\id 1TH NKO Paul's 1st Letter to the Thessalonians in the Nkonya Language of Ghana
\h 1 Tesalonikafɔ
\toc1 Ɔwʋlʋ́ Gyankpapʋá Paulo Lɔ́wanlɩ́n Sɩ́sɩ́ Tesalonikafɔ
\toc2 1 Tesalonikafɔ
\toc3 1 Te.
\mt2 Ɔwʋlʋ́ Gyankpapʋá Paulo Lɔ́wanlɩ́n Sɩ́sɩ́
\mt1 Tesalonikafɔ
\c 1
\rem Proofread 07-07-09
\p
\v 1 Mɩ́ Paulo, mɩ́a Silwano pʋ́ Timoteo dɛ́ ɔwʋlʋ́ ánfɩ wanlɩ́n sɩ́sɩ́ ɔpasua ánɩ́ ígyi anɩ Sɩ́ Bulu mʋa anɩ Wíe Yesu Kristo klɛ́, ɩbʋ Tesalonika wúlutɔ.
\p Anɩ Sɩ́ Bulu mʋa anɩ Wíe Yesu Kristo bʋgyíi mlɩ bʋalɛ, abʋha mlɩ iwilwii.
\s1 Tesalonikafɔ Hógyi
\p
\v 2 Nɩ́ anɩdɛ́ mpáɩ bɔ há mlɩ brégyíbrɛ́ á, anɩtɛdá Bulu ɩpán mlɩ fɛ́ɛ́ nwunsʋ. 
\v 3 Anɩtetsíá káɩ́n anɩ Sɩ́ Bulu mlɩ hógyi gyumagyihɛ. Alɩá mlɩdɛ́ mbɔ́dɩ́ bɔ dwɛ́ aba, pʋ́ alɩá mlɩlatomi há mlɩ ansɩ́ dɩn anɩ Wíe Yesu Kristosʋ kínkíínkín. 
\v 4 Apíó, anɩyin ánɩ́ Bulu tɔdwɛ́ mlɩ, alalɛ́ mlɩ pʋ́bwɛ́ mʋ klɛ. 
\v 5 Tsúfɛ́ megyí ɔnɔ́ kɛkɛ anɩlɔ́pʋ bɛbláa mlɩ \w asʋn wankláán\w* ámʋ. Mboún mlɩlówun Ɔŋɛ́ Wankɩ́hɛ́ amʋ túmi ɛ́. Ɩ́nɩ lɛ́ha mlɩlɛ́bɩ wankláán ánɩ́ asʋ́n ámʋ igyi ɔnɔkwalɩ. Mlɩlówun tsiátɔ́ oduá anɩlɔ́pʋtsíá mlɩtɔ ɛ́, alɩá ɩbɔ́bʋá mlɩ sʋ. 
\v 6 Mlɩlɛ́kasɩ́ anɩa anɩ Wíe tsiátɔ́. Tsúfɛ́ asʋ́n ámʋ sʋ mlɩlówun ɩwɩɔsɩn tsɔtsɔɔtsɔ, támɛ mlɩlɔ́pʋ ansigyí ánɩ́ itsú \w Ɔŋɛ Wankɩ́hɛ́\w* wá hɔ mʋ́. 
\v 7 Mʋ́ sʋ ɩlɛha ahógyipʋá bʋbʋ Makedonia ɔsʋlʋ́sʋ pʋ́ Akaia ɔmátɔ́ fɛ́ɛ́ bɛkɩ mlɩ bwɛhɛ́, buo mʋ́. 
\v 8 Tsúfɛ́ megyí Makedonia pʋ́ Akaia wʋlɛ anɩ Wíe asʋ́n ámʋ lɛklɛɩ́ tsú mlɩ wá yɔ́. Mboún mlɩ Bulu hógyi asʋ́n ɛ́ laklɛ́ɩ́ yɔ́ ɔtɩ́nɛgyíɔtɩ́nɛ́. Mʋ́ sʋ asʋansʋ má ɩnʋá abɛ́trá blɩ́ tsú mʋ́ ɩwɩ. 
\v 9 Tsúfɛ́ amʋ́ onutó bʋdɛ alɩá mlɩlɔ́pʋkɩ́tá anɩ brɛ́á anɩlɛ́bá mlɩ wá blɩ́. Alɩá mlɩlési ɩkpɩ súm ba mlɩdɛ́ Bulu Ɔkɩankpapʋ Ɔnɔkwalɩpʋ amʋ mboún súm. 
\v 10 Pʋ́ alɩá mlɩgyó brɛ́á Bulu mʋ Bi Yesu ámʋ́ʋ́ ɔlɔkʋsʋ́a tsu afúlitɔ ámʋ ɔbɛ́latsú ɔsʋ́sʋ́ bá. Mʋgyí ɔhá ánɩ́ ɔdɛ anɩ lɛ tsú Bulu ɔblɔ́ ámʋ́ʋ́ ɩbá ámʋtɔ nɩ́.
\c 2
\rem Proofread 07-07-09
\s1 Paulo Tsíátɔ́ Tesalonika Wúlutɔ
\p
\v 1 Apíó, mlɩ onutó mlɩyin ánɩ́ anɩ mlɩ wá bá mɔbwɛ kpaalɩ. 
\v 2 Mlɩyin alɩá bɔwa anɩ amʋmʋyɔ, sʋ́pa anɩ Filipi wúlutɔ asa anɩlɛ́bá mlɩ wá. Mlɩyin ánɩ́ akʋ bʋmotsulá, bɛhɩɛ kʋ́sʋ́ lɩ́ɩ́ anɩsʋ; támɛ anɩ Bulu lɔ́wa anɩ ɔwʋnlɩ́n, anɩlɛ́bláa mlɩ \w asʋn wankláán\w* ámʋ. 
\v 3 Tsúfɛ́ megyí afunu asʋ́n anɩdɛ́blɩ́. Mʋ́ sʋ ndɛ mlɩ kokóli. Megyí agywɩɩn laláhɛ kʋkʋ ígyi, anɩmɛ́dɛ́ mlɩ mlɛ́ ɛ́. 
\v 4 Bulu lɔ́hɔ anɩsʋ gyi, ɔlɔpʋ mʋ asʋn wankláán ámʋ wá anɩ ɩbɩtɔ. Mʋ́ anɩdɛ́blɩ́ nɩ́! Megyí anyánkpʋ́sa ansɩ́tɔ́ anɩdɛ́kɩ́ɩ blɩ́ mʋ́, Bulu yin anɩ klʋntɔ. 
\v 5 Mlɩhɩ́ɛ́ mlɩyin ánɩ́ megyí ɔnɔ́ dɛ́dɛ́ anɩlɔ́pʋ ba mlɩ. Anɩmɛ́ba bɔwa afunu kʋkʋ ɛ́ súná mlɩ, pʋ́nyá tɔkʋ tsú mlɩ wá. Bulu gyí anɩ ɔdansɩyin. 
\v 6 Anɩmódunká kanfʋ́ tsú nyankpʋsa ɔkʋkʋ, mlɩ, ntɛ́ɛ ɔha bambá wá. Kristo \w sumbí ayɔpʋ́\w* anɩgyí. Mʋ́ sʋ tɛkɩ anɩbʋ ɔkpa sɩ́ ɩwɩ tswɩ mlɩsʋ, 
\v 7 támɛ anɩlólwií há mlɩ, kɩ mlɩ fɛ́ alɩá abí-oyín tɛkɩ mʋ onutó abísʋ́. 
\v 8 Anɩtɛhɩ́ɛ́ klé mlɩ asʋ́n. Mʋ́ sʋ megyí Bulu asʋn wankláán ámʋ nkʋlɛ anɩlɔ́pʋ ba mlɩ, mboún anɩlési anɩ ɩwɩ ɛ́ há mlɩ, tsúfɛ́ mlɩlamlí anɩ adwɛpʋ́. 
\v 9 Apíó, yɛ́ɛ mlɛ́kaɩ́n agyʋ́má ánɩ́ anɩlɔ́yɔ ɔpa mʋ́a onyé pʋ́nyá tɔ́á ilehián anɩ? Alɩá anɩméesi ipian tswɩ mlɩsʋ brɛ́á anɩdɛ́ Bulu asʋn wankláán ámʋ ɔkan da súná mlɩ sʋ́ anɩlɔ́bwɛ mʋ́ alɩ.
\p
\v 10 Mlɩ ahógyipʋ amʋ pʋ́ Bulu gyí anɩ adansɩfɔ alɩá anɩlɔ́pʋtsíá mlɩtɔ. Anɩ ɩwɩ lɛtɩn, anɩ asʋ́n da ɔkpa, ɔlala ɛ́ metsiá anɩ ɩwɩ. 
\v 11 Mlɩyin ánɩ́ anɩlɛ́kpa mlɩtɔ okugyíɔkʋ fɛ́ alɩá abí-ɔsɩ́ tɛkpá mʋ abí. 
\v 12 Anɩlɔ́wa mlɩ atɛtɔ-ɔnlɩn, lwíí mlɩ klʋn, tɔ́ɩ́ kplá mlɩ anɩaa, mlɩtsía tsiátɔ́á ilegyi Bulu ansɩ́. Mʋlɛ́tɩ mlɩ ɔbɛ́ɛ, mlɩbénya mʋ iwíegyí pʋ́ mʋ numnyam amʋ ɩkʋ.
\p
\v 13 Tɔ́á sʋá anɩtɛdá mʋ ɩpán brégyíbrɛ́ ɛ́ gyí, brɛ́á anɩlɔ́pʋ mʋ asʋ́n ámʋ ba mlɩ á, mlɩmótsu mʋ́ ánɩ́ nyankpʋsa wá itsú. Mboún mlɩlɔ́hɔ mʋ́ ánɩ́ lɛ́lɛ́, itsú Bulu wá; tsúfɛ́ mʋ́ Bulu dɛ́pʋyɔ́ agyʋ́má mlɩ ahógyipʋ amʋtɔ nɩ́. 
\v 14 Apíó, mlɩlamlí fɛ́ Bulu ɔpasua ánɩ́ ɩbʋbʋ Yudea ɔmátɔ́, bʋgyi Kristo Yesu klɛ́ amʋ. Mlɩlówun ipian mlɩ pɩ ɩbɩtɔ, fɛ́ alɩ ámʋ́ʋ́ amʋ́ ɛ́ bowun ipian amʋ́ pɩ Yudafɔ ɩbɩtɔ ámʋ. 
\v 15 Yudafɔ lɔ́mɔ Bulu ɔnɔ́sʋ́ atɔɩ́pʋ́ pʋ́ anɩ Wíe Yesu. Amʋ́ kɛ́n lagya anɩ lɛ́ ɔmá ámʋtɔ. Bʋtamakle ahá asʋ́n, bʋtamagyi Bulu ansɩ́. 
\v 16 Bɔkʋsʋ́ lɩ́ɩ́ anɩsʋ ká anɩ itin bɛɛ, anɩmábla ahá ánɩ́ bʋmegyí Yudafɔ nkpahɔ́ɔ asʋ́n ámʋ, Bulu ɔhɔ amʋ́ nkpa. Ɩ́nɩ bwɛ lahá amʋ́ lakpan labiayi. Mʋ́ sʋ ɩlahá Bulu lanyá ɔblɔ́, ɔbɛ́bɩtɩ́ amʋ́ ɩsʋ.
\s1 Paulo Lékléá Ɔbɛ́layɛ́kɩ Tesalonikafɔ
\p
\v 17 Apíó, anɩlɛ́natɩ́ mlɩ wá ɔpá anɩmɔ́kʋ́sí mlɩsʋ kaɩ́n. Mʋ́ sʋ anɩhɩ́ɛ́ anɩdɛ́ ɔkpa dunká ánɩ́ abɛ́la bowun mlɩ ansɩ́tɔ́, tsúfɛ́ anɩdɛ́ mlɩsʋ kaɩ́n dʋbɩ. 
\v 18 Anɩlékléá abɛ́laba mlɩ wá. Mɩ́ Paulo onutó ó nabwɛ́ agywɩɩn ánɩ́ néyinkí bá ɩnʋ ɩta tsefɩnɩ, támɛ Ɔbʋnsám mɛ́ha ɔkpa. 
\v 19 Ma sʋ́ anɩ ansɩ́ dɩn? Megyí mlɩ sʋ ansɩ́ dɛ anɩ gyí ánɩ́ abénya ɔkpa tsú ɩwɩ anɩ Wíe Yesu ansɩ́tɔ́ brɛ́á ɔbɛ́ba? 
\v 20 Lɛ́lɛ́ mʋ́ á, mlɩgyí anɩ numnyam pʋ́ anɩ ansigyí.
\c 3
\rem Proofread 07-07-09
\s1 Timoteo Tesalonika Yɔ
\p
\v 1 Mʋ́ sʋ brɛ́á anɩmɛ́bɩ́ alɩá mlɩ tsiátɔ́ igyi, ɩdɛ anɩ háan a, anɩlɔ́bwɛ agywɩɩn anɩaa, anɩ mʋ́ abétsiá Atene wúlutɔ, 
\v 2 awa anɩ píó Timoteo, ogyi anɩ Bulu agyʋ́máyɔbá Kristo \w asʋn wankláán\w* ámʋ ɔkandatɔ sɩsɩ mlɩ, ɔbɔwa mlɩ ɔwʋnlɩ́n. Ɔtɔɩ kpla mlɩ amlɩlɩɩ kínkíínkín hógyitɔ, 
\v 3 mɛ́nɩ mlɩtɔ ɔkʋkʋ méeyinkí ɔma asʋn wunhɛ anfɩ sʋ. Mlɩ onutó mlɩyin ánɩ́ igyi tɔ́á ɩda yaɩ́ há anɩ Akristofɔ dodo. 
\v 4 Tsúfɛ́ brɛ́á anɩbʋ mlɩ wá á, anɩlɛ́bláa mlɩ ánɩ́ bɛ́dɩnká mlɩsʋ. Lɛ́lɛ bɛdɩnká mlɩsʋ fɛ́ alɩá mlɩyin. 
\v 5 Ɩ́nɩ sʋ brɛ́á netsíá mmetsíá á, nɔwa Timoteo mlɩ wá mbɛ́ɛ, ɔbɛ́kɩ alɩá mlɩdɛ́ hógyi amʋtɔ. Tsúfɛ́ ɩbɛ́talɩ́ ba ánɩ́ Ɔbʋnsám lasɔ mlɩ kɩ, há anɩ gyumagyihɛ labwɛ́ kpaalɩ.
\p
\v 6 Timoteo layínkí pʋ́ asʋn wankláán tsúa mlɩ wá ba anɩ séi, tsú mlɩ hógyi pʋ́ mlɩ abadwɛ ɩwɩ. Alabláa anɩ ɔbɛ́ɛ, mlɩ ɛ́ mlɩdɛ́ anɩsʋ kaɩ́n dʋbɩ. Mlɩdékléá mlówun anɩ, fɛ́ alɩ ámʋ́ʋ́ anɩ ɛ́ anɩdékléá abówun mlɩ ámʋ. 
\v 7 Mʋ́ sʋ apíó, mlɩ hógyi lawá anɩ atɛtɔ-ɔnlɩn, anɩ ipian pʋ́ anɩ asʋn wunhɛ fɛ́ɛ́tɔ́; 
\v 8 tsúfɛ́ mlɩlɩ́ɩ́ anɩ Wíe hógyitɔ kínkíínkín. Mʋ́ sʋ anɩ klʋn ládɩ́ anɩ asɩ. 
\v 9 Ɩpán mɔmʋ abɔ́kʋkʋ da Bulu mlɩ sʋ, ansɩ́á ɩdɛ anɩ gyí mʋ ansɩ́tɔ́ sʋ? 
\v 10 Anɩtɛhɩ́ɛ́ bɔ́ mpáɩ kókóli Bulu ɔpa mʋ́a onyé anɩaa, ɔhá ayinki bowun mlɩ, mɛ́nɩ abósuná mlɩ tɔ́á ɩbɛ́ha mlɩ hógyi bɔ́fʋn.
\p
\v 11 Anɩ Sɩ́ Bulu onutó mʋa anɩ Wíe Yesu bʋfínki ɔkpa ha anɩ aba mlɩ wá. 
\v 12 Anɩ Wíe ɔhá mlɩ apíó aba pʋ́ ahá fɛ́ɛ́ dwɛ ɔnɔ́ ɩwa ɔnlɩn, fɛ́ alɩ ámʋ́ʋ́ anɩtɔdwɛ́ mlɩ ámʋ. 
\v 13 Ɔwá mlɩ ɔwʋnlɩ́n, mɛ́nɩ anɩ Sɩ́ Bulu omóowun ɔlala mlɩ ɩwɩ, ifin kʋkʋ ɛ́ méetsiá mlɩ ɩwɩ mʋ ansɩ́tɔ́, anɩ Wíe Yesu mʋa mʋ ahá fɛ́ɛ́ ɔbákɛ amʋ.
\c 4
\rem Proofread 07-07-09
\s1 Tsiátɔ́á Ilegyi Bulu Ansɩ́
\p
\v 1 Apíó, ɩtráhɛ a, anɩlósuná mlɩ tsiátɔ́, mɛ́nɩ Bulu ansɩ́ bégyi mlɩ ɩwɩ. Lɛ́lɛ́ mʋ́ á, alɩ́ mlɩ tsiátɔ́ gyí nɩ́. Séi á, anɩhɩ́ɛ́ anɩdɛ́ mlɩ kokóli anɩ Wíe Yesu dátɔ́ anɩaa, mlɩbwɛ́ɛ mʋ́ dʋn alɩ. 
\v 2 Tsúfɛ́ mlɩyin mbla ámʋ́ʋ́ anɩlɔ́wa há mlɩ anɩ Wíe Yesu ɩdátɔ́ ámʋ. 
\v 3 Bulu dékléá mlɩháa mlɩ ɩwɩ ɩtɩn. Mʋ́ sʋ mlɩmáwa atsɩ mʋ́a ayin asʋ́n. 
\v 4 Mlɩtɔ okugyíɔkʋ ɔbɩ́ɩ alɩá ɔbɛ́kɩtá ɩwɩ, ɩwɩtɩ́ɩn pʋ́ obú ɔkpasʋ. 
\v 5 Ɩmábwɛ ɔwɔ́lɩ laláhɛ ɔkpasʋ, fɛ́ alɩá ahá ánɩ́ bʋmeyín Bulu bʋtɔbwɛ́. 
\v 6 Mlɩtɔ ɔkʋkʋ másisíi mʋ ba, swɩ́ɩ́ mʋ mʋ ka. Tsúfɛ́ anɩ Wíe ɔbɛ́bɩtɩ́ ahá ánɩ́ bʋtɔbwɛ́ mʋ́ odu ɩsʋ. Anɩdɛ́ mlɩ ɔlá da, fɛ́ alɩá anɩlɔ́kʋ bláa mlɩ yáɩ́. 
\v 7 Tsúfɛ́ Bulu mɛ́tɩ anɩ ɔbɛ́ɛ, abá bɔtɔ mbʋa; mboún ɔbɛ́ɛ, ifin kʋkʋ mátsiá anɩ ɩwɩ. 
\v 8 Mʋ́ sʋ ɔhagyíɔha ánɩ́ omegyi atosunáhɛ́ anfɩsʋ á, megyí nyankpʋsa omédébu. Mboún Bulu ámʋ́ʋ́ ɔlɔpʋ mʋ Ɔŋɛ Wankɩ́hɛ́ há mlɩ ámʋ.
\p
\v 9 Imehián ánɩ́ abɔ́wanlɩ́n asʋansʋ tsú mlɩ aba akristofɔ dwɛ ɩwɩ sɩ́sɩ́ mlɩ. Tsúfɛ́ Bulu onutó lasúná mlɩ alɩá mlɩdwɛ́ɛ mlɩ aba dodoodo. 
\v 10 Ɔnɔkwalɩ a, mlɩdɛ́ apíó ahógyipʋá bʋbʋ Makedonia ɔmátɔ́ fɛ́ɛ́ dwɛ dodo. Mʋ́ sʋ apíó, anɩdɛ́ ɩpa bwií há mlɩ anɩaa, mlɩtráa dwɛ aba dʋn alɩ. 
\v 11 Mlɩpʋdɩnka ɩwɩsʋ ánɩ́ mlétsiá tsiátɔ́ wankláán. Mlɔ́pʋ mlɩ ɩbɩ yɔ́ agyʋ́má pʋ́kɩ mlɩ ɩwɩsʋ, fɛ́ alɩá anɩlɛ́bláa mlɩ, 
\v 12 mɛ́nɩ mlɩa ahá ánɩ́ bʋmegyí ahógyipʋ mlétsiá wankláán, mlɩmɛ́ɛtrá pʋ ansɩ́ dɩ́nká ɔhaasʋ.
\s1 Anɩ Wíe Yesu Yinkí Bá
\p
\v 13 Apíó, anɩdéklé anɩaa mlɩbɩ́ɩ ɔnɔkwalɩ ánɩ́ ɩbʋ Akristofɔá bawú ɩwɩ, mɛ́nɩ mlɩméetsiá gyi awɩrɛhɔ fɛ́ ahá ánɩ́ amʋ́ ansɩ́ mɛdɩ́n tɔtɔsʋ. 
\v 14 Anɩlóhogyi ánɩ́ Yesu lówu kʋ́sʋ́ tsú afúlitɔ. Alɩ kɛ́n anɩlóhogyi ánɩ́ Bulu ɔbɛ́kpa ahá ámʋ́ʋ́ bɔhɔ mʋ gyi asa bowu ámʋ ba nɩ.
\p
\v 15 Anɩ Wíe onutó atosunáhɛ́ anɩdɛ́ mlɩ suná séi á. Anɩ ahá ánɩ́ anɩtráa anɩtsie nkpa asa anɩ Wíe ɔbákɛ ɩbɔ́fʋn a, anɩméegya awupʋ́ ámʋ nkpá yéfia mʋ. 
\v 16 Tsúfɛ́ anɩ Wíe ɔbɔ́kplʋ́n túmisʋ, \w Bulu-ɔbɔpʋ\w* dɛhɛn ɔbɛ́lɛ ɔnɔ́, bɔ́fʋlɩ́ Bulu ɔkpɛ ɛ́ brɛ́á anɩ Wíe onutó dɛ́kplɩ́ tsú ɔsʋ́sʋ́ ɔbá. Ahógyipʋá bawú bégyankpá kʋ́sʋ́. 
\v 17 Mʋ ɔma a, anɩ akɩankpapʋ ɛ́ fɛ́ɛ́ abɔ́yɔ́tʋ amʋ́ nwʋlʋ́táatɔ, anɩ fɛ́ɛ́ abéyefia anɩ Wíe afútɔ́. Tsú ɛkɛ ámʋ a, abétsiá anɩ Wíe wá brɛ́ fɛ́ɛ́. 
\v 18 Mʋ́ sʋ mlɩpʋ asʋ́n ánfɩ kɩta ɩklʋn wa aba ɩwɩtɔ.
\c 5
\rem Proofread 07-07-09
\s1 Ɩwɩsʋda Gyo Anɩ Wíe Ɩbá
\p
\v 1 Apíó, imehián ánɩ́ abɔ́wanlɩ́n brɛ́ pʋ́ ɛkɛá asʋ́n ánfɩ ɩbɛ́ba sɩ́sɩ́ mlɩ. 
\v 2 Tsúfɛ́ mlɩ onutó mlɩyin ánɩ́ anɩ Wíe ɔbákɛ amʋ ɩbɛ́ba bofwie anɩtɔ, fɛ́ alɩá owikplu tɛba onyé. 
\v 3 Brɛ́á ahá bɛɛ, “Owí latá, asʋ́n latá” á, alɩ brɛ́ ámʋtɔ bɛ́hɩ nɩ́. Ibófwie amʋ́tɔ́ fɛ́ alɩá ɩkwɩ́ɩ tɛkan ɔtsɩ ɔtsáwʋlɛ pɛ́. Ɔhaa mɛ́ɛdalɩ mʋ́tɔ́. 
\v 4 Támɛ apíó, mlɩ mʋ́ mlɩyin asʋ́n ánfɩ. Mʋ́ sʋ mlɩmétsíe oklúntɔ, mɛ́nɩ ɛkɛ ámʋ mɛ́ɛba bofwie mlɩtɔ fɛ́ owikplu. 
\v 5 Wankɩ mʋ́a ɔyɩ kɛhɛtɔ abí mlɩ fɛ́ɛ́ mlɩgyí. Megyí onyé ntɛ́ɛ oklúntɔ abí anɩgyí. 
\v 6 Mʋ́ sʋ mlɩha agyo, anɩmádɩdɩ fɛ́ aha bambá. Mlɩha adɩnka ansɩ́ ɩwɩsʋ, akɩ ɩwɩsʋ wankláán. 
\v 7 Onyé, adɩdɩ́pʋ́ bʋtɛdɩ́dɩ. Onyé, nta abʋpʋ́ ɛ́ bʋtɔbʋ́ ntá. 
\v 8 Támɛ anɩ mʋ́ á, wankɩtɔ abí anɩgyí. Mʋ́ sʋ mlɩha agyi ɩwɩsʋ. Mlɩha Kristo hógyi pʋ́ anɩ abadwɛ ɩbwɛ kántɔ́-atíntɔ tin anɩ kántɔ́. Mʋ ɔkpakɩ́ɩ ánɩ́ ɔbɔ́hɔ anɩ nkpa ɩbwɛ́ɛ kʋtʋpa ánɩ́ ibun anɩ nwun. 
\v 9 Megyí alɩá Bulu obénya ɔblɔ́ wa anɩ, bɩ́tɩ́ anɩ ɩsʋ sʋ́ ɔlɛlɛ anɩ. Mboún alɩá ɔbɔ́tsʋn anɩ Wíe Yesu Kristosʋ hɔ anɩ nkpa sʋ. 
\v 10 Kristo lówu há anɩ, mɛ́nɩ mʋ bábɩ a, nɩ́ anɩlawú o, anɩbʋ nkpa o, anɩa mʋnyɔ abétsiá. 
\v 11 Mlɩpʋ asʋ́n ánfɩ kɩta klʋn wa aba ɩwɩtɔ, pʋwa aba ɔwʋnlɩ́n, fɛ́ alɩá mlɩdɛ́ mʋ́ bwɛ dodo.
\s1 Ɩklá
\p
\v 12 Apíó, abwíí ɩpa há mlɩ, mlɩbu mlɩ ɔnɔ́ alɩɩ́pʋ́á bʋhɩ́ɛ́ bʋdɛ agyʋ́má yɔ mlɩtɔ, bʋdɛ mlɩ anɩ Wíe tsiátɔ́ suná. 
\v 13 Gyʋma ámʋ́ʋ́ bʋdegyí amʋ sʋ mlɩhɩɛ bu amʋ́, amlɩdwɛ amʋ́. Iwilwii itsía mlɩa mlɩ aba nsɩnɛ́.
\p
\v 14 Apíó, anɩdɛ́ mlɩ ɔlá da anɩaa, mlɩtɔɩ kpla awʋlɩyɔpʋ́. Mlɩwa afúpʋ́ atɛtɔ-ɔnlɩn. Mlɩbʋa amʋ́á bapɔn, amlɩnya klʋn ha ɔhagyíɔha. 
\v 15 Mlɩkɩ ánɩ́ ɔhaa mɔ́ɔpʋ lalahɛ ká mʋ ba ɩkɔ. Mboún mlɩbwɛ yilé há aba pʋ́ ahá fɛ́ɛ́.
\p
\v 16 Ansɩ́ igyí mlɩ, 
\v 17 amlɩbɔ mpáɩ brégyíbrɛ́. 
\v 18 Mlɩda Bulu ɩpán tógyítɔ́tɔ́. Mʋ́gyí tɔ́á Bulu dédunká tsú mlɩ wá mlɩ nkpatɔ, brɛ́ ánfɩ mlɩa Kristo Yesunyɔ mlɩlabwɛ́ ɩkʋlɛ anfɩ nɩ́.
\p
\v 19 Mlɩmákiná tɔ́á Ɔŋɛ Wankɩ́hɛ́ amʋ tekle bwɛ.\f + \fr 5:19 \ft Ntɛ́ɛ \fqa Mlɩmádun Ɔŋɛ Wankɩ́hɛ́ ogyá ámʋ.\f*
\v 20 Mlɩmábu Bulu ɔnɔ́sʋ́ atɔɩ́pʋ́ asʋ́n ámʋ tɔkʋ odu. 
\v 21 Mlɩsɔ tógyítɔ́ kɩ, amlɩkɩta mʋ́á ɩbʋ alɛ́tɔ́ kínkíínkín. 
\v 22 Mlɩkina lalahɛ kugyíkʋ.
\p
\v 23 Bulu tɛ́há anɩ iwilwii. Ɔtɩ́ɩn mlɩ ɩwɩ ɔkpagyíɔkpasʋ. Ɔkɩ́ɩ mlɩ nyankpʋsa-oyí, mlɩ ɔŋɛ́ pʋ́ mlɩ ɔklásʋ tsú lalahɛ kugyíkʋtɔ, mɛ́nɩ ɔlala méetsiá mlɩ ɩwɩ anɩ Wíe Yesu Kristo ɔbákɛ amʋ. 
\v 24 Bulu lɛ́tɩ mlɩ. Ɔnɔkwalɩpʋ ogyi, ɔbɔ́bwɛ mʋ́.
\p
\v 25 Apíó, mlɩbɔ mpáɩ ha anɩ ɛ́.
\p
\v 26 Ahá ahógyipʋ amʋ fɛ́ɛ́ itsiá gyágyáágyá. Mlɩlata aba puta ɔdwɛsʋ.
\p
\v 27 Ndɛ mlɩ bláa anɩ Wíe ɩdátɔ́ mbɛ́ɛ, mlɩkla ɔwʋlʋ́ ánfɩ suna ahógyipʋ amʋ fɛ́ɛ́.
\p
\v 28 Anɩ Wíe Yesu Kristo ogyíi mlɩ bʋalɛ.