\id COL - Ewage-Notu NT [nou] -Papua New Guinea 1987 (web 2014) \h COLOSSIANS \toc1 Ove Colossae Nati Embobo Mi Burisera \toc2 Colossae \toc3 Col \mt1 Ove Colossae Nati Embobo Mi Burisera \c 1 \p \v 1 Na Paul mi ingo ategurena. God mi na jawo setiri na Iesu da binga atopatari embo isena. \p \v 2 Namonde ingodenaso namendi Timothy de mi ove eiawa God da embo Colossae nati da atima era ainda yei edo ungo Keriso gebe edo ingodenaso nanonamendi ewagaewa isera ainda yei gaiera. \p God ingodenaso Mama mi ewamei ari de jo jamo de ingoda yei itare. \s1 PAUL GOD MI UNGO EWAMEI ARASE SEDO GOSISIRA \p \v 3-4 Iji jiwae nango ingo awa embo God ingodenaso Bada Iesu Keriso da God da yei ge sedo era edo iji ainde nango uso yei doio sedo era ainda be awa nango ingera ingo Keriso Iesu gebe ewa edo ingo God da embo berari dubo burewa awasedo. \v 5 Edo gebe binga ewamei matu ingoda yei bugusira iji ainde ingo ingisewa God ingoda yei ro itadi dipapa ira awa ingisewa. Edo ingo awa ingisewa edo ingo gosewa God umo ingoda yei ro itadi dipapa ira awa ingoda tumonda ari de dubo bari de da susu ra. Edo ro God mi ingoda yei itadi dipapa ira awa utu da ingo simba ise atira. \v 6 Edo ingo matu God da kando gatari da binga awa ingisewa edo binga awa gebe awodo gosisewa edo iji ainde God ingo ewamei isira da awodo binga ewamei awa busu berari da ravetiri embo berari ingera. \v 7 Edo Epaphras Keriso da buro ira amimi daedo ingo binga ewamei awa atopatetiri gosisewa. Edo umo Keriso da buro embo einda naso yei bugudo ingoda jawo da nango kondade evira. \v 8 Edo unemi setiri gositara Asisi Kotopu mi ingo kondade etiri ingo embo dubo burewa awa setiri gositara. \p \v 9 Edo nango ingoda binga ingititara ingo ro ewa awa awasedo nango ingoda jawo da God da yei ge sera. Edo nango God da yei sedo gosera unemi ari umo ingo ro awase dipapa ira awa gawase. Edo nango God da yei sedo gido era ingo jiro gari Asisi Kotopu mi itido ira amimi umo ro awase dipapa ira awa gawase sedo era. \v 10 Edo ingo jiro gari awodo gosise amimi ingo God umo rawodo atawase dipapa ira awodo atise edo ingo mi ro awo God umo iaviri adira awa adewa. Edo ingo mi ari wasiri neinde kainde adewa teta ri ewamei mi be ewagaewa jiwae edo ira da awodo adewa. Edo ingoda jiro gari God da yei awa bajido nembodiba adira. \v 11 Edo ingo mi saboa ari mi ro ingoda yei bugadira awa kumbawase sedo nango God da yei sedo gosera uso goroba awa ingoda yei itari ingo iaviri de edo goroba de uso buro awase. \v 12 Edo ingoda yei sera Mama mi ingo awa uso usasa de gitijigari iji de uso embobo da yei ro itadira awa embo ingo sia isira awasedo uso yei doio sewo. \v 13 Edo matu umenga da gitijijigegari amimi ingodena gitijijigurisera te boroko God mi ingodena soregetira. Edo umo ingodena soregedo ingodena uso mei da ingodena gitijigarase ititisira. \v 14 Edo Keriso mi mina itido ingodena soregurisira. Edo unemi ingodena soregetiri God mi ingodenaso wasiri bebegae kotembedo doturisira. \s1 KERISO MO AVERI? \p \v 15 Embo mi God awa gadi jaredo era te Keriso uso gari teta God da gari da awodo mi God awa isaga isira. Edo God umo rora berari de embo de ae atiri Keriso atina tina. Edo Keriso mi ro berari God mi isira awa derigurisira. \v 16 Edo da awa aera te God Keriso da yei awodo rora berari utu da ainde busu da ainda awa isira. Edo God Keriso da yei awodo rora berari ingode gido era edo gae edo era awa isira. Edo God Keriso da yei awodo utu da gitijijigegari nembogamo de busu da gitijijigegari memeinya de edo busu da gitijijigegari nembogamo de nati da embo da gitijijigegari de isira. Edo God Keriso da yei awodo rora berari isira Keriso mi gitijigarase. \p \v 17 Edo God rora berari de embo de ae atiri Keriso atina tina. Edo Keriso mi rora berari jiguri ungo saredo ewoga ewoga ae edo era te ungo God mi yei rawainda ititisira ainda atima era. \v 18 Keriso awa tamo da kopiri ra. Edo tamo awa uso embo Iesu gebe ari embobo awa ra. Edo Keriso awa tamo da ngamo na. Edo Keriso awa betedo tuturo da awa unemi eririsira awasedo umo awa embo berari betedo sekago erido era ainda gitijigari ra. \v 19 Ko Keriso God da goroba berari awa itiri burisira. \v 20 Edo God umo jiro buro isira awa uso mei da yei awodo ari rora berari de embo berari de awa ungae da umo jigari ewamei orase kotisira. Edo embo mi God ungae da otao orase sedo God uso mei awa itiri bugudo orega da bebetisira. Edo God da mei bebetisira amimi God embo berari de busu da rora berari de utu da rora berari de awa budo uso yei sekago bugadi emboro isira. \p \v 21 Edo matu awa ingo God ga da asusubedo atae ra te ingo besaun be atise uso gitopo edo isewa ainda be awa ingo wasiri bebegae ise kotari tepo tapo edo isewa awasedo. \v 22 Awarate boroko God uso mei da betari awasedo etiri ingo uso otatao etewa. Edo umo awodo etiri ingo God da yei asusubedo bugudo ewamei be edo jo ro atae edo ainda atewa. \v 23 Edo ingo binga ewamei ingisewa amimi etiri ingo God mi ingo awa embo ro adi ira awa gosisewa. Edo binga ewamei awa teta tutuvi embo mi mando itido era da awodo ra. Edo ingo awa teta mando inge ra awasedo ingo iji berari Iesu Keriso tumonda ise tutuvi ainda atiwo edo rora ro mi ari wasiri edo ingo mana duradewa. Edo na Paul awa binga ewamei da agipo ari embo edo binga ewamei awa minonu sewona. Edo binga ewamei eiawa busu berari da embo berari da yei ravira. \s1 PAUL BURO OKAIN BE ISIRA \p \v 24 Edo na ingo embo memesi burena te na dubo vevera aera ainda be awa na memesi bureno Keriso naso jo da atira awa memesi burira amimi ari uso tamo Iesu gebe ari embobo awa goroba orase. \v 25 Edo God mi na awa Iesu gebe ari embobo da agipo embo anase ititisira. Edo unemi nanemi buro eiawa anase ititisira amone ingo mi ewamei ari tambawase sedo isira. \v 26 Edo buro unemi nanemi anase ititisira amone uso binga awa minonu sanase ititisira. Edo God orobe berari mamatu da yei binga awa unjugurisira te boroko awa uso embobo da yei jo ge awa isaga etira. \v 27 Edo God uso embobo da yei jo ge awa isaga edo daedo ungoda yei isaga etira awa embo Jew ae ainda yei umo uso jo ge awa isaga ari dipapa ira awa isaga etira. Edo jo ge ainda be re eire. Keriso ingoda jo da atirari awa ingo gadewa ingo awa yei embo betae wasiri de atima era yei ainda mambadewa awa gadewa. \p \v 28 Edo nango awa Keriso awa embo berari da yei isaga era. Edo nango ewamei nango rawodo gosera awa embo berari dengoro ise edo embo berari atopapotera ungo Keriso mi ungo awa embo ro isira awasedo God da dombu da wasiri biae ae derorase. \v 29 Edo Keriso uso goroba nembodiba de naso jo da buro ira. Edo na uso goroba de buro okain ise embo dengoro ari buro ise atopatari buro ena. \c 2 \p \v 1 Na ingoda jawo da edo Laodicea nati embobo da jawo da edo embo na gae ainda jawo da buro okain be edo eni ta? Edo sano giwo. \v 2 Gebe na buro okain be ewona. Edo ungoda jo awa goroba arase sedo edo ungo dubo mina bara orase sedo edo ungo God mi ungoda yei ro itadi dipapa ira awa gorase sedo na buro okain be ewona. Awasedo ungo mi God da jo da ge gae sia ira ge awa gadera. Edo God da jo da ge gae sia ira awa boroko isaga etira awa Keriso ra. \v 3 Keriso awa jiro gari be moka ainda ngamo na. Edo jiro gari eiawa teta rora nembodiba God mi unjugari inge ra. \p \v 4 Edo na ingoda yei sena, embo jiwae be mi ingoda yei bugudo ge ngamo sedo ingo bagadi adera te ungoda yei awara seove. \v 5 Edo na awa naso tamo mi ingo dodo besaun atena te naso jo awa ingoda teda atira. Edo na gosena ingo Iesu gebe ari awa doae goroba de da jo da edo atewa awasedo na iaviri ena. \s1 KERISO GA DADA EDO ATIWO \p \v 6 Ingo tumonda ari mi Keriso Iesu Bada awa burisewa da awodo tumonda ari mi ungae da pepeta ewo. \v 7 Edo tumonda ari awa teta ri besisi busu tube tuda mambudo ira da awodo ra. Edo ingoda tumonda ari Keriso da yei awa tube tuda mambare. Edo Keriso awa teta mando tutuvi embo mi mando edo era da awodo ra awasedo ingoda wasiri awa Keriso da yei itiwo. Edo ingo awodo adewa awa ingoda tumonda ari awa babojise atadira teta ingo atopapotisera awodo. Edo ingoda tumonda ari babojirari iji berari God da yei doio sewo. \p \v 8 Embo nenei awa gandubari ge mi ingo awa awo da barago adi jarera. Edo ungo awa Keriso da ge awa ingoda yei atopatae rate embo da kotari awa ingoda yei atopapotera. Edo ungoda gandubari ge amone embo da ge ra. Edo ungoda gandubari ge amone asisi bebegae utu de busu de gitijigido era ainda ge ra. \v 9 Edo Keriso awa embo isira te umo awa God tamo da atisira. \v 10 Edo ingo awa Keriso ga da dada edo God da goroba berari awa burisewa. Edo Keriso awa asisi bebegae berari de asisi ewamei berari de awa derigedo ira. \p \v 11 Edo ingo Keriso ga da dada etewo Keriso mi wasiri biae da bufuri mi ingo bundisira awa diugetiri ingoda jo da kotari bebegae da goroba awa atae isira. Edo Keriso awa embo da tamo da andiso diugari da wasiri awa ambo ambo ise ingoda yei awodo awa aera te umone teta ingoda jo da andiso diugari inge isira. \v 12 Edo ingo umo mi ewamei ari wasiri awa burisewa iji ainde ingo Keriso ga da bebetisewa edo God mi ingo jigiri erewo ingoda wasiri bebegae mamatu awa atae isira ainda be awa ingo God da goroba da gebe isewa edo goroba amimi Iesu betetiri God mi umo jigiri eririsira awasedo. \p \v 13 Edo ingo embo Jew ae ingo ingoda wasiri bebegae awasedo teta bebetegari embobo inge isewa. Edo ingo tamo da andiso diugari wasiri awa bae edo Keriso ingoda jo da andiso awa diugedo bari inge ae ra. Awarate God mi ingo jigiri erewo ingoda yei Keriso da wasiri seka awa ititisira. Edo God mi ingodenaso wasiri bebegae berari awa kotembedo doturisira. \v 14 Edo agodari da ge Moses mi jiusira amimi ingodena awawa bundisira te God mi wujegurisira. Ko ainda be awa Iesu Keriso mi betetiri agodari ge da goroba awawa atae isira teta God mi Iesu ga da orega da benema mi dari takibari inge isira. \v 15 Edo God awodo isira amimi Satan de uso gitijijigegari de da goroba awa usibesi isira amimi ingo bekuba eorase sedo. Edo God mi embo berari da yei Keriso uso betari orega da amimi Satan de uso gitijijigegari de awa dorisira awa isaga isira. \p \v 16 Awasedo embo amemi imo ro indido kumbudo asase sedo ainda agodari itadera awa ungoda ge awa ingose. Edo ungo mi iji kotopu jigasase agodari sadera edo kariga seka bugari da bondo da agodari sadera edo jango indari iji da agodari sadera awarate ungoda ge awa ingove. \v 17 Edo agodari amone teta atiti ro amboda adira awarate Keriso awa gebe ra. \v 18 Edo embo nenei mi sadera ungo mi isaga be getera teta eturo da garago edo era da gari sadera sedo ungo mi ingo derigari sadera edo ingo bekuba adera te ungoda ge awa ingove. Edo embobo amimi sadera imo asisi tumondebain ae adesa edo saboa ae adesa awa imo utu da mambadi ae ra sadera te ungo ge be eose. Edo saboa sera saboa amone saboa be ae ra te busari ra. Edo embobo emone embo mi ge kotedo era da awodo kotedo era be ae tepo jariga embobo ra. \v 19 Edo ungo awa jariga embobo awasedo Keriso da dada ae edo era tamo da kopiri da. Edo tamo berari Keriso ga da dada isera awawa unemi ari dada ari de tamo da papatu budo dada edo ira rora ainde mi ari ungo berari dada atadera. Edo tamo da papatu dada edo atise edo tamo awa God umo tamo rawodo bajarase dipapa ira awodo bajadira. \s1 IESU GEBE ARI EMBOBO AWA TETA KERISO GA BETARI INGE ISERA \p \v 20 Ingo awa teta Keriso ga da betari inge etewo God mi etiri asisi utu de busu de gitijigido ira amimi ungoda goroba mi ingo bundari awa atae isira. Edo awa gebe tamo edo ingo roedo busu da atari embobo da atari awodo atevi? \v 21 Edo embo nenei mi sedo era rora awa jigose edo embo nenei mi sedo era rora awa indose edo nenei mi sedo era rora eiawa jigose sedo era. Edo ingo roedo embobo einda ge awa ingido evi? \v 22 Edo agodari ge awa atae adira. Edo agodari awa embo da agodari de atopatari de ra. \v 23 Edo embo atopapotera awa asisi tumondebain ise edo saboa ise tamo awa okain be simba edo era. Edo ungo awa jiro gari embobo awodo era te embo kondade ari ungoda jo da dipapa bebegae awa doari ta awa ungo inono aera. Edo embo atopatari awodo era amimi ero embo jariga embobo era. \c 3 \s1 IJI BERARI UTU DA RORA AWA DIPAPA EWO \p \v 1 God ingo jigiri eririsewa edo ingo wasiri seka Keriso ga da burisewa awasedo jo ingoda berari mi utu da rovi ravi awa dipapa ewo. Edo utu da ainda Keriso awa God da ingo be kena uso gitijigari anumba da anumbedo atira. \v 2 Edo iji berari busu da rora awa kotove ta iji berari utu da rora awa kotedo ewo ainda be awa ingoda wasiri mamatu awa atae isira. \v 3 Edo ingo God da diti da Keriso ga da wasiri seka de atewa awa busu da embobo awa wasiri seka awa gaera. \v 4 Awarate Iesu Keriso ingoda joda atira awa wasiri seka da ngamo na edo God umo awa embo berari da yei isaga adira iji ainde God ingo awa daedo isaga adira. Edo uso usasa nembodiba awa ingoda yei janibadira. \s1 WASIRI SEKA DE WASIRI MATU DE DA GE \p \v 5 Edo ingoda jo mi busu da embobo da wasiri awa adi ari gido dipapa awa dewo betare. Edo wasiri eiawa busu da embobo mi edo era, viro ise, dita ise, sino da wasiri awa edo era, kotari bebegae de dipapa nembogamo de edo jinaga jiwae edo era. Edo jinaga edo era amone teta ove kewari tumondebain arago edo era. \v 6 Edo God umo wasiri bebegae eiawa embo umo kera ae era ainda yei tini gambari nembodiba adira. \v 7 Edo ingo matu dipapa bebegae awa ise atima edo isewa iji ainde awa ingoda jo da dipapa bebegae mi ingo gitijigido isira. \p \v 8 Awarate boroko kotari bebegae de ari bebegae de tini gambari de embo nenei ujo ae ari de berari awa pigewo mambare. Edo embo nenei da jawo da ge bebegae seove edo isibari ge seove. \v 9 Edo ge mina busa eove ainda be awa ingo dipapa bebegae mamatu awa wawara edo dipapa seka awa burisewa teta bo mamatu awa wawara edo bo seka budo ewarago isewa awasedo. \v 10 Edo ingo jo da dipapa seka awa burisewa amimi God awa iji berari ingoda jo da buro edo ira irirari ingoda jiro gari God da yei awa bajido nembodiba iri ingo God da gari awa burewa. \v 11 Awasedo embo Jew embo ta embo Jew embo aeri edo embo tamo da andiso diugari wasiri awa burisi ta bae ri ainda sedo gari ainda mina sari awa nembodiba aera ainda be awa Keriso awa embo nembodiba ra edo Keriso awa embo umo gebe edo era ainda jo da atima ira awasedo. \p \v 12 Edo ingo awa God da embobo ra. Edo umo ingo dubo budo ingo katabetiri ingo uso embo isewa awasedo wasiri ewagaewa awa budo ombuwo teta bo seka ombarago ewo. Edo embo nenei dubo buwo edo embo nenei da yei kando ewo jariga eove edo wasiri biae embo nenei da yei eove ta saboa ewo. \v 13 Edo iji berari kondade mina ara ewo edo embo nei mi embo nei bekuba ari gido kotembedo dowo. Kotembedo mina doa ewo teta God mi ingo kotembedo doturisira awodo. \v 14 Edo dubo bari awa dowo wasiri ewagaewa nenei berari awa derigare ainda be awa dubo bari awa wasiri ewagaewa berari ainda susu ra. \p \v 15 Edo God mi ingo jawo setiri Keriso da tamo isewa awa ingo jo jamo jamo de atawase dipapa ira awasedo dubo jamo ari Keriso mi itido ira awa dowo ingoda jo awa dedegare. Edo doio sewo. \v 16 Edo Keriso da ge be jiwae edo ira awa ingoda jo da atare. Edo jiro gari nembodiba mi atopapotise dengoro mina ara ewo. Edo ingoda jo da God doio sise God da ya edo ya ewagaewa de God jasiga ari ya de awa God da yei sewo. \v 17 Edo ingo ro adewa edo sadewa awa sise ise gido Bada Iesu da jawo da ewo. Edo awodo ise sise gido Mamo God awa Iesu Keriso da yei awodo jasiga ewo. \s1 EMBO NENEI DA YEI RAWODO ADESA AINDA EMBORO \p \v 18 Ingo aro asini ingoda iubono kera ewo ainda be awa Iesu ge be ari embo evetu awa awodo adera. \p \v 19 Edo ingo iubono ingoda aro asini dubo buwo edo ungoda yei tini gambari eova. \p \v 20 Edo ingo kinapeina iji berari ingoda aimamo awa kera ewo ainda be awa amone God mi ingo mi awodo awase dipapa ira. Edo kinapeina ungoda aimamo kera adera amimi ari God iaviri adira. \p \v 21 Edo ingo aimamo gae gae edo ingoda kinapeina awo jo ambu re iji berari ungoda yei eiawa eose oiawa eose awa seove. \p \v 22 Edo ingo agipo embobo ingoda babojegari mi ro awase soro gido ewo. Edo ungo ingo ditini era iji ainde awo ungo iaviri orase sedo eove ta jo ewamei de da ewo ainda be awa ingo God dubo burewa awasedo. \v 23 Edo ingo ro ewa awa ingoda jo berari mi ewo teta ingo God da buro ae etewa awodo embo da buro aera te. \v 24 Edo kotewo God mi ingoda riroga awa itadera. Edo unemi uso embo da yei ro itadi sia etira awa imone badesa. Edo Keriso awa bajari be awa imone kera esa. \v 25 Edo embo ave wasiri bebegae ira embo awa uso wasiri bebegae awasedo mina badira ainda be awa tega da ainda God embo kasedo ira. \c 4 \p \v 1 Edo ingo babojegari ingoda agipo embobo awa gandubeove ta edo gogo ewo. Edo Iesu Keriso re utu da atira edo umone ingoda bajari daedo ra. \s1 RO ARI DA GE NENEI \p \v 2 God da yei ge sari awa dove. Edo ingo God da yei ge sise gido ewo mi biae eove ta God jasiga ewo. \v 3 Edo ingo God da yei ge sise gido sedo giwo God umo ingodenanemi uso jo ge Keriso da jawo da ainda binga awa minonu sorase emboro pirigare. Edo ungo mi na gajari oro da einda ititisera ainda be awa na binga awa minonu sedo ena awasedo. \v 4 Awarate God da yei sedo giwo emboro pirigari na binga isaga minonu sirinono embo mi ingore. \p \v 5 Edo embo Iesu ge be ae edo era ainda jo da jiro gari de da wasiri ewo. Edo ungoda yei Iesu da binga sari iji ewamei awa eura ewo. \v 6 Edo indari ngamo arase sedo embo mi ewa indari da itido era. Edo ingo embo da yei ge sise edo ungoda sedo gari da mina sise gido ingoda ge awa ewa itari ngamo arago awa ewo. \s1 PAUL DA ATEGARI SANGOVE \p \v 7 Ingodenaso dubo bari namendi Tychicus Keriso da agipo embo nango inge amimi jo uso berari mi Keriso da buro ira amimi naso yei ro berari iutara awa sari gadewa. \v 8 Edo umo nango berari da yei ro iutara ainda binga awa sadira ainde ingo iaviri sekago adewa edo ingoda jo awa sekago goroba adira awasedo na umo ingoda yei iteno mambutira. \v 9 Edo Onesimus dubo bari ingoda embo nei awa nanemi Tychicus ga da iteno mambutira. Edo ungo bugudo einda namendi mi ro berari ira awa soro gadewa. \p \v 10 Aristarchus einda nangae gajari oro da atira amimi ingo ategurira awa sano gawase sira. Mark, Barnabas da orobe awa daedo ingo ategurira awa sano gawase sira. Edo na ingoda yei matu sisena umo ingoda yei bugari gido indari itiwo indari yei itawo atare sisena. \v 11 Edo Iesu uso jawo nei Justus awa daedo uso ategari ingoda yei ititira. Edo embo tamonde eiawa Jew embobo ungo ungoda wasiri bebegae awa dodo God da yei wareregurisera. Edo ungo God da yei wareregedo ungo nangae daedo God da gitijigari da iji da buro awa ewora. Edo embo tamonde eiawa na kondade nembodiba be edo era te Jew embobo nenei ungoda wasiri bebegae dodo God da yei wareregurisera awa na kondade ae edo era. \p \v 12 Edo Epaphras ingoda embo nei Iesu Keriso da agipo embo umo daedo ingo ategurira. Edo umo uso jo berari mi ingoda jawo da iji berari God da yei ge sedo ira. Edo umo God da yei sedo gido ira unemi ari ingo goroba de gebe edo duradi ae edo ingoda tumonda ari awa bajido nembodiba ari ingo God mi ro awase dipapa ira awa kera awase sedo ira. \v 13 Edo na be awa gari ra umo ingo embo edo Laodicea nati embobo embo edo Hierapolis nati embobo embo buro okain be evira. \v 14 Edo Luke ingodenaso karu simba ari embo dubo budo era ainde Demas de ungoda ategari ingoda yei ititera. \p \v 15 Edo Laodicea nati da nanonamedi de Nympha de Iesu gebe ari embobo uso mando da dada edo era awa sewo gore nango mi ungo ategurera. \v 16 Edo ingo ove eiawa ajigedo gido awa ove eiawa Laocicea Iesu gebe ari embobo da yei itiwo mambare ainda be awa na ungo naso ge awa daedo ingorase dipapa ena awasedo. Edo daedo ove nanemi Laodicea nati embobo da yei ititisena awa ungo mi ingoda yei itoro bugare ko na ingo awa ajigedo gawase dipapa ena. \p \v 17 Edo Archippus da yei sewo Iesu Keriso mi buro awa asase itira awasedo mambudo atae asase setira sewo. \p \v 18 Edo na naso ingo topo mi eiawa jivena na Paul mi ingo ategurena. Ungo mi na bundetera awa ruvegeove. \p Edo God da ewamei ari ingoda yei matawa atare. \cls Awara \cls Ingoda namendi \cls Iesu Keriso da jawo da \cls Paul