\id HEB - Ewage-Notu NT [nou] -Papua New Guinea 1987 (web 2014) 
\h HEBREWS 
\toc1 Ove Hebrew Embobo Mi Burisera 
\toc2 Hebrew 
\toc3 Heb 
\mt1 Ove Hebrew Embobo Mi Burisera  
\c 1  
\s1 GOD USO MEI ITIRI INGODENASO YEI GE SISIRA  
\p
\v 1 Matu be matu God iji jiwae uso binga sari embobo emboro neinde kainde de itiri bugero edo ingodenaso mamoumbogo da yei ge sedo isira.  
\v 2 Awarate iji sangove einde God uso mei awa itiri bugudo ingodenaso yei ge siutara. Edo God de uso mei de ungo etoto mi dada edo rora berari awa isera. Edo God mi uso mei da yei rora boroko atera awa ititisira edo rora berari amboda bugadira awa itadira.  
\v 3 Edo ingodena God da mei gosise God da usasa janiburira awa gosera ainda be awa uso mei awa God da usasa mi janiburira awasedo. Edo uso mei da gari awa God da gari da awodo ra edo umo wasiri edo ira amone God mi edo ira da awodo edo ira. Edo uso mei umo uso ge goroba de mi seuri edo rora berari bejedo ewoga ewoga aerate ungo yei dada atima era. Edo umo wasiri bebegae tupari buro awa edo atae edo umo utu da God goroba jiwae da ingo be da anumbedo atira.   
\s1 GOD DA MEI DA JAWO MI ASISI EWAGAEWA DA JAWO AWA DERIGEDO IRA  
\p
\v 4 God mi asisi ewagaewa awa yei nembodiba da ititisira awarate unemi uso mei awa yei nembodiba be nembodiba da ititisira. Edo jawo God mi uso mei da yei ititisira amimi asisi ewagaewa da jawo awa derigurisira.  
\v 5 Ko God umo asisi ewamei da yei saera,  
\q1 “Imo awa naso mei na edo boroko na awa iso imamo etena.”  
\p Edo God asisi ewamei da yei saera,  
\q1 “Na iso imamo adena imo naso mei are.”   
\p
\v 6 Edo God umo uso mei bugo awa busu da itari bugarase isira iji ainde sisira,  
\q1 “God da asisi ewagaewa berari awa ungo umo tumondebain ore.”   
\p
\v 7 Edo asisi ewagaewa awa God mi sisira,  
\q1 “Asisi ewagaewa awa binga agipo ari embobo teta bisara mi sumbudo ira da awodo awa burigi sumbudo era. Edo ungo awa agipo embobo nanemi teta riawo ingege isena.”   
\p
\v 8 Edo mei awa God mi sisira,  
\q1 “God iso gitijigari goroba de awa matawa atadira. Edo imo iso embo gitijigadesa awa iso gitijigari awa ewamei be ra.  
\v 9 Edo imo awa iji berari ari ewamei awa dipapa ise edo ari bebegae awa ujo ae edo esa awasedo God iso God mi imo jawo sedo embo mi imo jasiga orase isira. Edo ungo mi imo jasiga etero imo iaviri isesa. Edo iaviri ari God mi iso yei ititisira amimi iaviri ari iso otatao da yei ititisira awa be nembodiba be derigurisira.”   
\p
\v 10 Edo daedo God mi sisira,  
\q1 “Imo Bada tuturo da busu isesa. Edo iso ingo mi utu berari awa isesa.  
\v 11 Edo ungo awa atae adera te imo awa atadesa. Edo ungo awa teta bo mamatu mi jari arago adera.  
\v 12 Edo inemi utu de busu de awa bo bojarago adesa. Edo bo mamatu awa atae euri bo seka edo era da awodo awa utu de busu de atae oro inemi utu de busu de seka adesa. Awarate imo awa matawa gari da awodo atadesa. Edo imo ogo adi aera.”   
\p
\v 13 Edo God mi asisi ewamei da yei saera,  
\q1 “Naso ingo be da eiedo anumbeio. Edo imo einda atio nanemi iso gitopo berari awa teta besi awodo iso tei tuda itane.”   
\p
\v 14 Edo asisi ewagaewa mo rori? Asisi ewagaewa awa asisi iji berari God sapo edo era awa ra. Edo ungo God sapo edo era edo God mi ungo ituri mambudo God umo embo ave soregadi kotedo ira awa kondade edo era.   
\c 2  
\s1 GOD DA SOREGARI KANDO AWA NEMBODIBA BE RA  
\p
\v 1 Awasedo ingode ge moka be ingera awa dodo kiambu kiambu gigisebedo mana mambadera te ge awa ingido gogo ise budo jo da itoro ainda matawa atare.  
\v 2 Edo binga asisi ewagaewa mi minonu sedo isera awa ingode gosera awa gebe ra. Edo embo binga awa ujo ae ise bae isera awa riroga embo awodo ise budo era awa burisera.  
\v 3 Awasedo ingodena soregari nembodiba da ge awa ingae adera awa ingodena daedo riroga awa badera. Edo ingode jebugari katogo aera. Edo Keriso umo umosuka soregari da binga awa tuturo da minonu sisira. Edo embo binga awa ingisera embobo ungo mi isaga ingodenaso yei seoro binga awa gebe awa gido era.  
\v 4 Edo God ari ungoda ge awa goroba arase sedo ari wasiri goroba de neinde kainde edo isira edo wasiri embo mi matu gae awa isira. Edo ingodena ungoda ge awa ingise God da wasiri goroba de edo ira awa gido ingode binga awa gebe awa gido era. Edo God umo embo ave dipapa edo ira ainda yei Asisi Kotopu da kando awa itido ira.   
\s1 IESU IJI TUPO ASISI EWAGAEWA DA TUDA ISIRA  
\p
\v 5 Nango sera ge amone busu amboda eradira awa sera. Edo God asisi ewagaewa busu awa simba orase itae ra.  
\v 6 Awarate God mi ro jiwari da tano da mi sisira awa isira,  
\q1 “Edo God mi imo ro edo busu da embobo awa ewamei edo kotedo esi? Edo nango ro etera amimi etiri imo nango kotesi?  
\q1 Edo embo berari awa inemi simba edo gogo esa awarate ungo mo averi?  
\v 7 Edo ungo iji tupo asisi ewagaewa da tuda isera awarate boroko imo ungoda yei jawo nembodiba itido edo ungo jigeso inbe inda vitera.   
\q1
\v 8 Edo rora berari inemi isesa awa gitijigarase itesa.”  
\m Edo gebe ungo mi busu berari de embo berari de awa gitijigadera te eiawa bugae atira. Awarate amboda bugadira.   
\p
\v 9 Edo boroko ingode Iesu awa rawodo iri awa gosera. Edo God Iesu mi embo berari awa embo betarase iji tupo asisi ewagaewa da tuda arase ititisira ainda be awa umo embo berari mi uso soregari awa borase dipapa isira sedo. Edo uso soregari awa kando ra. Edo Iesu memesi nembodiba budo bebetisira awasedo God mi uso yei usasa nembodiba de jasiga ari nembodiba de teta gitijigari nembodiba da gitijigari gobe itido era da awodo awa ititisira.   
\p
\v 10 Edo God mi awara setiri memesi Iesu da yei bugusira amimi etiri Iesu gitijigari embo be isira. Edo Iesu gitijigari embo nembodiba edo umo uso usasa de jasiga ari nembodiba de awa embo nenei da yei itadira amone awa ra. Edo Iesu mi embo nenei gitijigido budo soregari yei da budo mambari soregari badera.   
\p
\v 11 Edo Iesu mi ingodenaso jo bebegae awa segetiri ingodena ewagaewa isera. Edo umo de ingodenamonde awa ewagaewa isera edo God da isera awasedo Iesu ingodena uso nanonamendi sedo ira. Edo umo ingodena awa uso nanonamendi sira awa umo ingodenaso yei umo me gaera.  
\v 12 Edo Iesu mi sira,  
\q1 “God na iso yei naso nanonamendi da jawo da ge sadena.  
\q1 Edo na embo berari da diti da imo jasiga adena.”   
\m
\v 13 Edo umo daedo sira,  
\q1 “Na God tumonda adena.”  
\p Edo ge nei sira,  
\q1 “Na God mi kinapeina naso yei ititisira ainde da awa eire.”   
\p
\v 14 Edo ingodena uso kinapeina awa embo ra edo ingodenaso tamo awa pisi de ororo de ra awasedo Iesu umo daedo embo isira edo uso tamo awa pisi de ororo de da isira. Edo betari da susu Satan awa usibesi adi sedo Iesu tamo pisi de ororo de budo embo edo umo bebetisira.  
\v 15 Edo embo iji berari atise betari oju edo isera embobo awawa betari da oju mi bundisira te Keriso mi betedo wujegurisira.  
\v 16 Edo ingodena isaga gosera umo asisi ewagaewa kondade aera te umo embo edo Abraham da orobe ingodena berari awa kondade edo ira.  
\v 17 Edo Keriso umo uso nanonamendi awa embo priest adi sedo awa Keriso umo embo teta uso nanonamendi inge arase awa inono isira. Emboro nei atae ra. Edo Keriso God mi embo da wasiri bebegae awa kotembedo doarase sedo umo God da priest edo God sapo isira edo umo wasiri biae da rorou itari buro awa edo gogo edo isira. Edo Keriso umo wasiri bebegae da rorou itari buro awa ise awa embo berari jo edo ira.  
\v 18 Bagari de memesi de Keriso da yei bugusira awasedo boroko embo amenda yei memesi de bagari de puradira awa Keriso embo awa kondade adira awa inono na.   
\c 3  
\s1 IESU MOSES DERIGURISIRA  
\p
\v 1 Naso Iesu gebe ari nanonamendi God ingo daedo jawo sisira. Edo God Iesu itiri bugusira awa binga ewamei budo bugari embo arase isira. Edo ingodena binga ewamei awa gebe oro awa Iesu awa ingodenaso priest nembodiba adira. Edo naso nanonamendi umo awa nembodiba be kotewo.  
\v 2 God mi Iesu buro eiawa arase jawo setiri umo God kera ewamei be isira teta Moses mi God da mando da buro ise God sapo edo gogo isira da awodo.  
\v 3 Embo ave mando adira edo embo mi embo awa sedo jaradera te mando awa sedo jaradi aera da awodo embo mi Iesu sedo jaradera ge amimi Moses da buro jasiga isera ge awa derigare.  
\v 4 Edo ingodena mando gido ingode embo amimi etira awa gido era da awodo ingodena rora berari ingodenaso demo ponda awa gido ingode rora berari awa God mi isira awa gore.  
\v 5 Edo Moses God da mando da buro ise God edo gogo edo sapo isira. Edo embo mi buro Moses mi ro edo isira awa gido embo God mi amboda ro adira ainda gari awa budo isera. Edo Moses da buro awa teta God mi amboda ro adira ainda ove kewari inge ra.  
\v 6 Awarate Keriso awa agipo embo aera umone God da mei na. Edo umo God da mando da buro edo ira awa teta mei mi uso mamo da mando da buro edo ira da awodo ra. Edo ingodena awa God da mando ra. Edo ingodena goroba edo atadera edo iji berari God mi ro adi sisira adira awa gebe ise atadera awa ingodena God da embobo atadera.   
\s1 INGODE ISRAEL EMBOBO MI KOTARI ATITIGAE ISERA AWODO MANA ADERA  
\p
\v 7 Awasedo ingode Asisi Kotopu mi ro sira awa dengoro adera. Edo Asisi Kotopu mi sira,   
\q1
\v 8 “Matu yei ro atae da God mi ingoda mamoumbogo Israel embobo awa itido gadi ititisira awarate ungo tini gambari edo God da yei bekuba isera. Gaegae edo ingo tini gambari edo God da yei bekuba awodo eove ta God da ge awa ingiwo.  
\v 9 Edo God mi sisira, ‘Yei ro atae ainda ingoda mamoumbogo mi gaeko 40 wasiri goroba de na ro edo isena awa gido isera te ungo na sekago sekago itido gido isera.  
\v 10 Awasedo na embobo ainda yei tini gambari edo ungoda yei sisena ungo kotari nenei era ise emboro neinde kainde da mambutera awarate ungo naso ge ingae ise edo naso emboro tambae era.   
\q1
\v 11 Edo na tini gambari edo na ro adena awa sisena. Edo na sisena ungo mana nangae da naso jango indari yei jamo jamo da mana toradera sisena.’”   
\p
\v 12 Edo naso nanonamendi gaegae edo ingoda jo awa biae ari ingo Keriso gebe ari dove edo gaegae edo ingo God dodo wareregedo mambove ta gido gogo ewo.  
\v 13 Edo gaegae edo embo da ingoda teda awa wasiri biae be bagari umo jiro biae eure ta ingo berari iji einde boroko awa God mi jawo sira iji awa atirari kondade mina ara ewo ainda be awa ingodena berari awa Keriso ga da umo ise buro era awasedo.  
\v 14 Edo matu ingodena Keriso tumonda isera. Edo ingodena awodo ise ingodenaso tumonda ari da jigido takibedo atiriro iji sangove da iji awa bugadira awa ingodena awa uso teda toradera.   
\p
\v 15 Edo jiwari mi eiawa sira,  
\q1 “Imo boroko God da ge javi iso yei sirirari ingido gido beuso eose teta Israel embobo mi matu God da ge javi ingido dodo beuso isera awodo.”   
\p
\v 16 Edo embo mo amemi God da ge javi ingido dodo beuso iseri? Embo berari Moses mi gitijigido Egypt dodo bugusera amone ra.  
\v 17 Edo embo gaeko 40 da joda God mi ungo awa embo bebegae sedo kasisira embobo mo averi? Embobo amone wasiri bebegae edo yei ro atae ainda dudurigedo bebetegurisera embobo awa ra.  
\v 18 Edo God mi umo ro adira awa sedo isira, “Ungo mi mana nangae da naso jango indari yei jamo jamo da toradera.” Edo umo awodo sisira mo amende sisiri? Amone umone embo uso ge ingido dodo beuso isera embo de sisira.  
\v 19 Awasedo ingodena gosera ungo awa torari katogo aera ainda be awa ungo God gebe ae isera awasedo.   
\c 4  
\s1 GOD UMO USO JANGO INDARI YEI JAMO JAMO DA INGODE NANGAE TORADI DIPAPA IRA  
\p
\v 1 Edo God mi sira embo ave toradi dipapa adera embo awa umo God da jango indari yei jamo jamo da torare. Edo God da ge awa atae aera te atira. Awasedo gae gae edo embo da ingoda teda awa jango indari yei jamo jamo ainda torae dodo ponda aturase ingode oju ore.  
\v 2 Edo ingodena binga ewamei awa ingisera teta Israel embobo mi matu ingisera da awodo. Awarate ungo binga awa ingido gebe edo binga awa ungoda jo da itae awasedo binga awa ungoda teda awa be ae isira.  
\v 3 Awarate ingodena awa binga awa ingido gebe isera awasedo ingodena awa God da uso jango indari yei jamo jamo da ungae da totorisera. Edo embo tumonda ae edo era ainda jawo da God mi sisira,  
\q1 “Na ro adena awa sedo sisena, ungo mana nangae da naso jango indari yei jamo jamo da toradera.”  
\m Edo God busu de rora berari de awa ise umo jango indari yei jamo jamo awa sia isira. Edo umo yei awa sia etiri atiri dodo umo ge awa sisira.  
\v 4 Edo iji 6 awa atae edo 7 awa ingode jiwari da ajigedo gido era, “Edo iji 6 awa atae etiri God uso buro awa atae edo iji 7 awa umo jango indisira.”  
\v 5 Edo ingode sekago God ro sira awa ingore, “Ungo mana nangae da naso jango indari yei jamo jamo da toradera.”   
\p
\v 6 Edo embo tuturo da binga ewamei awa ingisera awa ungo God ga da uso jango indari yei jamo jamo da torae ra ainda be awa ungo gebe ae isera awasedo. Awarate God da jango indari yei jamo jamo da torari emboro awa atira.  
\v 7 Edo ingodena gosera ainda be awa God mi iji nei itido jawo sira boroko awa. Edo embo matu atima isera awa torae isera awarate gaeko jiwae atae etiri God mi iji ainda ge sedo jawo boroko sira awa David da yei sisira,  
\q1 “Imo boroko God da ge javi ingido gido beuso eose.”  
\m Edo ingodena jiwari einda tano da ainda ge awa matu setera.   
\p
\v 8 Edo Joshua mi embo gitijigido God da jango indari yei jamo jamo da torae etira gido awa God umo iji nei da ge awa mana sae etira.  
\v 9 Awasedo ingode eiawa be gore. Jango indari God mi uso embo mi borase sisira jango indari amone atira. Edo iji 6 atae etiri God iji 7 da jango indisira da awodo umo ingodenanemi jango indorase dipapa ira.  
\v 10 Edo God uso buro atae edo jango indisira da awodo embo ave uso buro atae adira awa umo God ga da uso jango indari yei jamo jamo da torare.  
\v 11 Awasedo ingode edo gido God ga da uso jango indari yei jamo jamo da torore. Edo Israel embomei mi God beuso edo torae isera da awodo ingode mana adera.   
\p
\v 12 Edo God da ge goroba de wasiri de atira. Edo God da ge awa di teta wo dangoro da di da awodo edo atira. Edo God da ge da di awa wo dangoro da di awa derigedo atira. Edo God da ge awa teta wo dangoro da di mi ingodenaso jo de jiro de da kasedo mambae etira awodo ra. Edo jo poporo da kasedo mambudo ingodena ro koteri edo ro dipapa be eri awa isaga adira.  
\v 13 Edo rora da ro God mi isira amimi God da dombu da awa unjugari katogo ae be ra. Rora berari God mi isira awa isaga da edo God da dombu ra. Edo God umo ingodenaso kotari berari de dipapa berari de awa gido ira. Edo ingodenanemi ro berari edo era awa uso yei ujugoro gadira.   
\s1 IESU AWA INGODENASO PRIEST NEMBODIBA RA  
\p
\v 14 Iesu God da mei awa vitido utu da torido God da dombu da atira edo umo awa ingodenaso priest nembodiba awasedo ingodenaso tumonda ari Keriso da yei ingode ingodenaso be mi sedo era awa ingode tumonda ari ainda jigido takibore.  
\v 15 Edo ingodena iji nenei goroba ae edo era iji ainde ingodenaso priest nembodiba awa ingodena jo edo ira. Edo bagari emboro neinde kainde da awodo ingodenaso yei bugudo ira da awodo uso yei bugudo isera te umo wasiri biae aera.  
\v 16 Awasedo rora neinde kainde ro ingodenaso yei bugadira awa kotari jiwae kotove awarate ingode God da kondade badi sedo awa ingode oju ae uso dombu da bugoro umo ingodena jo edo awa umo ingodena kondade adira.   
\c 5  
\s1 IESU MEMESI NEMBODIBA BETIRI GOD MI PRIEST ARASE ITITISIRA  
\p
\v 1 God mi uso embo da teda priest nembogamo kataburisira. Edo katabedo God mi uso jawo da embo kera arase sedo ungoda teda ititisira. Edo kera awodo ise God da yei wo mi rorou itido ira ungoda wasiri bebegae awasedo.  
\v 2 Edo priest nembodiba awa goroba aera teta embo nenei goroba ae awodo ra awasedo umo edo gogo edo embo jiro ae edo wasiri bebegae edo era awa budo edo gogo edo itadira.  
\v 3 Edo embo da wasiri biae da awa embo aera te umo daedo uso wasiri biae de da awa embo rorou awa itido ira.  
\v 4 Edo embo da amemi umo umosuka priest nembodiba da buro awa adi sedo adi aera te God mi embo awa jawo sedo priest nembodiba da buro awa arase itadira teta God mi Aaron jawo sisira da awodo.   
\p
\v 5 Edo da awodo Keriso umo umosuka priest nembodiba da buro awa adi sedo aera te God mi uso yei sisira,  
\q1 “Imo awa naso mei na boroko iso imamo etena.”   
\m
\v 6 Edo ge nei eiawa God mi uso yei sisira,  
\q1 “Imo awa priest adesa teta Melchizedek awodo edo imo priest da buro awa ise matawa atadesa.”   
\p
\v 7 Edo Iesu busu da atisira ainde umo ji de jijiu de God da yei sedo gido isira umo betari da soregarase. Edo umo God da yei benunu awodo seuri God umo ingido isira ainda be awa umo God mi ro arase dipapa ira awawa adi dipapa nembodiba be edo isira awasedo.  
\v 8 Edo Iesu awa God da mei na te umo memesi nembodiba burisira amimi etiri umo rawodo edo God kera ari ri awa gosisira.  
\v 9 Edo umo memesi burisira amimi umo soregari embo ewamei be ewamei wasiri matawa atari awa embo umo kera edo era ainda yei itido ira embo awa isira.  
\v 10 Edo umo priest da buro teta Melchizedek mi priest da buro edo isira awodo arase God mi umo priest nembodiba arase jawo sisira.   
\s1 KINAPEINA DA ATARI AWODO ATOVE  
\p
\v 11 Nango ge jiwae einda jawo da sari dipapa era te ingoda jiro awa okain etiri edo ingo kiambu ro gae ewa awasedo nango mi ge eiawa ingoda yei ujugari awa okain be ira.  
\v 12 Edo ingo iji ribori be God da ge ingewowa awasedo ingo mi embo nenei atopatae etewa te ingo God da ge awa kiambu gido gogowo ae awasedo ingo embo nenei mi God da ge da susu awawa ingoda yei atopatorase dipapa ewa. Edo ingo kaiema indae etewa awarate ingo emi indise atewa.  
\v 13 Edo embo ave emi indera embo awa mei kiambu ra. Edo wasiri amomo ewa ta biae ri amone mei kiambu emi beda amone gaera.  
\v 14 Edo embo ave bajido mei kiambu emi beda ari awa dodo ira embo awa wasiri amomo ewa ta biae ri awa gido ira. Edo embo awa teta God da ge tuda awawa indarago ise gadira.   
\c 6  
\s1 BAJIDO INGODE GOROBA DE KERISO GEBE ORE  
\p
\v 1 Ingode ge tuturo da Keriso da jawo da ingisera awa sise atadi aerate ingode uso ge nei awa ingode ingore. Edo ingode ge awa ingise babojiroro ingodenaso tumonda ari uso yei awa goroba are. Edo ingodena mando seka adi dipapa edo era mo ingode tutuvi derido mo sekago jigoro sokubedo ita? Edo sokubedo mo sekago derido eri ta? Edo sekago derido mo sekago sokubedo eri ta? Edo ingode mata awodo ise atima eri ta? Awodo aera. Edo da awodo ingode mana ge Keriso da jawo da ingode tuturo da ingisera awa sekago sekago sise atadera.  
\v 2 Edo ge tuturo da ingode ingisera ge amone eire. Atopatari wasiri bebegae awa dodo God da yei wareregedo umo gebe ari edo atopatari umo mi ewamei ari wasiri de ingo kopiri da itari wasiri de edo atopatari embo betedo wasiri de sekago erari de edo atopatari embo mi God da kasari matawa atari emone ge tuturo da ingode Keriso da jawo da ingode ingisera.  
\v 3 Edo God mi awara sari ingode bajido uso ge nei awa ingode ingore.   
\p
\v 4-6 Edo embo God uso usasa ungoda jo da janibedo ira edo ungoda jo pirigedo ira edo ungo utu da indari gambudo gido era edo Asisi Kotopu ungoda yei wosedo ira edo ungo gido era God da ge awa gebe edo ungo God mi wasiri goroba de iji amboda bugutira ainde adira awa gido era ainda edo embobo eiawa ungo God da ge awa be dodo demonda wosadera awa ungo sekago mana be wasiri biae awa dodo God da yei wareregadera ainda be awa ungo God da ge awa dodo demonda wosadera awa teta God da mei orega da benema mi sekago dari inge adera. Edo ungo awodo adera awa umo embo da diti da men gadira.   
\p
\v 7 Edo ga busu da ainda wowosise atirari embo mi ve ainda gowadera awa ve awa be nembogamo de da eradira awa ingode God mi busu awa ewamei etira awa gadera.  
\v 8 Awarate busu ainda bebe de vive de eradira awa busu awa ngamo aera. Edo embo mi ri mi itoro bebe de vive de awa ewadira awa ingode gadera God mi busu awa biae etira awa gadera.   
\p
\v 9 Awarate otatao nango ge ingoda yei eiedo sera awa nango ge eiawa ingoda jawo da saera ainda be awa nango gosera ingo God da soregari budo ingo awa be ewagaewa ewa awasedo.  
\v 10 Edo God rora ewagaewa awa embo da yei edo ira. Edo umo buro ingo mi isewa awa mana ruvegadira. Edo ingo mi Iesu gebe ari embobo kondade isewa edo ise atadewa amimi isaga ira awa ingo God dubo burewa awa God mana ruvegadira.  
\v 11 Edo nango ingo mi buro nembodiba awa ise atawase dipapa nembodiba be era. Edo nango ingo dowase ujo ae era. Edo ingo awawa ise atirowo iji sangove bugari ingo ingoda tumonda ari da be awa badewa.  
\v 12 Edo awodo ise ingo begogo ae emboro Iesu gebe ari embobo mi pepeta edo era ainda pepeta ise God mi ro ingodenaso yei itadi sari gari sisira awa badewa.   
\s1 GOD IJI BERARI RO ADI SEDO IRA AWA EDO IRA  
\p
\v 13 God mi Abraham da yei sari gari sisira iji ainde umo ro adi sari gari sisira awa adi sisira. Edo embo da God derigedo awa atae awasedo God uso jawo da goroba mi sari gari awa sisira.  
\v 14 Edo God mi Abaraham da yei sisira, “Na iso yei sari gari sena nanemi imo ewamei adena edo nanemi ano iso orobe awa jiwae be jiwae adera.”  
\v 15 Edo Abraham begogo ae simba isira. Edo simba edo ainda amboda God mi uso yei ro itadi sari gari sisira awawa kumbusira.   
\p
\v 16 Edo embo ave sari gari sadi adira awa umo embo umo derigedo atira ainda goroba da jawo da sari gari awa sira. Edo umo sari gari awa sadira awa embo nenei mi mana oro uso adi sari sadira ge awa atae adira.  
\v 17 Edo God umo embo uso sari gari ro sisira awa badi era embobo amimi umo uso ge awa wareregadi ae awa gorase sedo God umo uso ge awa isaga da ititisira edo umo uso jawo da goroba da sari gari ge awa sisira.  
\v 18 Edo God umo uso adi sari ge ingodenaso yei sisira awa umo uso jawo topo ainda goroba da uso adi sari awa sisira. Edo God ge etoto awawa sisira. Edo ingodena gosera God uso jiro awa wareregadi aera edo ingodena gosera God ge busae edo ira awasedo ingodena wasiri biae da yei awa dodo God da yei sumbudo mambudo awa utumo da torera edo ingodena awa jo ambae ra. Edo ingodenaso jo awa goroba de atiri ingodena God da ge adi sari ingodenaso yei sisira ainda jigido takibedo atera.  
\v 19 Edo God da adi sari ge awa teta nga ganuma riro edo itoso wosedo derido jigido ira da awodo ra. Edo ganuma riro ari eiawa goroba ra edo wasiri ae edo ira. Edo ingodena God uso adi sari ge awasedo utu da jo be jo da toradera awa inono teta priest nembodiba mi Jew embobo da tumondebain ari oro da bo nembogamo da gun da torido yei kotopu da torido ira da awodo ra.  
\v 20 Edo Iesu ingodena torae atero giti ingodenaso jawo da yei kotopu da totorisira. Edo Iesu priest nembodiba teta Melchisedek da awodo edo ingodenaso priest nembodiba edo matawa matawa atadira.   
\c 7  
\s1 GE PRIEST NEMBODIBA MELCHISEDEK DA JAWO DA  
\p
\v 1 Melchisedek awa nati Salem da gitijigari embo ra. Edo umo awa God inda atima ira ainda priest ra. Edo Abraham da embobo mi gitijijigegari da isoro embobo de awa embogo edo dorisera edo iji ainde umo engenemburiri Melchisedek mi umo tambudo umo ewamei isira.  
\v 2 Edo Abraham mi gitijijigegari nembogamo ainda rora awa budo dombu 10 awodo ititisira. Edo dombu 10 awodo pigedo dombu da awa Melchisedek da yei ititisira. Edo jawo Melchisedek da be ingodenaso ge mi awa ewamei da mamo. Edo Salem nati da gitijigari da be awa ingodenaso ge mi awa jo jamo jamo ari da mamo.  
\v 3 Edo Melchisedek da uso mamo de ai de uso umbogo de da kiki jiwari awa atae ra. Edo uso kumbari de uso betari de da kiki jiwari awa atae ra te umo teta God da mei awodo priest matawa atira.   
\p
\v 4 Edo Melchisedek mi embo nenei awa derigedo atira. Edo Abraham Jew embobo da umbogo mi gitijijigegari awa dedo ungoda rora jiwae be budo dombu 10 awodo pigedo dombu da awa Melchisedek da ititisira.  
\v 5 Edo Israel embobo mi indari de rora de dombu 10 awodo pigedo dombu da awa Levi da orobe priest da buro edo isera ainda itido isera ainda be awa Moses da agodari ge mi awodo orase sisira awasedo. Edo Melchisedek awa Levi da orobe aera te Abraham mi rora awa dombu 10 awodo pigedo dombu da uso yei ititisira.  
\v 6 Edo Melchisedek kando awa budo umo Abraham God da adi sari sisira ge awa burisira awa ewamei isira.  
\v 7 Edo ingodena gosera embo amemi ewamei ari itido ira embo amimi ewamei ari budo ira embo awa derigedo ira. Awasedo ingode gosera Melchisedek mi Abaraham derigurira awa.   
\p
\v 8 Edo Jew embobo ungoda rora de indari de awa dombu 10 awodo pigedo dombu da awa ungoda priests da yei itido isera te priests amone embo ra edo amboda betadera. Awarate Abraham rora dombu 10 awodo pigedo dombu da Melchisedek wasiri de atima ira ainda ititisira. Awasedo ingode gosera Melchisedek mi Jew embobo da priest berari awa derigurira.   
\p
\v 9-10 Edo nanemi sae etena Abraham umo uso diti da awa ituri Levi da orobe mi diti da burise edo uso diti da awa mina itido isera sae etena te iji ainde awa Levi da uso ai awa umo bae atisira awarate umo awa teta uso dombu da awa itarago edo isira ainda be awa umo awa Abraham da orobe awasedo. Edo awasedo nanemi sena Melchisedek mi Levi awa derigurira.   
\s1 JEW EMBOBO DA PRIESTS DA BURO AWA INONO AERA  
\p
\v 11 God agodari ge awa Israel embobo da yei ititisira. Edo Levi da uso orobe awa priest da buro agodari ge da awawa edo isera. Edo Aaron mi priest da buro awa tuturo isira. Edo priests einda buro awa ingodena kondade ari inono ae etira mo roedo amboda God mi priest nei Aaron awodo aerate Melchisedek awodo itiri bugusiri?  
\v 12 Edo God umo priests matu awa uso buro atae arase dipapa isira edo priest seka awa uso buro awawa arase dipapa isira awasedo umo sisira wasiri matu awa atae irirari edo wasiri seka bugadira.  
\v 13 Edo priest seka eiawa ingodenaso Bada Iesu awa sira. Edo umo awa Levi da orobe aerate umo awa orobe nei na. Edo orobe eiawa priest da buro rorou itari tendeba da awa da amemi aera.  
\v 14 Edo ingodenaso Bada Iesu awa umbogo Levi da orobe da aera awa ingodena berari garira te umo awa umbogo Judah da orobe da ra. Edo Moses mi orobe dada awa priest da buro awa orase saera.   
\s1 KERISO PRIEST DA BURO TETA MELCHISEDEK MI ARAGO ADI BUGUSIRA  
\p
\v 15 God mi umo buro nei isira awa isaga isira. Edo umo priest nei teta Melchisedek awodo itiri bugusira.  
\v 16 Edo Iesu bugudo ingodenaso priest isira ainda susu awa agodari ge aerate umo bugudo ingodenaso priest isira ainda susu awa uso goroba ra. Edo Keriso goroba de matawa atima ira.  
\v 17 Edo jiwari mi sira,  
\q1 “Imo priest teta Melchisedek awodo edo priest awodo matawa atadesa.”   
\m
\v 18 Awasedo God mi agodari ge da ari wasiri mamatu awa budo demonda ititisira ainda be awa ge awa goroba ae awasedo ingodena kondade ari sago ae awasedo.  
\v 19 Edo Moses da agodari mi ari embo ewamei adera awa inono aera. Awarate boroko God mi emboro seka diugetiri emboro amimi emboro matu awa derigurira. Awasedo ingodena emboro ainda pepeta ise awa God da demonda pepeta adera.   
\p
\v 20 Edo Iesu priest da buro ari awa kotise God da adi sari ge sisira awa kotewo. Edo God umo priests matu awa ititise adi sari ge awa saerate God Iesu itiri priest iri adi sari ge awa sisira.  
\v 21 Edo God mi Iesu da jawo da ge setiri gaisera,  
\q1 “Edo God mi adi sari ge awa sisira awa uso jiro awa wareregadi aera. Edo umo sisira, ‘Imo priest etesa edo matawa priest atadesa.’”   
\p
\v 22 Edo God adi sari ge awa sisira edo ingodena gosera Iesu mi ingodena embo ro ira amimi agodari ge mi ro isira awa derigurira.   
\p
\v 23 Edo sekago Iesu priest da buro ari awa kotise edo priest nenei ainda ajigari awa jiwae awa kotewo ainda be awa priest da awa beturi edo nei bugudo isira. Edo umo beturi nei bugudo isira. Edo awodo ise priests awawa bugudo isera.  
\v 24 Awarate Iesu matawa atima ira awasedo priest nei mi bugudo uso buro awa adi aera.  
\v 25 Awasedo Iesu embo ave umo gebe edo God da yei bugadera awa soregari boroko awa inono na edo inono matawa awodo atadira. Edo umo awa inono na ainda be awa umo matawa atise ungoda jawo da God da yei ge sedo ira awasedo.   
\p
\v 26 Iesu awa priest nembodiba umo ingodena kondade adira awa inono. Edo Iesu awa ewamei be. Edo umo awa wasiri biae de aera. Edo umo awa wasiri bebegae embobo awodo aera. Edo umo embo berari de rora berari de derigetiri gido God mi umo awa rora berari da inbe inda ititisira.  
\v 27 Edo Iesu awa priests nenei awodo aera. Edo ungo iji dada ungoda wasiri bebegae awa giti segadi rorou itido isera. Edo ungoda wasiri bebegae awa embo rorou itido ungo embo da wasiri bebegae da rorou awa itido isera. Awarate Iesu embo da wasiri bebegae awasedo uso tamo topo awa itiri rorou isira edo umo eiawa iji da isira iji jiwae aera. Edo umo iji da isira rorou awa inono na. Edo ingodenanemi rorou nei awa itadi aera.  
\v 28 Edo Moses da agodari ge mi sisira embo nenei awa priests nembogamo orase sisira te embo priests nembogamo isera awa ungo awa wasiri bebegae embobo ra. Awarate agodari ge awa iji ribori be atiri God uso sari gari ge awa sedo uso mei mi buro eiawa arase ititisira. Edo uso mei awa wasiri biae ae matawa atira.   
\c 8  
\s1 IESU AWA INGODENASO PRIEST NEMBODIBA RA  
\p
\v 1 Nango ge boroko sera ainda be re eire. Ingodenaso priest nembodiba awa wasiri de atira. Edo umo awa God nembodiba da ingo be da anumbedo atira.  
\v 2 Edo umo awa ingodenaso priest nembodiba utu da tumondebain ari yei kotopu da God kera ira. Edo tumondebain ari yei kotopu awa embo mi aerate God umo umosuka isira.   
\p
\v 3 Edo ungo mi priests nembogamo ititisera kando de wo rorou de awa God da yei itorase ititisera da awodo ingodenaso priest awa God da yei rorou itadira.  
\v 4 Edo umo buso da einda boroko atae etira awa umo priest da buro awa mana ae etira ainda be awa priests jiwae be mi kando ititera Jew embobo da agodari mi sira awasedo awa ungo busu da einda atera.  
\v 5 Edo buro ungo mi era busu da einda awa utu da da buro era ainda atiti awa era. Edo na sena einda be awa Moses umo God tumondebain ari oro bo mi itadi isira iji ainde God mi uso yei sisira, “Imo Sinai doriri da ateso na iso yei tumondebain ari oro gari rawodo itadesa awa sisena. Edo gari da sisena da awodo awa tumondebain ari oro awa awodo eio.”  
\v 6 Awarate priest da buro God mi Iesu mi arase ititisira amimi ungoda buro awa derigurisira teta God da uso adi sari ge Iesu mi embo da yei budo bugusira amimi agodari ge awa derigurisira da awodo ainda be awa God uso adi sari ge da uso susu mi agodari ge uso susu derigurisira da awodo.   
\p
\v 7 Edo agodari ge mi kondade ari inono ae etira gido awa God umo ge nei mana sae etira.  
\v 8 Edo God umo embo awa inono ae gido ge eiawa setiri gaisera,  
\q1 “God mi sira, ‘Amboda iji bugadira ainda nanemi Israel embobo de Judah uso orobe de da yei adi sari ge seka sadena.   
\q1
\v 9 Awarate ge seka awa ge matu ungoda yei sisena awodo aera. Edo matu nanemi ungoda mamoumbogo da ingo da jigido ungo Egypt nati awa dodo budo bugusena aingo de na adi sari ge ungoda yei sisena. Edo ungo naso ge awa kera ae etero gido na ungo budo gun da ititisena.  
\v 10 Awarate amboda na adi sari ge seka Israel embobo de Judah da orobe de da yei sadena.  
\q1 Edo na eiedo adena. Na naso agodari awa ungoda yei sano ungoda jiro da toradira. Edo na teta naso agodari awa ungoda joda gaiarago adena. Edo na awa ungoda God ano edo ungo awa naso embobo adera.   
\q1
\v 11 Edo ungo mi ungoda otatao da yei edo ungoda orobe da yei ingo God da be moka awa ingo giwo ta awa mana sadera. Edo ungo mana awodo sadera ainda be awa ungo berari embo nembogamo de embo nembogamo ae ainde da na gadera awasedo.   
\q1
\v 12 Edo na ungo jo ari ungoda wasiri bebegae awa kotembedo doadena. Edo na ungoda wasiri bebegae awa kotembedo dodo sekago mana kotadena.’”   
\p
\v 13 Edo God adi sari ge seka awa sise edo amimi etiri adi sari ge tuturo da sisira awa matu isira. Edo rora ro matu awa biae ise edo atae edo ira.   
\c 9  
\s1 UNGO MI MATU AWA WO DA ORORO DA AWA ROROU ITIDO ISERA  
\p
\v 1 Adi sari ge matu da awa tumondebain rawodo adera ainda agodari awa atima isira. Edo tumondebain ari oro bo mi ari awa busu da ra.  
\v 2 Edo tumondebain ari oro awa eiedo isera. Tumondebain ari oro da jo da awa diumba etoto ra. Edo be kena da awa diumba yei kotopu sedo isera. Edo yei kotopu ainda joda awa goriwo de tendeba de edo ambe God da dombu da itido isera awa atira.  
\v 3 Edo mangiro bo mi ari ainda kaingari ra edo bo ainda gun da awa diumba da kotopu be kotopu sedo isera awa atira.  
\v 4 Edo diumba ainda joda awa rora etoto atira rora muno de ewuse muno dagari ae edo ira ainde edo pogo da auri jawo gold mi ari de. Edo pogo awa adi sari ge da pogo jawo sedo isera. Edo pogo ainda joda awa ou auri jawo gold mi ari awa ititisera. Edo ou ainda joda awa indari God mi utu da edo ititisira ainda dewo memeinya awa ititisera. Edo daedo pogo ainda joda Aaron da ituka itero jaja diusira edo ganuma etoto God mi ainda tamo da agodari kewusira awa ititisera.  
\v 5 Edo pogo ainda tamo da awa asisi ewagaewa jawo Cherubim God da usasa simba ari buro edo isera awa ove kevedo ititisera. Edo ungoda piki mi pogo awa gajedo ainda derido atima isera. Edo pogo ainda tamo awa God mi jo ari yei sedo isera. Awarate boroko iji ainda nanemi mana tumondebain ari oro da rora berari da ge awa mana sadena.   
\p
\v 6 Edo ungo mi tumondebain ari oro da rora awa jo de itero priests iji dada torido ungoda buro awa edo isera.  
\v 7 Edo gaeko dada joda iji da priest nembodiba mi tumondebain ari oro da torido umo mangiro bo mi ari ainda torido edo diumba nei kotopu be kotopu ainda torido isira te embo mi torari sago aera. Edo umo yei kotopu be kotopu ainda torido edo umo awa embo edo embo da wasiri bebegae gae edo isera awa embo umo wo da ororo mi rorou itido isira.  
\v 8 Edo ingodena wasiri ainda be awa gosero Asisi Kotopu mi ingodena eiedo atopapotira. Edo ingodena tumondebain ari oro bo mi ari da wasiri awawa ambo ambo adera awa ingodena yei kotopu ge be da awa mana toradera teta embo mi tumondebain ari oro bo mi isera ainda torae isera da awodo adera.  
\v 9 Edo ungo tumondebain ari wasiri matu da awa ise edo kando de wo rorou de God da yei itido isera awarate awodo era amimi ae ungoda joda wasiri bebegae awa segae ra.  
\v 10 Edo embo tumondebain ari wasiri matu awa ise edo indari kumbari de tamo de da wasiri awa gosera te ungo ungoda joda segari awa ungo gaera. Edo wasiri mamatu ainda uso susu awa agodari neinde kainde tamo ponda awarate joda aera. Awarate boroko God mi uso adi sari ge seka awa isaga etira edo adi sari ge matu da atae ari iji awawa bugira.   
\s1 KERISO USO ORORO TOPO AWA WASIRI BIAE DA ROROU ITIRA  
\p
\v 11 Awarate Keriso priest nembodiba awa bugudo adi sari ge seka ainda buro ira. Edo tumondebain ari oro Keriso umo kera ira amimi tumondebain ari oro nenei awa derigurira. Edo embo mi oro awa aera edo oro awawa busu da einda aera.  
\v 12 Edo Keriso diumba mangiro demonda awodo torido umo yei kotopu be kotopu da totorisira edo iji ainde awa umo wo da ororo awa budo rorou itadi torae ra awarate umo ingodenanemi soregari kumborase sedo uso ororo topo awa rorou ititisira. Edo ingodena soregari awa budo edo wasiri matawa atari kumbadera.  
\v 13 Edo matu embo God da diti da ewamei orase sedo awa ungo adi sari ge matu da buro awa edo gogo edo isera. Edo priest mi wo da ororo de wo cow dungoro ewudo isira ainda aviga de awa budo aviga de ororo de awa embo da jiro gombu da pigedo isira. Edo piguri ungo adi sari ge matu mi sira awodo ewamei edo isera.  
\v 14 Awarate buro Keriso da ororo mi edo ira amimi adi sari ge matu da buro awa derigedo gogowo edo ira. Edo matawa atari Asisi Kotopu mi umo kondade etiri Keriso umo umosuka rorou ewamei God da yei ititisira. Edo Keriso da rorou mi etiri ingodena adi sari ge matu da buro adi jarari awa atae isira. Edo buro awa adi jarari awa atae etiri ingodena awa God wasiri de atira awa sapo adi dipapa era.   
\p
\v 15 Edo God mi ewamei ari natopo atari awawa embo mi kumborase sarigari sisira. Edo embo mi ewamei ari eiawa kumborase sedo Keriso awa jo jamo jamo ari itari embo da ge seka isira. Edo embo mi adi sari ge matu da buro awa adi jaroro ungoda wasiri bebegae awa matawa awodo atima ira. Edo ungoda wasiri bebegae mi atise wasiri bebegae mi ungo bundisira awarate Keriso uso betari mi ungo wujegurisira.   
\p
\v 16 Edo embo da ave giti betae atise umo betari uso busu de uso gayapa de awa amemi badi ainda jawo awa jiwari kato da jivedo ira. Edo embobo awa ungo embo ainda gayapa de busu de kumbari dipapa adera giti embo awawa betetira awa isaga sadera. Edo amimi isaga adira awa embo awa betari edo ungo mi uso gayapa de busu de awa kumbadera.  
\v 17 Edo embo awa wasiri de atadira awa ro unemi gaietira awa goroba ae adira awarate umo betari ro unemi gaietira awawa goroba adira.  
\v 18 Awasedo adi sari ge matu de adi sari ge seka de da susu awawa ororo ra.  
\v 19 Edo Moses mi God da agodari ge awa embo da ujugetiri getero umo wo da ororo de umo de kumbudo embo da jiro gombu da pigedo edo God da agodari jiwari da tamo da pigisira. Edo umo bo kokoi budo ri patu da eiedo ororo de sasaka de da patido ororo de sasaka de awa jiwari de embo de da yei pigisira awa umone awodo isira.  
\v 20 Edo umo awodo pigise sisira, “Eiawa adi sari ge God mi ingo mi kera awase sisira ainda ororo ra.”  
\v 21 Edo umo awa sedo ari da awodo ororo awa tumondebain ari oro bo mi ari da sa da pigedo edo rora berari oro ainda joda edo ainda tamo da pigedo isira.  
\v 22 Edo ungo adi sari ge matu da wasiri awa edo isera iji ainde ungo ororo rora berari da tamo da pigedo isera edo rora awa ewamei edo isera. Edo ororo jojae awa God umo wasiri bebegae awa mana kotembedo doae etira.   
\s1 KERISO WASIRI BIAE ATAE ARASE SEDO USO TAMO AWA ROROU ITITISIRA  
\p
\v 23 Tumondebain ari oro bo mi ari de uso joda rora berari de awa rora utu da atira ainda atiti ra. Edo priest mi wo da ororo awa rorou itido ira edo rora busu da eiawa ewamei edo ira te wo da ororo rorou itido era awa rora utu da ainda inono aera. Edo rovi ravi berari amimi rorou itari nembodiba mi wo da ororo da rorou itari awa derigurira awawa dipapa era.  
\v 24 Edo yei kotopu embo mi isera amone yei kotopu be da atiti ra. Edo Keriso yei kotopu embo mi isera ainda torae rate umo utu da totorisira edo ainda ingodenaso jawo da God da dombu da atima ira.  
\v 25 Edo Jew embobo da priest nembodiba awa wo da ororo awa budo yei kotopu be kotopu da gaeko dada da joda torido isera te Keriso iji jiwae torae ra.  
\v 26 Awarate Keriso iji jiwae torae etira awa iji ainda tuturo edo God rora berari ari edo Keriso iji jiwae memesi budo betae etira. Edo Keriso umo iji jiwae torae ra te boroko busu da sangove ari iji awa aikambu etiri edo umo isaga da bugudo edo wasiri biae da rorou isira. Edo embo da wasiri bebegae awawa atae arase sedo bebetisira.  
\v 27 Edo embo berari busu da atera awa iji da betadera. Edo embo dada betoro God mi ungo kasadira.  
\v 28 Edo Keriso embo jiwae be da wasiri bebegae da rorou edo iji da bebetisira. Edo umo sekago engenembadira iji ainde umo wasiri bebegae kotembedo doari buro awa adi aera te umo embo umo simba era awawa soregadi sekago bugadira.   
\c 10  
\s1 AGODARI GE AWAWA EMBO DA JO BEBEGAE AWA SEGARI INONO AERA  
\p
\v 1 Jew embobo da agodari ge awa rora be da atiti nembodiba aera te agodari ge awa rora ewagaewa bugadira ainda atiti kiambu ra. Edo priests mi gaeko jaige da agodari mi ro sira awodo rorou itari buro awa edo isera awarate embo God da yei bugudo isera awa rorou amimi ari embo da jo ewamei ari awa inono ae edo isira.  
\v 2 Edo rorou awawa inono awa embo God tumondebain edo isera awa God ungoda wasiri bebegae kotembedo doturira awawa gae etera. Edo ungo awawa gae etera awa rorou awawa atae ae etira.  
\v 3 Awarate gaeko jaige ungo rorou awa ititise amimi euri ungo ungoda wasiri bebegae awa kotembedo isera.  
\v 4 Edo wo da ororo mi embo da jo segari awa inono aera.   
\p
\v 5 Awasedo Keriso umo busu da bugadi aikambu ise God da yei sisira,  
\q1 “Imo kando de wo rorou itari de awawa imo dipapa aera te imo na awa rorou itari edo iso dipapa awawa anase dipapa esa.   
\q1
\v 6 Edo ungo mi wo rorou itari tendeba da itido riawo mi dungedo era edo wo neinde kainde mi embo da jo bebegae awa segarase itido era amimi ae imo iaviri aera.  
\v 7 Edo jiwari mi naso jawo da sedo sira, ‘God na iso wasiri awawa adi sedo bugena.’ Edo na jiwari mi sira awodo adi bugena.”   
\p
\v 8 Edo wo neinde kainde da rorou de kando de edo ungo mi embo da jo bebegae awawa segarase wo rorou itari tendeba da itido dungoro ewudo isira amone Keriso umone ainde sira. Edo kando de rorou de amone God umone dipapa ae edo isira edo amimi ae umo iaviri aera. Awarate embo agodari mi ro sira awa edo rorou neinde kainde amone itido isera.  
\v 9 Edo Keriso ainde sedo sisira, “God nanemi imo ro anase dipapa esa amone namone eire.” Edo awasedo unemi rorou mamatu awawa budo demonda itido rorou seka awa ungoda yei da ititisira.  
\v 10 Edo Iesu Keriso God mi ro arase dipapa isira awa edo uso tamo awa iji da rorou ititisira awasedo ingodenaso jo bebega awawa ewagaewa isira.   
\p
\v 11 Edo Jew embobo da priests iji dada rorou itari tendeba da be da derido wasiri biae da rorou da buro awa edo isera awarate ungo iji berari rorou da awa dawa itido isera. Awarate embobo da jo bebegae awawa segari rorou awa inono ae be ra.  
\v 12 Awarate Keriso embo da wasiri bebegae awasedo rorou iji da be da ititisira rorou awawa ewamei be matawa atira. Edo umo rorou awawa itido edo umo God da ingo be da anumbedo atira.  
\v 13 Edo umo ainda simba atirari amboda God mi uso wasai awa uso tuda itadira teta embo da tei da besi dirido era awodo.  
\v 14 Edo Keriso uso rorou da awasedo embo ave uso jo biae awawa etiri ewamei isiri embobo awa ewamei matawa atorase isira.   
\p
\v 15 Edo Asisi Kotopu daedo ge ainda gebe moka awawa ingodenaso yei isaga isira.  
\v 16 Edo God mi sisira,  
\q1 “Sari gari ge eiawa nanemi Israel embobo da yei sadena. Iji bugutira ainda nanemi naso agodari ge awawa ungoda jo da itadena edo teta nanemi ungoda jiro da gaiari inge adena.”   
\p
\v 17 Edo God ge nei sedo sisira,  
\q1 “Nanemi ungoda wasiri bebegae de ari bebegae de da awa ruvegadena.”   
\m
\v 18 Edo awasedo God matu ingodenaso wasiri bebegae awawa matu kotembedo doturisira edo wasiri bebegae da rorou itari buro awawa atae isira.   
\s1 INGODE GOD DA YEI ASUSUBEDO PURORE  
\p
\v 19 Nanonamendi Iesu mi ingodena awa embo betedo edo ingodena wujegurisira awasedo ingodena yei kotopu be kotopu da toradera amone inono na.  
\v 20 Edo ingodenanemi yei kotopu be kotopu da torororase sedo Keriso uso tamo topo awa teta bo keredo ira da awodo kerisira edo umo ingodena awa embo mangiro pirigedo gitijigido emboro seka da bugusira. Edo ingode emboro seka einda pepeta ise atore.  
\v 21 Edo ingodenaso priest nembodiba awa God da oro simba edo ira.  
\v 22 Edo Iesu da ororo mi ingodenaso jo bebegae awa segisira edo umo ingodena sasaka ewamei mi ingodenaso tamo segisira awasedo jo dongono ae edo goroba de ingode Keriso tumonda ise edo ingode God da yei asusubedo purore.  
\v 23 Edo God da sari gari ge ingode gebe ari sedo era awawa ingode doadi aerate ingode gebe ise atore ainda be awa ingode gosera God umo ro sari gari sisira awa adira awasedo.  
\v 24 Edo ingode kondade mina ara oro dubo burise edo embo nenei da yei ari ewagaewa orase sedo awa ingode emboro eura edo ewo mina wuja ore.  
\v 25 Edo embo nenei awawa dada ae era te ingode mana awodo adera. Edo iji nembodiba awawa aikambu etira awasedo ingode goroba edo kondade mina ara ore.   
\p
\v 26 Edo ingode Keriso da rorou awa ingido sedo edo ingode ge awawa ujo ae edo wasiri biae ise atadera awa God umo ingodenaso wasiri bebegae awa mana kotembedo doadira ainda be awa wasiri bebegae da rorou nenei awa atae awasedo.  
\v 27 Awarate embo da God da kasari da oju de ungoda riawo nembodiba mi God gitopo usibesi adira ainda ungoda oju de awa matawa atadira.  
\v 28 Edo embo da amemi Moses da agodari awawa beuso adira awa embo etoto ta tamonde mi isaga oro embo mi jo ari ae embo awa burigi be doro betadira.  
\v 29 Edo embo ave God da mei ujo ae adira awa embo ainda yei ro adira awa ingo kotevi? Edo embo amemi sari gari ge seka da ororo mi uso jo da wasiri bebegae uso awawa segisira edo ororo awa uso mina awa kiambu sadira awa embo ainda yei ro adira awa ingo kotevi? Edo embo amemi Asisi Kotopu God da jo ari embo da yei budo bugudo ira ainda yei ge biae sadira awa embo ainda yei ro adira awa ingo kotevi? Edo embo amemi awodo adira awa riroga unemi badira amimi riroga Jew beuso embo mi kumbusera ainde inono ae awa badira.  
\v 30 Edo ingodena gosera God mi sisira, “Wasiri biae da mina ari awawa naso buro ra. Nanemi mina adena.” Edo sedo sisira, “Nanemi naso embo awa kasadena.”  
\v 31 Edo ingodena God goroba de mina adi atira ainda ingo da wosadera awawa ingodenaso yei awa biae be ra.   
\p
\v 32 Edo matu ingoda yei ro isira awawa ruvegeove. Edo God da usasa ingoda tamo da janibeuri edo ingo memesi nembodiba budo ewa te memesi amimi ingo patae ra.  
\v 33 Edo iji dada embo mi ingoda jawo da embo jiwae da jo da ge biae sise ingoda yei biae edo era. Edo iji nenei embo mi ingoda otatao da yei biae edo era edo ingo ungode daedo memesi budo ewa.  
\v 34 Edo ingoda otatao nenei awa ungo mi gajari oro da itoro edo ingo ungo jo edo ungo kondade edo ewa. Edo embo mi ingoda rora bengono edo era edo iji ainde ingo tini gambari aerate iaviri edo ewa ainda be awa ingo gosewa God mi ingoda yei ro ititira rora amimi rora bengono etera awa dodo derigedo matawa atira.   
\p
\v 35 Awasedo goroba edo atiwo ainda be awa ingo awodo adewa amimi riroga nembodiba badewa.  
\v 36 Awarate ingo God mi ingoda yei ro itadi sisira awawa kumbadi sedo awa saboa ari mi God ingo ro awase dipapa ira awa ewo.  
\v 37 Edo jiwari mi sira,  
\q1 “Iji tupo atae ari embo bugadi ira awa bugadira. Edo uso bugari awa aikambu etira.   
\q1
\v 38 Edo embo Keriso gebe edo era awawa nangae da umo jigari ewamei edo era edo embobo awa atadera te embo ave wareregedo engenembedo era awa na embo ainda yei iaviri adi aera.”   
\p
\v 39 Edo ingodena awa embo wareregedo jajovegedo era awodo aera te ingodena awa embo Keriso gebe eoro God mi soregedo ira awa ra.   
\c 11  
\s1 EMBO GOD TUMONDA EDO ERA AINDA KIKI  
\p
\v 1 Tumonda ari mo rori? Ingodena rora ro arase dipapa edo adira awa gido era amone tumonda ari ra. Edo ingodena rora gaera te ingode ainda atira awa gido era amone tumonda ari ra.  
\v 2 Edo embo matu boroko ae be atima isera awa ungo tumonda ari mi atima isera edo God mi sisira ungo awa atari ewamei atima isera.   
\p
\v 3 Edo ingodena tumonda ari mi gido era God mi ge setiri rora berari awa isira awa gido era. Edo ingodena tumonda ari mi gido era God ingode ro gadi jarera amimi rora berari isira awa gido era.   
\p
\v 4 Edo Abel umo tumonda ari mi God da yei rorou itiri uso rorou mi Cain da rorou derigurisira. Edo Abel God tumonda isira awasedo God mi sisira umo ungae da umo jigari ewamei da torira sisira. Edo Abel uso kando itiri God iaviri isira. Edo Abel bebetisira te uso tumonda ari da kiki amimi ingodena atopatido ira.   
\p
\v 5 Enoch God tumonda isira awasedo umo betae rate God mi kumbusira. Edo embo mi umo eura isera te umo tambae ra ainda be awa God mi umo kumbiri utu da vivitisira. Edo jiwari mi sira God umo kumbae atiri giti da umo wasiri isira amimi God iaviri isira.  
\v 6 Edo embo ave God tumonda ae edo era awa ungo mi ae God iaviri aera. Edo embo ave God da yei puradi dipapa era awa God atira awa gebe adera edo God embo umo eura era ainda yei isaga edo ira awa gebe adera.   
\p
\v 7 Edo God mi Noah da yei amboda ro adira awa sisira. Edo Noah ga bugadi ira awawa gaera te tumonda ari mi God da ge awa gebe edo nga nembodiba didigurisira. Edo umo de uso orobe de nga da torero God mi ungo soregurisira. Edo Noah awodo isira amimi busu berari da embobo awa tumonda ae atima era awa isaga isira. Edo Noah God tumonda isira amimi God ga da umo jigari ewamei isira.   
\p
\v 8 Edo God mi Abraham jawo sedo uso busu awa dodo busu nei God mi uso itadi sari gari sisira ainda mambarase sisira edo iji ainde Abraham tumonda ari mi God kera isira. Edo Abraham uso busu dodo umo yei nonda mambutiri awawa gaera te umo mambusira.  
\v 9 Edo mambudo umo tumonda ari mi busu God mi uso itadi sari gari sisira ainda atisira. Edo umo esega embo awodo busu ainda boga wo andiso mi edo ainda atima isira. Edo God mi Isaac de Jacob de busu ainda daedo atorase sisira edo ungo teta Abraham atima isira da awodo atima isera.  
\v 10 Abraham awodo atima isira ainda be awa umo nati God mi sia edo isira ainda mambadi simba ise gido. Edo nati awa matawa atadira.   
\p
\v 11 Edo Sarah Abraham da aro umo evetu ogo isira te umo uso tumonda ari mi gasou jijirisira. Edo God mi uso yei sisira unemi ari umo mei badira awa sisira. Edo umo awa setiri Sarah umo gosisira umo ro sira awa adira awa gosisira.  
\v 12 Edo Abraham umo daedo embo ogo be isira edo umo uso mei mamo ari goroba awa atae adi aikambu isira te uso orobe da ajigari awawa jiwae be jiwae isira teta utu da damana da ajigari da awodo edo ewa kora da kora ajigari da awodo jiwae be jiwae awodo.   
\p
\v 13 Edo embobo eiawa rora God mi ungoda yei itadi sari gari sisira awawa bae atise ungo bebetisera awarate ungo rora awawa besaun be gido ungo iaviri isera. Edo ungo mi sisera busu eiawa ungoda nati be aerate ungo re esega embobo awodo ra sisera.  
\v 14 Edo embo amemi ge awodo sadera awa amimi isaga ira awa ungo ungoda nati be moka utu da awawa dipapa era awa isaga adira.  
\v 15 Edo ungo busu dodo bugusera awawa kotae edo era. Edo ungo ungoda busu matu awawa kotae etera awa ungo engenembae etera awawa isaga be ra.  
\v 16 Awarate ungo awodo kotae ra. Ungo busu nei dipapa era utu da busu edo ungo iji berari busu awa kotedo era. Edo ungo mi sedo era God awa ungoda God edo God awa iaviri edo ira ainda be awa unemi nati utu da ungo embo sia ira.   
\p
\v 17-18 Edo God Abraham iji ainde itido gosisira edo Abraham tumonda ari mi uso mei Isaac awa rorou awodo ititisira. Edo God mi Abraham da yei sisira, “Iso mei Isaac awa orobe jiwae adira.” Edo Abraham sari gari ge awawa ingisira te umo uso mei awa rorou itadi sia isira.  
\v 19 Edo umo awodo adi sia isira ainda be awa umo gebe isira Isaac betadira awa God mi sekago jigari eradira awasedo. Edo Isaac teta betari inge etiri God mi teta umo sekago jigari erari inge isira.   
\p
\v 20 Edo Isaac tumonda ari mi uso memei Jacob de Esau de ewamei isira edo umo ungoda yei rora ewagaewa amboda ungoda yei bugadira awawa ujugurisira.   
\p
\v 21 Edo Jacob betae atise umo tumonda ari mi Joseph da memei etoto awa ewamei isira. Edo umo awodo ise umo uso ketu da desegedo God tumondebain isira.   
\p
\v 22 Edo Joseph uso betari iji aikambu etiri umo tumonda ari mi uso tamo yei rawainda gowaderi awawa ujugedo edo Israel embobo amboda Egypt nati doadera awa sisira.   
\p
\v 23 Edo Moses da uso ai mi umo burisira iji ainde uso aimamo mi umo awa mei dagariae be gido gido ungo tumonda ari mi gitijigari nembodiba da ge awa oju ae mei kiambu Moses awa unjugurisera.   
\p
\v 24 Edo Moses bajido umo tumonda ari mi embo mi umo awa gitijigari nembodiba da gagara da mei awodo seorase sisira.  
\v 25 Edo umo wasiri biae da iaviri burigi be atae edo ira awawa ujo aerate umo God da embobo de memesi badi dipapa isira.  
\v 26 Edo Moses umo riroga amboda badira awa diti edo isira awasedo umo kotisira umo soregari embo God mi amboda itari bugadira awa embo memesi badira awa ewamei na awarate Egypt busu da gorotu nembogamo badira awa biae awa umo kotisira.   
\p
\v 27 Edo Moses tumonda ari mi gitijigari nembodiba da tini gambari awawa oju ae Egypt doturisira. Edo umo Egypt doturisira awa wareregedo engenembae ra. Edo umo mambuse God embo mi gae jaredo era awa gari inge edo isira.  
\v 28 Edo gaegae edo betari da asisi mi Israel embo da memei bebego awawa dari betorase sedo Moses tumonda ari mi embo jarusegari bondo sia edo wo lamb dorisera ainda ororo awa mangiro be da gutorase sisira.   
\p
\v 29 Edo Israel embobo tumonda ari mi ewa jawo Ewa Kokoi awawa teta busu garasa da derido sembarago isera. Awarate Egypt busu embobo sumbadi isera awa ungo berari ewa da indido ambujegurisera.   
\p
\v 30 Edo Israel embobo tumonda ari mi Jericho nati da puga ganuma mi edo inda vitari awawa jiroroka jiroroka etero iji 7 atae etiri puga awawa wowosisira.   
\p
\v 31 Edo Rahab tumonda ari mi Israel embobo etoto busu gadi bugusera awa ingo joga da isira awasedo amboda ungo embo God beuso edo isera awawa dorise umo dae doturisera.   
\p
\v 32 Edo na rawodo edo ingoda yei berari sano gevi? Na ingoda yei Gideon de Barak de Samson de Jephthah de David de Samuel de God da binga sari embo de da kiki awawa sadi adena awa iji ribori be adira.  
\v 33 Edo ungo awawa tumonda ari mi embogo edo busu jiwae da embo dedo isera. Edo ungo ro ewamei awa edo God mi sari gari ro sisira awa budo isera. Edo ungoda tumonda ari mi euri wo nembogamo lion da be gajuri wo awa ungo usibesi ae edo isira.  
\v 34 Edo embo mi ungo riawo ewuri ainda itido isera te ungo ewae ra. Edo gitopo mi ungo budo isera te ungo betae atima isera. Edo embo goroba egae awa goroba edo isera. Edo aumo embobo da isoro embobo mi ungode da embobgo adi bugoro ungo goroba edo gitopo dedo isera.  
\v 35 Edo embo evetu nenei tumonda ari mi ungoda orobe betedo isera awa sekago eroro budo isera.  
\p Edo embo nenei ungoda gitopo mi budo emi gisi mi ungo dorise sedo isera imo God doadesa awa nango imo dedo gaedo ari doadera sedo isera te ungo ungoda ge awa ujo ae edo God doadi ae sedo isera ainda be awa ungo garira ungoda gitopo mi ungo doro betadera te God mi ungo sekago jigari eradera edo ungoda wasiri seka amimi wasiri ungo busu da atise edo era awa derigadira awasedo.  
\v 36 Edo embo nenei eiawa embo nenei mi ungoda jawo da ge bebegae sedo vejedo isera. Edo embobo einda embo nenei awa embo mi bundedo gajari oro da itido isera.  
\v 37 Edo embo nenei awa ganuma mi wawara edo deoro bebetegedo isera. Edo embo nenei awa dubo diworo betedo isera. Edo embo nenei awa embo mi kasiwo mi deoro betedo isera. Edo ungo awa wo da andiso awa ombudo isera. Edo ungo awa rora ae embobo. Edo embo nenei mi ungoda yei bebegae edo dedo gaedo edo isera.  
\v 38 Edo ungo awa atari ewamei atoro gido embo mi ungo awa embo bebegae sedo ondedo isera. Edo ungo yei ro erae da edo doriri da awodo rerevi edo tembuse ganuma to da edo meko to da ewudo isera.   
\p
\v 39 Edo embobo eiawa God tumonda edo isera awasedo God mi sisira ungo awa embo ewagaewa awarate ungo God mi ungoda yei ro itadi sisira awa berari kumbae ra ainda be awa God ungo simba orase dipapa isira awasedo.  
\v 40 Edo ungo simba iriroro ingode namonde daedo rora ewagaewa God mi itadi sari gari sisira awa berari badera.   
\c 12  
\s1 INGODE IESU AMBO AMBO ISE GOROBA ORE  
\p
\v 1 Embo diti nembodiba be God tumonda ise atima isera edo embobo awawa teta ingodena jiroroka edo ditini ari inge era. Edo Iesu gebe ari embo edo era amone teta geregere sumbari inge edo era awasedo rora bouga ingode ro ango era amimi edo gogo edo sumborase beitigurira awawa ingode warawara ore. Edo wasiri biae awa rora bouga jiwae ra awasedo ingode warawara ore. Edo pigedo ingode God mi emboro ingodenaso dombu da itira einda geregere sumbore.  
\v 2 Edo ingode sumbuse ingode ingodenaso dombu awa Iesu da yei itido sumbore ainda be awa tuturo da edo mambudo sangove da awa umo awawa ingodenaso tumonda ari da susu awasedo. Edo Iesu umo orega da betadira awa gosisira awarate umo doae ra. Awarate umo iaviri uso yei bugadira awa kotedo edo orega da betadira ainda men awa kiambu kotisira. Edo umo awa boroko God da gitijigari anumba da ingo be da anumbedo atira.   
\p
\v 3 Edo memesi Keriso da yei bugusira awa kotewo. Wasiri bebegae embomei mi umo dedo gaedo ise uso yei biae isera te umo doae ra awasedo memesi ingoda yei bugadira awa jo ambari edo dove.  
\v 4 Edo ingo wasiri biae de da embogo ise bugudo betari aikambu aera.  
\v 5 Edo ingo goroba awase sedo God mi ingo uso kinapeina sedo awo gaiari ge ingoda yei sedo ira. Edo ingo ge amomo ruvegurisevi ta? God mi eiawa sisira,  
\q1 “Naso mei God mi iso atari awa ewamei adi sedo iso riroga itadira awa tumo doaso wosure ta God da bekuba awa kumbuio.   
\q1
\v 6 Edo kumbuio ainda be awa embo ave God mi dubo budo ira awa umo embo awa edo gogo edo sari uso atari awawa ewamei arase sedo riroga itido ira.  
\q1 Edo embo ave God mi uso mei sedo ira ainda yei umo riroga itido ira.”   
\p
\v 7 Edo mamo mi uso mei da yei riroga itido ira da awodo God mi ingoda yei riroga itido ira. Edo riroga awa kumbuwo ainda be awa God ingoda yei riroga itadira amimi ingo awa uso kinapeina awa isaga adira. Edo mamo mei da riroga itae edo ita? Awodo aera.  
\v 8 Edo ingo riroga bae adewa teta God da kinapeina mi kumbudo era awodo adewa amimi isaga adira awa ingo awa God da kinapeina aerate tepo popoiwo ra.  
\v 9 Edo ingodenaso mama mane busu da amimi ingodenaso riroga itoro ingodena ungo sapo edo era da awodo ingodenaso Mama utu da awa ingodenaso yei riroga itari ingode umo sapo ise atore.  
\v 10 Edo ingodenaso mama mane busu da awa ungo ro ewamei ira awa kotedo era awodo ingodena babojeoro ainde ingodena riroga itido era awarate ewamei ingodenaso yei bugarase sedo awa God ingodenaso riroga itido ira. Edo God awa ingodena ewamei teta umo ewamei awodo orase sedo ingodenaso yei riroga itido ira.  
\v 11 Edo God ingodenaso atari ewamei adi ingodenaso yei riroga itido ira iji ainde ingodena iaviri edo eri ta? Awodo aera ingodena dubo vevera edo era. Awarate amboda ingodena riroga burisera ainda riroga da be awa kumbadera. Edo riroga ainda be awa ingodena jo jamo jamo de atadera.   
\s1 RAWODO ATARI DA GE  
\p
\v 12 Imo God sapo adi dipapa iriroso tei iso goroba ae ari gido eio sekago goroba are. Edo imo begogo iriroso ingo ambari gido sekago jigio erare.  
\v 13 Edo embo goroba ae edo tei ingo ambari imo ambo ambo era awa gaegae edo dudurigeore ta imo emboro dagaia ewamei da pepeta eio. Edo aso embo tei ingo ambari awa goroba ore.   
\p
\v 14 Edo embo de da ge bagose jaredo ewo ta edo gido wasiri ewamei de da jaredo atiwo ainda be awa ingo awodo ae adewa awa ingo God gadi aera.  
\v 15 Edo gaegae edo embo da ingoda teda awa engenembedo God da jo ari awa doure simba mina ara edo ewo edo gido gogo ewo. Edo gaegae edo embo da ingoda teda awawa muti tokaka de eure awa gido gogo ewo ainda be awa embo awodo adira awa uso ge awawa teta inja kae awodo edo ari embo jiwae ingoda teda ainda yei dubo vevera puradira.  
\v 16 Edo gaegae edo embo da ingoda teda awa dita baita ari wasiri awawa eure gido gogo ewo. Edo Esau umo kotisira ewamei ari berari umo mei bego awasedo kumbadira awa tepo kotisira awasedo uso namendi mi uso ewamei ari kumbarase sisira. Edo uso namendi mi betiri umo uso namendi mi ainda mina awawa momba tewo da awawa itarase sisira. Edo gaegae edo embo ingoda teda da amimi teta Esau mi isira da awodo edo God da ewamei ari awa tepo awodo koture gido gogo ewo.  
\v 17 Edo ingo gosewa amboda umo uso mamo da ewamei ari kumbadi isira te bari sago ae isira. Edo umo ji de da emboro eura edo isiri awawa edo gogo adi isira te umo tambadi sago ae isira awasedo umo ewamei ari awawa amboda kumbari sago ae isira.   
\p
\v 18 Edo Israel embobo Sinai Doriri da bugudo riawo eviri edo umenga de utumo de gosisera edo bisara nembodiba de edo javi teta puin da javi inge awa ingisera edo ge javi ingisera. Awarate ingo rora ingo mi tamesi adi ewa ainda bugae ra teta ingo mi doriri oiawa tamesi ewa awodo awa.  
\v 19 Edo embo ge javi awawa ingido sisera ungo ge awawa sekago ingari ujo ae edo isera ainda be awawa ge amimi etiri ungo oju isera awasedo.  
\v 20 Edo ge javi mi sisira embo da wo awodo mi doriri einda tei itadira awa dewo betare sisira.  
\v 21 Edo ungo mi ro gosisera amimi etiri ungo oju nembodiba etero edo Moses mi sisira, “Na oju edo dudo gasetena.”   
\p
\v 22 Edo ingo awawa doriri awodo teta ainda bugaera te ingo awa Zion Doriri da bugewa. Edo Zion Doriri awawa nati God atima ira awa ra. Edo nati amone utu da Jerusalem nati ra. Edo asisi ewagaewa ainda atima era ainda ajigari awawa jiwae be jiwae ra. Edo ungo dada edo ise iaviri era.  
\v 23 Edo ingo awa Iesu gebe ari embobo da iaviri de dada ari da bugewa embo ungoda jawo utu da gaiari atira amimi. Edo ingo God embo berari kasedo ira yei bugewa. Edo ingo embo God mi euri ewagaewa edo era ainda asisi da yei bugewa.  
\v 24 Edo ingo awa Iesu God da adi sari ge seka sisira awawa ingodenaso yei budo bugusira ainda yei bugewa. Edo unemi adi sari ge seka da ororo mi ingoda tamo da pigarase bugewa. Edo Abel da ororo mi etiri mina ari mina ari awa bugusira awarate Iesu da ororo mi etiri God ingodena jo adira.   
\p
\v 25 Awasedo ingo gaegae edo embo ge ingoda yei sira awawa ujo ae eove gido gogo ewo. Ko embo God da ge busu da sisira embo ainda ge ujo ae isera ainda gagi mina ungoda yei bugusira. Awarate boroko God utu da edo ingodenaso yei ge sira awasedo ingodena uso ge ingae adera mo gagi mo kumberi ta kumbadi ae ri? Ingo ro kotevi?  
\v 26 Edo God matu Israel embobo da yei Sinai Doriri da ge setiri busu wasiri isira awarate umo sari gari sisira,  
\q1 “Na sekago ano busu iji da wasiri adira. Edo busu da awa aerate utu de da ano wasiri adira.”   
\m
\v 27 Edo God ge sekago sisira edo iji da sisira amimi isaga ira awa rora God mi isira rora awa wasiri adira iji ainde atae adera. Edo rora awawa atae ari edo rora embo mi ari wasiri ari katogo ae rora amimi atadera.   
\p
\v 28 Edo ingode utu da rora embo mi ari wasiri ari katogo ae awawa kumbusera awasedo ingode God da yei doio sadera. Edo ingode doio sise ingode God tumondebain rawodo oro amimi ari God iaviri adiri awawa ore.  
\v 29 Edo ingode oju de sapo ari de mi ingodenaso God tumondebain ore ainda be awawa umo riawo rora ewudo ira awodo awasedo.   
\c 13  
\s1 RAWODO ATARI DA GE AWA  
\p
\v 1 Ingo Keriso gebe edo nanonamendi isewa awasedo dubo mina bara ari dove.  
\v 2 Edo embo ingo gae awawa ingo esega adi bugari gido embo awa ingo joga da ewo. Edo embo nenei awodo edo asisi ewagaewa da yei ingo joga da edo isera te ungo asisi ewagaewa da yei ingo joga da era awawa ungo gaera.  
\v 3 Edo embo gajari oro da atera awawa kotewo teta ingo mi gajari oro da atae etewa awodo. Edo embo memesi burera awawa kotewo teta ingo mi kumbae etewa awodo awa.   
\p
\v 4 Edo ingo berari embo de evetu de jimbari wasiri awa ewamei awasedo giwo. Edo ingo iubono embo evetu nenei deda ewove edo ingo aro asini embo nenei de da ewove. Edo embo ari wasiri bebegae edo era edo embo paima ise diti ise edo era embobo awawa God mi kasadira.   
\p
\v 5 Edo iji berari ingoda jo da gano kumbadi dipapa eove te God doio sewo ko rora ingo matu kumbusewa awa embo iaviri ewo. Edo God mi sisira,  
\q1 “Na ingo dodo mambadi aera. Na ingode da matawodo atadena.”   
\p
\v 6 Awasedo ingode oju ae sore,  
\q1 “God awa naso kondade ari embo. Na oju adi ae. Edo embo mi ingodenaso yei biae eri ta? Awodo aera.”   
\p
\v 7 Edo ingoda gitijijigegari mamatu ingoda yei God da binga sisera embobo awawa ruvegeove. Edo ungo rawodo atima isera edo rawodo bebetegurisera awawa kotewo. Edo ungo Keriso rawodo tumonda edo isera awa gido da awodo Keriso tumonda ewo.  
\v 8 Edo Iesu Keriso awa nei aerate umo iji berari da awodo atima ira. Edo umo boroko rawodo atira da awodo sipe atutara. Edo umo rawodo euma atadira da awodo matawa atadira.   
\p
\v 9 Edo atopapotegari neinde kainde awawa bugadira te doawo atopatari amimi ari emboro ewamei awa dove. Edo ingodena agodari ge indari da awawa kera adera amimi ari ingodenaso jo goroba adi aera. Edo agodari ge amimi embo kera edo era awawa kondade aera.  
\v 10 Edo priests Jew embobo da tumondebain ari oro bo mi ari da buro edo isera awa ungo rora ro rorou itari tendeba da rorou itido isera awawa indae ra.   
\p
\v 11 Edo Jew embobo da priest nembodiba awa embo da jo bebegae awawa segadi sedo awa umo wo da ororo awawa kumbudo yei kotopu be kotopu da torido ororo awa rorou awodo itido isira. Edo umo ororo awa itido edo wo da vetu de tamo de awawa nati pon de itido dungedo isera.  
\v 12 Awasedo Iesu umo embo da jo bebegae awawa uso ororo topo mi segadi sedo umo nati nembodiba da ara ponda bebetisira.  
\v 13 Awasedo ingode nati joda ro dipapa edo eri awa dodo ingode nati ponda mambore. Edo ingode umo men gosisira da awodo men gore.  
\v 14 Edo nati nembodiba matawodo atadira awawa ingode busu da einda mana tambadera te ingodenanemi nati nembodiba utu da matawa atadira awa simba era.   
\p
\v 15 Awasedo Iesu mi ingodena kondade ari embo nenei da yei uso jawo da usasa awawa sise iji berari God jasiga ore. Edo ingode God jasiga adera jasiga amone rorou ingode uso yei itadera.  
\v 16 Edo embo nenei da yei ewamei ari de edo kondade mina mina ari de awawa ruvegeove ainda be awa awodo ewa awa rorou ewamei be God da yei ititewa.   
\p
\v 17 Edo ingoda gitijijigegari mi ingoda asisi de jo de awawa simba era. Edo ungo awa edo gogo era ainda be awa ungo God da diti da derido ungo ro ewora awa sadera awasedo. Awasedo ungoda ge kera ise ungo sapo ewo. Edo ingo ungoda ge kera adewa awa ungo iaviri de da ungoda buro adera awarate ingo ungoda ge kera ae adewa awa ungo dubo vevera de da ungoda buro adera. Edo ungo dubo vevera de da buro ise awa ingo kondade adi ae adera.   
\p
\v 18 Edo iji berari God da yei nango kondade arase sedo gido ewo. Edo nango gosera nangoda jo da kotari mi nango bekuba aera ainda be awa nango iji berari ro ewamei awawa adi dipapa edo era awasedo.  
\v 19 Edo na ingoda yei sedo gosena God sedo giwo na burigi be ingoda yei itari engenembane.   
\s1 ATAE ARI GE AWA  
\p
\v 20 Iesu betetiri God mi jigiri eririsira. Edo God mi umo jigiri erido ingodenaso Bada Iesu Keriso ingodena simba ira teta wo sheep simba ari embo mi uso wo sheep simba edo ira da awodo ira. Edo Iesu awawa wo sheep simba ari embo nembodiba isira.  
\v 21 Edo ingo mi God umo ro awase dipapa ira awawa awase sedo God uso adi sari ge matawa atari da ororo mi kondade berari ingo ro dipapa ewa awa itare. Edo God mi ari Keriso da goroba ingoda jo da matawa atirari edo unemi ingo kondade irirari ingo ro awo umo iaviri adira awawa ave. Edo iji matawa embo mi umo jasiga ore. Awara.   
\p
\v 22 Naso nanonamendi ove nanemi ingoda yei gaietena eiawa ove ribori aera awasedo na ingoda yei sedo gosena saboa edo jo ambuia de da naso ge eiawa ingiwo. Gaegae edo ingo jo ambowase sedo na ingoda yei ove jivetena.   
\p
\v 23 Edo na ingo ingodenaso namendi Timothy gajari oro da ititisera awawa wujeguritara awawa gawase dipapa ena. Edo umo burigi naso yei bugadira awawa na ingo gadi buguse budo bugadena.   
\p
\v 24 Edo ingoda gitijijigegari berari de God da embo berari de awa sewo gore ategurera. Edo nanonamendi Italy busu da atima era amimi ungoda ategari ingoda yei ititera.   
\p
\v 25 Edo God da ewamei ari ingo berari da yei matawa atare.