israel kcng nzpnu-esz'-nrade-li (12).  
\v 13 Naonrx tq lxblr mz nrlar Mzteadau kxesz'. \x + \xo 21:13 \xt Esikel 48:3-35\x*  
\v 14 X nzwzngr drkq lcdeng mz nou rplz nzpnu-esz'-nrade-li (12), x nzataplxsrngr nzryrtrngr drtq aposol neng Nei Sip.   
\p
\v 15 Enjrl kc tqycmnem bange malele kc neni kx ngi gol kx nzanengr Mzteadau, naonrx ngrdeng, x drkq ngrde. \x + \xo 21:15 \xt Esikel 40:3\x*  
\v 16 Mzteadau trpnzngr nrlarde kxboi, a' kx namu-txpwzlr esz'. Enjrl kc anele mzteadau mz neni kc tqmalele, x krlzbzle stadia siu-nzpnu-esz'-nrade-li (12,000), (kc tqngi kilomita siu-li-trtqki-pwx (2,400)). Nzboi-krde, nzetupx-krde x me krlzlzbz drkq ngrde, kxnamu-txpwzlr esz'.  
\v 17 Enjrl kc ane-kzle nzvekr drkq ngr Mzteadau, x krlzbzle kubit trtqki-esz'-nzpnu-pwx-nrade-pwx (144), (kc tqngi mita nzpnu-esz'mz-nrade-esz'mz (66)), vzpxm mz noabx kc tqane-ngrde, kc tqngi noabx sc leplz. \f + \fr 21:17 \ft Mz ngalrde lcng, opxm kx nabz 12,000 x 144 nzycmne-ebzpx-ngrdr nabz 12. Murde nabz 12 vzm mz mzlir rlilrdr. 12 X 1,000 = 12,000. 12 X 12 = 144. Mz Nzryrngrkxtr, nabz 12 nzrpibz nabz ngr nzayrkrpxngr da. \f*   
\m
\v 18 Drkq ngrde nzwz esz'ngr mz rplz kxprki, x Mzteadau esz'-krde nzwz esz'ngr mz gol kxlq, x nzpnapr-krde apule dzpq. \x + \xo 21:18 \xt Asaea 54:11-12\x*   
\p
\v 19 Nou rplz kcng mz drkq ngr Mzteadau nzmrlzng murde nzwzngr mz rplz kxlqlwx. Nou drkq kc kai rplz kxprki, krali rplz kxblutxpx apule nzopxkr bongavz mz nrlc kxngrlx, kratq rplz kxbx, krapwx rplz kxmqbq.  
\v 20 X kranzlvqn rplz kxbotapz', kraesz'mz rplz kxpc, krarlimz rplz kxplctxpx, krartqmz rplz kxblu apule nzblukr bongavz, krarpwxmz rplz kxyzlo, kranzpnu rplz kxplc, kranzpnu-esz'-nrade-esz' rplz kxbla, x kranzpnu-esz'-nrade-li rplz kxprpol.  
\v 21 X naonrx kcng nzpnu-esz'-nrade-li nzwzngr mz prl kxlqlwx amrlx. Naonrx esz' kc tzwzngr mz prl kxetu kx aglqpz' apule nelc, x lrpzki kxetu kc tqvz vau r Mzteadau nzwzngr mz gol, x nzlq-krde apule nzopxkr dzpq.   
\p
\v 22 A' trpnzngr Mangr-nzangiongr kx mcx Mzteadau mrkc tqmnc-ngrbz Gct badr leplz nedeng. Murde Kxetu Gct kc tqrninr ncdr Nei Sip nztekqtrlr Mangr-nzangiongr mz nzangiongr nidr mz nrlc amrlx Mzteadau.  
\v 23 X Mzteadau lc tryzlr-ngru mz zyzlr ngr nepi o temz, murde zluli r Gct ncdr Nei Sip, dela na-angrlxpele nide. \x + \xo 21:23 \xt Asaea 60:3, 11, 19-20\x*  
\v 24 X leplz kxnztubqng mrkcng amrlx mz nrlc, sa navzneng mz zyzlr ngrde, mz nzvz-nqblq-krde me pnz drtwr Gct. X king amrlx mz nrlc kcng tztubqng kz sa naprtrpzng mz Mzteadau, mz nzrglqlz-krdr Gct ncdr Nei Sip.   
\p
\v 25 Mzli kc bqnc, naonrx ngr taon nzbq mz nrlckxbq. A' mz Mzteadau kxmrna, naonrx ngrdeng trtxpengr nzrbqpx-ngrng, murde trpnzngr nrlckxbq mrlcde.  
\v 26 X leplz lcng tztubqng sa naprtrpzng mz Mzteadau. X sa natwzlr dztudrng kxmrlzvxing kxlqlwxng.  
\v 27 A' trtxpnzngr da kx trtakitrdeu mz nzobqkr Gct kx naprtrpzng mz Mzteadau, x trpnzngr leplz kx nzrtrngz-abeaneng da kx myangr drtq, x kxnzpokiang. A' nangi txpwz krkcng drtqdr tzyrope mz Buk ngr Nzlungr sc Nei Sip, nidr lang kx naprtrng elr. \x + \xo 21:27 \xt Asaea 52:1; Esikel 44:9\x* \fig Leplz kcng drtqdr tzyrope mz Buk ngr Nzlungr sa naprtrng mz Jerusalem kxmrna.|alt="149 book of life" src="149-AB02778b.tif" size="COL" loc="REV 21:27" copy="John Lear" ref="21:27" \fig*   
\c 22  
\s1 Da Kxmrlzting Ngr Jerusalem Kxmrna  
\p
\v 1 Mz nibr nzmc-krnge Jerusalem kxmrna, aelwapx-kz-ngrm enjrl kc bange Lue ngr Nzlungr yrlelzm mz tron nyz Gct ncdr Nei Sip, x nzopx-krde apule dzpq. \x + \xo 22:1 \xt Esikel 47:1; Sekaraea 14:8\x*  
\v 2 Yrlekiole vau r lrpzki kc tqtavau Mzteadau, x nrlarde rlilrdr tungr Nounc ngr Nzlungr. X nzpa-krdr nzwrde nzpnu-esz'-nrade-li (12) mz yiz kxesz', nzwrde esz' mz temz kxesz'. X leu rdrng ngi dalr nzrkatxngr zyagox ngr nrkrdrtq leplz kxnztubqng ngr mztea amrlx. \x + \xo 22:2 \xt Esikel 47:12; Nou 2:9\x*  
\v 3 A' trpengr nzayrplapxngr kc tqyrlq pnz Gct, tqakipxle nide x leplz. A' Gct ncdr Nei Sip nawxbuomqng mz tron nyzdr Mzteadau. X kxnzawz nedrng amrlx na-angiolr nidr elr. \x + \xo 22:3 \xt Sekaraea 14:11\x*  
\v 4 Mzli kc trpnzngr doa kx mcle Gct. A' mzli lcpe krkcng tzyrtrpz drtq Gct mz rtrlrmztr, sc tzmctr-atepebzlr mzte, x sc tzkrlz-angidrpe-kzlr nide. \x + \xo 22:4 \xt Nzrlaszngr 33:20; 1 Timoti 6:16; Matiu 5:8; 1 Jon 3:2\x*  
\v 5 Trpnzngr nrlckxbq mrlcde, x trnzsutiu drtwrdr zyzlr ngr nepi o lam, murde Kxetu Gct sa nayzlrpx-ngrbz badr. X leplz lcng sa nanginipe-kzdr king x nzaclve-krdr tqvzpe tqvzpe. X da kx mc-rmnr-ngrbo nide lape. \x + \xo 22:5 \xt Asaea 60:19; Daniel 7:18\x*   
\s1 Natq Enjrl X Natq Jiszs  
\p
\v 6 Zbz rpi-mop enjrl kc bange kx, “Natq lcng da angidr x takitrde nzabrkitr drtwr. X Kxetu rgu, Gct kc tqkabzle Mqngrde mz profet kcng bqnc, atwzlr-ngrmle ninge nzaelwapx-krbo mz kxnzawz nedeng amrlx da lcng tqycpe pipz nzprtz-krdr.”   
\p
\v 7 Rpim Jiszs bagu kx,  
\pm “Lalztq-angidramu, murde mzli trnaboiu x ninge kc tqyzlupe-mopwc'. X sa namrlzbz mz doa kcng tzyrlq-angidrlr natq kcng tqkapx Gct mz Buk lc, murde sa nakrlz-angidrlr da lcng amrlx mzli kc tqycpe pipz nzprtz-krdr.”   
\p
\v 8 Ninge Jon. Xlrx x mcx da lcng amrlx tqaelwa-ngrm enjrl kc bange. X kx yrkrpxbz kc nzxlr-krnge x nzrmc-krnge da lcng, ninge kc tqrweopebo zpr bade mz nzangio-krngele.  
\v 9 A' rpi-mople bange kx, “Bzkq! Angio txpwz Gct! Murde wztr-kzpo mz Gct, da kc tqwaiamu badr profet x leplz amrlx kcng tzyrlq-angidrlr natq kcng tqyclzm mz Buk lc.  
\v 10 Bzkq yrlq-kapqq natq kcng tqpipx Gct mz Buk lc, murde ycpe pipz nzkaputr-krmqng.  
\v 11 Mz nzmu-krde lcde, mzli r leplz nztekqtr-krdr nqmq krdrng sc tqyrkrpxpe. X mzli ka, kxnzvz-rbrng sa navz zvz mz nzvz-rbr-krdr, x kxdrka'-ngrng sa navz zvz nzale-krdr da kxdrka'ngr. A' kxnztrng sa navz zvz mz nztr-krdr, x kxnztubqng sa navz zvz nzale-krdr da kxtubq.” \x + \xo 22:11 \xt Daniel 12:10\x*   
\p
\v 12 Rpi-mop Jiszs kx,  
\pm “Ninge Jiszs. Lalztq-angidrmamu, murde mzli trnzboi-krdeu x ninge kc tqyzlupe-mopwc'. X sa natwzmc da kx nayrlq-ngrbo mq leplz amrlx, navz-nqblqle nzwz-krdrng, kxmule-esz' kxmrlz o kxtrka.” \x + \xo 22:12 \xt Asaea 40:10; 62:11; Sam 28:4; Jeremaea 17:10\x*  
\v 13 Ninge nou da amrlx x kx ayrkrpx da amrlx. X ninge kxrtwayz x kxrmnr-ngrbz. X ninge kz kx ryzutr da amrlx x kx amrbrtx mou.” \x + \xo 22:13 \xt Asaea 44:6; 48:12\x*   
\p
\v 14 Ninge Jon. Namrlzbz mz doa kcng lrpzdr tqprki mz nztapzo-krdrleng mz mepyr ngr Jiszs, murde takitrde nidr nzprtr-krdr mz naonrx ngr Mzteadau x nzmu-krdr nra Nounc ngr Nzlungr. \x + \xo 22:14 \xt Nou 2:9; 3:22\x*  
\v 15 A' kzdung kz leplz kcng tzvz-nqblqlr nzmncngr kxtrka, trtxpnzngr nzvztr-krdr Mzteadau. Leplz kxnzmulr seng: kxnzryzplengz-ngrng, kxnzrmwiming doa kx trngiu krnalzdr, kxnzrnibqng, kxnzangiolr mqngr drka' kxnzlz, x kxnzmrlzbz badr nzpokia-zvzngr.   
\pm
\v 16 “Ninge Jiszs. Ninge lc tqatwzlr-ngrbo enjrl nenge bamu mz nzpipx-krbzle da lcng bamu, nimu kxnzrlxngiting mz makxtr kcng rlimz. Vzpx-angidrmc mz nqvi lr melrmqnge King Devet. X apux Paglxnrlc, mz nzaelwapx-krnge Zbq Kxmrna ngr Gct.” \x + \xo 22:16 \xt Asaea 11:1, 10; Luk 1:78; 2 Pita 1:19; 1 Jon 3:2\x*   
\p
\v 17 Mqngrkxtr ncdr Olvz R Nei Sip nzrpibzlr bade kx, “Vzm!” X nekeng amrlx nzxlrlr natqde narpi-kzlr kx, “Vzm, kx Kxetu Jiszs!” Neke drtwrde brlxkz navzm, murde narmnq Lue ngr Nzlungr kx nzrka-nrbalq. \x + \xo 22:17 \xt Asaea 55:1\x*   
\s1 Aclvetioamu!  
\p
\v 18 Ninge Jon. Aclvetioamu nimu kcng tzxlrlr natq Gct kcng tqkapxle tqyclzm mz buk lc, murde namwxlrtiamu. Murde doa kx ryrlqtr-mopwz kzdung natq kxnzpokiangr mz natq kcng tqyclzpem mz buk lc, sa na-ayrplapx Gct mz nzayrplapxngr kxtrka kcng tqpipxpele mz buk lc. \x + \xo 22:18 \xt Lou Kcpwz 4:2; 12:32\x*  
\v 19 X doa kx katxpxle kzdung natq mz natq lcng tqkapx Gct tqyclzm mz buk lc, trpnzngr nzmncpx-krmle Mzteadau kxtr, x trpnzngr nzmu-krde nra Nounc ngr Nzlungr, mz nzkatxpxkr Gct da kxmrlzting kcng tqycmnetrngr buk lc.   
\s1 Vzm Kxetu Jiszs  
\p
\v 20 Jiszs kc tqycmnetr-ngrde da lcng amrlx rpile kx, “Da zpwxtx! Mzli trnzboi-krdeu x ninge kc tqyzlupe-mopwc'.” X kxnzrlxngiting amrlx nzrpibzlr bade kx, “Eu, angida! Vz-anim, kx Kxetu Jiszs!”   
\p
\v 21 X ninge Jon krka'-ngrne kx Kxetu Jiszs naokatrle leplz kxnztrng nedeng amrlx mz zmrlz ngrde kxmyalz. Eu, angida!