\id REV - Ewage-Notu NT [nou] -Papua New Guinea 1987 (web 2014) \h REVELATION \toc1 Ge Iesu Keriso Mi Isaga Isira \toc2 Revelation \toc3 Rev \mt1 Ge Iesu Keriso Mi Isaga Isira \c 1 \p \v 1 Ove eiawa kiki rora Iesu Keriso mi isaga isira ainda ra. Edo Iesu Keriso mi ingodena uso buro embobo da yei rora iji tupo bugadira awa God mi rora eiawa uso yei ujugurisira awa isaga adi sedo isira. Awasedo Iesu rora einda jawo da ge awa isaga adi dipapa edo uso asisi ewamei da na John uso agipo embo da yei ititisira. \v 2 Edo asisi ewamei mi naso yei bugudo rora gosisena ainda be awa ujugurisira. Awasedo na binga God mi ititisira edo gebe moka Iesu Keriso mi isaga isira awa jivena. \v 3 Edo embo amemi jiwari eiawa embo nenei da yei ajigadira awa umo God da ewamei ari kumbadira. Edo embo amemi rora amboda ro adira ainda ge awa ingido edo ge awa kera adira embo awa daedo God da ewamei ari kumbadira. Edo rora eiawa adira ainda iji awa aikambu etira. \s1 JOHN IESU GEBE ARI EMBOBO DITI 7 AWA ATEGURIRA \p \v 4 Na John mi ge eiawa ingo Iesu gebe ari embobo diti 7 Asia busu berari da ainda jivena. \p God awa boroko atira. Edo umo iji berari atima ira edo umo matawa atadira. Edo God da gitijigari da anumba da awa asisi ewamei 7 awodo atera. \v 5 Edo Iesu Keriso God da gebe moka isaga edo ira awa daedo atira. Edo God Mamo de God Mei edo God Asisi Kotopu ungo tamonde mi ewamei ari de jo jamo jamo de ingoda yei itore. Edo Iesu Keriso betetiri God mi umo jigiri eririsira awa umo awa embo tuturo da eririsira. Edo Keriso awa busu da gitijijigegari berari da gitijigari ra. \p Umo ingodena dubo budo ira. Edo umo uso ororo mi ingodenaso wasiri bebegae da bupuri awawa wujegurisira. \v 6 Edo ingodena Iesu Keriso tumonda edo era embobo awawa God mi priest mi God kera edo ira da awodo umo kera orase ititisira. Edo ingode umo jasiga ore ainda be awa umo usasa de goroba de atima ira awasedo. \p \v 7 Giwo umo poroga mi jiroroka etero bugutira. Edo embo berari mi umo gadera. Edo embomei umo ituka oregedo ainda dorisera awa daedo ungo umo gadera. Edo embo berari busu da umo gido uso bugari awasedo dubo vevera de oju de da ji sadera. En awa gebe awodo adira. \p \v 8 Edo Bada God goroba de atevira edo boroko goroba de atira edo umo goroba de atadira amimi sira, “Rora berari da tuturo edo sangove awa na nasuka ra.” \s1 JOHN ETURO ARAGO ISE KERISO GOSISIRA \p \v 9 Na ingoda namendi John Keriso awa embo memesi burena teta ingo ingo memesi burewa da awodo. Awarate na God da ewamei ari jiwae be kumbutena teta ingo God da ewamei ari kumbutewa da awodo. Edo na doae goroba de atena da ingo doae goroba de atewa da awodo. Edo ungo mi na sandido budo ingigi jawo Patmos einda ititisera ainda be awa na God da binga minonu sedo isena edo Iesu Keriso da kiki isaga edo isena awasedo. \v 10 Edo God da iji de Asisi Kotopu naso joda goroba edo gitijijigurise na God tumondebain edo isena. Edo na awodo God tumondebain eno ge javi naso gun da setiri na ingisena. Edo javi awa teta puin da javi inge ra. \v 11 Edo na dengoro eno ge javi mi sisira, “Imo ro gadi esa awa jiveio. Edo jivedo gido ove awa itio Iesu gebe ari embobo diti 7 Ephesus nati da, Smyrna nati da, Pergamum nati da, Thyatira nati da, Sardis nati da, Philadelphia nati da edo Laodicea nati da mambare.” \p \v 12 Edo embo amemi naso yei da ge siri awa gadi sedo na wareregurisena. Edo wareregedo na goriwo esegari rora berari 7 awodo gosisena. Edo goriwo esegari rora 7 awa ganuma mina nembodiba jawo gold mi egari ra. \v 13 Edo goriwo esegari rora 7 ainda soropu da awa embo gari teta God da mei embo isira awa inge derido atisira. Edo bo ribori be ombiri edo wosedo uso tei da dorisira. Edo sini auri gold mi ari awa uso oka da edo tamo da didigurisira. \v 14 Edo uso kopiri tu awa parara be parara teta angia da tu inge ra. Edo uso diti awa janiburisira teta ri avewa inge. \v 15 Edo uso tei awa biri biri teta auri riawo da ingedo u mi jigari biri biri arago isira. Edo uso ge javi awa teta umo mi doriri mendo da wosedo ganuma da dorise javi sarago isira. \v 16 Edo umo damana 7 awodo awa uso ingo be mi jijigurisira edo kasiwo teta wo dangoro da di inge awa uso be da ra. Edo uso dombu awa teta waiko beo da edo batitibedo janibedo ira da awodo janiburisira. \p \v 17 Edo na umo gido na uso tei da teta betedo durarago isena awarate unemi uso ingo be mi na tamesi ise sisira, “Oju eose. Edo rora berari da tuturo edo sangove awa na nasuka ra. \v 18 Edo na awawa wasiri da susu ra. Edo na betedo sekago erido edo matawa atena awasedo nanemi sano embo mi toradera ko dodo ijegadera. Edo nanemi betari da mangiro edo betari da nati awa simba edo ena. \p \v 19 “Awasedo na iso yei ro isaga ena gosesa awa jiveio. Edo na boroko ro iri edo amboda ro adiri berari awa isaga ena awasedo jiveio. \v 20 Edo damana 7 naso ingo be da gosesa edo rora goriwo esegari rora gold mi ari 7 gosesa ainda be awa unjugari ra awarate ainda be awa nanemi ujugadena. Damana 7 amone Iesu gebe ari embobo diti 7 ainda gitijijigegari ra. Edo goriwo esegari rora 7 amone Iesu gebe ari embobo diti 7 awa ra.” \c 2 \s1 BINGA IESU GEBE ARI EMBOBO DITI DA EPHESUS NATI DA ATIMA ISERA AINDA YEI MAMBUSIRA \p \v 1 Iesu Keriso mi naso yei da sisira, “Binga ro sadi ena awawa jiveio. Edo jiveio gido binga awa Iesu gebe ari embobo diti da Ephesus nati da atima era ainda gitijigari yei itio.” \v 2 Edo binga Iesu mi sisira eire. \q1 “Embo damana 7 uso ingo be mi jigido edo goriwo esegari rora 7 ainda teda tembira amimi ingoda yei sira, ‘Na ingo ro ewowa awawa gari ra. Edo na gosena ingo begogo ae buro nembogamo doae edo ewa awa. Edo na gosena embo bebegae mi ari bebegae eoro ingo mi sedo ewa amone biae ra sedo ewa. Edo embo nenei ungo awa Iesu da binga atopapotegari embobo seoro ingo mi ungo itido gido ungo ge busera awa gido ewa. \v 3 Edo ingo na awa embo memesi nembodiba budo ewa te begogo edo doae edo ewa. \p \v 4 ‘Awarate wasiri biae da ingo mi isewa awa atira. Ingo tuturo da na dubo be burisewa te boroko ingoda dubo bari awa kiambu ira. \v 5 Edo ingo yei ribori be dudurisewa awawa kotewo. Edo wasiri biae awa dodo God da yei wareregewo edo sekago emboro ingo tuturo da pepeta isewa ainda pepeta ave. Edo ingo ingoda wasiri bebegae awa dodo edo God da yei wareregae adewa awa na bugudo ingoda goriwo esegari rora awa jumbano wowosegadira. \v 6 Awarate rora nei ingo mi edo ewa awawa ewamei na. Ingo Nicolas da ambojimbi mi ro edo era awa ujo ae edo ewa teta na ungo mi ro era awa ujo ae edo ena da awodo. \q1 \v 7 ‘Edo ingo embo ave ge ingari sago gido awa Asisi Kotopu mi Iesu gebe ari embobo da yei ro sira awa ingiwo. \q1 Edo embo amemi wasiri bebegae derigadira embo ainda yei nanemi wasiri da ri God da buro da eririra ainda be awa uso yei itadena. Edo ri be awa itano indadira.’” \s1 BINGA IESU GEBE ARI EMBOBO DITI DA SMYRNA NATI DA ATIMA ISERA AINDA YEI MAMBUSIRA \p \v 8 Iesu Keriso mi naso yei da sisira, “Binga ro sadi ena awawa jiveio. Edo jivedo gido binga awa Iesu gebe ari embobo diti da Smyrna nati da atima era ainda gitijigari yei itio.” Edo binga Iesu mi sisira eire. \q1 “Embo rora berari da tuturo edo sangove amimi ge sira. Edo embo betedo edo sekago wasiri de eririsira amimi ingoda yei sira, ‘Na gosena ingo memesi tambutewa awa. \v 9 Edo na gosena ingo awa rora ae embobo rate ruvegeove ingo awa utu da rora da awa rora jiwae embobo ra. Edo na gosena embo ungo awa Jew embobo sedo era amimi ingoda jawo da ge bebegae sera te ungo awa Jew embobo aera ungo awa Satan da totopo ra. \v 10 Edo memesi nembodiba awa ingoda yei bugadira te oju eove. Edo Satan mi ingo itido gadi sedo edo unemi ari embo mi ingo awa gajari oro da itadera. Edo umo awodo ari ingoda memesi awa nembodiba be iji 10 awodo atadira. Edo ingo betari oju ae na sapo ise atadewa awa ingo betadewa iji ainde nanemi ingoda yei wasiri seka itadena teta gitijigari embo da gobe itido era da awodo awa. \q1 \v 11 ‘Edo embo ingo dengoro atirari gido awa Asisi Kotopu mi ro Iesu gebe ari embobo da yei sira awa ingiwo. \q1 ‘Edo embo amemi wasiri bebegae derigadira gido awa riawo natopo atari mi uso jawo betari sangove awa mana embo awa usibesi adira.’” \s1 BINGA IESU GEBE ARI EMBOBO DITI DA PERGAMUM NATI DA ATIMA ISERA AINDA MAMBUSIRA \p \v 12 Iesu Keriso mi naso yei da sisira, “Binga sadi ena eiawa jiveio. Edo binga awa jivedo gido itio Iesu gebe ari embobo diti da Pergamum nati da atima era ainda gitijigari da yei mambare.” Edo binga mi Iesu sisira eire. \q1 “Embo kasiwo teta wo dangoro da di inge uso be da atira amimi ingoda yei sira, \v 13 ‘Na gosena nati Satan uso gitijigari da anumba atira nati ainda ingo awa atewa. Awarate ingo awa iji berari naso jawo awa jigoro erido ira. Edo Satan atira nati ainda saboa edo agipo edo isira embo Antipas awa dorisera te iji ainde awa ingo na gebe ae doae isewa. \q1 \v 14 ‘Awarate ingo rora bebegae nenei isewa awa eire. Embo nenei ingoda nati da amimi Balaam da atopatari awa ambo ambo ise uso emboro da pepeta era. Edo Balaam mi matu be matu kotari Balak da jiro da itiri edo Balak mi Israel embobo gandubetiri wasiri bebegae isera. Edo unemi ungo gandubetiri ungo indari embo nenei mi ove kekevegari da yei rorou itido isera awa indido isera edo ungo sino pu da wasiri awa edo isera. \v 15 Edo daedo embo nenei ingoda teda awa Nicolaitan da ambojimbi da atopatari awa ambo ambo era. Edo na ungoda atopatari awa ujo ae edo ena. \v 16 Edo ingoda wasiri bebegae awa dodo God da yei wareregewo. Edo ingo awodo ae adewa awa na burigi be ingoda yei bugudo kasiwo naso be da atira emimi embobo ainde da embogo adena. \q1 \v 17 ‘Edo embo ingo dengoro atirari gido ro Asisi Kotopu mi Iesu gebe ari embobo da yei sira awa ingiwo. \q1 ‘Edo embo amemi wasiri bebegae derigadira embobo ainda yei nanemi utu da indari unjugari da atira jawo Manna awa itadena. Edo daedo nanemi embo dada da yei ganuma parara nanemi jawo seka jiusena awa itadena. Edo jawo ainda be awa embo ganuma awa kumbadira embo amimi gadira te embo nenei mi mana gadera.’” \s1 BINGA IESU GEBE ARI EMBOBO DITI DA THYATIRA NATI DA ATIMA ISERA AINDA MAMBUSIRA \p \v 18 Iesu Keriso mi naso yei da sisira, “Binga sadi ena eiawa jiveio. Edo jivedo gido binga awa Iesu gebe ari embobo da gitijigari Thyatira nati da atira ainda itio mambare.” Edo binga Iesu mi sisira eire. \q1 “God da mei uso diti awa jani burira teta riawo da avewa mi janibarago edo uso tei awa biri biri teta auri riawo da ingedo edo u mi jigari biri biri arago ira amimi ingoda yei sira, ‘Na ingo mi ewamei ewa awa gosena. Edo na gosena ingo dubo budo ewa edo ingo God gebe edo ewa edo ingo God de embo nenei de da sapo edo gogo edo ewa doae. \v 19 Edo na gosena buro ingo mi boroko ewa amimi buro ingo mi tuturo da isewa awa derigurira awa gosena. \q1 \v 20 ‘Awarate ingo wasiri biae da ewa. Evetu Jezebel umo God da binga sari evetu sedo ira evetu awa uso buro biae awawa doarase sae edo ewa. Edo evetu awa atopapotise naso buro embobo ganduburiri ungo sino pu da wasiri bebegae awa ise edo ungo indari embo nenei mi ove kekevegari da yei rorou itido era awa indido era. Edo uso atopatari awa biae ra. \v 21 Edo umo uso wasiri bebegae awa dodo God da yei wareregarase sedo na uso yei iji ewagaewa jiwae be ititewona te umo umo wasiri bebegae awa dodo God da yei wareregari ujo ae edo ira. \v 22 Edo nanemi ano umo karu biae be adira. Edo embo ungae da wasiri bebegae ewora ainde da ungoda yei memesi nembodiba be bugadira. Edo ungo ungoda wasiri bebegae awa dodo God da yei wareregae adera awa memesi awa ungoda yei bugadira. \v 23 Edo daedo nanemi uso ambojimbi awa digano bebetegadera. Edo na awodo adena awa Iesu gebe ari embobo diti diti amimi gadera awa na embo berari ro kotera edo dipapa era awa gosena awa gadera. Edo ingo embo dada ro edo ewa awa tetegedo na ingoda mina itadena. \q1 \v 24 ‘Awarate ingo embo nenei Thyatira nati da awa ingo atopapotegari bebegae awa ambo ambo aera. Edo ingo rora embo nenei mi jawo sedo era Satan da asisi mando da rora unjugari awa ingo gaera. Edo na ingoda yei sena na mana bouga nenei ingoda yei itadena. \v 25 Awarate na ro ingoda yei ititisena awa jigido takibewo. Edo amboda na bugadena iji ainde jigido takibedo atiwo. \q1 \v 26 ‘Edo embo amemi wasiri bebegae derigadira edo embo amemi na ro dipapa ena awa doae matawa ise atadira embo ainda yei iji sangove da nanemi goroba itadena. Edo goroba naso Mama mi naso yei ititisira goroba da awawa nanemi ungoda yei itadena. \v 27 Edo nanemi goroba ungoda yei itano ungo ketu goroba mi ari amimi busu berari da embo berari awa gitijigadera. Edo ingode ou busu mi ari awa kumbudo deoro bejedo ira da awodo ungo mi busu da embo da yei awodo adera. \v 28 Edo nanemi ungoda yei sipo damana daedo itadena. \q1 \v 29 Edo ingo embo dengoro atirari gido ro Asisi Kotopu mi Iesu gebe ari embobo da yei sira awa ingiwo.’” \c 3 \s1 BINGA IESU GEBE ARI EMBOBO DITI DA SARDIS NATI DA ATIMA ISERA AINDA YEI MAMBUSIRA \p \v 1 Iesu Keriso mi naso yei da sisira, “Binga nanemi sadi ena awa jiveio. Edo jivedo gido binga awa Iesu gebe ari embobo da gitijigari Sardis nati da ainda atira ainda itio.” Edo binga Iesu mi sisira eire. \q1 “Embo God da asisi ewamei 7 de damana 7 de awodo jigido atira embo amimi ingoda yei sira, ‘Na ingo ro ewa awa gosena. Edo na gosena embo mi ingo wasiri de atari sera te ingo awa bebetegari embobo mi atarago ewa. \v 2 Awasedo eriwo. Edo ingoda ari ewagaewa nenei ewa awa atae adi aikambu etira awasedo erido edo goroba de atave. Edo ingo atewa emboro awa God umo gosira emboro awa awara aera. \v 3 Awasedo ge matu ingo atopapotisera ge awa ruvegeove ta kera ewo. Edo ge awa kera ise edo ingoda wasiri bebegae awa dodo edo God da yei wareregewo. Edo ingo erae adewa awa na ingo sae gae ingoda yei bugadena teta bengono embo mi sae gae bugudo ira da awodo. Edo na bugadena iji awa ingo mi mana iji awa gadewa. \q1 \v 4 ‘Awarate embo enumba ae Sardis nati da atera awawa edo gogo ise edo wasiri bebegae ae edo era. Edo embobo awa teta embo emboro busu begara de ainda edo gogo edo pepeta euri edo uso sinibo dongono ae edo ira da awodo. Edo ungo edo gogo edo awodo atera awasedo amboda nanemi ungoda yei bo esa itano edo ungo nangae dada pepeta adera. \v 5 Edo embo amemi wasiri bebegae derigadira gido awa bo esa awa kumbadira. Edo embobo amemi wasiri matawa atari kumbadera embobo ainda jawo awawa nanemi wasiri da jiwari kato da jiveteno atira. Edo embo amemi wasiri bebegae derigadira embo ainda jawo awa nanemi mana tupadena. Edo nanemi naso Mama de uso anela de da dombu da embobo awa naso totopo sadena. \q1 \v 6 ‘Edo embo ingo dengoro atirari gido Asisi Kotopu mi ro Iesu gebe ari embobo da yei sira awa ingiwo.’” \s1 BINGA IESU GEBE ARI EMBOBO DITI DA PHILADELPHIA NATI DA ATIMA ISERA AINDA YEI MAMBUSIRA \p \v 7 Iesu Keriso mi naso yei da sisira, “Binga sadi ena eiawa jiveio. Edo jivedo gido binga awa Iesu gebe ari embobo diti da Philadelphia nati da atima era ainda gitijigari da yei itio.” Edo binga Iesu mi sisira eire. \q1 “Embo binga eiawa sira embo awa umone ewamei de gebe de da susu ra. Edo unemi David da mangiro pirigari rora awa ingo mi jigido atira. Edo unemi mangiro pirigadira awa embo nei mi mangiro awa gajari katogo ae ra. Edo unemi mangiro gajadira awa embo nei mi mangiro awa pirigari katogo ae ra. \v 8 Edo unemi ingoda yei sira, ‘Na ingo ro ewa awa gosena. Edo na gosena ingoda goroba awa kiambu rate ingo naso atopatari ambo ambo ise edo na sapo edo gogo edo ewa. Edo nanemi naso ge sari da emboro awa ingoda yei itido edo emboro be pirigetena. Edo nanemi emboro be awa pirigetena awa embo nei mi gajari katogo aera. \v 9 Naso ge ingiwo. Embo Satan da topo mi ungo awa Jew embobo setera te ungo awa ge busera awasedo nanemi ungo ingoda yei itano mambudo edo ungo men gido edo ingoda diti da tumondebain adera. Edo ungo gadera na ingo dubo budo ena awa. \v 10 Edo buria iji awa busu berari da embobo awa itido gadi sedo bugutira edo iji ainde nanemi ingo awa edo gogo edo simba adena ainda be awa ingo goroba edo nanemi ro awase sisena awa ewowa awasedo. \q1 \v 11 ‘Edo iji tupo atae ari na bugadena. Edo gaegae edo embo mi utu da riroga God mi ingo embo sia etiri atira awa bengono eore ta edo gogo edo rora kumbusewa awa simba edo gogo ewo. \v 12 Edo embo amemi wasiri bebegae derigadira awa nanemi ano embo awa teta God da tumondebain ari oro da tutuvi inge adira. Edo embo awa mana God da tumondebain ari oro awa doadira. Edo nanemi uso tamo da naso God da jawo awa gaiedo edo naso God da nati seka da jawo Jerusalem nati seka awa jiwadena. Edo God mi nati seka awa itari utu dodo wosadira. Edo daedo nanemi naso jawo seka awa gaiadena. \q1 \v 13 ‘Edo embo ingo dengoro atadira gido awa ro Asisi Kotopu mi Iesu gebe ari embobo da yei sira awa ingiwo.’” \s1 BINGA IESU GEBE ARI EMBOBO DITI DA LAODICEA NATI DA ATIMA ISERA AINDA YEI MAMBUSIRA \p \v 14 Iesu Keriso mi naso yei da sisira, “Binga sadi ena eiawa jiveio. Edo jivedo gido binga awa Iesu gebe ari embo diti da Laodicea nati da atima era ainda gitijigari da yei itio mambare.” Edo binga Iesu mi sisira eire. \q1 “Edo Iesu umo God da ge da awara sari embo mi edo gogo edo God da gebe moka awa isaga ira. Edo umo awa rora berari God mi isira ainda susu ra. \v 15 Edo unemi ingoda yei sira, ‘Na ingo ro isewa awa gosena. Embo umo ujo euri ungo iji nei sasaka jamo jamo indido era edo iji nei ungo sasaka awa vevera indido era awarate sasaka awa vevera be ae adira awa ungo mi tugadera. Edo ingo awa naso ge awa ujo ae aera te kumbae ewa awasedo ingo awa teta sasaka vevera ae jamo be aera te soropu da awodo ra. \v 16 Edo ingo naso ge ujo ae ae etewa amone awara edo ingo naso ge kumbae etewa amone awara te ingo awa teta sasaka vevera be ae awodo etewa awasedo na ingo naso be da awa tugadi aikambu etena. \v 17 Edo ingo sewa ingo rora jiwae embobo edo atari ewamei ewa sewa. Edo ingo ingoda yei rora jiwae atira awasedo ingo rora nenei ujo ae ewa sewa. Awarate ingo men gosewa edo dubo vevera tambutewa awa ingo gaera. Edo ingo awa teta embo rora ae edo bosini ae edo diti guba egeregari da awodo ra. \v 18 Edo awasedo nanemi ingoda yei sena ingo rora jiwae embobo adi sedo awa naso yei da puwo edo naso utu da gaiapa awa ori ave. Edo daedo ingoda men awa atae adi sedo awa utu da bo parara ori ave. Edo daedo ingo mi gadi sedo awa utu da siwo awa ori edo ingoda dombu da itiwo. \q1 \v 19 ‘Edo embo berari nanemi dubo budo ena awa ungo mi ari ewagaewa orase sedo awa nanemi ungo isiburise edo ungo dedo ena. Awasedo ingo ingoda jo berari mi ingoda wasiri bebegae dodo God da yei wareregewo. \v 20 Edo na mando mangiro pon da derido atise tain tain dorena. Edo embo amemi naso ge javi ingido mando mangiro pirigari na mando da torido na embo ainga da dada indari indadena. \q1 \v 21 ‘Edo embo amemi wasiri bebegae derigadira awa nanemi embo awa kumbudo naso gitijigari yei da mambano edo umo naso demonda anumbadira. Edo na daedo gitopo patido edo na naso Mama da gitijigari yei da mambudo edo naso Mama da demonda anumbedo atena. \q1 \v 22 ‘Edo embo ingo dengoro atirari gido ro Asisi Kotopu mi Iesu gebe ari embobo da yei sira awa ingiwo.’” \c 4 \s1 JOHN UTU DA TUMONDEBAIN ERO GOSISIRA \p \v 1 Edo na rora berari awa gido atae ise edo utu da mangiro pirigedo atiri gosisena. \p Edo ge javi teta puin da javi inge matu naso yei ge siri ingisena awa sekago ingisena. Edo ingeno umo sisira, “Imo einda vitio. Edo einda vitaso nanemi ro amboda adi ira awa isaga ano gase.” \v 2 Edo umo awodo setiri Asisi Kotopu mi bugudo naso joda goroba edo gitijijigurisira. Etiri edo na utu da gitijigari embo da anumba gosisena. Edo na embo anumba ainda anumbedo atiri gosisena. \v 3 Edo uso dombu awa teta ri munju mi ewarago isira. Edo uso agu da awa eriri gari neinde kainde mi umo jiroroka isira. \v 4 Edo gitijijigegari embobo 24 ainda anumba nenei mi gitijigari da anumba awa joda atiri jiroroka edo atisera. Edo gitijijigegari embobo 24 awawa gitijijigegari embobo 24 ainda anumba da anumbedo atisera. Edo gitijijigegari embobo awa bo parara awa ombari berari isera edo ungoda kopiri da awa gobe auri gold mi ari gitijigari embo mi asugurisira da awodo awa asugurisera. \v 5 Edo gitijigari embo ainda anumba soropu da atisira ainda edo birigi biri jara iri edo binga barara diviri edo javi neinde kainde bugusira. Edo gitijigari da anumba soropu da atisira ainda dombu da awa goriwo 7 awodo benibedo ewuse atisira. Edo goriwo 7 awa God da asisi ewamei 7 awa ra. \v 6 Edo gitijigari da anumba soropu da atisira ainda joda rora teta ewa binonu edo atima ira da awodo awa atisira. Edo na rora ainda jo awa isaga be gosisena. \p Edo rora 4 awodo gitijigari embo da anumba soropu da atisira ainda demonda wasiri de derido atisera. Edo rovi ravi 4 ainda oka de gun da awa diti mi ato ae ari ra. \v 7 Edo rora da wasiri de ainda uso gari awa teta wo Lion da gari da awodo ra. Edo nei ainda uso gari awa teta wo cow da mei da gari da awodo ra. Edo nei da uso gari awa teta embo da dombu da gari da awodo ra. Edo nei uso gari awa teta ri wakana mi pupusari inge da awodo ra. \v 8 Edo rovi ravi wasiri de 4 awa ungo dada da piki awa berari 6 awodo ra. Edo piki ainda be nei benei awa diti mi ato ae ari ra. Edo iji berari iji de tumba de ungo iji berari God jasiga ise ya sedo isera, \q1 “God Mamo imo Kotopu. God Mamo imo awa Kotopu edo imo awa goroba jiwae. God Mamo nangoda Bada imo awa Kotopu be Kotopu. Imo atima esa, atesa edo matawa atadesa.” \p \v 9 Edo rovi ravi wasiri de 4 ungo ya de da God jasiga edo isera. Edo embo gitijigari embo da anumba da anumbedo atisira ainda yei jasiga ise ategedo isera. Edo embo re amimi matawa atima ira. \v 10 Edo ungo ya de God jasiga eoro gitijijigegari embobo 24 awawa embo gitijigari da anumba da anumbedo atima isira embo ainda joda baingo dederi edo isera. Edo ungo baingo dederi ise embo matawa atima ira embo awa tumondebain edo isera. \v 11 Edo ungoda gitijigari embo da gobe ungoda kopiri da awa kumbudo gitijigari embo da jo da ititise sedo isera, \q1 “Nangoda Bada God inemi rora berari isesa. Edo inemi dipapa eoso ungo wasiri de bugudo isera. Awasedo embo berari mi imo jasiga ise imo sapo ise edo imo goroba nembodiba de atari sore.” \c 5 \s1 JOHN JIWARI KATO RUWARI GOSISIRA \p \v 1 Na ove jiwari rora ruwari embo gitijigari da anumba da anumbedo atisira amimi uso ingo be mi jigido atiri gosisena. Edo ove jiwari rora ainda be etoto awa ove mi beda ari ra. Edo umbaka vibu 7 awodo mi ove jiwari rora awa gajedo gogowo ari ra. \v 2 Edo na asisi ewamei goroba gosisena. Edo unemi gogo dimbudo sisira, “Embo ewamei mo rawa mi itari gambari umbaka vibu eiawa teugedo edo jiwari rora ruwari eiawa besugeiri?” \v 3 Edo umo awodo setiri ungo yei berari da embo ewamei da mi jiwari rora awa besugarase eura isera te embo da utu da ta busu tuda ta awodo mi jiwari rora awa besugorase awa tambae isera. Edo embo berari awa ove jiwari rora awa besugedo edo ajigari awa inono ae ra. \v 4 Edo na ji koma javi de sisena ainda be awa embo da ave ewamei amemi jiwari rora awa besugari katogo tambae isera awasedo. \v 5 Edo na ji awodo seno embo da gitijijigegari 24 ainda da mi naso yei sisira, “Ji seose ta gio. David da orobe nembodiba jawo sedo era Judah da ewowo da wo Lion mi gitopo awa patetira. Edo unemi gitopo awa patetira edo umo inono gido itari gambari umbaka vibu awa teugedo edo ove jiwari rora awa besugadira.” \s1 JOHN WO SHEEP DA MEI GOSISIRA \p \v 6 Edo na gitijigari da anumba de rora wasiri de 4 ainde gitijijigegari embobo 24 gitijigari da anumba jiroroka edo atisera awa gosise edo soropu da wo sheep da mei jawo Lamb awa gosisena. Edo Lamb ungo mi matu dorisera te umo betedo edo wasiri de sekago eririsira. Edo Lamb ainda kopiri da gi awa 7 edo uso dombu da ajigari awa daedo 7 na. Edo Lamb ainda diti 7 awa God da asisi ewamei 7 God mi itiri busu berari da mambusera awa ra. \v 7 Edo Lamb awawa mambudo embo gitijigari embo da anumba da anumbedo atisira ainda ingo be da jiwari rora ruwari awa kumbusira. \v 8 Edo umo awa kumbiri rovi ravi wasiri de 4 edo gitijijigegari embobo 24 ainde da Lamb ainda jo da baingo dederi edo tumondebain isera. Edo ungo dada awa rora teta guitar inge ingo jigari berari edo edo aga gold mi ari awa jigido isera. Edo aga jo da awa garawa muno eviri edo muno ewamei be vivitisira. Edo muno ewamei awa God da embobo mi iji berari God da yei ge sedo isera awa ra. \v 9 Edo ungo ainda baingo dederi edo atise ya seka sisera, \q1 “Imo itari gambari umbaka vibu teugedo edo ove jiwari rora besugadesa awa inono na ainda be awa ungo mi imo detero edo iso ororo mi etiri embo jiwae be jiwae God da yei bugusera. \q1 “Edo embobo awa embobo ge neinde kainde busu da awa sedo isera embobo awa ra. \q1 “Edo embobo awa busu berari da embobo ra. Edo ungo awa busu berari da orobe neinde kainde edo nati neinde kainde da embobo ra. \q1 \v 10 “Edo inemi ungo awa God da priest edo ingodenaso God kera orase ititisesa. Edo ungo mi busu da embobo awa gitijigadera. \q1 “Imo awa jiwari rora besugadesa awa inono na.” \p \v 11 Edo ya awa setero na sekago gosisena. Edo na ditini ise edo anela jiwae be jiwae da ge javi ingisena. Edo asisi ewagaewa awawa gitijigari embo da anumba de rovi ravi 4 wasiri de edo gitijijigegari embobo 24 awodo atisera awa jiroroka edo derido atisera. Edo asisi ewagaewa ainda ajigari awa jiwae be jiwae ra. \p \v 12 Edo ungo ainda derido atise ya eiawa sisera, \q1 “Lamb dorisera awa umo goroba de gaiapa de jiro gari de goroba ari de sapo ari de jasiga ari de kumbadira amone inono na.” \p \v 13 Edo rora berari utu da atima era edo busu da atima era edo ewa da atima era amimi ya sero ingisena. Edo ungo ya eiedo sisera, \q1 “Embo gitijigari embo da anumba da anumbedo atira edo Lamb de awa ungo iji matawa jasiga ari de sapo ari de goroba ari de kumbuse atore.” \p \v 14 Edo ungo ya awodo setero rovi ravi 4 wasiri de mi mina sisera, “En, awa gebe.” Edo gitijijigegari embobo 24 awa baingo dederi edo tumondebain isera. \c 6 \s1 LAMB MI UMBAKA VIBU 6 AWODO AWA JIWARI RUWARI DA AWA TEUGURISIRA \p \v 1 Edo na Lamb mi jiwari itari gambari umbaka vibu da awa teuguriri gosisena. Edo rovi ravi 4 wasiri de ainda da mi ge siri javi teta binga barara diwarago iri na ingeno sisira, “Puio.” \v 2 Setiri edo na wo horse parara bugutiri gosisena. Edo embo da ainda tamo da anumbedo edo umo gi emi jigido atiri gosisena. Edo umo gitijigari embo da gobe awa kumbudo edo embo dari embo isira edo umo embo patido dari betorase mambusira. \p \v 3 Edo Lamb mi jiwari itari gambari umbaka vibu nei awa teugurisira. Edo teugetiri edo na ingise ateno rora wasiri de nei mi sisira, “Puio.” \v 4 Setiri edo wo horse kokoi bugutiri gosisena. Edo embo ainda tamo da anumbedo atisira awa goroba ari kumbudo ari embo busu da awa embogo edo mina dara orase burisira. Edo umo goroba ari budo koma ewamei ari busu da awawa ari atae adira. Edo umo embogo embo da kasiwo nembodiba awa kumbusira. \p \v 5 Edo Lamb mi jiwari itari gambari umbaka vibu nei awa teugurisira. Edo teugetiri na ingise ateno rora wasiri de nei mi sisira, “Puio.” Setiri wo horse umenga bugutiri gosisena. Edo embo da ainda tamo da anumbedo atisira awa rora da bouga tega ari rora awa jigido atisira. \v 6 Edo awawa gido na rovi ravi wasiri de 4 ainda teda javi ingisena. Edo ingise ateno ge javi mi sisira, “Embo da mi ambe ingije kiambu awa ori adi sedo embo da mi gano itadira, uso iji da buro etira ainda betira awa. Edo embo da ami siri munju dogo kiambu da awa kumbadi sedo embo da amemi uso iji da buro etira ainda mina gano awa itadira. Awarate oil de grape ngamo wine de da mina awa atare.” \p \v 7 Edo Lamb mi jiwari gajari umbaka vibu nei awa teugurisira. Edo umo teugetiri edo na ingise ateno rora wasiri de nei amimi sisira, “Puio.” \v 8 Setiri wo horse karako bugutiri gosisena. Edo embo da uso tamo da anumbedo atisira uso jawo awa betari. Edo riawo matawa ewuse atari awa ambo ambo edo wo horse ainda ambo da bugusira. Edo ungo mi busu kataburisera edo etero dombu 4 awodo isira edo ungo dombu da ainda embobo awa doro betorase goroba kumbusera. Edo ungo embomei awa dadi sedo etero embogo de baimana de karu de busu da ambe wo berari awa dadi bugusera. \p \v 9 Edo Lamb mi jiwari gajari umbaka vibu nei awa teugurisira. Edo umo teugetiri edo rorou itari tendeba juda busu da embo mi embo deoro betedo isera ainda asisi awa gosisena. Edo embobo awa ungo busu da atise edo God da ge awa minonu sedo isera edo ungo edo gogo edo embo da yei Keriso da jawo da ge seoro gido isera awasedo busu da embo mi ungo detero bebetegurisera. \v 10 Edo ungo mi gogo dimbudo sisera, “Bada God imo awa goroba jiwae ra. Edo imo awa kotopu edo iso ge awa gebe moka ra. Edo iji roinge atae ari edo imo busu da embobo nango dorisera awa kasedo ungoda riroga itesi?” \v 11 Edo God mi embo dada da yei bo parara dada isira. Edo umo awawa ungoda yei itido sisira iji tupo ribori go simba orase sisira. Edo awa sedo ungoda yei sisira, “Ingo simba irirowo busu da embobo mi Iesu gebe ari embobo nenei Iesu sapo edo era awa ingo dorisera da awodo doro betadera. Edo Iesu gebe ari embobo da ajigari nanemi matu betorase awara sisena ajigari awa betoro awa busu da embobo mi ungo dari betari awa atae adera.” \p \v 12 Edo Lamb mi jiwari itari gambari umbaka vibu nei awa teugurisira. Edo umo awa iri na ditini isena. Edo na ditini eno didira nembodiba isira. Edo waiko umenga teta ungotu inge isira. Edo kariga teta ororo inge kokoi isira. \v 13 Edo damana sokedo utu da edo busu da wowosisera teta bisara mi sumbuse euri ri wasiri euri igi pururusedo busu da wosedo ira da awodo isira. \v 14 Edo utu ruwusira teta ingode opi ruvedo era da awodo. Edo utu awodo ruvedo edo atae edo mambusira. Edo doriri berari de ingigi berari de ungoda yei dodo gigiseburisera. \p \v 15 Edo busu da embobo da gitijijigegari nembogamo de memeinya de isoro embobo da gitijijigegari de rora jiwae embobo de embo nembogamo de agipo embobo de embo agipo embobo ae de ungo berari meko to da edo doriri temba da ganuma nembogamo da to da totorigedo unjugedo isera. \v 16 Edo ungo ainda unjugedo atise ganuma da edo doriri da yei gogo dimbudo sedo isera, “Gaegae edo Lamb nangoda yei tini gambari ira amimi nango tambure edo embo gitijigari da anumba da anumbedo atira amimi nango geure ta wosedo nango apuregegae. \v 17 Edo embo etoto ainda tini gambari iji awa bugira. Edo iji awa bugari embo inono mo amemi uso dombu da dereri?” \c 7 \s1 GOD MI ISRAEL EMBOBO 144,000 AINDA BEO DA USO SASA ITITISIRA \p \v 1 Edo na awa berari gido asisi ewamei 4 awodo gosisena. Edo asisi ewamei 4 awa busu da sangove 4 ainda derido busu da bisara 4 awa busu da edo ewa da edo ri tamo da awodo sumborase sedo ungo mi bisara awa to berari busu da ainda awa gajisera. \p \v 2 Edo na goseno asisi ewamei nei wosedo yari kena edo bugusira edo umo God wasiri de atima ira amimi sasa itido ira rora awa kumbudo bugusira. \v 3 Edo God mi asisi ewamei 4 ainda yei busu da edo ewa da memesi itorase goroba ititisira asisi ewagaewa ainda yei sisira, “Memesi boroko busu da edo ewa da edo ri da yei itave. Awarate giti ingode God da agipo embobo da beo da sasa itadera. Edo ingode awa edo awa ingo awo memesi bugadira.” \v 4 Setiri edo na ingeno embo God da sasa ungoda beo da kumbusera ainda ajigari awa sisera. Edo Israel orobe berari ainda teda awa embo 144,000 amimi God da sasa kumbusera. Edo Israel da embomei da orobe da jawo eire. \q1 \v 5 Edo Judah da orobe da sasa kumbusera ainda tega awa 12,000. Edo Reuben da orobe da sasa kumbusera ainda ajigari tega awa 12,000. Edo Gad da orobe da sasa kumbusera ainda ajigari tega awa 12,000. \v 6 Edo Asher da orobe da sasa kumbusira ainda ajigari tega awa 12,000 ra. Edo Naphtali da orobe da sasa kumbusera ainda ajigari tega awa 12,000. Edo Manasseh da orobe da sasa kumbusera ainda ajigari tega awa 12,000. \v 7 Edo Simeon da orobe da sasa kumbusera ainda ajigari tega awa 12,000. Edo Levi da orobe da sasa kumbusera ainda ajigari tega awa 12,000. Edo Issachar da orobe da sasa kumbusera ainda ajigari tega awa 12,000. \v 8 Edo Zebulun da orobe da sasa kumbusera ainda ajigari tega awa 12,000. Edo Joseph da orobe da sasa kumbusera ainda ajigari tega awa 12,000. Edo Benjamin da orobe da sasa kumbusera ainda ajigari tega awa 12,000. \s1 EMBO JIWAE BE JIWAE DADA ISERA \p \v 9 Edo na awawa gido atae edo sekago ditini isena. Edo embo jiwae be jiwae embo mi ajigari katogo ae awa gosisena. Edo embobo eiawa busu da orobe berari edo nati berari da embobo awa ra. Edo ungo awa busu da atise busu da ge gari neinde kainde sedo isera awa ra. Edo embobo awawa bo parara ewari berari edo ijiga ingo mi jigari berari edo Lamb da joda dederigedo atisera. \v 10 Edo embobo awa ainda dederigedo atise ungo gogo dimbudo sedo isera, “God gitijigari anumba da anumbedo atira edo Lamb de ungo etoto awawa soregari da susu ra.” \v 11 Edo asisi ewamei berari de gitijijigegari embobo 24 de rovi ravi 4 wasiri de gitijigari embo da anumba jinenebedo atima isera amimi God tumondebain edo isera. \v 12 Edo God tumondebain ise sedo isera, “Awa gebe jasiga ari de usasa de jiro gari de doio sari de sapo ari de goroba de matawa natopo atari awa God da topo ra. En awa gebe.” \p \v 13 Edo ungo awa setero gitijijigegari embobo 24 ainda embo da mi naso yei sisira, “Imo embo bo parara ewari berari etera eiawa gosesita? Edo imo ungo yei rawainda edo buguseri awa gosesita?” \p \v 14 Setiri na mina sisena, “Bajari na gaera te imo gosesa awasedo naso yei ujugeio gane.” \p Seteno umo naso yei sisira, “Embobo gosesa eiawa ungo busu da memesi nembodiba be nembodiba da soropu da sembusera awa ra. Edo ungo awa Lamb da ororo mi ungoda sinibo segedo edo parara isera awara. \v 15 Awasedo ungo God da gitijigari anumba demonda atise edo ungo uso mando da iji berari umo sapo edo era awara. Edo embo gitijigari embo da anumba da anumbedo atira amimi ungo edo gogo edo simba adira. \v 16 Edo ungo sekago mana beji tambaderi ta ko umo ujo awa mana tambadera. Edo waiko vevera mi mana ungo ewadira. Edo bisara vevera ta rora vevera nenei ro mi mana ungo ewadira. \v 17 Ainda be awa Lamb soropu da anumbedo atira amimi ungo simba adira teta wo sheep simba ari embo mi uso wo sheep simba edo ira da awodo. Edo God mi ungoda diti da jijiu awa tupari ungo iaviri adera.” \c 8 \s1 LAMB MI JIWARI RORA UMBAKA VIBU MI ITARI GAMBARI AMBO BE AMBO AWA TEUGURISIRA \p \v 1 Edo Lamb mi umbaka vibu jiwari rora da ambo be ambo awa teugetiri ge javi de javi nenei berari de utu da awa 30 minutes awodo atae isira. \p \v 2 Edo iji awa atae etiri na asisi ewamei 7 awodo God da joda dederigedo atero gosisena. Edo na goseno ungo da da puin burisera. \p \v 3 Edo asisi ewamei nei aga gold mi ari rora ewuse muno ewamei ira awa kumbari rora awa jigido edo umo bugudo rorou itari tendeba demonda dederisira. Edo ungo mi asisi ewamei ainda rora muno ewamei de jiwae ititisera unemi God da embobo da benunu de da dada edo edo rorou itari tendeba da gold mi ari gitijigari embo da anumba da joda atisira ainda itarase sedo. \v 4 Edo rora muno ewamei de dungisira ainda muno dagari ae be awa asisi ewamei God da joda derido atisira ainda ingo da aga da awa dodo edo God da yei God da embo da benunu God da sedo isera ainda da dada vivitisira. \v 5 Edo awodo edo asisi ewamei rigotu rorou itari tendeba da budo uso aga joino muno de kumbudo isira ainda joda ititisira. Edo joda itido aga awa warawara etiri busu da wowosisira. Edo wosetiri binga barara de javi nembodiba de edo birigi de didira de busu da isira. \s1 ASISI EWAGAEWA PUIN PUSISERA \p \v 6 Edo asisi ewamei 7 puin kumbusera awa ungo puin pusadi sia baia isera. \p \v 7 Edo asisi ewamei da uso puin pusisira. Edo pusetiri ga de gosoro de riawo ororo de dada ari busu da wowosisira. Edo riawo mi busu be da awa eviri edo busu be etoto awa atisira. Edo riawo mi ri nembogamo berari da be da awa ewuse edo be etoto awa doturisira. Edo riawo mi sasawa berari awa evetiri atae isera. \p \v 8 Edo asisi ewamei nei uso puin pusisira. Edo pusetiri edo rora teta doriri riawo mi ewarago ise wosedo ewa da mambusira. Edo ewa da wosetiri be da nembodiba awa wareregedo ororo isira. Edo ewa be da awa ororo etiri edo ewa be etoto awa atisira. \v 9 Edo rora wasiri de ewa da ainde sangove nei nembodiba da awa bebetero edo sangove nei be etoto awa atisera. Edo embo da nga nembogambo sangove nei da nembodiba awa bejedo dada ero edo sangove nei etoto awa atisera. \p \v 10 Edo asisi ewamei nei uso puin pusisira. Edo pusetiri damana nembodiba biri biri edo ewuse uso yei utu da awa teugedo edo umo de umo uriri memeinya nenei de da wowosira. \v 11 Edo damana ainda jawo awa tokaka ra. Edo umo wosetiri edo umo sangove nenei nembogamo awa tokaka etero edo sangove nenei etoto awa atisera. Edo umo tokaka isera awa embo jiwae be mi indido edo bebetegurisera ainda be awa umo awa tokaka isira awasedo. \p \v 12 Edo asisi ewamei nei mi uso puin pusisira. Edo pusetiri waiko da sangove nei nembodiba de kariga da be nei nembodiba de edo damana berari da ungoda sangove nembodiba nei de da yei biae ari bugiri sangove nenei nembogambo etoto atima isera. Edo ungoda usasa sangove nei nembodiba awa atae isira. Edo ungoda usasa sangove da awa atae etiri gido ungo janibedo gogo ae etero gido sipo bugusira edo waiko edo gogo edo janibae etiri tumba bugusira edo kariga de damana de janibari bebegae janiburisera. \p \v 13 Edo na dombu inda edo wakana nembodiba utu inbe inda iri gosisena. Edo wakana mi sisira, “Eiawa biae be biae be biae ra. Edo asisi ewamei nenei tamonde awa ungoda puin pusadi aikambu isera edo iji ainde awa memesi nembodiba be nembodiba awa embo busu da atima era ainda yei bugari ungo ro eri?” \c 9 \s1 ASISI EWAMEI NENEI TAMONDE UNGODA PUIN PUSISERA \p \v 1 Edo asisi ewamei nei mi uso puin pusisira. Edo pusetiri na damana utu da edo busu da wowosiri gosisena. Edo damana amimi riawo matawa ewuse atari da yei da mangiro awawa pirigarase sedo God mi mangiro pirigari rora awa uso yei ititisira. \v 2 Edo damana mangiro riawo matawa atari da yei da awa pirigetiri umbosi nembodiba be teta eke ewuse umbosi arago ise ijegedo bugudo inda vitido edo waiko de utu de awa gajetiri edo busu awa umenga isira. \v 3 Edo umbosi ainda jo da awa sopika busu da wowosisira. Edo sopika awawa embo oro memesi teta ganuma to guwo mi gaiuri memesi budo era da awodo awa sopika mi oro embo memesi kumborase sedo sopika goroba ari kumbusera. \v 4 Edo sasawa de ri de ri nenei de awa usibesi adi aerate ungo re embo God da sasa ungoda beo da itae awa dedo gaedo orase sisera. \v 5 Edo sopika mi embobo awa degoro bebetegorase saerate oro kariga 5 awodo memesi kumborase sisera. Edo ungo memesi kumbadera awa memesi awa teta ganuma to guwo mi embo gaiuri memesi budo era da awodo borase sisera. \v 6 Edo kariga 5 ainda joda embobo awa betadi dipapa adera te ungo mana betadera. Edo ungo betari eura adera te tambadi aera ainda be awa betari awa ungo dodo sumbudo mambadira. \p \v 7 Edo sopika sena ainda ungoda gari awa teta horse embo mi isoro da giro sagiro itoro edo era da awodo ra. Edo embo mi horse tamo da anumbedo mina dara adi sedo horse giro edo era da awodo ra. Edo horse ainda kopiri da awa rora na kotisena awa rora uso gari teta gitijigari embo da gobe gold mi ari da awodo ra. Edo horse ainda dombu da gari awa teta embo da dombu ingege ra. \v 8 Edo horse ainda tu awa teta evetu da kopiri tu inge edo ungoda di awa teta wo lion da di ingege ra. \v 9 Edo rora uso gari teta oka da bere auri mi ari ingege mi ungoda oka awa gajisera. Edo sopika ainda ungoda piki da javi awa teta horse mi gaga embo sirari kato de awa isoro embobo sirido isoro da sumbarase javi sedo ira da awodo sisira. \v 10 Edo sopika ainda ungoda senta awa teta dumi da awo da awodo ra. Edo ungo awo amimi oro embo kariga 5 awodo memesi tambadera. \v 11 Edo gitijigari nembodiba mi sopika eiawa gitijigido ira. Edo gitijigari awa asisi biae yei riawo matawa ewuse atima ira ainda gitijigido ira awa ra. Edo uso jawo Hebrew embobo da ge mi sedo era awa Abaddon na edo uso jawo Greek embobo da ge mi sedo era awa Apollyon na. Edo jawo Apollyon de Abaddon de ainda be awa rora usibesi ari embo. \p \v 12 Edo rovi ravi bebegae tamonde wakana mi sari setena. Edo biae da awa atae etiri edo bebegae etoto awa atira. \p \v 13 Edo asisi ewamei nei uso puin pusisira. Edo umo pusetiri ge javi sangove 4 rorou itari tendeba God da joda ainda bugutiri na ingisena. \v 14 Edo ge javi amimi asisi ewamei uso puin pusisira ainda sisira, “Asisi ewamei 4 umo nembodiba jawo Euphrates da bengi da bundetero atera awa wujegedo doio mambore.” \v 15 Edo setiri asisi ewamei mi ungo wujegurisira. Edo asisi ewamei 4 awa embo diti nembodiba busu da atima isera awa usibesi adi sia isera. Edo asisi ewamei 4 awawa iji eiawa edo kariga eiawa edo gaeko eiawa simba ewora. \v 16 Edo na setero gosisena isoro embobo horse da tamo da anumbedo tembera ainda ajigari awa 200 million na. \p \v 17 Edo na eturo arago ise na horse ainde embobo horse da tamo da anumbedo atisera awa gosisena. Edo embobo bere kokoi teta riawo kokoi inge edo umenga teta utu umenga inge edo karako ingege awa ombusena. Edo horse da kopiri awa teta lion da kopiri ingege ra. Edo riawo de umbosi de rora ewuse masa biae horse ainda be da bugudo isira. \v 18 Edo riawo de umbosi de edo rora ewuse muno biae edo isira rora ainde edo rora tamonde amimi embo diti nembodiba da busu da awa detero edo diti etoto atisera. \v 19 Edo horse awa ungoda be de ungoda senta de mi memesi adera awa ungoda goroba atira. Edo ungoda senta awa teta jingabu be mi gambudo ira da awodo ra. Edo ungo senta amimi eoro embo embo memesi budo era. \p \v 20 Awarate busu da embo diti etoto rovi ravi tamonde mi dae doturisera embobo awa ove kekevegari ungo ro isera awa dodo God da yei wareregae isera. Edo ungo auri mina nembogamo mi ganuma mi ri mi ove kekevegedo isera. Edo ove kekevegari ungo diti egae edo dengoro egae edo pepeta ae awa ungo tumondebain ari doae edo isera. Edo ungo asisi bebegae tumondebain ari doae edo isera. \v 21 Edo daedo embobo awa embo dari betari edo inja edo dita ari viro ari wasiri de bengono ari wasiri de awa dodo God da yei wareregae edo isera. \c 10 \s1 ASISI EWAMEI MI JIWARI JOHN DA YEI ITITISIRA \p \v 1 Edo asisi ewamei nei goroba jiwae awa utu dodo wowosiri gosisena. Edo asisi ewamei awa bo teta poroga inge ombusira edo eriri mi uso kopiri jiroroka isira. Edo uso dombu awa teta waiko mi janibarago isira. Edo uso tei etoto awa teta riawo avewa inge isira. \v 2 Edo umo jiwari kiambu pirigari uso ingo da jijigurisira. Edo umo uso tei be awa ewa tamo da itido uso tei anda awa busu da derido edo umo gogo teta lion mane mi dimbarago edo ge sisira. \v 3 Edo umo gogo dimbiri binga barara 7 awodo uso ge mina gogo de sisera. \v 4 Edo ungo ge mina sero na ungo ro sisera awa gaiadi isena te ge javi utu da siri ingisena. Edo na ingeno ge javi mi sisira, “Duberi 7 mi ro setera awa jiwose ta ungoda ge awa unjugari da doio atare.” \p \v 5 Edo ge javi awodo setiri na asisi ewamei tei nei ewa da edo tei nei busu da edo derido atiri gosisena amimi uso ingo be awa utu kena jigiri eriri sari gari ge sisira. \v 6 Edo umo ge awawa God utu de edo rora berari ainda atima ira ainde edo busu de edo rora berari ainda atima ira ainde edo ewa de edo rora berari ainda atima ira awa isira embo matawa atima ira ainda jawo da ge awa sisira, “Iji bugari iji nei awa simba eose. \v 7 Edo asisi ewamei ambo be ambo awa uso puin pusari God mi jo ge matu uso binga sari embobo da yei sisira awawa awodo teta awa adira.” \p \v 8 Edo umo awodo setiri ge javi utu da siri ingisena ge javi awa sekago naso yei sisira, “Mambuio jiwari pirigari asisi ewamei tei nei ewa da derido tei nei busu da derido edo atira amimi jigido atira awa kumbase.” \p \v 9 Edo ge javi awodo setiri na mambudo asisi ewamei da yei jiwari kiambu awa naso yei itarase sedo gosisena. Edo sedo geteno umo naso yei sisira, “Kumbudo indio. Edo imo indaso jiwari awa iso be da awa porere teta jou mi arago adira te iso tini da awa tokaka biae be adira.” \p \v 10 Setiri na jiwari kiambu awa uso ingo da kumbudo edo indisena. Edo indisena awa naso be da awa porere teta jou mi porere arago isira te nukegurisena awa naso tini da awa tokaka isira. \v 11 Edo na awodo eteno umo naso yei sisira, “Imo sekago God da binga awa busu da embo diti jiwae de edo ungoda gitijijigegari embobo de ungoda ge neinde kainde de edo tamo neinde kainde da yei God da binga awa minonu seio.” \c 11 \s1 EMBO ETOTO MI GOD DA BINGA MINONU SADERA \p \v 1 Edo unemi naso yei tega bari ituka teta ketu inge awa itido sisira, “Erido God da tumondebain ari oro de rorou itari tendeba de da tega awa kumbuio. Edo embo roinge mi God uso tumondebain ari oro da tumondebain eri awawa ajigeio. \v 2 Awarate God da tumondebain ari oro arapa da tega awa kumbose yei amone embo Jew ae awa kumboro toradera. Edo ungo torido kariga 42 awodo Jerusalem nati ewamei be ewamei da yei biae ise atadera. \v 3 Edo ungo awodo ise atiroro na naso binga sari embobo etoto itano mambudo iji 1,260 ainda joda naso binga minonu sadera. Edo ungo re bo betari waia awodo awa ombadera.” \p \v 4 Edo binga sari embobo etoto emone teta ri olive etoto inge edo goriwo esegari rora etoto iji berari busu berari da gitijigari da joda atima ira da awodo ra. \v 5 Edo embo amemi binga sari embobo etoto awa usibesi adi adera awa riawo ungoda be da edo bugudo ungoda gitopo usibesi adira. Edo emboro eiedo da embo amemi ungo usibesi adi adera awa bebetegadera. \v 6 Edo gaegae edo iji ainde ga bugurase sedo ungo God da binga minonu sadi sedo ungo utu gajari goroba awa kumbusera. Edo ungo sasaka memeinya awa soro ororo arase sedo ungo goroba ari kumbusera. Edo ungo soro karu neinde kainde busu da embobo da yei bugarase sedo ungo goroba kumbusera. Edo ungo awodo adi goroba kumbusera ungo iji nonde dipapa adera ainde. \p \v 7 Edo ungo God da binga minonu sedo atae oro ambe wo mi riawo matawa ewuse atima ira yei ainda edo bugudo ungo de da embogo adira. Edo ungo patido dari bebetegadera. \v 8 Edo ungo betoro ungoda tamo awa nati nembodiba uso jawo Jerusalem da emboro da doro ungo ainda pasido atadera. Edo embo mi ge unjugari da sise awa ungo mi iji nenei nati awa Sodom nati sadera edo iji nenei awa Egypt busu sadera. Edo nati re da ainda ungo mi Iesu awa benema mi orega da detero bebetisira. \v 9 Edo iji tamonde edo nei soropu ainde embo nati neinde kainde edo ungoda ge neinde kainde edo ungoda tamo gari neinde kainde mi God da binga sari embo etoto da tamo awa gadera. Edo embo da amemi tamo awa kumbudo mambudo gowadi dipapa oro edo embo mi embo ainda yei sadera ungo gowove sadera. \v 10 Edo God da binga sari embobo etoto awa bebetegetoro embo busu da atima era awa iaviri edo kando mina ita adera edo ungo mi bondo dada adera ainda be awa God da binga sari embobo etoto amimi eoro embo busu da awa memesi kumbutewora awa bebetisera awasedo. \p \v 11 Edo iji tamonde edo nei soropu da awa atae ari God mi ungoda yei wasiri seka da oena awa itari edo ungo wasiri seka de eradera. Edo ungo erero embo berari mi ungo gido oju be isera. \v 12 Edo ge javi nembodiba utu da edo ungoda yei einda vitiwo setiri God da binga sari embobo etoto ge awa ingisera. Edo ungo ge awa ingido edo ungoda gitopo awa ditini ise atero ungo poroga da joda utu da vivitisera. \p \v 13 Edo ungo vitero didira nembodiba isira. Edo didira etiri edo nati da oro mando diti nembodiba da awa usibesi etiri edo diti 9 awodo awa atiri edo embo 7,000 awodo bebetisera. Edo awodo etiri embo nenei berari oju mi biae edo ungo God utu da atima ira awa jasiga isera. \p \v 14 Edo wakana iji tamonde biae sisira. Edo bebegae etoto awa atae etira te biae da atira awa bugadi aikambu etira. \s1 ASISI EWAMEI AMBO BE AMBO USO PUIN PUSISIRA \p \v 15 Edo asisi ewamei ambo be ambo awa uso puin pusisira. Edo pusisira. Edo pusetiri ge javi jiwae utu da sisera, \q1 “Busu berari da busu da gitijijigegari gitijigido isera yei berari ainda ingodenaso Bada God de Soregari Embo God mi itari bugarase sisira awawa boroko gitijijigurera.” \p \v 16 Edo ge javi awodo setero gitijijigegari embobo 24 ungoda gitijigari anumba God da jo da ainda anumbedo atima isera awa ungo baingo dederi edo dombu mi busu tamesi ise God tumondebaion ise sisera, \q1 \v 17 “Bada God imo goroba da susu awa matawa atima esa. Edo imo iso goroba nembodiba mi gitijigari tuturo etesa awasedo nango iso yei doio sera. \v 18 Edo embo God gae awa tini gambari etera te iso tini gambari ari iji awa bugira. Edo embo bebetegurisera awa inemi kasadesa iji awa bugira. \q1 Edo iji inemi iso agipo embobo binga sari embobo da riroga itadesa iji awawa bugira. Edo iji inemi riroga iso embo berari embo nembogamo de embo memeinya de da itadesa iji awa bugira. Edo iji inemi embo busu usibesi isera awa usibesi adesa iji awa bugira.” \p \v 19 Edo tumondebain ari oro utu da ainda be awa pirigurisira. Edo pirigetiri embo mi sari gari ge dada ari tumondebain ari oro jo da awa gosisera. Edo birigi de gogo de binga barara de didira de ga nembodiba de gosoro de isira. \c 12 \s1 EVETU DE WO NEMBODIBA TETA INGABA INGE AINDA GE AWA \p \v 1 Edo utu da rora na matu gae awa etiri duduku be duduku isena. Edo na evetu teta bo waiko mi ewari inge awa gosisena. Edo uso tei tu da awa kariga edo gitijigari evetu da gobe damana 12 de awa uso kopiri da ra. \v 2 Edo evetu awa gasou de ra edo mei kumbadi aikambu isira ainda memesi awa kumbusira. \p \v 3 Edo utu da na rora nei na matu gae awa gido duduku be isena. Edo na rora wo ingaba inge nembodiba gosisena. Edo wo ainda tamo da ove awa kokoi edo uso kopiri awa 7 edo kopiri da gi awa 10 edo kopiri dada ainda awa gitijigari embo da gobe ra. \v 4 Edo wo amimi damana diti etoto nembogamo awa doturise uso jimbi mi damana diti nembodiba da awa utu da edo jumbudo wawara etiri ungo busu da wowosisera. Edo awodo edo evetu awa mei kumbadi aikambu iri gido umo evetu da yei asusubedo mambudo kotisira evetu mei kumbari nanemi nukegadena kotisira. \v 5 Edo evetu mei burisira awa ituka auri mi ari amimi busu berari da embobo awa gitijigadira. Edo evetu awa mei betiri embo da mi mei awa soumbedo budo God da gitijigari anumba demonda kumbudo mambusira. \v 6 Edo evetu awa yei embo atae yei ainda sumbudo mambusira yei God mi umo embo sia isira ainda edo ainda ungo mi umo awa iji 1,260 awodo simba adera. \p \v 7 Edo utu da embogo nembodiba tuturo isira. Edo Michael de uso asisi ewagaewa de mi wo nembodiba ingaba inge awa ondoro mambarase sedo ungae da embogo isera. \v 8 Edo wo nembodiba de uso anela de wareregedo embogo isera te Michael de uso asisi ewagaewa de mi wo nembodiba de uso asisi bebegae de awa dorisera. \v 9 Edo ungo dedo Michael mi wo nembodiba awa warawara etiri utu dodo wowosisira. Edo wo nembodiba ingaba inge umo awa jingabu ogo jawo Satan ra edo uso jawo nei awa Binei na. Edo embo re amimi busu da embo berari gandubedo ira. Edo Michael de uso asisi ewagaewa de mi umo dedo ungo mi umo de uso asisi bebegae berari de awa warawara etero ungo busu da wowosisera. \p \v 10 Edo ungo awodo etero ge javi nembodiba mi utu da edo sisira, \q1 “Boroko God da soregari bugira. Edo boroko God gitijigari goroba awa uso topo awa isaga etira edo boroko soregari embo God mi itiri bugusira awa daedo gitijigari goroba awa uso topo awa isaga etira. Edo awawa isaga etira ainda be awa iji de tumba de embo amimi God da dombu da iji berari ingodenaso nanonamendi Iesu gebe ari embomei awa bekuba evira edo embo awa pigetero utu dodo wosetira. \q1 \v 11 Edo ingodenaso nanonamendi Lamb da ororo mi edo God da gebe moka ungo mi minonu sisera amimi Satan pasetira. Edo ungo oju ae Iesu da jawo da bebetegadi ungo gitopo de da embogo isera. \v 12 Awasedo utu de ingo berari utu da atewa awa iaviri ewo. Awarate busu de ewa de ingoda yei awa biae be biae ra ainda be awa Satan ingoda yei wowosira awa tini gambari be ira. Edo umo tini gambari be tini gambari ira ainda be awa umo gosira uso iji awa atae adi aikambu etira awasedo.” \p \v 13 Edo wo nembodiba teta ingaba inge awa umo warawara etero utu dodo busu da wosetira awa gido gido umo evetu mei kumbusira evetu awa ondadi tuturo isira. \v 14 Awarate evetu awawa pupusedo uso yei embo atae ainda mambarase sedo ungo mi uso yei piki nembogamo wakana da awa etoto ititisera. Edo evetu awa pupusedo uso yei da mambari ainda jingabu mi umo dari jaredo doadira ainda be awa God mi gaeko tamonde edo nei da soropu da awodo umo simba adera. \v 15 Awasedo evetu awa oju sumbiri jingabu uso ambo da bugudo sasaka uso be da tugetiri wosedo teta umo nembodiba bojari inge isira. Edo jingabu mi evetu awa umo tamo da peko peko edo mambarase sedo umo bojari awa tugisira. \v 16 Awarate busu mi evetu awa kondade edo be angedo sasaka wo nembodiba da be da wowosisira awa nukegurisira. \v 17 Edo wo nembodiba awa evetu ainda yei tini gambari edo mambudo evetu ainda orobe deda embogo isira. Edo evetu ainda orobe awa embo berari God da ge kera ise Iesu mi gebe moka isaga isira awa gebe ise atima era awa ra. \v 18 Edo wo nembodiba ingaba inge awa umo mambudo ewa be da dederisira. \c 13 \s1 WO NEMBOGAMO ETOTO ARI BEBEGAE ISERA AINDA KIKI \p \v 1 Edo ditini eno wo nembodiba ewa tuda edo vivitisira. Edo wo nembodiba ainda kopiri da gi awa 10 edo uso kopiri awa 7. Edo gitijigari embo da gobe awa wo ainda kopiri da gi berari 10 ainda dada atisira edo kopiri 7 ainde daedo atisira edo jawo bebegae mi isibari ge bebegae God da jawo da sisera awawa ainda gaisera atira. \v 2 Edo wo nembodiba gosisena awawa uso gari awa teta ambe wo jawo leopard uso gari teta pusi da da awodo ainda ra. Edo wo ainda uso tei awa teta ambe wo jawo bear da da awodo ra. Edo wo ainda be awa teta lion da be inge ra. \v 3 Edo na wo da ainda kopiri awa embo amemi dari betari inge rate bubuko mi sekago evevegari edo kopiri sekago ewamei ari inge awa gosisena. Edo busu da embobo berari wo awa gido kove edo dipapa edo wo awa ambo ambo isera. \v 4 Edo busu da embo berari wo nembodiba ingaba inge awa tumondebain isera ainda be awa unemi uso goroba awa wo nembodiba ewa tuda edo vivitisira ainda yei ititisira awasedo. Edo ungo daedo wo nembodiba awa tumondebain ise sedo isera, “Embo da ave edo wo da rawa ungoda goroba wo einde da inono aera awasedo embo da rawai edo wo da rawa ungae da embogo adi aera.” \p \v 5 Edo kariga 42 awodo wo nembodiba ewa tuda edo vivitisira amimi uso buro bebegae be awa edo isira te God mi beitigae ra. Edo iji ainde wo nembodiba mi goroba de ge bebegae sedo isira. \v 6 Edo umo ge bebegae God da jawo da sedo isira edo yei umo atima ira jawo da sedo isira edo embo berari utu da atima isera ainda jawo da sedo isira. \v 7 Edo God mi awara seuri wo nembodiba ewa tuda edo vivitisira amimi God da embobo de embogo edo ungo derigedo isira. Edo umo embo tamo neinde kainde edo ge neinde kainde da gitijigari embo isira. \v 8 Edo embo berari busu da atera amimi wo awa tumondebain adera. Edo God umo busu ae atise embo nenei da jawo wasiri matawa atari da jiwari kato da jiusira. Edo wasiri da jiwari kato re Lamb ungo mi detero betisira ainda topo ra. Awarate embo wo awa tumondebain adera embobo awa ungo ungoda jawo God mi wasiri matawa atari da jiwari kato da jiwae amimi adera. \p \v 9 Edo embo ingo dengoro atirari gido ingiwo. \v 10 God awara sari Iesu gebe ari embo awa budo gajari oro da itadi adera awa embo kumbudo gajari oro da itadera. Edo God mi awara sari Iesu gebe ari embo awa kasiwo mi doro betadi adira awa embo doro betadira. Awasedo Iesu gebe ari embobo ungo goroba de atise edo iji berari Iesu gebe ore. \p \v 11 Edo wo nembodiba nei busu da edo vivitiri gosisena. Edo wo ainda gi etoto awa teta lamb da gi da awodo ra edo uso ge awa teta wo ingaba da ge inge ra. \v 12 Edo wo nembodiba ewa tuda edo vivitisira ainda uso betari da bubuko awa ewamei etiri edo uso goroba awa wo nei amboda busu da edo vivitisira ainda ititisira. Edo wo nembodiba busu da edo vivitisira amimi setiri busu da embo berari de rora berari de mi wo ewa tuda edo vivitisira awa tumondebain isera. \v 13 Edo wo nembodiba busu da edo vivitisira amimi ari wasiri nembogamo edo isira. Edo awodo ise seuri busu da embo berari ditini eoro riawo utu da edo busu da wosedo isira. \p \v 14 Edo God mi awara seuri wo nembodiba busu da edo vivitisira amimi wo nembodiba da joda ari wasiri goroba de edo isira edo amimi embo berari busu da atima isera awa gandubedo isera. Edo wo nembodiba busu da edo vivitisira amimi setiri busu da embo berari mi ove kewari uso gari teta wo nembodiba ewa tuda edo vivitisira awa kasiwo mi dari betadi aikambu edo sekago erari inge da gari awodo isera. \v 15 Edo God mi awara setiri wo nembodiba busu da edo vivitisira amimi oena pusetiri ove kewari uso gari teta wo nembodiba ewa tuda edo vivitisira ainda inge ainda yei toriri ove kewari awa wasiri kumbudo ge sadi tuturo isira. Edo ove kewari amimi setiri ungo mi embo ove kewari tumondebain ae edo isera awawa degeregurisera. \v 16 Edo wo nembodiba ewa tuda edo vivitisira amimi setiri embo berari embo nembogamo de memeinya de embo rora jiwae de rora ae de agipo embobo de embo agipo ae edo era ainde ungo taroro ungoda kopiri da ta ingo be da awodo burisera. \v 17 Edo tararo da uso gari awa wo da jawo de uso ajigari tega de ra awasedo embo taroro eiawa kumbae edo isera awa ungo rovi ravi ori garori ari sago ae isera. \p \v 18 Edo eiawa kotewo. Embo ave jiro gari embo awa wo nembodiba ewa tuda edo vivitisira ainda ajigari einda be awa tambare ainda be awa ajigari awa embo da jawo ra. Edo ajigari uso tega re 666 ra. \c 14 \s1 EMBO IESU MI MINA ITIDO SOREGURISIRA UNGO MI YA SEKA SISERA \p \v 1 Edo na wo Lamb doriri Zion da deriri gosisena. Edo embo 144,000 awodo Lamb da jawo de uso Mamo da jawo de awa ungoda kopiri da jiwari awa ungo Lamb ga da derido atero gosisena. \v 2 Edo ge javi utu da ingisena. Edo ge ainda javi awa teta umo mi doriri mendo da edo wosedo ganuma da dorise javi sarago isira. Edo ge javi awa teta barara diwarago isira. Edo ge javi ingisena awa uso ge javi awa teta embo jiwae be mi rora teta guitar inge dorirari sarago da awodo isira. \p \v 3 Edo embo 144,000 ungoda dombu awa gitijigari embo da anumba kena edo rovi ravi 4 wasiri de derido atisera awa kena isera. Edo ungo ainda derido atise ya seka sisera. Edo embo 144,000 Iesu mina itido busu da soregurisa awa ungo ya awa garira te embo nenei ya awa gae awasedo ungo sari katogo aera. \v 4 Edo embo 144,000 awa ungo ari wasiri bebegae ae isera awawa jo ewagaewa de atisera. Edo Lamb yei rawainda mambutira awa ungo umo ambo ambo edo era. Edo ungo re embo Iesu mi mina itido busu da embobo da yei soregurisira embobo awa ra. Edo ungo awa teta gitago da rora be tuturo ingege ta edo embo unemi tuturo da God da yei ititisira. \v 5 Edo ungo ge da busae. Edo ungo wasiri bebegae ae atima isera. \s1 ASISI EWAMEI TAMONDE MI BINGA MINONU SISERA \p \v 6 Asisi ewamei da utu inda pupusiri gosisena. Edo umo binga ewamei matawa atari awa embo ge neinde kainde edo tamo neinde kainde da yei minonu sadi sedo burisira. \v 7 Edo asisi ewamei mi gogo dimbudo sisira, “God oju ewo ainda be awa unemi busu da embo berari kasadira ainda iji awa aikambu etira. Edo embo utu de busu de edo ewa de umo de isira embo awa tumondebain ewo.” \p \v 8 Edo umo awodo setiri asisi ewamei nei umo ambo ambo isira amimi sisira, “Nati nembodiba Babylon awa munjegedo edo atae etira. Nati eiawa teta evetu biae mi euri busu da embo berari ari bebegae sino da pu da ari awa edo era da awodo ra. Edo evetu einda ari wasiri biae awa teta sasaka jawo wine goroba be embo mi indido jiro bebegae edo era da awodo. Awasedo nati ainda embobo de embo berari ungoda ge ingewora ainde awa God da tini gambari awawa gadera.” \p \v 9 Edo asisi ewamei nei asisi ewamei etoto awa ambo ambo isira amimi sisira, “Embo amemi wo nembodiba ewa tuda edo vivitisira awa tumondebain edo ira edo embo ave taroro uso kopiri da ta ko ingo da dorisira embo awa God da tini gambari gadira. \v 10 Edo God da tini gambari awa teta umo wine okain adego da jojedo ira da awodo ra. Edo gaegae edo umo okain awa goroba ae eurase sedo sasaka de dada ae edo ira awodo ra. Edo God mi seuri embo mi aga da umo okain awa indido era da awodo ra. Edo embo ave awodo adira awa umo riawo de busu de masa biae ise ewuse atima ira ainda soropu da wosadira edo umo God da asisi ewagaewa de Lamb de ainda dombu da memesi burise atadira. \v 11 Edo riawo mi ari embobo awa memesi kumbutiroro edo uso umbosi awa mata awodo ewuse atadira. Awasedo embo wo nembodiba de edo wo ove kewari de awa tumondebain adera awa ungo de embo nenei wo da taroro kumbadera embobo de awa memesi awa ungo dodo mambadi aera. Edo memesi awa atirari embobo awa mana jango indadera.” \p \v 12 Awasedo God da embobo ungo God da agodari ge kera ise edo Iesu gebe ari doae edo era awa ungo goroba de atore. \p \v 13 Edo ge utu da setiri ingisena edo sisira, “Eiawa jiveio, ‘Boroko iji einde tuturo edo embo ave Iesu da buro era awa betedo ungo iaviri adera.’” \p Edo ge javi awa setiri Asisi Kotopu mi mina sisira, “Awa gebe embo Iesu da buro awodo edo era awa ungo jango indise edo gogo edo atadera ainda be awa ungo utu da mambudo ungoda buro da riroga kumbadera.” \s1 UNGO AWODO ISERA AWA BUSU DA RIBE INDARI DADA ISERA \p \v 14 Edo awodo edo atae etiri na dombu inda edo rora uso gari teta embo da inge gosisena. Edo embo awa poroga parara da anumbedo atisira. Edo gitijigari embo da gobe gold mi ari awa uso kopiri da edo uso ingo da awa kasiwo di de ongegebari jijigurisira. \v 15 Edo asisi ewamei nei mi God da tumondebain ari oro da edo mambuse gogo dimbudo embo poroga da anumbedo atisira ainda yei sisira, “Busu da ribe awa sari etira edo inemi dada adesa iji be awa bugira awasedo imo iso kasiwo mi busu da ribe awa divedo dada eio.” \v 16 Edo awodo setiri embo poroga tamo da anumbedo atisira amimi uso kasiwo mi pigedo busu da ribe awa dada isira. \p \v 17 Edo umo awodo etiri asisi ewamei nei God da tumondebain ari oro utu da ainda edo bugutiri gosisena. Edo umo daedo kasiwo di de ongegebari awa jijigurisira. \p \v 18 Edo asisi ewamei nei riawo simba edo ira awa umo rorou itari tendeba awa dodo bugusira. Edo umo bugudo gogo dimbudo asisi ewamei kasiwo di de jigido atisira ainda sisira, “Wine be busu da awa sari etira awasedo imo iso kasiwo mi divedo wine be awa dada eio.” \v 19 Edo umo awodo setiri asisi ewamei kasiwo uso awa pigedo wine be awa diwusira. Edo umo divedo wine be awa God da ribe jasari rora da wawara isira. Edo ribe jasari rora awa God da tini gambari ra. \v 20 Edo asisi ewamei rora ainda wawara etiri wine be awa jasisira etiri ororo ribe jasari rora ainda edo yoyogo isira awa teta umo bojedo yei pendido ira da awodo isira. Edo uso kapuru tega awa embo da awodo ra edo mambusira awa 300 km awodo ra. \c 15 \s1 ASISI EWAMEI 7 EMBO JIWAE BE USIBESI ADERA AINDA GOROBA DE AWA DEDERISERA \p \v 1 Edo na utu da rora da na matu gae awa gido na kove be isena. Edo anela 7 awodo memesi berari 7 awodo awa jigido edo busu da itoro wosedo embo jiwae be usibesi orase sedo derido sia isera. Edo memesi 7 ambo be ambo awa bugadira awa God da tini gambari awa atae adira. \p \v 2 Edo na rora da uso gari awa teta ewa binono edo ira ainda gari da awodo gosisena. Edo na rora da ewa da uso gari awa teta riawo da gari awodo gosisena. Edo na daedo embomei wo nembodiba ewa tuda edo vivitisira edo uso ove kewari tumondebain ae edo uso sasa de edo uso ajigari de kumbae patido derigurisera awa gosisena. Edo embobo gosisena awa ungo sino God mi ungoda yei ititisira awa jigido edo rora teta ewa binono dari inge isira ainda demonda derido atero gosisena. \v 3 Edo ungo ainda derido atise edo jasiga ari ya God da agipo ari embo Moses de Lamb de mi God da jawo da sisera awa ya sisera, \q1 “Bada God imo goroba nembodiba de atesa. Edo wasiri inemi edo esa awa nembodiba edo goroba. Edo busu berari da embo da gitijigari nembogamo awa imo embo ganduburise wasiri aerate imo ari wasiri ewagaewa edo esa. \q1 \v 4 “Bada God embo berari mi imo sapo ore. Edo embo berari mi iso jawo jasiga ore. Edo imo imosuka awa ewamei. Edo busu da embo berari mi iso joda puma imo tumondebain adera ainda be awa ari ewagaewa inemi edo esa awa isaga edo ira.” \p \v 5 Edo awawa geteno edo God da tumondebain ari oro utu da ainda be awa pirigetiri edo na ainda joda God da oro kire bo mi ari gosisena. \v 6 Edo asisi ewamei 7 memesi 7 awodo jijigurisera awa God da tumondebain ari oro da edo bugusera. Edo ungo awawa bo seka awawa ombudo edo esi gold mi ari awawa emi tu da didigigedo bugusera. \v 7 Edo ungo bugero rovi ravi wasiri de 4 ainda da mi aga 7 awodo gold mi ari awawa asisi ewamei 7 ainda ititisira. Edo aga ungoda yei ititisira awa God da tini gambari matawa atima ira awara. \v 8 Edo God da tumondebain ari oro joda awa God da goroba de usasa de da umbosi mi beda isira. Edo embo tumondebain ari oro da joda torari awawa inono ae isira. Awarate memesi 7 anela 7 mi kumbudo bugusera memesi 7 awawa atae ari awa iji ainde embo mi tumondebain ari oro da toradera. \c 16 \s1 ASISI EWAGAEWA 7 MI GOD DA TINI GAMBARI UNGODA AGA DA AWA JOJETERO BUSU DA WOWOSISIRA \p \v 1 Ge javi nembodiba God da tumondebain ari oro da gogo dimbiri ingisena. Edo ge javi amimi asisi ewamei 7 da yei sisira, “Mambudo God da tini gambari aga 7 da awa jojawo busu da wosare.” \p \v 2 Edo ge javi awodo setiri asisi ewamei giti awa rora uso aga da awawa jojetiri busu da wowosisira. Edo wosedo embo wo nembodiba ewa tuda edo vivitisira ainda taroro burisera edo wo nembodiba da ove kewari tumondebain edo isera embobo ainda tamo da iso mamatu gari neinde kainde awa bugiri ungo memesi nembodiba be burisera. \p \v 3 Edo asisi ewamei nei uso aga da rora da ro awa jojetiri ewa da wowosisira. Edo wosedo ewa awa teta betari embo da ororo inge etiri rora wasiri de berari ewa da awa bebetegurisera. \p \v 4 Edo asisi ewamei nei uso aga da rora rori awa jojetiri edo umo da edo umo uriri da wowosisira. Edo wosetiri sasaka awa dodo ororo isira. \v 5 Edo asisi ewamei umo simba edo ira awa na ingeno sisira, “God imo awa ewamei be ewamei ra. Edo imo mata awodo atima ewosa awa boroko atesa edo imo riroga eiawa itadesa amone ewamei ra. \v 6 Edo busu da embobo mi iso embobo de edo iso binga sari embobo de degoro ungoda ororo yogogo edo ira awasedo inemi busu da embobo da yei ororo indorase itesa. Edo awodo riroga eiawa etesa awa ewamei be etesa.” \p \v 7 Edo umo awodo setiri ge javi nei rorou itari tendeba da siri ingisena, “Bada God iso goroba awawa nembodiba ra. Edo emboro awodo esa amone mina esa awasedo amone awara.” \p \v 8 Edo asisi ewamei nei uso aga da rora rori awa jojetiri edo waiko da wowosisira. Edo God mi awara setiri waiko vevera be edo uso usasa mi embo ewusira. \v 9 Edo waiko da usasa mi embo eviri ungo isiburise God da jawo da ge bebegae memesi itari ge sisera te ungo ungoda wasiri bebegae awa dodo God da yei wareregae isera edo umo jasiga ae isera. \p \v 10 Edo asisi ewamei nei mi uso rora ro aga da awa jojetiri edo wo nembodiba ewa tuda edo vivitisira ainda gitijigari anumba da wowosisira. Edo wosetiri yei wo nembodiba mi gitijigido isira awa umenga isira. Edo embo memesi nembodiba be kumbuse edo ungoda avewa gambudo isera memesi awasedo. \v 11 Edo ungo ungoda iso mamatu de memesi de awa embo God utu da embo nembogamo da yei isiburise bebegae sedo isera te ungo ungoda wasiri bebegae awa dodo God da yei wareregae ra. \p \v 12 Edo asisi ewamei nei mi uso aga da rora rori awa jojetiri wosedo sasaka nembodiba jawo Euphrates da wowosisira. Edo rora awa wosetiri umo awa atae be evevegurisira. Edo evevegetiri emboro gitijijigegari embobo waiko vitido yari kena da atima isera awa pepeta orase isira. \v 13 Edo na ditini eno wo nembodiba ingaba inge da be to da edo wo nembodiba ewa tuda edo vivitisira ainda be to da edo wo nembodiba busu da edo vivitisira uso jawo binga sari embo pasega ainda be to da asisi bebegae tamonde ungoda gari teta genaku da gari awodo awa bugusera. \v 14 Edo asisi bebegae awa ari wasiri goroba de neinde kainde edo isera. Edo asisi bebegae tamonde amimi setero busu berari da gitijijigegari embobo God goroba jiwae da iji de dada edo embogo adera. \p \v 15 Edo Iesu mi sisira, “Giwo bengono embo mi embo umo bugadi ae awodo kotiroro bugadira da awodo awa na embo mi na bugadi ae awodo kotiroro bugadena. Edo embo ave dombu gunjedo atira awa uso bosini simba ise iaviri are ko gae gae edo bosini ambu pepeta irirari embo mi goro men geure.” \p \v 16 Edo asisi biae tamonde mi setero busu berari da gitijijigegari nembogamo yei Hebrew ge mi jawo sedo era Armageddon ainda embogo orase dada isera. \p \v 17 Edo asisi ewamei ambo be awa uso rora ro aga da awa jojetiri bisara da wowosisira. Edo wosetiri God da tumondebain ari oro da nati da gitijigari da anumba da ge javi mi sisira, “Atae be atae etira.” \v 18 Edo ge javi awodo setiri birigi iri edo javi nembogamo de binga barara diviri edo didira isira. Edo didira nembodiba amimi didira nenei embo busu da atero isira awa derigurisira. Edo didira nembodiba awodo awa matu aera. \v 19 Edo didira nembodiba awa etiri nati nembodiba awa saredo diti tamonde isira. Edo busu berari da embobo da nati nembodiba awa usibesi edo dada edo atae isira. Edo God Babylon nati nembodiba da embo awa ruvegae gido ungoda yei uso tini gambari da umo tokaka awa ititisira. Edo setiri ungo mi indisera. \v 20 Edo ewa da ingigi de doriri de berari awawa atae isira. \v 21 Edo ga nembodiba uso be awa okain teta ganuma bouga be bouga da awodo utu da edo wosedo busu embobo dorisira. Edo ungo detiri busu da embobo God da jawo da ge bebegae sise umo isiburisera ainda be awa ga nembodiba uso be okain de bisibisara de awa nembodiba amimi etiri ungoda memesi awa biae be biae isira awasedo. \c 17 \s1 WASIRI BIAE BE BIAE ARI EVETU MEMESI BIAE TAMBUSIRA \p \v 1 Edo asisi ewamei 7 aga 7 jigido atisera ainda teda da mi naso yei bugudo sisira, “Puio nanemi inia ge mi nati nembogamo umo jiwae da be da didigurisera ainda riroga kumbadera awa isaga ano gase. Edo nanemi nati eiawa da jawo da ge sadena awa teta evetu wasiri bebegae edo ira ainda ge sarago adena. \v 2 Edo busu berari da embobo da gitijijigegari nembogamo iji berari wasiri bebegae edo era edo evetu wasiri biae edo ira ainde da. Edo busu berari da embobo iji berari uso wasiri biae da wine okain awa indido edo iji berari ungo jiro bebegae edo ira.” \p \v 3 Edo umo awodo sedo Asisi Kotopu naso joda goroba edo gitijijigurise edo asisi ewamei mi na kumbudo yei embo atae da mambusira. Edo umo na kumbudo mambiri edo evetu wo kokoi da tamo da anumbedo atiri gosisena. Edo wo ainda tamo da awa jawo bebegae neinde kainde mi isibari ge bebegae God da jawo da sisera awawa gaisera atisira. Edo wo ainda kopiri awa 7 edo uso kopiri da gi awa 10 awodo. \v 4 Edo evetu awa bo kokoi de karako de awa ombusira edo giro sagiro neinde kainde edo giro sagiro gold mi ari edo ganuma ewagaewa mi ari bogera mi ari awa uso kopiri da ra. Edo uso giro sagiro da mina awa nembodiba be ra. Edo evetu awa uso ingo da aga ribe bebetegari da masa da awodo uso wasiri bebegae mi beda ari jigido atisira. \v 5 Edo uso beo da awa jawo uso be unjugari awa eiedo jiwari ra, \q1 “Babylon nati nembodiba awa busu berari da wasiri bebegae ari da ai ra.” \p \v 6 Edo evetu awa God da embobo da ororo edo Iesu gebe ari embobo gebe ari doae edo isera embobo ungo mi dorisera ainda ororo awa indido evetu awa jiro biae etiri gosisena. \p Edo na evetu awa ditini ise kove be isena. \v 7 Edo asisi ewamei mi na nganega edo sisira, “Imo roedo kove be esi? Nanemi evetu einda inia ge da be de edo wo kopiri 7 de gi 10 de evetu eiawa budo tembira ainda be awa iso yei isaga adena. \v 8 Edo wo nembodiba ewa tuda edo vivitisira awa getesa awa matu awa wasiri de atisira te betedo uro umenga da tu be tuda wowosisira. Edo wosedo awa boroko sekago bugadi aikambu ira. Edo vitari ungo mi usibesi adera. Edo busu da embobo ungoda jawo God busu ae atise wasiri natopo atari da jiwari kato da ungoda jawo gaiae awa ungo wo nembodiba awa gido kove be adera ainda be awa wo awa matu awa wasiri de atisira te betedo edo sekago wasiri de bugadira awasedo. \p \v 9 “Edo embo jiro embobo mi ge einda be awa gadera. Edo kopiri 7 awa doriri 7 evetu mi anumbedo atira awa ra. Edo kopiri 7 awa daedo gitijijigegari embobo nembogamo 7 awa ra. \v 10 Edo gitijijigegari nembogamo 5 awa matu bugudo atae isera. Edo gitijigari nembodiba da awa boroko wasiri de atise gitijijigurira edo gitijigari nei awa amboda bugadira. Edo umo bugudo iji tupo be atadira. \v 11 Edo wo nembodiba matu wasiri de atisira te bebetisira awa gitijijigegari embobo nembogamo 7 ainde da dada ari ungoda ajigari awa 8 adira. Edo wo nembodiba awodo adira awarate uso yei da usibesi ari bugadira. \p \v 12 “Edo wo nembodiba da gi 10 getesa amone gitijijigegari embobo nembogamo 10 bugudo gitijigadi tuturo ae atera awa ra te amboda ungo wo nembodiba de daedo iji tupo be gitijigadera. \v 13 Edo gitijijigegari embobo nembogamo 10 awa kotari da awodo edo ungoda gitijigari da goroba awa wo nembodiba da yei itadera. \v 14 Edo ungo mi Lamb ga da embogo adera te Lamb awa embomei unemi matu jawo setiri uso saboa ari ambojimbi isera ainde da gitijijigegari embobo nembogamo de wo nembodiba de awa derigadera ainda be awa Lamb awa busu berari da gitijijigegari embobo berari da gitijigari edo umo awa babojegari berari busu da ainda bajari ra awasedo.” \p \v 15 Edo asisi ewamei awa sedo ge nei naso yei sisira, “Imo wasiri biae be ari evetu sasaka jiwae da be da anumbedo atiri getesa edo sasaka amone busu berari da embobo da ungoda tamo gari neinde kainde edo ungoda ge neinde kainde ra. \v 16 Edo kopiri da gi 10 getesa edo wo nembodiba getesa awa ungo wasiri biae ari evetu awa ujo ae edo uso rora berari de uso ombari digari berari awa dodo kumboro iji ainde men nembodiba gadira. Edo ungo uso rora berari kumbudo uso tamo pisi indido edo riawo da itoro ewadira. \v 17 Ainda be awa God mi ro adira awa ungoda jiro da ititisira awa ungo mi umo ro arase dipapa ira awa oro adira. Edo ungo kotari da awodo edo ungoda gitijigari goroba awa wo da yei itadera. Edo ungo awodo adera awa ro God mi sisira awa adira. \p \v 18 “Edo evetu getesa awa nati nembodiba be ra amimi busu berari da gitijijigegari nembogamo gitijigido ira.” \c 18 \s1 BABYLON NATI NEMBODIBA AWA ATAE ADIRA \p \v 1 Edo awa berari edo atae etiri asisi ewamei nei utu da edo bugutiri gosisena. Edo umo goroba jiwae de da bugutiri uso usasa mi busu berari janiburisira. \v 2 Edo umo gogo dimbudo sisira, \q1 “Umo atae etira awara. Edo Babylon nati nembodiba awa atae etira awara. Edo atae etira ainda asisi bebegae de ri memei bebegae gari neinde kainde awa boroko uso dumbari da atera. \v 3 Ainda be awa evetu amimi uso wasiri bebegae da wine okain itido seuri ungo mi indido era. Edo busu da gitijijigegari embobo nembogamo bugudo ungae da sino pu da wasiri awa ewora. Edo busu da embo rovi ravi ori garori ari buro edo era awa ungo evetu ainda rora mina nembogamo de awa dipapa edo ori garori buro ungae edo ungo rora embobo ewora.” \p \v 4 Edo umo awodo setiri ge javi nei utu da siri ingisena. Edo ge javi amimi sisira, \q1 “Naso embobo nati awa dodo ijegewo. Edo ungae da wasiri bebegae eove ainda be awa ingo wasiri bebegae unemi ira da awa adewa awa ingo riroga unemi kumbadira riroga da awa kumbadewa. \q1 \v 5 “Edo evetu ainda wasiri bebegae awa diripu edo utu da vivitira. Edo God uso wasiri bebegae ruvegae umo kasadi sia ira. \v 6 Awasedo ingoda yei ro edo ira da awodo mina ewo awarate ingoda mina ari mi unemi ro evira awa derigare. Edo wine okain unemi ingo mi indawase itido ira awa biae ra te wine okain ingo mi unemi indarase itadewa awa biae be biae are. \q1 \v 7 “Edo umo iji berari rora jiwae de jasiga ari de kumbadi dipapa evira awasedo uso yei memesi uso dipapa bebegae da tega da awodo itiwo. Edo umo uso joda sira, ‘Na gitijigari evetu nembodiba einda anumbedo atena. Edo na awa rori aera edo dubo vevera naso yei mana bugadira.’ \q1 \v 8 “Edo umo ge awodo sira awasedo iji da rovi ravi bebegae uso yei bugadira karu bebegae de betari da dubo vevera edo beji. Edo riawo mi umo atae adira ainda be awa Bada God goroba jiwae mi uso wasiri biae da mina ititira. \p \v 9 “Edo busu berari da gitijijigegari nembogamo ungae da indido kumbudo ise uso wasiri bebegae de uso dipapa bebegae da awodo ungo dipapa bebegae ewora awa ungo umo eviri umbosi vivitira awa gido ungo ji nembo be sadera. \v 10 Edo ungo umo memesi burirari gido besaun be deradera ainda be awa ungo oju adera. Edo ungo mi sadera, \q1 “‘Eiawa biae be ra. Edo Babylon nati nembodiba nati goroba iso riroga iji da mi bugira.’ \p \v 11 “Edo busu da rora ori garori ari embobo mi sera amemi ingodenaso rora ori eiri sera edo ungo daedo dubo vevera edo ji sadera. \v 12-13 Edo rora ungo mi ori garori edo era amone eire. Auri ewagaewa jawo gold de silver de edo bogera dagari egae ganuma mi ari edo kambo ewagaewa edo bo gari neinde kainde parara de kokoi de edo umenga de edo ri muno ewagaewa neinde kainde de edo wo nembogamo da di mi rora neinde kainde ari de edo rovi ravi neinde kainde ri mina nembogamo mi ari edo auri de ganuma ewagaewa de edo indari porere de edo rora muno ewagaewa de joino de ri vibu muno de jawo frankincense de myrrh de ri be jawo wine de oil de indari ewamei jasari jawo flour de indari ve jawo wheat de cow de sheep de horses de ungoda jumbari kato de agipo embobo de ungo mi ori garori edo era. Edo ungo mi daedo embomei ori garori edo era teta rovi ravi ori garori edo era da awodo. Edo rovi ravi re eiawa ori garori edo era te embo mi mana ori adera. \p \v 14 “Edo busu da rora ori garori ari embobo mi Babylon nati embobo da yei sadera, ‘Rovi ravi neinde kainde ewagaewa dipapa ewowa awa atae etira. Edo ingoda ewowo da gorotu de indari de awa atae etira. Edo ungo atae etera edo ingo mi ungo eura adewa te mana sekago tambadewa.’ \v 15 Edo busu da rora ori garori ari embobo de Babylon nati embobo de rora jiwae embobo isera awa memesi awa gido oju edo besaun be deradera. \v 16 Edo ungo besaun be derido dubo vevera ise sadera, \q1 “‘Eiawa biae be ra. Edo iji biae awa nati einda bugira. Edo matu bo gari neinde kainde parara de kokoi de umenga de awa ainda ra. Edo giro sagiro ewagaewa neinde kainde edo rora gold mi ari edo ganuma ewagaewa edo bogera mina nembogamo de awa ainda ra. \v 17 Awarate gorotu awa ro arago ise burigi be atae etira.’ \p “Edo ewa nga da totopo de embo nga de mambudo bugudo edo isera ainde edo embo nga da buro ari embobo de edo ewa da buro embobo nenei de ungo daedo besaun be dederisera. \v 18 Edo ungo besaun derido atise riawo da umbosi vivitiri gido gogo dimbudo ji sise sisera, ‘Nati nembodiba omimi busu da nati nenei awa derigurisira.’ \v 19 Edo ungo aviga mi ungoda kopiri da gutedo dubo vevera mi ji sise sisera, \q1 “‘Eiawa biae be ra. Edo memesi biae be awa nati nembodiba einda bugira. Edo ewa nga da totopo ewa da mambudo bugudo isera awa nati nembodiba einda gorotu awa embo ise rora embobo ewora te iji tupo be nati ainda gorotu de itipapo de atae etira. \q1 \v 20 ‘Awasedo utu de God da embobo de Iesu da binga atopapotegari embobo de God da binga sari embobo de nati eiawa atae etira awasedo iaviri ewo. Ainda be awa God mi nati ainda uso embobo mi ingoda yei ro isera awasedo mina edo umo usibesi etira.’” \p \v 21 Edo ungo awodo setero asisi ewamei goroba jiwae de amimi ganuma nembodiba be ganuma rora indari ve jasedo era ainda tega da awodo awa kumbudo pigetiri ewa da wowosisira. Edo wosetiri asisi ewamei mi sisira, \q1 “Da eiedo ungo mi isoro edo nati nembodiba Babylon awa doro atae adira. Edo atae ari embo mi eura adera te sekago mana tambadera. \v 22 Edo sino dari embobo de puin pusari embobo de sekago nati ainda iaviri mana adera. Edo buro neinde kainde edo nati ainda gano kumbudo era awa atae adira. Edo indari ve jasari ganuma nembodiba da javi awa nati ainda mana sekago sadira. \q1 \v 23 Edo goriwo sekago nati ainda mana janibadira. Edo embo da iaviri da javi jimbari bondo da nati ainda ewora awa mana sekago adira. Edo Babylon nati ingoda rora ori garori ari embobo da goroba mi busu nenei berari da rora ori garori ari embobo da goroba awa derigurevira. Edo ingo inja mi edo rora burise busu berari da embobo ganduburewowa.” \p \v 24 Edo Babylon nati jo ainda God da binga sari embobo da ororo de God da embobo da ororo de busu berari da embobo ungo mi deoro betewora ainda ororo de awa atira awasedo God mi nati ainda riroga itira. \c 19 \s1 JOHN UTU DA IAVIRI DA JAVI INGISIRA \p \v 1 Einda amboda embo jiwae be da ge javi awa utu da ingisena. Edo ungo God jasiga ise sisera, \q1 “Ingode God jasiga ore. Soregari de usasa de goroba de awa ingodenaso God da topo ra. \v 2 Edo God ari bebega da mina awa inono da ira. Edo wasiri biae ari evetu umo sino pu da wasiri bebega awa ise euri busu da embo berari wasiri biae ewora awa God mi umo detira. Edo umo dedo riroga itira ainda be awa umo God da agipo embobo deuri betewora awasedo.” \p \v 3 Edo embo jiwae be awa sedo ungo gogo dimbudo sisera, \q1 “Ingode God jasiga ore. Edo nati nembodiba evira ainda umbosi awa mata awodo vivitise atadira.” \p \v 4 Edo ungo mi awodo setero gitijijigegari embobo 24 de rovi ravi wasiri de 4 ungo mi God uso gitijigari embo da anumba da anumbedo atisira ainda jo da baingo dederi edo tumondebain ise sisera, \q1 “Awa gebe. Ingode God jasiga ore.” \s1 BADA GOD JIMBARI BONDO SIA ISIRA \p \v 5 Edo ge javi gitijigari embo nembodiba da anumbari demonda bugiri ingisera awa sisira, \q1 “God da agipo embobo berari de embo berari God oju edo era, embo nembogamo de embo memeinya de ingo berari ingodenaso God jasiga ewo.” \p \v 6 Edo ge javi awodo setiri embo jiwae be mi gogo dimbero ingisena. Edo embo jiwae be ainda javi awa teta umo nembodiba mi doriri mendo da wosedo ganuma da dorise javi sarago isera. Edo ungoda javi awa daedo binga barara da javi awodo ra. Edo ungo ge sero ingisena awa ungo eiedo sisera, \q1 “God jasiga ewo ainda be awa ingodenaso Bada God gitijigari nembodiba mi gitijijigurira. \v 7 Edo ingode jo iaviri ise dubo ewamei ore. Edo ingode uso jawo jasiga ore ainda be awa Iesu God da Lamb mi uso embobo teta embo mi uso aro kumbudo ira da awodo kumbarase iji bugira awasedo. Awasedo uso embobo umo gebe edo era awa uso aro awodo ungo sia etera. \q1 \v 8 Edo God mi ungoda yei bo parara biribiri edo ira awa omborase itira.” (Bo parara biribiri ira amone God da embobo da ari ewagaewa awa ra.) \p \v 9 Edo ungo awodo setero asisi ewamei mi naso yei sisira, “Eiawa jiveio, ‘Embo ave God mi Lamb da jimbari bondo da purorase oru etira embo awa umo iaviri are.’” Edo asisi ewamei awa sedo sisira, “Ge boroko iso yei jiwasase setena ge amone God da gebe moka ra.” \p \v 10 Edo asisi ewamei awodo setiri na daedo uso jo da baingo dederi edo umo tumondebain adi isena te unemi naso yei sisira, “Na tumondebain eose. Edo namonde imonde daedo edo embo berari gebe moka Iesu mi isaga isira ainda jigido era awa agipo embobo ra. Edo God da tumondebain eio. Edo Iesu awa isaga adi sedo binga sari embobo God da gebe moka sedo era awa uso binga awa minonu sera. \p \v 11 Edo utu pirigetiri na wo horse parara gosisena. Edo embo horse ainda tamo da anumbedo atisira embo ainda jawo awa Embo Ingode Gosera Umo Kondade Ira edo Gebe Moka Sari Embo ra. Edo embo amimi embo kasedo ira awa inono be ra. Edo umo embogo adi edo ira awa embogo inono da edo ira. \v 12 Edo uso dombu etoto awa riawo avewa ingege ra. Edo uso kopiri da awa giro sagiro jiwae be teta gitijigari embo da gobe inge ra. Edo uso jawo nei da uso tamo da gaiari ra awarate umo umosuka ainda be awa garira. \v 13 Edo bo ribori unemi ombusira awa ororo mi saburu isira. Edo uso jawo ungo mi sedo isera awa God da Ge. \p \v 14 Edo utu da isoro embobo ombari parara awa ombudo horse parara da vitido umo ambo ambo isera. \v 15 Edo umo kasiwo di de uso be da amimi busu da embo berari dedo edo ungo patadira. Edo umo busu da embo berari patido umo goroba nembodiba de da ungo gitijigadira. Edo embo mi grape jasari rora da grape jasoro uso ngamo sununu keputu edo ira da awodo embo awa horse parara ainda tamo da anumbari amimi ari edo God goroba jiwae da tini gambari awa busu da embobo da yei yoyogo adira. \v 16 Edo embo ainda bo ribori edo uso tei da ge eiawa jiwari ra, \q1 “GITIJIJIGEGARI NEMBOGAMBO DA GITIJIGARI EDO BABOJEGARI BERARI DA BAJARI AWA.” \p \v 17 Edo ainda amboda asisi ewamei waiko da deriri gosisena. Edo umo gogo dimbudo ri memei inda yima puma edo isera ainda yei sisira, “Puwo God bondo nembodiba sia ira awasedo dada ewo. \v 18 Edo puwo gitijijigegari embo nembogambo de isoro embobo da gitijijigegari de isoro embobo de wo horse de edo embo horse tamo da anumbedo era ainde edo embo berari agipo embobo de agipo ae embobo de embo nembogamo de embo memeinya de da ungoda tamo pisi awa indave.” \p \v 19 Edo umo awodo setiri na wo nembodiba ewa tuda edo vivitisira de busu da gitijijigegari embobo de ungoda isoro embobo de dada edo embo horse parara da tamo da anumbedo atisira ainde uso isoro embobo de da embogo adi dada isera awa gosisena. \v 20 Awarate ungo mi wo nembodiba ewa tuda edo vivitisira awa kumbudo edo binga pasega sari embobo wo nembodiba busu da edo vivitisira ainda jo da ari wasiri goroba de edo isera awa bundisera. (Edo binga pasega sari embo ari wasiri goroba de edo isira amimi embo wo nembodiba ewa tuda edo vivitisira ainda taroro burisera ainde edo embo wo nembodiba da ove kewari tumondebain edo isera awa unemi gandubedo isira.) Awasedo embo horse parara da tamo da anumbedo atisira amimi wo nembodiba de binga pasega sari embo de ungo wasiri de atero kumbudo riawo matawa ewuse atari da pigisira. \v 21 Edo nenei awa kasiwo embo horse parara da tamo da anumbedo atisira ainda be da mi dega buriga etiri bebetegurisera. Edo dega buriga etiri bebetegetero ri memei bugudo ungoda tamo pisi awa indido ungoda tini kakau kakau isira. \c 20 \s1 IESU KERISO GITIJIJIGURIRA \p \v 1 Edo na asisi ewamei uro umenga tu be tuda awa pirigari rora de esi bouga de awa jigido utu dodo wowosiri gosisena. \v 2 Edo anela mi wo nembodiba teta ingaba inge uso jawo Jingabu Ogo edo Binei edo Satan awa jigido edo gaeko 1,000 awodo atarase bundisira. \v 3 Edo bundedo asisi ewamei mi uro nembodiba jo umenga de ainda jo da pigisira. Edo ainda pigedo gaegae edo gaeko 1,000 ainda joda busu embobo awawa gandubeurase sedo be awa didigurisira. Edo embo mi bugudo be awawa pirigaderi ta awa gadi sedo itari gambari umbaka vibu mi mangiro be awa itiri gambudo mina semba edo begiti mina gamba isira. Edo gaeko 1,000 atae ari ungo mi Satan awa iji tupo wujegoro atadira. \p \v 4 Edo na gitijigari embo da anumba de edo embo ainda anumbedo era ainde awa gosisena. Edo embo anumba ainda anumbedo era awa embo kasadi sedo goroba ari kumbusera. Edo na embo God da ge minonu sedo isera edo gebe moka Iesu mi isaga edo isira awa minonu sedo isera awa embo deoro betedo isera ainda asisi awawa gosisena. Edo embobo awa wo nembodiba ta uso ove kewari ta ko wo nembodiba ewa tuda edo vivitisira ainda taroro ungoda kopiri da ta ingo da awa kumbae edo tumondebain ae embobo ra. Edo embobo awawa ungoda uje be da edo eririgedo Keriso ga da gitijijigegari da buro awa gaeko 1,000 awodo isera. \v 5 Edo bebetegari embobo awa eririsera awa erari tuturo awa ra. Edo gaeko 1,000 atae etiri embo nenei bebetegurisera awa ungo eririsera. \v 6 Edo embo erari tuturo eradera embobo awa ungo iaviri adera edo God mi ungo ewamei adira. Edo riawo matawa ewuse atari jawo sedo era betari nei amimi mana embobo eiawa usibesi adira. Edo ungo matawa atise edo ungo God da edo Keriso da priest embobo adera. Edo ungo Keriso ga da gaeko 1,000 awodo gitijigadera. \s1 UNEMI SATAN RIAWO MATAWA EWUSE ATARI DA PIGADIRA \p \v 7 Edo gaeko 1,000 atae ari ungo mi Satan wujegoro uro jo umenga da awa dodo vitadira. \v 8 Edo umo vitido busu da embobo gandubadira Gog de Magog de. Edo umo busu da embobo berari awawa gandubedo sari ungo dada edo embogo adera. Edo embobo ainda ajigari tega awa nembodiba be ra teta ewa kora da kora jiwae be awodo ra. \v 9 Edo Satan da uso embobo mi dada edo God da embobo awawa jiroroka isera edo nati God mi dubo budo ira ainde da awarate riawo mi utu da edo wosedo Satan da embobo awawa evetiri ungo bebetisera. \p \v 10 Edo ungo betetero Satan ungo ganduburisira awa God mi riawo matawa atari da pigetiri wowosisira. Edo ungo mi matu wo nembodiba ewa tuda edo vivitisira de binga pasega sari embo de pigetero riawo matawa atari da wowosisera da ainda wowosisira. Edo ungo iji de tumba de mata awodo memesi kumbuse atadera. \s1 KASARI SANGO BE SANGOVE \p \v 11 Ainda amboda na gitijigari embo da anumba nembodiba parara edo embo ainda anumbedo atiri gosisena. Edo busu de utu de uso dombu da awa inono ae edo sumbudo mambudo atae be atae isira. Edo ungo atae isera awa embo mi ungo awa sekago gaera. \v 12 Edo embo nembogamo de embo memeinya de bebetisera awa ungo gitijigari da anumba be da dederigedo atisera. Edo ungo ainda dederigedo atero umo jiwari kato nenei awa pirigurisira. Edo awa pirigedo umo jiwari kato neinda uso jawo wasiri da jiwari kato awa pirigurisira. Edo embo bebetegurisera amimi ro edo iseri awa jiwari kato ainda jiwusera. Edo jiwari kato ainda ro jiwusera awodo da God mi embobo ainda mina awa ititisira. \p \v 13 Edo embo ewa da mambuse bebetegurisera awa ungoda tamo awa ewa da atiri embobo awa ewa da edo vivitisera. Edo embo berari bebetegedo betari da yei da atima isera awa ungo vivitisera. Edo embobo awa ro edo isera awodo da God mi ungo kasisira. \v 14 Edo God mi betari da yei de betari de kumbudo riawo mata awodo ewuse atima ira ainda pigisira. (Edo riawo matawa atari sena emone betari nei embo mi mambudo kumbudo era awa ra.) \v 15 Edo embo amenda jawo wasiri da jiwari kato da jiwari tambae edo isera embo awa pigoro riawo matawa ewuse atari da wosedo isira. \c 21 \s1 UTU SEKA DE BUSU SEKA DE BUGADIRA \p \v 1 Ainda amboda utu seka de busu seka de gosisena. Edo utu matu de busu matu de atae isira. Edo ewa daedo atae isira. \v 2 Edo na Jerusalem nati seka God mi utu da edo itiri wowosiri gosisena. Edo gagara jimbadi euri giro sagiro tamo da vituri gari ewamei edo ira da awodo God mi nati awa gongoburisira. \v 3 Edo ge javi nembodiba gitijigari embo da anumba da edo bugutiri ingisena edo ge javi awa eiedo sisira, “Boroko God embo da teda atira. Edo umo ungoda teda atirari ungo uso embobo adera. \v 4 Edo unemi ungoda dombu da jijiu awa gaimbadira. Edo betari de dubo vevera de ji de memesi de awa atae adira ainda be awa rovi ravi berari mamatu awa atae etira.” \p \v 5 Edo ge javi awodo setiri embo gitijigari embo da anumba da anumbedo atisira amimi sisira, “Gio nanemi ano rora berari awa seka adira.” Edo umo awodo sedo naso yei daedo sisira, “Ge awawa gebe moka ra awasedo jiveio.” \p \v 6 Edo awodo sedo sisira, “Nanemi eteno ijegetira. Edo rora berari da tuturo edo sangove awa nanasuka ra. Embo ave umo ujo ira awa embo ainda yei nanemi umo uriri kapuru da ainda dimbudo umo awa tepo mina itae itano indadira. \v 7 Edo embo amemi na embo embogo edo derigadira awa na embo ainda God ano edo embo awa naso mei adira edo ewamei ari re awa itano kumbadira. \v 8 Awarate embo embogo ari oju adira edo embo embogo edo oju sumbadira edo embo iji berari wasiri bebegae adi kotedo sia edo ira edo embo edo deoro betedo era edo embo sino da wasiri bebegae edo era edo embo inja edo era edo embo ove kekevegari tumondebain edo era edo embo ge busedo era awa ungo berari riawo matawa ewuse atima ira ainda mambudo betari nei awa kumbadera.” \s1 JERUSALEM SEKA UTU DA EDO WOSADIRA \p \v 9 Asisi ewamei 7 aga 7 awodo memesi 7 awodo jigido atisera ainda teda asisi ewamei da mi bugudo naso yei sisira, “Puio, Iesu gebe ari embobo Lamb simba era teta evetu mi jimbadi sia edo iu simba arago era awa itano gase.” \p \v 10 Edo umo awa sedo Asisi Kotopu naso joda goroba edo gitijijigurise asisi ewamei mi na kumbiri na doriri in be inda ainda tamo da vivitisena. Edo God mi Jerusalem nati kotopu awa itiri utu da edo wowosiri asisi ewamei amimi isaga etiri na gosisena. \v 11 Edo God da usasa mi nati awa janiburisira. Edo nati ainda usasa awa nembodiba be isira teta ganuma mina nembogamo de mi birigi jaraga arago isira. \v 12 Edo ganuma mi nati awa puga digido jiroroka isera in be inda. Edo mangiro berari 12 awodo awa puga ainda edo asisi ewamei 12 awodo mi mangiro awa simba edo isera. Edo mangiro ainda awa Israel embobo da orobe 12 ainda jawo awa gaiari ra. \v 13 Edo mangiro berari tamonde awa puga ainda demo berari ainda ra. Edo sawari kena da awa mangiro tamonde ijari kena da awa mangiro tamonde edo iji vitido yari kena da awa mangiro tamonde iji wosedo purari kena awa mangiro tamonde ra. \v 14 Edo puga ainda jangi sangove sangove awa ganuma berari 12 awodo ra. Edo ganuma ainda begiti da Lamb da binga atopatari embobo 12 da jawo awa gaiari ra. \p \v 15 Edo asisi ewamei naso yei ge sisira awa umo nati ainda tega de uso mangiro da tega de puga da tega de awa kumbadi sedo umo tega bari ituka gold mi ari awa jijigurisira. \v 16 Edo nati ainda demo demo da tega awa da awara. Edo asisi ewamei mi nati awa jiroroka ise uso tega bari ituka mi tega kumbusira. Edo demo demo ainda tega awa 2,400 km ra. Edo inda vitari da tega awa 2,400 km ra. \v 17 Edo asisi ewamei tega bari rora embo mi ungoda mando da tega kumbudo era awa jingama edo nati gajari rora da tega awa kumbusira. Edo inda vitari da tega awa 72 metres ra. \v 18 Edo nati ainda puga awa ganuma ewagaewa mi egari ra. Edo nati awa gold mi ari ra. Edo nati awa isaga be teta dombu gari atiti da awodo gido imo uso joda ro atira awa gadesa. \v 19 Edo tutuvi sangove da derari da ganuma ainda demo da awa ove gari neinde kainde ari ra ganuma mina nembogamo ari gido biribiri edo isira. \v 20 Edo tutuvi da ainda ganuma ainda mina nembodiba edo teta waiko mi janibarago edo isira. Edo ganuma tutuvi nei da awa umenga inge ra. Edo ganuma tutuvi nei da awa parara edo tutuvi nei da ganuma awa jejeuga edo tutuvi nei da ganuma awa kokoi edo tutuvi nei da ganuma awa parara inge edo tutuvi nei da ganuma awa kokoi edo tutuvi nei da ganuma awa injibari edo tutuvi nei da ganuma awa umenga be edo tutuvi nei da ganuma awa karako edo tutuvi nei da ganuma awa daedo karako edo tutuvi nei da ganuma awa umenga inge edo tutuvi nei da ganuma awa kokoi ra. \v 21 Edo mangiro 12 awawa sameme nembogamo mi egari ra. Edo mangiro dada awa sameme dada mi egari ra. Edo nati jo da emboro awa gold teta atiti gari rora da awodo mi ari ra. \p \v 22 Edo na tumondebain ari mando nati ainda gae isena ainda be awa Bada God goroba jiwae umo umosuka edo Lamb de da awa nati ainda tumondebain ari mando awasedo. \v 23 Edo kariga de waiko de awa ainda atae ra ainda be awa God uso usasa mi janibedo isira edo Lamb awa nati ainda goriwo awasedo. \v 24 Edo busu berari da embobo awa nati ainda usasa mi atadera. Edo busu berari da gitijijigegari berari awa ungoda gorotu rora awa kumbudo nati ainda toradera. \v 25 Edo tumba da umenga awa nati ainda bugadi aera awasedo nati ainda mangiro awa mana gajadera te pirigari berari iji nembodiba de atadira. \v 26 Edo busu berari da embobo mi ungoda rora mina nembogamo de edo ungoda gorotu de kumbudo nati ainda toradera. \v 27 Awarate rora dongono de edo embo ge busedo era ainde edo embo rora eoro men gido era ainde awa mana nati ainda toradera. Awarate embo ungoda jawo Lamb da wasiri da jiwari kato da ungoda jawo atira amimi nati ainda toradera. \c 22 \s1 WASIRI DA UMO DE WASIRI DA RI DE DA GE \p \v 1 Edo asisi ewamei mi wasiri da sasaka awa ujiji etiri gosisena. Edo umo awa dongono ae ewamei be edo piribiri. \v 2 Edo umo awa God de Lamb de da gitijigari anumba da edo nati da emboro soropu da sumbudo ira. Edo umo ainda bengi da awa wasiri da ri gaeko dada da jo da iji 12 awodo kariga dada da be edo ira awa eririra. Edo ri ainda igi awa busu da embo ari ewagaewa ari siwo ra. \v 3 Edo God mi rora ro biae arase seuri biae edo ira awa embo mi mana nati ainda tambadera. \p Edo God de Lamb de da gitijigari anumba awa nati ainda atirari edo God awa uso agipo embobo mi tumondebain adera. \v 4 Edo God da agipo embobo mi uso dombu awa gadera edo uso jawo awa ungoda kopiri da gaiadera. \v 5 Edo tumba da umenga awa mana nati ainda bugadira edo embo mana goriwo dipapa adera o waiko da usasa dipapa adera ainda be awa Bada God awa ungoda usasa adira awasedo. Edo God da agipo embobo ungo awa gitijijigegari embobo edo mata awodo gitijijigurise atadera. \s1 IESU ENGENEMBADIRA \p \v 6 Ainda amboda asisi ewamei mi naso yei sisira, “Ge awa gebe moka ra. Edo Bada God mi uso asisi awa binga sari embobo da yei ititisira edo umo uso agipo embobo da yei ro bugadira awa isaga orase sedo uso asisi ewamei ititisira.” \p \v 7 Iesu mi sira, “Ingiwo. Na iji tupo be bugadena. Edo embo ave ge jiwari kato einda jo da awa kera adira embo awa iaviri adira.” \p \v 8 Edo na John mi ge berari eiawa ingena edo rora berari eiawa getena. Edo na dombu mi gido edo dengoro mi ingido asisi ewamei mi naso yei eiawa isaga isira asisi ewamei awa tumondebain adi uso jo da baingo dederi isena. \v 9 Awarate na baingo dederi eteno umo naso yei sisira, “Na tumondebain eose. Ta namonde imonde edo iso nanonamendi God da binga sari embobo de edo embo berari ge jiwari kato einda atira awa kera edo era awa agipo embobo ra. God da awa tumondebain eio. \p \v 10 Edo umo awodo naso yei sedo sisira, “Jiwari einda ro bugadira ainda ge awa unjugeose ainda be awa rora berari eiawa bugadira ainda iji awa aikambu etira awasedo. \v 11 Edo embo ave embo biae awa umo wasiri bebegae adi dipapa ari gido dowo are. Edo embo ave jo dongono de awa umo jo dongono da atadi ari gido dowo atare. Edo embo ave wasiri ewagaewa irirari gido dowo wasiri ewagaewa ise atare. Edo embo ave God da ge mi ro sira awodo atirari gido dowo awodo atare.” \p \v 12 Edo Iesu mi sira, “Ingiwo. Na iji tupo be bugadena. Edo na bugadena awa embo dada da ungoda wasiri da riroga awa budo bugadena. Edo embo umo ro edo ira awodo da tega uso riroga awa itadena. \v 13 Edo na awa tuturo edo sangove. Edo rora berari da tuturo de sangove de awa na nasuka ra. \p \v 14 “Edo embo ungoda wasiri bebegae awa segadera teta ungoda bosini dongono segedo era da awodo adera embo awa iaviri adira ainda be awa God mi awara sari ungo wasiri da ri da be awa indise edo ungo nati da mangiro be da awodo torido nati da joda atadera. \v 15 Awarate embo sino da wasiri bebegae awodo edo era edo inja edo era edo embo dita baita edo era edo embo embo nenei deoro betedo era edo embo ove kewari tumondebain edo era edo ge busedo era embobo awa ungo ponda matawa atadera. \p \v 16 “Edo na Iesu nanasuka naso asisi ewamei rora eiawa ingo Iesu gebe ari embobo da diti ainda yei minonu sorase ititisena. Edo na awa David da orobe ra. Edo na awa sipo damana ra.” \p \v 17 Edo Asisi Kotopu de Iesu gebe ari embobo de ungo awa Iesu embo sia etera teta gagara ademei mi uso jimbari iji sia edo ira da awodo edo ungo sera, “Iesu puio.” \p Edo embo ave ge eiawa ingira awa umo daedo puio sare. \p Edo embo awa umo ujo iri awa purare. Edo embo amemi dipapa ira embo awa puma wasiri da umo awa indare. Edo umo sasaka awa ori adi aera te God da kando uso yei da ititira. \s1 GE SANGOVE BE SANGOVE \p \v 18 Ingo berari ge isaga etiri gaietena eiawa ingewa embobo ainda yei ge eiawa sadena. Edo amemi uso kotari mi ge nei ge einda pundugadira awa God mi ari embo awa memesi jiwari einda setira awa tambadira. \v 19 Edo embo amemi uso kotari mi ge nenei einda gaietena awa tupadira awa umo wasiri da ri da be awa mana kumbadira edo God mi uso emboro gajari edo umo mana Nati Kotopu da mana toradira. Edo rora einda kiki awa nanemi einda gaietena. \p \v 20 Edo embo rora berari eiawa isaga isira embo amimi sira, “Awa gebe. Na iji tupo be bugadena.” \p Awara Bada Iesu, puio. \p \v 21 Bada Iesu Keriso da soregari da kando nembodiba ingo berari da yei matawa atare.