\id 2PE - Ewage-Notu NT [nou] -Papua New Guinea 1987 (web 2014) \h 2 PETER \toc1 Ove Nei Peter Mi Gaisira \toc2 2 Peter \toc3 2Pe \mt1 Ove Nei Peter Mi Gaisira \c 1 \p \v 1 Na Simon Peter Iesu Keriso da kondade ari embo edo Iesu da binga atopatari embo mi ove eiawa jivena. \p Edo na ingo tumonda ari nangoda da awodo kumbusewa embobo ainda yei jivena. \p Ingodenaso God de soregari embo Iesu Keriso embo berari da yei ari da awa berari edo ira amimi tumonda ari eiawa ingodenaso yei ititisira. \p \v 2 Edo ingoda gari God da edo ingodenaso Bada Iesu da amimi ari ewamei ari de jo jamo jamo de ingoda yei jiwae be bugare. \s1 GOD MI INGODENA JAWO SISIRA \p \v 3 Edo emboro God dipapa ira eiedo ingodenanemi atorase edo uso gari burise God uso goroba mi kondade ari rora berari awa ingodenaso yei ititisira. Edo God uso usasa de ewamei ari de kumborase jawo sisira awa ingodena umo gari ra awasedo umo kondade ari rora berari awa ingodenaso yei ititisira. \v 4 Edo God goroba nembodiba da amimi ingodenaso yei kando mina nembogamo de itadi sisira awa ititisira. Edo embo busu da atera awa ungoda dipapa awa bebegae ra. Edo gaegae edo dipapa da amimi ingodenaso jo da poka edo erido ingodena usibesi eurase sedo God mi kando eiawa ingodenaso yei ititisira. Edo ingodena kando awa kumberero ungo mi ingodena kondade oro ingodena dipapa bebegae da emboro awa dodo sumbudo God da yei mambadera. Edo uso yei da sumbudo mambudo uso wasiri awa kumbadera. \p \v 5 Awasedo kotedo gogo edo ingo Iesu Keriso awa tumonda ise daedo ewamei ewo. Edo ingo ewamei ise daedo jiro gari mi ewo. \v 6 Edo ingo jiro gari mi ise daedo kakana ewo. Edo ingo kakana ise daedo goroba ewo. Edo ingo goroba ise God rawodo atawase dipapa ira awodo atiwo. \v 7 Edo God rawodo atawase dipapa ira ingo awodo atise daedo jao namendi ari wasiri awa mina ara ewo. Edo ingo jao namendi ari wasiri mina ara ise daedo embo berari dubo buwo. \v 8 Edo ingo awodo irirowo rora ewagaewa berari amimi bajido nembodiba edo ari ingo Bada Iesu Keriso da gebe moka awa gadewa. Edo ingo uso gebe moka awa gosise buro irirowo edo be jiwae be adira. \v 9 Awarate embo ave awodo ae adira embo awa diti guba adi aikambu ari edo umo rora besaun be awa gadi jaradira. Edo embo awa embo ainda wasiri bebegae matu awa God mi kotembedo dodo edo uso jo biae segisira awa ruvegadira. \p \v 10 Awasedo naso nanonamendi God ingo jawo sira awa be arase sedo edo uso ewamei ari awa ingode da atarase sedo awa buro goroba edo ewo. Edo ingo awodo adewa awa ingoda tumonda ari goroba edo atirari ingo mana duradewa. \v 11 Edo ingo awodo adewa awa amboda ingo ingodenaso Bada edo soregari embo Iesu Keriso da gitijigari yei matawa atari da toradewa iji ainde unemi sadira puio torase sadira. \p \v 12 Edo ingo rora einda be awa gido gogowo edo edo ingo gebe moka ingisewa awa gebe ise goroba de dederewa te gaegae edo ruvegeowase sedo nanemi ge awawa matawodo sise atadena. \v 13 Edo na wasiri de atena ingo de nanemi rora eiawa ingoda yei sekago sadena amone awara. \v 14 Edo ingodenaso Bada Iesu Keriso mi isaga naso yei siutara naso tamo eiawa kongedo itadena ainda iji awa aikambu etira. \v 15 Awasedo gaegae edo ingo rora eiawa ruvegeowase sedo na ingoda yei emboro da itano kotokoto ise atadewa. Edo awodo da na betano ingo mi iji berari rora eiawa kotise atadewa. \s1 PETER MATU KERISO DA USASA GOSISIRA \p \v 16 Nango ingoda yei Bada Iesu Keriso goroba de bugadira sewora awa tepo ewowo kiki saera. Te nango nangoda diti mi uso goroba awa gosisera. \v 17 Edo God Mamo mi Keriso da yei usasa itiri uso dombu da batitibedo janiburisira teta waiko janibedo ira da awodo edo uso bosini janiburisira iji ainde nango awa Keriso da demo da derido atise ro isira awa gosisera. Edo nango ro isira awa gosise edo javi utu usasa de ainda ingisera amimi sisira, “Emone naso mei na awa na dubo bari ena. Edo na uso yei iaviri ena.” \v 18 Edo nango Keriso ga da doriri kotopu da atise edo ge javi awa utu da edo siri ingisera. \p \v 19 Awasedo ingodena binga God da binga sari embobo mi minonu sedo isera awa gebe be ira. Edo ingo binga awa kotedo gogo ewo ainda be awa binga awa teta usasa mi yei umenga da janibarago isira. Awasedo boroko tuturo edo mambudo Keriso engenembadira iji ainda awa binga ewamei gebe ise atiwo. Edo uso engenembari iji awa teta sipo damana sipo ateteuri batitibedo janibedo ira da awodo ra. \v 20 Awarate eiawa kotewo God da ge jiwari kato da gaisera awa embo da amemi uso jiro gari mi ujugadi ae be ra. \v 21 Ainda be awa embobo awa ungoda kotari mi sae awasedo awarate God mi binga awa itiri Asisi Kotopu mi embobo ainda yei ro sadera awa sisira. \c 2 \s1 ATOPAPOTEGARI PASEGA PISEGA DA GE \p \v 1 Matu Israel embobo da teda God da binga be moka sedo isera awawa atima isera awarate daedo binga nenei sari embobo gebusedo isera awawa atima isera. Edo da awodo binga sari embobo gebusedo era awa ingoda teda bugudo atadera. Edo ungo bugadera amimi atopatari pasega pisega awa budo bugudo edo oro ari biae bugadira. Edo ungo bajari mina itido ungo soregurisira awa ujo ae edo edo ungo ungosuka usibesi ari God mi ungo itari matawa euse atima ira ainda mambadera. \v 2 Awarate embo jiwae be ungoda emboro biae awa ambo ambo edo edo dita baita da wasiri awa adera. Edo embo jiwae be mi wasiri bebegae ungo mi era awa gido edo gebe moka da emboro da ge bebegae sadera. \v 3 Edo atopapotegari pasega pisega emimi gano dipapa edo edo ingoda yei kiki gebusari awa sadera. Edo ungo awodo ise edo ingoda rovi ravi kumbadera. Awarate iji tupo atae be ungoda kasari itari embo awa sia isira edo ungoda usibesi ari embo awa dombu gunjisira. \p \v 4 Edo matu boroko ae be asisi ewamei wasiri bebega isera awa God ungo jo ae isira awarate umo ungo itiri mambudo Satan da yei da mambusera edo ainda meko umenga da bunditero ainda atera. Edo ungo ainda atera awa ungoda kasari kumbari iji awa simba ise atera. \v 5 Edo God embo matu be matu atima isera awa jo ae edo ungoda rovi ravi usibesi edo isira. Edo God mi umo nembodiba itiri bojisira edo umo Noah atari ewamei da binga minonu sedo isira ainde edo embo nenei 7 awodo de awa soregurisira te embo nenei busu da atima isera awa wasiri bebegae edo isera umo da indido ambusera. \p \v 6 Edo God mi sisira Sodom nati embobo de Gomorrah nati embobo de awa wasiri bebegae era awasedo God mi riawo utu da edo itiri wosedo embobo ainde ungoda nati de awa ewusira. Edo God awodo isira awa embo wasiri bebegae edo era ainda yei ro adiri awa isaga edo isira. \p \v 7 Edo embo ewamei Lot da jo awa bouga isira ainda be awa umo Sodom nati embobo awa wasiri bebegae be ise edo agodari ae atima isera awasedo. Edo God mi Lot soregurisira. \v 8 Edo embo ewamei Lot umo Sodom nati embobo da teda atise gosisira iji berari embobo awa men gae wasiri bebegae edo isera awasedo uso jo awa bouga be edo isira. \p \v 9 Edo God awa Lot jo isira awasedo ingodena gosera embo God da emboro da pepeta ise memesi de bagari neinde kainde de burera awa God umo ungo rawodo edo soregadiri awa gosira. Edo God Sodom nati embobo bebegae awa kasisira awasedo ingodena gosera God embo wasiri bebegae edo era ainda riroga itadira awa. Edo ingodena gosera boroko God embo eiawa sasainbari mi edo ira awarate amboda iji God mi embo berari kasadira awa bugadira edo iji ainde embobo awa ungoda riroga kumbadera. \v 10 Edo ingodena gosera embobo awa ungoda joda dipapa bebegae awa iji berari ise edo God da bajari ari awa ujo ae edo era ainda yei God mi riroga awa itari bugadira. \p Edo atopapotegari papasega embobo eiawa ungo jariga da ge awa sedo era. Edo ungo utu da asisi ewamei usasa de embo mi gae jaredo era awa sapo ae dodo ge bebegae ungoda jawo da sedo era. \v 11 Edo asisi ewamei da goroba mi atopapotegari bebegae einda goroba awa derigedo atera te ungo God da diti da atopapotegari papasega eiawa tini gambari ge mi bekuba aera. \v 12 Awarate atopapotegari papasega eiawa ungoda kotari bebegae da awodo wasiri awa era. Edo ungo wasiri ro edo era awa kotise ae wasiri teta ambe wo ingode gaedo indadi edo era amimi arago edo era. Edo ungo rora ungo gae ainda jawo da ge bebegae sedo era. Edo usibesi ari awa ungoda yei bugadira teta usibesi ari ambe wo da yei bugudo ira da awodo. \p \v 13 Edo ungo mi eoro embo nenei memesi budo era awasedo ungo memesi kumbadewa awa ungoda mina bari ra. Edo ungo iji berari umo okain indido jiro bebegae edo era te ungo awodo era awa iaviri era. Edo ungo awa embo bebegae ra. Edo ungo embo gari ewagaewa awodo iso bondo da indari indadi bugutera te ungo mi ero men gari iso embo da teda bugutira ainda be awa ungo iji berari wasiri bebegae edo era awasedo. \v 14 Edo ungo iji berari wasiri biae adi sedo diti mi emboevetu ditini edo era. Edo ungoda dipapa berari awa bebegae be ra. Edo ungo emboevetu goroba egae awa gitijigido wao da itoro wosedo era. Edo iji berari ungo jinaga embobo edo gano de rovi ravi de dipapa edo era. Edo embobo eiawa God da riroga kumbudo edo riawo matawa ewuse atima ira ainda mambadera. \p \v 15 Edo ungo emboro dambuderari awa dodo edo munenegetera. Edo ungo Balaam Bosor da mei da emboro da uso tei kotu ambo ambo era. Edo Balaam gano kumbadi sedo wasiri biae adi iaviri isira. \v 16 Awarate God mi sisira awodo eurase. Edo wo donkey ge sae edo ira awa ge teta embo mi sarago edo Balaam da emboro biae awa beitigurisira. \p \v 17 Edo embo umo ujo mi biae edo umo da mambudo umo evevegeuri gido dubo vevera edo era. Edo da awodo embo kondade badi dipapa edo atopapotegari teta umo evevegari ingege einda yei mambudo kondade ari kumbae ed dubo vevera edo era. Edo daedo atopapotegari awawa teta poroga bisara mi piguri burigi be sumbudo era te sasaka meani wosae edo ira da awodo ra. Edo God mi atopapotegari einda yei awa umenga soropu da sia isira. \v 18 Edo ungo jariga awodo kotise ge puti sedo era. Edo embo mi ungoda ge puti awawa gebe orase sedo ungo teta jiro gari embobo inge edo embo atopatido era. Edo ungo awodo ise embo wasiri biae da emboro doadi edo era awa ungoda jo kumbari ge mi sedo jumboro sekago wasiri biae da emboro da mambudo era. \p \v 19 Edo ungo embo da yei sedo era, “Ingo nango ambo ambo adewa awa ingo rora da ro da agipo adi aera.” Awarate ungo awodo sera awa ungo ungosuka awa rora bebegae da agipo embobo era edo ainda be awa rora ro embo mi sapo ira awawa embo awa rora ainda agipo embo edo ira. \v 20 Edo embo ingodenaso Bada edo soregari embo Iesu Keriso da ge ingido edo embo God gae da emboro biae doadera te ungo amboda emboro biae da wareregadera awa ungo emboro ainda pepeta adera awa ungo teta wao da wosari inge adera. Edo ingode embobo ainda jawo da sera, “Matu ungo Keriso da ge gae atisera ainde ungoda atari awa biae ra awarate boroko ungoda atari awa biae be biae ra.” \v 21 Edo embobo awa emboro ewamei awa tambae adera awa amone biae be ra. Awarate embobo awa emboro ewamei da pepeta ima dodo emboro biae da wosadera amone biae be biae ra. \v 22 Edo ungoda yei ro adira amimi isaga adira awa dengoro bagari ge eiawa gebe ira, “Sino awa uso bero tugedo ira ainda engenembedo ira edo pu awa embo mi kainyedo era ainda engenembedo busu da apepo apepo edo ira. \c 3 \s1 IESU KERISO ENGENEMBADI SARIGARI SISIRA \p \v 1 Naso otatao na matu ingoda yei ove isena edo boroko na ove nei ena. Edo ove etoto einda jo da na ingoda kotari ewamei jiro da awa ewo wujadi jarena. Gaegae edo ingo God da ge awa ruvegeowase sedo na ove etoto ena. \v 2 Edo na ingo God da binga sari embobo mi ge matu be sisera awa ruvegeowase ujo ae ena. Edo daedo ingodenaso soregari embo Bada da uso binga atopatari embobo mi ge ro ingoda yei sisera awa ruvegeove. \p \v 3 Edo giwo iji sangove da embo nenei ungoda dipapa bebegae da awodo atima era awa bugadera. \v 4 Edo ungo mi ingo ganduburise sadera, “Iesu mo engenembadi sari gari sisita mo saeri? Edo umo engenembadi sisira mo umo mo rawari? Nangoda mamoumbogo atisera edo bebetisera awarate iji ainda tuturo edo God rora berari isira edo bugudo boroko rora berari awa da awodo atira.” \p \v 5 Edo embobo awodo sera awa ungo ruvegurera matu be matu God utu de busu de isira awa. Edo God mi ge setiri utu de busu de sirore isira. Edo God mi etiri busu umo jo da vitiri edo umo mi busu jineneburisira edo busu soropu da atisira. \v 6 Awarate amboda umo mi vitido busu pendetiri embo berari de rora berari de awawa usibesi isira embobo da wasiri bebegae awasedo. \v 7 Edo utu de busu de boroko atira te amboda God mi ge setiri riawo itari bugudo edo amimi utu de busu de awa usibesi adira. Edo iji da ainde God embo umo ujo ae ewora awa kasise ungo usibesi adira. \p \v 8 Naso otatao awa dubo burena ge da eiawa ruvegeove. God iji da awa gido ira iji da awa teta gaeko 1,000 inge edo ira edo umo gaeko 1,000 awa gido ira gaeko 1,000 awa teta iji da inge edo ira ainda be awa iji etoto eiawa uso yei awa da edo ira. \v 9 Edo embo nenei mi eiawa sedo era Keriso da jawo da Keriso awa umo uso engenembari iji awa ro sisira awa mana mana ise gido umo iji nenei budo pundugedo pundugedo edo ira sedo era. Awarate embobo awa ge ro sera awa gebe aera. Awarate embo riawo matawa euse ainda mamborase edo embo berari mi ungoda wasiri bebegae awa dodo God da yei wareregorase sedo umo jo edo ira. \p \v 10 Awarate Keriso da iji nembodiba awa bugadi sima bugarago teta bengono embo mi bugarago adira. Edo iji nembodiba awa bugari embo mi javi nembodiba utu da ingiroro edo utu atae adira. Edo utu da rora berari ingode gido era awa evedo atae adera. Edo busu de uso rora berari de awa atae adira. \p \v 11 Edo rora berari awa awodo da atae adira awa gosise ingo kotewa ingo wasiri biae adewa amimi atevita ko ingo kotewa ingo wasiri ewamei adewa amimi atevi? \v 12 Edo ingo God da iji awa simba ise gido atari ewamei atise edo wasiri ewamei ewo. Edo iji awa burigi bugarase dipapa ewo. Edo iji awa bugari utu awa evedo atae adira edo rora berari utu da awa vevera edo tiwadira. \v 13 Awarate ingodena awa God umo ro adi sedo sari gari sisira awa simba era. Edo umo utu seka edo busu seka adira sisira edo ainda awa embo mi ari ewagaewa umo umosuka adira te biae adi aera. \p \v 14 Awasedo naso otatao ingo iji awa bugarase simba ise gido iji berari God da diti da edo gido ewamei adi ewo edo wasiri biae ae ewo edo God ga da umo jigari ewamei da ewo. \v 15 Edo ruvegeove God umo ro edo umo ro adi sisira awa simba ira awa. Edo embo mi uso soregari da binga ewamei awa berari edo gido ingorase sedo umo simba ira awa ingodenaso namendi Paul ingode dubo burera amimi uso jiro gari God mi ititisira awa jingama edo ingoda yei daedo gaisira. \v 16 Edo Paul da ove berari da umo ge awa isaga edo gaiedo isira. Awarate Paul da ove da ge nenei da be awa unjugari ra awasedo embo jiro gari ae awa mana mana edo ge awa ujugari bebegae edo era. Edo ungo daedo jiwari da papatu nenei awa gae awasedo jiwari da sari awa bebegae sedo era. Edo ungo awodo edo era awa usibesi ungoda yei bugarase sedo kondade edo era. \p \v 17 Awarate naso otatao ingo eiawa matu gari ra. Awasedo gaegae edo atopapotegari papasega embobo mi ingo gitijigido soregari yei awa dodo mambari durove ta gido gogo ewo. \v 18 Awarate God ingo jo ari ingoda tumonda ari awa iji berari bajare. Edo ingoda jiro gari ingodenaso Bada Iesu soregari embo da yei awa iji berari bajare. Edo embo berari ungo boroko edo iji matawa ingodenaso Bada Iesu Keriso jasiga ore. \cls Awara \cls Iso namendi \cls Iesu Keriso da jawo da \cls Peter