\id 1JN - Nehan NT [nsn] -Papua New Guinea 2011 (web 2014) 
\h 1 Jon 
\toc1 A uakikilangana ro bolobolo ke boloin Jon 
\toc2 1 Jon 
\toc3 1Jo 
\mt1 1 Jon  
\mt2 A uakikilangana ro bolobolo ke boloin Jon  
\imt1 No uakikilangana ro bolobolo Jon  
\ip Jon ter uakikilanganar tamata ke uakeluk tang Iesu. Inggono ke ate uaia tun tang Iesu. Doh inggono ke ate uaia tun ponompe pare Iesu te God (1Jo 1-3).  
\ip Jon ke bolo toro bolobolo rone, o la tasir tamatang tagorong mana tar ate pare God e malauelhr tasisin (1Jo 3.1). God e malara tun tagigeig, temaene inggeig paki malauelhir pono tasir gisiameher tamatang tagorong man (1Jo 3.17; 1Jo 4.19-21). A puhono tena puhung ualatutompe God tar mamang binakalik (1Jo 2.8), inggeig paki malauelhir tasir gisiameher tamat.  
\ip Jon ke marang uanamana pono tasir tamatang tagorong mana toro mana pare, O tamatang tagorong mana tesno tamatampe God, doh gisina tera uaha tar matakaluana keip tatanon (1Jo 3.1; 2.3).  
\iot I lolono toro bolobolo rone:  
\io1 A luh doha kitup (1.1-4)  
\io1 No keketik God, kare no keketik Satan (1.5–2.2a)  
\io1 O man, doho boh (4.1-6)  
\io1 Na kalekinaler nimalauelhir (4.7-21)  
\io1 Pehuara keip tar nitagorong man (5.1-21)  
\c 1  
\s1 Iesu tero uelhire gero tua  
\p
\v 1 \x * \xo 1.1 \xt Jon 1.1\x*Inggeim king bolome tamiuoum toro uelhire rone gero tua gero mokon sioun ke uakekene pemer binak. Inggeim king longoro tun toro uelhire roon, karing banga tun tar matamiu, kare tuha tunur limamiu.  
\v 2 \x * \xo 1.2 \xt Jon 1.14\x*Inggonene re heir tar nitua ke uamakahain tamiueim. Doh inggeim king banga tatanon. Inggono ke hire tun toro mana tamiueim, doh inggeim king hirhire tauete teil pono tamiuoum pare, inggono tere kale teil tar nitua gere moko dedengua, inggon e uangoul teil tang God ge Tamagigeig, kare me ualasirain tagigeig.  
\v 3 Inggeim king hire tauete tamiuoum tar haua king bangain, karing longoroin marung uangoul uaia keip tokahoum tamiueim.  
\p Doha niuangoul tokaha uaiaonene a nagigeig mes Iesu Kristo, doh God ge Tamagigeig.  
\v 4 \x * \xo 1.4 \xt Jon 16.24\x*Inggeim king bolo puk toro uelhire roono rone mare unga uaha tun regi niuaheig.   
\s1 God ke uadelauana teregi niguata uasaeig  
\p
\v 5 \x * \xo 1.5 \xt 1Ti 6.16; Jas 1.17\x*Rone tero uelhire geking longoro turuiem tang Kristo, karing hire tauete tamiuoum. God Inggono ter luh, dohi lolono tatanon ahik me kitup tagu.  
\v 6 \x * \xo 1.6 \xt 1Jo 2.4\x*Temaeit geti kuleig pare, i uangoul tokaha uaia keip tang God, kari uangoul harahampela tar kitkitupun, inggeig o bohoboh, kara hik pahi uakeluk tun toro man.  
\v 7 Bo geti uangoul keipeig tar luh misiana re uangoul teil pe God, inggeig i matot i ueluiaesieig, song re uadelauana tunur deuatingina Iesu ger God tagigeig teregi mamang niguata uasalik.   
\p
\v 8 \x * \xo 1.8 \xt Ker 32.5; NU 28.13\x*Bo geti uoliheig ahik me niguata uasa kaeig tatagig, inggeig i bohboho katongosieig, karo uauaman ahik paho moko teil tagigeig.  
\v 9 Bo geti hire luaka inggeig teregi niguata uasa, inggon e uadelauana teregi niguata uasaeig, kare uadelauana tagigeig tar mamang inetelikir sa. Teeit God a uauaman, kara kodkodoho dede.  
\v 10 Bo geti kula inggeig pare, ahik pah ki guata me niguata uasa, inggeig i kulangua tang God a bohoboh, kara hik pahi uauia tono uelhireon o lame i lolono tar niuangoulur nagigeig.   
\c 2  
\s1 Iesu ter tamatang poul tagigeig  
\p
\v 1 \x * \xo 2.1 \xt Hib 7.25-26\x*Ro bung tug! Inggo ku bolo pukume tar uelhireninanine tamiuoum, maeit inggoum ahik pah mung turung guata tar niguatar sa. Bo mai tagigeig ke guata uasa, inggeig nagi tang siokor tamata re tur keip tagigeig i uoum tang Tamagig Iesu Kristo ger tamat a kodkodoh.  
\v 2 \x * \xo 2.2 \xt Jon 1.29; Kol 1.20; 1Jo 4.10\x*Inggono pe ter uahung ke me kale uelmahing teregi niguata uasaeig, doh ahik pah tagigeig puk, bo teres niguata uasa ponomper tamata uakapa tunane i kot.   
\p
\v 3 Bo inggeig i turung ate tun pare, o nang God geti uakeluk tun tena ualatohon.  
\v 4 A tamata gere kula pare, “Inggo u ate tang God,” doh ahik pahe uakeluk tena ualatohon, inggon a bohoboh, ahik pahe uangoul keip toro man.  
\v 5 \x * \xo 2.5 \xt Jon 14.21,23\x*Bo mai re longoro, kare uakeluk tono uelhire God, inggon e ualasirain pare, e malauelhirintiehe tun tang God, doha nimalauelhiron a kodkodoh tun. Inggono te paara, ri ate pe inggeig ri uangoul tokaha keip uaia pe tang God.  
\v 6 Mai re kula pare, e uangoul tokaha keip uaia tang God, inggono pake guata sirangua pono tar niguata ke guata pe Iesu.   
\s1 A ualatut mari uelmalaresieig  
\p
\v 7 \x * \xo 2.7 \xt Jon 13.34; 2Jo 5-6\x*Ro bung kaloug! Inggo ahik pah ku bolome tamiuoum me timuhur ualatut, bo a ualatohonene, “I uelmalaresieig.” Ter siokono kompe tar ualatut gekung longoromegioum sioun tar uakekenen.  
\v 8 \x * \xo 2.8 \xt Jon 1.9; Roum 13.12\x*Bo a ualatut pukuonene ku bolomeio tamiuoum a timuh pon, karo man tena nitua Kristo, doha nitua ponor emiuoum. Ter hauon a kitup e hilhiliu uain, kara luh ger man gine manasa re luh uamarmarein.   
\p
\v 9 \x * \xo 2.9 \xt 1Jo 4.20\x*Mai gere kula pare, “E uangoul teil tar luh, kare tokouasain tang uanotono gere tagorong mana pono tang Kristo.”\f + \fr 2.9 \ft toro uelhireng Grik “tahin.”\f* Inggon e uangoul harahampe tar kitkitupun.  
\v 10 \x * \xo 2.10 \xt Roum 14.13\x*Mai re malauelhirintiehe tang uanotono gere tagorong mana pono tang Kristo, inggon e uangoul teil tar luh, kara hik me inete re uasuasa tatanon i lolono tena niuangoul.  
\v 11 \x * \xo 2.11 \xt Jon 12.35\x*Bo mai re tokouasain tang uanotono gere tagorong mana pono tang Kristo, inggon e uangoul tar kitkitupun, kara hik pahe ate ia re lihihia, teeit a kitup ke uakut tatanon.   
\b  
\mi
\v 12 Inggo ku bolome tamiuoum ro bung tug, teeit remi niguata uasaoum ka uadelauana manasaig tar hangana Kristo.   
\mi
\v 13 Doh inggo ku bolo ponome tamiuoumur mamahoholik, teeit inggoum mung ate tatanonene re uangoulung sioun ke uakekene pemer binak.  
\mi Doh inggo ku bolo ponome tamiuoumur kalan, teeit inggoum kung touahiua tang Satan.  
\mi Doh inggo ku bolo pukume tamiuoum ro bung tug, teeit inggoum mung ate tang Tamagigeig.   
\mi
\v 14 Karu bolo ponome tamiuoumur mamahoholik, teeit inggoum mung ate tatanonene re uangoulung sioun ke uakekene pemer binak.  
\mi Karu bolo ponome tamiuoumur kalan, teeit inggoum o tampopokoh, kare no uelhire God o uangoul teil tamiuoum, karung touahiua tang Satan ger tang sa.   
\b  
\m
\v 15 \x * \xo 2.15 \xt Roum 8.7\x*Uakenua tar malauelhir i kot, doh tar ineteng gane i koto ger sa, bo gero malauelhira taninin na nimalauelhir God ahik pahe moko totomua.  
\v 16 \x * \xo 2.16 \xt Roum 13.14\x*Temaene a mamang inetelikane i kot misiana tar nimalauelhirir sa, kare tar gehe tar inet, kare tar uairana katongo turin tena bureher inet. A niguatanin ahik pahe la tur tagu tang Tamagigeig, bo e la tur pukane i kot.  
\v 17 \x * \xo 2.17 \xt Mat 7.21\x*Doha kot, kara mamang inetelik geka malaraig e turung kapa dede, bo mai re guat, kare uakeluk tena nimalara God, inggon e la turung uangoul dedenguampela.   
\s1 No uelmatan Iesu  
\p
\v 18 \x * \xo 2.18 \xt Mat 24.5,24; 2Jo 7\x*Ro bung tug! Gine ter uadouhinar binak, doh inggoum kung longoro manasa tena uelmatana Iesu e turung la manasame. Doh gine daan no uelmatana Iesu o bureh, gisine ra uangoul manas. Temaeit ri ate inggeig pare, inggono ter uadouhinar binak.  
\v 19 \x * \xo 2.19 \xt Apo 20.30\x*Gisina ka hiliu tur tar totoene tagigeig, teene ahik pesina paho nagigeig tun. Bo ge pakene o nagigeig tunusin, gisina paka uangoul tagu dedempela tagigeig. Bo gisina ka hiliu tar totoene tagigeig e ualasirangua pare, ahik me tang sioko tasisinar nagigeig.   
\p
\v 20 \x * \xo 2.20 \xt 1Ko 2.15; 2Ko 1.21; 2Jo 2\x*Bo inggoum ke uelpikur manasa Iesu tar Iabena Dedeil. Temaene rung atenguaoum toro man.  
\v 21 Inggo ahik pah ku bolome tamiuoum, teeit inggoum mung tele toro man, bo inggoum mung ate, karung ate pono pare, ahik pe mo boho ro la tur toro man.  
\v 22 \x * \xo 2.22 \xt 1Jo 4.3; 2Jo 7\x*Maionor bohoboh? Inggono ter tamata gere uolih tang Iesu pare, ahik pah ter Kristo. Doha tamata gere kula sira pare, na uelmatana Iesu, kare uolih pono tang God ge Tamagigeig mer Tun.  
\v 23 \x * \xo 2.23 \xt Jon 5.23; 1Jo 4.15; 5.1\x*Doh ahik me tang sioko re ueluelde puk tar Tunon e ueluelde pono tang Tamanon. Bo mai re kilauatoro tar Tunon, inggono ke kilauatoro pono tang Tamanon.   
\p
\v 24 Banga tapokis tar haua kung longoro turig tar uakekenen, karung sanga dede taninin, getung uakelukoum, inggoum mung turung uangoul tokaha teil dede tar Tunon, doh tang Tamanon.  
\v 25 Inggono ke ualapagaha tagigeig pare, “Inggeig i turung kale tar nitua gere moko dedengua.”   
\p
\v 26 Inggo ku bolo pukume tanininanine tamiuoum tar tur tane tas maisir tamata gera marang uoum keip tamiuoum toro boh.  
\v 27 \x * \xo 2.27 \xt Jon 16.13\x*Bo inggoum ke uahuhu manasa Iesu tar Iabena Dedeil, kare moko dedengua tamiuoum, ahik baka poluk pah mung sir me tamata re ualasira tamiuoum. A Iabena Dedeil tere ualasira manasa tamiuoum tar mamang inetelik. Doh na niualasiron a man, ahik paha boh. Uakeluk dede tar haua ke ualasiragiono tamiuoum marung uangoul keip dedeoum tatanon.   
\p
\v 28 Ro bung tug! Uangoul keip dede tang Kristo marung ongoloum tar binaka gete kotpokos, kara hik pah mung tokouaouo, karung matala gete tapokisimeon.  
\v 29 \x * \xo 2.29 \xt 1Jo 3.10\x*Getung ateoum pare, Iesu a tamata a kodkodoh, inggoum mung atengua pono pare, o tamata uakapa geka guata uaia, gisin o bung tunon.   
\c 3  
\s1 O bung tuna God  
\p
\v 1 \x * \xo 3.1 \xt Jon 1.12-13; 16.3\x*Bang! Tamagigeig e malauelhirintehe tun tagigeig, teeit ra kula peisieig pare, o bung tunon. Doh inggeig o bung tuna nomanon. Doh ter tengkana teene, maeit ra teler tamatane i koto uakapa tagigeig, teeit gisina ra tele tatanon.  
\v 2 \x * \xo 3.2 \xt 2Ko 3.18\x*Ro bung kaloug! Gine daan inggeig o bung tuna God, doh hape ri la baka pela inggeig halana haraha ta atein, bo i la ate to kompe gete la uamakahain Kristo. Doh inggeig i la turung misiana tatanon, ge inggeig pe i turung banga tun tatanon, hape re baka pe.  
\v 3 Doho tamata uakapasine ra uangoul keip tar nitagorong mana tang Kristo ra uadelauana katongois teres niguata uasa misiana tang Kristor delauana pe.   
\p
\v 4 Mais ra guata uasa gisina ra katego tar ualatutur nang God. Doh geta guata kompelaigir hagarinin, inggono ter siokono kompe ra ueluelde pein God, kare na ualatut.  
\v 5 \x * \xo 3.5 \xt Jon 1.29; 1Pi 2.22-24; 1Jo 2.2\x*Bo inggoum puk mung ate pare, inggono ke laha tar me kale liu tar niguata uasar nagigeigane i koto uakap, doh inggon ahik tagu me niguata uasa kaeig tatan.  
\v 6 Temaeit mai gere uangoul keip dede tang Kristo, ahik pahe guata uasa tagu, bo mai re guata uasa dede kompela ahik pahe naman manate tang Kristo, kara hik pahe ate tatanon.   
\p
\v 7 Ro bung tug! Ahik pah mung longoro me tang sioko gere uelour tamiuoum. Teeit mai gere guata tar hauar uia, inggon a kodkodoh te misiana kompe tatanon ger kodkodoh.  
\v 8 \x * \xo 3.8 \xt Jon 8.44\x*Bo mais ra uangoul, kara guata uasa dede harahampe, gisin o nang Satan, teeit Satan ke uangoul, kare guata uasa tanik manasa toro kikilangan. Doh ter tengkana maeit ke lahar tuna God te tar me mamantouo tena kalekinale Satan.   
\p
\v 9 \x * \xo 3.9 \xt 1Jo 5.18\x*Doh ahik me tang sioko tas mais geka kotpokos o bung tuna God ra uangoul, kara guata uasa dedempela, teeit na nitua God e moko teil dede tasisin. Doh gisin ahik pah ra matoto ra uangoul, kara guata uasa tagu, teeit gisina ka kotpokoso tur tang God.  
\v 10 Temaeit ri ate inggeig tas mais ro bung tuna God, kare mais ro bung tuna Satan. Mais ra guata tar haua ge ahik paha kodkodoh, gisin ahik tagu paho bung tuna God, kare mai ponompe ge ahik pahe malauelhir tagu tang uanoton gere tagorong mana tang Kristo inggono pon ahik paha nang God.   
\s1 Uelmalahiresioum  
\p
\v 11 \x * \xo 3.11 \xt Jon 13.34\x*Gine ter puhung uahire popokoho gekung longorosioum tar uakekenene pare, inggeig i uelmalahiresieig.  
\v 12 \x * \xo 3.12 \xt Uak 4.8\x*Doh ahik pahi guata sira misiana tang Ken ger nang Satan geke haluh pous tang tahin. Ae maene ke haluh pousono tatanon? Teeit tena nipilesono, kare na niguatono ger sa, bo na niguata tahinon a kodkodoh.  
\v 13 \x * \xo 3.13 \xt Jon 5.18-19\x*Doh ahik pah mung lutara ro bung uanotoug gete tokouasaisir tamatang gane i koto tamiuoum.   
\p
\v 14 \x * \xo 3.14 \xt Jon 5.24\x*Inggeig i ate pare, ka luaka liu tur manasasieig toro mat, kari kale tar nitua, teeit inggeig i uelmalahiresieig, bo mai ge ahik pahe malauelhir tagu, inggon e uangoul keip haraha toro mat.  
\v 15 \x * \xo 3.15 \xt UGO 21.8\x*Doh mai gere tokouasain tang uanoton, inggon a tang haluh, kare inggoum mung ate pare, ger tang haluh ahik tagu mena nitua gere moko dedengua.  
\v 16 \x * \xo 3.16 \xt Jon 13.1; Gal 1.4\x*Gine teki bang paroko pe inggeig, kari ate tar nimalauelhir tun, Iesu Kristo ke heir katongo tar tukununa tagigeig. Doh inggeig paki guata sira pono toso bung uanotougig.  
\v 17 \x * \xo 3.17 \xt Ual 15.7\x*Doh ge pare, me tang sioko na bureher mamang ineteliking gane i kot, kare banga tang uanotono ke katupa pe tar inet, doh ahik pah ke ueldolomo tatanon, hapengua re la moko pe na nimalauelhir God tatanon?   
\p
\v 18 \x * \xo 3.18 \xt Jas 2.15-16\x*Ro bung tug! Inggeig i uakenua manasa tar kulkula puk pare, i uelmalauelhiresieig, bo inggeig paki uamakaha tun tar uelmaluelhirono tar niguata, kara nipiles.  
\v 19 Inggono ter niguata, kara nipileser nagigeig teri ate toeig pare, i uangoul keip toro man, song ahikieig pahi kanuh tar binaka ri la tur i uoum tar Tamata Noman.  
\v 20 Doh geti ate katongosieig pare, ki kouh, bo God puk ter i ranantiehe teregi ninamanaeig, kare ate teil tar mamang inetelik.   
\p
\v 21 \x * \xo 3.21 \xt Hib 4.16\x*Ro bung kaloug! Geta hikieig pahi uakanuh katongosieig, inggeig ahik pahi kanuh tar tur i uoum tang God,  
\v 22 kari kale tar mamang inetelik ri dangataig tatanon, teeit inggeig ki uakeluk tun tena ualatohon, kari guata tar nimalarar nanon.  
\v 23 \x * \xo 3.23 \xt Jon 6.29; 13.34\x*Ginine tena ualatohon, “Tagorong mana tar hanganar Tunon Iesu Kristo, kari uelmalauelhiresieig,” ngohina ke ualatoho peono tagigeig.  
\v 24 \x * \xo 3.24 \xt 1Jo 4.13\x*Mais ka uakeluk tena ualatohono ra uangoul tokaha uaia keip tatanon, doh inggon e uangoul tokaha uaia keip tasisin, doh inggeig i ate pare, inggon e uangoul tokaha keip tagigeig, teeit tar Iabena Dedeil geke heirihaiono tagigeig.   
\c 4  
\s1 A iabena ger man, doha iabena ger boh  
\p
\v 1 \x * \xo 4.1 \xt Mat 7.15; 1Te 5.21; 1Jo 2.18; 2Jo 7\x*Ro bung kaloug! Ahik pah mung uolong tagorong man tas mais ra kula pare, ra kale teil tar iaben. Bo mung uedanga baka tasisina ge pare, la turur iabeneit ra kale teilisisina tang God. Ge o burehe per propet bohoboh ra uangoul ueltebeir.  
\v 2 \x * \xo 4.2 \xt 1Ko 12.3\x*Gine te hape rung turung ate paroko peoum ge pare, la turumper iabenono tang God ge me tang sioko re kula pare, “Iesu ger Kristo e la tur tang God ke la siraha tar tamat.” A iabenonene tar tamaton e la tur tang God.  
\v 3 \x * \xo 4.3 \xt 1Jo 2.18\x*Bo mai gere kula pare, “Iesu ahik mata la siraha tar tamat.” A iabenon, ahik pahe la tur tang God, a iabenon e la tur tosno uelmatana Kristo. Inggoum kung longoro pare, inggon e turung lame, doh gine daan, inggono gine manasa i kot.   
\p
\v 4 \x * \xo 4.4 \xt Mat 12.29; 1Jo 5.4-5\x*Bo inggoum ro bung tug, inggoum o nang God gekung touahiua manasa peoum tasir propet bohoboh, teeit a iabeneit re uangoul teil tamiuoum a i ranantiehe tasisit ra uangoul i kot.  
\v 5 \x * \xo 4.5 \xt Jon 8.47; 15.19\x*Gisin o peng gane i kot, kara menmene teil uamatoto tar ineteng gane i kot, doh gane i koto ra longoro tasisin.  
\v 6 Bo inggeig o nang God, kare mais ra ate tang God ra longoro tagigeig. Bo mais ahik paho nang God tagu, ahik pah ra longoro tagigeig. Gininanine te mari bang paroko inggeig tar iabene ger uauaman, kare tar iabene ger bohoboh.   
\s1 A uelmalauelhir e la tur tang God  
\p
\v 7 Ro bung kaloug! Inggeig i uelmalahiresieig, teeit a uelmalahir e la tur tang God. Temaeit mai re malauelhir tang uanoton, inggon a tuna God, e ate tang God.  
\v 8 Bo mai ahik pahe malauelhir tang uanoton, inggon ahik pahe ate tang God, teeit God inggono ter tengkanar nimalauelhir.   
\p
\v 9 \x * \xo 4.9 \xt Jon 3.16\x*Gine teke ualasira pein God re malauelhir pe tagigeig. Inggono ke heiriha tar tang siokor Tunane i kot mari uangoul keipeig tar nitua e la tur tatanon.  
\v 10 \x * \xo 4.10 \xt Roum 5.8-10; 1Jo 2.2\x*Gine te hape tar uelmalauelhir, inggeig ahik pah teki malauelhir tang God, bo inggono pare, God ke malauelhir tagigeig, kare heiriha tar Tuna pare, a uahung mare kale uelmahing teregi niguata uasaeig.   
\p
\v 11 Ro bung kaloug! Ge pare malauelhirintiehe nomana God tagigeig, inggeig i uelmalahire ponosieig.  
\v 12 \x * \xo 4.12 \xt Jon 1.18\x*Ahik me tang sioko tagigeig ke banga tang God, bo geti uelmalahiresieig, God e uangoul tagu dede tagigeig, doh na nimalauelhiron e la uahiuo tunuhane i lolono tagigeig.   
\p
\v 13 \x * \xo 4.13 \xt 2Ko 1.22; 1Jo 3.24\x*Inggeig i ate pare, i uangoul tagu tang God, doh inggon e uangoul tagu pono tagigeig, teeit inggono ke heir tagigeig tena Iabena ger Dedeil.  
\v 14 Doh inggeig ki banga, kari hire toro mana pare, God Tamagigeig ke heiriha tar Tuna tar me uaudeil tasir tamatane i kot.   
\p
\v 15 God e uangoul tagu tang mai gere hirhire tauete teil pare, “Iesu a Tuna God.” God e uangoul tagu tatanon.  
\v 16 Doh inggeig i ate uaia tun pare, God e malauelhirintiehe tun tagigeig, kari tagorong mana tatanono re malauelhirintiehe tun pe tagigeig.  
\p God inggono ter tengkanar nimalauelhir, doh mais ra uangoul keip tar nimalauelhir gisina ra uangoul tokaha keip tang God, doh God e uangoul tokaha keip tasisin.  
\v 17 Doh tar hagarionene a uelmalar e la popokoho tun i uantinanina tagigeig, maeit inggeig ahik pahi la kanuh tar binakang kedang, teeit inggeigane i kot i la misiana tang Kristo.   
\p
\v 18 Ahik me nisokoro kaein tar uelmalahir, teeit na nitampopokohor uelmalahir e uelueltula liu tar nisokor, bo a nisokor e la keipin tar niduh, doh mai re sokor, ahik paha popokoho na nimalauelhir.  
\v 19 Inggeig i uelmalahiresieig, teeit God ke malauelhir uakikilanga tagigeig.   
\p
\v 20 Ge me tang sioko re kula pare, e malauelhir tang God, kare tokouasa dedempein tang uanoton, inggonor tamaton a bohoboh. Hape geta hikieig pahi uelmalahiresieig, hapengua ri malauelhir pe inggeig tang God, ge ahik pe inggeig pah ki banga tatanon?  
\v 21 \x * \xo 4.21 \xt Mak 12.29-31\x*Doh Inggono ke heir tagigeig tar ualatutene, mai re malauelhir tang God, inggon e malauelhir pono toso bung uanoton.   
\c 5  
\s1 A nitagorong mana tar Tuna God  
\p
\v 1 \x * \xo 5.1 \xt 1Jo 4.15\x*Maisir tamata gera tagorong mana tang Iesu pare, Inggono ter Kristo, gisina ka kotpokoso o bung tuna God, doh mais ra malauelhir tang Tamanon, gisina ra malauelhir pono tar Tunon.  
\v 2 Gine te hape ri ate tun pe inggeig pare, ri malauelhir pe toso bung tuna God, inggeig i malauelhir tang God, kari uakeluk tena ualatuton.  
\v 3 \x * \xo 5.3 \xt Jon 14.15,23-24\x*Tar malauelhir tang God ter tengkana teene, “Uakeluk tena ualatuton.” Doh ginin ahik paha parakukuh tagigeig tar uakeluk.  
\v 4 Ge inggeig uakapa tun peene ro bung tuna God i touahiua manasa tar niguatar saane i kot. Gine ter uleikir nitampopokoho ka pehuara peinir kot, inggeig i tagorong mana tang Iesu.  
\v 5 Maiono ke touahiua tar niguatar saane i kot? Teesine kompe geka tagorong mana tang Iesu pare, a Tuna God.   
\p
\v 6 \x * \xo 5.6 \xt Jon 1.29-34\x*Iesu Kristo Inggono ter tang sioko ke laha tar kodom, ka me uahuhu pein, karo me tading ro deuatingin ke me mata pe. Inggono ahik pah ke laha tar kodomo puk, bo Inggono ke laha tar kodomo doho deuatingin. A Iabena Dedeil teke tur keip, kare hire tauete toro man, teeit a Iabena Dedeil Inggono teger uauaman.  
\v 7 Ge a touono per inete rasit ura tur keip, kara hire tauete toro mana tagigeig tang Iesu,  
\v 8 \x * \xo 5.8 \xt Jon 15.26\x*a Iaben, kara kodom, kara deuating, doha touonor inete rasina ka uelhote.  
\v 9 \x * \xo 5.9 \xt Jon 5.32-37\x*Inggeig i tagorong mana tar haua gera hire taueteigir tamata tagigeig, bo a haua puk geke hire taueteig God, ginina ter inete uleik, doh inggono ke hire tagigeig toro mana tar Tuna katong.  
\v 10 \x * \xo 5.10 \xt Jon 5.36-40\x*Mai re tagorong mana tar Tuna God, inggono ke sanga dede tar uelhire geke hireig God tatanon. Bo mai ge ahik pahe tagorong mana tang God, inggono ke kulangua tang God a bohoboh, teeit inggono ahik pah ke tagorong mana tar uelhire ger man geke hire uamatoto tolaig God tar Tun.   
\p
\v 11 O uelhire gero mana te pare, God ke heir tagigeig tar nitua gere moko dedengua, doha nituaon e moko tar Tunon.  
\v 12 \x * \xo 5.12 \xt Jon 3.36\x*Mai gere uangoul tagu tar Tunon, inggono na nitua, doh mai ge ahik pahe uangoul keip tagu tar Tuna God, ahik mena nitua gere moko dedengua.   
\s1 A uadouhinar men  
\p
\v 13 \x * \xo 5.13 \xt Jon 20.31\x*Inggo ku bolome tanininanine tamiuoumene rung tagorong mana tar hanganar Tuna God, maeit rung ateoum pare, remi nituaoum e moko dedengua.  
\v 14 \x * \xo 5.14 \xt Jon 14.13-14; 1Jo 3.21-22\x*Gine ter nitagorong mana re reih uahuhut tagigeig tang God. Geti dangata inggeig me inete tang God re malara pe, inggon e longoro tagigeig.  
\v 15 Doh geti ate inggeig pare, inggono ke longoro tagigeig tar haua ki dangatain, inggeig song ri ate tun pare, i turung kale tar haua ri dangatain tatanon.   
\p
\v 16 \x * \xo 5.16 \xt Mat 12.31\x*Doh me tang sioko geke banga me uanotougigeigene ri tagorong mana tang Kristo ke guata tar niguata uasa ge ahik pahe uoum keip tagu toro mat, inggonor tang sioko pake lotu tang God mare heirono tang uantonono tar nitua. Inggo u menmene tas mais ka guata tar niguata uasa ge ahik tagu pahe uoum keip toro mat. Bo a niguata uasa gere uoum keip toro mat e mok. Inggo ahik pah ku kula pare, o lotua tas mais ra guata taninin.  
\v 17 A mamang niguata uasalik ginin a sa, bo ahik puk pah teenina uakapa re uoum keip toro mat.   
\p
\v 18 \x * \xo 5.18 \xt 1Jo 3.9\x*Inggeig i ate pare, mais geka kotpokoso tur tang God, ahik pah ra uaateis tar niguatar sa, ge a Tuna God pe e kapil uaia tun tasisin, doh Satan ahik pahe matot e mamantouo tasisin.  
\v 19 Inggeig i ate pare, inggeig o bung tuna God, bo gane puk i koto uakap e moko tena nikauekon, kare na nitampopokoho Satan.  
\v 20 Doh inggeig i ate pono pare, a Tuna God ke laha tar me uanaman manate tagigeig, maeit ri ate inggeig tatanono pare, a God noman. Doh inggeig i uangoul tagu tatanono gere uaman, kare tar Tunono pon Iesu Kristo. Inggono ter God noman, kare ter nitua gere moko dedengua.   
\p
\v 21 Ro bung tug! Mung kapil katongosioum tasir god bohoboh.