\id 1TI  
\h 1 Timoteo 
\toc3 1Tm 
\toc2 1Tm 
\toc1 1 TIMOTEO 
\mt3 Paulo Ena Malele Lava'ana'ina  
\mt1 TIMOTEO (1)  
\mt3 Kevanai  
\is1 Puka Laloana Ilelena Luvana  
\ip Timoteo 'eva abiveni kauna 'alu'aluna ka, ia 'eva Paulo vali nama'ina eilolo vaia laloanai ebanoia deda'a to'ato'a kauna (Veauneke 16.1-3). Kanaua mulinai, Timoteo 'eva Dilava ena lo'e kauta Epesoai kauta i'ana'iavaita kaunai eao, inoku Paulo puka kanania eleleia eda'a kevana.  
\ip Dava lava'ana'ina lovana eakuia davana kanania. Timoteo 'eva be'imala kave'i, kau kataua vaida betata'u dedeai kau eta abiveni asi'i demava'ekota makauna. Kau katania delalovaia kanobata kanania davana boutai 'eva desi'avana. Kanaua 'ounai kau ka e'ula bemia kave'i koanai, ia 'eva iani vaida sia be'ani mai ia 'eva sia bekamoane. Kanaua ia bevakomoloa. Ivaluana 'eva abiveni kauta i'imata dalana nama'ina mai ia eta vinaula, kau ika'inita vinaulana bevavaia kauna mai ena koakoa aboita 'eva lovata eaku. Luva to'ona 'eva Timoteo 'eva bemia kave'i itani Iesu Keliso ena vinaula kauna nama'ina umauna. Inoku abiveni kauta edeata edeata kevatai vaka kanaua bevinaula koma.  
\is1 Puka Iduvuna Namata  
\io1 a. Lova aku. (1.1 - 2)  
\io1 b. Vaikabasi luvata Dilava ena lo'e mai vinaula kauta eta. (1.3 — 3.16)  
\io1 c. Vaikabasi luvata Timoteo mai ena vinaula etai. (4.1 — 6.21)  
\c 1  
\s1 Vanama'ina Luvana.  
\p
\v 1 Lau, Paulo, Dilava ita ivamaulita Dilavana mai Keliso Iesu ita kanuabata venia kauna eta luvai 'eva Keliso Iesu ena veauneke kau'uai ao,   
\p
\v 2 Timoteo alele venimu, oni 'eva lau naku'u umaumu Iesu iabivenina laloanai. Ameamea Kamata Dilava mai Keliso Iesu eta Lovia namana eta iulaveni koana, vilalo mai nua'elu akamuai bemimia.   
\s1 Vaikabasi Kauta Dedeta Kevatai  //  Be'imata Kave'i.  
\p
\v 3 Lau ada'a Makedonia kanona koanai, avasiasimu vitaitanai oni 'eva na'i Epeso vanuanai bomimia inoku kau vaida na'i bo'outa pasisi vaikabasi dedeta sia bevavai 'udai,  
\v 4 maivaka sibota kauanita sia beveveni kanobata dilavata sisibata mai kubudoli luvaluvata sia maieta ole davata kataua etai. Katania 'eva viala namata bevapuluta beia Dilava ena lalovai abiveniai evala'asi deikaia abivenina kanaua vinaulana ikabasinai sia devidulu.  
\v 5 E'u vasiasi luvana kanania 'olana umauna 'eva lalo'auai bemimia, kanaua 'eva nuata komolona medianai emakavala lalovai komolonai maivaka abiveni umaunai easi.  
\v 6 Ia kau vaida 'eva koakoa katania kevatai deda'a tau deda'a luva anita asi'i luvata deluvavai.  
\v 7 Deula Dilava ena talavatu ivaikabasi vaina kautai be'ao, beia dava lovana deakua 'o nuatai dava deluva vaia kula'ilana 'eva ovona sia deovo.   
\p
\v 8 Ita 'ani kaikabasi kau ka talavatu kanaua beda'avaia kave'i koanai talavatu 'eva dava nama'ina.  
\v 9 Maivaka 'ani kaikabasi talavatu kanaua 'eva komolo kauta daitai sia epulu ia talavatu 'eva talavatu deukua kauta daitai epulu, sia deda'a vaia kauta kataua mai Dilava 'olana sia de'aku kauta mai si'avana kauta, sia dekabukabu kauta mai Dilava vana devasi'avanala kauta, kamata 'o sinata deaku bata kauta kataua mai akuaku kauta,  
\v 10 kulakula kauta, mai kau sibona banona ekulala mai ateate sibona banona ekulala kauta, da'alabi kauta detavatava vaita kauta, mai dede kauta, mai lavuai laloanai de'ou avuavu kauta, maivaka dava edeata edeata kataua vaikabasi umauna dainai sia dedadai davata.  
\v 11 Vaikabasi umauna kanaua 'eva vanama'ina Dilavana valina nama'ina nuavina enai easi, vali nama'ina kanaua lau e'u ima'ima laloanai ene'eia divo vinaulana bavavaia.   
\s1 Paulo Vanama'ina Luvana  //  Keliso Evenia.  
\p
\v 12 Keliso Iesu ita eta Lovia namana vanama'ina luvana avenia, inoku ia 'eva lau kula'ila eveni'u 'olana ia lele ika kau'uai evao'u ena vinaula laloanai.  
\v 13 Beia 'ana'inai 'eva Keliso vana i'ouna avavaia si'asi'a mai avaiviivia, mai aivala si'asi'a kevanai melalanai, beia Dilava ena vilalo koana lau keva'uai 'olana e'u abiveni asi'i mai dava avavaia 'eva sia aikabasia.  
\v 14 Eta Lovia namana ena iulaveni koana keva'uai evanamala vaika, mai abiveni mai lalo'au Keliso Iesu enai ita eta kataua melala ka'onamoai eveni'u.   
\p
\v 15 Kanania 'eva luva umauna nuata umautai eka abiadae mai ekabiveni. Keliso Iesu easi kanobatai 'eva si'avana kauta bevamaulita, viloatai lau 'eva asi'avana vaika.  
\v 16 Beia Dilava ena vilalo koana lau 'eu ai, 'olana lau asi'avana vaika, inoku Keliso Iesu ena vapasisi kula'ilana kanaua sia bepupua vapasisina lau keva'uai bevala'asia, inoku vaida ikaika kanania beikala 'eva Keliso beabivenia mauli keinikeini bedavalia.  
\v 17 Lovia 'olana emauli keinikeini, sia betoto'o, mai sia kaikala kauna, Dilava mo kanaua sibona 'olana ekaku mai enai nuavi bemimia beda'amo to'ona asi'i. Amen.   
\s1 Paulo Timoteo Eva Asiasia  //  Bekula'ila.  
\p
\v 18 Timoteo, naku'u e, luva avenimu luvana kanania boda'avaia, kanaua 'eva 'ana'inai enolea luvana iluvanai oni lovamu deakuia, inoku enolea luvata kataua vitaitata boda'avaita koanai oni 'ani kuali nama'ina bovavaia.  
\v 19 Emu abiveni mai nuamu komolona nama'ina boabi 'ini kave'i. Vaida nuata komolota katania devasi'avanata 'eva eta abiveni devaukuta.  
\v 20 Ia viloatai 'eva Humenaio mai Alesanada, laluana 'eva 'ani Satani imanai avikanita ia ena siavu venunai bemimia, kanaua betata'u bevaikabasita eta luva si'asi'a Dilava enai luvata bevapuata.   
\c 2  
\s1 Kau Boutai Daitai  //  Ekameamea.  
\p
\v 1 E'u vasiasi lava'ana'ina 'eva kanania, kau boutai daitai Dilava bonoia beduluta mai bevanama'inata, ia daitai emu meamea ai Dilava enai vanama'ina luvana boluvala.  
\v 2 Mai lovia 'olana kauta mai siavu kauta boutai daitai vaka bomeamea, inoku ita mai ia 'eva mainua'eluta mauli nama'ina laloanai ekamia Dilava 'olana iakuna mai kabukabu maulina bounai dalanai.  
\v 3 Meamea kanania boina 'eva enama'ina inoku Dilava ivamaulita kauna nuana ivanama'inana koana.  
\v 4 Dilava e'ula kau boutai mauli beabia mai be'asi Dilava ena luva umauna beikabasia.  
\v 5 Inoku Dilava 'eva ka'onamo mai Dilava mai kau viloata ivaka'onamota kauna vaka ka'onamo Keliso Iesu, ia 'eva kau umauna,  
\v 6 ia sibona kauanina eveni kau boutai etavata beluvuta. Dilava 'eva ena ula evamomo'aia melalana umaunai evala'asia.  
\v 7 Kanaua 'ounai lau edila'u ilolo mai veauneke kau'uai a'ao Keliso valina baluvala, pulu edea kauta ivamaleleta kau'uai a'ao Dilava ena luva umauna mai abiveni bavaikabasita. (Luva umauna aluvala sia adedede.)   
\p
\v 8 Kanaua 'ounai, a'ula 'abu boutai ai kau sia bebabadu 'o sibota sia bevi'oudoli, ia eta mauli bekomolo laloanai imata kabukabuta beabi isi bemeamea.   
\s1 'A'ate Eta Koakoa  //  Nama'ita Bevavai.  
\p
\v 9 Maivaka lau a'ula, 'a'ate eta tubu'a vadodoai 'eva 'ani devavaita kave'i, ia vuita sia bevaedeanata, 'o dava 'amale'amaleta kataua kolo 'o kutukutuai devavaita davatai sia bevavanamata, tubu'a tavata namata sia bevadodo.  
\v 10 Ia eta koakoa nama'ita bevavai koakoata betata'u bevamomo'aita ia 'eva Dilava dekukudivo venia 'a'ateta.  
\v 11 Ateate 'eva ena manauai mai ena leleika itoinai ikabasi beabia.  
\v 12 Lau a'oukao, 'a'ate 'eva kau sia bevamaleleta 'o sia be'ola vaita, ia 'eva bemimia 'ulu'uluta asi'i.  
\v 13 'Olana Dilava eta'u Adamu evavai makava inoku muliai 'Eva evavaia.  
\v 14 Inoku Satani 'eva Adamu sia elebaia ia ateate elebaia, inoku si'avana ua'i ia kevanai emakavala.  
\v 15 Beia 'a'ate eta manau laloatai abiveni, lalo'au, mai kabukabu maulitai bemia basibasi koanai, nakuta bevapuluta, 'eva vamauli bedavalia.   
\c 3  
\s1 Ikakao Kauta Eta Mauli  //  Lo'e Kabukabuna Laloanai.  
\p
\v 1 “Kau ka e'ula Dilava ena lo'e ikakaona vinaulana bevavaia koanai ia 'eva vinaula nama'ina eula venia,” kanania 'eva luva umauna nuata umautai ekabia dae luvana.  
\v 2 Dilava ena lo'e ikakaona kauna 'eva ena koa benama'ina enai sia va'eva ka bedavalia, adana ka'onamo, nuana bevakula'ilala, nuana beabi 'inia, 'ola be'aku, da'a 'au kauta beabita dae ena lumai, mai vamalele vinaulana bevavaia kave'i,  
\v 3 sia beinu ba, sia beviala beia bemanau, sia beaivala, mai moni sia belalo'au venia.  
\v 4 Ia 'eva sibona ena luma kauta be'imata kave'i mai nakuna bevaidibata lelena be'ika mai 'olana be'aku dokadoka.  
\v 5 (Kau ka sibona ena luma kauta sia be'imata kave'i koanai, Dilava ena lo'e kauta a be'imata kave'i koma?)  
\v 6 Kau vali'umo eabiveni kauna 'eva lo'e ikakaona kaunai sia beabia 'isi, 'olana asi'i emaapa inoku Dilava Satani eva'ekoa boina asi'i ema'eko.  
\v 7 Inoku mulimuli kauta vaka ia 'olana be'aku, inoku sisiba sia bekakao mai Satani ena viuai sia beviviu.   
\s1 Vidulu Kauta Eta Mauli  //  Lo'e Kabukabuna Laloanai.  
\p
\v 8 Dala vitaitanai diakona vaka koakoa nama'ita bevaika vaikavai, dede vinaulata sia bevavai, sia beinu ba, mai dala va'evanai moni sia bekakavu.  
\v 9 Ia 'eva lalovai namata kataua Dilava 'ani evala'asita abiveni laloanai lalovaita deabi 'ini mainuata komolota mediatai.  
\v 10 Ia 'eva ekakovota makava inoku kevatai sia va'eva ka ekadavalia koanai diakono vinaulana bevavaia.  
\v 11 Dala vitaitanai adata vaka koakoa nama'ita bevaika vaikavai maivaka sisiba sia bekakao, sibota be'imata kave'i, mai vinaula boutai laloatai 'eva momo'aiai bevinaula.  
\v 12 Diakono adana ka'onamo, nakuna mai ena luma kauta 'eva be'imata kave'i.  
\v 13 Kau kataua diakono vinaulana devavaia kave'i kauta tavata 'eva 'ola aku vaida etai be'abi, eta abiveni bevanamala bekula'ila vaika Keliso Iesu valina be'oua kave'i.   
\s1 Eta Kukudivo Dalana.  
\p
\v 14 Lau anuabata melala kava'inamo laloanai 'ani bavasi baikamu, beia malele kanania asinia evavasi kevamu,  
\v 15 'olana 'ani kena bamaka'i boina ia malele kanania bevalalovaimu sibota eta mauli a eka'imata kave'i koma Dilava ena lo'e kauta viloatai, kanaua 'eva mauli Dilavana ena lo'e, Dilava ena luva umauna bemia vaia mai bevakula'ilala 'abuna.  
\v 16 Ita kaikabasi kave'i eta kukudivo dalana kanaua Dilava kevatai evala'asia kukudivona 'eva namana.  
\q1 Keliso 'eva kau kauaninai ela'asi,  
\q1 idumeai ena komolo evamomo'aia,  
\q1 anelu ia deikaia,  
\q1 kanobata boutai kevatai  
\q1 ia valina deilolo vaia,  
\q1 mai kanobata kauta ia deabivenia,  
\q1 nuavi laloanai eabia isi  
\q1 eda'a vutuvutuai.   
\c 4  
\s1 Vaikabasi Kauta Dedeta  //  Asi'i Demalebamui.  
\p
\v 1 Idume Kabukabuna e'outa kave'i ediaka, melala to'otai kau vaida abiveni bevikania ia dededede ka'ubata kataua mulitai bedada'a mai ka'uba si'avata vaika eta vaikabasi daitai bedadai.  
\v 2 Vaikabasi katania boita 'eva dede kauta kevatai de'asi lalovai komolota kataua 'eva desi'avana vitaitana 'auli siavunai de'abuta.  
\v 3 Kau de'alavuta sia bekamoane mai iani vaida 'eva sia be'ani. Beia Dilava iani evapulu 'eva eka ani, iani katania 'eva abiveni kauta mai Dilava ena luva umauna deikabasia kauta kataua evenita vanama'ina luvana beluvala inoku be'ani.  
\v 4 Dilava evapulu davata boutai 'eva denama'ina, boutai akatai 'eva Dilava vanama'ina luvana ekavenia inoku eka ani ia sia ka ekavasi'avanala.  
\v 5 'Olana iani 'eva Dilava ena luva mai eta meamea etata'u evakabukabuta.   
\s1 Keliso Iesu Ena Vinaula Kaumu  //  Nama'imuai Bo'ao.  
\p
\v 6 Vaikabasi katania bo'akalata bovaikabasita kave'i koanai oni 'eva Keliso Iesu ena vinaula kaumu nama'imuai bo'ao, inoku oni sibomu vaka abiveni luvatai mai vaikabasi nama'ina kanaua dainai odadai vaikabasinai bokula'ila.  
\v 7 Kanobata dilavata dedeta sisibata mai sisiba sia maianita kevatai boda'atau, beia sibomu ivakula'ilamu vinaulana bovavaia Dilava 'olana iakuna kaumuai bo'ao.  
\v 8 Kauanita ivakula'ilata vinaulata kavavai 'eva maiena nama'ina vaida, beia Dilava 'olana iakuna koana ena nama'ina 'eva dava boutai laloatai, 'olana ia 'eva iluva'ana'i vaina eta mauliai vali'u kanobata kanania laloanai mai mauli keinikeini vailai maulina vaka laloanai.  
\v 9 Kanania 'eva luva umauna nuata umautai ekabia dae mai ekabivenia.  
\v 10 Kanania 'ounai kabavunu mai kanana 'olana 'eva ita mauli Dilavana kanuabata venia, ia 'eva kau boutai eta Vamauli kauna, deabivenia kauta kataua 'eva bemauli.   
\p
\v 11 Luva katania bovaikabasita mai boluvavai beda'a vaita.  
\v 12 'Alu'alumu 'ounai kau oni sia beikamu 'iu'iu, beia ikaika nama'ita abiveni kauta vailatai bovala'asi emu luvaluvai, emu mauliai, emu lalo'auai, emu abiveniai, mai dala boutai laloatai sia va'eva ka bovavaia ia komoloai mai momo'ai ai bovavai.  
\v 13 Kau mato vailatai vinaula katania bovavai basibasi, Puka kabukabuna luvana bovakua, boilolo vaia, mai bovamalele vaia beda'amo lau bavasi kevamu.  
\v 14 Idume Kabukabuna ena veniveni nuamuai emimia venivenina sia bobalea vaia, kanaua 'eva lo'e kauta 'aida'aidata imata akamuai dekao'au demeamea koanai enolea luvana enai evenimu.  
\v 15 Bokaualo vinaula katania boutai laloatai mainuamu bounai bovavaita, inoku kau boutai oni emu vinaula 'ani enama'ina vinaulana beikala une.  
\v 16 Emu vaikabasi mai emu mauli bo'imata kave'i, dava katania bovavai basibasi, 'olana kanania bovavaia 'eva Dilava betata'u bevamaulimu mai lelemu de'ika kauta boutai vaka bevamaulita.   
\c 5  
\s1 Lo'e Kabukabuna Kauta 'Eva  //  Pulu Ka'onamo Boina.  
\p
\v 1 Kau momotuta kevatai sia boluva pasisi kovo, beia 'ola aku dalanai bo'outa kave'i itani ia 'eva oni kamamu boita, ia kau 'alu'aluta 'eva bo'akalamuai bovaota,  
\v 2 'a'ate momotuta 'eva sinamu boitai bovaota, mai 'a'ate 'alu'aluta 'eva lovumuai bovaota mai nuamu komolonai.   
\s1 'A'ateta Obuta Umauta  //  Beikata Kave'i.  
\p
\v 3 'A'ate obuta kataua deobu dokadoka 'a'ateta 'olata bo'aku.  
\v 4 Ia obu nakuna 'o kubuna vaida koanai, ia bovaikabasita makava eta kukudivo koakoana dainai eta luma kauta be'imata kave'i, kanaua boinai 'eva kamata sinata mai kubuta eta 'ima'ima tavana bevamuea, 'olana kanaua 'eva Dilava nuana ivanama'inana vinaulana.   
\p
\v 5 Obu ateatena sibona umauna emimia 'eva ena nuabata Dilava kevanai ene'eadivo boni mai lani boutai emeamea Dilava kevanai vidulu enoinoivaia.  
\v 6 Ia obu ateatena kanaua kauanina ena lalonama elalovaia namana 'eva kauaninai emauli ia idumeai 'ani eba.  
\v 7 Abiveni kauta kevatai luva katania boluluva beda'avai, asi'i kevatai va'eva ka demadavalia makauna.  
\v 8 Inoku kau ka kadi'a'ana 'o ena luma kauta umauta sia vidulu ka evenita 'eva abiveni koakoana evunia, kau kanaua boina kauna 'eva esi'avana vaika vakaia kau sia eabiveni kauna.   
\p
\v 9 Va lele pukanai obu vata sia beleleleta beda'amo eta pulu vikauta kalakoi navui avekenai, mai adata ka'o ka'o mo deobu vaita 'a'ateta 'eva vata beleleleta,  
\v 10 mai ateate kaikabasia kave'i ena mauli enama'ina, maivaka nakuna e'imata kave'i, da'a'au kauta eabita dae kave'i ena lumai, abiveni kauta da'alata e'abi, vaida eta bavunuai eduluta, mai vinaula nama'ita edeata edeata boutai laloatai evidulu ateatena.   
\p
\v 11 Beia obu 'a'ateta 'alu'aluta 'eva vata va lele pukanai sia boleleleta, 'olana nuata kamoane belalovaia koanai Keliso 'ani bebolabolala inoku bekamoane.  
\v 12 Kanaua 'eva ia sibota Dilava ena lavuai 'abunai bedododo 'olana Dilava kevanai eta luva'ana'i makavana kanaua sia bekamoane 'udai luva'ana'inana deukua.  
\v 13 Ia 'eva balea kauta dedada'a luma ka mune'e luma ka ai dele'au, sia eta baleai mo beia eta sisiba kaoai mai kau edeata eta vinaula laloatai dedododo, mai luva sia bemaluva luvata deluvavai.  
\v 14 Kanaua 'ounai lau a'ula obu 'alu'aluta 'eva bekamoane nakuta bevapuluta sibota eta luma be'ima. Inoku 'ou kauta sia 'ani beluva si'asi'a kevatai.  
\v 15 Obu vaida 'eva abiveni 'ani devikania deda'a Satani mulinai dedada'a.  
\v 16 Abiveni ateatena ka ena lumai obu vaida demimia koanai ia betata'u obu kataua beduluta, ia Dilava ena lo'e kauta mekau sia bevenita, inoku Dilava ena lo'e kauta betata'u obu umauta sibota demimia obuta kataua beduluta.   
\s1 Dilava Ena Vinaula Dekaualo Vaia  //  Kauta 'Olata Bo'aku.  
\p
\v 17 Dilava ena lo'e ai 'aida'aidata kauta kau kevatai 'ana'ia vai vinaulana nama'ina devavaia kataua 'olata oi boaku vaika. Mai vinaula dekaualo vaia Dilava ena luva deilolo vaia mai devamalele vaia kauta kataua 'eva 'olata oi boaku vaika.  
\v 18 Puka kabukabunai ediaka,  
\q1 “Bolomakau witi ivamukamukana vinaulana evavaia laloanai  
\q1 nutuna sia bodo'o bubua,”  
\qr Deu 25.4  
\m mai  
\q1 “Vinaula kauna tavana beabia  
\q1 'eva ekomolo.”   
\qr Lk 10.7  
\m
\v 19 Inoku kau ka Dilava ena lo'e e'olavaia kauna ena va'eva luvana eluluva 'eva lelena sia oi boabia dae, beda'amo kau lua 'o koi bevamomo'aia ia eva'eva 'eva leleta boabi dae.  
\v 20 Inoku lo'e e'olavaia kauna ka si'avana evavaia dokadoka koanai kau mato vailatai bo'ovenia inoku lo'e de'olavaia kauta boutai ikaika kanania beikala koanai va'eva sia bevavaia.   
\p
\v 21 Dilava mai Keliso Iesu mai anelu kabukabuta vailatai lau oni luva pasisina a'oumu, vinaula katania boutai lovata a'aku vinaulata daitai bodadai, kau boutai kevatai koakoa vitaitamo bovavaia ia sia kau ka'onamo enai bo'au.   
\s1 Sibomu Bo'imamu Kave'i.  
\p
\v 22 Bolalovai kave'i makava vakaia imamu kau ka akanai bokao'au Lovia namana ena vinaula bevavaia, vaida eta koa si'avata laloatai sia bodododo. Sibomu bo'imamu kave'i emu mauli sia be'obu Dilava vailanai.   
\p
\v 23 Vei 'avaeana mo sia boinua, ia vine veina kena boinua bo'amu bedulua 'olana emu 'olele 'ounai.   
\p
\v 24 Kau vaida eta si'avana 'eva sia devuni kaikata, si'avanata kataua 'eva be'ana'ia vaita lavuai 'abunai, beia vaida eta si'avana 'eva muliai 'ani bela'asi.  
\v 25 Vitaitana kau koa nama'ita devavai 'eva sia devuni kaikata, maivaka eta koa nama'ita sia kaikata koakoata vaka 'ani bela'asi.   
\c 6  
\s1 Da'alabi Kauna Ena 'Ola Kauna  //  'Olana Be'aku.  
\p
\v 1 Abiveni kauta kataua da'alabi vinaulana devavaia kauta boutai 'eva eta 'ola kauta 'olata be'aku vaika, inoku kau ka Dilava vana mai ita eta vaikabasi luvata akatai sia beluva si'asi'a.   
\p
\v 2 Da'alabi kauta eta 'ola kauta 'eva abiveni kauta koanai ia bo'akalata sia 'olata sia be'aku, beia da'alata beabi kave'i, 'olana 'ola kauta kataua da'alabi kauta kevatai vidulu deabia mai abiveni kauta kataua 'eva da'alabi kauta delalo'au venita. Dava katania 'eva bovamalele vaita mai bova-asiasita.   
\s1 Moni Ekalalovaia Vaika  //  'Eva Eka'ekoasi.  
\p
\v 3 Kau ka vaikabasi edeana ka evaikabasi vaia mai eta Lovia namana Iesu Keliso ena vaikabasi umauna mai Dilava ikukudivo venina vaikabasina dalana umauna evaikala davana sia evamomo'aia koanai,  
\v 4 ia 'eva eapa vaika, ia sia dava ka eikabasia. Ia ena lalovai desi'avana vaika, inoku luvaluva laloatai 'eva ebabadu mai luva sia eabidae, inoku luva kataua'i 'eva mama mai viala, luva si'avata vaika depupulu mai sia kau ka evamomo'aia.  
\v 5 Mai kau katania 'eva nuata sia dekomolo kave'i, Dilava ena luva umauna sia deikabasia, mai Dilava ivanama'inana vinaulatai belovia delalovaia inoku sibota viloatai deviala basibasi.   
\p
\v 6 Beia kau ka kevanai dava eabita davatai nuana edaia koanai Dilava ikukudivo venina maulina 'eva bevaloviaia.  
\v 7 Kapulu koanai dava sia ka kabiakasi kanobata, mai kanobatai ekaba koanai sia dava ka ekabia ekada'a vutuvutu.  
\v 8 Kanaua 'ounai kevatai iani mai tubu'a keta demimia koanai kataua 'eva 'ani edaia ita etai.  
\v 9 Ia de'ula bemalovia kauta kataua 'eva vikovo laloatai bedododo, lalovai bo'ota mai nuata iva-ananata lalovaita viunai beviviu, inoku eta mauli beabia beda'a si'avana 'abuna umaunai inoku bevavaita si'asi'a.  
\v 10 'Olana moni ilalo'au venina 'eva si'avana edeata edeata boutai bevapuluta. Kau vaida moni ulana deula vaika 'eva abiveni debolabolala sibota nuata devavilalo.   
\s1 Abiveniai Kuali Nama'ina  //  Bovavaia.  
\p
\v 11 Beia oni Dilava ena kau, dava katania boutai kevatai boda'atau. Ia komolo umauna bokavua, Dilava 'olana bo'aku, boabivenia, lalo'auai bomimia, bovapasisi, mai manauai bomimia.  
\v 12 Abiveniai kuali nama'ina bovavaia, vakaia mauli keinikeini boabi 'inia, 'olana kau mato devamomo'aimu vailatai emu abiveni koana o'oua dae kave'i melalanai Dilava mauli kanania laloanai e'aemu.   
\p
\v 13 Dilava dava boutai mauli evenita Dilavana mai Keliso Iesu ia sibona Pontio Pilato kevanai luva umauna e'ouiadae kauna vailatai lau oni avasiasimu.  
\v 14 Keliso ena talavatu pasisita luvata boda'avai kave'i mai kevatai sia bova'eva, mai kau ka vuvua sia bevakoamu beda'amo eta Lovia namana Iesu Keliso ena mue'udai melalana.  
\v 15 Ena mue 'udai melalana kanaua 'eva Dilava betata'u ena melala umaunai bevavaia. Dilava 'eva vanama'ina 'olana mai ia sibona mo dava boutai 'olata, lovia 'olana kauta boutai eta Lovia 'olana, mai lovia namata boutai eta Lovia namana.  
\v 16 Ia sibona mo bemia keinikeini sia beba kovo, ia 'eva 'ailala laloanai emimia 'ailala kanaua 'eva e'ailala vaika kau ka beda'a kevana 'eva sia bedaia, kau 'avaeana ka 'eva Dilava sia eikaia 'o sia beikala. 'Olaaku mai siavu 'eva Dilava kevanai bemia keinikeini. Amen.   
\s1 Dava Kevatai Dedoutamo Kauta  //  Lo'e Laloanai.  
\p
\v 17 Kau kataua vali'u kanobata kanania ena mauli davatai delovia kauta bo'outa pasisi, sia be'apa, mai eta nuabata lovia davatai 'ani betaule davata kataua etai sia belava'au, ia eta nuabata 'eva Dilava kevanai mo bemimia, 'olana dava boutai eainama venita nuata ivanama'inata.  
\v 18 Bo'outa vinaula nama'ita bevavai, koa nama'itai belovia, mai kau vaida kevatai kolekoleai beainama venita.  
\v 19 Dala kataua bevavai 'eva sibota eta lavo bevalalo, kataua'i ia bevamia 'inita mauli vailai maulina ena, inoku mauli kanaua beabia 'eva mauli umauna.   
\p
\v 20 Timoteo e, vinaula kanana Dilava evenimu vinaulana bo'imala kave'i, kanobata luvaluvata mai bo'o luvata kataua kau vaida de'ae lebata dediaka ‘idiba’ kauta kataua kevatai boda'atau.  
\v 21 'Olana kau vaida bo'o lalovaina kanaua delalovaia 'eva eta abiveni devataulea.  
\p Ameamea Dilava ena iulaveni koana 'eva boumuiai kevamuiai bemimia.