\id 1JN - Waunan (Woun Meu) NT (alternate orthography) -Colombia 2011 (DBL -2013) 
\h 1 JUAN 
\toc1 Nacharam ẽsap Juanau phã deepʉ̈itarr 
\toc2 1 Juan 
\toc3 1 Jn 
\mt1 1 JUAN 
\mt2 Nacharam ẽsap Juanau phã deepʉ̈itarr 
\ip \bd Khaíu phãjĩ.\bd* Mʉg carta jũrr Juan chi Jesuucha ich dʉ̈i nʉrramkhĩir jʉr autarrauta phãjim; ajapcharan Evangelio de San Juan phãtarr wounauma. San Juan gaai irua jaaujim, jãga ʉ̈u maach peerdʉajẽ; mamʉ jũrr mau mʉg ich carta nacharam gaai jaaujim, jãga mag ya ʉ̈u peerdʉwi nʉmjã maadëu khaphʉ aajẽ. Jöoi Juanau mʉg cartadam phãawai ya jöoiraa khitajim aajem. 
\ip \bd Chijã khʉʉn atheeta phãjĩ maimua khan jawaagta phãjĩ.\bd* Juanau mʉg nacharam carta phãju nawe año khapan Cristoou maach peerdʉ aaujem iekhan ya õor ee aaidʉ wëjoojim aajem, durrpierr. Mamʉ mag nʉm ee ĩchab ich maagwaiweta sĩi Cristo iek awi parhoob nem jaaujem khʉʉn khĩirjug dʉ̈ita waaurëu jaau nʉrrjëe ajim anaabá. Makhʉʉnau jaauwai maach mor mʉg simʉn Ẽwandamau oowai nem ãkhãraaga simgui aajeejim anʉm. Magua amag chan pöd Cristo õor khĩir thegwi wounag paju khaba sĩejim anaabá. Mag wounag pawi maachjö mor paraa nʉrrʉm aiguin amagan Cristoon sĩi ich pekau eeta nʉrrʉmjö sĩejim anʉm. Mag amau jaau wënʉrrarr ʉ̈khapimaaugau Juanau jũrr amag, “Cristoon chadcha woun ajim, í maachjö ich mʉg sĩebajieb” a jaaupʉ̈ijim aajem (1:1-3; 4:1-3). 
\ip Maagwai jũrr ãaur khʉʉn mag sëukha wënʉrrarr khʉʉnau jaauwai Jesuun sĩi maachjöpaita sĩejim aajeejim anʉm; mamʉ mag ichpai Ẽwandamkha sĩerrʉm anʉmta amau ʉ̈khaba aajeejim aajem. Amau mag parhoob nem jaau nʉm ee, jũrr Juanau chi ʉ̈kha durrarr khʉʉnag, “Jesuuta warrgarwe ich Ẽwandamau ichdëucha jʉr auwi maach peerdʉ aumkhĩir pʉ̈iju aajerr Cristo khabahab” aajeejim anʉm, “ichta chadcha Ẽwandam Iewaa” (1:3,7; 2:22-23; 3:23; 4:15; 5:1,20). 
\ip Juanau chan makhʉʉn dënjö parhoob nem jawaag khaba maadëu Ẽwandam ajapha khaugwi i dënkha nʉisiewain ãba i ipierraanaa ichdëu khõsimjö wënʉrraajem a jawaagta mʉg ẽsap phãjim. Magta wënʉrrʉmʉn maadëu chadcha ich Ẽwandamjã khõsinaa, dich khapeenjã kha khõsi, mag nʉm dʉ̈i ĩchab sĩi parhooba dichdëu nem waum aig nem wauba aphöbaadëju (1:6-7; 2:4-6,9-11,28-29; 3:4-10,23; 4:7-8,20-21; 5:1-5). 
\c 1  
\s1 Jesucristoouta õor iiupi wai sĩejem 
\p  
\v 1 Warr nem thum ompaawaiwe sĩerr igwiata mua mʉg ẽsap phã chirʉm, tagam khʉʉn ich Cristooucha jʉr autarr khʉʉn dʉ̈imua muajã mʉch jʉ̈gʉucha ũrwia mʉch daúacha ootarr jawaag; maachdëuta maach daúacha oonaa maach juaucha i gaai pʉrjim. Wajapcharan magan ar ʉ̈gthar õor öbërpiejemma, ich Cristo; i igwiata mua pãrag mʉg ẽsap phã chirʉm.  
\v 2 Mag ichdëuta õor Ẽwandam aar öbeerpiwia ich mag iiupiejemʉn warrgarwejã ich Aai dʉ̈ita sĩejeejim; pari magtarrta dau daaucha ich oopien bëewia marau maach daúachata i ootarr aawai maachdëu ootarrta jaau nʉm.  
\v 3 Mag maach daúacha oowia maach jʉ̈gʉucha ũrtarrpa pãrag jaau nʉmʉn, mʉg maachjã ich Jöoi chaar dʉ̈ijã khapeerkhanaa chi Iewaa Jesucristo dʉ̈ijã khapeerkha nʉmjö ĩchab pãarjã maach dʉ̈i khapeerkhanaa õor ãbpaimjö naamkhĩrau.  
\v 4 Mʉg thum ẽsap gaai mua phã deepʉ̈i chirʉmʉn, pãachdëujã cha mʉchdëu jaaupʉ̈i chirʉmjö abaawai warag pãach oneecha amkhĩrau. 
\s1 Ẽwandaman õtdauu 
\p  
\v 5 Pãrag jaaumkhĩir ich Jesucristooucha marag jaautarr iekhan mʉgau: Ẽwandaman õtdau paa dʉnʉmjö araraata sim; i gaai bʉ̈ʉrjã pekau chukhu sĩewai i sim aig chan bʉ̈ʉrjã khĩkhĩsupaijã khaba sim.  
\v 6 I mag sim dʉ̈ita maachin khapeerkha nʉm. Pari mag i dʉ̈i khapeerkha nʉmta maachdëu nem khaigba wau nʉm gaaimua khĩchag eeta wënʉrrʉmjö nʉm chan magan maachin sëukhaawaita mag i dʉ̈i khapeerkha nʉm a iekha nʉm. Mag nʉm dʉ̈i ĩchab maachdëu nem waauwaijã khaigbata wau nʉmʉn magan parta mag i dʉ̈i nʉm a iekha nʉm.  
\v 7 Pari ich jãg Ẽwandamjã pekau chukhu ararag eeta sĩejemjö maachjã ĩchab pekau wauba nʉm gaaimua ararag eeta wënʉrrʉmjö nʉmʉn, magan Ẽwandamau dich khapeen dʉ̈ijã õor ãbamjö ö ãba apinaa ĩchab ichdëu ich Iewaa Jesucristoog ich bag maach kõit ãrtarrauta maach khaibagjã thumaa chugpaapiejem, ich jãg döou memerkhög ʉawai chugpaajemjö. 
\p  
\v 8 Maadëuta dich igwia bʉ̈ʉrjã pekau chukhum a nʉmʉn, chadcha pekaupanta mag pekau chukhum anaawai, maachdëupaita wir aig maach khũgur nʉm; mag nʉm aig chan chadam iekjã khaugbata nʉm.  
\v 9 Pari chadcha dich pekau pöm nʉm khap irigta chaigpanaa dich khaigba abarm jaaumʉn, magan chadcha Ẽwandamau nem agchata waaujeewai agpierr maach khaibagjã thum chugpaapʉ̈imaju.  
\v 10 Wa sĩi khãijã maadëu maar chan bʉ̈ʉrjã pekau wauba aajem a iekhakhiin, magan jũrr maadëu ich Ẽwandamta sëunemeg phë nʉm, i iek mag maachin thumta pekau pöm khithëem aajeewai. Mag nʉm aig chan magan maadëu i iek ʉ̈khabata nʉm. 
\c 2  
\s1 Cristoou maach kõit iekhaajem 
\p  
\v 1 Keena, pãar thum mua mʉch chaainjö daupii wai chitaawai pãrag khap amkhĩir mʉg ẽsap gaai mʉgta jaaupʉ̈i chirʉm, mag khaphʉ aphöbaadeewai pekau waum ugua. Pari mʉg jaaupʉ̈i chirʉm ãba, ãb khãijã pekau ee burrmʉn maach abogado wai nʉm, Ẽwandam chi Aai dʉ̈i maach kõit iekhaajem; ma Jesucristoou. Irua õor dʉ̈i agpierraa ichdëu khap nem waaujeewai maach dʉ̈ijã agjö aju.  
\v 2 Jesucristota maach pekau kõit ʉdʉraa ich thõopijim, mag ich thõopibarmua maach pekau appaijã khaba thum ich iek ʉ̈kha nʉm khʉʉn dënpa Ẽwandamau chugpaapʉ̈imamkhĩir. 
\p  
\v 3 Maachta Ẽwandamau nem jaau sim ipierraa nʉmʉn magan chadcha maadëu khaphʉ nʉm, ya maach i dënkha nʉm.  
\v 4 Pari ãbmua khãijã “Mʉʉn i dënëu” a sim, pari mag simta bʉ̈ʉrjã irua nem jaau sim ipierraa khaba simʉn magan sĩi sëunemgau ich iiupaita mag i dën a nʉrrʉm; magan maguajã agtha chadam iek khaugbata sim.  
\v 5 Pari jũrr maach i ipierraa nʉm khʉʉnaun chadau chadcha wajapchata i khõsi nʉm. Mag i khõsi nʉm gaaimua maadëu khaphʉ nʉm, chadchata i dënkha nʉm.  
\v 6 Iin Ẽwandam dën aawai i dʉ̈i chirʉm a sim wounan chadcha mʉg jẽb gaai aawai ich Cristo nʉrraajerrjöta nʉrraju aai sim. 
\s1 Iek Iiur 
\p  
\v 7 Cristo gaaimua khodamnaan, cha mua pãrag jãga aju aai nʉ a jaaupʉ̈i chirʉm chan iek iiurcha khabam. Mʉg iekhan ar nawe pãachdëu warrcha Jesucristo iek ʉ̈kha phöbaadëwe ũrtarr iekpaiu; wajapcharan dich khapeen kha khõsi api jaau sim iekma.  
\v 8 Mag nawe pãachdëu ũrtarr ab mamʉ mua mʉg phã chirʉmʉn, ya tag warrgar pãach khĩchag ee naajerr khʉʉn khaba ararag chaar eeta ich Cristo dʉ̈icha naawai, ichiita pãar atheyan chi iiurkha sim. Magua ich Jesuu ich khapeen daupii aajerrjö pãraujã agjö pãach khapeen daupii wai nʉm. 
\p  
\v 9 Ãbmua khãijã Cristo dʉ̈i sĩewai ararag ee sim a sim, pari mag simta Cristo gaaimua ich khodkha simjã oomapha sim chan magan maan agtha khĩchag ee sĩewaita mag sim, bʉ̈ʉrjã maach peerdʉajem iek khaugba.  
\v 10 Magarrau ar chadcha Cristo gaaimua ich khodkha thʉnʉm khʉʉn thum daupii wai sim wounan chadcha ararag eeta khajapha nʉrrʉmjö sim, bʉ̈ʉrjã khaibag waujujã khĩirjuba.  
\v 11 Pari magba ar Cristo gaaimua dich khodkha khërʉmjã oomapha wai simʉn agtha ich mag khĩchag eeta simjö sim; ich mag sim gaaimuata dau khĩsumjö nʉrraawai pekaúa ich ëudʉ arrumjö simjã khaugba sim. 
\p  
\v 12 Keena, ar ewaa Ẽwandam iek ʉ̈kha nʉm gaaimua agtha chaainjö khithëem khʉʉn, Ẽwandamau Jesucristo gaaimua ya pãach pekau perdonaabarm pãrau khaphʉ naawaita mʉg ẽsap pãrag phã deepʉ̈i chirʉm.  
\v 13 Keena, pãachdëu Ẽwandam iek ʉ̈khatarr gaai ubʉ nʉm gaaimua ya chi jöoinkha nʉm khʉʉnjã agjö warrgar nem thum ompaawaiwe sĩerr ag Ẽwandampaita pãrau khaphʉ naawai pãragjã mʉg ẽsap phã deepʉ̈i chirʉm. Maimua pãar ar Ẽwandam iek ʉ̈khatarr agtha dʉ̈rrʉ̈ʉcha khaba nʉm gaaimua sĩi ewaa jöoinpagkhamam khʉʉnjö nʉm khʉʉn, pãraujã ya agjö chi dajãumie nem khaibag sĩerrʉm pãach garmua pödpʉ̈iwi nʉm aawaita pãragjã agjö mʉg ẽsap phã deepʉ̈i chirʉm. 
\p  
\v 14 Deeu ũwaai pãrag jaaukhim: Agtha chaainjö khithëem khʉʉn, ya pãrau Ẽwandam pãach Aaikha simjã khaphʉ naawai, pãrag mʉg ẽsap phã deepʉ̈i chirʉm. Jöoinaan, warr nem thum ompaawaiwe sĩerr ich ag Ẽwandampaita khaphʉ naawai pãragjã mʉg ẽsap phã deepʉ̈i chirʉm. Ẽwannaan, pãraujã pãachdëu Ẽwandam iek ʉ̈khatarr gaai ubʉnaa pãach thãar eecha wai wënʉrrʉmua ĩchab chi dajãumieu nem khaigbam waupiejemjã pãach garmua pödpʉ̈iwi naawai pãragjã agjö mʉg ẽsap phã deepʉ̈i chirʉm. 
\p  
\v 15 Magua ya chi jöoinag awiajã pãrag mag chirʉm: oob pãrau sĩi mʉg jẽb gaai parhoobam khʉʉnau amach khõchagpierr nem waaujemʉgta ee amiet. Ãbmua khãijã magʉm nem waujuuta ʉ̈rcha khĩirju sim khai, magan magua chan jũrr Ẽwandamta khõchkhaba sim.  
\v 16 Mʉig eegar jãg dichdëu nem khõchagpierrta nem waum khõchkhabaadëp aajem khĩirjug, wa nem dich dawagaa oowaijã dich dënkhapim khõsim khĩirjug maimua ar phatkhondam paraam khʉʉnjã ãba aata thöbaadëp aajem khĩirjug chan ich Ẽwandamauta dee sim khaba sĩi ich mʉig eegarm khĩirjugpaiu.  
\v 17 Pari mʉg jẽb gaai jãg õor pekau waupieg nem khaigbam pöm thʉnʉmʉn mʉg durr öm ed thum dʉ̈i chugpaju; pari magba jũrr ar Ẽwandamau khõsim nempaita waaujem khʉʉnan chad ich Ẽwandam dʉ̈ita ich mag nʉisiju. 
\s1 Sëu paraam khʉʉn maimua sëu chukhum khʉʉn 
\p  
\v 18 Chaaina, mʉg durran ya ich eegar paju ora pabaadëm. ¿Pãrau ũrba aajẽ, anticristo bëeju anʉm? Ya mʉʉgwaiwejã maach Cristo chaar oomaphanaa i igar khaba iekhaajem khʉʉn thʉnʉm, anticristonaan aajem khʉʉn. Õor sëukha jãg nʉrrjëem gaaimua ya maadëu khaphʉ nʉm, chadchata ya mʉg durr eegar paimʉʉ sim.  
\v 19 Pari jãg nʉrrjëem khʉʉnan maach eem arr khʉʉnpaita ĩs jãg Cristo igar khaba iekha nʉrrjëem; mag maach eem khʉʉn ajieb mamʉ, am chadcha maachjö Cristo dën khabajierram. Am chadcha maachjö Cristo dën arr akhiin agtha maach dʉ̈i ogdʉba wënʉrrakham. Pari juaujö ich Ẽwandamau jãgpi simʉn, jãan maach ee maach khapeen anʉm khʉʉnjã chadcha Cristo dën chaar khaba nʉmta jãg nʉrrjëemjã merag chukhu khap amkhĩrau. 
\p  
\v 20 Pari pãragjã Cristoou ich Ẽwandam Akhaar chaar deetarr wai naawai mua khaphʉ chirʉm pãrau jãgbaju. Mag pãrau chadam iek khaphʉ naawai jãg warm khʉʉn dënjö i ichaaur abaju.  
\v 21 Magua mua pãrag mʉg ẽsap phã deepʉ̈i chirʉm chan mag pãrau bʉ̈ʉrjã khaugba naawai khabam; mag khãai pãrau chadam iek khaphʉ naawaita pãrag mʉg ẽsap phã deepʉ̈i chirʉm. Mag nʉm dʉ̈i pãrau khaphʉ nʉm ĩchab, ar chi sëukha nem ĩgkhaajem khʉʉn chan chadam iek ʉ̈khaajem khʉʉn eem khabam. 
\p  
\v 22 Pãrau khaphʉ nʉm chijã agá chi sëumie chaar. Chi sëumie charan, ar Jesús igwia “Jã chan Ẽwandamaucha jʉr auwia pʉ̈itarr Cristo khabajim” a iekhaajem khʉʉnau. Ich magʉm khʉʉnpai khabahab anticristonaan, amach garmuata Cristo dʉ̈i iekkhõr autarr khʉʉn; ich akhʉʉnpaiu ĩchab Ẽwandam chi Aai iekjã ʉ̈khaba, i Iewaa Cristo iekjã ʉ̈khaba aajem khʉʉn.  
\v 23 Ar chi Ẽwandam Iewaa Cristo iekjã ʉ̈khaba simuan waragta Ẽwandam chi Aaijã iseg sim; magarrau ar chadcha Ẽwandam Iewaa Cristo igar simʉn chadau ĩchab chi Aai dʉ̈ijã khapeerkha sim. 
\p  
\v 24 Maguata muan pãragan warrcha pãachdëu maach peerdʉajem iek ʉ̈khatarrta ich mag pãach thãar ee wai naapi jaau chirʉm. Jãg maach peerdʉajem iekta pãrau pãach thãar ee wai nʉmʉn, pãachchajã ĩchab Cristo dʉ̈i khapeerkhanaa chi Aai dʉ̈ijã ich mag khapeerkha wënʉrraju.  
\v 25 Ich Cristooucha jaauwaijã maachin ich dʉ̈ita ich mag phë wai nʉrraju a jaaujim. 
\p  
\v 26 Jãg sĩi pãach khũguraag ẽkhaajem khʉʉn gaaimuata mua pãrag khap amkhĩir mʉg phã deepʉ̈i chirʉm.  
\v 27 Pari pãrau ich Ẽwandam Akhaarta pãach thãar ee wai naawai muata pãrag jaauju khaba chirʉm, mag pãar thãar ee simuata ichdëu khap pãrag jaaumaawai. Irua nem jaau sim chan sëukhaa khaba chadcharau. Maguata ich chi Ẽwandam Akharau pãachig jaaujemjö Cristo dʉ̈ita ogdʉba ich jãg nʉisit. 
\p  
\v 28 Chaaina, deeu pʉaba muan pãragan, Cristo dʉ̈ita ogdʉba nʉisit a chirʉm, maagwai deeu i bëewaijã i ögkhaju khãyau warag chigag chukhu i dʉ̈i naag.  
\v 29 Pãrau khaphʉ nʉm, maach Pör Jesucristoou nem agchata ichdëu khap nem waaujem. Maagwai ĩchab khaphʉ aju aai nʉm, thum nem agcha nem waaujem khʉʉnjã agjö Ẽwandam chaainkha nʉm. 
\c 3  
\s1 Ẽwandam chaainkha nʉm khʉʉn jãga nʉ 
\p  
\v 1 Keena pãadë khĩirjubat jãga Ẽwandamau maach khõsi sĩ: mag ich garmua maach khõsi sĩewai irua maachig ich chaain a thʉ̈rju aai sim, maach chadcha ich chaain aawai. Sĩi ar parhooba i iek ʉ̈khaba nʉm khʉʉnau chan ich Ẽwandam Iewaa mʉg jẽb gaai sĩethuurwaijã pöd i khaug auba arr aawaita ĩs mʉg maach Ẽwandamau ich chaainkha wai simjã pöd khaugba nʉm, jãga awia mag nʉ.  
\v 2 Cristo gaaimua khodamnaan, ya maachin chadchata Ẽwandam chaainau. Mʉʉgwaiwe chan maadëu khaugba nʉm, jãga nʉisiju khai mʉg atag pawiajã; ãba maadëu khaphʉmjö nʉmʉn, Cristo dʉnʉʉubaichëm ed maach ichjö aphöbaadëjupaita khaphʉ nʉm, ya mag edan dau daau khĩirchata i oophöbaadëju aawai.  
\v 3 Pari thum mag amach daúacha i ooju khĩirju nʉm khʉʉnan mʉʉgwaiweta wajapha naaju ẽkhaajem, ich jãg Jesucristojã khaibag chukhu wajaphata sĩerrʉmjö. 
\p  
\v 4 Ẽwandamau oowai nem khaigbam thum pekau aawai thum ar nem khaigbamta waaujem khʉʉnan pekauta wau nʉm.  
\v 5 Pãrau khaphʉ nʉm, Jesucristo mʉg jẽb gaai bëewai mʉig eegarm khʉʉn pekau chugpaaju jʉraanta bëejim, ichjö pekau chukhu paapʉ̈imaag. Maadëu khaphʉ nʉm, í bʉ̈ʉrjã pekau chukhu khitʉm.  
\v 6 Magua ar i dʉ̈ita ich mag khapeerkha wënʉrrʉm khʉʉn chan ich mag pekau ee wënʉrraba aajem. Pari magba ar agtha amach pekau eeta ich mag wënʉrraajem khʉʉnaun bʉ̈ʉrjã i khaugba naawaita mag wënʉrraajem.  
\v 7 Chaaina, ni iwiir ãbamʉgjã ʉdʉraa pãach khũgurpimiet: Õor wajapham khʉʉnaun nem agchata waaujem, ich Cristojã woun wajapham aawai;  
\v 8 pari magba ar pekauta wau nʉm khʉʉnan mepeer dën aawaita mag nʉm, ich chi mepeerjã ich warrgarwe ich mag pekau wau sĩerraawai. Wajapcharan ich Ẽwandam Iewaa mʉg jẽb gaai bëetarran, mag meperau õor khũgur wai simua pekau ee preso phë wai sĩerrjö narr khʉʉn i jua chaaur weeukhapʉ̈yaanta bëejim, tag meperagta maach ʉ̈rpai apimaaugau. 
\p  
\v 9 Chadcha Ẽwandam Akhaar atham gaaimua ũwaai thaabatarrjö aadëm chan tag ich mag ich pekau eepai nʉrraba aajem, ya ich Ẽwandamau deebarm khĩirjugta wai sĩewai. Wajapcharan mag Ẽwandam chaaikha sim aawaita ya tag ich pekau ee nʉrraba aajem.  
\v 10 Ar nem wajapham wauba ni dich khapeenjã kha khõchkhaba sim chan Ẽwandam dën khaba sim. Mag gaaimua ĩchab khaphʉ aajem, chijã khʉʉnta Ẽwandam chaainá maimua chijã khʉʉnta mepeer chaainá. 
\s1 Agdaujö dich khapeen kha khõsi nʉm 
\p  
\v 11 Keena, warrcha pãrag maach Pör Jesucristo iek jaauwai pãrau ũrtarran agdaujö dich khapeen kha khõsita api jaaujim; ma ajim pãrau nacha ũrtarr iek.  
\v 12 Magua maach chan pöd Caínjö khaibag aju khaba nʉm. Cainau mepeer igarta sĩerr aawai ich eeum thõopʉ̈ijim. ¿Khan jãgwi irua mag ich eeum thõojĩ? Ichdëu nem khaigba wau sim daar ich eeumua ich khãai nem wajapha wau sim Ẽwandamaujã wajapha oo sĩerr gaaimuama. 
\p  
\v 13 Cristo gaaimua khodamnaan, jãg Cainau ich eeum oomapha arrjö Ẽwandam iek ʉ̈khaba nʉm khʉʉnau jũrr pãachdëu ʉ̈kha durrum gaaimua pãach oomapha aawai, oob magʉm gaaimua warag, “¿Jãgwia jãg maach oomapha nʉ?” amiet.  
\v 14 Mag khãai warag dich khapeenta kha khõsi abat, ich Cristoou jaautarrjö. Dich khapeenta kha khõsi amʉn, maadëu khaphʉ nʉm, chadcha chi okhoomkha narrta ich dʉ̈i wënʉrramkhĩir ich dënkha wai sim, Cristoou. Maimua khaphʉ nʉm ĩchab agjö ar dich khapeen kha khõchkhaba simʉn, maan agtha okhoo nʉrrʉm gaaimua Cristo dën khaba sĩewaiu.  
\v 15 Ar Cristo gaaimua dich khodkha khërʉmta kha isëe simʉn magan maguan õor thõojemua khĩirjuajem dʉ̈i ãbata khĩirju sim. Pãrau khaphʉ nʉm, õor thõojem khʉʉnau chan ãbmuajã Ẽwandam ich thãar ee chukhu sim.  
\v 16 Jesucristoou maach kõit ich thõopitarr gaaimuata maadëu khaphʉ nʉm, khan agá dich khapeen kha khõchag. Mag maach daupigau ich thõopitarr aawaita maachdëujã agjö Cristo gaaimua dich khodkha durrum khʉʉn kõit am daupigau dich thõopiju akhiinjã agjö ʉdʉraa dich thõopiju aai nʉm.  
\v 17 Pari ãb phatkhon paraa simua khãijã Ẽwandam iek ʉ̈kha sim a simta ich khapeenau nemdam ig nʉm khaphʉ simjã oobamjöo sim, jãga mag wounau Ẽwandam thumaam khʉʉn daupii khitʉmta ich thãar ee wai chiraawai iruajã agjö õor daupii chirʉm abarju.  
\v 18 Chaaina, maadëu sĩi dich khapeenag par iiupaita “Muan pʉ khõsi chirʉm” aju khaba nʉm; mag khãai chadcha am athee nem wajapha wau nʉmuata amag khaphʉ apiju aai nʉm, maadëu chadcha am khõsi nʉm. 
\s1 Jãga khaphʉ aju aai nʉ maach Ẽwandam dënkha nʉm 
\p  
\v 19 Mag dich khapeen thumaa kha khõsi wënʉrrʉmʉn chadau maadëu khaphʉ nʉm, maach Ẽwandam iek chaarta ʉ̈kha naawai i igar nʉm; mag nʉm aiguin chadau ʉ̈khaa chaarta ʉ̈kha nʉm aju aai nʉm.  
\v 20 Mag ʉ̈khaa chaar ʉ̈kha nʉmta nem khaigba waauwaijã maach khĩirjugaupai maachig jajaaukhamjö akhiinjã, maach khĩirjug khãaijã ʉ̈rpai sim wai nʉm: ma Ẽwandamau. Iruata nem thum khaphʉ aajeewai maadëu i dau na nem agcha wauju ẽkha nʉmjã irua khaphʉ sim.  
\v 21 Khodamnaan, pari maach nem khaigba wauba naawai maach khĩirjugjã khõinaa simʉn, magan Ẽwandamag jëeuwaijã maadëu inag chukhuta irig jëeuju aai nʉm.  
\v 22 Magta irig jëeu nʉmʉn, maadëu ichig jëeubarm thum irua maachig deeju, ichdëu oowai maadëu i ipierraanaa irua nem khõsimpaita wau naawai.  
\v 23 Irua maachig waupi jaau simʉn ãba ich Iewaa iekta ʉ̈khapi simʉu; mag nʉm dʉ̈i ĩchab ich Jesucristoou waupi jaautarrjö agdaujöta dich khapeen kha khõsi api sim.  
\v 24 Ar mag i ipierraa wënʉrrʉm khʉʉnta i khapeenau, maagwai ichjã jũrr am khaperau. Mag chadcha ich Akhaar maachig deetarr gaaimua maadëu khaphʉ nʉm, chadcha í maach dʉ̈i sim. 
\c 4  
\s1 Jãga khaphʉ aju õor chadcha Ẽwandam igar nʉmua nem jaau nʉm 
\p  
\v 1 Keena Cristo gaaimua khodamnaan, ĩsin õor sëunemkham khʉʉn neeme thʉnʉm; mag sëukha wënʉrrʉmta amach iiupain Ẽwandamau jaaupitarr iekta jaau wënʉrrʉm aajem, sĩi magʉm gaaimua õor khũguraag. Oob jãg parhooba nem jaau nʉmta Ẽwandamau jaaupitarr iekta jaau wënʉrrʉm aajem khʉʉn iek ʉ̈khamiet. Amau jaau nʉm khap aag, ʉ̈khaju nawe ajapha khĩirjubat, chadcha Ẽwandam Akhaar chaar amach ee wai naawaita mag iekha nʉ wa sĩi dösãtauta mag iekhapi sĩ.  
\v 2 Ẽwandam Akharauta mag iekhapi sim khap aag mʉgta abat: Pãachdëu ũurwai Jesucristoon chadcha ich Ẽwandam Iewaa chaarta parhoobam chaaidamjö thaabachëwia sĩi ich mʉg wounkhata õor ee nʉrrajim a jaaumʉn, magan chadcha Ẽwandam Akharau jaaupitarr iekta jaau wënʉrrʉm.  
\v 3 Pari ar Jesús chan mag khabata bëejim a jaau nʉm khʉʉnau chan Ẽwandam Akhaar charau jaaupi simjö jaaubata nʉm. Chi mag sëukha nem jaau wënʉrrʉm khʉʉnaun Cristo oomaphanaa i igar khabata nem jaau nʉm. ¿Pãrau ũrba aajẽ mag anticristo bëeju anʉm? Magtarr aawai jãg sëukha nem jaau wënʉrrʉm khʉʉnaun i bëeju nawe ya i iekta jaau wënʉrrabahab.  
\v 4 Keena, pãar chadcha Ẽwandam chaain aawai i Akhaar chaar sĩi dösãt mʉg jẽb gaai sĩejem khãaijã jua theeg ʉ̈rpai sĩerrʉmta wai nʉm; magua jãg sëukha nem jaau nʉrrjëem khʉʉnagjã ʉ̈u ʉdʉraa pãach khũgurpibajierram.  
\v 5 Jãg chi sëukha nem jaaujem khʉʉnaun sĩi mʉig eegarm khʉʉn khĩirjugpaita jaau naawai Cristo ichaaurta jaau nʉm. Magua õrau am iek ũrm khõsi ũurjerram, amach khapeen iek aawai.  
\v 6 Pari maach agjö mʉig eegarm khʉʉnkha nʉmta jũrr Ẽwandam dënkha nʉm. Maagwai chi Ẽwandam amach thãar ee wai nʉm khʉʉnaupaita maach iek ũrm khõsi ũurjerram. Pari Ẽwandam dën khabam khʉʉnau chan bʉ̈ʉrjã maachdëu jaau nʉm iek ũrmapha aajem. Maguata ãbmua khãijã Ẽwandam iekta jaau nʉrrʉm anʉmta maadëu jaau nʉm ũrmapha simʉn magan maig merag chukhu sim, chadam iek jaauba sĩi chikham khũguraagta mag nʉrrʉm. 
\s1 Ẽwandamau thumaam khʉʉn daupii aajem 
\p  
\v 7 Keena Cristo gaaimua khodamnaan, Ẽwandamau ich garmuata maach khõsi sĩewai maadëujã agdaujöta jũrr dich khapeen kha khõsi aju aai nʉm. Thum ar agdaujö dich khapeen kha khõsi aajem khʉʉnan Ẽwandam chaainkhanaa ich Ẽwandam khĩirjugjã khaphʉ paaukhamam, ichdëu õor khõsi simjöta amaujã khõsi naawai.  
\v 8 Mamʉ ar amach khapeenjã kha khõchkhaba nʉm khʉʉn chan warrcha amachdëu Ẽwandam amach thãar ee aujim anʉm edjã chadcha thãraucha ʉ̈khawia auba arr aawaita mag nʉm. Magba akhiin amau amach khapeen daupii aajeekham, ich jãg Ẽwandamaujã thumaam khʉʉn daupii aajemjö.  
\v 9 Mag ichdëu maach daupii sim khap apiegta Ẽwandamau ich Chaai ãbpai khitʉm mʉg jẽb gaai pʉ̈ijim, mag pʉ̈iwia meebarmua maach ich dënkha auwia ich mag ich dʉ̈i wai nʉrraag.  
\v 10 Mag Ẽwandamau maach khõsi sim chan mag maachdëuta nacha maach garmua i khõchkhatarr aawai khaba, ich garmuata maach daupigau ich Chaai pʉ̈ijim, maach kõit ʉdʉraa ich thõopimkhĩir, mag ich thõopibarmua maach khaibag chugpaapʉ̈yaag.  
\v 11 Ẽwandamau mag maach khõsi aajeewai maachdëujã agjöta jũrr dich khapeen kha khõsi aju keena.  
\v 12 Mamʉ ¿jãga Ẽwandam maach dʉ̈i sim õrau khaphʉ nʉ? Chadcha dau daau chan maadëu Ẽwandam ooba aajem; pari maadëu agdaujö dich khapeen kha khõsita wënʉrrʉmʉn, magan chadcha ich Ẽwandamauta amag dau daau ich oopi simjö sim, mag dich khapeen kha khõsi nʉm gaaimua. Wajapcharan mag nʉm aigta Ẽwandam maach dʉ̈i sim, agtha ichdëu õor khõsi sim amag khap amkhĩir.  
\v 13 Mag maach Ẽwandam dʉ̈i khapeerkha nʉm anʉmjã khaphʉ nʉmʉn, ich Ẽwandamau maach dʉ̈i mag khapeerkham khõchgau ich garmua ich Akhaar maachig deetarr aawaiu.  
\v 14 Mag nʉm dʉ̈i ĩchab chi Ayau ich Iewaag õor peerdʉ aumkhĩir pʉ̈itarrjã marau maach daúacha ootarr aawaita mag khaphʉ jaau nʉm, chadcha Ẽwandam maach dʉ̈i khapeerkhaju aai sim õrag khap amkhĩir.  
\v 15 Maadëuta Jesuun chadcha Ẽwandam Iewaa aawai ich dʉ̈i ãba sim awia i aumʉn, magan maachin Ẽwandam dʉ̈ita khapeerkham iek khapeerkha nʉm.  
\v 16 Mag Ẽwandam maach dʉ̈i sĩewaita maadëu khaphʉ nʉm, chadcha irua maach khõsi sim. Ẽwandamau thumaam khʉʉn daupii aajemjöta dich khapeenjã daupii simʉn, magan Ẽwandam dʉ̈i khapeerkha sĩewaita mag ich khapeen daupii sim.  
\v 17 Mag maach khõsi sim khaphʉ naawaita warag maach garmuajã ʉ̈rcha maadëu i khõsi nʉm. Mag, õor i agkha nʉm edjã i ögkhaba naaju, mʉig eegar nʉwejã Ẽwandamau ich Iewaa khõsi aajemjö maachjã irua khõsi sim khaphʉ naawai.  
\v 18 Ẽwandamau chadcha maach khõsi sim maadëu khaphʉ nʉm aig i ögkhaba aajem; magju khãai dich khõsi sim khaphʉ naawai bʉ̈ʉrjã dich dʉ̈i khaigbajujã khĩirjubaju. Maadëu i ögkha nʉmʉn, magan dich khaibag khãijã wauju khĩirjuwiau. Magua, Ẽwandamau õor i agkham ed maachjã irua khaigba aju khĩirju nʉmʉn, magan agtha wajapcha maach khõsi sim khaugba naawaita mag khĩirju nʉm.  
\v 19 Ich garmuata nacha maach khõchkhatarr aawai ĩsin maachdëujã maadëu i khõsi nʉm.  
\v 20 Ãbmua khãijã, “Mua Ẽwandam khõsi chitʉm” a sim; pari mag simta dich khapeenjã kha khõchkhaba simʉn, magan maan sĩi sëukhaawaita mag iekha sim. Chi mag iekha simua ich khapeen dʉ̈i khĩircha oo simta mag kha khõchkhaba sim khai, jãga mag Ẽwandam ichdëu bʉ̈ʉrjã ooba aajemta irua khõsi abarju.  
\v 21 Jesucristoou maachig jaau pʉatarr maadëu khaphʉ nʉm. Mag irua jaau pʉarran mʉgau: “Pua chadcha Ẽwandam khõsi sim khai, magan pʉch khapeenjã ich agjö kha khõsi abá,” a sim. 
\c 5  
\s1 Jesús iek ʉ̈khaawain dich garmuata khaibag thum pödpäaijem 
\p  
\v 1 Jesuun chadcha Ẽwandamau ich Iewaa ichdëucha pʉ̈itarr aawaita i dʉ̈i ãba sim awia au sim wounan magan ya Ẽwandam chaairau. Magbarm aig agjö tagam khʉʉn Ẽwandam chaainkha nʉm khʉʉnaujã agjö i khõsi aju aai nʉm. ¿Jãgwi? Chi Aaijã khõsi naawaima; pöd chi Aai appai daupiinaa chi chaain khõchkhaba aju aai khaba nʉm.  
\v 2 ¿Jãga mag maadëu i chaainkha nʉm khʉʉnjã khõsi nʉm khap abarju? Chadcha ich Ẽwandamjã daupii naawai irua nem jaau sim ipierraa nem waauwaima. Mag i ipierraa wënʉrrʉmʉn, i chaainjã daupii wai wënʉrraju.  
\v 3 Chadcha Ẽwandam daupii nʉm anʉmʉn irua nem jaau sim thum i ipierraa nʉmʉu; mag irua maachig waupi jaau sim nem chan maadëu pödbaju ayaam nem khabam.  
\v 4 Thum maach chi Ẽwandam chaainkha nʉm khʉʉnau chan pekaúg ʉdʉʉr dich deeba aajem, dich garmuata pödpʉ̈pʉ̈i aajeewai.  
\v 5 Mag maadëu magʉm pekau pöd nʉmʉn, Jesús Ẽwandam Iewaa ich Ẽwandam dʉ̈i ãba sĩerrʉm iek ʉ̈kha wënʉrrʉm gaaimuata mag pödpäaijem. 
\s1 Ẽwandamau ich Chaai khaugpitarr 
\p  
\v 6 ¿Pari jãga mag Jesús Ẽwandam Iewaakha sim maadëu khaphʉ nʉ? Jesús pör choo nʉm aig ich Ẽwandamaucha ʉ̈gtharmua jaauwia pakuls gaai ya meemaa aawaijã agjö jaautarr aawaima. Mag nʉm dʉ̈i ich Ẽwandam Akhaar chadcha nem jaaujemuajã khaphʉ apiejem, Jesús chadcha Ẽwandam Iewaakha sim.  
\v 7-8 Aragan biek numí ich Chaai ichë sim õrag ich iekcha ũrpijim ʉ̈gtharmua: i pör choo naawai maimua ya thõopʉ̈yaag pakuls gaai i wai naawaijã agjö ũrpijim. Maimua ĩs ewag pawiajã ich ag iekpaita Ẽwandam Akhaar maach thãar ee simuajã khaphʉ apiejem, í chadcha Ẽwandam Iewaakha sim.  
\v 9 Mʉig eegarm khʉʉnaujã maachig nem mag aawai maadëu ʉ̈khaajeewai ich Ẽwandamaucha Jesús igwia ich Chaai a jaau sim chará wajapcha ʉ̈khaju aai nʉm, ichdëuchata mag jaau sĩewai.  
\v 10 Chadcha chi Ẽwandam Iewaa iekta ʉ̈kha simuan ich thãar ee khaphʉ sĩsim, chadam iekta ichdëu ʉ̈khabarm. Mamʉ mag Jesús igwia ich Ẽwandamaucha i Iewaa a jaau simjã ʉ̈khaba simuan warag ich Ẽwandamta sëunemeg phë sim, irua jaau sim ʉ̈khabam gaaimua.  
\v 11 Mag irua maachig jaau sim iekhan, maach ich dënkha auwia ich mag ich dʉ̈i wënʉrrapijuuta jaau sim; pari mag i dënkhanaa i dʉ̈i ich mag wënʉrrajuun, ãba ich Ẽwandam Iewaa gaaimuapaiu.  
\v 12 Magua chi Ẽwandam Iewaata ich thãar ee au simʉn ĩchab warreta iiu sĩsiejem, i dʉ̈i ich mag i dënkha nʉrraag. Pari chi Ẽwandam Iewaata auba sim chan agtha i dën khaba sim, i dʉ̈i ich mag iiu nʉrraag. Magʉm khʉʉn pöd i dʉ̈i ich mag nʉrrabam. 
\s1 Juanau ãbmiecha õor wawitarr 
\p  
\v 13 Keena, pãar Ẽwandam Iewaa iek ʉ̈khaajem khʉʉnagta mʉg ẽsap phã deepʉ̈i chirʉm, ya pãar i dënkha naawai chadcha pãach i dʉ̈i ich mag wënʉrraju khap amkhĩir. 
\p  
\v 14 Maadëu khaphʉ nʉm ĩchab, ich Ẽwandamau khõsi simjö maadëu irig jëeuwain irua maach iek ũrb khaba ũurjem.  
\v 15 Mag ichig jëeuwai maach iek ũurjem khaphʉ naawai mag jëeubarmjã ya wai nʉmjöta khĩirjuju aai nʉm, chadcha irua deeb khaba deeju aawai. 
\p  
\v 16 Ãbmua khãijã dich khaperau pekau wau sim oomʉn, i kõit Ẽwandamag jëeuju aai sim; majã juau ogthom khĩmie durr ich barpʉ̈imkhĩirjö Cristo ichaaur nem jaau nʉrraba sim khai mamʉ. Mag i kõit jëeumʉn, Ẽwandamau iiupi auwia ich dënkha auju, ich mag ich dʉ̈i wai nʉrraag. Ẽwandamau pödba aawai khabam, pari pogkha õrau pekau wau nʉm irua chugpaaba aajem, mag amach barpʉ̈imkhĩirjö Cristo iek khaphʉ nʉmta juau ogthom i ichaaur nem jaau wënʉrraawai. Magʉm pekauta wau nʉm kõit chan mua pãrau jëeuju aai nʉm aba chirʉm. Magʉm paran pãrau parta jëeuju, ichiita Ẽwandamau isegju aawai.  
\v 17 Nem khaigbam thum pekaukha öbër sim, pari magʉm Ẽwandamau chugpaabapäaiwai khĩmie durr maju arrjã maba aajem. 
\p  
\v 18 Maadëu khaphʉ nʉm, Ẽwandamta ich Aaikha wai sim woun chan ich mag ich pekau ee nʉrraba aajem, ich Ẽwandam Iewaauchata i thʉa wai sĩewai. Magua dösãtaujã pöd pekau ee thʉ aum iek i thʉ auba aajem.  
\v 19 Maadëu khaphʉ nʉm, maach chadcha Ẽwandam dënkha nʉm; pari khaphʉ nʉm ĩchab, mʉg jẽb gaai õor pöm sĩi dösãtauta ich jua eegar phë wai sim.  
\v 20 Maadëu khaphʉ nʉm ĩchab, Ẽwandam Iewaa maach ee bëewiata maachig khĩirjug deechëjim, Ẽwandam chaarta wajapcha khap amkhĩir. Mag gaaimuata maachin chadcha ich Ẽwandam chaar dʉ̈ita wënʉrrʉm, pari wajapcharan chi Iewaa Jesucristo dʉ̈ijã agjö naawai mamʉ. Mag Cristota Ẽwandam chaar anaa maach ich mag iiupiejemʉu. 
\p  
\v 21 Chaaina, ãbmiecha pãrag jaaukhim: Jãg Ẽwandam iek jaau nʉm anʉmjã Ẽwandam iek chaar khabamʉgta ee apiju ẽkhaajem khʉʉn dʉ̈i khĩir khaphʉ abat. 
\p Magdam ajim pãrag jaaum ig chirarr. Ayoo keena, 
\cls Juan