\id EPH - Waunan (Woun Meu) NT (alternate orthography) -Colombia 2011 (DBL -2013) 
\h EFESIOS 
\toc1 Pabloou Efesopienag ẽsap phã deepʉ̈itarr 
\toc2 Efesios 
\toc3 Ef 
\mt1 EFESIOS 
\mt2 Pabloou Efesopienag ẽsap phã deepʉ̈itarr 
\ip \bd Chi phãtarr.\bd* Pabloou carta jayap phãjim aajem Roma phöbör ee cárcel deg simua: chamʉg Efesopienag deepʉ̈itarr, Filipopienag deepʉ̈itarr, Colosapienag deepʉ̈itarr, maimua jöoi Filemonag deepʉ̈itarr. 
\ip Biek ãb ich Pabloou mag Efeso phöbör ee judionaanag Ẽwandam iek jaau sĩerr aawai ichdëujã aiguim khʉʉn khaphʉ sĩejim (Hch. 18:18-21). Mag nʉm dʉ̈i Ẽwandam iek jawaag am aar mawi año thãrjupjö ag phöbör ee Cristo iek jaau sĩerr aawai chará ichdëu thum am khaphʉ sĩejim aajem (Hch. 19). 
\ip \bd Chijã khʉʉn atheeta phãjĩ.\bd* Mag jaar provincia de Asia ee Efeso phöbörta chi pömaam ajim aajem. Mag phöbör pömaam aawai õor pöm sĩi mercancia aunaa për nʉmuapaita naajeejim anaabá. Ich ag phöbör eeta am ẽwandam Diana anʉmʉg jëeujem dijã sĩejim aajem (Hch. 19:27). 
\ip Mʉg cartaan Pabloou Efesopien thum chi ʉ̈kha durrum khʉʉn atheeta phãjim aajem, nacha amachdëu ũrwia deeum iglesiaag deebapäaiwai thumaam khʉʉnag ũrmamkhĩir. Mag Efesoom iglesia een judionaan khabam khʉʉnta ʉ̈rcha naajim aajem. 
\ip \bd Khan jawaag ajĩ.\bd* Pabloou ʉ̈rcha mʉg carta phãju khĩirju wai sĩerran, jãga Cristoou judionaan amach meeun khabam khʉʉn dʉ̈ijã õor ãbpaimjöo apʉ̈ijĩ a jawaag ajim (2:13-16). Ajapcharan maach mʉg Cristo iekta ʉ̈khawi i dënkha nʉm khʉʉnan, deeum meu awiajã, thum meu ãbpaimjönaa dö ãbam eem khʉʉnjöta nʉm a jaaupäaig ajim; ajapcharan mag ãbpaimkha nʉmuata Cristo iglesiakha nʉm jawaag. Jãga mag nʉ a jawaag Pabloou mʉgta jaaujim: 
\iq1 (1) Maach thum chi ʉ̈kha nʉm khʉʉnta Cristo morkha nʉm anaabá; maagwai ich jũrr maach Pörkha sim aajem (Cap. 4:15-16). 
\iq1 (2) Maachin di ãbpaim ëu awaag pa khapaana thʉrrp thʉnʉmjöta nʉm anʉm; mamʉ mag dipá pöm thʉnʉm ee ãb sim chi ajapcharam; ma, ich Cristo aajem, chi dihãd jãrram (Caps. 2:20-22, 4:4). 
\iq1 (3) Mag Cristo morkha nʉm aiguin, ʉʉi ich jaai appai oo sĩerrʉmjöta nʉm aajem (Cap 5:22-32). 
\c 1  
\s1 Salud 
\p  
\v 1 Mʉʉn Pabloou, Ẽwandamau khõsi sĩerrjö Jesucristooucha ich i jaaumkhĩir jʉr autarr. Muata pãrag mʉg ẽsap phã deepʉ̈i chirʉm, Efeso phöbör ee Ẽwandam dënkhanaa Jesucristo iek ʉ̈kha nʉm khʉʉnag.  
\v 2 Pãar kõit maach Aai Ẽwandamag jëeu chiraajem ichdëuta maach Pör Jesucristo dʉ̈imua ʉ̈u dʉ̈rrcha pãar eeg oowi pãar khõinaa phë wai naamkhĩir. 
\s1 Cristo dënkha nʉm khʉʉn dʉ̈i Ẽwandamau ajapha aajem 
\p  
\v 3 Muan maach Pör Jesucristo Aaita thö iekhaajem; ajapcharan Ẽwandamma; irigpaita ʉ̈u ajim a chiraajem, chadcha maach dʉ̈i ajapha amkhĩir Cristo pʉ̈itarr paar. Mag maach Cristo dënkha naawaita Ẽwandamau ʉ̈gtharmpeen dʉ̈i aajemjö maach dʉ̈i mʉig eegarwejã ich Akhaar gaaimua ajaphata aajem.  
\v 4 Pari mag maach dʉ̈i ajapha sim chan sĩi eeupemjö khĩirju auwi khaba, warr mʉg jẽb ompaaju nawe Jesucristo gaaimua ich Ẽwandamau ya maach ich dënkha auju khĩirju wai sĩerr aawaita maagjem, ich dau na tag kulpjã chukhu sĩi ich atheepaita ichdëu khõsimjö wënʉrramkhĩir. Mag warrgarwe ich garmua maach khõsi arr aawaita  
\v 5 Jesucristo gaaimua ya maach ich chaainkha aujujã khaphʉ sĩejim, ichdëu maach dʉ̈i am khõsi khĩirju wai sĩerrjö.  
\v 6 Mag gaaimuata chadcha ich mag Ẽwandam ajaug phënaa i thö iekhaajem, mag ich ajaug sĩerrʉm gaaimua ichdëu ich Iewaa daupii aajemta ʉ̈u maach athee pʉ̈itarr aawai.  
\v 7 Maach pekau gaaimua Ẽwandam dʉ̈i iekkhõr pöm narrta, sĩi khajapham dëbpaar phag nʉmjö Jesucristoouta maach daupigau ich bagau maach phag athaawai, ʉ̈u Ẽwandamau maach khaibagjã chugpaawi warre magʉm khĩir okhoopʉ̈ijim.  
\v 8 Pari magpaijã khaba, chadcha ichdëu maach khõsi chirʉm khap amkhĩir, maachig ich khĩirjugjã deewi ʉ̈u magʉmjã khaphʉ wënʉrrʉm.  
\v 9 Ajapcharan ĩchab warr ichdëupai ich thãar ee nem waumaju khaphʉ aajerrta maachig khaphʉ apijim.  
\v 10 Mag ich thãar eepai nem wauju khĩirju wai sĩerran, mʉg atag chadcha ichdëu magju ed paawaita ichdëu khĩirju simjöo aju. Mag edta ich Ẽwandamau õor thum edjã ee nem thʉnʉmpa Cristoog thʉsĩepʉ̈iju, am dʉ̈i jũrr ichdëuta khap amkhĩir. 
\p  
\v 11 Magta agtha maach thaababa nʉwe Ẽwandamau ya maach ich dënkha wai sĩejim, Cristo dʉ̈i khapeerkha nʉisiewai mag nawe ichdëu deeju jaau sĩerrjã ichdëu mag khĩirju wai sĩerrjö chadcha jʉ̈amkhĩir; Ẽwandamaun chadcha ichdëu oowai ajapha aju ayaam nemta wau sĩerrʉm.  
\v 12 Magta maach chi nacha Cristo iek ʉ̈khatarr khʉʉnjã ich dënkha aujim, mag ichdëu maar ich dënkha autarr gaaimua pãar maarjö i iek ʉ̈kha nʉm khʉʉnaujã ich Ẽwandam ajaug khitʉmta thö iekhamkhĩir.  
\v 13 Maguata pãraujã ĩchab chadcha Ẽwandam iek chaar mʉg maach peerdʉajem iek jaau nʉm ũrwi ʉ̈u Cristo iek ʉ̈khabaawai, Ẽwandamau ag nawe ichdëu deeju jaautarrjö pãragjã ĩchab ich Akhaar deejim. Mag ich Akhaar deetarran, pãarjã chadcha ich dënkha wai sim khap amkhĩir ajim.  
\v 14 Mʉʉgwaiwejã ya Cristo gaaimua Ẽwandamau maach ich dënkha wai sĩewai mʉg atag ya ichdëu maach auju ed paawaijã warre ich aarcha maach phë auwi ich dʉ̈ichata wai sĩsiju. Mag chadcha ichdëu maach ich aar phë auju khap amkhĩirta ich Akhaarjã mag maachig deejim. Mag ich garmua maach dʉ̈i magju a simʉn mʉʉgwaiwe ich ajaug thö iekhamkhĩrau. 
\s1 Chi ʉ̈kha nʉm khʉʉn kõit Pabloou Ẽwandamag khĩirjug jëeujerr 
\p  
\v 15 Maguata, chadcha pãrau pãachdëu maach Pör Jesús iek ʉ̈khatarrta agtha ogdʉba thãraucha ʉ̈khanaa thum Ẽwandam õorkha thʉnʉm khʉʉnjã daupii aajem khaphʉ chiraawai,  
\v 16 Ẽwandamag jëeuwaijã pãar jãg nʉm paar irig ʉ̈u ajim ab khaba ʉ̈u ajim a chiraajem.  
\v 17 Ʉ̈u pãrau bʉchkhun Ẽwandam khaphʉ naab mamʉ, warag ʉ̈rʉʉchata i khaphʉnaa jãgata Cristo gaaimua pãar athee nem ajapham pöm waaujẽ a khap apim khõsi chirʉm. Maguata muan maach Pör Jesucristo Ayagta jëeu chiraajem, ajapcharan ich Jöoi ʉ̈gthar chiraajemʉgma, pãrag ich khĩirjug deebarmua magʉm khap amkhĩir.  
\v 18 Mua jëeujem ĩchab Ẽwandamag, ichdëuta warag pãar khĩirjug aarthʉgbapʉ̈imjö amkhĩir; magbaawai mag ya ich aarcha phë athaawai ich dʉ̈icha onee wënʉrraju jaau simjã ajapcha khaphʉnaa, mag ich õorkha thʉnʉm khʉʉnan chadcha peerdʉwi naawai mʉigwejã onee naaju aai nʉm a khaphʉ amkhĩir.  
\v 19 Mag nʉm dʉ̈i ĩchab khap apim khõsi chirʉm, jãga mag Ẽwandam thumaam khʉʉn khãaijã ichta jua theeg sĩerrʉmta maach chi ʉ̈kha nʉm khʉʉn dʉ̈i sĩejẽ.  
\v 20 Ich mag jua theegau khabajieb Ẽwandamau deeu Cristo phiriu auwi ʉ̈gthar ich juachaar garcha thumaam khʉʉn Pörkhamkhĩir juppitarr.  
\v 21 Mag ich juachaar gar juppinaa ichjö jua theeg apibaawai, ichta reinaan thʉnʉm khãaijã ʉ̈rpainaa nem thumaa mʉg jẽb gaai wa edjã ee khãijã mepeenjöm thʉnʉm khãaijã ichta ʉ̈rpai apijim, mʉg atag pawiajã ich mag sĩerramkhĩir.  
\v 22 Magta Ẽwandamau nem thʉnʉm thumaa sĩi ich Iewaa Cristoogta thʉsĩepʉ̈ijim. Magnaa ichta maach chi ʉ̈kha nʉm khʉʉn Pörkhapinaa  
\v 23 maachigta ich Iewaa jũrr, mʉg jẽb gaai ichdëu khõsimjö nem wauju ayaa apijim. Cristoon ich appai simta durrpierr sĩerraawai ãbmuajã jamta i sĩejẽ aju khabam. Mag simta maach chi ʉ̈kha nʉm khʉʉn dʉ̈in ichta chi Pörkha sim. 
\c 2  
\s1 Ẽwandam õor dʉ̈i ajaug khitaawaita maachin ʉ̈u peerdʉajem 
\p  
\v 1 Warran pãran pãachdëu nem khaigba waaujerr gaaimua pöd Ẽwandam aar öbërju khaba naajim, sĩi pãach pekau eepaita narr aawai.  
\v 2 Pãraun sĩi Ẽwandam khaugbam khʉʉnau nem waaujemta waaujeejim, ar mʉig eegarpain ichta ʉ̈rpai sĩerrʉm khõchagpierr, ajapcharan dösãt ipierrma, ichdëuta õragjã warag Ẽwandamau nem khõchkhabamta waupim khõsi aajem ipierr.  
\v 3 Maarjã warran thum ich magta naajim, sĩi dichdëu nem waum khõchagpierr; nem magju abarmʉn parhoobam khĩirjug dich khĩirjug ee bëe nʉmta agpierr waaujeejim, warr thaabaawaijã ich mag pekau eeta thaabatarr khʉʉn aawai. Chadcha maach mag wënʉrrarr gaaimua maran sĩi parhooba tagam khʉʉnjö Ẽwandam jua machag ãwatju aai naajim.  
\v 4 Mamʉ ʉ̈u Ẽwandamau õor thumaam khʉʉn dau aug khaug paraanaa ich garmua õor khõsi khitaawai,  
\v 5 mag maach khaibag gaaimua aubaju ayaa narrta ich jãg ichdëu deeu Cristo phiriu autarrjö maachjã ich aar auwi ich mag Cristo dʉ̈i ãba wënʉrraju khʉʉn khapijim. Mag Ẽwandam õor dʉ̈i ajaug khitʉm gaaimuata maachin ʉ̈u peerdʉwi nʉm.  
\v 6 Ya mag Cristo dʉ̈i ãba ich mag wënʉrraju khʉʉnkha naawai chadcha meewi narrta deeu phiriu autarrjö nʉm dʉ̈i ya ʉ̈gthar ich dʉ̈icha ohoodö nʉmjöta nʉm.  
\v 7 Mag Ẽwandamau maachigta nacha Cristo iek ʉ̈khapiwi ich dënkha autarran, ĩs ewag pawiajã jãga chadcha ichdëu maach khõsi sĩ a khap apinaa, mag Cristo dënkha nʉm gaaimuata chadcha ichjã maach dʉ̈i ajaug khitʉm khap apieg ajim.  
\v 8 Pãran mag Ẽwandam ajaug khitʉm gaaimuata ʉ̈u Cristo iek ʉ̈khawi peerdʉwi nʉm; pari mag nʉm chan sĩi pãach khĩrauta peerdʉju ẽkhatarr gaaimua khaba, ich Ẽwandamau ich garmuata pãar peerdʉ aum khõsi arr aawaita ʉ̈u pãar peerdʉ aujim.  
\v 9 Ẽwandamau maach peerdʉ au nʉm chan dichdëu nem wau nʉm gaaimua khabam, magba akhiin magʉm gaaimuata peerdʉjim a iekhaju.  
\v 10 Mamʉ warrgarwe Ẽwandamau khĩirju wai sĩerrjö ich athee mag nem ajapha wau wënʉrramkhĩirta Cristo gaaimua maach peerdʉ autarr aawai, maadëun chadcha nem ajaphamta wauju aai nʉm; pari majã dich peerdʉ aumkhĩir khaba, sĩi Ẽwandamau mag khõsi sĩewaita mag wauju aai nʉm. 
\s1 Cristo gaaimuata maachin ʉ̈u Ẽwandam dʉ̈i dau parii wënʉrrʉm 
\p  
\v 11 Keena, judionaan khabam khʉʉn, khĩir eyaa abat. Warr pãrau Cristo khaugju naweran, maar meeunau maachta mehëu thʉʉ nʉm awi pãar judionaan khabam khʉʉnan sĩi saak oomjöta aajeejim, maachjö mag dauchach chukhu nʉm awi. Pari mag nʉmʉn maachjã Ẽwandam dakhĩir pãarjö thãar ãkhãrag sĩi maach inaamjö nʉmta maagjeejim. Mamʉ ĩsin, magʉm gaaimuapai Ẽwandamau maach auba aajem khaphʉ naawai, jãg sĩi Ẽwandam dʉ̈i ajapha aag awi jãg maach mor dauchach nʉm chan bʉ̈ʉrjã maadëu igbata sim.  
\v 12 Chadcha warr chan pãrau Cristo khaugba naajim. Maar judionaan eeta Ẽwandamau mag maach peerdʉajem pʉ̈iju jaautarr aawai mag Cristo gaaimuata ich aar maach auju ayaa nʉmjã maraun khaphʉ naajim. Pari mag nʉm ee pãrau chan bʉ̈ʉrjã magʉm khaugba, ni maar jöoin dʉ̈i Ẽwandamau iek deetarrjã khaugba, pãran sĩi deeum meu aawai mag Ẽwandamjã khaugba, ni ichdëu pãach peerdʉ aujujã khaugba sĩi okhoota wënʉrrajim.  
\v 13 Pari ya ĩs chan magba Cristoou maach thumaam khʉʉn kõit ich bag ãrpitarr gaaimua pãarjã ich dënkha wai sĩewai mag pãar okhoo narrta ya ĩsin chad maach thum ãbata Ẽwandamau ich dënkha wai sĩejem.  
\v 14 Maguata ĩsin Cristoouta maach khõinaa phë wai sĩejem, chadcha maar meeun pãar meeun dʉ̈i khĩet nʉmta ĩsin ichdëuta maach thum khod ãbamjö abapʉ̈im, sĩi maach jãrr serrkau thuur simjö sĩerrta khʉt sĩewerbpʉ̈imjö abaawai.  
\v 15 Mag Cristoou ʉdʉraa ich thõopibarmuata mag Moiseeu ley pʉatarr gaai nem khĩir pogkhe ʉʉrkhapi simjã warre serbiiba apʉ̈ijim. Magta warr chan mag chikhamnagjã ooba agdaujö dich cuenta nʉrrjëe arrta, õor ãbpaimʉg paapʉ̈iwi warre chi iiunkhapʉ̈ijim. Magbarm aig ĩchab ya tag warramjö khaba, maach eepaijã khõinaa nʉisijim.  
\v 16 Mag pakuls gaai ich thõopibarmuata ĩchab mag maach khĩir au wënʉrrʉmjö narrjã Cristoou warre ajaug paapʉ̈iwi Ẽwandam dʉ̈ijã khõinaa apinaa õor ãbpaimjö apijim. 
\p  
\v 17 Mag Cristo bëetarran mag maach khõinaa wënʉrraju thumaam khʉʉnag jawaanta bëejim: Ar pãar Ẽwandam khaugbagau i warp narr khʉʉnag jawaan, maimua maar meeun pãar khãai bʉ̈ʉr i khaphʉpai narr khʉʉnagpa jawaanta bëejim.  
\v 18 Mag maach thum i iek ʉ̈kha nʉm khʉʉnaun, ich ãbam Ẽwandam Akhaarpaita wai naawai, Cristo gaaimuata ʉ̈u ĩsin judionaan wa judionaan khaba awiajã Ẽwandam chi Aai dʉ̈i khapeerkha wënʉrrʉm.  
\v 19 Mag i dʉ̈i khapeerkha naawai pãar chan ya sĩi chikham durr gaai jooba nʉmjö khaba, ĩsin ya sĩi dich meeun apha ãbam dö ee jooba nʉmjöta nʉm. Maguata mʉg maach Ẽwandam õorkha thʉnʉm khʉʉnan thum agdaujöpai nʉm nem thumaam athee, ya i chaainkha nʉm gaaimua ãba khodkha thʉnaawai.  
\v 20 Pãran ĩchab sĩi Ẽwandamau ich athee di ëwaag dipá jʉr wai simjöta nʉm. Ich Jesuucha ich i jaaumkhĩir jʉr autarr khʉʉn warrgar ĩchab Ẽwandam i jaaujerr khʉʉn dʉ̈i chi dipákha nʉm. Maagwai pãar jũrr chi dipá daígkha naawai makhʉʉn ʉ̈rta chi ëu simua bʉ̈rkha arrum. Maagwai ag eegar chi big pömaam chi dihãdkha sim ich Jesucristoou.  
\v 21 Ajapcharan jãg di ëu nʉm aig pa jʉ̈khapʉ̈pʉ̈igmampierr warag ʉ̈gthaag bãau ahaug maajemjöta nʉm maachjã. Õrau warag Cristo iek ʉ̈khamampierr ichdëuta ichdëu khap maach gaaimua mag di ëu arrumjö simjã warag nem pöm bãau arrum, ich sĩejem dikha awaag.  
\v 22 Mag pãar judionaan khabam khʉʉnjã Cristo dënkha naawai maach thumaam khʉʉnta ãba Ẽwandam Akhaar sĩejem dikha nʉm. 
\c 3  
\s1 Judionaan khabam khʉʉnagta Ẽwandamau ich iek jaaupitarr 
\p  
\v 1 Keena, mag pãar judionaan khabam khʉʉnpa Ẽwandam chaain khaju aai nʉm a jaau chitʉm gaaimuata mʉʉn mʉg preso chirʉm. Pari mua khaphʉ chirʉm, mʉg mʉ preso chirʉm gaaimua Cristoou jũrr pãar dʉ̈ita ajapha aju.  
\v 2 Ya pãrau khaphʉ aju aai nʉm, Ẽwandam õor dʉ̈i ajaug khitʉm gaaimua pãarjã dau aug khaugwi mʉrʉgta pãar ee ich iek jaaupitarr aawai chadcha ag gaaita chitʉm.  
\v 3 Ar warr mʉg ẽsap phãbaadëwe pãrag mʉchdëu bʉchkhun jaau chirarrjö, ich Ẽwandamau ich thãar eepai khaphʉ sĩerrjã ichdëuchata mʉrʉg jaautarr aawai mua khaphʉ chirʉm, chadcha pãar judionaan khabam khʉʉnjã irua ich dënkha auju aai sim.  
\v 4 Pãrau ag gaai thʉ̈rmamua khap aju, chadcha mʉrʉgjã mag ichdëupai nem khaphʉ sĩerr jaaujim, jãga mag judionaan khabam khʉʉn atheepa Cristo pʉ̈ijĩ.  
\v 5 Warrgar chan mʉg iek chan ĩsimjö dawaa jaauba aajeejim; maagjerr ĩs ewag pawiata Ẽwandamau Cristo i jaaumkhĩir ichdëucha maar chi apostolnaan jʉr autarr khʉʉnag ich Akharag jaaupibaawai chadcha jaauwiata ʉ̈u khaphʉ nʉm.  
\v 6 Mag ich iek khaugpimaphamjö wai sĩerr iekhan mʉg ajim: Maach meeun khabam khʉʉnjã mʉg maach peerdʉajem iek ʉ̈kha nʉm gaaimuata maach judionaan dʉ̈i ãba Ẽwandamau peerdʉ auwi, ich Jesucristoou jaautarrjö ʉ̈gtharjã öbërpiju. Mag ãbam iek ʉ̈kha nʉm gaaimua maach thumaam khʉʉnauta Cristo kõit ichdëu khõsimjö wau naawai i gaaimua Ẽwandamau nem ajapha aju a simjã chadcha ich magta aju pãar dʉ̈ijã. 
\p  
\v 7 Chadcha mʉch khĩraupai chan mʉg Cristoou maach peerdʉ aaujem jaau nʉm phidag auju khaba chirajim. Mag chirarrta Ẽwandam nem thumaam athee ichta ʉ̈rpai sĩerrʉmuata mʉrʉg ich iek jaaupibaawai ʉ̈u ag gaai chitʉm.  
\v 8 Ajapcharan mʉʉn thum mʉg Ẽwandam iek ʉ̈kha nʉm gaaimua i dënkha thʉnʉm eejã mʉchta serbiibacha chirʉm. Mag chirab mamʉ ich Ẽwandamauta pãar maar meeun khabam khʉʉn eejã mʉg maach peerdʉajem iek jaaupitarr aawai mag Cristo gaaimua maach dʉ̈i nem ajapha aajem pöoma maadëu chi jaaujujã khaugba aajemjã ʉ̈u jaau chitʉm.  
\v 9 Ich Jöoyau warrgarwe nem thum ompaabarwe nem wauju ichdëu khaphʉ sĩerrjã mʉrʉgta jaaujim, jũrr thumaam khʉʉnag jaaumkhĩir.  
\v 10 Pari mag mʉrʉg jaautarran, mag maach thumaam khʉʉnta Cristo dënkha nʉm gaaimua chi jua thierrnaan thum edjã eem khʉʉnau ʉ̈gtharm magwe mag Ẽwandam khĩirjug khaug sim khakhapdö amkhĩir ajim. Chadcha ichdëu nem wau nʉmpierr nem waau khaauga sĩerrʉm.  
\v 11 Pari mag maach thum judionaan khabam khʉʉnpa ich dënkha phë auju khĩirju wai sĩerr chan nem ĩsim khaba, ni õor khĩirjugjöjã khaba, ich Ẽwandamau warrgurwe mag khĩirju wai sĩerr aawaita chadcha mag maach Pör Jesucristo pʉ̈ibarm gaaimua maach thum ãba ich dënkha wai sim.  
\v 12 Maguata ya ĩsin mag Cristo iek ʉ̈kha naawai, i gaaimuata chadcha Ẽwandam bʉ̈ ignaa ich jãg chaain amach dënnaan dʉ̈i aajemjö irig jëeuwimʉ jëeujem, mag jëeubaawai maach iek ũrju khaphʉ naawai.  
\v 13 Maguata muan pãragan mag chirʉm keena: Ich Cristoou pãar judionaan khabam khʉʉnag ich iek jaaumkhĩirta mʉ jʉr autarr aawai ag iek gaaimua mʉg mʉ dau aphʉʉ cárcel deg chirʉm anʉm ũurwaijã oob ökhĩirjuu amiet. Magju khãai pãach gaaimua mʉg mʉ dau aug wau chirʉmʉn mʉchdëu pãar khõsinaa Ẽwandamaujã pãar khõsi aawaita mʉg chirʉm a khĩirjunaa warag oneeta abat. 
\s1 Chi ʉ̈kha nʉm khʉʉn kõit Pabloou jëeutarr 
\p  
\v 14 Mag pãar maar meeun khabam khʉʉnpa thumaa maach Aai Ẽwandamau ich chaainkha wai sĩewaita muan phõbkhanaa irigta ʉ̈u ajim aajem,  
\v 15 ajapcharan ar ichdëuta thumaam khʉʉn ʉ̈gthar thʉnʉm magwe ompaatarr aawai irigta Aai ichëju aai nʉmʉgma.  
\v 16 Mua pãar kõit irigta jëeu chiraajem, ichdëuta pãar dʉ̈i ajapha aag ichdëu am aig aju aai sĩewai. Maguata muan irig ich Akhaar gaaimuata pãar akhaardamjã warag ich gaaita ubʉ apim khõsinaa,  
\v 17 pãachdëu ʉ̈kha nʉm gaaimua Cristojã pãar thãar eeta sĩepim khõsi chiraajem; irigta pãar kõit jëeu chiraajem, mag Cristo gaaita ubʉ naawai agdaujö dich khapeen kha khõsi ajujã khaphʉnaa,  
\v 18 tagam khʉʉn agjö ʉ̈kha durrum khʉʉn dënjö jãga ich Cristoou khũchpaim athee khaba ich mag daupii wai nʉrraagta thumaam khʉʉn khõchkhaajẽ a khap amkhĩir; maimua jãga õor dau aphʉʉ maadëu nem igba khitawiajã thethem khʉʉnjö khõsi aajẽ a khap amkhĩir.  
\v 19 Mua khaphʉ chirʉm, chadcha mag irua maach khõsi sim chan pöd maadëu thumaa khaugbam. Pari ichiita pãar kõit jëeu chirʉm, Cristoou maach thumaam khʉʉn khõsi aajem a khap amkhĩir, maagwai ĩchab Ẽwandamta pãach gaai phẽs wai naawai ichdëu pãach dʉ̈i ajapha am ig simjö aju ayaa amkhĩir. 
\p  
\v 20 Ẽwandam jua theeg sĩerraawai chadcha mag maach ee sim aiguin ich ag jua theegaupai dichdëu jëeu nʉm atcha wa dichdëu khĩirju nʉm atcha khãijã ajapha aajem maach dʉ̈i.  
\v 21 Magua maach chi ʉ̈kha nʉm khʉʉn thumaam khʉʉnau Jesucristo gaaimua ãba iita mʉg atag pawiajã ich mag thö iekha wënʉrraju aai nʉm. 
\c 4  
\s1 Ẽwandam Akhaar gaaimua Cristo morkha nʉm 
\p  
\v 1 Keena, maach Pör Jesús i jaau chitʉm gaaimua preso chirʉmuata muan pãrag jaau jöchkhërʉm: chadcha Ẽwandamau thʉ̈rkha auwi i dënkha nʉm khʉʉnjöta agpierraa nʉrrjëe abat a chirʉm.  
\v 2 Pãachta warm khʉʉn khãaijã chi serbiibacharamjönaa khĩir thũu abat; chikhamnau dich dʉ̈i parhooba aawaijã sĩi khĩu ãwatpʉ̈inaa jũrr agdaujö dich khapeen kha khõsita abat.  
\v 3 Ẽwandam Akharagta idëu pãach khĩirjug ãba apiju ẽkhabat, ich mag khõinaa wënʉrrʉmua.  
\v 4 Maach chi Cristo dënkha nʉm khʉʉnan khapan thʉnaab mamʉ, õor ãbpaimkha nʉm Cristo gaaimua, maagwai chi Ẽwandam Akhaarjã ãbpaita sim maach ee sĩejem. Ich agjöta ĩchab Ẽwandam aar i dʉ̈i ãba naaimaju khĩirjugjã ãbpaita wai nʉm, mag ich aar awaagta warrjã maach thʉ̈rkha autarr aawai.  
\v 5 Maach Pör Jesucristojã ãbpaita wai nʉm; thumaam khʉʉnau agdaujö ãba maach peerdʉajem iekpaita thãraucha ʉ̈khawi ãbam thʉ̈r gaaipai pör choowi nʉm.  
\v 6 Ẽwandaman ãbpai ichta thumaam khʉʉn Aaikha sim, ichta thumaam khʉʉn khãaijã ʉ̈rpai sĩerrʉm; iin maach thum chi ʉ̈kha nʉm khʉʉn gaaimuata nem waunaa ichpaita maach thumaam khʉʉn thãar ee sĩejem. 
\p  
\v 7 Mag maach thum õor ãbamjö naab mamʉ, Cristoou ich garmuata ʉ̈u maachig ich jua theeg ichdëu deem aig maachpierr deematarr maadëu wai nʉnʉidʉm, ichdëu deemarrpierr, agua dich khapeen dʉ̈ijã ichdëu khõsimjö aag.  
\v 8 Mag maachpierr Cristoou ich juapá deemaju igwiata David khararrau ichdëu Ẽwandam iek phã pʉarr gaai jaauwai, 
\q1 “Ich iiu phiidʉbarmua mepeer pödpʉ̈iwi, i jua ee narr khʉʉnjã öbeer auwia, ʉ̈gthar sĩeimaju” ajim; 
\q1 “mammuata mʉig eegar ich õorkha nʉm khʉʉnag ich jua theeg amachpierr jigmaju” a phãjim. \rq (Sal. 68:18)\rq* 
\p  
\v 9 ¿Pari jãgwi mag í ʉ̈gthar maju ajĩma? Magtarran warrjã ʉ̈gtharmuata bëewi maach mʉig eegarm khʉʉn khãaijã aphʉʉcha meewi deeu ʉ̈gthar ich sĩerr aar maju arr aawai ajim.  
\v 10 Mag ichta ʉ̈gtharmuacha bëewi jẽb eegarcha udthurwi deeu ich sĩerr aar matarran, mam sĩeb mamʉ, mʉig eegar durrpierr simta maach wënʉrrʉmpierr maach dʉ̈ijã sim. Magua ãbmuajã pöd i jamta sĩ aju khaba sim.  
\v 11 Mag ich Cristoouta ich jua theeg chi ʉ̈kha nʉm khʉʉnag jigmaju atarr aawai chadcha ichdëuta ãaur khʉʉn ich iek durrpierr aaidʉ jaaujem khʉʉn khapijim, apostolnaan; ãaur khʉʉn sĩi ichdëu iek jaaumamta jũrr warm khʉʉnag chi jaaujem khʉʉn khapijim, profetanaan; ãaur khʉʉn sĩi maach peerdʉajem iek jaaumamua iita õrag amach thãar ee aupi jaaujem khʉʉn khapijim, evangelistanaan; maagwai ãaur khʉʉn ya ich iek ʉ̈kha durrum khʉʉn pekau ee burrm ugua am thʉajem khʉʉn pastornaan khapinaa, ich iek jaau khaug amkhĩir maestronaan khapijim.  
\v 12 Magta ya ich õorkha thʉnʉm khʉʉnag mag amau nem waujujã ich Cristoouta nem khaauga apijim, mag dichdëu khaphʉgpierr dich khapeen dʉ̈i nem wau nʉmua chi ʉ̈kha durrum khʉʉn thum agdaujö i iek gaaita warag thierrpagkhamamkhĩir.  
\v 13 Mag ya maach i dënkha naawai iruan maachigjã ich khĩirjugta paarpapim khõsi sim, ich athee nem waauwaijã ichdëu khõsi simjöta waau khaphʉ amkhĩir. Pari mag i khĩirjug paarpaagan, ichiita maach thumaam khʉʉnta agdaujö ö ãba maachdëu ʉ̈kha nʉm gaaita wajapcha ubʉnaa ich Ẽwandam Iewaa Cristota maach khapeerkha auju aai nʉm. Magbaawain chadau chadcha maach i dʉ̈i ubʉ nʉm aju aai nʉm.  
\v 14 Mag khai magan ya tag chaain amachig sĩi bʉ̈ʉr mag abaawai parhoobam khʉʉn iek ʉ̈khakharrsö amach khũgurpiejem khʉʉnjö khaba, chikham khũgur aum khõchgau khĩirjug khaug sĩerrjëem khʉʉn bëewi Ẽwandam iek chaar khabam maachig jaauchëwiajã ʉdʉʉr maadëu dich khũgurpibaju.  
\v 15 Mag ʉdʉraa parhoobam khʉʉnag dich khũgurpiju khãai, warag Cristo iek chaar maachdëu khaugtarr gaaita ubʉ naaju aai nʉm. Pari magaag atheyan dich khapeen kha khõsinaa am dʉ̈i chadam iekpaita ig wënʉrrʉm dʉ̈i Cristota maach Pör aawai i khĩirjugta aumamua warag dau thethe paaukhamaju aai nʉm.  
\v 16 Mag Cristota maach Pör aawai jũrr maach i iek ʉ̈kha nʉm khʉʉnta i mor eegamjö nʉm. Pãrau khaphʉ nʉm, maach mor gaai nem khĩir ãbpai khaba thʉnʉm. Ich agjöta naabahab ĩchab maach chi ʉ̈kha nʉm khʉʉn eejã. Maach thum ãba khaba thʉnaabahab Cristo athee nem wawaag. Mamʉ mag thʉnʉmua maach thumaam khʉʉnta i morkha naawai jũrr iwiir ãbmua nem waauwaijã agdaujö khõsi juag oo nʉmjö aajem. Mag Cristoouta maach thum ich morkha wai sĩewai ichdëuta maach khĩirjugjã bãaupimaajem; mag nʉm dʉ̈i ĩchab thum agdaujö dich khapeen kha khõsinaa thierrpagkhamaajem. 
\s1 Idëu Ẽwandamagta pãach khĩirjug ajaug paapibat 
\p  
\v 17 Magau keena, maach thum ãba maach Pör Cristo iekta ʉ̈kha naawai, mua pãrag jaaum ig chirʉmʉn mʉgau: Ya oob tag sĩi Ẽwandam khaugbam khʉʉnjö amiet. Pãrau khaphʉ nʉm jãgʉm khʉʉn khĩirjug chan sĩi maadëujã nem igba,  
\v 18 sĩi warag pöd ajapham nem khĩirjubam gaaimua khĩirjugpata jõpa sĩsidʉmjö sĩsidʉm. Amach thãar theeg sĩsidʉm gaaimua Ẽwandam warp naawai amau bʉ̈ʉrjã khaugba nʉm, jãga Ẽwandamau maach onee ich dënkha wai sĩejẽ.  
\v 19 Mag Ẽwandam iek ʉ̈khaag amach thãar theeg nʉm gaaimuata warag nem khaigbam amachdëu waau khaug thʉnʉm gaaipaita thʉnʉisiphʉm. Mag amau nem wau nʉm oowain thum maach inaamjö sĩsidʉmta wauba pʉakhimjã aba, warag magʉmta wauju khĩirju nʉm dʉ̈i ãba khapes ajuuta khĩirju sĩsidʉm.  
\v 20 Mamʉ warr pãrau Cristo khaaugwaijã magʉm nemta khaugaag khaba arr aawai pãar chan amjö magta wënʉrraju khaba nʉm.  
\v 21 I iek jaau nʉm ũurwaijã i igwia chadcharam nem jaau nʉmta khaugtarr aawai,  
\v 22 jãg warrgar pãach nem parhoob wau wënʉrraajerr khĩirjug warre isegbapʉ̈it. Jãgʉm khĩirjugan nem khaigbam wau nʉm gaaimua sĩi khajũa memerkhömjöta sim; mag sĩewai sĩi ãba nem khaigbam waum khõchgauta dikha thʉnaabahab.  
\v 23 Pãach khĩirjug idëu Ẽwandamagta ajaug paapibat, nem ajaphamta waum khõsi aag.  
\v 24 Magnaa mag nem ajapha wauju khĩirjugta chihöojö ogdʉba abat. Magʉm khĩirjugta Ẽwandamau aupi sim, ich dënjö khĩirjumkhĩir. Magua mag khĩirjugta aunaa ich Ẽwandamau khõsimjö i atheepai wënʉrrʉmuata pãach ʉ̈uu oopibat, chadcha chadam iekta ʉ̈kha nʉm khʉʉnjö. 
\p  
\v 25 Mag naawai oob tag dich khapeenag sëukhamiet; sëukhaju khãai iekhaawaijã chadchata dich khapeenag nem jaaujeet. Maachin mʉg nʉm aiguin thum agdaujö Cristo morkha thʉnaawai maachin thum khod ãbam khʉʉnkha thʉnʉm.  
\v 26 Mag naawai khĩir machgau oob pekau waumiet, mag meeukhaawaijã oob khĩir thũa chʉuu amiet,  
\v 27 eeu magʉm gaaimua dösãtta warag pãach dʉ̈i ʉ̈rpadukham.  
\v 28 Warr nem jĩgkhaajerr khai, ich mag nʉrraju khãai, pʉch juadamaucha phidkhabá; maagwai pʉchdëujã pʉch nemdam ig sim paraanaa agjö ig durrumta pari chukhum khʉʉnagjã deeju ayaa aju. 
\p  
\v 29 Oob bʉ̈ʉrjã iparii wa ihachkha khãijã iekhamiet; magju khãai iek ajaphampaita iekhabat. Õrau pãach iyʉ̈ʉ nʉm ũurwai amach jʉ̈gaagaa aawai warag amachdëu ʉ̈kha nʉm iek gaaita ubʉnaa onee apiju ayaam iekta iekhabat.  
\v 30 Nem khaigba wau nʉm gaaimua chan oob Ẽwandam Akhaar ökhĩirjuu apimiet. Ich jãg Akhaarta Ẽwandamau pãrag deebajieb, ich iek ʉ̈khaawai chadcha ich dënkha nʉm a khap amkhĩir. Mag i Akhaar wai naawaita mʉg atag mʉig eegar wënʉrrawi ich aarcha phë atham edjã chadcha ich dënkham iek ich dënkha wai sĩsiju.  
\v 31 Keena, warre pãach gaaimua barbapʉ̈it jãg pãach khapeenau pãach dʉ̈i bʉ̈ʉr abarm gaaimuajã khĩir okhoo chʉuu aadëp aajem khĩirjug, pãach khĩir machag, pãach khõrg, iek khẽgkha iekha nʉm, chikham khĩir iekha nʉm maimua mag tag nem khaigbam nem thumaa pãach gaai thʉnʉm warre isegbapʉ̈it.  
\v 32 Ö ajaphata aajeethʉ̈ pãach khapeen dʉ̈i, agdaujö chikham dau aug khaug paraa. Iwiir ãbam garmua khãijã khaigba aawai, magʉm iekjã tag igba, sĩi khĩir okhoopʉ̈pʉ̈i abat, ich jãg Ẽwandamaujã Cristo gaaimua maach khaibag chugpaapʉ̈iwia ich mag khĩir okhoopʉ̈itarrjö. 
\c 5  
\s1 Ẽwandam chaainkha nʉm khʉʉn jãga wënʉrraju aai nʉ 
\p  
\v 1 Ich Ẽwandamau ich garmuajã chadcha pãar ich chaain jãsene aajeewai ichdëu pãach dʉ̈i aajemjöta abat pãachdëujã pãach khapeen dʉ̈i.  
\v 2 Ich jãg Cristoou maach khõsi simjö pãraujã agdaujö pãach khapeen kha khõsi abat. Cristoou mag maach khõsi arr aawai maach daupigau pakuls gaai ʉdʉraa ich meerphë thõopijim. Ẽwandamau irua magbarm oowai ʉ̈u sĩejim. 
\p  
\v 3 Ya pãar Ẽwandam õorkha nʉm khʉʉn chan pöd pãach õor khabam dʉ̈ijã khapes aju khaba, tagam nem maach inaamjã wauba, chikham nemjã thumaa dich dën apim khõsi aju khaba, ni sĩi magʉm iek ig iyʉ̈ʉ ajujã khaba nʉm.  
\v 4 Sĩi iparii dau lököo wa ihachag khãijã iekhaju khãai, Ẽwandamau pãach dʉ̈i ʉ̈u aajem paar i ajaugta phëbat. Ya pãar Ẽwandam dën aawai, iek ãkhãraam chan pãrau tag iekhaju khaba nʉm.  
\v 5 ¿Jãgwi mua mag chirʉ́? Mua mag chirʉmʉn mʉgau: Amach õor khabam dʉ̈i khapes aajem khʉʉn, Ẽwandamau oowai maach inaam nem waaujem khʉʉn, wa chikham dënjö paarpaag awi amachdëu nem ig nem ẽkhabaadëmjã pʉa chʉuu aajem khʉʉnjã pöd Cristo Ẽwandam dʉ̈i ãba chi Pörkha sim aar öbërbaju aawaita mag chirʉm. Ar jãg nʉm khʉʉnaun jãg amachdëu nem wau nʉmʉgta ʉ̈rcha ee thʉnʉm, Ẽwandamagta ee aju khãai. Amach mag nʉm gaaimuata pöd i aar öbërbam.  
\v 6 Jãgʉm khʉʉn eem ãbmua khãijã pãach aig bëewi pãachig mʉ ichaaur jũrr magʉm gaaimuapai chan Ẽwandamau pãar chig abam a jaaumʉn, magan ichta sëukha nʉrrʉm. Magʉm khʉʉnag ʉdʉʉr pãach khũgurpimiet. Amau khaugba nʉm, ante magʉm waum khõchgau ich ipierraa khaba nʉm khʉʉn gaaita Ẽwandam khĩir machag meeuju khabahab.  
\v 7 Magua jãg i ipierraa khaba i ichaaur nem wau nʉm khʉʉn dʉ̈i chan oob bʉ̈ dʉ̈ii amiet. 
\p  
\v 8 Warr pãrau Ẽwandam iek khaugba aawain chadcha pãachjã sĩi khĩchag eemjöta wënʉrraajeejim. Pari ĩsin ya pãar maach Pör Cristo dʉ̈ita khapeerkhanaa i iekjã khaphʉ naawai ararag ee nʉmjöta nʉm. Mag naawai chadcha i iek khaphʉm khʉʉnjöta agpierraa nʉrrjëe abathʉ̈.  
\v 9 Mag Cristo gaaimua chadcha ararag eeta wënʉrrʉmʉn, õor ajaugta aadeejem; mag nʉm dʉ̈i ĩchab nem agcha waunaa iekhaawaijã chadam iekta iekhaajem.  
\v 10 Magua pãach nem waaupierr maach Pör Ẽwandamau oowai i dawagaa aju ayaam nemta wauju ẽkhabat.  
\v 11 Cristo khaugbagau sĩi khĩchag eemjö nʉm khʉʉnau maadëu nem igbam nem wau nʉm ee oob dʉ̈i dubmiet; magju khãai warag pãach ipaarmua amau nem wau nʉm chadcha khaigba sim a khap amkhĩir warag meerba jaaubapʉ̈it.  
\v 12 Jãgʉm khʉʉnau meraa nem wau nʉm chan maadëu igjã mapha sim, magʉm iigwai warag maach chigaata sĩewai.  
\v 13 Pari magba khaigbam khʉʉn daar maadëu nem wau nʉmjã thum ajaphata waauwain õrau amachdëu nem khaigba wau nʉmjã õtdau bʉ̈ʉgta oo nʉmjö aajem. Mag sim aig chi pekaujã pöd meraa aju khaba sim, õtdaúa thum arar wai sĩejemjö maach wajapha nʉm gaaimua amachdëu nem khaigba wau nʉmjã merag chukhu sĩewai. Mag maadëu ajapha nem wau nʉm gaaimua õrau amach khaigba nʉm khaug auwi Ẽwandamau khõsimjö mag ararag ee wënʉrram khõchgau i jʉrmʉn, chadcha i dënkha nʉisiejem.  
\v 14 Pari magaagan am iekhõoin, 
\q1 “Jãg pʉch pekau eepai khãi simjö sim daukhanpabá; 
\q1 chi khëchamjö thʉnʉm khʉʉn eemua phiidʉbaad; 
\q1 Cristoouta ich dënkha aunaa ich dʉ̈ita pʉ wai nʉrraju.” 
\p  
\v 15 Maguata muan pãragan agpierraata wënʉrrathʉ̈ a chirʉm, Ẽwandamau khõsimjö. Sĩi jãg nem jaau nʉmjã ũrba wënʉrraju khãai khĩirjugdam paraata aajeethʉ̈.  
\v 16 Ʉ̈uta nem ajapha wauju aai nʉm aiguin agpierr ich Ẽwandamau khõsi simjöta abat. Pãrau oo nʉm, ĩs ewag paawai chan ya warag chi ajaugjã chukhuta paaukhamam.  
\v 17 Oob jãg sĩi Ẽwandam khaugbam khʉʉnjö parhoob dau theeg chukhu nem waumiet. Magju khãai khani maach Pör Cristoou waupim khõsi sĩ a khĩirjunaa magʉmta wauju ẽkhabat.  
\v 18 Oob nag döwia okhoppha amiet. Jãgʉmuan warag maachig nem parhoobata waupinaa maach okhoopijuuta ẽkhaajem. Magju khãai Ẽwandam Akhaarta pãach gaai phẽsnaa idëu irigta pãachdëu nem waujujã jaaupibat.  
\v 19 Pãach iyʉ̈ʉ aawaijã maach Pör Cristo iekta onee ig iyʉ̈ʉ abat; meukhaar au nʉmuajã thãrauchata i thumeukharbat.  
\v 20 Maach Pör Jesucristo gaaimuata Ẽwandam chi Ayau ʉ̈u maach iek ũurjeewai nem thumaam paar irigta ʉ̈u ajim abat. 
\s1 Jãga aju aai nʉ dich khãai ʉ̈rpaim khʉʉn dʉ̈i maimua dich khãai eegpaim khʉʉn dʉ̈ijã agjö 
\p  
\v 21 Cristo iek ʉ̈kha naawai irua jaau simjö am khõchgau jũrr dich khapeen agjö ʉ̈kha nʉm khʉʉnaujã dichig nem mag aawai, ʉdʉraa amagta dich khãai ʉ̈rpai apibat. 
\p  
\v 22 Ʉʉin chi jaainpan, ich jãg maach Pör Ẽwandamagta ʉdʉraa pãach khãai ʉ̈rpai api nʉmjö, pãach jaainau pãachig nem mag aawaijã oob pãachta am khãai ʉ̈rpai aju ẽkhamiet.  
\v 23 Pãrau khaphʉ nʉm, mʉg maach chi ʉ̈kha nʉm khʉʉnta Cristo morkha nʉm. Maagwai ichta maach Pör anaa maach peerdʉ aaujemʉu. Magua ũrbat: ich jãg Cristota chi ʉ̈kha durrum khʉʉn Pörkha simjö, pãar jaainta pãar pöröu.  
\v 24 Magua, ich jãg mʉg maach chi ʉ̈kha nʉm khʉʉn thum Cristoou nem mag aawai i ipierraa aag i jua eegpai nʉmjö, ʉʉin chi jaainpanjã agjö nem thumaam athee pãach jaain ipierraa aag am jua eegpai ʉrrjëe abat. 
\p  
\v 25 Ich jãg Cristooujã ich iek ʉ̈kha phöbaadeewai ich iglesiakha nʉisiju khʉʉn daupigau am kõit ichta thõopitarrjö, pãach chi emkhooinaujã pãach ʉʉin daupii abat.  
\v 26 Cristoou mag ich thõopitarran, maach peerdʉajem iek ũr nʉm dʉ̈i dich pör choopibarmua ajaug paapʉ̈iwi ich atheepaita nem wau wënʉrramkhĩir ajim.  
\v 27 Mag ajaug paapʉ̈iwi ich atheepai nem waupi simʉn, deeu ich bëem edjã ʉʉi khĩir ajaug khaibagjã chukhu thumaam khʉʉnau khõoigjemjö khitʉmta ich athee awaagau; ajapcharan bʉ̈ʉrjã pekau chukhu, ni deeum khaigbam nem jaauju ayaamjã chukhu, sĩi ajappha khitʉmta ich aarcha awaagma.  
\v 28 Ich jãg Cristoou maach khõsi aajemjö ich agjöta aju aai nʉm chi jaainaujã pãach ʉʉin dʉ̈i. Jãg chi jayaujã ich mor bʉ̈ʉrjã chig apimapha aajemjö, ich ʉʉijã chig aba daupiita wai nʉrraju aai sim. Chadcha ich ʉʉijã daupii wai sim wounaun ichchata chig apimaphamjö sim, ich ʉʉijã ich morkha simta mag daupii wai sĩewai.  
\v 29 ¿Jãgwi mua mag chirʉ́? Maach mʉg nʉm aig ãbmuajã wir aig dichdëupai dich oomapha khaba aajeewaima. Ante warag maadëu thachjã ed ëepierr khönaa dich chig apimapha aajem, ich jãg Cristooujã ich mor aawai ich iglesia thʉa wai sĩejemjö.  
\v 30 ¿Maagwai maachjã mag irua thʉa wai sĩejem eem khʉʉn khabá, maachjã i morkha naawai? Chadcha i morma.  
\v 31 Pari mag chi jaai ich ʉʉi dʉ̈i ãbam morkha nʉm a nʉmʉn, Ẽwandam iek phã sim gaai jaauwaijã, 
\q1 “Maguata emkhooirau ich dënnaan dʉ̈i sĩejerrjã am phëpʉawi ich ʉʉi dʉ̈ita ogdʉba sĩsiju” a sim, 
\q1 “warr sĩi amach ap nʉrrjëe aajerrta ya magbaadëm aigmua sĩi ãbam morkha õor ãbpaimjö wënʉrraag.” \rq (Gn. 2:24)\rq* 
\p  
\v 32 Mua khaphʉ chirʉm, mʉg iek khap aag chadcha maach athee phithur sim. Pari mua mag chi ʉʉijã ich jaai dʉ̈i ãbam morkha nʉm a chirʉmʉn, maach chi iglesiakha nʉm khʉʉnta Cristo morkha nʉm igwiata mag chirʉm.  
\v 33 Pari mag cha mʉchdëu jaau chirʉm pãachdëu thum ajap khaugba awiajã, ichiita ich jãg pãachdëupaijã bʉ̈ʉrjã pãach chig apimapha aajemjö, thumaam khʉʉnau agdaujö pãach ʉʉin daupii abat. Maagwai chi ʉʉinaujã pãach jaain ipierraa nʉmua am ökhönaa agjö am daupii abat. 
\c 6  
\p  
\v 1 Chaaina, pãach dënnaanau iekhaawai am ipierraa abat; maach Pör Cristooujã magta apim khõsi sim pãrag. Pãrau magta am ipierraa nʉmʉn magan chadcha pãar agchata wënʉrrʉm.  
\v 2-3 Ẽwandam iek phã sim gaai jaauwaijã, “Oneenaa ʉ̈u dʉ̈rrcha año khapanaa wënʉrraag, pãach aai jãsenenaa pãach ãdjã jãsene abat” a sim. Tagam nem agjö ichdëu waupi jaau sim ee maata ʉ̈rcha chi ajapcharamʉu chaaina. 
\p  
\v 4 Mamʉ keena, pãach chi dënnaanaujã pãach chaain meeukhamkhĩirjö oob am dʉ̈i athuucha amiet; magju khãai warag am wajapha wawí bãaumam dʉ̈i maach Pör Cristoou khõsimjö wënʉrramkhĩirta amag khap apibat, ich magta jöoinpagkhamamkhĩir. 
\p  
\v 5 Pãar sĩi mʉg jẽb gaai chikhamnaan chogkha wënʉrrʉm khʉʉnjã, pãach pörnaanau pãachig nem mag aawai ich Cristoouchata pãachig jaaubarmjö am ipierraa waum khõsita waubat, maimuajã ajapha.  
\v 6 Mag am ipierraa nem waauwaijã, sĩi pãach aig oopaar aawaipai khaba, am meer awiajã ich agjö. Mamʉ mag nʉm chan sĩi pãach ajapha nem wau nʉm oomkhĩirpai khaba, Cristo chognaankha naawaita ichdëu khõsi simjö mag ajapha nem waubat.  
\v 7 Sĩi mʉig eegar dich agdaujöpai thʉnʉm khʉʉn atheeta nem wau nʉmjö khaba, maach Pör Cristo athee wau nʉmjö nem waum khõsita nem waaujeethʉ̈.  
\v 8 Ya pãrau khaphʉ nʉm, mʉig eegar aawai sĩi chikham chog wa chikham chog khaba arr awiajã, mʉg atag paawai dichdëu nem ajapha waaujerrpierr maach Pör Cristooujã maach dʉ̈i ich agjö aju. 
\p  
\v 9 Maimua pãach chi pörkha nʉm khʉʉnaujã agjö pãach chognaan dʉ̈i aairaa abat, oob am dakhãkhãujã aba. Khĩir eyaa abat, pãran ĩchab pãach chognaan dʉ̈i ãba thum maach Pör Ẽwandam ʉ̈gthar chiraajem jua eegpai nʉm. Jãg Jöoi dau naan maachin thum agdaujöpai thʉnʉm. 
\s1 Khan jãg nʉmuata mepeer dajẽk aju aai nʉ 
\p  
\v 10 Ermanonaan, ya ãbmiecha paawai muan pãragan, maach Pör Ẽwandamau ich juapa theeg deetarr pãach gaai simʉgta idëu pãach ubʉ paapibat a chirʉm.  
\v 11 Cristo iek ʉ̈kha nʉm gaaimua Ẽwandamau pãach dʉ̈i nem ajapha waumatarrta khĩir eyaanaa aata pör ee wai nʉisit, ich jãg soldaaun juurhi ee wërbʉan maawai ich thʉag ich jierrnemta jũapäaijemjö, mag pör ee wai nʉmuata ubʉ naawai meperagta ʉdʉʉr dich khũgurpiba aag.  
\v 12 ¿Khan jãgwi mua mag chirʉ́? Mʉg nʉm aig sĩi dichjöm khʉʉn dʉ̈ita wërbʉba naawaima. Maachin sĩi mepeen chi khaigbam edjã eem magwe thʉnʉm dʉ̈ita wërbʉ nʉm. Makhʉʉnauta mʉg durr ich khaibagau khĩsumjö simjã khaphʉnaa, iek theegnaa amachta ʉ̈rpai thʉnʉm.  
\v 13 Maguata muan pʉaba pãragan, Ẽwandamau ich jua theeg jierrnemjö deetarrta khajũajö jũabapʉ̈it a chirʉm, meperau khaibag ee dich mapiju ẽkhacheewaijã ʉ̈u peerdʉímʉ peerdʉpʉ̈pʉ̈ijii awi ʉ̈u pãach garmuata pödpʉ̈iwi ich mag ubʉ nʉisieg. 
\p  
\v 14 Muan maguata deeu ũwaai pãragan, ich jãg soldaaunau wërbʉan maawai amach khajũapai khu ee wayëunaa ajapha ãi khõorjʉ̈ dʉnʉisiejemjö, chadcha iekha nʉmuata sĩi ajap khĩir khaug nʉmjö abat a chirʉm. Soldaaunau amach thʉag amach thũrr gar jierrnem jũapäaijemjö, nem agchata waubat a chirʉm, meperag pãach chig am ugua.  
\v 15 Soldaaun wërbʉan wëtaagpamjö, ajaphata khĩir khaug nʉisit, maach peerdʉ auwi maach khõinaa apiejem iek jawaan wëtaag.  
\v 16 Mamʉ mag nʉm dʉ̈i ich jãg soldaaunau ich thʉag ich escudota ich na ʉa ahau aajemjö, pãraujã meperau pãach khaibag ee burrpiju ẽkha nʉmpierr warag Cristo iekta thãraucha ʉ̈khanaat, maagwai par meperau chookhierrau pãach phiphiskham õtdau khĩir phug bëe thʉnʉmjö thʉnaawiajã, mag pãachdëu ʉ̈kha durrumuata ʉdʉʉr pãach gaai papiba aag.  
\v 17 Ich jãg soldaaunau ich pör thʉag casco jũajemjö, pãraujã Cristoou ʉ̈u pãach peerdʉ autarr khaphʉnaa ag khĩirjugta jũa nʉmjö wai nʉisit, meperag pãach khũgurpiba aag. Magnaa ich Ẽwandam iek ich Ẽwandam Akharau pãachig khaugpitarrta jũrr pãach espaarkha athat, aguata pãach garmua jũrr i dajẽk aag. \fig |src="CN02070B.TIF" size="col" copy="© 1978 David C. Cook Publishing Co." ref="EPH 6.17" \fig* 
\v 18 Pari thum cha mʉchdëu jaau chirʉmjö dich garmuata pödpäaigan, jëeub khaba Ẽwandamagta jëeunaat. Ich magta irig jëeu wënʉrrʉmua idëu ich Ẽwandam Akharagta pãachig jaaupibat, jãga Ẽwandamag jëeuju aai nʉ. Khĩir khaphʉ abat, eeu bʉ̈ʉr abarm gaaimua khãijã Ẽwandamag jëeumapha adukham. Magju khãai pʉaba irigta chaigpamamua jëeunaa ĩchab tagam khʉʉn thum durrpierr Cristo iek ʉ̈kha nʉm khʉʉn kõitjã jëeunaat.  
\v 19 Mʉ kõitjã ĩchab jëeubat, Cristoou maach peerdʉ aaujem iek õrag jaauwaijã khĩirjug khaphʉ ichdëu iekhapim khõsimta mʉrʉg jaaumamkhĩir, maagwai jãga mag warr õrau amach peerdʉju aai nʉmjã khaugba narrta ya ĩsin Cristoou õor peerdʉ aaujem a jaauwaijã ögkhaba iekhaag.  
\v 20 Cristoou ich jũrr mʉ chogpʉ̈iwi mʉg maach peerdʉ aaujem iek jaau chirʉm atheeta mʉʉn mʉg amau mʉ preso wai nʉm. Magtarr aawai mʉig cárcel deg chirʉmuajã warag ichta õrag khap amkhĩir ögkhaba jawaagjã mʉ kõit jëeunaat keena. 
\s1 Ãbmiecharam salud 
\p  
\v 21 Maach khodam maadëu daupiinaa mʉg maach Pör Cristo iek jaau nʉm phidag gaai ogdʉba maach juag oo khitaajemuata mʉ mʉg cárcel deg chirʉmjã pãrag jaauwimaju, ajapcharan ich Tiquicoouma. Irua jaauju ĩchab pãrag mʉig mʉ khani jãg chirʉ́.  
\v 22 Mag pãrag nem ĩgkhaimamkhĩirta mua i pãar aar pʉ̈i chirʉm, maach mʉig jãga nʉ a jaaubaimam ũrbaawai pãar khĩir onee apieg.  
\v 23 Muan maach Ẽwandam chi Ayau maach Pör Jesucristo dʉ̈imua pãar chi ermanonaan thum khõinaata wai naapim khõsi chirʉm. Mag nʉm dʉ̈i ĩchab thãraucha ʉ̈kha naawai pãach eejã thum agdaujö chikham kha khõsi apim khõsita chirʉm.  
\v 24 Mamʉ mag pãar appai khaba, ar maach Pör Jesucristota ogdʉba thãraucha khõsi aajem khʉʉn thumta Ẽwandamag ʉ̈u wai sĩepim khõsi chirʉm. 
\p Magdampai ajim pãrag jaaum ig chirarr. Ayoo keena, 
\cls Pablo