\id GAL  
\h Kalatia 
\toc3 Kt 
\toc2 Kt 
\toc1 KALATIA 
\mt3 Paulo Ena Malele  
\mt1 KALATIA  
\mt3 Kauta Kevatai  
\is1 Puka Laloana Ilelena Luvana  
\ip Melala kataua'i kau lava'ana'ita umauta Iesu mulinai deda'a kauta 'eva Iuda kauta. Beia Iesu eta'u Paulo veauneke kaunai evaaoa inoku esinia eda'a puluedea kauta kevatai vali nama'ina beilolo vaia. Kau doutamo abiveni kauta ita devaka'onamo. Beia adedua namana ka epulu. 'Ana'inai kau kataua 'eva Mose ena talavatu sia deda'a vaita kauta, itani Iuda kauta Mose ena talavatu deda'a vaia boita, inoku abiveni kautai deao koanai talavatu kataua beda'a vaita o asi'i? Kau vaida 'eva ia deva asiasita iva beabia Iuda kauta eta koakoa vitaitanai, inoku ia betata'u Mose ena talavatu beda'a vaita.  
\ip 'A Paulo ediaka kanaua 'eva sia dava namana, ita Iesu Keliso eka abivenia 'eva Dilava vailanai eka komolo. Iuda kauta vaida 'eva deda'aua'i Kalatiai, inoku deula abiveni kauta ua'i beva asiasita Mose ena talavatu beda'avaita. Vinaula kanania 'eva Kalatiai epulu inoku Paulo valina eika. Kanaua 'ounai puka kanania eleleia, eta abiveni mai eta koakoa kanaua bevakomoloa.  
\ip Lava'ana'inai Paulo ediaka Dilava eta'u ia edilaia veauneke vinaulana bevavaia. Maivaka ediaka kau kataua Iesu Keliso enai deabiveni kauta 'eva Dilava vailanai dekomolo. Inoku puka to'onai 'eva ediaka Keliso ita si'avana kevanai eva'avaeata 'eva Idume Kabukabuna betata'u ita be'ana'ia vaita, ita 'eva melala boutai koakoa mediata kataua kau kevatai eka vavai.  
\is1 Puka Iduvuna Namata  
\io1 a. Lova aku. (1.1 - 10)  
\io1 b. Paulo veauneke kauna mai ena siavu. (1.11 — 2.21)  
\io1 c. Dilava ena iulaveni koana valina nama'ina. (3.1 — 4.31)  
\io1 d. Abiveni kauta eta komolo mai eta vinaula bevavai davata. (5.1 — 6.10)  
\io1 e. Luva to'ota. (6.11 - 18)  
\c 1  
\s1 Vanama'ina Luvana.  
\p
\v 1 Lau Paulo, veauneke kau'u, vinaula kanania sia kau deveni'u 'o sia desini'u, beia Iesu Keliso mai Kamana ba ai evako'isia 'udai Dilavana ita desini'u.  
\v 2 Lai abiveni kaumai bo'akalata ita nia'i lai amimia boumai vamaiai abiveni kaumui Kalatia kanona laloanai lo'e ka ka laloatai oi omimia kaumui alele venimui.   
\p
\v 3 Lai ameamea Dilava ita Kamata mai Lovia namana Iesu Keliso eta iulaveni koana mai nua'elu 'eva akamuiai bemimia.  
\v 4 Keliso sibona ena mauli eveni ita eta si'avana daitai, ia 'eva kanobata si'avana vaika kanania laloanai ita bevamaulita, ita Kamata Dilava ena ula vitaitanai.  
\v 5 Kanaua 'ounai Dilava ena nuavi bemia keinikeini. Amen.   
\s1 Keliso Valina Nama'ina  //  Sibonamo.  
\p
\v 6 Lau kevamuiai ada'unai 'eva Keliso ena iulaveni koanai e'aemui Dilavana alimo oi ovikania 'avaea ia oi oda'a vali edeana deluva vaia kauta kevata.  
\v 7 Kanaua 'eva sia vali nama'ina umauna. 'Abu kanania'i kau vaida devalalomui to'ato'a 'olana de'ula Keliso valina nama'ina bevaedeanala.  
\v 8 Lai 'o vutuvutu aneluna ka bema asi koanai, vali edeana ka lai 'o ia bema ilolo vaia ia sia vali nama'ina 'ana'inai kevamuiai lai ailolo vaia valina boina koanai sivada beabia keinikeini.  
\v 9 'Ana'inai lai aluvaia luvana vali'u mune'e lai aluvala 'udai. Kau ka sia vali nama'ina oabia dae valina ia vali edeana ka beilolo vaia koanai anana keinikeini beabia.  
\v 10 Vali'u lau 'eva kau eta ulai avinaula? Asi'i vaika. Dilava ena ulai avinaula. 'O kau nuata bavalalonamata dalana akavua? Kau nuata ivalalonamata amaula venia koanai, lau 'eva Keliso ena da'ala iabina kau'uai sia amaao.   
\s1 Veauneke Kauna Paulo  //  Sibona Sisibana.  
\p
\v 11 Bo'akala'u e, lau a'ula oi boikabasi vali nama'ina ailolo vaia valina 'eva sia kau ena ikabasiai e'asi.  
\v 12 Sia kau ka kevanai abia 'o sia kau ka evaikabasi'u, beia Iesu Keliso keva'uai evala'asia davana abia.   
\p
\v 13 E'u mauli 'ana'inai Iuda kauta eta abiveni dalanai amia koanai avavaia maulina 'uluna 'ani oi oika, Dilava ena lo'e kauta avaivi ivita vaika mai aula bavaoleta.  
\v 14 Lau ulu'u kauta Iudai doutamo viloatai Iuda eta abiveniai lau 'eva aidiba vaika, mai 'ava'avamai eta koakoa 'eva aula venita vaika.   
\p
\v 15 Beia sina'u bo'anai asido'o apulu laloanai Dilava 'ani edila'u, ena iulaveni koanai e'ae'u, ia ena ula ai  
\v 16 nakuna evala'asia keva'uai, valina pulu edea kauta kevatai bailolo vaia, sia kau ka ita kanaua lai aluvaluva vaia.  
\v 17 'O sia vaka ada'a Ielusalema, veauneke kauta 'ana'ita sia aikata, beia komolonai mo ada'a Alabia, mulinai ada'a mune'e Damaseko.  
\v 18 Vikau koi deole mulinai, lau aele'au ada'a Ielusalema Petelo kevana laluana lai aluvaluva, ua'i melala 'ouka ima lai amia.  
\v 19 Ua'i sia veauneke kauta edeata ka aikaia, Lovia namana kadina Iakobo mo sibona aikaia.  
\v 20 Dilava vailanai luva kanania alelea 'eva umauna ia sia adedede.   
\p
\v 21 Mulinai ako'isi 'eva ada'a Sulia mai Kilikia kanotai.  
\v 22 Beia ua'i Iudeai Dilava ena lo'e kauta 'eva lau koa'u sia deikabasia,  
\v 23 vali'u mo deika dediaka, “'Ana'inai evaiviivita kauna eta'u abiveni kanaua bevaolea davana 'eva vali'u 'ani eilolo vaia.”  
\v 24 Kanaua 'ounai lau dai'uai Dilava devanama'inala.   
\c 2  
\s1 Paulo Mai Banona Ita  //  Eta Vinaula Ka'ona.  
\p
\v 1 Vikau 'ouka vani deole mulinai mune'e lau mai Banaba Tito lai avuaia ita lai aele'au ada'a Ielusalema.  
\v 2 Dilava ena luva nua'uai evala'asi 'ounai ada'a Ielusalema, vali nama'ina kanaua pulu edea kauta kevatai ailolo vaia valina aluva vaia. Abiveni kauta de'ola vaita kauta ita 'eva 'aba'abai lai aluvaluva vaia belalovai lalovai, 'olana e'u vinaula bounai 'ana'inai ailolo vaia valina mai vali'u ailolo vaia valina anita asi'i dema asi'i 'ounai.  
\v 3 Ibanomai kauna Tito 'eva 'Elene kauna beia sia devasiasia iva beabia.  
\v 4 Eta do'u laloanai kadi'a'a dedeta vaida vunivuniai dedodo, de'idimata Keliso Iesu enai mauli kabia maulina beikabasia, eta ula 'eva talavatu da'alana iabina kautai bemane'eta divo 'udai.  
\v 5 Eta lalovai sia lai avamomo'aia, 'olana vali nama'ina luvana umauna kevamuiai asi'i emaedeana.   
\p
\v 6 Beia kataua 'eva kau namatai devaota kauta (lau keva'uai 'eva eta edeana asi'i. Dilava 'eva kau kauanina ena nama'ina sia evamomo'aia,) inoku kau kataua vali nama'ina lau ailolo vaia valina akanai sia dava ka dene'ea 'au.  
\v 7 Ia delaloune Petelo Iuda kauta kevatai vali nama'ina eilolovaia vitaitanamo Dilava vinaula eveni'u vali nama'ina pulu edea kauta kevatai ailolo vaia.  
\v 8 Dilava ena siavuai Petelo 'eva veauneke kaunai eao Iuda kauta kevatai, vitaitanai mo Dilava ena siavuai lau 'eva veauneke kau'uai ao pulu edea kauta kevatai.  
\v 9 Do'u kanaua 'olana kauta Iakobo, Petelo mai Ioane Dilava iulaveni koana kanania eveni'u davana deikaia une koanai, lau Banaba ita kadi'a'a koana imamai deabi. Inoku devamomo'aia lai kaumai 'eva lai bada'a pulu edea kauta kevata, ia 'eva beda'a Iuda kauta kevata.  
\v 10 Luva ka'onamo deluvaia kevamaiai 'eva ta'ovala kauta lai balalo vaita namana, luva kanaua lai abiadae ia vinaula kanania 'eva lau 'ani siako vaika avavaia 'udai'udai davana.   
\s1 Paulo Antioka Ai  //  Petelo E'ovenia.  
\p
\v 11 Beia Petelo easi Antioka koanai kau vailatai a'ovenia 'olana ena koa 'eva sia ekomolo.   
\p
\v 12 Petelo pulu edea kauta ita deaniani ka'ona laloanai Iuda kauta vaida Iakobo esinita kataua dela'asi, inoku Petelo 'eva kevatai eko'isi eda'atau, 'olana ia iva devaikabasi vaita kauta kataua emakau vaita.  
\v 13 Iuda kauta vaida vaka ia ena makau kanaua vitaitanai dede koana devavaia, inoku eta makauai Banaba vaka eakulea.  
\v 14 Lau koa kanaua aikaia une 'eva vali nama'ina luvana umauna sia deda'avaia, kanaua 'ounai boutai vailatai Petelo a'ovenia adiaka, “Oni 'eva Iuda kaumu, beia emu koa 'eva itani pulu edea kauta vitaitatai omimia, ia sia Iuda kauta boita. A boina pulu edea kauta bova asiasita Iuda kauta eta koakoai bemimia?”   
\s1 Vamauli 'Eva Abiveniai E'asi.  
\p
\v 15 Puluai ita 'eva Iuda kauta umauta, ia sia ‘si'avana kauta’, sia pulu edea kauta boita.  
\v 16 Beia kaikabasi kau 'eva talavatu kanaua iabi daenai sia bekomolo, ia Iesu Keliso beabivenia 'eva bekomolo. Kanaua 'ounai ita vaka Keliso Iesu kabivenia, kanaua'i Keliso iabiveninai ekakomolo ia sia talavatu iabi daenai, 'olana talavatu iabi daenai 'eva kau ka sia bekomolo.  
\v 17 “Beia ita Keliso kevanai eta komolo kakavua, beia si'avana kautai ka'ao itani pulu edea kauta vitaitata koanai, kanaua anina 'eva Keliso ita si'avana kauta ivavaita kauna, una? Beia kanaua 'eva asi'i vaika.  
\v 18 Sibo'u avasi'avanala talavatuna bavalavala 'udai koanai, lau sibo'u bavamomo'ai'u lau talavatu aukua kau'u mai si'avana kau'u.  
\v 19 Lau 'eva talavatu dainai aba talavatu enai, kanaua 'ounai Dilava enai bamauli.  
\v 20 Lau 'eva Keliso ita au ido'o valaukuna akanai deakubamai, inoku lau sia amauli, beia Keliso lau nua'uai emauli. Beia mauli kanania vali'u kauani'uai amia vaia maulina 'eva Dilava Nakuna elalo'au veni'u kauna sibona ena mauli abivenia 'ounai eveni'u amauli.  
\v 21 Dilava ena iulaveni koana 'eva sia avasi'avanala. Talavatuai komolo kama abia koanai, Keliso 'eva 'ani eba 'avaea.”   
\c 3  
\s1 Mauli 'Eva Talavatuai  //  Sia E'asi.  
\p
\v 1 Kalatia kaumui e, oi 'eva bo'o kaumui. Dai menai evakuleamui? Vailamui umaunai Iesu Keliso valina 'ani aluvaia kave'i au ido'o valaukunai deaku bala.  
\v 2 Lau a'ula dava ka'onamo mo oi bo'ou'u, Idume Kabukabuna oi oabia 'eva talavatu oi oda'avaia kave'i 'ounai 'o vali nama'ina oi oika mai oi oabivenia 'ounai?  
\v 3 Oi a obo'o koma? Siako 'ani mauli kanania Idume Kabukabunai oi oabi sinala, ia vali'u dava 'ounai oi o'ula kauani kula'ilanai oi bovaolea?  
\v 4 Oi vali nama'ina dainai oi oanana vaika 'eva anina asi'i una? Kanaua bekoma koanai, 'ani oi oanana vaika 'avaea.  
\v 5 Dava 'ounai Dilava Idumena evenimui mai vatabulovo vinaulata evavai viloamuiai? Talavatu oi oda'avaia kave'i 'ounai 'o vali nama'ina oi oika oi oabivenia 'ounai?   
\p
\v 6 Abela'amo olalovaia. Puka kabukabunai kanania deleleia koma,  
\q1 “Abela'amo Dilava eabivenia,  
\q1 ena abiveni dainai Dilava eta'u  
\q1 komolo kaunai evaoa.”   
\qr Gen 15.6  
\m
\v 7 Kanaua 'ounai oi boikabasi Dilava deabivenia kauta kataua boutai 'eva Abela'amo nakuna.  
\v 8 Puka Kabukabuna 'ani eikaia makava pulu edea kauta beabiveni 'eva Dilava betata'u komolota be'oua, kanaua 'ounai Abela'amo kevanai vali nama'ina eilolo vaia makava, “Oni daimuai kanobata kauta boutai Dilava bevanama'inata.”  
\v 9 Kanaua 'ounai mai eta abiveni kauta kataua 'eva Dilava bevanama'inata, abiveni kauna Abela'amo ita.  
\v 10 Talavatuai demimia kauta boutai 'eva Dilava ena sivada venunai demimia, 'olana Puka kabukabunai kanaua eleleia koma, “Talavatu pukanai delele luvata boutai sia be'ima kave'i kauna 'eva Dilava ena sivada venunai emimia.”  
\v 11 'Ani ela'asi kave'i talavatuai sia kau ka 'eva ekomolo Dilava vailanai, 'olana Puka kabukabunai ediaka,  
\q1 “Komolo kauna 'eva  
\q1 abiveniai bemauli.”   
\qr Hab 2.4  
\m
\v 12 Beia talavatu 'eva abiveniai sia easi, luana sia devitaita, Puka kabukabuna ediaka, “Kau ka talavatu luvata boutai beda'avai palu kauna 'eva kataua'i bemauli.”   
\p
\v 13 Keliso ita eta sivada vuvuana ekoaia, talavatu ena sivada laloanai evala'asita, 'olana Puka kabukabunai 'ani ilelena ediaka, “Au akanai dedodo'o kauta 'eva Dilava ena sivada laloanai.”  
\v 14 Keliso evala'asita 'olana 'eva vanama'ina Abela'amo eabia vanama'inana pulu edea kauta bedavalia Keliso Iesu dainai, kanaua 'ounai ita eta abiveniai 'eva Idume Kabukabuna e'ouia ana'i idumena kanaua ekabia.   
\s1 Talavatu Mai Luva 'Ana'i.  
\p
\v 15 Bo'akala'u e, eta mia maulina laloanai vaikaika ka kaikaia, kau lua eta luva 'ana'i devavaia deva'olua mulinai sia kau ka dava ka beabia tau 'o akanai sia ka bene'ea 'au, vitaitana mo bemimia.  
\v 16 Dilava ena luva 'ana'i Abela'amo mai 'ava'avana kevanai evavaia. Puka Kabukabuna sia ediaka ‘'ava'avamu kevatai’ anina 'eva kau doutamo, beia ediaka ‘'ava'avamu kevanai’ anina 'eva kau ka'onamo, ua 'eva Keliso Iesu.  
\v 17 A'oua 'eva kanania, Dilava luva 'ana'i evavaia makava vakaia vikau sinavu vani koi navui (430) deole mulinai talavatu eveni talavatuna betata'u luva 'ana'i kanaua sia beabia tau 'o sia beva'alamaia.  
\v 18 Talavatuai ainama bepupulu koanai, luva 'ana'iai 'eva ainama sia bepupulu. Ia luva 'ana'iai Dilava ena vilalo koanai ainama Abela'amo evenia.  
\v 19 Inoku talavatu ena vinaula 'eva dava? Talavatu epulu 'olana 'eva va'eva 'abuta bevala'asita. Ia 'eva anelu deabia deasi Mose imanai deudaia vinaulana epulu, beda'a mo pulu kanaua e'ouia 'ana'i puluna be'asi.  
\v 20 Dilava ena luva 'ana'i laloanai 'eva aveke ka'onamo mo emimia, inoku vaka'onamo kauna ena vinaula 'eva asi'i, beia Dilava 'eva ka'onamo.   
\s1 Talavatu Bevada'ata Beda'a  //  Keliso Kevana.  
\p
\v 21 Talavatu 'eva Dilava ena luva 'ana'i bevasi'avanala? Asi'i, asi'i vaika. Talavatu kanaua mauli eveni koanai, komolo 'eva 'ani talavatuai bema-asi.  
\v 22 Beia Puka Kabukabunai ediaka kanobata kanania kauta boutai 'eva si'avana e'alavuta laloanai demimia. Kanaua 'ounai Iesu Keliso enai deabiveni kauta 'eva eta abiveniai luva 'ana'i kanaua beabia.   
\p
\v 23 Abiveni kanania asido'o e'asi laloanai, ita 'eva talavatu e'alavuta vabuto'o kauta boita beda'a mo abiveni bela'asi.  
\v 24 Inoku talavatu 'eva eta ikakao kauna boina bevada'ata Keliso kevana ua'i abiveniai komolo bevenita.  
\v 25 Vali'u abiveni kanaua 'eva 'ani easi, talavatu ena ikakao siavuna kevatai 'eva 'ani eole.   
\s1 Abiveni Bevada'ata  //  Dilava Nakunai Ekao.  
\p
\v 26 Keliso Iesu oi oabivenia 'ounai oi boumuiai 'eva Dilava nakuna.  
\v 27 Keliso ita oi ovaka'onamo vaidi'u kabukabuna oi oabia kaumui boumuiai 'eva Keliso ena mauli tubu'ana vitaitana 'ani oi ovadodoa.  
\v 28 Kanaua 'ounai oi sia ka 'eva edeana, Iuda kauna 'o 'Elene kauna, da'ala abi kauna 'o sia da'ala abi kauna, moluane 'o ateate, 'olana boumuiai 'eva ka'onamo Keliso Iesu laloanai.  
\v 29 Inoku oi Keliso ena koanai, oi vaka Abela'amo ena pulu kaumui, Dilava ena luva'ana'i avuna 'eva 'ani oi boabia.   
\c 4  
\s1 Ita Dilava Nakuna.  
\p
\v 1 Lau aluvala luvana kanania, melo 'eva kamana ena dava boutai be'olavai, beia melo kikina koanai, ia 'eva da'ala abi kauna boina.  
\v 2 Ekiki laloanai, i'imana kauna mai ikakaona kauna eta ikakao venunai emimia beda'a mo kamana evamomo'aia melalana bedaia.  
\v 3 Vitaitana ita vaka melo kikita koanai kanobata ka'ubata edeata edeata da'alata iabitai kao.  
\v 4 Beia melalana umauna edaia koanai, Dilava nakuna esinia, ateate bo'anai epulu maivaka Iuda eta talavatu venunai epulu,  
\v 5 talavatu venunai kauta kataua bevamaulita, inoku beabita Dilava nakuna umaunai beva-aota.   
\p
\v 6 Vali'u nakunai oi oao 'ounai, Dilava 'eva Nakuna Idumena esinia easi nuatai emimia, Idumena kanaua'i ita Dilava ka'aea, “Kama'u.”  
\v 7 Kanaua 'ounai oi 'eva sia da'alabi kaumui, beia Dilava nakuna. Dilava nakuna umaumui 'ounai ena dava boutai eluva 'ana'i vai davata 'eva oi emui.   
\s1 Paulo Nuana Ebavunu  //  Kalatia Kauta Etai.  
\p
\v 8 'Ana'inai Dilava sia oi oikabasia koanai, oi 'eva sia dilava umauta kauta eta da'alabi kaumuiai oi oao.  
\v 9 Beia vali'u Dilava 'ani oi oikabasia, lau kanania amaluva koma, Dilava vaka oi eikabasimui kave'i, dava 'ounai oi bomumue ka'uba edeata edeata badebadeta eta nama'ina asi'i ka'ubata kevatai eta da'alabi kaumuiai oi boao 'udai?  
\v 10 Oi 'eva melala, vuia, vikau ka'onamo mai vikau boutai naduta mo emui melala namatai oi ovaota.  
\v 11 Lau 'eva oi daimuiai nua'u ebavunu, 'olana e'u vinaula boutai kevamuiai 'eva asi'i anita dema-asi'i.   
\p
\v 12 Bo'akala'u kaumui e, lau oi anoimui, lau oi banomuiai 'ani ao makava vitaitanai oi vaka talavatuai ola'asi lau boi'uai oao. Kele'e'uai sia koa ka oi ovavaia si'asia.  
\v 13 Oi oikabasi e'u 'olele 'ounai kevamuiai amia koanai vali nama'ina ailolovaia makava emuiai.  
\v 14 E'u 'olele ena mekauai avabavunumui, beia sia oi oika'uvadai, sia oi ovasi'avana'u, ia oi ovavai'u kave'i, Dilava ena anelu oi oabiadae boina 'o Iesu Keliso oi oabiadae boina.  
\v 15 Kanaua melalanai mailalonamamui oi omia, beia vali'u emui lalonama a eda'aia? Lau aikabasi melala kanaua'i makamui oi bomaoiasi lau oi bomaveni'u boina.  
\v 16 Beia vali'u lau luva umauna a'oumui 'ounai 'ani emui 'ou kau'uai a'ao, una?   
\p
\v 17 Kau kataua eta ula nuamui be'ani, beia eta lalovai mai eta ula 'eva sia dekomolo, eta ula kevamaiai oi boda'atau, oi boula venita.  
\v 18 Kau mediana iula venina dainai, oi boula veni'u melala boutai 'eva mediana, sia kevamuiai amimia melalatai mo.  
\v 19 Naku'u e, oi daimuiai abavunu, melo epupulu ana-anana boina, kanaua anana koma beda'a mo oi Keliso ikaikana vitaitanai oi bo'ao.  
\v 20 Lau nua'u ebavunu 'ounai kevamuiai bamimia lele'u bavaedeanala badulumui, oi daimuiai alalovai lalovai vunu.   
\s1 Luva Ivavitaitana  //  Akala Mai Sala Banota.  
\p
\v 21 Oi dai oi o'ula talavatu venunai oi bomimia kaumui o'ou'u. Oi talavatu dava ekoma 'eva oi oikabasi, una?  
\v 22 Puka Kabukabuna kanania elelea koma, Abela'amo nakuna 'eva lua, ka 'eva adana da'alabi ateatena kanaua kevanai evapulua, ka 'eva ia adana umauna kevanai evapulua.  
\v 23 Ia adana da'alabi ateatena nakuna 'eva kapulu vitaitanai epulu, beia adana umauna nakuna 'eva Dilava ena luva 'ana'i melona.  
\v 24 Sisiba kanania 'eva luva ivavitaitana boina. 'A'ate lua 'eva luva 'ana'i namata lua. Ka 'eva Sinai lolonai easi da'alabi kauta evapuluta, ia 'eva Akala.  
\v 25 Akala, e'oua 'eva Sinai lolona Alabia laloanai, ia 'eva vali'u melala kanania Ielusalema vanuana boina ia mai nakuna ita boutai talavatu da'alana iabina kautai de'ao.  
\v 26 Beia Ielusalema vutuvutuai davana kanaua 'eva da'ala sia e'abi ateatena Sala, ia 'eva ita sinata.  
\v 27 Puka Kabukabunai 'ani ilelena,  
\q1 “'Opa'opa ateatemu e,  
\q1 bolalonama!  
\q1 Mauli ananana sia onovaia ateatemu,  
\q1 bolalave bovaoi mailalonamamu.  
\q1 'Olana ateate 'avaeana nakuna  
\q1 'eva bedouta,  
\q1 ia ateate kanaua maiadana ateatena nakuna sia bedouta.”   
\qr Isa 54.1  
\p
\v 28 Bo'akala'u e, vali'u oi 'eva Isako boina Dilava nakuna, ia ena luva 'ana'i vitaitanai.  
\v 29 Melala kanaua'i kapulu vitaitanai epulu melona eta'u melo Idume Kabukabuna siavunai epulu melona kanaua evaiviivia, vali'u vaka kanaua mo boina.  
\v 30 Beia Puka Kabukabuna a eleleia koma? Kanania eluva koma, “Da'alabi ateatena nakuna ita lo'ota asi, 'olana eadavala umauna ateatena nakuna ena dava 'eva da'alabi ateatena nakuna ita sia bekole ka'ona.”  
\v 31 Kanaua 'ounai bo'akala'u e, ita 'eva sia da'ala abi ateatena nakuna, ia ita 'eva da'ala sia e'abi ateatena nakuna.   
\c 5  
\s1 Keliso Eluvuta Ovo.  
\p
\v 1 Keliso eta'u ita 'ani eluvuta talavatu laloanai sia ekamia. Kanaua 'ounai olava 'ini, asi'i demaliomui 'udai talavatu ena da'alabi kaumuiai asi'i oi oma-ao makauna.   
\p
\v 2 Kaiamui ovala, lau Paulo oi a'oumui, iva oi bomabia koanai Keliso ena vinaula 'eva anina asi'i kevamuiai.  
\v 3 Mai aluva pasisi venimui 'udai adiaka, iva beabia kauna talavatu boutai be'imata kave'i 'eva benama'ina.  
\v 4 Oi talavatuai komolo oi okavua kaumui 'eva Keliso enai sibomui otaumui uku, Dilava ena iulaveniai 'eva 'ani oi otabu.  
\v 5 Beia ita 'eva eta abiveniai mai Idume Kabukabuna siavunai kanuabata Dilava komolo bevenita.  
\v 6 Ita Iesu Keliso laloanai ekaka'onamo koanai, iva 'o sia iva ena edea 'eva asi'i, ia dava namana 'eva abiveni, mai lalo'auai ela'asi.   
\p
\v 7 Oi 'ana'inai 'eva abiveniai oi oda'a kave'i, beia dai e'alavumui luva umauna iabi daenai?  
\v 8 Nua-ani luvata kataua 'eva e'aemui Dilavana kevanai sia deasi.  
\v 9 Oi bolalovaia, “Vakubu mulamulana kikina etata'u palaoa itoinai evakubua.”  
\v 10 Lau 'eva Lovia namana avamomo'aia bedulumui oi lalovai edeana sia ka oi boabia. Lalo to'ato'a evenimui kauna kau a boina beia Dilava betata'u tavana bevenia.   
\p
\v 11 Bo'akala'u e, iva ailolo vaia koanai dava 'ounai devaiviivi'u? Kanaua bemamomo'ai koanai Keliso ena au ido'o valaukuna bailolo vaia 'eva adeduana asi'i.  
\v 12 Lau a'ula iva devabavunuta kauta kataua 'eva sibota beda'atau bemada'a adedua davana kanaua bemaukuaovo.   
\p
\v 13 Bo'akala'u e, Dilava e'aemui 'eva beluvumui. Eluvumui kaumui 'eva kauani vinaulata si'avata vaika sia oi bovavai, beia lalo'auai ka ka sibomui oi bovidulu viveni.  
\v 14 Talavatu boutai 'ani evaka'onamota luva kanania'i, “Kevamuai kauna bolalo'au venia oni sibomu olalo'au venimu vitaitana.”  
\v 15 Oi bo'imamui kave'i sibomui emui vinai mai emui viaku 'avaea viaku 'avaeai asi'i sibomui oi omavaolemui makauna.   
\s1 Idume Kabukabuna Vuavuana  //  Mai Kauani Ena Koakoa.  
\p
\v 16 Kanaua 'ounai adiaka, Idume Kabukabuna emui mauli be'ana'ia vaia koanai kauani ena ula vinaulata si'avata vaika sia 'ani oi bovavai.  
\v 17 'Olana kauani ena ula vinaulata 'eva Idume Kabukabuna ekaokai, Idume Kabukabuna ena ula vinaulata vaka kauani ekaokai, ia laluana 'eva 'ou kautai de'ao, kanaua 'ounai oi oulaveni davata oi bomavavai 'eva sia oi ovavai.  
\v 18 Idume Kabukabuna oi be'ana'ia vaimui koanai, oi 'eva talavatu venunai sia oi bomimia.   
\p
\v 19 Kauani ena koa 'eva makanai mo. Davata katania, kulakula, lalovai 'obuta, mo'a,  
\v 20 dilava dedeta ikukudivo venita, mena, vaivivi, viaku, mama, badu, idono, vibodala, vaikabasi dedeta,  
\v 21 lalovai si'avata, inuba, vavai 'avaea, mai koa vaida kataua boita boutai. 'Ana'inai 'ani aluva pasisi venimui, vali'u mune'e a'oumui pasisi 'udai, vinaula kataua boita devavai kauta 'eva Dilava ena lovia vanuana sia bedavalia.   
\p
\v 22 Beia Idume Kabukabuna eta mauli be'ana'ia vaia vuavuana 'eva lalo'au, lalonama, nua'elu, vapasisi, vilalo, vavai kave'i, abiveni dokadoka,  
\v 23 manau mai nua pasisi. Katania boutai 'eva talavatu sia evaiviivita.  
\v 24 Keliso Iesu ena kau 'eva kauanita mai eta koa si'avata vaika mai eta ula si'avata vaika 'ani ikokota'au au ido'o valaukuna akanai.   
\p
\v 25 Idume Kabukabuna mauli 'ani evenita 'ounai, ia eta mauli ema'an'ia vaia.  
\v 26 Ita sia eka-apa, banota sia ekavabaduta 'o sia ekamama venita.   
\c 6  
\s1 Oi Bovidulu Viveni.  
\p
\v 1 Bo'akala'u e, kau ka va'eva laloanai edodo koanai, nuamuiai Idume Kabukabuna evinuala kaumui ka botata'u nuamu medianai bovakomoloa. Beia oni vaka sibomu bo'imamu kave'i, vikovoai asi'i omadodo 'ounai.  
\v 2 Emui mekau oi bovua vai'ade, dala kanania'i 'eva Keliso ena talavatu oi boabia 'isi.  
\v 3 Dava asi'i kauna elalovaia ia 'eva kau namana ka koanai, ia sibona elebala.  
\v 4 Ka ka sibomui emui vinaula oi bovakovota, dava ovavaia kave'i davana 'eva sibomu boapavaimu, ia sia boabia boda'a kau vailatai.  
\v 5 Kau boutai sibota eta mekau bevuvua.   
\p
\v 6 Dilava ena luva emalelevaia kauna 'eva ena dava nama'ita boutai ena vaikabasi kauna ita bekoleta.   
\p
\v 7 Sibomui sia oi boakulea, sia kau ka Dilava bevabo'oa. Kau kea evadoa vitaitanai mo anina beabia.  
\v 8 Inoku kauani ena ulai evadovado kauna 'eva kauani kevanai ba bedavalia, beia Idume Kabukabuna enai evadovado kauna 'eva Idume Kabukabuna kevanai mauli keinikeini bedavalia.  
\v 9 Vinaula nama'ina ivavainai sia ekakau ba'oa, ita sia ekabadebade koanai, 'ua'ua melalana be'asi laloanai vuavua nama'ina ekabia.  
\v 10 Kanaua 'ounai nama'ina kadavali melalatai kau boutai kevatai nama'ina ekavavai, beia abiveni kauta kevatai 'eva nama'ina ekavavai kave'i.   
\s1 Vanama'ina Luvana To'ona  //  Mai Meamea.  
\p
\v 11 Lelelele namata katania oi boikata lau ima'uai aleleta devavasi kele'emui.  
\v 12 Kau de'ula vata namata be'ao kauta kataua deva-asiasimui iva oi boabia, 'olana umauna 'eva Keliso ena au ido'o valaukuna dainai kau asi'i demavaiivivita.  
\v 13 'Ani deivata kauta kataua mo, talavatu dainai sia dedadai, ia oi deula venimui iva oi boabia, inoku kauanimui dainai oi bo'apa.  
\v 14 Lau dava ka sia bapavaia 'avaea, ia eta Lovia namana Iesu Keliso ena au ido'o valaukuna sibona mo bapavaia, Keliso dainai kanobata eba lau e'uai, lau vaka 'ani aba kanobata enai.  
\v 15 Iva 'o sia iva luana anita asi'i, beia dava namana 'eva mauli makamakana.  
\v 16 Dilava ena nua'elu mai vilalo 'eva lalovai kanania deabia dae kauta boutai kevatai, maivaka Dilava ena kau kataua idumeai Isalaela kautai deao kauta etai.   
\p
\v 17 E'u luva to'onai sia kau ka nua'u beva ana-anala, 'olana lau kau'uai loi demimia loita devala'asita lau Iesu ena da'alabi kau'u.   
\p
\v 18 Bo'akala'u boumuiai e, ameamea eta Lovia namana Iesu Keliso ena iulaveni koana akamuiai bemimia. Amen.