\id PHP - Waunan (Woun Meu) NT (alternate orthography) -Colombia 2011 (DBL -2013) 
\h FILIPENSES 
\toc1 Pabloou Filipopienag ẽsap phã deepʉ̈itarr 
\toc2 Filipenses 
\toc3 Flp 
\mt1 FILIPENSES 
\mt2 Pabloou Filipopienag ẽsap phã deepʉ̈itarr 
\ip \bd Chi phãtarr.\bd* Chamʉg carta ĩchab ich Pablo Roma phöbör ee preso simua phãtarrau. Mʉg ẽsap phãju nawe ya diez añosjö sĩejim aajem Pabloou ichdëuta nacha am aar Cristoou maach peerdʉ aaujem iek jaauthurtarr. Mag i Ẽwandam iek jaauthurtarr khap am khõs nʉm khai, Hch. 16:12-40 jʉrwi ag gaai thʉ̈rbat. 
\ip Maimua ag khur ya biek thãrjupam Ẽwandam iek jaau nʉrraawaijã ichdëucha am oothurjim (Hch. 20:5-6). Mamʉ mag Roma phöbör ee preso sĩsierr aigmua años jayap sĩejim aajem, bʉ̈ʉrjã am dʉ̈i ooba. Mag ooba dʉ̈rrʉ̈ʉ narr aawai Pabloou khĩirjuawai ya amach garmua ich khĩir okhoobapʉ̈impii khãijã sĩejim (4:10). Mag nʉm ee Filipomua Epafrodito barchëjim anaabá, aram khʉʉnau ich Pablo athee ofrenda deepʉ̈itarr dʉ̈i. Magbaawai Pablo deeu khĩirdam onee aadëjim aajem. Chi Epafroditojã urumua peer meejim anaabá. Mor mas sĩewi monaaubaadeewaita deeu Pabloou am aar i pʉ̈ijim aajem, chamʉg cartadam dʉ̈i (2:25-30). 
\ip \bd Chijã khʉʉn atheeta phãjĩ.\bd* Filipopien peer amach thumta judionaan khabam khʉʉn ajim aajem. Am chan paraam khʉʉn khabajim aajem, pari mag durrumuata ofrenda jʉr phie nʉʉ ajim aajem, ermanonaan Jerusalenpien dau aphʉʉ khithëem khʉʉn athee (4:16; 2 Co. 11:9). Pabloou chi Filipopien athee mʉg ẽsap phãawai chan sĩi deeum khʉʉn aramjö iek phithurg aadëphʉm gaaimua am dʉ̈i iek ëudʉag khaba, sĩi khajapha ich khapkhʉʉn ichdëu oojem khʉʉnagamjöta phãjim. 
\ip \bd Khan jawaag ajĩ.\bd* Mag Filipopienau ich athee phatkhondam jʉr phie nʉʉ awi deepʉ̈itarr aawai, onegau ag paar amag ʉ̈u ajim aagta phãjim (4:10-20). Maguata cárcel deg sĩerr ãba, í onee chirajim a sim. Biek khapan mag ich onee sĩerrta mʉg ẽsap gaai jaau sim (1:4,18,25; 2:2,17,28-29; 3:1; 4:1,4,10). Mag maach onee aju aai nʉm a sim dʉ̈i nem khĩir pogkheta jaau sim; mamʉ ʉ̈rcha jaaupʉ̈i simʉn, mʉig eegar nʉwejã jãga wënʉrraju aai nʉ a simʉu. 
\c 1  
\s1 Salud 
\p  
\v 1 Ermanonaan, pastornaan, pastornaan juag oojem khʉʉn, maimua thum Filipopien Jesucristo iek ʉ̈kha nʉm gaaimua maach thum ãbam bi eemjö khodkha nʉm khʉʉn: 
\p Mʉʉn Pabloou. Muata pãar thumaam khʉʉn athee mʉg ẽsap phã chirʉm. Timoteota mʉ daumaai sim, mʉ dʉ̈ita ãba Jesucristo chogkhanaa i athee phidkha sĩewai. Maagwai maach numiim khʉʉnauta pãach thumaam khʉʉnag saludaanaa ʉ̈u naapim khõsi nʉm.  
\v 2 Mag gaaimua maach Aai Ẽwandamag jëeunaa maach Pör Jesucristoogjã jëeu nʉm, pãar ʉ̈uu wai nʉm dʉ̈i ĩchab khõinaa wai wënʉrramkhĩir. 
\s1 Pabloou chi ʉ̈kha durrum khʉʉn kõit Ẽwandamag jëeujerr 
\p  
\v 3 Mʉchdëu pãar khĩirju ahaukhampierr Ẽwandamag ʉ̈u ajim a chiraajem pãar kõit.  
\v 4 Mag Ẽwandamag jëeuwai pãar gaaimuata warag mʉ thãar onee aadeejem,  
\v 5 maach peerdʉajem iek jawaag maach thum ãbam phidag gaaipai naawai. Mag warrcha pãachdëu i iek ʉ̈khatarr aigmua pãraujã mag phidkha phöbaaderr, ĩs ewag pawiajã ich mag maadëu ogdʉba wënʉrrʉm.  
\v 6 Mua khaphʉ chirʉm, ichdëu jãg pãar thãar chi iiurig paapʉ̈itarrjö ichdëuta warag pãar khĩirjugjã bãaupiju, Jesucristo bëe nʉm ora ich phidag waumkhĩir.  
\v 7 Mʉrʉgan pãarta mʉ thãrau. Maagwai pãar gaaimuata Ẽwandamagjã ich mag onee ʉ̈u ajim aju aai chirʉm. Pãarta mʉig mʉ dʉ̈i cárcel deg ãba nʉmjö nʉm. Mua thethemnaan na maach peerdʉajem iek kõit iekhaawaijã pãrauta mʉ ipierr dʉ̈i ag kõit iekha nʉmjö nʉm, jammua pãachdëu Ẽwandamag jëeu durrum gaaimua. Pãran warp nʉm, mamʉ Ẽwandamau mʉrʉg phidag deetarr pãrau sĩi mʉchig appai deeba, ʉ̈u pãrau dʉ̈i mʉ juag oo nʉm, irig jëeu nʉmua.  
\v 8 Jesucristoou pãar khõsi simjö muajã pãar kha khõsi chitʉm. Mua mag chirʉm aig Ẽwandamau khaphʉ sim mʉ sëukhaba chirʉm. 
\p  
\v 9 Maguata mua warag pãar kõit Ẽwandamag jëeujem, pãach wir aigjã warag ʉ̈rcha agdaujö chikham kha khõsi amkhĩir; maagwai khĩirjug paraanaa Ẽwandam dau najã jãga wënʉrraju aai nʉ a khaugphömam dʉ̈i  
\v 10 nem aai khabamjã isegnaa nem ajaphampaita waumkhĩir. Mag amʉn magan Cristo bëem edjã pöd ãbmuajã “Pãar khaigba naajim” abaju.  
\v 11 Mag amʉn magan ĩchab ich Jesucristoouta pãrag nem ajapham pöm waau khaugpiju. Õrau pãar mag oobaawai amaujã ĩchab Ẽwandamag jëeumamua, “Ʉ̈uta pua am jãg phë wai chirʉm; pʉjöm chan chukhum” a iekhaju. 
\s1 Pabloou cárcel deg simua ich onee chiraajerr jaaupʉ̈itarr 
\p  
\v 12 Khodamnaan, mua pãrag khap amkhĩir jaaukhim: Mʉg amau mʉ cárcel deg pʉ̈ibapäaiwai õraun tag mua Ẽwandam iek jaauba ich jãg chirsijupii ajierram. Mamʉ mag khabajim. Ante magtarr aigmuata maach peerdʉajem iekhan warag aaidʉa khaphii aadëm.  
\v 13 Mag gaaimua mʉig soldaaun pöm thʉnʉm dʉ̈imua bithurgam khʉʉnaupa thum khakhapdö thʉnʉm, Cristo iek jaau chitʉm gaaimuata mʉ mʉg preso wai nʉm.  
\v 14 Mamʉ ermanonaanau oo nʉm, mʉ cárcel deg chirʉmjã Ẽwandamau mʉ chig apiba wai sim. Mag gaaimuata ʉ̈rcha i iek ʉ̈kha nʉm khʉʉnaujã warag khuphĩiuwia ögkhaba, dʉ̈i i iek jaau nʉm. Amau khaphʉ nʉm, maach Pör Cristo amach dʉ̈i sĩewai irua ʉdʉʉr am amach appai deebaju. 
\p  
\v 15 Mag Cristo iek jaau wënʉrrʉm ee, ãaur khʉʉnaun mʉ mʉg chirʉm oowia, mʉ khãyau amachdëuta ajapcha jaau nʉm awia jãg wënʉrrʉm, chikham dʉ̈i khujʉrpaim iekhau. Magarrau ãaur khʉʉnaun chad magjã khĩirjuba, amachdëu Cristo khõsi nʉm gaaimuata jãg jaau durrum.  
\v 16-17 Ar mag Cristo khõsinaa mʉjã dau aug khaug paraa nʉm gaaimua jaau wënʉrrʉm khʉʉnau khaphʉ nʉm, Ẽwandamauta mʉ mʉig wai sim maach peerdʉajem iek jaaumkhĩir. Mamʉ ãaur khʉʉnau chan chadcha jaaum khõsi khabamta juau ogthompaita Cristo iek jaau nʉm, sĩi õrag amachta chi ajapcharam khʉʉnau amkhĩirpai, magʉm gaaimua mʉg mʉ cárcel deg chirʉm awia warag kha oneg chukhu amkhĩir.  
\v 18 Mamʉ mʉ gaai mas khaba sim jãga amau jaau nʉ. Mʉrʉgan thum ich agjöpai sim; jaaumapha jaauwiajã ichiita amau Cristo iekta jaau nʉm. Mag gaaimua mʉchpa onee chirʉm. 
\p Mamʉ warag mʉ oneecha aju,  
\v 19 pãrau jãg mʉ kõit jëeu durrum dʉ̈i Ẽwandam Akhaar maach Pör Jesús khaigpër autarrauta mʉchjã ĩchab eeg oo sim khaphʉ chiraawai. Mag pãrau jëeu nʉm dʉ̈i Ẽwandam Akharau mʉ eeg oo sĩewai mʉigmuajã mʉ ʉ̈u öbërju.  
\v 20 Mamʉ dëgölp mʉ pöd öbërba ich mʉg cárcel degpai thõowiajã mʉ gaai mas khaba sim. Sĩi mua ʉ̈rcha khõsi chirʉmʉn mʉgau: Cristo dʉ̈ita ag na mʉch chiraajemjö ubʉ chitam khõsi chirʉm, thethemnaan na i kõit iekhaawaijã inag chukhu iekhaag, mʉch mag chirʉm oowia õrau warag Cristota thö iyʉ̈ʉ amkhĩir. Amau chadcha Cristota mag thö iekhamʉn, amau mʉ thõopʉ̈iwiajã, monakha öbër nʉm dʉ̈i ãba chirʉm.  
\v 21 Ʉ̈u monakha öbërkhiinjã, ãba Cristo iek jaau nʉm gaaipaita pʉʉrba chitaju; mʉ thõobpʉ̈ikhiin chará ajapcha sim, warre ich Cristo dʉ̈ichata chiraimaju aawai.  
\v 22 Mamʉ ʉ̈u chig aba öbërnaa mʉg jẽb gaai maach Pör Cristoou warag ich iek ʉ̈khapimkhĩir i athee õor jʉrju aai chirʉm amʉn, mag chan mua jaauju khaugba chirʉm khan ata jaauju khai irig.  
\v 23 Khar jãguata warag thoophem numijã am khõsi aadeejem: thoophem ãb Cristo aar chiranaa, thoophem ãbmua warag i iek jaau chitaag. Mua khĩirjuawai Cristoou ich aarta mʉ aukhiin chadcha mʉ ajapcha akham.  
\v 24 Mamʉ mua khaphʉ chirʉm ĩchab, pãar gaaimua idëu mʉ ich jãg mʉg jẽb gaai chitaju aai chirʉm.  
\v 25 Mag pãrau mʉch ig nʉm khaphʉ chiraawai mʉʉgwaiwe chan Ẽwandamau ʉdʉʉr amag mʉch thõopibajujã khaphʉ chirʉm. Mʉʉn pãar ee maach Ẽwandam iek jaau chitaju, warag pãar ubʉ paaukhamam dʉ̈i oneecha wënʉrramkhĩir.  
\v 26 Mag Cristoou mʉ pãach aar monakha baarpibarm oobaawai pãrau onee nʉm iekhau, “Cristo, ʉ̈uta pua jãg deeu i waibëewia maar ee pʉ iekdam jaau khëraichëm” aju. 
\s1 Maadëu jãga aju aai nʉ Cristo igar khaba nʉm khʉʉn dʉ̈i 
\p  
\v 27 Mʉʉn mau pãar warp chirab mamʉ, muan pãragan sĩita Cristoou maachig wënʉrrapi jaau simjöta thum i ipierraa wënʉrrapim khõsi chirʉm. Maagwai pöd mʉch pãar aar barba awiajã, warppaimua khãijã agtha pãach thumwe Cristo dʉ̈i ubʉnaa maach peerdʉajem iek jawaagjã ö ãba nʉm anʉmta mua ũrm khõsi chirʉm.  
\v 28 Ar maach igar khaba nʉm khʉʉnau pãach dʉ̈i amachdëu ampierr awiajã oob ögkhamiet. Pãrau magmʉn magan magʉm oowiata jũrr ewag khĩirjuwia amau ãsie, “Mʉkhʉʉnaun chadcha nem jaau nʉm paarta maadëu am dʉ̈i jãg nʉm, jãgan Ẽwandamau jãkhʉʉnta peerdʉ auwia maachta isegju” a khĩirjuju. Mamʉ mag awiajã, ich Ẽwandamauta ʉdʉraa magpi sĩewai  
\v 29 oob ögkhamiet. Maadëun Cristo iek gaai ʉ̈kha nʉisiewaita irig ʉ̈u ajim aajem; mamʉ agjö i iek jaau wënʉrrʉm gaaimua chikhamnau maach khaibag waauwaijã ĩchab irig ʉ̈u ajim aju aai nʉm.  
\v 30 Pãrau khaphʉ nʉm, mʉg maach peerdʉajem iek jaau wënʉrrʉm gaaimua õrau maach igar khaba nʉm. Pãrau pãach daúa oojeejim, jãga aajeejĩ mʉ jam pãar dʉ̈i chiraawai; ĩsjã pãrau ũr nʉm, jam pãar dʉ̈i nʉmjöta mau mʉ dʉ̈ijã thʉnʉm. 
\c 2  
\s1 Jãga aju aai nʉ maachjö Cristo iek ʉ̈kha nʉm khʉʉn dʉ̈i 
\p  
\v 1 Chadcha pãar gaaimua mʉ onee chirʉm, Cristoouta pãar khĩir onee api sĩewai. Ʉ̈u iruata pãar khõsinaa pãar khĩir jãsenkhaajem. Pãach thumaam khʉʉnau ãbam Ẽwandam Akhaarpai wai wënʉrrʉm gaaimua khod ãbamjö naawai ʉ̈u pãar chikham daupiinaa dau aug khaug paraajã aajem. Magua mʉ onee chirʉm.  
\v 2 Mamʉ pãrau mʉ oneecha apim khõsi nʉm khai, thumaa ö ãbata abat, jũrr chikham ichaaurjã aba, agdaujö chikham kha khõsi, nem wawaagjã chipar chipar khaba, ãbam khĩirjugpai paraa.  
\v 3 Pãachdëupaijã pãach thönaa bigaaum khʉʉnagjã sĩi pãach ëugar ajapha ig iyʉ̈ʉ amkhĩirpai chan oob warag nem waumiet. Mag khãyau warag chikhamnaan igwiata, “Jãkhʉʉnan chad maar khãaijã ʉ̈rpai naabma” abat.  
\v 4 Nemdam waauwaijã oob pãrau pãach atheepaita nem thumaa khĩirjumiet. Magju khãai ĩchab dich khapeen dʉ̈ijã ö ajapha ajuuta khĩirjubat. 
\p  
\v 5 Muan pãragjã, “Khĩirjug ajaphata paraa abat” a chirʉm, Cristoou khĩirjuajerrjö. 
\q1  
\v 6 Í ĩchab Ẽwandam aawai ich Aai dʉ̈i ãba sĩejim, iwiir ãbjã ʉ̈rʉʉ khaba. 
\q1 Mag sĩejieb mamʉ, ich mag ich Aai dʉ̈i ãba sĩerram khõchgau irua ich khãidu ogdʉ pʉamaphajã khabajim. 
\q1  
\v 7 Mag khãyau mag Ẽwandamkha sĩerrta, ich ajaugjã igba mʉg jẽb gaai bëewia, parhoobam chaaidamjö thaabachëwia, jũrr wounkha sĩeichëjim. 
\q1 Mag, sĩi ich Ayag ich ʉdʉraa phẽethʉgpinaa õor ee Ẽwandam chogkhaan bëejim. 
\q1  
\v 8 Mag wounag pawia, wounaan ee sĩeichëwia, sĩi chikhamnaanagta ʉdʉraa ich dʉ̈i amachdëu ampierr apijim. 
\q1 Mag Ẽwandam ipierraa am khõchgau sĩi õor thõomie arrjö ʉdʉraa pakuls gaai ich meerphë thõopijim. 
\q1  
\v 9 Mamʉ magtarr jũrr Ẽwandamau irig ichta thumaam khʉʉn khãai ʉ̈rpai apiwia ichta tagam khʉʉn khãaijã ajapcharam gaai thʉ̈rjim. 
\q1  
\v 10 Maagwai thumaam khʉʉnau Jesús khĩirpheeta jĩepöröu phõbkhakha aju: ötarr khʉʉnaupa ʉ̈gtharm magwe mʉg jẽb gaaim khʉʉnaujã agjö. 
\q1  
\v 11 Mag nʉmua thumaam khʉʉnau i khaphʉ amach meukhĩraucha irig, “Jesucristo, pʉchta chadcha thumaam khʉʉn Pöröu; pʉchdëuta nem thum khap chirʉm” a iekhamam gaaimua, ĩchab ich Ẽwandam chi Aaipata mag thö iekhaju. 
\s1 Jãga wënʉrraju aai nʉ Ẽwandam iek ʉ̈khabam khʉʉn ee 
\p  
\v 12 Cristo gaaimua khodamnaan, mua pãar daupii chitʉm. Mua khĩircha pãachig Ẽwandam iek jaau chitaawai pãachdëu mʉ ipierraa narrjö, magan mʉ mau warp chirʉmjã igba warag ich jãg ʉ̈khanaat. Maach Ẽwandam na nem khaigba wauju ökhö sĩi maach peerdʉajem iekta warag pãach ee ʉ̈rpai apiju ẽkhabat, mag wënʉrrʉmua ubʉ paaukhamaag.  
\v 13 Magaag athee ich Ẽwandamauta ich khõchagpierr pãrag mag nem waupim khõsi api sĩewai ichdëuta pãar juagjã oojem. 
\p  
\v 14 Mag pãachig nem waupi sim waauwaijã, warag onee pãach wir aig chipar chiparjã aba, khĩuta waubat,  
\v 15 daumaa ãbmuajã pãachig iekhapiju chukhu, mʉg õor khaibag thʉnʉm ee khaibagjã chukhu Ẽwandam chaainkha wënʉrramkhĩir. Pãar magta wënʉrrʉmʉn, magan mʉg durr ich pekau pömgau edau khĩejö sim eejã pãar edjã ee phĩdag phuphup thʉnʉmjöta wënʉrraju am ee,  
\v 16 jãga Ẽwandamau maach thãar chi iiurig paapäaijẽ a jaau wënʉrrʉm gaaimua. Maagwai Cristo bëem edjã mʉchpa pãar gaaimua onee chiraju, mʉch par phidkhaba abarm khaphʉ chiraawai.  
\v 17 Mua pãrag Ẽwandam iek jaautarr gaaimua, ʉ̈u pãrau ãba irua nem khõsimta wau wënʉrrʉm. Maagwai ich ag iek gaaimuapai amau mʉ thõoju akhiinjã, bʉ̈ʉrjã machagjã igba ʉdʉraa mua mʉch thõopiju. Magbarmua muajã pãrau nem wau nʉmjö, ichdëu khõsim nemta mʉchdëujã wau chirʉm khaphʉ chiraawai, mag mʉ thõokhiinjã mʉrʉgan ʉ̈u khërʉm.  
\v 18 Maagwai mʉ mag thõkhiinjã mʉʉn mʉchin onee chirʉm. Oob ökhĩirjuu amiet. Mag khãyau eeu dëgölp mʉ magwiajã pãachta warag oneeta abat. 
\s1 Timoteo Epafrodito dʉ̈i 
\p  
\v 19 Maach Pör Jesuu khõs amʉn, mʉigmua jöpcha mua pãar aar Timoteo pʉ̈iju, pãar oon mamkhĩir, mag pãar oothurwia pãar jãga nʉ a jaaubaicheewai mʉchjã onee chiraag.  
\v 20 Mʉchdëu pãar khĩirju chirʉm dʉ̈i tag i dënjö pãar khĩirju nʉm khʉʉn chukhu aawai, Timoteota mua pãar aar pʉ̈iju. Jãgdamauta chadcha pãar ʉ̈u wënʉrramkhĩirjã ich khod ãbam khʉʉn atheemjö aajem.  
\v 21 Tagam khʉʉnan sĩi amach wir aigpaita khĩirjuajerram. Mamʉ mag sĩsidʉm Jesucristo athee nem wauju khĩirjug chan bʉ̈ʉrjã khĩirjubamjöta aajerram.  
\v 22 Mamʉ pãrau khaphʉ nʉm, í warm khʉʉnjö khaba khitʉm. Maar ãba phidkha wënʉrraajeewaijã, iruata chadcha ich aaijö bʉ̈ʉrjã mʉ bʉ̈ ogdʉba ich mag ãba maar maach peerdʉajem iek jaau wënʉrraajeejim.  
\v 23 Magua, ya amau mʉch sĩi öbeerpʉ̈iju wa thõopʉ̈iju a ajapcha khaphʉ aadeewai iita mua pʉ̈iju a chirʉm, pãar oon mamkhĩir.  
\v 24 Mamʉ maach Pör Cristoou mʉigmua mʉch ʉ̈u öbeerpʉ̈iwia mʉchdëujã jöphëe pãar oon maju khaphʉ chiraawai mʉch chan mua ajappai khĩirjuba chirʉm. 
\p  
\v 25 Mamʉ ichiita mʉʉgwaiwe mua deeu pãar aar maach khod Epafrodito pʉ̈iju. Pãrau mʉ juag oomkhĩirta i pʉ̈itarr aawai chadcha irua ʉ̈u mʉ ipierr maach Pör Cristo iekjã jaau wai khitanaa woun atheemjö ag kõitjã warag khaigpër iekha khitaajem.  
\v 26 I iek ya irua pãar thumaa oom khõchag chirʉm aajem. Ichdëu maumua ũurwai, mag i mor machpatarr pãachdëu ũrtarr gaaimua pãrau i khĩirju nʉm anaawai, ichdëujã ĩchab pãar khĩirju sim.  
\v 27 Chi mor mas aan iin chadcha mor machpawia peer meejim. Mamʉ Ẽwandamau ʉ̈u i eeg oowia monaaupʉ̈ijim. Maata Ẽwandamau mag i eeg ooba ʉdʉraa meepimuan, mʉʉn ökhĩirjug pöoma chirsikham. Mamʉ ʉ̈u i monaau atham gaaimua Jöoirau mʉchpata eeg oojim, mag i bʉ̈ ʉʉakharr oowia gaai machag chirarr warag atcha ökhĩirjug pöm apimaaugau.  
\v 28 Mag i mor mas sĩerr gaaimua pãrau i khĩirju nʉm mʉchdëujã khaphʉ chiraawai, jöpkhaa pãar aar i pʉ̈im khõchag chirʉm, í deeu monakha barbaimam oobaawai deeu pãachjã thumaa onee amkhĩir. Ya mag í ʉ̈u barbaimaawai mʉchjã tag ökhĩirjug chukhu chirsiju ĩchab.  
\v 29 Mua i pʉ̈ibaawai, chadcha maach Pör Jesucristo gaaimua maach dʉ̈i khod ãbamjö naawai, onee pãach ee i baarpi athat. Maimua jãgjöm khʉʉn wounaan pãach ee baarwai ĩchab wajapha i dʉ̈i nʉmjö abat mag dʉ̈ijã.  
\v 30 Chadcha ichdëupaita peer ich khĩrau ich thõopijim, Cristoou nem waupi jaau sim ipierraa am khõchgau. Maimua ĩchab pãrau pãachdëucha mʉ juag oom khõsi durrumta warp nʉm gaaimua pöd ooba aawai, jũrr ichdëuta garpapa am khõchgau peer meebarm mʉ gaaimua. Maguata muan pãrag onee pãach ee i baarpi athat a chirʉm. 
\c 3  
\p  
\v 1 Jesucristo gaaimua khodamnaan, pãar maach Pör Jesucristo dʉ̈i naawai deeu pʉaba onee abat a chirʉm. 
\s1 Nem wau nʉm gaaimuapai chan pöd dich peerdʉ aubam 
\p Cha mua phã deepäaigpam iekhan nawe mʉchdëu pãrag phã deepʉ̈itarr iekpaiu. Mamʉ mʉchigpain ʉ̈u khërʉm, mag ich ãbam iekpai awiajã. Ichiita pãar athee nem ajaug sim, chikhamnag ʉdʉʉr pãach khũgurpimaaugau.  
\v 2 Mag mua jaaupʉ̈yaagpamʉn mʉgau: Khĩir khaphʉ abat, ar ichkhumjö nem sëunem nem khaigbamta jaau sĩerrjëem khʉʉn dʉ̈i. Jãkhʉʉnan sĩi amach mor ãrmienau. Amag chan ar dich wir aigpai am dënjö dich khakhua dauchachba nʉm khʉʉn chan Ẽwandam chaain khabam aajem.  
\v 3 Mamʉ par amach iphithur mag wënʉrrawiajã oob am ipierraa amiet. Maach mor ʉ̈rpain idëu sĩi dauchach paar sĩsid awiajã, maach thãarta khaigba sim chan parta i chaainau aju. Mag khãai maachin chad i chaain chaarpama, chadcha ich Ẽwandam Akharau jaau simjö thãraucha irig jëeujeewai. Mag jëeu wënʉrrʉmuata maach onee naajem, Jesucristo maach kõit meebarm gaaimua Ẽwandamau maach ich chaainkha wai sĩewai.  
\v 4 Mamʉ ãaur khʉʉnau chan magba nʉmta sĩi aman chadau õor ajapham khʉʉnau a jaau nʉrrjëe aajem. Amagan sĩi dich mor dauchachnaa nem ajapham wau nʉmuata Ẽwandamau maach ich aar aaujem aajem. Mamʉ chadcha magʉm gaaimuata maach ʉ̈gthar öbeerjeekhiin, magan mʉʉta am khãaijã ëntërcha öbërju.  
\v 5 ¿Khan jãgwia magkhajĩ? Ũrbat, pãrag jaaukhim: Mʉ dënnaanan amach numwe judionaan chaar ajierram, warrgar maach jöoin Benjamín khararr ag chaain ewagam khʉʉn dën. Bʉ̈ʉrjã amach jöoin i pʉaba wënʉrrarr aawai, mʉjã ich mag bãaupʉ̈ijierram. Bʉ̈rʉʉwe autarr agtha ocho diaspai chirʉm ee, warr jöoinau jaaujerrjö mʉ mehëudam phʉʉrbichpʉ̈ijierram. Maagwai mʉjã agtha mʉch thʉ̈r okhooba, judío charau. Mʉʉn ĩchab fariseo ajim, Ẽwandamau Moiseeg ich iek phãpitarr iek ajapcha ʉʉrkhaajem khʉʉn eem.  
\v 6 Mag Moiseeu phã pʉatarr iek mʉchdëuta mʉch khapeen khãaijã ajapcha ʉʉrkhaajerr aawaita jũrr Cristo iek ʉ̈kha nʉm khʉʉn ẽudeejã mua ẽkhaajeejim, am khaibag wawaag. Mag Moisés iek mʉchdëu ajapha ʉʉrkha chitarr gaaimua, ni ãbmuajã mʉ igwia mʉ ëugar khaigba nem ĩgkhaba aajeejim. 
\p  
\v 7 Ich mag jaar mʉchdëu khĩirjuawai magʉm thum ajaphamjö khaphʉ chitarr chan ĩs jũrr bʉ̈ʉrjã maadëu nem igbata sĩsidʉm.  
\v 8 Warran mʉʉn chadcha magʉmʉg ee chitajim. Mamʉ maagjerr ĩsin jũrr mʉʉn Jesucristo dënëu. Iita mʉ Pöröu. Tag ijö nem ajapham chan chukhum. Ʉ̈gthar öbëraag awi warrgar mʉchdëu nem wau chitarr, ĩs mʉgnaa oowai chan bʉ̈ʉrjã maadëu nem igbata sĩsidʉm. Ajapcharan sĩi mag mʉch khõchagpierr nem wau chitarr thum mua isegjim, jũrr Cristo dënkham khõchgau.  
\v 9 Mʉʉn ĩsin Cristo dʉ̈ita chirʉm. Mua mag chirʉm chan, mag sĩi mʉchta ajaug chirʉm awia khaba, ni Ẽwandamau ich iek Moiseeg phãpitarr iek mʉchdëuta ajapcha ʉʉrkha chitʉm awiajã khabam. Mua mag chirʉmʉn, Cristo iek thãraucha ʉ̈khabarm gaaimua Ẽwandamau mua nem khaigba wautarr thum chugpaabapäaiwaita mag chirʉm. Dichdëu nem wajapha wau nʉm gaaimuapai chan pöd dich peerdʉ aubam. Magju khãai Cristo jua eeta ich akhaardam joothʉ sĩubarm wounan chadau thãar ajapha chirsim aajem Ẽwandamau.  
\v 10 Muan Ẽwandamagta warag mʉchig ajapcha Cristo khaphʉ apim khõsinaa ĩchab Cristo iiupi autarr ag jua theegta mʉchig deepim khõsi chirʉm; magbaawai mua i dënjö gaai machag ãwatju aainaa ĩchab ijö thõju akhiinjã, warag thãar phĩiuwia khĩirjuba thõog.  
\v 11 Mua khaphʉ chirʉm, mʉ mag aphʉʉ akhiinjã, ichiita Ẽwandamau mʉ akhaardam mag jẽbdeg sĩepiba ich aar auju. 
\s1 Cristoou ichjö ajapha amkhĩirta maachig jaau sim 
\p  
\v 12 Mua mag chirʉm chan, mag ya mʉchdëu thum jaau dichdimamjö mʉchta ajapcha chirʉm aba chirʉm. Mʉg chirʉm aiguin mʉʉn agtha ajapha aju pöoma waaur chirʉm. Mag chirab mamʉ ajapha ajuuta ẽkha chirʉm. Cristoou ichjö amkhĩirta ichdëuta nacha mʉ jʉr autarr aawai agjö ãba ag khĩirjugta ogdʉba wai chitʉmua jũrr ich simjö ajapha ajuuta ẽkha chirʉm.  
\v 13 Keena, Cristo gaaimua khodamnaan, mua chan pãrag, “Ya mʉʉn ĩsin chadau mʉchdëu ig chirarrjö ajapha chirsim” aba chirʉm, agtha thum Cristoou jaau simjö khaba chiraawai. Mag agtha ajapcha khaba chirab mamʉ, ya warrgar mʉchdëu nem waaujerr chan tag khĩirjuba chitʉm. Magju khãai mʉ khĩirjugan, ãba khanta mua Cristo athee waubaawai i dawagaa abarju khai anaa irua nem khõsimpaita wauju khĩirju chitʉm.  
\v 14 Maagwai mʉg atag ya ich sim aarcha barbaimaawai mʉchdëu mag ich dawagaa nem wau chitarr jũrr Ẽwandamau mʉ dʉ̈i ajaphanaa ich dʉ̈i ich mag mʉ wai nʉrraju. Mamʉ mag maach ʉ̈gthar öbërju ayaa amkhĩir Jesucristo meebamua chan ãbjã Ẽwandamau auba aajeekham. 
\p  
\v 15 Maguata pãarjã ar mʉ dënjö Ẽwandam iek ajapha khaphʉ nʉm khʉʉnan magta khĩirjuju aai nʉm. Mamʉ ãbmua khãijã pãar ee ich ajaug phëwia ya iin thum ajapha chiraawai ich ajaug paapäaig chan tag nem ajapham wauju igba chirʉm amʉn, ich Ẽwandamau ĩchab irig mʉg jẽb gaaiwe chan agtha i thum ajapcha khaba sim a khap apiju.  
\v 16 Mamʉ mua mag chirʉm: Maadëu dichdëu nem khaugtarrpierr khĩirjunaata nem wauju awijã jaauju aai nʉm, bʉ̈ʉrjã khaugbam khʉʉn dënjö nem parhoob wauba. 
\p  
\v 17 Khodamnaan, pãrau mʉ jua eerpanaa mʉ dënjöta abat. Magnaa ĩchab pãar ee maach wënʉrraajerrjö wënʉrraajem khʉʉn oonaa agjö ajaphata nʉrrjëe abat.  
\v 18 Mʉchdëu nawe pãachig jaaujem iekpai ĩsjã deeu pãrag jaaukhim: Õor khapan ar maach ee ʉ̈kha nʉm ʉ̈kha nʉm aajem khʉʉn thum chan chadcha chi ʉ̈khaajem khʉʉn chaar khabam. Jãkhʉʉnan jãg amach parhoob wënʉrrʉm gaaimua sĩi dau theeg chukhumjöta thʉnʉm. Amagan sĩi parta Cristo pakuls gaai thõtarrjö aajem. Ar mag khĩirju nʉm khʉʉn oowaita thãar eepain bĩe chiraajem.  
\v 19 Jãgʉm khʉʉnaun sĩi parhooba amach ö khõchagpierr nem wau nʉmta, ajaug ʉ̈rpai sĩsidʉm aajem. Mag nem khaigba wau nʉm awia chigaa ajöjöopaijã khaba, warag amachta thö iyʉ̈ʉ aajerram. Amau ãba mʉg jẽb gayam nempaita khĩirju nʉm. Mamʉ magʉm paar Ẽwandamau khĩmie durrta am barkhʉʉipʉ̈iju, ich mag dau aphʉʉ wënʉrramkhĩir.  
\v 20 Mamʉ maachta ʉ̈gtharmpeen khaju khʉʉn aawai maach durran ʉ̈gthariu. Maagwai pöd warm khʉʉnjö mʉg jẽb gaaim nempaita khĩirjuju aju khaba nʉm. Maachin ãba maach Pör Jesucristo maach peerdʉ autarr ʉ̈gtharmua bëeta oo nʉm.  
\v 21 Mag ich pierrum edta ichdëucha ich iiu aawai maach mor mʉg maadëu nem igmap simjã ich dënjö ajaug paapʉ̈iju. Nem thum thʉnʉmjã ichdëuta ichdëu ampierr aju aai sĩerraawai ich ag juapaaupai irua chadcha sĩi maach ëu meebpʉ̈imjö aju. 
\c 4  
\s1 Cristo iek ʉ̈kha naawai oneeta wënʉrraju aai nʉm 
\p  
\v 1 Khodamnaan, mua pãar jãsenenaa pãar khõsi chitaawai pãar oon mam khõchaaga chiraajem. Ajapcharan pãar gaaimuata mʉʉn onee chiraajem. Mua khaphʉ chirʉm, pãrau chadcha maach peerdʉajem iek ʉ̈khatarr aawai par mʉ phidkhabajim. Jãg pãarta mua khajapham nemjö Cristo athee gan autarr gaaimua mʉ onee chirʉm. Maagwai ich mʉg ẽsap gaai thum mʉchdëu pãrag jaau chirʉmjö ich jãg ubʉ nʉisit, ʉdʉraa maach Pör Jesucristoogta pãach juag oopi nʉmua. 
\p  
\v 2 Mʉch ʉ̈phʉʉin khʉ ãbam khʉʉnagamjö mua mag chirʉm, Evodiaag, maimua Sintiqueegjã agjö: Chadcha maach Pör Jesucristo kharannaanjö khõinaa nʉisit, ichdëu api simjö.  
\v 3 Maimua pʉjã, mʉch khapeer ajapham, ĩchab maach peerdʉajem iek eemua bʉ̈ʉrjã ogdʉba nʉrraajeewai pʉrʉgjã jãkhʉʉn ʉʉin wawibá a chirʉm, tag ich jãg wënʉrram ugua. Mua õor ee maach peerdʉajem iek jaau chitaawai jãkhʉʉn ʉʉinauta Clemente dʉ̈imua tagam khʉʉn agjö mʉ dʉ̈i ãba wënʉrrarr khʉʉnpa mʉ bʉ̈ ogdʉba dʉ̈i mʉ ipierr jaau durraajeejim. Mag mʉ dʉ̈i wënʉrrarr khʉʉn thʉ̈r ya ʉ̈gthar Ẽwandamau ichdëu peerdʉ aumam khʉʉn thʉ̈r phãkhamaajem ẽsap gaai ĩchab phãkha thʉnʉm. 
\p  
\v 4 Maach Pör Jesucristo pãach dʉ̈i sĩejem khĩirjuwia onee abat. Ũmaai pʉaba pãrag jaau chirʉm: ¡Onee abat!  
\v 5 Maach Pör Cristo ya bëeimʉʉ sim khaphʉ, õor dakhĩir agpierraata wënʉrrathʉ̈; pãach khapeenjã chig aba, sĩi warag chikham dau aug khaug paraata abat.  
\v 6 Pãach phithurg waauwai oob ökhĩirjuu amiet. Mag khãyau warag mag pãach phithurg au wënʉrrʉm thum Ẽwandamagta jaaubapʉ̈it, irig jëeumamua. Mamʉ mag jëeumamua ĩchab pãach iek ũurjem paarjã irig ʉ̈u ajim abat.  
\v 7 Pãrau cha mua jaau chirʉmjöta amʉn, magan Ẽwandamau pãar ökhĩirjug meeupiju. Pãar Jesucristo dʉ̈i naawai phithurg auwiajã ĩchab ichdëuta pãar khõinaa wënʉrrapiju. Mag pãar khõinaa wënʉrrʉm chi ʉ̈khaba nʉm khʉʉnau pöd khaugba aajem, jãgata pãar mag nʉisip nʉ. 
\s1 Õrau oowai ʉ̈u ajöjöom nemta wauju aai nʉm 
\p  
\v 8 Khodamnaan, ãbmiecha paawai mua pãrag magkhim: Õrau ajapha pãach ëugar ig iyʉ̈ʉ amkhĩir, thumaam khʉʉn dakhĩir bʉ̈ʉrjã sëu chukhu ãba chadam iekpai iekhajuuta khĩirjubat. Ĩchab jãgata Ẽwandam dau najã nem ajapha waujuuta ãba khĩirjubat, pekau wauju khĩirjugjã chukhu. Magnaa khĩirjug paraa aajeethʉ̈ ĩchab, jãga abarm gaaimuata õrag pãach daupii apiju nʉ, bʉ̈ʉrjã pãach ëugar ĩgkhaju khʉʉn chukhu aag. Mua thum pãrag mag chirʉmʉn mʉgau: Pãachdëu nem wau nʉm oowia õrau amach ödegpai khãijã, jãgan chadcha ʉ̈u khërʉm ajöjöom nemta ãba wauju khĩirjubat.  
\v 9 Pãrau pãachdëujã khaphʉ nʉm mua pãar ee maach Ẽwandam iek jaaubaimaawai pãachdëu ʉ̈khatarr. Thumaam khʉʉnau mʉ iekha chitʉm ũrwia mʉ oojierram, jãga mʉ pãar ee chitajĩ. Ich jãg mʉ pãar ee phʉʉrdʉ chitʉmua nem wau chitʉm oojerr thumaa pãachdëujã mʉ dënjö abat. Pãar mag wënʉrrʉmʉn, magan ich Ẽwandam maach khõinaa apiejemchata pãar dʉ̈i nʉrraju. 
\s1 Ichig phatkhon deepʉ̈itarr paar Pabloou ʉ̈u ajim atarr 
\p  
\v 10 Maach Pör Jesucristoog ʉ̈u ajim a chirʉm, deeu pãrau mʉg mʉch dau ee aug khaugbarm paar. Chadcha pãrau agtha ʉ̈u mʉch khĩirju durrum khaphʉ chiraawai mʉ onee chirʉm. Mag chirʉm aig chan mag pãrau ya tag mʉ igba naajim aba chirʉm. Mua khaphʉ chirʉm, pãrau mʉ juag oom khõsi durrumta, sĩi wir aiguimjö khaba aawai, pöd nawe mʉ juag ooba naajim.  
\v 11 Mag chirʉm aig chan mag sĩi mʉch dau aphʉʉ chiraawai pãrau mʉchig nem dedee amkhĩirjã khabata mag iekha chirʉm. Mʉʉn mʉg chitʉmʉn, parhooba nemdam bʉ̈rʉʉm dʉ̈i awiajã magʉm aba chitʉm.  
\v 12 Mʉʉn ya parhoobata khaugwi chitʉm. Bʉ̈ʉrjã mʉchdëu nem ig chirʉm chukhu chirʉm aigjã nem khĩir thum paraamjö chiraajem. Jãsöo chirʉm aigjã biwaa chirʉm dʉ̈i ãba chitʉm. Khar mʉchdëu nem ig chirʉm atcha sob wai chiraajem; wa khar magbaju, jũrr bʉ̈ʉrjã chukhu chirʉm awiajã ökhĩirjuu oo chiraa khaugba chitʉm.  
\v 13 Mua chan mʉch dau aphʉʉ chitajujã khĩirjuba chitʉm, magʉm ãwat chitaagjã ich Cristoouta mʉrʉg juapá deejeewai.  
\v 14 Mag ab mamʉ, pãrau mʉ juag ooju aai khaba naajimjã aba chirʉm. Ante ʉ̈uta pãrau mʉ juag oob khaba oojierram. 
\p  
\v 15 Filipopien, pãrau pãachdëujã khaphʉ nʉm, ar mʉ pãar ee Macedonia durr Ẽwandam iek jaau phʉʉrdʉ chitawia jũrr deeum durr jaau chiraimaawaijã, maach khodnaan tagam khʉʉnau deepʉ̈iba nʉm ee, ãba pãraupaita pãachdëu Ẽwandam iek ʉ̈u khaugtarr paar awi mʉrʉg phatkhonjã deepʉ̈ijierram.  
\v 16 Ag najã agtha Tesalónica chiraawai, pãachdëuta kharii ʉ̈u mʉrʉg phatkhondam mʉch nemdam ig chirʉm athee deepʉ̈i nʉm mua aaujeejim.  
\v 17 Ãba sĩi pãar jua eem nem aum khõchgaupaijã khabata mʉ mag iekha chirʉm. Mua ʉ̈rcha khõsi chirʉmʉn, ĩchab pãrau mʉrʉg nem dee nʉm paarjã jũrr ich Ẽwandamauta pãrag ag khãyau nem ajapcharamta deepim khõsi chirʉm. 
\p  
\v 18 Ʉ̈u ajim keena. Ar pãrau mʉ athee Epafrodito gaau phatkhon deepʉ̈itarr thum ʉ̈u agcha khërajim. Ajapcharan mʉchdëu ig chirarr khãyaujã ʉ̈rʉʉchata pãrau deepʉ̈ijierram. Jãg pãrau mʉrʉg phatkhondam deepʉ̈itarran Ẽwandamau oowaijã ʉ̈u khërʉm, ichigchata deebarmjö aawai.  
\v 19 Jãg nʉm jũrran, pãachdëu nem ig nʉmpierr maach Ẽwandamau pãrag ichdëu nem thum jʉ̈a sim eem bʉ̈ʉrjã ĩgkhaba, deeb khaba deeju, pãar Jesucristo dënkhanaa i iek ʉ̈kha naawai. 
\p  
\v 20 Ichpaita maach Aai anaa maach Ẽwandamau. Ijöm khʉʉn chan tag chukhum. Maagwai irigpaita thumaam khʉʉnau mʉg atag pawiajã ich mag ʉ̈u ajim aju aai nʉm. 
\s1 Pabloou amach saluddam deepi jaautarr 
\p  
\v 21 Jesucristo gaaimua thum Ẽwandam chaainkha thʉnʉm khʉʉnag mua salud deepʉ̈i chirʉm abat. Ĩchab maach khodnaan mʉig cárcel deg ʉ̈iba mʉ oo khʉrrkhaajem khʉʉnaujã pãrag salud deepʉ̈i nʉm.  
\v 22 Maimua tagam khʉʉn thum mʉig agjö Ẽwandam iek ʉ̈kha durrum khʉʉnaujã amach thumaam khʉʉnau pãrag salud aajem. Mamʉ ʉ̈rcha pãrag salud deepʉ̈i nʉmʉn, Jesucristo gaaimua maach khodnaan mʉg Roma durram rey deg phidkhaajem khʉʉnauta pãrag salud deepʉ̈i nʉm. 
\p  
\v 23 Mʉgdampai ajim keena, mʉg ẽsap gaai pãrag jaaupʉ̈im ig chirarr. Pãar kõit maach Pör Jesucristoog jëeu chirʉm, ichdëuta pãar dʉ̈i ogdʉba ich mag pãar ʉ̈uu wai nʉrramkhĩir. Ayoo keena, 
\cls Pablo