\id 1TI - Ewage-Notu NT [nou] -Papua New Guinea 1987 (web 2014) \h 1 TIMOTHY \toc1 Ove Timothy Mi Burisira \toc2 1 Timothy \toc3 1Ti \mt1 Ove Timothy Mi Burisira \c 1 \p \v 1 Na Paul mi Timothy Keriso gebe edo naso mei inge isira ainda yei ove eiawa jivena. God ingodenaso soregari embo de Iesu Keriso de mi eoro ingodena ro God mi ingodenaso yei adira awa gido era ungo mi na awa Iesu da binga atopatari embo anase ititisera. \p \v 2 God Mamo de ingodenaso Bada Iesu Keriso de mi ingoda yei ewamei ari de jo ari de jo jamo jamo ari de itore. \s1 EMBO GEBUSARI AWA ATOPATIDO ERA AWA SEIO AWODO ATOPATOVE \p \v 3 Na imo Ephesus nati da atasase dipapa ena ge amone na Macedonia busu da mambuse iso yei sisena. Edo Ephesus nati embobo nenei mi ge biae awa atopapotera awasedo imo ungoda yei seio awodo atopatove seio. \v 4 Edo ungo awa kiki gebe ae awa atopapotera edo ungo awa ge embo God gae da ge awa atopapotera. Edo atopatari awodo mi euri embo ge mina baga edo era te amimi embo kondade ae God da ge awa gae awasedo embobo awa seio atopatari awodo awa dove. Edo embo God gebe adera awa ungo uso ge awa gadera. \v 5 Edo ungoda yei da seio ato awodo papotera awawa doro dubo bari awa ungoda teda eradira awasedo. Ainda be awa dubo bari awa jo ewamei da uso be ra edo kotari ewamei de tumonda ari be de awa. \v 6 Edo embo nenei ge eiawa doturisera awa iji berari embo nenei de da jo da jo da be ro atae kiki awa mina dira ise emboro nei da pepeta era. \v 7 Edo embobo awa God da agodari ge awa atopatari dipapa era te ungo uso ge awa gaera. Edo ungo goroba de ge sera ainde ungo ge ro seri ainda be awa ungo gaera. \p \v 8 Edo embo mi God da agodari ge awa dengoro adera God mi dengoro orase dipapa ira awodo awa ungo agodari ge awa ewamei awa gadera. \v 9-10 Edo ruvegeove God embo ewagaewa awa embo uso agodari ge awa itae rate embo wasiri bebegae edo era embobo awa embo uso agodari ge awa ititisira. Embo wasiri bebegae edo era re eire. Agodari bejari embobo edo embo embo nenei da yei ari bebegae edo era edo embo God ujo ae edo era edo embo wasiri bebegae edo era edo embo God sapo ae edo era edo embo ungoda mamono deoro betedo era edo embo ungoda ai mane deoro betedo era edo embo embo nenei deoro betedo era edo embo kotari bebegae kotedo era edo embo paima embo da wasiri biae awa edo era edo embo embo nenei sandido bundedo era edo embo ge busedo era edo embo embo nenei da jawo da ge busedo era edo embo atopatari gebe awa ujo ae edo wasiri bebegae edo era embobo awa embo God uso agodari awa ititisira. \v 11 Edo na ro boroko setena awa na atopatari binga ewamei da ro sira awodo awa na setena. Edo binga ewamei eiawa God wasiri biae ae rora berari inda atira awawa nanemi simba anase ititisira edo embo berari da yei minonu sanase ititisira. \s1 GOD INGODENA JO ISIRA AWASEDO INGODE USO YEI DOIO SORE \p \v 12-13 Ingodenaso Bada Iesu Keriso mi buro eiawa anase naso yei goroba ititisira awasedo na uso yei doio sena. Edo matu na Keriso da jawo da biae sedo isena. Edo na uso embobo eura edo tambudo na ungo dedo gaedo edo isena. Edo nanemi eono embo jiwae be memesi budo isera te Keriso kotisira nanemi buro eiawa edo gogo edo adena awa gido unemi na uso buro embo anase ititisira. Edo God naso yei na jo isira ainda be awa na Keriso gebe ae ise edo na ro ena awa gae ena awasedo. \v 14 Edo Keriso mi na edo gogo edo isira. Edo uso ewamei ari awa teta umo uriri mi naso jo da sumbudo beda ari inge isira. Edo na ungae da dada isena ainde na umo na dubo be burira edo unemi etiri na umo gebe nembodiba isena awa gosisena. \p \v 15 Edo unemi embo wasiri bebegae embobo awa soregadi Iesu Keriso busu da bugusira awa gebe moka ra awa gebe eio. Edo wasiri bebegae eiawa nanemi matu edo isena wasiri bebegae nembogamo amimi wasiri bebegae embo nenei mi edo isera awa derigurisira. \v 16 Awarate God na jo isira ainda be awa umo embo mi Keriso awa saboa ari mi gorase dipapa edo ira embo wasiri bebegae edo era awa saboa ari mi edo gogo edo ira na saboa ari mi edo gogo isira da awodo. Edo wasiri bebegae nanemi isena amimi embo nenei wasiri bebegae isera awa derigurisira awasedo embo mi God mi na jo isira ainda emboro awa gosisera edo ungo daedo gosisera God ungo jo adira awa. Edo God mi ungo jo ari ungo Keriso gebe edo ungo wasiri matawa atari awa badera. \v 17 Edo gitijigari nembodiba God matawa atise gitijigadira awa mana betadira edo ingodenanemi mana gadera awa embo berari mi sapo ise iji berari jasiga ore. Awara. \p \v 18 Timothy naso mei na iso yei ge eiawa ititena awa simba edo gogo eio. Edo imo awa Keriso da isoro embo ra awasedo atopapotegari bebegae embobo awa ro atopapotera awa atae orase seio. Edo ge nanemi iso yei ititena awa ge awa isoro embo mi uso isoro da gi emi jingama edo ira da awodo jingama eio. Edo na God mi iso jawo da matu ro sisira awa iso yei sena. \v 19 Keriso gebe ari awa dose. Edo ro ewamei edo ro biae ri awa iso kotari awa ewamei atare. Edo ro biae ri edo ro ewamei ri awa embo nenei da kotari awa biae isira awasedo ungoda tumonda ari Keriso da yei awa atae isira. \v 20 Edo Hymenaeus de Alexander de awa embobo einda teda ra awasedo na ungo God da jawo da ge bebegae sera awa gido ge dorase na ungo Satan da ingo da ititisena. \c 2 \s1 GOD EMBOBO EIEDO DA TUMONDEBAIN EWO \p \v 1 Tuturo da eiawa sadena. Iji jiwae embo nenei awasedo embo God manunugadera. Edo ungo God manunugurise edo ungo ro berari adi ise awa ungo God doio sadera awa awara. \v 2 Edo ingode ro ewagaewa awa ise jo jamo jamo de atorase awa embo God da yei sedo goro gitijijigegari nembogamo de gitijijigegari nenei de awa God kondade ari ungoda busu da embo ewamei gitijigore. \v 3-4 Edo embo mi God da yei ge awodo sadera awa God ingodenaso soregari embo awa iaviri adira ainda be awa umo embo berari mi uso ge moka awa gorase dipapa ira edo umo embo berari soregadi dipapa ira awasedo. \v 5 Edo God da atira edo soregari embo da Iesu Keriso atira. Edo embo umo kapuru awa sembadi dipapa adera awa riri da awodo pepeta edo sembadera. Edo Keriso awa embo de God de da soropu da teta riri inge awodo atira. \v 6 Edo Keriso God mi embo berari soregarase sedo umo betedo mina ititisira. Edo umo awodo awa iji be de isira awasedo God embo berari soregadi dipapa ira awa embo mi gosisera. \v 7 Awasedo nanemi tumonda ari de God ge be moka da binga awa minonu sanase sedo God mi na awa Iesu da binga atopatari embo anase itido edo embo Jew ae ainda yei na atopatanase ititisira. Edo na ge busae ra. Na gebe sena. \p \v 8 Edo na embo yei berari da amimi God manunugorase dipapa ena. Edo embo God awodo manunugurise ungoda tinigambari de ge bagari de atae ari edo ungoda ingo ungo mi jigoro ungoda kopiri da vitido ira ingo awa ewamei are. \p \v 9 Edo embo evetu ungo jiro ewamei kotise bo sini asugore edo jariga embo evetu awodo eure. Ainda be awa embo evetu ungo bo ewagaewa asugedo edo oreti ewagaewa dubo da duredo era edo kopiri giro edo era awa ungoda gari ewagaewa amimi embo evetu nenei da gari awa derigari awodo jariga da kotari awodo mana kotadera. \v 10 Edo evetu awa Iesu gebe ari evetu awa umo wasiri ewagaewa are. Edo umo wasiri ewagaewa awodo adira awa umo bo sini ewagaewa ombari inge adira. \p \v 11 Edo embo evetu awa sapoa ari mi jariga ae ungoda atopapotegari da ge ambubu ingore. \v 12 Edo na sena evetu mi embo awa atopatadira awa awara aera sena. Edo embo evetu awa mana embo da bajari adera. Edo ingo Iesu gebe ari embobo dada adewa ainde embo evetu mana ge sadera te ungo re ingise atore. \v 13 Ainda be awa God tuturo da awa Adam edo ainda amboda Eve isira. \v 14 Edo Satan umo Adam gandubae rate Satan Eve ganduburisira. Edo Satan umo Eve gandubetiri Eve God da agodari kera ae isira. \v 15 Awarate evetu da amemi Keriso gebe adira edo umo God de uso embobo de dubo badira edo umo jariga da kotari ae jo ewamei de da atadira awa umo uso kinapeina bari iji de awa God mi umo kondade adira. \c 3 \s1 IESU GEBE ARI EMBOBO DA GITIJIJIGEGARI DA GE AWA \p \v 1 Embo amemi Iesu gebe ari embobo da gitijigari adi dipapa adira awa embo awa buro ewamei dipapa ira awa gebe ra. \v 2 Edo Iesu gebe ari embobo da gitijigari awa embo wasiri biae ae edo aro da jimbusira awara te umo mana aro nei jimbadira. Edo umo edo gogo edo atise uso buro awa dagari ae ise atadira. Edo esega embobo uso mando da bugadera awa umo jo iaviri de da ungo atega adira. Edo umo God da ge ewamei atopatadira. \v 3 Edo umo mana umo okain indadira edo umo mana embogo embo adira te umo embo da yei edo gogo edo sasainbari mi adira. Edo umo iji berari gano dipapa adi ae. \v 4 Edo umo uso orobe awa edo gogo edo gitijigadira edo uso kinapeina awa ari saboa ari mi umo kera adera. \v 5 Edo embo umo uso orobe gitijigari gae adira mo rawodo edo umo Iesu gebe ari embobo gitijigari mo geiri? \v 6 Edo embo ave tepo iji tupo Iesu gebe ari embo adira awa gaegae embo awa jariga edo teta Satan mi jariga edo God da kasari da dudurisira awodo durure embo awa doawo Iesu gebe ari embobo da gitijigari eure. \v 7 Edo embobo ave Iesu gebe ae edo era amimi embo da sapo ae adera awa embo awa doawo Iesu gebe ari embobo da gitijigari eure ko gaegae edo embo mi umo bekuba oro umo Satan da wao da durure. \s1 KONDADE ARI EMBOBO DA GE AWA \p \v 8 Edo Iesu gebe ari embobo da teda da amemi kondade ari embo adi adira gido awa embo awa embo ewamei edo embo umo ro adi sira awa adira embo awodo gido are. Edo umo mana umo okain jiwae indadira edo umo mana jinaga embo adira. \v 9 Edo umo jo uso berari mi God mi gebe moka isaga isira awa gebe adira. \v 10 Edo umo ewamei eita ko biae eiri awa gadi sedo awa Iesu gebe ari embobo mi uso yei buro itoro are. Edo umo buro awa ewamei adira awa dowo Iesu gebe ari embobo mi itoro kondade ari embo are. \p \v 11 Edo kondade ari embo da aro awa evetu ewamei be are. Edo umo mana embo nenei da jawo da biae sadira. Edo umo mana umo okain jiwae indadira edo rora mana bengono adira. \p \v 12 Edo kondade ari embo aro da jimbusira awara te mana aro nei jimbadira. Edo umo uso kinapeina de aro de ewamei edo gitijigadira. \v 13 Edo embo ave buro ewamei adira awa embo mi umo sapo adera awasedo umo oju ae uso tumonda ari Iesu Keriso da yei awa sadira. \s1 ATARI EWAMEI RAWODO ATADERI AINDA TU GE AWA GOD MI ISAGA ISIRA \p \v 14 Na ove eiawa ise na kotena iji tupo atae ari na bugudo ingo gari dipapa ena. \v 15 Awarate na burigi bugae adena awa ingo ove einda ingodena God wasiri de atira ainda embobo rawodo ataderi awa gadewa. Edo God da embobo awa embobo Iesu gebe edo Iesu gebe ari embobo da diti ga isera awa ra. Edo Iesu gebe ari embobo diti dada awa teta tutuvi mi mando kondade edo ira da awodo ra edo umo goroba edo derido atima ira. Edo umo goroba de derido ira da awodo Iesu gebe ari embobo diti dada ungo God da ge moka awa goroba de derarase kondade edo era. \v 16 Edo ingodena awa wasiri ewamei de atari awa inono aera awa gebe ra awarate atari ewamei da tu ge awa Keriso ra. Eiawa koteio. \q1 Keriso busu da bugudo embo isira. Edo Asisi Kotopu mi umo awa embo ewamei awa isaga isira. Edo asisi berari umo kera isera. Edo busu berari da embobo awa uso jawo da binga awa ingisera. Edo busu da embobo jiwae be umo gebe isera. Edo God mi umo betiri erido amboda umo utu da vivitisira. \c 4 \s1 ATOPAPOTEGARI GE MOKA ATOPATAE EDO ERA AINDA GE AWA \p \v 1 Asisi Kotopu mi isaga sira iji ambo be amboda embo nenei awa Keriso gebe ari atae adera. Edo ungo Keriso gebe ari atae edo asisi mi ge busedo ira awa kera ise asisi biae da atopatari awa dengoro adera. \v 2 Edo ungo ingido ungoda kotari ewa mo rawara edo biae mo rawari awa atae ari ungo ge busari ge awa embo nenei da yei atopatadera. \v 3 Edo embobo amimi aro jimbari awa awara aera awa atopatadera. Edo ungo mi indari eiawa eiawa indove awa atopatadera. Awarate embo mi indorase sedo awa God mi indari awa isira. Edo embo God da ge awa be gido Keriso gebe edo era awa God ungo umo doio sedo awa indari awa indadera awa dipapa edo ira. \v 4 Edo rora berari God mi isira awa ewagaewa ra. Edo embo mi mana God mi rora da ro isira awa ujo ae adera te ungo God da yei doio sise indari unemi ititira awa badera. \v 5 Ainda be awawa eire. God mi ingode indari kumborase sisira awawa kumbuse indari awasedo doio sera. \s1 IESU KERISO DA AGIPO EMBO EWAMEI ARI DA GE AWA \p \v 6 Imo ge eiawa nanonamendi da yei atopatadesa awa imo awa Iesu Keriso da agipo embo ewamei na. Edo embo ave iji berari Keriso gebe ari God da ge moka atopatari de da ge awa kotadira embo awa Iesu Keriso da agipo embo ewamei na. Edo embo da ave awodo kotadira awa umo teta indari ewamei indari inge adira. Edo Timothy imone awodo esa. \v 7 Awarate kiki gebe ae awa ingose ainda be awa kiki awa sadera amimi kondade ari embo God gadi aera. Edo embo tembuse buro ira awa uso tamo awa goroba de atira awarate embo iji berari anumbedo atima ira awa uso tamo awa goroba ae edo ira. Da awodo iji berari ro aso iso tumonda ari awa goroba de atadira awa eio. \v 8 Edo embo tembuse buro adira awa ewamei na awarate embo ro ari uso tumonda ari awa goroba de atarase adira amone ewamei be ra ainda be awa tumonda ari Keriso da yei amimi kondade iri embo boroko atari ewamei edo ira edo daedo amboda utu da atari ewamei adira. \p \v 9 Edo na ro sena amone gebe ra. Edo nango embo berari mi ge eiawa ujo ae orase dipapa ae rate gebe orase dipapa era. \v 10 Awasedo nango memesi nembodiba burise buro nembodiba edo era ainda be awa nango gebe era God awa wasiri de atira. Edo God embo berari simba edo ira te embo ave umo gebe edo era awa soregedo ira. \v 11 Edo goroba de da ge eiawa embo da yei atopatio. \p \v 12 Edo embo amemi imo awa singa banga awasedo sapo ae adira awa embo ainda ge ingose ta iji berari ge ewagaewa sise atari ewamei atio edo embo dubo buio edo Keriso tumonda ise kotari ewamei de da atio. Edo imo awodo iriroso Iesu gebe ari embobo mi imo gido awa ungo esa da awodo awa adi dipapa adera. \v 13 Edo embo dada oro gido imo iji berari embo da uworo da God da ge jiwari awa ungoda yei ajigeio. Edo binga ewamei awa minonu seio. Edo God da ge moka awa atopatio. Edo imo awodo iriroso amboda na iso yei da bugadena. \v 14 Edo God da binga sari embo mi kando inemi badesa ainda ge awa sisera. Edo Iesu gebe ari embobo da gitijigegari embo mamatu mi ungoda ingo iso kopiri da ititero imo iso joda kando awa burisesa. Awasedo kando awa dose teta embo mi riawo doro ambudo ira da awodo. \p \v 15 Edo ge eiawa na ro setena awa koteio. Edo iji berari ge da ro sira awa eio iriroso embo mi imo iso tumonda ari goroba de bajari awa gore. \v 16 Edo imo ro esa awa gido gogo ise edo edo gogo edo atopatio. Edo dose ta iji berari eio ainda be awa imo awodo adesa awa iso soregari awa atae adi aera edo inemi aso God mi embo iso ge ingera awa soregadira. \c 5 \s1 IESU GEBE ARI EMBOBO NENEI EIEDO KONDADE EWO \p \v 1 Embo ogo da yei awodo eose awa seose ta iso imamo da yei rawodo sae etesa awodo seio. Edo singa banga awa teta iso namendi da yei ae etesa awodo awa eio. \v 2 Edo emboevetu ogogo awa iso inyei da yei ae etesa awodo awa eio. Edo ademei awa da yei awa iso ru da ae etesa awodo awa eio. Edo iji berari kotari ewamei de jo ewamei de da atio. \p \v 3 Saboa ari mi rori garori topo egae awasedo kondade ari embo ae awasedo sapo eio. \v 4 Awarate evetu rori ainda kinapeina de apipie de atadera awa doio uso kinapeina mi umo kondade ore. Edo kinapeina awa awodo adera amimi God iaviri adira. Edo ungo awodo adira awa ungo ungoda ai mamo mi simba edo isera ainda mina awa adera. \v 5 Edo evetu rori umo teotopo ae edo umo kondade ari ae gido awa umo iji berari God tumonda ise edo sedo gari God mi umo kondade are. \v 6 Awarate rori garori nenei gano badi sedo wasiri bebegae edo era edo rori garori eiawa ungo wasiri de atera awa teta ungo bebetegari ingege isera. \v 7 Edo rori uso kinapeina awa embo mi bekuba eorase sedo re ge eiawa kinapeina da yei seio. \v 8 Embo ave uso orobe simba ae edo ira embo amone teta umo awa Iesu gebe ae embo da wasiri awa edo ira ainda be awa embo Iesu gebe ae edo ira embo amimi uso orobe simba edo ira amimi embo gebe ari embo mi uso orobe simba edo ira awa derigedo ira. \p \v 9 Edo rori uso gaeko 60 awa derigae atirari gido uso jawo awa rorigarori kondade ari budo era ainda jawo de teda itove. Edo daedo uso iubono umo matu jimbusira ainda ajigari da derigadira awa uso jawo awa gaiove. \v 10 Edo embo mi rori da rawai wasiri ewamei edo ira edo da awodo umo uso kinapeina edo gogo edo simba edo ira edo esega embobo uso mando da budo ita edo God da embobo da tei segedo ita edo embo bouga ro budo jarera awa kondade edo ita edo umo ari wasiri neinde kainde ewagaewa jiwae edo ita awa uso jawo awa gaiewo. \p \v 11 Awarate rori gagara seka awa jawo itove ainda be awa amboda ungo sekago iu jimbadi dipapa adera edo Keriso da buro ari awa doadera. \v 12 Edo ungo Keriso da buro atae adera awa ungo Keriso da yei ro adera sisera awa adi aera. \v 13 Edo daedo rori emboevetu emimi yima mando da puma mando da ise begogo emboevetu adera. Edo embo nenei da jawo da ge iji berari sise rora ro da jawo da ge ungo mi sari katogo ae awa sadera. \v 14 Awasedo naso kotari rori seka da awa ungo sekago jimbadera. Edo ungo jimbudo kinapeina budo ungoda kinapeina awa simba ise atore. Edo ungo awodo adera awa ingodenaso gitopo awa mana ingodena bekuba adira. \v 15 Ko emboevetu rori nenei Keriso dodo Satan da yei wareregedo umo ambo ambo era. \p \v 16 Awarate evetu Iesu gebe ari evetu awa evetu rori ainda orobe awa umo rori awa simba are. Edo Iesu gebe ari embobo mi evetu rori awa simba adi aera te ungo re evetu rori embo topo ae awa simba adera. \p \v 17 Edo Iesu gebe ari embobo da gitijijigegari ungoda buro ewamei edo era awa ungo mina nembodiba bore. Edo gitijijigegari binga ewamei minonu sise God da ge atopatido era awa ungo daedo mina nembodiba bore. \v 18 Ko jiwari da tano mi sira, \q1 “Iso wo nembodiba ox awa indari ve ewoga ewoga ari buro irirari uso be awa takibedo digose.” \p Edo jiwari nenei da tano mi sira, \q1 “Buro embo awa uso mina badira.” \m \v 19 Edo embo da mi Iesu gebe ari embobo da gitijigari bekuba adira awa ingove te embo etoto ta tamonde mi umo bekuba adera awa embobo ainda ge awa ingiwo. \v 20 Edo Iesu gebe ari embobo da gitijijigegari da teda embo amemi wasiri biae ari gido embo ainda yei embo berari da jo da sewo awodo sekago eose sewo awa embo nenei mi ingido oju ore. \p \v 21 God da dombu da edo Iesu Keriso de asisi ewagaewa de da dombu da nanemi sena ge eiawa kera eio. Edo imo ge eiawa kera ise imo mana embo dakain da yei ewamei ise mambudo embo nei da yei biae mana adesa. Awodo aera te embo berari da yei ari da awodo adesa. \p \v 22 Edo embo da Iesu gebe ari embobo da gitijigari ari dipapa ari gido iso ingo awa uso kopiri da itae giti da iji tupo simba eio. Edo embo awa wasiri bebegae iriroro gido daedo mambose ta iso jo awa doio dagari ae be awodo atare. \p \v 23 Iji jiwae imo karu edo esa awasedo iji berari sasaka awa indose te iji dada ri be grape da uso ngamo awa indio, iso tini awasedo. \p \v 24 Embo nenei wasiri bebega eoro embo mi ungoda wasiri biae awa gido ungo kasari badera awa gido era. Awarate embo nenei wasiri bebegae gae tu da edo era awa ungoda wasiri biae awa embo mi gaera te amboda embobo ainda wasiri biae awa God mi isaga adira. \v 25 Da awodo embo nenei da ari ewagaewa awa embo nenei mi isaga gido era te embo nenei da ari ewagaewa gae tu da edo era awa ari ewagaewa awa God mi isaga adira. \c 6 \s1 AGIPO EMBOBO DE UNGODA BABOJEGARI DE DA GE AWA \p \v 1 Edo embo mi God da jawo de God da atopatari de da jawo da biae seorase sedo awa agipo embobo ungo ungoda babojegari iji berari sapo ore. \v 2 Edo agipo embobo bajari kera edo era awawa Iesu gebe ari embobo ungo ungoda babojegari awa nanonamendi awa sedo ungo ujo ae eore. Awarate agipo embobo ungoda babojegari kera edo gogo adera ainda be awa ungo mi Iesu gebe ari embo dubo burera awa kondade era. Edo ge eiawa minonu sise atopatiwo. \s1 ATOPATARI BIAE DE GOROTU GEBE DE DA GE AWA \p \v 3 Embo ave Bada Iesu Keriso da ge de nangoda atopatari de awa awara sae dodo ge nei atopapotira embo awa jariga embo ra edo umo nei ro gaera. \v 4 Edo umo iji berari ge da ge mina mina sadi dipapa edo ira. Edo umo ge mina mina sadi dipapa edo ira amimi euri embo dumo edo ge bagedo edo embo nenei da yei ge bebegae sedo era edo embo nenei da jawo da kotari bebegae edo era. \v 5 Edo embo ainda atopatari mi daedo euri embo nenei kotedo gogowo ae iji berari ge bagedo era. Edo ungo iji berari ge bagise eoro ge moka ungoda jo da awa atae edo ira. Edo ungoda jo da ge moka awa atae euri ungo kotedo era awa gano badi sedo God da buro adera awa kotedo era. Edo embo awodo edo era ainde da yima puma eove. \p \v 6 Awarate ingo jo ingoda awa jamo jamo edo atirari God sapo adewa awa ingoda gorotu awa nembodiba ra. \v 7 Edo ingodenaso aia mane mi ingodena burisera iji ainde ingodena ro budo busu da buguseri? Ingodena ro budo bugae ra. Edo amboda ingodena betadera iji ainde busu eiawa doadera ainde ingodena ro budo mamberi? Ingodena ro budo mambadi aera. \v 8 Awasedo ingodena indari ta bosini ni boroko jingama era amone inono na. \v 9 Awarate embo rora jiwae badi kotedo era awa iji tupo atae ari ungo wasiri bebegae neinde kainde awa tuturo edo gano badi adera. Edo wasiri bebegae amimi ari ungo memesi budo edo ungoda jiro bebegae ari amboda ungo riawo matawa ewuse atari ainda mambadera. \v 10 Edo embo gano dubo badera awa dubo bari awa wasiri bebegae neinde kainde da susu ra. Edo embo nenei gano badi dipapa nembodiba be edo era embobo awa Keriso gebe ari awa awa dodo besaun be mambudo era. Edo ungo besaun be mambudo ungoda jo dubo vevera jiwae be mi bouga edo bejedo dada edo ira. \s1 PAUL TIMOTHY DA YEI UMO RO ADIRA AWA SISIRA \p \v 11 Awarate Timothy imo awa God da embo ra awasedo wasiri bebegae berari nanemi sena eiawa dodo sumbuio. Edo iji berari ewamei ari de tumonda ari de dubo bari de awa dipapa eio. Edo iji berari ro aso God iaviri adira edo embo nenei da yei sasainbari mi ewamei adesa awa dipapa eio. Edo imo memesi awa badesa iji ainde tumonda ari dose ta goroba edo atio. \v 12 Edo imone Iesu Keriso da yei tumonda esa awa imo teta sumbudo riroga badi sumbarago esa re. Edo geregere awa sumbudo wasiri matawa atari da riroga awa imo imosuka awasedo kumbase. Ainda be awa imo matu embo jiwae beda jo da sisesa imo Iesu Keriso gebe ari sisesa edo iji ainde God imo wasiri matawa atari kumbasase jawo sisira. \v 13 Edo na God rora berari euri wasiri de atima era ainda diti da edo na Iesu Keriso Pontius Pilate da diti da derido God da gebe isaga ira ainda diti da dederisena edo na ungoda diti da iso yei ge sena imo dengoro eio. \v 14 God mi ro asase setira awa gogo edo eio edo boroko tuturo edo mambudo Bada Iesu Keriso engenembadira ainde eio aso embo mi imo bekuba ari sago ae ore. \v 15 Edo iji be awa bugari God mi Iesu Keriso itari umo engenembadira. Edo God gitijigari goroba de embo berari de busu berari de gitijigido ira awa gitijijigegari berari da goroba da susu ra. Edo God awa gitijijigegari embobo berari da gitijigari ra. Edo umo awa babojegari berari da bajari ra. \v 16 Edo umone awa iji berari atima ira edo atadira. Edo umo awa wasiri matawa atari da susu ra. Edo umo awa usasa embo mi aikambu purari katogo aera. Edo embo mi God awa gaera edo gadi aera. Edo God awa embo mi jasiga ore edo uso matawa atari goroba awa gore. Awara. \p \v 17 Edo embo busu da rora jiwae be budo edo ungo rora embobo edo era ainda yei seio ungo jariga embobo eore. Edo daedo ungoda yei seio busu da rora jiwae awa tumonda eore ainda be awa rora jiwae be awa atae adira te God tumonda ore. Edo God dagari ae edo rora berari awa ingodenaso yei itido ira ari ingodenanemi jingama ise iaviri orase sedo. \v 18 Edo rora jiwae embobo awa seio gore ungoda wasiri ewamei ari awa bajido tamonda tamonda orase teta ungoda rora jiwae bajido ira da awodo. Eiedo mi ungo rora jiwae embo be adera. Edo mosou embobo awodo eore ta iji berari embo nenei da yei rora kando ore. \v 19 Edo ungo awodo adera awa ungo rora jiwae be be moka awa utu da dada adera. Edo rora utu awawa ungoda wasiri amboda atadera ainda susu ra. Edo awodo ise awawa ungo riroga wasiri matawa atari awa badera. \p \v 20 Edo Timothy edo gogo edo buro God mi asase ititisira awa simba eio. Edo ge puti awa be aera awa embo nenei mi sedo era awa jiro gari nembodiba ra awa ge awa gae sirago eio. \v 21 Ainda be awa embo nenei awa ge awa budo awa tumonda ari emboro awa dodo wareregedo era. God da ewamei ari ingo berari da yei atare. \cls Awara \cls Iso namendi \cls Iesu Keriso da jawo da \cls Paul