\id 2TH - Ewage-Notu NT [nou] -Papua New Guinea 1987 (web 2014) \h 2 THESSALONIANS \toc1 Ove Nei Thessalonica Nati Embobo Mi Burisera \toc2 2 Thessalonica \toc3 2Th \mt1 Ove Nei Thessalonica Nati Embobo Mi Burisera \c 1 \p \v 1 Na Paul mi Silas de Timothy de da ove eiawa Thessalonica nati embobo Iesu gebe edo era edo God ingodenaso de Bada Iesu Keriso de da topo da yei gaiera. \p \v 2 God Mamo de Bada Iesu Keriso de mi ingoda yei ewamei de jo jamo jamo de itore. \s1 KERISO ENGENEMBADIRA IJI AINDE GOD MI EMBO KASADIRA \p \v 3 Nanonamendi nango iji berari ingo awa embo God da yei doio sedo era. Edo nango doio awodo sedo era amone awara ainda be awa ingoda tumonda ari awa bajido nembodiba iri edo ingoda dubo mina bara ari awa nembodiba ira awasedo. \v 4 Edo nango God da Iesu gebe ari embobo awa esega era aingo de ingo jasiga era. Edo ingo dari gaiari de memesi nembodiba de burewa te ingo doae Keriso gebe ise atewa awasedo nango ingo jasiga era. \p \v 5 Edo ingo dari gaiari de memesi de burewa amimi isaga ira awa God mi embo awa inono da kasadira ainda be awa ingoda dari gaiari de memesi de burewa amimi ingo awa sia ira God uso gitijigari iji de uso ewamei ari awa badewa. \v 6 Edo Iesu Keriso engenembadira iji ainde God mi ro ewamei awa adira. Edo embo amemi ero ingo memesi burewa awa God mi ari ungo riroga badera. \v 7 Edo amboda Bada Iesu uso asisi ewagaewa goroba de da utu dodo umo umosuka isaga adira iji ainde God mi ingo memesi burewa ainda yei jango indari ititise nango de daedo itadira. \v 8 Edo Keriso bugadira ainda embo God gae ainda embo binga ewamei Bada Iesu da jawo da ingido edo kera ae edo era embobo ainda yei riroga teta riawo ambe da ewudo ira ainda avewa inge awa Keriso mi itadira. \v 9 Edo ungo riroga badera awa matawa atae ae atadira. Edo Keriso bugadira iji ainde ungo de Keriso de awa ewoga ewoga adera edo ungo mi mana uso usasa goroba de awa gadera. \v 10 Edo Keriso bugadira iji ainde uso embobo berari ungo umo gebe edo era amimi saboa ari de umo jasiga adera. Edo ingo awa embobo ainda teda adewa ainda be awa ingo binga nango mi ingoda yei sisera awa gebe isewa awasedo. \p \v 11 Edo awasedo nango ingoda jawo da iji berari God manunugedo era. Edo nango manunugedo sedo gido era unemi ari ingo rawodo atawase umo dipapa ira awodo atadewa. Edo ingo awa embo ewagaewa adi dipapa edo ewa awasedo na God da yei sedo gosena uso goroba mi ingo kondade arase. Edo ingo ingoda tumonda ari da buro awa awase God uso goroba mi ingo kondade are. \v 12 Edo awodo ingoda yei ari ingodenaso God de Bada Iesu Keriso de da ewamei ari awasedo ingodenaso Bada Iesu da jawo awa jasiga irirowo edo Iesu mi ingo jasiga are. \c 2 \s1 EMBO BIAE BE BIAE DA GE \p \v 1 Nanonamendi na boroko ingoda yei sadena ingodenaso Bada Iesu Keriso engenembadira aingo de unemi ingodena jumbari ingodena inda vitido ungae dada adera awa sadena. \v 2 Edo na ingoda yei sedo gosena, embo da amemi Keriso da iji re bugira eire sadira awa mana mana edo dubo vevera eove. Edo embo da mi sadira God mi uso yei ge itira sedo awase sadira Keriso da iji re bugira sadira. Edo embo nei binga awa minonu sima awase sadira Keriso da iji re bugira sadira. Edo embo nei awa sadira nango mi ove etero Keriso da iji awa bugira sari ge sadira. \v 3 Edo gaegae edo embo da ge awodo sadera amimi ingo gandubeore ungoda ge awa gebe eove. Edo Keriso da iji bugae atirari embo jiwae be jiwae awa God kera ari ujo ae adera edo God ujo ae adera. Edo Embo Biae Be Biae awa umo amboda riawo matawa ewuse atadira ainda mambadira awa umo bugadira. \v 4 Edo Embo Biae Be Biae umo embo mi rora berari de asisi berari de tumondebain edo era awa ujo ae adira. Edo unemi sadira unemi rora berari awawa derigari sadira. Edo Embo Biae Be Biae amimi God da tumondebain ari oro da torido umo awa God sadira. \p \v 5 Edo ingo ruvegurisevita matu na ingode atisena ainde na awa ingoda yei ge re sisena. \v 6 Edo Embo Biae Be Biae amone boroko bugae etira te rora da ro mi uso emboro awa beitigurira. Edo ingo rora ro mi uso emboro beitigurira amone gosewa. Edo amboda rora uso emboro gajira rora awa serigadira iji ainda Embo Biae Be Biae amone bugadira. \v 7 Edo God mi ingodenaso yei embo wasiri bebegae boroko era awa isaga isira te amboda awa embo mi wasiri bebegae be bebegae awa adera. Edo embo Biae Be Biae da emboro gajira awa serigadira iji ainde embo mi wasiri bebegae be bebegae awawa adera. \p \v 8 Edo Embo Biae Be awa bugudo isaga adira awarate Iesu Keriso awa bugadira iji ainde umo opu mi edo uso bugari da goroba nembodiba de usibesi adira. \v 9 Edo Satan mi uso yei goroba itari Embo Biae Be Biae awa bugudo unemi ari wasiri goroba de neinde kainde adira edo umo wasiri awa adira wasiri amimi embo gandubadira edo wasiri embo mi matu gae awa adira. \v 10 Edo unemi embobo riawo mata awodo ewuse atima ira ainda mambadera ainda yei gebusari ge neinde kainde awa sadira. Edo embo riawo matawa ewuse atira ainda mambutera ainda be awa ungo God mi ungo soregurase ujo ae ise uso ge moka be awa bae era awasedo. \v 11 Awasedo gebusari ge awa ungoda joda atadira edo gebusari ge awa gebe orase sedo God mi ari uso gebe moka ainda be awa mana gadera. \v 12 Awasedo embo ave God da gebe moka awa gebe aerate wasiri bebegae ise iaviri adira embo awa God mi kasadira. \s1 GOD MI UNGO SOREGADI KOTISIRA \p \v 13 Nanonamendi iji berari nango ingo God mi dubo budo ira awasedo God da yei doio sadera. Tuturo da God ingo awa kotedo ingo soregadi kotisira edo God ingo uso embobo awase kotisira. Edo God awa ingo soregadira edo ingo awa uso embobo adewa ainda be awa Asisi Kotopu mi ingoda jo awa segetiri ewagaewa isera edo ingo God da gebe moka awa gebe edo ewa awasedo. \v 14 Edo nango binga ewamei awa ingoda yei minonu sedo isera edo emboro re awodo da God mi ingo uso soregari kumbudo uso embo awase jawo sisira. Edo God mi ingode Iesu gebe ari embobo nenei de dada jawo sisira ingodenaso Bada Iesu Keriso da usasa kumbawase. \v 15 Awasedo nangoda nanonamendi ge moka be nango mi minonu sari mi ove jiwari mi ingo atopapotisera awa ge moka be ainda jigido takibedo edo gebe ari awa atae eove. \p \v 16 God ingodenaso Mama mi ingodena dubo burisira. Edo God uso ewamei ari mi etiri ingodenaso jo awa goroba de matawa atira edo unemi ingodenaso yei ro adira awa euri gosera. Edo God de ingodenaso Bada Iesu Keriso de ungo mi oro ingo oju ae atave. \v 17 Edo ungo mi esusu oro ro ewamei awa goroba de ise edo save. \c 3 \s1 NANGODA JAWO DA GOD MANUNUGEWO \p \v 1 Nanonamendi Keriso da binga awa burigi be rawari edo embo mi God doio sise Keriso da binga awa ingo mi burisewa da awodo borase sedo nangoda jawo da God manunugewo. \v 2 Edo daedo God sedo giwo embo bebegae bugoro unemi nango soregarase ainda be awa embo jiwae be awa Keriso da binga gebe ae awasedo. \p \v 3 Awarate God mi iji berari ingo kondade adira. Edo unemi ingoda jo ari goroba adira. Edo wasiri biae embo mi ingoda emboro da bugadira te God mi uso emboro awa gajedo ingo soregadira. \v 4 Edo God mi nango seuri gido era ingo boroko ro ewa awa edo da awodo nango mi ro awase sadera awa adewa. \p \v 5 Edo ingo mi God da dubo bari awa gosirowo ingoda dubo bari awa bajarase edo ingo mi Keriso atae ae isira awodo awase sedo sena Keriso mi ingo kondade are. \s1 IESU GEBE ARI EMBOBO BURO ORE \p \v 6 Nanonamendi Bada Iesu Keriso da jawo da nango mi ingoda yei sera ingiwo. Edo nanonamendi berari begogo embobo nango mi ro orase sititara awa ae era awa dowo. \v 7 Edo ingo ingosuka gosewa ingo buro adewa teta nango buro isera da awodo. Edo nango ingoda teda atisera awa nango begogo embobo aera. \v 8 Edo embo mi nangoda yei indari itido isera awa nango embobo ainda yei indari da gano awa itido isera. Edo iji berari nango buro edo isera ainda be awa nango ingo mi gano mi indari ori edo nangoda yei itowase ujo ae ise edo isera. \v 9 Edo nango ingoda yei ro edo isera awa embo ingoda yei sedo goro nangoda yei indari itae etewa amone awara te nango ingoda yei sedo gaera ainda be re nango ingo mi nango gano badi buro era awa gido da awodo awasedo sedo edo isera. \v 10 Edo nango ingode atise ingoda yei sedo isera embo ave buro ari ujo ae adira embo awa indari indure sedo isera. \p \v 11 Edo nango eiawa ingoda yei sera ainda be nango ingera embo nenei ingoda teda atera awa begogo embobo ra awasedo. Edo ungo buro ae rate ungo tepo yima itido puma itido ise embo nenei da buro awa gido kiki dirido era. \v 12 Edo embobo awa sewo gore nango mi Bada Iesu Keriso da jawo da sari gari ititise sera wasiri biae awodo awa eove te gano budo indari de rora de ori adi buro ewo. \p \v 13 Edo nanonamendi ingo ari ewagaewa ima begogo ari dove. \v 14 Edo awasi embo da ingoda teda awa nango mi ro ove einda sera awa ae edo ita rora. Edo embo da ave nango ro sera awa ingae adira awa men garase sedo gido garago ewo. \v 15 Awarate uso yei gitopo da ae etewa awodo awa eove ta uso yei sewo ingesa awodo eose teta ingoda orobe da yei sasaimbari mi sae etewa awodo awa sewo. \s1 PAUL UNGO ATEGURISIRA \p \v 16 Keriso umo umosuka awa ingodenaso jo jamo jamo ari da susu ra edo iji berari ingoda yei ro adira awa unemi ingoda jo jamo jamo ari itare. Edo Keriso ingo berari de daedo atare. \p \v 17 Na nasuka naso ingo mi eiawa jivena, na Paul mi ingo ategurena. Edo ove berari nanemi gaiewona awa na ove sangove awa gaiena. \p \v 18 Edo ingodenaso Bada Iesu Keriso da ewamei ari ingo berari da yei matawa atare. \cls Awara \cls Ingoda namendi \cls Iesu Keriso da jawo da \cls Paul