\id REV - Waunan (Woun Meu) NT (alternate orthography) -Colombia 2011 (DBL -2013) 
\h APOCALIPSIS 
\toc1 Juan khãitarr 
\toc2 El Apocalipsis 
\toc3 Ap 
\mt1 EL APOCALIPSIS 
\mt2 Juan khãitarr 
\ip Juanau mʉg ich khãitarr õrag jawaag phãawai ya jöoiraa khitajim aajem. Ich mag jaar ĩchab Jesús igar ʉ̈kha durrum khʉʉn oomaaugau õrau am ẽudeejã ẽkhanaa, cárcel deg pʉ̈inaa wajappha dau aug waupiejeejim aajem. Ẽwandamau oowai mag ich chaain wajap dau aug wau durrum oobaawaita jöoi Juan khãaipi aujim anaabá, mag khãaipi athamua nem thum thʉnʉmʉn ichdëuta khap aajeewai mag ich chaain dau aphʉʉ api nʉm khʉʉn dʉ̈ijã ichdëu khap aju jawaag. 
\ip Magta chadcha Juanau Ẽwandamau ich khãaipinaa ichig oopitarr thumaa phãjim aajem, chi ʉ̈kha durrum khʉʉndam warag khĩir onee amkhĩir; mag nʉm dʉ̈i ĩchab ich Cristojã ũwaai deeu bëewi õor ich dau na khaigba aajerr khʉʉn thum theernaa isegju khap amkhĩir. Juanaun ich paarmua ya chi ʉ̈kha durrum khʉʉnag Cristoou magju khap apinaa, mʉg jẽb gaai phithurg au wënʉrrawiajã, warag magʉmjã igba Cristo dʉ̈ita ogdʉba ubʉ wënʉrrapim khõchgauta mʉg ẽsap phãjim aajem. 
\ip Juanau ichdëu nem oomatarr ĩgkhamam ũurwai, chadcha maach dauderraa aju aai sim, dichdëuta ootarr akhiin. Pari maagwai chi ʉ̈kha narr khʉʉnau khaphʉ naajim anaabá, Ẽwandamau mʉg durr khaigba aju jaau sim. Juanau ich daúachata oojim aajem, Ẽwandamau mʉg durr i agkhabarm ed jãga irua õor gaai jua khʉaba deeju. Ẽwandamau magta irig nem khĩir pogkhe oopimajim anaabá, thum ichdëu ootarrjöo jaaumamkhĩir. Pari chi Ẽwandam iek ʉ̈khaba nʉm khʉʉnau chan par Juanau mag ichdëu ootarrjö wajapha ẽsap gaai phãtarr thʉ̈ʉrjerrjã khaugba aajeejim anaabá. 
\ip Ya ĩs ewag paawai Juan khãitarr igwia õrau amach khĩirjugpierr jaaujem. Pari Ẽwandamau thumaam khʉʉnag ʉ̈rcha khaphʉ apim khõsi simʉn mʉgau: Mʉg nʉʉ awia dëgölp Ẽwandamau Jesucristo dʉ̈imua amach kha ukhur arr khʉʉn thum warre sĩi ichdëuta pödpʉ̈iwia ichta ʉ̈rpai sĩsiju. Mag edan chi mepeerpata Ẽwandamau sĩi eeg bʉ̈ʉu bichthʉgbaadëmjöta aju anaabá. Pari magtarr khur ar i iek ʉ̈khawia ogdʉba ich mag durrarr khʉʉnan ich dʉ̈i ich mag wënʉrramkhĩir, ʉ̈gthar phë arrwia ich mag ich dʉ̈i phë wai sĩsiju aajem. 
\c 1  
\p  
\v 1 Mʉʉn Juanau, Jesucristo chog. Muata pãrag mʉchdëu ootarr jaaum ig chirʉm. Mʉg mua jawaagpam iekhan ich Ẽwandamaucha Jesucristoog jaautarrau. Mag ichig jaaubaawaita mʉ khãaipi auwi mʉrʉg jaaujim, jũrr mua ich iek ʉ̈kha durrum khʉʉnag jaaumkhĩir. Mʉg iek thum ich jaaubarmjö chadcha jöpcha aju khap amkhĩir, Jesucristoou ich chog ãb ʉ̈gthar ich dʉ̈i sĩejemʉgta jaaujim, mag mʉ khãaipi atham ee jũrr magua mʉrʉg jaaumkhĩir.  
\v 2 Magbaawaita Ẽwandamau Jesucristo dʉ̈imua mʉchig oopinaa mʉchig ũrpitarrpa thumaa phã chirʉm.  
\v 3 Chi mʉg mua phãbarm ẽsap thʉ̈r sim woun onee aju; maimua onee ajurau ĩchab mʉg ich iek phã sim gaai Ẽwandamau nem thum ichdëu jaau sim iek ãbmua thʉ̈rmam ũrwia ag gaai jaau simjö i ipierraa wënʉrrʉm khʉʉn. Ya chadcha thum mʉg ẽsap gaai ichdëu jaau simjö öbëbërg maju dakkha pamam. 
\s1 Phöbör siete narr ee iglesiapierr Juanau ẽsap phãnaa aaidʉtarr 
\p  
\v 4-5 Mʉʉn Juanau. Muata mʉg ẽsap phã deepʉ̈i chirʉm Asia durr phöbör siete nʉm ee Ẽwandam iek ʉ̈kha nʉm khʉʉnag. Mua pãar kõit jëeu chirʉm, ichta warrgarwe ich mag sĩerranaa mʉg atagjã ich mag sĩerraju igwia, ich khu juupjem khĩirphee ich Ẽwandam Akhaar sĩerrʉm igwia, maimua Jesucristo chadam iek chaarcha jaauchëtarr igwiajã jëeu chirʉm, pãar dau ee aug khaug paraanaa pãar ʉ̈u wai nʉm dʉ̈i ĩchab pãar khõinaa wai wënʉrramkhĩir. Mag Cristota meeba arrjö nacha iiu phiidʉwia mʉg reinaan thʉnʉm khãaijã iek theeg ʉ̈rcha sĩerrʉm. Ich ag Cristota maach daupigau ʉdʉraa ich thõopijim. Magbarmua maach khaibag chugpaapʉ̈iwia  
\v 6 ich Aai anaa ich Ẽwandam athee maachta phadnaankha aujim, ich dʉ̈i agdaujö iek thethe wënʉrramkhĩir. Irigta ãba thumaam khʉʉnau, “Ich appaita ãba Ẽwandam chaarkha sĩerrʉm” a iekhanaa, “Ichdëupaita warrgarwejã nem thum khaphʉnaa mʉg atagjã khaphʉ sĩerraju; maata maach Ẽwandamau” a thö iekhaju aai nʉm. 
\q1  
\v 7 Cristo, Ẽwandam Iewaa, edjã baug ee urum thumaam khʉʉnau amach daúa ooju, i thõotarr khʉʉnaupa. 
\q1 Magbaawai durrpierram khʉʉnau amach daujã merag phëwi, jũrr amach gaai mas aju khap, i ökgau icharaucha bĩejurau. 
\q1 Magju anʉm chan sëukhaawai khabam. 
\p  
\v 8 Ich Ẽwandamauta ich igwia, “Mʉchpaita nacharam ẽsapdau Ajönaa chi ãbmiecharam Zetajö chitʉm” a iekhaajem, ich warrgarwejã ich mag sĩerrawi mʉg atagjã ich mag sĩerraju Jöoirau. Ichdëu mag sim aawai oob khĩirjumiet. Ichta Ẽwandamau, thumaam khʉʉn Pör; i athee chan phithurm nem chukhum. 
\s1 Khãaipi athamua maach Pör Jesucristo ootarr 
\p  
\v 9 Mʉʉn pãach khod ar Jesús iek gaaimua pãachjö phithurg au pʉʉrba khitaajemuata pãrag mʉg ẽsap phã deepʉ̈i chirʉm. Mag phithurg aaujeeb mamʉ, ich Jesucristoouta magʉm ãwataagjã juapá deejeewai, magʉmjã igba, phithurg jẽedʉ khitʉmua i aar barwi i khĩir wajaug oo wai chitaju. Ẽwandam iek jaau chitʉm dʉ̈i Jesuu nem wau nʉrrarr mʉch daúacha oojerrta jaau chitʉm gaaimua, mau döjãrr phʉram Patmos anʉm gaai preso chirʉm.  
\v 10 Mag mʉ preso chirʉmta biek ãb domighed ich Ẽwandam Akhaarta mʉ gaai phẽs aicheewai, mʉ dau eerthʉg athamjö abarm ee, trompeta iekjöta nem jẽbag mʉ ëugarmua mʉrʉg iekhachëwia,  
\v 11 “Nau mua pʉchig nem oopibarm thumaa ẽsap gaai phãnaa Asia durr phöbör siete nʉm ee mʉ iek ʉ̈kha nʉm khʉʉn aar deebapʉ̈i” ajim: “Efesopienag, Esmirnapienag, Pérgamopienag, Tiatirapienag, Sardipienag, Filadelfiapienag maimua Laodiceapienagjã agjö.” 
\p  
\v 12 Mʉchig mag iekhabaichëm khap aag awi mua ewag phʉʉrbanaa oowai, lámpara bʉ̈ ausĩiujemta phĩr dën phurii khithëem ãbam aig siete nʉm oojim.  
\v 13 Maimua mag lámpara siete nʉm jãrr mua oowai, woun ãb ich Jöoi Iewaa Jesujöö simta ichkhaarjã araa correerjö phĩr dën phuu khitʉmua ãi jʉ̈naa khajũa bʉ̈ duurga khĩeb bʉ̈ khãdau aar jũa dʉnʉm oojim.  
\v 14 Mag simʉn khĩirjug khaauga sĩerraawai sĩi lanjöta pördam bäpphä khitajim, ich khĩirjug khaugau. Maagwai ich daúapai nem thum khaphʉ aajeewai, i dau oowain sĩi õtdaujöta uujẽer uujẽer uujẽer sĩsid ajim.  
\v 15 I bʉ̈, sĩi nem inag õtdau ee bʉ̈ʉupinaa wau simjö nem theega sĩejim, broncejö. Mag nem theeg sĩewai sĩi uhbʉ oodʉnaajim, bʉ̈ʉrjã burrju khaba. Mag i bʉ̈ broncejö sĩewai sĩi phuu khitajim. Mag sim iekha sim ũurwai, ichta thumaam khʉʉn khãai iek theeg sĩerraawai, sĩi phũasdau dapagta dö igaau jurrdʉbaichëm iekjö sĩejim, i iek.  
\v 16 Mag simua ich juachaar gar phĩdag siete wai dʉnaajim; ich i ee espaar khẽu mii khitʉm phõpá garm magwe dëe khitʉmjã wai sĩejim, agua ich oomapham khʉʉnag bʉ̈ʉrjã ich jua jʉmpiba aag. Maimua i khĩir oowain sĩi edau pechagkham ee nem phuum oo nʉmjöta maach dau përpërmjö sĩejim, pöd i dʉ̈i khĩircha eerpaju khaba. 
\p Magta mʉrʉg mʉch daúacha maach Pör Jesucristoou ich oopijim. 
\p  
\v 17 Mag oobarmʉn mʉʉn sĩi chi meemjöta thʉbëpjã chukhu i bʉ̈khʉrr buju aimajim. Mamʉ magbaawai ichdëu mʉ gaai pʉrnaa, “Oob jãphierram” ajim. “Mʉchta nem thum ompaaju nawe chirajim; mʉg durr thum öwiajã mʉchta ich mag chirsiju khabahab” ajim mʉrʉg.  
\v 18 “Mʉchpai khabahab” ajim, “ar meewi deeu iiu phiidʉtarr; magtarr cha agtha iiu chirʉm, mʉg atagjã ich mag iiu chitʉm iekhau. Mʉchdëuta khap chirʉmgui” ajim, “jãagwaichata õor meepiju, maimua mag meewaijã chijã khʉʉnta khĩmie durr wëtju” a iekhamajim mʉrʉg.  
\v 19 Maimua mʉrʉg, “Cha pʉchdëu nem oobarm dʉ̈i nau pʉchig oopibarmpa ẽsap gaai thumaa phã sĩubá” ajim, “mʉʉgwai nem in thʉnʉm, maimua mʉgtarr khurjã nem öbëbërg maju thum phã sĩubá” ajim.  
\v 20 Maimua mʉrʉg, “¿Pua khaphʉ chirʉ́” ajim “khani jaau sĩ ar mua mʉch juachaar gar phĩdag siete wai chirarr, maimua lámpara ausĩiujemjã phĩr dën siete wai chirarr?” Magnaa ichdëupai, “Ar phĩdag siete narr, jã mag siete iglesia nʉm ee agjö pastornaan siete nʉm khʉʉnta jaau simgui” ajim. “Maagwai mag chi lámpara ausĩiujem agjö siete narr, jãkhʉʉn Asia durr mag iglesia siete nʉmta jaau simgui” a jaaujim mʉrʉg ich Cristooucha. 
\c 2  
\s1 Asia durr phöbör siete narr ee iglesiapierr iek jaaupʉ̈itarr 
\p Mag mʉchig Asia durr mag iglesia siete nʉm eem pastornaanag amachpierr ẽsap phãnaa aaidʉpi jaautarr aawai mʉkhʉʉn ẽsap pãar atheyau: 
\s1 1. Efeso phöbör eem pastorrag iek jaaupʉ̈itarr 
\p  
\v 1 Efeso phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ich chi iglesia siete nʉmpierr nʉrranaa ich juachaar garmua pãar chi pastornaan siete nʉmjã burrpiba wai sĩejemuata pʉrʉg ich imeerba mʉg ẽsap phã deepʉ̈ipijim. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau: 
\p  
\v 2 I iek pua nem wau sim thumaa irua khaphʉ chirʉm aajem. Irua khaphʉ chirʉm aajem, pʉ phidag chadcha nem theeg sim, mamʉ pua magʉmjã igba ich mag jua jeeuba phidkha khitaajem. Pʉch khapeenau nem khaigba waauwaijã pua sĩi khĩuu ãwatba aajemjã irua khapphʉ chirʉm aajem. Ar amach iiupai amta Ẽwandamau ich i jaaumkhĩir jʉr aujim aajem khʉʉn sëu pʉr awaagjã am dʉ̈i jãau nʉmjö par iekhaupai juapá chach oowia chadcha am sëunemeg pʉr autarrjã irua khaphʉ chirʉm aajem.  
\v 3 I iek pʉ chadcha i gaaimua phithur khitaajem aajem. Mamʉ magʉmjã pʉ khĩir bʉ̈ʉ aa khaugba ni khajewaajã khaugba phidkha khitaajem aajem.  
\v 4 Pʉ mag khitab mamʉ, i iek irua warr pʉ pʉch sĩerrjö ooba chirʉm aajem. ¿Khan jãgwi pua jãg warramjöcha i khõchkhaba sĩ? a sim ichdëu.  
\v 5 Magua irua pʉrʉg, khĩir eyaa abá a sim; i iek warr pʉ jãg khaba sĩejim aajem. Ãsie ewag pʉch khaibag khĩirjuwia iseg jëeubá, warr pʉchdëu i khõsi aajerrjö i khõsi aag. Mamʉ pua magbamʉn, pʉ aar mawia i iek irua warre pʉ iglesia lámpara sörjö isegpʉ̈iju aajem, tag igba aag.  
\v 6 Mamʉ jãg irua Nicolás igar nʉm khʉʉnau nem jaau wënʉrrʉm ichdëujã khõchkhaba simjö puajã am igar khaba sĩewai ʉ̈u sim aajem. Pua jãg sim aig i iek ichjã pʉ igar chirʉm aajem. 
\p  
\v 7 Magnaa ichdëupai, “Ar chi jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag nem jaau sim ũrbat” a sim. Ar phithurg au wënʉrrawiajã ich mag i khõsi wënʉrrʉm khʉʉnan ʉ̈gthar ich Ẽwandam dʉ̈icha wënʉrraju aajem. Makhʉʉnag irua Ẽwandam nemjĩir gayam nemjõ jõpiju aajem, õor ich mag iiu wënʉrrapiejem nemjõ. 
\s1 2. Esmirna phöbör eem pastorrag iek jaaupʉ̈itarr 
\p  
\v 8 Esmirna phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ich chi Nacharam anaa chi Ãbmiecharam aajemuata pʉrʉg ich imeerba mʉg ẽsap phã deepʉ̈ipijim; ajapcharan ar meewi deeu iiu phiidʉtarrauma. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau: 
\p  
\v 9 I iek pua nem wau sim thum khaphʉnaa, pʉ wajappha i gaaimua phithurg au khitaajemjã irua khaphʉ chirʉm aajem. I iek irua khaphʉ chirʉm aajem, pʉʉn chadcha dau aphʉʉ khitʉm. Mamʉ ʉ̈gtharin pʉʉn nem wajapham paraam aajem. Ar amach iiupain amta judionaan aawai Ẽwandam chaainau aajem khʉʉnau pʉ ëugar parhooba iekhaajemjã ĩchab irua khaphʉ chirʉm aajem. Mamʉ pʉrʉg am iek asekaspiba sim. Jãkhʉʉnan sĩi dösãt igar naawaita jãg thʉnʉm anaabá.  
\v 10 I iek pʉch dau aphʉʉ ajujã oob ögkham aajem. Chadcha pãar Ẽwandam dʉ̈i ubʉ nʉm khap aag awi pãar eem ãaur khʉʉn dösãtau cárcel degjã dubpʉ̈imaju anaabá. Maagwai tagam khʉʉn ẽudeejã ẽkhawi dʉ̈rrcha phithurg aupiju aajem. Pari magʉmjã igba ich dʉ̈ita ich mag ubʉ naapi sim. Mag wënʉrrʉmʉn, ʉ̈gthar pawiajã ich mag pãar i dʉ̈i nʉisiju aajem. 
\p  
\v 11 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ögkhaba ʉ̈u magʉm thum ãwatpʉ̈i nʉm khʉʉnan, warm khʉʉn khĩmie durr wët thʉnʉm daar, Ẽwandamau jũrr ich aarta phë auju aajem. 
\s1 3. Pérgamo phöbör eem pastorrag iek jaaupʉ̈itarr 
\p  
\v 12 Pérgamo phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉgjã mʉg ẽsap phã chirʉm. Mamʉ chi iekhan mag ich i ee espaar khẽu mii khitʉm phõpá garm magwe dëe khitʉm wai sĩejemuata pʉrʉg ich imeerba mʉg ẽsap gaai mʉg jaaupʉ̈ipijim. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau: 
\p  
\v 13 I iek pua nem waaujem thumaa irua khaphʉ chirʉm aajem. Pʉ sim phöbör dösãt phöbör anaabá. Mamʉ irua khaphʉ chirʉm aajem, magʉm ãba pua ich kha ogdʉba khitʉm. Irua khaphʉ chirʉm aajem, ar Antipas khararrau ich daúacha oowia ich iek jaau khitʉm athee chi dösãt igar thʉnarr khʉʉnau i thõo nʉm jaarjã, pua ãsie pʉchdëu ich iek ʉ̈khatarrjã isegba chadcha ĩsjã agtha ich mag ich kha ogdʉba khitʉm.  
\v 14 Mamʉ magʉm ãba, i iek pʉ khaigba simjã irua oo chirʉm aajem. Maguata pua Balaam igar nʉm khʉʉnagjã iekhaba sĩi oo wai sim anaabá. Ich jãg Balamau ajim anaabá, deeum woun Balac aajerrag israelnaanag nem khaigba waupi jaaujerr. Ich jãgua ajim anaabá, ar amach jua wautarrta ẽwandamkha wai nʉmʉg jëwaag ag khĩirphee nemchaain thorrphë wai narr nemek modjã khöpi jaaunaa ĩchab parhooba dich õor khabam dʉ̈ijã khapes aju aai nʉm a jaautarr. Pua mag khaphʉ simta mag Balaam igar nʉm khʉʉnag bʉ̈ʉrjã iekhaba sim aajem.  
\v 15 Mamʉ i iek mag appaijã khaba, pʉch iglesia ee Nicolaitanaan igar nʉm khʉʉnjã jʉrwërppʉ̈iba, pua sĩi oo wai sim anaabá. Nicolaitanaanau nem jaau nʉm chan irua khõchkhaba chitʉm aajem.  
\v 16 Magua irua pʉrʉg, “Ãsie ewag pʉch khaibag khĩirjuwia Ẽwandamag iseg jëeubá” a sim. Magbaju atheen, pʉ aar mawia ich i eem esparaupai warag pãach dʉ̈ipata wërbʉimaju jaau sim. 
\p  
\v 17 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ögkhaba ʉ̈u magʉm thum ãwatbapʉ̈imʉg, ʉ̈gthar pawiajã mʉg jẽb gaaim nem khoojem khĩir khabamta khöpinaa mokdaudam bäphä khitʉm gaai thʉ̈r iiur phã khitʉmjã ichdëucha deeju aajem. Mag thʉ̈r chan bigaaum khʉʉnau khaugba, ãba chi athamuapaita khaphʉ aju aajem. 
\s1 4. Tiatira phöbör eem pastorrag iek jaaupʉ̈itarr 
\p  
\v 18 Tiatira phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Ẽwandam Iewaa ar dau sĩi õtdau uu thʉnʉmjönaa bʉ̈jã sĩi broncejö phuunaa bʉ̈pá theeg sĩerrʉmuata pʉrʉg mʉg iek jaaupʉ̈ipijim. Magtarr aawai chamʉ́ pʉ atheem iek jaaupitarrau: 
\p  
\v 19 I iek irua khaphʉ chirʉm aajem pua nem wau sim. I iek pua õor kha khõsinaa pʉchdëu ich iek ʉ̈khatarrjã chadcha isegba ogdʉba ʉ̈kha sim aajem. Pua nem waauwaijã khĩir thũu waaujem aajem, waumaphamjã aba. Maimua i iek ĩs pua warram khãaijã ʉ̈rcha nem wau sim aajem, maimuajã wajapcha.  
\v 20 Mamʉ par pʉ mag sim ãba, pʉ jaauju paraa sim aajem: Pua ʉdʉraata Jezabelag i chaain khũgurpi sim aajem. ¿Jãgwi? Ichdëupai iita Ẽwandam i jaaumie awi ʉdʉraa dich õor khabam dʉ̈ijã khapes aju aai nʉm a jaaupinaa ĩchab Ẽwandam chaar khabamʉg jëwaag nemek mod wai narrjã khöpi jaau simjã bʉ̈ʉrjã irig iekhaba ʉdʉraa mag jaaupiewaima.  
\v 21 Í jãg simʉn irua sĩi oo chirʉm aajem, chi Jezabelau jãg nem khaigba wau sim thumaa ãsie ewag khĩirjuwia magʉm khaibag ichig chugpaapi jëeumkhĩir. Mamʉ magʉmta jëeujöjöopaijã khaba, ni jãg sĩi emkhooin parhoobam dʉ̈i sĩerrʉmjã ich jua pʉaba, ich agtha sĩerrʉm anʉm.  
\v 22 Ũrbá, mua pʉrʉg jaaukhim: Jöoirau jaauwai ich jãg ʉrrʉm gaaimua warre wajap i dau aug waupiju aajem; maimua ar irua nem jaau sim igarnaa i dʉ̈i khapes arr khʉʉnjã amach khaibag iseg jëeuwia ich igar theerbabamʉn, ĩchab irua amjã wajap dau aug auwi am ökhĩirjug pöoma ich agjö apiju aajem.  
\v 23 I chaainjã warre khëchpʉ̈iju anaabá. Mag oobaawaita thum iglesia nʉnʉidʉm eem khʉʉnau khakhapdö aju anaabá, ichdëuta chadcha õor thumaam khʉʉn thãar khaphʉnaa am khĩirjugjã khaphʉ chitʉm. I iek õrau khaphʉ aju aajem ĩchab, amachdëu nem waumarrpierr ichdëuta am dʉ̈ijã amachdëu aajerrjö aju.  
\v 24 Mamʉ i iek pãar ar dösãt iekta õrau amachdëupain chadcharam iek awi agʉg ee thʉnarr khʉʉn igar bʉ̈ʉrjã wëtba arr khʉʉnag chan irua tag atcha nem waupi jaaubam aajem.  
\v 25 Mamʉ ichiita ich deeu mʉg jẽb gaai pãach awaan bëe nʉm ora, pãachdëu ich iek ũrwia ʉ̈khatarran warag ogdʉba ich jãg ʉ̈khapi sim.  
\v 26 Ar ewag wëtba warag amachdëuta magʉm thum ãwatpʉ̈iwi ichdëu nem jaau simpai wau wënʉrrʉm khʉʉnag irua ich jãg ich Ayau ichjã iek theeg apitarrjö amjã iek theeg apiju aajem, ich dʉ̈i ãba mʉg durr gaai õor thum thʉnʉm pörkhamkhĩir.  
\v 27 Mag amachta chi pörnaankha nʉisiewai, amauta mʉg jẽb gayam khʉʉn dʉ̈i nem jua theeg amach garmuata thũr thorrbar sĩubarmjö dajẽk wai nʉisiju anaabá.  
\v 28 I iek ar chi mag nʉm khʉʉnag irua ĩchab amag edpherr garm phĩdagjã deeju aajem; ajapcharan ichpaita am dënkhapi auju anaabá. 
\p  
\v 29 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. 
\c 3  
\s1 5. Sardis phöbör ëem pastorrag iek jaaupʉ̈itarr 
\p  
\v 1 Sardis phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar Ẽwandam Akhaar ich gaai wai sĩenaa phĩdagjã siete wai sĩejemuata pʉrʉg ich imeerba mʉg iek jaaupʉ̈ipijim. Magtarr aawai chamʉ́ pʉ atheem iek pʉrʉg jaaupitarrau: 
\p I iek pʉʉn chadcha thʉ̈rphöo sim aajem, Ẽwandam i jëwaag. Mamʉ mag simʉn pʉʉn pʉch pekau eepai sĩi chi thõmjö simta jãg sim anaabá.  
\v 2 Ichdëu pʉ mag sim oo sĩewai pʉrʉg “Khĩir ubʉ abá” a sim; “maimua ar ʉ̈kha durrum anʉmta kha thũu khithëem khʉʉnjã khĩir onee apibá” a sim. Magbamʉn jãkhʉʉnjã warag eeg pawia khëchju anaabá. I iek irua oowai pua nem wau sim Ẽwandamau oowaijã ʉ̈u khaba sim aajem.  
\v 3 Ar nacha pʉchdëu ũrwia ʉ̈khatarr iekta khĩirjunaa, pʉchdëu khaigba arr Ẽwandamag chugpaapi jëeunaa, deeu i dʉ̈i ubʉ abá. I iek pua magbaju atheen, nem jĩgkhaajem khʉʉn sĩi dëgölp nem jĩgkhaimaajemjö, õor barbajöjöo sĩerr ee dëgölp pʉ aar barwi pʉ gaai mas deeju aajem.  
\v 4 Mag naab mamʉ jãig Sardiim iglesia ee ʉ̈u agtha nʉm aajem, ãaur khʉʉn ʉdʉʉr pekaúg amach ʉ̈rpapiba durrum khʉʉn. Makhʉʉnta khajũa bäphä jũanaa i dʉ̈i wënʉrraju anaabá, am amachdëu ich ipierr wajapha arr gaaimua chadcha mag wënʉrraju aai naawai.  
\v 5 Ar ögkhaba ʉ̈u magʉm thum ãwatpʉ̈i nʉm khʉʉnagan irua khajũa bäphämta jũapiju aajem. I iek magʉm khʉʉn thʉ̈r chan irua ich aar auju khʉʉn thʉ̈r phãajem ag ẽsap gaaimua borraapʉ̈ibam aajem. Magju khãai warre irua ich Aai dakhĩir maimua ich chognaan dakhĩirjã, “Chamʉ khʉʉnan mʉ dënëu” a jaauju aajem. 
\p  
\v 6 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. 
\s1 6. Filadelfia phöbör eem pastorrag iek jaaupʉ̈itarr 
\p  
\v 7 Filadelfia phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Cristo iekhau, ar ichta bʉ̈ʉrjã pekau chukhunaa sëu chukhu khitʉm iek. Ichdëuta warr rey David khararr yabmejã wai chirʉm aajem. Iruata mag yabmeeu puertdi weeu sĩubarm chan ni ãbmuajã pöd phãar aubam aajem; wa iruata warag khãijã phãar sĩubarm chan ãbmuajã pöd weeu aubam aajem. Ich mag sĩerrʉmuata pʉrʉg ich iek jaaupʉ̈ipitarr aawai pʉrʉg jaaukhim: 
\p  
\v 8 I iek pua nem wau simjã irua thumaa khaphʉ chirʉm aajem. Irua khaphʉ chirʉm aajem, chadcha pʉ chan magcha nem jua theeg khaba khitʉm; mamʉ magʉm ãba, pua i ipierraa khitaajem aajem. Pua ãsie i igwi, “Mua chan tag i iek ʉ̈khabamjã” aba, ich mag ogdʉba ʉ̈kha khitʉm aajem. Pʉch mag khitʉm gaaimua irua pʉ na puertdi weeu wai chirʉm aajem, ich iek jaauju ayaa amkhĩir. Mag puertdi chan ni ãbmuajã pöd phãar aubam aajem.  
\v 9 Ar dösãt igarnaa judionaanjã khaba nʉmta nem sëunem amach iiupain amta judionaan aawai Ẽwandam chaainau a nʉrrjëe aajem khʉʉnag, irua ajués pʉ khĩirpheeta jĩepör phõbkhapiju aajem, ichdëu chadcha pʉ khõsi chirʉm amag khap amkhĩir.  
\v 10 Pʉchdëu irua jaautarr ipierraanaa bʉ̈ʉrjã jua ʉ̈yaajã khaugba khitaajeewai irua pʉ thʉa wai chitaju aajem. Ichdëuta mag pʉ thʉa wai chirʉm chan mʉg jẽb gaaim khʉʉn thum Ẽwandamau chachwi ökhĩirjug pöoma thʉnʉm jaarjã pʉ warm khʉʉnjö khabaju anaabá, ichdëuta pʉ thʉa wai sĩewai.  
\v 11 Iin jöpcha bëeju aajem. Pʉchdëu i iek ʉ̈khatarr ich jãg ʉ̈kha chirʉmjö, ich jãg wajapha ʉ̈khapi sim, pʉchig nem deeju arr jũrr chikhamnagta deem ugua.  
\v 12 Ar ögkhaba ʉ̈u magʉm thum ãwatpʉ̈i nʉm khʉʉnan irua ich Aai Ẽwandam iglesia ee dibʉ̈ jãrramjö chi thierrnaanag paapʉ̈iwi ich mag bʉ̈ʉrjã isegaajã khaugba wënʉrrapiju aajem. Ichdëuta am gaai Ẽwandam thʉ̈rjã phãnaa i sĩejem phöbör thʉ̈rjã phã sĩuju aajem. Mag phöbör thʉ̈r Jerusalenau, Ẽwandam sĩejem aarmua bëeju phöbör. Ĩchab am gaai irua ich thʉ̈r iiurjã phã sĩuju aajem. 
\p  
\v 13 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. 
\s1 7. Laodicea phöbör eem pastorrag iek jaaupʉ̈itarr 
\p  
\v 14 Laodicea phöbör eem pastor: 
\p Maach Pör Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar chadam iekpaita iekha sĩerrʉm iekhau. Ichdëun ich daúa oonaa ich jʉ̈gʉucha ũrtarrjã ich agjöota jaaujem. I gaaimuata warrjã Ẽwandamau nem thum ompaa aujim. Mag sĩerrʉmuata pʉrʉg ich imeerba jaaupʉ̈ipitarr aawai pʉrʉg jaaukhim: 
\p  
\v 15 I iek pua nem wau simjã thumaa irua khaphʉ chirʉm aajem. Irua khaphʉ chirʉm aajem, pʉ jãga sĩ: Pʉ chan nem pechagjã khaba ni nem khukhunagjã khabata sim anaabá. Ajapcharan puan ʉ̈khabaaderrau ʉ̈khaba aadëpta sim aajem. Jãgbanaa pʉ warag khukhuna khãijã sĩekhiin, i iek ʉ̈ucha akham aajem; wa magbam khai nem pechag khãijã akhiin, ʉ̈ucha sĩekham anʉm ĩchab.  
\v 16 Mamʉ i iek pʉch jãg khukhuna khaba ni nem pechagjã khaba sĩi pëdchuchuupai sim gaaimua, pʉ irua döba sĩi deeu chöipʉ̈iju aajem.  
\v 17 Pʉchdëupain pua, “Mʉʉn phatkhon paraamʉu; phatkhon pöm wai chiraawai deeum nem atheejã augchëba chitʉm” aajem. Mamʉ pʉch kha onegjã chukhunaa pʉch dau aug sim chan pua khaugba, ni sĩi pʉch maadëu igmap dau khĩsumjönaa mor kharramjö simjã pua pʉch khaugba sim anaabá. Mag simta pʉ jãg iekha sim aajem.  
\v 18 Pʉdë irua jaaupʉ̈itarr iek ũrbarí, pʉrʉg jaaukhim: Pʉ chadcha phatkhon pöm paraa am khõs chirʉm khai, phĩr õt ee bʉ̈ʉunaa ya chi wajaug appai deeu jãppi simta ich jua gaai për aupi sim. Mag khai chadcha pʉ phatkhon paraa chitaju aajem. Jãg mor kharraa nʉrram ugua, i jua gaaita khajũa bäpphä bʉ̈ʉrjã memerkhög chukhum për auwi jũabá a sim. Maimua daujã wajapha nem oog atheejã ichdëu bënhë wajapham wai simta për athá a sim.  
\v 19 Irua ichdëu õor kha khõsim khʉʉnagan meeurrau sĩunaa ĩchab wawijã wawiejem aajem. Magua puajã pʉch khaibag iseg jëeuwia khĩirdam ubʉ Ẽwandamta jʉrbamʉn, i iek pʉ gaai mas aju aajem.  
\v 20 Iin maach thãar bʉ̈khʉrr chiraajem aajem, weeu aunaa ichig dubbá amkhĩir. Ãbmua khãijã weeu auwi irig dubbaad akhiin, iin ierrcha dubju chirʉm aajem, i dʉ̈i khapeerkhaag.  
\v 21 Ar nem phithurm awiajã ogdʉba ʉ̈u amachdëuta i dënjö nem thum pödpʉ̈i nʉm khʉʉnagan, irua ich jup chirʉm gaai dʉ̈i ãba ich bigaau juppiju aajem, ich dʉ̈i ãba iek theeg nʉisimkhĩir, ich jãg ichdëujã nem thum pödtarr jũrr ĩchab ich Ayau ich dʉ̈i ãba iek theeg apitarrjö. 
\p  
\v 22 Magnaa ichdëupai, “Ar jʉ̈g ʉ̈rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. 
\c 4  
\s1 Ʉ̈gthar Aai i jëeu nʉm ootarr 
\p  
\v 1 Mag mʉrʉg thumaa jaau dichtarr khur mua oowai, edjãata puertdijö weeudʉ wëjöm mua oobaadëjim. Mag eemua nacha mag mʉchdëu trompeta jẽbag sim iek ũrtarr ag ödijö simuata mʉrʉg, “Mau ʉ̈gthar pidú, mʉg atag nem thumaa öbëbërg maju mua pʉrʉg oopikhim” a sĩejim. 
\p  
\v 2 Magbarm ee ich Ẽwandam Akharauta mʉ ʉ̈gthar athaadeewai ich Ẽwandam juupjemta nem pörkhau pöoma sim ooimajim. Ag gaai woun ãb jup sĩejim.  
\v 3 Mag pörkhau gaai jup sĩerr woun sĩi mokdaudam jaspe aajemjö bʉ̈ʉnaa cornalinajö phuphuphumjö sĩejim. Mag pörkhau pöm sim bigaau ĩchab pirm phãauraanaa dau bʉ̈ʉʉ esmeraldajö simta jʉ̈a wëjoojim.  
\v 4 Mag pörkhau pöm sim bigaau deeum ich agjö pörkhau chaaindam daii khithëem khapan veinticuatro ohood phʉʉrdʉ wëjömjã mua oojim. Maig ĩchab jöoin khajũa wajappha bäpphä jũanaa pörsirjã phĩr dën jũa sĩsid ajim. Makhʉʉn jöoin chi khapanagjã veinticuatro narr aawai makhʉʉn pörkhau mag veinticuatro narr gaai ich agpierr ohood wëjoojim.  
\v 5 Mag pörkhau warm khʉʉn jãrrcha sim aarmua pagthʉm dau phʉr jẽjẽer khabaadëm dʉ̈i ĩchab phiphis khabaadëmua sĩi iyʉ̈ʉmjö aadëp sĩejim. Mag pörkhau pöm sim khĩirphee õtdau siete paakhanaa dʉnʉnʉid thʉnaajim. Makhʉʉn ich Ẽwandam Akhaar ajim.  
\v 6 Ich ag pörkhau na ĩchab phũasjö simta sĩi dau bʉ̈ʉʉ simjã sĩejim. 
\p Mag pörkhau pöm sim bigaau jãrrcha sĩi khanjö sĩsidʉmta khĩir gar maimua ëugarm magwe dau khapan phuphup sĩsidʉm jayap naajim. Mag sĩsidʉmʉn iiu sĩsid ajim.  
\v 7 Chi nacha sĩerr leonjö sĩejim; mag ẽudeem, phak emkhöidamjö sĩejim; mag garm wounkha sĩejim; maimua ẽudeecharam, jayapam, sĩi jimiejãu pöm simta ũrr jörrömjö sĩejim.  
\v 8 Mag sĩsidʉmʉn amach jayapwe sĩi nem ich khapan agdaujö seis wai sĩsid ajim, amachpierr. Ierr jãgarm magwe dau phuphupnaa ʉ̈rjã sĩi dau khapan phuphup sĩsid ajim. Amach makhʉʉnau bʉ̈ʉrjã ijeeuba edaram magwe Ẽwandam thö iekhamamua, 
\q1 “Ẽwandam, pʉjö bʉ̈ʉrjã pekau chukhum khʉʉn chan ooba aajem” anaajim. 
\q1 “Pʉchta thumaam khʉʉn Pör anaa thumaam khʉʉn khãaijã chi jua thierriu. 
\q1 Pʉchta warrgarwejã ich mag sĩerranaa mʉg atagjã ich mag sĩerraju” a thö iekhamajierram. 
\p  
\v 9 Mag sĩi ich khapan sĩsidʉmua maach Ẽwandam ichta ich mag thõojã khaugba mag ich pörkhau gaai oo simʉg jëeu nʉmua, ʉ̈u ajim anaa i thö iekha naajim.  
\v 10 Mag i thö iekhakhakhampierr mag jöoin veinticuatro ohood wëjöm khʉʉnau i jup sim khĩirphee, “Pʉchta chadcha chi jua thierrau” anaa amach pörsir phĩr dën jũa narr jua ee auwia irig ʉanaa phõbkhakha aajeejim, mag ichta thõjã thõba warrgarwe ich mag iiu sĩerrʉmʉg jëeuwai.  
\v 11 Mag thʉkhöokhanaa meukharauta irig, 
\q1 “Pʉʉta maar Pör Ẽwandamau; 
\q1 pʉʉta chadcha chi jua thierr aawai pʉ khĩragta thumaam khʉʉnau eenaa thö iekhaju aai nʉm” anaajim. 
\q1 “Pʉchdëu nem thum ompaam khõsi ompaawiata chadcha nem thum thʉnʉm” a thumeukhar majierram. 
\c 5  
\s1 Corderooupaita ẽsap khaar sĩsid arrjã thʉrrëuju a jaautarr 
\p  
\v 1 Mag jãrrcha khu juupjem sim gaai woun oo sĩerrau, ajapcharan ich Ẽwandamauma, ich juachaar gar pa gaai ẽsap pʉʉrthʉ sim wai simjã mua oojim. Mag ẽsap, jãgarjã phãnaa ëugarm magwe phãnaa, thʉ̈rmajupierrpai khibjʉ̈rjö simua khaar sĩsid ajim. Magʉm siete naajim mag ẽsap pʉʉrthʉ sim gaai.  
\v 2 Mua mag oo atham dʉ̈i ĩchab ich Ẽwandam chog ãb nem jua theeg simua iek khẽgkha, “¿Chijãguata magan mʉig mʉg ẽsap khaar sĩsidʉm thʉrrëupʉ̈inaa mʉg ẽsap eeureu auju aai sĩ?” a sĩejim.  
\v 3 Mamʉ mam ʉ̈gthar, ni mʉg jẽb gaai, ni mʉg jẽb eegarjã õor ãbjã chukhu ajim, mag ẽsap pʉʉrthʉ sim eeureunaa ag gaai thʉ̈raag. Ni sĩi agʉg eerpaju khʉʉnpaijã chukhu ajim.  
\v 4 Mamʉ mag ẽsap eeurjãgnaa ag gaai thʉ̈rju ayaam woun ni ãbjã chukhu ni sĩi agʉg eerpajupaijã chukhu abarm mʉchdëu oobaawai, jãga ag gaai phã sim khap abarju awi, mua pöd ãwatba warag mʉ bĩebaadëjim.  
\v 5 Mag mʉ ich dakhĩir bĩe chirʉʉ paawai mag jöoin veinticuatro narr eem ãbmua mʉ aig bëewi mʉrʉg, “Oob tag bĩem, ar sĩebahab” ajim, “David khararr ag chaain ewagam khʉʉn bi eem Chaai leonjö jua theeg sĩerrʉm. Jãguata ya ichdëu nem thum thʉnʉm pödpʉ̈itarr aawai ichdëuta jãg ẽsap khaar sĩsidʉmjã thʉrrëupʉ̈inaa eeurjãg ooju aai sĩebahab” ajim. 
\p  
\v 6 Mʉchig magbaa mua oo nʉʉ aawai, chadcha mag sĩi khanjö dau jayap ich paar sĩsidʉm bigaau jöoin ohood wëjöm jãrr, ar corderodamjö ʉdʉraa ich thõopiwia deeu iiutarrta oothẽu khërajim; ajapcharan ich Jesuma. Amau i thõo naawai pa gaai meerphëtarr agtha merag chukhu sĩejim. Mag khitʉmʉn sĩi kach khapan sietenaa dau khapanjã agjö siete phuphup sĩejim. Makhʉʉn dau khapanag siete nʉmua chi Corderoou Ẽwandam Akhaar gaaimua nem thum khaphʉnaa durrpierr oo phë wai sĩejemta jaau sim.  
\v 7 Mag chadcha mag corderodamjö khitʉmua mawi, mag pörkhau gaai jup simua juachaar gar ẽsap pʉʉrthʉ sim wai sĩerr jũrr i jua eem jëeu auwimajim.  
\v 8 Mag Corderodamau amach dakhĩir mag ẽsap pa gaai pʉʉrthʉ sim jëeu athaimam oobaawai mag sĩi khanjö ich paar sĩsidʉmua agjö aig jöoin veinticuatro narr dʉ̈imua sĩi i khĩirphee thʉkhökhöod aphöbaadëjim. Makhʉʉn jöoinau amachpierr arpa wai naajim, maimua jarrdam phĩr dën phurii khithëemjã agjö amachpierr wai naajim. Mag jarr ee incienso ipir wai sĩsid ajim. Ma, Ẽwandam chaainkha nʉm khʉʉnau irig jëeu nʉm khʉʉn iek aajem, mag jarr ee ipir sĩsidʉm.  
\v 9 Makhʉʉn jöoin mag thʉkhökhöod thʉnʉmua chi Cordero thumeukharmamua meukhaar iiurta au naajim. Amau meukhaar au narr mʉg ajim: 
\q1 “Pʉchdëupaita ãba jãg ẽsap jua ee auwi chi khaar sĩsidʉmjã thʉrrëu werbaju aai sim, pʉchta thumaam khʉʉn kõit ʉdʉraa pʉch thõopitarr aawai. 
\q1 Pʉch thõo nʉm aig bag ãrtarrauta pua õor durrpierram khʉʉn amach meupierr Ẽwandam athee përkha aujim. 
\q1  
\v 10 Makhʉʉnta pua Ẽwandam na phadnaan khapiwia ĩchab chi pörnaan khapiju. 
\q1 Magbaawai mʉg durr jũrr amachdëuta khap nʉisiju” a thumeukharmajim ich khĩircha. 
\p  
\v 11 Maimua mua oowai, mag pörkhau bigaau mag khanjö ich paar sĩsidʉm dʉ̈i jöoin ohood wëjöm ëugar, Ẽwandam chognaan pöoma sĩi sereu phʉʉrdʉ wëjoojim. Mag thʉnʉmʉn chi khapanag millones y millones thʉnarr aawai, khapaana sĩi maach dau warpta pos pʉʉrthʉ, pöd maadëu chi beerjujã khaugba thʉnaajim.  
\v 12 Mag thʉnʉm khʉʉnau thet meukhaar au nʉmua mag naajim: 
\q1 “Jãg Corderodam õor gaaimua ʉdʉraa ich thõopitarrauta jua theeg thʉnʉm thum auwia nem ajapham thʉnʉmjã thum auju aai sim. 
\q1 Ãba ichpaita thumaam khʉʉn khãaijã nem khĩirjug khaugnaa juapa theegjã ichdëupaita auju aai sim. 
\q1 Magnaa irig eenaa, i ooimʉgjã thö iekhanaa, irigpaita thumaam khʉʉnau jëeuju aai nʉm” a thumeukhar majierram. \fig |src="HK061C.tif" size="col" copy="Orace Knowles ©The British & Foreign Bible Society, 1954, 1967, 1972, 1995." ref="REV 5.12" \fig* 
\p  
\v 13 Ẽwandam chognaanau mag meukhaar au dichdimaawai, ĩchab thumaa ich Ẽwandamau nem wautarr edjã ee thʉnʉm khʉʉnau, mʉg jẽb gayam khʉʉnau, khëchwia ya jẽb ee nʉm khʉʉnau, maimua nem thum phũas ee thʉnʉm khʉʉnaupa ĩchab ö ãba meukharau ʉ̈ʉrbabapʉ̈imjã mua ũrjim. Mag amau ʉ̈ʉrbapʉ̈itarr meukhaar mʉg ajim: 
\q1 “Ar pörkhau gaai Jöoi jup simʉg maimua Corderodamagjã agjö ãba pãragpaita mʉg atag paawaijã ich mag thumaam khʉʉnau jëeunaa ee aju aai nʉm” ajierram. 
\q1 “Pãar wajaugpaita thumaam khʉʉnau thö iekhaju aai nʉm. 
\q1 Magnaa, ‘Pãachta mʉg atag pawiajã thumaam khʉʉn khãaijã ich mag jua theeg nʉm’ aju aai nʉm” ahaug majierram meukharaupai. 
\p  
\v 14 Magbaawai mag khanjö ich paar sĩsidʉm khʉʉnau ĩchab amach paarmua ö ãba, “Jãan chadcha ich magau” aajeejim. Makhʉʉnau magbarm dʉ̈i ĩchab mag jöoin veinticuatro narr khʉʉnaujã deeu jĩepör phõbkhanaa am wajaug thö iekhajierram amag jëeumamua. 
\c 6  
\s1 Ẽsap khaar sĩsid arr thʉrrëu nʉm ootarr 
\p  
\v 1 Mag ẽsap pa gaai pʉʉrthʉ sim jëeu auwi, mʉ dakhĩraa mag Corderodamau chi ẽsap nacha khaar sĩerr thʉrrëupʉ̈iwi eeureu oobaadëjim. Magbarm ee mag sĩi ich paar sĩsidʉm eem ãbmua mʉrʉg, “Pidú, oobahur” a sĩejim.  
\v 2 Irua mag oobahur abaawai mua oowai, cabaai bäpphä simta aig sĩejim. Mag cabaai ʉ̈r woun sĩerrau ich jua ee choophõ wai sĩejim. Mag simʉg pörsir deewi jũapi sĩubaawai, ichdëuta thumaam khʉʉn pödpʉ̈iwi, ichta emkhooikha öbërjim, ich garmua ich jua jʉmpiba sĩerraag. Ma, mʉg atag paawai ichdëuta mʉig eegarm khʉʉn ich jua jʉmpiba ichta chi pörkha sĩsiju. Pari ma chan chi Cordero khaba aawai ich mag chi pörkha sĩerrabaju. 
\p  
\v 3 Maimua chi Corderodamau deeu chi ẽsap auwia mag khaar sĩerr napemjö thʉrrëubapäaiwai, mag dau jayap ich paar sĩsidʉm eem ãb phak emkhöijö simua agjö, “Pidú, oobahur” ajim mʉrʉg.  
\v 4 Mag irua oobahur abaawai deeum cabaai phuríi simta dʉnʉʉubaichëjim. Mag cabaai phur sim ʉ̈r woun sĩerr jua ee espaar joothʉ sĩuwi jua theega apijim, õor khõinaa thʉnarr meeukhapiwi wir aig chikham khëchamkhĩir. Magbaawai durrpierr juurhi theega sĩi wërbʉphöo aadëjim. Ma ajim sello numiim gayam mʉrʉg oopitarr. 
\p  
\v 5 Maimua sello thãrjupam thʉrrëuju mʉrʉg oopijim. Majã arjö chi Corderodamau thʉrrëubapäaiwai mag jayap narr ee ãb wounkha simta ich khapan seis wai sĩerrau warm khʉʉn dënjö, “Oobahur” ajim mʉrʉg. Magbaawai sĩi cabaai phʉis simta dʉnʉʉubaichëjim. Mag gaai woun bëetarrau ich jua ee lib chach wai bëejim.  
\v 6 Mag cabaai phʉis sim dʉnʉʉubaicheewai mag jayap ich paar sĩsidʉm eem ãbmua jãdau theega burrju igwi magjim: “Khãai ãb phidkhabarmuata trigo libdam thãrjuppai auju. Mamʉ nemkhau vino dʉ̈i awaag chan phatkhon chukhum” a sĩejim. 
\p  
\v 7 Mag khur sello jayapam thʉrrëubaadëjim. Maimua Corderodamau mag sello jayapam thʉrrëubapäaiwai jũrr mag jĩmiejãu pöm sim ũrr jörrömjö simuata, “Pidú, oobahur” ajim mʉrʉg.  
\v 8 Magbaa mua agʉg oowai cabaai uashãu khĩirkha sim gaai ãb wounjö simta mua oojim. Mag wounjö sim thʉ̈r “Chi Meem” a thʉ̈r sĩejim. Mag gar deeum urajim. Ma, i thʉ̈r “Khĩmie Durr” a thʉ̈r naajim. Makhʉʉnag jua theeg deewi mʉg durr peer jãrrchapaím amag jaaujim, esparau õor khëchnaa, jãdaúajã khëchnaa, bën theeg õor ee burrpiwi agʉmuajã khëchnaa, sĩi nem pabʉ̈ eem nem maach khoojemʉgjã õor khëchpʉ̈imkhĩir. 
\p  
\v 9 Mag khur chi Corderodamau chi cincoom sello thʉrrëubapäaiwai nasãdjö wau sim eegar mua oojim, Ẽwandam iek jaau durrum gaaimua khëchpʉ̈imarr khʉʉn.  
\v 10 Makhʉʉnau amach dau aphʉʉ juau khëchmarr jũrr Ẽwandamag am dʉ̈i agjö amkhĩir jaau durrumua thet mag naajim: “Ẽwandam, pʉchta thumaam khʉʉn khãai jua theeg ʉ̈rchanaa, pekaujã chukhu, pʉch iekhatarrjã chadcha khitʉm, ¿jãagwaita pua maar bag ãrtarr jũrr õor i agkhawi maar khëchtarr khʉʉn dʉ̈i ich agjöo ajuuta jãg sĩma?” anaajim irig. 
\p  
\v 11 Amau magbaawai amag khajũa bäphä sĩsidʉm phëdeewi sĩi warag, “Pãar khodnaanjã pãach khëchtarrjö Cristo ipierraa i iek jaau durrum gaaimua khëchpʉ̈iwia pãach aig ãba paaukhachë nʉm ora, idëu bʉchkhun oo athat” ajim. 
\p  
\v 12 Maimua chi Corderodamau jũrr ya seim sello thʉrrëubapäaiwai ʉʉur theega duui dichdimamjã mua oojim. Magbaadeewai mʉg edau ãsdawam sĩi put phʉichjö phʉissi aadëjim; maagwai jũrr edau chi edaram, ajapcharan edau argma, bagjö phurii aadëjim.  
\v 13 Magbaadee ĩchab edjã ee phĩdag thʉnarrjã, sĩi phũ theeg wëbaadeewai nemjõ agtha khũguthu khitwe khʉi duubjemjö, mʉg jẽb gaai khʉi thʉnʉisijim.  
\v 14 Magbaadëm dʉ̈i ĩchab edaujãjã sĩi ẽsapjö pʉʉrsiirmamua chukkhu aadëjim. Magbaa thumaa durrsĩ sĩsidʉmjã amach narr aigmua chawag ërëubaadee ĩchab döjãrr morr sĩsidʉmjã ich agjö chawag ĩiudʉjierram.  
\v 15 Mʉg durr gayam reinaanjã mag oobaa, ãaur khʉʉn jẽb degjã ierr paaukhamaawai, ãaur khʉʉn durrbʉ̈ ee mokpör dapagkham eegarjã dubjierram, daumeerwai. Mamʉ makhʉʉn appaijã khabajim. Ich agjö daumerjierram ĩchab, chi daphʉm khʉʉn, soldaaun pörnaan, riknaan, chi jua thierrnaan, sĩi chikham chogkha par phidkha sĩsid arr khʉʉnpa; thumaam khʉʉn ich agjöo daumerjierram, jãphierr nʉm iekhau.  
\v 16 Mag daumer nʉmua durrsĩigta wounaanagamjö chaigpanaa, “Jãg pörkhau gaai oo simʉg maar oom ugua, maar ʉ̈r dʉrbagkhawi pãach eegar maar meer athat” anaajim.  
\v 17 “¡Maar meer athat! Maar gaaita Cordero khĩir machag meeuju ed barbaichëm. Jãg sim, ¿khaíu i jua jʉmbarju?” anaajim, i ökgau. 
\c 7  
\s1 Israelnaan chi dauchacham khʉʉn 
\p  
\v 1 Mag thʉnarr khur mua oo nʉʉ aawai Ẽwandam chognaanta dau jayap mʉg jẽb ʉ̈r dʉnʉnʉihdʉ naajim: ãb dokhẽu gar edau öbeerjem gar, ãb dökhierr gar, ãb thoom igar juachaar garm bijãr, maagwai ãb juawë gar, arag dau jayap naajim. Makhʉʉnau bʉ̈ʉrjã phũ dichpiba thʉa wai naajim, ni mʉg jẽb gaaijã phũ wëba, phũas ʉ̈rjã wëba, ni bʉ̈ʉrjã pabʉ̈dam gaaijã phũ wëm ugua.  
\v 2 Ĩchab deeum Ẽwandam chog edau öbeerjem garmua urumjã mua oojim. Magua ich jua ee õor dauchaachjem waidurajim, ich Jöoi charau agua õor dauchachamkhĩir deetarr. Ich mag Ẽwandam chogau mag warm khʉʉn jayap mʉg jẽb khaibag waunaa phũasjã khaibag wawaag jua theeg narr khʉʉnag thet khĩesirnaa,  
\v 3 “Ẽwandam iek jaau wënʉrraju khʉʉn dag gaai marau agtha ich Ẽwandam dauchach phãkhaba nʉwe chan, oob jʉ̈chag mʉg jẽb, mʉg phũas, ni pabʉ̈jã khaibag waumiet” ajim amag. 
\p  
\v 4 Mua ũurwai mag chi dauchachpʉ̈itarr khʉʉn thum chi khapanag ciento cuarenta y cuatro mil nʉm anaajim, Israel chaain amach thʉ̈rpierr mʉg: 
\q1  
\v 5 Judá khodnaan: 12,000 
\q1 Rubén khodnaan: 12,000 
\q1 Gad khodnaan: 12,000 
\q1  
\v 6 Aser khodnaan: 12,000 
\q1 Metalí khodnaan: 12,000 
\q1 Manasés khodnaan: 12,000 
\q1  
\v 7 Simeón khodnaan: 12,000 
\q1 Leví khodnaan: 12,000 
\q1 Isacar khodnaan: 12,000 
\q1  
\v 8 Zabulón khodnaan: 12,000 
\q1 José khodnaan: 12,000 
\q1 Benjamín khodnaan: 12,000 
\m Arag ciento cuarenta y cuatro mil naajim mag Ẽwandamau dauchachpitarr khʉʉn. 
\s1 Õor pöm khajũa bau appha jũa narr khʉʉn 
\p  
\v 9 Magtarr khur ũwaai deeu Ẽwandam juupjem pörkhau pöoma simʉg mua oowai, õor pöooma sĩi bʉ̈jãaupaita baurur wëjöm oojim chi Cordero na. Mag sĩsidʉmʉn thumaa khajũa chi bau appha jũanaa sothark piujöo khithëemta jua panhappha thʉnaajim. Maig thʉnaajim õor phöbörpierram khʉʉn, meupierr meu khĩir pogkhe; wajapcharan durrpierram khʉʉnta maiguin ãba podpa thʉnaajim. Mag sĩi khapan maach dau dʉ̈rrkhab warpham magwe phʉʉrdʉ wëjöm aawai pöd ãbmuajã beer aubajim, kharra naajim khai chi khapanag.  
\v 10 Mag thʉnʉm khʉʉnau serereukhamua, “Ar pörkhau gaai oo sim gaaimua maimua Cordero gaaimuata maachin ʉ̈u peerdʉ nʉm” a serereu khajierram.  
\v 11 Maagwai chi Ẽwandam chognaanjã thum bʉ̈jãaupaita dʉnʉnʉid phʉʉrdʉ wëjoojim, mag pörkhau bithurg jöoin ohood wëjöm dʉ̈i ĩchab mag sĩi khanjö ich paar sĩsidʉmpa thʉnʉm ëugarm magwe. Mag dʉnʉnʉid thʉnʉʉ awi, mag pörkhau gaai oo sim khĩirphee phõbkhanaa, i thö iekhamamua irig mag naajim: 
\q1  
\v 12 “Mʉg atag pawijã ãba maach Ẽwandamta ʉ̈ucha chitaju. 
\q1 Iita ãba ooimʉg phënaa thö iekhaju aai nʉm. 
\q1 Ichta ãba khĩirjug khaug sĩerrʉm. 
\q1 Irigpaita ĩchab thumaam khʉʉnaujã eenaa ʉ̈u ajim aju aai nʉm. 
\q1 Ichdëupaita chadcha jua theeg thum auju aai sim. 
\q1 Jãan chadcha ich magta aju aai sim” anaajim amachdëupai. 
\p  
\v 13 Magbaawai mag jöoin veinticuatro narr eem ãbmua mʉ aig bëewi mʉrʉg, —Ar õor sĩi khajũa bäpphä jũa sĩsidʉm, ¿pua khaphʉ chirʉ́ aichëjim, chijã khʉʉn agá maimua jãkhʉʉn jammua bëejierrá? 
\p  
\v 14 Magbaa mua irig, —Señor, pʉchdëuta khap chirabahab, mua chan khaugba chirʉm a chirajim. 
\p Magbaa ichdëu mʉrʉg jaaubaadëwi magjim: 
\p —Jãkhʉʉnan Ẽwandamau õor ökhĩirjug pöoma api nʉm jaar ʉ̈u i iek ogdʉba ʉ̈kha durrawia peerdʉtarr khʉʉnaugui ajim. Magua khabahab ajim, jãg am khajũa bäpphä jũa sĩsidʉm, chadcha ich chi Cordero bag ãrtarrauta amach khaibag thum chugpaatarr aawai. 
\q1  
\v 15 “Magwiata jãg bʉ̈ʉrjã ijeeu khaugba edaram magwe pörkhau gaai oo sim khĩirphee i ipierraa irig ich khĩircha jëeu durrumgui” ajim. 
\q1 “Maagwai jãg pörkhau gaai oo simuata am thʉa wai sĩeju. 
\q1  
\v 16 Ya jãgbarm aigmua tag am jãsog ãwatba, ni öbichagjã ãwatbam; 
\q1 ed pechagaujã khakhaichag khaba, ni edaúajã am phaabamgui” ajim. 
\q1  
\v 17 “Jãg pörkhau bigaau ohood wëjöm jãrr ar corderodamjö simuata am thʉa wai sĩejugui” ajim. 
\q1 “Ichdëuta, dö parag aar nemchaain dö döpien phë arrjemjö, amau nem ig nʉm thumaa deewi ichdëuta am dauchöjã jãrpʉ̈pʉ̈i aju” a jaaumajim mʉrʉg mag jöoirau. \rq (Sal. 23:1-2; Is. 49:10; Ez. 34:23)\rq* 
\c 8  
\s1 Ẽsap khaar sĩerr ãbmiecharam thʉrrëutarr 
\p  
\v 1 Maimua chi Corderoou ya ãbmiecha sieteem sello thʉrrëupʉ̈inaa chi ẽsap eeurjãg athaawai, edjã ee ora jãrrjö sĩi khĩúu jöisijim.  
\v 2 Mag khĩu thʉnʉʉ arr khur mua oowai Ẽwandam chognaanta siete i na dʉnʉnʉid thʉnaajim. Makhʉʉnag siete trompetas deejim, amach pipied ããbdö auwi ökhar ichdëu jaaumam aig sirmamkhĩir.  
\v 3 Mag warm khʉʉnag jigtarr khur deeum Ẽwandam chog bëewia, deeum incienso phaajem phĩr dën bʉ̈rʉʉ phurii khitʉm jua ee waibëewi, agjö ich ag phaajem nasãd ʉ̈gthaa wau sim khĩirphee dʉnʉʉuchëjim. Mag i dʉnʉʉubaicheewai warag irig incienso pöm deejim, Ẽwandam chaainau jëeu durrum iek dʉ̈i khajapham nemjö pömaacha waaurëunaa mag phĩr dën nasãd wau sim gaai phaamkhĩir.  
\v 4 Mag incienso phaabaadeewai chi naar Ẽwandam chaainau jëeu durrum iek dʉ̈i mag Ẽwandam chog chi phaa sim jua eemua ãba Ẽwandam sim aarta naar jĩubaadëjim.  
\v 5 Maimua mag chi Ẽwandam chogau ichdëu incienso phaajem bʉ̈rʉʉ khitʉm waiberr auwi, jũrr nasãd gaai chi daupaam eemta auwia, ich dën ee ipiirnaa mʉg jẽb gaai phöpʉ̈ijim. Mag phöbapäaiwai, pagthʉmta bubuju khabaadëm dʉ̈i õor iekjö iyʉ̈ʉmjö jöisim ee, pagthʉm dau phʉr jẽjẽer khabaadëmua ʉʉurpa duuibaadëjim. 
\p Ma ajim ãbmiecha sieteem sello thʉrrëupʉ̈i nʉm mʉrʉg oopitarr. 
\s1 Siete trompetas narr ããbdö sirmam ootarr 
\p  
\v 6 Maimuan chad mag Ẽwandam chognaan siete amach pipied trompeta ããbdö wai narr khʉʉnau ya siraag paaukhabaadëjim.  
\v 7 Chi nacha sir sĩerrau ich trompeta sirbaadeewai nosegdau dap mokpörjö sĩsidʉmta õtkhĩir sĩi bag phuriimjö sĩsidʉm dʉ̈i khʉibaadëjim mʉg jẽb ʉ̈r. Magbaawai pabʉ̈ jãrrchapaím khëchwi phũakdam phãauraa khëkhëd arrjã sĩi thumaa phaadubjim. 
\p  
\v 8 Maimua mag nosegdau dap chë dichtarr khur mag nacha sirtarr gar sĩerrau agjö ich trompeta sirjim. Mag biek numiim sirbaadeewai sĩi nem pöm durrsĩjö simta õtdau khĩirjö ug bëewi phũas ee burrjim. Magbaawai jãrrcha atcha phũas bagag pajim.  
\v 9 Mag phũas eem dö bagag pabaadeewai agjö jãrrchapaím ãwarrjã khëchdubwi mag phũas ee barco jörrjëe arrjã agjö jãrrchapaím warre ãrwi joothũpjierram. 
\p  
\v 10 Magbaawai ãbakhaíujã agjö ich trompeta sirjim. Mag ya sirm thãrjupam gaai paawai, edjã eemua phĩdag pöoma simta õtdau khĩirjö phug bëewi, mʉg jẽb gaai dösĩg khapan dökhum dipa nʉnʉidʉm ʉ̈r burrwi, peer jãrrchapaím dösĩg eem dö ãrpʉ̈ijim.  
\v 11 Ma, phĩdag “Chi Ach” a thʉ̈r sĩejim. Magua ich burrtarrpierr dö nʉnʉidʉm thum achag abpäaiwai õor pöooma öjim. 
\p  
\v 12 Maimua deeum chi Ẽwandam chog agjö aig sĩerrau ĩchab ich trompeta sirjim. Ma, jayapam ajim. Mag sirbarmua mʉg edau ãsdawam jãrrchapaím thõo auwia, edaram ed argjã jãrrchapaím thõo aunaa, phĩdagjã ĩchab jãrrchapaím dau thõokha aujim, amach wʉʉjemjö wʉʉm ugua. Maimua edau khëubaadeewaijã sĩi athuuchata khĩssu aadëmua da ãspabajöjöomjöta aadëjim.  
\v 13 Magbaa mua oo nʉʉ aawai Ẽwandam chogta edjã ee ʉ̈apëpërgmamua iekha jörrajim. I iekhamatarr mʉg ajim: “¡Ë! ¡Aaay, ĩsin chad! Agtha Ẽwandam chognaan thãrjupam khʉʉnau amach trompeta sirju waaur nʉm. Nau jãkhʉʉnau sirphöbaadeewai mʉg jẽb gaai jooba durrum khʉʉnan chadcha aphʉʉta durraju” a iekha jörrajim chi Ẽwandam chogau. 
\c 9  
\p  
\v 1 Maimua chadcha chi Ẽwandam chognaan sirju waaur narr eem ãbmua ich trompeta tẽee aadëjim. Mag siram cincoom gaai, Ẽwandam chogta edjã eemua phĩdagjö phug bëem mua oopʉ̈ijim. Magʉg, sĩi jẽbdijö ierr maach dau warp ithurm jaaba wëjöm ee thʉrrdö sim dën chi yabme deepijim ich Ẽwandamau.  
\v 2 Magbaa mag yabmeeu mag ithurm jaaba wëjöm eem thʉrrdö weeu athaawai, ag eemua orno pömkham eemjö sĩi ʉ̈gthaag naar phʉissi khõrr jĩubaadëmua edau khĩir gar thʉa jöisiewai, warre edaujã khĩssu aadëjim.  
\v 3 Mag naar jĩubaadëm eemua langosta dap asphitjö sĩsidʉm pöooma öbërdʉtkhawi durrpierraaa aaidʉjierram. Mag sĩsidʉmua khaawai khierr machag döjũr khierr machagjö apijim chi Ẽwandam chogau.  
\v 4 Mag langosta dap sĩsidʉmʉg bʉ̈ʉrjã pabʉ̈ chig apiba, pakhërjã thʉrrkhichpiba, phũakjã ãrpiba, ni nemjĩirjömjã ãrpiba jaaujim. Ãba amag jaautarran, õor Ẽwandam dauchach amach dag gaai chukhum khʉʉnta khaibag waupi jaaujim.  
\v 5 Mag amag õor khaibag waupi jaaujieb mamʉ, pöd thõo chan thõoju khaba nʉm a jaaujim. Õor thõoju khãai sĩita am gaai khaa nʉmua cinco meses sĩi am gaai mas waupi jaaujim. Mag khaamam khierr machagan döjũriu khaamamjöta aajeejim chi machag. 
\p  
\v 6 Mamagkham jaran parii õrau wir aigpai amach thõo ẽkhawiajã pöd amach thõobajurau. Thõm khõchaaga aadëp awiajã meeg khabata thaabatarrjö aadëp ajurau, bʉ̈ʉrjã thõba. 
\p  
\v 7 Mag langosta, õor khĩirkhanaa pör gaaijã pörsirjöö sĩsidʉm paar sĩsid ajim, phĩr dën. Mag sĩsidʉmʉn sĩi cabaai juurhi ee wërbʉan arraag wajap khĩir khaug sĩsidʉmjöta sĩsid ajim.  
\v 8 Mag sĩsidʉmʉn ĩchab sĩi ʉʉinjö pörbʉ̈ wʉrnaa khierrjã khum khierrjö sĩsid ajim.  
\v 9 Am mor sĩi jierrjö simua meu sĩsid ajim. Mag sĩsidʉm ũrrphöbaadeewai ich jẽbag sĩi juurhi ee wërbʉajem carrota wërbʉ phöbaadeewai cabayou wai khaphig phöbaadëphʉm iekjö sĩsid ajim.  
\v 10 Mag sĩsidʉmʉn döjũrjöta dur gaaijã jur paar sĩsid ajim. Mag sĩsidʉmʉgta õor khaibag waupi jaautarr aawai am khierr machag mag dur gaaita sĩsid ajim, mag khaamamua cinco meses õor gaai machag ãwatpi wai naag.  
\v 11 Mag langosta pöm durrpierr aaidʉ thʉnʉm pör ĩchab ich mag ierr ithurm wëjöm ee thʉrrdö sim aar chi pörkha sim ag mepeerpaiu. Mag mepeer thʉ̈r Abadón aajem ebreonaan meúa. Maagwai griegonaan meúata Apolión aajem. Mag sim aig maach meúan “õor pöm khëchmie” a simʉu. 
\p  
\v 12 Ma, trompeta cincoom sirbarmua nacha õor dau aug wautarr ajim. Mamʉ agtha dau numí sirju waaur naajim. 
\p  
\v 13 Mag khur chadcha chi Ẽwandam chogau warm khʉʉn dënjö ich trompeta sirjim. Ma, seim ajim. Maig Ẽwandam khĩirphee phĩr dën nasãdjö simta kach jayap jʉjʉrʉʉ sim sĩejim. Mag chi Ẽwandam chogau ich trompeta tẽee abaawai  
\v 14 mag nasãd kach jayap jʉjʉrʉʉ sim eemuata woun iekjö chi Ẽwandam chog mag ich trompeta sir sĩerrag iekha simua, “Ar döjã pöoma Eufrates aajem igaau mepeer dau jayap ö jʉ̈kha thʉnʉm ẽerkhʉʉibapʉ̈i” a sĩejim.  
\v 15 Magbaawai chadcha mag mepeer dau jayap jʉ̈kha thʉnarr ẽerkhʉʉipʉ̈ijim, amach ẽerkhapʉ̈iju ed pabaadeewai. Ich ar maig ajim am ẽerkhapʉ̈iju atarr ora, mag ẽerkhabapäaiwai õor mʉg jẽb gaai jooba durrum khʉʉn jãrrchapaím khëchpʉ̈imkhĩir.  
\v 16 Makhʉʉn ẽudee soldaaun cabaai gaai wëdurajim, õor khaibag wauju khʉʉn. Mua ũurwai am khapanag doscientos millones anaajim. 
\p  
\v 17 Magta mʉrʉg makhʉʉn cabaaijã oopijim. Mag cabaai gaai wënʉrrʉm khʉʉn amach thũrr gar jierrjö sĩsidʉmta õtdau khĩirjö phuu pʉʉrdʉ jũa sĩsid ajim; ãaur khʉʉn dën sĩi phãauraa jacintojö sĩsid aawai tagam khʉʉn dën azufrejö uashãu khĩirkha sĩsid ajim. Chi cabaai pör, león pörkha sĩsid ajim. Mag sĩsidʉm i eemua sĩi õtdau khĩirta khĩbchëug öbër thʉnʉm dʉ̈i naar jĩubaadëphʉm eemua azufrepata jĩerrarrau khajim.  
\v 18 Mag õtdau khĩir naar dʉ̈i azufrepa jĩerrarraukhamua õor pöooma peer mʉg jẽb gaai jooba durrum khʉʉn jãrrchapaím ödubjim.  
\v 19 Mamʉ am i ee mamagkhamuapai khabajim, mag õor pöm khëch thʉnarr. Mag sĩsidʉm durin ĩchab sĩi nemkhõrjö pör paar sĩsid aawai magʉmuapata ĩchab õor dajẽk wai naajim. 
\p  
\v 20 Mamʉ mag õor pöm ödubtarr ee chi iiu nʉisierr khʉʉnau amach daúa mag ootarrjã amachdëu mag nem khaigba waaujerr chan bʉ̈ʉrjã pʉabajierram. Mag khãai warag meperagta Ẽwandamagamjö jëeunaa, sĩi nem parhoob phĩr dën, phatkhon dën, bronce dën, mokdau dën maimua pa dënpa nem oob waunaa, ni iiujã iiuba sĩsid aawai dʉrdʉrjã aba ni amachig jëeu nʉmjã khaugba sĩsidʉmʉgta warag jëeu nʉisijim.  
\v 21 Mamʉ magpaijã khabajim. Magphöbaadëmʉn wir aig chikhamanjã amachdëu khëcham aig khëchnaa, bënëujã chikham khʉgnaa, amach õor khabam dʉ̈ijã khapesnaa ich mag nem jĩignemjã nʉisijim, amach jua pʉaba. 
\p Mag trompeta seim sirbarmua Ẽwandamau mʉg atag õor i agkhaju mʉrʉg oopitarr ajim. 
\c 10  
\s1 Ẽwandam chog chi jua thierr ʉ̈gtharmua ẽsapdam dʉ̈i bëetarr 
\p  
\v 1-2 Magtarr khur mua oo nʉʉ aawai, Ẽwandam chog dewam nem jua theeg simta ʉ̈gtharmua sĩi jʉʉnthumie bau thʉnʉm eemua bëewi, mʉ dakhĩir bʉ̈chaar garm bʉ̈ phũas ee dʉnʉʉunaa bʉ̈wë garm bʉ̈ durr jẽb gaai dʉnʉʉuchëjim. Mag simua pirm ich pör ʉ̈r wai sĩejim. I khĩir, sĩi edau khĩirjö bʉ̈ʉʉ maach dau khakhaisamjö sĩewai i bʉ̈ sĩi õtdau ʉ̈gthaag uu jẽjẽerkhamjöta sĩejim. Ẽsapdam pa gaai pʉʉrthʉ khitʉmjã jua ee wai sĩejim.  
\v 3 Mag dʉnʉʉuchëwi nem iek theeg äaa ajim. Mag äa a simʉn sĩi león puu a sim iekjö sĩejim. Mag irua äa abaawai pagthʉm siete narrauta dʉ̈i i iek ʉ̈kha, äaa ajierram.  
\v 4 Maimua mag pagthʉm siete narrau iekha dichdimaawai ya mua ẽsap gaai phãag ẽkha chirajim. Mamʉ magbaa ĩchab ʉ̈gtharmua mʉrʉg woun iekjö, —Jãg pagthʉm siete narrau nem jaaubarm pʉchdëu ũrtarr oob phãm; sĩi pʉch thãar eepai wai sĩsí ajim. 
\p  
\v 5 Magbaawai mag Ẽwandam chog bʉ̈ ãb phũas ee dʉnʉʉunaa bʉ̈ ãb durr jẽb gaai dʉnʉʉu sĩerrau ich juachaar garm jua ʉ̈gthaag edjãag ʉanaa magjim: 
\p  
\v 6 —Ẽwandam ichta ich mag meejã khaugba sĩerranaa mʉg edaujã ompaawi, mʉg jẽb, mʉg phũas maimua makhʉʉn ee nem thʉnʉm thum ompaatarr Jöoi iekhau, mʉgbarm aigmua ya chadcha maachdëu jaau nʉmjö aimʉʉ pamgui ajim.  
\v 7 Ya ãbmiecharam Ẽwandam chogau sieteem ich trompeta sirbaadeewai Ẽwandamau ichdëu ich thãar eepai nem wauju khaphʉ sĩerr thumaa ich i jaaumienag jaautarrjö aagpamgui ajim chi Ẽwandam chogau. 
\p  
\v 8 Magbaawai mag edjã eemua mʉrʉg woun iekjö iekha sĩerrau deeu mʉrʉg, —Ar Ẽwandam chog bʉ̈ ãb phũas ee dʉnʉʉunaa thoom bʉ̈ durr jẽb gaai dʉnʉm aar mawia irua jua ee padam gaai ẽsapdam pʉʉrthʉ khitʉm eeurjãg wai dʉnʉm jëeu athamí ajim mʉrʉg. 
\p  
\v 9 Magbaawai chadcha mua i aar mawia ichig mag ẽsapdam jëeubaimaawai mʉrʉg, —Ya magan warre khöbapʉ̈i ajim. Nau pua i ee aauwain chadcha khũwaa mieljö khöpʉ̈iju; mamʉ pʉ bi ee pabaimaawai nem achaaga pʉ biiu ãwatbajugui ajim mʉrʉg. 
\p  
\v 10 Magbaawai mua chadcha mag ẽsap i jua eem auwi khöbaadëjim. Warran chadcha mua mieljö khũwaa khöpʉ̈ijim; mamʉ ya mʉ jã gar paawaita sĩi nem achaaga mʉ biiu ãwatbajim.  
\v 11 Magbaawai mag chi mʉrʉg ẽsap dee sĩerrau mʉrʉg, —Agtha Ẽwandamau nem waumaju pöoma thʉnaawai puajã agjö phãju pöoma chirʉmgui ajim, phöbörpierr õor meu khĩir pogkhe amach meupierr nʉnʉidʉm ee durrpierr reinaanagpa jawaag. 
\c 11  
\s1 Ẽwandamau õor numí ich i jaaumkhĩir pʉ̈itarr 
\p  
\v 1 Maimua ãbmua padam duraa khitʉm mʉrʉg deejim. Mag deewi, —Jãgua chachbamí ajim; Aai i jëeujem di, ag ee nemchaain khëchnaa phaa nʉmua Ẽwandamag jëeujem nasãd, maimua ag ee Aai i jëeu nʉm khʉʉnjã agjö chi khapanag beerbapʉ̈i ajim mʉrʉg.  
\v 2 Mamʉ ar daau gajãrcha õor biirdʉajem wëu wëjöm chan oob chacham ajim, jã sĩi bʉ̈ʉrjã ʉ̈khaba aajem khʉʉn atheem aawai. Makhʉʉnauta año thãrjup awi jãrr Ẽwandam phöbör dʉ̈i sĩi amachdëu ampierr ajugui ajim.  
\v 3 Pari mamag khabaadeewai Ẽwandamau ĩchab ich i jaauju khʉʉn numí pʉ̈ijugui ajim, año thãrjup awi jãrr makhʉʉnauta sʉrkhaajem khajũa jũanaa irua amachig nem jaaubarm jũrr õrag jaaumkhĩir. 
\p  
\v 4 Chi Ẽwandam chogau jaauwai ich mʉkhʉʉnta jöoi Zacarías khararrau olivo bʉ̈ numí jaaunaa ĩchab lámpara ausĩiujemjã numí jaautarrau. Ajapcharan makhʉʉn numiim khʉʉnauta ajap õor dau aug wau nʉm jaar maach Ẽwandam thumaam khʉʉn Pörkha sĩerrʉm iek jaauju khʉʉnau.  
\v 5 Makhʉʉnta ãbmua khãijã khaibag wauju ẽkhaju atheen, sĩi amach i eemua õtdaujö uu jẽjẽer khabaadëmua warre amach dʉ̈i mag nʉm khʉʉn sĩi phaa khëchpʉ̈iju anaabá.  
\v 6 Makhʉʉnaun año thãrjup awi jãrr amachdëu Ẽwandam i jaau wënʉrrʉm ee bʉ̈ʉrjã noseg chëpiba aagjã nem jua theeg naaju aajem. Dö bagag paapʉ̈imaagjã jua theegnaa ĩchab õor dau aug wawaagjã amachdëu am aig aju anaabá. 
\p  
\v 7 Maimua mag año thãrjup awi jãrr Ẽwandam iek jaau wënʉrrʉʉ awi, thum jaau aaipabaadee, mag ierr ithurm wëjöm ee thʉrrdö sim eemua mepeer sĩi jãgaamjö sim öbërchëwi, am dʉ̈i wërbʉchëwi, ich garmuata am pödpʉ̈iwia am khëchpʉ̈iju.  
\v 8 Mag khëchpʉ̈iwi, thumaam khʉʉnag ich jua oomkhĩir, maach Pör Jesucristo meerphë thõotarr ag phöbörjã wëug ee amach numwe sĩi ëudʉtkha sĩuju. Mag phöbör Jerusalenta ich khaibag gaaimua jũrr Sodoma a thʉ̈rnaa ĩchab Egipto gaai thʉ̈r sim, makhʉʉnjã ich agjö khaibag athee thʉ̈rphöo sĩerrjëe arr aawai.  
\v 9 Mag khëchpʉ̈iwi khãai thãrjup awi jãrr sĩi kaaijã ee ëudʉtkha sĩuju, õor phöbörpierram khʉʉn amach meupierr meu khĩir pogkhe bëe thʉnʉm khʉʉnag oomkhĩir. Mamʉ iwiir ãbam khʉʉnau mag oowi bëpam iigwaijã chi khëchtarrau ʉdʉʉr bëppibaju.  
\v 10 Makhʉʉn numí mag Ẽwandam iek jaau wënʉrrʉm khʉʉn mag mepeer sĩi khanjö simua khëchbapʉ̈im abaawai, õor durrpierram khʉʉnta onee ajurau, Ẽwandam i jaau durrum gaaimua amach khajap sĩuba aajerr khʉʉnta ya khëchbapäaiwai. Mag onegau jũrr agdaujö chikhamnag regalojã ʉahʉanaa phiestajã wauju. 
\p  
\v 11 Mamʉ am mamagkham ee, mag khãai thãrjup awi jãrrnaa, deeu Ẽwandamau am akhaardam am gaai phãarthʉ sĩubaawai amach numwe deeu phiidʉtkhaju anaabá. Mag khëchpʉ̈iwia khãai thãrjup awi jãrr narrta deeu Ẽwandamau phiriutkha atham oobaawai chi oo nʉm khʉʉn wajappha jãphierrju aajem.  
\v 12 Mag chi Ẽwandam i jaau wënʉrrarr khʉʉn deeu iiu phiidʉtkha nʉisiewai ʉ̈gtharmuata õor iekjö amag, “Mau ʉ̈gthar pidut” aju. Magbaawai chadcha edjã baug ee ʉ̈gthaa paaukhabaadëju. Mag am ʉ̈gthar paaukhabaadëm am oomaphanaa am kha ukhur aajerr khʉʉnaujã oopʉ̈iju.  
\v 13 Am mag ʉ̈gthar paaukhabaadëm ee ʉʉur theega duuibaadëmua phöbör eem dijã di khapan sĩi dʉrbagkhaju. Mag di chʉabagkhabarmua õor siete mil warre khëchju. Magbaawai mag ʉʉurʉu khëchba ʉ̈u iiu nʉisim khʉʉnau ĩchab jãphierr durrumua Ẽwandam ʉ̈gthar khëraajem thö iekha nʉmua irig, “Ẽwandam, pʉchta chadcha emkhooirau; pʉjöm chan ni ãbjã chukhum” ajurau, jãphierr nʉm iekhau. 
\p  
\v 14 Ma, trompeta seim sirtarr õor dau aug wauju jaau sim ajim, biek thãrjup waaur narr eem ya biek numiim. 
\p —Mamʉ agtha chacham ãb waaur sim ajim, thãrjupam. Ma nau jöpcha oopijugui ajim mʉrʉg. 
\s1 Ãbmiecharam trompeta sirtarr 
\p  
\v 15 Mag dau ãb waaur sim atarr aawai chadcha ĩchab deeum Ẽwandam chogau chi ãbmiecharam ich trompeta sirjim. Ma, sieteem ajim, ãbmiecharam. Mag sirbaadeewai ʉ̈gthar sĩi õor iekjö sereubaadëmua mag naajim: 
\q1 “Mʉg durran thumaa maach Pör Ẽwandamaujã jʉ̈anaa, ichdëucha jʉr auwi maach Pörkhapitarr dʉ̈imuata jʉ̈aju aai nʉm. 
\q1 Mag, maach Ẽwandamauta mʉg durr gaai thum ichta ich mag chi Pörkha sĩsiju” anaajim. \rq (Ex. 15:18; Dn. 7:14,27)\rq* 
\m  
\v 16 Magbaawai ĩchab Ẽwandam khĩirphee mag jöoin veinticuatro amach pörkhaupierr ohood wëjorr khʉʉnaujã eeg phõbkha jẽkhʉt dagau dʉrkhanaa irig jëeumamua mag naajim: 
\q1  
\v 17 “Ẽwandam, pʉʉta maar Pör thumaam khʉʉn khãaijã chi jua thierr aawai pʉrʉgta ʉ̈u ajim anʉm. 
\q1 Ãba pʉchta warrgarwejã ich mag chitanaa ĩsjã ich agtha iiu chitʉm. 
\q1 Ĩs pua pʉch jua theeg thum auwi mʉg durr chadcha pʉchdëuta ya jʉ̈a chirsim. 
\q1  
\v 18 Durrpierram khʉʉnta pʉ dʉ̈in meeukha thʉnʉm; 
\q1 mamʉ ya pua am gaai pʉch khĩir machag meeuju ed pachëjim. 
\q1 Ĩsin chad pua nawe khëchtarr khʉʉn khĩircha jaaumamua amachdëu nem waaujerrjö pʉchdëujã am dʉ̈i aju. 
\q1 Ĩsta ĩchab pʉch chogkhanaa pʉch i jaaumien dʉ̈ijã wajaphanaa pʉch chaainkha nʉm khʉʉn dʉ̈ijã wajapha aju edau, thethem khʉʉn wa sĩi parhoobam khʉʉn awijã ar pʉchig ee aajerr khʉʉn dʉ̈i. 
\q1 Mamʉ ĩchab ĩsta pua ar mʉg jẽb gaai nem ãr nʉm khʉʉnjã öpʉ̈iju edau” anaajim, irig ee nʉmua. 
\p  
\v 19 Amau mag Ẽwandamag jëeuphöbaadëm ee mua oowai Ẽwandamag jëeujem diita weeudʉ jöisijim, ʉ̈gthar. Mag weeudʉbaadëm ee ierr mag warrgarwe ich chaain dʉ̈i iek deetarr ãkhaajem baaudiita dawaa aadëjim. Mag chi Ẽwandam di weeudʉbaadeewai, pagthʉmdau phʉr jẽjẽer khabaadëm dʉ̈i õor iekjö sereu jöisimua, pagthʉm theega wʉwia ʉʉur theegjã duuibaadëm dʉ̈i noseg dau dap sĩi mokdaujö sĩsidʉmta chë thʉnʉisijim. 
\c 12  
\s1 Õoirjö simua ʉʉi ẽudee ẽkhatarr 
\p  
\v 1 Maimua edaujã ee ijaaur öbërjim, Ẽwandamau ich jua theeg oomkhĩir pʉ̈itarr. Mag ijaaur öbërtarr mʉg ajim: Ʉʉirauta sĩi ãsdawam edauta khajũajö jũanaa jũrr edaram edau arg gaai oo dʉnʉm edjã eemua öbërchëjim. Ich mag ʉʉirau pörsir jũa sim gaai phĩdag sĩi docen ãb phuphup sĩejim.  
\v 2 Mag khitʉmʉn jõor khitarr aawai agäa agäa khitajim, ya chaai awaag bi machgau.  
\v 3 Mag ʉʉi öbërchëtarr khur deeum ijaaur edjã ee öbërjim. Mag ijaaur jũrr mʉg ajim: Õoirjö nem pöoma sĩi phuríi simta ãbam gaaipai pör khapan siete nener simpierr pörsir panhappha sĩejim. Mag simʉn ĩchab kach khapanjã jʉjʉrʉr diez wai sĩejim, phak kachjö sĩsidʉm.  
\v 4 Mag simua dur phis a thũaphëbaraau warre edjã eem phĩdagjã jãrrchapaím mʉg durr ʉ̈r thũphãau sĩujim. Magwi mag ʉʉi chaai awaag bi machkha sĩerr khĩirphee nʉ sĩsijim, ich dakhĩir athaawai ag bʉ̈rre chi chaaidam khöpʉ̈yaag.  
\v 5 Magua mag nʉ sim ee, mag machkha thʉnarr aawai, mag ʉʉirau chaai chi emkhooidam oojim. Mamʉ mag atham bʉ̈rre ãbmua chi chaaidam jiirbaadëwi Ẽwandam ich pörkhau gaai oo sim aar wai dʉnaaimajim, ʉdʉʉr khöpiba. Mag chaairauta jöoipa sĩsiewai nem iek theeg jũrr durr mʉg wëjöm thumaa ichdëuta jʉ̈a sĩsiju a jaaujim mʉrʉg.  
\v 6 Magbaawai chi ãd jũrr sĩi jãog wai naamkhĩir Ẽwandamau i athee nem thum khĩir khaug wai sĩerr aawai warp õor chukag ee mawi mamta año thãrjup awi jãrr sĩeimajim. 
\p  
\v 7 Maimua magtarr khur edjã ee juurhi phiidʉjim. Ʉ̈gtharm Ẽwandam chog Miguel anʉmta tagam ich khapeen agjö Ẽwandam chognaan dʉ̈imua jũrr mag mepeer õoirjö simta sĩi pör khapan sim dʉ̈i wërbʉ naajim. Mag õoirjö sim igar nʉm khʉʉnjã agjö khapan thʉnaajim.  
\v 8 Mamʉ chi angelnaanau amach garmua chi mepeer pödbapäaiwai chi mepeer warre ich khapeen dʉ̈i ʉ̈gtharmua jʉr wërppʉ̈ijim.  
\v 9 Magta chadcha chi mepeer mag õoirjö sim ich khapeen ich igar thʉnarr khʉʉn dʉ̈i ãba ʉ̈gtharmua mʉg jẽb gaai barkhʉʉipʉ̈ijim. Ich mag mepeerpaita warrgarwe nemkhõr gaai thʉ̈rnaa ĩchab Satanás a thʉ̈ʉrjem, durrpierr õor thumaam khʉʉn khũgurmie, ajapcharan dösãtma.  
\v 10 Magbaawai angelnaanta sereubaadëm mua ũrjim. Mag sereubaadëmua mag naajim: 
\q1 “Ĩsta ya õor peerdʉju ed pabaichëm. 
\q1 Mʉg durr gayam jua theeg thum jũrr maach Ẽwandam dënëu. 
\q1 Maach Pör Cristo ichdëucha jʉr autarrjã warag atcha iek theegta sĩsim. 
\q1 ¿Khan jãgwi? Edaram magwe maach ermanonaan ëugar Ẽwandamag sëukha nem ĩgkha nʉrraajerr ʉ̈gtharmua isegbapäaiwaima. 
\q1  
\v 11 Maimua jẽb gaaijã maach khodamnaanau amach garmuata mag mepeer pödbapʉ̈im, corderodamjö ʉdʉraa ich thõopitarr iekta ʉ̈khawia ag bagauta Ẽwandamag amach khaibag ʉpi nʉmua. 
\q1 Mag nʉm dʉ̈i ĩchab amach dau aphʉʉ khëchjujã igba, warag ögkhaba i iekta jaau durrarr gaaimuapata chadcha amach garmua i pödpʉ̈ijierram. 
\q1  
\v 12 Magbarm gaaimua edaujãjã wounaanjö onee abat. 
\q1 Maimua pãach chi ag ee thʉnʉm khʉʉnjã thumaa onee abathʉ̈. 
\q1 Mamʉ ¡ë, apdurr, pãar jẽb gaai jooba durrum khʉʉn dʉ̈i phũas ee jooba durrum khʉʉnjã agjö! 
\q1 Ya ich ũjãrr barapäaiwai meperan ĩsin meeukhata sĩsim thumaam khʉʉn dʉ̈i. 
\q1 Irua ya khaphʉ sim, mʉigmua jöpcha ya tag ichdëu ampierr abaju” a serereu khajierram. 
\p  
\v 13 Ya mag chi meperau ich mʉg jẽb gaai barapʉ̈im oobaawai khĩir machgau jũrr mag ʉʉi chaai emkhooi ootarr ẽudeeta ẽkhabaadëjim.  
\v 14 Mamʉ magbaawai ĩchab mag ʉʉirag nem ich dapag jĩmiejãu ichjö sĩsidʉm deejim, mag nemkhõr anʉm aigmua warre warp ũrramkhĩir. Mag ich paarpabaadeewai chi nemkhõrig ich chig apimaaugau warp ũrrbaadëjim, õor barbag chʉʉi sĩeimaag, mamta año thãrjup awi jãrr sĩi i jãog wai naaju arr aawai.  
\v 15 Magbaawai chi nemkhõriu waa döota soo abarmʉn, ich i eemua nem pöm dösĩgjö bau jĩerrau jöisijim, magbarmua dökhierr chʉug pogbar jöisiewai ag ee chi ʉʉi khẽu khuurbʉ thõmkhĩir.  
\v 16 Mamʉ magbaawai ĩchab jẽbëujã ʉʉi khaigpërmjö khaigpërjim, mag nemkhõriu ich i eem döou döjã pöm ompaa autarr sĩi eeg bereu athaawai.  
\v 17-18 Magbaawai chará chi mepeer mag õoirjö sĩerr warag chi ʉʉi dʉ̈ita meeukha sĩsiwi, jũrr chi chaain ewagam khʉʉn gaaita jua machag deeju awi, warag am dʉ̈i wërbʉan petajim. Mag chi chaain ewagam khʉʉn anʉmʉn, ar Ẽwandamau nem jaau sim thum ipierraanaa Jesucristoou chadcharam iek jaautarrjã ʉ̈khawi agtha ogdʉba ich mag ʉ̈kha wënʉrrʉm khʉʉnau. 
\c 13  
\p  
\v 1 Makhʉʉn dʉ̈i wërbʉagta mag chi õoirjö simua sĩi phũas igaau nʉ dʉnʉisijim. 
\s1 Mepeer numí sĩi khanjö sĩsid arr 
\p Maimua mua oowai mepeer pöm sĩi ãbam gaaipai pör khapan siete nenernaa kach khapanjã diez jʉjʉr simta phũas eemua mʉ dakhĩraa öbërchëjim. Mag phak kachjö jʉjʉr sĩsidʉmpierr pörsir jũakhanaa ĩchab mag pör khapan nener sĩsidʉm gaaijã Ẽwandam igwi parhoobata phã sĩsid ajim.  
\v 2 Mag mepeer phũas eemua öbërbaichëm mua ootarr, sĩi khum chi jojothorjö sĩejim. Mamʉ mag simta jũrr chi bʉ̈, jos bʉ̈khanaa, i i, león ikha sĩejim. Mag simʉg mag ãbakhai sĩi õoirjö sĩerrau ich jua theeg deebaawai ichjö iek theeg apijim.  
\v 3 Mag chi mepeer phũas eemua öbërchëtarr pör, dau ãb sĩi nem pöm thoop thʉnaajim, ya agua pöd iiubajujö. Mamʉ mag thʉnarr, ãbakhai mag phũas igaau õoirjö sĩerrau irig ich jua theeg thum deetarr aawai ichdëupai ich pör monaaupʉ̈ijim. Mag monaaubaadëm oowi dauderraa nʉm iekhau thumaam khʉʉnau irigta ee aphöbaadëjim.  
\v 4 Magphöbaadëmua warag mag õoirjö simʉgta Ẽwandamagamjö jëeujierram, mag ãbakhai phũas eemua öbërchëtarrag ich jua theeg deetarr jũrr. Mamʉ mag khumjö simʉgjã ĩchab Ẽwandamagamjö jëeumamua, “¿Khaita magan jãg mepeerjö jua theegnaa emkhooikha sĩ, i dʉ̈i jãwaag?” a iekhamajierram. 
\p  
\v 5 Mag khumjö jojothor sim dö eemua öbërchëtarrag ĩchab nem iek khaug iekhapinaa Ẽwandam igwiajã parhooba iek ãkhãraam ichdëu iekham aig iekhaju aai sim a jaaujim, chi õoirjö sĩerrau. Mamʉ mag i iek theeg apitarran, año thãrjup awi jãrrpaim atheepaita Ẽwandamau i magpijim.  
\v 6 Magbaa chadcha mag õoirjö sĩerrau ichig jaautarrjö parhooba iekhanaa, Aai i jëeujem di igwijã parhooba iekha, ya ʉ̈gthar öbërwi durrum igwiajã parhoobam iekta iekha thʉnʉʉujim.  
\v 7 Magʉg ĩchab Ẽwandam iek ʉ̈khawi i chaainkha durrum khʉʉn dʉ̈i wërbʉmkhĩirjã jua theega apijim, mag wërbʉwi ich garmua am pödpʉ̈imkhĩir. Magʉg ĩchab ichta ʉ̈rpai iek theeg apijim mʉg durr gaai õor thumaam khʉʉn dʉ̈i. Magbaawai durrpierram khʉʉn dʉ̈i ichta ʉ̈rpai sĩsijim, thumaam khʉʉn khãaijã.  
\v 8 Mag mepeer khumjö jojothor simʉgta mʉg atag paawai Ẽwandamagamjö jëeuju, ar thum Corderodam ʉdʉraa maach kõit ich thõopitarrau warr mʉg jẽb ompaabarwe ich ẽsap gaai am thʉ̈r phãkha auba arr khʉʉnau. Makhʉʉnta mag mepeer igar naaju aawai makhʉʉnauta maach chi Ẽwandam iek ʉ̈kha nʉm khʉʉn dau aug wauju. 
\q1  
\v 9 Magua jʉ̈g ʉ̈rʉʉ nʉm khai wajapha ũrbat: 
\q1  
\v 10 “Preso maag thaabatarr khai, chadcha preso pʉr auju. 
\q1 Thuthuíu thõog thaabatarr khai, chadcha thuthuíu thõju.” 
\m Pari mag nʉmʉn, thum Ẽwandam iek ʉ̈kha nʉm gaaimuau. Maguata Ẽwandam chaainan, amach mag phithurg auju khap, sĩi amachdëu ʉ̈khatarr iek gaaita warag ubʉ ʉ̈kha wënʉrraju aai nʉm. 
\p  
\v 11 Magtarr khur deeum mepeer jẽb eemua öbër urum mua oojim. Ma jũrr corderojö kach numí wai sĩejim. Mag sim iekhaawain sĩi õoir iekjö simta jãgaamjö sĩejim.  
\v 12 Mag simua ĩchab ãbakhai phũas eemua öbërchëtarr jua theeg thumaa ich gaai wai sĩejim. Maguata ich dakhĩir ich iekhau mʉg jẽb gayam khʉʉn thumaam khʉʉnag mag phũas eemua pör pöm thoop sim öbërchëtarragta Ẽwandamagamjö jëeupibaawaijã, chadcha i ipierraa jëeu naajim.  
\v 13 Mag jua theeg simua aawai ĩchab õrau ag na nem wau nʉm ooba aajempa waumamua edjã eemua õtdau khĩirta noseg chë thʉnʉmjö apijim, thumaam khʉʉn dakhĩir.  
\v 14 Mag mepeer pör pöm thoop sim phũas eemua öbërchëtarr dakhĩir mag nacha õoirjö sĩerrau warm mepeer corderojö sĩerrag õor dauderraa nem waupijim, mag nem wau simua õor khũgur aumamkhĩir. Mag õor khũgur auwi chi corderojö sĩerrau warm mepeer ich khapeer khĩirkha waupijim; ajapcharan mag sĩi pör pöm thuthuíu thoop simjö sĩerrta deeu monaautarr khĩirma.  
\v 15 Maimua jũrr mag corderojö sĩerrag chi õoirjö sĩerrau ich juapá deewi mag khum jojothorjö sim khĩirkha wau sĩerr iiu aupijim. Mag nem inag dën mepeer khĩirkha wau sĩerrta iiu auwi iek öbër sĩsiewai thumaam khʉʉnau ichigta Ẽwandamagamjö jëeuba nʉm khʉʉnan khëchpi jaaujim.  
\v 16 Mamʉ magpaijã khabajim. Mag ich khĩirkha wau sĩerr iiupi athaawai thumaam khʉʉnag ich dauchachta jua gaai wa dag gaai khãijã phãkhapi jaaujim. Chaaindam bʉ̈rʉʉmdam gaai, ya dʉ̈rrcharam khʉʉn gaai, phatkhon paraam khʉʉn gaai, dau aphʉʉm khʉʉn gaai, sĩi chikham chogkha sĩsidʉm khʉʉn gaai, chikham chog khaba amach khõchagpierr nʉrrjëem khʉʉn gaaijã, thumaa mag dauchachta ʉdʉraa amach gaai phãkhapi jaaujim.  
\v 17 Mamʉ ar mag amach gaai mag mepeer dauchachjã chukhu ni i numerojã chukhu nʉm khʉʉnau chan pöd amach garmua nem përjujã khaba, ni dich nem ig nʉmjã për auju khabam a jaaujim chi meperau. 
\p  
\v 18 Mʉg mua jaau chirʉm khaug awaagan dʉ̈rrchata khĩirjug paraa aju aai sim. Chi mag khĩirjug khaphʉ simua khaug athá, magan mag mepeer dauchach khan número agá. Wajapcharan mag numeroon ĩchab woun mʉg atag sĩeju dënëu. Chi número, 666 khabahab. 
\c 14  
\s1 144,000 meukhaar au narr khʉʉn 
\p  
\v 1 Magtarr khur mua oo nʉʉ aawai ich Jöoi chi Cordero chaarta durrsĩ Sión anʉm gaai oodʉnʉm mua oojim; ajapcharan ich Jesuma. I dʉ̈i õor khapan ciento cuarenta y cuatro mil naajim. Mag Cordero dʉ̈i nʉm khʉʉnan ĩchab thumaam khʉʉnau i thʉ̈rta i Aai thʉ̈r dʉ̈i amach dag gaai phãkhanaa ag panhappha sĩsid ajim.  
\v 2 Maimuata edjã ee sĩi õor iekjö simta mamʉ salt pöm jurur wëjöm iekjö mua ũrbaadëjim. Mag simʉn ĩchab nem jẽbag pagthʉm pʉʉrbabaadëm iekjönaa õor khapan arpa sir nʉm iekjö thʉnaajim.  
\v 3 Mag thʉnʉmʉn mag Ẽwandam juupjem pörkhau sim bigaau ĩchab jöoinpa ohood wëjöm dʉ̈i mag dau jayap nemchaainjö ich paar sĩsidʉm bigaau phʉʉrdʉ meukhaar iiur au nʉm khʉʉn iekta mag thʉnaajim. Mag amau meukhaar au narr chan ãbmuajã pöd khaugbajim, am dënjö awaag. Ãba mʉg jẽb gaai jooba durrarr khʉʉn eem mag ciento cuarenta y cuatro mil peerdʉtkhatarr khʉʉnaupaita am dënjö aau khaugjierram.  
\v 4 Makhʉʉn chan mʉg jẽb gaai aawaijã, jãg deeum ʉʉin dʉ̈i khapes apiba jaaujemjö, ãba Ẽwandamagpaita ee aajerr khʉʉnau. Amauta chadcha Cordero nʉnʉʉukhampierr dʉ̈i i bʉ̈ ogdʉba wënʉrrajim. Amachta mag Ẽwandam athee maimua Cordero atheejã am chognaankha wënʉrraju aai naajim, chadcha mag atheeta warm khʉʉn eemua Ẽwandamau am peerdʉ autarr aawai.  
\v 5 Am mag sëukha nʉrrjëejã khaba arr khʉʉn aawai bʉ̈ʉrjã am ëugar jaauju khʉʉnjã chukhu ajim. 
\s1 Ẽwandam chognaan thãrjupam khʉʉnau iek jaauthurtarr 
\p  
\v 6 Maimua mua deeum Ẽwandam chog edjã ee ũrr jörröm oo athajim. Magua mʉg jẽb gaai naajem khʉʉn athee Ẽwandamau ich mag maach iiupi wai nʉrraju iekta jaau jörrajim, durrpierr õor nʉnʉidʉm ee amach meupierr.  
\v 7 Mag irua jaau jörrarr iek mʉg ajim: “Ẽwandam dau na nem khaigbam wauju ökhö abat. Mag khãai irig jëeunaa iita thö iekhabat. Ya ĩsta irua õor ich aar phë auju wa phë auba warag isegju khãijã amach khĩircha jaauju ed pabaichëm. Mʉg edjãjã ompaawi mʉg jẽbjã ompaatarragta jëeubathʉ̈. Ichdëuta ĩchab phũasjã ompaawi jẽb eemua dö khumdʉ öbër sĩsidʉmjã ompaajim” a jaau jörrajim, ũrr jörrömua. Ma nacharamua iek jaau dichtarr ajim. 
\p  
\v 8 Mag ẽudee deeum Ẽwandam chog agjö ääag urajim. Magua, Babilonia phöbörön ya eegar pabaadëmta jaau jörrajim. “Ya eegar pajim” a sĩejim, “ar ich dënjö durrpierram khʉʉnag parhoob pekau waupiejerr phöbör.” 
\p  
\v 9 Makhʉʉn ẽudee ya thãrjupam agjö dewam Ẽwandam chog ũrr jörrömua magmajim: “Ar jãg phũas eemua mepeer öbërchëtarragjã jëeunaa sĩi i khĩirkha wau simʉgjã jëeuwi ʉdʉraa amach dag gaai wa jua gaai khãijã i dauchach phãpitarr khʉʉnan  
\v 10 ichiita Ẽwandam khĩir machag sĩi maach thõojem benenjö simta ãwatab khaba ãwatjugui” ajim. “I khĩir machag mag simta am gaai meubapäaiwai Cordero dakhĩir maimua pekau chukhu ʉ̈gthar nʉm khʉʉn dakhĩirjã õtdau azufre dʉ̈i waaurëu wëjöm eeta jẽerjugui” a sĩejim, “ich mag dau aphʉʉ ag ee õt khierr jẽmer wënʉrramkhĩir.  
\v 11 Mag am õt khierr jẽmer nʉm naar jĩu wëjöm chan chugpaajã khaugba, ich mag sĩerrʉm iekhau. Mag õtdau ee nʉm khʉʉn chan bʉ̈ʉrjã gaai nakha aa khaugba, ich mag edaram magwe machag jẽmer wënʉrrajugui” ajim, “amachdëu mag meperagta Ẽwandamagamjö jëeunaa ĩchab sĩi i khĩirkha wau sĩerragjã jëeunaa ʉdʉraa amach gaai i dauchach phãpitarr kõit.” 
\p  
\v 12 Magam uguata ar Ẽwandam dënkhanaa irua nem jaau sim ipierraanaa ĩchab Jesús bʉ̈jã ogdʉba wënʉrrʉm khʉʉnan warag ubʉta ʉ̈kha wënʉrraju aai nʉm. 
\p Ma ajim Ẽwandam chog thãrjupamua jaau dichtarr. 
\p  
\v 13 Maimua mua ũurwai ʉ̈gtharmuata woun iekjö mʉrʉg, “Cha mua pʉchig jawaagpam phãbá” a sĩejim. Mag irua phãpi sĩerr iek mʉg ajim: 
\p —Ĩsmua atagta chadcha ʉ̈uhcha ajugui ajim, ar maach Pör Jesús iek thãraucha ʉ̈kha durrumua mee nʉm khʉʉn. 
\p Magbaawai Ẽwandam Akharaujã, —Jãan chadcha ich magau a sĩejim. Mʉg jẽb gaai aawai chadcha phithurg aaujerrjã par khaba aju aawai khĩir meeu nʉisijugui ajim, Ẽwandam athee amachdëu nem wajapha waaujerr jũrr. 
\s1 Ẽwandam chognaanau õor pöm ʉʉrppʉ̈iju oopitarr 
\p  
\v 14 Magtarr khur deeu oo nʉʉ aawai jʉʉnthumieta edjã ee bau wëjoojim. Mag bau wëjöm ʉ̈r woun ãb Emkhooi Iewaa Jesujöö simta oo sĩejim. Magua pörsir phĩr dën jũanaa ich jua ee oz anʉm wai sĩejim, thuthuijö dëe simta sĩi jũurthʉ sim.  
\v 15 Maig ĩchab deeum agjö Ẽwandam chog Aai i jëeujem degmua öbërchëwi mag jʉʉnthumie bau wëjöm ʉ̈r oo sĩerrag magchëjim: “Ya nemjĩir phur wëjoowai eeuju aai thʉnʉm. Ar pʉch jua ee thuthui wai simua thʉrrphëwi eeubá” ajim, mʉg jẽb gayam khʉʉn khëchpʉ̈iju ora pabaadëm jaauwi. 
\p  
\v 16 Magbaawai chadcha mag jʉʉnthumie bau wëjöm ʉ̈r oo sĩerrau ich thuthuíu mʉg jẽb ʉ̈r ʉʉrphëbarmua waa nemjĩir dau thumaa eeu aujim. 
\p  
\v 17 Mag khur deeum Ẽwandam chog öbërjim mag Aai i jëeujem di ʉ̈gthar sim eemua. Maguajã agjö ich jua ee mag thuthui oz anʉm wai sĩejim.  
\v 18 Mag ẽudee agjö deeum öbërchëjim, ierr nasãdjö sim aarmua. Maguan ĩchab sĩi iekhabarmuapai mʉg durr thum uurdʉpi jaaubaawai, õtdaúapai mʉg durr thum öpäaig nem jua theeg sĩejim. Magua mag ãbakhai jua ee thuthui wai sĩerrag thet khĩesir magjim: “Jẽb gaai uvadö nʉnʉidʉm een ya sĩi waau ʉidʉm, jãg pʉch jua ee thuthui wai simua chi ierr thʉrrkha aupet. Ya waau thʉnaabahab” ajim, õor warre ʉʉrppʉ̈iju jaauwi. 
\p  
\v 19 Magbaawai chadcha mag thuthui jua ee wai sĩerrau mʉg durr ʉ̈r ʉʉrphë, waa uvadö nʉnʉid arr eem thumaa thʉrrkha aunaa chi chö piirjʉʉujem ee barkhʉʉipʉ̈ijim chi chö piirjʉumkhĩir. Mag chi chö piirjʉumkhĩir a simʉn, maan wajapcharan Ẽwandamau õor gaai jua khʉaba ich khĩir machag meeujuuta jaau sim.  
\v 20 Magta phöbör igaau arrnaa chi chö piirjʉupʉ̈ijim. Mag piirjʉubaadee, ag eemua chi chö sĩi dösĩgjö phur jĩubaadëmua, warpham magwe trescientos kilómetros sĩi bag phur ũur jöisijim. Mag döjö ũur wëjöm naug ee cabaai dʉnʉʉupi ootarr akhiin, i öpierrjö sĩejim, chi naug. Mag döjö ũur wëjöm a simʉn, õor khëch nʉm jaar bag pöm ãrjuuta jaau sim. 
\c 15  
\s1 Ẽwandam chognaan siete ãbmiecha õor khaibag wauju jawaan bëetarr khʉʉn 
\p  
\v 1 Maimua deeu edaujã ee ijaaur maach dauderraa ompa jöisijim. Ma, mʉg ajim: Ẽwandam chognaanta siete edjã eemua öbërdʉtkhachëjim. Makhʉʉnauta ãbmiecha wajappha õor dau aug waupiju khʉʉn ajim. Magbarm dʉ̈i ĩchab ya mag amau nem thumaamua mag chach dichdimaawai Ẽwandam khĩir machagjã ich maigpai meeuju ajim. 
\p  
\v 2 Mag khur mua oojim ĩchab, phũasta sĩi vidrio dënjö sim igaau Ẽwandamau amachig sirmkhĩir arpa deetarr dʉ̈i ag panhapha õor dʉnʉnʉid thʉnʉm. Makhʉʉn mag mepeer khum chi jojothorjö sim phũas eemua öbërchëtarragjã jëeuba, ni i khĩirkha wau simʉgjã jëeuba, ni i thʉ̈r ni i dauchachjã ʉdʉraa amach gaai phãpiba arr gaaimua mag mepeer amach garmua pödtarr khʉʉn ajim.  
\v 3 Makhʉʉnau Corderota thumeukhar naajim. Mag meukhaar warrgar Ẽwandam chog Moisés khararrau phãtarr ajim. Mag amau meukhaar au narr mʉg ajim: 
\q1 “Ẽwandam, pʉʉn maar Pöröu. 
\q1 Pʉchta thumaam khʉʉn khãai chi jua thierrau. 
\q1 Pua nem wautarr thum chadcha wajaphanaa ooimʉ sim. 
\q1 Pua nem waaujemjö chan ni ãbmua pödbam. 
\q1 Durr thum mʉg wëjöm ee pʉchta thumaam khʉʉn Reikha sĩerrʉm. 
\q1 Pʉ iekhan chadcharam iekhau; 
\q1 maimuajã puan chad nem agchata waaujem. 
\q1  
\v 4 Señor, ¿khaíuta mʉg thʉnʉm aig pʉ ögkhabaju abarí? 
\q1 ¿Khaíuta bʉ̈ʉrjã pʉrʉg jëeubaju khai? 
\q1 Pʉch appaita bʉ̈ʉrjã pekau chukhu khitaawai durrpierram khʉʉnau bëewi ãba pʉrʉgta jëeuju. 
\q1 Ya pua thumaam khʉʉnag jaaubarm, chijã khʉʉnta pua pʉch aar phë auju khʉʉn agá, maimua chijã khʉʉnta pua barkhʉʉiju khʉʉn agá” a aumajierram, meukharau. 
\p  
\v 5 Maimua mag thʉnarr khur mua oowai, ʉ̈gthar Aai i jëeujem degam Santuariota Ẽwandamau israelnaan dʉ̈i iek deetarr iek ãkhaajem aar dawaa weeu dʉnaajim.  
\v 6 Mammuata makhʉʉn Ẽwandam chognaan siete khajapham nemjö amachdëu agua õor khaibag wauju jua panhapha öbërchëjierram. Makhʉʉnau put lino anʉm dënta bʉ̈ʉrjã memerkhög chukkhu sĩi phugphugamjö sĩsidʉmta jũanaa, ichkhaarjã dakha phĩr dën ãi jʉ̈ajem phurii khitʉmua ãi jʉ̈ sĩsid ajim.  
\v 7 Mag am öbërdʉtkhabaicheewai nacha mag nemchaainjö ich paar sĩsidʉm jayap narr eem ãbmua amag amachpierr jarrdam phĩr dën ããbdö deemajim. Makhʉʉn jarrdampierr maach Ẽwandam ichta warrgarjã ich mag sĩerrawi mʉg atagjã ich mag sĩerraju ag khĩir machgauta khajapham dö dënjö ipir sĩsid ajim. Mag sĩsidʉm chookhʉʉibaadeewaita ichdëu chachmampierr nem khĩir pogkhe öbërmaju.  
\v 8 Mag jarr amachpierr ããbdö jigbapäaiwai Ẽwandam chi wajaug sĩerrʉmua ich iiu mag Santuario ee naar khĩ joppijim. Mag Aai i jëeujem deg chi Ẽwandam chognaan siete narr khʉʉnau amachpierr nem khĩir pogkhe chachmamua, thum öbeerpʉ̈ibam aig chan pöd ni ãbjã dubju khaba aajeejim. 
\c 16  
\s1 Ẽwandam khĩir machag jarr eem choopʉ̈imam ootarr 
\p  
\v 1 Maimua mua ũurwai mag Aai i jëeujem deg naar jĩu wëjöm eemuata mag Ẽwandam chognaan siete narr khʉʉnag nem theeg woun iekjö, “Ërëubaadëwi jãg mʉ khĩir machag jarr siete nʉm ee döjö jöjöid thʉnʉm, jẽb ʉ̈r chookhʉʉibamit” ajim ich Ẽwandamaucha. 
\p  
\v 2 Magbaawai chadcha ãbmua petawi ich jarr ee wai sĩerr mʉg jẽb ʉ̈r choopʉ̈ijim. Mag choobapäaiwai thum mag mepeer khum chi jojothorjö sim phũas eemua öbërchëtarr khĩirkha wau simʉg jëeunaa i dauchachjã wai narr khʉʉn gaai bën burrjim. Mag bënën mor gaai sĩi phĩedaujö öbërdʉtkhabaadëmta machaaga sĩejim. Mag simuan waragta õor ãrmaajeejim. 
\p  
\v 3 Maimua jũrr ẽudeemua ich jarr eem phũas ee choobapäaiwai sĩi phũas thumaa bagag pajim. Mag phũas eem dö, sĩi õor meem bagjöta sĩsijim. Mag bagag pabaadëmua ag ee nem thʉnarr thumaa khëchdubjim. 
\p  
\v 4 Mag khur thãrjupam urum, agjö Ẽwandam chog. Maguajã warm khʉʉn dënjö ich jarr eem choopʉ̈ijim. Mamʉ magua jũrr dösĩg dʉ̈i jẽb eegarmua dö khumdʉ nʉnʉidʉm ʉ̈rta choobapäaiwai, napem dënjö ĩchab dö thumaa bagag paapʉ̈ijim.  
\v 5 Magnaa mag dösĩgpierr dö ãrpi sĩerraupai iekhamamua, 
\q1 “Ẽwandam, pʉchta bʉ̈ʉrjã pekau chukhu khitʉm; 
\q1 pʉchta warrgarwejã ich mag khitaawai ĩsjã ich agtha sĩerrʉmgui” a sĩejim. 
\q1 “Pʉchdëu am dʉ̈i chachbarm aig, pua am dʉ̈i nem agchata abarmgui” ajim, “amachdëu nem waumarrpierr. 
\q1  
\v 6 Amau pʉ chaain bag ãrwi pʉ i jaaumien bagjã ãrjierram. 
\q1 Magtarr aawai ĩs pua jũrr amag bagchata döpibaadëmgui” ajim. 
\q1 “Jũrr amau pʉrʉg ich agjö jãgta apim khõsi naabajieb amach dʉ̈i” a iekhamajim. 
\p  
\v 7 Magbaawai ĩchab ierr incienso phaajem nasãdjö wau sim aarmuata agjö Ẽwandam chogau, “Ëera, jãan chadaugui” ajim. “Maar Pör Ẽwandam, pʉchta thumaam khʉʉn khãai chi jua thierr; puan chadcha khĩirjug khaphʉnaa am gaai agchata abarmgui” ajim, “bʉ̈ʉrjã khaigba aba.” 
\p Ma biek thãrjupam Ẽwandam khĩir machag chootarr ajim. 
\p  
\v 8 Mag khur deeu chi Ẽwandam chog jarrdam dʉ̈i bëewi jũrr mʉg edau ãsdawam khĩir ʉ̈rʉʉ choopʉ̈ijim. Mag choobarm ya biek jayapam ajim. Mag edau khĩir ʉ̈r choobapäaiwai warag edau pechaaga aadëmua sĩi ed pechgau õor gaai mas ajim.  
\v 9 Mamʉ mag edaúa phaa thʉnʉʉuwi, sĩi phausumjö sĩsidʉmjã amach khaibag ãsie ewag khĩirjuwi Ẽwandamagjã chugpaapi jëeuba, ni sĩi i thö iekhajöjöopaijã khabajierram. Magju khãai sĩi warag irig parhoobaa amachdëu iekham aig iekha thʉnʉʉujierram; majã ichdëuta magʉm khaibag burrpibaju akhiinjã jua theeg simʉgta mag iekhajierram. 
\p  
\v 10 Mag khur Ẽwandam chog cincoom bëewi, ĩchab ichdëu jarrdam wai nʉrrarr eem mag phũas eemua mepeer öbërchëtarr juupjem pörkhau ʉ̈r choopʉ̈ijim. Mag choobapäaiwai irua durr jʉ̈a sĩerrpierr thumaa khĩchag ee jöisijim. Magbaawai õor i igar nʉm khʉʉnan gaai machgauta sĩi amach meukhĩirpaijã thetthe khabaadëp aajeejim.  
\v 11 Mamʉ mamagkhamjã amachdëu nem khaigba wau nʉm chan pʉajöjöopaijã khaba aajeejim. Magju khãai chãddauta mor gaai sĩi phĩedaujö dau dap sĩsidʉm machgau, Ẽwandam ʉ̈gthar chiraajem dʉ̈ita khujʉrmjö warag parhoobaa irig iekha thʉnʉʉujierram. 
\p  
\v 12 Mag khur Ẽwandam chog seim bëewi, ich jarr eem döjã Eufrates aajem ʉ̈r agjö choopʉ̈ijim. Mag choobapäaiwai döjã pöm simta sĩi jʉʉubaadëjim, edau öbeerjem garmua reinaan wëdurarr khʉʉn dʉrbagkha dichamkhĩir. 
\p  
\v 13 Maimua mua oowai, mag nacha mepeer õoirjö sĩerr i eemua jʉ̈chëumiejö sim öbërwi, ãbakhai khum chi jojothorjö sĩerr i eemuajã öbërwi, maimua ãbakhai chi sëukha nem ĩgkhamie kach numpai cordero dënjö jʉjʉr sĩerr ag i eemuajã agjö jʉ̈chëumiejöo khitʉm öbërjim.  
\v 14 Mag jʉ̈chëumiejö sĩsid arr, chi mepeer akhaar ajim. Makhʉʉnaun ĩchab ag na õrau nem ooba aajempa wau wënʉrrajim. Mag wënʉrrʉmʉn mʉg jẽb gaai reinaan sĩsidʉm khʉʉn dʉ̈i iekta dee wënʉrrajim, thumaa ãba biirdʉnaa Ẽwandam ichta thumaam khʉʉn khãaijã chi jua thierr dʉ̈i amach wërbʉju edam athee khĩir khaugaag. 
\p  
\v 15 Mag nʉm ee maach Pör Jesucristooucha, “Keena, khĩir khaphʉ nʉisit; õor chikham nem jĩgkha nʉrraajemjö mʉʉn sĩi õor bëebajöjöo sĩerr ee dëgölp barchëjugui” ajim. “Mag mʉ pierrwai onee aju khʉʉnan, ar daukhananaa pekaúgta bʉ̈ʉrjã amach ʉ̈rpapiba nʉm khʉʉnau. Mag nʉm aiguin aman, khajũa bäphä memerkhög chukhu jũa nʉmjöta thʉnʉm. Maagwai mag ed õrau dich mor kharr ooba aawai chigaajã abajugui” ajim ichdëucha. 
\p  
\v 16 Maimua chadcha mag jʉ̈chëumiejö sĩsid arr khʉʉnau amachdëu mʉg atag ajujö mʉ dakhĩraa wëtwi mʉg jẽb gaaim reinaan ãbam aig biirdʉ aujierram wërbʉag. Mag am biirdʉ narr aig ebreonaan meúa Armagedón a thʉ̈ʉrjem. Ich maigta chadcha wërbʉ nʉmua Ẽwandam dʉ̈i juapá chachju anaabá. 
\p  
\v 17 Mag khur ãbmiecha sietemua paawai, agjö deeum Ẽwandam chogau ich jarr eem sĩi ich jãg ʉ̈gthaa edjã eepai wëpʉ̈ijim. Mag irua wëbapäaiwai, mag ʉ̈gthar Aai i jëeujem degam Santuario aarmuata nem theeg, “Ĩsin chad ya thum aaipa sĩsimgui” ajim.  
\v 18 Mag irua ya aaipabaadëm abaawai, pagthʉmta dau phʉrphʉr abarmʉn jẽbʉ ahau khabaadëm dʉ̈i, sĩi iyʉ̈ʉmjö jöisimua ʉʉur theegajã duui dichjim. Mag ʉʉur theeg duui dichjujö chan mʉg jẽb ompaatarr aigmua ewag pawiajã duuiba aajem.  
\v 19 Magbaadëmua phöbör pöm sim Babilonia anʉm eegarta waa sĩi jẽb thorrdʉkhʉr aadëmua, phöbörön warreta perás thãrjup öbeerpʉ̈ijim, jẽb thorrdʉbaadëmua. Magbaadëm dʉ̈i ĩchab deeum durrjã phöbör eem di khapaana sĩi pogueu pʉamajim. Magbaawaita Ẽwandamau Babilonia phöbör gaaita ʉ̈rcha jua khẽgkhapʉ̈ijim, ich pekau waaujerr khĩir okhooba wai sĩerr gaaimua.  
\v 20 Mag ʉʉur theeg duuitarrau phũas ee morr phʉʉr ʉid arrjã, sĩi warag ierr paaukhabaadeewai, durrsĩ nʉnʉid arrjã ĩchab warag jẽb ee ierr paaukhabaadëjim.  
\v 21 Magbaawai ĩchab edjã eemua sĩi noseg dau dap mokdaujö chë thʉnʉisijim. Chi noseg dau chʉgag ochenta libras sĩsid ajim. Ẽwandamau mag noseg chëpiwi wajappha amach dau aug waubarm oowi, õrau warag Ẽwandam thʉ̈rcha thʉ̈rnaa, parhoobaaa amachdëu iekham aig iekha thʉnʉʉujierram. 
\p Ma ajim Ẽwandam chogau ãbmiecha ich jarr eem Ẽwandam khĩir machag choobapʉ̈im mua ootarr. Mamʉ mag mua oojim a chirʉmʉn, maan mʉg atagjã thum cha mʉchdëu jaau chirʉmjö ajuuta mʉrʉg mʉch daúacha oopimajim. 
\c 17  
\s1 Chi durpathierrmie khaibag wauju jaautarr 
\p  
\v 1 Magbaawai Ẽwandam chognaan mag jarr panhapha siete narr eem ãb bëewi mʉrʉg, —Pidú mua pʉrʉg oopikhimgui ajim, chi durpathierrmie ar döjã nem pöoma bau wëjöm ʉ̈r oo sim khaibag wauju.  
\v 2 Magnaa mʉrʉg, Mʉg durr gayam reinaanau thumaam khʉʉnau ich ag ʉʉipaita wai khãijierramgui ajim. Maagwai tagam khʉʉn agjö mʉg jẽb gayam khʉʉnjã sĩi mag parhooba saak ʉʉi bag chë simjö sĩerr gaaimua ichig paa wai simgui ajim. 
\p  
\v 3 Makhʉʉn thum oopieg chi Ẽwandam Akharau mʉ khãaipi atham ee, chi Ẽwandam chog mag mʉrʉg pidú a sĩerraupai jũrr mʉ warp õor chukag ee athaadëjim. Mam pabaimaawai, ʉʉita sĩi mepeer pöm phuríi sim ʉ̈r oo sim mʉrʉg oopijim. Mepeer pöm mag phur simʉn sĩi pör khapan ãbam mor gaaipai siete nenernaa kach khapanjã diez wai sĩejim. Mag sim moron, sĩi ẽsapdau parhoobaaa Ẽwandam igwia iekha phã sĩsidʉmuata ëntër mor ipir sĩejim. Mag sim ʉ̈rta mag ʉʉi chi durpathierrmie oo sĩejim.  
\v 4 Ĩchab chi ʉʉijã mag simʉn, sĩi khajũa wajappha phuriimjönaa khichphë khĩirkha simta jũa sĩejim. Mag ʉ̈r ĩchab phĩrjã jũanaa, mokdau ooihmʉ nem parhẽpagkham dʉ̈i perlas anʉmpa jũanaa, ĩchab jarrdam phĩr dënkha khitʉm ee sĩi mag emkhooin dʉ̈i ich parhooba sĩerrta khajapham nemjö inagjã chukhu ippir jöi wai oo sĩejim.  
\v 5 I dag gaai oowai i thʉ̈r anʉmta maadëu wajappai khaugba sĩi, “Babilonia ichta phöbör pömaacharam, thum chi durpathierrmie ãd anaa nem khaigbam thum mʉg jẽb gaai thʉnʉm ag ãd” a phã sĩejim. 
\p  
\v 6 Ya mag mʉchdëu oobaawai mua khaug athajim, sĩi Jesús iek ʉ̈kha durrum khʉʉn pöm khëchbapäaiwai bag pöm ãrbarm oowiata onegau sĩi don ʉʉijö oo sim. 
\p  
\v 7 Mag oowia mua khĩirju chirʉʉ paawai chi Ẽwandam chogau mʉrʉg, —¿Khanthee atcha khĩirju sĩma? ajim. Mua pʉrʉg jaaubajup ajim, chijã agá jãg ʉʉi, maimua khai agá ĩchab ar chi mepeer pör khapan sietenaa kach khapanjã diez wai simua ich ʉ̈r chi ʉʉi juppi warrum. 
\p  
\v 8 Maimua chadcha mʉrʉg jaaumamua magjim: ’Jãg meperan warran mʉg jẽb gaai nʉrrajim; mamʉ meewi ya tag ooba aajem. Pari mʉg atag Ẽwandamau ierr thʉrrdöjö sim eemua ʉdʉraa öbërpibaawai deeu nʉrraichëjugui ajim. Magbaawai ar ich mag iiu wënʉrraju khʉʉn thʉ̈r phãkhamaajem ẽsap gaai warr mʉg jẽb ompaaju nawe phãba awi ag gaai thʉ̈r chukhu nʉm khʉʉn wajap dauderraa ajugui ajim, mag meetarrta deeu nʉrraichëm oowi. Mag deeu iiu nʉrraichëjup mamʉ, ich Ẽwandamauta warre i jua khẽgkhapʉ̈ijugui ajim, ich mag okhoom iek okhoomkhĩir. 
\p  
\v 9 Maimua mʉrʉg, ’Wajapha ũrbá, mua pʉrʉg jaaukhimgui ajim chi Ẽwandam chogau: Jãg ãbam mor gaaipai pör khapan siete nʉm pua oo sim, jã chi ʉʉi oo sim eegar durrsĩ khapanag siete nʉmta jaau simgui ajim.  
\v 10 Jãg pör siete nener sim ĩchab reinaan siete narrta jaau sim. Mag reinaan siete narr eem cinco ya eegar pawia ãbpaimuata agtha ich durr jʉ̈a simgui ajim. Maagwai ãbakhai agtha reikhaju waaur sim. Mamʉ mag ãbmiecha reikhaju waaur sim reikhawijã, khũchpai mag sĩewi, warm khʉʉnjö eegar pajugui ajim.  
\v 11 Mamʉ ãb simgui ajim ochoom reikhaju. Maan ar chaig mua pʉrʉg mepeer phuríi sim mʉg jẽb gaai sĩerrta thõwi chukhu aadëm a chirarraugui ajim. Ichpai mag reinaan siete pʉrʉg jaau chirʉm eemkha sim. Ya mag biek numí ichpai reikhabarm aigmuan chadau warre thõm iekcha thõjugui a jaaumajim mʉrʉg. 
\p  
\v 12 Maimua mag jajawagmamua, ’Mag chi mepeer kach khapan diez jʉjʉr sĩerrau ĩchab chi kach khapanagpierr agjö reinaan diez nʉmta jaau simgui a jaaumajim mʉrʉg chi Ẽwandam chogau. Makhʉʉnau agtha bʉ̈ʉrjã gobernaaba nʉm. Mamʉ Ẽwandamau amag mag chi mepeer phũas eemua öbërchëtarr dʉ̈i iek theeg apijugui ajim, sĩi khũchpaim athee.  
\v 13 Makhʉʉn reinaan diez ãba ibëpwi, mag mepeer phũas eemua öbërchëtarragta amach jua theeg thumaa deewi, warag amach garmuata Cordero dʉ̈i wërbʉjugui ajim.  
\v 14 Mamʉ chi Corderoou ich garmuata amach thum pödpʉ̈iju, ichta mʉg durr gaai chi thierrnaan thum thʉnʉm khʉʉn Pör anaa reinaan Rey aawai. I dʉ̈i thʉnʉm khʉʉnan, ich Ẽwandamaucha jʉr auwi amachdëu ʉ̈khatarr iek thãraucha ʉ̈kha wënʉrrʉm khʉʉnau. 
\p  
\v 15 Maimua deeu mʉrʉg magjim, chi Ẽwandam chogau: ’Ar pua jãg chi durpathierrmie oo sim eegar döjãjö nem pöoma bau wëjöm oo sim chan, döjã chaar khabam. Jãan õor khapanagta jãg thʉnʉmgui ajim, durrpierram khʉʉn amach meupierr meu khĩir pogkhe.  
\v 16 Maagwai ar phũas eemua mepeer pöm sim öbërchëtarr gaai kachjö khapan jʉjʉr diez thʉnʉmjã, i kach chaar khaba, jãkhʉʉnan reinaan i dʉ̈i ãba mʉg durr gobernaaju khʉʉnaugui ajim. Ich jãkhʉʉnaupai jãg chi ʉʉi chi durpathierrmie oomaug aphöbaadëmua i khaibag wawaag i ẽudeejã ẽkhaju. Maimua i jua eem nemjã khechthʉgwi, ich ap barpʉawi, i dijã örpʉ̈ijugui ajim.  
\v 17 Amau mag nʉmʉn, ich Ẽwandamau juau amag magpi sĩewaita mag amachdëu ampierr thʉnaajugui a jaaumajim. Magnaa, Maguata amau amach reinaan appai iekhawi, chi mepeer mag phũas eemua öbërchëtarragta amach iek theeg thum deejugui ajim, Ẽwandamau ichdëu jaautarrjö öbër nʉm ora.  
\v 18 Ĩchab ar pua ʉʉi oo simjã jã chan ʉʉi chaar khabam. Jãan ar phöbör ãbpai nem pöm simuata mʉg jẽb gaai reinaanag thumaa ichdëuta nem khap jajaau aajem ag phöböröugui ajim. 
\p Magta chi Ẽwandam chogau ichdëu oopimatarr thumaa mʉrʉg jaaumajim. 
\c 18  
\s1 Babilonia eegar patarr 
\p  
\v 1 Magtarr khur mua oo nʉʉ aawai Ẽwandam chog dewamta ʉ̈gtharmua bëem oojim. Mag simʉn ĩchab chi jua thierr aawai nem iek theeg sĩejim. Mag pierrwai jẽbën sĩita araraa aadëjim, i mor gaaimua.  
\v 2 Magua thet ääagmamua mag sĩejim: 
\q1 “¡Ya Babilonia phöbörön eegar pajim! 
\q1 Ĩsin ya sĩi pabʉ̈ ee sĩerrjëem khʉʉn diiu; 
\q1 mepeen khaigbam khĩirpierr naajem di anaa pabʉ̈ eem nem maach khoojem khʉʉn diigta pabaadëbahab” a sĩejim. 
\q1  
\v 3 “Warran iin chadcha jãg ich parhooba deeum gaaijã pʉrpʉr sĩerrarr gaaimua durrpierram khʉʉnta nag dënjö thumaa khëch wai sim dʉ̈i ichig paa wai sĩejim. 
\q1 Reinaanagjã amach ʉʉi dʉ̈ímjö ich dʉ̈ita khapes apiwi, 
\q1 nem jua paraam khʉʉnagjã sĩi mag ag ee nem parhooba amachdëu khõchagpierr nem waupi sim gaaimua warag phatkhon paraam khʉʉnag paapʉ̈ijim. 
\q1 Mamʉ ich paarmua maagjerrta ĩsin jũrr ichta eegar pabaadëm” a jaaumajim. 
\m  
\v 4 Mag chi Ẽwandam chog iekha öbaadëm ee, deeu ʉ̈gtharmua woun iekjö, 
\q1 “Pãar mʉ chaainkha nʉm khʉʉn, jãg phöbör eemua öbërwi chawag ërëubaadët” ajim. 
\q1 “Magbamʉn pãachpa dʉ̈i amau pekau wau nʉm ee burrwi paai öbërbaadeewai, pãachpata phithurg ee mawi dau aug wauju. 
\q1  
\v 5 Jãg phöbörön sĩi pekau pöoma simgui” ajim. 
\q1 “I pekau pömagan sĩi ʉ̈gthaa edjã ee sĩmii wëjömjö sim. 
\q1 Maagwai jãg nem khaigbam parhooba ichdëu waum aig wau sim gaaimua, mua i gaai jua khʉaba deejugui” ajim ich Ẽwandamau. 
\m  
\v 6 Magnaa jũrr ich chognaanagta, 
\q1 “Ichdëu chikham dʉ̈i aajerrjö abat” ajim, “jũrr i dʉ̈i. 
\q1 Ichdëu nem khaigba waaujerr ʉ̈r jũrr ag khãai atcha biek numí i gaai deebat. 
\q1 Ichdëu chikhamnag döpiejerr khãaijã jũrr athuucha nem achag waaurëu deebat. 
\q1  
\v 7 Jãg ichdëupai ich thöwi parhooba ichdëu khõchagpierr aajerr paar, ich agjö i gaai mas waunaa i dau aug waupibat” ajim. 
\q1 “Iruan ichdëupai ich igwi, ‘Mʉʉn mʉiguin rey ʉʉijöta ʉm, mʉ chan khoopaa ʉʉi khabam; mʉg ʉrrʉm chan mʉ chan bʉ̈ʉrjã dau aphʉʉ ʉrrabaju’ a iekhaajem. 
\q1  
\v 8 Mamʉ mua mag chirʉmgui” ajim ich Ẽwandamau: 
\q1 “Ich jãg ʉrrʉm paar i ed bëeju paar sim. 
\q1 Mag ed, khãai ãbpaim ee i gaai mas aju. Mua i gaai nem khaigbam khĩir pogkhe chachmamua, õor pöm öpiwia, jãdau theegjã burrpijugui” ajim. 
\q1 “Mʉch pãar Pör chi jua thierrauchata mag i dau aphʉʉ api chiraawai, 
\q1 wajap i dauhi ãrpiwi, 
\q1 ãbmiecha paawai chi phöbörjã thum sĩi örpʉ̈ijugui” ajim ich Ẽwandamaucha. 
\p  
\v 9 Mag phöbör örbapäaiwai, reinaan ag ee amach ʉʉin dʉ̈ímjö khapes awi parhooba amachdëu ampierr arr khʉʉnau ʉ̈apëpërkhamua, i athee bĩeju anaabá, chi naar appai ʉ̈gthaa edjã ee jĩu thʉnʉm oowia.  
\v 10 Mag oowia dëgölp amach gaaijã agjö aju khĩirjuwi, aigjã bëeba, warp amach nʉm aarpaimua, 
\q1 “¡Ë! ¡Aay, Babilonia! 
\q1 Phöbör pöomanaa chi jua thierr arrta ĩs chad pʉ chan at oobam. 
\q1 Sĩi sëukhabarmjö abarm ee pʉ gayan Ẽwandamau masta deebarmgui” aju jũrram khʉʉnau. 
\p  
\v 11 Ĩchab nem jua paraam khʉʉnaujã amach daúa phöbör magbarm oobaawai, bĩe nʉmua ʉ̈apëpër aju anʉm, amachdëu oowai ya tag amach nem për auju khʉʉn chukhu aphöbaadëm khĩirjuwia.  
\v 12 Jãgbaawai, nem inag pöm waibëewiajã, “¿Khaíu për athaju? Mʉig për aaujeejim: phĩr, phatkhon, mokdau parhẽpagkham, perlas; put wajapham lino dën seda dën dʉ̈i sĩi phuriinaa khichphë khĩirkha sĩsidʉm; pa thũpham khĩirpierr; marfil dën nem wau sĩsidʉm, pa wajapham dën, jierr dën, cobre dën maimua mármol dën nem wau sĩsidʉm.”  
\v 13 Maimua amach wir aigpai, “¿Khaíu athajugui?” aju, “thũpag pöm phëbëe nʉm, canelajöm, incienso, mirra, jʉ̈gdee; vino, nemkhau, arin, trigo; nemchaain daphʉm nem uajem, cabaai, oveja, carro, maimua par phidkhamkhĩir õor për nʉmjã, ¿khaíuta jãgʉm nem thum awaagáwa?” aju, amach ödegpai.  
\v 14 Mag nʉmua chi phöbörögta wounagamjö, 
\q1 “Nemjõ sĩphamjö pua ʉ̈rcha pii aajerr ya ĩs chan tag chukhu aadëmgui” aju. 
\q1 “Pʉ nem ooimʉ sĩsid arrjã thum phatkhonpa ĩsin ya pua okhoom iekchata okhoobapʉ̈im. 
\q1 Jãgbarm chan pua tag oog khabamgui” aju, mag chi phöbör uu thʉnʉmʉgta. 
\p  
\v 15 Maimua jũrr nem jua paraam khʉʉn magʉm thum për nʉmua mag phöbör gaaimua warag phatkhon paraamʉg patarr khʉʉnaujã amachdëu mag oobaawai, ĩchab amach gaaijã agjö aju khĩirjuwia, aigjã bëeba, warp amach nʉm aarpaimuata bĩenaa ʉ̈apëpërkhamua, 
\q1  
\v 16 “¡Ë! ¡Aay, phöbör pöoma eegar pajim!” aju. 
\q1 “Pʉʉn chadcha phöbör ooimʉganaa, sĩi ʉʉi khajũa wajapham lino dën jũanaa, khĩirpierr chi phurjã jũanaa, khichphë khĩirjã jũa simjöta sĩejim. 
\q1 Mag jũanaa chihöo phĩr dën, perlas, maimua mokdau parhẽpagkhampa jũa simjö sĩerrta, 
\q1  
\v 17 jöpcha sĩi sëukha nʉmjö arr ee phatkhon pöoma okhoobarmgui” aju. 
\p Magbaawai agjö barco eem capitannaan, marinernaan maimua thum ar döjãrr jörrjëemuata phatkhon khĩirdamjö oojem khʉʉnjã thum warppai nʉisiju anaabá.  
\v 18 Mam warppaimua mag phöbör uurdʉ thʉnʉm naar edjã ee phʉis jĩu thʉnʉm oowia, thet ääakhamua, “¿Jamta deeum phöbör ich mʉgjökham maadëu oog agá?” aju anʉm.  
\v 19 Magnaa chadcha amach gaai masi nʉm õrag oomkhĩir, amach pör ee jẽb phöpʉ̈inaa ʉ̈apëpërkham dʉ̈i bĩe nʉmua, 
\q1 “¡Ë! ¡Aay, phöbör pöoma khitarr! 
\q1 Maar thum phũas ee barco paraam khʉʉn, pʉ gaaimuata chadcha maar riknaanag paaukhajimgui” aju. 
\q1 “Magtarrta jöpcha arr ee pʉʉn warreta eegar pabaadëmgui” aju. 
\q1  
\v 20 Mamʉ warm khʉʉn mag bĩephöo thʉnʉm daar, ʉ̈gtharm magwe onee abat. 
\q1 Onee abat ĩchab Ẽwandam chaain, Ẽwandam i jaaumien, maimua ich i jaaumkhĩir ichdëucha jʉr autarr khʉʉnjã agjö onee abat. 
\q1 Ẽwandamau Babiloniapien dʉ̈i jãgbarmua, jũrr pãarta irua dau ee aug khaugwi am gaaita mas dee sim khabahab, amachdëu pãach dʉ̈i aajerrjö. 
\p  
\v 21 Magbaawai ãb Ẽwandam chog ĩchab nem jua theega simua, mok pör pöoma sim phũas ee barpʉ̈inaa magjim: 
\q1 “Babilonia, phöbör pömaam, pʉʉn cha mua mok barbapʉ̈imjöta buudimamgui” ajim. 
\q1  
\v 22 “Jãgbarm chan mʉg atag pawiajã, pʉ kaaijã ee chan bʉ̈ʉrjã tag arpa sir nʉm iek ũrba, karris iekjã ũrba, ni trompeta iekjã ũrbam. 
\q1 Nem inag wau nʉm gaai phidkha nʉm khʉʉnjã chukhu, ni mok bã nʉm iek jʉjʉrrkhamjã tag ũrbamgui” ajim. 
\q1  
\v 23 “Pʉʉta jãgbarm chan mʉg atag pawiajã pʉ ee õtdaudam phuu dʉnʉmjã ooba, ni õor jua pʉʉrwai onee serereu aajerr iekjã ũrbam. 
\q1 Pʉ eem nem jua paraam khʉʉnan, chadcha mʉg durr gaai chi jua thierrnaan ajim. 
\q1 Maimua pʉchdëujã pua durrpierram khʉʉn sĩi khũgur wai sĩejim, pʉchdëu nem khaigba wau simta õrau khaugbam gaaimua. 
\q1 Pari mag sĩerrta, ya pʉʉn chadchata eegar pabaadëmgui” ajim. 
\p  
\v 24 Magta chadcha Babilonia phöbör eegar paju. Mamʉ mag i eegar pajuun, ag eeta Ẽwandam chaain bag ãrtarr pöoma thʉnʉm gaaimuau. Aigta thʉnʉm: Ẽwandam i jaaumien dʉ̈i thum i chaain bag ãrmatarr, maimua thum ar i gaaimua durrpierr chikhamnau juau thõopʉ̈imarr khʉʉn bagjã agjö. 
\c 19  
\s1 Ʉ̈gthar Aai i jëeu nʉm ootarr 
\p  
\v 1 Mag Babilonia eegar pabaadëm ootarr khur, õor pöoma sereu wëjöm mua ũrjim, ʉ̈gthar. Makhʉʉnau serereukhamua, 
\q1 “¡Ẽwandam maach Pörögta thumaam khʉʉnau jëeubathʉ̈! 
\q1 Ichta õor peerdʉajemʉu” anaajim. 
\q1 “Ijöm chan chukhum; 
\q1 ichpaita thumaam khʉʉn khãai chi jua thierriu. 
\q1  
\v 2 Ichta õor dʉ̈i agpierraa sĩerrʉm, chadcha amachdëu nem waumaajerrpierr am gaai aag. 
\q1 Chi durpathierrmiejã ichdëu nem parhooba ampierr nem wau sĩerrarr gaaimua durrpierram khʉʉn pekau waupiejerr jũrr, 
\q1 ya ich gaaijã mas deebarmgui” anaajim maach Ẽwandamau. 
\q1 “I chaain anaa i chogkha nʉm khʉʉn khëchmam chan sĩi ich jãg par khĩir okhoobam arr aawai, ya chadcha i dʉ̈i ich garmua õor dʉ̈i aajerrjö abarm” a serereu khajierram. 
\p  
\v 3 Mag sereu thʉnarr khur, ũmaai deeu magjierram chi ʉ̈gtharmpeenaupai: 
\q1 “Ẽwandam, ʉ̈uta pua jãg Babilonia örpʉ̈ijim; 
\q1 chi naar jãg nathöo jĩu sĩsimʉn jãan ich jãg sĩerrʉm iekhaugui” anaajim. 
\p  
\v 4 Magbaawai mag jöoin veinticuatro narr khʉʉnau agjö jayap sĩi khanjö sĩsidʉmta ich paar sĩsid arr khʉʉn dʉ̈imua Ẽwandam ich khu juupjem gaai oo sim khĩirphee kanieu thʉkhöokhanaa, khĩeb jẽb gaai dagau dʉrkhanaa irig jëeumamua, “¡Jãan ich magau! ¡Chadcha iita maach thumaam khʉʉnau thö iekhaju aai nʉmgui!” ajierram. 
\p  
\v 5 Makhʉʉnau magbaawai ĩchab mag Ẽwandam khu juupjem pöm sim aarmuajã õor iekjö, 
\q1 “Maach Ẽwandamta thöbathʉ̈” a sĩejim, “pãach thum ar i ökhönaa i chogkha nʉm khʉʉnau. 
\q1 Jöoinaujã i thönaa chaainaupa iita thöbat” a sĩejim. 
\s1 Cordero jua pʉrju jaautarr 
\p  
\v 6 Maimua mua ũr nʉʉ aawai, sĩi õor pöm wëjöm iekjö thʉnʉmta mamʉ ĩchab salt pöm jurur wëjöm dʉ̈i pagthʉmpa turururkham iekjö thʉnaajim mua ũurwai. Mag sĩi sereu wëjöm khʉʉnau mag naajim: 
\q1 “¡Maach Pör Ẽwandaman chadcha emkhooirau! 
\q1 Maach Pör Ẽwandam thumaam khʉʉn khãai chi thierriuta ya nem thum gobernaa sĩsim. 
\q1  
\v 7 Keena, ya Corderoon jua pʉraagpam, onee ajuga. 
\q1 Mag oneenaa i appaita thö iekhaju. 
\q1 Chi ʉʉi, ya ar chihöowia sĩi khĩir khaug sim. 
\q1  
\v 8 Irig jũapijim khajũa wajapham, lino dën. 
\q1 Maan sĩi memerkhögjã chukhu, ich bäpgau sĩi bʉ̈ʉmjö sim. 
\q1 Mag ich bäpgau bʉ̈ʉmjö simua Ẽwandam chaainkhanaa i dau na wajapha wënʉrraajerrta jaau sim. 
\q1 Magua mag khĩirta irig jũapijim” anaajim. 
\p  
\v 9 Maimua chi Ẽwandam chogau mʉrʉg, —Nau mua iekhabarm phã sĩubá ajim. Mʉg iekhan ich Ẽwandamaucha ich imeerba jaaupitarrta mua pʉrʉg jawaagpamgui ajim mʉrʉg. Magnaa ichdëupai, Corderoou ich jua pʉr nʉm phiesta ee thʉ̈rkhʉʉiwi chi wët nʉm khʉʉnan chadcha oneeta ajugui ajim. 
\p  
\v 10 Mʉchig magbaawai, mua i bʉ̈khʉrr phõbkhaimajim irigta Ẽwandamagamjö jëwaag. Mamʉ mag mua ich bʉ̈khʉrr phõbkhabaimaawai mʉrʉg, —Ʉ̈ʉ̈, oob jãgam mʉ dʉ̈i. Ẽwandamagta jëeubá ajim. Mʉjã sĩi pʉ dʉ̈i ãba Ẽwandam chog khabahab ajim, pʉ khodnaan ar Jesús iek amachdëu ʉ̈khatarrta ogdʉba amachdëu ootarrjö jaau durrum khʉʉnjö. Ẽwandamagta jëeubá ajim mʉrʉg. 
\s1 Cabaai bäpphä sim gaai nʉrrarr 
\p  
\v 11 Mʉchig magbaawai, mua phiidʉnaa oo nʉʉ aawai, edaujãata sĩi weeudʉ wëjoojim. Mag edjã weeudʉ wëjöm eemua woun ãb cabaai bäpphä sim gaai öbërchëjim. Mag thʉ̈r “Mʉchdëu Nem Wauju Abarmʉn Chadcha Wau Chitʉm” ajim i thʉ̈r, ichdëuta thum wajapha gobernaanaa juurhi eejã wërbʉajeewai.  
\v 12 Mag sim dau oowain, sĩi õtdau khĩirjöta nem dapag phuphup sĩsid ajim. Ich pör gaai pörsir khapan paarnaa ĩchab ich gaai ich thʉ̈rjã phã wai sĩejim. Mamʉ mag thʉ̈r chan bigaaum khʉʉnaujã khaugba, ãba ich chi warrum khʉʉupaita khaphʉ sĩejim ich thʉ̈r.  
\v 13 Mag simua khajũa jũa sim gayan, sĩi dawaa bag phur sĩsid ajim. Ich mag wounpai ĩchab, “Ẽwandam Iek” a thʉ̈r sĩejim.  
\v 14 Ich mag ẽudee Ẽwandam chognaan khapaana pʉʉrthʉ wënʉrrajim. Mamʉ makhʉʉnjã mag sĩsidʉmʉn, sĩi thum khajũa chi wajapham lino dën bäphä memerkhögjã chukhu sĩsidʉmta jũanaa, cabaai bäpphä sĩsidʉm gaaita wënʉrrajim.  
\v 15 Mag cabaai bäpphä sim gaai öbërchëtarrau durrpierr õor nʉnʉidʉm jua khʉaba pãaukhapʉ̈imaag ich i ee thuthui dëe khitʉm wai sĩejim. Ichdëuta mʉg durr thum jʉ̈a wai sim aawai jũrr ich jua jʉmpiba dajẽkta wai sĩsiju. Magbaadëmua õran sĩi uva chö piirjʉu awaag bʉ̈ʉu eeg pibthai nʉmjöta aju am gaai. Magnaata amachigpai Ẽwandam thumaam khʉʉn khãaijã ʉ̈rpai sĩerrʉm ag khĩir machag khajapham döjö jarr ee choo wëjömta döpipʉ̈imaju.  
\v 16 Mag wounau ich khajũa gaai maimua ich khupá gaaijã agjö ẽsapdau phãkha wai nʉrrajim. Chi ẽsapdau mag phã sĩerr, “Reinaan Rey anaa chi pörnaan Pör” a phã sĩejim. Ajapcharan jãan ich maach Pör Jesucristo ajim. 
\p  
\v 17 Maimua jũrr dewamta pari agjö Ẽwandam chogkha simta cha edau phuu nʉm gaai dʉnʉʉunaa, nem ichpan wir aig amach khapeenpai pʉr khoojem khʉʉn thʉ̈ʉrwai, ääakhamua mag sĩejim: 
\p —Nemchaain wir aig pãach khapeen pʉr khoojem khʉʉn, daaig pidut a sĩejim. Ẽwandamau pãar athee phathau pöoma wai sim, ¡khöbahut!  
\v 18 Pãar atheen thʉnʉm: reinaan mod, soldaaun pörkhanaa emkhooinkha thʉnarr khʉʉn mod, cabaai mod, mag cabaai gaai nʉrrjëe arr khʉʉn mod, maimua thumaam khʉʉn mod. Õor sĩi chikham chogkha nʉrrjëe arr khʉʉn mod, maimua chikham chogkhaba sĩi amach khõchagpierr nʉrrjëe arr khʉʉn modjã agjö thʉnʉmgui ajim. Magnaa, ¡Khöbat, jã pãar atheemʉugui! a jaaujim, nemchaainag. 
\p  
\v 19 Maig oowai ĩchab chi mepeer khumjö jojothor sim phũas eemua öbërchëtarr dʉ̈i mʉg jẽb gayam reinaanpa amach soldaaun dʉ̈i ãba biirdʉ thʉnaajim, mag cabaai bäpphä sim gaai nʉrrʉm dʉ̈i i khapeen i ẽudee wënʉrrʉm khʉʉnpa ãba amach garmua wërbʉag.  
\v 20 Mamʉ magbaadëm ee chi mepeer mag phũas eemua öbërchëtarr preso sĩsijim. Mag preso sĩsim dʉ̈i ãbakhai chi sëukha nem jaau nʉrraajerrjã agjö pʉr auwi, dʉ̈i ĩchab preso sĩsijim. Ich mag sëukha nem jaaumieuta mag khumjö sim phũas eemua öbërchëtarr dakhĩir õrau nem ooba aajempa wau nʉrrʉm gaaimua õor khũgur aumaawai, ʉdʉraa amach gaai mag phũas eemua öbërchëtarr ag dauchachjã amach gaai phãpiwi i khĩirkha wau simʉgjã Ẽwandamagamjö jëeujierram. Mag amach numwe pʉrkha auwi, ich jãg thõojã thõoba iiu sĩsidʉmta thʉrrdö ee azufre õtdau dʉ̈i waaurëu uu wëjöm ee barkhʉʉipʉ̈ijim.  
\v 21 Magbaawai tagam khʉʉn am khapeen, mag cabaai gaai nʉrrarrau ich i ee espaar durag sĩerrau, ajapcharan ich Jesucristoouma, sĩi su khëchpʉ̈ijim. Mag khëchbapäaiwai, chadcha nemchaain pöm bëewi sĩi khödubbapʉ̈imjö abaawai, õor pöm thʉnarrta chukkhu aadëju. 
\c 20  
\s1 Mil años 
\p  
\v 1 Maimua Ẽwandam chogta ʉ̈gtharmua eeg urum mua oojim. Magua ich jua ee jẽbdi ierr nem pöm thʉrrdöjö sim eem yabme waidurajim, caden pöm sim dʉ̈i.  
\v 2 Mag bëewia, mag nem pöm õoirjö sim pʉr athaichëjim. Mag õoirjö simta warrgarwe “nemkhõr” a thʉ̈ʉrjem; ich arpai ĩchab mepeer a thʉ̈rnaa Satanás a thʉ̈ʉrjem. Mag pʉr auwi mil años sĩi ibʉʉr sĩujim.  
\v 3 Mag ibʉʉrnaa mag ierr jẽbdijö simta thʉrrdöjö wëjöm ee barpʉ̈iwi wajapha phãar sĩujim, mag mil años pa nʉm ora tag ich mag durrpierr õor khũgur nʉrram ugua. Maimua mag mil años dichdimaawaita deeu khũchpaim athee ẽerpʉ̈iju ajim. 
\p  
\v 4 Maimua khu juupjem khapan thʉnʉmjã mua oojim. Ag gaai ohood aphöbaadëjim, amach garmua warm khʉʉn khaibag waumkhĩir wa am kõit khãijã iekhamkhĩir ich Jöoirau iek theeg apitarr khʉʉn. Ĩchab maig naajim, Jesucristoou Ẽwandam iek jaautarr ʉ̈khawia jũrr amach paarmua jaau durrum gaaimua chikhamnau ö thʉrrphë khëchtarr khʉʉn akhaar. Makhʉʉnta ĩchab mag phũas eemua khum chi jojothorjö sim öbërchëtarragjã jëeuba ni amach dag gaai wa jua gaai khãijã i thʉ̈r phãpiba arr khʉʉnau. Makhʉʉnta deeu iiu nʉisiwi Cristo dʉ̈i ãba mil años chi pörnaankha nʉisijim.  
\v 5 Ma nacha iiu phiidʉtkha nʉm ajim. Mamʉ warm khʉʉn ar Ẽwandam iek ʉ̈khaba khëchmarr khʉʉn chan tag iiuba, ich mag nʉisiwi, mag mil años dichdimaawaita ũwaai deeu iiu nʉisijim.  
\v 6 Mag nacha õor iiu phiidʉtkha nʉm ee dʉ̈i phiidʉtkhabarm khʉʉnan, chadcha oneeta ajurau. Mag iiu nʉisim chan jũrr warm khʉʉn phiriutkha auwi khĩmie durr barkhʉʉi nʉm edjã am chig abaju. Mag khĩmie durr barpʉ̈i nʉmta, maach meetarrta deeu meeju a jaau simʉu. Magbarmʉn mag warm khʉʉn khĩmie durr wët thʉnʉm daar, Ẽwandam atheeta phadnaankhanaa Cristo atheejã phadnaankha wënʉrrʉmua ich Cristo dʉ̈i ãba mil años chi pörnaankha nʉisiju. 
\s1 Õtdau uu wëjöm ee mepeer barbapʉ̈im ootarr 
\p  
\v 7 Mag amachta chi pörnaankha nʉm ee mil años dichdimaawaita mag mepeer Satanás ibʉʉr wai narrjã deeu ẽerpʉ̈iju aajem.  
\v 8 Mag ich ẽerbapäaiwaita, durrpierr õor khũgur nʉrrʉmua, Gog durram khʉʉn dʉ̈i Magog durram khʉʉnpa ãbam aig biirdʉ auju anaabá, mag biirdʉnaa Ẽwandam igar nʉm khʉʉn dʉ̈i wërbʉag. Mag chi wërbʉju anʉm khʉʉnan, khapaana sĩi phũas igaau mosdau thʉnʉmjöta thʉnaajim, chi khapanag. 
\p  
\v 9 Makhʉʉnta mag ãba biirdʉnaa ërëuwi, sĩi Ẽwandam chaain irua ʉ̈rcha jãsenecha aajem phöbör dʉ̈i phʉʉr thuur auwimajierram. Mamʉ amau mag phʉʉr thuur atham ee, wërbʉbamjö arrta, Ẽwandamau ʉ̈gtharmua õtdau khĩirta noseg daujö khʉipiwi sĩi warre phaa khëchpʉ̈ijim.  
\v 10 Magbaawai ĩchab chi mepeer mag õor khũgur sĩerrjã jũrr warm khʉʉn numí mag khum chi jojothorjö sĩerr dʉ̈i ãbakhai chi sëukha nem jaaumie dʉ̈i narr aar barpʉ̈ijim, thʉrrdö ee õtdau khĩirta azufre dʉ̈i waaurëu uu wëjöm ee, mʉg atag pawiajã ich mag õtkhierr machgau dau aphʉʉ idawaa wënʉrramkhĩir. 
\s1 Khu juupjem pöm bäpphä sim khĩirphee warre dich khĩircha jaauju 
\p  
\v 11 Maimua mua oojim ĩchab, khu juupjem pöoma bäpphä sim; ag gaai chi woun oo sĩerrjã mua oojim. Mag khu juupjem gaai oo sim oowi, mʉg durr edaujã dʉ̈i sĩi dëgölp chukkhu aphöbaadëjim. Tag oojã ooba, ich mag nʉisijim.  
\v 12-13 Õor nawe khëchmarr khʉʉnjã Ẽwandam khĩirphee bʉ̈jãaupai dʉnʉnʉid thʉnʉm mua oojim, mʉg jẽb gaai aawai chi thierrnaan arr khʉʉnpa. Mag ich khĩirphee õor phʉʉrbaadëm dʉ̈i, aig libro thʉnarr gaai eeureutkha oopijim. Mag eeureutkha oopiwiata mag libro thʉnarr gaai phã sĩsid arrjö thumaa mʉg jẽb gaai aawai amachdëu nem waumatarrpierr am dau aphʉʉ aju jaaumajim. Pari magaagan, khëch nʉm khʉʉn akhaar naajem aarmuajã thumaa Ẽwandam dakhĩir öbërchëjierram, phũas ee khãijã okhoowi khëchtarr khʉʉnpa. Mag thum ãbam aig nʉisiewaita, chadcha am dʉ̈i Ẽwandamau amachdëu nem waumaajerrpierr ajim. Mamʉ deeum libro sĩejim ĩchab; mag gaaita thʉnʉm, õor ich mag iiu wënʉrraju khʉʉn thʉ̈r.  
\v 14-15 Mag ẽsap õor iiu wënʉrraju jaau sim gaai thʉ̈r öbërba abarm khʉʉnan, mag thʉrrdö õtdaujö uu wëjöm eeta barkhʉʉipʉ̈ijim, ajapcharan khĩmie durrma. Mag barkhʉʉi nʉmta, mʉg jẽb gaai meewi deeu ũwaai mee nʉm aajem. Maigta ĩchab õor dënjö maach dajẽgpiejerrjã tag dajẽgba aadëju, ichpa chi khaigbam khʉʉn dʉ̈i mag thʉrrdö õtdaujö wëjöm ee barbapäaiwai. 
\c 21  
\s1 Edjã iiur durr iiur dʉ̈i 
\p  
\v 1 Magtarr khur nacharam edaujã mʉg durr dʉ̈i narr Ẽwandamau thum chi iiurig paapʉ̈itarr aawai edjã iiurta durr iiur dʉ̈i mua oojim. Magtarr aawai ya phũasjã chukhu ajim.  
\v 2 Mʉch daúachata mua oojim, bʉ̈ʉrjã pekau chukhum khʉʉn phöbör, Jerusalén chi iiur, ʉ̈gthar Ẽwandam sim aarmua eeg urum. Mag urumʉn ya ʉʉi wajap chihöowi ich jaai dʉ̈i jua pʉraagpamjö, sĩi thum chi khĩir khaugamta urajim.  
\v 3 Magbarm ee ʉ̈gtharmua nem theeg õor iekjö, “Ĩsin chadau Ẽwandaman õor ee dau daauta nʉrrʉmgui” ajim, “am kha ogdʉba ich mag sĩerraag. Am i phöbörkha nʉisiewai jũrr ichta chadcha am Ẽwandamkha sĩsiju.  
\v 4 Ichdëuta thumaa wajapha am dauchöjã jãrpʉ̈pʉ̈i aju. Mam chan tag õor meebam, õor dauhi paraajã abam. Tag chikham ʉ̈apëpërjã aba, gaai machagjã tag khaugbajugui” ajim, “ya warr nem thʉnarr thum isegpʉ̈iwi thum chi iiur apha thʉnaawai.” 
\p  
\v 5 Magbaawai chi khu juupjem gaai oo sĩerrau, “Muata nem thʉnʉm thum chi iiurig paapäaijem” a iekhajim. Mag iekhapʉ̈iwia, jũrr mʉrʉgta, —Cha mua iekhabarm iek thumaa phã athá. Jãan chadcharam iek aawai pãrau ag gaai ʉ̈khaju aai nʉmgui ajim. 
\p  
\v 6 Magtarr khur deeu mʉrʉg, —Ya nem thumaa aaipa sĩsimgui ajim. Mʉchpaita nacharam ẽsapdau Ajönaa chi ãbmiecharam Zetajö chitʉm; mʉchta nem thum ompaaju nawe chirajim, mʉg durr öwiajã mʉchin ich mag chirsijugui ajim. Chi öbisi nʉm khʉʉnag mua sĩi ich jãg par õor iiupiejem dö khumdʉ öbër sim eem döpiju.  
\v 7 Ar ögkhaba amach garmua pödpʉ̈i nʉm khʉʉnaun, mʉ juagam nem thʉnʉm thum amachdëuta auju. Mʉchta am Ẽwandamkha chirsiewai jũrr amach mʉ chaainkha nʉisijugui ajim.  
\v 8 Mamʉ mʉ iek jawaag khuwʉ̈ʉm khʉʉn, mʉ iek ʉ̈khaba aajem khʉʉn, mua khõchkhabam nem waaujem khʉʉn, juau õor thõojem khʉʉn, dich õor khabam dʉ̈i khapes aajem khʉʉn, bënkhʉʉn, parhooba juau nem wautarragta mʉrʉgamjö jëeujem khʉʉn, maimua thum õor sëu paraam khʉʉn, magʉm khʉʉnan thum thʉrrdö õtdau azufre dʉ̈i waaurëu uu wëjöm eeta mua barkhʉʉipʉ̈ijugui ajim. Mamta biek numiimua paawai thõo chaarcha thõ nʉmʉugui a iekhajim. 
\s1 Jerusalén chi iiur 
\p  
\v 9 Maimua Ẽwandam chognaan siete narr khʉʉnau amach pipied agjö jarr siete wai narr ee ãbmiecha agua õor khaibag wauju waiberr khʉʉn eem ãb bëewi mʉrʉg, —Mau pidú, mua pʉrʉg oopikhimgui ajim, Cordero ʉʉi paju. 
\p  
\v 10 Maimua Ẽwandam Akharau mag mʉrʉg oopipigmamua chadcha durrsĩ pöoma ʉ̈gthaa sim gaai mʉ athaadëjim, chi Ẽwandam chogau. Mag arrwi phöbör pöoma sim mʉrʉg oopijim, ʉ̈gtharm phöbör Jerusalén anʉm. Phöbör pöm mag simta ʉ̈gthar ich Ẽwandam sim aarmua eeg uraawai, sĩi arar urajim.  
\v 11 Ag bʉ̈ araragan, sĩi ooihmʉ mokdau wajaphamjöta khitajim, mokdau jaspe aajemjö, dau bʉ̈ʉ vidriojö.  
\v 12 Mag simʉn ʉ̈gthaa thuur phʉʉrdʉ sĩejim. Mag thuur phʉʉrdʉ simta puertdi khapan doce sĩejim. Makhʉʉn puertdi khapanagpierr Ẽwandam chognaanjã agpierr ããbdö dʉnʉnʉid ajim, chi thʉanaan. Mag dʉ̈i ĩchab warrgar jöoi Israel khararr chaain doce narr khʉʉn thʉ̈rjã mag puertdipierr phãkha sĩsid ajim.  
\v 13 Ed öbeerjem gar puertdi thãrjup wai sĩejim; ed burrjem gar agjö thãrjup, margajãrm bi garjã thãrjup, maimua baggajãrm bi garjã agjö puertdi thãrjup sĩejim.  
\v 14 Mag phöbör igaau thuur phʉʉrdʉ simʉn, mokdau pör dapag doce nʉm gaaita khaarkha thʉnaajim. Mag mok pör nʉmpierr ĩchab Corderoou ich i jaaumkhĩir doce jʉr autarr khʉʉn thʉ̈rjã gaai phãkha sĩsid ajim. 
\p  
\v 15 Maagwai chi mag mʉ dʉ̈i iekha sĩerrau padam phĩr dën jua ee wai sĩejim, agua chi phöbör chach phʉʉrdʉpʉ̈iwia, thum chi puertdi mag sĩsid arrjã chachkhapʉ̈inaa chi phöbör igaau thuur phʉʉrdʉ sĩerrjã chachpäaig.  
\v 16 Mag phöbörön sĩi thum jã agdaujöo iwiir duraajã khaba, chi jã pheeugjã chi jã durag dʉ̈i ãbata sĩejim. Maimua chadcha chi phöbör chachbaadëjim. Mag chach oowai, chi jã durag, chi jã ʉ̈gthaag maimua chi jã pheeugjã thum agdaujö ich mag dos mil doscientos kilómetros sĩejim.  
\v 17 Maimua jũrr chi phöbör igaau thuur phʉʉrdʉ simjã chachbaadëjim. Majã chachpʉ̈inaa oowai, sesenta y cinco metros sĩejim, chi parrg appai. Mag irua chach sĩerr, sĩi maach ich mʉig jẽb gayam khʉʉn chach ajim. 
\p  
\v 18 Chi phöbör igaau thuur phʉʉrdʉ sĩerr mokdau jaspe anʉm dënta wau sĩejim, maagwai chi phöbör phĩr chaar dën ajim. Mag phĩr chaar dën aawaita sĩi vidrio memerkhög chukhumjöta sĩejim.  
\v 19 Chi phöbör igaau thuur phʉʉrdʉ sim bʉ̈ gaai ĩchab mokdau khĩirpierram dën ooihmʉ wau sĩsid ajim. Nacharam jaspe dën ajim; numiim, zafiro dën; thãrjupam, ágata dën; jayapam, esmeralda dën;  
\v 20 cincoom, ónice dën; seim, cornalina dën; sieteem crisólito dën; ochoom, berilo dën; nueveem, topacio dën, diesam, crisoprasa dën; onceem, jacinto dën; maimua doceem, amatista dën ajim.  
\v 21 Chi puertdi doce narrjã ĩchab perlas dënta waukha sĩsid ajim. Mag chi puertdi khapanagjã chi perlas khapanagpierr narr aawai puertdipierr perla khĩir ãbpaimua wau sĩsid ajim. Maagwai mag phöbör eem kaaijã chi wajapcharamjã ĩchab phĩr chaar dën aawai sĩi vidriojö dau bʉ̈ʉmjöta khitajim. 
\p  
\v 22 Mag phöbör ee mua bʉ̈ʉrjã Ẽwandamag jëeujem di oobajim, ich maach Pör Ẽwandam thumaam khʉʉn khãaijã jua theeg ʉ̈rpai sĩerrʉmpaita Ẽwandamag jëeujem di anaa ĩchab ichpaita chi Cordero aawai.  
\v 23 Ich Ẽwandamaupaita ich mor gaaimua arar wʉʉ jẽer wai sĩewai mag phöbör chan mʉg ãsdawam edaujã chukhu ni edaram edaujã chukhu sim. I lamparaan ĩchab chi Corderodampaiu.  
\v 24 Mag sĩewai ĩchab phöbör durrpierr thʉnʉmjã sĩi mag phöbör arar wʉʉ jẽer thʉnʉm bʉ̈ʉgta wënʉrraju anaabá. Maagwai ĩchab mʉg jẽb gayam reinaanaujã mag phöbörta thö iyʉ̈ʉ aju aajem.  
\v 25 Mag phöbör eem puertdi chan phãraajã khaugba ich mag sĩerraju aajem. Mag nʉm dʉ̈i ĩchab edau khëwaajã khaugba sĩerraawai, edau khĩejã chukhu aju anaabá.  
\v 26 Phöbör durrpierram khʉʉnauta mag phöbör igwia, “Keena, jãgjöm phöbör chan chukhum” a iekhanaa, woun ëugarmjö wajapha i ig iyʉ̈ʉ aju anʉm.  
\v 27 Mag phöbör ee chan ĩchab bʉ̈ʉrjã maach inaam nem chan dubbam. Nem maach dawag khabam waaujem khʉʉnjã dubba, ni sĩi chikham khũguurjem khʉʉnjã pöd dubbam. Ãba chi dubju khʉʉnan, Cordero ẽsap gaai thʉ̈r phãkha thʉnʉm khʉʉnpaita dubwi ich mag i dʉ̈i iiu wënʉrraju aajem. 
\c 22  
\p  
\v 1 Mag oopitarr khur chi Ẽwandam chogau mʉrʉg dösĩg dau bʉ̈ʉ khitʉmjã oopijim, õor iiupiejem dösĩg. Mag dösĩg sĩi vidriojö sim Ẽwandam khu juupjem Cordero dʉ̈i sim aarmuata öbër sĩejim.  
\v 2 Mag phöbör eem kaaijã chi wajapcharam jãrr, maimua dösĩg ipierr, pabʉ̈ naajim döi numwe, õor ich mag iiu wënʉrrapiejem nemjõ bʉ̈. Mag nemjõon edaupierr ich mag chë sĩerrʉm aajem, bʉ̈ʉrjã khĩir jaraajã khaugba. Wajapcharan añopierr doce veces cheejem aajem. Mag nemjõ gayam chi khër khʉimamuata jũrr durrpierram khʉʉn ich mag monakha apiejem anaabá.  
\v 3 Mag phöbör ee chan Ẽwandamau khõch khaba aajem nem wau nʉm gaaimua irua mas deeju ayaam khʉʉnjã chukhum aajem. Ich Ẽwandamta Cordero dʉ̈i mag phöbör ee chi Pörkha nʉisiju anaabá. Maagwai chi chognaan mag irig jëeu nʉm khʉʉnaun,  
\v 4 i dʉ̈i khĩircha oonaa i thʉ̈rta amach dag gaai ich mag phã wai wënʉrraju aajem.  
\v 5 Maig chan edau khëwaajã khaugbaju anʉm. Maagwai chi maig wënʉrrʉm khʉʉnau õtdau paagjã õtdau igba, ni mʉg ãsdawam edaujã igbaju aajem, ich maach Pör Ẽwandamauchata am wʉʉ wai nʉrraju aawai. Mag ich dʉ̈icha nʉisim khʉʉnauta mʉg atag pawiajã i dʉ̈i ich mag gobernaa nʉisiju aajem, mag durr iiur gaai. 
\s1 Jesucristo ya bëeimʉʉ sim 
\p  
\v 6 Maimua chi Ẽwandam chogau mʉrʉg, —Mʉg iekhan chadcharam iek aawai, ag gaai ʉ̈khaju aai nʉmgui ajim. Ich Ẽwandamau ich i jaaumienag wajapha ich iek jaaumkhĩir khĩirjug deejemuachata ʉ̈gtharmua mʉch ich chog pʉ̈ibarmgui ajim, jũrr muata õor ich chognaan agjö mʉg jẽb gaai thʉnʉm khʉʉnag ichdëu mʉg atag jöpcha nem wauju thum oopimkhĩir. 
\p  
\v 7 Mag nʉm dʉ̈i ĩchab ich Jesuupai ich igwia, iin mʉgtarr khur jöpcha maach awaan bëeju aajem. Ar mʉg iek phã sim gaai öbëbërg maju jaau sim thumaa ʉ̈khawi ag ipierraa nʉm khʉʉnag warag onee api sim. 
\p  
\v 8 Mʉch chi Juanauchata cha mʉchdëu nem jaau dichdimam thumaa mua mʉch daúacha oowi mʉch jʉ̈gʉucha ũrjim. Mag mʉchdëucha oowi ũr dichtarr khur, mua chi Ẽwandam chog mag mʉchig nem thumaa oopitarr bʉ̈khʉrr kanieu phõkhabaimajim, irig jëwaag awia.  
\v 9 Mamʉ magbaawai ichdëu mʉrʉg, —Ʉ̈ʉ̈, oob mʉ dʉ̈i jãgam, mʉjã sĩi pʉjö Ẽwandam chog khabahab ajim, pʉ khodnaan Ẽwandam i jaaumien ar mʉg ẽsap gaai phã sim ʉ̈khawi ag ipierraa aajem khʉʉnjö. Mʉrʉg jëeuju khãyau Ẽwandamagta jëeubá ajim. 
\p  
\v 10 Maimua ĩchab mʉrʉg magjim: ’Ẽwandamau nem thumaamua ichdëu chachmaju mʉg ẽsap gaai jaau simjö aimʉʉ sim aawai, oob pua sĩi õragjã jaauba pʉch thãar eepai khaphʉ wai chitamgui ajim. Mag khãyau thumaam khʉʉnag jaaupet ajim.  
\v 11 Ar nem khaigba waaujem khʉʉnag jaau nʉmjã ʉ̈khabamʉn, idëu amach khaibag ee naapibá ajim. Mamʉ ar chi wajapha ʉ̈kha nʉm khʉʉnagan, warag nem wajaphamta waupinaa, maimua chi Ẽwandam atheepai wënʉrrʉm khʉʉnagjã warag i gaaita ubʉ wënʉrrapi jaaubá a jaaumajim mʉrʉg, chi Ẽwandam chogau. 
\p  
\v 12 Magbaawai, “Ëera, mʉʉn jöpcha pãar jʉraan majugui” ajim ich Jesuucha. “Mag mʉch mam dʉ̈i mʉch chaainag amachdëu waumarrpierr deemaagjã mua nem phë arrjugui” ajim.  
\v 13 “Mʉchta nacharam ẽsapdau Ajönaa, chi ãbmiecharam Zetajö chitʉm. Mʉchta nem thum ompaaju nawe chirajim; mʉg durr thum öwiajã mʉchin ich mag chirsijugui” ajim, ich Jesuu ich idamaucha. 
\p  
\v 14 Ar sĩi khajũa wajap jã simjö thãar wajapha pekau chukkhu nʉm khʉʉnta ʉ̈uhcha thʉnʉm khʉʉnau, amauta maach iiupiejem nemjõ mag mua jaau chirʉm gayamjã jõnaa, mag phöbör puertdi khapan wʉwʉr wëjöm eejã dubju aai naawai.  
\v 15 Mamʉ bënkhʉʉn, amach ʉʉin khabam dʉ̈i khapes aajem khʉʉn, juau chikham thõojem khʉʉn, parhooba õrau nem wautarragta Ẽwandamagamjö jëeujem khʉʉn, maimua ar sëukha nem ĩgkhanaa chikham khũguurjem khʉʉn chan, ni ãbjã dubba, thum Ẽwandamau isegpʉ̈iju. 
\p  
\v 16 Mag mʉchdëu jaau chirʉm chadcha aawaita, ich Jesuujã ich igwi, ichdëuchata ich chog pʉ̈ijimgui ajim, magʉm thumaa ar ich iek ʉ̈kha durrum khʉʉnag jaaumkhĩir. Magnaa ichdëupai ich igwi, “Mʉchta sĩi khajap nemjĩirjö David khararr chaain ewagam khʉʉn eemua sũrkha phiidʉtarr anaa ĩchab edaupherr garm phĩdag wʉʉ öbeerjemʉugui” ajim Jesuu, ich bëeju igwia. 
\p  
\v 17 Magbaawai Ẽwandam Akharauta chi Cordero ʉʉi dʉ̈imua, “¡Pidú!” anʉm. Maagwai pãar chi ũr nʉm khʉʉnaujã ĩchab, “Jesús, jöpcha pidú” abat irig. Maimua Ẽwandam khaugam khõchgau öbissi nʉmjö nʉm khai, maach peerdʉajem iek sĩi õor iiupiejem döjö simta sĩi ich jãg për aujã për auba ʉ̈khabat. 
\p  
\v 18 “Ar mʉg ẽsap gaai mua mʉch i jaaumienag jaaupitarr iek phã sim ũr nʉm khʉʉnag mua mag chirʉmgui” a sim, ich Jesuu: “Ãbmua khãijã chamʉg mua nem jaautarr ʉ̈r jũrr mʉ ichaaur jaaumʉn, Ẽwandamaujã ĩchab ich mʉg ẽsap gaai jaauwai õor chachmaju a sim thumaa i gaaita burrpiju.  
\v 19 Wa magba ãbmua khãijã mʉg mʉch i jaaumienag jaaupitarr iek phã sĩsidʉm igba sĩsidʉm awi bʉchkhun khãijã isegpʉ̈imamʉn, Ẽwandamaujã jũrr irig õor iiupiejem gayam nemjõ jõpiba, ni mʉg ẽsap gaai jaauwai chi ʉ̈gthar öbër nʉm khʉʉnag nem deeju a jaau simjã deebaju.  
\v 20 Mʉch chi nem magju thum jaau chirʉmuata chadcha mʉʉn jöpcha maju a chirʉm, pãar awaan.” 
\p Maadëujã chadcha ich magta jëeuju aai nʉm: “Señor Jesús, deeu jöpcha pidú.” 
\p  
\v 21 Maach Pör Jesuu pãar thumaa ʉ̈u oopaar phë wai sĩepim khõsi chirʉm. 
\p Mag ajim keena, ich Jesucristooucha mʉ khãaipi auwi mʉrʉg oopitarr. 
\cls Juanau