\id 2TH - Waunan (Woun Meu) NT (alternate orthography) -Colombia 2011 (DBL -2013) 
\h 2 TESALONICENSES 
\toc1 Biek numiim ẽsap Pabloou Tesalónicapienag phã deepʉ̈itarr 
\toc2 2 Tesalonicenses 
\toc3 2 Te 
\mt1 2 TESALONICENSES 
\mt2 Biek numiim ẽsap Pabloou Tesalónicapienag phã deepʉ̈itarr 
\ip \bd Khaíu phãjĩ maimua chijã khʉʉn atheeta phãjĩ.\bd* Chamʉg ẽudeem cartajã Pabloouta phãjim ĩchab Tesalónicapien athee. Mag nacharam ẽsap deepʉ̈itarr khur dʉ̈rrʉ̈ʉ aadëm ee agtha amachdëu ʉ̈kha nʉm gaaimua dau aug wau nʉm anʉmjã ichdëu ũr sĩejim aajem. Mag nʉm dʉ̈i irua ũurwai ãaur khʉʉnau ajappai khaugba naajim aajem, mag maach Pör Jesucristo deeu ich chognaan dʉ̈i ichta chi Pörkha bëewi ichdëu igbaju khʉʉnag warre amach khĩircha jaaubarm ed chi ʉ̈kha nʉm khʉʉn dʉ̈ijã jãga aju (1:8-9). Mag wir aig amach khapeenaupai amach dau aug wau naawai ãaur khʉʉnau khĩirjuawai ya ag ed pabaichëmpii naajim aajem. Maguata Ẽwandamau juau khãijã am dʉ̈i jãgpi sim aajeejim anʉm. Amachdëu mag khĩirju nʉm gaaimua ãaur khʉʉn chará ya phidkhajã phidkhaba naajim anaabá, eeu dëgölp Jesús barbaicheewai sĩi amach phithur atarrdam werpʉaju awi. 
\ip \bd Khan jawaagta phãjĩ.\bd* Pabloou amag mʉg ẽsap phãnaa deepʉ̈itarran amag, jãgwiata mag chikhamnau dau aug waupi nʉmjã ãwat wënʉrrʉ́ a jaaunaa Ẽwandamau mʉg durr i agkhabarm edjã jãga aju a jaaupäaig ajim. Pabloou nacha amag jaaujim, khantheeta Ẽwandamau ich chaain ʉdʉraa dau aug waupiejẽ chikhamnaan jua machgau. I iek jãg Cristo iek ʉ̈kha durrum gaaimua dau aphʉʉ aajerr jũrr ich Ẽwandamauta am ich aar phë auju aajem (1:5). Ajapcharan ich Cristo pierrwaita ich gaaimua dau aphʉʉ aajerr khʉʉn khĩir meeupiwi, jũrr mag i igar durrarr khʉʉn dʉ̈i khaigba aajerr khʉʉn gaai irua jua khʉabaju (1:6-7). Maimua ĩchab amag khap amkhĩir ajapha jaaupʉ̈ijim, agtha Cristo bëewi mag ich iek isegtarr khʉʉn gaai mas aju ed khaba sim (cap. 2). 
\c 1  
\s1 Salud 
\p  
\v 1 Mʉch Pabloouta Silvano dʉ̈i Timoteopa ãba nʉmua mʉg ẽsap phã deepʉ̈i chirʉm pãar Tesalónica phöbör ee Cristo gaaimua maach khodkha nʉm khʉʉnag. Mua khaphʉ chirʉm, pãar chadcha Ẽwandam chi Aai gaai ubʉ thierrkhanaa ĩchab maach Pör Jesucristo dʉ̈ijã ubʉ nʉm.  
\v 2 Marau Ẽwandam chi Ayag jëeunaa maach Pör Jesucristoogjã jëeu nʉm, pãar ʉ̈uu wai nʉm dʉ̈i ĩchab khõinaa wai wënʉrramkhĩir. 
\s1 Cristo bëewai pekau paraam khʉʉn gaai Ẽwandamau mas aju 
\p  
\v 3 Khodamnaan, pãrau pãachdëu ʉ̈kha nʉm iekta chadcha warag ogdʉba ʉ̈khanaa aguata nem jua theeg paaukhamam dʉ̈i wir aig pãach khapeenjã waragta daupii paaukhamaawai, chadcha pãar gaaimua marau Ẽwandamag ʉ̈u ajim aju aai nʉm.  
\v 4 Pãach jãg durrum gaaimua chadcha maachdëujã mʉg maach Ẽwandam iek ʉ̈kha nʉnʉidʉmpierr wënʉrrʉmua pãar ëugar wajapha ig iyʉ̈ʉ aajem. ¿Khan jãgwi? Jãg õrau pãach dʉ̈i khaigba pãach ẽudee ẽkhabaadëphʉmjã magʉm igba khĩir thũu ãwat durraawaima.  
\v 5 Pãar jãg phithurg ãwat durrum paar, Ẽwandam thumaam khʉʉn dʉ̈i nem agchata waaujeewai, pãar irua ich aar öbërju ayaa apiju. Mag i gaaimua maagjerr paar pãar dʉ̈i mag ʉ̈u awiajã, ãbmuajã pöd Ẽwandamau pãar dʉ̈i jãgbaju aai sim aju khaba sim. 
\p  
\v 6 Jöoi thumaam khʉʉn dʉ̈i mag nem agcha waaujeewaita jãg pãar dau aug wau nʉm khʉʉn dʉ̈ijã irua ĩchab ich agjö am aphʉʉ apiju.  
\v 7 Magnaa pãach chi dau aphʉʉ durrum khʉʉnta mʉg atag maach Pör Jesús sĩi õtdau uu thʉnʉm ee ich chognaan chi jua thierrnaan dʉ̈i ʉ̈gtharmua bëewai maach thum ãba jua ʉ̈ipiju.  
\v 8 Mag i urum edan ar õrau ich igmapha aajerr khʉʉn dʉ̈i maach Pör Jesuu õor peerdʉ aaujem iek jaauwaijã asekasmapha aajerr khʉʉn gaai mas deenta urum.  
\v 9 Makhʉʉnan sĩi irua barkhʉʉipʉ̈iwia mam ich mag okhoo nʉisiegau. Magbarm chan tag maach Pör Jesús khĩir wajaugjã ooba, ni i jua theegjã oobaju.  
\v 10 Mag i pierrwai i chaain chi ʉ̈kha durrum thumaam khʉʉnauta irig ee aju. Maig pãarjã i dʉ̈i naaju, marau pãachig jaautarr iek ʉ̈khatarr aawai. 
\p  
\v 11 Maguata marau Ẽwandamag pãar kõit ich jãg jëeu durraajem, ichdëu pãrag ich iek ʉ̈khapi aauwai ichdëu wënʉrrapim khõsi sĩerrjö wënʉrramkhĩir. Marau khaphʉ nʉm, pãachdëu chadcha ʉ̈kha nʉm gaaimua pãrau dʉ̈rrcha i athee nem wajapham waum khõsi nʉm. Mamʉ mag nem waujujã, ich jua theegauta mag pãachdëu ig nʉmjö apikhiin ʉ̈u akham.  
\v 12 Mag nʉmua pãar gaaimua maach Pör Jesujã thumaam khʉʉnau thö iekhaju. Magbaawai ichdëujã ĩchab maach Ẽwandam dʉ̈imua pãach khĩircha ʉ̈u pãar thö iekhaju. 
\c 2  
\s1 Cristo bëeju na woun ãb chi khaigbam bëeju jaautarr 
\p  
\v 1 Khodamnaan, maach Pör Jesucristo pierrwai maachin chadcha i dʉ̈i nʉisiju. Mamʉ mag i bëeju jaau nʉm gaaimua chan  
\v 2 oob parhoobam khʉʉnag ʉdʉʉr pãach khũgurpimiet, Ẽwandam iek awia pãachig jaau nʉmua, sĩi õor ijẽjẽbkham ũrwia, wa ẽsapjöm khãijã maar i gaai thʉwia parhooba pãach aig deepʉ̈i nʉm gaai ya maach Pör Jesucristoon barbaichëm a jaauwaijã oob magʉm gaaimua pãach khũgurpimiet.  
\v 3 Ãbmua khãijã pãachig mag jaauwai maan sëukhaawaiu. Ich Jesucha bëeju na ichiita woun ãb chi khaigbam mʉg jẽb gaai sĩeichëju. Mag wounauta õor Ẽwandam dʉ̈i meeukhapiju. Mamʉ mʉg atag paawai Ẽwandamau jũrr i gaaita jua khʉaba ich mag i gaai mas wai nʉrraju.  
\v 4 Pari ichta mʉg jẽb gaai sĩweran ich mag wounauta Ẽwandam igwia nem jaau nʉmjã bʉ̈ʉrjã khõchkhaba ni sĩi irigjã jëeupimapha aju. Maguan mawia ichta Aai i jëeujem degjã jupimaju; mag jupimawia iita Ẽwandamau aju, ichdëupai. 
\p  
\v 5 ¿Pãrau khĩir ee paba nʉ, ar mʉ pãar aar chiraawai ich mag iek mua pãachig jaaujerr?  
\v 6 Pãrau khaphʉ nʉm ĩchab, khaniuta mʉʉgwaiwe i bëepiba sĩi ãba ich bëeju ed aadeewaita ʉdʉraa bëepi nʉ.  
\v 7 Mʉʉgwaiwejã õrau nem khaigbam pöm wau thʉnʉm. Mamʉ mag ãbmua idëu i bëepiba thʉa wai simjö sim chawag khecheu athaawaita warag khaibag athuucha thʉnʉisiju.  
\v 8 Mag idëu ʉdʉraa ich bëepibaawain chadau mag woun chi khaigbam bëewi sĩeichëju; mamʉ par mag khaibag sĩewiajã maach Pör Jesuu, sĩi phuasirbapʉ̈imjö, ich ooimʉgau ich jua theeg dʉ̈imua warre thõopʉ̈iju.  
\v 9 Mag woun chi khaigbam bëejuun, mepeer jua theeg dʉ̈ita bëeju. Mag simua aawai chi meperau i juag ooju, ag na õrau nem ooba aajempa õor dauderraa waumamkhĩir; mamʉ mag waumamʉn sĩi õor khũguraagpaiu.  
\v 10 Magbaadëm abarmʉn, ar pöd peerdʉba awia Ẽwandamau isegju khʉʉnan ichdëu khũgurm aig nem parhooba waumamua khũgurmaju, chadcharam iek amachig jaautarrjã warag igba ni ʉ̈khajã ʉ̈khaba awia maach Pör Jesuug ʉdʉʉr amach peerdʉpiba arr aawai.  
\v 11 Mag gaaimua ich Ẽwandamaujã ĩchab ʉdʉraa mag nem chad khabamʉg am khũgurpimaju, magʉmta chadam iekjö ʉ̈khamamkhĩir;  
\v 12 magbaawai ĩchab magʉm gaaimua amach khõchagpierr nem khaigbamta waum khõchgau chadam iekta ʉ̈khaba arr gaaimua jũrr ich Ẽwandamauta am gaai mas aímʉ mas aag. 
\s1 Ẽwandamau ich athee peerdʉ awaag jʉr autarr khʉʉn 
\p  
\v 13 Khodamnaan maach Pör Jesuu kha khõsim khʉʉn, ichiita marau pãar gaaimua Ẽwandamag ʉ̈u ajim aju aai nʉm. ¿Khan jãgwi? Pãachta jãig Tesalónica phöbör ee chi nacha Ẽwandamau jʉr autarr khʉʉn aawaima. Magnaa ĩchab ich Ẽwandam Akhaar maachig nem wajapha waupiejem dʉ̈imua pãachdëu ʉ̈khatarr gaaimuapa pãachta nacha peerdʉwi naawaima.  
\v 14 Magaag atheeta Ẽwandamau õor peerdʉ aaujem iek marau jaau wënʉrrʉm gaaimua Ẽwandamau pãar ich dënkha aujim, mʉg atag pawiajã maach Pör Jesucristo ajaug ich mag oo wënʉrramkhĩir. 
\p  
\v 15 Magau khodamnaan, Ẽwandam iek khĩirchajã marau jaaunaa sĩi ẽsap phã deepʉ̈i nʉm gaaijã pãachig jaautarr chan oob khĩir okhoomiet. Khĩir okhooju khãai pãrau warag ag gaaita ubʉ thierrkha nʉisit.  
\v 16-17 Maraun, ich maach Pör Jesucristoouchata maach Ẽwandam chi Aai dʉ̈imua pãar khĩir jãsenkhanaa pãar juag oopim khõsi nʉm, pãrau nem jaaunaa nem wau nʉm thum wajaphata öbëbër amkhĩir. Ich Ẽwandamauta maach khõsi khĩir jãsenkhajim, ich mag wënʉrrʉmua ich dʉ̈i ogdʉba nʉisijujã khap amkhĩir. 
\c 3  
\s1 Pabloou ich khapeen dʉ̈imua amach kõit jëeupi narr 
\p  
\v 1 Khodamnaan, ãbmiecha paawai marau pãrag maar kõit jëeubat anʉm, mag gaaimua pãach ee arrjö maach Pör Jesuu õor peerdʉ aaujem iekta jöpcha durrpierr aaidʉbaadee õraujã ʉ̈kham khõsi amach thãraucha ʉ̈khamkhĩir.  
\v 2 Pãrau khaphʉ nʉm, thumaam khʉʉnau chan Ẽwandam iek ogdʉba ʉ̈khaba aajem. Maagwai jëeunaat, õor khaibag sĩsidʉm khʉʉn jua eemuajã ʉ̈u maar peerdʉmkhĩir.  
\v 3 Mamʉ ich maach Pör Jesucristoou ich garmua chan maach kha ogdʉba sĩerraawai pãar irua ich dʉ̈i ubʉ wai sĩenaa mag khaibagkham khʉʉn jua ee burrpimaaugaujã pãar thʉa wai nʉrraju.  
\v 4 Pãar chadcha maach Pör Jesucristo dʉ̈ita wënʉrraawai marau khaphʉ nʉm, pãrau marau nem jaau nʉm ipierr nem waunaa mʉg atagjã ich jãg wau nʉisiju.  
\v 5 Mag pãrau maach ipierraa aju khaphʉ naab mamʉ, warag Ẽwandamag jëeu nʉm, ich jãg ichdëujã maach khõsi arrjö pãragjã warag wir aig pãach agdaujö daupiicha amkhĩir. Magnaa ĩchab maach Pör Jesucristo juapaata pãrag deepi jëeu nʉm, chikham jua machgau pãach dau aphʉʉ awiajã ich dënjö ãwatamkhĩir. 
\s1 Phidkhamapham khai thachjã khöbaju aai sim 
\p  
\v 6 Khodamnaan, maach Pör Jesucristo iekta maach iek gaai thʉwi marau pãrag jaaum ig nʉm: Ar õor pãach ee sĩi amach khõchagpierr am khõchgau phidkhamaphanaa marau pãachig nem wajapha jaautarr chaaur nʉrrjëem khʉʉn dʉ̈i oob khapeerkhamiet.  
\v 7 Pãrau khaphʉ nʉm jãga maar pãar ee wënʉrrajĩ. Maar mag sĩi parhooba maachdëu ampierr wënʉrraba arr aawai pãrau pãachdëujã khaphʉ nʉm, khanjöm nemta pãrau maar jua oowia agjö maar dënjö wauju aai nʉ.  
\v 8 Maar chan mag sĩi phidkhajã phidkhaba õor igaau par thach khöba aajeejim. Ante iwiir ãbmua khãijã maar jãogam khõchgauta ichpa khöjudam chukhu chirajim am ugua, khajeeu durrum ãba, maran edaram magwe phidkhaajeejim maach bidam athee.  
\v 9 Maar mag phidkha wënʉrrarr chan mag maach wënʉrrʉm paar pãrau marag sĩi par thach khöpiju aai khaba naawaijã khaba, maach mag phidkha nʉm oowi maachjö phidkhamkhĩirta maar jãg wënʉrrajim.  
\v 10 Maach jam pãar dʉ̈i naathuurwai marau pãrag iekha pʉajim. Mag iek mʉg ajim: “Pãar ee ãb khãijã phidkhamapha sim khai, magan thachjã khöbaju aai sim.” Ma ajim marau pãrag jaau pʉatarr.  
\v 11 Pari magtarrta marau maumua ũurwai ãaur khʉʉn mag sĩi phidkhajã phidkhaba, parta naajem anʉm.  
\v 12 Ar mag bʉ̈ʉrjã nem waujujã chukhu nʉm khʉʉnag marau, “Sĩi par naaju khãai phidkhabat” anʉm “pãach bi athee.” Maach Pör Jesucristo iekta i imeerba marau mag jaaupʉ̈i nʉm. 
\p  
\v 13 Khodamnaan, nem wajapha wau nʉm gaaimua chan oob pãrau khajeeu nʉm awia tag nem waubam amiet.  
\v 14 Mʉg marau pãrag phã deepʉ̈i nʉm iekta ãbmua khãijã asekasmapha sim khai, magan mag wounan warre thumaam khʉʉnag ich mag sim khakhapdö apinaa oob i dʉ̈i khapeerkhamiet, ich dʉ̈i magbaawai deeu khĩir naauwia deeu ewag khĩirjumkhĩir.  
\v 15 Mamʉ magwia khãijã oob i dʉ̈i iekkhõr paraa nʉmjö i oomapha amiet. Magju khãai agtha pãach khodkha sĩewai sĩi i wawibat. 
\s1 Pabloou chi ʉ̈kha durrum khʉʉn kõit Ẽwandamag jëeutarr 
\p  
\v 16 Maach Pör Jesús maach khõinaa apiejemʉgta pãar kõit jëeu chirʉm, pãar wënʉrrʉmpierr ichdëuta pãar khõinaa wai nʉrramkhĩir. Ichchata ich mag pãar dʉ̈i sĩepim khõsi chirʉm. 
\p  
\v 17 Mʉch Pabloouchata mʉch juadamaucha pãrag mʉg ãbmiem saluddam phãnaa deepʉ̈i chirʉm. Mʉch ẽsap phãapierr ich jãg mʉchdëucha mʉch thʉ̈r firmaapäaijem, chadcha mʉchdëuchata deepʉ̈i chirʉm khap amkhĩir.  
\v 18 Maach Pör Jesucristoogta pãar kõit jëeu chiraajem, ichdëuta pãrau nemdam ig nʉm thumaa dedee amkhĩir. 
\p Mʉgdampai ajim pãrag jaaupʉ̈im ig chirarr. Ayoo keena, 
\cls Pablo