\id 2CO - Ewage-Notu NT [nou] -Papua New Guinea 1987 (web 2014) \h 2 CORINTHIANS \toc1 Ove Nei Corinth Embobo Mi Burisera \toc2 2 Corinth \toc3 2Co \mt1 Ove Nei Corinth Embobo Mi Burisera \c 1 \p \v 1 Na Paul, God da goroba mi Iesu Keriso da binga atopatari embo isena. Ingodenaso namendi Timothy mi nangae da ove eiawa Corinth nati da God da embo berari atima era edo Greece busu da God da embo atima era ainda yei ititera. \p \v 2 Edo God ingodenaso Mama de ingodenaso Bada Iesu Keriso de mi oro ingoda jo jamo jamo are. Edo ingoda yei soregari kando ore. \s1 PAUL GOD JASIGA ISIRA \p \v 3 God ingodenaso Bada Iesu Keriso da Mama edo Mamo ingodena jo edoingodena kondade edo ira awa ingode jasiga ore. \v 4 Edo ari bebegae ingodenaso yei bugudo ira awa umo ingodena kondade edo ira awasedo ingodena embo nenei ungoda yei wasiri bebegae gari neinde kainde bugudo ira awa ingodenanemi embomei awa kondade edo era. God mi ingodena kondade edo ira emboro da ainda ingode embo nenei awa kondade edo era. \v 5 Edo ingodena memesi nembodiba Keriso mi burisira da awodo budo era te ingodena uso kondade ari nembodiba budo era. \v 6 Edo nango memesi badera awa memesi amimi ingo kondade badewa. Edo nango kondade badera kondade awa ingo daedo badewa. Edo ingo goroba ari budo memesi awa bawase sedo re ingo kondade nango mi burera da awa ingo burewa ainda be awa memesi nangoda yei bugudo ira awa ingoda yei daedo bugudo ira. \v 7 Awasedo nango gosera ingo mana Iesu gebe ari awa atae adewa. Edo nango gosera memesi nango burera da awa ingo burewa te nango daedo gosera kondade ari nango mi burera da awa ingo mi burewa. \p \v 8 Edo nango Asia busu da atera ainda memesi nangoda yei puma ira ainda binga awa ingo kiambu gae ta rora awasedo ingoda yei sano gadewa. Edo nango memesi nembodiba budo era amimi nangoda goroba awa atae adi aikambu edo ira edo nango kotedo era awa nango betaderi ta rora. \v 9 Edo nango kotedo era nango betorase dodo era awodo kotedo era. Awarate memesi eiawa nangoda yei edo ira amimi nango nangosuka awa tumonda eorase awodo edo ira awarate awodo ari nango God betari embo jiguri erido era awa tumonda orase edo ira. \v 10 Edo nango memesi biae be budo isera amimi etiri nango betari aikambu isera te God mi nango soregurisira. Edo da awa aera te memesi sekago nangoda yei bugadira edo ingo iji berari God da yei sedo gawo umo iji berari awodo ise nango soregadira. \v 11 Edo awodo ise God mi ingo mi ro arase sewa awa na embo adira. Edo embo jiwae be mi God mi nango jo edo kondade ira ainda emboro awa gido ungo mi umo jasiga adera. \s1 PAUL DA KOTARI WAREREGURISIRA \p \v 12 Nangoda jo mi sira nango busu da atera ainda emboro awa ewamei sira awasedo nango jariga era. Edo ingoda jo da awa God mi ari nangoda be awa jamo aera. Edo nango busu da atima era embobo ainda jiro gari mi ingo awa sapo aera te God mi nango kondade euri nangoda kera ari ingoda yei amimi kera ari embo nenei da yei edo era awa derigedo ira. \v 13 Edo nango ingoda yei ge unjugari da awa jiwae rate nango ge gaedo era awa ingo ajigedo gido ainda be awa gido ewa. \v 14 Edo ingo nango awa be gae sumbae edo ewa awarate ingo nango gido gogowo awase dipapa era. Edo ingo nango gido gogowo edo iaviri adewa nangoda buro awasedo. Awasedo Bada Iesu da iji sekago bugadira iji ainde nango ingo awasedo iaviri adera edo ingo nango awasedo iaviri adewa. \p \v 15-16 Edo awa be gido gogo ise na ingo esega adi kotetena. Edo Macedonia busu da mambuse na petedo ingo gadena awa kotetena. Edo amboda na Macedonia busu da mambudo edo engenemburise na sekago petedo ingo gadena awa kotetena. Edo na ingo iji etoto awodo esega adena amimi ingo ewamei ari etoto badewa. Edo na ingo esega irinono ingo na kondade awo na Judea busu da mambadena awa na awodo kotetena. \v 17 Awarate awodo kotedo na naso jiro wareregetena awa ingo naso jawo da sewa, “Paul re goroba ae etira. Edo umo rora ro adi edo ira awa jo etoto edo ira.” Edo na ro adi dipapa edo ena amomo namomo embo God gae awodo ta? Edo ungo awara sedo ungo rora ro awa adi sedo era te ungo ae edo era. Namomo awodo ta? \p \v 18 Awodo aera. God gebe sedo ira da awodo na awara sadena awa naso ge awa gebe adira. Edo na jiro etoto ise ge sae ra. \v 19 Timothy de Silvanus de namonde awa ingoda yei Iesu Keriso God da mei awa seoro gido ewa. Edo umo awara sedo ira awa umo rora rori awa edo ira doae ra. Edo umo iji berari umo ro adi sedo ira awa edo ira. \v 20 Edo God umo ro adi sari sedo ira Iesu Keriso da buro awasedo awa be edo ira da awodo nango Iesu Keriso da jawo da awara sera. Edo nango awodo sise God jasiga edo era. \v 21 Edo God mi euri ingodena tumonda ari mi goroba de Iesu Keriso da dombu da derido era. Edo God mi nango awa uso buro embobo orase kataburisira. \v 22 Edo embo mi nango awa God da topo awa gorase sedo God mi nangoda tamo da bubuko ititisira. Edo Asisi Kotopu nango mi burisera awa kando tuturo God mi nangoda yei ititisira. Edo nango kando awa burisera amimi etiri nango God umo amboda ingodenaso yei ro itadi sisira awa itadira awa gosisera. \p \v 23 Edo God gosira na gebe sena awa. Edo gae gae edo nanemi ano ingo dubo vevera tambowase sedo na ingoda yei bugudo biae awodo eose awa sari jaredo gido na naso ingo esega ari da kotari awa Corinth nati da ainda atae isena. \v 24 Edo ingo awa goroba de Keriso gebe ise uso emboro da pepeta ewa edo ingoda yei nango mi eiawa eio edo eiawa eose awa sari ujo ae era. Awodo aera te nango dipapa era awa ingo jo iaviri de Keriso da emboro da pepeta awase dipapa era. \c 2 \s1 PAUL UMO CORINTH NATI DA ENGENEMBAE ISIRA AINDA GE \p \v 1 Awasedo na ingoda yei bugudo ano ingo sekago dubo vevera tambowase kotetena na mambadi ae kotetena. \p \v 2 Ko na ano ingo dubo vevera tambadewa awa na dubo vevera tambadena edo amemi ari na dubo ewamei eni? Edo embo nanemi ano dubo vevera adera da awodo atadera. \v 3 Edo ingo na bugae atinono wasiri bebegae ingoda teda bugira awa budo ewamei awase sedo na ingoda yei ove nei awa isena. Edo na ingoda teda bugano ingo mi na awo dubo ewamei adena awa ano dubo vevera tambowase sedo na ujo ae ena. Edo na gosena na iaviri adena awa ingo berari awa iaviri adewa. \v 4 Edo na jo memesi de ji de ove awa ingoda yei gaisena. Edo na ano dubo vevera tambowase ujo ae isena awarate na ingo dubo nembodiba budo ena awa gawase dipapa ena. \s1 EMBO NENEI DA BURIA KOTEMBEDO DOWO \p \v 5 Embo da ingoda teda amimi wasiri biae ari embo nenei dubo vevera tambadera awa dubo vevera naso yei da bugae rate ingoda yei bugira. Edo na ge okain sari dipapa aerate umo etiri embo jiwae be teda awa uso wasiri bebegae awasedo dubo vevera tambutewa. \v 6 Edo ingo embo jiwae be mi riroga awa itititawa edo riroga amone inono na. \v 7 Edo boroko umo dubo vevera tambudo edo uso jo ambure ta uso wasiri biae awa kotembedo dowo. Edo kotembedo dodo umo kondade ewo uso jo awa goroba are. \v 8 Edo na ingoda yei sedo gosena uso yei ingo umo be dubo burewa awa edo gogo edo sewo gare. \v 9 Matu na ingo itido gadi na ingoda yei ove nei awa gautana. Ko ingo naso ge awa kera evi ta mo kera adi aeri awa gadi sedo na ove nei awa jiwutana. \v 10 Ingo wasiri biae embo nei mi etira awa kotembedo doadewa gido awa na daedo embo ainda wasiri biae awa kotembedo doadena. Edo embo nei mi naso yei biae adira awa Keriso da diti da na embo ainda wasiri biae awa ingo embo kotembedo doadena. \v 11 Edo nango gosera Satan umo ro adi sia ira awa awasedo gaegae oro Satan mi ingodena paturase sedo ingode ingodenaso wasiri bebegae awa kotembedo mina doa era. \s1 PAUL TROAS AINDA TITUS EURA ISIRA \p \v 12 Edo na Troas nati da Keriso da binga ewamei awa minonu sadi bugeno God mi naso buro awasedo emboro pirigurisira. \v 13 Awarate na jo isira ainda be awa ingodenaso namendi Titus awa ainda tambae isira awasedo na embomei da yei atiwo sedo na Macedonia busu da mambusena. \s1 KERISO MI INGODENA KONDADE ARI DERIGADERA \p \v 14 Awarate ingode God jasiga ore ainda be awa unemi ingodena kondade etiri ingodena Keriso da goroba mi gitopo awa papotera awasedo. Edo God mi nango uso buro orase itiri bugusera edo uso ge awa teta joino muno mi mando da sirido ira da awodo God da ge awa yei berari da ravira. \v 15-16 Edo Keriso nango God da yei itiri God mi nango awa teta embo mi joino muno ewamei awa mimbedo edo budo era da awodo burira. Edo nango God da ge awa embo munenegari ainda yei budo bimbijera awa teta muno biae embo mi mimbedo betedo era da awodo awa nango ra awarate embo God mi soregurira awa teta muno ewamei embo mi mimbedo wasiri de atima era da awodo ra. Awasedo embo amemi buro eiawa adera awa uso inono ni? \v 17 Embo jiwae be God da binga ewamei awa mina badi sedo era te nango awa embomei emimi era awodo aera. God mi nango itiri bugusera awasedo nango wataki edo tumonda ari mi awodo awa uso binga awa minonu sera. \c 3 \s1 PAUL DA BURO GOD DA ADI SARI SEKA DA MINONU AWA \p \v 1 Nango nangoda jawo da ge sedo era mo ingo kotedo ewa nango jariga da ge sera awodo kotedo evi ta? Awodo aera nango jariga da ge saera. Embo nenei mi ingoda yei bugudo ungo embo ewagaewa awodo gawase sedo ungo ove embo nenei mi ungoda jawo da gaedo era awa budo bugudo era. Edo ingo dipapa nango mi ove awodo awa ingoda yei budo bugorase evi ta ko ingo mi nangoda yei ove awodo awa itadi dipapa evi? \v 2 Awodo aera ainda be awa embo mi ingoda tumonda ari Keriso da yei awa gido teta ungo ingo mi nangoda buro ewamei awa ove da gaisewa awa ajigarago edo era. Edo ge eiawa na naso jo da ititisena. \v 3 Edo Keriso umo umosuka buro awa ingoda teda isira awa teta umo umosuka ove awa nangoda yei gaiari inge isira. Edo Keriso ganuma tamo da ove awa jiwae rate umo God da Asisi wasiri de atira amimi ove awa nangoda jo da jiwusira. \p \v 4 Edo nango ge eiedo sera ainda be awa Keriso da desegedo nango iji berari God tumonda edo era. \v 5 Edo nango inono awasedo buro eiawa era awa saera. Awarate God mi iri nango awa inono edo buro eiawa era. \v 6 God da sarigari seka awa agodari gaiae rate sarigari seka awa buro ro Asisi Kotopu mi ira awa ra. Edo God mi euri nango awa inono edo nango sari gari seka da buro awa edo era. Edo agodari jiwari awa nango betorase edo ira te Asisi Kotopu mi nangoda yei wasiri itido ira. \p \v 7 Edo God mi siri Moses mi agodari awa ganuma da gaisira. Edo Moses mi gaedo agodari awa budo embo da yei wowosisira. Edo Moses umo agodari awa ungoda yei ititiri God da usasa nembodiba janibetiri edo Moses da dombu awa usasa nembodiba isira. Edo usasa nembodiba awa tuturo edo atae edo mambusira te embo uso dombu awa gadi inono ae isera. \v 8 Edo agodari awa God da usasa parara de da embo da yei bugusira te Asisi Kotopu da usasa nembodiba mi agodari da bugari da usasa nembodiba awa derigurisira. \v 9 Edo buro embo bebetegorase bugusira awa usasa nembodiba de bugusira awarate God da buro da usasa nembodiba ari embo God ga da umo jigari ewamei orase bugusira amimi buro giti da usasa nembodiba awa derigurisira. \v 10 Awasedo buro seka da usasa nembodiba amimi buro matu da usasa nembodiba awa atae isira. \v 11 Edo buro iji tupo atari da usasa nembodiba awa nembodiba rate buro matawa atari da usasa awa nembodiba be nembodiba ra. \p \v 12 Nango gosera buro seka da usasa nembodiba awa matawa atadira awasedo nango ge unjugae rate oju ae nango God da ge awa sedo era edo goroba de buro awa edo era. \v 13 Edo Moses mi Israel embobo mi uso dombu da usasa nembodiba atae ira awa georase bo mi uso dombu gajisira awodo awa nango awodo aera. \v 14 Edo iji ainde embo da jiro awa gajisira. Edo ainda tuturo edo bugudo boroko ungo sari gari matu awa ajigurise ungo be gae edo isera teta bo mi ungoda dombu dogari ungo gadi jararago. Awarate embo ave Iesu Keriso ga dada adira awa Keriso God da ge awa isaga ari embo awa isaga be gadira teta ungo mi bo embo da dombu gajedo atira awa pirigari embo awa yei isaga garago adira. \v 15 Edo boroko embo Moses da ge awa ajigedo era te ge ainda be awa ungo be gae ra teta bo mi ungoda dombu dogari ungo gadi jararago edo era. \v 16 Edo jiwari mi sira, \q1 “Moses God da yei wareregetiri bo awa dudurisira.” \p Da awodo boroko embo ave God da yei wareregadira embo awa God da ge ainda be awa gadera teta bo mi uso dombu dogedo atira awa durari umo yei sekago garago adira. \v 17 Edo jiwari da tano amimi sira God da jawo da ge sira amone Asisi Kotopu da jawo da ge sera. Edo yei rawainda God da Asisi atira awa embo wujegedo ira. \v 18 Awasedo ingodena berari da dombu awa pirigedo God da usasa nembodiba awa biri biri ira teta iji mi kipa da tamo da gauri biri biri edo ira da awodo. Edo ingodena awa God da Asisi da usasa nembodiba awa gosiroro ingodena awa warereguriri ingodenaso gari awa God da gari da awodo ira. Edo ingodenaso gari God da gari da awodo awa iji dada bajido nembodiba ira. \c 4 \s1 BINGA EWAMEI DA USASA AWA GAJARI AERA \p \v 1 God uso jo ari mi nangoda yei buro eiawa orase ititisira awasedo nango mana jo ambadera. \v 2 Edo nango embo Iesu ge be orase sedo ungo gandubaera. Edo gebusari ge de edo ge nenei awodo de mi ari nango men geosase sedo nangoda gun da itido era. Edo nango God da ge awa mana jigoro wosadira awarate nango gebe mi awa atopatido era. Edo God da diti da nango uso ge moka be awa isaga edo era edo nango buro awodo oro embo mi nango God da buro ewamei be ewamei era awa gorase edo era. \v 3 Edo binga ewamei nango mi minonu sera awa unjugari ge aera te embo nenei awa riawo natopo atari ainda emboro da pepeta edo mambutera edo embo embomei ainda yei awa binga ewamei awa teta unjugari ge inge ungo mi gadi jaredo era. \v 4 Edo ungo God da ge awa gebe ae edo era ainda be awa busu einda god mi euri ungo umenga da atima edo era. Keriso da gari awa God da gari da awodo ra. Edo binga ewamei Keriso da usasa da awa janiburira te Satan mi embo mi usasa eiawa georase gajira. \v 5 Edo nango embo da yei nango ro era awa atopatae rate nango re Keriso Iesu awa embo nembodiba awodo awa atopapotera. Edo nango ingoda yei sera nango awa Iesu da jawo da ingoda agipo embobo ra sera. \v 6 Edo God mi tuturo da sisira umenga einda soropu da dowo usasa nembodiba be janibare. Setiri usasa janiburisira da awodo God amimi etiri uso usasa awa ingodenaso jo da janiburira. Edo ingodena Keriso da dombu da ditini era awasedo nango God da usasa nembodiba awa gosera. \p \v 7 Edo embo nango God da usasa de goroba de burisera amone nangoda tamo ne teta ou busu mi edo era da awodo ra. Edo ou awodo edo era awa atae adira. Edo God mi uso goroba de usasa de ingodenaso tamo atae adira ainda joda itido ira edo amimi goroba de usasa de awa ingodenaso ae awarate amone ta God goroba de ra awa isaga adira. \v 8 Iji jiwae be dari gaiari nangoda yei bugudo ira te dari gaiari amimi nango patae bejae ra. Edo iji jiwae nango mana mana edo era ainda be awa nangoda yei rora awodo ira ainda be awa rori awa nango gae awasedo awarate nangoda jo ambae ra. \v 9 Gitopo jiwae nango ondedo era te God nango dodo mambae ra. Edo iji jiwae embo mi nangoda yei biae edo era te ungo mi nango usibesi aera. \v 10 Edo ungo mi Iesu dorisera da awodo ungo mi iji berari nango dadi jaredo era. Edo embo mi nangoda jo da Keriso atise nango kondade ira awa gorase sedo God mi embo mi awodo nangoda yei awodo orase awara sisira. \v 11 Edo iji berari nango busu da atima era eingo de embo mi nango Iesu da buro embobo awasedo doro betorase jaredo era. Edo embo mi iji berari Iesu mi nango kondade ira awa gorase sedo God mi embo da yei awara seuri awodo re edo era. \v 12 Edo nango iji berari binga ewamei awa minonu sedo era awasedo betari awa nangode da iji berari asusubedo atima ira awarate nango mi buro eiawa era amimi etiri ingo wasiri matawa atari awa betewa. \q1 \v 13 Edo embo ya gaisira amimi sisira, \q1 “Na ge sena ainda be awa na God gebe ena awasedo.” \p Edo ingodena da awodo gebe edo era awasedo ingodena iji berari God da jawo da ge sedo era. \v 14 Edo ingodena gosera God mi Bada Iesu awa wasiri de jigiri eririsira amimi ingodena daedo Iesu gada jigari eradera. Edo unemi nango jigari eroro ingode nangode awa budo uso joda dada adira. \v 15 Edo ro berari nango mi burera amone ingo embo burera. Edo embo mi embo jiwae da teda God da soregari da kiki awa sadera. Edo embo ajigari roinge mi ingera awa bajido nembodiba adira. Edo ungoda ajigari awa bajido nembodiba irirari God da yei ategari ge sari da ajigari awa nembodiba adira. Edo embo mi iji berari awodo ise God jasiga adera. \s1 DEDO GAEDO ARI BUSU DA AMONE RORA KIAMBU RA \p \v 16 Awasedo ingodena mana jo ambadira. Edo ingodenaso tamo awa iji berari awodo ise sasainbedo betedo atae ira awarate ingodenaso asisi awa iji jaige seka ira. \v 17 Edo dedo gaedo ari ingodenaso yei iji dada da bugudo ira amone iji tupo atadira. Edo memesi ingode boroko gosera amimi ari ingode usasa nembodiba natopo atari awa badera. Edo usasa nembodiba amimi memesi awa derigadira. \v 18 Edo ingodena awa rora embo mi boroko gosera ainda ingodenaso dombu awa itae ra te ingodena awa rora embo mi boroko gae jarera rora ainda dombu awa ititera. Edo rora embo mi boroko gosera rora awa iji tupo atadira te rora embo mi gadi jarera rora awa mata awodo atadira. \c 5 \p \v 1 Ingodena busu da einda atise tamo ingode atera amone teta ba boga inge ra. Edo ingodenaso tamo awa teta ingodenaso ba boga mi durarago adira te God mi utu da ingodenanemi atorase mando ira. Edo mando awa embo mi ae rate God mi ira edo mando awa mata awodo atadira. \v 2 Edo ingodena God mi utu da mando awa teta embo mi bo ingodenaso tamo da itido era da awodo itarase be dipapa edo era. \v 3 Gaegae edo ingodenaso asisi awa tamo ae eurase sedo ingodena tamo seka eiawa itarase dipapa era. \v 4 Edo ingodena busu da atari tamo ainde atise ingodena memesi tambutera. Edo ingodena ingodenaso tamo awa totigari ujo ae edo era teta embo mi ungoda ombari matu awa totigedo era awodo edo tamo ae ari ujo aera awarate ingodena awa God mi ingodenaso tamo seka awa itarase dipapa era. Edo ingodena tamo seka badera awa teta ingodenaso tamo seka mi ingodenaso tamo matu bebetira awa nutegari inge adira. \v 5 Edo God awa ingodena boroko sia ira tamo seka awa borase sedo. Edo God mi amboda rora awa berari adira awa sisira awa ge be orase sedo boroko re ingodenaso yei Asisi Kotopu ititira. \p \v 6 Awasedo ingodenaso tumonda ari God da yei awa goroba edo atadira. Edo ingodena gosera ingodenaso busu da atari tamo awa ingodenaso mando edo ira awasedo ingodena God mi mando ira ainda ingode atae ra. \v 7 Edo ingode eiawa gebe awa gosera edo ingode diti mi gosera awasedo aerate ingode God tumonda era awasedo. \v 8 Edo ingodenaso tumonda ari God da yei awa goroba de atira awarate ingodenaso mando seka God mi ingodena awasedo ira awa bari da dipapa amimi ingodenaso mando busu da einda atari da dipapa awa derigurira. \v 9 Awarate ingodena busu da einda ataderi ta ko utu da God ga da ataderi awa ingodenaso wasiri ari da dipapa awa God mi gido dipapa arase awa adera. \v 10 Edo ingodena berari awa Keriso da jo da deroro ingodena wasiri ewamei ewori ta wasiri bebegae ewori ta awa Keriso mi sadira. Sedo ingodena ro ewora awodo da dada riroga badera. \s1 KERISO MI ETIRI INGODENA AWA GOD GA DA OTAO ISERA \p \v 11 Nango God oju edo era awasedo nango iji berari God da binga awa sise embo mi gebe orase dipapa edo era. Edo God ingodenaso jo da gebe moka awa gido ira awodo na ingo eiawa gawase dipapa ena. \v 12 Nango nangoda jawo da nangosuka jariga ge serita? Awodo aera. Edo embo mi sedo era embo da gari arapa da awawa nembodiba ra awarate awawa be aera awasedo ingo mi embobo ainda yei ge mina sawase ainda embo awawa gawase sedo awa nango ingoda yei ge be itoro nango gido jariga awase sedo nango dipapa era. \v 13 Embo mi nango jiro bebegae ari embo serita? Dowo sore. Ko nango ro era amone God da topo awa era. Edo embo mi nango awa jiro embobo serita? Dowo sore. Ko nango ro era amone ingo embo era awasedo. \v 14 Nango ro era berari amone Keriso da dubo bari re ainda susu ra. Edo nango gosera embo da mi embo berari da mina itido bebetisira. Edo ingodenanemi betae etera te Keriso mi ingodena awasedo bebetisira. \v 15 Keriso embo berari awasedo bebetisira awasedo ingodena wasiri de atera awa ingodenaso dipapa dada da awodo ingode buro mana adera. Awarate Keriso ingodena awa embo mina itido betetiri God mi jigiri eririsira awasedo umo embo buro ore. \p \v 16 Matu na embo mo ewa ta ko bebegae ri awa ungoda jawo da embo busu da atima era amimi ge kasedo era awodo ge kasedo isena. Edo daedo Keriso da jawo da na embo busu da atima era amimi kotarago edo isena. Awarate boroko na awodo kotae ra. \v 17 Edo embo ave Keriso ga dada etira embo amone embo seka etira. Edo emboro mamatu awa atae etiri edo emboro seka awa bugira. \v 18 Edo eiawa God mi edo ira. Matu awa ingodena awa God da gitopo ra awarate boroko Keriso da buro mi etiri ingodena awa uso otatao etera. Edo God mi ingodenaso buro awa oro embo nenei awa uso otatao orase buro awa ititisira. \v 19 Nangoda binga re eire. God Iesu mi ro isira awasedo embo da wasiri bebegae kotembedo dodo edo iri ungo uso otatao era. Edo umo binga eiawa nangoda yei sedo edo embo nenei da yei sorase sisira. \p \v 20 Awasedo nango ingoda yei Keriso da jawo da binga ewamei sedo era amone teta God umo umosuka ingoda yei ge sarago edo ira. Edo nango ingoda yei sedo gosera God da gitopo awodo atove ta uso otatao ewo. \v 21 Edo Keriso awa wasiri biae aera te God mi ingodena awasedo ingodenaso wasiri bebegae da mina da bouga awa Keriso da itiri edo Keriso mi ango isira. Edo God awodo isira awa awodo ari ingodena Keriso ga dada edo nango uso ewamei borase isira. \c 6 \p \v 1 Awasedo nango God ga da buro dada ise gido ingoda yei sedo gosera God da jo ari ingoda yei isira awa be ae eurase sera re gido gogo ewo. \v 2 Edo God ge sira eiawa ingiwo, \q1 “Na embo jo edo isena iji ainde ingo na jawo seowo edo na ingo jo edo isena. \q1 Edo na embo soregedo isena iji ainde na ingo kondade isena.” \p Edo naso ge ingiwo, boroko awa God da jo ari bari da iji ra. Edo boroko awa God da soregari bari iji ra. \s1 PAUL MEMESI JIWAE BE BURISIRA \p \v 3 Nango embo mi nangoda buro awa biae siriroro edo nangoda atari awa teta rora emboro da aturi embo mi tei dedo duridera awodo eurase sedo nango edo gogo edo atima era. \v 4 Edo ro berari nango mi era edo ro berari nangoda yei ira amimi embo da yei isaga ira awa nango awa God da buro ari embobo awa isaga ira. Edo memesi de dubo vevera de ro bebegae ira awa nangoda yei bugutira edo iji ainde nango saboa ari mi buro awa doae mata ise atera. \v 5 Embo nenei mi nango dorera edo embo nenei mi nango gajari oro da ititera edo tini gambari embobo mi nango jiroroka edo ge bebegae awa gogo dimbudo nangoda yei sedo era. Iji nenei nango iji ribori be buro edo era edo begogo tambudo era edo iji nenei nango ewo ae edo era edo iji nenei nango indari indae edo era. \v 6 Edo nango wasiri bebegae ae ewamei be atima era edo be gosise gido nango kera edo era edo embo da yei ewamei edo era. \v 7 Edo Asisi Kotopu nangoda jo da aturi edo nango embo dubo budo era edo nango God da binga awa gebe mi sedo era edo God da goroba amimi nango kondade edo ira. Edo ewamei ari God mi nangoda yei ititisira awa teta nangoda isoro gi emi inge isira. Edo nango gi emi amimi gitopo de embogo ise nangoda tamo soregedo era. \v 8 Edo embo nenei nango sapo edo era te embo nenei nango sapo ae edo era. Embo nenei nango jasiga edo era te embo nenei nangoda jawo da ge bebegae sedo era. Nango gebe sedo era te embo nenei mi nango ge busari embobo sedo era. \v 9 Embo nenei nango ro era ainda be awa gosera te embo nenei awa nango atae awodo awa era. Embo nenei sedo era nango betadi aikambu etera sera te giu nango wasiri de atera. Edo God mi sira dari gaiari nangoda yei bugusira amone awara sira ainda be awa umo nango esusu itadi edo ira awara te dari gaiari mi bugudo nango ae betae ra. \v 10 Iji jiwae rora nango ari dubo vevera orase awa bugudo ira te nango iaviri de atima era. Edo embo mi nango awa rora ae embobo sedo era te nango embo da yei God da binga ewamei atopapotera amimi ungoda yei rora neungoae be ititera. Edo embo mi nango awa busu da rora ae embobo sedo era te utu da rora berari awa nangoda topo ra. \p \v 11 Oarie naso Corinth nati embobo na ingoda yei ge unjugae setena. Edo na jo naso berari mi ingo dubo budo ena. \v 12 Edo na naso jo awa ingoda yei pirigedo ena te ingo ingoda jo awa naso yei pirigaera. \v 13 Edo na boroko ingoda yei teta ingo awa naso kinapeina awodo awa ge sena. Nango ingo dubo budo era da awodo jo ingoda berari mi nango dubo buwo. \s1 BIAE DE EWAMEI DE MANA OTAO ADERA \p \v 14 Embo God gegae ainde da dada edo God da buro adi eove. Edo God da embobo da ari barari de embo God gegae daari barari awa gari da awa ta? Edo umenga de usasa ga dada atae eteri ta? \v 15 Edo Keriso da atopatari de Satan da atopatari da mo da awa ta? Edo Iesu gebe ari embo de embo Iesu gebe ae edo ira ainde mo da awa ta? \v 16 Edo ingodena God da mando da ingode ove kewari tumondebain adera mo awa ta? Awodo aera ainda be awa God ingodenaso jo da atira, uso mando da. Edo God umo umosuka iso jawo da ge sisira, \q1 “Na ungoda joda atadena edo ungoda teda tembadena. \q1 Edo na ungoda God ano edo ungo naso embomei adera.” \p \v 17-18 Edo awasedo God mi sekago sisira, \q1 “Ingo embo God gae awa dodo embo nei adewa. Edo ingo rora biae da jigae adewa awa na ingo ingo joga da adena. Edo na ingoda imamo ano edo ingo naso memei de memeigagara de adewa.” \m Awawa God goroba jiwae de mi sisira. \c 7 \p \v 1 Naso otatao God mi sarigari eiawa berari ingodenaso yei sisira. Awasedo ro mi iri ingodenaso tamo de jo de dongono ira awa ingode awawa segoro mambari edo ewagaewa adera. Edo ingode God oju ise jo dongono ae atore. \s1 PAUL DA IAVIRI AWA \p \v 2 Nango iaviri de buwo. Nango embo da amenda yei biae aera. Edo nango embo da amenda yei da biae ro ae dubo vevera tambae. Edo nango embo da ave gandubae ra. \v 3 Edo na eiawa sena awa ingo men gawase saera. Edo na matu ingoda yei sisena na ingo dubo nembodiba budo ena awa sisena. Na ingo de da ateni ta ko na ingode da beteni? Na rora etoto eiawa adi sia etena. \v 4 Edo na gosena ingo rora ewamei awa ari dipapa ewa awa gosena. Edo na ingo mi ro ewa awa iaviri be ena. Bouga jiwae be nangoda yei bugutira te naso jo awa goroba edo atira. Edo iaviri mi naso jo awa beda edo kukusedo sawara yoyogo ira. \p \v 5 Edo nango Macedonia busu da bugudo atero edo bouga awa nangoda yei doae puse atira. Edo yei berari da bouga neinde kainde atima ira. Edo embo iji berari ge bagise nango jiroroka eoro edo oju nangoda jo da atima ira. \v 6 Awarate God mi jo ambari embobo da jo awa euri goroba edo ira edo umo Titus nangoda yei itiri bugiri nangoda jo goroba etira. \v 7 Edo uso bugari amimi ae nangoda jo goroba ae rate ingo mi umo kondade ititawa embo awa setiri ainde da amimi etiri nangoda jo awa goroba etira. Edo umo naso yei ingo na gari dipapa nembodiba ewa awa setiri gosana. Edo ingo embo naso yei biae iutara awa embo dubo vevera ititawa. Edo ingo na soregari dipapa ewa awa setiri gosana awasedo na iaviri nembodiba be ena. \p \v 8 Matu na ove ingoda yei gautana ove amimi etiri ingo iji tupo dubo vevera ititawa. \v 9 Edo ainda binga awa ingido na dubo vevera iutana te na boroko awa dubo vevera aera ainda be awa dubo vevera ititawa amimi etiri ingo ingoda emboro matu awa dodo God da emboro seka da pepeta ewa awasedo. God mi naso ove da jo da ingoda yei ge sisira awasedo na ove isena amimi ae ingo iji ribori dubo memesi kumbae ra. \v 10 Edo dubo vevera awa God mi awara sedo ira uso embo mi borase edo dubo vevera amimi ari embo ungoda wasiri bebegae awa do God da yei wareregorase. Edo God da yei wareregedo uso kando soregari awa badera edo awa ari ingodena iaviri adera. Awarate embo God da topo ae awa ungoda dubo vevera mi euri ungo betari matawa atari awa budo era. \v 11 Giu dubo vevera God mi ingoda yei ititara amimi etiri ingo God da wasiri awa be goroba de adi dipapa ewa. Edo ingo wasiri bebegae nanemi jivedo ingoda yei siutana awasedo ingo ingoda jawo awa ewamei arase dipapa ewa. Edo ro iutara amimi etiri ingo oju ise gido ingo nanemi engenembedo sekago esega anase dipapa ewa. Edo ingo buro okain isewa ainda be awa ingo embo ingoda teda amimi wasiri bebegae era awa awo ewamei orase dipapa isewa awasedo. Edo ingo awodo ititawa amimi ingoda teda wasiri bebegae awa atae iutara awa isaga iutara. \p \v 12 Gebe, ove awawa nanemi jiwutana awarate embo wasiri biae iutara awasedo na ove awa aera te edo na embo memesi burara awa embo na ove awa aera. Awarate ingo mi nango dubo burewa awa God da dombu da awa ingoda yei isaga arase sedo na ove awa jiwutana. \v 13 Edo ingo naso ge da ingido ro siutana awa ititawa awasedo nango iaviri era. \p Edo daedo Titus mi ingo mi umo kondade ititawa ainda emboro awa setiri gido nango amimi etiri nango iaviri nembodiba be era. \v 14 Matu na uso yei ge sise ingo jasiga iutana. Edo ingoda ari ewagaewa isaga etira awa na ingo jasiga etena awa gebe etena. Edo nango iji berari ingoda yei gebe sedo era. Da awodo na ingo Titus da yei jasiga iutana edo ge awa gebe iutara. \v 15 Edo Titus ingo mi nangoda ge awa kera ititawa edo umo dipapa be edo umo ingo jo de pon de ititawa awa kotari edo uso dubo bari ingoda yei awa bajido goroba ira. \v 16 Edo na gosena boroko ingo ewamei ewa awasedo na iaviri ena. \c 8 \s1 IESU GEBE ARI EMBOBO MI KONDADE MINA ARA EDO ISERA \p \v 1 Nanonamendi God mi Iesu gebe ari embobo Macedonia busu da awa kondade etiri embomei eiawa Iesu gebe ari embobo nenei da yei ari ewagaewa era. Edo kiki awa sano gave. \v 2 Bouga jiwae be ungoda yei bugusira. Edo ungo rora ae embobo awodo atewora te ungoda tumonda ari mi ungo iaviri nembodiba be ise edo ungo Iesu gebe ari embobo nenei awa kondade adi dipapa edo ungoda gano awa dada edo edo gano jiwae be itititara. \v 3 Edo ungo ro edo era awa na gosena ungo ungoda kando mi siri ititera. Edo da awa aera te ungoda kando ititera amimi ungoda kando itari da dipapa edo era awa derigurira. \v 4 Edo nango mi itorase sae itae rate ungoda dipapa mi ititera. Edo God da embobo Judea busu da awa kondade adi dipapa edo nango mi awara soro adi sititara. \v 5 Edo ungoda ari mi nango ungo ro adi kotera awa derigurara. Giti awa ungo ungosuka awa God da yei ititara. Awa edo gano dada ari da buro awa kondade adi sedo nangoda yei bugutitara. \v 6 Awasedo Titus gano dada ari buro eiawa unemi ingo Corinth nati embobo Iesu gebe ari embobo da yei tuturo isira awasedo uso yei sititara imo Iesu gebe ari embobo Corinth nati da ainda mambudo kondade eio embobo gano dada ari buro tuturo isesa awa atae ore sititara. \v 7 Iso tumonda ari edo iso God da ge sari de iso jiro gari de iso embo nenei kondade adi dipapa edo esa ainda iso dubo bari nangoda yei da ainde awa berari awa nembodiba ra awasedo iso gano dada kondade ari buro awa eio nembodiba be are. \p \v 8 Edo na eiawa ingo mi awase sae ra. Awarate na Iesu gebe ari embobo nenei mi ungoda embo nenei kondade adi dipapa nembodiba era ainda emboro awa ingoda yei ujugurena edo na ingoda gano kando itari awa ingo rawodo God dubo burevi awa isaga adi dipapa ena. \v 9 Edo ko gosewa ingodenaso Bada Iesu Keriso uso kando awa etiri gosisewa awara. Umo awa itipapo de mei na te ingo awa embo umo rora ae embo inge isira. Edo umo rora ae embo isira awa uso rora ae inge ainda susu da edo ingo rora jiwae be bawase isira. \p \v 10 Edo naso kotari re eire. Gaeko nei gun da ainda ingo embo nenei dodo ingo gano dada adi buro awa tuturo isewa. \v 11 Edo gano nenei awa budo dada edo buro awa edo mambudo atae ewo. Gaeko gun da ainda ingo jo ingoda berari amimi buro awa tuturo isewa awasedo da awodo jo ingoda berari mi buro awa atae ewo. Ingoda jo mi roinge itadi evi awodo awa itiwo. \v 12 Edo ingo ingoda kando mi sari itari dipapa adewa awa God ingoda kando awa badira. Edo God umo rora ingo ro ae ta atiri awodo awa gosise itawase ujo ae ra. \p \v 13-14 Edo embo nenei awa itoro gambari atiroro na ingo sari jarari awa na ujo ae ena awarate iji boroko eiawa ingo rora jiwae be yoyogo ewa awasedo na kotena ingo embo nenei beji mi ambutera awa kondade adevi ta rora. Edo ingo awodo adewa awa amboda ingo baimana bugari jarirowo ungo indari jiwae burise edo ingo kondade adera. Edo awodo ise awa embo dada ungo jingama ise atari katogo awa berari badewa. \p \v 15 Edo jiwari mi sira, \q1 “Embo amemi jiwae dada etira awa inono na. Edo embo amemi enumba ae dada etira amone inono na.” \s1 PAUL TITUS DE USO OTATAO ETOTO DE AWA CORINTH NATI DA ITARI MAMBORASE DIPAPA ISIRA \p \v 16 Nango God ategurera ainda be awa unemi etiri Titus ingo kondade adi dipapa jo de etira nango ingo kondade adi era da awodo. \v 17 Edo nango mi unemi mambarase sedo getero umo awara setira. Edo da nango mi setera awa embo aera te umo ingoda yei bugadi kotise edo dipapa be evira awasedo. \v 18 Edo Iesu gebe ari embobo berari mi ingodenaso namendi nei binga ewamei awa ujugedo gogowo edo ira awasedo umo sapo edo era edo awasedo umonde Titus de awa ingoda yei ititera. \v 19 Edo Iesu gebe ari embobo berari mi umo dipapa edo gido umo nangode tembarase sisera. Edo umo nangode tembuse gano dada ari buro eiawa kondade evira. Edo nangoda buro era emimi ari embo God jasiga adera edo nango kondade mina ara adi dipapa era awa isaga adira. \p \v 20 Awasedo gae gae edo embo nenei mi nango gano jiwae be simba era ainda emboro da ge busorase sedo nango buro awa edo gogo edo era. \v 21 Edo nango embo da diti da edo God da diti da ro gebe ri awa adi dipapa era. \p \v 22 Awasedo na embo etoto einde namendi nei de da iteno mambutera. Iji jiwae be nango namendi awa uso buro da awa itido gosisera edo uso buro ewamei awa gebe isira. Edo umo ingo awasedo iaviri ise kondade adi dipapa nembodiba be ira. \v 23 Edo embo amemi embo emomo averi soro gido ungoda yei seio, “Titus Paul da kondade ari embo ra. Edo umo Paul ga da buro dada edo ise ingo kondade adi dipapa ira. Edo Iesu gebe ari embobo mi nanonamendi etoto eiawa itero bugera. Edo ungo buro era amimi iri embo Keriso jasiga era. \v 24 Edo embomei eiawa ingoda yei bugoro gido jao namendi ari wasiri awa ewo awo Iesu gebe ari embobo berari mi nango mi ingo jasiga ari ge sedo era awa gebe awa gore. \c 9 \s1 GANO DA GE NENEI \p \v 1 Ingo gosewa gano God da embobo Judea busu da atera awa kondade adi itero mambutira awa gosewa awasedo na ro edo ge jiwae gaieni? \v 2 Edo na gosena ingo kondade adi dipapa ewa awasedo Macedonia busu embobo awa seteno getero na ingo jasiga ena. Edo na ungoda yei siutana ingo Corinth embo awa gaeko nei gun da ainda kondade adi sia isewa awa mata atira siutana. Edo na ungoda yei ingo kondade adi dipapa nembodiba edo ewa awa setena gido ungo daedo dipapa nembodiba ititara kondade adi. \v 3 Awasedo na boroko nanonamendi eiawa ingoda yei iteno mambutera awa ra. Edo ungo bugoro gido jasiga ari ge ingoda jawo da siutana awa ewo be are. Edo ingo gano itadi dada ititawa awa itadi sia ewo nanemi ingo sia adewa siutana awodo awa. \v 4 Edo Macedonia busu embobo bugudo ingo sia ae tambadera nango mi ingo sia ari awodo kotitara awasedo awa nango men nembodiba be gadera edo ingo daedo men nembodiba be gadewa. \v 5 Awasedo na nanonamendi eiawa na bugae atise giti itano bugudo gano kando itadi sisewa awa dada iriroro na bugadi kotedo ititena. Edo ungo gano awa dada oro na bugadena edo iji ainde awa na embo sia adera. Edo na embo mi ingo gano awa itewa ainda be awa ingo itari dipapa edo gido itewa awa gorase dipapa ena. Edo na embo nenei mi gano awa embo nenei mi itawase sari jaredo itari awodo awa georase ujo ae ena. \p \v 6 Edo eiawa kotewo embo ave buro kiambu edo ve kiambu govedo ira embo awa rora be kiambu budo ira awarate embo ave buro nembodiba edo ve jiwae govedo ira embo awa rora be jiwae be kumbudo ira. \v 7 Awasedo embo dada ungo roinge itadi kotera awa awodo awa itare. Edo kotari bebegae ise itove. Edo embo nenei mi engega era awasedo itove ainda be awa embo jo iaviri de ititira awa God umo embo awa dubo budo ira. \v 8 Edo Mamo God umo itipapo de embo amimi uso soregari kando mi sari ingoda yei rora ewagaewa jiwae itadira. Edo umo ingoda yei awodo itari ingo rora jiwae be budo indido kumbudo adewa. Edo ingo rora jiwae be budo edo nenei deposi adira awa embo nenei da yei itadewa. \v 9 Edo jiwari mi sira, \q1 “Umo uso wasiri ewamei be mi sari embo rora ae embobo da yei itadira. Edo uso soregari kando awa mata awodo atadira.” \p \v 10 Edo God mi ve awa ve gowari embo da yei gowarase itido ira. Edo unemi ve awa euri korukara edo erido ira edo amboda embo amimi indari be awa dada edo indadira. Edo da awodo God mi gano itasase ngamo ari awa itari itadesa. Edo dipapa awa teta ve inge ra. Edo iso jo da dipapa amimi erido euri iso kando itari amimi euri embo jiwae da yei ewamei ari awa bugudo ira. Edo ewamei ari awa teta indari jiwae be budo esa da awodo ra. \v 11 Edo God mi iso yei jiwae itadira awasedo iji berari imo embo nenei da yei kando jo de da adesa. Edo ingo jo de da awodo itawo nango mi ingoda kando awa embo jiwae da yei itoro edo ungo mi God jasiga adera. \p \v 12 Edo ingoda jo mi ititewa amimi ari baimana God da embo da yei bugutira awa atae adira. Edo da awa aera te ingoda jo mi kando ititewa amimi ari God da yei doio nembodiba sadera. \v 13 Edo ingo kando itari buro eiawa irirowo embo jiwae be mi ingoda tumonda ari Keriso da yei awa saboa ari de ra awa gadera. Edo ungo mi ingo Keriso da binga ewamei gebe ise sedo ewa awa gebe awa gadera awasedo ungo mi God jasiga adera. Edo da awa aera te ungo mi God jasiga adera ainda be awa ingo jo ingoda berari mi ungoda yei itido ewa awasedo. \v 14 Edo awasedo God mi ingoda yei kando ewamei nembodiba etira ungo mi ingo dubo burise iji berari God da yei sedo goro ingo ewamei adira. \v 15 Edo God ingodena berari da yei kando ingode gano mi ori ari katogo ae awa ititisira awasedo ingode umo jasiga ise doio sore. \c 10 \s1 PAUL USO BURO AWA BEITIGARI GE SIRA \p \v 1 Na Paul na nasuka teta Keriso mi jo edo ge sasainbari mi sae etira awodo awa ingoda yei ge sadena. Embo mi naso jawo da sedo era, “Umo ingodena esega edo ira awa umo oju edo ingodenaso yei ge okain sae edo ira te dodo mambudo ira awa ge okain sedo ira.” \v 2 Eiawa embo mi naso jawo da sedo era te na ingoda yei bugudo ena iji ainde na ingoda yei ge okain sari ujo ae edo ena. Edo na awo ingoda yei ge okain awodo seone. Awarate embo mi sedo era na wasiri edo ena awa teta embo God gae mi wasiri awodo awa era ari sedo era te emboro awodo da awa na ungoda yei ge okain rawodo sadena awa gosise sedo ena. \v 3 Edo na busu da embo God gae ainda teda atena awa gebe ra awarate embo busu da atera amimi embogo rawodo edo era da awodo awa na embogo aera. \v 4 Edo nangoda isoro gi emi de embo busu da atera ainda isoro gi emi de awa da awodo aera. Edo gi emi nango mi budo embogo era awa ta God da gi emi goroba de ra. Edo gi emi awa jingama ise na gitopo da puga jigido bejedo edo umo gi emimi usibesi edo ena. \v 5 Na embo da kotari busari berari awa bejedo ena. Edo embo nenei mi embo God gosera ainda emboro da rora itido emboro gajedo era. Awarate gi emi awa jingama ise rora emboro gajedo era awa wawara eono demonda mamburi na emboro isaga edo ena. Edo na embo da Kotari biae bundedo budo Keriso da yei budo bugudo ena ungo Keriso kera era. \v 6 Edo na ingo ge awa kera awase dipapa edo ena te na embo kera ae edo era awa ungoda riroga itadi sia edo ena. \p \v 7 Ingo rora uso gari ponda awa gosewa. Edo embo ave ingoda teda amimi umo awa Keriso da topo awodo sedo ira amimi nango daedo Keriso da topo atera awa gare. Ingodena awa embo awodo Keriso da topo ra. \v 8 God mi nangoda yei goroba ititisira ingo jumboro wosawase ae rate ingo kondade oro ingoda gebe ari awa goroba arase. Awase na goroba einda ge jariga da ge setenita rora te na men gaera. \v 9 Awarate na ove ena emimi ano ingo oju awase sedo na ari awa kotove. \v 10 Awarate embo nenei ingoda teda amimi eiawa sedo era, “Paul umo ove edo ira awa ge okain goroba de berari gaedo ira te umo ingodenaso yei bugudo ira iji ainde awa umo goroba ae embo edo ira edo uso ge awa goroba ae edo ira sedo era.” \v 11 Edo embo naso jawo da ge awodo sedo era awa sewo gore na besaun atena edo naso ge ove edo ainda sena ge amone ge na ingo esega ise sadena ge da awa gaedo ena. \p \v 12 Nanemi mana naso buro awa embo nenei mi ungoda buro da ge jiwae sise jasiga edo era ainde da tega mana adena. Edo atopapotegari nenei ingoda teda amimi ungoda buro awawa tega mina ara edo era awawa jiro bebegae egeregari ra. Edo awodo nganega edo era awa ungo embo da kotari ro biae ri edo ro ewamei ni awa kotedo era God da kotari awa aera. \v 13 Awarate nango nangoda buro awa jasiga ise buro da tano gaia God mi nango embo ititisira awa jarugadi aera. Nango God mi buro nango mi ingoda teda orase ititisira ainda ge awa sadera te nango mana tano awa jarugadera. \p \v 14 Edo nango mana buro tano God mi ititisira awa jarugadera. Edo ingo awa tano ainda ponda atae ra. Ingo awa ainda joda ra awasedo nango mi embo nenei ingoda yei bugae atero bugudo Keriso da binga ewamei ingoda yei ujugurisera. \v 15 Awasedo nango embo nenei mi ingoda teda buro isera awasedo nango nangosuka jasiga aera. Edo nango ingoda tumonda ari awa bajido nembodiba arase sedo buro nango mi ingoda teda era awa nembodiba arase dipapa era. Awarate embo nenei da buro da jawo da jariga edo nango mana God mi nangoda buro da tano ititisira awa mana jarusegadera. \v 16 Edo buro awa ingoda teda edo atae edo nango yei nenei God da buro embo nenei mi mambae ainda mambadera. Edo nango ainda mambudo Binga Ewamei awa minonu sadera. Edo nango yei nenei da mambudo nango mana buro embo nenei mi isera awasedo mana nango nasuka jasiga adera. \p \v 17 Edo jiwari mi sira, \q1 “Embo ave jariga ge sadi adira awa dowo God mi ro isira ainda ge awa jariga ge sare.” \p \v 18 Edo God mi embo da uso buro awa ewamei sadira awa gebe ewamei adira awarate unemi ewamei awodo awa mana sadira. \c 11 \s1 PAUL ATOPAPOTEGARI GE BUSARI EMBOBO ATIMA ERA AWA UJUGURISIRA \p \v 1 Edo ingo na awa jiro biae embo da ge awa sari kotadewa re na ingoda yei sedo gosena sasainbari mi naso ge ingawase. \v 2 Edo na ingoda dubo bari God da yei awa nembodiba arase dipapa ena God umo dipapa ira da awodo. Edo nanemi ingo awa Keriso da yei da ititisena teta mamo mi uso gagara ademei awa umo jimbadira embo ainda yei itido ira da awodo ra. \v 3 Jingabu mi Eve da yei bugudo umo ganduburisira. Edo embo ingoda yei teta jingabu mi Eve da bugusira da awodo ingoda yei bugudo era. Edo na ingo embobo emimi gandubadera awa jo ira. Edo ingo ganduboro ingo mana mana edo Keriso jo mi dubo bari awa doadewa. \v 4 Edo embo amemi ingoda yei bugudo Iesu awa ge busari mi atopatoro ingo embo awa ingo jo de pon de edo ewa. Edo nango mi ingo Iesu da binga ewamei awa gebe mi atopatido era awarate embo nei mi bugudo atopatari biae Iesu da jawo da awa seoro ingo embo ainda atopatari awa budo ewa. Edo nango gebe mi Asisi Kotopu da jawo da atopatoro edo embo nei mi bugudo asisi nei awa atopatoro edo ingo embo awa ujo ae ae edo ewa. \p \v 5 Edo ingoda atopapotegari nenei emimi na mana derigadera. \v 6 Awase na awa ge sari embo ewamei aerate na ge ro sena awa na gosena. Edo na iji jiwae eiawa ingoda yei isaga edo ena edo gebe awa ingo gido ewa. \v 7 Edo na God da binga ewamei ingoda yei atopapotise na ingo mi mina itawase sae ra. Edo na ingoda teda atisena ainde ingo embo nembogamo awase sedo na embo kiambu isena. Edo awodo isena mo na biae iseni ta? \v 8 Edo na God da buro ingoda teda isena awa Iesu gebe ari embobo nenei mi naso gano itero bugusira. Edo na gano awa budo isena awa teta embobo ainda gano awa bengono edo ingo kondade ari inge edo isena. \p \v 9 Edo na ainda ingoda teda atima isena ainde na gano dipapa edo isena te gae gae edo na ingo sano jarowase sedo na ingoda kondade benunu sae edo isena. Awarate Macedonia busu da nanonamendi mi buguse naso rora budo bugudo isera. Edo rora budo bugudo isera awa inono be ra. Edo na matu God da buro ingoda teda awodo edo isena da awodo amboda adena. Edo na mana ingo naso mina itawase sadena. \v 10 Edo Keriso da gebe naso jo da atiri na ingoda yei sena, embo yei berari da Greece busu da atera amimi na ingoda teda God da buro isena ainda emboro awa ingadera. Edo embo da ge mi mana ge awa rawurase gajadera. \v 11 Edo na roedo ge eiedo seni? Na ingo dubo bae ise gido ge eiedo mo senita? Awodo aera. God gosira na ingo dubo burena awa gosira. \p \v 12 Edo gae gae edo ingoda atopapotegari nenei mi ungo na buro edo ena da awodo ari sise jariga ge seorase sedo na boroko ro ena da awodo ise atadena \v 13 Edo atopapotegari eiawa ge nenei atopapotise ungoda buro da jawo da gebusise ungo awa Iesu da binga atopapotegari embobo sera te ungo awa awa aera. Ungo awa teta ambojimbi inge ise edo embo ganduburera. \v 14 Edo ungo awodo era awa rora seka aera. Satan umo uso gari awa nei adira edo teta asisi ewamei usasa de da awodo adira. \v 15 Da awodo Satan da buro embobo ungoda gari awa nei edo buro ewagaewa ari embobo ingege adera. Awarate iji ambo be amboda embobo eiawa ungoda wasiri bebegae ewora awasedo riroga inono da badera. \s1 PAUL KERISO DA BURO ISE IJI BERARI MEMESI BUDO ISIRA \p \v 16 Na ingoda yei sekago sena na awa jiro biae embo awodo kotove. Awarate ingo na jiro biae embo sanase dipapa adewa awa sewo awarate naso ge ingiwo. Edo ingirowo na ge atopapotegari embobo nenei mi jariga ge sedo era da awodo jariga ge kiambu sane. \v 17 Na boroko God da uso goroba mi ge sae ra te na teta jiro biae embo mi ge sarago ena. \v 18 Edo jiro bebegae embobo jiwae be mi ungoda buro da ge awa ingoda yei jariga ge sera awasedo naso ge daedo ingiwo. \v 19 Ingo awa jiro gari embobo awodo kotedo ewa te ingo jo iaviri de atopapotegari embobo jiro bebegae de da ge awa ingewa. \v 20 Edo embo amemi ero ingo ungoda agipo embobo ewa amimi ingoda rora berari atae burera edo ungo awodo dorase sae ewa. Edo embo amemi ingoda yei biae ise ingo ujo ae ise edo ingo sogo da dorera awa ingo awara sewa. \v 21 Edo na embo nenei mi edo era da awodo ae edo ena awasedo namomo goroba ae ta? Awase? \p Awarate rora ro mi ari embo jariga ge sadira awa na daedo rora da awasedo na jariga ge sadena. Na teta jiro biae embo mi ge sarago ena te na oju adi aera. \v 22 Edo atopapotegari embobo emimi jariga ise ungo awa Hebrew embobo sera. Ungo awodo seri ta? Awara na daedo Hebrew embo ra. Edo ungo Israel embobo sera. Na daedo Israel embo ra. Edo ungo awa Abraham da orobe sera. Na daedo Abraham da orobe ra. \v 23 Edo ungo sera ungo awa Keriso da buro embobo sera. Na daedo Keriso da buro embo ra. Edo na Keriso da buro ena amimi ungo derigurena. Edo ingo kotewa naso jariga ge eiedo mi na jiro biae embo eni ta? Keriso da buro nanemi ena amimi ungoda buro awa derigurira. Edo ungo derigurise iji jiwae be na gajari oro da atima ena. Edo embo mi ngombu mi na vejedo isera iji jiwae. Edo iji jiwae embo mi na doro betanase aikambu edo isera. \v 24 Edo iji da Jew embobo mi na iji 39 awodo esi eriwa mi vejero naso tamo eriri isira. Edo iji nei iji 4 awodo Jew embobo mi da awodo naso yei isera. \v 25 Edo iji da Rome nati da embobo mi na vejisera. Edo iji tamonde naso yei ari da awodo isera. Edo iji tamonde na ewa nga de pepeta eno ewa nga bejedo dada etiri na ewa kapuru da jawusena. Edo nga nei na pepeta isena awa bejedo dada etira waiko da edo tumba da awa ewa da atisena. \p \v 26 Edo iji jiwae na pepeta eono umo bojedo isira edo bengono embobo de naso embobo Jew de edo embo Jew ae de mi na usibesi adi aikambu edo isera. Edo na nati nembodiba da atise edo busu da pepeta ise edo nga de ewa kapuru da sembadi eono memesi nembogamo eiawa naso yei bugudo isira. Edo embo ungo naso otatao sedo isera amimi na gandubedo isera. \v 27 Iji berari na buro nembodiba edo isena. Edo tumba jiwae na ewo aera te dombu gunjedo atima isena. Edo na beji de umo ujo de tambudo isena. Edo na iji jiwae indari ae edo jajemo mi dudugasedo isena. Edo na sini bo ae edo isena. \v 28 Edo da awa aera te iji berari na Iesu gebe ari embobo rawodo ateri awa kotedo isena. Edo awodo kotedo isena awa teta bouga nebodiba ango ari inge edo isena. \v 29 Edo Iesu gebe ari embo awa goroba ae euri re na daedo goroba ae edo isena. Edo embo nei dedegeuri Iesu gebe ari embo wasiri biae edo dudureuri re na umo jo edo ena. \p \v 30 Awasedo na jariga ge sadena edo memesi ro tambadena amimi isaga adira awa na goroba aera awasedo na jariga ge sadena. \p \v 31 Bada Iesu awa ingode jasiga edo era ainda Mamo God awa gosira na gebe sena awa. \v 32 Edo na Damascus nati da atima isena ainda nati da gitijigari nembodiba jawo Aretas mi ititisira amimi na bundadi dipapa edo uso isoro embobo awa itiri nati jiwa da puga nembodiba nati jiroroka ari da be awa simba edo isera. \v 33 Awarate naso otatao mi na kandia nembodiba da joda itido diumba kiambu da ponda itido itero busu da wowosisena. Edo na awodo kondade etero na mambeno isoro embobo na bundae isera. \c 12 \s1 PAUL ETURO ARAGO EDO RORA SEKA GOSISIRA \p \v 1 Na gosena jariga ge sedo era amimi embo da yei ewamei ro ae edo ira te na ge sadena awasedo dowo ge sane. Matu na eturo arago isena ainda God mi rora seka awa isaga isira ainda kiki awa ingoda yei sadena. \v 2 Gaeko 14 gunda atisira ainde God mi na betiri utu in be inda vivitisena. Edo na gaera na naso tamo joda awodo vivitiseni ta ko tamo dodo asisi mi vivitiseni awa naso yei nganega eove. Awarate God umo ro isira awa gosisira. \v 3 Awarate na utu da vivitisena awa gosena edo sekago ingoda yei sadena naso tamo mi vivitisita ko tamo dodo asisi mi vivitisiri awa na gaera. Awarate God umo naso yei ro isira awa umo gosisira. \v 4 Edo na ainda atise ge javi naso ge mi awa sari katogo ae awa ingisena. Edo na ge javi ainda be awa ingeno God mi sisira ge ro ingesa awa busu da ainda seose sisira. \v 5 Awasedo na utu da vivitisena awasedo na jariga ge sadena amone awara awarate na nasuka jariga ge mana naso jawo da mana sadena. Awarate rora isaga edo ira awa na goroba ae edo ena ainda ge awa sadena ainda be awa embo na goroba ae gosera awa God mi uso goroba mi na kondade adira awa gadera. \v 6 Edo na jariga da ge sadi dipapa adena awa na jiro biae embo adi aera ainda be awa na jariga ge sena awa gebe sena awasedo. Edo embo mi na ro isena awa gido edo naso ge ingido gae gae edo na awa embo nembodiba awodo kotorase sedo na jariga ge sadi aera. \p \v 7 Gae gae edo na rora ewagaewa gosisena edo ingisena awasedo na jariga embo eonase sedo God mi awara sari Satan mi naso tamo da rora teta bebe inge awa ititisira. Edo rora bebe inge emimi naso tamo da memesi itido ira awa teta Satan da uso binga budo bugari embobo mi na memesi itarago edo ira. Edo umo na memesi edo ira amimi ari na saboa embo anase edo ira. \v 8 Edo iji da na God da yei eiawa sisena sedo umo nganega edo memesi awa dodo barase sedo gosisena. \v 9 Edo iji tamonde awodo arase sedo gosisena te umo umo iji berari naso yei da sedo isira, “Na imo kondade ena amone naso kondade re inono na ainda be awa imo goroba ae adesa iji ainde na naso goroba mi imo kondade adena.” Edo umo awodo naso yei setiri na goroba ae awasedo na iaviri isena ainda be awa Keriso da goroba awa nangae da atadira awasedo. \v 10 Edo na wase ae edo atadena edo embo mi naso jawo da ge biae sadera edo iji biae de dedo gaedo ari de edo bouga de awa naso yei bugadira ko na Keriso da buro ena awasedo awarate na iaviri ena ainda be awa na wase ae edo ena iji ainde na goroba edo ena awasedo. \s1 PAUL IESU DA BINGA DA ATOPATARI BURO EDO IRA AINDA GE SISIRA \p \v 11 Na wasiri teta jiro biae embo mi arago ena awarate amone ingo mi etewo na wasiri awodo re ena. Edo ingo naso buro awa awara sae etewa awa awodo ae ewa. Ingo mi sedo ewa atopapotegari eiawa God da jiro gari da emboro awa gari sewa te na awa God da dombu da awa kiambu ra te naso jiro gari awa ungoda jiro gari awawa derigurira. \v 12 Edo na ingoda teda atima isena ainda na sapoa ari mi buro edo isena edo ari seka neinde kainde embo mi matu ae gae awa edo isira edo ari wasiri goroba de awa edo isira edo rora berari eiawa edo isira amimi isaga edo isira awa na awa Iesu da binga atopatari embo awa edo isira. \v 13 Edo na ingoda yei ari nei ise edo Iesu gebe ari embobo nenei da yei ari nei edo iseni ta? Awodo ae be ra. Awarate na ingo mi na kondade awase sise emboro awodo da na ingoda yei ewoga be edo isena. Edo na awodo ise na wasiri biae ingoda yei iseni ta? Edo ingo mi kotembedo doawase siseni ta? Awodo aera. \s1 PAUL DA KOTARI NEMBODIBA CORINTH NATI EMBOBO DA YEI \p \v 14 Iji etoto na ingo esega adi bugusena edo boroko na ingo esega adi sekago sia ena. Edo na ingo esega adena ainde ingo mi naso yei rora itawase na sedo gadi aera. Edo na ingo kera ena awa ingoda gano awa badi aera te na ingo kondade adi ingo kera ena. Edo kinapeina mi aimamo da indari itae rate aimamo mi kinapeina da indari itido era. \v 15 Edo ingo awa ewamei atawase sedo na iaviri de naso rora berari awa ingoda yei itadena edo na iaviri de naso tamo awa itadena. Edo naso dubo bari nembodiba ingoda yei amimi iri ingoda dubo bari naso yei awa kiambu ita? \p \v 16 Edo na ingoda yei bouga itae rate embo ingoda teda amimi sera umo uso buro gae unjugari da ise nango gandubedo nangoda rora budo ira sera. \v 17 Awarate ungo awodo sera awa na nganega edo gadena na emboro rawodo da awodo iseni? Na binga sari embobo nenei iteno bugudo ingo gandubedo ingoda rora budo iseri ta? \v 18 Na Titus sedo geteno ingo esega isira edo ungae da awa nanonamendi nenei awa nanemi iteno bugusera. Edo Titus ingo gandubedo ingoda rora burisi ta? Awodo aera. Umo ingoda yei mambudo buro nanemi matu edo isena da awodo awa isira. Edo Titus de namonde awa God da buro awa da awodo edo era. \p \v 19 Edo ingo kotewa nango ingoda yei beitigari ge sadi jarari kotevi ta rora? Awodo aera. Nango God da diti da ge sera awa teta Keriso mi ge sorase dipapa irirari arago era. Edo nangoda otatao rora berari nango mi edo era awa ingo kondade adi edo era. \v 20 Na kotena na ingo esega adi bugadena ainde ingo ro irirowo bugudo gadena awa na ujo ae adena. Edo na ingoda yei bugano ingo mi na ingoda yei ro adena awa gido ingo ujo ae adevi ta rora. Edo na oju ena ainda be awa na ingoda yei bugudo ingo ge mina baga ise edo embo nenei da rora dipapa mina ara ise edo tini gambari mina ara ise edo kando egae ise ge bebegae sise gebusise edo jariga embobo awodo ise edo kera egae irirowo tambadena awa kotena. \v 21 Edo embo nenei ingoda teda awa jo dongono de edo emboevetu bebegae de atera edo embo nenei da aro asini awa budo atera. Edo ungo awodo atera edo ungoda wasiri bebegae awa dodo edo God da yei wareregae era awasedo na ingoda yei bugano edo naso God mi ingoda joda ari na awa poiwo embo awodo adena. Edo umo awodo ari na kotena na ji sadena ainda be awa embomei einda wasiri bebegae awasedo. Edo na eiawa adira awa oju ena. \c 13 \s1 PAUL GIDO GOGO ORASE UNGODA YEI GE SISIRA \p \v 1 Matu na iji etoto ingo esega isena. Edo na ingo sekago esega ano edo naso esega ari ingoda yei awa iji tamonde adira. Edo embo etoto ta tamonde mi embo nei awa wasiri biae ari ge sadera awa ingodena gebe adera umo wasiri biae etira awa awawa jiwari mi ingodenaso yei sira awasedo. \v 2 Edo na matu ingo iji etoto esega isena iji ainde embo wasiri bebegae isera ainda yei sisena wasiri biae awa sekago eove. Edo boroko na ungoda yei sekago wasiri biae awa eove sena. Edo na ungoda yei sena edo ingo embo nenei de da yei sena na sekago ingoda yei engenembadena awa na ingo jo adi aera. \v 3 Ingo Keriso naso yei awodo ge sedo ita mo ko sae ri awawa gadi dipapa evi ta? Edo na ingoda yei bugadena iji ainde isaga adira Keriso mi ge naso joda ititiri na ge sena. Edo Keriso ingoda teda buro ira amimi uso goroba awa isaga ira. \v 4 Edo embo mi Keriso awa benema mi orega da dorisera iji ainde umo uso goroba awa isaga aera te boroko God da goroba nembodiba uso joda amimi Keriso atira. Da awodo nango awa goroba aera te God da goroba nangoda jo da amimi nango Keriso ga dada edo wasiri de atadera. Awasedo nango God da ge awa ingoda yei ujuguriroro ingo God da goroba awa gadewa. \p \v 5 Edo ingo mo be Iesu gebe ari embobo ta mo awodo aeri? Awawa kotise edo ainda be awa giwo. Edo ingo be Keriso ingoda jo da atira awa gosevita? Edo uso goroba ingoda jo da awa bajido goroba ita? Edo ingo mo be Keriso gebe evita ko tepo ae etewa awa evi? Awa kotise edo ainda be awa giwo. \v 6 Edo awa kotise na kotena ingo ingodena Keriso da topo be ra awodo awa gadewa. \v 7 Awarate nango God sedo gosera umo ingo kondade ari ingo wasiri bebegae eowase sedo gosera. Edo nango God da yei sedo goro ingoda yei awodo ari embo mi nangoda buro awa ewamei sorase aera. Nango re God sedo goro ingo kondade ari wasiri ewagaewa awase sedo gosera. Edo embo mi nangoda buro awa biae sadera amone ro aera. \p \v 8 Edo nango ro adera amimi God da gebe moka awa ari duradi aera. Edo nango ro berari era amone kondade ero God da gebe moka awa dederira. \v 9 Edo nango wase ae eoro edo ingo goroba embobo edo ewa awa nango iaviri edo era ainda be awa nango ingo goroba de Iesu gebe ari embobo awase be dipapa edo era awasedo. Edo nango benunu God da yei sera awa ingo ingosuka umo jigari ewamei awase sedo sera. \v 10 Awasedo na yei besaun be atise boroko ove eiawa ingoda yei ititena ainda be awa amboda na ingo esega adena iji ainde na God mi goroba naso yei ititisira amimi ingoda yei biae ari ujo ae ise gido ena. Edo nanemi ingo kondade ano ingoda tumonda ari Keriso da yei awa goroba arase sedo God mi naso yei goroba ari ititisira amimi ingo ano eradewa. Edo umo goroba ari ititisira amimi ingo jumbano wosawase itae ra. \p \v 11 Edo naso nanonamendi na ove eiawa atae adi aikambu ena awasedo na ingoda yei sena atiwo. Edo iji berari ewamei ise atiwo. Edo nanemi ro awase setena awa edo gogowo edo ise ewo. Edo ge mina baga ae tepo atiwo. Edo jo jamo jamo de atiwo. Edo God ingo dubo burise ingoda yei jo jamo jamo ari itido ira awa ingo de daedo atare. \p \v 12 Ingo mina bara jo iaviri de ewo. Edo God da embo berari ungoda ategari ingoda yei ititera. \p \v 13 Bada Iesu Keriso da uso soregari kando de edo God da dubo bari de Asisi Kotopu da jao namendi ari de awa berari ingo de daedo matawa atore. \cls Awara \cls Ingoda namendi \cls Iesu Keriso da jawo \cls Paul