\id PHP - Ewage-Notu NT [nou] -Papua New Guinea 1987 (web 2014) \h PHILIPPIANS \toc1 Ove Philippi Nati Embobo Mi Burisera \toc2 Philippi \toc3 Php \mt1 Ove Philippi Nati Embobo Mi Burisera \c 1 \p \v 1 Na Paul de Timothy de Iesu Keriso da buro embobo nango etoto mi God da embobo Philippi nati da atima era awa ategurera. Ingo embo Keriso Iesu gebe edo ewa ainde Iesu gebe ari embobo da gitijijigegari embobo de kondade ari embobo de ingo berari da yei nango ategedo ove eiawa ititera. \p \v 2 God ingodenaso Mama de Bada Iesu Keriso de mi ingoda yei jo jamo jamo ari itido ingoda yei ewamei ore. \s1 PAUL GOD MI UNGO KONDADE ARASE SEDO GOSISIRA \p \v 3-4 Iji jiwae ingo kotise na God jasiga ena. Edo na God da yei ingo kondade arase sedo gido ena. \v 5 Edo na iaviri de God da yei ge sedo ena ainda be awa ingo binga ewamei ingisewa iji ainda tuturo edo bugudo boroko nanemi binga ewamei awa minonu sanase sedo ingo mi iji berari na kondade edo ewowa awasedo. \v 6 Awasedo na gosena God buro eiawa ingoda jo da tuturo isira awa unemi buro awa atae adira. Edo amboda Iesu Keriso sekago engenembedo bugadira iji ainde God mi buro ingoda jo da ira awa atae adira. \p \v 7 Edo na ingo ruvegae ra. Edo nanemi ingo kotadena amone awara ainda be awa God mi buro nanemi anase ititisira awa ingo mi na kondade ewowa awasedo. Edo na gajari oro da itae giti da na jo iaviri de binga ewamei da jawo da beitigari ge sisena edo iji ainde ingo mi na kondade isewa. Edo na awa eno binga ewamei awa yei berari da rawusira. Edo boroko na gajari oro da ateno ingo naso yei ewamei edo na sekago kondade ewa. \v 8 Edo na ingoda yei sena na ingo be dubo budo ena ainda susu awa Keriso da dubo bari nembodiba naso joda atira. Edo na awa sena awa God umo gosira na ingoda yei gebe sena. \p \v 9 Edo na God da yei sedo gosena ingo kondade ari ingoda dubo bari awa babojirari edo ingoda jiro gari de edo ingo ro adi ewa awa gosise ari de awa daedo bajare. \v 10 Edo ingoda jiro gari bajari eiawa adewa mo ewamei ta ko biae ri awa gadewa. Edo awa gido Keriso da sekago bugari iji de ingo wasiri bebegae ae atadewa. \v 11 Edo Iesu Keriso mi ari ingo awa wasiri ewagaewa adewa teta ri be ewamei edo ira da awodo. Edo embo mi ingoda wasiri ewagaewa ewa awa gosise God jasiga adera. \s1 KERISO MI KONDADE EURI INGODENA EWAMEI ATIMA ERA \p \v 12 Naso nanonamendi na naso yei ro isira amimi etiri embo jiwae be binga ewamei ingisera awa gawase dipapa ena. \v 13 Edo na gajari oro da ateno gitijijigegari nembogamo na mando simba ari embobo de embo nenei einda atera awa gosera na awa na Keriso da binga atopateteno embo tini gambari isera awasedo gajari oro da einda atena awa gosera. \v 14 Edo na gajari oro da einda atima ena amimi esusu etiri Iesu gebe ari embobo jiwae be da ungoda tumonda ari awa babajigedo nembogamo etiri edo ungo oju ae binga ewamei awa minonu sera. \p \v 15 Edo embo nenei awa binga ewamei awa minonu sera ainda be awa ungo naso buro awa ji sise edo naso buro awa derigadi dipapa era te embo nenei awa jo ewamei de edo kotari ewamei de da mi binga ewamei awa minonu sera. \v 16 Edo embobo eiawa gosera God mi naso yei buro binga ewamei eiawa simba anase ititisira awa gosise gido ungo dubo bari mi binga ewamei awa minonu sera. \v 17 Awarate embo nenei ungoda jawo awa nembodiba arase sedo Keriso da binga awa minonu sera. Edo ungo awa buro awa jo mi aera. Edo na gajari oro da atinono ungo naso memesi awa nembodiba arase dipapa era teta embo bupuri mi bundoro tamo torougedo iso matu nembogamo edo ira da awodo awa. \v 18 Edo ungo mo ewamei de binga ewamei mo minonu seri ta mo ko ungo mo jo bebegae de da binga ewamei mo minonu seri? Na awa be kotae ra te ko ungo binga jo ewamei de minonu sera awa na iaviri ena. \p \v 19 Edo na iaviri ari awa mana doadena ainda be awa na gosena ingo God da yei naso jawo da ge sedo ewa edo Iesu Keriso da Asisi mi na kondade ari ewamei awa naso yei bugadira awa. \v 20 Edo na dipapa nembodiba edo ena awa na iji berari God mi na ro anase dipapa ira awa adi. Awarate nanemi ano Keriso me geurase sedo na jo de Keriso da buro awa ewamei adi dipapa nembodiba edo ena. Edo na ateni ta ko na beteni amone tepo ra ainda be awa na betadena awa Keriso jasiga ari badira edo na atadena awa Keriso jasiga ari badira. \v 21 Ko na atadena awa Keriso naso jo da atira awarate na betadena awa na awa ungae da atadena. \v 22 Awarate na busu da atise na Keriso embo buro nembodiba adena awa ro adeni awa na mana mana ena. \v 23 Edo na awa kotari etoto da soropu da ra. Na awa busu da atari awa dodo mambudo Keriso ga da atari awa nembodiba be dipapa ena ainda be awa naso busu da atari awa amimi derigadira awasedo. \v 24 Awarate busu da mata atadena awa na ingo kondade adena edo na busu da atadena amimi naso betari awa derigadira. \v 25 Edo na gosena awa gebe ra awasedo na gosena na betae atadena. Edo na atise ingo kondade ano ingoda tumonda ari goroba ari ingo iaviri de atadewa. \v 26 Awasedo na bugudo ingo sekago esega ano ingo naso tumonda ari Keriso da yei awa gadewa edo ingo iaviri nembodiba adewa ingoda tumonda ari Iesu Keriso da yei awasedo. \p \v 27 Ingoda atari awa ewo ewamei are Keriso da binga ewamei mi atopapotira awodo. Edo awodo ewo ainda be awa na binga ingo berari awa Keriso da atopatari da gitopo embobo de embogo edo dada edo ingoda kotari awa da etiri goroba de derido ingo binga ewamei Keriso da jawo da minonu sewa awa ingari dipapa ena. Edo na bugudo ingo gadeni ta ko na bugadi aeri awa na gaera awarate na ingoda binga awa ingari dipapa ena. \v 28 Edo ingoda gitopo gido oju eove. Iji berari goroba ewo. Edo ingoda gitopo ingo goroba de derawo gido ungo gadera ingo mi ungo patadewa edo God mi ingo soregadira awa gadera. \v 29 Edo God ingo mi umo gebe awase edo umo embo memesi bawase sedo ingo jawo sisira. \v 30 Edo ingo nangae da gitopo da ainga embogo ewa. Edo na matu gitopo einga embogo isena edo na boroko mata gitopo einga embogo ise atena awa ingo ingewa awa ra. \c 2 \p \v 1 Embobo mi Keriso ga dada edo eoro ungoda tumonda ari Keriso da yei awa goroba edo ita mo aeri? Edo Keriso mi uso embobo dubo budo ira mo ungoda jo mo goroba edo ita mo aeri? Edo Asisi Kotopu Iesu gebe ari embobo da joda atima ira mo ungo mo otao mina mina edo eri ta aeri? Edo Iesu gebe ari embobo dubo mina bara edo era mo ungo mo ari ewagaewa mina ara edo eri ta aeri? \v 2 Edo ingodenaso sedo gari einda ge mina sewa awasedo na ingoda yei sena iaviri mi naso jo beda are ingoda kotari awa da are. Edo ingoda dubo mina bara ari awa da are. Edo ingoda Keriso da buro ari da dipapa awa ewo da are. \v 3 Edo ingo embo nembogamo adi sedo re ingoda dipapa topo awa eove. Edo jari da ge awa sise wasiri awa eove. Edo ingoda wasiri mi embo nenei da wasiri awa derigari awodo kotove ta wasiri awa jasiga mina ara ewo. \v 4 Edo ewamei ingoda yei bugarase sedo iji berari buro eove ta embo nenei da yei ewamei awa bugarase dipapa ewo. \p \v 5 Edo ingoda kotari awa teta Iesu Keriso da kotari awodo are. \v 6 Ko Iesu Keriso da gari awa iji berari God da gari awodo edo isira te umo God da gari awa jigido takibedo atari awodo awa ae isira. \v 7 Edo umo gari awa demonda itido edo buro embo da gari awa burisira. Edo umo embo edo embo da gari awodo bugusira. \v 8 Edo umo jariga embo awodo pepeta aera te umo God kera ari da emboro da awodo pepeta isira. Edo umo God kera edo orega da bebetisira. \v 9 Awasedo God umo jigiri eririsira awa edo umo gitijigari nembodiba arase sedo yei in be inda ititisira. Edo God mi Keriso da jawo awa nembodiba edo rora da jawo de embo da jawo nenei de awa derigurisira. \v 10 Awasedo embo berari utu da edo busu da edo busu tu da awa Iesu da jawo awa jasiga ise edo uso yei baingo dederi ise uso yei tumondebain adera. \v 11 Edo embo berari isaga Iesu Keriso awa gitijigari sise edo God Mamo awa jasiga adera. \s1 JANIBEWO TETA GORIWO MI JANIBEDO IRA DA AWODO \p \v 12 Awasedo naso otatao ewagaewa na ingode atima isena awa ingo iji berari na kera edo isewa awarate boroko na besaun atena einde na ingo mi na kera awase dipapa ena. \v 13 Edo ingo soregari da be awa adi sedo awa God oju ise iji berari Keriso gada pepeta ari buro awa ewo ainda be awa God iji berari ingoda jo da buro edo ira ari ingo umo kera adi dipapa awase sedo. \p \v 14 Edo ingo iji dada ingoda buro ise gido bekuba ise ge bagove. \v 15 Edo ingo ge bagadi ae edo bekuba ae ingoda buro adewa awa ingoda atari awa ewamei be atadewa. Edo atari awodo awa embo wasiri bebegae edo era embobo ainda teda atise adewa awa ingo God da embobo awa God da dombu da wasiri biae ae atadewa. Edo ingo embobo ainda teda atise binga ewamei awa sae etewa awa teta damana mi umenga da soropu da janiburise atima ira da awodo awa janibadewa. \v 16 Edo ingo awodo adewa awa Keriso da engenembari iji de awa na iaviri be adena ainda be ingo mi awodo ewa amimi isaga adira awa naso buro da be awa ira awasedo. \p \v 17 Ingoda tumonda ari awa teta embo mi God da yei rorou itido era da awodo ra. Edo na kotena embomei amimi na doro betadeni ta rora. Edo ungo na doro betano naso betari awa ingoda tumonda ari da tamo da vitido teta embo mi God da yei rorou itido era da awodo adira. Edo awodo adira awa na iaviri adena edo na ingo daedo iaviri awase dipapa adena. \v 18 Edo da awodo ingo nangae da iaviri ewo. \s1 PAUL TIMOTHY DE EPAPHRODITUS DE DA JAWO DA GE GAISIRA. \p \v 19 Bada Iesu mi dipapa adira awa na Timothy awa iji tupo ingoda yei itano mambadira. Edo umo ingoda yei mambadira iji ainde binga sari naso jo ari goroba adira binga awa na ingari dipapa ena. \v 20 Edo Timothy awa iji berari uso jo da ingo awa kotedo ira da awodo na ingo awa naso jo da kotedo ena. \v 21 Ko embo nenei berari awa Keriso mi ungo ro orase dipapa ira awa ari kotae era te ungo awa ungo ro dipapa era awa adi dipapa era. \v 22 Edo ingo ingosuka gosewa Timothy awa God da buro awa ewamei be edo ira awa gosewa. Edo ingo gosewa umo de namonde awa binga ewamei awa minonu sise buro dada teta mei de mamo de mi buro dada arago edo era. \v 23 Edo iji tupo atae ari naso yei ro adira awa gido edo iji ainde awa na Timothy ingoda yei itadi dipapa adena. \v 24 Edo God dipapa adira edo na daedo dipapa ena awa iji tupo atae ari ingoda yei bugadira. \p \v 25 Edo ingodenaso namendi Epaphroditus mina kondade arase naso yei itewo bugusira. Edo ingo umo itewo umo nangae da dada binga ewamei minonu sari da buro awa dada edo era edo umo nangae da wasiri biae awa embogo edo evira awarate na kotetena na umo sekago ingoda yei itano mambadira awa kotetena. \v 26 Edo umo ingo awa gadi dipapa nembodiba be ira ise atari biae ira ainda be awa ingo umo karu ari binga ingisewa awasedo. \v 27 Edo ingo binga awa be ingisewa ainda be awa umo karu edo betadi aikambu isira te God mi umo jo isira. Edo God daedo na jo isira ainda be awa umo betae etira awa naso dubo vevera awa nembodiba ae etira. \v 28 Awasedo ingodenanemi gido iaviri orase na umo ingoda yei itano mambarase dipapa ena. \v 29 Edo umo ingoda yei bugari gido umo ingo jo de pon de ewo teta Iesu gebe ari embobo mi ingo jo de pon de mina ara edo era da awodo. Edo embo nenei umo isira da awodo isera awa sapo ewo. \v 30 Edo umo awa Keriso da buro awa embo edo umo awa na kondade ari itadi isira ingo mi besaun be atise itari inono ae awa itadi edo betadi aikambu isira. \c 3 \s1 GOD MI ETIRI INGODENA UNGAE DA UMO JIGARI EWAMEI EDO ERA \p \v 1 Naso nanonamendi na ove eiawa atae ae atise na ingoda yei eiawa sadi ena ingo Iesu Keriso ga dada edo gido iaviri ewo. Edo na matu ingoda yei ro gaisena awa sekago ingoda yei oju ae sadena. Edo ingo ge awa ingawo ingo kondade ari atari ewamei atave. \p \v 2 Edo embo wasiri bebegae ise tamo da andiso diugedo era awa gido gowo ewo ainda be awa ungo awa teta sino ingege ra awasedo. \v 3 Edo ungo awa tamo da andiso diugari wasiri be awa bae ra te ingodena awa tamo da andiso diugari wasiri awa burisera ainda be awa ingodena Asisi Kotopu mi God tumondebain edo era. Edo daedo ingodena Asisi Kotopu mi Iesu Keriso gada dada isera awasedo ingodena iaviri era. Awarate ingodena ingodenaso bondo de mamo umbogo da wasiri neinde kainde awa tumonda ae ra. \p \v 4 Edo na nasuka rora awawa tumonda ari dipapa ae etena amone inono na. Edo embo nenei rora awa tumonda ise awa inono na kotae etera awa na rora awa tumonda ise embobo awa derigae etena. \v 5 Edo naso aia mi na betiri pura da atae etiri naso tamo da andiso awa diugurisera. Edo naso aia de mama de awa Israel embobo ra. Edo naso orobe awa Benjamin da orobe ra. Edo na awa Hebrew embo moka ra. Edo na Jew embobo da agodari mi sira awodo edo agodari simba ari embobo Pharisee isena. \v 6 Edo Jew embobo da agodari awasedo goroba be edo na awa Iesu gebe ari embobo da gitopo isena. Edo agodari ge awa kera edo amimi ari embo ewamei ari awa kera isena awasedo na awa embo ewamei be ewamei isena. \p \v 7 Awarate rora matu nanemi nembogamo kotedo isena awa na boroko kotena awa nembogamo aera ainda be awa na boroko Keriso gebe ena awasedo. \v 8 Edo da awa aera te boroko na kotena awa rora berari awa teta puti da awodo ra ainda be awa na boroko Iesu Keriso gosena awasedo. Edo Iesu Keriso naso Bada mi rora berari awa derigedo atira. Edo na Keriso awasedo rora nenei awa wawara edo ena. \v 9 Edo na Keriso da dada ari awodo gadi sedo na rora nenei berari gido awa na kotedo ena ungo awa puti pigari awodo awa kotedo ena. Edo matu awa na kotisena na agodari ge awa kera adena awa amimi ari na God ga da umo jigari ewamei adena kotisena te naso kotari awa atae isira. Edo na Keriso gebe edo God gada umo jigari ewamei isena. Edo naso tumonda ari awa God gada umo jigari ewamei edo ena ainda susu ra. Edo God awa umo jigari ewamei ainda ngamo na. \v 10 Edo na Keriso gari dipapa edo ena edo uso erari da goroba awa bari dipapa edo ena. Edo na memesi teta Keriso umo bebetise burisira awodo bari dipapa ena. \v 11 Edo na teta umo bebetisira da awodo na betadi dipapa ena te na gosena amboda na betadena awa God mi na jigari eradena. \s1 INGODENA AWA TETA RIROGA BADI SUMBARAGO EDO ERA \p \v 12 Na matu riroga awa betena saera. Edo na embo ewamei be etena awa na saera. Awarate riroga awa badi sedo na petae rate sumbuse atena ainda be awa Iesu Keriso mi na awa uso embo anase isira awasedo. \v 13 Naso nanonamendi na riroga awa matu bae ra te na ro ena awa sano ingo gadewa. Edo na rora naso gun da awa ruvegedo na sumbuse ingo giti itido riroga awa badi jaredo ena. \v 14 Awasedo riroga awawa badi sedo na dagaia sumbuse naso dombu awa geregere sumbudo atae ari yei da itido ena. Edo riroga na badi dipapa edo ena amone wasiri matawa atari God mi Iesu Keriso da buro awa embo ingodenanemi borase jawo sira awa ra. \p \v 15 Edo ingodena berari kinapeina ingege ari awa atae etiri edo ingodenaso tumonda ari awa bajido goroba etira awasedo ingode riroga bari awa kotadera. Awarate embo nenei ingoda teda awa awodo kotae era awa God mi ari ingo mi isaga gadewa. \v 16 Awarate na ingoda yei sena ingodena matu Keriso da emboro da pepeta adi tuturo isera awa ingode doadi ae rate ingode emboro ainda pepeta ise atima ore. \p \v 17 Edo naso nanonamendi na ro ena awa gido da awodo edo ewo. Edo nangoda atari awa embo mi gido atera embomei awa gido gowo edo ungo mi era da awodo awa ewo. \v 18 Matu iji jiwae be na ingoda yei embo bebegae awa seteno gosisewa awarate na sekago ingoda yei jijiu de da sena embo jiwae be wasiri de atise wasiri bebegae edo era edo embobo amimi ero Keriso da betari orega da awa teta tepo awodo ira. \v 19 Edo embobo eiawa amboda betadera ainde awa yei riawo matawa euse atima ira ainda mambadera ainda be awa ungo rora ungoda tamo mi dipapa era awa tumondebain edo era awasedo. Edo wasiri ro edo ungo men gadera wasiri awa ungo kotise jariga edo era. Edo ungo iji berari awa busu da rora awa kotedo era. \v 20 Awarate ingodena ingodenaso ewowo busu utu da ainda mambadi era awa jo iaviri de ingodenaso soregari embo Bada Iesu Keriso awa utu dodo wosarase simba era. \v 21 Edo umo wosedo ari ingodenaso tamo wase ae awa uso tamo awa usasa de teta ombari parara ombudo era da awodo adira. Edo Keriso uso goroba mi rora berari gitijigido ira amimi ari ingodenaso tamo awa uso tamo dagari ae be da awodo adira. \c 4 \s1 UNGO RO ADERI AWA PAUL MI SISIRA \p \v 1 Naso nanonamendi na ingo be dubo budo ena. Edo na iaviri de atima ena ainda be awa ingo awa naso buro da be awasedo. Awasedo naso nanonamendi iji berari Keriso da emboro da pepeta ewo sumbudo demonda mambove. \p \v 2 Euodia de Syntyche ingo embo evetu etoto ge bagitawa awa jo da ewo ainda be re ingo Keriso gebe isewa awa jao isewa awasedo. \v 3 Edo imo naso kondade ari embo na imo emboevetu eiawa kondade adi dipapa ena. Edo ungo Clement de embo nenei de da nangae da buro eiawa edo era awawa ungoda jawo awawa wasiri natopo atari da jawo itido era yei ainda God mi ungoda jawo awa itadira. \p \v 4 Edo ingo Keriso da emboro da pepeta ise gido iji berari iaviri ewo. Sekago sane iaviri ewo. \p \v 5 Edo ingo atise gido ingo rora berari awa gari awodo awa kotove ta awa embo nenei mi gore. Edo Bada da engenembari iji awa aikambu etira. \v 6 Edo rora ro awa embo kotari jiwae kotove ta iji nonde ingo God ga da ge sadewa ainde ingo ro dipapa ewa awa sewo gare. Edo sawo gari gido awa uso yei doio sewo. \v 7 Edo ingo awodo irirowo awa God mi ari ingoda jo awa jamo jamo adira. Edo embo God umo awodo edo ira ainda emboro awa gae jaredo era te ingo Iesu Keriso ga da dada etewo unemi ingoda jo awa ari jamo jamo ari edo ingoda jo de ingoda jiro de awa goroba edo atadira. \p \v 8 Awara naso nanonamendi naso ge sangove awa ingoda yei sadena. Rora ro ewamei ni edo rora ro embo mi jasiga edo eri edo rora ro awa kotopu ri edo rora ro awa dagariae ri edo rora ro awa gebe ri edo rora ro awa dagari ae be dagari ae ri edo rora ro awa embo mi ewamei awodo gido eri awa rora da awa kotise atiwo. \p \v 9 Edo na ingoda yei ro sisena edo ro ingoda yei atopateteno gosisewa awa iji berari ewo. Edo na ro eno gosisewa da awodo ewo. Edo God euri ingodenaso jo jamo jamo edo ira awa umo ingode daedo matawa atadira. \s1 KANDO ITERO PAUL UNGODA YEI DOWO SISIRA \p \v 10 Na Keriso ga da dada isena edo atima ena awa naso iaviri awa nembodiba be ra. Edo matu ingo na kondade isewa awarate ingoda kondade awa atae isira. Edo na ingo na kondade ari ujo ae awa na saera te ingo na kondade ari iji ewamei awa bugaera sena. Awarate iji ribori be atae etiri iji ewamei sekago bugiri ingo na kondade adi ewa. \v 11 Edo na ingoda yei eiedo saera ainda be awa naso rora awa jiwae ae ra awa saera. Awarate naso yei ro atira awa na gosena awa inono na. \v 12 Edo iji jiwae be na rora ae edo ena te iji ainde na rawodo atadeni awa na gido ena. Edo iji jiwae naso rora awa jiwae edo na ro dipapa edo ena awa derigedo ira awarate daedo iji ainde na rawodo atadena awa gido ena. Awasedo na yei rawainda ateni ta edo iji nonde ateni awa na ewamei be atena. Edo na beji ita ko indari jiwae indeni ta na inono eni ta? Naso rora jiwa ta ko naso rora enumba ae ta? Awa awarate na ewamei be atena. \v 13 Edo ro naso yei adira awa Keriso mi naso yei goroba ituri na inono edo ena. \p \v 14 Awarate iji bebegae buguri ingo mi na kondade edo ewa amone ewamei be ra. \v 15 Edo ingo Philippi nati embobo na binga ewamei minonu sadi tuturo isena awa Macedonia busu awa doturisena awa ingo gosisewa. Edo na yei awa doturisena ainde embo nenei mi na kondade aera te ingo Iesu gebe ari embobo ingo mi na kondade isewa. Edo ingo nangae da kando mina ita isewa te embo nenei awodo aera. \v 16 Edo na Thessalonica nati da atono ingo mi na kondade edo iji jiwae be na rora ro dipapa edo isena awa itido isewa. \v 17 Edo na awa iji berari kando badi awa kotae rate na ingo mi ingoda kando ititewa ainda be awa bawase dipapa edo ena. \v 18 Awasedo na ingo mi berari ro ewowa awa embo dowo sadi ove eiawa ititena. Edo ingo mi naso yei ro ewowa awa inono na. Edo kando ingo mi itewo Epaphroditus mi naso yei budo bugusira. Edo kando jiwae be awa inono na edo awa teta rorou muno de embo mi God da yei itido era da awodo ra. Edo rorou awa God mi budo umo iaviri edo ira. \v 19 Edo naso God rora berari da topo umo Iesu Keriso awasedo ingo rora ro berari jingama ise atari dipapa ewa awa ingoda yei itadira. \p \v 20 Edo iji matawa ingode iji berari God ingodenaso Mama awa jasiga ore. Awara. \p \v 21 Edo na God da embobo berari awa ategurena embo Keriso da totopo awa. Edo nanonamendi einda nangae atima era awa ungoda ategari ingoda yei ititera. \v 22 Edo God da embobo berari einda atima era amimi ingo ategurera. Edo God da embobo Rome embobo da gitijigari nembodiba da mando da buro edo era awa ungo daedo ingo ruvegae ategurera. \p \v 23 Edo Bada Iesu Keriso da ewamei ari ingo berari da yei matawa atare. \cls Awara \cls Ingoda namendi \cls Iesu Keriso da jawo da \cls Paul