\id HEB  
\h 'Ebelu 
\toc3 Eb 
\toc2 Eb 
\toc1 'EBELU 
\mt3 Malele  
\mt1 'EBELU  
\mt3 Kauta Kevatai  
\is1 Puka Laloana Ilelena Luvana  
\ip Puka kanania eleleia 'eva abiveni kauta vaida kataua beduluta eta abiveni devikanita 'olana kau vaida ia devabo'ota inoku adedua laloanai demia. Kanaua 'ounai puka kanania eleleia eta abiveni bevakula'ilala. Keliso mo sibona kevanai edaia Dilava ena dala umauta bevaikata.  
\ip Puka kanania dava namata koi lovata eakuta. Lava'ana'ina 'eva Iesu 'eva Dilava nakuna umauna. Iesu kanobatai emia laloanai, ia 'eva mekau doutamo ekoata, mai anaana namavaikata eabita inoku dala kanaua'i Dilava eta'u Iesu 'eva kau boutai iduluta kauna namanai evaoa (2.10). Kanaua 'ounai Iesu 'eva enolea kauta mai anelu mai Mose ekeinita. Ivaluana 'eva Dilava sibona eta'u Iesu eabi isi kabukabu kaunai eao keinikeini. Ia 'eva kabukabu kauna namana vutuvutuai, ia 'eva kevanai edaia kau ia deabivenia dokadoka kauta bevamaulita. Mose ena koakoa mai ena talavatu lovata eaku. Kanaua 'eva Iesu dava evavaita kauna va'ava'ana vitaitana.  
\ip Puka kanania laloanai Isalaela kauta makavata kauta eta abiveni sisibata doutamo demimia (11), inoku kau eta abiveni evakulu'ilata. To'ona 'eva ia evakula'ilata adedua davadava kataua bedavalita, 'a ia 'eva eta abiveniai belava'ini beda'amo ba ai. Ia makata 'eva Iesu kevanai bemimia, ena dalai bedada'a, mekau mai anaana kataua 'eva eta abiveni sia beabia tau (12.1 - 12).  
\is1 Puka Iduvuna Namata  
\io1 a. Lova aku: Keliso 'eva Dilava ivala'asina. (1.1 - 3)  
\io1 b. Keliso 'eva anelu ekeinita. (1.4 — 2.18)  
\io1 c. Keliso 'eva Mose mai Iosua ekeinita. (3.1 — 4.13)  
\io1 d. Keliso ena kabukabu vinaulana ena namana. (4.14 — 7.28)  
\io1 e. Keliso ena luva'ana'i ena namana. (8.1 — 9.28)  
\io1 f. Keliso ena veniveni ena namana. (10.1 - 39)  
\io1 g. Abiveni 'eva dava namana. (11.1 — 12.29)  
\io1 h. Vasiasi luvana mai luva to'ota. (13.1 - 25)  
\c 1  
\s1 Dilava Ena Luva  //  Nakuna E'outa.  
\p
\v 1 Siako vaika koanai Dilava eta'u enolea kauta nututai melala doutamo dala edeata edeatai 'ava'avata e'outa.  
\v 2 Beia vali'u melala katania to'otai 'eva Nakuna nutunai ita e'outa. Dilava eta'u Nakuna dainai vutuvutu mai kanobata evavaita, ia eta'u Nakuna edilaia avuna davata boutai evenia ia ena.  
\v 3 Nakuna kanania Dilava ena nuavi 'amale 'amalena evala'asia, ia 'eva Dilava vitaitana umauna, ia ena luva siavunai dava boutai e'imata. Ia kau eta si'avana edeinita ovo mulinai vutuvutuai siavu boutai Dilavana idibana duasi 'olana iakuna 'abunai emia divo emia.   
\s1 Dilava Nakuna 'Eva  //  Anelu Ekeinita.  
\p
\v 4 Ia 'eva anelu ekeinita 'olana Dilava ia vana evenia vana 'eva anelu vata ekeinita.  
\v 5 Dilava eta'u ia e'ouia ediaka,  
\q1 “Oni 'eva lau Naku'u.  
\q1 Vali'u melala kanania'i Lau oni  
\q1 avapulumu,”  
\qr Sal 2.7  
\m ia anelu sia ka kevanai kanaua eluva koma, mune'e ediaka,  
\q1 “Lau 'eva ia Kamanai ba'ao,  
\q1 ia vaka Lau Naku'u ai be'ao.”   
\qr 2 Sam 7.14  
\m
\v 6 Mai vaka Nakuna batani kauna esinia easi kanobatai koanai eluva ediaka,  
\q1 “Dilava ena anelu boutai  
\q1 'eva ia bekukudivo venia.”   
\qr Deu 32.43  
\m
\v 7 Anelu lovata eaku ediaka,  
\q1 “Dilava ena anelu 'eva  
\q1 lani ai evaota, ena anelu vaida  
\q1 da'alana deabi aneluta 'eva  
\q1 'alova vulenai evaota.”   
\qr Sal 104.4  
\m
\v 8 Ia Nakuna lovana eakuia ediaka,  
\q1 “Oni 'eva Dilava, emu  
\q1 lovia imia'auna bemia keinikeini,  
\q1 oni 'eva komolo ai emu vanua  
\q1 o'ola vaia.   
\q1
\v 9 Vinaula komolo oula venia,  
\q1 si'avana 'eva ovaivivia.  
\q1 Kanaua 'ounai Dilava emu Dilava  
\q1 eta'u lalonama deolonai esisimu  
\q1 emu lovia koana,  
\q1 vamu eabiaisi banomu vailatai.”   
\qr Sal 45.6, 7  
\m
\v 10 Mai mune'e ediaka,  
\q1 “Lovia namana e,  
\q1 makavana umaunai kanobata  
\q1 'eva oni ovavaia, vutuvutu vaka  
\q1 oni imamuai ovavaia.   
\q1
\v 11 Vutuvutu mai kanobata  
\q1 'eva betaule, beia oni 'eva  
\q1 bomia keinikeini,  
\q1 mai dava boutai bevuluvulu  
\q1 tubu'a 'ana'ina boina.  
\v 12 Vutuvutu mai kanobata bolo'uta  
\q1 ikalu boina, ikata bedeana  
\q1 tubu'a 'ana'ina boina.  
\q1 Ia oni 'eva 'abumuai mo,  
\q1 emu mauli vikauta 'eva  
\q1 sia be'ole.”   
\qr Sal 102.25-27  
\m
\v 13 Sia melala ka Dilava anelu ka kanania e'ouia koma ediaka,  
\q1 “Idiba'u duasi miadivo  
\q1 beda'amo oni ivaivivimu kauta  
\q1 aemu palapalana ine'ena 'au  
\q1 davanai bava aota.”   
\qr Sal 110.1  
\p
\v 14 Anelu 'eva dava? Ia boutai 'eva idume, Dilava da'alana deabi kauta, esinita vamauli beabia kauta beduluta.   
\c 2  
\s1 Vamauli 'Eva Dava Namana.  
\p
\v 1 Kanaua 'ounai Nakuna valina luvana umauna 'ani kaika davana eka'imala kave'i, kanaua enai asi'i kama da'atau 'ounai.  
\v 2 Dilava ena anelu nutunai 'ava'avamui e'outa luvata vaka siavu luvatai deao, vinaulata sia devavai 'o sia deabi dae kauta 'eva mekau eva'olua mekauna dekoaia.  
\v 3 Vamauli 'eva dava namana, kanaua ekavasi'avanala koanai mekau be'asi mekauna kevanai ita a ekapode koma?  
\p Vamauli kanania 'eva Lovia namana sibona 'ani e'ouia dae makava, inoku deika kauta deta'u devamomo'aia ita etai.  
\v 4 Dilava sibona vaka koa namata, vatabulovo vinaulata, siavu vinaulata edeata edeata eva la'asita, mai ia ena ula vitaitanai Idume kabukabuna eveni ia sibota devamomo'aita.   
\s1 Iesu Be'ana'ia Vaita  //  Vamauli Laloanai.  
\p
\v 5 Dilava 'eva sia anelu edilata kanobata makamakana e'asi kanobatana kanaua be'ola vaia, kanobatana 'eva vali'u valina akakava kanania.  
\v 6 Puka kabukabuna laloanai 'abu ka kanania eleleia koma ediaka,  
\q1 “Dilava e, kau 'eva dava?  
\q1 Inoku oni ia olalovai 'inia.  
\q1 Kau nakuna 'eva dava?  
\q1 Inoku oni ia o'imala kave'i.   
\q1
\v 7 Oni ota'u melala kava'inamo  
\q1 ia ova'ovua anelu venutai,  
\q1 beia mune'e oni ota'u nuavi  
\q1 mai 'ola aku koana ova'olala.   
\q1
\v 8 Oni ota'u dava boutai  
\q1 ia ena ikakao venunai  
\q1 one'eta divo.”  
\qr Sal 8.4-6  
\m Dilava dava boutai ia ena ikakao venunai ene'etadivo 'eva ia betata'u dava boutai beika 'inita. Beia vali'u ita ka'ika 'eva dava boutai sia ia ena ikakao venunai boina.  
\v 9 Beia ita Iesu ekaikala, ia melala kava'inamo e'ovu anelu venutai, beia ba eanana vaia 'ounai Dilava eta'u nuavi mai 'ola aku koana 'olanai evadodoa. Ia ba aviavina eonovaia kau boutai daitai, ua 'eva Dilava ena iulaveni koana.   
\p
\v 10 Dilava ena vinaula 'eva ekomolo, ia 'eva dava boutai evavai mai eikata kao, nakuna doutamo ena nuavi laloanai bevada'ata dodo 'ounai eula Iesu beanana beva'olu kave'i, inoku nakuna doutamo be'asi ena nuavi laloanai bemimia. Iesu sibonamo be'ana'ia vaita vamauli laloanai.  
\v 11 Kau eta si'avana edeini ovo kauna mai eta si'avana edeinita ovo kauta itana kamata 'eva ka'onamo. Kanaua 'ounai Iesu sia emalalai ia be'aeta bo'akalana.  
\v 12 Ia eta'u Dilava e'ouia ediaka,  
\q1 “Oni vamu ba'oua dae  
\q1 bo'akala'u vailatai.  
\q1 Eta do'u laloatai  
\q1 oni vamu bavanama'inala.”   
\qr Sal 22.22  
\m
\v 13 Mune'e eluva ediaka,  
\q1 “Lau 'eva Dilava abivenia.”  
\qr Isa 8.17  
\m Eluva 'udai ediaka,  
\q1 “Lau kau'u nia mai  
\q1 Dilava nakuna eveni'u kauta  
\q1 'eva lau ita.”   
\qr Isa 8.18  
\s1 Iesu Kau Ai Eao  //  Ita Beduluta.  
\p
\v 14 Nakuna ekoma kauta kataua 'eva kau maividiota maivaka mailalata, Iesu sibona ia vitaitatai easi eta kauani maulinai emia, kanaua evavaia 'olana 'eva ena ba ai Diabolo ba e'ola vaia diabolona beva'ekoa,  
\v 15 maivaka da'ala deabi kauta eta mauli melalata boutai ba demakau vaia kauta beluvuta ovo.   
\p
\v 16 Iesu easi 'eva sia anelu eduluta, ia easi 'eva Abela'amo 'ava'avana eduluta.  
\v 17 Kanaua 'ounai ia 'eva bo'akalana vitaitatai eao dala boutai laloatai, ia kabukabu kauna namanai be'ao mai ena vilalo mai ena vinaula komolo Dilava ena vinaula evavaia laloanai kau eta si'avana be'outa kao.  
\v 18 Ia sibona vikovo laloanai emia maivaka eanana 'ounai ia vikovo laloanai demimia kauta iduluta eikabasi.   
\c 3  
\s1 Iesu 'Eva Mose Ekeinia  
\p
\v 1 Kanaua 'ounai bo'akala'u kabukabumui e, oi lai ita Dilava e'aeta ka'ona kaumui, Iesu oi bolalovaia kave'i, ia 'eva Dilava ena veauneke kauna maivaka kabukabu kauna namana eta abiveniai valina kakakava kauna.  
\v 2 Mose Dilava ena luma laloanai evinaula kave'i vitaitanai Iesu 'eva esinia Dilavana ena vinaula evavaia kave'i mainuana bounai.  
\v 3 Luma evavaia kauna 'olana deaku vaika vakaia luma kanaua, vitaitana Iesu 'eva nuavi namana beabia vakaia Mose.  
\v 4 Luma boutai mai ivavaita kauta, beia Dilava 'eva dava boutai evavaita.  
\v 5 Mose 'eva Dilava ena luma bounai laloanai da'alabi kaunai eao evinaula kave'i mainuana bounai, ia 'eva vailai Dilava dava be'oulai davata luvata eluva.  
\v 6 Beia Keliso 'eva Dilava Nakuna, ia Dilava ena luma e'ola vaia mainuana bounai. Ita melala bounai eka abiveni maikula'ilata eka nuabata venia mailalonamata koanai ita 'eva Dilava ena kau.   
\s1 Dilava Ena Kau Eta Laani 'Abuna.  
\p
\v 7 Kanaua 'ounai Idume Kabukabu kanania eluva koma,  
\q1 “Vali'u melala kanania'i  
\q1 Dilava lelena oi bo'ika koanai,   
\q1
\v 8 nuamui sia oi bovapasisita  
\q1 itani melala kanaua kano'akunai  
\q1 Dilava dekovoia laloanai  
\q1 devakaunama boina.   
\q1
\v 9 Ua'i 'ava'avamui vikau vani navui  
\q1 laloatai e'u vinaula deikata  
\q1 beia dekovo'u mai devakovo'u.   
\q1
\v 10 Kanaua 'ounai ulu kanaua  
\q1 abadu venia aluva adiaka,  
\q1 ‘Nuata 'eva dau'ai vaika  
\q1 'ounai e'u dala sia deikabasia.’   
\q1
\v 11 Inoku abadu aluva'ana'i  
\q1 pasisi adiaka,  
\q1 ‘Ia 'eva e'u laani 'abunai  
\q1 sia beda'adodo.’”   
\qr Sal 95.7-11  
\p
\v 12 Bo'akala'u e, oi bo'imamui kave'i sia ka sibona nuana beabi si'ala sia ena abiveni ai beda'a ovo mauli Dilavana beda'ala mulili.  
\v 13 Puka kabukabuna eluvavaia ediaka ‘vali'u melala kanania’ 'eva ita eta melala, kanaua 'ounai melala boutai banomui ita nuamui oi bovakula'ilata, si'avana betata'u belebamui nuamui asi'i emavapasisita makauna.  
\v 14 Eta abiveni kamakavala davana eka abi 'inia beda'amo to'onai 'eva ita Keliso itana kavinaula ka'ona kautai ekao.   
\p
\v 15 Puka kabukabuna kanania eluva koma,  
\q1 “Vali'u melala kanania'i  
\q1 Dilava lelena oi bo'ika koanai  
\q1 nuamui sia oi bovapasisita  
\q1 melala kanaua'i 'ava'avamui  
\q1 devakaunama boina.”   
\qr Sal 95.7, 8  
\p
\v 16 Kau davata Dilava lelena de'ika beia devakaunama? Mose Aikupito ai evala'asita kauta kataua boutai.  
\v 17 Dilava dai ebadu venita vikau vani navui laloatai? Kau kataua si'avana devavai kano'akunai de'eko deba palu kauta.  
\v 18 Dai kevatai Dilava eluva 'ana'i pasisi venita ena laani 'abunai sia beda'adodo eko? Ua 'eva dai e'outa? Dilava lelena sia deda'avaia kauta kataua.  
\v 19 Kanaua 'ounai ita 'ani kaikabasi ia eta abiveni asi'i 'ounai laani 'abunai sia deda'a dodo.   
\c 4  
\s1 Ita Eka Kula'ila Laani  //  Abunai Ekada'adodo.  
\p
\v 1 Dilava ena luva 'ana'i ai ita eta laani 'abunai eka da'adodo 'eva 'abunai mo, kanaua 'ounai ita eka'imata kave'i, sia ka be'eko laani 'abuna asi'i ema leala 'ounai.  
\v 2 Ita vali nama'ina kaika, Isalaela kauta vaka luva 'ani deika. Beia kevatai luva de'ika luvana sia maiena nama'ina 'olana de'ika luvata sia deabiveni.   
\p
\v 3 Kanaua 'eva Dilava eluva vitaitana ediaka,  
\q1 “Abadu aluva'ana'i pasisi adiaka,  
\q1 ‘Ia 'eva e'u laani 'abunai  
\q1 sia beda'adodo.’”  
\qr Sal 95.11  
\m Ia ita abiveni kauta 'eva ena laani 'abunai eka da'adodo. Vinaula kanania 'eva 'ani evaolea kanobata evavaia koanai.  
\v 4 'Olana puka kabukabuna laloanai melala ivakalakoi kana luvana eluva ediaka, “Dilava ena vinaula boutai evaole vakaia melala ivakalakoi kanai lana eani.”  
\v 5 Mune'e laani lovana eaku ediaka, “Ia 'eva e'u laani 'abunai sia beda'adodo.”  
\v 6 Vali nama'ina deika makava kauta kataua eta lele ika asi'i 'ounai Dilava ena laani 'abunai sia deda'adodo. Beia vali'u vaida 'eva ia ena laani 'abunai beda'adodo.  
\v 7 Kanaua 'ounai melala vaida 'ani deole mulitai Dilava eta'u melala ka eabia isi vana e'aeia “Vali'u melala kanania”, mune'e Davida nutunai melala kanaua valina ekava ediaka,  
\q1 “Vali'u melala kanania,  
\q1 Dilava lelena oi bo'ika koanai  
\q1 nuamui sia oi bova pasisita.”   
\qr Sal 95.7, 8  
\p
\v 8 Iosua laani 'abuna umauna bemavenita koanai Dilava 'eva muliai melala sia ka bema'oua.  
\v 9 Kanaua 'ounai kaikabasi Dilava ena kau lata be'ani melalana 'eva e'asi vitaitana melala ivakalakoi kana boina.  
\v 10 Dilava ena laani 'abunai 'ani deda'adodo kauta 'eva eta vinaulai lata de'ani vitaitana Dilava ena vinaula evaolea vakaia lana eani boina.  
\v 11 Kanaua 'ounai ita 'eva ekakula'ila laani 'abuna kanaua'i eka da'adodo, Lele sia de'ika kauta kataua boitai sia ekao inoku kau ka laani 'abuna kanaua sia beleala.   
\p
\v 12 'Olana Dilava ena luva 'eva emauli maivaka esiavu, e'ano vaika kuali lepona makana aveke aveke de'ano lepona kanaua ekeinia, ia 'eva e'ano vaika beko sisita beda'amo nuata mai idumeta mai kulia ivataibouta mai kuliata, inoku kau eta lalovai lalovai mai eta ula boutai 'eva beva la'asita.  
\v 13 Kanobata davata ka Dilava vailanai sia bevuni kovo, dava boutai benoasi ia vailanai sia i'alavuta vakaia ita eta mauli boutai valita ekakava.   
\s1 Iesu 'Eva Kabukabu Kauta  //  'Olatai Kauna Namana.  
\p
\v 14 Ita 'eva mai eta kabukabu kauta 'olatai kauna namana ele'au eda'a vutuvutu, ia 'eva Iesu Dilava Nakuna. Kanaua 'ounai ita 'eva eta abiveni valina kakakava abivenina eka abi 'inia.  
\v 15 Eta kabukabu kauna namana Iesu 'eva eta badebade 'abutai elalota, nia'i kanobatai emia koanai dekovoia dala edeata edeatai ita boita, beia ia kevanai 'eva sia si'avana ka.  
\v 16 Kanaua 'ounai maikula'ilata ekada'a iulaveni Dilavana ena mia'au abuna kevanai, kanaua'i vilalo namana ekabia mai iulaveni ekadavalia, eta ula melalatai beduluta. \fig Kabukabu kauna namana.|src="HK00260B.TIF" size="col" ref="4.14—5.10" \fig*   
\c 5  
\s1 Iesu 'Eva Eta  //  Vamauli 'Olanai Eao.  
\p
\v 1 Kabukabu kauta namata boutai 'eva kau viloatai Dilava eabitaisi ena vinaula bevavaia kau daitai, ainama davata mai si'avana iabi ovota davata beveveni.  
\v 2 Kabukabu kauna namana betata'u sia maieta ikabasi kauta mai va'eva devavai kauta belalota 'olana ia sibona vaka dala dounamoai ebade bade.  
\v 3 Ia sibona vaka ebade bade 'ounai, sia kau eta si'avana daitai mo, beia ia sibona ena si'avana iabi ovota davata vaka beveveni.   
\p
\v 4 Kau ka sibona kabukabu kauna namana koana sia beabia beia Dilava betata'u be'aea kauna kabukabu koana beabia, vitaitana Alona e'aeia boina.   
\p
\v 5 Dala vitaitanai Keliso vaka sibona kabukabu kauna namana koana sia eabia, beia ia evenia Dilavana e'ouia ediaka,  
\q1 “Oni 'eva lau Naku'u.  
\q1 Vali'u melala kanania  
\q1 Lau 'eva Kamamuai a'ao.”   
\qr Sal 2.7  
\m
\v 6 Puka kabukabunai 'abu kai eluva ediaka,  
\q1 “Oni 'eva kabukabu kaumu ai  
\q1 bo'ao keinikeini  
\q1 vitaitana Melikisedeki kabukabu  
\q1 kauna namana boina.”   
\qr Sal 110.4  
\p
\v 7 Iesu kanobatai emia koanai ia ba ai bevamaulia Dilavana kevanai emeamea enoinoi e'ae'ae 'unu'unu ekani makana maiveina, inoku Dilava ia lelena eika 'olana sibona evakikia Dilava 'olana eaku vaika 'ounai.  
\v 8 Ia 'eva Dilava Nakuna, beia ena ana-anai Dilava lelena ikana eikabasia.  
\v 9 Kanaua'i eva'olu kave'i, ia lelena daitai dedadai kauta boutai eta vamauli keinikeini 'olanai eao.  
\v 10 Dilava eta'u Iesu kabukabu kauna namana ai evaaoa Melikisedeki kabukabu vinaulana evavaia kauna boina.   
\s1 Sia Ekamiamo Melo Kikita Boita.  
\p
\v 11 Melikisedeki ena vinaula lovata lai ba'aku luvata 'eva dounamo, beia iluvata kave'i 'eva depasisi 'olana 'uluta oi bo'ika 'eva ovota sia 'ani oibovo.  
\v 12 Melala dau'adau'a oi oabiveni 'ani edaia, oi 'eva vaikabasi kaumui ai oi bo'ao, beia vali'u kau ka bemata'u Dilava ena luva umauna 'olana bemavaikabasimui 'udai. Oi 'eva itani bae de'inu do'o melota boita, iani pasisita ianitai asido'o oi okula'ila.  
\v 13 Kau ka bae e'inu do'o kauna 'eva melo kikina, 'olana ia 'eva komolo luvata sia eikabasita.  
\v 14 Iani pasisita 'eva kau namata eta, ia 'eva nuata dekomolo nama'ina mai si'avana koata 'ani deikabasita.   
\c 6  
\s1 Dilava Enai Ekakula'ila  //  Mai Ekavi'ima.  
\p
\v 1 Kanaua 'ounai ita kakula'ila vaila kada'aia Keliso ena vaikabasi kula'ilana kabia, beia abiveni vaikabasita lava'ana'ita abivenita etai sia ekamia. Katania 'eva ba vinaulatai kalalo'udai inoku Dilava kabivenia,  
\v 2 vaidi'u kabukabu vaikabasina mai akatai ima dekao'au, maivaka ba ai ko'isi 'udai vaikabasina mai mia keinikeini lavuaina, sia ekamue vaikabasi katania 'olatai.  
\v 3 Dilava be'ula koanai ita 'eva vaila ekada'ala vaikabasi kula'ilana enai.   
\p
\v 4 Ia 'ana'inai Dilava nuata eva'ailalata, vutuvutu ainamana deonovaia, Idume Kabukabuna ita devinaula ka'ona kauta kataua 'eva sia 'ani belalo'udai bedaia.  
\v 5 Dilava ena luva nama'ina deikabasia mai Dilava ena siavu vailai be'asi davana vaka deonovaia,  
\v 6 inoku Keliso enai de'eko detaule kauta belalo 'udai melala ivaluana bemakamaka 'eva sia bedaia, 'olana ia 'ani imatai Dilava Nakuna au ido'o valaukuna akanai dekokoia 'au 'udai kau vailatai devamalalaia.   
\p
\v 7 Vitaitana itani kano kanaua akanai melala doutamo lamu eaku, iani nama'ita evapuluta devinaula kauta eta, kano kanaua 'eva Dilava ena vanama'ina beabia.  
\v 8 Beia kano kanaua akanai 'iniauma mai ava 'ini'inita dekubu koanai ia sia mai ena nama'ina ka, Dilava ia 'ani besivadala 'alovai beani palu.   
\p
\v 9 E'u lalo'au kaumui e, kanaua lai aluva pasisi venimui koma, beia lai aikabasi dokadoka oi 'eva sia kanaua boina, vanama'ina nama'ina beda'a vaimui vamauli 'abunai.  
\v 10 Dilava 'eva sia kau ka enai e'au, emui vinaula oi ovavai mai emui lalo'au ia vanai 'ani oi ovala'asi ena kabukabu kauta oi oduluta vali'u vaka oi oduluta kauta sia bebolabolata.  
\v 11 Lai aula vaika oi boumuiai vinaula kanaua'i oi bokula'ila beda'amo to'onai dava oi onuabata venia davana oi boabia.  
\v 12 Oi sia bobalea, eta abiveni mai eta vapasisi daitai Dilava eluva'ana'ivai davata deabi kauta boitai oi bo'ao.   
\s1 Ekabiveni Dilava Ena  //  Luva'ana'i Dainai.  
\p
\v 13 Dilava eta'u Abela'amo kevanai eluva'ana'i koanai sia kau ka Dilava akanai ekeini 'ounai ia sibona vanai luva'ana'i pasisina evavaia,  
\v 14 ediaka, “Lau oni bavanama'inamu umauna, inoku ava'avamu bavadoutamota.”  
\v 15 Inoku Abela'amo evi'ima maivapasisina eda'amo Dilava eluva'ana'i davana eabia.   
\p
\v 16 Kau ka luva'ana'i pasisina bevavaia koanai, ia akanai kauna vanai luva'ana'i pasisina kanaua bevavaia inoku luva'ana'i pasisina kanaua betata'u ena luva bevamomo'aia ia eta viala bevapuala.  
\v 17 Vitaitanai, Dilava eula bevamomo'aia ena luva'ana'i 'eva bemomo'ai ena luva'ana'i davata be'abi kauta kataua kevatai, mai vaka eula kau kataua beikabasi ia ena lalovai vailai lalovaina sia beva edeanala, kanaua 'ounai ia luva'ana'i pasisina evavaia.  
\v 18 Dilava 'eva sia ededede 'ounai ena luva luana katania luva'ana'i mai ena luva'ana'i pasisina 'eva sia bevaedeanata, inoku ita da'a'au kauta kasi Dilava kevanai kauta 'eva vakula'ila namavaikanai ekalava 'ini vailatai e'asi davana ekanuabata vaia.  
\v 19 Nuabata kanania kabia nuabatana 'eva vitaitana do'o boina eta mauli ai, ekula'ila evalava 'inita bevada'atadodo vutuvutu lo'e kabukabunai laloa ikekeavuna tubu'anai beva da'ata keini beda'amo ekabukabu vaika 'abuna laloanai.  
\v 20 Ita daitai Iesu e'ana'ia eda'adodo ua'i kabukabu kauna namanai eao keinikeini, vitaitana Melikisedeki kabukabu vinaulana evavaia boina.   
\c 7  
\s1 Melikisedeki Lovia 'Olana  //  Mai Kabukabu Kauna Namana.  
\p
\v 1 Melikisedeki kanania 'eva Salema lovia 'olana mai vaka aka umau umauna Dilavana ena kabukabu kauna. Abela'amo ekuali vanua loviata eaku bata emue laloanai devidavali, Melikisedeki eta'u Abela'amo evanama'inala.  
\v 2 Abela'amo eta'u kuali laloanai eabita davata boutai 'ouka laloatai ka ka Melikisedeki evenia. Melikisedeki vana anina 'eva ‘vinaula komolo loviana 'olana’, mune'e vana Salema loviana anina 'eva ‘nua'elu loviana 'olana’.  
\v 3 Melikisedeki 'eva kamana asi'i sinana asi'i, ena iduvu asi'i, aida epulu aida eba sia kaikabasi, ia sisibana asi'i, ia 'eva vitaitana Dilava Nakuna boina, kabukabu kaunai emia keinikeini.   
\p
\v 4 Melikisedeki kanaua oi bolalovaia, ia a e'aida 'aida koma! Ita 'ava'avata Abela'amo kuali ai dava nama'ita 'ouka eabi, 'ouka laloatai ka ka ia evenia.  
\v 5 Levi iduvuna kauta kataua 'eva kabukabu kauta namatai deao, 'ounai talavatu ai eluva ediaka, Abela'amo 'ava'avana Isalaela kauta eta dava boutai 'ouka, 'ouka laloatai ka ka boakalata Levi iduvuna bevenita.  
\v 6 Melikisedeki 'eva sia Levi iduvuna kauna, beia Abela'amo kevanai ena dava boutai 'ouka, 'ouka laloatai ka ka eabita inoku ia eta'u Abela'amo Dilava ena luva'ana'i eabia kauna kanaua evanama'inala.  
\v 7 Ita kaikabasi vanama'ina namavaikana eabia kauna betata'u vanama'ina kikina vaika eabia kauna bevanama'inala.   
\p
\v 8 Kabukabu kauta 'eva kau eta dava 'ouka, 'ouka laloatai ka ka deabita, Melikisedeki vaka Abela'amo ena dava 'ouka, 'ouka laloatai ka ka eabita, kabukabu kauta 'eva bebaba, beia Melikisedeki 'eva emia keinikeini Puka kabukabunai eluva vitaitana.  
\v 9 Kanania kamaluva koma, Levi kauta kau eta dava 'ouka, 'ouka laloatai ka ka deabita, ia Abela'amo ena dava 'ouka, 'ouka laloatai ka ka Melikisedeki evenia laloanai Levi ena iduvu kauta vaka eta dava 'ouka, 'ouka laloatai ka ka deveni boina.  
\v 10 'Olana Melikisedeki Abela'amo ita devidavali koanai Levi 'eva asido'o epulu ia 'ava'avana Abela'amo kaunai emia.   
\s1 Iesu Vitaitana Melikisedeki.  
\p
\v 11 Dilava Isalaela kauta talavatu evenita Levi iduvuna kauta kabukabu vinaulana bevavaia. Ia Levi iduvuna kabukabu vinaulana devavai kave'i beia vinaula kanaua 'eva kau sia devakomolota Dilava vailanai 'ounai kabukabu kauna edeana ka bela'asi bevinaula itani Melikisedeki boina, ia sia Alona boina.  
\v 12 Kabukabu kauta eta vinaula bevadeanata 'eva talavatu vaka bedeana.  
\v 13 Kanaua lovana kakua kauna 'eva iduvu edeana kauna, sia Levi iduvuna kauna, iduvu kanaua laloanai 'eva kau ka vaka kabukabu vinaulana sia evavai kovo.  
\v 14 Inoku 'ani kaikabasi kave'i eta Lovia namana 'eva Iuda iduvunai epulu, beia Mose kabukabu kauta ka iduvu kanaua'i sia e'ouia.   
\p
\v 15 Dava ka'oua davana 'ani kaikabasi kave'i 'olana kabukabu kauna ka 'ani evaila, ia 'eva Melikisedeki boina.  
\v 16 Ia kabukabu kaunai eao 'eva sia kau eta talavatu 'o eta dalai, ia mauli siavunai emia to'ona asi'i.  
\v 17 Puka kabukabunai kanania eluva koma,  
\q1 “Oni 'eva kabukabu kaumuai omimia beda'amo bomia keinikeini,  
\q1 Melikisedeki kabukabu vinaulana  
\q1 evavaia boina.”   
\qr Sal 110.4  
\m
\v 18 Inoku talavatu 'ana'ina 'ani deabia ovo, 'olana ia 'eva ebadebade mai vaka ena vinaula asi'i.  
\v 19 Mose ena talavatu ai kau sia evakomolota Dilava vailanai. Kanaua 'ounai Dilava eta'u nuabata nama'ina ka ita evenita nuabatana kanaua 'eva talavatu ekeinia, kanaua'i ita kadada'a Dilava kevana.   
\p
\v 20 Mune'e Dilava mai ena luva'ana'i pasisinai Iesu kabukabu kaunai evaoa. Levi iduvuna kauta kataua 'eva sia Dilava ena luva'ana'i pasisinai kabukabu kautai deao.  
\v 21 Ia Iesu kabukabu kaunai eao 'eva Dilava ena luva'ana'i pasisinai. Dilava kanania eluva koma,  
\q1 “Lovia namana 'eva  
\q1 ena luva'ana'i pasisina evavaia  
\q1 ia ena luva sia beva edeanala,  
\q1 ‘Oni 'eva kabukabu kaumuai omimia beda'amo bomia  
\q1 keinikeini.’”   
\qr Sal 110.4  
\m
\v 22 Kanania boina Iesu 'eva luva'ana'i namana kanania ivamomo'aina kaunai eao, luva'ana'i kanania 'eva luva'ana'i namana 'ana'ina ekeinia.   
\p
\v 23 Kabukabu kauta 'eva doutamo 'olana ia deba eta vinaulai sia demia keinikeini.  
\v 24 Ia Iesu 'eva bemia keinikeini, ena kabukabu vinaulana 'eva sia beda'a kau ka kevana.  
\v 25 Ia emia keinikeini maivaka ita daitai ia Dilava enoia 'ounai, ia vanai Dilava kevana beda'ala kauta boutai bevamauli paluta.   
\p
\v 26 Iesu kanania 'eva kabukabu kauna namana eta ula boutai eikabasi. Ia 'eva ekabukabu, va'eva 'o si'avana ka ia kevanai asi'i, ia 'eva si'avana kauta etai iabina tau ia ele'au eda'amo vutuvutu akana umaunai.  
\v 27 Ia 'eva sia kabukabu kauta kataua vitaitata, kabukabu kauta ka ka 'eva melala boutai sibota eta si'avana i'ou kaota vinaulata bevavai makava mulinai kau eta si'avana i'ou kaota vinaulata bevavai. Ia Iesu 'eva kanaua sia bekoma, 'olana ia sibona ena mauli eveni si'avana iabi ovona davanai eao, ia melala ka'onamoai vinaula kanaua itoina evaolea.  
\v 28 Mose ena talavatu eta'u kau eabita isi kabukabu kautai deao, beia debadebade, ia Dilava ena luva'ana'i pasisina talavatu mulinai e'asi luva 'ana'inana pasisina kanaua eta'u Dilava Nakuna eabia isi 'ani eva'olua kave'i kabukabu kauna namanai eao mai ia 'eva bemia keinikeini.   
\c 8  
\s1 Iesu 'Eva Ita Eta Kabukabu Kauna  //  Namana Vutuvutu Ai.  
\p
\v 1 Lau aluvavai luvata anita 'eva katania, ita maieta kabukabu kauna namana kanania boina kauna ka emimia. Ia vutuvutuai siavu Dilavana ena mia'au 'abuna idibana duasi i'olaku vaina 'abunai 'ani emia'au.  
\v 2 Ia 'abu kabukabuna umaunai kabukabu kauna namana ena vinaula evavaia, lo'e umauna kanaua 'eva sia kau devalavala, Lovia namana Dilava eta'u evalavala.   
\p
\v 3 Kabukabu kauta namata boutai deabita isi 'eva ainama davata mai veniveni davata beveveni Dilava kevanai, kanaua 'ounai eta kabukabu kauna namana kanania vaka dava ka beveveni.  
\v 4 Iesu kanobatai bemamia koanai ia kabukabu kaunai sia bemao, 'olana kabukabu kauta demia ia deta'u ainama davata deveni Mose ena talavatu vitaitanai.  
\v 5 Kabukabu kauta eta vinaula 'eva vutuvutuai devavaia vinaulana vitaitana umauna va'ava'ana koana boina, vinaula kanaua 'eva vitaitana Dilava Mose e'ouia pasisi lo'e kabukabuna evalavala boina ediaka, “Bo'ika, loloai avaikamu davata boutai ikaikata vitaitata umautai bovavai.”  
\v 6 Beia vali'u Iesu kabukabu vinaulana eabia 'eva kabukabu kauta eta vinaula ekeinita, 'olana ia luva'ana'i namana kanaua vaka'ona kaunai eao, luva'ana'i namana kanania 'eva kena enama'ina vakaia luva'ana'i namana 'ana'ina, 'olana ua 'eva luva'ana'i nama'ita vaika akatai evalavala.   
\s1 Luva'ana'i Namana Makamakana  //  'Eva 'Ana'ina Ekeinia.  
\p
\v 7 Luva'ana'i namana lava'ana'ina itoinai bemanama'ina koanai, ivaluana sia kamaula venia.  
\v 8 Beia Dilava ena kau kevatai va'eva eikaia 'ounai e'outa ediaka,  
\q1 “Lau, Lovia namana Dilava,  
\q1 aluluva, Melala 'ani e'asi,  
\q1 luva'ana'i namana makamakana  
\q1 bavavaia Isalaela kauta kevatai  
\q1 maivaka Iuda iduvuna laloanai.   
\q1
\v 9 Lau, Lovia namana Dilava,  
\q1 aluluva, Luva'ana'i namana  
\q1 kanania 'eva sia ia 'ava'avata  
\q1 ita aluva'ana'i luvana boina,  
\q1 ia imatai abi Aikupito kanonai  
\q1 avala'asita koanai.  
\q1 Ia e'u luva'ana'i namana  
\q1 sia deabivenia 'ounai  
\q1 lau vaka leleta sia aika.”   
\q1
\v 10 Lau, Lovia namana Dilava,  
\q1 mune'e aluluva,  
\q1 Kanaua mulinai luva'ana'i  
\q1 namana kanania 'eva Isalaela  
\q1 kauta kevatai bavavaia.  
\q1 Lau e'u talavatu ia nuatai  
\q1 bane'ea divo mai  
\q1 ia nuata 'otoitai baleleta.  
\q1 Lau 'eva ia eta Dilava ai ba'ao,  
\q1 ia 'eva lau e'u kau ai be'ao.   
\q1
\v 11 Sia kau ka bo'akalana 'o  
\q1 kevanai kauna bevaikabasia  
\q1 bediaka,  
\q1 ‘Lovia namana boikabasia’.  
\q1 'Olana kikinai eda'amo  
\q1 namana koana boutai  
\q1 'ani beikabasi'u.   
\q1
\v 12 Eta va'eva vinaulata laloatai  
\q1 balalota inoku eta si'avana  
\q1 babolabolata.”   
\qr Ier 31.31-34  
\p
\v 13 Dilava luva'ana'i namana makamakana eluvavaia koanai, lava'ana'ina kanaua 'eva 'ana'inai evaoa, inoku dava e'ana'ia mai evuluvulu davana 'eva betaule.   
\c 9  
\s1 Luva'ana'i Namana  //  'Ana'ina.  
\p
\v 1 Luva'ana'i namana lava'ana'ina 'eva maiena kukudivo talavatuta mai kukudivo 'abuna, 'abu kanaua 'eva nia'i kanobatai kau imatai devavaia.  
\v 2 Aiole devalavala inoku dekekeia avu laloana lua, laloa makavana vana de'aeia Kabukabu 'abuna. Kabukabu 'abuna laloanai 'eva lamepa ivalavana 'abuna ka maivaka vakavaka kikina ka, akanai veniveni palaoana kabukabuna dene'eiadivo Dilava ena.  
\v 3 Ikekebili tubu'ana ivaluana laloana duasi 'eva de'ouia Ekabukabu vaika 'abuna.  
\v 4 'Abu kanaua laloanai 'eva vaka kabukabuna ka koloai ivavaina akanai mulamula bonana nama'ina de'abua, maivaka luva'ana'i namana papa'ona ka kauanina itoinai koloai i'alavuna, papa'o laloanai 'eva kolo olakana ka laloanai mana deudaia manana mai 'Alona ena ikoko'a kanaua 'ana'inai uauana dedimu dela'asi davana mai bika'a palapalata lua akatai talavatu deleleta bika'ata.  
\v 5 Papa'o i'alavuna akana 'eva de'ouia Si'avana i'ou kaona 'abuna, Dilava ena nuavi anelu vitaitata boita lua vata Kelubi, vanitai 'abu kanaua depaka bubua. Beia vali'u dava katania boutai sia ba'oulai kave'i. \fig Lamepa ivalavana 'abuna.|src="HK00264B.TIF" size="col" ref="9.2" \fig*   
\p
\v 6 Dava kataua kanaua deva'oluta koma, inoku melala boutai kabukabu kauta laloa makavana laloanai deda'adodo eta vinaula devavaita.  
\v 7 Beia kabukabu kauna namana sibona mo vikau ka laloanai melala ka'onamo mo laloa ivaluana laloanai eda'adodo, sia imana 'avaeana eda'adodo, ia lala eabia edodo vaia ia sibona ena si'avana daitai maivaka kau sia deikabasi ia si'avana devavaia kauta 'ounai.  
\v 8 Dava kataua'i Idume Kabukabu 'ani evaikabasita kave'i, kabukabu 'abuna makavana elalava do'o laloanai beda'a ekabukabu vaika 'abuna dala dodona 'eva asido'o eluvu.  
\v 9 Dava katania 'eva vali'u melala kanania ivavitaitata boita. Dala kanaua'i ainama davata mai veniveni davata deveveni Dilava enai, beia dava kataua'i kukudivo kauta nuata 'otoita sia bevakomolo dokadoka.  
\v 10 Ua 'eva aniani davata ia inuinu davata mai idi'u koakoata, kauani ena talavatu 'avaeata, ia bevinaula beda'amo Dilava dala bevamakamakala 'udai melalanai. \fig Aiole kabukabuna.|src="LB00259b.tif" size="col" ref="9.1-10" \fig*   
\s1 Luva'ana'i Namana  //  Makamakana.  
\p
\v 11 Beia vali'u Keliso 'ani easi depulu davata nama'ita eta kabukabu kauna namanai eao, Aiole kanaua enama vaika mai enama'ina vaika lo'ena laloanai eda'adodo, ua 'eva sia kau imatai devavaia maivaka sia kanobata ena.  
\v 12 Keliso lo'e laloanai eda'adodo koanai, sia nani 'o bolomakau nakuta lalata eabi, ia sibona ena mauli eveni lalanai ekabukabu vaika 'abuna laloanai melala ka'onamo mo eda'adodo, ita daitai ua'i vamauli keinikeini vinaulana evaolea.  
\v 13 Kau Dilava vailanai de'obu koanai, nani ia bolomakau lalata mai bolomakau nakuta 'alovai de'abutauku lavutai kau dekapolaita, inoku kauanita Dilava vailanai demakamaka mai dekabukabu.  
\v 14 Ua 'eva luva umauna beia Keliso lalana 'eva kataua ekeinita. Keliso 'eva sia mai ena si'avana 'o sia mai ena va'eva ka, ia mia keinikeini Idumena Kabukabuna ena viduluai sibona ena mauli veniveni davanai evaoa Dilava evenia. Keliso lalana kanaua 'eva ita nuata bevamakamakala, koa sia mai anita kataua kevatai ekalavatau ekada'a mauli Dilavana ena vinaula ekavavaia.   
\s1 Keliso Lalanai Luva'ana'i Namana  //  Makamakana Evamomo'aia.  
\p
\v 15 Kanaua 'ounai Keliso 'eva vaka'ona kaunai eao luva'ana'i namana makamakana bevakula'ilala. Ia kau eta si'avana luva'ana'i namana 'ana'ina laloanai demia si'avana devavaita kataua beluvuta 'ounai eba, inoku Dilava e'aeta kauta 'eva Dilava eluva'ana'i vaia avuta beabia keinikeini.   
\p
\v 16 Bebaba kauna ena ula luva'ana'ina 'eva sia bevinaula beda'amo ena ba bevamomo'aia mulinai ula luva'ana'ina kanaua 'eva bevinaula vaia.  
\v 17 Ula luva'ana'ina 'eva eluva'ana'i vaia kauna bebaba vakaia luva'ana'i siavuna bevinaula, beia ia sia eba mauli do'o emimia laloanai luva'ana'i kanaua 'eva sia maisiavuna.  
\v 18 Kanaua 'ounai luva'ana'i namana lava'ana'ina vaka ba lalanai luva'ana'i siavuna evinaula.  
\v 19 Lava'ana'ina Mose eta'u kau boutai kevatai talavatu luvana evaikabasita, kanaua mulinai bolomakau nakuta lalata mai nani lalata vei ita eabi ka'ona, mamoe vuina 'aolana mai nopa uauana ita eabita eudauku, talavatu pukana mai kau boutai akatai esibulaita.  
\v 20 Inoku ediaka, “kanania 'eva luva'ana'i namana lalana, Dilava e'oumui oi boabi'inia.”  
\v 21 Dala vitaitanaimo Mose lo'e kabukabuna akanai maivaka kabukabu vinaulana devavai davata boutai akatai vaka lalai esibulaita.  
\v 22 Mose ena talavatu vitaitanai 'eva lala betata'u dava doutamo bevamakamakata, inoku lala sia be'itabu'itabu koanai si'avana sia i'oukao be'ao. \fig Nopa uauana.|src="HK00114B.TIF" size="col" ref="9.19" \fig*   
\p
\v 23 Lo'e laloanai davata katania 'eva vutuvutu davata ivavitaitata mai dala kanaua boinai bevamakamakata, beia vutuvutu davata umauta 'eva veniveni nama'ina umaunai bevamakamakata.  
\v 24 Keliso 'eva sia kau imatai 'abu kabukabuna devavaia 'abuna laloanai eda'adodo, 'abu kanaua 'eva 'abu kabukabuna umauna ivavitaitana, ia ita beduluta 'ounai 'abu kabukabuna umauna vutuvutu akanai 'abuna laloanai eda'adodo eda'a Dilava vailanai evailaasi.   
\p
\v 25 Vikau ka ka laloatai 'eva kabukabu kauta namata sisi lalata deabi deda'a ekabukabu vaika 'abunai deda'adodo. Beia Keliso 'eva sia melala doutamo vutuvutuai eda'adodo veniveni davanai eao sibona evenia 'udai 'udai.  
\v 26 Kanaua bemako koanai, kanobata eabi lamala koanai easimo vali'u Keliso 'eva melala doutamo bemaanaana. Beia Keliso melala ka'onamo evailaasi melala katania to'otai, sibona veniveni davanai eao si'avana iabiovotai.  
\v 27 Kau boutai 'eva melala ka'onamo mo bebaba, mulinai Dilava bevaluvata.  
\v 28 Dala vitaitanai Keliso 'eva melala ka'onamo mo veniveni davanai eao kau mato eta si'avana beabiovo. Ia melala ivaluana bevailaasi 'eva de'imala kauta bevamaulita 'ounai, ia sia si'avana iabiovota 'ounai be'asi.   
\c 10  
\s1 Keliso Kauanina Melala Ka'onamo  //  Ita Boutai Daitai Eveni.  
\p
\v 1 Mose ena talavatu 'eva dava nama'ina vailai be'asi davana va'ava'ana, sia dava umauna. Talavatu dalanai kau eta si'avana iabiovota davata vikau ka ka vitaitata deveni, beia dava kataua 'eva Dilava kevanai de'asi bekukudivo kauta sia bevakomolota kave'i.  
\v 2 Veniveni kanania bemata'u Dilava dekukudivo venia kauta eta si'avana melala ka'onamoai bemavamakamakata koanai, ia sibota bemaikabasi eta si'avana 'ani deole, inoku si'avana iabita ovo davata sia bemaveni 'udai.  
\v 3 Beia si'avana iabita ovo davata kataua deveni 'eva vikau ka ka laloatai ia eta si'avana delalovaita 'udai.  
\v 4 'Olana bolomakau mai nani lalata 'eva si'avana sia beabita ovo.   
\p
\v 5 Kanaua 'ounai Keliso easi kanobatai koanai ia Dilava e'ouia ediaka,  
\q1 “ Veniveni davata maivaka  
\q1 kabukabuna davata sia  
\q1 oula venita.  
\q1 Ia kauani ka ova'olua lau e'u.   
\q1
\v 6 Oni veniveni davata 'alovai  
\q1 detouta venivenita  
\q1 mai si'avana iabita ovo davata  
\q1 sia olalonama vaita.   
\q1
\v 7 Inoku lau aluva adiaka,  
\q1 ‘Dilava e, Lau kau'u nia, 'ani asi,  
\q1 talavatu pukanai vali'u  
\q1 deleleia vitaitanai  
\q1 oni emu ula vinaulana  
\q1 bavavaia.’”   
\qr Sal 40.6-8  
\m
\v 8 Keliso eluva makava ediaka, “Vakabukabu davata, ainama davata, veniveni davata 'alovai detouta davata, mai si'avana iabiovota davata oni sia oula venita, sia olalonama venita.” (Kataua 'eva Mose ena talavatu ena ula 'ounai deveni.)  
\v 9 Mulinai eluva ediaka, “Dilava e, Lau kau'u nia, 'ani asi, oni emu ula vinaulana bavavaia.” Ia 'eva vakabukabu dalana lava'ana'ina eabia tau ia ivaluana evalavala.  
\v 10 Iesu Keliso eta'u Dilava ena ula vinaulana evavaia, ia sibona kauanina melala ka'onamoai ita boutai daitai evenia veniveni davanai eao, kanaua'i ita 'ani evakabukabuta.   
\p
\v 11 Melala boutai kabukabu kauta boutai delalava inoku eta kabukabu vinaulata devavai, veniveni davata ka'oka'omo kataua deveni 'udai veni 'udai, ia veniveni davata kataua 'eva si'avana sia beabita ovo.  
\v 12 Beia Keliso eta'u melala ka'onamoai veniveni davanai eao si'avana iabitaovo 'ounai, veniveni kanaua 'eva evinaula beda'amo to'ona asi'i. Inoku ia Dilava idibana duasi 'olana iakuna 'abunai 'ani emia divo.  
\v 13 Kanauai ia evi'ima beda'amo Dilava betata'u 'ou kauta bevuata be'asi Keliso aena palapalana venunai.  
\v 14 Ia veniveni davana ka'onamoai eta si'avanai evakabukabuta kauta kataua bevakomolota kave'i beda'amo to'ona asi'i.   
\p
\v 15 Idume Kabukabu vaka 'ani sibona vali kanania ita e'outa. Lava'ana'ina eluva ediaka,   
\q1
\v 16 “Lovia namana 'eva eluluva,  
\q1 Melala kanaua mulinai  
\q1 Lau e'u luva'ana'i namana  
\q1 kevatai bavavaia 'eva kanania.  
\q1 E'u talavatu ia nuatai bane'ea divo  
\q1 mai ia nuatai balelea.”   
\qr Ier 31.33  
\m
\v 17 Mune'e ediaka,  
\q1 “Lau ia eta si'avana mai  
\q1 eta va'eva babolabolata.”   
\qr Ier 31.34  
\m
\v 18 Inoku si'avana mai va'eva kataua 'ani e'ou kao 'ounai si'avana iabita ovo davata venivenina 'eva anina asi'i.   
\s1 Ita Ekaabiveni Umauna  //  Dilava Kevanai Ekada'a.  
\p
\v 19 Bo'akala'u e, kanaua 'ounai ita Iesu eba lalanai kula'ila ekaabia ekabukabu vaika 'abuna laloanai ekada'adodo.  
\v 20 Iesu kauanina eba 'eva iveli keini tubu'ana e'idia vakaia dala makamakana mai mauli eluvuia ita 'outai.  
\v 21 Ita 'eva maieta kabukabu kauna namana ka Dilava ena kau e'ola vaita.  
\v 22 Nuatai ia lalana eito kapokapo 'ounai nuata umaunai si'avana kanaua 'ani eabia ovo, kauanita vaka vei anevanai 'ani edeinita kave'i, kanaua 'ounai vali'u ita Dilava kevana ekada'ala mainuata umaunai maivaka maiabivenita sia ekabaoa.  
\v 23 Dilava ena luva'ana'i 'eva bevamomo'aia 'ounai, ita eta nuabata ka'ouia nuabatana ekaabi'inia.  
\v 24 Banota ita ekalalovai lalovai ka'ona, ka ka ekavakula'ila viveni, eta lalo'au ekavaikata, mai nama'ina vinaulata ekavavai.  
\v 25 Vaida lo'e do'una vinaulata dekauba'oa kauta eta koakoai sia ekaao, beia banota ekavakula'ilata do'u vinaulana eka vanamala Lovia namana ena melala be'asi kevata kauna kaikala laloanai.   
\s1 Dilava Nakuna  //  Sia Ekada'ala Mulili.  
\p
\v 26 Ita Keliso valina 'ani kaikabasia umauna mulinai eta ula ai si'avana ekavavai basibasi koanai, si'avana kataua iabita ovo veniveni davana edeana sia ka emimia.  
\v 27 Ia dava muliai bepupulu ekamakau vaia davana 'eva valuva namana mai 'alova si'avana Dilava devaiviivia kauta bevaoleta.  
\v 28 Kaikabasi kau ka Mose ena talavatu eukua sia eabia dae koanai i'ou daena kauta lua 'o koi devamomo'aia vakaia kau kanaua va'eva kaunai e'ao deaku bala sia delaloa.  
\v 29 Kau ka etata'u Dilava Nakuna aena venunai elavamudu lavamudua koanai, ia etata'u luva'ana'i namana lalana ia evakabukabua kauna dava 'avaeanai evaaoa, mai Dilava ena vilalo koana evuata e'asi Idume Kabukabuna kevanai eluva si'asi'a venia kauna, kau kanaua ekalalovaia ena mekau bekoala 'eva a benama koma!  
\v 30 Ita kaikabasi Dilava 'eva kanania eluva koma ediaka, “Tava veni 'eva e'u vinaula, lau batata'u tavana bavamuea.” Mune'e ediaka, “Lovia namana betata'u ena kau bevaluvata.”  
\v 31 Inoku ekada'a mauli Dilavana imana laloanai ekaenouda 'eva dava si'avana umauna!   
\p
\v 32 Melala makavana a oi okoma melalana oi bolalovaia. Dilava ena 'ailala oi odavalia mulinai anaana doutamo oi oabi beia oi 'eva oi ovakula'ila.  
\v 33 Melala vaida kau vailatai devabo'omui mai devaiviivimui, maivaka melala vaida anaana kataua boita deabi kauta oi oduluta.  
\v 34 Vabuto'o lumanai de'alavuta kauta oi oduluta, maivaka vaida deta'u emui lavo deabi koanai oi ovapasisi mailalonamamui, 'olana oi oikabasi emui lavo nama'ita umauta 'eva bemia keinikeini.   
\p
\v 35 Kanaua 'ounai emui lalovai kula'ilana sia oi bovikania. 'Olana kanaua'i tavana namana oi boabia.  
\v 36 Oi 'eva bovapasisi 'olana Dilava ena ula vinaulana oi bovavaia mulinai eluva'ana'i vaia davana oi boabia.  
\v 37 Puka kabukabunai Keliso lovana eakuia ediaka,  
\q1 “Melala kava'inamo  
\q1 ia sia bedau'a,  
\q1 ia be'asi kauna 'eva be'asi,  
\q1 ia sia bemaka'i.   
\q1
\v 38 E'u vinaula komolo kauna  
\q1 'eva abiveniai bemauli.  
\q1 Ia beda'a'u mulili koanai  
\q1 lau ia sia balalonama venia.”   
\qr Hab 2.3, 4  
\p
\v 39 Ita 'eva sia deda'a mulili mai detaule kauta kataua boita, ita 'eva maiabivenita vamauli ekaabia.   
\c 11  
\s1 Abiveni 'Eva Dava?  
\p
\v 1 Eta abiveni etata'u kanuabata davata evuata e'asi dava umautai de'ao, sia ka'ika davata dava umautai evaaota.  
\v 2 Kau 'ana'ita vaka abiveni kanania 'ounai Dilava eta'u evamomo'aita.  
\v 3 Abiveniai ita kaikabasi vutuvutu mai kanobata davata boutai 'eva Dilava ena luvai depulu, inoku kaikabasi ka'ika davata 'eva sia kaikata davata kevatai deasi depulu.   
\s1 Abela, Enoka Mai Noa  //  Eta Abiveni.  
\p
\v 4 Abiveniai Abela 'eva veniveni davana nama'ina Dilava evenia Kaino ena veniveni davana ekeinia, inoku ena abiveni 'ounai Dilava eta'u Abela ena veniveni davana eabiadae maivaka vinaula komolo kaunai evaoa. Ia eba, ia ena abiveniai ia 'eva eluluva do'o.   
\p
\v 5 Abiveniai Enoka kanobatai Dilava eta'u eabia isi eda'a kevana, ia sia eba, kanaua 'ounai sia kau ka ia edavalia. 'Olana Dilava eta'u eabia tau. Puka kabukabunai evamomo'aia ediaka ia asido'o eabia isi laloanai ia 'eva Dilava nuana evanama'inala.  
\v 6 Sia maiena abiveni kauna 'eva Dilava nuana ivanama'inana sia eikabasia. Dilava kevana beda'ala kauta 'eva beabiveni umauna Dilava 'eva emauli maivaka dekavua kauta tavata nama'ita bevenita.   
\p
\v 7 Abiveniai Noa 'eva Dilava dava vailai bepupulu davana eabivenia laloanai ia sia eika davata Dilava lelena eabidae maimakauna aunakoi ka evavaia inoku ena luma kauta ivamaulita davana be'ao abaka laloanai. Abiveni kanaua'i ia komolo kaunai eao Dilava vailanai vakaia kanobata kauta mekau namana dekoaia.   
\s1 Abela'amo Mai Sala  //  Eta Abiveni.  
\p
\v 8 Abela'amo 'eva Dilava eabivenia. Ia e'aeia koanai lelena eabiadae eda'a ovo ena kano evikania. Dilava eluva'ana'i kano ka bevenia, ia a beda'ala 'eva sia eikabasia laloanai ena kano umauna evikania.  
\v 9 Abiveniai Abela'amo eda'a luva'ana'i kanona, ua'i da'a'au kaunai eao, ia Isako mai Iakobo ita aiole laloatai demia, ia laluana vaka luva'ana'i ka'onamo deabia Dilava kevanai.  
\v 10 'Olana Abela'amo 'eva evi'ima Dilava betata'u vanua kanaua bevalava 'inia kave'i miakeinikeini vanuanai be'ao.   
\p
\v 11 Abela'amo adana Sala ita 'ani demotu vaika sia melo ka bemavapuluia, ia abiveni ai 'eva Abela'amo kama ai eao 'olana ia Dilava evamomo'aia ena luva'ana'i bevamomo'aia.  
\v 12 Abela'amo 'eva emotu vaika vitaitana 'ani eba boina, kau motuna ka'onamo kanania iduvu namavaikana evapulua vitaitana vutuvutu visiuta boita 'o 'atu nabuana boina ekavakuta 'eva sia ekavaku paluta.   
\p
\v 13 Kau katania boutai eta abiveni ai demia beia Dilava ena luva'ana'i davata asido'o deabi laloanai deba, beia vailai bepupulu davata deikabasita 'ounai delalonama vaita, vakaia mulinai ia sibota deluvasi ia 'eva da'a'au kauta mai 'abua ede kauta kanobata kanania akanai.  
\v 14 Kau kanaua deluva koma 'eva ita kaikabasi ia 'eva eta kano umauna dekavua.  
\v 15 Ia kano kanaua makavanai devikania kanona bemalalovaia koanai bemamue vaka bemadaia. Ia kanaua sia dekoma.  
\v 16 Vanua ia de'imala vanuana 'eva vanua nama'ina vaika vutuvutu vanuana. Inoku Dilava 'eva sia emalalai ia be'aea eta Dilava, 'olana ia vanua ka 'ani eva'olua ia eta.   
\p
\v 17 Dilava Abela'amo ekovoia laloanai Abela'amo abiveni ai nakuna Isako veniveni davanai evaoa. Dilava Abela'amo kevanai eluva'ana'i 'ava'avana bedouta, beia Abela'amo nakuna ka'ou kukunamo veniveni davanai evaoa eveni.  
\v 18 Dilava Abela'amo e'ouia ediaka, “Isako kaunai oni 'ava'avamu aluva'ana'i vaita kauta bepupulu.”  
\v 19 Abela'amo eabiveni Dilava 'eva mai siavuna kau ba ai bevako'isia 'udai. Inoku kamadiaka Abela'amo 'eva nakuna Isako ba ai eabia 'udai boina.   
\s1 Isako, Iakobo Mai Iosepa  //  Eta Abiveni.  
\p
\v 20 Abiveniai Isako eta'u Iakobo mai 'Esau evanama'inata mai vailai bepupulu davata vaka e'outa.   
\p
\v 21 Abiveniai Iakobo ena ba 'ani ekevai vaika laloanai ia Iosepa nakuna ka ka evanama'inata maivaka ena ikoko'a ai ekoma 'au Dilava ekukudivo venia.   
\p
\v 22 Abiveniai Iosepa ena ba 'ani ekevai laloanai Isalaela iduvuna Aikupitoai bela'asi kanaua valina ekava maivaka e'outa kuliana Kanana kanonai bekoleta.   
\s1 Mose Ena Abiveni.  
\p
\v 23 Abiveniai Mose kamana sinana ia epulu mulinai devunia vuia koi 'olana de'ikaia ia 'eva melo nama'ina, inoku 'Aikupito Loviana 'olana sia demakau venia ena talavatu sia deabia dae.   
\p
\v 24 Abiveniai Mose e'aida'aida koanai ia sia eula 'eva Aikupito loviana 'olana nakuna ateatena be'aea nakunai be'ao.  
\v 25 Ia sibona eula Dilava ena kau ita beanana ka'ona, ia sia eula melala kava'ina mo si'avana vinaulata belalonama vaita.  
\v 26 Mose elalovaia ia Keliso dainai beanana 'eva enama'ina vaika vakaia Aikupito lavota be'abi, 'olana vailai tava nama'ina tavana elalovaia.   
\p
\v 27 Abiveniai Mose 'eva Aikupito evikania, lovia 'olana ena badu makauna sia emakau. Ia evapasisi sia kaikala Dilavana 'ani eikaia boina.  
\v 28 Abiveniai Mose eta'u La'au keini naduna eva'olua, e'outa lala ai nutuala akata deukuta, akuaku aneluna Isalaela nakuta melota batanikauta asi'i emaakubata makauna.   
\s1 Isalaela Kauta Dounamo  //  Dilava Deabivenia.  
\p
\v 29 Abiveniai Isalaela kauta 'eva Atu 'aolanai dekeini vitaitana kano ladanai dekeini boina, ia Aikupito kauta dekovokovo bekeini laloanai boutai 'atuai dedono ba.   
\p
\v 30 Abiveniai Isalaela kauta Ieliko vanuana alana namana deda'aia kaiu melala kalakoi ka 'eva epalu.   
\p
\v 31 Abiveniai La'aba mo'a ateatena 'eva Isalaela eta 'idima'idima kauta lua eduluta kave'i 'ounai Ia 'eva Dilava sia deabia dae kauta ita sia deba ka'ona.   
\p
\v 32 Inoku lau luva dava vaka baluvala? Kidioni, Balaka, Samusoni, Idepeta, Davida, Samuela mai enoela kauta valita bakakava melalana 'eva sia edaia.  
\v 33 Ia eta abiveni ai dekuali kanobata doutamo devasi'avanata, komolo vinaulata devavai, Dilava ena luva'ana'i davata deabi, ia deta'u laioni nututa de'alavuta,  
\v 34 'alova namata devabo'ota, kuali lepota kevatai deveau ovo. Debade bade ia mune'e dekula'ila 'udai, kuali ai dekula'ila si'asia 'abu edea kauta 'itota delo'ota.  
\v 35 'A'ate vaida 'eva kadi'a'ata deba kauta deko'isi 'udai dedavalita, vaida devavabuto'ota kauta sia deula beluvuta 'olana beaku bata laloanai ko'isi 'udai nama'inanai bemauli 'ounai.   
\p
\v 36 Vaida 'eva deikata demamai devabo'ota, de'odita, deliota vabuto'o lumanai de'alavuta.  
\v 37 Bika'a ai deaku bata, deilipapata lua, kuali lepotai dekala bata. Mamoe mai nani avata delio deda'a to'ato'a, deulalu, devaiviivita mai devasi'avanata.  
\v 38 Kanobata 'eva sia maiena nama'ina ka ia kevatai. Ia 'eva sia maieta kano kauta boitai deda'a to'ato'a, kano'akunai, lolo ai, bika'a 'iletai mai 'uliai demia.   
\p
\v 39 Kau katania boutai 'eva maieta abiveni dainai Dilava eta'u evamomo'aita, beia Dilava ena luva'ana'i davata 'eva asido'o deabi.  
\v 40 'Olana Dilava 'eva ena lalovai nama'ina umauna eva'olua ita eta. Ena ula 'eva 'ana'inai deabiveni kauta mai ita 'eva melala ka'onama bevakomolota ka'ona.   
\c 12  
\s1 Iesu Ekaikala  //  Mai Ekabivenia.  
\p
\v 1 Kanaua 'ounai abiveni maulinai demia kauta doutamo 'eva vialulu kauta boita delavata kaiu, ita dava kataua devamekauta mai si'avana deabi 'inita si'avanata kataua boutai kamaabita ovo, vakaia vailatai e'asi veau vilo'onai kamaveau maivapasisita ita.  
\v 2 Ita makata 'eva Iesu mo ekaikala, ia eta'u ita eta abiveni evapulua makavanai beda'amo to'onai, ia 'eva vailai emimia lalonamana 'ounai evapasisi sia emalalai au ido'o valaukuna anaanana vuvuana ekoaia akanai eba, inoku ia vali'u 'eva uai Dilava ena mia'au 'abuna idibana duasi i'olakuna 'abunai 'ani emia divo.   
\s1 Dilava Mekau Bevenita  //  'Eva Ekakomolo.  
\p
\v 3 Oi ia oi bolalovaia kave'i, ia si'avana kauta devaiviivia si'asi'a laloanai evapasisi, kanaua 'ounai sia oi bobalea mai sia oi bomanomano.  
\v 4 Oi 'eva si'avana ita oi okuali, beia sia oi oviaku, oi asido'o lala oi oidi'ua.  
\v 5 Dilava eta'u nakunai evaomui vaidiba luvatai evakula'ilamui luvana 'ani oi obolabolala, 'una? Ediaka,  
\q1 “Naku'u e, Lovia namana  
\q1 evaidibamui 'eva lelena oi bo'ika,  
\q1 mune'e e'ovenimui 'eva nuamui  
\q1 sia oi bovamanomano.   
\q1
\v 6 'Olana Lovia namana  
\q1 elalo'au venita kauta evaidibata,  
\q1 maivaka nakunai evaota kauta  
\q1 'eva e'odita.”   
\qr Aon 3.11,12  
\p
\v 7 Emui anaanai oi bovapasisi, ua 'eva kamamui ena vaidiba. 'Olana Dilava etatau nakunai evaomui. Kama davana nakuna sia evaidibala?  
\v 8 Kau boutai nakuta devaidibata. Oi sia bevaidibamui koanai oi 'eva sivabu tauasi melomui sia ia nakuna umaumui.  
\v 9 Ita boutai maikamata kanobata kanania akanai devaidibata inoku leleta kabidae. Ita idumeta Kamata vutuvutuai kauna lelena daitai ekadai kave'i 'eva ekamauli.  
\v 10 Ita kamata kanobatai nia'i kauta eta komolo ai melala kava'inamo devaidibata, ia Dilava evaidibata 'eva ita eta nama'ina 'ounai, kanaua'i ia ita ena kabukabu maulina laloanai ekamia ka'ona.  
\v 11 Kama naku evaidibata koanai maianaanana ia sia mailalonamana, beia muliai beanana mai mekau bekoala kauta kataua 'eva vaka'ona vuavuana nama'ina beabia inoku vinaula komolo kautai be'ao.   
\p
\v 12 Kanaua 'ounai imamui debavunu kaumui imamui oabita isi mai kuimui deba kaumui ovapasisi oko'isi.  
\v 13 Emui da'a dalata oi bovakomolota, inoku aeta desi'avana kauta dala kanaua'i aeta benama'ina.   
\p
\v 14 Oi bokovokovo kau boutai ita nua'elu ai oi bomimia mai oi bokabukabu, 'olana sia bekabukabu kauna 'eva Lovia namana sia beikala.  
\v 15 Ka ka oi boimamui kave'i, kau ka Dilava ena iulaveni koanai asi'i ematabu makauna, 'o viloamuiai kau ka au lamuna vamaina boina asi'i emakubu 'au mato asi'i emavabavunumui mai asi'i emava'obumui makauna.  
\v 16 Oi bo'imamui kave'i, viloamuiai kau ka sia bekulakula, 'o idume vinaulana 'olana sia de'aku kautai asi'i demao makauna vitaitana 'Esau boina, ia 'eva iani nau ka'onamo 'ounai ena pulu makava koana vanama'ina itoinai etavaia.  
\v 17 'Ani oi oikabasi, muliai 'Esau 'eva kamana kevanai ena pulu makava koana vanama'inan iabina eula enoia maikanikanina, beia kamana ia eda'aia mulili, 'ounai 'Esau ena pulu makava koana nama'ina beabia 'udai dalana sia ka edavalia.   
\s1 Ita 'Ani Kaele'au  //  Vutuvutu Ielusalemana.  
\p
\v 18 Oi oasi 'abuna 'eva sia 'ana'inai Isalaela kauta deda'a Sinai lolona boina. Sinai lolona 'eva imatai ekabia kovo bedaia, 'alova e'ani, oli 'uma'umana mai vabuto'o e'alavua maivaka levo e'unu,  
\v 19 bisi 'uluna mai lele ka deika. Inoku kau lele de'ika kauta kataua Mose denoia Dilava ia kevatai sia luva ka beluvala 'udai.  
\v 20 'Olana kau kataua Dilava e'outa luvana demakau vaia dokadoka, ia eluva ediaka, “Kau ka beda'a lolo kanania imanai beabia kovo 'eva bika ai beaku bala, bema sisi ka koanai vitaitanai kanaua mo bekomala.”  
\v 21 Dekailao koa namata deikata koanai demakau si'asi'a, inoku Mose vaka e'ululu 'ululu ediaka, “Amakau vaika.”   
\p
\v 22 Beia oi oasi 'abu kanania 'eva Siona lolona, mauli Dilavana ena vanua, vutuvutu Ielusalemana. 'Abu kanaua laloanai anelu 'ito namavaikana mailalonamata demia.  
\v 23 Oi oasi melo batani kauta eta do'u namana viloatai vamui vutuvutuai deleleta, kau boutai ivaluvata kauna Dilavana kevana mai vinaula komolo kauta kataua idumeta 'ani dekomolo kave'i kauta kevatai.  
\v 24 Oi oasi Iesu luva'ana'i namana makamakana ivaka'onamona kauna kevana, mai ia lalana si'avana iabita ovo kauna kevana, lala ekapolai kauna kanaua 'eva Abela lalana tavana eulavaia lalana kanaua ekeinia.   
\s1 Eka'imata Kave'i.  
\p
\v 25 Oi bo'imamui kave'i, e'oumui kauna sia oi bo'oualavu venia. Kau kanobatai kataua Dilava ena luva evenia kauna Mose de'oualavu venia kauta 'eva mekau dekoaia. Ita vutuvutuai evaidibata kauna ekavasi'avanala koanai mekau be'asi mekauna kevanai a ekaveau ovo koma?  
\v 26 Melala kanaua'i ia lelena eta'u kanobata eva'iuva'iuvaia, inoku vali'u 'ani eluva'ana'i ediaka, “Lau mune'e sia kanobata mo bava'iuva'iuvaia, ia vutuvutu vaka bava'iuva'iuvaia.”  
\v 27 Luva kanania “mune'e” anina 'eva evavaita davata kataua be'iuvai'iuvai 'eva davata boutai beabita ovo, ia sia be'iuvai'iuvai davata 'eva 'abutai bemimia.   
\p
\v 28 Dilava elovia vaia vanuana sia e'iuvai'iuvai vanuana evenita ita ekalovia vaia 'ounai vanama'ina luvana Dilava ekavenia, mai'olakuta ekakukudivo venia maivaka maimakauta ia ekavanama'inala.  
\v 29 'Olana ita eta Dilava 'eva 'alova namana umauna boina dava boutai e'abu paluta.   
\c 13  
\s1 Banota Ekalalo'au Venita Basibasi.  
\p
\v 1 Oi sibomui ka ka oi bovilalo'au viveni basibasi bo'a ka'onamo boina Keliso laloanai.  
\v 2 Sia oi bobolabola, da'a'au kauta 'eva emui lumai oi boabita dae, 'olana vaida deta'u eta lumai da'a'au kauta deabita dae koanai anelu deabita dae, beia ia sibota 'eva sia deikabasi.   
\p
\v 3 Vabuto'o lumatai de'alavuta kauta oi bolalovaita vitaitana oi 'eva ia ita vabuto'o lumatai oi omimia boina. Deanana kauta oi bolalovaita vitaitana oi 'eva oi oanana boina.   
\p
\v 4 Kau boutai kamoane 'oalana be'aku 'eva benama'ina. Momoluane mai 'a'ate adamui ita emui kamoane oi bo'imala kave'i 'eva benama'ina, 'olana Dilava betata'u mo'a kauta mai kamoane laloanai dekulakula kauta 'eva bevaluvata.   
\p
\v 5 Moni sia oi boula venita vaika ia dava kevamuiai demimia davata mo oi bo'abi nuamui benama'ina, 'olana Dilava eluva ediaka,  
\q1 “Lau 'eva sia kena  
\q1 bavikanimui kovo maivaka  
\q1 sia kena babolabolamui kovo,  
\q1 asi'i vaika.”   
\qr Deu 31.6  
\m
\v 6 Kanaua 'ounai maikula'ilata ekaluva Ekadiaka,  
\q1 “Lovia namana 'eva  
\q1 lau idulu'u kauna,  
\q1 lau sia bamakau.  
\q1 Kau dava bevavaia  
\q1 lau keva'uai?”   
\qr Sal 118.6  
\p
\v 7 'Ana'inai de'anaia vaimui Dilava ena luva devaikabasimui kauta oi bolalovaita. Eta mauli oi bolalovaia a demia koma eda'amo deba, inoku eta abiveni koata vitaitata oi bokovota.   
\p
\v 8 Iesu Keliso 'eva lavi, vali'u maivaka mala sia bedeana beda'amo bemia keinikeini.  
\v 9 Vaikabasi luvata edeata edeata sia betatau dala medianai bevada'ata tau. Dilava ena iulaveni koana nama'inana betata'u nuamui bevakula'ilata, iani talavatuta sia oi bovanamata. 'Olana iani talavatuta deabita dae kauta kataua 'eva sia nama'ina ka dedavalia.   
\p
\v 10 Ita 'eva maieta vaka kabukabuna, ua 'eva au ido'o valaukuna akanai Iesu eba vakana, kabukabu kauta kataua lo'e laloanai ia eta kabukabu vinaulata devavai kauta be'asi ita eta vaka kabukabuna kanaua'i beaniani 'eva sia maieta komolo.  
\v 11 'Olana sisi lalata 'eva kabukabu kauna namana evuata eda'a ekabukabu vaika 'abuna laloanai evuata edodo si'avana iabiovota 'ounai, beia sisi kauanita 'eva evuata eda'a vanua alana mulinai etouta.  
\v 12 Vitaitanai Iesu vaka sibona lalanai kau eta si'avanai bevamakamakata 'ounai vanua alana mulinai eanana eba.  
\v 13 Kanaua 'ounai ita vaka ekada'a ia kevana, vanua alana mulinai ia emalalai vaia malalaina ia ita ekamalalai ka'ona.  
\v 14 Kanobata kanania laloanai ita eta mia keinikeini vanuana ka asi'i, ita 'eva vanua kanaua vailai e'asi vanuana ka'imala.  
\v 15 Kanaua 'ounai ita melala boutai Iesu vanai Dilava vanama'ina ekavenia, ita ekata'u nututai ia vana ekaapavaia, ua 'eva ita eta veniveni davana Dilava ena.  
\v 16 Vinaula nama'ita maivaka banomui iduluta vinaulata sia oi bobolabolata, 'olana vinaula kataua boita 'eva veniveni davata Dilava elalonama vaita.   
\p
\v 17 De'ana'ia vaimui kauta leleta daitai oi bodadai mai deula veni vinaulata oi bovavaita. 'Olana ia detata'u oi de'imamui Dilava vailanai maimakauta, melala boutai. Leleta daitai oi bodadai 'eva mailalonamata eta vinaula bevavai, beia mo leleta daitai sia oi bodadai koanai mai lalovailalovaita bevinaula, inoku kanaua 'eva sia maividuluna kevamuiai.   
\p
\v 18 Melala boutai oi bomeamea lai akamai ai. Lai nuamai umauta lalovaita 'eva bekomolo kave'i 'olana dava boutai laloatai lai a'ula vinaula komolota lai bavavai.  
\v 19 Lau anoimui oi bomeamea kula'ila Dilava besini'u bavasi kaokao kele'emui.   
\s1 Vanama'ina Luvana To'ona.  
\p
\v 20 Nua'elu Dilavana eta'u Lovia namana Iesu ba kauta viloatai evako'isia, ia 'eva miakeinikeini luva'ana'ina namana lalana e'itabua siusiu inoku mamoe 'ima kauna namanai eao.  
\v 21 Lau ameamea, Dilava kanania betata'u dava nama'ita boutai bevenimui 'olana ena ula vinaulana oi bovavaia 'ounai, Iesu Keliso vanai ia elalonama vaia vinaulana nuatai bevavaia. Keliso kevanai nuavi bemia keinikeini. Amen.   
\p
\v 22 Boakala'u e, malele kanania alele venimui luvata 'eva sia delaka'ina, ia e'u vakula'ila luvata katania oi boabidae dokadoka.  
\v 23 Avaikabasimui bo'akalata Timoteo vabuto'o lumanai 'ani devala'asia, ia bemaasi kaokao koanai laluana lai bamavasi lai bamaikamui.   
\p
\v 24 De'ana'ia vaimui kauta boutai mai Dilava ena kau boutai kevatai e'u vanama'ina luvana oi bo'outa. Ua'i Italia ai demia kauta eta vanama'ina luvana desinia kele'emui.   
\p
\v 25 Dilava ena iulaveni koana 'eva boumuiai kevamuiai bemimia. Amen.