\id TIT - Ewage-Notu NT [nou] -Papua New Guinea 1987 (web 2014) 
\h TITUS 
\toc1 Ove Titus Mi Burisira 
\toc2 Titus 
\toc3 Tit 
\mt1 Ove Titus Mi Burisira  
\c 1  
\p
\v 1 Na Paul mi ove eiawa jivena. Na awa Iesu Keriso da buro embo edo na awa Iesu Keriso da binga atopatari embo ra.  
\p Edo embo God mi jawo sisira ainda tumonda ari awa goroba arase edo ungo mi God da ge moka be awa gogo orase sedo God mi na jawo sedo na ungo kondade anase ititisira.  
\v 2 Edo God umo ungo mi wasiri natopo atari kumborase sedo dipapa isira awasedo umo na ungo kondade anase ititisira. Edo busu eiawa ae atiri God ge busae edo ira amimi sisira unemi ingodenaso yei wasiri matawa atari eiawa itadi sisira.  
\v 3 Edo iji God mi sisira awa bugiri umo uso binga awa isaga isira. Edo God ingodenaso soregari embo mi naso yei binga eiawa nanemi simba anase itido edo nanemi minonu sanase sisira. Edo unemi naso yei setiri gido na binga ewamei awa minonu sena.   
\p
\v 4 Edo Titus na ove eiawa iso yei gaiena. Imo Keriso gebe isesa teta na Keriso gebe isena awodo edo imo teta naso mei inge isesa.  
\p Edo God Mamo de Iesu Keriso ingodenaso soregari embo de mi iso yei ewamei ari de jo jamo jamo ari de itore.   
\s1 TITUS DA BURO CRETE BUSU DA AWA  
\p
\v 5 Buro ingae nanemi sangove nei ae doturisera awa atae asase sedo na imo Crete busu da doturisena. Edo na iso yei sisena nati berari ainda mambudo Iesu gebe ari embobo da gitijijigegari itasase sisena. Edo gitijijigegari da ro sisena awa ruvegeose.  
\v 6 Edo Iesu gebe ari embobo da gitijigari awa embo nenei da diti da wasiri biae mana adira. Edo umo aro da jimbadira te aro nei mana jimbadira. Edo uso kinapeina awa Keriso gebe adera. Edo embo mi uso kinapeina awa gido uso kinapeina awa saboa ari de kera ari de awa gadera.  
\v 7 Edo Iesu gebe ari embobo da gitijigari umo awa God da buro simba ira awasedo umo embo nenei da diti da awa wasiri biae mana adira. Edo umo mana jariga adira edo umo mana tini gambari burigi adira. Edo umo mana umo okain indido jiro biae adira edo umo iji berari mana embogo adi dipapa adira. Edo umo mana jinaga embo adira.  
\v 8 Edo esega embobo uso mando da bugadera awa ungo sapo edo gogo adira. Edo umo wasiri ewamei awa iji berari adira. Edo umo kotari ewagaewa de atadira. Edo umo wasiri ewamei de kotopu de atadira. Edo umo uso wasiri dedegurise atadira.  
\v 9 Edo umo binga gebe moka nango mi atopapotewora awa mana doadira te goroba de gebe adira. Eiedo umo awodo gebe ise binga awa embo nenei da yei atopatari be de atopapotirari ungoda tumonda ari awa goroba adira da awodo embo amemi binga awa gebe aera sadera awa gitijigari amemi ungo atopapotirari awa binga awa gebe awa gadera.   
\p
\v 10 Embo jiwae be God da ge moka awa kera ae edo era. Edo embo jiwae be mi sedo era Iesu gebe ari embobo awa Jew embobo da wasiri awa ambo ambo adera sedo era te ungoda ge awa jiro biae da ge ra. Edo ungo ge awodo sedo era amimi euri embo teta diti ambubu awodo era. Edo ungo mana God da emboro ewamei awa gae edo era.  
\v 11 Edo atopapotegari ainda ge awa atae are. Edo ungo mi ato awodo papotera amimi iri orobe jiwa God da ge moka be awa dodo demonda wowosera. Edo embobo eiawa atopatari biae awa atopapotera ainda be awa ungo ganu dipapa era awasedo.  
\v 12 Edo binga sari embo da Crete busu da amimi sisira, Crete busu embobo awa ge bubusegari embobo ra. Edo ungo awa jinjeri sino da awodo ingege ra. Edo ungo awa begogo embobo edo jinaga embobo ra sisira.  
\v 13 Edo umo awodo sisira awa gebe sisira awasedo Crete busu embobo da tumonda ari awa ewamei arase sedo re imo bekuba ge ungoda yei sedo awodo eove seio.  
\v 14 Edo Jew embobo da ewowo kiki bebegae awa dengoro eore. Edo embo God da ge moka ujo ae isera ainda agodari ge daedo dengoro eore.  
\v 15 Edo embo ave jo dagari ae be de atira embo awa rovi ravi teta ewagaewa awodo awa gido ira te embo ave tumonda ae ise jo dongono de da atima ira embo awa rovi ravi teta bebegae awodo awa gido ira. Edo ungo awodo gido era ainda be awa ungoda gari de ungoda jo de awa bebegae be bebegae awasedo.  
\v 16 Edo embobo awa ungo God gari sedo era te embo nenei mi embomei ainda bebegae edo era awa gido ungo embobo awa God be gae ta rora awodo awa gido era. Edo embobo awa embo nenei ujo ae edo era edo ungo kera ae edo era edo ungo buro da ro ewamei awa ari sagogo aera.   
\c 2  
\s1 IJI BERARI GOD DA GE MOKA AWA ATOPATIO  
\p
\v 1 Awarate Titus imo iji berari God da ge moka berari awa atopatio.  
\v 2 Edo imo embo mamatu awa atopapotise ungoda yei seio umo okain awa indove. Edo jiro gari mi wasiri awa ewo. Edo ingo ingosuka ingoda wasiri awa dedegurise atiwo seio. Edo ge busari awa ujo ae ise God da ge moka awa gebe ewo seio. Edo embo nenei da yei ewamei ise atawase seio. Edo ewamei ari awa dowase seio.   
\p
\v 3 Edo emboevetu ogogo awa atopapotise ungoda yei seio, atari kotopu deda atiwo teta Iesu gebe ari emboevetu atae etera awodo awa. Edo iji berari embo nenei da jawo da ge seore seio. Edo umo okain awa iji berari indido edo umo okain da agipo eore seio. Edo embo nenei da yei ro ewamei awa atopatorase seio.  
\v 4 Edo ungo awodo atopapotise emboevetu seseka awawa ungoda iubono de kinapeina de dubo borase sore seio.  
\v 5 Edo seio sore emboevetu seka awa kotari ewagaewa de wasiri dedegari ge atise edo wasiri ewagaewa de ungoda mando da rovi ravi awa edo gogo edo simba ore. Edo embo mi God da ge moka da jawo da ge biae seorase sedo awa emboevetu seka awa seio soro ungoda iubono kera ore.   
\p
\v 6 Edo memei singa awa atopapotise seio kotari ewagaewa kotise edo gogo edo atorase seio.  
\v 7 Edo Titus imo singa banga mi ari ewagaewa gido orase sedo awa iji berari wasiri ewagaewa eio. Edo imo ungo atopapotise gido edo gogo edo jo berari mi eio.  
\v 8 Edo ge embo mi kiki dirari ge ae awa seio ainda be awa iso gitopo awa ingodenaso jawo da ge busadi jarera edo ge bebegae awa eura edo ingodenaso jawo da sadi jarera awarate imo ge ewamei sadesa awa ungo ge biae ro awa tambudo sari katogo ae adera awasedo ungo tambae edo men gadera.   
\p
\v 9 Edo agipo embobo atopapotise gido ungoda yei seio, “Ingoda babojegari kera ewo edo ingo ro berari ewa awa awo ungo iaviri orase awa ewo. Edo ingoda babojegari mi ro awase sedo goro gido mina adi aera awa seove.  
\v 10 Edo ingoda babojegari da rora bengono eove ta ungo ingo tumonda iriroro iji berari ungoda yei buro ewamei ewo. Edo ingo ingoda babojegari da buro ewagaewa awodo adewa amimi ari embo God ingodenaso soregari embo da atopatari awa badera.”   
\p
\v 11 Amone ko God mi soregari da kando unemi embo berari da yei itadi dipapa evira ainda be moka awa isaga etira awasedo.  
\v 12 Isaga etiri awa umo ingodenanemi wasiri bebegae ari awa dodo edo busu da rovi ravi dipapa ari awa doarase dipapa ira. Edo umo ingodena ingodenasuka wasiri dedegurise atorase dipapa ira. Edo umo ingodena busu einda atise wasiri ewamei ise uso emboro awa ambo ambo orase dipapa ira.  
\v 13 Edo ingodenaso God nembodiba ingodenaso soregari embo da usasa bugarase simba edo era awa bugadira. Edo ingodena iji awa bugarase simba atera eingo de umo wasiri boroko setena awodo awa atorase dipapa ira.  
\v 14 Edo ingodena wasiri bebegae berari da soregadi sedo Iesu Keriso bebetisira. Edo umo bebetisira awa umo ingodenaso jo awa segari ingodena uso embo ewagaewa orase isira. Edo umo bebetisira awa ari ingodena uso embobo wasiri ewagaewa adi dipapa edo era embobo awodo orase isira.   
\p
\v 15 Edo iji berari ge awa atopatio. Edo imo iso goroba berari de mi embo atopapotise esusu ari ge ungoda yei seio awarate embobo wasiri ewagaewa ae atera awa bekuba ari ge seio. Edo embo da mi imo ro sesa awa nembodiba ae awodo koture.   
\c 3  
\s1 EIEDO ATIWO  
\p
\v 1 Embo da yei eiawa ruvegeore seio. Ungo gitijijigegari embobo de embo nembogamo de awa sapo ise ungo kera ore. Edo ungo wasiri ewagaewa neinde kainde awa ore.  
\v 2 Edo ungo embo nenei da jawo da biae seore. Edo ungo jo jamo jamo de atise edo embo berari da yei umo jigari ewamei ise atore. Edo ungo embo berari da yei edo gogo ore.   
\p
\v 3 Daedo matu ingodena awa jiro ae gido wasiri bebegae awa isera. Ingodena kera ae isera edo atopapotegari bebegae mi ingodena ganduburisera. Edo ingodena iji berari ingodenaso joda dipapa awa ise wasiri bebegae neinde kainde awa isera. Edo ingodena iji berari embo nenei da jawo da biae kotedo ungo ujo ae edo isera. Edo embo nenei mi ingodena ujo ae eoro edo ingodena ungo ujo ae edo isera.  
\v 4-5 Edo ingodena awodo atima isera te ewamei ari de dubo bari de awa God ingodenaso soregari embo da awa bugiri iji ainde God mi ingodena soregurisira. Edo God ingodena soregurisira awa ingodenaso ari ewamei awa embo aera te umo ingodena jo isira awasedo. Edo God mi ingodena segetiri edo Asisi Kotopu mi etiri ingodena wasiri seka da atadi tuturo isera teta ingodena seka ingari inge isera.  
\v 6 Edo God ingodenaso soregari embo Iesu Keriso mi ingodena embo ro isira awasedo Asisi Kotopu jojetiri umo wosedo ingodena beda isira.  
\v 7 Edo God ingodenaso yei ewamei etiri ingodena ungae da umo jigari ewamei isera. Edo ingodena God ga da umo jigari ewamei isera awa ingodena gosera ingodena wasiri matawa atari badera awa.  
\v 8 Edo ingodena gosera ge eiawa gebe ra.  
\p Awasedo embo God gebe edo era awa buro ewamei orase sedo awa imo goroba edo nanemi boroko ro setena awa atopatio amone awa sena. Edo gebe amone ge ewamei na. Edo ungo ge eiawa ingise wasiri ewamei ore ainda be awa wasiri ewamei mi embo kondade edo ira.  
\v 9 Awarate embo ge bagera embobo ainde da anumbedo atose. Edo embo God gae da ge de edo ge bagari ge de edo Jew embobo da agodari ge da ge bagari de ge mina mina sari de awa jegigi eio ainda be awa embo ge awodo sera amimi embo nenei kondade aera re.  
\v 10 Edo embo amemi iri Iesu gebe ari embobo ewoga ewoga edo diti etoto era embo ainda yei seio awodo eose. Edo umo ge iso awa ingae ari gido sekago uso yei seio awodo eose. Saso ingae ari gido imo umo dodo mambuio.  
\v 11 Ko imo gosesa embo ave wasiri awodo edo era amone God dodo emboro nei da pepeta ira awa embo biae ra. Edo wasiri bebegae unemi ira amimi umo embo biae awa isaga ira.   
\s1 GE SANGOVE AWA  
\p
\v 12 Iso yei Artemis awa iteni ta mo ko Tychicus awa iso yei iteni? Embo etoto einda embo da iso yei itano bugadira awa imo edo gido naso yei da bugadesa Nicopolis nati da ainda be awa na ainda ga wosadira awa ainda atadi kotena awasedo.  
\v 13 Edo Zenas agodari embo de Apollos de ungoda buro tuturo orase sedo awa edo gido ungo kondade eio. Edo ungo nati dada da pepeta ise ro dipapa adera rora awa itio.  
\v 14 Edo ingodenaso embo awa atopatio wasiri ewagaewa ore ise embo nenei memesi burera awa kondade ore. Edo ingodenaso embo awodo atopatadesa awa tepo anumbedo mana atadera.   
\p
\v 15 Edo embo berari einda nangae atima era amimi imo ategurera. Edo ingodenaso Iesu gebe ari otatao berari awa seio gore nango mi ungo ategurera.  
\p God da ewamei ari ingo berari da yei matawa atare.  
\cls Awara  
\cls Iso namendi  
\cls Iesu Keriso da jawo da  
\cls Paul