\id 1JN - Nali Translation \ide UTF-8 \h 1 John \toc1 1 John \toc2 1 John \toc3 1Jn \mt1 1 John \c 1 \s1 Nongan para taleh \p \v 1 Nongan para taleh ara para koluw-koluw mamu kinna ma melit masih mapu kantayah, pe yowu kanhilingiy, pe yowu kannimei kinna mara yowu, pe mara yowu kinnime yiy, pe nima yowu kinnahatek kinna kili yiy—Nongan para taleh ara ko, yowu topo pohowei. \v 2 Pe taleh ara, ara kinsa yelan, pe yowu kannimei, pe yowu topo tiyaniy, pe yowu pohowe nongan para taleh mepo andre kinto-kinto, kisa kili wawu mepo iro kili Tamarou pe kinsa yelan kinsa kili worou. \v 3 Pe yowu, ara yowu pohowe tesah mepo yowu kannimei pe kanhilingiy, pwen pe andre wawu yi kambultere wawu kasa sura yowu. Pe mbultere torou, ara iyapolo Tamarou, pe iyapolo Norun Yesu Kristus. \v 4 Pwen yowu ratuluwi nongan aro, ara para kimbusi worou kapep kiya pwesai. \s1 Karikai nondriya nganan \p \v 5 Pwen nongan aro, ara yowu kanhilingiy iyau kili Yesu Kristus, pe yowu pohowei isa kili wawu: Pe Ngindrai, ara nganan, pe lokuhan kinto kili yiy pwi masih. \v 6 Pwen kapa tukapa worou ngara kambultere para totohun kiya kili Ngindrai, hapeko ngara koro tokuyani kultuw para lokuhan manau, pwen ara tupwasoyou pe tukantokuyani nongan ndrokonan pwi. \v 7 Hapeko kapa tukarikai kiya nganan, tehe yiy, ara ita nondriya nganan, ara tumbultere iyawule sura hamou-hamou, pe ndreye Norun Yesu, ara imbusi worou turayah howen iya hu pakut mwomwan torou masih. \p \v 8 Pe kapa tukapa pakut mwomwan kinto kili tou pwi, ara tupwaske rou mbukenan, pwen nongan ndrokonan, ara kinto kili tou pwi. \v 9 Pe kapa tukapohopoh kiya hu pakut mwomwan torou kiya kii Ngindrai, pwen Ngindrai, ara lohongan ndrisiyon pe kultuw tan para tamwanye, ara imwonen, pe ilahiy kitali hu pakut mwomwan torou, pe kimbusi worou karayah howen kiya hu kultuw kanmwonen pwi. \v 10 Pe kapa tukapwai kapa, tukonho mbusi pakut mwomwan pwi, pwen tumbusi Ngindrai irayah tehe ndramat hamou para pwasoyou, pe nongnan, ara kinto kiltou pwi. \c 2 \p \v 1 Wawu noru, uratuluwi nongan aro isa kili wawu para wawu mbuna akambusi pakut mwomwan. Hapeko kapa hamou kimbusi pakut mwomwan, pwen ndramat hamou para sopwat iripo para kiwong kiya kili Tamarou para kipenanirou—yiy ara Yesu Kristus, Ndramat Imwonen. \v 2 Yiy, ara iyki yiy mbukenan tehe yukyuk para kirapiyani hu pakut mwomwan torou, pe andre kinrapiyani hu pakut mwomwan torou o, ara pwi, hapeko andre kirapiyani hu pakut mwomwan ta hu ndramat masih kenne para kol pwan. \p \v 3 Pe tupahasaniy tehe worou kansapahasani yiy kapa tukaro ndruwa hu nongan para pwahanou tan. \v 4 Pe ndramat mepo ipa, “Upahasani yiy,” hapeko kinto ndruwa hu nongan para pwahanou pwi, ara yiy ndramat hamou para pwasoyou, pe nongan ndrokonan ta Ngindrai, ara kinto kili yiy pwi. \v 5 Hapeko kapa ndramat hamou kiho ndruwa nongnan, pwen namiliwa Ngindrai, ara ipep ita kili yiy. Kultuw mepo andre kimbusi worou tukapahasaniy tutora kili yiy, ara tehen toro: \v 6 kapa ndramat hamou kippai sura Ngindrai, pwen kitokuyani tesah Yesu ngara kimbusiy. \p \v 7 Pwen wawu kowase, kuntatuluwi nongan handra para pwahanou howen kinsa kili wawu pwi, hapeko nongan para pwahanou saken mepo akanwiriy koluw kinna. Nongan para pwahanou saken iye, ara nongan ara ko mepo akanhilingiy pwen. \v 8 Pe tehen tora ko urupo ratuluwi nongan para pwahanou howen handra isa kili wawu, pe nongan ndrokonan para aliy, ara akannimei iro kili Kristus pe wawu yi. Paratesah, lokuhan, ara itapo iyau, pe ngana nongan ndrokonan, ara kinlenganiy. \p \v 9 Pwen ndramat mepo ipa ita nondriya ngana Yesu Kristus, hapeko kimwisnani nalin hamou, ara ita ndron nondriya lokuhan. \v 10 Pwen ndramat mepo ndriyan kimbulihi nalin hu, ara ita nondriya nganan, pe hapesah para kimbusi hu kayos, ara pwi. \v 11 Hapeko yiy mepo ihingasi nalin, ara ita nondriya lokuhan, pe ita rikai nondriya lokuhan, pe ikowu hape aleheh itapo iya aliy. Paratesah, lokuhan kinyohi maran. \q1 \v 12 Wawu noru, uratuluwi nongan iye isa kili wawu, \q2 paratesah, iya ngala Yesu opu, kintapiyani hu pakut mwomwan tawawu. \q1 \v 13 Yo uratuluwi nongan aro isa kili wawu mepo wawu kanpahas kinna lohongai ndrisiyon tawawu ndrangan niwen kinna kili Ngindrai, \q2 paratesah, wawu kanpahasani yiy koluw kinna. \q1 Yo uratuluwi nongan aro isa kili wawu mepo mahapo ko wawu pwotisingi lohonga wawu iya kili Ngindrai, \q2 paratesah, akantamwaitini Sinai. \q1 \v 14 Uratuluwi nongan aro yi isa kili wawu mepo tehe hu mbunah, \q2 paratesah, akanpahasani Tamarou. Yo uratuluwi nongan aro isa kili wawu mepo wawu kanpahas pwen kinna ata Ngindrai mepo yiy para koluw kinna. \q1 Yo uratuluwi nongan aro isa kili wawu mepo mahapo ko wawu pwotisingi lohonga wawu iya kili Ngindrai, \q2 paratesah, wawu pwokeya wawu, \q2 pe nongna Ngindrai, ara ita lohonga wawu lang masih, \q2 pe akantamwaitini pwoke ta Sinai pwen. \s1 Ndriya wawu mbuna kimbuluhi melit para kol pwan \p \v 15 Ndriya wawu mbuna kimbuluhi kultuw mwomwan ta hu ndramat para kol pwan, ndre sehe kultuw mwomwan para kol pwan. Kapa ndramat hamou ndriyan kimbuluhi kultuw mwomwan ta hu ndramat para kol pwan, ara namiliwai ta Tamarou kinto kili yiy pwi. \v 16 Paratesah, hu kultuw mwomwan masih ta hu ndramat para kol pwan— tehe hu namiliwai para nombuwe ndramat, pe namiliwai para mara ndramat kilimiri melit pe kinamiliy, pe kultuw para kasikiye ndramat kiya melit soyon—hu kultuw mwomwan masih aro, ara kinyau kili Tamarou pwi, hapeko iyau kol pwan. \v 17 Pe hu kultuw mwomwan ta hu ndramat para kol pwan, pe hu namiliwai para aliy, ara andre kimmun o mwaihei, hapeko ndramat mepo imbusi namiliwai pwokeyan ta Ngindrai, ara andre kinto-kinto. \s1 Hu mepo hupa hukowu ta noru Ngindrai kamai, ara marahu kiro \p \v 18 Wawu noru, lang kinsa komulmun, pe akanhilingiy tehe kristus pwasoyou, ara itapo isa. Pe mahapo yi, ara hu kristus pwasoyou soyon, ara hu kansa. Pwen tehen aro ko tukapahasaniy tehe lang kinsa komulmun. \v 19 Yihu kantali rou kanna mawen, hapeko yihu ara para surarou imwonen pwi. Paratesah, kapa hu para sura tou, ara andre hu koro manau sura tou, hapeko yihu tali rou huyau, ara ipwainganiy tehe yihu para sura tou pwi. \p \v 20 Wawu kanwiri lomwes iyau kili Mwoiwan Haiyan ta Ngindrai, pe wawu masih wawu pahasani nongan ndrokonan ta Ngindrai\f + \fr 2:20 \fq TP: nongan ndrokonan ta Ngindrai \ft ENG: true message \f*. \v 21 Wawu kankowu nongan ndrokonan pe uratuluwi nongan isa kili wawu, ara pwi, hapeko wawu pahasaniy, paratesah, pwasoyou kinyau nongan ndrokonan pwi. \v 22 Ndramat para pwasoyou, ara hiyeh? Ndramat mepo ipa ikowu tehe Yesu, ara Kristus. Ndramat tehen tora, ara yiy kristus para pwakekeriu—yiy ipa ikowu ta Noru Ngindrai Kamai pe Taman. \v 23 Ndramat ipa ikowu ta Noru Ngindrai Kamai, ara Taman kinto kili yiy pwi, pe yiy mepo ipohowe Noru Ngindrai Kamai iya ngawan, ara Taman ita kili yiy. \p \v 24 Pwen tesah akanhilingiy koluw kinna, ara ita manau kili wawu. Kapa tesah akanhilingiy ara itandron kili wawu, pwen wawu tora ndron kili Noru Ngindrai Kamai pe Taman i. \v 25 Pe tesah kintandranga rou kinna aliy, ara iye—ara taleh andre kinto-kinto. \p \v 26 Yo urupo ratuluwi hu nongan aro isa kili wawu, ara iyata hu mepo hu pakanohonou para kaluwani wawu kayasongsin. \v 27 Hapeko lomwes mepo wawu kanwiriy iyau kili yiy, ara ita manau kili wawu, pe kinlahi hamou kisa pe kihinuwani wawu, ara pwi. Hapeko Mwoiwan Haiyan kinhinuwani wawu kinna melit masih, pe lomwes ara, ara ndrokonan, pe pwasoyou pwi—pwen kinhinuwani wawu pe akoro manau kili yiy. \s1 Hu noru Ngindrai pe pakut mwomwan \p \v 28 Pwen mahapo, wawu noru, akoro pai manau kili Kristus, pwen kapa kiro mwonen nakimui kisa, ara andre tukoro tine pwokeyan, pe andre tukanmasi kiro mbulmaran kiro mwonen kisa, ara pwi. \p \v 29 Kapa wawu pahasaniy tehe kultuwayin ara imwonen, pwen wawu pahasaniy tehe hu ndramat masih mepo hukambusi tesah imwonen, ara yihu noru Ngindrai. \c 3 \p \v 1 Akahalingiy, Tama rou ndriyan imbuluhi rou namandran iya, pe iyki ndriyan isa kili tou, para kapohowe rou noru Ngindrai! Pe worou, ara tehen tora! Pwen ndroiyin ara pe hu ndramat para kol pwan kanpahasani worou pwi, paratesah, yihu kanpahasani yiy pwi. \v 2 Wawu kowase, mahapo worou noru Ngindrai, pe worou nakasarayah tesah kamulan, ara kinileu mapu. Hapeko tupahasaniy tehe kiro mwonen Kristus kisarayah, ara andre tukarayah tehe yiy, pe andre tukanime yiy, ara tehe yiy imwonen. \v 3 Hu ndramat masih mepo hutora longani melit itapo isa iyau kili yiy, ara andre hu mbukenahu kambusihu karayah howen tehe yiy mbukenan ara yiy howen. \p \v 4 Pe hu masih mepo hu mbusi pakut mwomwan, ara hu ndrihisani nongan para pwahanou ta Ngindrai, ndrokonan para aliy pakut mwomwan, ara kultuw mwomwan para ndrihisani nongan para pwahanou ta Ngindrai. \v 5 Wawu pahasaniy tehe Kristus kinsarayah, para kirapiyani hu pakut mwomwan torou kayau. Pe pakut mwomwan, ara kinto kili yiy pwi. \v 6 Pe hamou kiro kili yiy, ara andre kinto waiyaniy para kiro mbusi pakut mwomwan , ara pwi. Pe ndramat kiro mbusi pakut mwomwan manau, ara andre kinnime Kristus pwi, ndre kinpahasani yiy pwi, ara pwi. \p \v 7 Wawu noru, hamou mbuna kiluwani wawu kayasongsin. Ndramat mepo imbusi melit imwonen, ara kultuwayin imwonen tehe Kristus i, yiy kultuwayin imwonen. \v 8 Pe ndramat mepo ngara kimbusi pakut mwomwan, ara yiy ata sinai, paratesah, sinai ara kinmbusi pakut mwomwan koluw kinna. Pwen ndroiyin ara pe Noru Ngindrai Kamai isarayah, ara para kipwalngani mbulya sinai. \v 9 Yiy mepo irayah noru Ngindrai, ara andre kinro waiyaniy para kiro mbusi pakut mwomwan ndron, ara pwi, paratesah, nongna Ngindrai, ara ita ndron kili yiy, pe andre kiro mbusi pakut mwomwan manau, ara pwi. Paratesah, yiy kintayah noru Ngindrai pwen. \v 10 Pwen andre tukayirowe hu noru Ngindrai, pe hu noru sinai, ara tehen toro: Ndramat kinmbusi kultuw kinmwonen pwi, ndre kinnamili nalin pwi, ara yiy noru Ngindrai pwi. \s1 Ndriyam kimbulihi hamou-hamou \p \v 11 Nongan mepo wawu kanhilingiy koluw kinna, ara iye: Ndriya rou kimbulihi hamou-hamou. \v 12 Wawu mbuna akarayah tehe Kain, mepo yiy ata sinai, pe itingundru nalin. Pe paratapeh pe itingundrun? Paratesah, kultuwayin ara mwomwan masih, pe kultuwayi nalin, ara imwonen. \v 13 Wawu nali, mwoiwa wawu mbuna kihin kapa hu ndramat para kol pwan hu kamwisnani wawu. \v 14 Worou tukanpahasaniy tehe tukantali kimat pe tukanwiri taleh mepo andre kinto-kinto, paratesah, ndriya rou imbuluhi nali rou hu. Pe yiy mepo ndriyan kinmbuluhi nalin pwi, ara ita ndron pahandra pwoke para kimat. \v 15 Ndramat kimwisnani nalin, ara yiy ndramat para tingundru ndramat, pe wawu pahasaniy tehe ndramat para tingundru ndramat, ara andre kinwiri taleh kinto-kinto pwi. \p \v 16 Pwen andre tukapahasani kultuw para namiliwai, ara tehen toro: Yesu Kristus, ara iyki mwoiwan para kisopwat rou. Pwen worou i, ara tukaiki mwoiwa rou para kasopwat nali rou hu. \v 17 Kapa ndramat hamou mamenmenan soyon para kol pwan pe kinime nalin iro ndroisi handra-handra, hapeko koyun kinsikirani nalin pwi, tehen tapeh pe namiliwa Ngindrai andre kiro kili yiy? \v 18 Pwen wawu noru, mbuna tukanamili ndramat kiya hu nongan ndre kiya poho rou opu, hapeko kiyapolo hu kultuwayi rou pe nongan ndrokonan. \v 19 Pwen iye ko imbusi worou tupahasaniy tehe worou ara para nongan ndrokonan, pe karahatini worou koro mwoimwoi mbulmara Ngindrai, \v 20 kapa ndriya rou kiporu. Paratesah, tupahasaniy tehe Ngindrai, ara ipahasani melit masih, pe lohongan ara iramwatini lohongai masih iripo ndriya rou. \p \v 21 Wawu kowase, kapa ndriya rou kinporu pwi, ara tukarahatini rou koro mbulmara Ngindrai. \v 22 Pe kapa tukatohun pe kasok yiy, ara andre kiykiy kisa kili worou, paratesah, ngara tukoho ndruwa hu nongan para pwahanou tan, pe ngara tukambusi kultuw mepo inamiliy. \v 23 Pwen nongan para pwahanou tan, ara iye: Tukapwotisingi lohonga worou kiya ngala Norun Yesu Kristus, pe ndriya rou kimbulihi hamou-hamou tehe kinpwandrandrahani worou. \v 24 Pe hu mepo huho ndruwa nongan para pwahanou tan, ara huppai sura yiy, pe yiy ippai sura hu. Pwen aro ipwainganiy tehe Ngindrai ippai sura tou. Pe tupahasaniy tehe Ngindrai ippai sura tou, ara iyau kili Mwoiwan Haiyan mepo Ngindrai kiniykiy iripo kiltou. \c 4 \s1 Wawu kanohonou hu mwomwoyou \p \v 1 Wawu kowase, wawu mbuna akapwotisingi lohonga wawu kiya kili hu ndramat mepo Mwoiwan Hiyan kinto kili hu pwi. Hapeko akanohonou pe akayirowei hiyan namu tehe hu mwomwoyou ara ata Ngindrai ndre pwi, paratesah, hu poropet para pwandrandraman, ara hu kanna kene kol pwan. \v 2 Pe andre tukayirowe Mwoiwa Ngindrai, ara tehen toro: Hu ndramat masih mepo huwong ngawan tehe Yesu Kristus ara irayah ndramat, ara huyau kili Ngindrai. \v 3 Hapeko yiy mepo kinwong ngawan pe kinhari ngala Yesu pwi, ara kinyau kili Ngindrai pwi. Aro ara mwoiwa kristus para pwandrandraman, mepo wawu kanhilingiy tehe andre kisa, pe mahapo, ara kinsa iripo kol pwan pwen. \p \v 4 Wawu noru, wawu yau kili Ngindrai, pe wawu kantamwaitini hu poropet para pwandrandraman, paratesah, yiy mepo ita nondriyam, ara pwoke tan namandran iya, iya kili yiy mepo iripo kol pwan. \v 5 Yihu, ara para kol pwan, pwen hu wong iya marai para kol pwan, pe hu ndramat para kol pwan, ara huhilingi hu. \v 6 Worou tuyau kili Ngindrai, pe yiy mepo ipahasani Ngindrai, ara ihilingi rou, hapeko hiyeh kinyau kili Ngindrai pwi, ara andre kinhilingi rou pwi. Iya lohongai aro ko, worou andre kayirowe Mwoiwa nongan ndrokonan pe mwomwoyou pwasoyou. \s1 Namiliwa Ngindrai pe namiliwa rou \p \v 7 Wawu kowase, ndriya rou kimbuluhi hamou-hamou, paratesah, ndriyai para kambuluhi hamou-hamou, ara iyau kili Ngindrai. Hu masih mepo ndriyahu imbuluhi hu ndramat, ara hu noru Ngindrai, pe hupahasani Ngindrai. \v 8 Pe yiy mepo ndriyan kinmbuluhi hu hayah pwi, ara ikowu ta Ngindrai, paratesah, Ngindrai, ara ndriyan ngara kimbulihi hu ndramat. \v 9 Ngindrai ipwaingani namiliwan isa kili worou, ara tehen toro: Ipwandrisa Norun hamou opu isa kol pwan, pwen andre tukoro wiri taleh kiyau kili yiy. \v 10 Ndriya rou imbuluhi hamou, ara tehen toro: Worou tukannamili Ngindrai imu, ara pwi, hapeko yiy inamili worou pe ipwandrisa Norun isa tehe yukyuk para kirapiyani hu pakut mwomwan torou. \v 11 Pwen wawu kowase, kapa Ngindrai ndriyan kinmbuluhi rou, pwen ndriya rou, ara kimbulihi hamou-hamou i. \v 12 Ndramat hamou kinho nime Ngindrai pwi, hapeko kapa ndriya tou kimbulihi hamou-hamou, Ngindrai iripo kili worou, pe namiliwan, ara irayah ngawan isa kili worou. \p \v 13 Tehen toro ko, tupahasaniy tehe turopo mwalen, ara iyau kili yiy, pe yiy iripo kili worou, paratesah, Mwoiwan, ara kiniykiy kinsa kili worou. \v 14 Pe tukannimei pe tukantiyaniy tehe Taman, ara ipwandrisa Norun Kamai para kirayah Ndramat para Sopwat hu ndramat para kol pwan. \v 15 Kapa ndramat hamou kiwong ngawan tehe Yesu ara yiy Noru Ngindrai Kamai, pwen Ngindrai ita kili yiy, pe yi i, ara ita kili Ngindrai. \v 16 Pwen tupahasaniy pe tupwotisingi lohongarou tehe Ngindrai ndriyan imbuluhi rou. Ngindrai ara ndriyan ngara kimbulihi hu ndramat. Hu mepo hutora nondriya namiliwai, ara hutora kili Ngindrai, pe Ngindrai ita kili hu. \p \v 17 Iyau meresai tehen toro ko, wou kanamili ndramat hamou tisingiy, pwen andre tukarahatini rou pwokeyan kiro lenge tamwanye, paratesah, turayah tehe Yesu turopo kol pwan iye. \v 18 Worou andre kannoh ta Ngindrai pwi, kapa worou kanamili yiy imwonen masih. Paratesah, hamou kinoh, ara andre kiwiri koran. Pe yiy mepo inoh, ara namiliwai ndrokonan kinto kili yiy pwi. \p \v 19 Tunamili hamou-hamou, paratesah, yiy kinnamili worou imu. \v 20 Kapa ndramat hamou kipa, “Yo unamili Ngindrai, ” hapeko ihingasi nalin, ara yiy ndramat hamou para pwasoyou. Paratesah, kapa ndramat hamou kinho namili nalin mepo ngara kiro nime yiy, ara kinlahi para kinamili Ngindrai mepo kinho nime yiy pwi. \v 21 Nongan para pwahanou iye, ara kiniykiy kinsa kiltou: Tehe ndramat mepo ndriyan kimbuluhi Ngindrai, ara ndriyan kimbuluhi nalin i. \c 5 \s1 Lohongai ndrisiyon iya kili Noru Ngindrai Kamai \p \v 1 Pe hu ndramat masih mepo hu pwotisingi lohongahu hu tehe Yesu ara Kristus, ara yihu noru Ngindrai. Pe yihu masih mepo ndriyahu imbuluhi taman, ara ndriyahu kimbuluhi norun i. \v 2 Pwen worou andre kapahasaniy tehe tunamili hu noru Ngindrai, ara tehen toro: Worou kanamili Ngindrai, pe tukoho ndruwa hu nongan para pwahanou tan. \v 3 Pe namiliwa Ngindrai, ara tehen toro: Tukoho ndruwa hu nongan para pwahanou tan. Pe hu nongan para pwahanou tan ara waison o para tukatokuyaniy. \v 4 Paratesah, hu masih mepo hu noru Ngindrai, ara hu ramwaitini hu kultuw mwomwan para kol pwan. Lohonga rou ndrisiyon aro, ara iyki pwoke namandran para karamwaitini kultuw mwomwan ta hu ndramat para kol pwan. \v 5 Pwen hiyeh ilahiy para kiramwaitini pwoke ta hu ndramat para kol pwan? Yihu kopu mepo hu pwotisingi lohongahu tehe Yesu, ara Noru Ngindrai Kamai. \p \v 6 Pwen yiy aro ko ara isawiri paptais iya ndran pe imat pe ndreyen imuw—yiy mepo Yesu Kristus. Yiy kinsa pe kiniwiri paptais o ara pwi, hapeko ipaptais pe ndreyen imuw. Pe Mwoiwan Haiyan ara itiyani titiye tan, paratesah, Mwoiwan Haiyan, ara yiy ndrokonan. \v 7 Paratesah, melit matindra ara itiyani titiye tan: \v 8 Mwoiwan Haiyan, ndran, pe ndrai, hu matindra kene, ara hutiyani titiye handra ko. \v 9 Worou tupwotisingi lohongarou iya titiye ta ndramat, hapeko titiye ta Ngindrai, ara ihohin iya, paratesah, titiye ta Ngindrai opu, ara itiyani titiye ta Norun. \v 10 Ndramat mepo ipwotisingi lohongan iya kili Noru Ngindrai Kamai, ara ipahasani titiye iye. Pe yiy mepo kinpwotisingi lohongan kinna kili Ngindrai pwi, ara imbusi yiy irayah ndramat hamou para pwasoyou. Paratesah, kinpwotisingi lohongan kinna titiye mepo Ngindrai kintiyaniy iyata Norun, ara pwi. \v 11 Pe titiye aro, ara tehen toro: Ngindrai kiniyki taleh mepo andre kinto-kinto ara kinsa kiltou, pe taleh aro, ara ita kili Norun. \v 12 Sehe ndramat mepo Noru Ngindrai Kamai ita kili yiy, ara taleh ita kili yiy. Pe yiy mepo Noru Ngindrai Kamai kinto kili yiy pwi, ara taleh kinto kili yiy pwi. \s1 Nongan iyahapwen \p \v 13 Uratuluwi hu nongan aro isa kili wawu mepo wawu pwotisingi lohonga wawu iya ngala Noru Ngindrai Kamai, pwen andre akapahasaniy tehe taleh kinto-kinto, ara ita kili wawu. \v 14 Pe tukanrahatinirou kinna mbulmara Ngindrai, pwen tukatohun toro: Pe kapa tukasok yiy kiya hapesah kiho ndruwa namiliwan pwokeyan, ara andre kihilingi rou. \v 15 Pe kapa tukapahasaniy tehe ngara kihilingi worou–pwen tesah tukasok–ara tukapahasaniy tehe tukanwiriy pwen kili yiy. \p \v 16 Pe kapa akanime nali wawu hamou kimbusi pakut mwomwan handra mepo andre kinluwani yiy kinna kimat pwi, ara akatohun pe Ngindrai andre kiyki taleh kiya kili yiy. Pe uwong ara iyata hu mepo pakut mwomwan ta hu kinho luwani hu kinna kimat pwi. Pakut mwomwan handra, ara ngara kiluwani ndramat kiya kimat. Pe kunpwai para akatohun kiya aliy, ara pwi. \v 17 Hu kultuw mwomwan masih, ara pakut mwomwan, pe pakut mwomwan handra, ara kinho luwani ndramat kinna kimat pwi. \p \v 18 Pe tupahasaniy tehe ndramat mepo irayah noru Ngindrai, ara andre kinho mbusi pakut mwomwan manau, ara pwi. Paratesah, Noru Ngindrai Kamai, ara ipwokerani hu huro hiyan, pe kinlahiy sinai kipokasiyani hu, ara pwi. \v 19 Pe tupahasaniy tehe worou, ara noru Ngindrai, pe hu masih mepo hu kanpahasani Ngindrai pwi, ara hutora pahandra pwoke ta sinai. \v 20 Pe tupahasaniy i tehe Noru Ngindrai Kamai ara kinsa, pe kiniyki lohongai ileu kinsa kili worou, pwen andre tukapahasani yiy mepo yiy ndrokonan. Pe iyau kili Norun Yesu Kristus, pwen worou tutora kili yiy mepo yiy ndrokonan. Pe yiy, ara Ngindrai ndrokonan, pe yiy ara taleh mepo andre kinto-kinto. \p \v 21 Pwen wawu noru, akoro mawen kili hu kerewek.