\id 1JN  
\h 1 Ioane 
\toc3 1Io 
\toc2 1Io 
\toc1 1 IOANE 
\mt3 Malele Lava'ana'ina  
\mt1 IOANE (1)  
\mt3 Eleleia Kauna  
\is1 Puka Laloana Ilelena luvana  
\ip Malele kanania 'olana 'eva lua. Ioane e'ula abiveni kauta beduluta, inoku ia mai Dilava ita Kamata, mai Nakuna Iesu Keliso ita nuata beka'onamo. Ivaluna 'eva ia sia e'ula dede kauta de'asi delebata eta abiveni Dilava kevanai davana beabia tau. Kau katania eta koakoa 'eva vabulai demimia inoku kanania deluva koma, “Kanobata kanania davata 'eva sia denama'ina. Iesu 'eva Dilava nakuna, kanaua 'ounai ia kauai sia be'asi, kanobata kanania davata ita sia bemia ka'ona, ita kau kavavaia boina 'eva sia bedaia.” Maivaka dediaka, “Kau ka e'ula bemia kave'i Dilava kevanai koanai, ia 'eva kanobata kanania davata sia belalonama vaita, kataua daitai nuana sia belaloto'ato'a”.  
\ip Malele kanania eleleia 'eva dede katania leleta de'ika kauta evavaita si'asi'a dokadoka. Ia ediaka Iesu 'eva easi ia 'eva kau umauna, inoku Iesu deabivenia kauta kataua 'eva Iesu beulavenia dokadoka mai kau vaka belalonama venita.  
\is1 Puka Iduvuna Namata  
\io1 a. Lova aku. (1.1 - 4)  
\io1 b. 'Ailala mai vabula. (1.5 — 2.29)  
\io1 c. Dilava nakuna mai diabolo nakuna. (3.1 - 24)  
\io1 d. Luva umauna mai va'eva. (4.1 - 6)  
\io1 e. Lalo'au koana. (4.7 - 21)  
\io1 f. Abiveni ena siavu. (5.1 - 21)  
\c 1  
\s1 Mauli Luvana.  
\p
\v 1 Lau vali'u vali kanania alele venimui 'eva kau makavana umaunai emia kauna kanaua valina, kau kanaua kaiamaiai lelena lai aika, makamaiai lai aikaia, makamai umaunai lai aikaia kave'i mai imamaiai lai abia kovo. Ia 'eva Mauli Luvana kauna kanaua 'eva Keliso mauli 'olana.  
\v 2 Mauli kanania kanobatai evala'asia. Mauli keinikeini kauna kanania Keliso lai aikaia 'ounai valina lai akakava mai lai ailolo vaia kevamuiai. Ia 'eva Kamana ita demia inoku kevamaiai evala'asia.  
\v 3 Lai dava lai aikaia maivaka 'uluna lai aika davana lai ailolo vaia kevamuiai 'eva oi mai lai ita ekavaka'onamo. Eta vaka'onamo 'eva Kamana mai Nakuna Iesu Keliso 'ani ita ita.  
\v 4 Lai alele venimui 'olana 'eva ita ekalalonama ka'onamo.   
\s1 Dilava 'Eva 'Ailala.  
\p
\v 5 Vali Keliso enai lai aika valina vali'u lai ailolo vaia kevamuiai 'eva kanania. Dilava 'eva 'ailala, Ia enai 'eva vabuto'o asi'i vaika.  
\v 6 Ita kamadiaka Dilava ita kavaka'onamo beia vabuto'o laloanai kadada'a koanai ita 'eva kadedede mai Dilava ena luva umauna sia kada'avaia.  
\v 7 Beia Dilava 'ailala laloanai emimia boina ita 'ailalai kadada'a koanai ita 'eva banota ita ekavaka'onamo, Nakuna Iesu lalanai eta si'avana boutai edeini ovo.   
\p
\v 8 Ita kamadiaka eta si'avana asi'i koanai ita sibota kalebata maivaka Dilava ena luva umauna 'eva nuatai asi'i.  
\v 9 Beia ita eta si'avana Dilava vailanai eka'outa dae koanai ia 'eva lele ivavua venina kauna mai komolo kauna inoku eta si'avana be'ou kao maivaka eta va'eva boutai bedeinita ovo.  
\v 10 Ita kamadiaka si'avana sia ka kavavaia koanai Dilava 'eva dede kaunai kavaoa, maivaka ena luva 'eva nuatai asi'i vaika.   
\c 2  
\s1 Keliso 'Eva Ita Iduluta Kauna.  
\p
\v 1 Naku'u ma'adi e, lau kanania alelea evavasi kele'emui 'eva oi si'avana sia ka oi bovavaia 'ounai. Beia mo kau ka si'avana evavaia koanai ita iduluta kauna ka 'eva emimia Kamana be'oua ita daitai, ia 'eva komolo kauna Iesu Keliso.  
\v 2 Ia sibona ena mauli eveni vaka'ona davanai eao eta si'avana i'ou kaota daitai, sia ita sibota mo daitai ia kau boutai eta si'avana daitai.   
\p
\v 3 Ita Dilava e'outa talavatuta luvata kada'a vaita koanai eka ikabasi ita 'eva Dilava kaikabasia.   
\p
\v 4 Kau ka bemadiaka, “Lau Dilava aikabasia,” beia Dilava ena talavatu sia eda'avaita koanai, kau kanaua 'eva dede kauna, ia nuanai Dilava ena luva umauna 'eva sia emimia.  
\v 5 Kau ka Dilava ena luva eda'avaita kauna 'eva Dilava elalo'au venia umauna. Kanaua'i ekaikabasi kave'i ita 'eva Dilava nuanai.  
\v 6 Kau ka ediaka ia Dilava enai emimia kauna 'eva Iesu emauli vaia maulina vitaitanai bemauli.   
\s1 Talavatu Luvana Makamakana.  
\p
\v 7 E'u kau ma'adi e, talavatu luvana kanania alelea evavasi 'eva sia makamakana, ia talavatu luvana 'ana'ina 'ani makavanai oi oabia laloanai oi oabivenia, talavatu luvana kanania 'eva 'ana'ina 'ani oi oika luvana.  
\v 8 Beia talavatu luvana kanania 'eva makamakana, anina umauna 'eva Keliso mai oi kevamuiai 'ani ekaikala, 'olana vabuto'o 'eva 'ani etaule, ia 'ailala umauna 'ani ekakala.   
\p
\v 9 Kau ka bediaka ia 'eva 'ailala laloanai emimia, beia bo'akalana ulana sia e'ula kauna ia 'eva vali'u vabuto'o laloanai emimia do'o.  
\v 10 Kau ka bo'akalana elalo'au venia 'eva 'ailala laloanai emimia, inoku kele'enai si'avana asi'i, sia kau ka bevava'evaia.  
\v 11 Ia kau ka bo'akalana ulana sia e'ula kauna 'eva vabuto'o laloanai emimia mai vabuto'o laloanai edada'a. Vabuto'o eta'u ia makana 'ani e'alavuta 'ounai, a eda'ala 'eva sia eikabasi.   
\q1
\v 12 Naku'u ma'adi e,  
\q1 alele venimui 'olana 'eva  
\q1 emui si'avana Keliso vanai  
\q1 'ani i'ou kaota.   
\q1
\v 13 Kamamai kaumui e,  
\q1 alele venimui 'olana 'eva  
\q1 oi kau kanaua makavanai  
\q1 emia easi mo vali'u kauna  
\q1 'ani oi oikabasia.  
\q1 Kau 'alu'alumui e,  
\q1 alele venimui 'olana 'eva  
\q1 oi kau si'avana vaika  
\q1 'ani oi ova'ekoa.   
\p
\v 14 Naku'u e,  
\q1 alele venimui 'olana 'eva  
\q1 oi Kamata oi oikabasia.  
\q1 Kamamai kaumui e,  
\q1 alele venimui 'olana 'eva  
\q1 oi kau kanaua makavanai  
\q1 emia easi mo vali'u kauna  
\q1 'ani oi oikabasia.  
\q1 Kau 'alu'alumui e,  
\q1 alele venimui 'olana 'eva  
\q1 oi okula'ila Dilava ena luva  
\q1 nuamuiai emimia 'ounai  
\q1 kau si'avana vaika  
\q1 'ani oi ova'ekoa.   
\p
\v 15 Kanobata mai laloanai demimia davata boutai sia oi bolalo'au venita, beia kau ka kanobata elalo'au venia koanai, ia 'eva Kamata ena lalo'au 'eva sia ia nuanai.  
\v 16 'Olana kanobata laloana davata boutai 'eva kauani ena ula vaika davata bevavai, maka ena ula vaika davata be'ika, mai lovia davata beapavaita, kataua boita boutai 'eva Kamata kevanai sia de'asi ia kanobata enai de'asi.  
\v 17 Kanobata mai laloana iula venia davata boutai 'ani detaule palu, ia Dilava ena ula vinaulana devavaia kauta 'eva bemauli keinikeini.   
\s1 Keliso Ena 'Ou Kauna.  
\p
\v 18 Naku'u e, kanobata bepupua melalana 'eva 'ani ele'au. Vali 'ani oi oika Keliso ena 'ou kauna e'asi, mai vali'u Keliso ena 'ou kauta doutamo 'eva 'ani devaila. Kanaua 'ounai ita kaikabasi melala to'ona 'eva 'ani ele'au.  
\v 19 Kau kataua kevatai dela'asi beia ia 'eva sia ita banota umauta. Bema ita banota koanai, ita ia ita kamamia ka'ona. Beia ia eta da'a ovoai evala'asia kave'i ia 'eva sia ita banota.   
\p
\v 20 Beia oi 'eva Kabukabu kauna Keliso eta'u Idume Kabukabuna eveni davana 'ani oi oabia nuamuiai, kanaua 'ounai oi boumuiai 'eva Dilava ena luva umauna oi oikabasia.  
\v 21 Lau oi sia alele venimui 'olana oi Dilava ena luva umauna sia oi oikabasia 'ounai, ia oi 'eva Dilava ena luva umauna 'ani oi oikabasia. Inoku oi 'ani oi oikabasi dede 'eva Dilava ena luva umauna enai sia e'asi.  
\v 22 Dede kauna 'eva dai? Ia ediaka Iesu 'eva sia Keliso. Kau kanaua boina 'eva Keliso ena 'ou kauna, ia 'eva Kamana mai Nakuna ita e'outa avuavu.  
\v 23 Kau ka Kau Nakuna e'oua avuavu kauna ia enai 'eva Kamana asi'i. Kau ka Kau Nakuna evamomo'aia kauna 'eva Kamana vaka ia kevanai.   
\p
\v 24 Makavanai luva oi oika luvana 'eva nuamuiai bemimia. Oi oika luvana kanaua oi boda'a vaia koanai, oi 'eva Nakuna laloanai mai Kamana laloanai oi bomimia.  
\v 25 Kanania 'eva Keliso sibona eluva 'ana'i vaia ita eta, mauli keinikeini bevenita.   
\p
\v 26 Alele venimui eta ula belebamui kauta kataua luvata aluluva.  
\v 27 Ia oi 'eva Keliso eta'u Idume Kabukabuna evenimui nuamuiai emimia, kanaua 'ounai sia kau ka bevaikabasimui beia 'ani edaia. 'Olana Idume Kabukabuna 'eva dava boutai evaikabasimui, ena vaikabasi 'eva umauta, ia sia ededede. Idume Kabukabuna evaikabasimui vitaitanai melala boutai Keliso laloanai oi bomimia.   
\p
\v 28 Naku'u ma'adi e, vali'u Keliso laloanai oi bomimia, 'olana ia ena mue 'udai melalanai ita 'eva ekakula'ila maivaka sia ekamalalai ia vailanai.  
\v 29 Oi oikabasi Keliso 'eva komolo kauna koanai, oi boikabasi kave'i kau kataua komolo vinaulata devavai kauta boutai 'eva Dilava nakuna.   
\c 3  
\s1 Dilava Nakunai Kao Kauta.  
\p
\v 1 Kalalovai kave'i, Kamata ena lalo'au kevatai namavaikana inoku e'aeta ita 'eva ia nakuna. Ita 'eva ia nakuna umauta. Kanobata kauta sia deikabasita 'olana 'eva ia Dilava sia deikabasia 'ounai.  
\v 2 E'u kau ma'adi e, vali'u ita 'eva Dilava nakuna, ita kau aboita 'eva asido'o ela'asi kave'i, beia ita kaikabasi Keliso be'asi koanai ita 'eva ia boinai ekao, 'olana ia umauna ekaikala.  
\v 3 Kau boutai Keliso kevanai nuabata kanania'i demimia kauta 'eva sibota nuatai si'avana beasi'i vitaitana Keliso nuanai si'avana asi'i boina.   
\p
\v 4 Kau ka si'avana evavaia 'eva Dilava ena talavatu evaivivia, 'olana si'avana 'eva talavatu evaivivia.  
\v 5 Beia oi 'ani oi oikabasi Keliso evaila 'eva si'avana beabi ovo, ia nuanai 'eva si'avana asi'i.  
\v 6 Kanaua 'ounai kau ka Keliso ita demia ka'ona kauna 'eva si'avana sia bevavai basibasi. Ia kau ka si'avana evavai basibasi kauna 'eva Keliso sia eikala une maivaka sia eikabasia.   
\p
\v 7 Naku'u ma'adi e, sia kau ka bevuamui beda'a va'eva vavai 'abutai. Kau ka vinaula komolona evavaia kauna 'eva ekomolo, vitaitana Keliso ekomolo boina.  
\v 8 Si'avana evavai basibasi kauna 'eva Diabolo ena, 'olana Diabolo 'eva 'ani makavanai si'avana evavai easi mo vali'u. Dilava nakuna easi 'olana 'eva kanania, Diabolo ena vinaula bevaolea.  
\v 9 Kau ka Dilava nakunai epupulu kauna 'eva si'avana sia bevavai basibasi, 'olana mauli makamakana Dilava enai e'asi maulina ia nuanai emimia. Ia Dilava enai epulu 'ounai si'avana sia bevavai basibasi.  
\v 10 Inoku Dilava nakuna mai Diabolo nakuna viloata 'eva ekaikabasi kave'i. Kau ka vinaula komolona sia evavaia 'o bo'akalana sia elalo'au venia kauna 'eva sia Dilava nakuna.   
\s1 Ita Ka Ka Ekavilalo'au Viveni.  
\p
\v 11 'Ana'inai oi oabiveni laloanai vali oi oika valina kanania: Ita ka ka ekavilalo'au viveni.  
\v 12 Kaino boinai sia oi bo'ao, ia 'eva Diabolo ena kau, sibona kadina Abela eaku bala. Dava 'ounai Kaino Abela eaku bala? 'Olana ia ena koakoa 'eva desi'avana, beia kadina ena koakoa 'eva dekomolo.   
\p
\v 13 Bo'akala'u e, kanobata kauta ulamui sia be'ula koanai, sia oi botabulovo.  
\v 14 Ita bo'akalata kalalo'au venita 'ounai kaikabasi ita 'eva ba laloanai 'ani kala'asi mauli makamakana laloanai kadodo. Ia kau ka ena lalo'au asi'i kauna 'eva ba laloanai emimia do'o.  
\v 15 Bo'akalana ulana sia e'ula kauna 'eva akuaku kauna, oi oikabasi akuaku kauna nuanai 'eva mauli keinikeini asi'i.  
\v 16 Keliso ena mauli eveni ita daitai. Kanaua'i ita kaikabasi lalo'au umauna 'eva dava. Kanaua 'ounai ita vaka eta mauli ekaveni bo'akalata daitai.  
\v 17 Kevanai dava doutamo kauna bo'akalana eulalu kauna eikala beia sia edulua koanai, kaikabasi Dilava ena lalo'au 'eva ia nuanai sia emimia.  
\v 18 Naku'u ma'adi e, eta lalo'au 'eva luvai mo mai nututai mo sia ekaluvala 'avaea, ia eta lalo'au 'eva eta koakoa umautai ekavaika vaikavaia.   
\s1 Ekakula'ila Dilava Vailanai.  
\p
\v 19 Dala kanania'i ekaikabasi ita 'eva Dilava ena luva umaunai kamimia, maivaka nuata bekula'ila Dilava vailanai.  
\v 20 Bema nuata bevalalovaita si'asi'a koanai, ita ekaikabasi Dilava 'eva enama vaika vakaia ita nuata mai kaikabasi davata boutai, maivaka ia 'eva dava boutai eikabasita.  
\v 21 E'u kau ma'adi e, ita nuata sia bevalalovaita si'asi'a koanai ita maikula'ilata Dilava vailanai 'ani ekalavadivo.  
\v 22 Inoku kevanai dava boutai ekanoinoi vai davata bevenita, 'olana ena talavatu luvana kada'avaia mai ivanama'inana vinaulana kavavaia.  
\v 23 Dilava ena talavatu luvana 'eva kanania, ita Ia Nakuna Iesu Keliso vana ekabivenia mai e'outa vitaitana ka ka ekavilalo'au viveni.  
\v 24 Dilava ena talavatu luvana eda'avaia kauna 'eva Dilava nuanai emimia, Dilava vaka ia nuanai emimia. Dilava Idume Kabukabuna evenita 'ounai, ita kaikabasi Dilava 'eva ita nuatai.   
\c 4  
\s1 Dilava Idumena  //  Mai Ka'uba Si'avana.  
\p
\v 1 E'u kau ma'adi e, Idume Kabukabuna deabia dekoma kauta boutai eta luva sia oi bovamomo'aita, ia oi bokovota makava oi boikabasi idume kanaua 'eva Dilava enai e'asi 'o asi'i. 'Olana enolea kauta dedeta doutamo kanobatai 'ani dela'asi 'abu bounai ai.  
\v 2 Dala kanania'i ekaikabasi ia 'eva Dilava Idumena deabia: Kau ka be'ou dae Iesu Keliso 'eva kauaniai easi kanobatai koanai, idume kanaua ia eabia idumena 'eva Dilava enai e'asi.  
\v 3 Beia idume ka Iesu e'oua avuavu 'eva Dilava enai sia e'asi. Idume kanaua 'eva Keliso ena 'ou kauna Diabolo enai e'asi. Valina oi oika be'asi 'eva ia 'ani easi vali'u kanobata kanania laloanai.   
\p
\v 4 Naku'u ma'adi e, oi 'eva Dilava ena, enolea kauta dedeta oi ova'ekotasi, 'olana Dilava Idumena nuamuiai emimia 'eva ekula'ila vaika vakaia diabolo kanobata kauta kevatai kanaua.  
\v 5 Ia enolea dedeta 'eva kanobata ena, kanaua 'ounai kanobata luvata mo deluva vaita kanobata kauta ia leleta de'ika.  
\v 6 Beia ita 'eva Dilava ena, kau ka Dilava eikabasia kauna 'eva leleta be'ika, ia kau ka sia Dilava ena kauna 'eva leleta sia be'ika. Kanania boinai luva umauna idumena mai dede idumena 'eva 'ani ekaikabasita.   
\s1 Dilava 'Eva Lalo'au.  
\p
\v 7 E'u kau ma'adi e, ka ka kamalalo'au viveni, 'olana lalo'au 'eva Dilava kevanai e'asi. Evilalo'au viveni kauna 'eva Dilava enai epupulu, maivaka Dilava eikabasia.  
\v 8 Ia sia evilalo'au kauna 'eva Dilava sia eikabasia, 'olana Dilava 'eva lalo'au.  
\v 9 Dilava 'eva ena lalo'au kanania evaikata koma, Nakuna ka'oukukunamo esinia easi kanobatai, inoku ia dainai ita ekamauli.  
\v 10 Lalo'au umauna 'eva kanania: Ita Dilava sia kalalo'au venia, beia Dilava ita elalo'au venita 'ounai Nakuna esinia easi ita eta si'avana i'oukaota veniveni davanai eao.   
\p
\v 11 E'u kau ma'adi e, Dilava 'eva kanania elalo'au venita koma 'ounai, ita vaka banota ka ka kanaua ekalalo'au venita koma.  
\v 12 Sia kau ka Dilava eikaia kovo, beia ita banota ka ka kalalo'au venita koanai, Dilava 'eva ita nuatai emimia, ena lalo'au 'eva enama'ina vaika ita nuatai.   
\p
\v 13 Dilava Idume Kabukabuna evenita 'ounai, kaikabasi ita 'eva Dilava nuanai kamimia mai ia vaka ita nuatai emimia.  
\v 14 Dilava Nakuna esinia easi kanobatai kau ivamaulita kaunai eao, inoku lai 'ani aikaia mai lai a'ouia dae.  
\v 15 Kau ka ena luvai bevamomo'aia Iesu 'eva Dilava Nakuna koanai, Dilava 'eva ia nuanai emimia, ia vaka Dilava nuanai emimia.  
\v 16 Elalo'au venita Dilavana kaikabasia mai kabivenia.  
\p Luva umauna Dilava 'eva lalo'au. Kau ka kau elalo'au venita kauna 'eva Dilava ia nuanai emimia, ia vaka Dilava nuanai emimia.  
\v 17 Dala kanania'i lalo'au nuatai 'eva enama'ina vaika, inoku ita 'eva sia ekamakau Dilava ena lavuai melalana laloanai, 'olana kanobata kanania laloanai eta mauli 'eva Keliso ena mauli vitaitana.  
\v 18 Dilava ena lalo'au laloanai 'eva sia ekamakau, Dilava ena lalo'au kula'ilanai 'eva makau boutai elo'ota asi, 'olana makau laloanai mekau lalovaina emimia. Kanaua 'ounai kau ka emakau 'eva ia nuanai lalo'au asido'o ekula'ila kave'i.   
\p
\v 19 Ita ka ka banota kalalo'au venita 'olana Dilava ita elalo'au venita makava 'ounai.  
\v 20 Kau ka ediaka ia Dilava elalo'au venia beia bo'akalana ulana sia e'ula koanai, ia 'eva dede kauna. Kau ka bo'akalana kaikala kauna sia elalo'au venia 'eva Dilava sia kaikala kauna sia belalo'au venia bedaia.  
\v 21 Keliso talavatu luvana evenita talavatuna kanania: Dilava elalo'au venia kauna 'eva bo'akalana vaka belalo'au venia.   
\c 5  
\s1 Abiveni Kauta Kanobata Ena Koakoa Ulata Sia De'ula.  
\p
\v 1 Kau ka Iesu eabivenia ia 'eva Keliso kauna kanaua 'eva Dilava nakuna, Kamana elalo'au venia kauna 'eva ia enai epulu melona vaka elalo'au venita.  
\v 2 Dilava kalalo'au venia mai ena talavatu luvata kadada'a vaita koanai, ekaikabasi komolo ita 'eva Dilava nakuna kalalo'au venita.  
\v 3 Ita Dilava kalalo'au venia 'eva ena talavatu luvata ekada'a vaita. Maivaka ena talavatu luvata 'eva sia depasisi ita kevatai.  
\v 4 'Olana Dilava nakuna boutai 'eva kanobata siavuna deva'ekoasia. Ita Dilava kabivenia, koakoa kanania'i kanobata ena siavu kava'ekoasia.   
\p
\v 5 Kanaua 'ounai kanobata siavuna deva'ekoasia kauta kataua mo sibota deabiveni Iesu 'eva Dilava Nakuna.   
\s1 Dilava Eta'u Nakuna Valina Ekava.  
\p
\v 6 Iesu Keliso 'eva veiai mai lalai easi, veiai eidi'u kabukabu mai au ido'o valaukuna akanai eba. Ia 'eva sia veiai mo easi, ia veiai mai lalai easi. Idume Kabukabuna vaka eluva asi, 'olana Idume Kabukabuna 'eva Dilava ena luva umauna.  
\v 7 Kanaua 'ounai kakoina 'eva Iesu devamomo'aia:  
\v 8 Idume Kabukabuna, vei, mai lala, kakoina eta luva 'eva ka'onamo, Iesu 'eva Dilava Nakuna.   
\p
\v 9 Ita kau deluva asi luvata eka abitadae, beia Dilava eluva asi luvana 'eva namavaikana 'olana ia 'eva Dilava, eluva asi vaia luvana 'eva ia Nakuna valina.  
\v 10 Kau ka Dilava Nakuna eabivenia kauna 'eva eluva asi vaia luvana kanania ia nuanai emimia. Dilava sia eabivenia kauna 'eva Dilava dede kaunai evaoa, 'olana kau kanaua 'eva Dilava Nakuna enai eluvaia luvana kanaua sia eabivenia.  
\v 11 Dilava eluva asi vaia luvana 'eva kanania: Dilava 'eva mauli keinikeini evenita, inoku mauli kanania 'eva ia Nakuna enai emimia.  
\v 12 Dilava Nakuna eabia dae kauna 'eva mauli 'ani eabia, ia Dilava Nakuna sia eabia dae kauna 'eva mauli sia eabia.   
\s1 Mauli Keinikeini.  
\p
\v 13 Dilava Nakuna vana oi oabivenia kaumui malele kanania alele venimui, 'olana oi boikabasi mauli keinikeini 'eva 'ani oi oabia.  
\v 14 Ita 'eva vakula'ila kanania kabia Dilava vailanai, ita ia ena ula vitaitanai dava ka ekanoia koanai leleta e'ika.  
\v 15 Ita ekaikabasi Dilava enai dava dava kanoinoi vaita 'eva leleta e'ika koanai, ekaikabasi komolo kanoinoi vai davata 'eva 'ani eka abita.   
\p
\v 16 Kau ka bo'akalana enai si'avana kanaua sia eba davana eikala koanai akanai bemeamea, inoku Dilava betata'u bo'akalana kanaua mauli bevenia. Lau kau kataua eta si'avana sia bevuata beda'a ba 'abuna kauta luvata aluluva. Beia kau vaida si'avana ka devavaia kanaua betata'u bevuata beda'a ba 'abuna. Lau si'avana kanaua akanai bameamea davana lovana sia akua.  
\v 17 Va'eva vavai boutai 'eva si'avana, beia si'avana vaida 'eva sia devuata deda'a ba keinikeini 'abuna.   
\p
\v 18 Ita kaikabasi Dilava nakunai de'ao kauta 'eva si'avana sia devavai basibasi. Dilava Nakuna e'imata kave'i, kau si'avana vaika ia sia beabita kovo.  
\v 19 Kaikabasi ita 'eva Dilava nakuna, ia kanobata itoina 'eva kau si'avana vaika ena siavu laloanai.   
\p
\v 20 Maivaka ita kaikabasi Dilava Nakuna easi 'eva nuata eva'ailalala, kanaua'i ita Dilava umauna ekaikabasia, mai ita 'eva Dilava umauna nuanai mai Nakuna Iesu Keliso nuanai kamimia. Iesu Keliso 'eva Dilava umauna maivaka ia 'eva mauli keinikeini Dilavana.   
\p
\v 21 Naku'u ma'adi e, dede dilavata kevatai oi bo'imamui kave'i mai kevatai oi boda'a tau.