\id 2TI - Ewage-Notu NT [nou] -Papua New Guinea 1987 (web 2014) \h 2 TIMOTHY \toc1 Ove Nei Timothy Burisira \toc2 2 Timothy \toc3 2Ti \mt1 Ove Nei Timothy Burisira \c 1 \p \v 1-2 Na Paul mi ove eiawa Timothy awa teta naso mei inge ainda yei jivena. God mi dipapa edo na awa itiri Iesu da binga atopatari embo isena. Edo unemi na itiri bugusena binga ingodena Keriso Iesu ga da dada edo wasiri be awa burisera awa minonu sanase. \p Edo God ingodenaso Mama de Bada Iesu Keriso de ungo mi ingoda yei ewamei ari de jo ari de jo jamo jamo ari de itore. \s1 TIMOTHY KERISO BE TUMONDA EDO IRA \p \v 3 Na jo ewamei de da God kera ena teta naso mamo umbogo mi umo kera isera da awodo. Edo iji dada na iso jawo da God manunugedo ena edo na umo doio sedo ena. \v 4 Edo na matu imo dodo mambusena iji ainde imo ji sisesa. Edo na awa kotise imo sekago gadi dipapa ena ainda be awa imo sekago gido awa na iaviri be adena. \v 5 Edo na ruvegae kotedo ena imo Keriso gebe edo esa teta iso apie Lois de iso inyei Eunice de mi giti Keriso gebe isera da awodo. \v 6 Edo na gosena tumonda ari ungoda jo da atira da awodo iso jo da atira awasedo na iso yei sena gae gae edo riawo amburase embo mi ri gotu tatedo pusedo era da awodo gae gae edo God da buro ari goroba iso jo da atira awa ambure puseio erare. Edo matu na naso ingo iso kopiri da iteno God mi kando eiawa iso ititisira. \v 7 Ko Asisi Kotopu God mi ingodenaso yei ititisira amimi ae ingodena oju aera te Asisi Kotopu mi ingodenaso jo awa beda edo ingodenaso yei goroba de dubo bari de edo jiro ewamei ititisira. \p \v 8 Awasedo imo embo nenei da yei imo Keriso da yei ro gosisesa awa sise gido me geose. Edo ungo na gajari oro da ititisera Iesu Keriso awasedo. Edo na gajari oro einda atena awa embo me geose ta iji berari binga ewamei awa embo sia eio memesi badi sia eio teta memesi nanemi burisena dawodo. Edo memesi ingodenanemi kumbudo ena ainda tega amone God mi ingodenaso yei goroba itido ira ainde inono ra. \v 9 Edo God mi ingodena awa uso embo orase jawo sedo ingodena soregurisira ingodenanemi ro isera awa embo aerate uso dipapa mi edo uso kando mi. Edo matu be matu God umo busu ae atise umo ingodenaso yei ewamei adi kotisira Keriso da buro awasedo. \v 10 Awarate boroko ingodenaso soregari embo Iesu Keriso awa busu da bugiri God uso kotari berari awa isaga etira. Edo Keriso mi etiri betari da goroba awa atae etiri edo wasiri matawa atari da binga ewamei awa isaga etira. \v 11 Edo God mi na binga ewamei awa minonu sanase jawo sisira edo na awa Iesu da binga atopatari embo edo embomei awa atopatanase ititisira. \v 12 Edo na buro awa isena awasedo memesi burisena awarate na me gaera ainda be awa na mana mana aerate Iesu Keriso tumonda edo ena. Edo na gosena boroko tuturo edo mambudo Keriso engenembadira iji ainde God mi buro ro anase ititisira awa simba adira. \p \v 13 Edo ge ewamei nanemi imo atopapotisera amimi atopatasase emboro isaga isira awasedo emboro awa ambo ambo eio. Edo emboro awa ambo ambo iriroso Keriso mi imo kondade irirari Keriso gebe ise edo umo dubo buio. \v 14 Edo Asisi Kotopu iso jo da atima ira ainda goroba mi edo gogo edo God mi buro ro asase iso yei ititisira awa simba edo gogo eio. \p \v 15 Edo imo gosesa embo jiwae be Asia busu da awa atae mambudo na dotera. Phygelus de Hermogenes de na dodo mambusera. \p \v 16-17 Edo God mi Onesiphorus da orobe jo are ainda be umo iji jiwae be na kondade euri naso jo iaviri edo ira. Edo na gajari oro da ateono umo na me aera umo Rome da bugudo umo na eura be eura edo na tambusira. \v 18 Edo iji nembodipa de God mi ari umo God da jo ari nembodiba bare. Edo imo gosesa umo Ephesus nati da na embo buro isira awa kiambu aera. \c 2 \s1 TETA GOD DA ISORO EMBO EWAMEI AWODO EIO \p \v 1 Timothy naso mei Iesu Keriso mi imo jo ari goroba de atio. \v 2 Edo ge imo de embo nenei jiwae de mi atopapoteno ingisewa ge awa embo nenei God da buro ewamei adera embo gosesa ainda atopatio. Edo imo embobo awa atopataso ungo mambudo embo nenei atopatore. \p \v 3 Edo memesi iso yei bugadira awa sumbose ta memesi awa buio teta isoro embo ewamei mi sumbae memesi budo ira awodo ainda be awa imo awa Iesu Keriso da isoro embo awasedo. \v 4 Edo isoro embo awa uso gitijigari mi uso buro awa gido iaviri arase sedo umone uso buro re isoro embo da buro da awa ise buro nenei awa ae edo ira. \v 5 Edo embo ave sumbudo riroga badi sumbudo ira embo awa umo sumbari da agodari awa kera adira awarate umo sumbari da agodari awa kera ae adira awa ungo mi uso yei riroga ro itadi aera. \v 6 Edo embo ave buro okain edo ango pigedo parago budo edo indari govedo ira embobo awa tuturo da be awa ungo mi giti giti badera. \v 7 Edo na ro sena awa koteio. Edo imo kotiroso God mi imo kondade ari be gase. \p \v 8 Keriso awa koteio. Edo binga ewamei Keriso betetiri God mi jigiri eririsira awa nanemi minonu sena awa Iesu Keriso gitijigari nembodiba David da orobe da awa sena. \v 9 Na awa binga ewamei awa minonu sedo ena awasedo na memesi burise atima ena. Edo ungo mi na bupuri mi bundisera teta embo bebegae bundedo era da awodo rate ungo mi mana God da ge awa bundadera. \v 10 Edo embo God mi jawo sisira ungo mi soregari de usasa natopo atari de Iesu Keriso mi ititira awa borase jawo sisira awa embo na memesi eiawa na ujo ae aera. \v 11 Edo ge eiawa embo mi sedo era awa gebe ra, \q1 “Ingodena Keriso ga da betari inge ae etera awa ingodena ungae da atae etera. \v 12 Edo ingodena sasainbari mi memesi awa badera awa ingodena ungae da gitijigadera. Edo ingodena umo gae sadera awa umo ingodena umo gae sadira. \v 13 Edo ingodenaso tumonda ari awa ambujegadira awa umo iji berari ro adi sedo ira awa adira.” \s1 GOD MI BURO EMBO AWA BURO EMBO EWAMEI SEDO IRA AINDA GE \p \v 14 Gae gae edo ingoda embo ge boroko nanemi setena awa ruvegeore ta sekago sewo gore. Edo God da dombu da okain be sewo gore ge puti awa embo ge bagore. Edo ge bagari mi embo kondade ae rate ge bagari mi euri embo ingera awa biae edo ira. \v 15 Edo imo buro embo God da buro awa ise gido buro ainda men geose ta iji berari gebe mi God da ge awa gogo edo atopatio. Edo God mi iaviri arase sedo iji berari God da buro awa awodo eio. \v 16 Ge puti de ge busaride mi embo jumburi ungo God dodo besaun be mambudo era awasedo embo ge awodo sedo era ainde da anumbeose. \v 17 Edo atopatari embobo amimi atopatido era awa teta iso matu betedo ira da awodo ra. Edo atopapotegari etoto awodo atopapotera awa Hymenaeus de Philetus de ra. \v 18 Ungo God da ge moka awa dodo sera embo da sekago erari awa matu ari sera. Edo ungo awodo atopapotise embo nenei da tumonda ari awa usibesi era. \v 19 Edo embo mi emboro demonda ganuma nembodiba awa miminegari sago aera da awodo atopapotegari bebegae ainda ge mi God da ge moka awa teta ganuma inge ra edo embo mi mana miminegoro emboro demonda wosadira. Edo ganuma ainda tamo da eiedo jiwari ra, ‘God embo uso topo awa gari ra.’ Edo jiwari nei sira, ‘Embo ave umo God da topo sadira awa embo awa wasiri bebegae ari awa doare.’ \p \v 20 Rora jiwae embo da mando da awa ou gono gari neinde kainde de tewo gari neinde kainde de atira. Edo ou nenei de tewo nenei de da mina awa nembodiba rate nenei da awa memeinya na. Edo ou gono de tewo nenei de awa bondo ise jingama ari rate nenei awa iji nenei de jingama ari ra. \v 21 Da awodo awa God da embo da teda embo gari neinde kainde ra. Embo ave uso wasiri bebegae uso jo da awa wawara euri mambudo ira awa uso jo ewamei edo ira edo embo awa teta ou gono de tewo gatoro de awa embomei buro nembodiba awa embo itido era awasedo ungoda mina nembogamo de awodo ra. Edo God mi embo awa ewamei adira edo God ungae da awa buro ewagaewa neinde kainde adira. \v 22 Awarate embo seseka jiwae be awa rora neinde kainde awa dipapa era te Timothy imo awa dipapa awa dodo sumbudo mambuio. Edo imo de embo jo ewagaewa de mi Keriso da yei kondade arase sedo gido era jo ewamei ari de tumonda ari de dubo bari de jo jamo jamo de dipapa ewo. \p \v 23 Awarate ge puti awa ingari wasiri de ge tepo tapo sari de ge busari ge sari de da wasiri awa ujo ae eio ainda be awa ingo gosewa ari wasiri emimi euri embo ge bagedo era. \v 24 Keriso da buro embo awa ge bagure ta umo wasiri ewamei mi ise embo berari saboa ari mi edo gogo edo atopatare. \v 25 Edo Keriso da buro embo umo uso gitopo da yei ungoda kotari awa biae ra sise gido re ungoda yei edo gogo edo are. Edo umo ungoda yei edo gogo edo irirari God mi ari awasi ungo ungoda wasiri bebegae awa dodo God da yei wareregedo uso ge moka awa gaderi ta rora. \v 26 Edo Satan mi ungo awa uso wao da uso ge kera orase wao isira awarate ungo God da ge moka awa gadera awa ungo Satan da gebusari ge awa gido wao da awa dodo wosadera. \c 3 \s1 ATAE IJI AIKAMBU BUGUTIRARI EIEDO AWA ADIRA \p \v 1 Ge eiawa gio. Iji sangove awa aikambu adira ainde iji awa biae be adira. \v 2 Edo embo mi rora ungo mi ungosuka berari badi kotadera. Edo ungo awa mosou embobo adera edo ungo jariga embobo edo ungo rora berari awa gari awodo kotadera. Edo ungo mi ge okain mi embo nenei da yei sadera edo ungo mi mana aimamo kera adera. Edo embo mi ungoda yei ewamei adera awa ungo mana mina adera. Edo ungo mana God tumondebain adera. \v 3 Edo ungo embo nenei da yei jao namendi ari mana adera edo ungo embo nenei mana jo adera. Edo ungo embo nenei da jawo da ge busadera edo ungo embogo adera edo ungo dombu jinjeri de teta ambe wo inge adera. Edo ungo rora ewamei rori awa ujo ae adera. \v 4 Edo ungo busari embobo adera edo ungo ro era awa dombu ipu gae adera edo ungo embo nembogamo awodo kotadera. Edo ungo God dubo badi aerate ungo busu da rora awa dubo badera. \v 5 Edo ungo God tumondebain ari oro da torido teta ungo God tumondebain ari inge adera te ungo awa God da goroba awa ujo ae adera. Edo embo awodo era ainda demonda awa yeose. \p \v 6 Edo embo nenei sena emone ungo embo nenei da mando da vitido emboevetu kotari atitigae ainde da otao edo era edo wasiri bebegae de dipapa bebegae de era awasedo ungo bouga jiwae be kumbutera. Edo embobo eiawa emboevetu de da otao ise atopatari bebegae awa atopapotera. \v 7 Edo emboevetu eiawa iji berari ge seka awa ingari dipapa era te ungo iji berari God da ge moka awa gae jarera. \v 8 Edo Jannes de Jambres de Moses da ge da gitopo edo uso ge ujo ae isera da awodo embobo sena embobo eiawa God da ge da gitopo edo uso ge awa ujo aera. Edo ungoda kotari awa bebegae edo ungo God da ge be moka awa dodo ge bebegae da wareregurisera. \v 9 Awarate ungo iji atopapotera edo ungo atae be adera. Ainda be awa embo mi Jannes de Jambres de da atopatari awa be ae gosisera da awodo embo mi burigi be embo sena embo eiawa embo ganduburira awa gadera. \s1 GOD DA GE BE MOKA AWA GEBE ISE ATIO \p \v 10 Awarate ingo gosewa na awa embobo eiedo aera. Edo ingo gosewa na ro atopatido ena edo na rawodo atima ena edo na ro adi dipapa edo ena awa. Edo ingo gosewa naso tumonda ari Keriso da awa edo na memesi budo ena ainda emboro awa. Edo ingo gosewa na God da embobo berari awa dubo budo ena edo na God da buro awa doae edo ena awa. \v 11 Edo ingo gosewa na binga ewamei minonu sedo ena awasedo buria jiwae be burisena awa. Edo ingo na Antioch nati de Iconium nati de Lystra nati de esega eno ungo mi naso yei da memesi nembodiba be ititisena awa gosewa. Awarate ingo gosewa ungo awodo isera iji ainde God na soregurisira. \v 12 Edo embo ave Iesu Keriso tumonda adira edo Keriso da emboro da pepeta adira embo awa embo mi dedo gaedo adera. \v 13 Embo bebegae de busari embobo de mi iji berari wasiri bebegae edo era edo wasiri bebegae ungo mi amboda adera amimi wasiri bebegae ungo mi boroko era awa be derigedo gogowo adira. Edo ungo mi embo nenei ganumbedo era da awodo ungo ungosuka mina ganumbedo edo era. \p \v 14 Awarate Timothy imo dose ta God da gebe moka imo ro ewamei atopatetero gido gebe isesa awa gebe ise atio. Edo embo amemi imo atopapotisera awa imo gosesa. \v 15 Edo tuturo da imo mei kiambu da edo bugudo boroko da jiwari kotopu imo gosisesa awa ruvegeose. Edo imo gosesa jiwari kotopu awa ajigurise imo jiro gari tambudo esa amimi imo kondade euri imo God da soregari rawodo kumbari ri awa gido esa. Edo imo gosesa embo amemi Iesu Keriso gebe edo era awa God mi soregadira. \v 16 Edo God uso gebe moka awa setiri edo uso buro embobo mi ge awa gaisera edo emboro awodo da God uso jiwari kotopu berari awa ititisira. Edo jiwari kotopu mi God da gebe moka awa ingodena siri gosera. Edo jiwari kotopu mi ro gebe ira awa atopatido ira. Edo ingodena biae eoro jiwari kotopu mi ingodenaso wasiri biae isaga edo ingodena awa ewamei da itido ira. Edo jiwari kotopu mi isaga euri embo mi wasiri ewamei rawodo aderi awa gido era. \v 17 Awasedo jiwari kotopu mi awodo atopaturi ingodena God da embobo awa wasiri ewagaewa neinde kainde ari da emboro awa pepeta orase sia edo ira. \c 4 \s1 EMBO BERARI DA YEI BINGA EWAMEI AWA MINONU SEIO \p \v 1 Na iso yei da goroba de ge eiawa sadena. Iesu Keriso bugudo gitijijigurise embo berari wasiri de atera ainde edo bebetegurisera awa kasadira awa uso diti da edo God da diti da iso yei eiawa sadena. \v 2 Binga ewamei awa minonu seio. Edo eiawa binga ewamei minonu sari iji ewamei ta ko iji biae ri awa kotose ta goroba de da iji berari binga ewamei awa minonu seio. Edo embomei ungoda kotari awa biae gorase binga ewamei awa minonu seio. Edo embo mi biae oro gido ungoda yei awodo eose seio. Edo iji berari embo kondade eio Keriso tumonda ore. Sasainbari mi iji berari atopatio. \v 3 Ainde be awa amboda iji bugadira ainde embo mi atopatari gebe awa mana dengoro adera te embobo awawa ungoda dipapa awa ambo ambo ise atopapotegari embobo jawo soro ungo ro ingadi dipapa era awa sadera. \v 4 Edo embomei awawa God da gebe moka awa ingari awa dodo ungo kiki pasega awa ingido gogo adera. \v 5 Awarate ro adira awa imo imosuka dedegeio. Edo memesi iso yei da bugadira awa goroba edo atio. Edo iji berari binga ewamei minonu sari da buro awa eio. Edo iji berari God mi iso yei buro ro asase ititisira awa eio. \s1 PAUL USO BURO ATAE ARI IJI AWA BUGIRA \p \v 6 Na kotena Rome embobo na doro betadena iji awa asusubetira awasedo na teta God da yei rorou betari itido era awodo awa betadi ena. \v 7 Edo na ainto sumbari awa sumbudo bugudo boroko atae ari tei da bugena. Edo na doae Keriso gebe ise edo God mi buro ro anase ititisira awa edo atae etena. \v 8 Edo na buro atae eteno riroga God mi embo ungae da umo jigari ewamei eoro itido ira riroga awa na simba ise utu da atira. Edo iji nembodiba bugutira ainda God embo berari edo gogo edo kasedo ira amimi naso yei riroga awa itadira. Edo na da awa aerate embo berari Keriso dubo budo era edo umo bugarase simba era ainde da God mi riroga awawa itadira. \s1 PAUL DA GE SANGOVE TIMOTHY DA YEI SISIRA \p \v 9 Edo gido naso yei iji tupo buguio. \v 10 Ko Demas umo busu da rovi ravi awawa dipapa edo na dodo Thessalonica nati da mambutara. Edo Crescens awa na dodo Galatia busu da mambutara. Edo Titus na dodo Dalmatia busu da mambutara. \v 11 Edo Luke umo umosuka nangae da atira. Edo Mark awa tambudo budo buguio ko umo na kondade edo buro eiawa adira awasedo. \v 12 Ko Tychicus awa nanemi iteno Ephesus nati da mambutara. \v 13 Edo imo bugadesa iji ainde naso ombari Carpus da mando da Troas nati da doturisena awa budo buguio. Edo daedo buka ro awa budo buguio. Edo buka wo tamo mi edo era awa na daedo dipapa be ena awa budo buguio. \p \v 14 Edo Alexander embo rora auri mi edo ira amimi naso yei da iji berari wasiri biae be awa itido isira. Edo embo amimi naso yei ro iutara awodo God mi uso riroga awa itadira. \v 15 Edo embo awa diti jimba eio ainda be awa umo awa ingodenaso binga awa ujo ae edo isira. \p \v 16 Edo ungo na bekuba ero na beitigari ge sisena iji ainde otao da rawa mi na kondade aera. Ungo berari na doturisera. Edo God mi ungoda wasiri bebegae awa koturase. \v 17 Awarate Iesu Keriso mi nangae da atise etiri na goroba isena awasedo na binga ewamei berari awa minonu embo Jew ae ainda seteno ungo ingititara. Edo naso wasai mane awa ungo dombu jinjeri de teta wo nembodiba jawo lion inge rate Keriso mi na uso be da awa soregurara. \v 18 Gaegae edo wasiri bebegae mi na paturase sedo God mi na soregedo na uso gitijigari yei utu da ainda itadira. Edo umo iji matawa jasiga ari bare. Awara. \p \v 19 Edo Priscilla de Aquila de Onesiphorus da orobe de awa seio gore ungo ategurena. \v 20 Edo Erastus awa Corinth nati da atira. Edo Trophimus Miletus nati da awa karu etiri gido na umo ainda dodo ainda mambutana. \v 21 Edo gido ga wosae atirari naso yei buguio. \p Eubulus de Pudens de Linus de nanonamendi nenei de da imo ategurera. \p \v 22 Edo Bada Iesu Keriso iso asisi de da atare. \p Edo God da ewamei ari ingoda yei matawa atare. \cls Awara \cls Iso namendi \cls Iesu Keriso da jawo da \cls Paul