\id 1JN - Ewage-Notu NT [nou] -Papua New Guinea 1987 (web 2014) \h 1 JOHN \toc1 Ove John Mi Gaisira \toc2 1 John \toc3 1Jn \mt1 Ove John Mi Gaisira \c 1 \s1 IESU KERISO DA JAWO DA GE \p \v 1 Iesu Keriso awa God da ge embo da wasiri itido ira awa ra. Edo Keriso umo tuturo da atisira edo matawa atadira. Edo nango uso ge ingisera edo nango nangoda diti mi umo gosisera. Edo nango gido gogo isera. Edo nango uso demonda ra. \p \v 2 Edo wasiri be moka eiawa isaga etiri nango mi gosisera awasedo nango Keriso da jawo da wasiri matawa atari awa ingoda yei sera. Edo wasiri matawa atari eiawa Mamo ga da atari ra. Edo unemi wasiri einda be moka awa isaga etiri nango mi gosisera. \p \v 3 Edo ingo nango de da otatao edo Mamo de uso mei Iesu Keriso de da dada awase sedo nango ro nangoda diti mi gido edo ingisera awa ingoda yei daedo sera. \v 4 Edo ingodenaso iaviri awa beda arase sedo nango ove eiawa ingoda yei jivera. \s1 GOD AWA USASA RA \p \v 5 Binga God da mei mi siri nango mi ingisera binga awa nango mi ingoda yei minonu sera. Edo binga re eire God awa usasa ra. Edo umenga uso joda atae ra. \v 6 Awasedo ingodena wasiri biae da umenga da pepeta ise ingodena God da otatao sadera awa embo mi ingodenaso ari barari awa gido ingodena ge busera awa gadera. \v 7 Awarate ingodena Iesu gebe ari embobo usasa da teta God umo usasa da atira awodo atadera awa ingodena teta otatao awodo dada anumbedo kiki mina dira ise atadera. Edo ingodena awodo iriroro God da uso mei Iesu da ororo mi ingodenaso wasiri bebegae awa segirari ingodena ewagaewa adera. \p \v 8 Edo ingodena wasiri bebegae ae atari sadera awa ingodena ingodenaso jo awa ganduburera. Edo ingodena wasiri biae ae atari sadera awa God da gebe moka awa ingodenaso jo da atae ra. \v 9 Awarate ingodena wasiri bebegae adera awa God da yei soro God umo ro adi sari gari sisira awa adira edo unemi ro ewamei awa ingodenasoyei adira. Edo unemi ingodenaso wasiri bebegae ro edo era awa kotembedo dodo edo unemi ingodenaso jo awa segari ewagaewa adera. \v 10 Edo ingodena wasiri bebegae ae sadera awa ingodena sera God ingodenaso jawo da ge busari sera ainda be awa matu God mi sisira embo berari awa wasiri bebegae isera. Edo ingode awodo sadera awa God da ge ingodenaso jo da atae ra. \c 2 \s1 KERISO AWA INGODENASO KONDADE ARI EMBO RA \p \v 1 Naso kinapeina ingo wasiri bebegae eowase sedo na ove eiawa ingoda yei jivena awarate embo da ave wasiri biae adira awa embo ewamei Iesu Keriso awa God da dombu da atise ingodenaso jawo da God da yei ge sira awara. \v 2 Edo Keriso God da tini gambari wasiri biae da awa atae arase sedo umo betedo ingodenaso wasiri biae da mina itari isira. Edo ingodena da awa embo aera te umo bebetisira awa edo busu berari da embo berari da wasiri bebegae da mina itari isira. \p \v 3 Edo ingodena God da agodari kera adera gido awa ingodena God isaga be gadera. \v 4 Edo embo da amemi God da agodari beuso ise umo God gari sadira embo awa umo ge busira. Edo embo ave awodo ira awa God da gebe moka awa uso jo da atae ra. \v 5 Awarate embo ave God da ge kera ira embo awa umo God dubo be burira edo God da dubo bari awa uso jo da ra. Edo emboro awodo da awa ingodena gosera ingodena awa Iesu gebe ari embobo awa. \v 6 Edo embo ave umo Iesu gebe ari embo sadira awa embo awa Iesu Keriso rawodo atisiri da awodo atare. \s1 INGODE GOD DA USASA DA PEPETA ORE \p \v 7 Naso dubo bari otatao agodari nanemi ingoda yei gaiena eiawa agodari seka aera. Agodari emone matu ra edo agodari tuturo da ingo mi kumbusewa awa ra. Edo agodari matu emone binga ingo mi matu ingisewa awara. \v 8 Gebe agodari amone matu rate iji berari seka edo ira. Edo agodari Keriso da joda awa seka ra edo da awodo agodari ingoda joda amone seka ra. Ko umenga awa tuturo edo atae iri edo usasa be moka awa tuturo edo janiburira. \p \v 9 Edo embo ave uso namendi ujo ae ise umo usasa da atari sira embo awa umo umenga da atira. \v 10 Edo embo ave uso namendi dubo burira embo awa umo usasa da atira awasedo embo amimi bagae embo nei wasiri biae aera. \v 11 Awarate embo ave uso namendi ujo ae ira embo awa umo umenga da atira. Edo embo awa umenga da pepeta ise edo umo rawodo mambutiri awa gae jarira ainda be awa umenga mi etiri embo awa diti guba etira awasedo. \p \v 12 Naso kinapeina God awa uso mei Iesu Keriso da tamo da ingoda wasiri bebegae kotembedo doturisira awasedo na ingoda yei gaiena. \v 13 Edo ingo mamono Keriso matawa atima isira edo ingo umo garira awasedo na ingoda yei jivena. Ingo singa na ingoda yei ove jivena ainda be awa ingo wasiri bebegae da susu embo awa dorisewa awasedo. \p \v 14 Edo ingo kinapeina ingo Mamo garira awasedo na ingoda yei ove jivena. Edo ingo mamono Keriso atevira awa ingo garira awasedo na ingoda yei ove jivena. Edo ingo memei singa na ingoda yei ove jivena ainda be awa ingo awa goroba jiwae awasedo. Edo God da ge awa wasiri de ingoda joda atira edo ingo mi embo wasiri biae da susu awa dorisewa. \p \v 15 Edo busu da rora de busu de awa dubo beove. Edo ingo rora awa dubo badewa awa ingo Mamo dubo badi aera. \v 16 Edo busu da rora re eire embo da jo da dipapa bebegae edo embo mi rora gido kumbadi dipapa edo era edo rora berari busu da amimi euri embo jariga edo era rora amone busu da rora ra. Edo God mi rora awa itae bugae ra. Edo rora berari amone busu da rora ra. \v 17 Edo busu de rora berari busu da embo mi dipapa edo era rora awa atae adira awarate embo ave God mi ro orase dipapa ira awa edo era embo awa matawodo atadera. \s1 KERISO DA GITOPO \p \v 18 Naso kinapeina iji sangove awa aikambu etira. Edo ingo Keriso da gitopo bugadira awa ingisewa. Edo embo awa gitijigari nembodiba be Satan da yei edo Satan mi itari wosarase sisira awa bugadira. Edo Keriso da gitopo jiwae be awa matu bugera awasedo nango gosera iji sangove awa aikambu etira. \v 19 Edo nangoda embo nenei awa nango dodo mambera awarate ungo awa nangoda otatao be aera awasedo ungo nango dotera. Edo ungo nangoda otatao be re ungo nango doadi aera te ungo nangode atae etera. Edo embo ingodena doturisera embobo emone Keriso da wasai ra. \p \v 20 Awarate Keriso Asisi Kotopu itiri wowosisira. Edo Asisi Kotopu wosetiri ingo Asisi Kotopu kumbusewa awasedo ingo God da ge be moka awa gosewa. \v 21 Na ove eiawa ingoda yei ena ainda be awa ingo gebe moka awa gae awasedo aerate ainda be awa ingo ge be moka awa garira awasedo. Edo daedo ingo gosewa ge busari mi ge be moka ae awasedo. \p \v 22 Awasedo ingode embo ro awa busari embo seri? Embo Iesu awa Soregari Embo God mi itari bugarase sisira ae sedo ira embo awa busari embo ra. Edo embo awa Keriso da gitopo ra. Edo embo awa God de uso mei de awa ujo ae edo ira. \v 23 Edo embo amemi God da mei ujo ae ira embo awa Mamo daedo ujo ae ira. Edo embo ave God da mei kumbutira embo awa Mamo daedo kumbutira. \p \v 24 Awasedo binga ingo mi tuturo da ingido gebe ise kumbusewa binga awa ingoda joda itiwo. Edo binga awa ingoda jo da atadira awa ingo iji berari God de uso mei de da demonda atadewa. \v 25 Edo Keriso umo umosuka wasiri matawa atari awa ingodenaso yei itadi sari gari sisira. \p \v 26 Edo ingo mi embo ingo gandubadi dipapa era ainda kotari awa gawase sedo na ove eiawa ingoda yei jivena. \v 27 Awarate Keriso uso Asisi awa itiri ingoda yei wowosisira. Edo wosetiri ingo umo kumbusewa. Edo uso Asisi ingode da atirari ingo embo nenei mana sawo ingo atopatadera ainda be awa uso Asisi mi rora berari awa ingo atopatido ira awasedo. Edo unemi ingo ro atopatido ira awa gebe moka ra gebusari aera. Awasedo ingo Asisi Kotopu da atopatari awa kera ise Keriso da jigido takibedo atiwo. \p \v 28 Awara naso kinapeina ingode Keriso da engenembari iji de goroba de da atadi sedo awa ingode Keriso da jigido takibedo atore. Edo gaegae edo Keriso da engenembari iji de men gido unjugeore ta ingode Keriso da jigido takibedo atore. \p \v 29 Edo ingo gosewa God awa ewamei be ra awasedo ingo gosewa embo ave ewamei era embo amone God da kinapeina na. \c 3 \s1 GOD DA KINAPEINA \p \v 1 Mamo ingodena dubo budo gogowo edo ira awa giwo. Edo umo iji berari ingodena dubo budo gogo ise ingodena uso kinapeina sedo ira. Edo awa gebe ra ingodena awa God da kinapeina na awasedo embo God gae embobo awa ingodena gaera. \v 2 Naso otatao ewagaewa boroko ingodena awa God da kinapeina na awarate amboda ingodenaso yei mo ro eiri? Edo boroko awa isaga aera awarate ingodena gosera Keriso bugadira iji ainde ingodena teta Keriso ingege adera ainda be awa ingodena uso dombu gosise umo gadera. \v 3 Edo embo ave Keriso bugadira awa gosise umo simba ira embo awa edo gogo edo atare teta Keriso umo ewamei awodo. \p \v 4 Edo embo ave wasiri biae ira embo awa umo God da agodari bejira ainda be awa wasiri biae awa God da agodari bejari rora ra. \v 5 Edo ingo gosewa Keriso umo embobo da wasiri bebegae kumbudo mambadi sedo awa umo isaga da bugusira. Edo ingo gosewa Keriso awa wasiri biae aera. \v 6 Awasedo embo ave Keriso da demonda atira embo awa umo iji berari wasiri biae aera te embo ave iji berari wasiri bebegae edo ira embo awa umo Keriso gaera edo umo awa Keriso da embo aera. \p \v 7 Naso kinapeina memeinya embo da amemi ingo gandubadi ari gido uso ge ingove. Edo embo ave ro ewamei ira embo awa embo ewamei na teta Keriso embo ewamei awodo ra. \v 8 Edo embo ave iji berari wasiri bebegae edo ira embo awa Satan da embo ra ainda be awa tuturo da edo bugudo boroko awa Satan umo wasiri biae edo ira awasedo. Edo God da mei awa umo Satan da buro awa usibesi adi sedo bugusira. \p \v 9 Edo embo ave awa God da kinapeina awa God da wasiri awa ungoda jo da atira awasedo ungo iji berari wasiri biae aera. Edo God awa ungoda Mamo na awasedo ungo iji berari mana wasiri bebegae adera. \v 10 Edo ungo God da kinapeina ta ko Satan da kinapeina ri awa ungo ro adera amimi isaga ari gadewa. Edo embo ave ro ewamei awa ae era edo ungoda namendi dubo bae era embo awa God da mei aera. \s1 DUBO MINA BARA EWO \p \v 11 Binga ingo mi tuturo da gebe isewa amone eire dubo mina bara ewo. \v 12 Edo ingode Cain mi arago mana adera. Cain awa embo wasiri bebegae berari da susu da mei awasedo umo uso namendi detiri bebetisira. Edo Cain roedo uso namendi dorisiri? Umo uso namendi dorisira ainda be awa wasiri umo edo isira awa bebegae rate wasiri uso namendi mi edo isira awa ewagaewa awasedo. \p \v 13 Awasedo naso nanonamendi embo God gae mi ingo ujo ae iriroro gido kove eove. \v 14 Edo ingodena gosera ingodena awa matu teta betari da awodo rate ingodena wasiri seka kumbusera. Edo ingodena awa gosera ainda be awa ingodena ingodenaso nanonamendi dubo burera awasedo. Edo embo ave embo nei dubo bae adira embo awa betari embo inge ra. \v 15 Edo embo ave uso namendi ujo ae adira embo awa uso jo da embo nenei dari betari embo ra. Edo ingo gosewa embo nenei dari betari embo awa wasiri matawa atari kumbae ra. \p \v 16 Edo Keriso uso wasiri awa ingodena embo ititisira awodo da ingode gosera ge dubo bari da be awa. Awasedo ingode ingodenaso nanonamendi awa embo ingodenaso wasiri awa itore. \v 17 Edo embo rora jiwae embo mi uso namendi rora ae embo awa rora ro dipapa irirari dodo kondade ae adira amomo God da dubo bari mo embo ainda joda atita mo atae ri? Atae be ra. \v 18 Edo naso kinapeina ingode tepo be mi ge jiwae sise ingode embo dubo bari mana sadera awarate ingode ari ewagaewa embo nenei da yei adira amimi isaga adira awa ingodena embo nenei dubo burera. \s1 INGODE OJU AE GOD DA DOMBU DA ATORE \p \v 19 Edo ingode awodo ise ingodena Iesu gebe ari embobo da teda atera awa gore. Edo ingode God da dombu da oju ae atore. \v 20 Edo ingodenaso jo da ge mi ingodena bekuba ari gido ingode mana ruvegadera God da ge mi ingodenaso jo da ge awa derigurira awa gore. Edo ingodena gosera God rora berari awa garira. \p \v 21 Awasedo naso otatao ingodenaso jo da ge mi ingodena bekuba ae adira awa ingodena oju ae God da dombu da goroba de atadera. \v 22 Edo ingodena ro God da yei itarase sedo gosera awa kumbutera ainda be awa ingodena uso agodari ge awa kera era edo ingodena ro era amimi iri umo iaviri ira awasedo. \v 23 Edo God umo ingodenanemi agodari kera orase sira amone eire. God mi ingodena uso mei Iesu Keriso da jawo da tumonda orase sira edo ingodena dubo mina bara orase sira teta Keriso mi ingodena dubo mina bara orase sisira da awodo. \v 24 Edo embo ave God da agodari ge kera ira embo awa iji berari God ga da pepeta ira edo God ungae da pepeta edo ira. Edo emboro eiedo da ingodena gosera God iji berari ingode nangae pepeta edo ira awa. Edo ingodena gosera ainde be awa God uso Asisi Kotopu ingodenaso yei ititisira awasedo. \c 4 \s1 GEBE MOKA SARI ASISI DE GEBUSARI ASISI DE AWA ATERA \p \v 1 Naso otatao ewagaewa, ge busari binga sari embobo awa yei berari da tembera awasedo embo berari ungo God da Asisi kumbari sera awa gebe eove. Awarate ingo God mi asisi awa ititisita mo ko itae ri awa gadi sedo awa ungo itido giwo. \v 2 Edo asisi amomo God da yei edo bugusita mo ko God da yei bugaeri awawa emboro eiedo da isaga gadewa. Embo amemi Soregari Embo God mi itari bugarase sisira amone Iesu ra awa sira embo awa asisi unemi kumbusira awa God mi ititisira. \v 3 Awarate embo amemi Soregari Embo God mi itari bugarase sisira amone Iesu ra awa sae edo ira embo awa asisi unemi kumbusira awa God mi itae isira. Awarate gitijigari nembodiba be Satan da yei edo bugadira amimi asisi awa ititisira. Edo ingo ingisewa asisi re bugadira awa edo boroko asisi awa matu bugudo busu da atira. \p \v 4 Awarate naso kinapeina ingo awa God da topo ra. Edo ingo gebusari binga sari embobo awa matu patetewa ainda be awa Asisi ingoda jo da atira ainda goroba mi asisi embo God da topo ae da jo da atera ainda goroba awa derigetira awasedo. \v 5 Edo embo God da topo ae awa ungo iji berari busu da rora da ge awa sedo era edo embo iji berari busu da rora awa kotedo era embobo awa embobo ainda ge awa ingido era. \v 6 Awarate ingodena awa God da topo ra. Edo embo ave God garira awa ingodenaso ge ingido ira awarate embo ave God da topo ae awa ingodenaso ge ingae edo ira. Awasedo ingodena awodo da gosera asisi amomo ge be moka sari asisi ta ge busari asisi ri awa gosera. \s1 GOD AWA DUBO BARI DA SUSU RA \p \v 7 Naso otatao God awa dubo bari da susu ra awasedo ingode dubo mina bara ore. Edo embo da amemi embo nei dubo badira amimi isaga adira awa embo awa God da mei edo umo God gari ra. \v 8 Edo embo da amemi embo nei dubo bae adira amimi isaga adira awa embo awa umo God gaera ainda be awa God awa dubo bari da susu ra. \v 9 Edo emboro eiedo da God umo ingodena dubo burira awa isaga adi ira. God umo uso mei awo da awa busu da itiri bugusira ingode umo tumonda edo wasiri seka kumborase sedo. \v 10 Edo ge dubo bari da be mo rori? Ingodenanemi God dubo bae aera sadi aera awarate God umo ingodenaso wasiri bebegae kotembedo doadi sedo ingodena dubo budo umo uso mei ingodenaso Soregari Embo arase ititisira awa ge dubo bari da be re eire. \p \v 11 Edo naso otatao ewagaewa God awodo da ingodena dubo budo gogo edo ira awasedo ingode dubo mina bara ore. \v 12 Edo embo da amemi God gaera awarate ingode dubo mina bara adera awa God ingodenaso joda atirari uso dubo bari ingodenaso joda awa bajadira. \p \v 13 Edo ingodena rawodo edo God ingodenaso demonda pepeta iri edo ingodena God da demonda pepeta era awa goseri? Eiedo da gosera. God uso Asisi ingodenaso yei ititisira. \v 14 Edo ingodena Keriso gido edo ingodena embo nenei da yei Mamo mi uso mei awa busu da embo berari da soregari embo arase ititisira awa sero gosera. \v 15 Edo embo amemi Iesu awa God da mei sira embo awa God da demonda pepeta iri edo God uso demonda pepeta ira. \v 16 Edo God umo ingodena dubo bari siri ingodena umo gebe era ainda be awa uso dubo bari awa ingodenaso joda totorisira awasedo. \p God awa dubo bari da susu awasedo embo ave embo nenei dubo badira amimi isaga adira awa embo awa God da demonda pepeta iri edo God embo ainda demonda pepeta ira. \v 17 Edo ingodena God da embo kasari iji de oju ae derorase sedo God mi etiri uso dubo bari ingodenaso jo da awa goroba edo babojisira. Edo ingodena busu da atera emboro amone Keriso busu da atisira emboro da awodo atera awasedo ingodena oju ae God da dombu da deradera. \v 18 Edo oju de dubo bari de awa mana iji da amimi ingodenaso jo da mana atadera. Edo dubo bari ingodenaso jo da atadira dubo bari amimi oju awawa miminegari ponda wosadira. Awasedo embo ave oju adira awa dubo bari awa embo ainda jo da atae ra. Edo embo ave riroga bugutira awa kotadira awa oju awa embo ainda jo da ra. \p \v 19 God ingodena giti dubo burisira awasedo ingodena God dubo burise edo embo nenei dubo budo era. \v 20 Edo embo da amemi uso namendi ujo ae ise dodo na God dubo budo ena sedo ira embo awawa ge busari embo ra ainda be awa embo awa uso namendi gosira awa dubo bae ira mo umo rawodo edo God umo dombu gae ira awa dubo buriri? \v 21 Edo eiawa Iesu mi ingodenananemi orase sisira embo ave God dubo burira awa embo awa uso namendi daedo dubo bare. \c 5 \s1 INGODENA BUSU DA BAGARI AWA PATETERA \p \v 1 Embo amemi Iesu awa soregari embo God mi itari bugarase sisira awa gebe adira embo awa umo God da mei adira. Edo embo ave God dubo burira embo da amimi God da kinapeina dubo badira. \v 2 Edo emboro eiedo da ingodena God da kinapeina dubo burera awa gosera. Ingodena God dubo burise edo uso ge kera era amimi isaga ira awa ingodena God da kinapeina dubo burera. \v 3 Edo ingodena God da agodari kera era ainda be awa God dubo burera awasedo. \v 4 Edo uso agodari kera era awa ingodenaso yei bouga aera ainda be awa God da kinapeina berari mi busu da bagari awa patadera. Edo ingodena tumonda ari de daedo atadera awa emboro awodo da ingode busu da bagari awa patadera. \v 5 Edo embo amemi busu da bagari awa pateiri? Embo Iesu awa God da mei awodo gebe ira embo amimi busu da bagari awa patadira. \s1 EMBORO EIEDO DA INGODENA IESU AWA GOD DA MEI AWODO GIDO ERA \p \v 6-7 Iesu umo mi ewamei ari wasiri awa kumbusira iji ainde God utu da edo sisira Iesu awa uso mei sisira. Edo Iesu umo betae giti da God utu da edo sekago sisira Iesu awa uso mei sisira. Edo Asisi Kotopu umo umosuka daedo sedo ira Iesu awa God da mei edo ingodena gosera uso ge awa gebe ainda be awa Asisi Kotopu iji berari gebe sedo ira awasedo. \v 8 Awasedo umo de ororo de Asisi Kotopu de rora tamonde emimi ge da awa sera amimi isaga ira awa Iesu awa God da mei na. \v 9 Edo embo da mi rora da ro awa sari ingodena umo gebe adera edo God ingodenaso yei rora da ro awa sari ingode umo gebe ore ainda be awa uso ge mi embo da ge awa derigedo ira awasedo. Edo God uso mei da jawo da ingodenaso yei ro sisira awa gebe sisira. \v 10 Edo embo ave God da mei gebe adira embo awa umo gosira uso jo da God da ge uso mei da jawo da awa gebe ra. Awarate embo amemi God da ge awa gebe ae ise edo God awa ge busari embo sadira ainda be awa embo awa God mi uso mei da jawo da ro sisira awa gebe aera. \v 11 Edo God ingodenaso yei ge mo rori sisiri? Umo sisira umo wasiri matawa atari ingodenaso yei ititisira edo ingode wasiri matawa atari eiawa uso mei da yei awodo tamborase sisira. \v 12 Edo embo ave uso mei kumbusera embo awa wasiri matawa atari eiawa kumbusira te embo ave God da mei kumbae awa embo awa wasiri natopo atari awa kumbae ra. \s1 WASIRI NATOPO ATARI DA GE \p \v 13 Embobo ingo awa God da mei da jawo awa gebe ewa. Edo ingo mi wasiri matawa atari awawa burisewa gawase sedo na ove eiawa ingoda yei jivena. \v 14 Edo ingodena oju ae God da dombu da atadera ainda be awa ingodena gosera ingodena God da wasiri da awodo atise rora ro itarase sedo gadera awa umo ingodenaso yei dengoro adira. \v 15 Edo iji nonde ingodena God da yei sedo gadera awa umo ingodenaso ge ingadira. Edo ingodena gosera umo ingodenaso ge ingido ira awasedo ingodena gosera umo ingodenanemi ro embo sedo gosera awa ititira. \p \v 16 Edo ingo namendi da wasiri biae ari gadewa amimi umo mana budo betari matawa atari da emboro da mambadira awa God da yei sedo giwo embo da wasiri biae awa kotembedo doare. Edo God uso wasiri biae awa kotembedo dodo wasiri itadira. Edo na ge sena amone embo umo wasiri biae edo ira te amimi gitijigido betari matawa atari da emboro da mambae edo ira ainde sena. Edo wasiri biae embo gitijigido betari da emboro da mambudo ira atira wasiri biae na ainda ge saera. Edo imo ungo embo God manunugadi adewa awa jigido gogo edo ewo. \v 17 Edo wasiri bebegae berari atira amone biae ra awarate wasiri biae embo gitijigido betari matawa atari da emboro da mambae edo ira amone atira. \p \v 18 Edo ingodena gosera embo ave umo Iesu gebe ari embo edo ira awa umo iji berari wasiri biae ae edo ira ainda be awa God da mei mi umo simba edo ira awasedo. Edo God da mei mi embo awa simba eono edo embo wasiri bebegae da susu embo awa embo awa usibesi ae edo ira. \p \v 19 Edo embo wasiri bebegae da susu awa busu da embo berari awa gitijijigurira awarate ingodena gosera ingodena awa God da totopo ra. \p \v 20 Edo ingodena gosera God da mei bugudo jiro gari ingodenaso yei ititisira awasedo ingodena God be moka garira. Edo ingodena iji berari God be moka da demo da atima era ainda be awa ingodena iji berari uso mei Iesu Keriso da demonda atima era awasedo. Edo Iesu Keriso awa God be moka ra. Edo Keriso awa wasiri matawa atari ra. \p \v 21 Naso kinapeina gaegae edo ove kekevegari tumondebain eove ta iji berari gido gogo ewo. \cls Awara \cls Iso namendi \cls Iesu Keriso da jawo da \cls John