\id EPH - Ewage-Notu NT [nou] -Papua New Guinea 1987 (web 2014) \h EPHESIANS \toc1 Ove Ephesus Nati Embobo Mi Burisera \toc2 Ephesus \toc3 Eph \mt1 Ove Ephesus Nati Embobo Mi Burisera \c 1 \p \v 1 Na Paul mi ingo ategurena. God mi na jawo setiri na Iesu da binga atopatari embo isena. Edo God da embobo Ephesus nati nembodiba da atima era embobo awa Iesu Keriso gebe edo umo jo ungoda berari mi kondade ari mi kera era ainda yei ove eiawa jivena. \p \v 2 God ingodenaso Mama de Bada Iesu Keriso de mi ingoda yei kondade ari da kando de jo jamo jamo de itare. \s1 EWAMEI ARI GOD MI INGODENASO YEI ITITISIRA \p \v 3 God ingodenaso Bada Iesu Keriso da Mamo da yei ingode doio sore ainda be awa unemi ingodena ewamei isira awasedo. Eiedo God mi etiri ingodena Keriso de da dada isera. Edo ingodena Keriso ga dada etero unemi utu da kando berari awa ingodenaso yei ititisira. \v 4 Edo God utu de busu de ae atise ingodena kataburisira. Edo umo dipapa isira ingodena Keriso da embobo oro Iesu da uso ororo mi ingodenaso jo awa segari ingode God da jo da ewamei be derorase dipapa isira. \v 5 Edo God umo ingodena matu be matu dubo burisira awasedo God umo kotisira Iesu mi kondade ari umo ingodena awa ari uso kinapeina orase isira. Edo kotari awodo edo God iaviri isira. \v 6 Edo God umo ingodenaso yei ewamei edo ira awasedo umo uso mei God mi dubo burira awa ingodenaso yei soregari da kando ititisira. Edo God umo ingodenanemi kando eiawa mina itorase sae awasedo ingodena mina itae soregari da kando eiawa burisera. Edo ingode kando eiawa budo jo iaviri de ingode God jasiga ore. \p \v 7 God umo Keriso da betari awasedo ingodenaso wasiri bebegae awa kotembedo doturisira. Edo umo ingodenaso wasiri bebegae kotembedo dodo edo wasiri bebegae da bupuri awa wujegurisira. \v 8 Edo God da ari ewagaewa ingodenaso yei edo ira awa nembogamo ra. Edo uso wasiri ewagaewa ingodenaso yei edo ira awa jiwae be ra. \v 9 God uso jiro gari berari mi umo matu Iesu Keriso adira awa kotisira awa isira. Edo God umo matu ro adi kotisira awa umo umosuka gae tuda kotisira awarate boroko uso kotari awa ingodenaso yei isaga etira. \v 10 Edo uso iji be awa bugari God umo ro adi kotisira awa berari atae adira. Edo God da uso kotari awa unemi rora berari utu de busu de isira awa dada ari Keriso mi ungo gitijigarase kotisira. \p \v 11 Edo God umo ro adi kotedo ira awa be edo ira. Tuturo da God umo kotisira uso dipapa mi ingodena katabadi kotisira edo ingodena Keriso ga da dada edo ingodena awa God da embomei orase kotisira. \v 12 Edo God mi ingodena awawa kataburisira ingodenanemi umo uso ari ewagaewa ingodenaso yei isira awawa jasiga orase sedo edo umo ingodena kataburisira awawa Iesu Keriso tumonda orase sedo isira. \p \v 13 Edo ingo God umo embo soregedo ira ainda binga ewamei ge be awa ingido Keriso gebe isewa. Edo ingo Keriso gebe etewo God da Asisi Ewamei Be God mi itari bugarase sisira awa ingoda yei ititisira amimi ingo awa God da topo awa isaga isira ainda be awa God da Asisi Ewamei Be awa ingodenaso kotopu ra awasedo. \v 14 Edo ingodena God da Asisi Ewamei Be awa itiri budo edo ro God mi uso embobo da yei itadi sisira awa ingode badera awa gosera. Edo Asisi Kotopu ingodenaso jo da atiri ingode gosera embo Keriso mi mina itido budo soregurisira embo awa God mi amboda badira awa gosera. Awasedo ingodena God da usasa nembodiba awa kotise ingode umo jasiga ore. \s1 PAUL UMO MI UNGODA YEI RO ARASE SEDO GOSIRI AWA SISIRA. \p \v 15-16 Edo ingo Iesu Keriso gebe ise God da embomei dubo burewora ainda binga ingido na iji berari God doio sise umo ingo kondade arase sedo gosewona. \p \v 17 Edo na ingo ruvegae God usasa de ingodenaso Bada Iesu Keriso da Mamo mi ingoda yei God da Asisi itarase iji berari sedo gido ena. Edo ingo mi God gawase Asisi Ewamei Be mi jiro gari itari amimi God awa ingoda yei isaga adira. \v 18 Ingo mi soregari God mi ingo mi kumbawase sedo jawo sisira awawa gawase sedo awa na God da yei ingoda jiro pirigarase benunu sedo ena. Edo daedo ingo mi iji amboda rora ewagaewa Keriso ga da kando edo kumbadewa awa isaga gawase sedo awawa na God da yei ingoda jiro pirigarase benunu sena. \v 19 Edo daedo ingo mi ingode Iesu gebe ari embobo da yei goroba itido ira awawa gawase sedo na God da yei benunu sena. \p \v 20 Edo goroba amone eiedo ra. Iesu bebetisira awa God mi uso goroba nembodiba mi jigiri eriri utu da uso demonda gitijigarase ititisira. Edo God Iesu jigiri eririsira ainda goroba de God uso goroba ingodenaso jo da ainde re da awa ra. \v 21 Edo God Iesu Keriso uso demonda utu da ititisira amone Keriso re ge be inda ra. Orobe da gitijigari de busu einda gitijijigegari de embo de asisi bebegae de anela de edo utu da gitijigegari embobo de awa ungo berari Keriso da tuda ra. \v 22 Edo God mi etiri Keriso awa rora berari de embo berari de da gitijigari isira. Edo God mi Iesu awa Iesu gebe ari embobo berari gitijigarase ititisira. \v 23 Iesu Keriso awa teta tamo da kopiri inge ra. Edo Iesu gebe ari embobo awa teta Keriso da ingo de tei de tamo de inge ra. Edo Keriso da goroba mi rora berari yei berari da awa sirido ira amimi Iesu gebe ari embobo uso tamo awa sirido ira. \c 2 \s1 KERISO MI GOROBA ITURI INGODE ATIMA ERA. \p \v 1 Matu ingo God kera ae edo isewa edo ingo wasiri bebegae edo isewa awasedo God da Asisi Ewamei Be ingoda jo da atae awasedo ingo awa betari inge ra. \v 2 Edo iji ainde awa ingo iji berari busu da embo da emboro bebegae awa ambo ambo edo isewa. Edo ingo Satan kera edo isewa asisi bebegae da gitijigari awa. Edo Satan awa asisi biae umo boroko embo God kera ae edo era awa gitijigido ira. \v 3 Edo matu ingodena berari awa embobo emimi atima era da awodo atima isera. Ingodena ro ingodenaso jo da dipapa bebegae mi orase dipapa edo isera awa edo isera. Edo kotari biae ro ingodenaso jiro da bugudo isira awa ingode edo isera. Edo iji ainde God umo embo wasiri bebegae edo isera ainda yei tini gambari ise ingodenamonde daedo tini gambari isira. \p \v 4-5 Awarate God uso jo ari ingodenaso yei awa nembodiba edo uso dubo bari ingodenaso yei awa nembodiba awasedo ingodena ingodenaso wasiri bebegae mi teta betari inge isera etero God ingodena jigiri erero Keriso da wasiri seka awa ingodenaso yei ititisira. Edo God ingo soregurisira ainda susu re uso kando ari ra. \v 6 Edo God mi ingodena jigiri erido edo ingodena utu da ungae da gitijigari inge edo era ari bebegae derigedo era. \v 7 Edo God mi embo berari mi ingodena Keriso da jo da awodo dubo burisira awawa gorase sedo ari wasiri ewamei nembodiba eiedo awawa isira. \v 8 Edo God uso soregari ingodenaso yei itido ira ainda susu re ingodenaso ari ewagaewa aera God uso soregari ingodenaso yei itido ira ainda susu re uso kando ari de ingodenaso tumonda ari de ra. Edo soregari re God da kando ingodenaso yei ra. \v 9 Edo God mi ingodena awodo soregurisira awasedo gaegae edo jariga ge seove. \v 10 Edo God mi etiri ingodena Keriso ga da dada isera edo God mi ari ewamei ingodenaso jo da isira amimi ari ingodena ari ewagaewa adera. Edo matu boroko ae be God mi kotisira awa ingodena Keriso da wasiri seka awa budo iji berari atise ari ewagaewa orase kotisira. \s1 IESU GEBE ARI EMBOBO BERARI AWA DA RA \p \v 11 Ingo embobo iji ingoda inyein mane mi ingo burisera awa Jew aera edo ingo matu ro edo isewa awa ruvegeove. Edo Jew embobo mi ungo ungosuka awa embo tamo da andiso diugari wasiri bari embobo sedo era te ingo awawa embo tamo da andiso diugari wasiri awa bae embobo sedo era. \v 12 Edo matu ingo atima isewa ainde ingo Keriso da topo aera. Ingo awa aumo embobo edo God mi Israel embo kataburisira ainda teda aera. Edo ingo God da uso sari gari ge sisira awa ingo ingaera. Edo ingo busu da atisewa ainde ingo God awa gaera edo unemi wasiri ewagaewa ingo embo adi dipapa isira awa ingo gaera. \v 13 Edo matu awa ingo besaun be ra te ingo Keriso da embobo edo ingo aikambu bugusewa. Edo rora berari eiawa isira ainda susu awa Keriso da betari awa ra. \p \v 14 Edo ingo embo Jew ae de nango Jew embobo de awa matu gitopo ra te Keriso umo umosuka etiri ingodena gitopo awa atae isera. Edo ingode teta ingodenaso soropu da puga digarago edo ingodena gitopo edo atima isera te Keriso uso betari da goroba mi puga awa bejisira. \v 15 Edo Iesu Keriso umo Jew embobo de ingo embo Jew ae ainde awa dada ari embo diti da edo ungae da dada orase sedo umo Jew embobo da agodari ge awawa budo demonda ititisira. Edo umo awodo etiri embo diti etoto eiawa gitopo mina mina ari awa atae isera. \v 16 Edo Keriso da betari orega da mi etiri embo diti etoto einda tini gambari mina ara edo isera awa atae isira. Edo Keriso mi orega da betedo etiri embo dombu etoto awawa God ga da otatao isera. Ungo God ga da otatao edo dombu da isera. \v 17 Awasedo Keriso mi bugudo binga ewamei awa embo berari da yei minonu sisira, ingo embo Jew ae God dodo besaun atima ewa edo ingo Jew embobo God ga da asusubedo atima ewa ainda yei. \v 18 Edo ingodena berari Jew embobo de embo Jew ae de awa Keriso awasedo ingode God da Asisi Ewamei Be de da dada edo God da diti da bugutera. \p \v 19 Awasedo ingo embo Jew ae ingoda aumo embobo ari iji edo gitopo embobo ari iji awa atae isira edo ingo awa God da embobo berari de da dada edo God da orobe da topo etewa. Edo ingo God da orobe ise ingo ewamei ari berari God mi uso embobo da yei itido ira awa badewa. \v 20 Edo God da embobo awa teta mando ingege ra. Edo Iesu Keriso awa teta tutuvi tuturo da derido era da awodo ra. Edo Iesu da binga atopapotegari embobo edo God da binga sari embobo amimi tutuvi nenei awa derido era. Edo ungo mi tutuvi deroro God mi ingo awa tutuvi da mando be awa itido ira. \v 21 Edo Keriso mi mando berari awa jigido takibeuri goroba edo derido atima ira. Edo mando awa goroba de awodo deruri edo mando awa God da atari yei edo ira. \v 22 Edo ingo Keriso ga da dada etewo God Iesu gebe ari embobo nenei de da ingo awa tutuvi ainda itero gambira. Edo ingo berari awa dada didigurira teta mando da ituka dada digido era da awodo iri mando God uso Asisi Ewamei Be mi atima ira awodo ewa. \c 3 \s1 BURO PAUL MI EMBO JEW EGAE DA TEDA ISIRA \p \v 1 Na Paul Iesu Keriso da buro ari embo gajari oro da einda atena ainda be awa na ingo embo Jew egae da yei binga ewamei minonu sedo ena awasedo. \p \v 2 Edo ingo ingisewa God naso yei da saboa edo naso yei buro eiawa ano edo ingo ewamei adi sedo. \v 3 Edo nanemi be ganase sedo God mi uso jo da kotari awa isaga isira. \v 4 Edo na ge tupo einda gaetena. Edo ingo nanemi jivetena awa ajigedo awa Keriso da jawo da ge God mi jo ge edo budo atima ira ainda be awa gadewa nanemi gosisena da awodo. \v 5 Matu God umo ge awa ujugaera te boroko God umo uso Asisi Ewamei Be da yei awodo ge awa Iesu da binga atopapotegari embobo da yei edo God da binga sari embobo da yei isaga isira. \v 6 Edo jo ge God mi dubo evira awa boroko isaga etira amone eire. God umo kotisira awa embo Jew ae binga ewamei awa ingido ungo Jew embobo de da dada edo God uso ewamei ari awa borase kotisira. Edo ungo diti da ainda embo nenei edo ro God mi Iesu Keriso da yei awodo itadi sisira awa ungo daedo badera. \p \v 7 Edo God naso yei ewamei be edo naso yei binga ewamei minonu sari buro awa ititisira. Edo God mi naso yei goroba ituri na uso buro ari embo awodo edo ena. \v 8 Edo God da embo nenei berari mi na be derigedo era te God mi naso yei sisira Keriso da ewamei ari jiwae be binga ewamei da awa budo embo Jew ae ainda yei mambanase sisira. \v 9 Edo God rora berari isira amimi iji berari uso ge awa unjugurevira te boroko umo na itido awa umo embo berari mi umo ungo embo ro adiri awa gorase dipapa ira. \v 10 Edo God umo uso ge unjugurevira ainda be re eire. Asisi berari de utu da gitijigido era awa God umo dipapa ira ungo embo Jew ae de Jew embobo de Iesu gebe era awa dada era amimi uso jiro gari awa gorase dipapa ira. \v 11 Edo God umo rora berari isira iji ainda tuturo edo bugudo awa God umo iji berari kotedo ira awa Iesu Keriso ingodenaso Bada awa itari bugari embo Jew ae de Jew embobo de mi umo gebe edo embo diti da orase kotedo ira. \v 12 Edo ingodena Keriso ge be edo ungae da dada edo awa ingodena iji berari oju ae God da diti da dederera. \v 13 Edo na awa ingo embo memesi awa burena te na ingoda yei sedo gosena ngamo doawo wosure ko ingo mi ewamei ari eiawa bawase sedo eiedo awa naso yei ira. \s1 PAUL IJI BERARI GOD MI UNGO KONDADE ARASE SEDO GIDO ISIRA \p \v 14-15 God orobe berari ainda jawo susu awa dada ungoda yei ititisira. Edo nenei utu da atima era nenei busu da atima era awarate God ungo berari ainda jawo ititisira. Edo na God da gari jiwae kotise uso dombu da baingo dederi ena. \v 16 Edo God da usasa de goroba de awa nembodiba awasedo na uso dombu da baingo dederi ise uso yei sedo gosena ingoda yei uso Asisi Kotopu itari amimi ari ingoda jo goroba arase sedo gosena. \v 17 Edo na God da yei sedo gosena Keriso bugudo ingoda jo da atirari ingo umo tumonda irirowo umo atarase. Edo ingo mi God da embo berari de da Keriso da dubo bari awa nembodiba awa gawase na God da yei sedo gosena ingoda atari da susu awa uso dubo bari ingoda yei arase. \v 18 Edo ewa awa kapuru ra edo utu awa in be inda ra edo doriri awa nembodiba ra te Keriso da dubo bari mi berari awa derigurira. \v 19 Edo ingo mi mana boroko Keriso da dubo bari berari awa mana badewa ainda be awa uso dubo bari awa nembodiba ra awarate boroko ingo mi umo ingo dubo burira awa gosewa. Edo amboda Keriso da dubo bari berari burise ingo mi God mi ingoda yei ro itadi dipapa edo ira berari awa badewa. \p \v 20 Edo ingode ro God mi arase sedo gadera awa unemi derigadira. Edo ingodenanemi ro kotadera awa unemi derigadira. Edo umo awodo edo ira ainda be awa Keriso ingodenaso jo da atise uso goroba ingodenaso yei itido ira awasedo. \v 21 Edo Iesu gebe ari embobo de embo berari de ungoda orobe berari de Iesu da buro awasedo iji natopo God jasiga ore. Awara. \c 4 \s1 GOD DA EMBOBO AWA DITI DA RA \p \v 1 Ungo mi na gajari oro da ititisera ainda be awa na God da buro edo isena awasedo. Edo na ingoda yei ge sirinono naso ge ingiwo. \v 2 Edo God mi ingo rawodo atawase sira emboro awodo awa ingo atadewa. Jariga embobo awodo eove. Kera sapo mina ara ewo. Embo nenei ingo biae adera awa mina itove. Edo ingo kondade mina ara adewa awa embo mi ingo dubo mina bara ewa awa gadera. \v 3 Edo God da Asisi Ewamei be mi ingoda jo jamo jamo ari itiri ingo embo da edo kotari da ave. Edo awodo awa atadi ewo. \v 4 Ingo awa Keriso da tamo da ra. Edo ingo uso Asisi Ewamei Be da awa burisewa. Edo binga ewamei da awa gawase sedo God mi ingo jawo sisira. \v 5 Bada da atima ira tumonda ari da atima ira edo umo mi ewamei ari wasiri da atima ira. \v 6 Edo God da atima ira. Umo awa embo berari da Mamo edo unemi berari awa gitijigido ira edo umo embo berari da jo da atima ira edo embo mi uso buro awa yei berari da gido era. \p \v 7 Edo Keriso umo kando ingodenaso yei itadi dipapa edo ira awa ingodenaso yei kando dada itido ira. \v 8 Edo jiwari sira, \q1 “Umo uso gitopo berari awa patido edo embo Satan mi \q1 bundisira awa umo yei in be inda vivitisira. Edo \q1 vitido embo da yei kando ititisira.” \p \v 9 Edo ingodena ge awa ingido ingodena ro gido eri? Ingodena gido era awa Keriso umo vitae giti da umo wowosisira. Umo wosedo riawo euse mata awa euse atima ira ainda umo wowosisira. \v 10 Edo ingodena gido era embo wowosisira edo embo utu da vivitisira embo awa embo da awa ra. Edo utu da vitido umo kiambu gigisebedo yei in be inda vivitisira yei berari ainda atarase. Edo yei berari utu berari da edo busu berari da ainda Keriso awa atira. \v 11 Edo Keriso umo umosuka embo da yei kando awa ititisira. Embo nenei awa unemi Iesu da binga atopapotegari embobo orase ititisira. Edo embo nenei awa God da binga sari embobo orase ititisira edo embo nenei awa binga ewamei minonu sari embobo ititisira edo embo nenei awa Iesu gebe ari embobo awa simba ari embobo orase ititisira edo embo nenei awa atopapotegari embobo orase ititisira. \v 12 Edo God da embobo mi God da buro adi sia orase sedo God embobo eiawa ititisira. Edo umo Iesu gebe ari embobo awa Keriso da tamo isira awa uso dombu da jo goroba de derorase. \v 13 Awasedo ingodenaso jiro gari God da mei da yei edo ingodenaso tumonda ari awa babojirari ingode buro dada adera. Edo ingodena awa embo be wasiri biae ae teta Keriso inge adera. \p \v 14 Edo ge bubusegari embobo da atopatari awa teta bisara goroba de sumbudo euri ewa nembogambo edo ira da awodo ra. Edo ewa awa nembogamo edo amimi kinapeina piguri vitido wosedo edo era. Edo ingodena awa embo be edo kinapeina oro ewa nembogambo mi pigari yima puma ari awa atae adera. Edo ge bubusegari embobo da embo gandubari mi euri embo ungoda atopatari bebegae awa budo era. \v 15 Awarate ingode atopapotegari awodo awa mana adera. Ingode dubo bari de God da ge moka be awa sise iji jaige teta Iesu Keriso da awodo orase. \p \v 16 Edo ingodena Keriso da tamo papatu neinde kainde uso agodari da tuda dada edo atise awa buro ewamei adera. Edo Keriso mi ingodena awa jigari ingodena dada atadera. Edo tamo patu dada awa ungoda buro awa ewamei adera awa tamo papatu berari awa babojise edo tamo berari awa goroba adera. Edo ingodena embo nenei dubo burise edo kondade mina ara adera amimi ari embo dada goroba adera. \s1 GOD INGODENASO YEI WASIRI SEKA ITIDO IRA \p \v 17 Na God da jawo da ge ingoda yei sena ingiwo. Ingo teta embo gae mi atarago edo ewa atari awodo awa dowo. \v 18 Edo kotari embo God gae da awa tepo ra edo umenga awa ungoda jiro da ra. Edo ungo awa kotari atitigaera edo ungo mana God da ge awa ingadera awasedo ungo wasiri seka God mi itido ira awa bae era. \v 19 Edo ungo wasiri bebegae ari da me gari awa atae ra awasedo ungo wasiri bebegae neinde kainde awa edo era. Edo embo mi iji berari wasiri biae adi dipapa era awasedo ungo dita baita da wasiri awa era. \p \v 20 Keriso ingo wasiri bebegae awodo awa awase atopatae ra. \v 21-22 Edo ingo Keriso da ge awa ingewa edo ingo ge moka be uso jawo da awa ingewa awasedo ingoda jo da kotari bebegae awa pigewo. Edo jo da kotari bebegae amimi euri ingo wasiri bebegae ise atima isewa. Edo ingoda jo da kotari bebegae amimi sasainbedo ingoda tamo de asisi de awa usibesi ira. \v 23 God da yei sedo giwo jo seka de jiro seka de itare. \v 24 Edo ingo bosini seka burise mamatu wawara edo ewa da awodo kotari seka God mi ititira awa burise mamatu awa wawara ewo. Edo kotari seka badewa amone teta God da kotari inge ra. Edo ingo awa budo wasiri seka da atirowo embo mi isaga be gadera. \p \v 25 Awasedo gebusari awa dowo. Edo embo dada uso namendi da yei ge be mi sare ainda be awa ingodena awa Keriso da tamo papatu awasedo. \v 26 Iji dada ingo tini gambari adewa te burigi doio amimi ari ingo wasiri biae eove. \v 27 Edo Satan mi ari ingo wasiri biae adi emboro pirigeove. \v 28 Embo ave matu bengono edo isiri awa bengono doare. Edo rora bengono ari awa dodo umo ganu budo indari ori adi awa tuturo edo buro are. Edo umo buro irirari uso ganu awa embo rora ae awa kondade arase awa inono adira. \p \v 29 Edo ingo embo nenei da yei ge sise gido ge bebegae awa jingama eove ta ge ewagaewa awa jingama ewo amimi ungo kondade ari ungo jo jamo jamo ari bore. Edo ge ingo sadewa amimi embo ingoda ge ingera ainda yei ewamei are. \v 30 Edo God da Asisi Ewamei Be ingoda jo da atira amimi ingo awa God da topo isaga ira ainda be awa God da Asisi Ewamei Be awa ingoda kotopu ra. Edo God da Asisi Ewamei Be ingoda jo da atira amimi ingo gosewa awa iji amboda God mi imo wujegadira awa bugutira awasedo wasiri biae awo amimi ari God da Asisi Ewamei Be dubo vevera tambure. \v 31 Tini gambari edo wasiri bebegae adi dipapa ari ge bagari edo ge bebegae embo da jawo da sari kotari bebegae embo nenei da yei ari edo wasiri bebegae berari awa dowo atae are. \v 32 Edo wasiri bebegae awawa atae ari edo ari ewagaewa mina ara ise embo nenei da wasiri bebegae awa kotembedo mina doa ewo teta God mi ingoda wasiri bebegae kotembedo doturisira awodo. \c 5 \s1 RORA EWAMEI AWA EWO \p \v 1 Ingo awa God da kinapeina na awasedo ingo edo gido God edo ira da awodo adewa. \v 2 Edo Keriso ingodena dubo burisira da awodo ingo iji berari embo nenei dubo buwo. Edo Keriso umo umosuka betadi etiri ungo mi teta rorou God da yei itarago isera. Edo God rorou muno ewamei de awa gido iaviri isira. \p \v 3 Edo ingo awa God da embomei na awasedo dita baita ari da wasiri awa eove edo wasiri bebegae adi kotove edo embo nenei da rora dipapa eove. Edo wasiri bebegae be eiawa adi sedo ge seove. \v 4 Edo daedo embo nenei isibeove edo kiki bebegae awa seove awarate iji berari God jasiga ewo. \v 5 Edo ingo gosewa embo ave dita baita ari wasiri edo ira edo wasiri bebegae adi kotedo ira edo embo nenei da rora dipapa edo ira embo awa mana ewamei ari God de Keriso de mi ungo gitijigadera iji ainde itadera awa mana badera. \p \v 6 Edo embo jiro bebegae da ge sera awa gaegae edo ingo gandubeore ungoda ge ingove ainda be re embo berari God da ge kera ae edo era awa God ungoda yei tini gambari edo ira awasedo. \v 7 Awasedo embomei einde anumbedo kiki dirise atove. \v 8 Edo matu ingo wasiri bebegae ise umenga da atima isewa awarate boroko ingo awa God da embobo edo usasa da atewa awasedo wasiri embo usasa da atima era ainda awa ewo. \v 9 Edo awodo ewo ainda be awa usasa mi euri ari wasiri ewagaewa bugudo ira teta ri ewamei mi be ewamei edo ira da awodo ra. \v 10 Edo ingo mi wasiri ewagaewa irirowo God mi gido iaviri arase sedo re God ingo ro awase sira awa dengoro edo ingiwo. \p \v 11 Edo embo wasiri bebegae umenga da atise edo era ainde da atise kiki dirise atove ta embo mi wasiri biae awa gorase re isaga ewo. \v 12 Edo na boroko mana embo mi wasiri bebegae unjugari da edo era awa mana sadena ainda be awa amimi ari ingodena me nembodiba gadera awasedo. \v 13 Edo ingode rora usasa da itoro embo mi rora awa rori awa isaga gido era da awodo ingo embo da wasiri bebegae awa isaga oro embobo awa usasa da atari embobo aderita rora. \v 14 Awasedo God mi jiwari da sisira, \q1 “Ingo embobo ewo ewa awa teta ingo betari inge edo \q1 awa dombu gunjedo eriwo. Edo ingo erawo Keriso da \q1 usasa ingoda yei janibari gave.” \p \v 15 Edo ingodena awa iji biae da atera awasedo atise gido gogowo ise atiwo. Edo teta embo jiro ae mi atarago eove ta jiro gari embobo edo atiwo. \v 16 Edo iji dada ari ewagaewa ari iji iso yei bugadira awa ewamei eio. \v 17 Edo awasedo jiro bebegae embobo awodo eove ta iji berari God ingo ro awase sira awa gosise atiwo. \p \v 18 Gaegae edo umo okain indari embobo eove edo umo okain indove ainda be awa umo okain indadewa amimi ingo ari usibesi adewa. Awarate God da yei sedo giwo God da Asisi Ewamei Be mi ingoda jo awa sirare. \v 19 Edo ingo God da ge da ya de ya ewagaewa de ge ewagaewa de mi ge mina sara ewo. Edo ingo God da yei ge sise edo ya ewagaewa sise re iji berari ingoda jo berari mi God jasiga ewo. \v 20 Edo ingoda yei ro adira awa ingo Mamo God da yei edo Bada Iesu Keriso da jawo da awodo doio sewo. \s1 IU DE ARO DE ATARI WASIRI \p \v 21 Ingo awa saboa ari mi Keriso sapo ewa da awodo saboa ari mi sapo mina ara ewo. \p \v 22 Edo ingo aro asini saboa ari mi ingoda iubono sapo ewo teta ingo Keriso sapo edo ewa da awodo. \v 23 Amone ko iu mi aro awa bajari ira awasedo teta Keriso awa Iesu gebe ari embobo bajari edo ira da awodo ra. Edo Iesu gebe ari embobo awa Keriso da tamo na edo umone ungoda soregari ra. \v 24 Edo awasedo ingo aro asini saboa ari mi ingoda iubono sapo ewo teta Iesu gebe ari embobo mi saboa ari mi Keriso sapo edo era da awodo. \p \v 25 Ingo iubono ingoda aro asini dubo buwo teta Keriso mi Iesu gebe ari embobo dubo budo ungo embo bebetisira awodo. \v 26 Edo Iesu Keriso mi betedo sekago erido edo uso ge de sasaka de mi uso gebe ari embobo segari edo uso sekago engenembari sia orase sedo isira teta ademei mi uso jimbari iji simba edo ira da awodo. \v 27 Edo Iesu gebe ari embobo mi sia edo dongono nei ro atae edo gari ewamei be teta ademei tamo andiso evetu ogo da tamo andiso awodo ae ewamei be adera. Edo ungo awawa wasiri bebegae de ae adera. \v 28 Edo embo ungoda tamo simba edo era da awodo ungoda aro asini simba ore. Edo embo uso aro simba adira awa umo uso tamo simba adira. \p \v 29-30 Edo embo ungoda tamo topo awa ujo ae edo eri ta? Awodo aera. Awarate embo ungoda tamo simba edo era teta Keriso mi ingodena Iesu gebe ari embobo simba edo ira da awodo ra ainda be awa ingodena awa Keriso da tamo patu awasedo, \v 31 Edo jiwari mi sira, \q1 “Embo de evetu de awa dada orase sedo embo uso ai de mamo de awa dodo ira.” \p \v 32 Edo iu de aro de da ge amone gebe ra te daedo Keriso uso embo Iesu gebe ari embobo awa dubo budo ira ainda emboro awa isaga edo ira. \v 33 Awara na ro setena amone eire ingo iubono saboa ari mi ingoda aro asini sapo ewo teta ingo saboa ari mi ingosuka sapo edo ewa da awodo. Edo ingo aro asini ingoda iubono awa saboa ari mi sapo ewo. \c 6 \s1 AIMAMO DE KINAPEINA DE DA ATARI DA WASIRI \p \v 1 Ingo kinapeina ingoda aimamo kera adewa amone ingoda yei re ewamei ra. \v 2 Edo God mi agodari ge eiawa sisira, “Ingoda aia de mamo de sapo ewo.” \v 3 Edo umo awa sedo gari de eiawa sisira, “Ingo awodo adewa awa ingo ewamei atadewa edo busu da iji ribori be atadewa.” Edo agodari ge matu sisira edo awa sedo umo sari gari ge da ro saera. \p \v 4 Edo ingo aimamo wasiri awo ingoda kinapeina tini gambari eorase awa ewo. Awarate ungo edo gogo edo atopatiwo emboro Keriso mi ingo mi ungo atopatawase dipapa ira awodo edo kondade ewo ewamei bajore. \s1 AGIPO EMBOBO DE BABOJEGARI DE DA ATARI WASIRI \p \v 5 Ingo agipo embobo oju de jo dadara de kotari ewamei de da ingoda babojegari ganu itido ingo ori edo ira embo awa sapo ewo teta ingo Keriso kera ae etewa awodo. \v 6 Edo iji berari ingoda bajari sapo edo gogowo ewo. Edo ungo imo buro iriroso ditini iriroro buro ewamei eio awarate imo buro iriroso ditini ae adera iji ainde da buro okain eio. Edo buro esa awa ungo mi imo buro ewamei esa awodo sorase buro awa eove. Awarate ingo awa Keriso da buro embobo ra awasedo ro God mi asase dipapa ira awa jo iso berari mi edo gogo eio. \v 7 Edo ingo ingoda bajari kera ise ingo iaviri de da buro awa ewo teta ingo embo be awa kera ae rate Keriso kera ewa awodo awa. \v 8 Eiedo ewo ainda be awa ingo gosewa embo ave buro embo ta ko buro da bajari ri awa uso buro awa edo gogo edo adira embo ainda yei God mi riroga itadira. \p \v 9 Edo ingo babojegari ingo daedo ingoda buro embobo da yei ewamei ewo. Edo gaegae edo iji berari ungoda yei seove ungo buro biae adera awa dadewa seove. Edo ingo de ingoda babojegari de da bajari da awa utu da atima ira. Edo umo embo berari awa emboro da ainda kasedo ira awasedo ruvegeove. \s1 IESU GEBE ARI EMBOBO DA ISORO GI EMI \p \v 10 Ambo be ambo da awa na ingoda yei eiawa sadena. Ingo awa Keriso ga da dada isewa awasedo uso goroba nembodiba mi ingoda goroba bajido nembodiba are. \v 11-12 Gaegae edo Satan mi ge busari durove ta isoro gi emi God mi ingoda yei itadi dipapa ira awa berari buwo ainda be awa ingodena awa isoro embo de aerate ingodena awa asisi bebegae be de Satan da gitijigari asisi bebegae goroba de busu da tamo da gitijigido ira edo asisi bebegae jiwae be umenga da iji de busu gitijigido ira ainda de da isoro edo era. \v 13 Edo iji biae awa bugutira edo iji ainde awa gitopo mi bugudo ingo dedo gaedo adira. Edo ingo oju sumbadi ae adewa re God da isoro da gi emi awa boroko kumbuwo Edo use gi emi awa badewa awa ingo mana sumbudo mambadewa te derido embogo adewa. Edo embogo edo ingo mi gitopo awa derigadewa. \p \v 14 Awasedo sia ewo, God da ge moka be awa ipu da sini digarago ewo. Edo God da ewamei ari awa oka da pako durarago ewo. \v 15 Edo binga ewamei jo jamo jamo ari ge awa sadi re teta esega adi ise tei goru itarago ewo. \v 16 Edo iji berari tembuse gido re tumonda ari awa teta ingoda bere awodo ingo mi budo tembuma ewo. Edo Satan mi uso gi siwo gutari awa ingoda yei pigadira te ingoda tumonda ari mi ingo soregari ingo mana memesi badewa. \v 17 Edo ingo God da soregari badewa amone teta gobe okain budo asugedo ingoda kopiri soregarago adewa. Edo God da ge God da Asisi Ewamei Be mi ingoda yei itadira amone teta kasiwo ingera. Edo kasiwo awa ingo mi jigiwo. \v 18 Edo God da isoro gi emi awa budo iji berari God da yei benunu sewo ingo kondade are. Edo God da Asisi Ewamei Be da dipapa awodo God da yei iji berari ge sise atiwo. Edo iji berari gido gowo ise atiwo. Edo God da embo berari awa embo God da yei ge sari awa dove. \p \v 19 Edo daedo God da yei sedo giwo na ge sadi sia ena awa unemi ro sadeni awa sari sano edo na binga ewamei da ge be jo da awa isaga be ane. \v 20 Edo na Iesu da binga atopatari embo awa gajari oro da atena ainda be awa na binga ewamei minonu sedo ena awasedo. Edo na sekago binga ewamei awa minonu sanase sedo re God da yei sedo giwo na kondade are. \s1 PAUL DA ATEGARI \p \v 21 Na rawodo atima ena awa gawase re Tychicus ingodenaso namendi ingodena kondade ewamei edo God da buro edo ira amimi naso yei ro ira awa sari gadewa. \v 22 Edo awa sari gawase sedo na umo ingoda yei ititena. Edo unemi nago ro berari ewora awa sari gido amimi ari ingoda jo goroba adira. \p \v 23 Edo God Mamo de Bada Iesu Keriso de mi nanonamendi berari da yei dubo bari de jo jamo jamo de itore. Edo nanonamendi berari gebe ise mata atore. \v 24 Edo embo nenei doae mata Bada Iesu Keriso dubo burera awa ungoda yei God iji berari ewamei edo are. \cls Awara \cls Ingoda namendi \cls Iesu Keriso da jawo da \cls Paul