\id 2PE  
\h 2 Petelo 
\toc3 2Pt 
\toc2 2Pt 
\toc1 2 PETELO 
\mt3 Malele Ivaluana  
\mt1 PETELO (2)  
\mt3 Eleleia Kauna  
\is1 Puka Laloana Ilelena Luvana  
\ip Malele kanania deleleia 'olana 'eva abiveni kauta be'outa ia 'eva vaikabasi kauta dedeta vaida lovata sia be'aku kovo. Ia kauta 'eva 'ani kau ita devaka'onamo eta abiveni mai eta mia maulina mediana bevavaia si'asi'a. Puka kanania etata'u kau e'outa luva kataua makavanai veauneke kauta devenita davata beabi 'inita, 'olana luva kataua'i ia Dilava mai Lovia namana Iesu Keliso beikabasita kave'i. Veauneke kauta 'eva makatai Iesu deikaia mai kaiatai ena vaikabasi 'uluta deika. Kau vaida dediaka Iesu 'eva sia bemumue be'asi 'ounai, puka kanania ediaka Iesu 'eva bemumue beasi dokadoka, beiamo vali'u komolonai sia be'asi, kanaua anina 'eva nia. Dilava 'eva eula kau boutai belalo'udai, kanaua 'ounai ia 'eva evi'ima maikula'ilana (3.9).  
\is1 Puka Iduvuna Namata  
\io1 a. Lova aku. (1.1 - 2)  
\io1 b. Dilava ena 'ae'ae. (1.3 - 21)  
\io1 c. Vaikabasi kauta dedeta. (2.1 - 22)  
\io1 d. Lovia namana ena asi 'udai. (3.1 - 18)  
\c 1  
\s1 Vanama'ina Luvana.  
\p
\v 1 Lau, Simona Petelo, Iesu Keliso ena da'alabi mai veauneke kau'u, e'u malele alelea evavasi eta Dilava mai ivamaulita kauna Iesu Keliso eta komolo dainai abiveni nama'ina umauna oi oabia vitaitana lai banomai kaumui kele'emui.  
\v 2 Ameamea emui aoneka Dilava mai eta Lovia namana Iesu kevatai namana be'ao, inoku iulaveni koana mai nua'elu emuiai 'eva namana be'ao.   
\s1 Dilava Ena 'Ae'ae  //  Mai Ena Abidae.  
\p
\v 3 Keliso 'eva Dilava ena siavuai dava boutai ekaula venita davata evenita inoku kataua'i ita mauli umauna laloanai ekamia mai Dilava ikukudivo veninai ekamia, kanaua 'eva ita e'aeta ena nama'ina mai nuavi evenita Dilavana kaikabasia 'ounai.  
\v 4 Dala kanania'i ia eta'u veniveni namata mai nama'ita vaika eluva 'ana'i vaita davata evenita, inoku veniveni katania betata'u kanobata ena lalovai si'avata vaika bevasi'avanata davata etai beabi tau inoku ita ekasi Dilava ikaikanai ekao ia ita ekamia ka'ona.   
\p
\v 5 Veniveni katania daitai oi bokula'ila, emui abiveni akanai koakoa nama'ina oi bone'ea 'au, mai emui koakoa nama'ina akanai ikabasi oi bone'ea 'au,  
\v 6 emui ikabasi akanai vakula'ila oi bone'ea 'au, emui vakula'ila akanai vapasisi oi bone'ea 'au, emui vapasisi akanai Dilava 'olana iakuna vinaulana oi bone'ea 'au,  
\v 7 emui vinaula Dilava 'olana iakuna akanai bo'a ka'onamo koakoana oi bone'ea 'au, emui bo'a ka'onamo koakoana akanai lalo'au oi bone'ea 'au.   
\p
\v 8 Koakoa nama'ita katania oi bovavaita kula'ila emuiai be'ao koanai, emui ikabasi eta Lovia namana Iesu Keliso enai 'eva bekula'ila mai bemomo'aia.  
\v 9 Ia kau ka katania sia bevavai koanai ia 'eva makana de'ede, sia eikaika mai ena si'avana 'ana'ita Dilava e'outa kao si'avanata 'eva 'ani ebolabolata.  
\v 10 Kanaua 'ounai bo'akala'u e, Dilava e'aemui mai edilamui ena kauai oi oao 'eva oi bokula'ila mai oi bovamomo'aia. Inoku kanaua oi bovavaia koanai sia oi bo'eko.  
\v 11 Dala kanania'i oi 'eva komolo itoina bevenimui eta Lovia namana mai vamauli kauna Iesu Keliso ena lovia vanuana emia keinikeini vanuana laloanai oi boda'a dodo.   
\p
\v 12 Kanaua 'ounai oi Dilava ena luva umauna 'ani oi oikabasia kave'i mai oi oabia luvana akanai 'ani oi olava 'ini, beia melala boutai 'eva dava katania boutai bavalalovaimui une.  
\v 13 Lau mauli'uai amimia do'o laloanai alalovaia dava katania nuamuiai bavalalovaimui une 'eva ekomolo.  
\v 14 'Olana eta Lovia namana Iesu Keliso e'ou'u vitaitanai aikabasi kave'i kauani'u kanania 'eva 'ani bavikania 'ounai.  
\v 15 Bavakovo bakula'ila inoku emui dala ka bavavaia inoku e'u ba mulinai 'eva dava katania boutai oi bolalovai 'inita.   
\s1 Keliso Ena Nuavi Makamaiai  //  Laiaikaia Kaumai.  
\p
\v 16 Eta Lovia namana Iesu Keliso ena siavu mai ena asi kanobatai luvata lai avaikabasimui laloanai 'eva kanobata ena idiba sisibana sia ka lai akaoia, beia lai 'eva makamai umaunai ena siavu lai aikaia.  
\v 17 Iesu 'ola aku koana mai nuavi Kamana Dilava kevanai eabia laloanai lele ka 'ailala nuavina umauna laloanai e'ovu easi ediaka, “Kanania 'eva lau Naku'u, e'u lalo'au kauna, alalonama venia vaika.”  
\v 18 Ua'i lolo kabukabunai Iesu ita lai amia koanai lai sibomai umaumai lele kanania vutuvutuai easi 'uluna lai aika.  
\v 19 Kanaua 'ounai enolea kauta luva deluvaia luvana lai avamomo'aia. Oi vaka eta luva daitai oi bodadai 'eva benama'ina itani lamepa 'ailalana vabuto'o laloanai e'ani boina, beda'amo vutuvutu be'ailala inoku 'avu'ani visiuna nuamuiai be'ailala.   
\p
\v 20 Dava boutai akatai kanania 'eva oi bolalovai 'inia, Puka kabukabuna luvata 'eva sia enolea kauna ka sibona ena lalovai luvata eluvavai.  
\v 21 'Olana enolea luvana 'eva sia kau ka ena ulai easi, ia kau kataua Idume Kabukabuna ena siavu laloanai demimia kauta deta'u Dilava lalovai evenita lalovaita luvata deluvavai.   
\c 2  
\s1 Enolea Dedeta Eta  //  Koakoa Si'avata Vaika.  
\p
\v 1 'Ana'inai Isalaela kauta viloatai enolea kauta dedeta vaida demia vitaitana vaikabasi kauta dedeta vaida viloamuiai bevaila. Eta vaikabasi dedeta kataua'i emui abiveni bevasi'avanata davatai bevaikabasi, Lovia namana lalanai etavata kauna de'ouia avuavu, inoku ia sibota ivaoleta vinaulana devavaia molaumolau.  
\v 2 Kau doutamo ia daitai bedadai kulakula koata bevavai, inoku koakoa kataua 'outai kau 'eva Dilava ena luva umauna enai beluva si'asi'a.  
\v 3 Vaikabasi kauta eta idono 'ounai dede sisibatai nuamui be'ani, beia eta lavuai 'eva 'ani siako vaika e'olu emimia maivaka ivaoleta kauna 'eva eibi evi'ima.   
\p
\v 4 'Olana Dilava anelu deva'eva kauta sia eikata vadai, ia 'alova eani keinikeini 'abuna laloanai eitota dodo, ua'i 'uli vabulana laloanai demimia lavuai melalana de'imala.  
\v 5 Dilava ulu 'ana'ina sia eikaia vadai, ia abaka evala'asia Dilava 'olana sia deaku kauta evaoleta. Ia Noa komolo eilolo vaia kauna mai banona kalakoi ka ita evamaulita.  
\v 6 Dilava eta'u Sodoma mai Gomola vanuata si'avata vaika mekau evakoata inoku 'alovai etouta avu deda'amo lavuai deao, vitaitanamo vaka Dilava 'olana sia de'aku kauta kevatai bepupulu.  
\v 7 Dilava eta'u komolo kauna Lota evamaulia, ia 'eva kau kataua talavatu deukuta kauta eta koakoa si'avatai nuana ebavunu.  
\v 8 ('Olana komolo kauna Lota 'eva ua'i ia viloatai emia mala mala eta si'avana eika mai 'uluta eika, inoku koakoa kataua deta'u ia nuana devabavunua.)  
\v 9 Kanaua 'ounai Lovia namana 'eva ia 'olana de'aku kauta vikovo laloatai a bevamaulita koma 'eva eikabasi mai si'avana kauta mekau bekoala 'abunai a bevamiata koma vaka eikabasia beda'amo lavuai melalanai.  
\v 10 Kataua akatai 'eva kauani ena lalovai vinaulata si'avata vaika deda'avaita ia Dilava ena siavu 'olana sia de'aku kauta 'eva mekau namana umauna bekoala.  
\p Vaikabasi kauta dedeta katania 'eva nuata deto'oto'o vaika mai de'apa, eta 'ola aku asi'i mai luva si'avata nuavi kauta vutuvutuai demimia kataua de'outa.  
\v 11 Anelu kataua eta kula'ila mai eta siavu 'eva nama vaikata vakaia vaikabasi kauta dedeta katania, beia ia kauta 'eva Lovia namana vailanai vaikabasi dedeta ivasi'avanata luvata sia deluvaia.   
\p
\v 12 Ia kau katania 'eva dava ovota sia de'ovo kauta luva si'avata deluva mamakau, vitaitana sisi kataua eta lalovai asi'i eta ulai mo demimia sisita boita kau ia beabita beaku bata 'ounai depulu, ia vaka be'ole itani 'asi boita.  
\v 13 Eta si'avana devavai si'avanata tavata vitaitata be'abi. Ia umauta laniai kauani ena koakoa si'avata vaika ivavaitai 'eva delalonama, mai ita oi boaniani ka'ona laloanai vaka bevamalalaimui mai vamui bevavai si'asi'a.  
\v 14 Makata 'eva kulakulamo dekakavu mai si'avana ivavaitai sia debavunu, 'a'ate nuata sia dekula'ila 'a'ateta devuata deda'a si'avana 'abunai, nuata deidono vaika mai ia 'eva Dilava ena sivada laloanai.  
\v 15 Vaikabasi kauta dedeta katania 'eva dala komolona 'ani debolabolala mai dealu 'avaea alu 'avaea Beola nakuna enolea kauna Bala'ama mulinai dedada'a, ia 'eva vinaula si'avana tavana monia beabia davana elalo'au venia vaika.  
\v 16 Ena si'avana dainai sibona ena doniki lele sia eikabasi donikina eta'u kau leletai ia e'ovenia, inoku enolea kauna nuana e'ailala ena bo'o kanaua eda'a vaia davana evapuala.   
\p
\v 17 Kau katania 'eva itani vei debubudi 'abuta delada boita eta luva anita asi'i 'o valea kula'ilana boina oli evivua to'ato'a lamu sia evuala e'asi, inoku Dilava 'abu evabula vaika 'abuna 'ani eva'olua ia eta.  
\v 18 Eta apa mai bo'o luvata deluluva maivaka kulakula koakoata si'avata vaika devavai mai kau kataua vali'u mo va'eva 'abutai ia viloatai dela'asi kauta bevuata bemumue.  
\v 19 Ia deluva'ana'i kau 'eva si'avana da'alana sia be'abi, beia ia sibota 'eva si'avana devavaia si'avanana da'alana iabina kautai de'ao, 'olana dava ka kau ena mauli e'ola vaia koanai ia 'eva kanaua da'alana iabina kaunai e'ao.  
\v 20 Kau kanobata maulina 'obunai dela'asi deasi eta Lovia namana mai Vamauli kauna Iesu Keliso deikabasi mune'e demumue kanobata ena si'avana laloanai inoku e'ola vaita koanai, kau kataua 'eva kevatai besi'avana vaika vakaia 'ana'inai mauli demia vaia davana.  
\v 21 Kau kataua boita 'eva dala komolona sia bemaikabasia 'eva bemanama'ina, ia deikabasia inoku talavatu kabukabuna devenita talavatuna enai deda'aovo 'eva sia enama'ina.  
\v 22 Aoneka luvana ia etai davana 'eva emomo'ai, “'Oveka emumue sibona e'ula 'ulana e'ani, mai boloma eidi'u kave'i vaika beia mune'e emumue edada'a 'ika'ikai eto'ato'a.”   
\c 3  
\s1 Lovia Namana Ena Asi  //  Luva'ana'ina.  
\p
\v 1 E'u kau ma'adi e, vali'u kanania 'eva e'u malele ivaluana alelea evavasi kele'emui, malele lava'ana'ina mai kanania aleleta 'eva dava katania avalalovaimui une inoku emui lalovai lalovai bekomolo kave'i.  
\v 2 E'u ula 'eva luva 'ani siako vaika enolea kauta kabukabuta deluvavai luvata mai talavatu luvata kataua eta Lovia namana mai Vamauli kauna ena veauneke kauta deta'u deveni luvata oi bolalovai 'ini.   
\p
\v 3 Lava'ana'ina oi boikabasi kave'i inoku melala to'ota laloatai vabo'obo'o kauta vaida bela'asi, ia eta mauli 'eva sibota kauanita ena ula e'ana'ia vaita kauta, oi bevabo'omui,  
\v 4 kanania beluva koma, “Iesu eluva 'ana'i be'asi, una? Inoku ia a'i? 'Ava'avata 'ani deba palu, beia dava boutai 'eva 'abutai mo kanobata epulu koanai easi mo vali'u.”  
\v 5 Beia eta luva 'eva sia dekomolo luva umauna 'eva sia delalovai 'inia, 'ana'inai Dilava ena luvai vutuvutu mai kanobata depulu, inoku kanobata 'eva atubata laloanai ele'au epulu mai 'atu eta'u kanobata ekaiua.  
\v 6 Mune'e vei eta'u kanobata 'ana'ina abakai evaolea.  
\v 7 Dilava ena luva ka'onamo kanaua vali'u vutuvutuai mai kanobatai demimia davata eabi 'inita 'alovai bevaoleta, beia beda'amo Dilava 'olana sia de'aku kauta eta lavuai mai eta ole melalanai.   
\p
\v 8 E'u kau ma'adi e, dava ka'onamo kanania 'eva sia oi bobolabolala, Lovia namana vailanai melala ka'onamo 'eva itani vikau da ka'onamo (1,000) mai vikau da ka'onamo 'eva itani melala ka'onamo.  
\v 9 Lovia namana 'eva sia emaka'i ena luva'ana'i vinaulata ivavaitai, sia vaida delalovaia boina, ia 'eva oi evakula'ilamui 'olana sia e'ula kau ka betaule, ia e'ula kau boutai eta si'avanai belalo 'udai.   
\p
\v 10 Beia Lovia namana ena melala be'asi 'eva itani vinao kauna boina, melala kanaua'i 'eva 'ulu nama vaikana bevuvua laloanai vutuvutu betaule, vutuvutu laloana davata boutai 'alovai be'ani, mai kanobata mai akanai davata boutai betaule.  
\v 11 Dava boutai 'eva kanaua beole koma koanai, oi 'eva kau a boimuiai oi bo'ao? Emui mauli 'eva bekabukabu mai Dilava 'olana iakuna maulinai oi bomimia.  
\v 12 Dilava ena asi melalana oi o'imala laloanai oi bovinaula kula'ila melala kanaua ena asi bemolau. Melala kanaua'i 'eva vutuvutu beani palu mai vutuvutu davata 'alova siavunai beveve palu.  
\v 13 Beia ita 'eva Dilava eluva'ana'i vaia luva'ana'ina ka'imala, ua 'eva vutuvutu mai kanobata makamakana vinaula komolo kauta mo bemia vaia 'abuna.   
\p
\v 14 Kanaua 'ounai, e'u kau ma'adi e, melala kanaua oi o'imala laloanai oi bovinaula kula'ila, si'avana sia oi bovavai mai sia oi bova'eva Dilava vailanai maivaka mainua'elumui ia ita oi bomimia.  
\v 15 Oi bolalovai 'inia eta Lovia namana ena vakula'ilai 'eva ita bevamaulita. Bo'akalata eta lalo'au kauna Paulo aoneka Dilava evenia aonekana kanaua'i luva vitaitanai mo elele venimui.  
\v 16 Ena malele boutai laloatai dava katania lovata e'aku, davata vaida 'eva depasisi mai ovota sia ekaovo, inoku kau eta ikabasi dekiki kauta mai nuata sia depasisi kauta detata'u luva anina deluvala va'eva vitaitana Puka kabukabuna luvana vaidai devavaia boina. Kanaua devavaia 'eva ia sibota bevaoleta.   
\p
\v 17 Kanaua 'ounai, bo'akala'u ma'adi e, kanania 'eva oi oikabasia 'ounai oi bo'imamui kave'i, asi'i talavatu deukua kauta eta va'evai oi omalava 'au, inoku oi oma'eko 'ounai.  
\v 18 Beia eta Lovia namana mai ivamaulita kauna Iesu Keliso ena iulaveni koana mai ia ikabasinai oi bokukubu. Ameamea nuavi 'eva ia enai vali'u beda'a mo to'ona asi'i. Amen.