\id REV  
\h Ivala'asina 
\toc3 Iv 
\toc2 Iv 
\toc1 IVALA'ASINA 
\mt3 Keliso Ena Luva  
\mt1 IVALA'ASINA  
\mt3 Ioane Kevanai  
\is1 Puka Laloana Ilelena Luvana  
\ip Puka kanania 'eva melala kanaua'i abiveni kauta Lovia namana Iesu Keliso deabivenia dianai devaana-ana sia'ata laloanai eleleia. Puka kanania 'olana 'eva ana-ana kanaua laloanai ia bevakula'ilata inoku eta abiveni sia bevikanita. Puka kanania laloanai luva ivavitaitata doutamo, dava muliai bepupulu 'o 'ani depulu davata luvata eluva. Ivavitaitata kataua eta vinaula umauta 'eva katania. Iesu Keliso 'eva Lovia namana, inoku ia imanai Dilava betata'u ena 'ou kauta boutai bekaokaita, mai Satani vaka kanaua bekaokaia koma. Inoku Iesu vinaula katania boutai bevaoleta 'eva Dilava betata'u delava 'ini kauta kataua mai eta abiveni sia deva'ekoasi kauta akatai nama'ita bevenita. Ia 'eva Dilava ita bemimia, mekau mai ana-ana 'eva beasi'i, 'olana Dilava 'eva dava boutai bevaedeanata bemakamaka.  
\is1 Puka Iduvuna Namata  
\io1 a. Lova aku. (1.1 - 8)  
\io1 b. Enolea iluvuna mai lo'e kabukabuta 7 eta malele. (1.9 — 3.22)  
\io1 c. Puka i'ouna mai i'alavuna 7. (4.1 — 8.1)  
\io1 d. Bisi 7. (8.2 — 11.19)  
\io1 e. Dragona mai aivala sisita lua. (12.1 — 13.18)  
\io1 f. Ikata edeata edeata. (14.1 — 15.8)  
\io1 g. Dilava ena badu voduta 7. (16.1 - 21)  
\io1 h. Babulonia e'eko. (17.1 — 20.10)  
\io1 i. Lavuai namana to'ona. (20.11 - 15)  
\io1 j. Vutuvutu, kanobata, mai Ielusalema makamakana. (21.1 — 22.5)  
\io1 k. Luva to'ota. (22.6 - 21)  
\c 1  
\s1 Puka Valina Ikavana Luvana.  
\p
\v 1 Kanania 'eva Iesu Keliso evala'asia luvana, kanaua 'ounai ena da'alaabi kauta bevaikata davata 'eva alimo bepupulu. Iesu ena anelu esinia eda'a ena da'alaabi kauna Ioane evaikabasia,  
\v 2 Ioane eta'u Dilava ena luva mai Iesu Keliso enai depulu davata boutai eikata kataua 'eva e'outa dae.   
\p
\v 3 Enolea luvata katania bevakuta kauna 'eva benama'ina, maivaka lelena de'ika kauta mai dava ilelena 'eva deabia nuatai de'ule kauta kataua 'eva denama'ina, 'olana melalana 'ani ekevai.   
\s1 Ioane Malele Eleleia Eda'a  //  Dilava Ena Lo'e Kabukabuta  //  Kalakoika Kevatai.  
\p
\v 4 Lau Ioane, Dilava ena lo'e kabukabuta kalakoika 'Asia kanonai alele venimui. Ia enai oi iulaveni mai nua'elu 'ani bevenimui Dilavana 'eva vali'u emimia, mai 'ana'inai emia, mai ia vaka 'eva 'ani beasi, mai ena mia'au 'abuna vailanai idume kalakoika etai,  
\v 5 mai Iesu Keliso enai, ia 'eva abiveni ivamomo'aina kauna, ba kauta viloatai ia makava ba ai eko'isi 'udai, mai kanobata loviata 'olata eta lovia 'olana.  
\p Elalo'au venita inoku ia lalana ai ita eta si'avana ai 'ani eva'avaeata,  
\v 6 mai ita 'ani lovia vanuana mai kabukabu kautai evaaota ena Dilava mai Kamana da'alata eka abi. Iesu Keliso kevanai nuavi mai siavu bemia keini keini! Amen.   
\q1
\v 7 Oikaia, Iesu 'eva oli ita e'asi,  
\q1 mai kau boutai makata  
\q1 'eva ia beikala,  
\q1 duluna dekoia kauta vaka  
\q1 ia beikala, mai ia dainai kanobata  
\q1 kauta boutai 'eva bekakani.  
\q1 Momo'ai dokadoka kanania  
\q1 'eva bepupulu, Amen.   
\p
\v 8 Lovia namana Dilava eluluva ediaka,  
\q1 “Lau 'eva 'Alepa mai 'Omeka,  
\q1 Makavana mai To'ona.  
\q1 Lau 'eva vali'u amimia,  
\q1 makavanai vaka amia  
\q1 maivaka vailai ba'asi,  
\q1 siavu boutai Dilavana.”   
\s1 Ioane Keliso Eikaia.  
\p
\v 9 Lau Ioane, oi bo'akalamui mai banomui anaana laloanai mai lovia vanuana laloanai mai manau ai vapasisi kanaua 'eva ita eta Iesu dainai, Dilava ena luva mai Iesu valina avala'asia 'ounai Patamo motumotunai de'ule'u amimia.  
\v 10 Lovia namana ena melala ai lau 'eva Idume ai akukudivo, inoku lele ka namana muli'uai aika itani bisi ka 'uluna boina,  
\v 11 ia ediaka, “Oikata davata 'eva puka ai leleta inoku bosinita beda'a Dilava ena lo'e kabukabuta kalakoika vanuata katania kevata, Epeso, Semulana, Pelekamo, Tuatila, Sadi, Piladelepia, mai Laodikea.”   
\p
\v 12 A'ilo'u 'udai lele eluva veni'u kanaua baikala akoma. Inoku a'ilo koanai kolo lamepata ivalavata'au davatai kalakoika aikata,  
\v 13 inoku lamepa ivalava'auta davata viloatai 'eva kau ka “itani Kau nakuna boina,” tubu'a lakavaikana evadodoa e'ovu eda'a aena palapalata edavalita inoku kolo 'apana ai pedena edo'oia keini.  
\v 14 'Olana mai vuina 'eva dedeva'i ovo itani dapulu boina, vitaitana oli deva'ina boina, mai makana 'eva itani 'alova evuvule boina.  
\v 15 Aena 'eva itani kopa 'alova laloanai e'ita e'amale 'amale boina, mai lelena 'eva itani ka'uda namata depouta'au 'uluta boina.  
\v 16 Imana idibanai visiu kalakoika eabita, kuali lepona makana aveke aveke de'ano lepona nutunai ela'asi. Ia vailana 'eva itani ado'alavuni melala ekakala 'ailalana boina. \fig Lamepa 'abuta.|src="bk00154b.tif" size="col" ref="1.12" \fig*   
\p
\v 17 Ia aikaia koanai, a'eko aena 'olanai apakadivo itani aba boina. Inoku ia imana idibana kau'uai ekao'au inoku eluva ediaka, “Sia bomakau, lau 'eva makavana mai to'ona.  
\v 18 Lau 'eva mauli kau'u, lau 'eva aba, beia vali'u lau 'eva bamauli keini keini! Inoku lau 'eva ba mai mitava kita abita.  
\v 19 Kanaua 'ounai, dava 'ani oikata 'eva leleta 'au, vali'u depupulu davata mai muliai bepupulu davata.  
\v 20 Visiu kalakoika ima'u idibanai mai kolo lamepata ivalava'auta davata kalakoika oikata. Katania 'eva luva vunita inoku anita 'eva kanania boina. Visiu kalakoika 'eva Dilava ena lo'e kabukabuta kalakoika aneluta, mai kolo lamepata ivalava'auta davata kalakoika 'eva Dilava ena lo'e kabukabuta kalakoika.”   
\c 2  
\s1 Malele Beda'a Dilava Ena  //  Lo'e Kabukabuna Epeso Ai.  
\p
\v 1 Inoku ia e'ou'u ediaka, “Dilava ena lo'e kabukabuna aneluna Epeso vanuanai kanania bolele venia koma. Kau kanaua visiu kalakoika imana idibana ai eabita mai kolo lamepata kalakoika viloatai eda'a keini keini kauna ena luva 'eva kanania.  
\v 2 Lau oni emu koakoa, emu bavunu vinaulata mai emu vapasisi 'eva aikabasita. Lau aikabasi oni 'eva si'avana kauta sia oikata vadai, veauneke kautai devaaota kauta kataua okovota beia ia 'eva sia veauneke kauta umauta, inoku odavalita ia 'eva dede kauta.  
\v 3 Oni 'eva ovapasisi mai lau va'u dainai oanana vaika, mai sia okauba'oa.   
\p
\v 4 Beia lau 'e'u luva 'eva kanaia oni keva muai, emu lalo'au lava'ana'ina lau keva'uai lalo'auna 'ani ovikania.  
\v 5 Kanaua 'ounai 'abu kanaua'i o'eko 'abuna lalovaia, bolalo'udai inoku ovavai makava davata bovavai. Bema sia bolalo'udai koanai, lau 'eva bavavasi oni kevamu inoku emu lamepa ivalava'auna 'abunai babia ovo.  
\v 6 Beia emu nama'ina ka'onamo 'eva kanania. Nikolaita kauta eta koakoa ovaiviivi, vitaitana lau vaka eta koakoa avaiviivi.   
\p
\v 7 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika. Ena abiveni bekula'ila si'avana laloatai bekeini kauna 'eva komolo bavenia mauli eveveni auna vuavuana beania, au kanaua 'eva Dilava ena lobai ekukubu.”   
\s1 Malele Beda'a Dilava Ena  //  Lo'e Kabukabuna Semulana Ai.  
\p
\v 8 Inoku ia eluva 'udai ediaka, “Dilava ena lo'e kabukabuna aneluna Semulana vanuanai kanania bolele venia koma. Kau kanaua 'eva Makavana mai To'ona, eba mai emauli 'udai kauna ena luva 'eva kanania.  
\v 9 Emu kau anaana mai emu ulalu 'eva aikabasita. Beia oni 'eva lavo kaumu. Kau kataua Iuda kautai devaaota kauta ivasi'avanamu luvata deluva 'eva aikabasi, ia 'eva sia Iuda kauta umauta, beia Satani ena lo'e kauta.  
\v 10 Boanana vaia davana 'eva sia bomakau vaia. A'oumu, Diabolo betata'u oi vaida bekovomui vabuto'o lumanai bene'emui, inoku melala 'ouka 'eva oi boanana. Beia oni emu abiveni lau keva'uai 'eva boabi'inia beda'amo ama'i ba ai, inoku lau oni mauli keini keini bavenimu vitaitana lovia i'olana davana boina.   
\p
\v 11 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika. Ena abiveni bekula'ila si'avana laloatai bekeini kauna 'eva ba ivaluanai sia beanana kovo.”   
\s1 Malele Beda'a Dilava Ena  //  Lo'e Kabukabuna Pelekamo Ai.  
\p
\v 12 Inoku ia eluva 'udai ediaka, “Dilava ena lo'e kabukabuna aneluna Pelekamo vanuanai kanania bolele venia koma. Kau kanaua mai ena kuali lepona makana aveke aveke de'ano kauna ena luva 'eva kanania.  
\v 13 Lau aikabasi Satani 'ani ena mia'au abuna kanaua 'eva oni omiala 'abuna. Beia oni ota'u lau va'u oabi 'inia, inoku vali'u ekava kauna Anitipa, e'u abiveni kauna, Satani emiala 'abuna kanaua'i deaku bala melalanai koanai, emu abiveni lau e'uai 'eva sia o'ouia avuavu.   
\p
\v 14 Beia emu si'avana vaida 'eva katania. Kau vaida oi viloamuiai 'eva Balama ena vaikabasi luvata deabi 'ini, kau kanaua eta'u Balaki evaikala a boina Isalaela kauta si'avanai bene'eta, inoku ia deta'u dilava dedeta ivakabukabuta ianita deani mai kulakula koakoata si'avata vaika devavai.  
\v 15 Dala vitaitanai kau vaida viloamuiai 'eva Nikolaita kauta eta vaikabasi luvata deabi 'ini.  
\v 16 Kanaua 'ounai olalo'udai. Bema sia bolalo'udai koanai, lau 'ani alimo bavasi kevamu, inoku kuali lepona nutu'uai ela'asi kanaua'i baviaku venita.   
\p
\v 17 Mai kaiana kauna betata'u Idume Kabukabuna ena luva Dilava ena lo'e Kabukabuna kauta e'outa luvana lelena be'ika. Ena abiveni bekula'ila si'avana laloatai bekeini kauna 'eva iani vana mana vuniata vaida bavenia, maivaka bika'a deva'ina ka akanai va makamakana ka ilelena'au bika'ana ia bavenia, bika'a iabina kauna mo va kanaua beikabasia.”   
\s1 Malele Beda'a Dilava Ena  //  Lo'e Kabukabuna Tuatila Ai.  
\p
\v 18 Inoku ia eluva 'udai ediaka, “Dilava ena lo'e kabukabuna aneluna Tuatila vanuanai 'eva kanania bolele venia koma. Dilava Nakuna, kanaua makana 'eva itani 'alova evuvule boina mai aena palapalata 'eva itani kopa e'amale 'amale boina kauna ena luva 'eva kanania.  
\v 19 Lau oni emu koakoa, emu lalo'au, emu abiveni, emu vidulu vinaulata, mai emu vapasisi 'eva aikabasita. Mune'e vali'u ovavai katania 'eva ovavai 'ana'i dekeinita.   
\p
\v 20 Beia emu si'avana 'eva kanania, oni ateate vana 'Isabele sibona enolea ateatenai evaaoa ateatena kanaua 'eva oikaia vadai. Ia ena vaikabasi ai e'u da'ala abi kauta e'ana'ia vaita va'eva kulakula koakoata si'avata vaika ivavaitai mai dilava dedeta ivakabukabuta ianita deani.  
\v 21 Lau 'eva ia melala 'ani avenia ena kulakula koakoatai belalo'udai. Beia ia 'eva sia e'ula.  
\v 22 Kanaua 'ounai lau batata'u 'olele 'etanai bakapoa 'au, bema ia sia belalo'udai eta si'avana koakoatai koanai ia ita dekulakula kauta kataua itana bavaanaanata vaika.  
\v 23 Ia nakuna vaka baku bata. Inoku Dilava ena lo'e kabukabuta kauta boutai beikabasi, lau 'eva kau nuata mai eta lalovai lalovai adavalita kau'u, mai lau batata'u oi ka ka emui koakoa vitaitatai tavamui bavamue.   
\p
\v 24 Beia oi kalina boumuiai Tuatila ai, ateate kanana ena vaikabasi luvata sia oi oabi'ini mai Satani ena vunivuni davata kanania deko davata 'eva sia oi oikabasi kaumui, lau a'oumui adiaka sia mekau ka akamuiai bane'ea.  
\v 25 Beiamo oi dava 'ani oi oabia davanamo oi boabi'inia beda'amo lau bavavasi.   
\p
\v 26 Ena abiveni bekula'ila si'avana laloatai bekeini kauna mai e'u vinaula bevavaia beda'amo to'onai kauna 'eva lau batata'u siavu bavenia kanobata kauta beloviata.  
\v 27 ‘Ia 'auli ikoko'anai be'ola vaita, beakuta mukamuka itani olaka boina.’ Vitaitana lau Kama'u kevanai siavu abia boina.  
\v 28 Lau vaka ia koi visiu bavenia.  
\v 29 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika.”   
\c 3  
\s1 Malele Beda'a Dilava Ena  //  Lo'e Kabukabuna Sadi Ai.  
\p
\v 1 Inoku ia eluva 'udai ediaka, “Dilava ena lo'e kabukabuna aneluna Sadi vanuanai 'eva kanania bolele venia koma. Dilava ena Idume kalakoika mai visiu kalakoika eabita kauna ena luva 'eva kanania, Lau emu koakoa 'eva aikabasita, lovamu deakuia dediaka, ‘Dilava ena lo'e kabukabuna kanania 'eva emauli,’ beia oni 'eva 'ani oba.  
\v 2 Ibi ko'isi, kevamuai demimia davata 'ani bebaba davata vakula'ilata, 'olana e'u Dilava vailanai 'eva emu koakoa sia ka komolona adavalia.  
\v 3 Dava devaikamu mai leleta o'ika davata lalovaita, leleta daitai bodadai, mai bolalo'udai. Beia bema sia boko'isi koanai lau 'eva vinao kauna boinai bavavasi, inoku oni 'eva sia boikabasi lau 'eva melalana davanai bavavasi.   
\p
\v 4 Beia kau vitalua na'i Sadi ai 'eva eta tubu'a sia deva'obuta. Ia 'eva tubu'a deva'ita bevadodota, lau ita lai badada'a, 'olana ia 'eva mai eta komolo kanania bevavaia.   
\p
\v 5 Ena abiveni bekula'ila si'avana laloatai bekeini kauna 'eva, ia boita, tubu'a deva'ina bevadodoa. Ia vana 'eva Dilava ena mauli pukanai lau sia 'ani basiua, beia Kama'u mai ena anelu vailatai ia vana 'eva baluva vaia.  
\v 6 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika.”   
\s1 Malele Beda'a Dilava Ena  //  Lo'e Kabukabuna Piladelepia Ai.  
\p
\v 7 Inoku ia eluva 'udai ediaka, “Dilava ena lo'e kabukabuna aneluna Piladelepia vanuanai 'eva kanania bolele venia koma. Ekabukabu mai momo'ai kauna, Davida ena ki eabia kauna. Ia dava eluvua 'eva sia kau ka be'alavua, mai ia dava e'alavua 'eva sia kau ka beluvua kauna ena luva 'eva kanania.  
\v 8 Lau oni emu koakoa 'eva aikabasi. Ikala, lau nutuala ka oni vailamuai 'ani aluvua kanaua 'eva sia kau ka be'alavua. Aikabasi emu kula'ila 'eva kikina, beia lele'u daitai odadai mai va'u sia o'oua avuavu.  
\v 9 Ikala, lau batata'u Satani ena do'u 'abuna kauta kataua, sibota Iuda kautai devaaota beia ia 'eva sia Iuda kauta, beia ia 'eva dededede, bavuata ba'asi inoku oni aemu 'olanai bekuidula, kanaua'i beikabasi lau 'eva oni alalo'au venimu.  
\v 10 'Olana oni e'u luva pasisi leleta daitai odai ovapasisi 'ounai lau batata'u anaana namavaikana kanaua melala be'asi kanobatai kau boutai bavakovota kanaua'i 'eva oni bataumuavu.  
\v 11 Lau 'eva kevaimo 'ani bavasi, 'ounai dava oabia 'eva boabi'inia, inoku sia kau ka 'eva emu lovia i'olana davana beabia.   
\p
\v 12 Ena abiveni bekula'ila si'avana laloatai bekeini kauna 'eva e'u Dilava ena luma kabukabuna divoavuna bavaaoa, inoku ia 'eva 'abu kanaua sia bevikania. Lau ia akanai e'u Dilava vana mai e'u Dilava ena vanua vana balelea, Ielusalema makamakana, davana 'eva e'u Dilava enai vutuvutuai be'ovu be'asi, mai lau vaka ia akanai va'u makamakana balelea.  
\v 13 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika.”   
\s1 Malele Beda'a Dilava Ena  //  Lo'e Kabukabuna Laodikea Ai.  
\p
\v 14 Inoku ia eluva 'udai ediaka, “Dilava ena lo'e kabukabuna aneluna Laodikea vanuanai 'eva kanania bolele venia koma. De'aea Amen kauna, abiveni kauna mai momo'ai dokadoka makanai depulu eikata kauna, Dilava evavaita davata boutai eloviata kauna ena luva 'eva kanania.  
\v 15 Lau oni emu koakoa aikabasi, oni 'eva sia o'elu mai sia osiavu. Lau e'u ula oni 'eva bosiavu 'o bo'elu.  
\v 16 'Olana oni 'eva sia osiavu dokadoka mai sia o'elu dokadoka, beia osiavu siavu, 'ounai lau nutu'uai bapulaimu asi.  
\v 17 Oni odiaka, ‘Lau 'eva lavo kau'u, e'u dava doutamo, sia dava ka atabu.’ Beia oni sia oikabasi oni 'eva osi'avana vaika, belalomu vaika, oulalu, o'ede maivaka mai'okomu.  
\v 18 Lau oni avaidibamu, 'alovai kolo devamakamakala davana keva'uai botavala, kanaua'i lavo kaumuai bo'ao. Bovadodoa tubu'ana deva'ina vaka keva'uai botavala, inoku kaumu 'avaeata malalaina bepupua, mai 'ede mulamulana botavala makamuai bolaia inoku boikaika kave'i.  
\v 19 Lau alalo'au venita kauta 'eva a'ovenita mai a'odita, kanaua 'ounai mailalovaimu bovinaula kula'ila, mai bolalo'udai.   
\p
\v 20 Ikala, lau nutuala aunai alalava inoku akuaku. Bema kau ka lele'u e'ika inoku nutuala eluvua, lau badododo ba'asi inoku ia ita baniani, mai ia lau ita lai baniani.  
\v 21 Ena abiveni bekula'ila si'avana laloatai bekeini kauna 'eva komolo bavenia lau ita e'u lovia imia'auna 'abuna akanai lai bamia'au, vitaitana lau akula'ila si'avana laloatai akeini inoku Kama'u ita ena lovia imia'auna 'abuna akanai lai amia'au boina.  
\v 22 Mai kaiana kauna betata'u Idume Kabukabuna ena luva Dilava ena lo'e kabukabuna kauta e'outa luvana lelena be'ika.” \fig Iesu nutuala aunai eakuaku.|src="cn02107B.tif" size="col" ref="3.20" \fig*   
\c 4  
\s1 Dilava Vutuvutuai  //  Dekukudivo Venia.  
\p
\v 1 Dava katania mulitai, akailao vutuvutuai 'eva nutuala ka iluvuna elava vaila'uai aikaia. Inoku lele 'ani eluva veni'u makava kanaua lelena aika 'eva itani bisi ka 'uluna boina eluva ediaka, “Ele'au mai nia'i, inoku katania mulitai 'eva dava 'ani bepulu davata bavaikamu.”  
\v 2 Komolonai Idume Kabukabuna evada'a'u, inoku ua'i vaila'uai 'eva lovia imia'auna 'abuna ka vutuvutuai aikaia mai kau ka 'eva akanai emia.  
\v 3 Inoku ua'i emia'au kauna 'eva ikana e'ailala vaika itani bika'a nama'ita vaika vata daiamoni e'ailala mai lubi e'aola boina. Boualo lovia imia'auna 'abuna kanaua enoiakaiu, ikana 'eva e'ailala vaika itani bika'a nama'ina vaika vana 'emeladi boina.  
\v 4 Lovia imia'auna 'abuna kanaua 'eva lovia imia'auta 'abuta luanavui vani vaka demiaia kaiukaiu, inoku kau 'aida'aidata luanavui vani lovia imia'auta 'abuta kataua akatai demia'au, tubu'a deva'ita devadodo mai 'olatai 'eva lovia i'olata davata kolo ai ivavaita devadodota.  
\v 5 Lovia imia'auna 'abunai e'amalea, e'uluia mai aika eaku kao easi. Lovia imia'auna 'abuna vailanai 'eva lamepa kalakoika deani maivulevuleta. Katania 'eva Dilava idumena kalakoika.  
\v 6 Maivaka lovia imia'auna 'abuna vailanai ua'i 'eva dava ka ikana itani 'atu eanevaovo kalasi boina, eaneva vaika itani bika'a nama'ina vaika vana kilisitala boina.  
\p Bo'adai 'eva mauli davata vani lovia imia'auna 'abuna delavaia kaiukaiu, inoku ia vailata ai mai mulita ai 'eva maka ai ekaiutaavu.  
\v 7 Mauli davana makavana 'eva itani laioni boina, ivaluana 'eva itani bolomakau boina, ivakoina 'eva maivailana itani kau vailata boina, ivavanina 'eva itani bo'ibata elolovo boina.  
\v 8 Mauli davata vani kataua 'eva ka ka vanita kalakoi inoku vanita kataua laloata mai mulita 'eva maka ai ekaiutaavu. Boni mai lani ia lata sia de'ani, ia dediaka,  
\q1 “Kabukabu, kabukabu,  
\q1 kabukabu 'eva Lovia namana  
\q1 Siavu bounai Dilavana,  
\q1 Ia 'eva emia, emimia,  
\q1 mai be'asi kauna.”   
\p
\v 9 Mauli davata katania detata'u lovia imia'auna 'abuna akanai emia'au kauna mai emia keini keini kauna kevanai nuavi, 'olaaku mai vanama'ina luvata deveveni koanai,  
\v 10 'aida'aidata kauta luanavui vani detata'u lovia imia'auna 'abuna akanai emia'au kauna vailanai dekuidula, inoku emia keini keini Dilavana dekukudivo venia. Eta lovia i'olata davata dekapota lao lovia imia'auna 'abuna vailanai, inoku dediaka,   
\q1
\v 11 “Emai Lovia namana  
\q1 mai emai Dilava e,  
\q1 oni 'eva maiemu komolo,  
\q1 nuavi, 'olaaku mai siavu boabita,  
\q1 oni dava boutai ovavaita dainai,  
\q1 mai emu ula ai dava boutai  
\q1 depulu inoku demauli.”   
\c 5  
\s1 Ioane Puka Ilo'una Ka  //  Mai I'alavu Davana Eikaia.  
\p
\v 1 Inoku lovia imia'auna 'abunai emia'au kauna imana idibanai 'eva puka ilo'una ka aveke avekenai ilelena mai i'alavu davata kalakoi ka ai i'alavu 'inita eabia aikaia.  
\v 2 Inoku anelu kula'ilana ka aikaia evaoi 'unu'unu ediaka, “Dai 'eva mai ena komolo i'alavu davata beva'alamata inoku puka ilo'una beluvua?”  
\v 3 Beia sia kau ka vutuvutuai 'o kanobatai 'o kanobata venunai puka ilo'una beluvua bedaia 'o laloanai bekaidodo.  
\v 4 Inoku lau akani si'asi'a 'olana sia kau ka dedavalia eva mai ena ekomolo puka ilo'una beluvua 'o laloanai bekaidodo.  
\v 5 Inoku 'aida'aidata kauna ka e'ou'u ediaka, “Sia bokakani! Ikala, Iuda iduvuna ena Laioni, Davida lamuna kauna, 'ou kauta ekaokaita kauna, ia betata'u puka ilo'una mai i'alavuna davata kalakoi ka beluvuta bedaia.” \fig Puka ilo'una mai i'alavu davata.|src="Scroll-bb.tif" size="col" ref="5.1" \fig*   
\s1 Ioane Mamoe Nakuna Eikaia.  
\p
\v 6 Inoku Mamoe nakuna ka lovia imia'auna 'abuna bo'adanai elava aikaia, ikana itani 'ana'inai deaku bala boina, mauli davata vani mai 'aida'aidata kauta ua'i delavaia kaiukaiu. Ia bobolona 'eva kalakoika mai makana vaka kalakoika, kataua 'eva Dilava idumena kalakoika kanobata bounai laloanai esinita la'asi.  
\v 7 Mamoe nakuna eda'a inoku lovia imia'auna 'abunai emia'au kauna imana idibana ai puka ilo'una eabia.  
\v 8 Inoku ia puka ilo'una 'ani eabia koanai, mauli davata vani mai 'aida'aidata kauta luanavui vani 'eva Mamoe nakuna vailanai dekuidula. Ia ka ka 'eva mai eta kita vana hap maivaka kolo voduta laloatai 'eva mulamula bonata mediatai devavonuta deabi, kataua 'eva Dilava ena kabukabu kauta eta meamea.  
\v 9 Inoku masi makamakana ka deabia,  
\q1 “Lovia namana oni 'eva maiemu  
\q1 komolo puka ilo'una boabia  
\q1 mai i'alavuna davata boluvuta,  
\q1 'olana oni 'eva deaku bamu,  
\q1 inoku Dilava dainai 'eva  
\q1 iduvu boutai, lele boutai,  
\q1 kau boutai mai kanobata bounai  
\q1 kauta lalamu ai otavata.   
\q1
\v 10 Oni ota'u lovia vanuanai  
\q1 mai kabukabu kautai ovaaota  
\q1 eta Dilava da'alana be'abi,  
\q1 inoku ia 'eva kanobatai belovia.”   
\s1 Boutai Dilava Mai Mamoe Nakuna  //  Dekukudivo Venita.  
\p
\v 11 Inoku akailao 'eva anelu doutamo vaika leleta aika, sinavu boutai sinavu 'ouka dekeinia, ia deta'u lovia imia'auna 'abunai mai mauli davata vani mai 'aida'aidata kauta delavata kaiu.  
\v 12 Inoku demasi 'unu'unu dediaka,  
\q1 “Mamoe nakuna 'ana'inai  
\q1 deaku bala mamoena 'eva  
\q1 mai ena komolo, siavu, lavo,  
\q1 nuakomolo mai kula'ila  
\q1 maivaka 'olaaku, nuavi  
\q1 mai akuabalai beabita.”   
\p
\v 13 Inoku mauli davata boutai vutuvutuai, kanobatai, kanobata venuna mai 'atu ai mai 'atu laloanai demimia davata boutai demasi leleta aika dediaka,  
\q1 “Lovia imia'auna 'abuna  
\q1 akanai emia'au Dilavana  
\q1 mai Mamoe nakuna kevatai  
\q1 akuabalai, 'olaaku, nuavi mai  
\q1 siavu bemia keini keini!”   
\p
\v 14 Inoku mauli davata vani deluva dediaka, “Amen!” Inoku 'aida'aidata kauta dekuidula inoku dekukudivo venia.   
\c 6  
\s1 Mamoe Nakuna Puka Ilo'una I'alavuna Davata Kalakoi Eabita Ovo.  
\p
\v 1 Mamoe nakuna puka ilo'una i'alavuna davata makavana eva'alamaia aikaia. Inoku mauli davata vani banota ka eluva 'unu'unu lelena aika itani e'uluia boina, ediaka, “Mai!”  
\v 2 Akailao 'eva vaila'uai osi deva'ina ka aikaia, inoku emia'au kauna 'eva peva ka eabia, mai lovia i'olana davana ka 'eva devenia, inoku osiai eveau asi, ikana itani ia 'ani eta'u 'ou kauta eva'ekota, maivaka mai siavuna edada'a doutamo beva'ekota.   
\p
\v 3 Mamoe nakuna i'alavu davana ivaluana eva'alamaia koanai, mauli davana ivaluana eluva lelena aika ediaka, “Mai!”  
\v 4 Inoku osi kavaka ela'asi osina 'eva e'aola. Emia'au kauna 'eva siavu evenia kanobatai nua'elu beabia tau mai kau bevaviakuta, beviaku ba. Ia 'eva kuali lepona namavaika ka devenia.   
\p
\v 5 Mamoe nakuna i'alavu davana ivakoina eva'alamaia koanai, mauli davana ivakoina eluva lelena aika ediaka, “Mai!” Inoku akailao 'eva vaila'uai osi 'umabobokona ka aikaia. Emia'au kauna imanai 'eva mekau bevakovota davana ka eabia.  
\v 6 Inoku lele ka boina mauli davata vani viloatai eluva lelena aika ediaka, “Melala itoina vinaulana tavana 'eva witi 'ou ka'onamo, mai melala ka'onamo vinaulana tavana 'eva iani vana bali 'ou koi, beia 'olive auta mai vine kulata 'eva sia bovasi'avanata.”   
\p
\v 7 Mamoe nakuna i'alavu davana ivavanina eva'alamaia koanai, mauli davana ivavanina eluva lelena aika ediaka, “Mai!”  
\v 8 Akailao 'eva vaila'uai osi laolina ka aikaia. Emia'au kauna vana 'eva Ba, inoku ba kauta eta 'abu 'eva ia mulinai denanadia. Ia 'eva siavu devenita kanobata ikolena aveke vani laloanai avekena ka kauta 'eva kuali laloanai kuali leponai beaku bata, doe laloanai vikolo ai bebaba, 'olele laloanai 'oleleai bebaba mai kanobata sisita aivalata beaku bata.   
\p
\v 9 Mamoe nakuna i'alavu davana ivaimana eva'alamaia koanai, akailao vala kabukabuna venunai Dilava ena luva dainai mai ena luva i'ou daena dainai 'ani deaku bata kauta boutai idumeta aikata.  
\v 10 Ia devaoi 'unu'unu dediaka, “Siavu Loviana namana e, oni 'eva okabukabu mai momo'ai, melala davanai 'eva kanobata kauta bovaluvata inoku lalamai daitai mekau bovenita?”  
\v 11 Inoku ia ka ka 'eva tubu'a laka'ita deva'ita devenita, inoku e'outa melala kikinamo bevi'ima kovo beda'amo banota da'alaabi kauta mai bo'akalata 'eva beaku bata inoku iakubata vakuvakuna bevaolea kave'i vitaitana ia deaku bata boina.   
\p
\v 12 Mamoe nakuna i'alavu davana ivakalakoina eva'alamaia aikaia, kanokau namavaikana epulu. Melala evabula tubu'a 'umabobokona boina, vuia itoinai e'aola lala boinai eao,  
\v 13 mai visiu vutuvutuai de'ekoasi deda'a kanobatai itani lani eunu si'asi'a veivei evautea inoku vuana maikata eva'ekoasita boina.  
\v 14 Vutuvutu etaule itani puka ilo'una boina, delo'uia, inoku lolo mai motumotu boutai 'eva 'abutai devailutaasi.  
\v 15 Inoku kanobata loviata 'olata, lovia kauta, kuali 'olata kauta, lavo kauta, siavu kauta mai kau boutai, da'alaabi kauta mai sia da'alaabi kauta boutai 'eva va'ala mai lolo bika'ata viloatai depode.  
\v 16 Ia deta'u lolo mai bika'a namata de'aeta dediaka, “O'eko akamai ai inoku lovia imia'auna 'abunai emia'au kauna vailanai mai Mamoe nakuna ena badu kevatai ovatauavu mai.  
\v 17 'Olana ia eta badu melalana namana 'ani easi, inoku dai 'ani belavadivo?”   
\c 7  
\s1 Dilava Ena Da'alaabi Kauta Sinavu Boutai Sinavu Ka Vaninavui Vani (144,000) Ba'utai Loi Deabi.  
\p
\v 1 Kanaua mulinai anelu vani kanobata 'unipuata vani delavata avu aikata, kanobata ena lani vani deabita kao, sia lani ka kanoai 'o 'atuai be'unu 'o au ka bevivua.  
\v 2 Inoku anelu edeana ka vaka dae duasi ele'au easi aikaia, mauli Dilavana ena koa i'ulena davana eabia. E'ae lao 'unu'unu anelu vani kataua Dilava eta'u siavu evenita kanobata mai 'atu bevasi'avanata aneluta e'outa ediaka,  
\v 3 “Oi kanobata 'o 'atu 'o au sia oi bovasi'avanata beda'amo eta Dilava ena da'alaabi kauta ba'utai koa i'ulena davana lai bane'ea.”  
\v 4 Inoku koa i'uleta davata deabi kauta devakuta leleta aika 'eva da boutai sinavu ka sinavu vaninavui vani (144,000), ia boutai 'eva Isalaela iduvuna 'ouka lua etai deasi.   
\q1
\v 5 Iuda iduvuna kauta kataua koa i'uleta davata deabita kauta 'eva  
\q1 da boutai 'ouka lua (12,000),  
\q1 Lubena iduvunai 'eva  
\q1 da boutai 'ouka lua (12,000),  
\q1 Kado iduvunai 'eva  
\q1 da boutai 'ouka lua (12,000),   
\q1
\v 6 Asele iduvunai 'eva  
\q1 da boutai 'ouka lua (12,000),  
\q1 Napatali iduvunai 'eva  
\q1 da boutai 'ouka lua (12,000),  
\q1 Manase iduvunai 'eva  
\q1 da boutai 'ouka lua (12,000),   
\q1
\v 7 Simeona iduvunai 'eva  
\q1 da boutai 'ouka lua (12,000),  
\q1 Levi iduvunai 'eva  
\q1 da boutai 'ouka lua (12,000),  
\q1 Isakala iduvunai 'eva  
\q1 da boutai 'ouka lua (12,000),   
\q1
\v 8 Sebuluna iduvunai 'eva  
\q1 da boutai 'ouka lua (12,000),  
\q1 Iosepa iduvunai 'eva  
\q1 da boutai 'ouka lua (12,000),  
\q1 mai Beniamina iduvunai 'eva  
\q1 da boutai 'ouka lua (12,000).   
\s1 Kau Mato Namavaikana Tubu'ata Deva'ita Devadodo Dilava Dekukudivo Venia.  
\p
\v 9 Dava katania mulitai akailao 'eva kau mato namavaikana sia kau ka bemavakuta bemadaia, kanobata ka ka ai, iduvu ka ka ai, kau edeata edeata mai lele edeata edeata, lovia imia'auna 'abuna vailanai mai Mamoe nakuna vailanai delava aikata. Ia 'eva tubu'a deva'ita lakavaikata devadodo mai imatai 'eva vakolo uauata deabi.  
\v 10 Inoku devaoi 'unu'unu dediaka,  
\q1 “Vamauli 'eva eta Dilava,  
\q1 lovia imia'auna 'abunai  
\q1 emia'au kauna,  
\q1 mai Mamoe nakuna  
\q1 etai e'asi.”   
\p
\v 11 Anelu boutai 'eva lovia imia'auna 'abuna, 'aida'aidata kauta mai mauli davata vani delavata kaiu. Mai Lovia imia'auna 'abuna vailanai dekuidula vailata kua eda'aia inoku Dilava dekukudivo venia,  
\v 12 dediaka,  
\q1 “Amen!  
\q1 Akuabalai, nuavi, nuakomolo,  
\q1 vanama'ina luvata, 'olaaku,  
\q1 siavu mai kula'ila 'eva  
\q1 eta Dilava enai bemia keini keini.  
\q1 Amen.”   
\p
\v 13 Inoku 'aida'aidata kauna ka elavuai'u ediaka, “Tubu'a laka'ita deva'ita devadodota kauta katania 'eva kau davata? Maivaka a'ia'i de'asi?”  
\v 14 Lau ena luva avamuea adiaka, “Loviamu e, oni oikabasi.” Inoku e'ou'u ediaka, “Kau katania 'eva anaana namavaikana laloanai dela'asi deasi kauta, ia eta tubu'a laka'ita 'eva Mamoe nakuna lalanai 'ani dedeinita inoku devadeva'ita.  
\v 15 Kanaua dainai,  
\q1 ia 'eva Dilava ena lovia imia'auna 'abuna vailanai delalava,  
\q1 inoku ena luma kabukabuna laloanai boni mai lani  
\q1 ia da'alana de'abi.  
\q1 Inoku lovia imia'auna 'abuna  
\q1 akanai emia'au Dilavana 'eva ena  
\q1 aiole ai bevaaota akatai beva'auta.   
\q1
\v 16 Ia 'eva sia bevikolo kovo,  
\q1 sia vei bata beba kovo.  
\q1 Melala siavuna sia bekalata 'o  
\q1 sia siavu davata ka bevalo'olo'ota.   
\q1
\v 17 'Olana Mamoe nakuna lovia  
\q1 imia'auna 'abuna bo'adanai  
\q1 emimia 'eva ia beikata kao itani  
\q1 mamoe i'imata kauna boina,  
\q1 ia betata'u be'ana'ia vaita  
\q1 bedada'a mauli veina  
\q1 ebubudi kevanai,  
\q1 inoku Dilava betata'u ilulu  
\q1 makata boutai makatai  
\q1 beukuta ovo.”   
\c 8  
\s1 Puka Ilo'una I'alavuna Davana Ivakalakoi Eluvuia, Anelu Ka Mai Kolo Olakana.  
\p
\v 1 Mamoe nakuna Puka ilo'una i'alavuna davana ivakalakoikana eva'alamaia koanai, melala koana avekena boina ua'i vutuvutuai 'eva 'ulu asi'i vaika.  
\v 2 Inoku anelu kalakoi ka Dilava vailanai delava aikata, inoku bisi kalakoi ka 'eva devenita.   
\p
\v 3 Anelu edeana ka vaka kolo voduna ka eabia easi inoku vala kabukabuna vailanai elavadivo. Ia 'eva mulamula bonana mediana doutamo devenia inoku Dilava ena kabukabu kauta boutai eta meamea itana 'eva lovia imia'auna vailanai kolo valana kabukabuna akanai beveveni.  
\v 4 Inoku anelu imanai mulamula bonana mediana eani 'adumena 'eva Dilava ena kabukabu kauta eta meamea ita evaka'onamo dele'au deda'a Dilava vailanai.  
\v 5 Inoku anelu vodu eabia vala kabukabuna 'alovanai evavonua, inoku eitoia asi kanobatai 'eva vutuvutu e'uluia, 'ulu namata devua mai kanokau epulu.   
\s1 Anelu Vani  //  Eta Bisi Deuvani.  
\p
\v 6 Inoku anelu kalakoika kataua deva'olu eta bisi beuvanita. \fig Bisi deuvanita.|src="lb00187b.tif" size="col" ref="8.6" \fig*   
\p
\v 7 Anelu makavana ena bisi euvania, inoku lamu bika'a boita mai 'alova lala ita devaka'onamo de'ekoasi kanobatai. Kanobata ikolena koi laloanai avekena ka 'eva eani palu, au ikoleta koi laloanai au avekena ka eani palu, mai vadovado davata ikoleta koi laloanai vadovado davata avekena ka eani palu.   
\p
\v 8 Anelu ivaluana ena bisi euvania, inoku dava ka itani lolo namavaikana ka mai 'alovana boina 'eva 'atuai dekapoia uku. 'Atu ikolena avekena koi laloanai avekena ka 'eva lalai eao,  
\v 9 'atuai demauli davata ikoleta koi laloanai avekena ka 'eva deba, mai aunakoi ikoleta koi laloanai avekena ka desi'avana.   
\p
\v 10 Anelu ivakoina ena bisi euvania, inoku visiu namavaikana ka e'ailala itani au 'ala'auna ka e'ani 'alovana evuvule boina, vutuvutuai e'ekoasi, inoku lava boutai ikoleta aveke koi laloanai aveke ka akatai eno'au mai vei debubudi 'abutai eno'au.  
\v 11 Visiu vana 'eva ‘Vamai’. Vei boutai ikoleta aveke koi laloanai aveke ka 'eva evamai. Kau doutamo vei kanaua deinuia 'eva deba, 'olana vei evamai vaika.   
\p
\v 12 Anelu ivavanina ena bisi euvania, inoku melala ikolena aveke koi laloanai avekena ka 'eva 'ailalana eakuia, vuia ikolena aveke koi laloanai avekena ka 'ailalana eakuia, mai visiu boutai ikoleta aveketa koi laloanai aveketa ka 'eva 'ailalata eakuta, kanaua 'ounai aveketa ka 'eva devabula. Lani ikolena aveke koi laloanai avekena ka 'eva 'ailala asi'i, maivaka boni ikolena aveke koi laloanai avekena ka 'eva vitaitanamo.   
\p
\v 13 Inoku akailao 'eva bo'ibata ka vutuvutuai elovo aikaia 'eva eluva 'unu'unu lelena aika ediaka, “Besi'avana! Besi'avana! Kanobatai demimia kauta boutai kevatai 'eva besi'avana vaika, 'olana anelu koina kataua eta bisi 'ani beuvanita 'ulutai 'eva dava bepupulu.”   
\c 9  
\s1 Anelu Ivaimana  //  Ena Bisi Euvania.  
\p
\v 1 Anelu ivaimana ena bisi euvania, inoku vutuvutuai visiu ka e'ekoasi eda'a kanobatai aikaia. Visiu kanaua 'eva 'uli e'ovu vaika sia bepupua 'ulina iluvuna kina devenia.  
\v 2 Ia 'uli e'ovu vaika kanaua eluvuia koanai, vaitabu 'uliai ele'au itani 'alova namavaikana e'ani vaitabuna ele'au boina. Melala mai vutuvutu 'eva 'uli e'ovu vaika vaitabunai evavabulata.  
\v 3 Inoku 'oasi'o vaitabu laloanai dela'asi deasi kanobatai, ia 'eva siavu evenita vitaitana itani 'a'ava ealata anaanana boina.  
\v 4 'Oasi'o de'outa sia kanobata avana 'o vadovado davana ka 'o au ka bevasi'avanala, beia Dilava ena koa ba'utai asi'i kauta kataua mo bevaanaanata.  
\v 5 Ia 'eva e'outa vuia ima mo laloanai kau bevaanaanata, ia sia beaku bata. Inoku anaana betata'u bevaanaanata 'eva itani 'a'ava kau ealala anaanana boina.  
\v 6 Melala kataua laloatai kau 'eva ba bekavua, beia sia bedavalia, beula vaika bemaba, beia ba 'eva ia etai beveau tau.   
\p
\v 7 'Oasi'o kataua ikata 'eva itani kuali beda'ala osita deva'oluta boita, 'olatai 'eva dava ka itani lovia i'olana davana kolo ai devavaia boina de'olaia, mai vailata 'eva itani kau vailata boita.  
\v 8 Vuita 'eva itani 'a'ate vuita laka'ita boita, mai niketa 'eva itani odola sisi vana laioni niketa boina.  
\v 9 Pedetai 'eva 'auli palapalanai de'alavuta, ia vanita 'uluta 'eva itani osi doutamo vaika mailava'au davata vata kaliota ositai deliota develita kuali deda'ala 'uluta boita.  
\v 10 Iuta 'eva mai'inita itani 'a'ava iuta boita, mai iutai 'eva mai eta siavu kau vuia ima bevaanaanata.  
\v 11 Ia 'eva mai eta lovia 'olana ka, 'uli e'ovu vaika kanaua eikala kao aneluna, 'Ebelu leletai ia vana 'eva Abadoni, mai 'Elene leletai vana 'eva Apoliona, anina 'eva Vasi'avana kauna.   
\p
\v 12 Si'avana namavaikana makavana 'ani eole, kanania mulinai si'avana namavaikata lua 'ani be'asi.   
\s1 Anelu Ivakalakoina  //  Ena Bisi Euvania.  
\p
\v 13 Anelu ivakalakoina ena bisi euvania, inoku lele ka 'eva Dilava vailanai vala kabukabuna kolo ai devavaia kanaua bobolona vani etai 'uluna easi aika.  
\v 14 Lele kanaua eta'u anelu ivakalakoina bisi eabia aneluna e'ouia ediaka, “Eupalate lavana namana aba'abanai anelu vani 'ani deliota aneluta kataua boluvuta.”  
\v 15 Inoku anelu vani kataua 'ani deva'olu vikau kanaua vuia kanaua melala kanaua mai melala koana kanaua'i 'eva beluvuta kanobata kauta ikoleta aveke koi laloanai avekena ka beaku bata.  
\v 16 Anelu vani kataua eta kuali kauta mai osita eta numela aika 'eva kelepu boutai sinavu lua (200,000,000).  
\v 17 Inoku e'u makakeini ai osi mai ivaveauta kauta osi akatai demia'au aikata, ia pedeta i'alavuta 'aulita 'eva de'aola itani 'alova boina, de'uma'uma, mai delaoli. Osi 'olata 'eva itani odola sisi vana laioni 'olata boita, maivaka nututai 'alova, vaitabu mai bika'a vata salpa mai 'alovata dela'asi.  
\v 18 Dava si'avata vaika koi kataua osi nututai dela'asi davata deta'u kanobata kauta ikoleta aveke koi laloanai avekena ka deaku bata, dava kataua 'eva 'alova, vaitabu, mai bika'a vata salpa.  
\v 19 Osi eta siavu 'eva nututai mai iutai demimia, iuta 'eva itani kau'asi mai 'olata boita inoku kanaua'i kau devaanaanata.   
\p
\v 20 Kau kalina dava si'avata vaika koi katania'i sia deaku bata kauta 'eva imatai devavai davatai sia delalo'udai, ia ka'uba si'avata vaika, mai kolo, siliva, kopa, bika'a, mai au ai devavaita dilavata dedeta, sia deikaika 'o lele sia de'ika 'o sia dedada'a dilavata dedeta kataua ikukudivo venita sia devapuala.  
\v 21 Eta akuaku koakoatai, eta oada koakoatai, eta mo'a koakoata si'avata vaikai, 'o eta vinao koakoatai sia delalo 'udai kovo.   
\c 10  
\s1 Anelu Ka Mai Puka  //  Ilo'una Kikina Ka.  
\p
\v 1 Inoku anelu kula'ilana ka vutuvutuai e'ovu easi aikaia. Ia 'eva oli ekaiuia avu, 'olana akanai 'eva boualo, ia vailana e'ailala itani melala boina, mai ia aena ikata 'eva itani 'alova evule si'asi'a boita.  
\v 2 Ia 'eva puka ilo'una kikina ka 'ani iluvuna imanai eabia. Aena idibana 'eva 'atu akanai elava'au mai aena e'alina 'eva kanobata akanai elava'au.  
\v 3 Anelu kanaua evaoi 'unu'unu itani odola sisi vana laioni enini boina. Inoku evaoi koanai, e'uluia 'eva 'ulua kalakoi-ka, ka ka luva ka ka deluva.  
\v 4 Inoku 'ulua kalakoi-ka deluva koanai, lau 'eva leleta balele kao akoma. Beia lele ka vutuvutuai easi aika ediaka, “'Ulua kalakoi-ka deluluva luvata bovunita, sia boleleta 'au.”   
\p
\v 5 Inoku anelu 'atu akanai mai kanobata akanai elava'au aneluna kanaua aikaia imana idibana eisia 'au vutuvutu eda'aia.  
\v 6 Inoku anelu kanaua eta'u mia keinikeini Dilavana, vutuvutu mai laloana davata boutai mai kanobata mai laloana davata boutai mai 'atubata mai laloana davata boutai evavaita Dilavana vanai eluva'ana'i ediaka, “Vi'ima melala 'ani eole, Dilava 'eva sia bevi'ima dau'a.  
\v 7 Beia anelu ivakalakoi-kana ena bisi beuvania melalanai koanai, Dilava ena lalovai vuniana 'eva bevaolea, Vali nama'ina kanania 'eva ena enolea kauta ia da'alana de'abi kauta evaikabasita vitaitanai bepupulu.”   
\s1 Ioane Puka Ilo'una Kikina Eania.  
\p
\v 8 Inoku vutuvutuai lele kanaua eluva veni'u 'udai lelena aika ediaka, “Da'a inoku anelu 'atuai mai kanobatai elalava aneluna imanai puka ilo'una iluvuna kanaua boabia.”  
\v 9 Kanaua 'ounai ada'a anelu kanaua kevana inoku anoia puka ilo'una kikina kanaua beveni'u. Ia lau e'ou'u ediaka, “Abia ania. Nutumuai 'eva bedia'adia'a itani metunu veina boina, beia bo'amuai 'eva be'uli.”  
\v 10 Inoku anelu imanai puka ilo'una kikina kanaua abia inoku ani palua, mamina nutu'uai 'eva edia'adia'a itani metunu veina boina, beia ani palua mulinai bo'a'uai 'eva euli.   
\p
\v 11 Inoku e'ou'u ediaka, “Oni 'eva kau edeata edeata, kanobata edeata edeata, mala edeata edeata, maivaka lovia 'olata edeata edeata kauta boutai kevatai enolea luvata boluva vai 'udai.”   
\c 11  
\s1 Vali Kava Kauta Lua.  
\p
\v 1 Lau 'eva silibo ka itani dava ivakovota ikoko'ana boina eveni'u inoku e'ou'u ediaka, “Da'a, Dilava ena lo'e kabukabuna mai vala kabukabuna bovakovota, maivaka ua'i dekukudivo kauta bovakuta.  
\v 2 Beia lo'e kabukabuna alana mulimulina kua bo'adana 'eva sia bovakovoa, 'olana pulu edea kauta 'ani evenita, ia vanua kabukabuna vuia vaninavui lua 'eva beda'ala 'ika'ika 'au.  
\v 3 Lau vali'u ikavana kauta lua siavu bavenita inoku pute tubu'ata bevadodota kataua 'eva vilalo koana devala'asia, inoku melala boutai da ka sinavu lua kalakoi navui (1,260) kataua laloatai enolea luvana beilolo vaia.”   
\p
\v 4 Vali kava kauta luana katania 'eva olive auta lua mai lamepa ivalavata davata lua katania 'eva kanobata eloviala Loviana namana vailanai delalava.  
\v 5 Bema kau ka be'ula laluana bevaanaanata, laluana nututai 'alova bela'asi inoku eta 'ou kauta bevasi'avanata, inoku kau davana be'ula bevaanaanata kauna 'eva kanania boinai beaku bata.  
\v 6 Kau katania 'eva mai siavuta vutuvutu be'alavua inoku enolea luvana beilolo vaia melalata laloatai 'eva lamu sia be'aku. Maivaka mai siavuta vei lalai bevaaoa, mai ia eta ula vitaitanai si'avana ivapuluta vinaulata edeata edeata ai kanobatai bevapulu.   
\p
\v 7 Ia eta vali kava kanaua bevaolea bepupua mulinai, aivala sisina 'eva 'uli to'ona asi'i laloanai bele'au be'asi 'eva beviaku venita inoku beakuta 'eva beaku bata.  
\v 8 Ia kauanita 'eva Ielusalema vanuana namana dalana bo'adanai be'eno. Ua 'eva ia eta Lovia namana au ido'o valaukuna akanai eba 'abuna, vanua namana kanaua luva ivavitaitanai vana de'ouia, Sodomo 'o Aikupito.  
\v 9 Melala koi mai kalina ka laloanai kau edeata edeata, iduvu edeata edeata, lele edeata edeata, mai kanobata edeata edeata kauta be'asi ba kauanita luana kataua beikata, beia be'outa sia bekoleta.  
\v 10 Kanobata kauta 'eva kau luana eta ba dainai belalonama si'asi'a, maivaka kau ka ka ainama beveni vidaveni, 'olana enolea kauta luana kataua deta'u kanobata kauta devaanaanata vaika.   
\p
\v 11 Beia melala koi mai kalina ka de'ole mulitai, Dilava enai mauli lavivina easi nuatai edodo, inoku deko'isi delavadivo. Deikata kauta boutai 'eva demakau si'asi'a.  
\v 12 Inoku vutuvutuai lele namavaikana ka deika, ediaka, “Oele'au omai nia'i.” Inoku ia oli ka laloanai dele'au deda'a vutuvutu laloanai 'eva eta 'ou kauta devialulu.  
\v 13 Melala koana kanaua'i 'eva kanokau namavaikana epulu inoku vanua namana ikolena aveke 'ouka laloanai aveke ka 'eva itoina evasi'avanala, maivaka kanokau eta'u kau da boutai kalakoika (7,000) evabata. Kau kalina demauli kauta kataua 'eva demakau si'asi'a inoku vutuvutu Dilavana devanama'inala.   
\p
\v 14 Si'avana namavaikana ivaluana 'ani eole. Oteko, si'avana ivakoina 'eva kevaimo be'asi.   
\s1 Anelu Ivakalakoi Kana  //  Ena Bisi Euvania.  
\p
\v 15 Inoku anelu ivakalakoikana ena bisi euvania. Inoku vutuvutuai lele deluva 'unu'unu dediaka,  
\q1 “Kanobata vanuana 'eva  
\q1 'ani easi eta Lovia namana mai  
\q1 ia ena Keliso etai eao. Inoku  
\q1 Dilava beloviala keini keini.”   
\m
\v 16 Inoku 'aida'aidata kauta luanavui vani Dilava vailanai eta lovia imia'autai demia'au kauta, vailata kano eda'aia depaka divo Dilava dekukudivo venia,  
\v 17 dediaka,  
\q1 “Lovia namana Siavu boutai  
\q1 Dilavana e, oni omimia mai  
\q1 'ana'inai omia.  
\q1 Lai vanama'ina luvata lai avenimu,  
\q1 'olana emu siavu namavaikana  
\q1 'ani oabia  
\q1 inoku 'ani bomakava  
\q1 kanobata itoina boloviala.   
\q1
\v 18 Pulu edea kauta 'eva  
\q1 debadu si'asi'a,  
\q1 beia 'olana oni emu badu  
\q1 melalana 'ani easi,  
\q1 ba kauta boutai ivaluvata  
\q1 melalana 'ani easi.  
\q1 Emu da'alaabi kauta  
\q1 enolea kauta kataua,  
\q1 mai emu kabukabuta kauta,  
\q1 mai oni vamu 'olana de'aku kauta  
\q1 kataua, kikitai eda'amo namata,  
\q1 boutai tavata nama'ita  
\q1 bovenita melalana 'ani easi.  
\q1 Maivaka kanobata devasi'avanala  
\q1 kauta kataua bovasi'avanata  
\q1 melalana 'ani easi.”   
\p
\v 19 Inoku Dilava ena lo'e kabukabuna vutuvutuai 'eva eviluvu, inoku ena talavatu mauana 'eva ua'i lo'e kabukabuna laloanai ua'i aikaia. Inoku e'amalea, 'ulu namavaikata devua, e'uluia, kanokau eko'isi, mai lamu bika'a boita eaku.   
\c 12  
\s1 Ateate Ka Mai Sisi Ka  //  Vana Dragon.  
\p
\v 1 Inoku koa namana ka vutuvutuai evailaasi. Ateate ka tubu'ana 'eva melala, mai vuia 'eva ia aena palapalata venutai, mai lovia i'olana davanai 'eva visiu 'ouka lua e'olaia.  
\v 2 Ia 'eva maibo'ana inoku maiananana ekani vilavila vitaitana 'eva 'ani bemauli.  
\v 3 Inoku koa ka vaka edeana vutuvutuai evaila. Dragon ka 'aolana nama vaikana 'olana kalakoi ka ita mai bobolona 'ouka mai lovia 'olata davata kikita kalakoi ka 'eva ia 'olana ka ka akatai.  
\v 4 Ia iunai visiu ikolete koi laloani aveke ka vutuvutuai edalota asi de'ovu kanobatai.  
\p Dragon ateate 'ani bemauli eko ateatena vailanai elava, inoku ateate melo bevapulua koanai beaniamo.  
\v 5 Inoku ateate melo evapulua, melo 'eva moluanena, melo kanaua 'eva kanobata boutai 'auli ikoko'anai be'ola vaita, inoku melo 'eva deabia molau dele'au deda'a Dilava kevana inoku eda'a ena lovia imia'aunai.  
\v 6 Ateate 'eva eveau ovo eda'a kano'akunai Dilava 'abu ka 'ani eva'olua ia ena 'abu, ua'i ia be'imala beda'a melala boutai da ka sinavu lua kalakoinavui (1,260).   
\p
\v 7 Inoku vutuvutuai 'eva kuali epulu, Mikaelo mai ena anelu ita dragon deviaku venia, dragon mai ena anelu ita vaka Mikaelo deviaku venia.  
\v 8 Beia dragon ena kula'ila 'eva sia edaia, inoku ia mai ena anelu ita 'eva vutuvutuai eta 'abu devatauleia.  
\v 9 Dragon namana kanaua 'eva vutuvutuai deitoia asi. Ia 'eva kau'asi 'ana'ina vana Diabolo 'o Satani, kanobata itoina elebaia kauna. Ia mai ena anelu ita 'eva deitota asi de'ovu kanobatai.   
\p
\v 10 Inoku lele ka namavaikana vutuvutuai aika ediaka,  
\q1 “Vali'u eta Dilava ena vamauli,  
\q1 ena siavu, mai ena lovia vanuana,  
\q1 mai Keliso ena siavu 'eva  
\q1 'ani easi,  
\q1 'olana bo'akalata va'evai  
\q1 e'uleta kauna,  
\q1 boni mai lani Dilava vailanai  
\q1 va'evai e'uleta kauna 'eva  
\q1 'ani itona asi.   
\q1
\v 11 Ita bo'akalata mamoe nakuna  
\q1 lalanai mai Dilava ena luva  
\q1 iluvanai diabolo deakuia.  
\q1 Ia eta mauli 'eva sia delalo'au  
\q1 venia ia deula bebaba.   
\q1
\v 12 Kanaua 'ounai oi vutuvutu mai  
\q1 ua'i oi omimia kaumui boumuiai,  
\q1 olalonama.  
\q1 Beia kanobata mai 'atu 'eva  
\q1 besi'avana vaika,  
\q1 'olana Diabolo 'eva 'ani  
\q1 e'ovu evasi kele'emui,  
\q1 ia 'eva ebadu vaika,  
\q1 'olana eikabasi ena melala  
\q1 'eva 'ani eto'oto'o.”   
\p
\v 13 Dragon eikabasi ia 'eva 'ani deitoia asi e'ovu kanobatai koanai ia ateate melo evapulua ateatena ulana sia eula beaku bala eko mulinai eda'a.  
\v 14 Beia ateate 'eva bo'ibata namana vanina lua devenia, inoku belolovo beda'a kano'akunai ena 'abu iva'oluna kanauai, ua'i be'imala vikau koi mai kalina ka, kau'asi ia sia bedavalia.  
\v 15 Inoku kau'asi kanaua nutunai vei e'ulaia asi itani abaka boina inoku ateate mulinai eda'a bealuaovo.  
\v 16 Beia kanobata ateate eduluia nutuna eluvuia inoku vei kanaua dlaron nutunai e'ulaia asi veina edonoia.  
\v 17 Dragon 'eva ateate ebadu venia si'asi'a, 'ounai eda'a ateate nakuna mai kekena bekuali venita. Kau kataua 'eva Dilava ena luva deabi 'ini mai Iesu luva umauna evala'asia enai deabiveni kauta.  
\v 18 Inoku dragon 'eva 'atuai nabuai elava.   
\c 13  
\s1 Aivala Sisita Lua Dele'au.  
\p
\v 1 Inoku akailao 'eva aivala sisina namavaikana ka 'atuai ele'au aikaia. Ia 'eva bobolona 'ouka mai 'olana kalakoi ka, bobolonai 'eva mai eta lovia 'olata davata 'ouka, 'olana ka ka akatai 'eva Dilava ivasi'avanana luvata ileleta.  
\v 2 Aivala sisina namavaikana kanaua aikaia ikana 'eva itani pusi asina namavaikana boina aena ikata 'eva itani sisi vana bea aena boita, mai nutuna 'eva itani sisi vana laioni nutuna boina. Dragon eko'isi ena kula'ila, mai ena lovia imia'auna, mai siavu namana aivala sisina namavaikana kanaua evenia.  
\v 3 Aivala sisina namavaikana kanaua aikaia 'olana ka 'eva duana loina bema vabaia boina beia dua kanaua 'eva enama'ina, inoku kanobata itoinai etabulovo si'asi'a aivala sisina namavaikana kanaua mulinai eda'a.  
\v 4 Kau dragon kanaua dekukudivo venia 'olana ia 'ani siavu aivala sisina namavaikana evenia, inoku aivala sisina namavaikana vaka dekukudivo venia delavuai dediaka, “Dai 'eva aivala sisina namavaikana kanania boina? Dai maikula'ilana ia bekuali venia?” \fig |src="HK00046B.TIF" size="col" ref="13.2" \fig* \fig |src="lb00048b.tif" size="col" ref="13.2" \fig* \fig Taiga, Bea, mai Laioni.|src="bk00049b.tif" size="col" ref="13.2" \fig*   
\p
\v 5 Aivala sisina 'eva komolo evenia apa luvata, mai Dilava ivasi'avanana luvata beluluva, siavu evenia vuia vaninavui lua laloatai ia belovia.  
\v 6 Nutuna eluvuia Dilava ivasi'avanana luvata eluva, mai luva dedetai ia vana, mai Dilava ena mia 'abuna mai vutuvutuai demimia kauta boutai vaka etai.  
\v 7 Ia 'ani siavu devenia Dilava ena kau bekualita beakubata. Mai komolo evenia iduvu boutai, kau boutai, lele boutai mai kanobata boutai be'olavaita.  
\v 8 Kanobata ivavainai vata sia ileleta mamoe nakuna deakubala ena mauli pukanai kauta boutai kanobatai demimia kauta ia bekukudivo venia.  
\v 9 Maikaiana kauna, lele be'ika.   
\q1
\v 10 Dilava be'ula kau ka beabia bevavabuto'oa koanai, kau kanaua  
\q1 'eva beabia bevavabuto'oa.  
\q1 Mai be'ula kau ka kuali leponai  
\q1 bekala bala koanai, kau kanaua  
\q1 'eva kuali leponai bekala bala.  
\q1 Kanania evavaia 'eva ia ena  
\q1 kabukabu kauta 'eva vakula'ilai  
\q1 mai abiveniai bemimia.   
\p
\v 11 Inoku aivala sisina namavaikana edeana ka vaka kano laloanai ele'au aikaia, ia bobolona 'eva lua itani mamoe nakuna bobolona boita, beia eluvaluva lelena 'eva itani dragon boina.  
\v 12 Ia 'eva aivala sisina namavaikana makavana ena siavuai mai vanai evinaula, siavu kanania'i kanobata mai kanobatai demimia kauta boutai evaasiasita aivala sisina namavaikana makavana kanaua dekukudivo venia, dua bema vabaia beia enama'ina vaia sisina namavaikana kanaua.  
\v 13 Aivala sisina namavaikana ivaluana vatabulovo vinaulata namata evavai, ka 'eva kau boutai makatai 'alova vutuvutuai eva'ovua easi kanobatai.  
\v 14 'Olana siavu evenia vatabulovo vinaulata kataua aivala sisina namavaikana makavana vanai evavai. Vatabulovo vinaulata kataua'i kanobatai demimia kauta boutai elebata. E'outa aivala sisina namavaikana makavana kuali leponai dekalaia bemaba beia emauli 'udai kanaua ikaikana va'ava'ana ka bevavaia ia vana beabiaisi mai beakuaabalai.  
\v 15 Siavu evenia aivala sisina namavaikana makavana ikaikana va'ava'ana mauli lavivina bevenia bevamaulia, inoku ia vaka beluvaluva mai kau boutai be'outa dai koakoana va'ava'ana sia bekukudivo venia kauta kataua boutai 'eva beakubata.   
\p
\v 16 Maivaka aivala sisina namavaikana kau boutai evaasiasita, kikita mai namata, lovia kauta mai ta'ovala kauta, sia da'ala de'abi kauta mai da'ala de'abi kauta, boutai 'eva koa ka imata idibatai 'o ba'utai beabia.  
\v 17 Dai koa kanaua sia eabia kauna 'eva sia dava ka betavala mai sia dava ka betavatava vaia kovo, koa kanaua 'eva aivala sisina namavaikana kanaua vana 'o ia vana numelana.  
\v 18 Maiaonekamu kaumu 'eva vakuvaku kanania anina 'ani boikabasia bedaia, 'olana vakuvaku kanania 'eva kau vana, numelana 'eva sinavu kalakoi kalakoinavui kalakoi (666).   
\c 14  
\s1 Mamoe Nakuna Ena Kau  //  Masi Makamakana Deabia.  
\p
\v 1 Inoku akailao 'eva mamoe nakuna vaila'uai aikaia, Siona lolona akanai elava, mai kau boutai da sinavu ka vaninavui vani (144,000) 'eva ia ita mai kau kataua ba'utai 'eva mamoe nakuna vana mai kamana vana ileleta.  
\v 2 Inoku 'ulu ka vutuvutuai aika itani abaka ealu 'uluna mai vutuvutu e'uluia 'uluna namana boina. 'Ulu kanaua aika 'eva itani kita aku kauta eta kita vata 'apa demone vai boita.  
\v 3 Inoku kau kataua masi makamakana ka lovia imia'auna vailanai mai mauli davata vanina vailatai mai kau 'aida'aidata vailatai deabia. Sia kauka masi kanaua 'ani beikabasia ia kau da 144,000 kanobatai lalanai etavata kautamo sibota.  
\v 4 Kau kataua 'eva 'a'ate ita sia denoka'ona kauta, eta mauli laloatai sia va'eva ka devavaia. Mamoe nakuna a eda'ala 'eva mulinaimo dedada'a kauta. Kanobata kauta viloatai ia 'eva etavata mai Dilava mai Mamoe Nakuna etai 'eva veniveni davata makavatai deao.  
\v 5 Dede luvana ka nututai sia deluvaia, ia kevatai 'eva va'eva asi'i.   
\s1 Anelu Koi Valuva Melalana  //  Valina Dekava.  
\p
\v 6 Inoku anelu edeana ka vutuvutu mai kanobata bo'adatai elovo aikaia, ia 'eva Vali nama'ina mia keinikeini valina eabia, inoku kanobatai demimia kauta kevatai beilolo vaia, kanobata boutai, iduvu boutai, mala edeata edeata, mai kau boutai kevatai.  
\v 7 Ia eluva 'unu'unu ediaka, “Dilava makauna omakau mai vana oabiaisi, 'olana lavuai melalana 'ani edaia. Vutuvutu, kanobata, atu mai kanoai vei ebubudi ivavaita kauna okukudivo venia.”   
\p
\v 8 Inoku anelu ivaluana anelu makavana mulinai elovo ediaka, “Ani e'eko asi! Babulonia vanua namana, 'ani e'eko asi, ena mo'a anaanana mulamulanai kanobata boutai eva inubata.”   
\p
\v 9 Inoku anelu edeana ivakoina anelu luana mulitai elovo eluva 'unu'unu ediaka: “Kau ka aivala sisina namavaikana mai ia ikaikana va'ava'ana ekukudivo venia mai ia ba'unai 'o imanai sisi namavaikana loina beabia koanai,  
\v 10 ia vaka Dilava ena badu mulamulana pasisina beinua, ena badu 'ounai elaiauda sia maiveina. Kauna kanaua 'eva anelu kabukabuta mai Mamoe nakuna vailatai 'alova maibika'ana vana salpai belo'olo'o beanana si'asi'a.  
\v 11 Deanana vaia 'alovana kanaua vaitabuna 'eva bele'au to'ona asi'i. Aivala sisina namavaikana mai ikaikana va'ava'ana dekukudivo venia 'o vana loina deabia kauta 'eva boniai mai laniai eta laani asi'i, 'o vana numelana deabia kauta 'eva beananamo.”   
\p
\v 12 Kanaua 'ounai Dilava ena kabukabu kauta mai ena luva 'olata de'aku mai Iesu enai deabiveni 'ini kauta 'eva manauai bemimia.   
\p
\v 13 Inoku lele ka vutuvutuai aika ediaka, “Luva kanania lelea. Vanama'ina 'eva vali'u beda'a vailai Lovia namana enai deabidadama mai debaba kauta etai.” Idume Kabkabuna vaka ediaka, “'O momo'ai, eta vinaula mekauai lata be'ani, eta vinaula nama'ita betata'u ia bebanota.”   
\s1 Kanobata Ena Ukuuku  //  Melalana Edaia.  
\p
\v 14 Inoku akailao, 'eva oli ka deva'ina vaila'uai aikaia, oli kanaua akanai kau ka emia'au ikana 'eva itani Kau nakuna boina, 'olanai 'eva lovia 'olana davana kolo ai devavaia, mai imanai 'eva ukuuku lepona 'anona ka eabia.  
\v 15 Inoku anelu edeana ka lo'e kabukabunai ela'asi oli akanai emia'au kauna e'aeia 'unu'unu ediaka, “Emu ukuuku lepona abia ukuuku vaia, 'olana ukuuku melalana 'eva 'ani eabia, kanobatai ukuuku davata 'eva 'ani de'aiva.”  
\v 16 Kanaua 'ounai oli akanai emia'au kauna ena ukuuku lepona kanobata akanai etaveia, inoku kanobatai de'aiva davata boutai eukuta.   
\p
\v 17 Inoku anelu edeana ka vutuvutuai lo'e kabukabunai ela'asi, ia vaka imanai ukuuku lepona ka 'anona eabia.  
\v 18 Mune'e anelu edeana ka vaka, 'alova e'ola vaia aneluna, vala kabukabunai ela'asi inoku anelu imanai ukuuku lepona 'anona eabia kanaua e'aeia 'unu'unu ediaka, “Emu ukuuku lepona 'anona abia kanobata ena vine kulanai vine vuavuata ukuta, 'olana kanobata vinena vuavuata 'eva 'ani de'aiva.”  
\v 19 Inoku anelu kanaua ena ukuuku lepona kanobata akanai etaveia, kanobata vinena vuavuata edouta bou inoku Dilava ena badu 'abuna vine vuavuata imuduta mukamuka 'abunai ekapota dodo.  
\v 20 Inoku ia 'eva vanua mulinai vine vuavuata imuduta mukamuka 'abunai demuduta mukamuka, inoku imuduta mukamuka 'abunai lala ealu asi, ele'au eda'a akai itani osi bemalavadivo nutunai boina, ia ena laka'ina 'eva kilomita sinavu koi boina.   
\c 15  
\s1 Anelu Kalakoi Ka Vasi'avana Davata Oleta Kalakoi Ka Deabita.  
\p
\v 1 Akailao 'eva koa ka namavaikana mai nama'ina vaika vutuvutuai aikaia. Anelu kalakoi ka imatai 'eva anaana si'avata vaika davata oleta umauta kalakoi ka deabita, 'olana katania'i 'eva Dilava ena badu bevaolea.   
\p
\v 2 Inoku akailao dava ka itani 'atu 'eva kalasi boina mai'alovana aikaia. Kau ua'i 'atu 'aba'abanai delava kauta 'eva aivala sisina namavaikana mai ikaikana va'ava'ana mai vana numelana deakuta kauta. Dilava kita vana apa kanaua evenita deabi.  
\v 3 Inoku Mose Dilava ena da'alabi kauna masina mai Mamoe nakuna masina deabita,  
\q1 “Emu vinaula 'eva namavaikata  
\q1 mai mediata vaika,  
\q1 Lovia namana siavu boutai  
\q1 Dilavana e.  
\q1 Emu dala 'eva  
\q1 komolota mai umauta,  
\q1 Kanobata boutai eta Lovia.   
\q1
\v 4 Lovia namana e,  
\q1 dai 'eva makaumu sia bemakau,  
\q1 mai vamu sia beabia isi?  
\q1 'Olana oni sibomu 'eva  
\q1 okabukabu.  
\q1 Kanobata boutai be'asi  
\q1 oni vailamuai bekukudivo venimu,  
\q1 'Olana oni emu koakoa komolota  
\q1 'eva 'ani deika.”   
\p
\v 5 Katania mulitai akailao vutuvutuai lo'e kabukabuna iluvuna aikaia, ua 'eva Dilava ena talavatu aiolena.  
\v 6 Inoku anelu kalakoi ka anaana si'avata vaika davata kalakoi ka imatai deabi ua'i dela'asi deasi, tubu'a nama'ita vaika vata linen, mai'amale 'amaleta devadodota, mai pedetai 'eva kolo 'apata.  
\v 7 Inoku mauli davata vanina ka kolo voduta kalakoi ka mia keinikeini Dilavana ena baduai devonu, eabita anelu kalakoi ka kataua evenita.  
\v 8 Inoku Dilava ena nuavi mai ena siavu vaitabuna 'eva lo'e kabukabuna laloana evavonua, inoku sia kau ka bema da'adodo bemada'amo anelu kalakoi ka kataua anaana si'avata vaika davata kataua bemavaoleta.   
\c 16  
\s1 Dilava Ena Badu Voduta  //  Kalakoi Ka De'itabuta Siusiu.  
\p
\v 1 Inoku lele ka lo'e kabukabunai aika anelu kalakoi ka e'outa 'unu'unu ediaka, “Oda'a, Dilava ena badu voduta kalakoi ka kanobata akanai oi bopovuta asi.”   
\p
\v 2 Kanaua 'ounai anelu makavana eda'a ena vodu kano akanai e'itabua asi, inoku dua ikana sia mediana mai eanana vaika kau aivala sisina ena numelana deabia mai ikaikana va'ava'ana dekukudivo venia kauta akatai epulu.   
\p
\v 3 Anelu ivaluana ena vodu 'atu akanai e'itabua asi, inoku 'atu lalai eao itani ba kauna lalana boina, inoku dava ua'i 'atu laloanai demauli davata boutai deba.   
\p
\v 4 Anelu ivakoina ena vodu nutuai mai vei kanoai debubudi akatai e'itabua asi, inoku lala ai deao.  
\v 5 Inoku vei e'ola vaita aneluna lelena aika ediaka,  
\q1 “Oni 'eva kabukabu Dilavana,  
\q1 oni 'eva vali'u omimia mai  
\q1 'ana'inai omia Dilavamu,  
\q1 emu valuva katania'i si'avana  
\q1 kauta mekau ovakoata 'eva  
\q1 okomolo vaika.   
\q1
\v 6 'Olana ia deta'u emu kabukabu  
\q1 kauta mai enolea kauta  
\q1 deaku bata lalata de'itabu asi,  
\q1 inoku ia eta koakoai deula lala  
\q1 be'inu 'ounai lala ovenita be'inu.”   
\m
\v 7 Inoku lele ka vala kabukabunai easi aika ediaka,  
\q1 “'O, luva umauna, Lovia namana  
\q1 siavu boutai Dilavana e,  
\q1 oni emu valuva ai si'avana kauta  
\q1 mekau ovakoata 'eva  
\q1 umauta mai dekomolo.”   
\p
\v 8 Anelu ivavanina ena vodu melala akanai e'itabua asi, inoku melala siavu evenia 'alova siavunai kau bevalo'olo'ota.  
\v 9 Siavu nama vaikana eta'u kau evalo'olo'ota inoku Dilava vana desivadala, anaana si'avata vaika e'olavaita kauna, beia sia deula belalo'udai inoku Dilava vana beakuaabalai.  
\v 10 Anelu ivaimana ena vodu aivala sisina ena lovia imia'auna akanai e'itabua asi, inoku vabuto'o aivala sisina ena lovia vanuana itoina e'alavua, inoku kau deanana vaika 'ounai malata dealata,  
\v 11 mai eta anana mai duata daitai Dilava vutuvutuai emimia Dilavana desivadaia, beia eta vavai si'asi'a ai belalo'udai 'eva sia deula.   
\p
\v 12 Anelu ivakalakoina ena vodu Eupalate nutuna namana akanai e'itabua asi, inoku nutu veina 'eva elada mai melala daena duasi lovia 'olata be'asi eta dala eva'olua.  
\v 13 Inoku ka'uba si'avata vaika koi aikata ikata itani 'alabeto boita, ia 'eva dragon nutunai, mai aivala sisina nutunai mai enolea kauna dedena nutunai dela'asi.  
\v 14 Ia 'eva diabolo ka'ubata si'avata vaika koa mai vatabulovo vinaulata devavai, mai dela'asi deda'a kanobata itoina ena lovia 'olata kevata, bevalalota Siavu Boutai Dilavana ena melala namanai bekuali.   
\p
\v 15 “Inoku lele ka aika ediaka, kaiamui ovaala, lau 'eva vinao kauna boina bavavasi. Kau ka makana de'ata emimia mai ena tubu'a evadodoa kauna 'eva enama'ina, ia sia mai'okona beda'a keinikeini inoku mato vailatai bemalalai.”   
\p
\v 16 Inoku ka'uba si'avata vaika koina lovia 'olata devalalota deda'a 'abu ka 'Ebelu malatai vana de'aea Alamakedono ai.   
\p
\v 17 Anelu ivakalakoi kana ena vodu lavivi laloanai e'itabua asi, inoku Dilava ena luma kabukabuna laloanai lovia imia'auna akanai lele ka easi eluva 'unu'unu ediaka, “'Ani eole.”  
\v 18 Inoku vutuvutu e'amalea, aika eaku e'uluia, 'ulu namata devua, mai kanokau si'avana vaika eko'isi, kanobatai kau epulu laloanai kanokau kanaua boina sia ka eko'isi, kanokau kanania 'eva si'avana vaika vaika.  
\v 19 Inoku Babulonia vanuana namana 'eva e'alama aveke koi, mai kanobata boutai vanuata namata 'eva de'alama demukamuka. Dilava 'eva Babulonia vanua namana ena si'avana elalovai 'ini inoku ena badu si'avana vaika mulamulana pasisina 'ouna vonuna Babulonia evenia einuia.  
\v 20 Inoku motumotu boutai detaule, mai lolo 'eva sia idavalita.  
\v 21 Lamu vutuvutuai e'ovu itani bika'a namata boita, eta mekau 'eva kiloglam imanavui boita de'ekoasi kau akatai, inoku lamu bika'a boina kanaua dainai kau Dilava vana desivadala, 'olana anaana kanania 'eva esi'avana vaika.   
\c 17  
\s1 Mo'a Ateatena Namana  //  Mai Aivala Sisina.  
\p
\v 1 Anelu kalakoi ka kataua vodu kalakoi ka deabita aneluta ka easi inoku e'ou'u ediaka, “Mai, mo'ai ekula'ila vaika ateatena namana ena anaana bavaikamu, ia 'eva vei doutamo akatai emimia.  
\v 2 Ia 'eva kanobata lovia 'olata kauta ita dekulakula mai kanobata kauta vaka itana dekulakula itani mulamula pasisinai deinuba.”   
\p
\v 3 Inoku anelu kanaua Idume Kabukabunai evua'u eda'a kano'akunai, ua'i ateate ka aikaia aivala sisina ka 'aolana 'olana kalakoi ka bobolona 'ouka kauaninai 'eva Dilava ivasi'avanana vata ileleta kanaua akanai emia'au.  
\v 4 Ateate kanaua 'eva tubu'a pepolona mai 'aolana maikolota de'amale'amale evadodota, mai bika'a koevata vaika mai kutukutu 'amale'amaletai evanama, imanai 'eva kolo 'ouna ka eabia, laloanai 'eva ena vinaula si'avata vaika evavai mai ena kulakula koakoata 'obuta evonu.  
\v 5 Ia ba'una akanai 'eva va vunina ka ilelena,  
\q1 ‘BABULONIA NAMANA,  
\q1 KANOBATAI MO'A 'A'ATETA BOUTAI  
\q1 MAI DAVA SI'AVATA VAIKA SINATA.’   
\m
\v 6 Inoku ateate kanaua aikaia 'eva Dilava ena kabukabu kauta mai Iesu valina dekava kauta kataua deaku bata lalatai einu ba. Aikaia koanai atabulovo si'asi'a.   
\p
\v 7 Inoku anelu kanaua e'ou'u ediaka, “Dava 'ounai otabulovo? Lau ateate kanana mai aivala sisina 'olana kalakoi ka bobolona 'ouka akanai emia'au kanaua luvata vuniata ba'oumu.  
\v 8 Inoku aivala sisina, oikaia kanaua 'eva 'ana'inai emia, ia vali'u sia emimia, ia 'eva 'uli 'oulana to'ona asi'i kanaua'i bele'au be'asi, inoku beda'a beole vaika. Dilava kanobata evavaia koanai kanobata kauta vata mauli pukana laloanai sia ileleta kauta, aivala sisina kanaua beikala 'eva betabulovo, 'olana ia 'eva 'ana'inai emia, vali'u sia emimia, maivaka beasi 'udai.   
\p
\v 9 “Kanania 'eva kau maiaonekana kauna 'eva anina 'ani beikabasia, aivala sisina 'olana kalakoi ka 'eva lolo kalakoi ka kataua akatai ateate emia'au.  
\v 10 Kataua vaka 'eva lovia 'olata kalakoi ka, ima 'eva 'ani de'ekoasi, ka 'eva vali'u emimia, ka 'eva asido'o easi; beia ia be'asi koanai 'ani bemimia kava'inamo.  
\v 11 Aivala sisina kanaua 'ana'inai emia, beia vali'u 'eva sia emimia, ia 'eva lovia 'olana ivakalavanina, ia 'eva lovia 'olata kalakoi ka banota ka beia ia vaka bevaolea.   
\p
\v 12 “Bobolo 'ouka oikata kataua 'eva lovia 'olata 'ouka asido'o ka ena lovia vanuana ka eabia, beia ia aivala sisina ita siavu beabia belovia melala koana ka'onamo laloanai.  
\v 13 Ia boutai eta lalovai 'eva ka'onamo, inoku eta kula'ila mai eta siavu 'eva aivala sisina bevenia.  
\v 14 Inoku ia 'eva Mamoe nakuna bekuali venia, beia Mamoe nakuna betata'u beakuta 'olana ia 'eva lovia namata boutai eta Lovia namana mai lovia 'olata boutai eta Lovia 'olana, e'aeta, mai edilata mai deabi venia mulinai dedada'a kauta 'eva ia ita.”   
\p
\v 15 Inoku anelu e'ou'u ediaka, “Vei kataua oikata akatai mo'a ateatena emia'au 'eva, kau edeata edeata, pulu edeata edeata, kanobata edeata edeata, mai mala edeata edeata kauta.  
\v 16 Aivala sisina mai bobolo 'ouka oikata kataua 'eva mo'a ateatena kanaua ulana sia be'ula, ena dava boutai beabiovo inoku mai'okona bevikania, vidiona beania inoku 'alova ai betoua.  
\v 17 Dilava ena ula bevaolea lalovaina 'eva ia nuatai ene'eiadivo inoku nuata bevaka'onamoa eta siavu 'eva aivala sisina bevenia belovia vaia, beda'amo Dilava ena luva bemomo'ai.  
\v 18 Ateate kanaua oikaia 'eva vanua namana inoku kanobatai lovia 'olata boutai e'ola vaita.”   
\c 18  
\s1 Babulonia Vanua Namana  //  Ani E'ekoasi.  
\p
\v 1 Katania mulitai anelu edeana ka vutuvutuai e'ovu easi aikaia. Ia ena siavu 'eva nama vaikana mai ena nuaviai kanobata itoina eva'ailalala.  
\v 2 Lelena evakula'ilala evaoi 'unu'unu ediaka,  
\q1 “'Ani e'ekoasi! Babulonia  
\q1 vanuana namana 'ani e'ekoasi!  
\q1 Ia 'eva diabolo mai ka'uba si'avata  
\q1 boutai eta mia 'abunai e'ao,  
\q1 manumanu si'avata mai  
\q1 ulata sia de'ula davata  
\q1 eta mia 'abunai e'ao.   
\q1
\v 3 'Olana kanobata kauta boutai  
\q1 ita kulakula koakoata si'avata  
\q1 vaika devavai  
\q1 itani ena mulamula pasisinai  
\q1 deinu ba boina.  
\q1 Kanobatai lovia 'olata kauta vaka  
\q1 ia ita deno ka'ona,  
\q1 mai kanobatai tavatava kauta  
\q1 'eva ena dava mediata tavata  
\q1 namatai delovia.”   
\m
\v 4 Inoku lele edeana ka vutuvutuai aika ediaka,  
\q1 “E'u kau e, vanua kanana  
\q1 laloanai ola'asi omai.  
\q1 Inoku ia ita si'avana  
\q1 sia oi bovavai ka'ona.  
\q1 Mai ena anaana si'avata vaika  
\q1 sia ka oi boabia.   
\q1
\v 5 'Olana ena si'avana 'eva  
\q1 'ani edouia eda'amo vutuvutuai,  
\q1 mai Dilava 'eva ia ena vavai  
\q1 si'asi'a boutai elalovai 'ini.   
\q1
\v 6 Ena veniveni vitaitanaimo  
\q1 oi bovenia 'udai.  
\q1 Evavaia davana 'eva  
\q1 melala lua tavana oi boveveni.  
\q1 Mulamula pasisina evenimui  
\q1 davana 'eva melala lua  
\q1 ena 'ouai oi bolaiauda  
\q1 bekula'ila inoku beinua.   
\q1
\v 7 Anaana namavaikana mai  
\q1 vilalo namavaikana oi bovenia  
\q1 itani nuavi mai dava tavata  
\q1 namata sibona evenia boina.  
\q1 Sibona nuanai eapa ediaka,  
\q1 ‘Lau 'eva lovia 'olana ateate'u  
\q1 amimia, lau 'eva sia obu,  
\q1 mai lau 'eva sia bakani kovo.’   
\q1
\v 8 Kanaua 'ounai melala ka'onamo  
\q1 laloanai ia bana davata boutai  
\q1 bedavalita,  
\q1 ba, kani mai doe.  
\q1 Ia 'eva 'alova laloanai beani palu.  
\q1 'Olana Lovia namana Dilava  
\q1 ia ilavuaina Dilavana 'eva  
\q1 ekula'ila vaika.   
\p
\v 9 “Kanobatai lovia 'olata ia ita deno ka'ona mai ena lavo delalonama vaia ka'ona kauta 'eva 'alova kanaua vaitabuna beikala koanai belaloa mai bekanidiala.  
\v 10 Ena anaana bevamakauta, inoku ia 'eva dau'ai vaika belalava bekakani beluluva,  
\q1 ‘Esi'avana vaika!  
\q1 Kula'ila vanuana namana e,  
\q1 esi'avana vaika!  
\q1 Babulonia e,  
\q1 siavu vanuana namana!  
\q1 Melala koana ka'onamo laloanai  
\q1 Dilava evaanaanamu vaika.’   
\p
\v 11 “Kanobatai tavatava kauta vaka belaloa mai bekanidiala 'olana eta tavatava davata 'eva sia kau ka 'ani betava 'udai.  
\v 12 Tavatava davata kataua 'eva kolo mai siliva, bika'a koevata mai kutukutu 'amale'amaleta, tubu'a koevata vaika, tubu'a pepolota, tubu'a kevekeveta nama'ita, tubu'a a'olata, au bonata nama'itai devavai davata edeata edeata, sisi vana elepant kusivanai devavai davata boutai, au tavata namata auta, kopa, 'auli mai bika'a pasisina medianai devavaita davata,  
\v 13 iani bonata ivanama'inata mulamulata vata sinemoni mai spaisi, mulamula bonata nama'ita vata inisenese mai mila, mai mulamula kula'ilana kauani beuku mulamulana, mulamula pasisina mai olive deolona, palaoa nama'ita, witi, bolomakau mai mamoe, osi, mai kaliota, da'alabi kauta, mai kau eta mauli.  
\v 14 Dava detavatava vai kauta be'oua bediaka,  
\q1 ‘Babulonia e,  
\q1 dava nama'ita oula venita davata  
\q1 mai emu lovia davata mai emu  
\q1 nuavi davata boutai 'eva  
\q1 'ani detaule,  
\q1 inoku sia 'ani bodavalita 'udai.’   
\p
\v 15 “Tavatava kauta dava ia kevanai detavatava vaita inoku monitai delovia kauta 'eva dau'ai vaika belalava, 'olana ena anaana bevamakauta. Belaloa mai bekanidiala  
\v 16 Bekakani bediaka,  
\q1 ‘Esi'avana vaika!  
\q1 Esi'avana vaika, Vanua namana e'  
\q1 Tubu'a koevana vaika vana linen,  
\q1 pepolona, mai 'aolana ovadodota,  
\q1 kolo 'amale'amaletai,  
\q1 bika'a koevata vaika mai  
\q1 kutukutu nama'itai ovanama.   
\q1
\v 17 Melala koana ka'onamo  
\q1 laloanai emu lovia davata  
\q1 katania boutai 'eva 'ani deole.’  
\p “Aunakoi kapena kauta boutai, mai dele'au dekalima kauta boutai, aunakoiai devinaula kauta boutai, mai 'atuai deda'a to'ato'a eta dava detavatava vai kauta boutai dau'ai belalava.  
\v 18 Ia be'ani vaitabuna bele'au beikala koanai, bevaoi bediaka,  
\q1 ‘Vanua davana 'eva vanua namana kanania boina?’   
\m
\v 19 Apulolo 'olata akatai bene'e'au mai belaloa mai bekakani 'unu'unu bediaka,  
\q1 ‘Esi'avana vaika!  
\q1 Esi'avana vaika, Vanua namana e,  
\q1 maieta aunakoi 'atuai deveau  
\q1 kauta boutai ena lovia davatai  
\q1 lavo kautai de'ao,  
\q1 melala koana ka'onamo laloanai  
\q1 ia 'eva 'ani eole.   
\q1
\v 20 Vutuvutu e. Lalonama!  
\q1 Olalonama,  
\q1 Dilava ena kabukabu kaumui,  
\q1 mai veauneke kaumui,  
\q1 mai enolea kaumui!  
\q1 Evavaimui si'asi'a 'ounai  
\q1 Dilava ia mekau evakoala.’”   
\p
\v 21 Inoku anelu kula'ilana ka eta'u bika'a 'otoina nama vaikana ka eabia isi 'atu laloanai ekapoa uku inoku ediaka,  
\q1 “Kanania boina vitaitanai  
\q1 Babulonia vanua namana  
\q1 'atu laloanai bekapoa uku,  
\q1 inoku sia bedavalia 'udai.   
\q1
\v 22 Oni emuai 'eva,  
\q1 Kita vana 'apa demonevai kauta  
\q1 mai masi kauta, siau  
\q1 mai bisi uvani kauta 'uluta  
\q1 sia 'ani ika 'udai beao.  
\q1 Vinaula edeata edeata kauta  
\q1 sia ka 'ani idavali 'udai beao.  
\q1 Iani ivakali mukamukata  
\q1 'uluta sia ka vaka  
\q1 'ani ika 'udai beao.   
\q1
\v 23 Lamepa 'ailalana sia ka emuai  
\q1 'ani beani 'udai.  
\q1 Kamoane makamaka kauna  
\q1 mai ateatena leleta  
\q1 emuai sia 'ani beika 'udai.  
\q1 Dava katania bepupulu  
\q1 'olana emu tavatava kauta 'eva  
\q1 kanobatai kau namata deao,  
\q1 mai emu menai 'eva  
\q1 kanobata boutai olebata.   
\q1
\v 24 Babulonia vanua namana  
\q1 anaana eabia 'olana 'eva  
\q1 ia laloanai 'eva enolea kauta  
\q1 mai Dilava ena kabukabu kauta  
\q1 lalata dedavalita,  
\q1 mai kanobatai deaku bata kauta  
\q1 boutai lalata vaka.”   
\c 19  
\s1 Vutuvutuai Devaoi Dediaka,  //  'Aleluia!  
\p
\v 1 Kanania mulinai, 'ulu ka aika itani kau do'utamo vaika vutuvutuai devaoi dediaka,  
\q1 “'Aleluia! Kavanama'inala.  
\q1 Vamauli mai nuavi mai siavu  
\q1 'eva eta Dilava ena.   
\q1
\v 2 Dilava ena valuva 'eva  
\q1 umauta mai dekomolo.  
\q1 Ia eta'u mo'a ateatena namana mekau evakoala,  
\q1 'olana ena mo'a koakoatai  
\q1 kanobata evavaia si'asi'a 'ounai.  
\q1 Dilava ena da'alabi kauta deaku  
\q1 bata lalata tavata 'ani evamuea.”   
\p
\v 3 Inoku devaoi 'udai dediaka,  
\q1 “'Aleluia! Kavanama'inala.  
\q1 Vanua namana e'ani vaitabuna  
\q1 ele'au sia bepupua beda'amo  
\q1 to'ona asi'i.”   
\p
\v 4 Inoku 'aida'aidata kauta luanavui vani mai mauli davata vani dekuidula lovia imia'auna akanai emia'au Dilavana dekukudivo venia. Inoku devaoi dediaka,  
\q1 “Amen, 'Aleluia!”   
\s1 Mamoe Nakuna Ena  //  Kamoane Naduna.  
\p
\v 5 Inoku ua'i lovia imia'aunai lele ka easi ediaka,  
\q1 “Dilava ena da'alaabi kaumui  
\q1 boumuiai mai makauna oi omakau  
\q1 kaumui kikinai eda'amo namana  
\q1 boumuiai e,  
\q1 eta Dilava kavanama'inala.”   
\p
\v 6 Inoku 'ulu ka aika, 'uluna 'eva itani kau doutamo vaika 'o ka'uda namata deaku 'au 'o vutuvutu e'uluia 'uluna namana boina devaoi dediaka,  
\q1 “'Aleluia!  
\q1 'Olana eta Lovia namana  
\q1 siavu boutai Dilavana 'eva  
\q1 ita e'ola vaita.   
\q1
\v 7 Ekalalonama mai Lalota  
\q1 benanama, nuavi ekavenia!  
\q1 'Olana Mamoe nakuna ena  
\q1 kamoane melalana 'ani ele'au,  
\q1 mai beadavala ateatena vaka  
\q1 'ani sibona eva'olua.   
\q1
\v 8 Tubu'a nama'ina vana linen,  
\q1 deva'ina mai e'amale'amale  
\q1 mai sia mai'obuna,  
\q1 devenia bevadodoa.”  
\m (Tubu'a nama'ina kanaua anina 'eva Dilava ena kabukabu kauta vinaula komolota devavai kauta.)   
\p
\v 9 Inoku anelu e'ou'u ediaka, “Luva kanania lelea. Deveauveau venita Mamoe nakuna ena kamoane naduna laloanai deasi kauta kataua 'eva denama'ina.” Maivaka ediaka, “Katania 'eva Dilava nutuna luvata umauta.”  
\v 10 Inoku anelu kanaua aena 'olanai akuidula bakukudivo venia ako. Beia ia lau e'ou'u ediaka, “Kanana sia bovavaia! Lau 'eva da'alabi kau'u 'avaea'u oni ita mai bo'akalamu Iesu valina dekakava kauta ita. Dilava sibonamo ekakukudivo venia! 'Olana Iesu i'ou daena 'eva enolea siavunai.”   
\s1 Osi Deva'ina Akanai  //  Emia'au Kauna.  
\p
\v 11 Inoku akailao vutuvutu eluvu aikaia 'eva osi deva'ina ka ua'i elava, akanai emia'au kauna vana 'eva ‘ABIVENI’ mai ‘MOMO'AI’. Ia 'eva komoloai evaluva mai ekuali.  
\v 12 Makana ikata 'eva itani 'alova evuvule boina, 'olanai 'eva lovia 'olata davata doutamo, ia kaunai 'eva va ka ilelena beia sia kau ka va kanaua eikabasia, ia sibonamo eikabasia.  
\v 13 Ena tubu'a laka'ina evadodoa 'eva lalai iudaukuna, inoku ia vana 'eva ‘DILAVA ENA LUVA’.  
\v 14 Vutuvutu ena kuali kauta ia mulinai deda'a, osi deva'itai demia'au, tubu'a nama'ita vata linen devadodota, deva'ita mai siade'obu.  
\v 15 Nutunai 'eva kuali lepona 'anona ela'asi, ena vinaula 'eva kanobata edeata edeata boutai beakuta mukamuka, inoku ia 'eva 'auli ikoko'anai be'ola vaita. Siavu boutai Dilavana ena badu si'avana vaika bevamomo'aia 'abuna vine vuavuana ivakali mukamukana 'abunai bevakalita mukamuka.  
\v 16 Vabatanai ena tubu'a laka'ina akanai 'eva va kanania eleleia, ‘Lovia 'olata boutai eta Lovia 'olana mai Lovia namata boutai eta Lovia namana.’   
\p
\v 17 Inoku anelu ka melala laloanai elava aikaia, kanobata mai vutuvutu viloatai delovo manumanuta boutai e'aeta 'unu'unu ediaka, “Omai, Dilava ena nadu namanai ovaka'onamo.  
\v 18 Inoku oi 'eva lovia 'olata kauta, kuali 'olata kauta, mai kula'ila kauta vidiota oi bo'ani, osi mai osiai demia'au kauta vidiota oi bo'ani, mai kau boutai, da'alaabi kauta mai sia da'ala de'abi kauta, kikita mai namata boutai vidiota oi bo'ani.”   
\p
\v 19 Inoku aivala sisina kanaua mai kanobata ena lovia 'olata kauta mai eta kuali kauta ita deakubou osi deva'inai emia'au kauna mai ena kuali kauta ita bekuali deko aikata.  
\v 20 Beia aivala sisina deakuia de'abia mauli, ena enolea kauna dedena ia vanai vatabulovo koakoata evavai kauna ita. Koakoa kataua'i aivala sisina vana numelana deabia mai koakoana va'ava'ana dekukudivo venia kauta elebata. Ia laluana 'eva maulitai bika'a mai'alovana vana salpa eani keinikeini 'ovu'ovunai deitota dodo.  
\v 21 Inoku ia eta kau kalina osi deva'ina akanai emia'au kauna nutunai kuali lepona ela'asi kanaua'i eakubata, inoku manumanu boutai vidiotai deani vunu.   
\c 20  
\s1 Keliso Itana Belovia Vikau  //  Da Ka (1,000).  
\p
\v 1 Inoku vaka anelu ka vutuvutuai e'ovu easi aikaia, imanai 'eva 'uli to'ona asi'i kina mai seini namana ka eabita.  
\v 2 Sisi vana dragon, kau'asi 'ana'ina, ia 'eva Diabolo, 'o Satani, eabi 'inia inoku seiniai edo'o 'inia vikau boutai da ka (1,000) bemia vaia.  
\v 3 Anelu sisi kanaua 'uli to'ona asi'i laloanai eitoia uda, inoku e'alavu 'inia mai akanai talavatu koana ene'eia divo, kanobata kauta asi'i emalebata 'ounai ua'i bemimia beda'amo vikau boutai da ka (1,000) be'ole. Kanaua mulinai 'eva beluvua inoku bela'asi bemimia melala kava'inamo.   
\p
\v 4 Inoku akailao 'eva lovia imia'auta akatai demia'au kauta aikata 'eva siavu deabi bevaluva mai Iesu valina dekava mai Dilava ena luva deluva vai daitai 'atota detauuku kauta idumeta aikata. Ia 'eva aivala sisina kanaua 'o koakoana va'ava'ana sia dekukudivo venia mai vana numelana ba'utai 'o imatai sia deabi kauta. Ia 'eva demauli 'udai inoku Keliso ita delovia vikau boutai da ka (1,000).  
\v 5 (Ba kauta kalina boutai 'eva sia demauli 'udai eda'amo vikau boutai da ka (1,000) deole.) Kanania 'eva ba ai ko'isi 'udai lava'ana'ina.  
\v 6 Kau kataua ko'isi 'udai lava'ana'ina laloanai demimia kauta 'eva denama'ina mai dekabukabu. Ba ivaluana 'eva sia maiena siavu kevatai, beia ia 'eva Dilava mai Keliso eta kabukabu vinaulata ivavaita kautai be'ao mai ia ita belovia ka'ona beda'amo vikau boutai da ka (1,000).   
\s1 Satani 'Alova 'Ovu'ovunai  //  Deitoia Uda.  
\p
\v 7 Inoku vikau boutai da ka be'ole mulinai Satani 'eva ena vabuto'o 'abunai beluvua.  
\v 8 Satani bela'asi beda'a kanobata itoinai kanobata kauta belebata, ua 'eva Gog mai Magog bevado'uta kuali bedada'a. Eta mato 'eva itani 'atu nabuana boina.  
\v 9 Kanobata itoinai dekeini deda'a Dilava ena kau demimia 'abuna mai ena lalo'au vanuana delavaia kaiukaiu. Beia 'alova vutuvutuai e'ovu easi kuali kauta kataua boutai e'abu paluta.  
\v 10 Inoku diabolo kanaua ia eleba si'ata diabolona 'eva ua'i bika'a mai'alovana vana salpa e'ani 'ovu'ovuna laloanai dekapoia dodo, aivala sisina mai enolea kauna dedena dekapota dodo 'abunai. Ua'i kakoina laniai mai boniai beanana beda'amo to'ona asi'i.   
\s1 Lovia Imia'auna Namana Deva'inai  //  Emia'au Kauna Ena Valuva.  
\p
\v 11 Inoku lovia imia'auna namana deva'ina ka mai akanai emia'au kauna aikaia. Kanobata mai vutuvutu 'eva vailanai deveau ovo inoku sia 'abu ka dedavalia 'udai.  
\v 12 Inoku ba kauta namata mai kikita Dilava ena lovia imia'auna vailanai delava aikata, inoku anelu puka deluvuta, viloatai puka edeana ka deluvuia kanaua 'eva mauli pukana. Ba kauta eta koakoa puka laloatai ileleta vitaitatai evaluvata.  
\v 13 'Atu laloanai deba kauta 'atu eta'u evaeleta 'au, mai ba mai mitava deta'u eta ba kauta devaeleta 'au. Inoku kau boutai 'eva ka ka eta koakoa vitaitataimo evaluvata.  
\v 14 Mulinai ba mai mitava vaka 'alova 'ovu'ovuna laloanai deitota dodo. 'Alova 'ovu'ovuna kanaua 'eva ba ivaluana.  
\v 15 Kau kataua vata ua'i mauli pukana laloanai sia ileleta kauta boutai 'eva 'alova 'ovu'ovuna laloanai deitota dodo.   
\c 21  
\s1 Vutuvutu Makamakana Mai  //  Kanobata Makamakana.  
\p
\v 1 Inoku akailao vutuvutu makamakana mai kanobata makamakana aikata, 'olana vutuvutu makavana mai kanobata makavana 'eva 'ani detaule, 'atubata vaka ioina asi'i.  
\v 2 Inoku vanua kabukabuna aikaia, Ielusalema makamakana, Dilava kevanai vutuvutuai ela'asi e'ovu easi. Aikaia ikana 'eva itani kamoane makamaka ateatena evanama kave'i kave'i mai eva'olu adana ita bevidavali boina.  
\v 3 Inoku lele ka lovia imia'aunai easi aika eluva unu'unu ediaka, “Vali'u Dilava ena mia 'abuna 'eva kau kevatai, Dilava 'eva ia ita bemimia, mai ia 'eva Dilava ena kauai be'ao, Dilava sibona 'eva ia kevatai bemimia mai eta Dilava ai be'ao.  
\v 4 Ia betata'u makata veita boutai beuku ovo, inoku kau sia beba 'udai, sia bevilalo 'udai, sia bekani 'udai, mai sia beanana 'udai, 'olana dava 'ana'ita kataua 'eva 'ani detaule vaika.”   
\p
\v 5 Inoku lovia imia'auna akanai emia'au Dilavana ediaka, “Kaiamui ovala, Lau dava boutai 'ani avamakamakata!” Mai e'ou'u ediaka, “Luva kanania 'eva lelea 'olana luva katania 'eva umauta mai ivamomo'aita.”  
\v 6 Inoku mune'e e'ou'u ediaka, “Dava boutai 'ani avavai palu. Lau 'eva Alepa mai Omega, Lava'ana'ina mai Mulikaina. Kau ka 'atona elada kauna lau batata'u mauli veina ebubudi tavana asi'i davana bavenia beinua.  
\v 7 Ena abiveniai si'avana laloatai ekula'ila ekeini kauna 'eva avuna katania boutai be'abi, inoku lau 'eva ia ena Dilava ba'ao, ia 'eva lau naku'uai beao.   
\p
\v 8 Beia makau kauta, sia deabiveni kauta, desi'avana vaika kauta, akuaku kauta, kulakula kauta, oada kauta, dilava dedeta dekukudivo venita kauta, mai dede kauta boutai 'abuta 'eva bika'a mai'alovana vana salpa eani keinikeini 'ovu'ovuna laloana. Kanania 'eva ba ivaluana.”   
\s1 Ielusalema Makamakana.  
\p
\v 9 Anelu kalakoi ka kataua banota ka easi keva'u, ia 'eva anaana si'avata vaika kalakoi ka oleta vodu kalakoi ka devonu eabita, inoku e'ou'u ediaka, “Mai! Lau kamoane makamaka ateatena bavaikamu, ia 'eva Mamoe nakuna adana.”  
\v 10 Inoku Idume Kabukabuna nua'u evavonua inoku anelu evua'u eda'a lolo ka laka'ina vaika akanai, inoku vanua namana kabukabuna, Ielusalema, vutuvutuai Dilava kevanai e'ovu easi kanaua evaika'u.  
\v 11 Dilava ena nuavi 'eva vanua kanania eva'ailalala ovo, e'amale 'amale itani bika'a koevana vaika vana daiamoni boina, e'ailala si'asi'a itani kalasi boina.  
\v 12 Vanua kanania makuna 'eva nama vaikana mai eakai vaika, nutualana 'eva 'ouka lua, anelu boutai 'ouka lua 'eva nutuala ka ka ai delalava. Nutuala ka ka ai 'eva Isalaela iduvuna 'ouka lua vata ileleta.  
\v 13 Nutuala koi 'eva dae duasi, koi 'eva dodo duasi, koi 'eva 'atu duasi, koi 'eva divo duasi.  
\v 14 Vanua namana makuna ena lava'au bika'ata 'eva 'ouka lua, akatai 'eva Mamoe nakuna ena veauneke kauta 'ouka lua vata ileleta.   
\p
\v 15 Anelu e'ou'u aneluna imanai 'eva ikoko'a ka koloai devavaia ikoko'ana eabia, inoku vanua namana, mai nutualana, mai makuna bevakovota.  
\v 16 Vanua evalavala 'uni'unina vani viloata 'eva devitaita, ena laka'ina mai ena palapala vaka vitaita, ikoko'ai vanua ekovoia inoku ena laka'ina edavalia 'eva kilomita da lua sinavu lua (2,200), ena aka mai palapala vaka vitaitamo.  
\v 17 Anelu eta'u maku ena imusi evakovoa 'eva mita kalakoinavui kalakoi (66), anelu 'eva kau eta vakovo vitaitanai kanaua evakovota koma.   
\p
\v 18 Maku 'eva bika'a nama'ina vaika vana daiamoni ai devavaia, mai vanua namana 'eva kolo umaunai devavaia inoku e'ailala vaika itani kalasi boina.  
\v 19 Vanua evalavala makuna ena lava'au bika'ata 'eva bika'a nama'ita vaika edeata edeata boutai 'ouka lua, bika'a nama'ita vaika vata 'eva katania, lava'ana'ina 'eva daiamoni, e'ailala, ivaluana 'eva sapaia, e'uma'uma, ivakoina 'eva kalakedo, ava 'ibuna boina, ivavanina 'eva emelalde, e'uma'uma,  
\v 20 ivaimana 'eva sadonu, e'aola'aola, ivakalakoina 'eva lubi, e'aola, ivakalakoi kana 'eva kulusolito, laolina, ivakalavanina 'eva belulio, e'uma'uma, ivakalavani kana 'eva topasio, e'ailala, iva'oukana 'eva kulusopalaso, kauna e'uma'uma, iva'ouka kana 'eva iakinto, e'uma'uma, mai iva'ouka luana 'eva ametuso, pepolona.  
\v 21 Maku nutualana 'ouka luana 'eva kutukutu deva'ita namata 'amale 'amaleta ouka lua, ka ka 'eva kutukutu ka ka ai devavaita. Vanua laloana dalata boutai 'eva kolo umauna, de'ailala vaika itani kalasi boita.   
\p
\v 22 Lau vanua kanaua laloanai sia Luma Kabukabuna ka aikaia, 'olana Lovia namana siavu boutai Dilavana mai Mamoe nakuna 'eva vanua ena Luma Kabukabuna.  
\v 23 Vanua namana kanaua 'eva melala 'o vuia 'ailalata sia eula venita, ia beva'ailalala, 'olana Dilava ena nuavi 'eva vanua eva'ailalala mai Mamoe nakuna 'eva vanua ena lamepa.  
\v 24 Kanobata kauta vanua 'ailalanai bedada'a, mai kanobatai lovia 'olana kauta 'eva eta nuavi davata edeata edeata be'abi beda'a ua'i.  
\v 25 Melala boutai laloatai nutualana 'eva sia be'alavuta kovo, 'olana ua'i 'eva boni asi'i.  
\v 26 Kanobata kauta boutai eta nuavi davata mai eta lovia davata 'eva be'abi vanua namana kanaua laloanai bedododo.  
\v 27 Beia 'obu davana sia ka ua'i bedododo mai koakoa si'avata vaika devavai kauta 'o dede kauta sia ka vaka ua'i bedododo, mamoe nakuna ena mauli pukana laloanai vata ileleta kautamo ua'i vanua kanaua'i beda'adodo.   
\c 22  
\s1 Mauli Veina Nutuna.  
\p
\v 1 Inoku anelu kanaua eta'u mauli veina nutuna evaika'u, eaneva vaika itani kalasi boina. Nutu kanaua 'eva Dilava mai Mamoe nakuna eta lovia imia'autai ealu e'ovu easi,  
\v 2 mai ealu e'ovu eda'a vanua namana dalana namana bo'adanai. Nutu avekena avekenai 'eva mauli deveveni auta delava, vikau ka'onamo 'eva vuata edeata edeata vuia ka ka laloatai devuvua. Ia uauata 'eva kanobata kauta boutai eta 'olele ivanama'inata davata.  
\v 3 Vanua kanaua laloanai 'eva Dilava sia kau ka beva sivadaia. 'Olana Dilava mai Mamoe nakuna eta lovia imia'auta 'eva vanua kanaua laloanai bemimia, inoku ena da'alabi kauta 'eva ia bekukudivo venia,  
\v 4 inoku ia vailana beikala, mai Dilava vana 'eva ia ba'utai belelea 'au.  
\v 5 Ua'i 'eva boni asi'i, kau 'eva lamepa 'o melala 'ailalata sia beula venita, 'olana Lovia namana Dilava betata'u 'ailala bevenita. Mai ia 'eva lovia 'olatai be'ao belovia keini keini beda'amo to'ona asi'i.   
\s1 Iesu 'Ani Be'asi.  
\p
\v 6 Inoku anelu kanaua e'ou'u ediaka, “Luva katania 'eva umauta mai ivamomo'aita. Lovia namana Dilava, enolea kauta idumeta evakula'ilata ia valina dekava Dilavana ena anelu esinia dava 'ani bepupulu davata ena da'alabi kauta bevaikata.”   
\p
\v 7 Iesu ediaka, “Kaiamui ovala, Lau 'eva 'ani kevaimo bavavasi, enolea luvata puka kanania laloanai 'olata delalovai 'ini kauta 'eva denama'ina.”   
\p
\v 8 Lau Ioane, dava katania aikata mai 'uluta aika kau'u. Inoku 'uluta aika mai aikata mulinai, evaika'u aneluna aena 'olanai akuidula bakukudivo venia akoma.  
\v 9 Beia ia eta'u lau e'ou'u ediaka, “Sia bokukudivo veni'u. Lau 'eva da'alabi kau'u oni boimu mai bo'akalamu enolea kauta boita mai puka kanania luvana 'olana de'aku mai deabi 'ini kauta boutai boita. Oni 'eva Dilava sibona mo bokukudivo venia.”  
\v 10 Mai vaka e'ou'u ediaka, “Puka kanania'i enolea luvata sia bo'alavuta, 'olana katania boutai bepupulu melalana 'eva 'ani ekevai.  
\v 11 Kau si'avana vinaulata devavai kauta 'eva si'avana vinaulata bevavai, koakoa 'obuta devavai kauta 'eva koakoa 'obuta bevavai, komolo vinaulata devavai kauta kataua 'eva komolo vinaulata bevavai, dekabukabu kauta 'eva bekabukabumo.”   
\p
\v 12 Iesu ediaka, “Kaiamui ovala. Lau 'eva 'ani kevaimo bavavasi. Lau bavavasi koanai tavamui ba'abi bavavasi inoku boumuiai dava oi vavai vitaitataimo tavamui bavenimui.  
\v 13 Lau 'eva Alepa mai Omega, Lava'ana'ina mai Mulikaina, dava boutai iabilamata mai ivapuata kau'u.”   
\p
\v 14 Eta tubu'a dedeinita kauta 'eva denama'ina, inoku ia 'eva maieta komolo mauli eveveni auna vuavuana beania, mai vanua namana Ielusalema makamakana nutualanai beda'adodo.  
\v 15 Beia vanua namana kanaua mulinai kau 'eva 'oveka boita, oada kauta, kulakula koakoata si'avata vaika devavai kauta, akuaku kauta, dilava dedeta dekuku divo venita kauta, mai kau dede ulana deula vaika dedemo luvata deluluva mai vinaulata devavai.  
\v 16 “Lau, Iesu, e'u anelu asinia evasi oi Dilava ena lo'e kaumui emuiai luva umauta katania bevenimui. Lau 'eva Davida lovia 'olana Lamuna mai kekena. Lau 'eva 'avu'avuni visiuna 'ailalana.”   
\p
\v 17 Idume Kabukabuna mai kamoane makamaka ateatena laluana dediaka,  
\q1 “Mai!”  
\m Dai lele kanania e'ika kauna vaka bediaka,  
\q1 “Mai!”  
\m Dai 'atona elada kauna 'eva be'asi. Maivaka davana e'ula kauna 'eva be'asi mauli veina tavana asi'i davana beinua.   
\p
\v 18 Puka kanania'i enolea luvata de'ika kauta boutai a'outa kao. Kau ka luva katania akatai luva edeana ka bene'ea 'au koanai, Dilava betata'u puka kanania laloanai anaana kataua ia enai bene'e'au.  
\v 19 Bema kau ka enolea pukana kanania laloanai luva ka beabia ovo koanai, Dilava betata'u ia avuna mauli eveveni aunai mai vanua kabukabuna laloanai beabia ovo, kanania 'eva enolea pukanai iluvavaina.   
\p
\v 20 Iesu, dava katania luvata e'ou dae kauna ediaka,  
\q1 “Luva umauna,  
\q1 lau 'eva 'ani kevaimo bavasi.”  
\q1 Amen. Lovia namana Iesu e,  
\q1 Mai.   
\p
\v 21 Ameamea, Lovia namana Iesu ena iulaveni 'eva Dilava ena kau boumuiai akamuiai bemimia. Amen.