\id 2TI stc-562TI-Nat.sfm, 2 Timothy, Natqgu (Santa Cruz) STC, Daniel Boerger, 11/07/2007 
\ide UTF-8
\h 2 Timoti 
\toc3 2 Timoti 
\toc1 Nzryr-krbz Pol Krali Mz Timoti 
\toc2 2 Timoti 
\mt1 Nzryr-krbz Pol Krali Mz Timoti  
\imt1 Natq Ngr Nzaplxtqngr Mz Nzryr-krbz Pol Krali Mz Timoti  
\ip Mc natq ngr nzaplxtqngr mz nzryr-krbz Pol ayrnrngr mz Timoti.  
\ip Pol yrle letz krali lc mz mzlir yiz 65—67 AD, mzli kc tqmncpx-ngr-mople mz presin mz nzwrde krali, tqaenzli-ngrde nznibq-krdr nide. Kztedeng amrlx nzrlaszpxlr nide, a' ngi txpwz Luk kc tzmncng badr. Yrle letz lc x sc tzbz ate.  
\ip Mz letz lc, Pol pibzle mz Timoti da kcng naokatrlr nide mz nzwztr-krbzle mz Gct. X rngidrlvz-ngrbzle bade mz nztu-amqngi-krde mz nzrlxngiti-krde x nzwz-krde kxmule-esz' da kx prtz. Rpi-kzpzle bade kx, “Sutitx-zlwzbz drtwrnge kx navz-kaipe' x mzli r nenq kzprla kc ate.” Murde krlzle kx ycpe pipz nzbz-krde.  
\c 1  
\p
\v 1 Nim la Timoti. Ninge Pol, aposol ne Mevalu Jiszs. X mcpx Gct ninge mz nzyapwxtipx-krnge nzlungr kxboi kc tqesalz-ngrbzle mz leplz kcng tzlxngitilr Mevalu Jiszs.   
\p
\v 2 Timoti, apubo bam trtem angidr. X krka'-ngrne kx Gct Trtegu x Kxetu rgu Mevalu Jiszs, nakabzlr bam zmrlz ngrdr kxmyalz, nzmnc-zpwxngr, x nayc mz drtwrdr nim.  
\v 3 Wztrpo mz Gct mz nabz kxtubq, da kc tzwai melrmqngeng. X mzli kang kqlu krka'-ngrne nim, x awi-zvz-ngrbo bade.  
\v 4 Mz nzdctipxkr drtwrnge mzli kc tqprszpx-ngrne nim, tqyrni-ngrme bange, sutitx zlwz drtwrnge nzmc-krnge nim, murde na-abrtz-mouki.   
\s1 Natu-amqngi Mz Nzwztr-krbzme Mz Kxetu, Kxmule-esz' Drtqm Nzaetqbz  
\p
\v 5 Krlz-angidrx kx lxngiti-zpwxq Kxetu rgu. Murde blrkqm Lois x lxem Yunis, nzalvztr-ngrdr nim, mz nzlxngiti-krm Jiszs Kxnzmcpx. X krlz-kzx kx nzrlxngiti-krm sc tqxplrpe krlzmle mzli ka.  
\v 6 A' mzli ka nadcpx mz drtwrm mzli kc tqyrlqo-ngrbo mqnge bam, x Gct avzomle bam zmatq ngr Mqngrkxtr mz nzwztr-krbzme bade. X drtwrm napqtr zvz mz nzwz-nqblq-krm zmatq lc.  
\v 7 Murde Mqngrkxtr ngi nou zmatq, nivz, x nzaclve-lzbqngr. A' trbatrpwzleu zmwxlr.  
\v 8 Delc, bzkq mwxlrq nzpipx-krbzme Kxetu rgu mz leplz, x bzkq myangr drtqm nzmncpx-krmc mz presin mz nzwztr-krbo bade. A' narlrpx-lzbq-ngrn mz nzyapwxtipx-krm Nrpakxmrlz mz zmatq ngr Mqngrkxtr, kxmule-esz' drtqm nzaetqbz da kc tqwaix.   
\p
\v 9-10 X Nrpakxmrlz lc nide sele.  
\pm Gct arlapxle x kqlele nigu nzngini-krgu doa kxnztr nedeng, mz nzvz-nqblq-krde me pnz drtwrde x zmrlz ngrde kxmyalz. A' trvzpxpuu mz da kx aleku. Murde mzli kc nrlc trnzwzka-ngrde, Gct pnzpe drtwrde kx Mevalu Jiszs Kxnzmcpx na-arlapxle nigu. X mz nzvzo-krmle mz nrlc, aovxiole zmatq ngr nzbzngr. X Nrpakxmrlz aelwapx-ngrde kxnamu nzprtrngr mz nzlungr kxboi.   
\p
\v 11 X nzmcpx ninge mz nzngini-krnge aposol mz nzalvztrngr x nzrlepxngr Nrpakxmrlz.  
\v 12 X mzli ka, mz nzwztr-krnge lc mz Nrpakxmrlz, dekc tqaetqmle drtqnge x tqmncpx-ngrmc mz presin. A' trmya-ngru drtqnge. Murde krlzx Gct kc tqabrkitrx drtwrnge. X lxngitix kx sa nabatrple Nrpakxmrlz kc tqaprcmle bange nzryapwxtipx-zvzngr nakrlzbzle nzyzlu-krm Jiszs. \f + \fr 1:12 \ft Kzdung leplz nztekqtr-krdr ngalrde lc blepxbz, mz nzrpi-krdr kx, “X lxngitix kx sa na-aclve-angidrle nzlu-krnge, nakrlzbzle mzli kc nabz-ngrne o nzyzlu-krm Jiszs.” Kzdung natq mz Grik tropxu. \f*   
\m
\v 13 Timoti, nadcpx mz drtwrm nzalvztrngr kxtubq kcng tqpibo bam. X alvztr-zpwxbz mz leplz. X mz nzaxvctr-krbzme mz Mevalu Jiszs, navz zvz nzabrtr-krbzme drtwrm bade x nzmrlzti-krm nide.  
\v 14 X mz nzokatrkr Mqngrkxtr kc tqmncpxm bagu, aclve angidr Nrpakxmrlz kc tzaprcbz bam. Murde nzalvztr-ngrng amrlx mz Nrpakxmrlz lc natubqpwz mz nzyapwxtipx-krmleng.   
\p
\v 15 Krlzpeq kx kxnzrlxngiting nzkqlung dalr Provins kc Esia, trnztu-amqngiung mz nzokatr-krdr ninge, a' mzli ka nzrlaszpelr ninge. X wai-kzle Fijelzs x Hzmcjinis.   
\p
\v 16-18 A' abrtz-zlwz-ngrne Onesiforzs. Krlzpeq kxmu nzokatr-krde ninge mztea Efiszs. X mzli kc tqkaputr-ngrmle Rom, rtangrtile ninge, vz vz mzli kx rmcti-ngrde ninge. X trmya-ngru drtqde nzmncpx-krmc mz presin. A' okatr-zvzle ninge. X delc, mz nzkrka'-krnge, tqrlxti-ngrbo mz Kxetu rgu kx na-amrlzle lr ma nyzde mzli ka. X krka'-ngrne kx Kxetu rgu nayc mz drtwrde nide mzli kc nayzlu-ngrm Jiszs.   
\c 2  
\p
\v 1 Mrlxnge Timoti, nzrlxngiti-krm naxplr mz nzokatrkr Mevalu Jiszs nim.  
\v 2 Xlr-zvzme nzalvztr-krnge mz Nrpakxmrlz. Mzli ka, aprcbz nzalvztrngr lcng mz leplz kcng tqabrtrpzku drtwrgu badr mz nzalvztr-krdr kzdung kz leplz, murde leplz lcng na-alvztr-moulr kzdung kz leplz.  
\v 3 Rlrpx-lzbqngr, da kc tqwaix, mz nzwztr-krbzki mz Mevalu Jiszs, kxmule-esz' drtqgi nzaetqbz.  
\v 4 Na-apuki ncblo ngr vea, kc tqvz-nqblqpwzle kxetu rde. X tr-rlr-ngrpwzleu nzaotrkr ncte dalr nrlc. X dekc tqabrtzlvzngr kxetu rde nide.  
\v 5 X na-apu-kzki doa kx prtr mz nzesangr. Murde vz-nqblqpwzle nqmq ngr nzesangr, murde natwzle da kxmrlz.  
\v 6 X na-apu-kzki doa kxwz kato mz nrlanc. Murde sa nangq-kaile dalr nrlanc kc tqetqti drtqde.  
\v 7 Na-aoti zvz drtwrm nzycmne-ebzpxngr lcng tq, murde Kxetu rgu na-aopxbzle bam kxnamu nzwztr-krbzme bade.   
\p
\v 8 Delc, nayc-zvz-ngrde mz drtwrm Nrpakxmrlz lc tqyapwxtipxx mz nzwztr-krbo bade, kxmule-esz' nzaetqbz drtqm. Murde Jiszs Kxnzmcpx kc tqvzpxm mz nqvi lr King Devet, drtqde nzaetq-kaipz mz nzrnibqngr nide, a' tulz-mop mz nzbzngr.  
\v 9 X drtqnge nzaetq-kzpz mz nzamyati-ngrm drtqnge x nzamncpx-krmlr ninge mz presin. X nzapusr-ngrdr ninge ncblo kx xpqbrlrngr lou murde lepxx Nrpakxmrlz. A' natq Gct rblx nzapqbrlvzngr mz presin.  
\v 10 Delc, tqvz-zvzngr nzlepx-krnge Nrpakxmrlz, x rlrpx-lzbq-ngrne mz nzprtilz-krdr ninge da lcng amrlx, murde leplz kcng tqmcpx Gct narlapx-kzng, mz nzlxngiti-krdr Mevalu Jiszs, x naprtr-kzng mz nzlungr kxboi Heven.  
\v 11-13 Murde natq angidr deseleng.  
\q1 Mz nzbzmi-krgu Kraes, sa nalu-aloku badr.  
\q1 Mz nztu-amqngi-krgu mz nzrlxngitingr, sa na-aclveku badr mz nrlc kc navzm.  
\q1 A' nekeng nzpxtxpx-ngrdr nide, sa napxtxpx-kz-ngrde nidr.  
\q1 Kxmule-esz' taoku mz nzatutr-krgu da kx esalz-ngrbzku bade, a' trtxpnzngr nztao-krde mz nzatutr-krde da kx esalz-ngrmle bagu.  
\q1 Murde nqmq kr Kraes trpnzngr nztekqtr-krde, a' vz-nqblq-zvzle nqmq krde lc tqmrlz.   
\s1 Kxnzawz Angidr Ne Gct  
\p
\v 14 Timoti, adcpx-mopwz mz leplz nemqng natq kcmang tqpi-kaipo. X mz drtq Gct, rpwa'-ngrbz badr nzotablrlvz-krdr natq kx akipxle leplz. Murde trokatrleu leplz, a' atrkatile kxnzlalztqng.  
\v 15 Navz zvz nzalvztr-zpwx-krm Nrpa ngr Jiszs, murde nakrlzq kx Gct abrtzlvzle nzalvztr-krmq lcng x drtqm trmyau mz nzmc-krdeleng.  
\v 16 A' kapx-lzbqm mz leplz kcng tzycmnetr-ngrdr dalr nrlc. Murde drtwr kxmule lc tramatqleu Gct x trokatrleu leplz. A' mailztxpxle nidr mz nzrtxlvzlz-zvz-krdr alwx ngrdr.  
\v 17 X nzalvztr-krdr lcng tqtrka sa naetunepx mz mzlirmu. X na-apule kxsqki kc tqngi kansz. Kzdq kxnzalvztr-rbr lcng drtqde Haemznezs x kzdq kz drtqde Filetzs.  
\v 18 Nzvz-rlrubzng mz nzalvztrngr angidr. Murde nzrpilr kx nigu kxnzrlxngiting sc tzatulzpeng mz nzbzngr x trpe-moungr nztulzkr nrkrdrtqgu kalr. Nzalvztrngr lc tqatrkatipebzle nzrlxngitikr kzdung leplz. \x + \xo 2:18 \xt 1 Korint 15\x*  
\v 19 A' krlzku kx nzalvztrngr angidrng kc tqkabz Gct sa natu-amqngi-alo. Murde Nzryrngrkxtr rpile kx, \qt “Yawe krlz-angidrle nekeng leplz nedeng.”\qt* \x + \xo 2:19 \xt Nzkqlu-krdr 16:5; Jon 10:14\x* X rpi-kzle kx, \qt “Leplz amrlx kcng tzplzpxlr kx nzlxngitilr Kxetu naesablqtilr nqmq krdr kxtrka.”\qt* \x + \xo 2:19 \xt Joel 2:32; Sam 34:12-14; Nzyrplapxngr 3:7\x*   
\p
\v 20 Mz nzvz-nqblq-krde nqmq krgu, mzli kx vz-ngrm kzdq kxetu mz ma nyzgu, rkabzku bade dakxnzng kxmrlzti, mz nzamatq-krgu nide. A' mzli kx mnc-ngrgu esz'-krgu, trmu-zvzkuu dakxnzng kxnamulr krkcng tzkabz bade.  
\v 21 X krlc nzycmne-ebzpxngr kx navz-nqblqku. Nzmu alqngi-lzbqku mz da kcng tqtrka, apuku dakxnzng kcng tqmrlz. X takitrde nzmcpx nigu mz nzokatr-krgu Kxetu rgu, murde tqoliqpe-ngrgu mz nzale-zvz-krgu da kxmrlzti.  
\v 22 Mz nzmu-krde lcde, kx Timoti, esablqti da kxtrka amrlx kcng tzmrlzbz mz obla. A' mz nzokatrkr leplz kcng tzlxngitilr Kxetu rgu x tzsuti drtwrdr nzabrtzlvz-krde nidr, navz zvz nzale-krm da kxtubq, nztu-amqngi-krm mz nzrlxngiti-krgu, nzmrlzti-krm Gct x leplz, x nzmnc-zpwx-kz-krmu badr.  
\v 23 Eu, navz zvz mz nzpxtxpx-krm nzaongr drtwr kcng tqangqngu-ngrde leplz, murde nzbatrpzlr nzotablrngr.  
\v 24 Murde kxnzawz ne Kxetu, bzkq nzotablrng x drtwrde ngya ani mz nzatrkatikr leplz nide. A' nanginide mrlx kx okatrle leplz amrlx x alvztr angidr.  
\v 25 X mz nivz lr Kxetu, na-atubqtile leplz kcng tzpxtxpx-ngrdr nide, murde mwx elx Gct naokatrle nidr mz nztekqtr-krdr nqmq nr drtwrdr x nalxngitilr natq angidr.  
\v 26 X drtwrdr naopx, murde narlapxbzng mz nzesabrtikr Setzn, kc tqrtulrtr-ngrbzle badr nzale-krdr me pnz drtwrde.   
\c 3  
\s1 Leplz Kxnztrkang Mzli Ka Tqaenzli-ngrgu Nzyzlu-krm Jiszs  
\p
\v 1 Nakrlzq kx mzli ka tqaenzli-ngrgu nzyzlu-krm Jiszs sa naprtr-kzku mz nzkxpungr kang kqlu.  
\v 2 Murde kxmule-esz' nzrpilr kx nzlxngitilr Jiszs, a' leplz nzkqlung sa navz-rbrng. Sa na-aoti txpwz drtwrdr nidr esz'-krdr, x namrlzbz badr trau. Sa naglqpx-lzbqng x nalcpung. Sa narpibqting leplz x narnzlvzolr natq trtedr x lxedr. Trna-abrtzlvzlru da kxmrlz x trna-amatq-kzlru Gct.  
\v 3 Trpnzngr scdr nivz x trnakrlzlru nzipqngr leplz. Trna-aclvetio-lzbqung x sa narpikiti-katong leplz. Trpnzngr nzrycngr mz drtwr badr, x sa natrka badr da kxmrlz amrlx.  
\v 4 Trpnzngr nardr x sa na-amwalr kztedrng. Sa namrlzbz badr alwx ngr nrkrdrtqdr namyaszpxle nzvz-nqblq-krdr Gct.  
\v 5 Leplz lcng sa naprtrpqng bagu mz nzrpi-krdr kx nidr lrmakxtr. A' trtingr, murde trnzrlrpx-lzbq-ngrpwzung mz zmatq ngr Mqngrkxtr, nztekqtr-krde nabzdr. Delc nayrlqpx-lzbq-ngrbzku badr.   
\p
\v 6-7 Kzdung leplz kxnzmulr lcng nzprtrpzng mz ma nyz olvz kcng nzrlxngiti-krdr trxplru, mz nzesabrti-krdrleng mz nzalvztr-rbr-krdr. X olvz lcng nzvz-nqblq-txpwzlr drtwrdr esz'-krdr. X o ani txpwz nzrtwz-krdr nrpa kznike vzne, murde nzrpilr narmcti-ngrdr nrwx. A' rblx nzkrlz-krdr da angidr murde suti drtwrdr alwx ngrdr namyaszpxle nzvz-nqblq-krdr Gct, kc tqngi nou nrwx.  
\v 8-9 Ncblo kcng tzvznebzng mz ma lcng, nzpibqtilr Nrpakxmrlz. Murde nzao-krdr drtwrdr kxdrka'-ngrng, x nzvz-rbrng mz nzrlxngiti-krdr. Ncblo lcng nzapulr Janzs x Jabrzs kcng bqnc, tzpibqtilr nzalvztrkr Mosis. A' nzpokia-krdr aelwapx-lzbqpengr. X mz nqmq lcpwz, ncblo kcng tzvzneng mzli ka, nzvz-rbr-krdr sa naopx kalr. \f + \fr 3:8-9 \ft Mzle-lzbq lcng, Janzs x Jabrzs, drtqdr trnzyroung mz Nzryrngrkxtr. A' mz nqmq kr lr Jiu, nzrpilr kx ncblo lcng nidr ncblo neng King r Ijipt kxnzrngineng dabo ngr nzaelwapx-krdr rkx kx vzpxm mz drka'. [Nzrlaszngr 7:11-22; 8:7-19] \f*   
\s1 Vz-nqblqpwz Nzalvztrngr Angidr  
\p
\v 10 Timoti, vz-nqblqpeq nzalvztr-krnge, nqmq krnge, me pnz drtwrnge, nzrlxngiti-krnge, trnzngya-ani-kru drtwrnge, nivz lrnge, x nztu-amqngi-krnge.  
\v 11 X krlzpeq kxmu nzatrkati-krdr ninge, x nzaetq-krdr drtqnge mzli kc tqmnc-ngrne mztea Adiok, Ikonizm, x Listra. \x + \xo 3:11 \xt Aposol 13:50; 14:4-6, 19-20\x* Kxmule-esz' sc tzatrkatilr ninge, a' Kxetu rgu sc tqokatrpele ninge x arlapxle ninge murde ma tqbzx.  
\v 12 Murde da zpwxtx kx leplz amrlx kcng tzsuti drtwrdr nzvz-nqblq-krdr me pnz drtwr Gct mz nzlxngiti-krdr Mevalu Jiszs, sa na-atrkati kz leplz nidr.  
\v 13 A' leplz kxdrka'-ngrng badr kxnzpokia-ngrdr kxnzlxngitilr Jiszs, nztrka-krdr sa naetunepx zvz. X sa naesabrtilr leplz murde nzesabrti-kaing.   
\p
\v 14 Timoti, krlzq kx nzalvztr-krgr ngi da angidr, murde krlz-zpwxq nigr kcng tzalvztrlr nim. Delc, navz zvz mz nzlxngiti-krmle.  
\v 15 Abzo mzli kc tqtopwzbe-ngrn, krlz-zpwxq Nzryrngrkxtr. X zmatq ngrde alvztrpele nim kx nabrti drtwrm Mevalu Jiszs mz nzarlapx-krde nim.  
\v 16 Gct kaomle natq amrlx mz Nzryrngrkxtr mz zmatq ngr Mqngrkxtr, murde natq lcng naokatrlr leplz mz nzalvztr-krdr nidr, mz nzlc-apqbz-krdr nidr, mz nzatubqti-krdr nidr, x mz nzaelwapx-krbzlr badr nzmncngr kxtubqbz mz nzobqkr Gct.  
\v 17 Murde doa nedeng, naoliqting mz nzale-krbzlr da kxmrlz mz leplz.   
\c 4  
\s1 Nzwz-krm Navz Zvz  
\p
\v 1-2 Timoti, mz nzwz-krm, naoliq-zvzq mz nzyapwxtipx-krm Nrpakxmrlz, kxmule-esz' mrlzbz bam o mrlzbz mz leplz o trtingr. Nzalvztr-krm naokatrle leplz mz nzaopx-krde da kx vz-rbr, x mz nzatubqti-krde nidr x mz nzapqtr-krbzle drtwrdr. X aenzli-zpwxbz badr mz nzvz-nqblq-krdr natqm. Murde Mevalu Jiszs x Gct Trte sa tzobqlvz-ngrdr nzwz-krm. X mzli kc Mevalu Jiszs navz-ngrmle mz nzngini-krde King r nrlc, sa napipxbzle mz leplz amrlx nztubq-krdr o trtingr, kxmule-esz' kxnzlubeng o kxnzbzpeng.   
\p
\v 3 Murde kalr, leplz trnavz-nqblqlru nzalvztrngr angidrng. A' sa navz-nqblq-txpwzlr me pnz drtwrdr x nalalztq-lzbzng mz kxnzalvztrng kcng drtwrdr tqesz'ti badr.  
\v 4 X sa naesablqtilr da angidr mz nzo-lxlvrti-krdr be ngr nqmq krdr kcng trngiu da angidr x da kx trpnzngr drtwr ngrde.  
\v 5 A' nim, kx Timoti, namnc-nrwx-ngrn mz da amrlx. Kxmule-esz' nzaetqbz drtqm, a' navz zvz mz nzale-krm nzwzngr kcng tqaprcbo bam. Ryapwxpxbz Nrpakxmrlz mz leplz kcng trnzlxngitikalr Jiszs, mz nzrlrpx-lzbq-krbzme mz Kxetu rgu, da kc tqwaix.   
\p
\v 6-7 Murde rlrpx-lzbqpe-ngrbo mz Gct, kxmule-esz' ycpe pipz nznibq-krdr ninge. X angidatipex nzwzngr kc tqaprcmle bange mz nzngini-krnge ncblo ngr vea kxmrlz ne Kraes. Murde ota-zpwxpex mz nztu-amqngi-krnge mz nzrlxngitingr. X vo-angidr-kzx mz nzesangr kc tqyrlqmle bange x sc tqayrkrpxpex. \x + \xo 4:6-7 \xt 2 Timoti 2:4-5\x*  
\v 8 X krlzx kx sa natwzx da kxmrlzting Heven kx nzvzpxmqng mz nzabrtzlvzkr Gct nzmnc-krnge mz nrlc ka. Murde Kxetu rgu tubq zvz mz nzayzlu-krbzle da mz leplz. X mzli kc nayzlu-ngrmle, sa nakamle bange da lcng tqmrlzting. X leplz amrlx kcng tzaenzli-kzlr nzyzlu-krmle x tqabrtzlvz-kzle nidr, sa natwz-kzlr da lcng tqmrlzting.   
\s1 Natq Ngr Nzarlr-lzbqngr  
\p
\v 9 Sutitx zlwz drtwrnge nzvz-ani-krme Rom mz nzmnc-lxblr-krgi.  
\v 10 Murde Demas mrlz zlwz bade dalr nrlc. X rlaszpele ninge x vzpe taon kc Tesalonika. Kresen vzpe mz nzwz-krde mz Galesia Provins, x Taetus vzpe kz mz Dalamasia Provins.  
\v 11-12 Atwzlrpe-ngrbo Tikikzs bam mz nztekqtr-alzu-krde nim mz taon kc Efiszs. A' Luk kx mnc-txpwzkr ncdr mzli ka. Oti Jon Mak x vzmamu ncdr, murde krlzle nzokatr-krde ninge mz nzwzngr mrka.  
\v 13 Mzli kc navz-ngrme, twzm du dztungeng. Twzm kot scnge, ycbz mz mzlegi Kapzs mrkc mztea Troas. X twz-kzp buk scngeng, myapxbz krkcng tzwzngr mz be kzu. \fig Timoti, twzm buk scngeng.|alt="118 Timothy bringing the things to Paul" src="118-CN02088b.tif" size="COL" loc="2Ti 4:13" copy="David C. Cook" ref="4:13" \fig*   
\p
\v 14-15 Nzmu kx tqrmctiq Aleksada kc tqrwzngr aian, aclvetio nide. Murde rpwa'-ngrde nzalvztr-krgu, x yctxbz nzatrkati-krde ninge. A' krlz-angidrx kx Gct sa na-ayrplapxle nide.   
\p
\v 16 Mzli kc tqkot-ayrnr-ngrne mrka Rom, trpnzngr kztegung kx okatrle ninge. Murde nzrlasz-ngrdr ninge mz nzmwxlr-krdr. A' krka'-ngrne kx Kxetu rgu naipqle nidr.  
\v 17 Murde Kxetu txpwz kx tum mz nibrnge x abrmle nelznge. Delc tqyapwxtipx-zpwx-ngrbo Nrpakxmrlz mz leplz amrlx kcng trngiulrJiu tzmncng mz kot. X Gct arlapxle ninge murde trnznibqkalr ninge.  
\v 18 X krlzx kx Kxetu sa na-arlapxbzle ninge mz da kxtrka amrlx. X sa na-aprtrle ninge mrnyzde Heven.  
\p X naglqpx zvz nide. Eu, angida.   
\p
\v 19-21 Eu, sutitx-zlwzbz drtwrnge kx navz-kaipe' x mzli r nenq kzprla kc ate. Murde Erastzs sc tqmnc taon kc Korint x Trofimzs sc tqamnctxne mrkc mztea Miletzs, murde yagox.  
\p Timoti, rpibz “Nimu la,” mz Prisila ncdr Akwila, x lr ma nyz Onesiforzs. Doa lrmakxtr amrlx mrka, myapxbz Yubulzs, Prudens, Linzs, x Klaodia, nzrpibzlr bam kx, “Nim la.”   
\p
\v 22 Krka'-ngrne kx Kxetu rgu namnc zvz mz nabzm. X naokatrle nimu amrlx mz zmrlz ngrde kxmyalz. Eu, angida.  
\cls Delape. Ninge \sig Pol. \sig*