\id 2TH stc-542TH-Nat.sfm, 2 Thessalonians, Natqgu (Santa Cruz) STC, Daniel Boerger, 11/07/2007 
\ide UTF-8
\h 2 Tesalonika 
\toc3 2 Tesalonika 
\toc1 Nzryr-krbz Pol Krali Mz Lr Tesalonika 
\toc2 2 Tesalonika 
\mt1 Nzryr-krbz Pol Krali Mz Lr Tesalonika  
\imt1 Natq Ngr Nzaplxtqngr Mz Nzryr-krbz Pol Krali Mz Lr Tesalonika  
\ip Letz lc yrbz aposol Pol mz dzbe lrmakxtr kcng taon kxetu Tesalonika. Mc kz ‘Natq ngr Nzaplxtqngr Mz Nzryr-krbz Pol Kx Ayrnrngr Mz Lr Tesalonika.’ Letz krali lc tqyrle mz nibr kzdung temz mz letz kc kai. Murde mrlx kc tqrtwz letz kc kai, mz nzyzlu-krmle rlwa-ngrbzle mz Pol kzdung nrpa ngr lr Tesalonika. Rpibzle bade kx lr Tesalonika nztu-amqnging mz nzrlxngiti-krdr kxmule-esz' nzaetqbz drtqdr mz nzatrkatingr nidr. X rpi-kzpzle kx kzdung leplz nzalvztr-rbr-ngrdr kx Kraes sc tqyzlupe-mop, a' lr Tesalonika trnzprtrpeung mz nzvzmi-krde leplz nedeng Heven. Kzdung kz leplz trnzwzu, x Pol lc-apqbzle nidr.  
\ip Mz nzmu-krde lcde, Pol yrle letz krali lc mz nzapqtr-krbzle drtwr lr Tesalonika x mz nzalvztr-krde nidr mz nzyzlu-kr-mop Kraes kalr.  
\iot Mrkcng Mz Letz Lc  
\io1 Apqtr-ngrbzle drtwrdr mz nzkxpu-krdrng mz nzvz-nqblq-krdr Kraes. \ior [dckrlzde 1]\ior*  
\io1 Alvztr-ngrde nidr mz nzyzlu-krm Kraes kalr. \ior [dckrlzde 2]\ior*  
\io1 Pibzle badr kx navz zvz mz nzwz-krdr x na-ayrplapxlr kx nzpxtxpx-ngrdr nzwzngr. \ior [dckrlzde 3]\ior*  
\c 1  
\p
\v 1 Ninge Pol, nigr badr Saelas x Timoti. Ryrbzkr bamu, nimu leplz neng Gct Trtegu, x Kxetu rgu Jiszs Kxnzmcpx, kc tzmncng mz taon Tesalonika.   
\p
\v 2 Krka'-ngrne kx Gct Trte x Kxetu rgu Jiszs Kxnzmcpx naokatrlr nimu mz zmrlz ngrdr kxmyalz x namnc-zpwxamu.   
\s1 Gct Sa Na-ayrplapxle Leplz Kxnztrkang Kalr  
\p
\v 3 Mzlegrng x inwegrng, takitrde nzawi-zvz-krbzkr mz Gct nimu. Murde nzrlxngiti-krmu sc tqetunepx zvz, x nzmrlzti-lzbq-krmu sc tqatunedz.  
\v 4 Mz nzmu-krde lcde, glqpx-lzbq-ngrbzkr nimu mz mzlegung mz Kraes. Yapwxtibzkr kx nztu-amqngi-krmu x nzrlxngiti-krmu sc tqvz zvz, kxmule-esz' nzatrkatimu x trnzamnc-zpwxu nimu.   
\p
\v 5 Tu-amqngiamu mz nzatrkatingr mzli kc tqvectr-ngrbzmu leplz mz Gct mz nzngini-krde King rdr. Krlc aelwapx-ngrde kx nzpipxkr Gct kx nimu leplz kxnztubqng da angidrtx x takitrde nzprtr-krmu Heven. Murde atubqtipele nimu mz nzobq-krde.  
\v 6 Mz nzmu-krde lcde, takitrde Gct nzayrplapx-krde krkcng tzatrkatilr nimu.  
\v 7 X sa nakatx-kzle nzatrkatingr lc nimu, x nawai-kzle nigr, mzli kc Kxetu Jiszs na-adcpx-lzbq-ngrde mz nzvzo-krmle Heven, nidr badr enjrl nedeng kxnzmatqng.  
\v 8 Sa navzomqng mz nabz nyr kxwou, x mzli lc sa na-ayrplapxle leplz kcng tzpxtxpx-ngrdr nzlxngiti-krdr Gct x nzmnc-nqblq-krdr Nrpa ngr Kxetu rgu Jiszs.  
\v 9 Nzayrplapxkr Kxetu kx namule sele. Sa narpwa'-alo-ngrbzle badr nzmnc-krdr me mnc-ngrde, x trnamclru nzetukr zmatq ngrde. A' mz nzmnc-alo-krdr esz'-krdr, trpnzngr da kxmrlz kx narmctilr.  
\v 10 X leplz neng Gct sa naglqlz-ngrdr nide x kxnzrlxngiting lcng amrlx na-amatq-ngrdr nide mz da lcng na-alele mzli kc nayzlu-ngrm Jiszs. X naprtr-kzamu mz dzbede lc, murde lxngitiamu natqgr.   
\p
\v 11 Delc, nzkrka'-zvz-krgr nimu tqkxmu-ngrde sele. “Gct rgr, krka'-ngrgr kx natakitrde nidr nzlungr kc tqoliqti-ngrn nidr. X kx naokatrpzme nidr mz zmatq ngrm, murde na-alelr da kcng amrlx tqmrlz tzsuti drtwrdr mz nzlxngiti-krdr Mrlxm.  
\v 12 Gct Trte x Kxetu rgr Jiszs Kxnzmcpx, krka'-ngrgr kx naokatramu nidr mz zmrlz ngrmu kxmyalz, murde leplz na-amatqlr drtq Kxetu rgr Jiszs mz nike nzalelr x na-amatq-kzlr nidr mz nzngini-krdr leplz nedeng. Eu. Angida!”   
\c 2  
\s1 Kxtrvz-nqblqleu Lou Sc Gct Sa Navz-kaip, X Kraes Sc Tqvz-atem  
\p
\v 1 Mzlegrng x inwegrng, rpikr napi-mopwzkr du dalr mzli kc nayzlu-ngrm Kxetu rgu Jiszs Kxnzmcpx, x mzli kc nayrlwr-lxblr-ngrgu badr.  
\v 2 Bzkq rlr-ngrbzmu mz leplz nzatalvzo-krdr x nzataprlz-krmlr nabzmu, mz nzrpi-krbzlr bamu kx, “Mzli kc navz-ngrm Kxetu kaputr-pnzm.” Murde mzli lc trvzkap. Kxmule-esz' nzrpilr kx da lc aelwa-ngrbz Mqngrkxtr, o nzpibzlr da lc mz nzalvztrngr, o mz nrpa kx nzrpilr kx atwzlr-ngrbzkr,  
\v 3 a' bzkq lxngitiamu nidr. Murde da li lang nakaputr-kaipqng x Kxetu kc tqyzlu-atem. Leplz nakqlung kalr kx naxpqbrlr-ngrdr Gct. X Kxtrvz-nqblqleu Lou sc Gct sa navzm, nide kc naprtr kalr mz nzayrplapx-alongr mz Hxl.  
\v 4 Ncblo lc sa narpwa'-ngrbzle mz leplz nzangio-krdr Yawe Gct angidr x kxtrngiu gct angidr kz. Murde sa na-amyalz-lzbqbz badr. X sa nawxbupx-kzp Mangr-nzangiongr Yawe Jerusalem x narpile kx nide Gct.   
\p
\v 5 Nadcpx mz drtwrmu da kcng tqpi-pnzbo bamu mzli kc tqmnc-ngrgu.  
\v 6 X sc tqkrlzpeamu zmatq kc tqlolvzbele nide mzli ka. A' mzli kc nakrlz-ngrbzle mzli rde, Gct sc tqrlrpx-ate-ngrde nzvz-krm Kxtrvz-nqblqleu Lou scde.  
\v 7 Zmatq ngr Setzn sc tqwz-kapqpe mz nrlc mzli ka. A' Kxtrvz-nqblqleu Lou sc Gct trvzkap murde trkatxkangr Gct Kxrlolvz zmatq ngrde.  
\v 8 Mzli kc nakatxpengr Gct zmatq Kxrlolvz, Kxtrvz-nqblqleu Lou sc Gct sc tqvzpem, x Kxetu Jiszs sc tqyzlu-atem. X sa naodati-atwrnr-ngrbzle zmatq ngr Kxtrvz-nqblqleu Lou sc Gct lcde mz zmatq ngr nzvz-krmle, x nanibqle nide mz natq ngr naode.  
\v 9 Kxtrvz-nqblqleu Lou sc Gct lc sa navzm mz zmatq ngr Setzn. X sa na-aelwapx-ngrde rkx kxkqlu kx bletipx-lxblrng kx narpibz leplz nzvzpxmqng mz Gct.  
\v 10 X sa na-aleti-kzle da kxtrka kang kqlu, murde rpile naesabrti-ngrde leplz kcng naodati-along. Sa naesabrtile nidr murde napxtxpx-ngrdr nzlxngiti-krdr Nrpa ngr Jiszs, kc na-arlapxpele nidr.  
\v 11 X sa na-aprcbz Gct nidr mz nzlxngiti-zvz-krdr nzpokiakr Kxtrvz-nqblqleu Lou scde.  
\v 12 Murde krkcng amrlx kznikeng trnzlxngitilru Nrpakxmrlz, a' nzsuti txpwz drtwrdr nzalengr da kxdrka'ngr, na-ayrplapxng.   
\s1 Nzmcpxmu Murde Narlapxamu  
\p
\v 13 Mzlegrng x inwegrng, Gct mrlztile nimu. X abzo mzli kc tzwzngr nrlc, mcpxle nimu murde na-arlapxle nimu kalr. X arlapxle nimu murde lxngitiamu nzalvztrngr angidr x Mqngrkxtr atrle nimu. Mz nzmu-krde lcde, takitrde na-awi-zvz-ngrbzkr bade nimu.  
\v 14 Gct kqlele nimu mz Nrpakxmrlz kc tqlemgr bamu, murde leplz na-amatqlr nimu da kc tqwai nzamatq-krdr Kxetu rgu Jiszs Kxnzmcpx.  
\v 15 Mz nzmu-krde lcde, natu-amqngi-zvzamu mz nzlxngiti-krmu natq angidr kc tqalvztrpzkr bamu mz nzryapwx-krgr x mz nzryr-krbzkr bamu.   
\p
\v 16-17 Gct mrlztile nigu. X mz zmrlz ngrde kxmyalz, apqtr-zvzmle drtwrgu x okatrle nigu mz nzobqtipx-krgu da kcng nakam Kraes bagu. Krka'-ngrgr kx Kxetu rgu Jiszs Kxnzmcpx x Gct Trtegu na-apqtrpzlr drtwrmu. X na-axplrlr nimu mz nzale-krmu x nzrpi-krmu da kxmrlzting amrlx.   
\c 3  
\s1 Krka'-ngrnamu Nigr  
\p
\v 1 Mzlegrng x inwegrng, krka'-ngrnamu nigr murde Nrpa ngr Kxetu naletx-anipwz x nalxngiti leplz kxkqlu, da kc tqwaipeamu.  
\v 2 Krka'-kz-ngrnamu kx na-arlapxbz Gct nigr mz mq leplz kxnztrkang, kxnzvz-rbrng, x kxtrnzlxngitilru Kxetu rgu.   
\p
\v 3 A' Kxetu kc tqbrti drtwr, dekc na-axplrle nimu x na-arlapxbzle nimu mz zmatq ngr Setzn kc Tqdrka'ngr, murde ma tqodatile nzrlxngiti-krmu.  
\v 4 Abrtrpzkr drtwrgr mz Gct, delc drtwrgr tqbr-ngrde kx sa namnc-nqblq-zvzamu natqgr kcng tqpibzkr.  
\v 5 Krka'-ngrgr kx nabatrpzle nzkrlz-krmu kx Gct aodule nimu, kx na-atu-amqngi-zvzle nimu, da kc tqwaipe Kraes.   
\s1 Bzkq Drtqmu Sa  
\p
\v 6 Pibzkr bamu mz drtq Kxetu rgu Jiszs Kxnzmcpx, kx navecpx-lzbqmamu mz kxnzrlxngiting kcng drtqdr tqsa x trnzvz-nqblqlru nzalvztrngr kc tqpibzkr bamu.  
\v 7 Murde krlzpeamu kx nqmq krgr ngipe lrpzki kx navz-nqblqamu. Drtqgr trtau mzli kc tqmnc-ngrbzkr bamu.  
\v 8 X mz nzmnc-krgr, xpe-zvzbzkr dakxnzng mz leplz. X wz-zvzkr mz zbq kang kqlu mz nzatatr-krmgr trau, murde drtqmu naopx x ma tqrkabzkr bamu nzwzngr kx naetunepxngr nzwz-krmu.  
\v 9 Kxmule-esz' takitrde nzpi-krbzkr bamu nzokatr-krmu nigr mz nzngini-krgr aposol, a' aclveti-lzbqgr mz nzngini-krbzkr lrpzki kc navz-nqblqamu. \x + \xo 3:9 \xt Matiu 10:10; Luk 10:7; 1 Korint 9:1-12; Galesia 6:6; 1 Timoti 5:18\x*  
\v 10 X lou kc tqpibzkr bamu mzli kc tqmncbe-ngrbzkr bamu, nide sele, “Mrlx kx pxtxpx-ngrde nzwzngr, trtakitrdeu nzmu-krde.” \fig Mrlx kx pxtxpx-ngrde nzwzngr, trtakitrdeu nzmu-krde.|alt="116 He who refuses to work, it isnt fitting for him to eat." src="116-WA03881b.tif" size="COL" loc="2TH 3:10" copy="Graham Wade" ref="3:10" \fig*   
\p
\v 11 Pi-ngrbole murde xlrkr kx kzdung nimu nzpxtxpx-ngrdr nzwzngr. X trpnzu drtwrdr dztudr, a' pnz txpwz drtwrdr dztu leplz kc-kzng.  
\v 12 Mz nzvz-nqblq-krde zmatq rgr mz nzngini-krgr aposol ne Kxetu rgu Jiszs Kxnzmcpx, pibzkr bamu kx leplz kxnzmulr lcng na-apqbrtxtrpwzlr naodr x na-aleng nzwzngr kx na-atatr-ngrmlr.  
\v 13 A' mz nimu amrlx, bzkq yrlqpx-lzbqamu mz nzale-krmu da kxmrlz.   
\p
\v 14 Mrlx kx trmnc-nqblqleu natq kcng tqyrbo bamu mz letz lc, namcpwzmu nide. X navecpx-lzbqmamu bade, murde drtqde la namya mz nzvz-rbr-krde.  
\v 15 A' bzkq apusr-ngrnamule enqmi rmu, a' apusr-ngrnamule mzlemu o inwemu kx nalc-apqbzamu.   
\s1 Natq Ngr Nzarlr-lzbqngr  
\p
\v 16 Krka'-ngrgr kx Kxetu r Nrwx namncbz bamu x naka-zvzbzle bamu nrwx, murde namnc-zpwxamu.   
\p
\v 17 Mz nzvz-nqblq-krnge nqmq krnge, yr-angidrx natq lcng mz mqnge, “Nimu la!” Murde na-aelwapx-ngrne kx atwzlr-ngrbo letz lc.   
\p
\v 18 Krka'-ngrgr kx Kxetu rgu Jiszs Kxnzmcpx naokatrle nimu amrlx ngrmu mz zmrlz ngrde kxmyalz.  
\cls Delape. Ninge \sig Pol\sig*,  
\cls nigr badr \sig Saelas\sig* x \sig Timoti.\sig*