\id GAL - Ewage-Notu NT [nou] -Papua New Guinea 1987 (web 2014) 
\h GALATIANS 
\toc1 Ove Galatia Busu Embobo Mi Burisera 
\toc2 Galatia 
\toc3 Gal 
\mt1 Ove Galatia Busu Embobo Mi Burisera  
\c 1  
\p
\v 1 Na Paul mi ove eiawa gaena. Iesu Keriso de God Mamo Iesu etiri eririsira amimi Iesu da binga atopatari embo anase ititisira. Embo nei mi na buro eiawa anase itae bugae ra.  
\v 2 Na nanonamendi einda atera ainde da Iesu gebe ari embobo Galatia busu da dada edo era awa ategurera.   
\p
\v 3 God ingodenaso Mama de Bada Iesu Keriso de mi ingoda yei edo gogo edo kando ise edo oro ingo jo jamo jamo are.   
\p
\v 4 Edo wasiri bebegae busu berari da embobo mi era amimi ingodena awa embo mi esi mi ingodena bundarago ira. Awarate ingodena wujegadi sedo Keriso ingodena embo bebetisira. Edo Keriso awodo bebetisira awa umo ingodenaso Mamo God mi arase dipapa isira awa isira.  
\v 5 Awasedo iji berari ingode God jasiga ore. Awara awodo are.   
\s1 UNGO MI BINGA NEI INGISERA  
\p
\v 6 Na ingo ro ewa awa ingido na kove be ena. God Keriso da ari ewamei da derido ingo jawo sisira. Edo jawo setiri ingo uso yei bugudo edo iji tupo atae etiri ingo binga nei ingido umo dotewa. Edo na ingoda jawo da ge awa ingido na kove be ena.  
\v 7 Edo binga nei ingewa emomo binga ewamei ta biae ri? Gebe amone binga ewamei aera. Na ingoda yei sena embo nenei mi Keriso da kiki awa seoro ge ewagaewa awa budo edo gebusari ge amimi itoro edo kiki edo ira. Edo embomei amimi Keriso da kiki awodo sera amimi ero ingo mana mana ewa.  
\v 8-9 Edo nango matu ingoda yei binga ewamei awa minonu sisera awarate embo averi nango ta utu da asisi ta amimi ingoda yei binga nei awa sae etera awa God mi embo awa riawo matawa atari da itari mambare.   
\p
\v 10 Edo na ingoda yei ge eiedo sena awa ingo kotewa na embo nenei mi naso ge awa ge ewamei sorase dipapa eni ta? Awodo aera. God na ro ena awa gosira edo na umo iaviri arase dipapa ena. Edo na buro eiawa ena amomo ano embo mi iaviri orase eni ta? Awodo aera. Edo na buro eiawa ise embo mi iaviri orase dipapa adena amone namone Keriso da buro embo aera.   
\s1 PAUL IESU DA BINGA ATOPATARI EMBO ISIRA AINDA EMBORO  
\p
\v 11 Naso nanonamendi eiawa sano giwo embo awa na binga ewamei sena einda susu aera.  
\v 12 Embo mi naso yei binga ewamei awa itae ra edo embo mi binga ewamei awa naso yei atopatae ra. Awarate Iesu Keriso umo umosuka binga ewamei awa naso yei isaga etiri na burisena.   
\p
\v 13 Edo ingo na matu rawodo atima isena ainda binga awa ingisewa. Na Jew embobo da wasiri awa ambo ambo ise God tumondebain edo isena te na Iesu gebe ari embobo da diti awa jo ae dedo gaedo ise diti dada awa usibesi adi jarima isena.  
\v 14 Na Jew embobo da God tumondebain ari wasiri awa ambo ambo edo isena awa na embo nenei derigedo isena gaeko naso da awodo awa. Edo na naso mamoumbogo da atopatari awa ambo ambo edo isena awa embo nenei derigedo isena.   
\p
\v 15 Awarate God naso yei wasiri ewamei edo na kataburisira. Edo na naso aia da vetu to da ateno God na umo sapo anase sia isira.  
\v 16 Edo nanemi Keriso da jawo da binga ewamei awa embo Jew egae ainda yei minonu sanase sedo God mi Keriso mo averi awa naso yei isaga isira. Edo God mi Keriso awa naso yei isaga isira edo na embo nenei mi na umo awa atopatoro gadi sedo sedo gaera.  
\v 17 Edo na Jerusalem nati da Iesu da binga atopapotegari embobo nenei awa gadi mambae ra te na dambuderari Arabia busu da mambusena. Edo na ainda mambudo ainda atima isena edo amboda na Damascus nati da engenemburisena.  
\v 18 Edo na ainda ateno gaeko tamonde atae isira edo Peter da yei sedo gari itido gadi sedo na Jerusalem nati da mambusena. Edo ainda mambudo na Peter ga da pura etoto atisena.  
\v 19 Edo atise na Iesu da binga atopatari embo James Iesu da namendi awa gosisena te na Iesu da binga atopapotegari embobo nenei awa gaera.   
\p
\v 20 Ge nanemi boroko gaena awa gebe ra. Edo na ge eiawa God da diti da gaise sena awa na ge busae ra.  
\v 21 Edo amboda na nati da Syria de Cilicia busu de da ainda mambusena.  
\v 22 Edo iji ainde Iesu gebe ari embobo Judea busu da awa na averi awa gaera te ungo embo mi naso jawo da ge sedo isera awa gido isera.  
\v 23 Edo embo mi naso jawo da ge eiedo sedo isera, “Embo matu ingodena dedo gaedo edo isira edo embo mi Keriso gebe eorase gajadi jarima isira awa umo boroko embo da yei Keriso rawodo edo gebe aderi awa sise tembira.”  
\v 24 Awasedo naso yei ro isira awa embo ungo mi God jasiga isera.   
\c 2  
\s1 IESU DA BINGA ATOPAPOTEGARI EMBOBO NENEI MI PAUL INGO JOGA DA ISERA  
\p
\v 1 Gaeko 14 atae etiri na Barnabas ga da Jerusalem nati da engenemburisena. Edo nango Titus budo nangode daedo mambusera.  
\v 2 Edo na mambusena ainda be awa God umo na mambanase dipapa ira awa naso yei isaga etiri gosisena awasedo. Edo na vitido Iesu gebe ari embobo da gitijijigegari de da dada isena. Edo embo nenei awa ainda nangode da dadaaera. Edo dada edo na ungoda yei binga ewamei na embo Jew egae ainda yei minonu sena awa ujugurisena. Edo na ujugurisena ainda be awa na ungo naso Jew egae embo da yei binga ewamei minonu sari da buro awa gajorase sedo ujugurisena.  
\v 3-4 Edo naso otao Titus Greek embo awa ungo mi tamo da andiso diugari wasiri awa barase sae ra awarate embo nenei mi ungo awa Iesu gebe ari embobo inge edo gebe ari embobo de da dada edo Titus da tamo da andiso awa diugadi dipapa isera. Edo embobo eiawa nangode dada isera ainda be awa ungo nango Jew embobo da wasiri awa ambo ambo eri ta aeri awa gadi sedo dipapa isera. Edo ungo awa gadi sedo nangoda teda teta bengono da gari embobo awodo isera. Edo nango awa Iesu Keriso ga da dada isera edo umo nango Jew embomei da wasiri wujegurisira te ungo nango sekago bundoro edo agipo embobo awodo orase dipapa isera.  
\v 5 Awarate nango binga ewamei ingo awasedo simba adi edo ungoda ge awa ingae isera.   
\p
\v 6 Edo embo Iesu gebe ari embobo mi ungoda gitijijigegari sedo era awa ungo kotari seka awa naso yei sae isera. Edo gitijijigegari nembogamo amimi ae na oju aera ainda be awa God da dombu da awa ingodena awa berari da awodo ra.  
\v 7 Awarate ungo gosisera God mi Peter da buro binga ewamei awa Jew embobo da yei minonu sarase ititisira da awodo God mi naso buro binga ewamei awa embo Jew ae ainda yei minonu sanase ititisira awa gosisera.  
\v 8 Edo God mi Peter da yei binga ewamei Jew embobo da yei minonu sarase goroba ititisira da awodo God mi naso buro binga ewamei awa embo Jew egae ainda yei minonu sanase ititisira edo buro awa anase goroba ari ititisira.  
\v 9 Edo James de Peter de John de awa Iesu gebe ari embobo mi ungoda gitijijigegari sedo era amimi God mi embo Jew ae binga ewamei minonu sari da buro nembodiba naso yei ititisira awa gido sisera ingodenaso buro re da awa ra sedo na Barnabas ga de da ingo burisera. Edo nango berari ge emboro da awodo kotedo sisera nango awa embo Jew egeregae ainda teda buro iriroro edo ungo awa Jew embobo da teda buro orase sisera.  
\v 10 Edo ungo mi sisera, nango Iesu gebe ari embobo da teda embo rora egeregae Jerusalem nati da awa ruvegeorase kondade ise atorase sisera. Edo namone awa embo buro okain ewona.   
\s1 PAUL ANTIOCH NATI DA PETER DA YEI AWODO EOSE SISIRA  
\p
\v 11 Peter Antioch nati esega adi bugiri nanemi Iesu gebe ari embobo berari da diti da sisena wasiri isira awa biae awa isira awa sisena.  
\v 12 James mi embo nenei Antioch nati da mamborase sisira awarate embobo eiawa mambae atero Peter iji berari embo Jew ae edo Iesus gebe ari embobo de indari indido kumbudo edo isira awarate embobo eiawa Antioch nati da bugusera awa Peter embo Jew ae edo Iesu gebe ari embobo de indido kumbudo ari awa atae isira. Edo Peter umo embo mi sisera embo Jew ae edo Iesu gebe edo era awa Jew embobo da wasiri tamo da andiso diugari wasiri awa badera sisera awasedo uso jiro wareregetiri umo embo Jew ae edo Iesu gebe ari embobo de daedo ingido kumbudo ari awa atae isira.  
\v 13 Edo Iesu gebe ari embobo nenei Jew embobo awa oju isera Peter mi isira da awodo edo ungoda jiro wareregurisera. Edo Barnabas ungo oju da wasiri awa ero gido umo daedo uso jiro wareregurisira.   
\p
\v 14 Awasedo ungo binga ewamei da emboro gebe ainda pepeta ae era awa gido na ungo berari da diti da Peter da yei sisena, “Embo imo ne Jew embo ra awarate imo embo Jew ae ainda wasiri awa ewosa. Imo embo Jew ae ainde da indido kumbudo ise edo Jew embobo da wasiri awa ambo ambo ae ewosa. Edo roedo imo iso jiro wareregetiri embo Jew ae awa Jew embobo da tamo da andiso awa diugari wasiri awa ambo ambo orase sewosi?   
\s1 EMBO AVE IESU GEBE ADERA EMBO AWA GOD MI SOREGADIRA.  
\p
\v 15 “Ingodena awa Jew embobo mi wasiri bebegae ari Jew ae embobo sedo era awa aera. Ingodenaso umbogo re Jew embobo ra.  
\v 16 Awarate ingodena gosera Jew embobo da agodari ge awa kera adera amimi mana ari ingodena God ga da umo jigari ewamei adera. Edo ingodena gosera embo ave Keriso Iesu tumonda adira embo awa God ga da umo jigari ewamei adira awa gosera. Edo ingodena daedo ingode God ga da umo jigari ewamei adi sedo Keriso tumonda isera. Ingodenaso Jew embobo da agodari ge kera ari mi ae ingodena God de da umo jigari ewamei aera. Edo Jew embobo da agodari ge kera ari buro amimi ae embo da ave God ga da umo jigari ewamei da aera.   
\p
\v 17 “Edo nango sera tumonda ari awa God ga da umo jigari ewamei ari da susu ra. Edo nango Jew embobo nango soregari tambari dipapa edo awa nango Moses da agodari ge awawa mana ambo ambo adera edo Keriso mi sita nango embo Jew ae awodo edo wasiri bebegae ari embobo sita? Awodo aera umo awodo saera.  
\v 18 Awarate ingodena agodari kera ari awa soregari da susu awodo adera awa teta mando matu awa arasegedo edo sekago tutuvi derido edo itadi jararago adera. Edo awodo adera amimi ingodena awa wasiri bebegae embobo awodo adera.  
\v 19 Edo na agodari awa kera adi jarise na agodari mi ro anase sira awa adi jarisena awa tambusena. Edo na awa gido na awa wasiri biae embo awa gosisena. Awarate na agodari ge awa ambo ambo ari dodo God awasedo atadi ena.  
\v 20 Naso wasiri bebegae teta Keriso ga uso orega da betarago isira awasedo na boroko wasiri de atena. Na naso goroba mi atae rate Keriso naso jo da atiri na daedo atena. Edo na busu da atena ainda susu awa naso tumonda ari God da mei da yei awa sedo. Umo na dubo burisira awasedo umo na awasedo bebetisira.  
\v 21 Na God da kando ari awa ujo ae aera. Edo embo ave umo agodari kera ira amimi ari umo God ga da umo jigari ewamei ae etira awa Keriso awa tepo awodo betae etira.”   
\c 3  
\s1 UNGO RE AGODARI KERA ARI EMBORO DA PEPETA ERA  
\p
\v 1 Ingo Galatia busu embobo awa jiro bebegae embobo ra. Edo embo mi ingo simbora edo ingo gandubedo era. Edo nango mi isaga be Keriso da orega da betari awa ingoda yei atopapotisera.  
\v 2 Naso sedo gari da einda mina awa sewo gane ingo agodari mi ro awase sira awa edo ewa amimi euri ingo God da Asisi budo evi ta ko ingo binga ewamei ingido gebe isewa amimi etiri ingo God da Asisi burisevi?  
\v 3 Ingo ro awasedo jiro bebegae embo awodo isevi? Tuturo da ingo mi Asisi Kotopu da goroba mi Iesu Keriso gebe edo isewa. Awarate boroko ingo sekago agodari da ge kera edo ewa.  
\v 4 Edo rora berari ingoda yei isira ainda be bugusita mo ko bugaeri Ro ingoda yei isira amone rora nembodiba ra.  
\v 5 Ingo ro agodari mi awase sira awa isewa amimi etiri God ari wasiri goroba de ingoda teda isita mo ingo binga ewamei gebe isewa awasedo God mi ari wasiri goroba de ingoda teda isiri?   
\s1 KERISO TUMONDA ARI EMBORO DA PEPETA EWO  
\p
\v 6 Jiwari mi Abraham da jawo da sisira,  
\q1 “Abraham God gebe isira awasedo God mi sisira uso tumonda ari awasedo umo nangae da umo jigari ewamei adira.”   
\m
\v 7 Awasedo eiawa giwo embo ave God gebe adira embo awa Abraham da orobe be moka ra.  
\v 8 Edo jiwari mi sekago sira amboda embo Jew ae awa God gebe adira awa God mi ari embo awa God ga da umo jigari ewamei da adira sira. Awasedo awodo ae atiri giti da Abraham binga ewamei eiawa burisira, “Edo iso yei awodo God mi Abraham awodo busu berari da embobo awa ewamei adira.”  
\v 9 Edo Abraham God gebe isira edo God mi umo ewamei isira da awodo embo ave God gebe adira embo awa God mi embo awa ewamei adira.   
\p
\v 10 Edo embo amemi ungo agodari ge mi ro sira awa era awasedo God mi ungo soregadira kotera te embobo amone riroga awa badera. Edo jiwari mi sira,  
\q1 “Embo ave iji berari Moses mi ro berari agodari da jiusira awa kera ae adira embo awa God da riroga awa badira.”   
\p
\v 11 Edo ingodena isaga be gosera awa embo agodari ge kera adira amimi mana ari umo God ga da umo jigari ewamei adira ainda be awa jiwari mi sira,  
\q1 “Embo ave uso tumonda mi sira awasedo umo God ga da umo jigari ewamei ira embo awa ewamei atadira.”   
\p
\v 12 Awarate agodari ge awa God tumonda ari ge awa sae ra. Awarate agodari mi rora ro ari da ge awa sedo sisira,  
\q1 “Embo amemi ro berari agodari mi sira awa adera embo awa atari ewamei adira.”   
\p
\v 13 Awarate Keriso mi ainda mina awa itido ingodena soregurisira. Edo ingodena soregurisira amimi ingodena agodari ge da riroga awa mana badera. Edo Keriso ingodena awasedo riroga awa burisira awasedo ingodena riroga awa mana badera. Edo Keriso ingodena awasedo riroga awa burisira awasedo ingodena riroga awa mana badera. Edo ingodena eiawa gari ra ainda be awa jiwari mi sira,  
\q1 “Embo ave ri da esegedo doro betarase adera embo awa God da simbora ari badira.”   
\p
\v 14 Edo Jew ae embobo mi ewamei ari God mi Abraham da yei Jew ae embobo da yei itadira sisira amone borase Keriso bebetisira awara. Edo God Iesu Keriso da yei awodo ewamei ari eiawa itido ira awasedo ingodena Keriso tumonda ise Asisi Kotopu God mi itadi sari gari sisira awa badera.   
\s1 GOD UMO RO ADI SISIRA AINDE AGODARI DA GE DE  
\p
\v 15 Nanonamendi ge awa ujugano gawase re embo mi ro edo era awa sano gadewa. Embo da umo betadi ise re unemi sadira uso rora berari awa uso kinapeina da topo sedo ira. Edo umo awodo sadira awa embo nei mi ge nei ro sadi aera.  
\v 16 Da awodo awa God mi Abraham de uso orobe de da yei ro adira sisira. Edo jiwari mi God mi uso orobe da yei sisira awa embo jiwae de da sise saera te jiwari mi sisira God mi uso orobe da yei sisira awa embo da be de da sisira. Edo jiwari mi orobe sisira amone Keriso de sisira.  
\v 17 Edo naso ge ainda be re eire. Edo God mi Abraham da yei sisira awodo awa adira. Edo amboda gaeko 430 atae etiri God mi agodari ge awa ititisira edo ge amimi God da sari gari ge awa tupadi aera.  
\v 18 Awarate God mi kando embo umo agodari ge awa kera edo ira awasedo itari bugadira awa kando God uso sari gari ge sisira awasedo awa bugaera. Awarate God uso sari gari ge awasedo Abraham da yei ewamei ari awa ititisira.   
\p
\v 19 Awara roedo God agodari ge awa ititisiri? Amone embo mi wasiri biae awa rori awa be isaga gorase sedo God agodari ge awa ititisira. Awarate umo agodari ge awa mata awodo atarase kotae ra. Edo God umo Abraham da orobe da awa Keriso bugarase sia isira edo iji ainde awa God agodari ge awa atae arase sia isira ainda be awa Abraham da uso orobe da yei God uso sarigari ge awa sisira awasedo. Asisi ewamei mi God da agodari ge awa siri Moses mi busu embobo de edo God de ungoda soropu da derido ge awa burisira.  
\v 20 Awarate God uso sari gari ge ititisira awa embo da umo edo busu embobo da soropu da awodo itae ra. God umo umosuka embo da soropu da derae edo uso sari gari ge awa embo da yei sisira.   
\s1 GOD AGODARI GE ITITISIRA AINDA BE RE EIRE  
\p
\v 21 Agodari ge mo God da sarigari ge da gitopo ta? Awodo aera. Awarate agodari mi ae embo God ga da umo jigari ewamei aera ainda be awa God umo agodari ge mi ari embo wasiri awa borase sia aera.  
\v 22 Edo jiwari mi ingodenaso yei sira awa busu berari da embobo awa wasiri bebegae adi sedo dipapa jiwae era amimi ungo gitijijigurira awarate embo ave Iesu Keriso gebe adira awa kando God mi itadi sedo sari gari sisira awa badira. Edo embo kando awa burira ainda susu awa embo ainda tumonda ari Iesu Keriso da yei atira awasedo.   
\p
\v 23 Edo matu Keriso gebe ari iji awa bugae atiri agodari Moses mi ititisira awa teta gajari embobo simba ari embo mi ingodena gajari oro da itido mangiro be digido ira da awodo ra. Edo amboda God mi Keriso gebe ari da emboro awa isaga edo God mi ingodena wujegurisira.  
\v 24 Edo agodari awa teta atopatari mi ingodena simba ise ari ewamei orase edo ira da awodo rate amboda Keriso bugusira iji ainde ingodena Keriso gebe edo era ainde God ga da umo jigari ewamei edo era.  
\v 25 Awasedo Keriso gebe ari iji awa bugiri edo agodari kera adi jarari iji awa atae isira. Edo agodari mi ingodena gitijigari iji awa atae isira.   
\p
\v 26 Edo ingo berari ingoda tumonda ari Keriso da yei amimi ingo God da kinapeina isewa. Edo ingo God da kinapeina edo Keriso ga da dada isewa.  
\v 27 Edo ingo umo mi ewamei ari wasiri awa budo edo Keriso ga da dada isewa. Edo Keriso ga da dada edo ingoda ari barari berari awa unemi edo ira da awodo ewa.  
\v 28 Edo embo berari Keriso ga da dada isera emboro amone emboro da awara. Jew embo de embo Jew egae ainda da emboro re da awara. Edo agipo embo de embobo agipo embobo ae ainde da emboro re da awara. Embo de evetu de emboro re da awara.  
\v 29 Edo ingo awa Keriso da topo awasedo ingo awa Abraham da orobe be ra. Edo ingo awa Abraham da orobe awasedo ingo God mi ro sari gari Abraham uso orobe da yei sisira awa badewa.   
\c 4  
\p
\v 1 Na ro boroko setena awawa sekago sane. Mei amboda uso mamo da gorotu nembogamo badi ira mei awa umo kiambu aturi awa embo mi umo awa teta agipo embo da yei edo era da awodo awa edo era. Edo umone gorotu berari da topo adira te boroko da awa umo awodo edo era.  
\v 2 Edo mei awa mei kiambu atadira awa umo embo umo simba era embobo amimi ro arase sera awa adira amboda mei awa bajido uso gorotu nembogamo berari uso mamo mi doturisira awa badira.  
\v 3 Da awodo awa ingodenaso yei edo ira. Ingodena Keriso da be awa gadi jarise atima isera awa ingodena awa teta kinapeina bajae jarise atima era da awodo ra. Edo asisi bebegae busu berari da embobo gitijigido era asisi da amimi etero ingodena ungoda agipo embobo isera.  
\v 4 Awarate iji God mi ewamei sisira awa bugiri God uso mei itiri busu da bugusira. Edo God uso mei awa itiri bugudo mei awa embo isira.  
\v 5 Edo umo embo Jew embobo da agodari kera edo era ainda mina itido embo soregadi edo ingodena God da kinapeina orase sedo umo Jew embobo da agodari awa kera isira.   
\p
\v 6 Ingodena awa God da kinapeina na awasedo God uso mei awa itiri bugusira edo asisi uso mei da asisi amimi ingodenaso jo da atima ira. Edo asisi emimi iji berari sedo ira ‘Mama naso Mama.’  
\v 7 Awasedo ingodenaso agipo ari awa atae etiri ingodena God da kinapeina isera. Edo uso kinapeina isera awasedo God mi ingodenaso yei memei mi ro budo era awa berari itari badera.   
\s1 PAUL GALATIA BUSU DA IESU GEBE ARI EMBOBO AWA JO ISIRA  
\p
\v 8 Matu awa ingo God gae awasedo ingo awa asisi bebegae ainda agipo embobo isewa.  
\v 9 Awarate God tambudo ingo umo gosewa awarate sae etena God mi ingo tambudo umo ingo gosira. Edo ingo God gosewa edo umo ingo gosira mo ro edo ingo engenembedo asisi goroba ae edo ingo kondade ari sago ae ainda yei mambadi dipapa evi? Ingo sekago ungoda agipo embobo adi sedo ungoda yei engenemburevi ta?  
\v 10 Ingo kotedo ewa bondo adewa awa nembodiba edo iji jaige da ro nembogamo bugutira awa nembodiba awodo kotedo ingo iji ainde tumondebain edo ewa.  
\v 11 Na ingo jo be ira. Naso buro ingoda teda isena mo tepo ta?   
\p
\v 12 Naso nanonamendi na ingoda yei sedo gosena na agodari awa kera ari awa atae isena da awodo ingo agodari kera ari awa atae ewo. Matu awa ingo naso yei biae aera.  
\v 13 Ingo gosewa matu na karu isena iji ainde na ingoda yei binga ewamei tuturo da minonu sisena.  
\v 14 Edo naso karu mi etiri ingo buro jiwae na simba ise naso yei isewa. Edo ingo na ujo ae aera te ingo na teta God da asisi ewamei bae etewa da awodo awa burisewa. Edo ingo na burisewa awa teta Iesu Keriso bae etewa awodo awa burisewa.  
\v 15 Edo iji ainde awa ingo iaviri isewa te boroko mo ro etevi? Ingoda yei ari inono ne ingo ingoda diti awa gurugedo budo naso yei itae etewa.  
\v 16 Edo na ingoda yei gebe sena amimi etiri ingo naso yei ingoda gitopo da ae etewa awodo awa ewa.   
\p
\v 17 Embo nenei awa sera ungo ingo kondade ari dipapa era te ungoda dipapa de kotari de awa ewagaewa aera. Edo ungo ingo mi ungoda atopatari awa ambo ambo awase sedo ungo ingo de namonde ewoga ewoga orase dipapa era.  
\v 18 Edo embo gebe awa atopatadera gido awa ungo mi embo nenei mi ungoda atopatari awa ambo ambo orase dipapa adera edo ge awa gebe na ingode atisena iji ainde da aera te ge awa gebe iji nenei berari da atadira.  
\v 19 Naso kinapeina evetu mi mei badi jarise memesi budo ira da awodo na Keriso ingoda jo da atarase dipapa ise edo memesi burena.  
\v 20 Edo na ge eiawa ingoda joda sadi sedo na ingoda yei bugadi dipapa ena awarate na bugudo ingo gido naso kotari wareregedo ge nei sadenita rora.   
\s1 PAUL HAGAR DE SARAH DE DA JAWO DA GE SISIRA  
\p
\v 21 Embo ingoda teda amemi Moses da agodari ge awa kera adi dipapa era ainda na sedo gari eiawa itadena ingo agodari ge mi ro sira ainda be mo gosevita?  
\v 22 Agodari ge mi sira awa Abraham awa memei etoto da mamo na. Agipo evetu mi mei da betiri edo Abraham uso aro moka agipo evetu ae awa mei nei da burisira.  
\v 23 Edo emboevetu mi gasou jirido memei budo era da awodo awa agipo evetu awa gasou jirido Abraham da mei da burisira. Awarate aro agipo evetu ae awa umo God da sari gari ge awasedo gasou jirido Abraham da mei nei burisira.   
\p
\v 24 Edo kiki eiawa kiki gebe rate teta inia ge inge awodo ra. Edo kiki ainda be re eire. Emboevetu etoto awa God da sari gari ge etoto sisira awodo ra. Edo evetu Hagar da uso kinapeina awa agipo embobo isera, edo umo awa ge God mi doriri Sinai da sisira awa ra.  
\v 25 Hagar awa agodari ge ro Moses mi Sinai doriri ainda burisira awa sedo pepetira edo umo daedo Jerusalem nati de Jew embobo berari de awa sedo pepetira. Jerusalem nati kinapeina awa agipo embobo ra teta Hagar da kinapeina agipo isera awodo ra.  
\v 26 Awarate Jerusalem nati utu inda awa uso embobo awa agipo embobo aera. Edo Jerusalem nati emone teta Iesu gebe ari embobo da aia inge ra.  
\v 27 Edo inia ge eiawa jiwari mi sira,  
\q1 “Ero evetu kinapeina bae awa iaviri are. Edo evetu kinapeina burise memesi budo era awa gae awa iaviri nembodiba are.  
\q1 Edo evetu uso iu mi doturisira ainda kinapeina da ajigari mi evetu iu de da kinapeina da ajigari awa derigadira.”   
\p
\v 28 Isaac God da sari gari ge awasedo Sarah da mei isira da awodo naso nanonamendi ingo God da sari gari ge awasedo God da kinapeina isewa.  
\v 29 Edo Abraham da mei Hagar mi kumbusira amimi mei Sarah mi kumbarase God da Asisi mi sisira awa dedo gaedo isira. Edo boroko da awodo dari gaiari Iesu gebe ari embobo da yei bugudo ira.  
\v 30 Ingode jiwari da ro ajigedo eri? Ingode ajigedo era,  
\q1 “Agipo evetu de uso mei de awa ondeio mambore ainda be awa agipo evetu da mei mi mana mamo da gorotu nembogamo awa badira. Edo mei evetu agipo evetu ae uso mei mi mamo da uso gorotu nembogamo awa badira.”   
\p
\v 31 Naso nanonamendi ingodena Iesu gebe ari embobo awa agipo evetu da kinapeina aera te ingodena awa evetu agipo evetu ae ainda kinapeina na.   
\c 5  
\s1 SEKAGO AGIPO EMBOBO EOVE  
\p
\v 1 Ingodena agipo embobo ewora awa atae orase sedo Keriso mi ingodena wujegedo soregurisira. Edo ingo awa boroko embo God mi soregurisira embobo awa ra awasedo ingo sekago agipo embobo eosase sedo goroba edo derido atiwo.   
\p
\v 2 Edo nanemi ingoda yei sena ingido gogo ewo. Embo amemi bugudo ingoda tamo da andiso diwadi soro gido re awara seove. Edo ingo awara sadewa awa ro Keriso mi ingo embo isira amimi ingo kondade adi aera.  
\v 3 Nanemi ingoda yei sena awasedo ingido gogo ewo. Embo ave tamo da andiso diugari wasiri awa bae etira embo awa Jew embobo da agodari berari awa kera ae etira.  
\v 4 Edo embo ingoda teda amimi God ga da umo jigari ewamei adi sedo Jew embobo da agodari awa kera adi jarira embo awa umo Keriso dodo seugetira. Edo daedo umo umosuka God mi uso soregari kando uso yei itari sago ae yei ainda itira.  
\v 5 Ingodena gosera ingodenaso tumonda ari Keriso da yei awasedo God mi ari ingodena ungae da umo jigari ewamei da adera. Edo ingodena ewamei God mi Asisi Kotopu da yei da awodo itari amboda bugadira awawa simba edo era.  
\v 6 Edo ingodena Keriso ga da dada isera awa tamo da andiso diugari wasiri awa bari awa nembodiba aera edo tamo da andiso diugari wasiri awa bari ae awa nembodiba aera. Awarate embo mi ingodena embo nenei dubo budo era awa gido ingodena Keriso tumonda era awa gadera amone rora nembodiba ra.   
\p
\v 7 Edo ingo awa Keriso tumonda ari emboro da ewamei sumbusewa. Awarate embo amemi ingo emboro ainda sumbowase sedo duredo edo emboro beitigetiri? Edo embo amemi ingoda yei ge sedo etiri ingo ge be moka awa doturitavi?  
\v 8 God iji berari ingo uso yei jumbudo ira ge be moka da emboro awa gajae edo ira.  
\v 9 Edo embo mi wasiri biae awa ge sedo era amone eire, “Ambe bajari siwo jawo yeast kiambu mi ari ambe nembodiba edo bajadira.”  
\v 10 Na gosena ingo rora ewamei awa adi dipapa ewa awa gosena. Edo ingodena awa God ga da pepeta era awasedo na gosena ingo naso ge awa mana ujo ae adewa. Na gosena embo amemi etiri ingo mana mana ewa embo awa God mi uso riroga itadira.   
\p
\v 11 Naso nanonamendi na ingo tamo da andiso diugari wasiri awa bawase dipapa edo bawase atopatae etena awa Jew embobo mi naso yei memesi awa mana itae etera. Edo na ingo tamo kotopu diugari wasiri awa bawase atopatae awarate na tumonda ari da emboro awa atopapotena awasedo ungo mi naso yei memesi ititera. Edo na ingo awodo atopatae etena awa naso yei kotari bebegae nanemi Keriso da betari orega da awa atopapotena ainda kotari bebegae awa atae ae etira.  
\v 12 Edo embo ingo mana mana awase era awa na dipapa ena awa ungo ingo seugae etera.   
\p
\v 13 Edo naso nanonamendi ingo agipo ewowa awa doawase sedo God mi ingo jawo sisira. Awarate agipo ari awa atae edo ingo ro dipapa ewa awa adewa awa kotove. Edo ingo God ingo dubo burira awasedo sapo mina ara ewo.  
\v 14 Ko agodari ge da mi agodari ge nei da be awa ujugurira. Edo ge da re eire, “Imo imosuka dubo buresa da awodo embo nenei dubo buio.”  
\v 15 Awarate ingo wo mi edo era da awodo mina gamba ise edo mina dara adewa awa gido gogo ewo ko ingo ingosuka usibesi mina ara adewa.   
\s1 ATARI BIAE DA BE DE EDO ASISI KOTOPU DA BE DE  
\p
\v 16 Na ingoda yei sena Asisi Kotopu mi ingoda yei ro sira da awodo atiwo. Edo awodo atadewa awa ingoda joda dipapa bebegae mi ro awase sira awa mana adewa.  
\v 17 Edo ingoda joda kotari bebegae de edo Asisi Kotopu de mi ro awase sira rora etoto eiawa buro da awawa aera. Edo rora etoto eiawa gitopo edo era awasedo Asisi Kotopu mi ingo gitijigadira awa ingo mana ingoda joda kotari bebegae mi ro awase dipapa ira awa adewa.  
\v 18 Edo Asisi Kotopu mi ingo gitijigadira awa ingo awa agodari ge da agipo embobo adi aera.   
\p
\v 19-20 Edo ingo ingoda joda kotari bebegae mi ro awase sira awa isaga be gosewa. Edo kotari bebegae re eire, dita ari, viro ari, wasiri bebegae, ove kekevegari tumondebain ari, inja ari, edo gitopo mina ara ari, embogo ari, ge bagari, embo nenei ji sari, tini gambari ari, edo embo nenei kondade ae ari, embo nenei da rora dipapa ari edo ewoga ewoga ari edo umo okain indido jiro bebegae ari, umo okain indido wasiri bebegae ari.  
\v 21 Edo na matu ingoda yei wasiri bebegae eiawa ari da ge awa sisena te na boroko sekago sena awasedo ingiwo embo ave wasiri bebegae eiawa era awa mana God da gitijigari iji da ewamei awa badira.   
\p
\v 22 Awarate be Asisi Kotopu mi ira amone gari nei na. Edo Asisi Kotopu mi be ira amone dubo bari, iaviri ari, jo jamo jamo ari, sapoa ari, embo nei kondade ari, edo ewamei ari, gebe sari, tini gambari ari ae, edo jo da dipapa bebegae awa ae ari.  
\v 23 Edo ro Jew embobo da agodari ge mi sira awodo awa rora eiawa adewa awa awara sira.  
\v 24 Edo embo ave Iesu Keriso da topo awa ungo awa teta ungoda kotari jo da bebegae awa orega da dari inge isera.  
\v 25 Edo Asisi Kotopu mi wasiri seka ingodenaso yei ititirari ingode Asisi Kotopu kera ise uso emboro da pepeta ore.  
\v 26 Edo ingode mana jariga embobo awodo mana adera edo ingode ingodena awa embo nembogamo sise embo nenei awa embo memeinya mana sadera edo ingode mana ji mina sara adera.   
\c 6  
\s1 INGODE EMBO NENEI DA BOUGA ANGO MINA ARA ORE  
\p
\v 1 Naso nanonamendi embo da amemi wase ae edo wasiri biae adira awa embo ingoda teda amemi God da emboro gadira embo amimi embo wasiri biae etira awa kondade are. Awarate jo ewamei ari mi umo kondade ewo. Edo gae gae edo ingo wasiri bebegae awa eove ta gido gogo ewo.  
\v 2 Ingoda bouga awa ango mina ara ewo edo kondade mina ara ewo. Edo awodo adewa amimi Keriso mi ro awase sisira awa adewa.  
\v 3 Edo embo ave umo embo nembo aerate umo embo nembo awodo kotadira embo awa umo umosuka ganduburira.  
\v 4 Ingo dada ingo ro isewa awa kotewo. Edo ingo ro isewa awa ewamei awa ingoiaviri adewa. Edo eiedo kotove embo ounda wasiri mi naso wasiri derigetira edo naso wasiri mi embo ounda wasiri derigetira awodo kotove.  
\v 5 Edo embo berari ungo dada ungo ro isera awa ungo ungosuka bajari ra.   
\p
\v 6 Edo embo ave Iesu da binga ingira embo awa uso rora ewagaewa awa embo umo atopapotira embo ainga kando edo bare.   
\p
\v 7 Ingo ingosuka gandubeove. Edo ingo mana God gandubadewa. Edo embo amemi ve umo ro gowadira ve da ainda be awa wujegadira.  
\v 8 Da awodo embo amemi uso jo da ro govedo ira ainda be awawa budo ira. Edo embo amemi ve biae uso jo da govedo ira awawa betari natopo atari awawa kumbadira awarate embo amemi Asisi Kotopu da ve awawa uso jo da gowadira awawa wasiri natopo atari kumbadira.  
\v 9 Awasedo wasiri ewagaewa ise gido ingode mana begogo adera ainda be awa ingodena iji berari wasiri ewagaewa adera edo amboda awa uso be awa jiwa be badera.  
\v 10 Awasedo ingodenaso iji atira einde ingode embo berari da yei ewamei ore. Edo awodo ise ingode naso otatao Iesu gebe ari embobo da yei ewamei ari awa ruvegeore.   
\s1 PAUL DA GE SANGOVE  
\p
\v 11 Na naso ingo mi ingoda yei ove ena. Edo ove jiwae ena eiawa giwo.   
\p
\v 12 Edo embo rora embo mi diti mi gido era awasedo jariga ge sadi dipapa edo era edo embo re emimi oro ingo tamo kotopu da mendo da andiso diugari wasiri awa bawase jarera. Ungo mi Keriso orega da betisira awawa atopatadira awawa dedo gaedo ari kumbadera awarate ungo atopatari awawa dodo ingo tamo andiso da diugari wasiri awawa kumbawase sadera awawa ungo dedo gaedo ari awawa kumbadi aera.  
\v 13 Awarate embo ungo tamo da andiso diugari wasiri edo era awa ungode daedo agodari awa kera ae edo era. Edo ungo ingo tamo da andiso diugari wasiri awa bawase dipapa era ainda be awa ingo tamo da andiso diugari wasiri awa badewa awa ungo jariga ge sadi sedo sera awasedo.  
\v 14 Awarate na jariga ge Iesu Keriso da orega da betari awa sadena. Edo na rora nenei da jawo da jariga ge mana sadena. Iesu da betari orega da amimi etiri busu da rora mi na jumbari awa atae isira edo naso busu da rora dipapa ari awa atae isira.  
\v 15 Edo embo umo tamo da andiso diugari wasiri burisita ko bae ri amone nembodiba aera. Awarate God mi ari ingodena embo seseka adera awa nembodiba ra.  
\v 16 Edo embo ave awodo kotera embobo ainde God da embobo berari de da yei God ungo jo ise ungoda yei jo jamo jamo ari itare.   
\p
\v 17 Edo boroko naso ge sangove da sadena. Embo da amemi mana awo na memesi sekago badena ainda be awa naso tamo da bubuko atira amimi sira awa na awa Iesu da buro embo awodo ra.   
\p
\v 18 Naso nanonamendi Iesu Keriso da kando gatari ingode da matawa atare.  
\cls Awara.  
\cls Ingoda namendi  
\cls Iesu Keriso da jawo da  
\cls Paul.