\id 1PE  
\h 1 Petelo 
\toc3 1Pt 
\toc2 1Pt 
\toc1 1 PETELO 
\mt3 Malele Lava'ana'ina  
\mt1 PETELO (1)  
\mt3 Eleleia Kauna  
\is1 Puka Laloana Ilelena Luvana  
\ip Malele kanania 'eva abiveni kauta doutamo adedua namavaikata dedavili kauta beduluta eta abiveni bevakula'ilata. Abiveni kauta e'outa ia 'eva Iesu Keliso valina nam'ina belalovai 'inia. Iesu kanaua 'eva eba maivaka eko'isi 'udai, mai ena luva'ana'i ia bemumue be'asi. Ena luva 'ana'i belalovaia kula'ila maikula'ilata bevi'ima beda'amo be'asi. Abiveni kauta kataua boutai eta abiveni bekovota. Kanaua 'ounai ia 'eva eta abiveniai belava 'ini beda'amo Keliso bemumue be'asi. Inoku melala kanaua'i ia 'eva tavata be'abi.  
\is1 Puka Iduvuna Namata  
\io1 a. Lova aku. (1.1 - 2)  
\io1 b. Dilava ena mauli devaikabasi. (1.3 - 12)  
\io1 c. Mauli kabukabuna. (1.13 — 2.10)  
\io1 d. Abiveni kauta eta koakoa kau anaana laloatai. (2.11 — 4.19)  
\io1 e. 'Ana'iavai kauta eta vinaula. (5.1 - 11)  
\io1 f. Luva to'ota. (5.12 - 14)  
\c 1  
\s1 Vanama'ina Luvana.  
\p
\v 1 Lau Petelo Iesu Keliso ena veauneke kau'u, Dilava edilamui kaumui oi oda'asiusiu kano edeatai da'a'au kaumui boimui oi o'ao, ua'i Ponito ai, Kalatia ai, Kapadokia ai, Asia ai mai Bitunia ai oi omimia kaumui alele venimui.  
\v 2 Dilava ita kamata ena ikabasi makava vitaitanai edilamui inoku Idume Kabukabuna 'eva oi 'ani evakabukabumui, inoku Iesu Keliso lelena daitai oi bodadai ia lalanai emui si'avana bedeinita. Ameamea Dilava ena iulaveni koana mai nua'elu 'eva emuiai namana be'ao.   
\s1 Dilava Ekavanama'inala  //  Nuabata Umauna Evenita.  
\p
\v 3 Eta Lovia namana Iesu Keliso Kamana Dilava ekavanama'inala, ia ena vilalo nama vaikana 'ounai Iesu Keliso eba ena ko'isi 'udai maulina laloanai ita evapuluta 'udai, inoku nuabata umauna evenita.  
\v 4 Ita kanuabata avuta Dilava nakuna bevenita. Vanama'ina kanaua 'eva 'ani eva'olua vutuvutuai ua'i oi emui, sia besi'avana, sia be'obu, maivaka sia betaule.  
\v 5 Dilava ena siavu etata'u e'alavumui emui abiveni dainai beda'amo vamauli kanaua 'ani eva'olua bevala'asia melala to'onai vamaulina oi boabia.   
\p
\v 6 Kanania 'ounai lalomui benanama oi bolalonama si'asi'a, beia vali'u melala kava'inamo nuamui debavunu 'olana vikovo edeata edeata devakovomui 'ounai.  
\v 7 Vikovo kanaua 'eva emui abiveni ena nama'ina bevamomo'aia. Ia abiveni ena nama'ina 'eva kolo kanaua 'alovai devanama'inala beia 'ani betaule kolona ena nama'ina ekeinia. Emui abiveni kanaua devakovoa devanama'inala abivenina 'eva Iesu Keliso bevaila melalanai ivanama'inamui, iabi daemui mai 'olamui be'aku davanai be'ao.  
\v 8 Iesu sia oi oikaia kovo beia oi olalo'au venia. Vali'u sia oi oikala ia oi oabivenia inoku oi olalonama vaia, lalonama namana mai nama'ina kanaua 'eva luvai i'ou kave'ina sia bedaia.  
\v 9 'Olana emui abiveni vuavuana oi oabia, kanaua 'eva idumemui ivamaulita davana.   
\p
\v 10 Enolea kauta kataua Dilava ena vilalo koana oi kevamuiai bela'asi davana ia deta'u vamauli kanaua dekavuia kave'i maivaka demalelevaia kave'i.  
\v 11 Idume Kabukabuna Keliso eta'u esinia Idumena 'eva enolea kauta nuatai emia, Keliso ena ana-ana mai ena nuavi ana-anana mulinai be'asi davana evaikabasita 'ounai ia 'eva devakovoa beikabasi melala davanai maivaka koana a boina.  
\v 12 Dilava enolea kauta kevatai evala'asia ia eta vinaula 'eva sia sibota eta nama'ina dainai ia oi emui nama'ina dainai, maivaka vali'u vali nama'ina kanania 'eva deilolo vaia kauta detata'u Idume Kabukabuna vutuvutuai esinia 'ovu easi kauna ena viduluai devaikabasimui. Dava katania 'eva anelu vaka deula beikata une.   
\s1 Mauli Kabukabunai Ekamia.  
\p
\v 13 Kanaua 'ounai nuamui oi bovavai kave'i, oi bova'olu emui nuabata itoina 'eva Iesu Keliso bela'asi koanai iulaveni koana bele'au emuiai.  
\v 14 Vali'u leleika melomuiai oi bo'ao, kauanimui eta ula koakoata si'avata vaika 'ana'inai sia oi oikabasi koanai oi ovavaita koakoata sia oi bovavaita.  
\v 15 Ia e'aemui Dilavana ekabukabu boina oi vaka bokabukabu emui koakoa boutai laloatai.  
\v 16 Puka kabukabunai 'ani ilelena  
\q1 “Lau 'eva akabukabu 'ounai  
\q1 oi 'eva bokabukabu.”   
\qr Lev 11.44, 45  
\p
\v 17 Oi o'aea Kama, ia 'eva kau evaluvata koanai ikana enama'ina kauna sia elalovaia ia ka ka ena vinaula ena vinaula daitai bevaluvata. Kanaua 'ounai emui mia nia'i kanobatai 'eva maimakaumui oi bomimia vitaitana kano edea kaumui boina.  
\v 18 Oi 'ani oikabasi, Dilava oi emui mauli si'avana vaika kanaua 'ava'avamui devenimui maulina laloanai evamaulimui 'eva kanobata davata 'ani betaule kataua siliva 'o kolo boitai sia etavamui,  
\v 19 ia Keliso lalana nama'ina vaika mamoe nakuna kaunai loi 'o sia si'avana ka mamoena boinai etavamui.  
\v 20 Dilava 'eva 'ani siako vaika kanobata asido'o epulu laloanai ia edilaia, inoku melala to'ona kanania'i evala'asia oi daimuiai.  
\v 21 Oi Keliso dainai Dilava oabivenia, ia 'eva Keliso bai evako'isia 'udai mai nuavi evenia. Kanaua 'ounai oi emui abiveni mai emui nuabata 'eva Dilava enai emimia.   
\p
\v 22 Vali'u Dilava ena luva umauna iabidaenai idumemui 'ani oi odeinita kave'i, bo'akalamui oi bolalo'au venita dokadoka mai dalana 'ounai, banomui oi bolalo'au venita dokadoka mainuamui boutai.  
\v 23 Oi opulu 'udai 'eva sia kea kanaua bepepeda davanai, ia sia bepepeda keana kanaua Dilava ena luva emauli mai emia keinikeini luvanai oi opulu 'udai.  
\v 24 'Olana Puka kabukabunai ilelena boina,  
\q1 “Kau boutai 'eva ava boina,  
\q1 maivaka eta nuavi 'eva  
\q1 ava velavelana boina.  
\q1 Ava elamoda  
\q1 velavelana e'eko asi e'ole.   
\q1
\v 25 Beia Lovia namana  
\q1 ena luva 'eva bemimia  
\q1 beda'amo to'ona asi'i.”  
\qr Isa 40.6-8  
\m Vali nama'ina kanaua deilolo vaia kevamuiai 'eva luvana kanania.   
\c 2  
\p
\v 1 Kanaua 'ounai oi sibomui si'avana vinaulata boutai, dede, dibadiba, mama, sisiba kao boutai oi boito'au.  
\v 2 Melo 'oma'omana epupulu bae eula venia boina, melala boutai idume ena vamalele nama'ina oi boula venia, inoku namamui oi bo'ao beda'amo vamauli oi boabia.  
\v 3 'Olana oi 'eva Lovia namana ena vanama'ina 'ani oi onovaia kovo.   
\s1 Lovia Namana 'Eva Mauli Bika'ana,  //  Oi 'Eva Dilava Ena Kau.  
\p
\v 4 Oi bo'asi Lovia namana Iesu kevana, ia 'eva mauli bika'ana, kanobata kauta debo'okaia beia Dilava eta'u bika'a kanaua edilaia, inoku eikaia 'eva enama'ina vaika ia kevanai.  
\v 5 Oi vaka mauli bika'ata boita, Idume Kabukabu ena siavuai Dilava ena lo'e kabukabunai oi bo'ao, oi 'eva ia ena kabukabu kaumui emui mauli oi bovenia idume ainama davanai be'ao Dilava betata'u mai lalonamana beabimui dae Iesu Keliso dainai.   
\p
\v 6 Puka Kabukabunai kanania eleleia koma,  
\q1 “Oi kaia, lau bika'a ka abia isi  
\q1 ua 'eva diu bika'ana nama'ina  
\q1 vaika Siona lolonai ane'ea divo,  
\q1 dava boutai ia akanai  
\q1 bevalavata 'au,  
\q1 ia beabivenia kauna 'eva  
\q1 sia bemalalai.”   
\qr Isa 28.16  
\m
\v 7 Kanaua 'ounai oi oabivenia kaumui kevamuiai 'eva enama'ina vaika, ia sia deabivenia kauta kevatai 'eva bika'a 'avaeana ilelena boina,  
\q1 “luma ivalavana kauta  
\q1 ulana sia de'ula bika'ana 'eva  
\q1 'ani luma diuna bika'anai eao.”   
\qr Sal 118.22  
\m
\v 8 Maivaka,  
\q1 “Kau bika'a kanaua'i  
\q1 detatai delavatabu  
\q1 mai delavade'i de'eko.”  
\qr Isa 8.14  
\m Dilava ena luva sia de'ika sia devamomo'aia 'ounai ia de'eko, ua 'eva ia avuta Dilava ena lalovai vitaitanai.   
\p
\v 9 Beia oi 'eva Dilava edilamui kaumui, lovia 'olana ena kabukabu kaumui, kabukabu iduvuna, kaumui katana 'eva Dilava ena. Dilava eabimui 'eva ena koakoa nama'ita oi bo'outa dae 'ounai, inoku ia 'eva oi vabuto'o laloanai e'aeamui la'asi ena 'ailala nama'ina umauna laloanai evada'amui dodo.  
\v 10 'Ana'inai oi 'eva sia Dilava ena kau ia vali'u 'eva oi 'ani Dilava ena kau, 'ana'inai oi 'eva Dilava sia elalomui ia vali'u 'eva Dilava ena vilalo 'ani oi oabia.   
\s1 Dilava Ena Da'alabi Kauta.  
\p
\v 11 E'u lalo'au kaumui e, oi 'eva kano edea mai da'a 'avaea 'avaea kaumui kanobata kanania laloanai, avasiasimui, kauanimui eta koakoa 'obuta sia oi bovavai, kataua detata'u idumemui dekualita.  
\v 12 Sia deabiveni kauta viloatai emui koakoa 'eva bekomolo, devasi'avanamui si'avana kaumuiai devaomui kauta emui koakoa nama'ita be'ika, inoku Dilava vana bevanama'inala ia ena mue'udai melalanai.   
\p
\v 13 Kau eta siavu kauta boutai leleta oi boda'a vai, ua 'eva Lovia namana 'olana iakuna 'ounai, kanobata loviana 'olana lelena oi bo'ika ia 'eva 'ola kauna,  
\v 14 maivaka kavamani kauta leleta oi bo'ika, ia 'eva 'ola kauna esinita si'avana kauta bevananata, ia vavai kave'i kauta bevanama'inata.  
\v 15 'Olana Dilava ena ula 'eva emui koakoa nama'itai vabo'obo'o kauta eta luva si'asi'a be'alavuta.  
\v 16 Talavatu kevanai oi bo'avaea, beia emui mia 'avaea kanaua si'avana iluvuna davanai sia be'ao, oi 'eva Dilava da'alana iabinai oi bo'ao.  
\v 17 Kau boutai 'olata oi bo'aku, banomui oi bolalo'au venita, Dilava oi bomakau vai, lovia 'olana 'olana oi bo'aku.   
\s1 Keliso Eanana Vitaitanai Ekanana.  
\p
\v 18 Da'alabi kaumui e, emui 'ola kauta leleta oi boda'avai maimakaumui, sia nama'ina 'o luva komolo kauta mo kevatai ia aivala kauta kevatai vaka.  
\v 19 Ena si'avana asi'i beia Dilava elalovaia 'ounai anana ekoala kauna kanaua 'eva Dilava ia bevanama'inala.  
\v 20 Koakoa si'avata oi bovavai inoku beakumui laloanai oi bovapasisi koanai ena nama'ina 'eva dava? Ia vinaula nama'ita oi bovavai oi boanana laloanai oi bovapasisi kanaua 'eva mai nama'inana Dilava vailanai.   
\p
\v 21 Kanania 'ounai Dilava oi e'aemui. Keliso 'eva eanana oi daimuiai, evikanimui eda'a ivavitaitai oi ia mulinai aena 'abutai oi bodada'a.  
\v 22 “Keliso 'eva sia si'avana ka evavaia  
\q1 maivaka nutunai dede luvana  
\q1 sia ka dedavalia.”   
\qr Isa 53.9  
\m
\v 23 De'ou si'ala beia eta luva sia ka evamuea, anana eonovaia beia sia evabavunuta, beia boutai 'eva komoloai evaluva Dilavana imanai euda.  
\v 24 Keliso kauaninai eta si'avana evuata au ido'o valaukuna akanai eba 'eva si'avana enai ekaba ia komolo enai eka mauli. Deakuia loitai oi 'ani evanama'inamui.   
\p
\v 25 'Ana'inai oi 'eva da'a 'avaea'avaea mamoena boina, beia vali'u 'eva 'ani oi omue oi oasi idumemui i'imata mai ika'inita kauna kevana. \fig Mamoe i'imata kauna mamoe e'ana'iavaita.|src="bk00004b.tif" size="col" ref="2.25" \fig*   
\c 3  
\s1 Kamoane Kauta Mai 'A'ateta.  
\p
\v 1 'A'ate e, itani da'alabi kauta eta 'ola kauta leleta de'ika boita, adamui leleta oi bo'ika, Lovia namana ena luva sia deabia dae kauta kataua 'eva sia luvai beia oi emui koakoa nama'itai vamauli beabia,  
\v 2 emui koakoa komolota mai 'ola aku vinaulata be'ika daitai.  
\v 3 Oi velamui 'eva sia kauanimui akanai ivavelana 'ounai, sia vuimui velata 'o kaiamui boita kolo 'o dava 'amale'amaleta 'o emui ivadodo tavata namata boita.  
\v 4 Beia nuamui umauta davata, lalovai nama'ina manauna ena nama'ina sia betaule davanai oi bovavelata inoku kanaua Dilava vailanai ena nama'ina namavaikana.  
\v 5 'Olana 'ana'ina melalanai kabukabu 'a'ateta kataua eta nuabata Dilava kevanai 'a'ateta kanaua devanama koma, adata leleta daitai dedai kave'i.  
\v 6 Sala adana Abela'amo lelena eika mai e'aeia ena lovia. Oi vaka komolo vinaulana oi bovavaia mai melala boutai sia oi bomakau 'eva nakuna 'a'atemuiai oi bo'ao.   
\p
\v 7 Kau e, dala vitaitanai oi vaka adamui ita oi bomia ka'ona, kauani vinaulatai debadebade beia 'olata oi bo'aku mai oi bo'imata kave'i, Dilava ena mauli umauna ainamana ita oi boabi ka'ona, 'olana emui meamea dalana asi'i ema'alavua 'ounai.   
\s1 Vinaula Komolo 'Ounai Ekanana.  
\p
\v 8 Luva to'ona kanania, boumuiai nuamui beka'onamo, oi bolalovai lalovai, oi bovilalo'au viveni bo'a ka'onamo boita, oi bovilalo viveni, maivaka oi bomanau.  
\v 9 Eta si'avana tavata sia oi bovamue mai koakoa si'avata sia oi bovavai, 'o eta luva si'asi'a tavata sia oi bovamue kevatai sia oi boluva si'asi'a, beia devasi'avanamui kauta 'eva oi bovanama'inata, 'olana kanaua 'ounai e'aemui Dilavana ena vanama'ina oi boabia.   
\p
\v 10 'Olana Puka kabukabunai 'ani deleleia,  
\q1 “Kau ka be'ula mauli belalo'au venia mai melala nama'ina  
\q1 beikala 'eva  
\q1 malana be'imala kave'i  
\q1 nutunai si'avana luvana  
\q1 sia beluvala,  
\q1 nutuna bibi'anai dede luvana  
\q1 sia beluvala kovo.   
\q1
\v 11 Si'avana bevikania  
\q1 vinaula nama'ita bevavai,  
\q1 nua'elu bekavua mulinai  
\q1 bedada'a.   
\q1
\v 12 'Olana Lovia namana makana  
\q1 'eva vinaula komolo kauta eikata,  
\q1 kaiana 'eva eta noinoi 'uluta eika,  
\q1 beia Lovia namana vailana  
\q1 'eva si'avana kauta emulita.”   
\qr Sal 34.12-16  
\p
\v 13 Oi vinaula nama'ina oula venia oi bovavaia koanai dai betata'u oi beva-ananamui?  
\v 14 Beia vinaula komolota oi bovavai oi anana koanai oi 'eva bonama'ina Dilava vailanai. “Eta vaivivi luvata sia oi bomakau vaita nuamui sia bebavunu.”  
\v 15 Beia Keliso 'eva nuamuiai 'olana oi bo'aku emui Lovia namana kabukabuna. Inoku melala boutai oi bova'olu, emui nuabata nuamuiai emimia nuabatana anina belavuai lavuai vaia kauta eta lavuailavuai luvana oi bovamuea mai vaka'onamui maivaka mai 'ola akumui.  
\v 16 Melala boutai emui mauli laloanai nuamui bekomolo Dilava vailanai. Inoku kau kataua emui vinaula nama'ita Keliso enai oi ovavai vinaulatai de'oumui si'asi'a kauta vinaula kataua betata'u bevamalalaita.  
\v 17 'Olana Dilava ena ula melalanai vinaula medianai oi boanana 'eva enama'ina, emui si'avana 'ounai oi boanana 'eva sia enama'ina.   
\p
\v 18 'Olana Keliso melala ka'onamoai eba si'avana iabiovota vinaulata boutai daitai, ia maiena va'eva kauna eta'u va'eva kauta 'abutai eba 'olana bevuata beda'a Dilava kevana. Kauaniai eba, beia idume ai emauli 'udai.  
\v 19 Keliso 'eva idumeai eao eda'a devabuto'o idumeta kevatai eilolo.  
\v 20 Idume kataua 'eva 'ana'ina umaunai Noa aunakoi evavaia koanai, kau kataua Dilava lelena daitai sia dedai beia nuana evapasisia evi'ima belalo 'udai kauta. Beia aunakoi kanaua laloanai 'eva sia douta, kauta kalavani mo vei kanaua laloanai evamaulita.  
\v 21 Vitaitana vei 'eva vaidi'u kabukabuna Iesu Keliso ena ko'isi 'udaiai oi evamaulimui koana, sia kauanimui 'obuta oi bodeini 'ounai ia oi boluva'ana'i nuamui nama'itai Dilava vailanai.  
\v 22 Keliso 'eva 'ani vutuvutuai ele'au, vali'u Dilava idibana duasi 'ola aku 'abunai emimia, anelu, lovia idumeta mai siavu kauta boutai e'ola vaita.   
\c 4  
\s1 Eta Mauli.  
\p
\v 1 Keliso kauaniai eanana ounai, oi vaka lalovai kanaua vitaitanai nuamui oi bovakula'ilata, 'olana kauani beanana kauanina 'eva si'avana bevikania.  
\v 2 Kanaua 'ounai emui mauli melalata boutai laloatai kauani ena ula si'avata vaika sia oi bovavai, ia Dilava ena ula vinaulata oi bovavai.  
\v 3 'Ana'inai oi 'eva pulu edea kauta eta ula vitaitatai oi omia 'ani edaimui. Mo'a, ula si'avata vaika vinaulata oi ovavai, oi oinu ba, oi oaivala, oi ovabo'obo'o, dilava dedeta oi okukudivo venita.  
\v 4 Vali'u kau kataua 'eva detabulovo de'ou si'amui, 'olana oi ia ita sia oi ovaka'onamo sia oi oaivala 'ounai.  
\v 5 Beia ia 'eva eta koakoa daitai 'ani eva'olu mauli mai ba kauta bevaluvata Dilavana vailanai belavadivo valita bekakava.  
\v 6 Kanaua 'ounai vali nama'ina ba kauta kevatai eilolo vaia, ia vaka kauanita 'eva lavuai deabia kauta boutai boina, ia idumeta 'eva bemauli Dilava ena ula vitaitanai.   
\s1 Dilava Ena Vilalo Koata.  
\p
\v 7 Dava boutai eta ole 'eva 'ani e'asi, kanaua 'ounai sibomui oi bolalovaimui kave'i nuamui oi bovakula'ilata inoku oi bomeamea.  
\v 8 Beia namana umauna 'eva banomui oi bolalo'au venita mainuamui boutai, 'olana lalo'au 'eva si'avana doutamo evaku bubuta.  
\v 9 Emui lumai banomui ka ka oi boabita dae ia sia oi bonunulaita.  
\v 10 Dilava oi ka ka ena vilalo koanai ainama evenimui, inoku ka ka oi bodulumui Dilava ena vilalo koata edeata edeata i'imata kaumui mediamuiai oi bo'ao.  
\v 11 Kau ka beilolo koanai ia 'eva luva Dilava enai e'asi luvana vitaitanamo beilolo vaia, mai kau ka e'ula bevidulu, ia vaka 'eva Dilava kula'ila evenia kula'ilana vitaitanamo bevavaia. Dava kataua boutai laloatai Dilava vana ekavanama'inala Iesu Keliso dainai. Nuavi mai siavu ia ena beda'amo to'ona asi'i. Amen.   
\s1 Keliso Ena Kauai Ekao 'Ounai  //  Eka Anaana.  
\p
\v 12 E'u lalo'au kaumui e, ivakovo ananana emuiai bepupulu 'eva sia oi botabulovo sia oi bolalovaia dava edeana ka emuiai epupulu. Asi'i.  
\v 13 Oi bolalonama, 'olana oi 'eva Keliso eanana boinai oi oanana, Keliso ena nuavi bela'asi koanai oi bolalonama si'asi'a.  
\v 14 Oi Keliso ena kau 'ounai de'ou si'amui koanai, nama'ina 'eva oi emui 'olana Dilava Idumena Kabukabuna nuavina 'eva oi akamuiai.  
\v 15 Oi ka oanana koanai sia akuaku dainai 'o vinao dainai 'o vinaula si'avana dainai 'o va'eva vavai kauta kau edeata eta vinaula laloatai dedododo dainai.  
\v 16 Ia oi ka Keliso ena kau 'ounai oanana, oni 'eva sia bomalalai ia Dilava bovanama'inala va kanaua oabia 'ounai.   
\p
\v 17 'Olana melalana 'ani ele'au Dilava ena kau bevaluvata makava. Ita beva'ana'iata koanai Dilava valina nama'ina sia deabia dae kauta kataua kevatai 'eva a beole koma?  
\v 18 Puka kabukabunai kanania deleleia koma,  
\q1 “Vinaula komolo kauta  
\q1 mauli iabinai beanana koanai  
\q1 Dilava sia deabia dae kauta  
\q1 mai si'avana kauta  
\q1 a belava 'ini koma?”   
\qr Aon 11.31  
\m
\v 19 Kanaua 'ounai Dilava ena ula dainai deanana kauta 'eva vinaula nama'ita mo bevavai, idumeta 'eva evavaita Dilavana leleta e'ika kauna imana laloanai beudata.   
\c 5  
\s1 Dilava Ena Mamoe 'Itona  //  Oiboika 'Inita.  
\p
\v 1 Oi viloamuiai Dilava ena lo'e ai 'aida'aidamui kaumui avasiasimui, lau vaka ana'ivai kau'u, Keliso eanana 'eva lau maka'uai aikaia, nuavina bevaila laloanai lau maiavu'u.  
\v 2 Dilava ena mamoe 'itona viloamuiai i'imata kaumuiai oi bo'ao oi boika 'inita kave'i Dilava ena ula vitaitanai. Sia o'uto'ato'ai oi bovavaia, ia mainuamui bounai oi bovavai. Moni dainai sia oi bovinaula beia nuamui mai lalonamanai oi boika 'inita.  
\v 3 Oi bo'imata kauta etai sia loviai oi bo'ao, ia kevatai vaikavaika nama'ita kaumuiai oi bo'ao.  
\v 4 Inoku mamoe 'ima 'olana kauna Keliso bela'asi koanai oi 'eva 'ola ivakuavuna 'amale'amalena nuavina sia betaule kovo davana oi boabia.   
\p
\v 5 Kau 'alu'alumui e, dala vitaitanai 'aida'aidata kauta leleta oi bo'ika, boumuiai sibomui manauai oi bovidulu viveni, 'olana Puka kabukabunai ilelena ediaka,  
\q1 “Dilava 'eva apa kauta  
\q1 bemulita, ia manau kauta  
\q1 'eva ulata be'ula.”   
\qr Aon 3.34  
\m
\v 6 Kanaua 'ounai sibomui oi bovakikimui Dilava ena siavu venunai oi bomanau, melala be'asi laloanai ia betata'u oi beabimui isi.  
\v 7 Nuamui bavunuta boutai Dilava enai oi bone'e divo, 'olana ia 'eva oi e'imamui.   
\p
\v 8 Oi bolalovai kave'i mai oi bo'imamui kave'i. Emui 'ou kauna diabolo 'eva oi kevamuiai eda'a keinikeini eninini itani 'oveka namana vana laioni boina evikavu kau ka bema ania lalovaina elalovai.  
\v 9 Emui abiveniai oi bolava 'ini diabolo oi bo'alavua, 'olana oi oikabasi bo'akalamui boutai kanobata kanania laloanai 'eva anana vitaitanamo devuala.  
\v 10 Iulaveni boutai 'olata Dilavana Keliso enai e'aemui ena mia keinikeininai nuavina laloanai bevada'amui dodo kauna boni kava'inamo oi anana vakaia, mulinai ia sibona betata'u bevakomolomui, bevapasisimui, bevakula'ilamui, bevalava 'inimui kave'i.  
\v 11 Siavu boutai 'eva Dilava ena beda'amo to'ona asi'i. Amen. \fig Laioni.|src="HK00046B.TIF" size="col" ref="5.8" \fig*   
\s1 Vanama'ina Luvana To'ona.  
\p
\v 12 Sila ena viduluai lau malele kikina to'oto'ona kanania alelea. Lau aikala ia 'eva bo'akalata umauna. Lau alele venimui 'eva nuamui bavakula'ilata mai ba'ou dae Keliso dainai eanana 'eva Dilava ena iulaveni koana umauna. Oi iulaveni koana kanania laloanai oi bolava 'ini.   
\p
\v 13 Dilava ena lo'e kauta Babulonia ai demimia oi ita Dilava eabimui isi kauta detata'u eta vanama'ina luvata devenimui, Maleko naku'u abiveniai vaka ena vanama'ina luvana evenimui.  
\v 14 Lalo'au koana viba'uai ka ka emui vanama'ina oi boveveni.  
\p Lau ameamea Keliso enai oi omimia kaumui boumuiai nua'elu laloanai oi bomimia.