\id 1JN - Gela New Testament 
\h 1 John 
\toc1 Na Diki Gegere John na Tabu te Gerea 
\toc2 1 John 
\toc3 1 John 
\mt2 Na Diki Gegere  
\mt1 John na Tabu  
\mt2 te Gerea  
\is1 ?Na hava te tughunia igaa?  
\im Na mane te gerea na gegere eni te mua bosatatea na ahana, hauva rana mane sule ni holohoru idania tara bosa ke a John, nina manevetena Jesus. Gaia te gerea ghua na Rongorongo Uto mana Na Livu.  
\ip John te gegere vanira rana taluutuni na pukuna te liona kara kabu sakaisonikolua God ma Dalena, Jesus Christ. John te bosa vanira ke vagha gaira tara liona ge kara gonia te vagha keri ke, kara taonighi mughua nina lei vetena God ma kara sopa dolovira heghedira.  
\ip John te liona ghua rana taluutuni ge kara mua taonighi na lei tarai sorisori. Balu manetarai sorisori tara taluutunia na lei totobo soko ighita ta tabei tana maramana eni te dika. Na pukuna keri, tara bosaa Jesus te mua na tinoni te utuni, te loghoa na huli te vagha na hulida. Ilokana na gegere eni John te bosaa na lei manetarai sorisori te vaghara keri, tara tangomana ge kara dikala didira na taluutuni arahei tara taonira. Keri ke gaia te talutatea te utuni Jesus te sivuragha mai lokana na huli ni tinoni tana maramana eni.  
\iot Na lei Ghanaghana Mava ilokana na Gegere eni  
\io1 God na marara mi ghita ka taonia mughua na nilabuna Christ (1:1-2:29)  
\io1 Na nilabuda te talutatea ke vagha ighita na dalena God pi ghita na dalena Satan (3:1-24)  
\io1 Na halautu ge ka ghilala vakodora lei prophet sorisori (4:1-6)  
\io1 Na puku ni dolo te butu mai ta God (4:7-21)  
\io1 Jesus na halautu ge ka holaa na vola kasila (5:1-21)  
\c 1  
\s1 Jesus na bosa te talutatea na vola te utuni  
\p
\v 1 Inau tu gerea vanighau nia na Bosa ni vola. Agaia te ghaha mai tua tana vuivuni, agaia tai rongovia mai vaevanea tua. Ighai tai righia nia na puku ni matamami, ma tabea nia na puku ni limamami.\x - \xo 1:1 \xt John 1:1\x*  
\v 2 Ma God te talutatea gaia te vahera na lei tinoni na puku ni vola, mi ghai tai righia tua. Mi taeni ighai tai ladavaghinia ge kai tughunitatea vanighau, na pukuna gaia na vola maurihali. Agaia itatana God na Mama, me mai livu vanighai tua.\x - \xo 1:2 \xt John 1:14\x*  
\v 3 Mi ghai tai tughunitatea vanighau, na lei totobo tai vaevanei mai rongovighi tua, ge kau sakai sonikolu itamami. Mi ghita ka sakai sonikolu itatana Tamada maia na dalena Jesus Christ.  
\v 4 Mai gerei na lei totobo raini, ge ke vonughighi dida\f + \fr 1:4 \fk dida \ft balu na gegere tabu te loghoa \fk nimiu.\f* na togotogo.   
\s1 Na kabuada ilokana na marara  
\p
\v 5 Aeni nina na rongorongo Jesus Christ te vaheghai mai, ge kai tughunitatea vanighau, “God ke na marara, me taho tua na pungi tatana.”  
\v 6 Ma ge ka bosa, “Ighita ta kabu tabu kolua God,” hauvaa ma ka tona haliua so, na kabu ilokana na pungi ke, mi ghita ta kiko vamua, ma mua ghahaghita tana utuni.  
\v 7 Ma ge ka ghahaghita ilokana na mararana God, te vagha te ghaha iga Christ ke, mi ghita ta sakai sonikolu hegheda. Mana ghabuna Jesus na Dalena te va marabughita tana lei paluda soko.   
\p
\v 8 Ma ge ka bosa, “Ighita ta mua gonighi na lei totobo dika,” ighita ta kiko pulohighita vamua, ma mua pangotia sughua na utuni.  
\v 9 Ma ge ka sopa tughunitatei vania God na lei paluda ke, ma gaia ke talukehai na paluda soko, me ke va marabughita tana na lei totobo dika. Gaia ke gonighi te vaghai kiri na pukuna te gonia haia na hava te nia baubahu, me ke nea na hava te maemane.  
\v 10 Ma ge ka bosa, “Ighita ta mua palugha,’ ke, ta kikoa God, ma talutatea ge na bosana God te mua ghaha ilokani na lei sopa tobada.   
\c 2  
\s1 Christ dida na hahanga  
\p
\v 1 Ghau na lei dalegu tana taluutuni, inau tu gerea vanighau gatu na gegere eni, ge kau bei tumu gea tana tangohahi. Hauva, ke vagha sakai tatada ke gonia na tangohahi ke, ighita ta loghoa sakai ke kokoeliulivuti tughughita va itatana God Tamada - agaia Jesus Christ, na puku ni maemane.  
\v 2 Christ heghena te mate vanighita te vagha na sukaghi, ge ke talukehai na lei paluda - na mua paluda vamua ighita, na paludira ghua na lei tinoni soko.   
\p
\v 3 Ighita ta talutatea gea ghilala utoa God ke vagha ka taonighi lei nina vetena.  
\v 4 Ma ge siki sakai ke bosa te ghilala God, me mua taonighi lei nina vetena ke, na tinoni keri te kiko me taho na utuni tatana.  
\v 5 Ma hei ke taonighi na lei bosana God ke, ma gaia te dolovia sughua God. Aeni te talutatea iga ta ghilalaa ta sakaisonikolu itatana God.  
\v 6 Ma hei ke bosa te sakai sonikolu itatana God ke, gaia ke taonia na volana Jesus Christ.   
\s1 Na vetena vaolu  
\p
\v 7 Ghau lei kulagu tana taluutuni, na vetena tu gerea vanighau eni ke na mua vetena vaolu. Aeni ke, na vetena haulaghi tau ghilalai tua tana bona tau vuivuni mai ge au taonia Jesus Christ. Na vetena haulaghi eni ke na rongorongo tau rongovia tua, ge kau sopa dolovighau heghemiu mughua. \x - \xo 2:7 \xt John 13:34\x*  
\v 8 Hauva na vetena eni tu gerea vanighau te vagha na vetena vaolu itaeni, na pukuna na nilabuna Christ maia na nilabumiu ghua ighau tau talutatea aeni te utuni, na pukuna na puku ni marara te marara mai tua, mana pungi te taghaa.\fig Na puku ni marara te marara mai tua, mana pungi te taghaa.|alt="Lamp" src="HK00151B.TIF" size="col" loc="end 8" copy="HK00151B" ref="2:8" \fig*   
\p
\v 9 Ma hei ke bosa te kabu ta nina marara God, me nia sika so na tinoni taluutuni ke, me kabu so mua tana pungi.  
\v 10 Ma hei te dolovia na tinoni taluutuni ke, me kabu utuni sughua tana marara, me taho siki totobo dika tana volana ke nea siki sakai ge ke tumu tana tangohahi.  
\v 11 Eo, ma hei ke nia sika na tinoni taluutuni te kabu tua ilokana na pungi. Me sakutua ilokana na pungi me mua ghilala ivei te va, na pukuna na pungi te nea me rorodo.   
\p
\v 12 Ghau na lei dalegu tana taluutuni, inau tu gegere vanighau gatu, na pukuna God te talukehai tua na palumiu itatana Christ.   
\p
\v 13 Ghau na lei tonikama, inau tu gegere vanighau na pukuna ighau tau ghilala gaia te ghaha mai tua tana vuivunina mai.  
\p Ghau na lei garimane, inau tu gegere vanighau gatu na pukuna ighau tau laga vulea tua Satan.   
\p
\v 14 Ghau na lei dalegu tana taluutuni, inau tu gegere vanighau gatu na pukuna ighau tau ghilala tua God Tamada.  
\p Ghau na lei tonikama, inau tu gegere vanighau gatu, na pukuna ighau tau ghilala gaia te ghaha mai tua tana vuivunina mai.  
\p Ghau na lei garimane, inau tu gegere vanighau gatu, na pukuna ighau tau laga tana taluutuni, mana bosana God te ghaha itamiu, mau laga vulea tua Satan.   
\p
\v 15 Kau bei dolovia na nilabu te dika tana maramana pa siki totobo ilokana. Ma ge kau dolovia na maramana ke, ma kau mua dolovia tua God Tamada.  
\v 16 Na lei nilabudira rana vure ni maramana raeni ke, tara mua va mai tatana God. Eo, na lei nilabu dika te vaghai na lei tangohahi te vuhaa mai tana ghanaghana ni huli, mana hava na lei tinoni tara nighi gharu tana bona tara righighi na lei totobo mara lioni, mana lei tinoni tara nighi talunagho didira na lologho ke, me taho siki totobo raini ke, te va butu mai tatana Tamada, hauva ka mi tana maramana vamua tara va mai.  
\v 17 Na maramana eni mana lei totobo tara nia gharu ilokana kara talutaghai. Hauvaa arahei tara taonia na liona God kara lavia na vola kasila.   
\s1 Ghana levunimate Christ  
\p
\v 18 Ghau na lei dalegu tana taluutuni, na sosoko ni bongi te dutu mai tua! Kau rongovia tua na ghana levunimate Christ ke livu mai tana bongi keri. Mi taeni ke, e subo na ghana levunimate Christ tara sivuragha mai tua. Na pukuna keri, ge ka ghilala na sosoko ni bongi te dutu mai tua.  
\v 19 Na ghana na levunimate Christ raini ke, tara kokoeliulivuti kolughita tua te padi tana taluutuni. Hauva tara rughuhoru sanighita na pukuna tara mua sakai sonikolu itatada. Ma ge kara taluutuni utuni ke, ge ma kara kabukolughita. Keri ge ka ghilala utora tara mua sakaisonikolughita tana taluutuniana Christ.   
\p
\v 20 Mi ghau tau taluutuni tua, Christ te kovala horua mai tua na Tarunga Tabu i vuvungamiu, na pukuna keri ge au ghilala na utuni ga.  
\v 21 Na hava na pukuna ge u gerea vanighau ke, na mua pukuna tau mua ghilala na utuni, hauva ka, mana pukuna tau ghilala na hava te utuni. Mau ghilala ghua taho siki tarai sorisori ke mai tana utuni.  
\v 22 ?Ma hei na tinoni te kiko? Agaia siki sakai te bosaa Jesus te mua na Christ.\f + \fr 2:22 \fk Christ \ft Tana leu ni Jew = Messiah; Na tinoni God te vilia ge ke vavolara rana Jew.\f* Mana tinoni te vagha keri ke, te levunimate vania Christ na pukuna te mua holopangotira na Mama mana Dale.  
\v 23 Ma hei tua ke nia hughu na Dale ke te nia hughu ghua na Mama. Ma hei ke holopangotia na Dale ke, me holopangotia ghua na Mama.  
\v 24 Keri ke, kau kabu marabu mughua tana hava tau rongovia tua tana bona tau vuivuni ge au taonia Christ. Ma ge kau gonia te vagha keri, ma kau sakai sonikolu haia itatana na Mama mana Dale.  
\v 25 Mana Dale te nia baubahu vanighita na vola kasila.   
\p
\v 26 Inau tu gerea vanighau gatu na lei totobo raeni ge kau righitaonighau heghemiu itadira rahei tara tabotabo ge kara pegopegoghau.  
\v 27 Mi ghau ke, a Christ te kovala horua mai tua na Tarunga Tabu i vuvungamiu, mana Tarunga Tabu ke ghaha haia itamiu. Keri ke, me uto ke taho siki sakai ke taraighau nia na hava te utuni, na pukuna na Tarunga Tabu te taraighau tua nia na lei totobo raini soko, mana hava te nia tarai te utuni, me taho iga na kiko. Kau taonia nina tarai na Tarunga Tabu ke, ge kau sakai sonikolu itatana Christ.   
\p
\v 28 Eo, ighau na lei dalegu tana taluutuni, kau kabu sakai sonikolu itatana Christ, keri ge ka loghoa na liopapara ma ka mua nia maa siki totobo tana bongi keri ke oli mai gaa.  
\v 29 Mi ghau tau ghilala Christ te maemane, ma kau ghilalara ghua rahei soko tara gehegehetighi na hava te maemane ke, agaira rakiri na lei dalena God.   
\c 3  
\s1 Na nilabuda te talutatea ke vagha ighita na dalena God  
\p
\v 1 Kau ghanaghana ivei vaho tua te ghaghua anina na dolo God Tamada vanighita te sule ngangata. Mi ghita ta ghilala tua te sule ngangata na pukuna God te hologhita nia rana lei dalena, me utuni sughua ighita anina. Subo na vure tana maramana tara mua ghilala utoa God, keri ge kara mua ghilala ighita rana lei dalena God. \x - \xo 3:1 \xt John 1:12\x*  
\v 2 Ghau na lei kulagu tana taluutuni, itaeni ta ghilala tua ighita rana dalena. Mi ghita ta mua ghilala mua, ivei ka ghaghua i kise, hauva ma ka ghilala utoa tana bona a Lord ke oli mai tana maramana, me ke livu vanighita, ma ka vaevanea na puku ni reireina nia na matada, mi ghita ka vagha Christ.  
\v 3 Ma hei ke taluutunia ke, gaia ke vaghaa Christ, me ke kabu marabu mughua, te vaghaa Christ te kabu marabu.   
\p
\v 4 Ma hei ke tangohahi ke, ma gaia te diua nina na vetena God me hughua God puku ni maana.  
\v 5 Mi ghau tau ghilala, Jesus Christ te mai tana maramana ge ke lavikehai na lei paluda soko. Ma ghilala ghua gaia a Christ te mua loghoa siki palu itatana. \x - \xo 3:5 \xt John 1:29\x*  
\v 6 Taho siki sakai te kabu sakaisonikolua Christ, ke va tona haliua na tangohahi. Ma hei ke tangohahi haia ke, me ke mua righia pe ke mua ghilala utoa Christ.   
\p
\v 7 Ghau na lei dalegu tana taluutuni, kau bei lubatia siki sakai ge ke pegopegoghau nia na lei totobo raini. Arahei tara gehegehe maemane ke, agaira tara maemane tana matana God, te vagha Christ te maemane.  
\v 8 Ma rahei tara tangohahi haia ke, gaira tara nina vure Satan, na pukuna Satan te diua nina na vetena God tana vuivunina mai me sara itaeni. Ma gaia na Dalena God te sivuragha mai na pukuna eni, ge ke durakei na lei nina gehegehe Satan.  
\v 9 Ma rahei tara sivuragha mai lokana nina binaboli God ke, kara mua ghoi tangohahi tua, na pukuna na nilabuna God ilokana na voladira. Keri ke, gaira tara kabu uto mara kabu tabu taonia na liona God. Gaira kara mua tangomana ge kara tangohahi, na pukuna gaira rana dalena God.  
\v 10 Keri ke, na hava te vilivokaghita rahei rana dalena God, ma rahei rana dalena Satan te vagha eni, rahei tara mua gehetighi na lei totobo te maemane, mara mua dolovira rana taluutuni, gaira tara mua dalena God.   
\s1 Kau sopa veidolovi heghemiu  
\p
\v 11 Aeni na rongorongo tau rongovia tana bona tau vuivuni ge au taonia Christ, “Ighita ka veidolovi.” \x - \xo 3:11 \xt John 13:34\x*  
\v 12 Ka bei vagha Cain idania. Gaia nina tinoni Satan me labumatea Abel na tahina. ?Na hava na pukuna ge labumatea na tahina? Na pukuna na lei nilabuna Cain te mua maemane, mana nilabuna Abel te maemane tana matana God. \x - \xo 3:12 \xt Vuivuni 4:8\x*   
\p
\v 13 Ghau rana hoghogu tana taluutuni, keri ke, kau bei nia hare gea tana bona rana tangohahi tana maramana eni gaira ghamiu na levunimate.  
\v 14 Ma ge ka dolovira rana taluutuni ke, ighita ta ghilala ta tatavahale tana maana ni mate, mi ghita ta lavia na vola kasila. Ma rahei kara mua dolovira rana taluutuni ke, agaira tara kabu sarana na maana ni mate. \x - \xo 3:14 \xt John 5:24\x*  
\v 15 Ma hei ke nia sika na tinoni taluutuni ke, gaia te vagha na labutabo. Mi ghita ta ghilala na labutabo ke mua loghoa na vola kasila.  
\v 16 Tana bona gaia Jesus Christ te lubatia na volana me mate vanighita, gaia te talutatea na nilabu ge ka dolovi utunira na lei tinoni. Na pukuna eni, ighita ghua ka talada mughua ge ka taluhorua na volada vanira rana taluutuni.  
\v 17 Ma hei ke lologho au tana maramana eni ke, me ke vaevanelea soo na tinoni taluutuni te kabu bona me mua arovia, me ke mua hangaa ke, gaia te mua dolovia siki sakai te vagha God te dolovia.   
\p
\v 18 Ghau na lei dalegu tana taluutuni, ka bei bosa vamua ighita ta sopa veidolovi hegheda. Ighita ka talutatea mughua na puku ni dolo vanighita hegheda nia na hava ta gehetia.  
\v 19 Ma ge ka nea sughua te vagha keri ke, ge ka ghilala utoa ighita ta ghahaghita tana utuni, me ke mua gunaguna na kutuda tana bona ka tughuru tana matana God.  
\v 20 Sakai vamua na ghanaghanada ke dete kaleghita iga me bosa vanighita, “ighita na tangohahi” ke, ka kabu mabo na pukuna God te ghilala utoi na lei totobo soko ta gonighi, mana ghanaghanana God ma nina veiarovi te haba vulei na lei ghanaghanada soko.   
\p
\v 21 Ghau na kulagu tana taluutuni, ke vagha na tobada te mua dete kaleghita, keri ge ka loghoa na liosakai tana bona ka tughuru tana matana God.  
\v 22 Ma God ke vaheghita na lei totobo ta nongighi tatana, na pukuna ta taonighi nina lei vetena ma gehetia na hava te liona God.  
\v 23 Raini na lei totobo God te bosai vanighita ge ka nei: Ka taluutunia na Dalena, Jesus Christ, ma ka veidolovi te vagha Jesus te bosaa vanighita. \x - \xo 3:23 \xt John 13:34; 15:12, 17\x*  
\v 24 Ma rahei kara taonighi nina lei vetena God ke, gaira kara sakaisonikolua God ma God te sakaisonikolura gaira. Ma ka ghilala utoa God te kabu sakaisonikolughita na pukuna na Tarunga Tabu te vaheghita mai tua te kabu itatada.   
\c 4  
\s1 Na halautu ge ka ghilala vakodora lei prophet sorisori  
\p
\v 1 Ghau rana kulagu tana taluutuni, na pukuna tara subo tua na lei prophet sorisori tara va mai tana maramana ke, kau bei taluutuni udolura gea rahei kara bosaa tara lavia tua nina Tarunga Tabu God. Ma kau tabotaboa na hava tara taraighau nia, ge kau ghilala vakodo utoa nina Tarunga Tabu God te utuni tadira, pe taho.  
\v 2 Mi ani kau nea na ghilala kaleana ahei te lavi utunia nina Tarunga Tabu God, ahei ke kokoe kalea gaia Jesus Christ te mai tinoni me loghoa na huli te vaghaghita ke, agaia keri te loghoa nina Tarunga Tabu God itatana.  
\v 3 Hauva ma hei na prophet vaghana ke bosa, a Jesus Christ te mua mai tinoni iani tana maramana, na prophet eni te mua loghoa nina Tarunga Tabu God ilokana. Na tidalo sorisori ilokana na tinoni keri, te va mai tua tana ghana levunimate Christ.\f + \fr 4:3 \fk levunimate Christ \ft Greek = Antichrist - na tinoni te mai bosa vilivokaa Christ. Erua na ahana Satan.\f* Mau rongovia tua na ghana levunimate Jesus Christ ke mai i kise, hauva mi taeni gaia tua iani tana maramana.   
\p
\v 4 Ghau na lei dalegu tana taluutuni, ighau nina vure God, mau laga vulera tua na lei prophet sorisori, mau sonikehai didira na tarai, na pukuna na Tarunga Tabu te ghaha ilokamiu. Mana Tarunga Tabu te laga vulea nina maana Satan, te vunaghi pungisira rahei tara mua ghilalaa God.  
\v 5 Rana prophet sorisori tara mua ghilalaa God, mara nighi tarai na lei ghanaghana ni maramana vamua. Mana pukuna eni, rana vure tara mua ghilalaa God ke, ge ra holopangotighi didira na lei tarai.  
\v 6 Hauva, ighai nina manevetena God, mi ghai tai loghoa nina maana. Ma rahei tara ghilala God ke, ma gaira kara taonia nimami na tarai. Hauva rahei kara mua nina vure God, kara mua taonia nimami na tarai. Keri ke, ma eni te talutatea vanighita rahei tara loghoa na Tarunga Tabu te utuni, ma rahei tara loghoa na tidalo dika ilokadira.   
\s1 Na puku ni dolo te butu mai ta God  
\p
\v 7 Ghau rana kulagu tana taluutuni, ka nia tona haliu na veidolovi na pukuna na dolo te butu mai ta God. Ahei te dolovira na lei tinoni ke, gaia na dalena God, ma gaia te ghilala God.  
\v 8 Ma hei ke mua dolovira rana vure ke, me mua ghilalaa God, na pukuna God na puku ni dolo.  
\v 9 A God te talutatea nina dolo vanighita te vagha eni, gaia te nia vetena mai na Dalena sosopa tana maramana ge ka lavia na vola kasila itatana.  
\v 10 Na puku ni dolo te va mai ta God. E mua na nilabu ighita ta nea vania God, hauva na nilabu gaia te nea vanighita. God te nia vetena mai na Dalena ge ke mate vanighita te vagha na vatei sukaghi tughuani na lei paluda.   
\p
\v 11 Ghau rana kulagu tana taluutuni, na pukuna God te dolovighita te vagha keri, mi ghita ghua ka kabu veidolovi.  
\v 12 Sakai vamua te taho siki sakai te vaevanea God, me ke vagha ka sopa veidolovi ke, gaia te righikalea te vagha God te kabu itatada, ma nina dolo God ke gonighi na hava te liona.\x - \xo 4:12 \xt John 1:18\x*  
\v 13 Mi ghita ta ghilala God te sakaisonikolu itatada, mi ghita itatana gaia, na pukuna gaia te vaheghita mai nina Tarunga Tabu.  
\v 14 Ighai tai vaevanea na Dalena God nia na matamami, mai tughunitatea vanira na lei tinoni, God Tamada te nia vetena na Dalena ge ke vavolaa na maramana.  
\v 15 Ma rahei kara tughunitatea Jesus agaia Dalena God, God ke kabu itadira ma gaira itatana God.  
\v 16 Keri ke, mi ghita ta ghilala utoa God te dolovighita, mi ghita ta taluutunia ge ke dolovighita haia.  
\p God na puku ni dolo, ma rahei tara dolovia haia God mana lei tinoni ke, gaira tara kabu sakaisonikolu ta God, ma God te sakaisonikolura gaira.  
\v 17 Me te vagha ta ghahaghita itatana God ke, dida na dolo te totolo, me maemanea na volada, ge ka mua mataghunia God tana bongi ni dete. Ge ka tughuru tana matana God nia na liosakai, na pukuna ka kabu taonia na volana Christ tana maramana eni.  
\v 18 Ahei te ghilala God te dolovia, gaia te mua mataghunia God na pukuna, tana bona nina puku ni dolo God te ghaha tana volana ke, gaia ke mua tangomana ge ke mataghunia. Balu vure tara mataghunia God, na pukuna tara ghilala God ke detera. Na pukuna keri, siki sakai ke mataghunia God ke, mi ghita ta ghilala nina dolo God te mua ngasi mua tana volana.   
\p
\v 19 Ighita ka sopa veidolovi na pukuna agaia God te diki dolovighita tua.  
\v 20 Ma ge siki tinoni taluutuni ke ghaghua, “Inau tu dolovia God,” me ke nia sika so na tinoni taluutuni ke, mana tinoni keri te kiko vamua. Ke vagha ke mua dolovia na tinoni te righia nia na matana ke, me ke mua tangomana ge ke dolovia God te mua righia nia na matana.  
\v 21 A God heghena te vaheghita mai na vetena eni, “Ahei te dolovia gaia, ke dolovira ghua na lei tinoni taluutuni.”   
\c 5  
\s1 Na taluutuni itatana na Dalena God  
\p
\v 1 Arahei kara taluutunia Jesus agaia na Christ ke, gaira rana dalena God. Ma rahei kara dolovia na Mama ke, kara dolovira ghua rana lei dalena udolu.  
\v 2 Mi ani ta nea na ghilalana ta dolovira rana dalena God, tana bona ta dolovia God, ma ka taonighi nina lei vetena.  
\v 3 Ma ge ka dolovia God ke, mi ghita ghua ka taonighi nina lei vetena.\x - \xo 5:3 \xt John 14:15\x* E mua sakai vahola vanighita, ge ka taonighi nina lei vetena,  
\v 4 na pukuna rana dalena God kara tangomana na lagavuleana na maramana eni mana lei nilabu dika. Mi ghita ta lagavulea na maramana eni nia dida na taluutuni ta Jesus.  
\v 5 ?Ahei ke laga vulea na maramana? Agaia keri vamua te taluutunia Jesus gaia na dalena God.   
\s1 Na tughunitateana Jesus Christ  
\p
\v 6 Ighita ta ghilalaa Jesus Christ gaia Dalena God nia na vulitabu ni beti maia na ghabuna te tave tana ghaivavala. E mua beti lee vamua, mana beti mana ghabu ghua. Mana Tarunga Tabu heghena te tughunia te utuni, mana Tarunga Tabu te mua kiko.  
\v 7 Ra tolu na totobo tara bosatatea na hava te utuni itatana Jesus Christ - \f + \fr 5:7 \ft Balu na Gegere Tabu vaolu tara talua - \fq ikokou - na Tamada, na Bosa, mana Tarunga Tabu, me tolu raini ta sakai vamua. Mara tolu na totobo bosatatea tana maramana:\f*  
\v 8 na Tarunga Tabu, nina vulitabu Jesus tana beti, mana ghabuna Jesus te tave tana bona te mate. Ma tolugaira tara talamaghinia Jesus Christ gaia Dalena God.  
\v 9 Ighita ka taluutunia nina tutughu na tinoni ke, hauva mana hava God te bosaa God te haba vule va. Ma gaia God te tughunitatea vanighita na hava te utuni te manana na Dalena.  
\v 10 Arahei tara taluutunia Dalena God ke, tara ghilala aeni te utuni. Ma rahei tara mua taluutunia na hava God te tughunitatea ke, ma gaira tara bosaa God te kiko, na pukuna gaira tara mua taluutunia na hava God te bosaa nia na Dalena.  
\v 11 Aeni na hava God te talutatea - Gaia te vaheghita na vola kasila, mana vola keri ighita ta lavia itatana Dalena.\x - \xo 5:11 \xt John 3:36\x*  
\v 12 Ahei te sakaisonikolu itatana na Dale ke, agaia te loghoa na vola kasila. Ma hei ke mua holopangotia dalena God itatana, ke mua lavia na vola kasila.   
\s1 Ta lavia tua na vola kasila  
\p
\v 13 Inau tu gerei na lei totobo raini lokana na gegere eni vanighau tau taluutunia tua Dalena God, ge kau ghilalaa tau lavia tua na vola kasila.  
\v 14 Ighita ka loghoa na liosakai te vagha eni, ge ke vagha ka nongia siki totobo itatana God, me ke taonia na liona, agaia ke rongovighita.  
\v 15 Mana pukuna ta ghilala gaia te rongovighita so tana bona ta nongia ke, ma ghilala ghua gaia ke vaheghita na lei totobo ka nongighi itatana.   
\p
\v 16 Ge kau righia siki tinoni taluutuni ke tangohahi me ke mua manana na mate kasila ke, kau kokoeliulivuti vania God, ge ke vahea na vola na tinoni keri. Hauva balu tangohahi te manana na mate kasila.\x - \xo 5:16 \xt Rana Hebrew 6:4 \x* Mu mua bosa ge kau kokoeliulivuti vania God vanira rana vure tara gonighi na tangohahi rakiri.  
\v 17 Na lei gehegehe dika soko rana vure tara nei ke, raini na palu, mana mua palu udolu te manana na mate kasila.   
\p
\v 18 Mi ghita ta ghilalara rahei na lei dalena God kara mua tona haliua na tangohahi na pukuna Jesus Christ te barera, keri ge Satan ke mua nera ge kara tona hahi.  
\v 19 Mi ghita ta ghilala ta nina vure God, hauva Satan te vunaghi pungisira rahei tana maramana eni ge kara mua taluutunia God.  
\v 20 Mi ghita ta ghilala ghua Dalena God te mai tua tana maramana eni, me vaheghita na manaha, ge ka ghilala utunia gaia na puku ni God sughua. Mi ghita ta sakaisonikolu itatana God te utuni, na pukuna ighita ta sakaisonikolu itatana Dalena Jesus Christ. Ma gaia vamua na puku ni God te vaheghita na vola kasila.   
\p
\v 21 Ghau lei dalegu tana taluutuni, kau righitaonighau ge kau bei holohabara na lei titinoni god.