\id ROM - Ewage-Notu NT [nou] -Papua New Guinea 1987 (web 2014) 
\h ROMANS 
\toc1 Ove Rome Nati Embobo Mi Burisera 
\toc2 Rome 
\toc3 Rom 
\mt1 Ove Rome Nati Embobo Mi Burisera  
\c 1  
\s1 PAUL ROME NATI EMBOBO ATEGURISIRA  
\p
\v 1 Na Paul Iesu Keriso da agipo ari embo mi ove eiawa ingoda yei gaiena. Edo Iesu da binga atopatari embo anase God mi na kataburisira. Edo God mi na uso binga ewamei awa minonu sanase kataburisira.   
\p
\v 2 Matu be matu God mi binga ewamei eiawa uso binga sari embobo da yei isaga isira. Edo isaga etiri Iesu Keriso busu da bugae giti da ungo God umo ro adi sisira awawa jiwari kotopu da gaisera.  
\v 3 Edo binga ewamei eiawa God uso mei Iesu Keriso ingodenaso Bada da jawo da ra. Edo busu da uso kumbari awa Iesu Keriso awa gitijigari nembodiba David da orobe da teda awa.  
\v 4 Awarate uso God inge ari awawa Iesu umo gido betetiri God mi uso goroba mi umo etiri eririsira awasedo ingode gosera ingodenaso Bada Iesu Keriso awa God da mei na.  
\v 5 Edo God umo naso yei riroga ro itae ra ainda be awa umo na dubo budo ira awasedo. Edo unemi Iesu da binga atopatari buro awa naso yei ititisira edo unemi na busu berari da mambanase sisira. Edo na mambuse embo berari mi Iesugebe ise kera orase sedo na binga eiawa ujugedo ena.  
\v 6 Edo ingo Rome nati embobo God ingo deda Iesu Keriso da embobo awase jawo setira.   
\p
\v 7 Awasedo ingo Rome nati da embo berari ave ave God mi be dubo be budo uso topo orase jawo sisira ainda yei na ove eiawa gaiena.  
\p God ingodenaso Mamo de Bada Iesu Keriso de mi ingoda yei iji berari ewamei ore. Edo iji berari oro ingoda jo awa jamo jamo ore.   
\s1 PAUL ROME NATI EMBOBO GADI DIPAPA ISIRA  
\p
\v 8 Naso ge sae tuturo da awa na God ategurena Iesu Keriso da jawo da awodo awa sano gadewa ainda be awa embo yei berari da awa ingo Iesu Keriso ge be ewa awa gosera.  
\v 9 Edo na iji berari binga ewamei uso mei da jawo da atopapotena edo iji berari God awa naso jo berari mi sapo edo ena. Edo God umo gosira na iji berari ingo awa kotise iji berari uso yei sedo gido ena ingo simba ise edo ingo kondade arase.  
\v 10 Edo na iji ribori simba ise na God manunu gedo ena iji ainde na ingo esega adi sedo iji berari God sedo gido ena emboro burigi arase.   
\p
\v 11 Edo ingoda tumonda ari awa goroba arase sedo na Asisi Kotopu mi na ro atopapotara awawa ingode kando edo badi sedo awa embo na ingo gadi dipapa ena.  
\v 12 Edo na mambudo ingode da awodo kando adena edo ingo daedo Asisi Kotopu mi ingo ro atopapotara awa nangae da kando edo badewa amimi ingodenaso tumonda ari awa goroba adira. Edo ingode awodo ise emboro awodo da kondade mina ara adera.   
\p
\v 13 Edo naso nanonamendi na iji jiwae be ingo esega adi kotemona te rora da ami na beitigedo ira awa sano gawase sena. Na iji berari ingo esega irinono amimi ari embo ingoda teda awa Iesu be goroba de gebe orase dipapa edo ena teta embo Jew ae da teda isena da awodo.  
\v 14 Edo na awawa embo berari da agipo ari embo ra awasedo na binga ewamei awa embo isaga da atera ainda edo embo unjugedo atera ainde da yei sadena edo embo gari jiwae burisera ainda gari kiambu burisera ainda yei sadena.  
\v 15 Awasedo na daedo ingo Rome embobo da yei na binga ewamei sadi sia etena.   
\s1 BINGA EWAMEI AWA GE GOROBA DE RA  
\p
\v 16 Naso tumonda ari berari awa binga ewamei da atira. Edo binga ewamei awa God da ge goroba de awara awasedo embo averi Jew embo ta embo Jew ae ri awa binga ewamei awa gebe adira edo God mi ungo soregadira.  
\v 17 Edo binga ewamei emimi euri God mi embo budo ituri ungae da umo jigari da emboro awa isaga edo ira. Edo emboro einda embo God ga da umo jigari ewamei da edo era. Edo embo ave iji berari tumonda edo ira embo awa God mi ari umo jigari ewamei ungae da edo ira. Edo einda ge sise jiwari mi sisira,  
\q1 “Embo ave uso tumonda ari mi God ga da umo jigari ewamei adira embo awa atari ewamei awa tambadira.”   
\s1 EMBO YEI BERARI DA AWA WASIRI BEBEGAE ISERA  
\p
\v 18 God mi embo wasiri bebegae be ewora awasedo umo tini gambari edo ungo kasadi sedo emboro awa isaga etira. Edo wasiri bebegae embo mi edo era amimi emboro beitigeuri ungo God da uso ge be moka awa gae jaredo era.  
\v 19 Edo God mi ungo usibesi adira ainda be awa God uso ge be moka awa embo da yei isaga etiri edo embo mi isaga gosera awasedo.  
\v 20 Edo tuturo da God busu da rora berari de isira iji ainda edo bugudo boroko God iji berari uso goroba da be moka de umo mo averi awa isaga evira. Edo embo mi be moka eiawa ungoda diti mi gari sago ae rate ungo rora berari God mi isira awa gido isaga God uso goroba awa gosise edo umo averi awa roawasedo gae edo eri? Awasedo embo mi be tambudo wasiri bebegae ise atari sago ae ira.   
\p
\v 21 Edo ungo God mo averi awa gosera te ungo God sapo ae ise umo atae awodo awa edo era. Edo unemi ro isira awasedo umo jasiga ae edo era. Edo ungoda kotari awa bebegae edo umenga mi ungoda jiro awa sirido atira.  
\v 22 Edo ungo sedo era ungo awa jiro gari embobo sedo era ungo awa jiro gari embobo sedo era te ungo awa jiro egae embobo ra.  
\v 23 Edo ungo God natopo atari awa tumondebain ae rate ungo ove kewari teta embo betedo ira awa inge edo rimei de jingabu de ove kekevegari ingege de rora nenei jiwae be ungo mi tumondebain adi sedo kevedo era.   
\p
\v 24 Edo embo ave wasiri biae edo era awa jiro egae embobo ra awasedo God mi ungo awa doturira. Edo ungo dotiri kotari bebegae berari ungoda jo da kotera awa era. Edo daedo ungo mengari wasiri awa mina ara edo era.  
\v 25 Edo ungo ge moka be God da jawo da awa gebe ari ujo ae era awarate ungo God da jawo da ge busari ge sera awa gebe era. Edo ungo God rora berari isira embo awa tumondebain ae dodo, ungo rora God mi isira awa tumondebain edo era. Edo embo yei berari da awa iji berari God jasiga ae etera. Awasedo God ungo doturira. Awa gebe ra.   
\p
\v 26 Embo wasiri bebegae era awasedo God ungo doturira. Edo ungo dotiri ungo mengari nembodiba budo purari wasiri awa mina ara era. Edo emboevetu awa ungo ungosuka mina ara edo era. Edo ungo mi ari wasiri awodo awa ari sago ae awa era.  
\v 27 Edo da awodo embo awa ungoda aro asini de atari da wasiri awa ae rate ko ungo ungoda embo nenei de da evera. Edo embo awodo ise ungo ungosuka kombo mina ara ari awa edo era. Edo awodo era awa ungo wasiri biae be biae awa era awasedo ungo riroga ungo mi dipapa era awa burera.   
\p
\v 28 Edo embo iji berari God da ge be moka ro gosiseri awa ruvegadi dipapa edo era awasedo God ungo doturira. Edo ungo dotiri ungoda kotari awa biae be etiri ungo iji berari wasiri ungo mi ari sago ae awa edo era.   
\p
\v 29 Edo embobo wasiri bebegae neinde kainde edo era. Edo embo nenei mi embo nenei da rora awa dipapa era. Edo ungo iji berari wasiri bebegae mina ara edo era. Edo kotari bebegae mina kota edo era. Edo embo nenei dorero bebetera. Edo embogo mina ara era. Edo embo nenei da jawo da ge busera. Edo ungo iji berari wasiri bebegae awa embo nenei da yei arase dipapa edo era. Edo ungo embo nenei da wasiri biae gido embo nenei da yei sedo era.  
\v 30 Edo embo nenei da yei ge biae sedo era. Edo ungo God ujo ae edo era. Edo ungo awa jariga embomei. Ungo sedo era ungo awa embo ewagaewa. Edo ungo iji berari awa wasiri biae adi emboro seka kotedo edo era. Edo ungoda aimamo da yei ge jinjedo era.  
\v 31 Edo embo dita baita ari wasiri awa edo era. Edo ungo sarigari sedo era te amboda ungo ae edo era. Edo ungo kando mina ara ae edo era.  
\v 32 Edo embo gosera God da agodari mi sira awa embo wasiri biae adera awa embo wasiri biae adera awa betedo riroga natopo badera awarate ungo gae sira ise iji berari wasiri bebegae eiawa edo era. Edo daedo embo amemi wasiri biae adira awa ungo awara sadera. Edo embo awodo sise ungo wasiri bebegae era edo embo nenei da wasiri bebegae edo era awa gido sedo era.   
\c 2  
\s1 GOD MI YEI BERARI DA EMBO BERARI AWA KASADIRA  
\p
\v 1 Naso otatawo ingo embo nenei da ari awa gido ungo awa wasiri bebegae embobo sedo ewa awarate na ingoda yei ge sena. Ingo bara wasiri bebegae ungo era da awodo edo ewa te ingo mi ungo awa wasiri bebegae ari embobo sise ingo ingosuka awa ingo wasiri bebegae ae embobo sedo ewa. Edo awodo sise ingo mana God da yei ingo wasiri biae ae embobo sadewa.  
\v 2 Edo ingodena gosera God da yei bajari ari atira awasedo embo wasiri bebegae edo era awa kasedo ira.  
\v 3 Edo naso otatawo ingo kotewa God embo nenei wasiri bebegae edo era awa kasise ingo wasiri bebegae ungo era da awodo ewa awa derigadira awodo ingo mo kotevita?  
\v 4 Edo God ingoda yei sasaimbari mi edo ira ainda be awa umo ingo dubo burira awa ingo mo ujo evita mo ujo ae evi? Edo God ingo ingoda wasiri bebegae awa dodo uso yei wareregawase dipapa ira awasedo iji tupo ae be ingoda yei edo gogo edo ira. Awase na kotena ingo awa gaeta rora.   
\p
\v 5 Awarate ingo awa jiro bebegae embobo awasedo ingo awa iji berari wasiri bebegae ise atewowa edo ingoda jimbo awa diripu edo vivitira teta embo mi ungoda gano dada ari yei da dada eoro diripu edo sauma ira da awodo. Awasedo God iji sangove da tini gambari edo embo berari awa edo gogo edo kasadira awa irirari ingo ingoda riroga diripu evira awa badewa.  
\v 6 Edo iji ainde God mi ingodena ingodenaso wasiri da ro ewora awa tetegedo mina itadira.  
\v 7 Embo nenei wasiri ewamei ise atewora awa God mi ungoda yei uso usasa de jasiga borega ari de edo wasiri natopo atari de awa itarase dipapa era ainda yei wasiri natopo atari awa itadira.  
\v 8 Awarate embo nenei wasiri biae awa ambo ambo ise wasiri ewamei ujo ae edo era awa ungoda yei God umo tini gambari edo riroga bouga be awa itadira.  
\v 9 Memesi de oju de awa embo wasiri bebegae edo era ainda yei bugadira giti Jew embobo da yei edo amboda embo Jew ae ainda yei.  
\v 10 Awarate God mi uso usasa de jasiga borega ari de jo jamo jamo ari de awa embo buro ewamei edo era Jew embobo inge ainda yei giti itido edo amboda embo Jew ae inge ainda yei itadira.  
\v 11 Edo embo berari awa God da diti da inono na awasedo umo ungoda yei ari berari inono da edo ira.   
\p
\v 12-15 Edo embo ave wasiri biae adira embo ainda yei awa God mi riroga itadira. Edo God uso agodari jiwari awa embo Jew ae ainda yei itae ra te embo ave ungoda teda amemi wasiri biae adira awa embo ainda yei God mi riroga itadira. Ainda be awa ungo wasiri ewamei rawari edo wasiri biae rawari awa ungo garira ainda be awa agodari ro sira ungoda joda atira. Edo ungoda kotebari mi daedo sedo ira amone wasiri biae ra o amone wasiri biae ae ra awasedo ungo wasiri biae eri ta ko wasiri biae ae ri awa ungo gosera. Edo God mi Jew embobo amemi wasiri bebegae adera ainde daedo riroga itadira. Ainda be awa God uso agodari jiwari awa ungoda yei ititisira awa ungo agodari awa kera ae edo era awasedo. Edo ungo ro aderi awa ungo gari rate ungo ae edo era. Edo embo ungo ro aderi awa gari rate ungo ae edo era awa mana God mi soregadira. Einda be awawa ingodena agodari gosera amimi ari ingodena God ga da umo jigari ewamei adi aera awarate ingodena agodari ro sira awawa adera amimi ari ingodena God ga da umo jigari ewamei adera.  
\v 16 Edo iji bugadira ainde God mi Iesu Keriso da yei awodo embomei ungoda jo da kotari gae kotedo era awa isaga da kasadira. Edo na binga ewamei eiawa bejedo sise re iji berari uso be eiawa ingoda yei sedo ena.   
\s1 AGODARI MI RO JEW EMBOBO DA YEI SIRA  
\p
\v 17 Edo ingo Jew embobo kotewa awa ingo agodari God Moses da yei sisira awa tumonda edo ewa amimi sari God mi ingo soregadira awodo kotewa. Edo ingo awa God da otatawo ewoga be awodo gosise jariga edo ewa.  
\v 18 Edo God ingo ro awase dipapa ira awa ingo gosewa. Edo agodari mi ewamei mo rawari edo biae mo rawari awa atopapotiri gosewa.  
\v 19 Edo ingo sedo ewa ingo awa diti guba egeregari da dedegari embobo edo daedo sedo ewa ingo awa umenga da atima era embobo ainda usasa.  
\v 20 Ingo garira teta gae inge ewo embo nei atopatarago edo era. Edo daedo sedo ewa ingo awa embo jiro ambubu da dedegari embobo. Edo God mi uso agodari awa ingoda yei ititisira awasedo ingo kotewa awa ingo gari berari awa be bari kotise edo ingo ro berari sedo ewa awa gebe sari kotebedo ewa.  
\v 21 Edo ingo embo nenei atopatido ewa te ko ingo ingosuka atopatae edo ewa. Edo ingo embo nenei da yei bengono eove sise dodo ingo mi bengono edo evita rora?  
\v 22 Edo ingo embo nenei da yei dita eove sise dodo ingo mi dita edo evita rora? Edo ingo ove kewari tumondebain ari ujo ae ise dodo ko ingo ove kewari tumondebain ari ujo ae ise dodo ko ingo asisi da indari bengono edo evita rora?  
\v 23 Edo ingo agodari da ge awa ewamei sise dodo ko ingo agodari awa bejedo ewa amimi euri God sapo ae edo ewa.  
\v 24 Amone ujugurira jiwari mi ingoda jawo da sira awa gebe ira. Edo ge jivedo sira,  
\q1 “Embo Jew ae amimi God ganduburera ainda be re ingo Jew embobo mi iji berari wasiri bebegae edo ewa awasedo.”   
\p
\v 25 Ingo agodari kera adewa awa ingoda tamo da andiso diugari da wasiri mi ingo kondade adira awarate ingo tamo da andiso diugari da wasiri awawa ise dodo agodari awawa beuso adewa awawa ingoda tamo da andiso diugari da wasiri adewa amimi ingo kondade mana adira.  
\v 26 Edo embo Jew ae awa tamo da andiso diugae atise edo agodari mi ro arase sira awa ira embo awa God da diti da awa tamo da andiso diugari inge ainda be awa ungo God da ge kera edo era.  
\v 27 Edo agodari da ge awa ingo Jew embobo da topo ra edo ingoda tamo da andiso diugurisewa te ingo agodari awa kera ae edo ewa. Edo embo Jew ae awa ungoda tamo da andiso diugae rate ungo agodari da ge awa kera adera ami ari ungoda wasiri mi ingo Jew embomei God Kera ae atima ewa awa isaga adira.   
\p
\v 28 Embo ave awawa God da topo awawa ingo kotevi? Edo embo amemi Jew embobo da ari wasiri berari awawa adira amimi ari umo God da topo awodo eita?  
\v 29 Awodo aera te eiawa giwo God da Asisi mi embo da jo da torido buro ari edo embo awawa embo God da topo awodo adira te agodari mi buro awawa adi aera. Edo embo ememi wasiri awodo edo ira awa God mi jasiga borega edo ira te embo mi jasiga borega ae edo era.   
\c 3  
\s1 EMBO DA WASIRI BEBEGAE MI GOD DA GE AWA MANA JUMBARI WOSADIRA  
\p
\v 1 Jew embomei mi ungoda mamoumbogo da ari wasiri awawa irirari amimi embomei Jew ae ainda wasiri awa derigari awodo ingo kotevita? Edo embo da tamo da andiso diugari amimi embo awa kondade aetita ko adi aeri?  
\v 2 En! God uso binga awa Jew embomei kondade arase ititisira. Itiri ungo simba arase bajari budo isera.   
\p
\v 3 Edo Jew embomei nenei mi God da yei saboa ae isera awarate ingo kotewa mo amimi ari God ungoda yei saboa ae eita?  
\v 4 Anan awodo aera. Embo berari awa ge bubusegari embobo awodo adera te God umo awa gebe embo awodo natopo atima ira. Edo jiwari God da jawo da sedo sisira,  
\q1 “Iji nonde imo ge sadesa awa embo mi imo gebe sesa awa gadera. Edo iji nonde embo mi imo bekuba adera awa iso ge mi ungo potegadesa.”   
\p
\v 5 Edo embo nenei mi sedo era, “Ingodena wasiri bebegae adera amimi ari embomei mi God awa gadera. Awarate God sira unemi ingodena riroga itadira mo ewamei ta?” Edo emboro awodo awa embo nenei mi sedo era.  
\v 6 Awarate awodo aera ungo ro sedo era awa gebe aera. Edo God umo ewamei ae gido derigadira awa umo mana busu da embo awa kasadira.   
\p
\v 7 Edo embo nei mi sadira, “Naso ge busari mi God da gebe ari awa ari isaga ari embo mi God jasiga adera awa God mana na kasadira.”  
\v 8 Edo embo ge awodo sise gebe ae sedo era, “Ewamei bugarase sedo awa puwo ingode wasiri bebegae ore.” Edo embo nenei mi na kamena kawaga ise ge awodo awa nanemi sari sedo era awasedo ungo re ari awodo da kasadira.   
\s1 EMBO BERARI AWA WASIRI BEBEGAE ISERA  
\p
\v 9 Awasedo na ro seni? Jew embobo atima era emboro amimi embobo Jew ae atima era emboro awa derigedo ita? Anan awodo aera. Edo na matu ingoda yei karigeteno getewa, Nango Jew embomei de Jew ae embomei de awa ungoda wasiri bebegae teta esi inge ra awa ungo busedo ira.  
\v 10 Edo ge jiusera awodo,  
\q1 “Embo ave awa God da diti da bibinango aera.  
\v 11 Edo embo berari awa God da emboro be awa gae jaredo era. Edo embo berari awa God tambadi eura ae edo era.  
\v 12 Edo embo berari awa ungoda ari bebegae mi euri God seugedo demonda wosedo era. Edo ungo berari awa ari bebegae edo era.  
\v 13 Edo ungoda be awa pirigari teta uje be inge awasedo ungoda be da awodo ge pasega sari embo tokaka be awa bugudo ira. Edo ge betari masa biae teta jingabu da jone inge awa ungoda avewa da ijegedo ira.  
\v 14 Edo ungoda be awa isibari de dumo ge de tini gambari de mi beda edo ira.  
\v 15 Edo ungo burigi memesi ititise edo deoro betedo era.  
\v 16 Edo ungo yei rawainda mambutera awa ero embo dubo vevera de memesi de tambutera.  
\v 17 Edo ungo jo jamo jamo ari tambari da emboro awa ungo gae jaredo era.  
\v 18 Edo ungo God oju ari awa gae jaredo era.”   
\p
\v 19 Edo ingodena gosera ro berari agodari mi sira awa embo amemi agodari da jigido takibedo atera ainda sira. Edo agodari embobo awodo da yei ge siri busu berari da embo wasiri bebegae edo era embo awa ungo ungosuka beitigari ge sari katogo ae era. Edo agodari mi ari God mi embo berari awa kasadira.  
\v 20 Edo embo agodari mi ro sira awa edo amimi ari mana ungo God ga da umo jigari ewamei adera. Awarate agodari mi ari embo ungo wasiri bebegae ewora awa gadera.   
\s1 EMBORO EIEDO DA EMBO GOD GA DA UMO JIGARI EWAMEI EDO ERA  
\p
\v 21 Awarate boroko God mi embo emboro rawodo da ungae da umo jigari ewamei aderi awa isaga etira. Embo da umo agodari ge da saboa edo ira amimi mana ari umo God ga da umo jigari ewamei da mana adira. Awarate agodari de God da binga sari embobo de awa emboro ainda ge sisera.  
\v 22 Embo mi Iesu Keriso awa tumonda adera emboro ainda embo awa God ga da umo jigari ewamei adera. Edo Jew embobo de embo Jew egeregae de awa God da diti da awa neinde kainde aera awasedo embo berari amemi Iesu Keriso tumonda adera awa God ga da umo jigari ewamei adera.  
\v 23 Edo embo berari awa wasiri bebegae isera awasedo God da atiti awa ungo doturisira.  
\v 24 Edo emboro eiedo da embo God ga da umo jigari ewamei adera. Edo God da soregari embo da yei itido ira awa kando ra. Edo embo mi mina itido kando awa mana badera ko Iesu Keriso mi mina awa matu ititisira awasedo. Itido wujegurisira.  
\v 25 Edo God mi Iesu betarase ititisira teta embo mi rorou itido era awodo awasedo embo Iesu tumonda adera awa God mi ungoda wasiri bebegae awa kotembedo doadira. Edo embo God ga da umo jigari ewamei adera ainda emboro awa isaga adi sedo God Iesu itiri bugudo bebetisira. Edo matu awa God embo da wasiri bebegae awa gido riroga itae ainda be awa umo Iesu itari bugudo betadira ainda iji awa simba ise gido.  
\v 26 Awarate boroko God Iesu Keriso itiri bugusira amimi betedo ingodenaso riroga burisira. Edo awodo ise amimi isaga ira God umo awa ewamei edo ira edo embo amemi Iesu tumonda adera embo awa God ga da umo jigari ewamei adera awa isaga ira.   
\p
\v 27 Awasedo ingodena rora rori ainda derido jariga adera en? Awodo aera ko ingodena awa agodari da derido jariga mana adera ainda be awa ingodena agodari awa kera edo amimi mana God ga da umo jigari ewamei mana adera. Awarate ingodena Iesu Keriso tumonda adera awa ingodena God ga da umo jigari ewamei adera.  
\v 28 Edo ingodena mana ge eiawa doadera. Edo embo amemi agodari kera adira amimi mana God ga da umo jigari ewamei adira te embo amemi Iesu Keriso tumonda adira embo awa God ga da umo jigari ewamei da adira.  
\v 29 Edo God mo ingodena Jew embobo ungo ungosuka ungoda God ta mo ko embo Jew ae ainda daedo ungoda God ri? Gebe umone Jew embobo da God edo embo Jew ae ainde daedo ungoda God ra.  
\v 30 Edo God umo Jew embobo de embo Jew egeregae de daedo simba ari da awodo edo ira. Edo Jew embobo da teda embo da amemi Iesu Keriso tumonda adira embo awa God ga da umo jigari ewamei adira. Edo daedo embo Jew ae ainda teda embo da amemi Iesu Keriso tumonda adira embo awa God ga da umo jigari ewamei adira.  
\v 31 Edo Iesu Keriso awodo tumonda ise ingodena agodari ge awa ujo ae erita? Awodo aera te ingode ero agodari awa goroba edo dederira.   
\c 4  
\s1 ABRAHAM DA KIKI MI TUMONDA ARI DA BE AWA ISAGA IRA  
\p
\v 1 Edo ingode ingodenaso umbogo Abraham awa kotore. Umo ewamei ari da susu mo ro tambusiri?  
\v 2 Edo umo buro ewamei isira amimi ari umo God ga da umo jigari ewamei da ae etira re umo jariga ae etira. Awarate umo God da diti da jariga ari awa jarisira.  
\v 3 Edo ingo gosewa awa jiwari mi sira, “Abraham awa God gebe isira awasedo God Abraham gosise sisira embo eiawa nangae da umo jigari ewamei be ira sisira.”   
\p
\v 4 Edo uso be eire. Edo embo buro edo ira awa uso mina budo ira. Edo embo mi embo ainda mina awa uso kando awodo sae rate ungo sedo era embo oiawa buro edo mina betira sedo era.  
\v 5 Awarate God mi sira ungae da umo jigari ewamei adi adera awawa embo mi buro ewamei edo amimi mana adera te God umo tumonda adira amimi adira. Edo ingodena God umo tumonda adera amimi God umo gadira ingodena awawa teta embo wasiri bebegae ae embobo awodo gadira.  
\v 6 Edo God embo da buro ewamei awa gae rate umo embo umo tumonda ira awa gido sedo ira embo oiawa nangae da umo jigari ewamei ira sedo ira. Edo God awodo seuri embo awa iaviri edo ira. Edo einda jawo da David mi jiwari da sira,   
\q1
\v 7 “Embo amenda wasiri bebega awa God mi tupedo edo kotembedo dodo ira embo awa iaviri edo ira.  
\v 8 Edo embo awa God mi umo wasiri bebegae ae awodo gido ira embo awa iaviri edo ira.”   
\p
\v 9 Edo iaviri ari da ge David mi sisira mo umo mo Jew embo tamo da andiso diugari wasiri edo ira ainde berari sisita mo embo nenei de daedo sisiri? Umo embo tamo da andiso diugari wasiri ae edo era embo Iesu gebe era ainde daedo sisira. Edo ingodena eiawa gari ainda be awa matu setena jiwari mi sisira awa, “Abraham God gebe isira awasedo God Abraham gido sisira embo eiawa nangae da umo jigari ewamei ira sisira.”  
\v 10 Edo ge eiawa nanjigo God mi Abraham da yei sisiri? Umo tamo da andiso diugari wasiri burisira ainde isita mo ko tamo da andiso diugari wasiri awa bae atiri isiri? Eiawa giti da isira te amboda aera.  
\v 11 Edo amboda awa umo tamo da andiso diugari wasiri awa burisira. Edo tamo da diugari wasiri awa Abraham umo matu God tumonda edo edo umo God ga da umo jigari ewamei ira awarate embo gorase wasiri awa isira. Awasedo Abraham awa embo berari tamo da andiso diugae embobo God tumonda edo edo God ga da umo jigari ewamei edo era ainda umbogo ra.  
\v 12 Edo umo ungoda umbogo ewowo isira awawa ungo tamo da andiso diugari wasiri awawa ae rate ungo God tumonda era teta Abraham mi umo tamo da andiso diugari wasiri awa bae atise God tumonda isira da awodo era awa gosera ungo God ga da umo jigari ewamei era awasedo.   
\s1 GOD MI ABRAHAM DA ADI SARI SISIRA  
\p
\v 13 God Abraham da yei adi sari sisira awa busu berari awa uso topo edo uso orobe da simba arase sisira. Edo Abraham agodari awa kera isira awarate awa embo God Abraham da yei adi sari awa sae ra. Awarate Abraham God tumonda isira awasedo God umo sisira nanemi eteno embo oiawa nangae da umo jigari ewamei ira. Edo awasedo God adi sari awa Abraham da yei sisira.  
\v 14 Edo God umo saera embo agodari kera adira amimi God mi ro itari borase sisira awawa kumbadi aera te embo God tumonda adera embobo amimi kumbadera.  
\v 15 Edo ingodena God da agodari ge awa kera edo ewamei badi dipapa adera awa mana badera ainda be awa ingodena God da agodari ge awa kera ae sumbae adera. Edo ingodena God da agodari ge awa kera adi jaradera ainda sangove re ingodena awa God da tini gambari da petadera. Awarate agodari ge awa atae re agodari beuso ari re bugadi aera.   
\p
\v 16 Edo God mi Abraham da yei ro itadi sisira awa umo embo umo tumonda edo era embobo berari ainda yei itido ira te Jew embobo God da agodari ge sisira awa kera edo era embobo ainda da aera te embo berari God tumonda edo era teta Abraham mi isira da awodo edo era ainda yei. Edo emboro ainda ingodena Abraham awawa ingodenaso nombo ewowo sedo era.  
\v 17 Edo God mi ge ainda jawo da jiwari joda sisira,  
\q1 “Nanemi ano embo busu berari da atima era amimi iso orobe adera.”  
\m Edo God umo umosuka adi sari eiawa sisira, embo amemi busu rawainda ainda Abraham God gebe isira God awa gebe adera embo awa Abraham da orobe adera. Unemi bebetegari awa euri wasiri de sekago erido era. Edo umo ro adira awa sedo ira teta matu ari awodo.   
\p
\v 18 Edo God mi Abraham da yei sisira, “Iso orobe da ajigari awa neingo atae be teta damana da awodo adera.” Edo Abraham adi sari awa ingisira edo ari sago ae awodo awa gosisira te umo God gebe ise umo ro adi sisira awa petedo isira. Edo umo awodo gebe edo umo embo jiwae be da umbogo isira.  
\v 19 Edo Abraham da gaeko awa 100 aikambu awasedo umo kinapeina da mamo ari sago ae edo uso aro awa gasou jirari katogo ae ko umo awa ogo awasedo awarate awa kotise uso tumonda ari God da yei ituri erido bajido isira.  
\v 20 Edo Abraham uso gebe ari awa doae isira. Edo umo iji berari God gebe isira edo umo God da adi sari ainda kotari jiwae aera. Edo uso tumonda ari mi jo goroba edo God jasiga borega isira.  
\v 21 Edo Abraham umo gosisira God uso adi sari awa adira awa.  
\v 22 Awasedo God Abraham da tumonda ari gido etiri umo God ga da umo jigari ewamei isira.  
\v 23-24 Edo ge gaisera God mi ari embo ungae da umo jigari ewamei adera ainda ge awa Abraham de edo embo God mi ari ungo ungae da umo jigari ewamei adera ainda yei gaisera. Edo embo oiawa God gebe adera edo Iesu ingodenaso Bada awa betetiri unemi sekago jigiri eririsira awa gebe adera ainda yei ge awa gaisera.  
\v 25 Edo God ingodenaso wasiri bebegae awasedo Iesu itiri bebetisira. Edo Iesu betetiri God umo ari ingodena ungae da umo jigari ewamei orase sedo God sekago Iesu etiri eririsira.   
\c 5  
\s1 GOD MI ETIRI INGODENA UNGAE DA UMO JIGARI EWAMEI EDO ERA  
\p
\v 1 Ingodenanemi Iesu Keriso tumonda etero unemi etiri ingodena God ga da umo jigari ewamei edo era. Edo ingode bega da atima era Iesu Keriso da buro awasedo.  
\v 2 Edo Iesu Keriso mi ingodenaso tumonda awasedo ingodena giti jigido God da kondade ari awa bari emboro da mambusira. Edo ingodena kando awa budo boroko ingodena goroba de dederera. Edo ingodena boroko simba ise iaviri era ainda be awa ingodena gosera amboda awa God mi ingodenaso yei uso usasa awa itadira.  
\v 3 Edo ge nei sadena ingodenaso yei memesi puradira awa ingodena iaviri adera ainda be awa memesi mi ari ingodena goroba ise atadera.  
\v 4 Edo God umo ingodena memesi da joda goroba de ise atima era awa gido umo gosira ingodena ewamei adi dipapa era awa gosira. Gido umo iaviri ira. Edo ingodena God ingodenaso yei iaviri ira awa gosise ingodena God umo ro adi adi sari sisira awa simba adera.  
\v 5 Edo ingodena awodo simba adera awa ingodena jaro de adi aera ainda be awa Asisi Kotopu God mi ingodenaso yei ititisira amimi ingodenaso jo awa God da dubo bari mi sirisira. Awasedo ingodena mana mana mana adera te gosera God umo ro adi sari sisira awa adira.   
\p
\v 6 Edo ingodena ewamei ari awa goroba ae etero ainde Iesu Keriso ingodena wasiri bebegae embobo awa embo bebetisira. Edo God iji ewamei bugiri Iesu Keriso betarase itiri bugusira.  
\v 7 Edo ingo ro kotevi? Edo embo mi embo ewamei awa embo betae etita? Awasi embo roinge mi awodo awa aderita rora.  
\v 8 Awarate God mi ingodenaso yei umo be ingodena dubo budo ira awa isaga isira. Edo ingodena wasiri bebegae ise atero Keriso ingodena embo bebetisira.   
\p
\v 9 Edo Iesu Keriso awa uso ororo wosetiri bebetisira awasedo God mi etiri ingodena God ga da umo jigari ewamei edo era. Edo da awa aera te amboda God mi busu berari da embo berari awa kasadira. Edo God tini gambari adira iji ainde ingode gosera Keriso mi ingodena soregadira.  
\v 10 Edo ingodena matu awa God da gitopo ra ingodenaso wasiri bebegae awasedo awarate uso mei bebetisira awasedo God mi etiri boroko ingodena God da otatao etera. Edo da awa aera te Iesu Keriso ingodenaso joda atise ari ingodena soregadira.  
\v 11 Edo da awa aera te ingodenaso Bada Iesu Keriso etiri ingodena awa uso otatao etera awasedo ingodena iaviri era.   
\s1 ADAM AWA BETARI DA EMBORO DA SUSU AWARATE KERISO AWA WASIRI DA EMBORO DA SUSU  
\p
\v 12 Embo da Adam mi God beuso etiri edo wasiri biae busu berari da embo da yei bugusira. Tuturo etero betari daedo embo berari da yei bugusira. Edo embo berari wasiri bebegae isera awasedo betari busu berari da embo berari da yei bugusira.  
\v 13 Edo Moses da agodari ge awa bugae atiri embomei wasiri bebegae edo isera awarate agodari ge awa bugae atisira awasedo embo mi wasiri biae ro isera awa sari sago aera.  
\v 14 Awarate Adam da iji da tuturo edo mambudo Moses da iji de awa embo berari betari awa oju edo era. Edo embo wasiri biae God da agodari tuturo awa beuso teta Adam mi isira awodo aera te emboro nei wasiri bebegae etero betari awa ungoda yei bugusira.  
\p Edo Adam awa kiambu teta Iesu Keriso amboda bugadira awa inge ra.  
\v 15 Awarate ungo etoto awa da awa aera ainda be awa God da soregari kando awa Adam da betari kando awodo aera. Edo God sisira embo berari awa betadera ainda be awa Adam da wasiri biae awasedo. Edo embo jiwae be bebetisera embo da Adam da wasiri biae amimi awa gebe ra awarate God da kando amimi Adam da God kera ae ari wasiri awa nembodiba be derigurira awasedo God Iesu Keriso itiri edo soregari kando awa embo jiwae be da yei ititisira.  
\v 16 Edo God embo da yei uso kando itido ira ainda emboro de Adam da wasiri biae da emboro de awa ewoga ewoga ra. Edo Adam da wasiri biae awa God da kasari da susu ra awarate God embo berari da wasiri biae gido ungo umo jigari ewamei orase dipapa edo Iesu Keriso kando itiri bugusira.  
\v 17 Edo embo berari betadera ainda be awa Adam mi wasiri biae isira awasedo awa gebe awarate ro Iesu Keriso da betari mi etiri isira amimi ro Adam da uso wasiri biae mi etiri isira awa be derigedo gogo isira. Edo embo ave God mi ari ungae da umo jigari ewamei adira edo God da soregari da kando awa badira embo awa Iesu Keriso ga gitijigadira.   
\p
\v 18 Awasedo ingodena berari awa riroga da emboro da mambutera ainda be awa embo da Adam da wasiri biae mi awarate boroko Iesu Keriso da uso ari ewamei mi wujegetiri edo demonda atari de edo wasiri de awa embo berari da yei bugusira.  
\v 19 Edo embo jiwae be wasiri bebegae edo era ainda be awa embo da Adam mi God kera ae isira awasedo awarate God mi etiri embo jiwae be awa God ga da umo jigari ewamei adera ainda be awa embo da Iesu Keriso mi God kera isira awasedo.   
\p
\v 20 Edo embo mi wasiri biae mo rori awa gorase sedo God uso agodari Moses da yei itiri gaisira. Edo God uso agodari itiri embo agodari ainda tini gambari isera. Etero ungoda wasiri bebegae awa babojisira. Edo embo da wasiri bebegae iji berari bajido isira awodo awarate God da dubo bari da kando mi wasiri biae awa derigedo nembodiba etira.  
\v 21 Edo embo berari wasiri biae edo era awasedo betari awa iji berari embo berari da yei bugudo ira awarate God mi dubo bari mi gitijijigurise ari ingodena awa ungae da umo jigari ewamei adera. Edo ingodena God ga da umo jigari ewamei iriroro uso dubo bari mi ingodena awa gitijigido budo wasiri mata awa atari da mambadira ainda be awa ro ingodenaso Bada Iesu Keriso mi isira awasedo.   
\c 6  
\s1 IESU KERISO MI ETIRI INGODENA ATIMA ERA.  
\p
\v 1 Awasedo God mi rawodo ari ingodena ungae da umo jigari ewamei adera awa na ro seni? Edo God mi uso dubo bari ingodenaso yei isaga adi sedo irirari ingode iji berari wasiri bebegae ise aterita?  
\v 2 Awodo aera ingode awodo adi aera. Edo wasiri biae awa ingodena awa teta betari embobo awodo ra awasedo ingode mana iji berari wasiri bebegae ise atadera.  
\v 3 Edo ingo gosewa ingodena umo mi ewamei ari wasiri burisera awa isaga ira Iesu Keriso ga da dada isera. Edo ingodena ungae da dada isera awa ingodena teta ungae da betari da awodo isera.  
\v 4 Edo Keriso betetiri God uso goroba usasa de mi umo etiri eririsira da awodo ingodena wasiri seka awa erido badi sedo ingodena umo mi ewamei ari wasiri awa edo edo ingodena awa teta betari edo Iesu ga da gowari inge isira.   
\p
\v 5 Edo ingodena teta Iesu gada betari inge adera awa God mi ingodena jigari erido edo wasiri seka awa teta Iesu sekago erido wasiri seka burisira da awodo awa badera.  
\v 6 Edo ingode gosera ingodenaso jo da wasiri biae da dipapa atira awa goroba ae arase sedo edo ingodena awa wasiri biae da agipo embo awodo eorase sedo ingodenaso kotari matu awa Iesu ga da orega da bebetisira mamatu awa Iesu ga da orega da bebetisira.  
\v 7 Ainda be awa embo ave betedo era embo awa wasiri bebegae da dipapa da goroba mi umo usibesi ari awa dorase sedo umo atae isira.   
\p
\v 8 Edo ingodena awa teta Keriso ga da betari inge isera awasedo ingodena gebe edo era awa ingodena ungae da wasiri seka budo atadera awa gebe edo era.  
\v 9 Edo ingodena gosera Keriso betetiri God mi umo jigiri eririsira. Edo Keriso mana sekago betadira ainda be awa betari awa umo usibesi ari awa goroba ae etira awasedo.  
\v 10 Edo umo inono edo bebetisira awa wasiri biae da riroga awa be atae arase sedo bebetisira awarate boroko umo God ga da umo jigari ewamei de da atima era.  
\v 11 Edo emboro awawa kotewo ingo teta betari inge isewa edo wasiri biae da dipapa awa umo ingo usibesi ari awa goroba ae isira awarate ingo Keriso Iesu ga da dada edo God jasiga borega ise atima ewa.   
\p
\v 12 Edo wasiri biae ingoda tamo atae adira awa gitijigadi dipapa ira awa ingo wasiri biae da dipapa awa ujo ae ise edo ingoda tamo da bebegae da dipapa mi ingo ro awase sira awa eove.  
\v 13 Edo tamo patu ingoda awa doawo iwata biae eure edo ingoda tamo patu nenei awa wasiri biae da goroba da itove. Awarate ingo awa God mi ro ewamei da jingama arase awasedo ingoda tamo berari awa God da yei itiwo ainda be awa ingo awa teta bebetegari embobo awodo edo God mi wasiri seka de da jigari erari inge etewa awasedo.  
\v 14 Edo ingo awa Moses da agodari da agipo aera te God mi ingo awa jo edo wujegurisira awasedo wasiri biae da dipapa mi mana ingo awa gitijigadira.   
\s1 INGODENA AWA EWAMEI ARI DA AGIPO EMBOBO RA  
\p
\v 15 Awasedo na ro seni? Ingodena wasiri bebegae ise aterita ko ingodena awa agodari da agipo embobo ae edo awarate God unemi ingodena jo edo wujegurisira awasedo? Awodo aera.  
\v 16 Na ingo gawase dipapa ena ingo embo nei da agipo embo adi dipapa edo ungae da dada adewa re uso ge awa kera adewa. Edo ingo embo ainda ge kera adewa awa uso agipo embo adewa. Edo da awodo ingo ingoda tamo awa wasiri biae da itido re wasiri biae da agipo embo adewa awa amimi ari ingo betae sumba isewa awarate ingo ingoda tamo awa God da yei itido re uso agipo embo adewa amimi ari ingo God ga da umo jigari ewamei da adewa.  
\v 17 Edo ingode boroko God doio sore ainda be awa matu awa ingo awa wasiri biae da agipo embo awodo isewa te boroko awa ingo ingoda jo berari mi kera etewa gebe moka ungo mi ingo atopapotisera awa.  
\v 18 Edo ingo kera etewo God mi wasiri biae da esi awa wujegetiri ingo awa wasiri ewamei da agipo embobo etewa.   
\p
\v 19 Edo God da ge awa ingoda gari awa pirigae awasedo rora nati da ingo gido ewa awa na iji berari gaedo ena. Iji tupo ingo ingoda tamo awa ari bebegae neinde kainde awa adi itido edo wasiri biae da agipo embobo ititawa awarate boroko ingo wasiri ewagaewa da ari awa God mi awase dipapa ira awasedo ingoda tamo awa ari wasiri ewamei ari da itiwo edo wasiri ewamei da agipo embo ave.   
\p
\v 20 Iji tupo ingo awa wasiri biae da agipo embobo ewowa awarate iji ainde awa ingo God mi ro ewamei awase dipapa isira ainde da bundae ra.  
\v 21 Edo ingo iji tupo wasiri bebegae oiawa ewowa edo amimi iri ingo me gosewa edo riroga ro burititavi? Edo wasiri biae awodo edo era amimi euri embo riroga wasiri natopo da betari awa budo era.  
\v 22 Awarate God mi wasiri biae da esi awa wujegetiri ingo awa God da agipo embobo etewa. Edo ingo uso agipo embo etewa edo ingoda riroga awa boroko edo iji berari wasiri ewagaewa ise God da diti da atadewa edo ingo wasiri matawa atari awa badewa.  
\v 23 Edo wasiri biae da mina awa betari ra awarate ingodena Iesu Keriso ingodenaso Bada ga da takibetera awa God mi wasiri matawa atari itadira. Itiri uso kando awa ingodena mina itido badi aera.   
\c 7  
\s1 INGODE WASIRI SEKA DA GE SORE  
\p
\v 1 Naso nanonamendi ingo na ro sadi ena awa gosewa ainda be awa ingo berari agodari awa garira. Edo embo wasiri de atira awa agodari mi uso goroba mi umo jigido atira awarate embo awa betadira awa agodari da goroba awa berari atae edo ira.  
\v 2 Awarate eiedo ra evetu uso iu wasiri de atira awa umo uso iu awa doari sago ae ira ainda be awa agodari mi ungo awa dada digido atira awasedo awarate uso iu betadira awa agodari mi umo digari awa atae adira.  
\v 3 Awasedo uso iu wasiri de atirari edo umo embo nei de da jimbadira awa umo ipu da ari wasiri awa ira. Awarate uso iu betadira awa agodari da goroba mi ungo etoto bundedo atira awa atae ari umo deposi adira. Awasedo umo embo nei de da jimbadira awa umo ipu da ari wasiri awa mana adira.   
\p
\v 4 Naso nanonamendi eiedo awa ingoda yei edo ira. Keriso betetiri ingo awa teta ungae da betari inge isewa. Edo ingo teta ungae da betari inge etewo ingo agodari tumonda ewowa awawa soregari tambawase atae etira. Awasedo boroko ingo embo nei da topo adewa. Awarate Iesu betetiri God mi jigiri eririsira. Edo boroko ingo God da buro ewamei awa adi sedo Iesu Keriso ga da dada etewa.  
\v 5 Giti da embo berari atadi dipapa edo era awodo ingode atima isera iji ainde agodari mi etiri ingodenaso wasiri bebegae ari da dipapa mi erido ingodenaso tamo da goroba etiri gido ingode wasiri bebegae mi iji berari betari da giti edo mambuteuri edo isera.  
\v 6 Awarate boroko agodari da bundari mi ingodena mana jigadira ainda be awa ingodena awa teta betari inge isera edo agodari ingodena bundisira ainda goroba awa atae isira awasedo. Edo ingodena boroko emboro matu agodari mi atopapotisira awodo awa God sapo aerate Asisi Kotopu da emboro seka awa ambo ambo ise awodo God sapo edo era.   
\s1 AGODARI MI WASIRI BIAE AWA RORI AWA ISAGA IRA  
\p
\v 7 Ingode ro seri? Ingode Moses da agodari awa biae serita? Awodo aera. Edo agodari mi wasiri biae mo rori awa naso yei isaga etira. Ge ujugadena eire. Edo agodari mi sira embo nenei da rora badi dipapa eose awasedo na gosena embo nei da rora badi dipapa adena awa biae ra.  
\v 8 Edo agodari mi emboro etiri wasiri biae da dipapa emboro ainda pepeta ise etiri dipapa neinde kainde bebega awa naso joda erido edo goroba jiwae be era. Awarate agodari atae awa wasiri biae awa teta betari da awodo ae etira.  
\v 9 Edo na bajido agodari rawodo buro edo iri awa gadi jarise awa na edo gogo edo atima isena. Awarate agodari da buro da gebe awa gido awa na embo biae awa isaga gosisena.  
\v 10 Edo na daedo gosisena awa na wasiri matawa da betari awa badena awa gosisena. Edo agodari mi na wasiri natopo bae etena awa dodo agodari mi betari natopo awa naso yei budo bugusira.  
\v 11 Edo agodari mi emboro etiri wasiri biae emboro ainda pepeta ise na gandubetiri na kotisena awa wasiri natopo badi sedo agodari kera ae isena. Edo awodo gandubedo wasiri biae mi etiri na awa teta betari inge isena.   
\p
\v 12 Awasedo na gosena agodari awa wasiri biae de aera edo agodari berari awa ewamei na. Edo agodari da ge ememi embo da yei emboro be awa ujiji edo embo kondade edo ira.  
\v 13 Edo awa gebe ta agodari mi etiri na awa betari inge iseni ta? Awodo aera. Edo agodari aera te wasiri biae da dipapa mi rora ewamei awa jingama edo etiri na teta betari inge isena. Edo wasiri biae mi emboro ainda buro ise etiri na wasiri bebegae awa ewamei ae ra awa gosisena. Awasedo agodari mi isaga ira awa ari wasiri bebegae awa biae be biae ra.   
\s1 EMBO DA JODA EMBOGO EDO ERA  
\p
\v 14 Ingodena gosera agodari awa God da rora rate na awa busu da atari embo ra. Edo na awa wasiri biae da dipapa da agipo embo teta embo awa embo nei da ori ari uso agipo embo arago isira.  
\v 15 Edo na ro ena awa na gaera ainda be awa na ro adi dipapa ena awa aerate na ro ari ujo ae ena awa ena.  
\v 16 Edo na wasiri biae ena ari ujo ae ena amimi isaga ira awa na gosena agodari awa ewamei na.  
\v 17 Awasedo na nasuka eiawa aera awarate wasiri biae dipapa da mi naso joda atise amimi iri na eiawa ena.  
\v 18 Edo na gosena ewamei awa na busu da atari embo da joda ataera ainda be awa na wasiri ewamei awa ari dipapa ena te ari sago ae ena.  
\v 19 Edo na ro ewamei awa ari dipapa ena awa aerate na wasiri biae ari dipapa ae ena awa ena.  
\v 20 Edo na ro na ari dipapa ae ena awa ena ainda be awa na nasuka eiawa aera te wasiri biae mi naso joda atise iri na wasiri eiawa ena.   
\p
\v 21 Awasedo na gosena buro einda emboro awa naso joda ira. Edo na iji berari wasiri ewamei adi dipapa edo ena te wasiri biae mi naso joda goroba de gitijijigurise euri na iji berari wasiri biae edo ena.  
\v 22 Edo na iji berari kotedo ena God da agodari awa ewamei na. Edo na agodari einda yei iaviri ena.  
\v 23 Awarate buro emboro nei awa naso joda ira. Edo buro emboro nei eiawa agodari ewamei kotedo ena ainga da iji berari embogo edo ira. Edo buro emboro nei emimi euri wasiri biae naso joda buro ise atima ira amimi na bundedo ira.  
\v 24 Aio na dubo vevera ira ainda be awa buro emboro nei ira emimi na giti edo betari da budo mambudo wujegurira. Edo na amemi wujegeiri?  
\v 25 Edo na God doio sena ainda be awa unemi ingodenaso Bada Iesu Keriso mi na embo ro isira awasedo na wujegadira.  
\p Edo na ro sena ainda ambo da eiawa sadena. Ingodena ingodenaso kotari da ingodena God da agodari awa sapo adi dipapa era te ingodenaso joda awa ingodena wasiri biae da buro emboro awa kera adera.   
\c 8  
\s1 INGODENA AWA ASISI KOTOPU MI RO SIRA AINDA ATERA  
\p
\v 1 Embo ave Iesu Keriso ga da dada pepeta adira embo awa wasiri biae da mina awa mana badira.  
\v 2 Edo einda be awa Asisi Kotopu mi goroba de ingodenaso joda buro ise edo ingodena wujegetira awasedo. Edo Asisi Kotopu ingodena wujegari edo wasiri biae de betari de awa ingodenaso joda gitijijigurera awa atae isira. Edo ingodena Iesu Keriso ga dada isera. Edo Asisi Kotopu mi ingodenaso yei wasiri seka ititisira.  
\v 3 Edo ingodena agodari da ge awa ambo ambo edo era te amimi ingodena kondade aera ainda be awa ingodenaso jo awa bebeta awasedo ingodena ro agodari mi sira awa ari sago aera. Awarate God mi ingodena kondade adira. Edo God emboro nei sia etira ainda ingodena soregadira. Edo umo uso mei awo da tamo ingodenaso da awodo awa ititisira awarate uso tamo da awa wasiri biae ataera. Edo uso mei bugudo umo umosuka ingodenaso bebegae awasedo rorou ititisira edo amimi etiri wasiri biae da riroga ingodenaso joda awa atae isira.  
\v 4 Awasedo boroko ingodena Asisi Kotopu mi ro sira ainda atadera edo ro bebegae ingodenaso joda dipapa edo era ainda atadi ae adera awa ingodena God da agodari awa kera adera.   
\p
\v 5 Edo embo ave ro bebegae ungoda joda atima ira amimi rawodo orase seuri edo era awa ungo iji berari tamo pigise wasiri bebegae edo era. Awarate embo ave ungo ro Asisi Kotopu mi orase siri ainda atera awa Asisi Kotopu mi ungoda jo awa gitijiguri edo uso dipapa awa edo era.  
\v 6 Awarate dipapa bebegae mi ingoda jo awa gitijigadira awa amimi ari ingo betari matawa atari awa badewa te ingoda jo awa Asisi Kotopu mi gitijigadira awa amimi ari ingo ewamei atise edo jo jamo jamo ari badewa.  
\v 7 Awasedo dipapa bebegae mi embo da jo awa gitijigadira awa embo awa God da gitopo adira ainda be awa umo God da agodari awa kera ae ira edo umo kera ari sago ae ra.  
\v 8 Edo embo ungo ungoda dipapa bebegae mi ro orase dipapa era awa ungo mi ro oro God iaviri adiri awawa ari katogo ae.   
\p
\v 9 Awarate God da Asisi awa ingoda joda atira awasedo awa ingo awa ingoda dipapa bebegae mi rawodo atawase sira awodo aera. Edo ro Asisi Kotopu mi awase siri awa awodo adewa. Edo embo amenda jo da Keriso da Asisi awa atae awa embo uso topo aera.  
\v 10 Edo ingoda tamo awa wasiri bebegae awasedo betadira awarate Keriso ingoda jo da atira awasedo awa ingoda asisi awa wasiri de atira ainda be awa God mi etiri ingo awa ungae da umo jigari ewamei ewa awasedo.  
\v 11 Iesu betetiri God mi jigiri eririsira. Edo God da Asisi ingoda jo da atira awasedo God Iesu jigiri eririsira amimi ingoda tamo betedo dakawa ira ainda wasiri itira amimi awa uso Asisi awa ingoda jo da atira awasedo.   
\p
\v 12 Awasedo naso nanonamendi ingodena ingodenaso wasiri bebegae da dipapa orase wujegae doturisira awarate ingodena ro Asisi Kotopu mi ingodena orase dipapa ira awa wujegurera.  
\v 13 Edo ingo ro dipapa bebegae mi awase dipapa ira awodo atadewa awa betari matawa atari awa badewa awarate Asisi Kotopu da goroba mi ingo dipapa bebegae awa dawo betadira awa ingo atadewa.  
\v 14 Edo embo ave God da Asisi kera adira embobo awa God da kinapeina ra.  
\v 15 Edo God umo uso Asisi itiri bugusira amimi ari ingo agipo embobo awase aera edo ari ingo sekago oju awase aera awodo aera te Asisi Kotopu mi ari ingo God da kinapeina adewa. Edo Asisi Kotopu mi ari ingode God da yei sadewa, “Mama, naso Mama.”  
\v 16 Edo God da Asisi de ingodenaso asisi de mi ge da eiawa sedo era ingodena awa God da kinapeina ra.  
\v 17 Ingodena ainda be awa ingodena awa God da kinapeina mi God da itipapo de gaiapa de awa badera ainda be awa ro God mi uso mei Iesu da ititisira awa ungae da ingode badera. Ko ingodena busu da atise memesi unemi burisira da awodo ingode badera gido awa ingode atari ewamei unemi burisira da awodo badera.   
\s1 ATARI EWAMEI INGODENANEMI BADERA AWA  
\p
\v 18 Edo atari ewamei God mi amboda ingodenaso yei isaga ari badera amimi memesi ingode busu da atise burewora awa be derigedo gogowo adira awasedo nanemi mana mina ita edo tega adena.  
\v 19 Edo iji ainde God mi ingodena awa uso kinapeina da gari be awa isaga adira awa rora berari God mi isira awa simba ira.  
\v 20 Edo rora berari God mi isira awa be jiwae ae atira edo ungoda wasiri awasedo aera te God mi setiri isira awasedo. Awarate God umo gosisira amboda iji ewamei awa bugadira.  
\v 21 Edo iji awa bugari God mi rora berari unemi isira ainda bebetegari da bundari awa wujegadera. Edo rora berari God mi isira awa wujegari God da kinapeina mi badera da awa badera.   
\p
\v 22 Edo ingodena gosera tuturo da edo bugudo boroko rora berari God mi isira awa memesi iji berari burise atima era teta evetu mi mei badi ise memesi budo ira da awodo awa.  
\v 23 Edo rora God mi isira amimi da memesi burera edo ingodena daedo God da kando giti Asisi Kotopu burisera ainde da memesi awodo burera. Edo ingodena God mi uso kinapeina awodo raro isira edo ingodenaso tamo seka itarase sedo simba ise ingodenaso joda memesi burise atima era.  
\v 24 Awarate God ingodena soregurisira iji ainde tuturo edo bugudo ingodena boroko umo tumonda edo umo rora ewamei itadira awa simba edo era. Ingodena rora ro kumbadi dipapa edo era awa matu kumbudo awa ingode rora awa dipapa ise atadi aera. Edo ingodena rora matu gari awa simba edo erita? Awodo aera.  
\v 25 Awarate ingodena rora ingode matu gae awa diti adera awa saboa edo simba adera.   
\p
\v 26 Da awodo ingodenaso tumonda ari God da yei amimi Asisi Kotopu mi bugudo ingodena embobo goroba ae awa kondade edo ira. Edo ingodena ro God da yei benunu saderi awa gae ra awasedo ingodenanemi men de da ge ato jaroro gido Asisi Kotopu mi kondade edo God da yei ingodena awa embo sedo gido ira.  
\v 27 Edo God embo da joda ro atiri awa gari awa Asisi Kotopu ro sira awa gido ira ainda be awa Asisi Kotopu mi God da embo awasedo God da yei uso wasiri mi sedo gido ira.   
\p
\v 28 Edo ingodena gari ra ingodena embo God dubo burera ainda yei ro bugudo ira ainda God mi buro ira ro ewamei awa embo umo dubo burera ainda yei bugarase. Edo eiawa God mi embo berari uso wasiri awa orase jawo sisira ainda yei edo ira.  
\v 29 Edo embobo God tuturo da umo gosisira umo gebe adera embobo awa budo uso mei inge arase ititisira. Edo God awodo isira awa uso mei awa mei bego awodo ari edo ingodena awa uso nanonamendi menmenya awodo orase isira.  
\v 30 Awasedo embo God mi tuturo da kataburisira embobo awa jawo sisira. Edo embo jawo sisira embobo awa unemi etiri ungo ungae da umo jigari ewamei isera. Edo embo ungae da umo jigari ewamei da isera awa ungo uso usasa awa kando etiri burisera.   
\s1 IESU KERISO MI GOD DA DUBO BARI NEMBODIBA AWA INGODENASO YEI ISAGA ISIRA.  
\p
\v 31 Ge ewagaewa awa kotise ingode ro seri? Ingode eiedo sadera God awa ingodenaso otao awasedo ingodena awa embo buro ira awasedo embo da rawai ingodena usibesi adi aera.  
\v 32 Edo God uso mei da bugari awa jigido petae ra te itiri bugusira rorou ingodena awasedo itarase. Edo umo uso mei ingodenaso yei ititisira awasedo ingodena gosera umo ingodena umo sapo orase rora ewamei nenei kando itadira.  
\v 33 Edo ingodena tuturo da embo God mi uso embo orase kataburisira awa embo amemi ingodena awa bekuba edo inono aderi? Edo embo da rawai ari sago aera ainda be awa God umo umosuka etiri ungo ungae da umo jigari ungae da ewamei edo era awasedo.  
\v 34 Edo embo amemi God da embobo awa kaseri? Embo da amemi ari sago aera ainda be awa Iesu Keriso ingodena awa embo iji berari God da yei gegeta ise ingodena kondade edo ira. Edo embo re Keriso awa betetiri God mi wasiri de jigiri eririsira. Edo God umo jigiri erido umo God da ingo be kena anumbedo atira.  
\v 35 Awasedo rora amemi ingodena awa Keriso da dubo bari da awa ari ewoga ewoga eri? Wasiri biae mi ko iji biae mi ta dari gaiari ta beji ta rora ae atari mi ta buria mi ta dari betari mi ari awa bugeita?  
\v 36 Edo rora berari eiawa ira ingodenaso yei awa teta jiwari mi sira awodo,  
\q1 “Iji berari iji dada da nango imo awasedo nango betari da buria edo era. Edo nango teta wo sheep doro betarase budo mambarago ise biae edo era.”   
\p
\v 37 Awarate rora berari emimi da rawai ari ingodena Keriso da dubo bari da awa kausu kausu adi aera ainda be awa umo ingodena dubo budo ira amimi iji berari kondade irirari ingodena ungoda yei goroba be edo derigadera.  
\v 38-39 Edo na gosena rora da ro mi ari ingodena Keriso da dubo bari da awa kausu kausu adi aera. Betari de ro ingodena busu da atiroro adira edo asisi berari de utu da gitijijigegari de utu da rora goroba neinde kainde de edo rora matu isira ainde edo ro amboda adira ainde edo rora utu da ainde rora busu da ainde mi mana ingodena oro God da dubo bari da awa kausu kausu adera. God mi ingodenaso Bada Iesu Keriso itiri bugusira amimi isaga isira awa umo ingodena dubo budo ira awa.   
\c 9  
\s1 EMBOMEI GOD MI KATABURISIRA  
\p
\v 1 Na ro adi sena awa gebe ra. Na ge busae ra ainda be awa na awa Keriso da topo ra. Edo ge javi mi naso joda ge sira edo Asisi Kotopu mi daedo naso yei siri na ge sena awa gebe ra.  
\v 2 Edo na naso embo topo Iesu Keriso awa ujo ae isira awasedo dubo vevera nembodiba budo ena. Edo na naso orobe da jawo da ge sedo ena Jew embobo. Edo na naso joda ungo embo memesi budo ena awa atae mana adira.  
\v 3 Edo naso embomei awa Iesu gebe orase sedo na nasuka dubo ewamei de da God da isibari awa budo edo Keriso seugedo dodo atima ena.  
\v 4 Edo embomei Abraham da apipie jawo Israel da orobe awa God mi kataburisira. Edo God mi etiri ungo uso kinapeina isera. Edo unemi ungoda tumondebain ari oro bo mi ari ainda joda torido uso usasa mi ungoda yei da isaga isira. Edo unemi uso agodari awa ungoda yei da ititisira. Edo unemi soregari embo awa itiri bugarase sedo ungoda yei adi sari mono gousira. Edo unemi ungoda yei tumondebain ari gebe da emboro awa ititisira.  
\v 5 Edo ungo awa embo umbogo nembodiba Abraham de Isaac de edo Jacob de tuturo da embo orobe dada da jawo ititisera ainda orobe ra. Edo Iesu Keriso embo da tamo awa budo ombudo ungoda embo nei isira. Rora berari eiawa Iesu Keriso mi ungo awa embo isira awarate ungo uso mei Iesu Keriso awa ujo ae isera awarate ingode iji matawa Iesu Keriso rora berari awa gitijigido ira awa jasiga ore, awara.   
\p
\v 6 Israel embobo jiwae be Keriso bero isera te edo emimi ae God umo ro adi sisira awawa aera. Edo Israel da orobe jiwae atera te nenei awawa uso kinapeina aera.   
\p
\v 7 Edo daedo Abraham da orobe jiwae awawa uso kinapeina moka be aera. Awarate God mi Abraham da yei da sisira awodo awa, “Isaac da yei da awodo awa iso orobe awawa bugadera.”  
\v 8 Edo eiawa ge ainda be ra, embo ave God mi Abraham da yei adi sari sisira awa gebe adera embobo awa God da kinapeina na awarate embo ave gebe ae adera awa uso kinapeina aera. Abraham da orobe nenei awawa God da kinapeina na te Abraham da orobe nenei awa God da kinapeina aera.  
\v 9 Edo God mi Abraham da yei adi sari sisira re eire, “Gaeko da atae ari na engenembedo bugudo imonde Sarah de da yei mei itadena.” Setiri Abraham gosisira uso orobe be awa uso mei nei Ishmael awodo bugadi ae.   
\p
\v 10-13 Edo amboda mei Isaac emimi bajido aro jimbusira edo Rebecca uso aro awa mei dindiga badi iri iji ainde God mi Rebecca da yei sisira mei bugo Esau mi uso namendi nei Jacob awa sapo adira sisira. Edo jiwari mi ainda jawo da ge sedo sisira,  
\q1 “Na Jacob ewamei adi kotetena te na Esau ewamei adi kotaera.”  
\m Edo Rebecca memei dindiga eiawa bae etiri edo ungo wasiri ewamei de wasiri biae de ae etero giti da God mi awawa sisira. Awasedo amimi isaga ira God umo tuturo da uso embo katabadi kotisira awa isira. God mi Esau ta mo ko Jacob ro isera awodo kataburisiri? Awodo aera.   
\p
\v 14 Awasedo ingode ro seri? God mi katabari inono da ae isita?  
\v 15 Awodo aera ainda be awa God mi Moses da yei sisira, “Embo amenda yei na jo adena embomei ainda yei jo adena edo embo amenda yei na dubo badena awa dubo badena.”  
\v 16 Edo ingodena ro dipapa edo era edo, edo era awa God da uso ewamei da susu awa aera te God ingodena jo edo ira awa umo ingodena katabedo ira ainda susu ra.  
\v 17 Awasedo God mi ro Pharaoh da yei sisira awa gaisera,  
\q1 “Naso goroba awa iso yei awodo isaga adi edo daedo busu berari da embo berari mi naso jawo awa gorase sedo gido na eteno imo gitijigari nembodiba isesa edo na eteno imo durido woseteso iso jigari erari iji atae isira.”   
\m
\v 18 Awasedo embo amenda yei God umo jo adi dipapa adira embomei ainda yei umo jo adira te embo nenei da yei awa uso dipapa awodo ari ungo teta Pharaoh inge embo ge ewagaewa ingari ujo ae edo era da awodo ra.   
\s1 GOD KASEDO IRA TE UMO DAEDO JO EDO IRA  
\p
\v 19 Awarate embo da ingoda teda mi naso yei nganega adewa, “Eiawa gebe ta God rawodo edo embo umo ro edo ira awa embo bekuba eiri? Edo God embo da amemi rora ro arase dipapa adira embo awa mana God mi umo ro arase dipapa ira awa beuso adira.”  
\v 20 Edo ingo naso yei awodo sadewa awa na emboro eiedo sadena, naso otao imo God da yei ge mina imo embo rawodiri awa sadesita rora? Edo ou gono mi mana umo isira embo ainda yei sadira, “Roedo imo na eiedo isesi?”  
\v 21 Edo embo ou isira embo awa busu awa budo umo ro adi dipapa ira awa adira. Embo awa busu ou isira da awa budo ou da embo awasedo edo nei awa wo mane awasedo adira awa awara.   
\p
\v 22-23 Edo da awodo God umo ro dipapa edo ira awa edo ira. Edo God umo uso tini gambari de goroba de awawa isaga adi dipapa edo embo nenei da yei awodo adira amone awara awarate umo amenda yei tini gambari ira amone burigi burigi mana usibesi adira edo umo usasa isaga adi dipapa adira embo amenda yei edo jo adira.  
\v 24 Awawa ingodena awa unemi jawo sisira embobo awasedo. Edo ingodena nenei awa Jew embobo da teda edo ingodena nenei awa embo Jew ae ainda teda jawo sisira.  
\v 25 Edo eiawa ro Hosea God da binga sari embo mi God mi sisira awa matu gaisira,  
\q1 “Embo naso topo ae awawa nanemi naso embobo jawo sadena. Embo ungo dubo bae edo isena awa nanemi ungoda jawo, ‘Na ungo dubo budo ena embobo ra,’ sadena.  
\v 26 Edo yei embo mi ungoda yei sisera ingo awa God da embobo aera sisera ainda ungo mi ungo awa God wasiri natopo de atira ainda memei sadera.”   
\p
\v 27 Edo Israel embobo da jawo da Isaiah mi sedo sisira,  
\q1 “Israel embobo da ajigari awa teta awa kora bengi da da awodo awa embo jiwae soregadi ae rate embo enumba ae awa God mi soregadira.  
\v 28 Ainda be awa Bada God mi burigi be goroba de busu da embobo awa kasadira.”   
\p
\v 29 Edo iji nei Isaiah mi ge nei sisira,  
\q1 “God rora berari asisi de utu da atima era awa jigido ira amimi ingodena jo etiri ingodenaso orobe nenei atera. Awarate God ingodena jo ae aetira awa Sodom nati de Gomorrah nati de da rawodo isira awodo awa ingodenaso yei aetira.”   
\s1 JEW EMBOBO GOROBA BE EDO EWAMEI ADI JARISERA  
\p
\v 30 Awasedo ingode ro seri? Ingode eiawa sadera, embobo Jew ae awa God ga da umo jigari ewamei adi sedo ungo God iaviri arase buro aera te ungo God tumonda edo era awasedo God mi etiri ungo God ungae da umo jigari ewamei etera.  
\v 31 Awarate Israel embobo embo God unemi kataburisira awa ungo God ga da umo jigari ewamei adi sedo gido emboro eura edo era awarate ungo emboro awa mana tambadera.  
\v 32 Edo roedo ungo God ga da umo jigari ewamei ae edo eri? Ungo ari sago ae ainda be awa tumonda ari awa ungo ro edo era ainda susu ae awasedo awarate agodari awa kera adi jarera awa ungo ro era ainda susu ra awasedo. Edo awodo ise ungo emboro da ganuma da dedo dudurera.  
\v 33 Edo ungoda durari awa jiwari mi emboro eiedo sira,  
\q1 “Giwo, ganuma nanemi Jerusalem nati doriri da ititena ganuma amimi ari embo dedo duradera. Awarate embo ave umo gebe adera awa mana jo ambadera.”   
\c 10  
\s1 ISRAEL EMBOBO TUMONDA ARI EMBORO AWA UJO AE EDO ERA  
\p
\v 1 Naso nanonamendi na naso jo berari mi God mi naso embo Israel embobo awa soregarase dipapa edo ena. Edo God mi awodo arase na iji berari uso yei sedo gido ena.  
\v 2 Na gosena ungo goroba berari mi ungoda umbogo da wasiri awa ise God kera adi dipapa era te ungo emboro be awa ujo ae era.  
\v 3 Ungo God mi euri embo ungae da umo jigari ewamei edo era ainda emboro awa ambo ambo ae edo ungo ungosuka emboro ungoda seka adi jarera awasedo emboro God mi iri embo ungae da umo jigari ewamei era awa ungo ujo ae era.  
\v 4 Edo Keriso da bugari mi etiri agodari ge kera adi jarari da emboro awa atae isira. Edo embo ave gebe adera awa God mi ari embo awa ungae da umo jigari ewamei da adera.   
\s1 GOD EMBO BERARI SOREGADI DIPAPA EDO IRA.  
\p
\v 5 Agodari kera edo God ga da umo jigari ewamei ari eiawa Moses mi gaisira,  
\q1 “Embo amemi umo agodari mi ro sira awa adira inono gadira awa embo awa soregari tambadira.”   
\p
\v 6-8 Awarate God ge be edo ungae da umo jigari ewamei da ari ainda ge re eire,  
\q1 “Keriso budo wosaso imo kondade arase sedo umo eura utu da mambudo eose. Edo Keriso eura edo kumbudo vitaso imo kondade arase sedo uje beda mambudo eura eose. Edo eura awodo eose ainda be awa ingodena Keriso tumonda edo soregari kumbusera. Edo binga nango mi minonu sera awa ingo matu ingisewa awasedo binga awa ingadi yei ribori be mambove. Edo God da binga awa ingido ingoda joda atirari embo nenei da yei sewo.  
\v 9 Edo ingo embo nenei da joda Iesu awa naso gitijigari ra sise edo jo ingoda ainda Iesu betetiri God mi jigiri eririsira awa gebe adewa awa God mi ingo soregadira.  
\v 10 Edo nango awa nangoda joda gebe ise edo nangoda gebe ari awa embo nenei da yei seoro ingido era ainda emboro da nango God ga da umo jigari ewamei edo era edo unemi nango soregedo ira.”   
\p
\v 11 Edo jiwari mi sira,  
\q1 “Embo amemi umo gebe adira awa iaviri edo mana jo ambadira.”   
\p
\v 12 Ko binga emone embo berari awasedo ra ainda be awa God Jew embobo de embobo Jew ae de awa simba ari da awodo ise edo embo berari awa gitijigido ira. Edo embo amemi uso yei jawo sadera ainda yei unemi ewamei ari nembodiba be itadira.   
\m
\v 13 Ko ge awa jiwari mi sira,  
\q1 “Embo amemi Bada God da yei jawo sadira embo awa God mi soregadira.”   
\p
\v 14 Awarate embo mi God gebe ae adera mo rawodo edo ungo uso yei jawo seri? Edo ungo binga ingae mo rawodo edo ungo gebe eri? Edo embo da amemi binga awa minonu sae ari mo ungo mo rawodo edo ingeri?  
\v 15 Edo God da binga minonu sari embobo awa itae mambae oro mo embo mo rawodo edo binga mo ingeri? Teta jiwari mi sira awodo,  
\q1 “Edo embo binga ewamei budo bugudo era awa ungoda bugari awa dagari ae be ra.”   
\p
\v 16 Awasedo ingodena gosera Israel embobo binga ewamei ingisera. Awarate embo enumba ae gebe isera. Awasedo Isaiah kotari jiwae mi sisira,  
\q1 “Bada God binga nanemi minonu setena amemi gebe eri?”   
\p
\v 17 Awasedo embo binga ewamei Iesu Keriso da jawo da awa ingiroro tumonda ari awa ungoda yei bugadira.   
\p
\v 18 Awarate nanemi nganega ari eiawa ititena, Israel embobo binga ingae mo gebe ta? Awodo aera ungo binga ingera. Edo ge awa jiwari mi sira,  
\q1 “Busu berari da embo berari mi binga God da jawo da javi awa ingera. Edo binga awa embobo busu berari da ainda yei bugira.”   
\p
\v 19 Edo sedo gari nei ititena, Israel embobo gosiserita mo ko gaeri? En ungo gosisera. Moses mi mina sari awawa ingodena kondade edo sisira. Umo sisira God mi uso yei sedo sisira,  
\q1 “Nanemi embobo asisi egae da yei ewamei ininono inemi ungoda yei joda dumo adesa. Edo nanemi embobo eiawa gae awawa jawo sininono imo tini gambari adesa.”   
\p
\v 20 Edo moses giti awa gaetiri Isaiah amboda oju ae sisira God mi uso yei sisira,  
\q1 “Embo na eura ae atera amimi na tambera. Edo embo na kotae era awa ungoda yei na nasuka isaga etena.”   
\p
\v 21 Awarate Israel embobo awa sisira,  
\q1 “Embomei eiawa iji berari na beuso ise ujo ae edo era embobo awa edo embo na ungode da umo jigari ewamei adi dipapa edo ena awasedo na ungo naso yei purorase simba edo ena.”   
\c 11  
\s1 GOD ISRAEL EMBOBO JO ISIRA  
\p
\v 1 Awasedo na ingoda yei sedo gosena, God uso embo ujo ae isita? Umo awodo aera. Na mina setena ainda be awa na awa Israel embo ra Abraham da orobe ra edo Benjamin da riri nei na.  
\v 2 Edo God umo embo tuturo da kataburisira embobo awa ujo ae aera. Edo ingo Elijah da ge God da yei Israel embobo awa bekuba isira awa ingo ruvegurisevita?   
\p
\v 3 Edo ge awa eire. Elijah mi God da yei sisira,  
\q1 “Bada God ungo mi iso binga sari embobo berari awa degedo edo iso rorou itari tendeba awa arasegurisera. Edo na nasuka awa atena edo ungo mi na doro betanase jarera.”   
\p
\v 4 Edo umo awodo setiri God uso yei mina ro sirira? God uso yei sisira,  
\q1 “Embo 7,000 kotari god jawo Baal awa tumondebain ae era awa nanemi ungo goseno ungo atera.”   
\p
\v 5 Da awodo boroko God mi Israel embobo enumba ae uso topo orase kataburisira awa atima era.  
\v 6 Edo embo mi ro era awa God mi ungo kataburisera ainda susu aera te God umo embo kataburisira ainda be awa uso jo ari awasedo. Edo embo mi ro era awa God mi ungo kataburisira ainda susu gido re umo ungoda yei jo aera.   
\p
\v 7 Awasedo eiawa isira. Israel embobo ungo ro eura edo isera awa tambae isera. Edo Israel embobo embo enumba ae God mi kataburisira amimi God da soregari awa tambusera. Edo God embo nenei de da jawo sisira te ungo teta embo dengoro ae da awodo isera.  
\v 8 Edo jiwari mi sisira,  
\q1 “God mi etiri ungo kopiri okain de isera. Edo ungo iji berari ungoda dombu mi gae edo ungoda dengoro mi ingae edo isera.”   
\p
\v 9 Edo David mi Israel embobo da jawo da sisira,  
\q1 “Dowo, ungoda bondo de rora jiwae be de mi ungoda yei teta wao inge are. Edo wao mi ungo dari edo doawo ungo riroga bore.  
\v 10 Edo ungoda jiro umenga etiri ungo teta diti awa dowo guba ari edo ungo dadara gasise pepeta ore. Edo mata awodo ungoda ari bebegae mi teta bouga ungoda saga da arago irirari dowo ungo kukubedo tembore.”   
\p
\v 11 Awasedo na ingoda yei sedo gosena, Jew embobo ungo dudurisera mo God mi ungo usibesi adi setiri duduriserita? Awodo aera, Jew embobo awa wasiri bebegae etero gido God mi soregari awa embobo Jew ae da yei itari edo Jew embobo awa soregari awa ungo daedo bari dipapa orase isira.  
\v 12 Edo Jew embobo awa wasiri bebegae etero edo ewamei ari nembodiba be awa embobo Jew ae da yei bugusira. Edo Jew embobo awa God da yei awa goroba ae etero kondade ari nembodiba be awa embobo Jew ae da yei bugusira. Edo amboda Jew embobo roinge Keriso da yei puradera awa inono adira iji ainde awa embobo Jew ae mi ewamei ari boroko budo era awa ungo mi be derigedo badera.   
\s1 GOD EMBOBO JEW AE SOREGEDO IRA  
\p
\v 13 Na boroko ingo embobo Jew ae da yei ge sena. Na God da binga atopatari embo embobo Jew ae da yei mata atadena awa na iji berari naso buro awa nembodiba adena.  
\v 14 Edo naso embo topo na ro ena awa gido awase ungo soregari badi dipapa erita rora.  
\v 15 Edo God Israel embobo ujo ae etiri busu embobo nenei awa God ga da otao ari ewamei da era. Edo God Israel embobo sekago badira iji ainde ro eiri awa ingo kotevi? God ungo sekago badira ainde ungo awa teta embo betari God mi jigari erari inge adira.   
\p
\v 16 Edo indari seka ba buro da sari edo ira awa ingode kiambu budo God da yei itadera awa indari sari berari awa God topo ra. Edo ri uso besisi awa God da yei itadera gido awa papatu awa uso topo adira.  
\v 17 Ri jawo Olive unemi gousira edo simba isira ainda papatu awa jorisira. Edo papatu nenei awa joredo edo ri olive nei ambe da erido ira ainda patu awa joregedo budo ri uso ingo mi gowari ainda itari gambadira. Edo ingo embobo Jew ae awa teta ri Olive ambe da erido ira ainda patu inge ra. Edo God mi diugedo ituri gambudo edo ingo ewamei ari Jew embobo mi burera da awodo teta ri patu itari gambari mi ri ainda ngamo budo edo goroba ari budo ira da awodo awa burewa.  
\v 18 Awasedo embo God mi joregedo ira teta ri patu mi joredo era awodo awa ujo ae eove. Edo jariga embo awodo eove ainda be awa imo awa teta ri patu inge awasedo. Edo imo teta ri patu inge awasedo inemi ae ri uso besisi awa goroba aera. Awarate ri uso besisi mi euri imo goroba edo esa.   
\p
\v 19 Awarate inemi sadesa, “Awa gebe ra te God mi nango itari gamborase sedo ise ri papatu nenei awa jorisira.”  
\v 20 Edo imo ro sadesa amone gebe ra. God nenei jorisira ainda be awa ungo gebe ae isera awasedo. Awarate unemi ingo awa itiri gambusewa ko ingo gebe isewa awasedo. Edo God mi ingoda yei ro isira awasedo jariga eove te God da yei doio sedo edo gogo edo atiwo.  
\v 21 Edo God mi Jew embobo ri da bugo patu be awawa eregadira mo imo kotesa imo Jew ae mo eregae doaetita?   
\p
\v 22 Awawa kotise ingo gadewa God jo ari mi wasiri edo ira edo umo daedo goroba de kasedo ira. Edo embo uso binga ujo ae isera awa be goroba de kasisira awarate ingo awa jo isira. Edo ingo unemi berari ingo jo ise atarase dipapa ise tumonda adewa awa ingo jo adira awarate ingo tumonda ae adewa awa unemi ingo awa daedo teta ri patu nenei eregarago adira.  
\v 23 Edo Jew embobo beuso ari doadera awa God mi ungo awa sekago ri da itari gambadera ainda be awa umo awa inono na.  
\v 24 Edo ingo embo Jew ae awa teta ambe da ri jawo sedo era ainda patu inge ra. Edo ri patu awa eregedo wosetiri edo God mi kumbudo nati da ri da itiri sekago gambusira. Edo Jew embobo awa teta ri nati da erido ira ainda patu inge ra awasedo God mi sekago budo ri uso topo da sekago itari gambarase adira amone buro isaga be ra.   
\s1 GOD EMBO BERARI JO EDO IRA  
\p
\v 25 Naso nanonamendi ingoda jo da ingo jiro gari embobo awa kotove ta dowo koma ge eiawa ingoda sano gave. Eire, Israel embobo mi mana God da binga awa beuso ise mata awodo atadera. Amboda embo Jew ae embobo da ajigari Keriso da yei bugadera awa inono adira iji ainde awa Israel embobo da God da binga beuso ari iji awa atae adira.  
\v 26-27 Edo emboro eiedo da awa God Israel embobo berari awa soregadira. Edo jiwari mi sisira,  
\q1 “Soregari embo mi Jerusalem nati da bugudo Jacob da orobe da wasiri bebegae awa ondari mambadera. Edo na ungoda wasiri bebegae awa kotembedo dodo na ungoda yei ro adi sari sisena awa be adira.”   
\p
\v 28 Edo Jew embobo binga ewamei awa ujo ae edo God da gitopo etera. Awarate ungo binga ewamei awa ujo ae etero amimi ingo embobo Jew ae awa kondade etira ainda be awa God mi uso kando awa ingoda yei itira. Awarate ko uso adi sari ungoda mamo umbogo tuturo da ainda isira awasedo God uso dubo bari Jew embobo da yei da awa atae ae atira.  
\v 29 Edo God embo katabedo edo ungo ewamei adira awa umo sekago kotari nei edo ungoda yei biae sadi aera.  
\v 30 Edo ingo embobo Jew ae ingo matu God kera ae isewa te boroko Jew embobo da beuso ari mi ingo God da jo ari awa betewa.  
\v 31 Da awodo boroko Jew embobo God beuso isera awasedo God ingo Jew ae embobo awa jo etiri umo sekago Jew embobo awa jo adira.  
\v 32 Edo embo berari God beuso etero God mi setiri ungo teta embo gajari oro da atima era da awodo isera oro edo God mi ungo jo arase.   
\s1 INGODE GOD JASIGA ORE  
\p
\v 33 God da kotari de edo gari de uso ari goroba de awa atae ae adi ae teta umo buin inakade sumbudo ira da awodo ra. Edo uso kotari de gari de awa inbe inda ra. Edo embo amemi God da uso kotari awa ujugedo inono eiri? Edo God buro edo ira awa amemi gari inono eiri?  
\v 34-35 Edo jiwari mi sira,  
\q1 “Embo amemi Bada God da kotari awa gari ri? Edo embo ave umo inono ta God ro eiri awa sari eiri? Edo embo ave umo inono ta God da yei kando itari edo amemi ari God uso yei kando mina itadiri?”   
\p
\v 36 Embo da ave awa inono aera ainda be awa God mi rora berari awa isira edo God mi etiri rora berari awa atima ira edo rora berari wasiri de awa atima ira God da yei usasa itadi sedo. Awasedo embo berari awa God jasiga iji berari ore. Awara.   
\c 12  
\s1 GOD KERA ADI SEDO RE INGODE EMBORO EIEDO DA ATADERA  
\p
\v 1 Awasedo naso nanonamendi God da jo ari nembodiba awasedo na ingoda yei sedo gosena ingoda tamo de jo de God da yei itiwo teta wo betari rorou itido ewa awodo aera te teta wo wasiri de kando itido ewa awodo. Edo ingo ingosuka awodo itadewa awa God mi ingoda rorou awa barase sedo re giti umo ingoda wasiri bebegae kotembedo doarase sedo giwo. Edo emboro eiedo awa God be jo ingoda mi berari tumondebain adewa.  
\v 2 Edo ro busu berari da embo mi era awa gido eove. Ta ingo jiro gari seka badi sedo awa dowo God mi ingoda jo de ingoda kotari de awa be wareregedo gogo are. Edo umo ingo awodo wareregadira awa God umo ingo ro awase dipapa ira awa ingo gadewa. Edo God ingo ro ewamei edo wasiri biae ae awa awo umo iaviri adi sedo dipapa ira awa gadewa.   
\p
\v 3 Edo God mi uso kando gatari mi setiri naso yei ititisira awasedo na ingo da da yei sena jariga embo da kotari awodo awa kotove ta iaviri ae ingo ingosuka awa kotewo. Edo ingo embo nembodiba mo rawodo ri awa kotewo God mi tumonda ari ingoda yei tega rawodo ititisira awa tetegedo kotewo.  
\v 4 Edo ingodenaso tamo da papatu awa jiwae be ra edo tamo papatu emimi buro edo era awa da awawa aera.  
\v 5 Da awodo ingodena buro berari edo era awa da awa aera awarate ingodena awa berari Keriso ga da dada edo teta tamo da inge isera.  
\v 6 Awasedo God uso kando gatari ingodenaso yei ititisira awodo da ingode kondade ari awa God mi ingodenaso yei ititisira awa jingama ore. Edo God mi embo da da yei God uso binga sarase kondade ari awa itadira awa uso tumonda ari rawodo ri awa binga awa sare.  
\v 7 Edo God mi embo da da sapo arase kondade ari itadira awa dowo umo sapo are. Edo embo ave atopatari da kondade ari awa badira awa dowo umo atopatare.  
\v 8 Edo embo ave embo koma vevera iriroro kondade adi goroba burisira awa dowo embo awa ge ewagaewa sedo kondade are. Edo amemi kando itadi kondade ari burisira awa dowo kando jo mi berari itare. Edo God mi embo amemi Iesu gebe ari embobo bajari arase kondade goroba ari itadira gido re dowo begogo ae gitijigare. Edo embo amemi embo nenei da yei ewamei arase kondade ari itiri burisira awa dowo iaviri de ewamei are.   
\p
\v 9 Edo ingo embo nenei dubo jo ingoda amimi berari buwo. Edo wasiri bebegae awa ujo ae ewo. Edo ro ewamei awa jigiwo.  
\v 10 Edo ingo awa nanonamendi ingege etewa awasedo teta nanonamendi mi dubo mina bara arago ewo. Edo jo berari mi sapo mina ara ewo.  
\v 11 Edo begogo embobo awodo eove ta ingo tei pigedo buro ewo. Jo ingoda berari mi Bada God sapo ewo.  
\v 12 Edo God ingo embo ro adi sia ira awasedo iaviri ewo. Edo ingo wasiri biae tambadewa edo wasiri biae da soropu da awa saboa ewo. Edo iji berari God manunugewo.  
\v 13 Edo God da totopo awa rora ro mi jariroro gido rora ingoda topo awa itiwo. Edo esega embobo bugoro gido sewo bugudo ingoda mando da atiroro edo simba ave.   
\p
\v 14 Edo embo amemi ingo dedo gaedo era awa God da yei sedo giwo ungo ewamei are. Gebe sedo giwo ungo ewamei are awarate biae arase seove.  
\v 15 Edo embo ave iaviri era ainde da iaviri ewo. Edo embo ave biya era ainde da biya ewo.  
\v 16 Dubo ewamei de da buro dada ewo. Jariga embobo eove. Edo embo memenya mi daedo otao asase soro gido jo de awara seio. Rora berari imo gari awodo kotose.   
\p
\v 17 Embo amemi iso yei biae oro gido mina biae eose. Embo berari ro awara sera awa ari dipapa eio.  
\v 18 Edo embogo jambogo ise ge babaga seove ta embo berari de da dubo ewamei ari mi atarase seio.  
\v 19 Naso otatao embo ingoda yei wasiri bebegae edo era awa mina eove ta dowo inono ari God da tini gambari mi mina are ko jiwari mi sira,  
\q1 “Bada God mi sira wasiri biae da mina ari awa naso buro ra. Na nasuka mina itadena.”   
\p
\v 20 Awarate jiwari mi ro sira awodo tete awa ewo,  
\q1 “Ingoda gitopo beji tambutiroro gido indari itiwo. Edo ungo umo dipapa iriroro gido itiwo indore. Edo ingo awodo adewa teta ri munju ungoda kopiri da dada arago adewa amimi ari ungo me gadera.”   
\p
\v 21 Edo wasiri biae awa dowo ingo derigeure ta ewamei edo amimi wasiri biaeawa derigewo.   
\c 13  
\s1 INGODE INGODENASO BUSU DA GITIJIJIGEGARI KERA ORE  
\p
\v 1 Embo berari awa ungoda busu da gitijijigegari awa kera ore ainda be awa God mi gitijijigegari awa itido gitijigorase goroba ari ungoda yei ititisira awasedo.  
\v 2 Edo embo ave gitijijigegari God mi ititisira ainde da embogo adira awa embo awa God ro itido ira ainde da embogo ira. Edo embo ainda amemi awodo adira awa amimi ari kasari awa embo ainda yei wosaadira.  
\v 3 Edo embo amemi ewamei adira embo awa uso busu da gitijijigegari awa oju adi aera te embo amemi biae adira awa gitijijigegari oju adira. Edo ingo gitijijigegari oju ae atari dipapa edo re ewamei ewo.  
\v 4 Edo ingo ewamei awa adewa awa gitijijigegari mi ingo awa jasiga adera ainda be awa ungo awa God da buro ari embobo ingoda yei ewamei purarase sedo ungo buro era. Awarate ingo wasiri biae adewa awa gitijijigegari awa oju ewo ko ungo riroga itari da goroba awa budo atera awasedo goroba awa jingama adera. Edo gitijijigegari awa God da buro embobo edo ungo God da jawo da embo wasiri bebegae era awa riroga ititera.  
\v 5 Awasedo ingoda busu da gitijijigegari awa kera ewo edo God da tini gambari awasedo eove ta ko ingoda joda ge ingo mi ro awase sira awa God oju ise.   
\p
\v 6 Edo busu da gitijijigegari awa ungoda buro iji jaige da era awa God da buro awa era awasedo ingo takis itadewa awa awara.  
\v 7 Awasedo ungo ingoda takis itawase sedo gadera awa itiwo. Edo ingoda gitijijigegari embobo awa sapo edo kera ewo.   
\s1 ARI WASIRI EIEDO MINA ARA EWO  
\p
\v 8 Ingoda gagi awa embo nenei da yei ature. Ta gagi eiawa da awa dowo atare. Embo nenei dubo bari awa dowo gagi nembodiba ingoda yei atare. Edo embo amemi embo nenei dubo burira awa agodari berari awa kera ira.  
\v 9 Edo agodari mi sira, “Ipu da eove embo dawo betore bengono eove embo nenei da rora dipapa eove.” Edo agodari einde edo agodari nenei de mi dada isera edo ungoda susu da awa eire, “Embo nenei dubo buio teta imo imosuka dubo buresa da awodo.”  
\v 10 Edo embo amemi embo nei dubo badira awa embo ainda yei wasiri biae adi aera. Awasedo embo amemi embo nenei dubo badira embo awa agodari berari awa kera ira.   
\p
\v 11 Edo na ingo mi awa awase sena ainda be awa ingodena iji boroko atera awa gosewa awasedo. Ingoda ewari da erawase iji re bugira eire. Edo ingodena tuturo da gebe isera iji ainde soregari iji awa besaun be isira te boroko Iesu Keriso mi ingodena soregadira iji awa iji aikambu etira.  
\v 12 Edo tumba awa atae adi aikambu iri sipo keradi asusubetira. Awasedo ingode embo mi umenga da era wasiri awa ingode era awa dore. Ingode wasiri ewamei ise atadi sedo re ingode usasa da bere de gi de emi de awa bore.  
\v 13 Edo ingode wasiri ewamei ise teta embo usasa da isaga da atima era da awodo atore. Edo ingode indari bebegae awa mana adera edo umo bebegae mana indadera edo ingode ari wasiri dita baita da awodo mana adera edo ingode embogo adi ae edo tu mina sumba adi ae atore.  
\v 14 Edo awodo eove ta Bada Iesu Keriso awa ingoda gi de emi de awodo edo dowo unemi ingo awa soregare. Edo ingoda dipapa bebegae mi ro awase sira awa ingido eove.   
\c 14  
\s1 IESU GEBE ARI EMBOBO NENEI AWA KIKI DIROVE  
\p
\v 1 Embo uso gebe ari awa goroba ae ira awa atega ise ungae da otao ewo. Edo uso de iso kotari ewa de biae de awa ewoga ewoga ari gido umo tu beose.  
\v 2 Embo da Iesu gebe ari embo amimi sira awa rora berari awa indadira awa awara te embo nei gebe nembogo ae edo ira amimi wo indae edo ira.  
\v 3 Awasedo embo amemi rora berari indido ira awa embo embo nei wo indae edo ira embo awa ujo ae eure. Edo embo wo indae edo ira embo awa embo rora berari indido ira embo awa biae ari ge seure. Edo awodo seure ainda be awa God embo wo indae edo ira ainde da awara sedo ira awasedo.  
\v 4 Edo imo embo nenei da agipo embobo mi ewamei iri ta ko biae iri awa gido awara etesa awara sari embo aera. Te bajari uso topo mi umo ewa ita biae iri awa awara sare. Edo Bada Iesu Keriso mi umo jigari erido edo goroba de deradira.   
\p
\v 5 Embo da mi kotedo ira iji nenei awa nembogamo edo iji nenei awa nembogamo ae kotedo ira awarate embo nei umo kotedo ira awa iji berari awa tega da awodo awa kotedo ira. Edo embo berari mi ungo ro kotera ainda be awa gore.  
\v 6 Edo embo amemi iji dada awa nembogamo sira awa umo awodo ira awa God sapo ira. Edo embo amemi indari neinde kainde indira embo awa God sapo ira. Edo awodo ise amimi umo God da yei indari awasedo doio sira. Edo embo amemi indari nenei ujo ae ise indae edo ira embo awa God sapo edo ira. Edo awodo ise awa God da yei doio sedo ira.  
\v 7 Edo ingodena awa ingodenasuka bajari edo atise edo bebetise adera naso dipapa awa awodo adi aera.  
\v 8 Awarate ingodena wasiri de atadera awa Keriso awa ingodenaso bajari ra edo ingodena betadera awa Keriso awa daedo ingodenaso bajari ra.   
\p
\v 9 Edo Keriso awa bebetegari de wasiri de da bajari adi sedo betedo sekago eririsira.  
\v 10 Awasedo imo roedo iso namendi ujo ae esi? Edo ingo nenei ingo roedo ingoda nanonamendi mi bebegae ari ge sedo bekuba evi? Ingodena berari awa God da diti da derido petero unemi ingodena kasadira.   
\p
\v 11 Ko jiwari mi sira,  
\q1 “Bada God mi sira nanemi ingoda yei sena embo berari mi naso joda baingo dederi adera edo embo berari mi na awa God sadera awodo adira.”   
\p
\v 12 Awasedo ingodena berari awa God da dombu da derido edo uso yei da ro isera edo ro awasedo iseri isaga adira.   
\s1 NAMENDI ISO ASO WASIRI BIAE EURE  
\p
\v 13 Awasedo ingode bekuba mina ara ari awa doadera. Edo ingo re eiedo kotedo adewa gaegae awo ingoda nanonamendi wasiri bebegae eorase edo gogo edo atiwo.  
\v 14 Edo na Paul awa Bada Iesu ga da da ari atima ena awasedo na wo indadena awa awara awa gido ena. Awarate embo da amemi wo indari awa awara ae kotadira awa embo awa wo indadira awa awara ae adira.  
\v 15 Edo imo ro indesa amimi ari iso namendi memesi badira awa imo ro esa amimi imo umo dubo bae dotesa awa isaga adira. Edo inemi ro indesa amimi doaso Keriso embo ave embo betisira awa uso tumonda ari usibesi adira awa rora awodo awa sekago indose.  
\v 16 Edo doaso embo nenei mi imo ro sesa awa ewamei awa oro biae eure ta edo gogo edo atio.  
\v 17 Edo ingodena God da gitijigari da iji awa sera te ingodena agodari eiawa indose awawa indio awa saera awarate ingodenamone Asisi Kotopu mi ewamei ari ingodenaso yei itido ira ainda ge awa sera. Edo unemi ingodenaso yei itido ira awa ewamei atari de jo jamo jamo de edo iaviri de awa.  
\v 18 Edo embo amemi awodo Keriso sapo adira gido awa amimi ari God iaviri adira edo ari embo nenei mi umo ro ira awa ewamei ira awa sadera.   
\p
\v 19 Awasedo ingode iji berari edo gido ro ingode oro embo nenei jo jamo jamo aderi edo oro embo nenei ungoda gebe ari awa goroba aderi awa ore.  
\v 20 Edo indari da agodari awasedo God mi embo nei da joda buro ira awa usibesi eose. Gebe rora neinde kainde indadesa awa awara te imo indari indesa amimi ari embo nei durido wasiri biae adira awa imo ro esa awa biae awa esa.  
\v 21 Edo imo wo indesi ta ko umo okain indesi ta ko rora neinde kainde esa amimi ari iso namendi durido wasiri biae adira awa wasiri awodo awa sekago eose.   
\p
\v 22 Awasedo embo amemi eiawa indeni ta doeni sedo uso joda mana mana edo ira awa God da joda edo iso joda koteio. Edo embo ave uso joda umo ro ira awa awara kotira edo amimi umo bekuba ae kotira awa embo awa dubo ewamei embo ra.  
\v 23 Awarate embo amemi umo ro indira awa ewamei ta biae ri awa mana mana adira awa God mi umo bekuba adira ainda be awa embo tumonda ari mi ae etira awasedo. Edo ingodena ro era ainda susu awa tumonda ari awa ae re ingodena ro era awa wasiri biae ra.   
\c 15  
\s1 NA NA SEOSE TA EMBO NENEI KONDADE ADI DIPAPA EWO  
\p
\v 1 Embo nenei da gebe ari awa goroba ae edo ira amimi ungoda bouga awa beorase sedo ingodena goroba de gebe edo era amimi kondade ore. Edo ingode wasiri oro ingodena awa iaviri orase mana adera.  
\v 2 Awarate ingodenaso nanonamendi da yei ewamei oro edo ungo iaviri orase sedo ingode ari wasiri ewamei adera. Edo uso tumonda ari awa bajido edo nembodiba edo goroba arase sedo ingode ari wasiri ewamei adera.  
\v 3 Ko Keriso umo umosuka iaviri adi ari wasiri ewagaewa aera. Edo jiwari mi sisira,  
\q1 “Embo mi iso yei biae sera te biae sera awa naso yei biae sera.”   
\p
\v 4 Ko ingode mana mana ae gorase sedo ungo mi jiusera awa Asisi Kotopu mi ingodena atopatarase gaisera. Edo jiwari mi etiri ingodena jo goroba de saboa ari de burisera.  
\v 5 God awa jo goroba de saboa ari de da susu ra. Edo dowo God mi ari ingo berari awa jao namendi de joda edo dubo ewamei ari mina ara ise atave. Edo awodo adewa amimi ingo Iesu ro isira awa adewa.  
\v 6 Edo ingo berari dada edo javi da mi God Iesu Keriso ingodenaso Bada da Mamo awa jasiga ewo.   
\s1 EMBOBO JEW AE DE DA GOD JASIGA EWO  
\p
\v 7 Embo mi God jasiga orase sedo dipapa mina ara ewo teta Keriso mi ingo dipapa edo burisira awodo.  
\v 8 Edo na ingoda yei sena God umo ro adi sisira awa adira awa isaga adi edo God umo Jew embobo da mamoumbogo da umbogo tuturo da ainda adi sari sisira awa be arase sedo Keriso awa Jew embobo da agipo embo isira.  
\v 9 Edo embobo Jew ae mi God uso jo ari awa gido umo jasiga orase sedo Keriso awodo bugusira. Edo jiwari mi sira,  
\q1 “Awasedo embobo Jew ae da teda nanemi iso yei ategari itadena. Edo ya sise iso jawo jasiga adena.”   
\p
\v 10 Edo ge nei jiwari mi sisira,  
\q1 “Ingo embobo Jew ae God da katabari embobo de da dada edo iaviri ewo.”   
\p
\v 11 Edo eiawa ge nei jiwari da sisira,  
\q1 “Ingo embobo Jew ae Bada God jasiga ewo. Edo embo berari umo jasiga ewo.”   
\p
\v 12 Edo Isaiah mi sisira,  
\q1 “Embo da Jesse da orobe da bugadira awa teta ri ipu da uso osiri bugudo iri da awodo ra. Edo umo awa embobo Jew ae awa gitijigadi eradira. Edo umo erari ungo mi umo gebe adera.”   
\p
\v 13 God awa tumonda ari da susu ra. Awasedo dowo God mi ingoda tumonda ari awasedo iaviri de dowo God mi jo jamo jamo ari de itare. Edo ingo Asisi Kotopu da goroba da desegurise dowo ingoda tumonda ari awa bajido nembodiba are.   
\s1 PAUL UMO ROEDO OVE GAISIRI AWA UJUGURISIRA  
\p
\v 14 Naso nanonamendi na gosena ingo ari ewagaewa edo ewa edo jiro gari jiwae be burisewa. Edo na gosena ingo ingosuka ato mina pata adewa awa.  
\v 15-16 Awarate ove einda na ingoda yei ge nenei sadi sedo na ingo dengoro ena na oju ae ingoda yei ge okain sisena ainda be awa Iesu Keriso da agipo embo ari da buro awa naso yei ititisira awasedo. Edo uso agipo embo edo na embobo Jew ae awa kera edo ena. Edo God mi embobo Jew ae awa teta rorou ewamei budo ira da awodo awa barase sedo na teta priest mi God da binga ewamei ungoda yei minonu sarago ewona. Edo na awodo minonu seono Asisi Kotopu mi ungoda jo seguri ungo ewamei edo era.   
\p
\v 17 God da buro awa na Keriso Iesu ga dada edo ena. Edo na buro awa ise iaviri ena.  
\v 18-19 Edo na mana embo nenei da buro awa gido sadena te na isaga be Keriso umo na kondade iri buro ena awa sadena. Edo unemi na kondade iri nanemi embobo Jew ae awa kondade eno ungo God kera era. Edo ungo God kera era ainda be awa nanemi ro sise ena edo God da ari wasiri goroba de awasedo edo Asisi Kotopu da goroba awasedo. Awasedo na naso buro awa Jerusalem nati da tuturo edo Keriso da binga ewamei awa yei jiwae be da minonu sise jiroroka ise mambutinatina edo bugudo na Illyricum busu da bugudo naso buro awa ainda atae isira.  
\v 20 Edo embo nei da tutuvi derari da na mando itonase sedo yei Keriso da jawo awa ingae da ainda na binga ewamei minonu sadi edo ena.  
\v 21 Edo jiwari mi sira,  
\q1 “Embo uso jawo sae gae awa ungo mi gadera. Edo embo ungo mi uso jawo ingae mi ingadera.”   
\s1 PAUL ROME NATI ESEGA ADI JIRO BURO ISIRA.  
\p
\v 22 Iji jiwae be na ingo esega adi dipapa ewona te rora da mi naso yari awa betitgedo ira.  
\v 23 Awarate na naso buro busu einda awa atae edo awa na ingo esega adi jiro buro ena ainda be awa na awodo adi dipapa ewona awasedo.  
\v 24 Edo na Spain busu da mamabadi kotewona. Edo na ainda mambuse awa na torido ingo gadi dipapa ena. Edo iji tupo ingo esega adena amimi awase ingo mi na kondade awo Spain busu da mambadenita rora.  
\v 25 Awarate boroko God da embobo Jerusalem nati da atera awa sapo adi sedo na nati ainda mambutena.  
\v 26 Edo na Jerusalem nati da mambutana ainda be awa Macedonia de Greece busu de da embo Iesu gebe ari embobo mi embo rora egeregae God da embobo da teda Jerusalem nati da atima era awa kondade edo gano dada isera awasedo.  
\v 27 Edo ungo ungoda dubo bari mi setiri gido adi setera. Awarate ungo ungoda gagi embo rora atitigae ainda yei atira awasedo dowo kondade ore. Edo Jew embobo ewamei ari God mi ungoda asisi da yei isira ewamei awawa embobo Jew ae de kando isera awasedo embobo Jew ae ungoda rovi ravi jiwae awa dowo Jew embobo de kando osisa edo bore.  
\v 28 Edo na buro eiawa atae edo ainda amboda gano berari ungo mi dada etera awawa ungoda yei itido awa na Spain busu da mambadena. Edo na Spain busu da mambuse edo emboro da awa ingo esega adena giwo.  
\v 29 Edo ingo esega adena amimi na gosena Keriso da ewamei ari nembodiba be awa budo ijegadena.   
\p
\v 30 Naso nanonamendi ingodenaso Bada Iesu Keriso awa kotise edo dubo bari Asisi Kotop mi itido ira awadeso iji berari be jamo adi ae God da yei na embo manunugewo.  
\v 31 Gaegae edo Judea busu embobo gebe ae edo era amimi na deore sedo giwo God mi na soregare. Edo Jerusalem nati da God da embo atima era amimi naso buro da iaviri orase God da yei sedo giwo na kondade are.  
\v 32 Awasedo na God mi buganase dipapa adira awa na iaviri nembodiba ise ingoda yei bugadena. Edo bugadena naso esega ingoda yei amimi ari naso tamo de asisi de awa jango indadera.  
\v 33 God awa ingodenaso jo jamo jamo ari da susu ra dowo ingode da mata awa ingo berari de atare. Awara.   
\c 16  
\s1 PAUL ROME NATI DA USO OTATAO ATEGA ISIRA.  
\p
\v 1 Phoebe Cenchreae nati evetu Iesu gebe edo Iesu gebe ari embomei sapo ira awa iji tupo ingo esega adi ira.  
\v 2 Edo umo awa Iesu da topo ra awasedo God da teototopo mi ae etera awodo umo oro gatewo. Edo umo rora ro dipapa ari gido umo kondade ewo ainda be awa evetu awa iji jiwae be embo jiwae be kondade edo ira edo na da awodo kondade edo ira.   
\p
\v 3 Naso otatao etoto Priscilla de uso iu Aquila de awa ategurena sewo gore. Ne Keriso da buro esena awa ungo awa naso kondade isera.  
\v 4 Edo ungo na kondade ero embo mi iji jiwae doro betorase isera, na embo awasedo na nasuka edo embobo Jew ae berari Iesu gebe edo era awa iji berari ungoda yei doio be sera.   
\p
\v 5 Edo Iesu gebe ari embobo iji berari ungoda mando da dada edo era awa sewo gore ategurena. Naso otao Epaenetus awa ategurena sewo gare. Umo Asia busu da embo da teda umo awa embo giti be giti Keriso gebe isira.   
\p
\v 6 Edo Mary ingo awa embo buro nembodiba isira awa sewo gare ategurena.   
\p
\v 7 Andronicus de Junias de Jew embobo na ingege awa gajari oro da nangae da itititara. Na gebe ae ateno ungo Iesu gebe isera. Iesu da binga atopapotegai embobo da demonda edo ungoda jawo awa nembodiba ra. Awawa sewo gore ategurena.   
\p
\v 8 Ampliatus awa ategurena sewo gare. Umo de namonde God da ewamei ari ewagaewa awa kiki dada dirido otatao isera.   
\p
\v 9 Stachys naso otao de Urbanus nangoda kondade ari embo Keriso da buro da awa sewo gore atugurena.   
\p
\v 10 Edo embo jiwae be gosera Apelles umo saboa ari mi Keriso kera isira. Embo awa sewo gare atagurena. Edo Aristobulus ategurena sewo gare.   
\p
\v 11 Herodiom Jew embo na inge de Narcissus da memei Iesu gebe edo era awa sewo gore ategurena.   
\p
\v 12 Tryhaena de Tryphosa de God da agipo ewamei edo era edo Persis umo God awasedo buro nembodiba isira awa sewo gare ungo ategurena.   
\p
\v 13 Rufus God awa embo buro nembodiba isira edo uso ai iji berari na awa uso mei simba arago edo isira awa sewo gore ategurena.   
\p
\v 14 Asyncritus de Phlegon de Hermes de Patrobas de Hermes de daedo Iesu gebe ari nanonamendi nenei de da ategurena sewo gore.   
\p
\v 15 Philologus de Julia de Nereus de uso ru de Olympas de God da teotopo ungode daedo atera awa sewo gore ategurena.   
\p
\v 16 Edo ingo Iesu gebe ari embobo ingo mina bara ise atega mina ara ewo. Edo Iesu gebe ari embobo diti diti mi ungoda atega ari ingoda yei ititera.   
\s1 PAUL DA DENGORO BAGARI SANGOVE  
\p
\v 17 Naso nanonamendi na ingoda yei sena embo nenei mi embo eoro dada edo diti ewoga ewoga edo era. Edo ungo mi eoro embo ro gebe eri awa mana mana edo era. Edo ungo mi atopatari ingo mi burisewa awa jumboro wosedo ira. Awasedo embo awodo edo era awa diti jinjibewo. Edo daedo dada eove.  
\v 18 Edo embo awodo edo era awa Keriso ingodenaso Bada awa sapo aera te ungoda jo da dipapa awa kera edo era. Edo awodo ise ge girawo garawo sise embo da yei ge ngamo sedo era. Edo ungo awodo ise embo kiambu gosisera awa ganduburera.  
\v 19 Edo embo berari mi ingo iji berari binga ewamei jigido ewa awa ingido era awasedo na iaviri ena. Edo na ingoda ari ewagaewa ari da gari awa bajarase dipapa ena te na ingoda ari bebegae ari da gari awa kiambu arase dipapa ena giwo.   
\p
\v 20 Edo God ingodenaso jo jamo jamo ari da susu amimi iji tupo Satan awa patari munjadira. Edo patari munjedo Satan umo ingoda goroba da tuda adira.  
\p Bada Iesu da kando ari awa ingoda yei iji matawa atare.   
\p
\v 21 Naso Keriso da buro da kondade ari embo Timothy de naso otatao Lucius de Jason de Sosipater de mi ingo ategurera.   
\p
\v 22 Paul da ove eiawa na Tertius mi gaianase sedo Paul mi naso yei sisira. Setiri nanemi gaiena. Edo na awa daedo Iesu gebe ari embo mi ingo ategurena.   
\p
\v 23 Na Paul Gaius da mando da atima ena. Edo umo ingo ategurira giwo. Edo uso mando ainda Iesu gebe ari embobo awa dada edo era. Edo nati da gano simba ari embo Erastus de nangoda namendi Quartus de mi ingo ategurera giwo.   
\p
\v 24 Bada Iesu Keriso da ewamei ari ingo berari da yei mata awa atare. Awara.   
\s1 INGODE GOD JASIGA ORE  
\p
\v 25 Ingode God jasiga ore. Ko matu be matu iji matu da God uso ge awa unjugedo atima isira te boroko awa isaga etira. Edo ge awasedo edo binga ewamei Iesu Keriso da jawo da ainde nanemi minonu sedo ena awasedo God mi etiri ingoda tumonda ari awa be goroba etira. Edo ingoda tumonda ari awa goroba ari ingoda gebe ari awa mana atae adira.  
\v 26 Edo God da gebe moka awa binga sari embobo mi gaisera awa isaga etira. Edo daedo emo berari mi gebe ise kera orase God betae atima ira amimi busu berari da embo berari mi uso ge ingorase sisira.   
\p
\v 27 Awasedo Iesu Keriso tumonda ise ingode iji berari God jasiga ore. Edo jiro gari berari awa uso topo ra.  
\cls Awara  
\cls Ingoda otao,  
\cls Iesu Keriso da jawo da  
\cls Paul.