\id 2TI - Waunan (Woun Meu) NT (alternate orthography) -Colombia 2011 (DBL -2013) 
\h 2 TIMOTEO 
\toc1 Biek numiim ẽsap Pabloou Timoteoog phã deepʉ̈itarr 
\toc2 2 Timoteo 
\toc3 2 Ti 
\mt1 2 TIMOTEO 
\mt2 Biek numiim ẽsap Pabloou Timoteoog phã deepʉ̈itarr 
\ip \bd Chi phãtarr.\bd* Mʉg biek numiim carta Pabloou Timoteoog phã deepäaiwai chi Pablo deeu preso sĩejim aajem, Roma phöbör ee. Maig khërʉmua jöoyau ya ich pöm khitabajujã khaphʉ sĩejim anaabá (4:6). Mag jaar Cristo iek ʉ̈kha durrarr khʉʉn ajappha dau aug waaujeejim anʉm, mag amachdëu ʉ̈kha durrum gaaimua. Mag nʉm eeta ich Pablojã ĩchab deeu Romapienau i pʉr auwi sĩi õor thõotarrjö cárcel deg pʉ̈ijierram aajem (2:9). Maig paawai i khapeenaujã i bar pʉawi ãba jöoi Lucas appaita i daumaai sĩejim aajem (4:10-11). 
\ip \bd Khaígta phã deepʉ̈ijĩ maimua khan jawaag ajĩ.\bd* Chamʉg carta gaai iek jaaupʉ̈itarr iekhan ya jöoi Pablo ich meeju athee ãbmiecha iekhapʉ̈itarrau. Mamʉ mag ich dau aphʉʉ ajuuta ʉ̈rcha khĩirjunaa aata jaaupʉ̈iju khãai, chi ʉ̈kha durrarr khʉʉn ichdëu ajapha naapim khõsi simta jaaupʉ̈ijim. Timoteota Efesoom pastor arr aawai iruan Timoteoou ich iglesia ee nemdam waauwaijã thumaata ajapha öbërpim khõsi aajeejim anʉm. Magamkhĩirta ya ichdëu tag i oobaju khaphʉ sĩerr aawai ajappha wawipʉ̈ijim mʉg ẽsap gaai. 
\c 1  
\s1 Salud 
\p  
\v 1 Mʉʉn Pabloou, Jesucristoou ich i jaaumkhĩir jʉr autarr. Mag jʉr auwi, Ẽwandamau ich khĩrau mʉ pʉ̈im khõsi pʉ̈ijim, ich iek jaaumamua warrgarwe thãrau ich iek ʉ̈kha nʉmʉn Jesucristo gaaimua irua peerdʉ auju a jaautarr iek õrag jaaumkhĩir.  
\v 2 Timoteo, pʉʉta mʉch chaaijö daupii wai chitaawai pʉrʉg mʉg ẽsap phã deepʉ̈i chirʉm. Muan Ẽwandam maach Ayau maach Pör Jesucristo dʉ̈imua pʉ dau aug khaug paraanaa pʉ ʉ̈uu wai nʉm dʉ̈i khõinaata pʉ wai wënʉrrapim khõsi chirʉm. 
\s1 Chigag chukhu Cristo ig iyʉ̈ʉ aju aai nʉm 
\p  
\v 3 Timoteo, pʉ igwi khĩir eyaanaa edaram magwe Ẽwandamag ʉ̈u ajim a chiraajem, irig jëeupierr. Mua mag irigpaita jëeunaa ãba i atheepaita phidkha chitʉmʉn, ich jãg warrgarwe ĩchab mʉch jöoinau aajerrjö Jöoi dau najã mʉch khĩirjug ajapha chirʉm khapta mʉg phidkha chitʉm.  
\v 4 Agtha khĩir eyaa wai chitaajem, ar maach ayoyoo khaawai pʉ dauhi paraa thʉnarr. Magarr aa deeu pʉ dʉ̈i oom khõchag chirʉm, mag oobaawai onee chirsieg.  
\v 5 ¿Khan jãgwi mua mag chirʉ́? Mua mag chirʉmʉn, pua chadcha pʉch thãraucha Cristo iek ogdʉba ʉ̈kha sim mʉchdëu khaphʉ chiraawaita mag chirʉm. Ich mag ʉ̈khaajeejim pʉ ãdhũan Loidaau pʉ ãd Eunice dʉ̈imua. Maagwai mua khaphʉ chirʉm, puajã ich agjö ʉ̈kha sim. 
\p  
\v 6 Mag gaaimua mua pʉ wawí chirʉm: Ar mʉchdëu pʉ ʉ̈r jua ausĩubaawai Ẽwandamau pʉrʉg ich jua theeg deetarr, oob sĩi ich jãg par wai chitam. Magaag warrjã agua phidkhamkhĩirta Ẽwandamau pʉrʉg mag ich jua theeg deetarrau.  
\v 7 Irua maachig ich Akhaar chi jua thierrta deebajieb, õrag inag chukhu ich iek jaaumkhĩir. Mag Akharauta maachig dich khapeenjã kha khõsi apinaa nem waauwaijã wajapha khĩirjunaata nem waupiejem.  
\v 8 Timoteo, oob pʉchdëu maach Pör Jesucristo khaugtarr igwia õrag jaauju chigaa chiram, ni Cristo gaaimua mʉ mʉg preso chirʉm õrag jaaujujã oob chigaa am. Magju khãai Ẽwandamau pʉchig juapadam deetarrau warag mʉ ipierr dʉ̈i maach peerdʉajem iekta jaaum khõsi jaaubá, agʉm gaaimua pʉch aphʉʉ ajujã khĩirjuba.  
\v 9 Ẽwandamaun maach peerdʉ auwi sĩi pekau chukhu ich atheepai wënʉrramkhĩirta maach jʉr aujim. Mag maach jʉr autarr chan mag ichdëu oowai maachdëu nem wajapha wau wënʉrrʉm gaaimuajã khaba, warrgarwe ich Ẽwandamau mʉg durr thum ompaaju nawe ich garmua maach eeg oowia, Jesucristo gaaimua maach khĩir jãsenkhawia, ichdëu khõsi simjö wënʉrramkhĩirta maach jʉr aujim.  
\v 10 Mag warrgar maach khĩir jãsenkhatarran maach peerdʉajem Jesucristo pʉ̈itarr gaaimuata ĩs ewag pawiajã khaphʉ nʉm. Magtarr aigmua ich Jesucristoouta maach dajẽegjem jua theeg chukhu apʉ̈inaa jũrr maach peerdʉajem iekta ʉ̈rpai apijim. Magtarr aigmua ĩchab warr maach meewai ich mag okhoo wënʉrraju arrta ʉ̈gthar öbërju aai apijim. 
\p  
\v 11 Mag ich iek jaaujem khamkhĩirta Ẽwandamau mʉ jʉr auwi judionaan khabam khʉʉn ee pʉ̈ijim.  
\v 12 Magtarr aawai mag iek jaau chitʉm gaaimuata chadcha mʉg mʉ phithur da aphʉʉ chitaajem. Mag chitab mamʉ jãgʉm iek gaaimuata mʉʉn wajappha khĩir naau chitaajemjã aba chitʉm. Mua khaphʉ chirʉm, khai iekta mʉchdëu ʉ̈kha chirʉ́. Mag ãba Ẽwandam iekta mʉchdëu ʉ̈kha chiraawai i jua theeg simjã mua khaphʉ chirʉm. Maagwai ich aar mʉch thʉ̈r nʉm ora mʉch thʉa wai nʉrrajujã khaphʉ chirʉm. 
\p  
\v 13 Timoteo, ar iek wajapham maach Ẽwandam dën mua jaau chitarr ũrwi pʉchdëu khaugtarrta wajap khĩir eyaanaa agpierr chitá. Magnaa jãg pʉchdëu ʉ̈khatarr iek ich jãg ogdʉba ʉ̈khanaa, Cristoou ich garmua maach khõsi arr gaaimua i dʉ̈i wënʉrraawai, pʉch khapeen kha khõsi chitá.  
\v 14 Ẽwandam Akhaar maach ee sĩejem ag jua theegau Ẽwandamau ich iek pʉchig jaaupitarr wajaphata jaaubá; chikhamnagjã oob chaauraa jaaupim. 
\p  
\v 15 Pʉrʉg khap amkhĩir jaaukhim: Ẽwandam gaaimua maach khodkha thʉnʉm khʉʉn Asia durrmua mʉ dʉ̈i ãba bëetarr khʉʉnau ya tag mʉrʉgjã ooba mʉch appai mʉ barpʉajierram. Chi mag mʉ barpʉatarr khʉʉn ee Figelo Ermógenes dʉ̈i narrjã makhʉʉnaujã mʉrʉg ooba sĩi wëtjierram.  
\v 16 Onesíforoouta mʉg mʉ cárcel deg chirʉm oowia bʉ̈ʉrjã chigag chukhu biek khapan ʉ̈u mʉ khĩir jãsenkhaajerr aawai Ẽwandamag i kõit jëeu chirʉm, ich chaain dʉ̈i ich ʉʉipa eeg oomkhĩir.  
\v 17 Ichdëuta ich Roma barbaichëm bʉ̈rre, bʉ̈ ʉ̈ijã chukhu, mʉ jʉr phʉʉrdʉ khitʉʉ awi ʉ̈u mʉ chirʉm aar bëejim.  
\v 18 Pua mʉ khãyaujã wajapcha khaphʉ chirʉm, jãga i phidkhaajeejĩ Efeso phöbör ee sĩejeewai. Magua mua pʉrʉg tag jaaubam. Irua mʉch dʉ̈i jãgtarr jũrr, deeu ũmaai Cristo bëem ed Ẽwandamag i dau aug khaugpim khõsi chirʉm. 
\c 2  
\s1 Jãga soldaaunjö Jesucristo chogkhaju aai nʉ 
\p  
\v 1 Timoteo, pʉʉta mʉch chaai chaarjö wai chitaawai pʉ wawikhim: Pʉch khĩirjugaupai nem jaauju khĩirjuba Jesucristoou ʉ̈u pʉch eeg oowi pʉchig juapá deetarrauta i iek jaaubá. Pua magta amʉn, ich mag nem jaau chitʉmuata warag i dʉ̈i pʉ juapá jãpmaju.  
\v 2 Õor khapanag dakhĩir mua jaaujerr pʉchdëu ũrwi khaugtarr iek jũrr ar pʉchdëu oowai chadcha deeum khʉʉnagjã jaau wai nʉnʉʉu ajöjöom khʉʉnag jaaupet, magbaawai jũrr makhʉʉnau agjö deeum khʉʉnag jaaumkhĩir. 
\p  
\v 3 Pʉch chadcha Jesucristo chogkha chitʉm gaaimua bʉ̈ʉrjã pʉch dau aphʉʉ ajujã igba, soldaaunjö i chogkha chitá.  
\v 4 Pua khaphʉ sim, soldaaun abarm chan mag sĩi ich phidagjã khaugba nem parhoobam gaaita oo sĩi aba aajem. Magju khãai ʉ̈u ich pörkha simjã ich gaaimua onee amkhĩir, ãba ich phidag waujupaita khĩirjuajem, ich pör ichaaur aju khĩirjuba.  
\v 5 Maimua ĩchab jemkha nʉmua premio gaanjem khʉʉnjöta chitá. Pua khaphʉ sim, amau amach reglamento wai nʉm gaai jaau simjö jemkhabam chan pöd mag premio gan auba aajem. Magua puajã Ẽwandamau pʉchig jaau simjö nem thumaa wajaphata waubá.  
\v 6 Ich agjöta sĩebahab nemjĩir jĩirwaijã. Phidkhaba arr khʉʉnau pöd amachdëuta nacha ag eem khöju khaba nʉm. Juachö khaisö nem jĩir nʉm khʉʉnauta mod paarpaawaijã nacha ag eem khöju aai nʉm.  
\v 7 Cha mua pʉchig jaaubarm wajapha khĩirjubá. Pua mag wajapha khĩirjumʉn, maach Pör Jesucristoou pʉrʉg khĩirjug deeju, jãga ich iek jaauju aai sĩ a khap amkhĩir. 
\p  
\v 8 Mag mua jaau chirʉm khĩirjunaa warag jaaubá, jãga maach Pör Jesucristo rey David khararr ag chaain ewagam khʉʉn eemkha sĩerrta meewi deeu iiu phiidʉjĩ. Ich ag iekta muajã ich mag jaau chitʉm, ajapcharan maach peerdʉajem iekma.  
\v 9 Mag iek jaau chitʉm gaaimuata mʉg phithurg wau chitʉm dʉ̈i õor thõotarrjö ĩs warag mʉ preso wai nʉm. Mamʉ mʉg mʉ preso chirʉm gaaimua chan oob amau Ẽwandam iek mag aaidʉpimaaugau awi, cha mʉ wai nʉmjö ãbam aigpai i iek pʉr wai naaju amiet.  
\v 10 Maguata muan warag maach peerdʉajem iek aaidʉpim khõchgau, ich jãg phithurgjã igba ãwat chitaju, mʉg atag Ẽwandamau ich iek ʉ̈khapi aumam khʉʉndam ʉ̈u amkhĩir; mag Jesucristo gaaimua peerdʉ nʉisiewai ich mag i sim aar wënʉrramkhĩir.  
\v 11 Cha mua jaau chirʉm chan sëukhaawaijã khabam: 
\q1 Maach i dʉ̈i wënʉrrʉmta khëchmʉn, magan ĩchab ʉ̈gthar pawijã ich mag i dʉ̈i iiu wënʉrraju. 
\q1  
\v 12 I gaaimuata phithurg au wënʉrrʉmjã magʉm igba nʉmʉn, magan ĩchab irua durr jʉ̈a sim aar pawijã maach iek thethe wënʉrraju i dʉ̈i. 
\q1 Mamʉ maadëuta i iek ʉ̈khamapham iekhau i khaugbam amʉn, magan maach meem edjã agjö irua maach aubaju iekhau, “Muajã pãar khaugba chitʉm” aju. 
\q1  
\v 13 Iruata nem magju abarmʉn, ich magta aju ich igbam khʉʉn dʉ̈i. 
\q1 Maadëun dichdëu nem wauju atarr ichaau pawia wauba awiajã, ichin ich iekhatarrjö chadchata nem wau sĩerrʉm, pöd ich iekhatarr meerju khaba sĩerraawai. 
\s1 Jãga Ẽwandamau khõsimjö i chogkhaju aai nʉ 
\p  
\v 14 Timoteo, ar sĩi jãg maadëu igmapham iek igphöbaadëmjã pʉa chʉuu aajem khʉʉnag deeu phʉʉrba jaaubá, tag jãgʉm iek gaaipai ich jãg wënʉrram ugua. Jãgʉm iek chan bʉ̈ʉrjã maadëu nem igbata sĩsidʉm. Jãgʉm khʉʉnaun sĩi jãg iekha wënʉrrʉmua warag õor khaibagta wau nʉm.  
\v 15 Ãba Ẽwandam na wajapha chitajuuta ẽkhabá, wajappha i iek jaau khaphʉ jaau chitʉmua. Magaag atheen õor amach ajapha phidkha nʉm gaaimua chigag chukhu naajem khʉʉnjö abá, chadcharam iekta ag eyaa jaau chitʉmua. 
\p  
\v 16 Ar sĩi maadëu igmapham iek iyʉ̈ʉm khʉʉn aig dʉ̈i par iphithur iyʉ̈ʉ aju khãai, pʉchta warag chaaug pet. Pua khaphʉ sim, ar sĩi jãgʉm iekpai ig iyʉ̈ʉm khʉʉnan, sĩi amachdëupaita warag Ẽwandam na amach khaibag wau nʉm dʉ̈i  
\v 17 mag amau jaau wënʉrrʉm iek ũr nʉm khʉʉn khĩirjugpata warag ãr wënʉrrʉm. Imeneo dʉ̈i Fileto magta wënʉrrʉm.  
\v 18 Maguata amach mag wënʉrram khõchgau warag amachta mag maach Ẽwandam iek chaar eemuajã öbërdʉtkhawi sĩi nem parhooba jaau wënʉrrʉm. Mʉg atag ökhar maach phiidʉtkhajuuta am iek mag ya maach iiu phiidʉwi nʉm aajem. Magʉm iek ũrwi ãaur khʉʉnau ʉ̈u Cristo iek ogdʉba ʉ̈kha narrta ya warag iseg wëtum.  
\v 19 Par amau mag amach iphithur amach khõchagpierr jaau wënʉrrab mamʉ, Ẽwandam iek chan cambieba ich mag sĩerrʉm. Mag sĩewai ich iek gaai, “Maach Pör Ẽwandamau ich chaainan thum wajapha khaphʉ sĩerrʉm” a phãnaa ĩchab, “Thum maach Pör Ẽwandamag jëeu wënʉrraajem khʉʉnan amach khaibag isegju aai nʉm” a phã sim. 
\p  
\v 20 Pua khaphʉ sim, riknaan deg jua choogjem nem khĩir pogkhe thʉnaajem, phatkhon dën dʉ̈i phĩr dënpa. Pari mag appai khaba, pa dënjã paraanaa jẽb dënjã thʉnaajem. Am nem mag sĩsidʉm ãaur khʉʉn sĩi parhooba jua chogaagau; mamʉ ãaur khʉʉn chan mag sĩi parhooba ag ee jua chogaag khaba, kharii ich igam edta iigjem.  
\v 21 Mua pʉrʉg jaaukhim, mʉ iek ũrbá: Maach chan mʉg nʉm aig sĩi parhooba jua chogaag atheem nemjö khaba, nem wajapha wau nʉm gaaita maach Pör Cristoog ʉdʉraa dichta ich jua choogjem khapiju aai nʉm. Mamʉ magaagan i dau na bʉ̈ʉrjã khaibag chukhuta naaju aai nʉm. Mag khaibag chukhuta nʉmʉn chadau, irua ichdëu igam aig maach igju, ich athee nem wajapha waumkhĩir. 
\p  
\v 22 Timoteo, ar ẽwannaan amachdëu khõchagpierr nem waaujem khʉʉn khĩirjug oob pʉch gaai ʉ̈rpapim. Mag khãai ar par iiupai khaba chadcha maach Pör Ẽwandamag jëeu durraajem khʉʉn dʉ̈i chitʉmuata Ẽwandam dau na agcha chitaju ẽkhanaa irua nem khõsimpaita waubá. Maadëu ʉ̈kha nʉm iekjã bʉ̈ʉrjã ogdʉba ʉ̈khanaa dich khapeenjã thumaa kha khõsi abá, am dʉ̈i khõinaa chitʉmua.  
\v 23 Mamʉ ar maadëu igmapham iekta parhooba jaau wënʉrraajem khʉʉn dʉ̈i chan oob am ipierr dʉ̈i magʉm gaai par pʉch iphithur iyʉ̈ʉ chitam. Ya pua khaphʉ sim, jãgʉm iek gaaimuan sĩi warag chikham ipeer ahaujii awi, warag khĩir khʉʉukha phöbaadëp aajem.  
\v 24 Pua khaphʉ sim ĩchab, maach mʉg maach Pör Jesucristo chogkha nʉm khʉʉn chan pöd dich khapeen dʉ̈i meeukha nʉrrjëe aju khaba nʉm. Mag khãai thumaam khʉʉn daar wajaphata wënʉrraju aai nʉm, Ẽwandam iekjã wajapha jawaag.  
\v 25 Mag jaauwaijã ar warag chaaur ʉ̈kha ʉ̈kha sĩerrjëem khʉʉnagjã jaau khaphʉ ithũu jaauju aai sim. Maadëu khaugbam, mag ithũu jaaumam gaaimua khãijã Ẽwandamau am khĩirjug ichig khĩirjupi auju. Mag akhiin khaugbaju arr khãijã ʉ̈u Ẽwandam iek chaar khaphʉ aadeewai  
\v 26 meperau sĩi ichdëu nem khõsimpierr waumkhĩir ich las ee khõokha wai simjö narrjã ʉ̈u peerdʉtkhaju. 
\s1 Jãga thʉnaaju khai Ẽwandamau mʉg durr i agkhaimʉʉ paawai 
\c 3  
\p  
\v 1 Timoteo, ĩchab khaphʉ abá: Mʉg atag ya Ẽwandamau mʉg durr i agkhaimʉʉ paawai warag Ẽwandam iek ʉ̈khajujã phithuurga aju.  
\v 2 Mag jaar paawai õrau amachpaita wir aig khĩirju sĩsid aju. Mag nʉm dʉ̈i phatkhonagta eenaa ĩchab wir aig amachpai thö iekhaju. Ẽwandam khõchkhaba warag parhooba chaaur iekha sĩsidnaa, dënnaanpan amach dënnaanau iekhaawaijã warag dʉ̈i ʉ̈kha ʉ̈kha sĩsid aju, amach dʉ̈i ajapha aajerrjã deeu ewag khĩirjuba. Mʉg maadëu ʉ̈kha nʉm iekjã õrau ʉ̈khamaaugau warag amachdëu ampierr aju:  
\v 3 dich dënnaan dʉ̈i agdaujö chikham daupii khaba, bʉ̈ʉrjã dich khapeen dau aug khaug chukhu aju. Magnaa nem ieknem, nem khaigbam wauju khĩirju athamjã pöd ãwat auba, dich khapeen gaaijã jua khʉabanaa, dau lököo, bʉ̈ʉrjã nem wajapham khõchkhabaju.  
\v 4 Mag nʉm dʉ̈i ĩchab dich khapeen dich dʉ̈i wajaug aajerr khʉʉnjã imeraa dakhũgne pʉr auwi khaibag wauju. Eem khʉʉnau amach thethemkha nʉm awia wir aig amachpai thönaa, Ẽwandamau nem khõsimjã wauba sĩi amachdëu nem khõsimʉgta ee aju.  
\v 5 Magʉm khʉʉnau amach iiupain chadcha ʉ̈kha nʉm aju. Mamʉ mag amachdëu ʉ̈kha nʉm anʉmjöjã wënʉrrabaju mag wënʉrraag Ẽwandamag ʉdʉʉr ich jua theeg amachig deepiba naawai. 
\p Õor mag nʉrrjëem khʉʉn dʉ̈i khĩir khaphʉ abá.  
\v 6 ¿Khan jãgwia mua mag chirʉ́? Mua mag chirʉmʉn, jãgʉm khʉʉnauta parhoob dipierr dub wënʉrrʉmua ar ʉʉin sĩi bʉ̈ʉr abaawaijã chikham iek ʉ̈khakharrsö sĩerrjëem khʉʉn amachig paa aumaajeewaita mag chirʉm. Magʉm ʉʉinta parhoobam pekau pöm amach khõchagpierr nem wau sĩerrjëem khʉʉnau.  
\v 7 Amachigan warag khĩirjug ajaphamta khaug wëtum anʉm; mamʉ mag nʉm chan maach peerdʉajem iek chaar chan bʉ̈ʉrjã khaugba nʉmta mag nʉm.  
\v 8 Ich jãgta ajierram warrgarjã bënkhʉʉn Janes aajerrau ãb agjö Jambres aajerr dʉ̈imua. Moiseeu Ẽwandam iek jaau khitaawai jũrr makhʉʉnau warag i ichaaur ajierram. Ĩsjã ich agjöta nʉm. Ar jãg nem khaigba jaau wënʉrrʉm khʉʉnan sĩi warag khĩirjug memerkhömjöta sĩsidʉm. Mag gaaimua jãgʉm khʉʉnan ya chi okhoomta nʉm, Ẽwandam iek ʉ̈khaba naawai.  
\v 9 Par am jãg nʉm, jãgʉm khʉʉnau pöd ich jãg õor khũgur wai wënʉrrabam. Jãg naawia mag warm khʉʉn Moisés ichaaur arr khʉʉnjö õrau am igwia “Jãkhʉʉnan bʉ̈ʉrjã khaugba nʉmta jãg wënʉrrʉm” a khaug athaawai, tag amag ee abaju. 
\s1 Pabloou ãbmiecha Timoteo wawitarr 
\p  
\v 10 Puata chadcha mua nem jaau chirʉm ipierraa aajem. Pua khaphʉ sim, mʉ jãga chitaajẽ maimua khantheeta mʉ mʉg chitʉ́. Pua khaphʉ sim, õor dʉ̈ijã mʉ khĩir machag chukhu chitʉm. Magju khãai mua thumaam khʉʉn kha khõsi chitʉm dʉ̈i ĩchab mʉ Ẽwandam gaaijã ubʉ chirʉm,  
\v 11 õrau mʉch dʉ̈i khaigba aawai mʉch dau aug wau nʉmjã igba magʉm ãwat chitaag. Pua khĩir eyaa sim jãga ajierrá mʉ dʉ̈i Antioquía phöbör ee, Iconio phöbör ee maimua Listra phöbör eejã agjö. Amau chadcha peer mʉ thõojierram, mamʉ maach Pör Ẽwandamau ʉ̈u am jua eemua mʉ peerdʉ aujim.  
\v 12 Ar chadcha Jesucristo dënkhanaa ãba i atheepai nem wau wënʉrram khõsi nʉm khʉʉnan, chadcha õrau am dʉ̈i khaigba aawai dʉ̈rrcha am dau aphʉʉ aju.  
\v 13 Mamʉ ĩchab ar jãg õor khũgurnaa khaigba nem wau wënʉrrʉm khʉʉnan mʉg atag paawai warag athuucha paaukhamaju, amachpata dösãtau khũgur wai sĩewai. 
\p  
\v 14 Mamʉ pʉ chan oob magʉm khʉʉnjö chitam. Magju khãai, chi jaautarr khʉʉnaujã chadam iekta pʉchig jaautarr khap, pʉchdëu Ẽwandam iek khaugtarr gaaita warag ubʉ thierrkha chirsí.  
\v 15 Mag nʉm dʉ̈i ĩchab Ẽwandam iek phã sĩsidʉm gaai pʉchdëu erraawe khaugtarrta khĩir eyaa abá. Mag pʉch bʉ̈rʉʉwe khaugtarrdamuata pʉrʉg khĩirjug wajapham deejim, pʉchdëu thãraucha Jesucristo iek ʉ̈khabaawai peerdʉmkhĩir.  
\v 16 Ẽwandam iek phã sĩsidʉmʉn, thum ich Ẽwandamaucha khĩirjug deewi phãtarrau. Maguata sĩi õrag jawaagjã nem wajaugnaa aguapai õrag meeurrau sĩwaagjã nem wajaug sim. Õor wawiegjã nem wajaug sim, aata jaau nʉʉ jaau nʉʉ aadee khaphʉ aadee Ẽwandam dau najã agchanaa õor dau najã agcha wënʉrramkhĩir.  
\v 17 Jãg iek pua khaugtarrauta ar pʉjö Ẽwandam chogkham khõsi nʉm khʉʉnag khaphʉ apiejem, jãga amau Ẽwandam athee amachdëu waum khõsimpierr waau khaphʉ aju. 
\c 4  
\p  
\v 1 Timoteo, Ẽwandam Jesucristo dʉ̈i nʉm dakhĩir mua pʉrʉgan, Cristoou maach peerdʉ aaujem iek jaau nʉmta warag pënaa a chirʉm. Pua khaphʉ sim, ich mag Cristoouta õor pörkhaan bëem ed thumaam khʉʉnag jaauju, ich aar auju wa aubaju. Mag sim dakhĩirta pʉrʉgan,  
\v 2 õrau mag pʉchdëu jaau nʉm iek ũrmapha awiajã, ichiita jaaubá a chirʉm. Cristo iekta õrag ʉ̈khapi auju ẽkhabá; khaigba wënʉrrʉm khʉʉnag ikhʉaba iekhabá; ar Ẽwandam iek athee kha thũu nʉm khʉʉnjã khĩir onee apibá. Magnaa nem jaauwaijã ithũuta nem jaaubá.  
\v 3 Mʉʉgwaiweran agtha õrau ũrju nʉm. Mamʉ mʉg atag paawai chan mʉg iek wajapham jaauwaijã õrau bʉ̈ʉrjã khõchkhabaju. Iek wajapham jaau nʉm khʉʉn iek ũrju khãyau, warag amach maestronaan amach khĩetta jʉr auwi amachdëu ũrm khõsimpaita amachig jaaupiju.  
\v 4 Mag nʉm gaaimua chadcharam iekhagta warag oojã ooba, sĩi parhoobam iek jaau nʉmʉgta ee aju.  
\v 5 Mamʉ pʉ chan oob magʉm khʉʉnjö chitam; magju khãai thumaam khʉʉn dakhĩir agpierraata chitá. Phithurg au chitawi khãijã ãwatbá. Tagam nem wauju khãai, Jesucristo iek maach peerdʉajem jaau nʉm gaaipaita chitʉmua pʉchig phidag jaautarrta wajapha wau chitá. 
\p  
\v 6 Timoteo, warrgar Ẽwandam athee nemchaain kheechjerrjö mʉʉn ya amau juauta thõopʉ̈iju dakha pamaawai mʉg atag jöpcha mua tag pʉ juag oobaju.  
\v 7 Ẽwandam i jaau nʉmta sĩi khajap jãau chaar jãau nʉmjö ʉdʉʉr mʉch deeba, mʉʉn ya ag iek kõit woun atheemjö wërbʉbarm. Woun ãb khaphig nʉrrʉmua ich barju atarr aar barbaimamjö, muajã ĩchab Ẽwandamau mʉchig phidag deetarr thum waubapʉ̈im. Maach Pör Jesucristo iek mʉchdëu ʉ̈khatarrjã isegba agtha ich mag ʉ̈kha chitʉm. 
\p  
\v 8 Mʉch mʉg phidkhabarm jũrran, jãg khaphig nʉm aig chi ganbarm khʉʉg pörsir deejemjö, mʉrʉgjã ʉ̈gthar pabaimaawai maach Pör Jesucristooucha, “Pʉ ʉ̈u mʉ na ajapha chitajim” awi nem deeb khaba deeju, ichdëuta thumaam khʉʉn dʉ̈i agcha ich jua khap nem waaujeewai. Mamʉ mag irua nem deeju chan mʉrʉgpai khaba, ar thum chadcha i deeu bëepim khõsi nʉ durrum khʉʉnagjã irua deeju. 
\s1 Ãbmiecha Timoteoog nem jaautarr 
\p  
\v 9 Timoteo, mʉ ap chitʉm jöpcha mʉ oobahur.  
\v 10 Mʉʉn mʉch appaita chirʉm, Demaaujã Tesalonicaag mam khõchgau mʉ barpʉabajeewai. Sĩi mʉg jẽb gayam nemegta ʉ̈rcha ee am khõchgau mʉrʉgjã ooba petajim. Crescentejã Galaciaag petaawai Titoou jũrr Dalmaciaag petajim.  
\v 11 Mʉiguin Lucas appaita mʉ dʉ̈i sim. Marcos jʉr aunaa irig jaauwi pʉch dʉ̈i aipidú; mua mau i igju mʉch juag oomkhĩir.  
\v 12 Tiquicoon chadau mʉchdëuta Efesoog pʉ̈ijim.  
\v 13 Mag pʉch bëewai Troas phöbör ee Carpo di aig mʉ capote pʉatarr aipidú. Mag dʉ̈i ĩchab mʉ ẽsapjã phëpidú. Thum phëbëeba awiajã ar pergamino gaai phã sĩsidʉm chan oob phëpʉam. 
\p  
\v 14 Alejandro chi jierr dën nem waaujemuan wajapta mʉ khaibag waubarm. Irua mʉ dʉ̈i jãgtarr jũrr maach Pör Ẽwandamauta khap chirʉm, ichdëu ampierr i dʉ̈i aag.  
\v 15 Timoteo, jãg dʉ̈i khai khĩir khaphʉ chitá. Jãgua chan maachdëu Ẽwandam iek jaau wënʉrrʉm khõchkhaba, warag chaaurta iekha sĩerrʉm. 
\p  
\v 16 Nacha chi thethemnaanau mʉ amach aar thʉ̈rpʉ̈iwi iekhathuurwai, ni ãbjã mʉ bigaau chukhu ajim, mʉ ipierr dʉ̈i mʉ kõit iekhaag. Magju khãai sĩi thumaam khʉʉnau mʉrʉg oobamjö ajierram. Amau jãgtarr paar Ẽwandamau amag ag iek ëudʉba akhiin ʉ̈u akham.  
\v 17 Amau bʉ̈ʉrjã mʉ khaigpërbajierrab mamʉ, maach Pör Jesuuta chadcha ʉ̈u mʉ eeg oowia mʉrʉg ich juapadamjã deejim. Mag gaaimua ʉ̈u mua khĩirdam ubʉ maach peerdʉajem iekjã jaauwi parhooba judionaan khabam khʉʉnaupa ũrjierram. Mag, maach Pör Ẽwandamau ʉ̈u mʉrʉg juapadam deewiata, khum i ee chirʉmjö chirarrjã, ʉ̈u mʉ peerdʉjim.  
\v 18 Mua khaphʉ chirʉm ĩchab, mʉg durr gaai mʉg khaibag pöm thʉnʉm eemuajã irua mʉ peerdʉ auwia mʉ thʉa wai nʉrraju, khaigbam khʉʉnag chig apiba ʉ̈gthar ichta thumaam khʉʉn Pörkha sim aar barmkhĩir. Thumaam khʉʉnau iita thö iekhaju aai nʉm, ichta ich mag wajaug khitaawai. 
\s1 Pabloou salud deepʉ̈itarr 
\p  
\v 19 Timoteo, mʉ salud Priscaag jaaubá, Aquiloog maimua Onesíforoogjã agjö, thum ich chaain dʉ̈i ich ʉʉiragpa.  
\v 20 Erasto Corinto phöbör ee thʉbajim, maagwai Trófimo mor mas sim mua werpʉajim Mileto phöbör ee.  
\v 21 Ed khõrg jaar paju nawe pʉchdëujã jöpcha mʉ oobahur. Pʉrʉg salud deepʉ̈i nʉm Eubuloou, Pudenteeu, Linoou, Claudioou maimua thum Cristo gaaimua maach khodkha thʉnʉm khʉʉnaujã agjö pʉrʉg salud deepʉ̈i nʉm. 
\p  
\v 22 Timoteo, maach Pör Jesucristoou pʉ thʉa wai nʉrrapim khõsi chirʉm dʉ̈i tagam khʉʉn dʉ̈ijã Ẽwandamau ʉ̈u apim khõsi chirʉm. Ayoo kakë, 
\cls Pablo