\id COL - Waunan (Woun Meu) NT (alternate orthography) -Colombia 2011 (DBL -2013) 
\h COLOSENSES 
\toc1 Pabloou Colosapienag ẽsap phã deepʉ̈itarr 
\toc2 Colosenses 
\toc3 Col 
\mt1 COLOSENSES 
\mt2 Pabloou Colosapienag ẽsap phã deepʉ̈itarr 
\ip \bd Chi phãtarr.\bd* Chamʉg cartajã ĩchab Efesios dʉ̈i Filipensejö ich jöoi Pabloou cárcel deg simua phãtarrau (1:24; 4:18). Ãb sim ĩchab cárcel deg simua agjö ichdëu Filemonag phãtarr. Mag jöoi Filemón Colosapierr ajim aajem. Mʉkhʉʉn carta thum jayapwe Tíquico Onésimo dʉ̈i pʉ̈iwi am gaau deepʉ̈itarrau (4:7-9). 
\ip \bd Chijã khʉʉn atheeta phãjĩ.\bd* Pabloou ũurwai Colosaam iglesia ee maestronaan anʉmta sĩi sëukha nem jaau nʉrrjëem khʉʉnjã nʉm ajim aajem. Makhʉʉnau ag eyaajã khaba sĩi parhoob nem jaau nʉmua ʉ̈u chadcha ʉ̈kha durrum khʉʉndam warag khaibagta wau wënʉrrajim anaabá. Magta Pabloou Colosapien chi ʉ̈kha durrarr khʉʉnag mʉg ẽsapdam phã deepʉ̈ijim aajem, mag nʉrrjëem khʉʉnag ʉdʉʉr amach khũgur aum ugua. 
\ip Amau jaauwai Cristo iek ʉ̈kha nʉm khʉʉnaujã angelnaan chi thierrnaan ʉ̈gthar nʉmʉgta jëeuju aai nʉm a jaaujeejim anʉm. Mag nʉm dʉ̈i ĩchab dich mehëujã phʉʉrbichpinaa tagam ley Moiseeu phã pʉatarrjã ʉʉrkhaju aai nʉm aajeejim aajem. Mamʉ magpaijã khaba, amau nem khaigbacha jaaujerran, õrag jaauwaijã Jesús chan Ẽwandam khaba sĩi angeljöpaita sim a jaaujeejim anaabá, warag i serbiibag phë nʉm iekhau. 
\ip \bd Khan jawaag ajĩ.\bd* Mag sĩi nem agchajã jaauba nʉrrjëem khʉʉnag ʉ̈u maach peerdʉajem iek ʉ̈kha durrum khʉʉn khũgurpimaaugauta Pabloou amag ajapha jaaujim, jãga sĩerrʉ́ Cristo maimua khani jãgjĩ mag Cristoou maach kõit (1:15-23; 2:8–3:4). Biblia gaai libro khapan thʉnʉm gaai mag iek jʉrkhiin, mʉg Colosenses gaai jaau sim khãai ajapcha jaau sĩsidʉm oobaju. 
\ip Mʉg carta Colosapienag deepʉ̈itarr thʉ̈ʉrwai peer Efesopienag deepʉ̈itarrjö paimʉʉ sim, khĩirjug dakha naawai. Mag naab mamʉ, chi tema chaar amau jaau nʉmʉn khĩethuupai sĩsidʉm. Efesios gaai chi carta ëntër oowai, jãga maach Cristo iek ʉ̈kha nʉm khʉʉnta i morkhanaa i iglesiakha nʉ a simta jaau sim. Maimua jũrr mʉg Colosenses gaai jaauwai, Cristo Ẽwandamkhanaa ichta mag iglesia Pör aawai ichdëupaita õor ich aar öbërju ayaa apiejem a sim. 
\c 1  
\s1 Salud 
\p  
\v 1-2 Mʉʉn Pabloou, ich Ẽwandamau khõsi sĩerrjö ich Jesucristooucha ich i jaaumkhĩir jʉr autarr. Muata mʉg ẽsap phã deepʉ̈i chirʉm, Colosas phöbör ee Cristo iekta ogdʉba ʉ̈kha durrum gaaimua Ẽwandam õorkha nʉm khʉʉnag. Mua pãar kõit maach Aai Ẽwandamag jëeu chiraajem, ʉ̈u dʉ̈rrcha pãar eeg oonaa pãar khõinaa phë wai sĩemkhĩir. Maach ermano Timoteo mʉig mʉ dʉ̈i sim; i iek iruajã pãrag salud aajem. 
\s1 Pabloou chi ʉ̈kha durrum khʉʉn kõit Ẽwandamag jëeujerr 
\p  
\v 3-4 Mau marag jaaucheewai mag pãrau Jesucristo iek pãachdëu thãraucha ʉ̈khatarrta ogdʉba ʉ̈kha nʉm dʉ̈i ĩchab thum Ẽwandam õorkha thʉnʉm khʉʉn dʉ̈ijã agdaujö kha khõsi nʉm a ũr naawai, pãar kõit maach oraa nʉmpierr Ẽwandamagta ʉ̈u ajim a durraajem, ajapcharan maach Pör Jesucristo Ayagma.  
\v 5 Marau khaphʉ nʉm, mag chadcha thum agdaujö wir aigjã pãach khapeen daupii nʉmʉn, pãachjã thum Ẽwandamau ich aar auwi ich mag i dʉ̈i nʉisiju khaphʉ nʉm gaaimuata mag nʉm. Warrcha chadcharam iek pãachdëu ũrwi ʉ̈u peerdʉ nʉisierr edwe Ẽwandamau pãach ich dʉ̈i mag phë aujujã khaphʉ ajierram.  
\v 6 Ich jãg pãachig jaaubaawai pãrau ʉ̈khatarr iekpaita ĩchab deeum khʉʉn eejã durrpierr aaidʉmam. Mag jaau nʉm ũrwi ʉ̈khamam khʉʉnjã khapaana paaukhamam dʉ̈i ĩchab õor pöoma warr amach khaigba wënʉrraajerr khĩirjug isegwi õor wäjäaunag paaukha thʉnʉm, ich jãg ʉ̈u Ẽwandamau chadcha ich garmua maach khõsi aajem iek jaau nʉm ũrwi pãachdëu ʉ̈khatarrjö. Pãrau khaphʉ nʉm, mag Ẽwandamau ich garmua maach khõsi aajemʉn chadcharau.  
\v 7 Ich magta maach khodam Epafras maadëu i iigjemua pãrag jaaujim, pãrag ich mag iek jaau sĩethuurwai. Pãrau khaphʉ nʉm, iruajã ĩchab pãachig Cristo iek jaau nʉm gaaita ogdʉba ich jãg jẽedʉ khitaajem.  
\v 8 Ich Epafraauta mag Ẽwandam Akharau pãrag pãach ee agdaujö pãach khapeen daupii api simjã mau maar aar jaauchëjim. 
\p  
\v 9 Maguata maachdëu mag ũr autarr aigmua warag pʉaba Ẽwandamagta jëeu naajem pãar kõit, ich khĩirjugta pãrag deemkhĩir; maagwai ichdëuta ĩchab ich Ẽwandamau nem waupim khõsimjã thumaa pãachig khaphʉ apimkhĩir.  
\v 10 Irigta pãar kõit jëeujem, chadcha maach Pör Cristo dënkha nʉm khʉʉnjö pãach nem wau nʉmpierr irua nem khõsimta wau nʉmua dich khapeen dʉ̈i nem ajapha aju ayaamjã waub khaba waumkhĩir; mag nem wau nʉm gaaimua warag ich Ẽwandamjã ajapcha pãachig khap amkhĩir.  
\v 11 Agjö jëeujem ĩchab, ich Ẽwandam thumaam khʉʉn khãaijã jua theeg sĩerrʉmʉgta ich jua theeg pãach gaai phẽs deebarmua pãach ich dʉ̈i ubʉ naamkhĩir, maagwai bʉ̈ʉr abarm gaaimua phithurg aadëp awiajã magʉmjã juapadam thethe ãwat naamkhĩir.  
\v 12 Maagwai pãrau onee ich Jöoi chi Ayagjã ʉ̈u ajim aju. Ichdëuta pãachjã warm khʉʉn agjö ya ʉ̈kha wënʉrrʉm khʉʉn dʉ̈i ãba ich aar auju ayaa apʉ̈inaa pãach ich dënkha naawai pãar dʉ̈ijã ʉ̈u aju.  
\v 13 Meperau maach sĩi khĩmie durrag phë arraag ichta maach khãai ʉ̈rpai sĩerrjã, ʉ̈u ich Ẽwandamauta maach peerdʉ auwia jũrr ich Iewaa ichdëu jãsene aajemta maach Pörkhapijim,  
\v 14 ich Ẽwandam dʉ̈i maach iekkhõr pöm narrjã ichdëuta ich bagau maach pekau chugpaapʉ̈iwia ich dënkha autarr aawai. 
\s1 Cristoou ich thõopibarmua Ẽwandam dʉ̈i khõinaa apitarr 
\p  
\v 15 Ẽwandam chan maadëu pöd ooba aajem, mamʉ Cristo ich Aai dʉ̈i khĩir ãba sĩerraawai ʉ̈u i gaaimua khaphʉ nʉm jãga sĩerrʉ́ Ẽwandam chi Aaijã. Ichta nem thum ompaaju nawe ich Aai dʉ̈i sĩerr aawai ichta nem thum thʉnʉm Pörkha sĩerrʉm.  
\v 16 Nem thum maadëu daúa oonaa pöd ooba aajempa mʉg jẽb gaaim maimua ʉ̈gtharm magwe thʉnʉmjã Ẽwandamau i gaaimuata ompaajim: reinaan, maimua edjã eem magwe Ẽwandam chognaanjöm; magʉm khʉʉnta amachta ʉ̈rpainaa iek theegnaa jua theeg sĩsidʉm khʉʉnjã ichdëuta thum ompaajim, magʉm khʉʉnagjã ichdëu ig simjö ich ipierraa amkhĩir.  
\v 17 Ich Cristoon mag nem thum mʉg thʉnʉm ompaaju nawe sĩerrʉm; ichdëuta mag nem khĩir pogkhe thʉnʉmjã thum amach sĩsid ajupierr sĩumajim.  
\v 18 Mamʉ magpaijã khaba, ich Cristota iglesia Pöröu, maagwai jũrr chi iglesia sĩi i morou. Mag ichta warrgarwe sĩerrarrjö, iiu phiidʉju aigjã ichta ĩchab nacha phiidʉjim, magbarm gaaimua nem thum thʉnʉm khãaijã ichta ʉ̈rpainaa ichta ĩchab mag chi phiidʉtkhaju khʉʉn dʉ̈ijã ich mag chi Pörkha sĩerraag.  
\v 19 Ẽwandamau ich Iewaa Cristota pʉ̈ijim, ich Iewaa õor khĩir thegbarm gaaimua ichchata õor ee sĩeichemjö amkhĩir. Mag wounag pawiajã ichiita agtha ich Aai dʉ̈i simjö ich mag Ẽwandamkha sĩerrajim.  
\v 20 I gaaimuata ĩchab mʉg durr gaai thum õor thʉnʉmjã amach pekau gaaimua Ẽwandam dʉ̈i iekkhõr wai narrjã ʉ̈gtharm magwe thʉnʉm khʉʉnpa ich dʉ̈i khõinaa naapiju aai apijim. Ĩs mag i dʉ̈i khõinaa nʉmʉn, Cristoou maach peerdʉ awaag ich bag pakuls gaai ãrpitarr gaaimuata mag i dʉ̈i khõinaa nʉm.  
\v 21 Warr pãrau Ẽwandam khaugba aawain pãran chadcha okhoo naajim, mag pãach khaibag gaaimua i dʉ̈i iekkhõr paar narr aawai.  
\v 22 Pari ĩs ya magba, ich garmuata jũrr ich dʉ̈i khõinaa phë wai sim, mag Cristo wounag pawi ʉdʉraa ich thõopitarr gaaimua. Mag pãar ich dʉ̈i khõinaa apitarran, ich atheepai nem wau wënʉrrʉmua bʉ̈ʉrjã pekau chukhu, kulp chukhu ich aar phë awaagau.  
\v 23 Pari mag bʉ̈ʉrjã kulp chukhu ich aar pãach phë aupiegan, ich mag pãachdëu ʉ̈khatarr iek gaaita ubʉnaa ĩchab pãachdëu maach peerdʉajem iek ʉ̈khatarr edwe ich dʉ̈i ich mag nʉisijujã khaphʉ nʉisierr khĩirjugta khĩir okhooba wai wënʉrraju aai nʉm. Ich mʉg maach peerdʉajem pãrau ũrtarr iekpaita ĩchab durrpierr jaau nʉm; mʉchdëujã ich ag iekta jaau khitaajem. 
\s1 Pablo phidag judionaan khabam khʉʉn ee 
\p  
\v 24 Mag maach peerdʉajem iek jaau chitʉm gaaimuata mʉʉn mʉg dau aphʉʉ preso chirʉm. Mamʉ mʉch mʉg chirʉmjã jũrr pãachta ʉ̈u amkhĩir aawai mag aphʉʉ chirab mamʉ onee chiraajem. Mʉch mʉg wai nʉm gaaimuata, ich jãg Cristoou iglesia ich morkha sim athee ich dau aphʉʉ wai naawai ãwattarrjö, mʉchdëujã agjö i dënjö aju ẽkha chiraajem.  
\v 25 Mua khaphʉ chirʉm, Ẽwandamau mʉʉta ich iek ʉ̈kha nʉm khʉʉn juag oojemkha wai sim, pãar maar meeun khabam khʉʉnpa ʉ̈u amkhĩir. Mag phidagta ichdëu mʉrʉg deetarr aawai maach peerdʉajem iekta meerba muan thum jaaumaajem;  
\v 26 ajapcharan warrgarwe Ẽwandamau ich mag bʉ̈ʉrjã õrag jaauba sĩi ichdëupai khaphʉ wai sĩerrma; magtarr ĩsta ya ich dënkha nʉm khʉʉnag khaugpibarm.  
\v 27 Magta pãarjã i dënkha nʉm khʉʉn aawai maar meeun judionaan khaba awiajã Ẽwandamau pãragjã khaphʉ apibarm, jãga mag Cristo maach thãar ee sĩejemta mʉg atag ʉ̈gthar paaukhawijã oo wai wënʉrraju.  
\v 28 Mag Cristota muan sĩi ikhõrjã khaba õrag jaau khitaajem, ich Ẽwandamau mʉchig khĩirjug deetarrdamau am wawimamua; ajapcharan Cristoog sĩi khaibag chukhu ajappha khithëemta irig ich jua eecha phëdeegma.  
\v 29 Magaag atheeta mʉʉn maach peerdʉajem iek jaau chirʉm, magaagjã ich Cristo jua theeg mʉ gaai simuata mag jaaupi sĩewai. 
\c 2  
\p  
\v 1 Mʉch mag chirʉmuata pãrag khap apim khõsi chirʉm, chadcha dʉ̈rrcha Ẽwandamag jëeu chiraajem pãar kõit, Laodicea iglesia eem khʉʉn kõit, maimua khĩircha mʉchdëu ooba aajem khʉʉn kõitpa jëeub khaba jëeu chiraajem.  
\v 2 Mag Ẽwandamag jëeu nʉm gaaita ogdʉba chiraajemʉn, pãach thãar onee amkhĩrau, ich jãg agdaujö dich khapeen kha khõsi wënʉrrʉmua warag khĩirjug paarpamaawai Ẽwandamau ich appaimua khaphʉ sĩerrta pãachdëujã ajapcha khaugmamkhĩir; ajapcharan pãar maar meeun khabam khʉʉnagjã Cristota ajapcha khap amkhĩirma.  
\v 3 Ãba mag Cristo khaphʉ nʉm gaaimuata chadcha ichdëu nem waupim khõsimjã waau khaphʉ waaujem.  
\v 4 Mua mag chirʉmʉn, pãachig ãbmua khãijã i wajaug aadee iwiir ãbamʉgjã sĩi pãach khũgurpimaaugauta mag chirʉm.  
\v 5 Chadcha khĩircha chan pãar aar khaba chirab mamʉ, mʉ akharan pãar aar simjö sim. Magua ĩchab mʉ onee chirʉm, mag pãrau nem parhooba wauba sĩi pãachdëu Cristo iek ʉ̈kha nʉm gaaita ubʉ nʉm a ũr chiraawai. 
\s1 Cristo gaaimua Ẽwandamau iiupi auwi õor iiurkha nʉm 
\p  
\v 6 Magua muan pãragan, ich jãg warrjã maach Pör Jesucristoog pãach peerdʉ aumkhĩir i igtarrjö warag i kha ogdʉbata nʉisit a chirʉm.  
\v 7 Mag i kha ogdʉba aagan, pa jẽb ee ajap khaarkhamaajemjöta warag i gaai ubʉ ajuuta ẽkhanaa warrcha pãachig jaautarr iek ogdʉba ʉ̈kha nʉmuata i gaai thierrkhabat. Mamʉ mag nʉmjã nem thumaam paar Ẽwandamagta ʉ̈u ajim abat.  
\v 8 Khĩir khaphʉ abat keena: ar jãg sĩi mʉg jẽb gayam khĩirjugta chadam iek awi aata õrag jaau nʉrrjëem khʉʉnag oob ʉdʉʉr pãach khũgurpimiet. Jãkhʉʉn chan Cristo iekjã jaauba, sĩi maachjöpaim khʉʉn khĩirjug dʉ̈i ar meperau khõsimjö Cristo ichaaur aajem khĩirjugta jaau wënʉrrʉm. 
\p  
\v 9 Mamʉ Ẽwandam khaugaag chan pãrau magʉm khĩirjug igba nʉm, Cristo wounag pawi maach ee pʉ̈itarr gaaimua Ẽwandamau warre ichchata khaphʉ apitarr aawai.  
\v 10 Mag Cristota amau jaau nʉm angelnaanjöm wa mepeenjöm jua theeg sĩsidʉm khãaijã ichta ʉ̈rpai sim dʉ̈ita pãar õor ãbamkha naawai, ich Ẽwandamchata ya pãach dʉ̈i wai nʉm.  
\v 11 Ich mag Cristo iekta pãrau ʉ̈khabaawai ichdëuta Ẽwandam athee pãrag nem waau khaugpijim. Mamʉ mag pãar i dau na ʉ̈u nʉisim chan sĩi maar meeunjö dich khakhua gaai dauchach nʉmua khaba, pãar thãar ajaug paabapʉ̈imuata magpijim, pãachdëu nem khaigbam waaujerrjã tag waupimapha abarmua. Mag Cristoog dich thãar ajaug paapi nʉmta irigan dauchach charau, chadcha Ẽwandam atheepai wënʉrraawai.  
\v 12 Pãach pör choopi nʉm ed pãar warre Cristo dʉ̈icha ãbam jẽbdeg aukhërbarmjö ajim, ajapcharan mag chi khëchamjö nʉisiewai pãachdëu nem khaigbam waaujerr isegpʉ̈iwia tag wauba aag. Magnaa ĩchab pãrau Ẽwandamau ich Cristo phiriu autarr jua theegjã ʉ̈kha naawai warre ich Cristo dʉ̈ichata iiu phiidʉtkhabarmjö ajim, ich ag jua theegau ichdëu nem waupim khõsimpai wau wënʉrraag.  
\v 13 Warran sĩi pãachdëu nem khaigba wau narr gaaimua pãran chadcha sĩi okhoota naajim Ẽwandam na. Mag nʉm dʉ̈i ĩchab ni judionaanau aajemjö pãach ajaug paaju awi pãach khakhua gaai dauchachjujã bʉ̈ʉrjã khĩirjuba aajeejim. Mamʉ mag okhoo narrta ĩs Cristo gaaimua Ẽwandamau pãar khaibag thumaa chugpaapʉ̈iwi ich Cristojö ich mag iiu wënʉrrapiju aai apijim.  
\v 14 Mag pekau gaaimua i dʉ̈i kulp pöm narrta warre ichdëu chugpaapʉ̈ijim. Magbarm aigta mag Moiseeu phã pʉatarr leíu Ẽwandamag maach khaibag waupi jaau simjö sĩerrjã warre ichpata dʉ̈i pakuls gaai meerpbapʉ̈imjö abaawai warre maach chig aju khaba sĩsijim.  
\v 15 Meperau ich jua theegau õor thum ich athee phë wai sĩerrjã Cristo thumaam khʉʉn dakhĩir pakuls gaai jiir jöisim thumaam khʉʉnag oopibarmua Ẽwandamau warre mag chi mepeer pödpʉ̈ijim, i jua ee narr khʉʉnjã chadcha peerdʉju ayaa amkhĩir öbeerkha athamua. 
\s1 Ʉ̈gthar naaimaju khʉʉnjö wënʉrrajuuta ẽkhabat 
\p  
\v 16 Mag leíu maach kulp pöm nʉm jaau sĩerr jua eemta ya Cristoou öbeer autarr aawai, mag ley igwi ãbmuajã pãraujã maar judionaan dënjö aju aai nʉm awi, nem inag khönaa dödöjö dö nʉm oowi, wa maarjö tagam nem phiesta ed, ed jop nʉm ed wa jua ʉ̈ʉijem ed khãijã ʉʉrkhaba nʉm oowi, jãga aju aai nʉ a jaauju khaba nʉm.  
\v 17 Warrgar Ẽwandamau maar judionaanag mag ʉʉrkhapiejerr chan ich mag kha wënʉrramkhĩir khaba, sĩi Cristo bëe nʉm orapai ʉʉrkhamkhĩir ajim. Ajapcharan magʉm kha nʉmua jãga ichdëuta am peerdʉ auju a khap apieg ajim.  
\v 18 Ar jãg amachdëuta ajapcha ʉ̈kha nʉm awi pãachig, “Maar dënjö Ẽwandam chognaanagpa jëeuba naawai pãar chan agtha ajapcha khaba nʉm” a iekhaawai, oob am iek asekasmiet. Jãgʉm khʉʉnaun, Ẽwandamau amagta nem inagjã dau daau oopiejeewai amauta pãar khãaijã khapcha nʉm anaa, sĩi amachdëu nem khaphʉmta thö iyʉ̈ʉ sĩerrjëem.  
\v 19 Mamʉ mag nʉm chan Cristota chi ʉ̈kha nʉm khʉʉn Pörkha sim dʉ̈i khaba nʉmta mag nʉm. Maachigan Cristoouta warag ich iek khaugpiejem, thachdam khö nʉmua chaain dʉ̈rrpamaajemjö. Ich jãg maach padamjã ichdëuta thumaa sõpigkha wai sĩejemjö, maach ich iek ʉ̈kha nʉm khʉʉnjã ichdëuta õor ãbpaimkha wënʉrrapiejem, warrgarwe ichdëu magpiju atarrjö, iwiir ãbmuajã chikham igbam aba.  
\v 20 Ya pãrau tag parhoobam khĩirjug õrau jaau nʉm ʉʉrkhaba aag chadcha Cristo dʉ̈i meewi nʉmjö naawai, meperau maach khũguraag ẽkhaajemjö amau maach peerdʉju awi nem waupi jaau nʉmjã ipierraa aag khaba nʉm. Mag nʉmta, ¿khan jãgwi agtha Cristo khaugba wënʉrrʉm khʉʉnjö  
\v 21 nem parhoobam gaaijã pʉrju khaba, nem parhoobamjã khöju khaba, ni sĩi amau jaaujemjö nem inagjã parhooba dich jua ee pöd pʉrju khabamta agtha ʉʉrkha wënʉrraajẽ?  
\v 22 Jãgʉm nem sĩi mʉig eegar õor maachjöpai thʉnʉm khʉʉnau amach iiupai jaau nʉm khabahab. Magʉm nem sĩi bʉ̈ʉr abarmua chukhu aadeejeewai sĩi magʉm khoojerr gaaimua wa magʉm ʉʉrkhaajerr gaaimuapai chan Ẽwandamau maach aubaju.  
\v 23 Par daúapai oowain, chadcha amau jaau nʉm ʉ̈uumjö sĩsidʉm, Ẽwandam dawagaa amkhĩir nem wau nʉm dʉ̈i dichta thumaam khʉʉn khãaijã serbiibanaa dichdëupaijã dich dau aug khaugpiba jaau naawai. Pari mag nʉm chan pöd bʉ̈ʉrjã nem khaigbam wauju khõchag chugpaa aubajuuta mag jaau nʉm. 
\c 3  
\p  
\v 1-2 Ya pãar Cristo dʉ̈i iiu phiidʉtkhawi nʉmjö naawai chadcha ʉ̈gthar Cristo Ẽwandam juachaar gar chi Pörkha sim aar naaimaju khʉʉnjö wënʉrrajuuta ẽkhabat, mʉig eegarm nemta atcha khĩirjuba.  
\v 3 Pãran ya nem parhoobam wauju khĩirjug isegtarr khʉʉnau. Magtarr aawai pãran Ẽwandamau ich aar phë auwia Cristo dʉ̈i ãba jooba wënʉrrapiju khʉʉnau.  
\v 4 Mag Cristo dʉ̈i ãba jooba wënʉrraju khʉʉn aawai ich Cristo bëewi ichdëu ich ajaug thumaam khʉʉnag oopibarm ed pãar ichdëu ajaug paa atham khʉʉnta ichdëu ich dʉ̈i ich mag phë wai sĩsiju. 
\s1 Warram khĩirjug isegpʉ̈iwi khĩirjug iiurta au nʉm 
\p  
\v 5 Magua, nem khaigbam wauju khõchagjã warre pãach gaaimua khecheunaa barbapʉ̈imjö abat. Ni ãbmuajã ich õor khabam dʉ̈i khapes am, Ẽwandamau oowai maach inaam nemjã tag waum, warr ich khõchag aig nem waunaa warag bigaaum khʉʉnta chigaa apiejerrjã oob tag agjö am, ni oob phatkhonagjã wʉrpa am; phatkhon khĩragta wʉrpa nʉmʉn nem parhoobamta ẽwandamkha waunaa agʉg jëeu nʉm dʉ̈i ãba sim.  
\v 6 Magʉm nem parhooba wau nʉm khʉʉn gaaita Ẽwandamau jua khʉaba deeb khaba deeju, ich ipierraa khaba aawai.  
\v 7 Warran chadcha pãrau magʉmta waaujeejim;  
\v 8 mamʉ ĩs ya pãar magʉm athee khaba nʉm. Magua muan pãragan mag chirʉm: pãach khõrg pʉabat; khĩir machagjã isegbapʉ̈it. Chikham khaibag wauju, chikham khĩir khĩir mor chigpai iekha nʉm, iparii iekha nʉm, jãgʉm thum warre isegbapʉ̈it a chirʉm.  
\v 9-10 Warr pãachdëu parhoob nem waaujerrjã ya khajũa sörjö isegpʉ̈iwi jũrr khĩirjug iiurta wai naawai oob chikhamnag sëukhamiet. Mag khĩirjug iiur ich Ẽwandamauta deetarr aawai, maach mag khĩirjunaa irua khõsimjö wau nʉm khʉʉnan i khĩir thegmamua warag ajaug pamam dʉ̈i ajapchata i khaphʉ paaukhamam.  
\v 11 Pãar mag naawai ni ãbmuajã ich ajaug thöju khaba sim: judioou wa judío khabamua, mehëu thʉʉ simua wa thʉʉba simua, chi durrkhʉʉu wa durr chaauramua, agtha chikham chogkha simua wa chikham chog khaba simua, chi khapcha simua wa khaugba simua, ni ãbmuajã maata iwiir ãb ʉ̈rpai sim aju khaba sim. Magʉmta khĩirjuju khãai dichdëu Cristo wai simta nem thum thʉnʉm khãaijã ʉ̈rpai sim khaphʉnaa ichpaita ĩchab thum ich iek ʉ̈kha nʉm khʉʉn ee sĩejemjã khap aju aai nʉm.  
\v 12 Ẽwandamau pãar khõsi sĩewai pãarjã ĩchab ich õor khamkhĩir ichdëuta pãar jʉr aujim. Magua, ich jãg ich garmua pãach jʉr autarrjö agdaujö chikham dau aug khaug paraa aajeethʉ̈, agdaujö ö ajapha. Dichta chikham khãai ʉ̈rpai aju ẽkhaba dau maata abat, dich dʉ̈i khaigba aawaijã magʉm igba sĩi warag khĩu jʉmpʉ̈pʉ̈i aa khaphʉ.  
\v 13 Mag agdaujö ãwaat khaphʉnaa iwiir ãb khãijã bibigag paraa sim khai, agdaujö perdonaawi magʉm iek tag igba warre khĩir okhoobapʉ̈it. Ich jãg maach Pör Cristooujã maach perdonaatarrjö, pãachdëujã agjö pãach khapeen perdonaabat.  
\v 14 Pari mag mua jaau chirʉmjö wënʉrraagan, pãach khapeen daupii aju khĩirjugta ʉdʉraa pãach gaai ʉ̈rpapibat. Magta amʉn, pãachjö dʉ̈i ʉ̈kha durrum khʉʉn thum Ẽwandamau oowaijã i dawagaa wënʉrraju, ö ãba.  
\v 15 Ĩchab mag nʉm dʉ̈i Cristoogta warag ʉdʉraa pãach khõinaa apibat, mag wënʉrrʉmua Cristo mor gaai õor ãbpaimjö khõinaa wënʉrramkhĩirta warrjã Ẽwandamau pãar ich dënkha autarr aawai. Mag Ẽwandamau pãach ich dënkha auwi pãach wir aigjã khõinaa api sim paar irig ʉ̈u ajim abat. 
\p  
\v 16 Agjö ĩchab Cristoou maach peerdʉ aaujem iek pãachdëu khaugtarrta khĩir okhooba ich mag pãach thãar ee wai nʉisit. Mag iek warag khaugmaag, khĩirjug khaphʉta jũrr agdaujö pãach khapeenag jaaupetat. Mag nʉm dʉ̈i ĩchab wawimamua jũrr agdaujö chikham khĩir onee apibat. Chadcha thãraucha Ẽwandamag ʉ̈u ajim anaa irig meukharau Salmos aunaa deeum meukhaarjã i jʉ̈gaagaamta aubat.  
\v 17 Mamʉ magʉm nem thum pãachdëu jaauwai wa waauwai khãijã, chadcha maach Pör Jesús dënkha naawai, ichdëu waupim khõsimjö waum khõsita waubat. Magnaa ĩchab ich Jesús gaaimua ich Ẽwandam chi Ayagjã ʉ̈u ajim abat. 
\s1 Jãga Ẽwandamau khõsimjö aju aai nʉ dich khapeen dʉ̈i 
\p  
\v 18 Ʉʉin jaainpan, pãach jaainau pãachig nem mag aawai oob pãachta am khãai ʉ̈rpai aju ẽkhamiet. Pãarjã maach Pör Jesús iek ʉ̈kha nʉm khʉʉn aawai pãach jaainagta ʉdʉraa pãach phẽethʉgpiju aai nʉm.  
\v 19 Mamʉ pãach chi jaainaujã mag pãachta am khãai ʉ̈rpai nʉm awi, oob am dʉ̈i pãachdëu am aig amiet; magju khãai warag pãach ʉʉindam jãsehneta abat. 
\p  
\v 20 Chaaina, pãraujã agjö, pãach dënnaanau pãachig nem jaau nʉmpierr am ipierraa ajuuta ẽkhabat; maach Pör ʉ̈gthar chirʉmuajã magta ʉ̈uu oojem.  
\v 21 Mamʉ pãach chi dënnaanaujã oob khĩir masi amag meeurrarrau amiet; magta amʉn, eeu warag meeukhawi amachig nem jaau nʉmjã ʉ̈khamapha adukham. 
\p  
\v 22 Ar mʉg jẽb gaai sĩi chikham chogkha nʉm khʉʉn, pãach patronnaanau pãachig nem jaau nʉmpierr am ipierraa abat. Mamʉ mag am ipierraa nʉm chan mag sĩi pãach dʉ̈i aairaa amkhĩir pãach oo naawaipai khaba, am meer awiajã ichiita chadcha nem waum khõsi ich magta abat, maach Pör Cristo dau na nem khaigba wauju ökhö.  
\v 23 Mag nem waauwaijã sĩi õor atheepai wau nʉmjö khaba, ich maach Pör Cristo atheechata wau nʉmjö pãachdëu nem wau nʉm thum waum khõsita waubat.  
\v 24 Pãrau khaphʉ nʉm, pãachdëu magta nem wau nʉm jũrran maach Pör Cristoou pãragjã ich dʉ̈i ãba ich durr gayam nem jʉ̈apiju, mag pãach pörkha nʉm khʉʉnau nem jaau nʉm waum khõsi wau nʉm aig maach Pör chaar ich Cristo atheepata wau naawai.  
\v 25 Mamʉ magba ar nem khaigbamta wau nʉm khʉʉnan mag amachdëu nem parhooba aajerr jũrr ich Ẽwandamauta agjö am dʉ̈i ichdëu khap aju. Irig chan iwiir ãbjã warm khʉʉn khãai ajapcharam chukhum, nem khaibag wauba aag. 
\c 4  
\p  
\v 1 Magua pãar ar chognaan wai nʉm khʉʉn, pãach chognaan dʉ̈i agpierraa abat. Pãran chadcha am pörnaanau, mamʉ khĩir eyaa abat: ĩchab ãb thumaam khʉʉn khãaijã ʉ̈rpai sĩerrʉmua pãarjã oo sim ʉ̈gtharmua; ma ĩchab pãar Pörkha sim.  
\v 2 Ẽwandamagta jëeu nʉʉ jëeu nʉʉ abat. Mag jëeu nʉmua ĩchab irig ʉ̈u ajim abat.  
\v 3 Maar kõitjã maach Pör Ẽwandamag jëeubat keena, warag ich iekta jaauju ayaacha apinaa jãga Cristoou õor peerdʉ aaujẽ a jawaag. Mag Cristoou õor peerdʉ aaujem iek õrau khaugba aajerr jaau chitʉm gaaimuata mʉg mʉ preso chirʉm.  
\v 4 Maimua sĩi mʉ kõitpaijã jëeubat keena, mua i iek jaauwai ajapha mʉchdëu jaauju aai chirʉmjö warre dawaacha jawaag.  
\v 5 Ar maach dënjö Cristo iek ʉ̈khaba nʉm khʉʉn dʉ̈i iyʉ̈ʉ aawai, wa nem waauwai khãijã, ajapha khĩirjunaata iekhabat. Maach peerdʉ autarr iek jaauju ayaampierr jũrr khaugbam khʉʉnag jaaubat.  
\v 6 Mag am dʉ̈i iyʉ̈ʉ aawaijã am jʉ̈gaagaata iekhabat, warag amag ũrm khõsi ũrmkhĩir. Mamʉ ĩchab amachdëu khaugbam pãachig jëeuwaijã ʉ̈khaa khaphʉ aag mag pãachdëu jaau nʉmjã ajapha khaphʉ abat. 
\s1 Ãbmiecharam salud 
\p  
\v 7 Cristo gaaimua maach khodam maachdëu i chig amapha aajemua pãrag jaauwimaju, mʉ mau jãga chirʉ́; ajapcharan Tiquicoouma. Ich mʉg ermanodaman ichig nem jaaubarmjã chadcha ich agpierr wai jẽedʉ khitaajem; magua ĩchab ʉ̈u mʉ dʉ̈i maach Pör Cristo athee mʉig phidkha khëraajem.  
\v 8 Magua mua iita pʉ̈i chirʉm, mʉig maach jãga naajẽ a jaaubaimaawai pãach khĩir onee amkhĩir.  
\v 9 I dʉ̈i mam ĩchab Onésimo, pãach aram woun agjö maadëu jãsene aajem. Jãjã agjö ichig nem mag abarmʉn ag ipierr wai jẽedʉ khitaajem. Amach numiim khʉʉnau amau pãrag jaauwimaju, jãga durrú mau maach chi ʉ̈kha nʉm khʉʉn. 
\p  
\v 10 Mʉ khapeer Aristarco mʉig mʉ dʉ̈i cárcel deg khëraajemuajã pãrag salud aajem; Marcooujã agjö salud aajem, ajapcharan Bernabé i primoouma. Ya Marcos igwi mua pãachig jaaupʉ̈itarr aawai ya pãrau khaphʉ nʉm, pãach aar baarwai ajapha i recibiibat.  
\v 11 Maach khodam Jesús ibʉʉr wauwi Justo aajemuajã salud deepʉ̈i sim. Mʉig judionaan chi ʉ̈kha durrum khʉʉn ee mʉkhʉʉn thãrjuppaim khʉʉnauta ʉ̈u mʉ ipierr jaau durrum, Cristota amach thãar ee auwi irigta ʉdʉraa amach Pörkhapimkhĩir. Magua amauta ĩchab ʉ̈u mʉ khĩirdam jãsenkha wai naajem.  
\v 12 Mag tag ĩchab pãach aram woun Epafras Jesucristo chogkha phidkha khitʉmuajã pãrag salud deepʉ̈i sim. Ich mag ichdëun pãar kõit Ẽwandamag jëeu khitaajem, pãachdëu ʉ̈khatarr iek gaai ubʉnaa thumaa ich Ẽwandamau khõsimjöta waumkhĩir.  
\v 13 Mua mʉch daúacha mag pãar kõit jëeu sim oojeewai khaphʉ chirʉm, irua chadcha dʉ̈rrcha pãar khĩirjuajem. Mamʉ ajapcharan pãar appai khaba, Laodicea ee chi ʉ̈kha durrum khʉʉnjã khĩirjunaa ĩchab Ierápolipienjã ich agjö khĩirjuajem.  
\v 14 Mʉig doctor Lucas maadëu i chig apimapha aajemuajã pãrag salud deepʉ̈i sim, maimua Demas anʉmuajã agjö.  
\v 15 Mag tag ĩchab tagam ermanonaan Laodicea nʉm khʉʉnagjã salud deebat. Ermana Ninfaagjã saludaanaa i di aig Ẽwandamag jëwaag ãba biirdʉajem khʉʉnagjã salud deebat.  
\v 16 Mʉg ẽsap cha mua pãrag deepʉ̈i chirʉm pãachdëu ya ajapha thʉ̈rbapäaiwai jũrr Laodicea phöbör ee agjö ʉ̈kha durrum khʉʉnag deebapʉ̈it, amaujã amach aar ag gaai thʉ̈ramkhĩir. Maagwai am aar pʉ̈itarr jũrr pãach aig deebaicheewai agjö ag gaai thʉ̈rbat.  
\v 17 Arquipoog mʉ imeerba muata irig “Maach Pör Cristoou ichig phidag deetarr gaaita ich jãg ogdʉba phidkha chitá” a jaaupʉ̈i chirʉm abat.  
\v 18 Mʉg ẽsap mʉchdëuta pãrag deepʉ̈i chirʉm khap amkhĩir, mʉg ãbmiecharam saluddam mʉchdëuchata mʉch juadamaucha phã deepʉ̈i chirʉm, ajapcharan mʉch jöoi Pabloouma. Keena, mʉg mʉ preso chirʉm khĩir eyaanaa mʉ kõit jëeubat. Mʉch garmuajã pãar kõit jëeu chiraajem, Ẽwandamau ʉ̈u pãar eeg oomkhĩir. 
\p Magdampai ajim mua pãrag jaaum ig chirarr. Ayoo keena, 
\cls Pablo