\id 2TI - Nkangala New Testament Zambia
\ide UTF-8
\h 2 Timateo
\toc1 Mukanda ua mucivali ua Paulu kuli Timateo
\toc2 2 Timateo
\toc3 2 Tim
\mt2 Mukanda ua Paulu ua mucivali kuli
\mt1 TIMATEO
\imt Citsindikisi
\ip Livulu lia mucivali lia Timateo liapua mukanda uamucivali uakuhuma kuli kanganda Paulu kuli ndongisi uendi Timateo. Mukanda ua Timateo uamucivali vausonekele kuyehi nakuhua ca muono ua Paulu. Va muhakele mu kamenga mu Loma ha ntsimbu eyi (2 Tim 1:16). Paulu uakele na vusamba vuakukola na Timateo kaha vintsimbu viavingi uakele nakumutumbula nguendi muana (Fil 2:22, 1 Tim 1:2, 1:18).
\ip Ou ukeuo umo ua mikanda iuana yakuhuma kuli Paulu ije yasonekelelele kuli muntu keti ku cikungulukilo. Ikuavo itatu ku mikanda eyi ikeyo ya 1 Timateo, na Tito na Filimoni. Ha ntsimbu ije mukanda ua 2 Timateo vakele naku usoneka, vaka Yesu vakele nakuvapakesa mu nganda ya Loma. Eci cikeco canehele linga Paulu vamuhake mu kamenga kaha uakele nakushika Timateo linga atualeleleho nalukakateya mukukaluua. Ngue kuya mu 1 Timateo, Paulu ahana Timateo vinangulo viavingi ha valongisi vamakuli (1 Tim 1:16-18). Kaha naua alekesa Timateo nguendi kukakala vintsimbu via kukaluua kulutue (3: 1).
\iot Muvanavitumbikilamo:
\io1 1. Paulu aputuka nakuhinduisa Timateo (1: 1-2) kaha ambahoni amukolese (1: 3-18).
\io1 2. Ambahoni alekesa Timateo linga atualeleleho nalukakateya (2: 1-13).
\io1 3. Cakuhatako amuhana vinangulo vimo vije muasa kuyoyelamo (2: 14-26).
\io1 4. Ambahoni amunangula ha vije vikalingiua kulutue na ngila yacili muje vati akasa kuvitambula (3: 1-4; 8).
\io1 5. Paulu amanusula na mezi endi lika kuli Timateo (4: 9-24).
\c 1
\p
\v 1 Yange Paulu, kanganda ua Kilistu Yesu ku cizango ca Njambi kuya ku cikulaheso ca muono uje uli muli Kilistu Yesu,
\p
\v 2 Njikusonekela yove Timateo, munange injazanga:
\p Kavumbi, cikeketima na ciyulo vije vihuminina kuli Njambi Tate na Kilistu Yesu Muene yetu.
\s Kutsatsela na Kulikolesa
\p
\v 3 Njitsantsela Njambi uje injikapangela na mana akutungukua, ngue muje muvalingile vakukuluila vange, omo njikamianuka vintsimbu vioshe mu malombelo ange. 
\v 4 Ngue muje njikanuka masozi eni, njikatondo cikuma vutsiki na mutania kumimona, linga njakushule nanzolela. 
\v 5 Njilinakuanuka lutsilielo luove lua vusunga, lutsilielo luje luakele hakulivanga muli kuku yove uampuevo Loisi na vanoko Yunisi nahano vene, cilivene nguange nove uli naluo. 
\v 6 Ha cuma eci njikuanukisa linga uhozelele vuana vua Njambi vuje vuli muli yove kuhitila muje munjakusalekele mavoko ange. 
\v 7 Omuo Njambi katuhanene Cimbembesi ua liova vuno honi Cimbembesi ua nzili na cizango na kulihilula yetu vavenia.
\p
\v 8 Keti uvue shuamua ya kuhana vukaleho vua Muene yetu, cipue vuange cinzinda cendi, vuno honi lipangele nange mukuyandela muzimbu uacili mu nzili ya Njambi. 
\v 9 Ikeye uatuovuele nakutusana nakusana ca kulela, keti ngue kuya ku vipangi vietu vuno honi ku vutumbe vuendi na kavumbi vije viatuhanene muli Kilistu Yesu tele kanda mavu va atange, 
\v 10 vuno honi vanacisolola kuhitila mukusoloka ca Muyoyesi uetu Kilistu Yesu, uje nanongesa kutsa nakuneha muono na kuhona kutsa ku ceke kuhitila mu muzimbu uacili. 
\v 11 Omuo ya muzimbu uacili ou, vanjihanguile kupua muka kuambulula na kanganda na mulongisi, 
\v 12 nankuma njilinakuyanda ngue muje munjili nakuyandelamo. Vuno honi kunjesi na shuamua, omuo njatantekeya uje njinatsiliela, kaha njatantekeya cilivene asa kuniunga muacili vije vinjinakundika kuli ikeye noho ha Litangua lije. 
\v 13 Kavangeya cimueso ca mezi a vusunga aje unevu kuli yange mu lutsilielo na cizango vije vili muli Kilistu Yesu. 
\v 14 Niunga muacili vusunga vuje vuvanakundika kuli yove na Cimbembesi Uakulela uje uakala muli yetu.
\p
\v 15 Uatantekeya nguove voshe vaje vali mu Asiya vananjitengulukila, kupandakana kumo na Fingeliase na Helemengenese. 
\v 16 Muene ahane cikeketima ku ntanga ya Onesifolase, omuo vintsimbu viavingi ikeye nakala nakunjilisa, kakele na shuama na malienge ange, 
\v 17 vuno honi omo uahetele mu Loma, uanjitondele cikuma nakunjiuana. 
\v 18 Muene amutavese linga auane cikeketima cije cikahumu kuli Muene ha Litangua lije! Uatantekeya muacili vipangi vije viakuasele mu Efeso.
\c 2
\s Lisualale Uacili ua Kilistu Yesu
\p
\v 1 Ambahoni yove munange, kolesa mu kavumbi kaje kali muli Kilistu Yesu, 
\v 2 na vije viunevu kuli yange ha mesho a vakaleho vavengi vaje vakundama ku vantu valutsilielo vaje vasa kulongesa na vakuavo naua. 
\v 3 Lipangele mu tuyando ngue lisualale uacili ua Kilistu Yesu. 
\v 4 Naumo uahi lisualale asa kulinga nevi na vije mu vipangi viendi via vusualale, omuo viyongola viendi vinapu kutonda kuvuahelesa uje ntuama yendi. 
\v 5 Muka kushatuka kuvasa kumuzika cilongo kuvanga ashatuke muailamo mashiko. 
\v 6 Ndimi uakupanga cikuma ikeye napande kukala na mutambela uakulivanga ua vimbuto. 
\v 7 Singaniekaho hali evi njihandeka, omuo Muene akakuhana kuvuisisa muli vioshe.
\p
\v 8 Anuka Yesu Kilistu, vamusanguile ku vatsi, uapuile mutekuluila ua Ndaviti, ngue muvanaviambulula mu muzimbu uange uacili, 
\v 9 muzimbu uacili uje unjilinakuyandela nakukala mu malenge ngue nji muhuza. Vuno honi lizi lia Njambi likelio kuliesi mu malenge. 
\v 10 Nankuma njilina kutualelelaho nalukakateya mu viuma vioshe ha mulonga ua vaje vavanahangula, linga navakevo vakauane kuovoka muli Kilistu Yesu na vumpau vuaco vua miaka yoshe. 
\v 11 Eci kuhandeka ca vusunga nguavo,
\q1 “Nga tunatsi nendi,
\q2 kaha naua tukayoya nendi,
\q1
\v 12 nga tutualelelaho na lukakateya,
\q2 kaha naua tukayula nendi,
\q1 nga tumuviana,
\q2 nendi naua akatuviana.
\q1
\v 13 Nga kutuesi nalutsilielo,
\q2 ikeye hanga uapua ualutsilielo,
\q2 omuo kasa kuliviana ikeye vavenia.”
\s Muka Vipangi uje Ivanatambula kuli Njambi
\p
\v 14 Vanukise evi, kaha vanangule ku mesho a Muene linga keti vakale na vimpata ha mezi, eci kucesi naseho, vuno honi cipihisa vaje vaka kuvuilila. 
\v 15 Linga muuaselamo kulihana yove vavenia kuli Njambi ngue uje ivanatambula, ngue muka kupanga uje kasa kukala na shuama, uje akuata muacili lizi lia vusunga. 
\v 16 Litenge ku vimpata via kasauntu na vimpande via vupi vije vituala lika vantu kulahako na Njambi. 
\v 17 Kaha vimpande viavo vinapu ngue mbandu yamukongo. Vamo hhakati kavo vapuile Haimenease na Filetase, 
\v 18 vakevo vaje vanaseza vusunga omuo vahandeka nguavo kusanguka cinahiti laja. Valinakupihisa lutsilielo lua vakuavo. 
\v 19 Vuno honi luvula lua Njambi hanga luemana ngoo, na kasateso aka nguavo, “Muene atantekeya vaje vendi,” kaha naua nguavo, “Eceleni uoshe uje atumbula lizina lia Muene ahume ku viuma via mazilo.”
\p
\v 20 Mu njivo yakama kumuakele lika vitenga via ngolinde cipue via siliva vuno honi na via kupanga ha miti na via vuma, vimo via ha cipale navikuavo viakupangesa lika hali hoshe. 
\v 21 Nga umo alilelesa ikeye vavenia ku vitenga viakupangesa hali hoshe, kaha akapua citenga cakupangesa ha cipale, viakulela na seho kuli liavenia njivo, vialivuahesela lumo kuvipangesa ku vipangi viacili. 
\v 22 Teua ku mashungu a vukuenje kaha pangela lika vusunga, na lutsilielo, na cizango, na ciyulo hamo na vaje vasana Muene na mitima yakulela. 
\v 23 Litenge ku vimpata via vulema na vunzimba, uatantekeya nguove vikanehe kulicokota. 
\v 24 Ngamba ya Muene kapandele kupua muka kulicokota vuno honi napande kupua ua ngozi ku muntu uoshe, mulongisi uacili, ualukakateya, 
\v 25 uje asa kuhilula vaje vamuluisa na mutima uakulikehesa. Linga hamo Njambi akavahanako ntsimbu linga vakatenguluke ku vipi kaha vakatantekeye vusunga, 
\v 26 linga vateue ku muheto ua Liyavolo, uje navakuata linga vapange muaya cizango cendi.
\c 3
\s Kuyoya cakuhona Njambi mu Matangua a Mamanusuilo
\p
\v 1 Vuno honi ivuisisa eci, mu matangua akumanusuilo kukakala vintsimbu viakukaluua. 
\v 2 Omuo vantu vakapua vaka kulizanga vakevo vavenia, vakazanga vimbongo, vakalihalesa, vaka lijundula, vakapua vaka kasauntu, vakahona kuononoka visemi viavo, vaka hona kutsatsela, vaka hona kulela, 
\v 3 vaka keniuka, vaka hona cikeketima, vakapua vakaleho va makuli, vakapua vaka cipululu, vaka hona kulihilula, vakazinda viacili, 
\v 4 vaka luuangania, vaka lupozoka, vaka shula nakulihalesa, vaka zanga senga kupulakana kuzanga Njambi, 
\v 5 vaka kakateya viuma via cifua cakulemesa Njambi vuno honi vakaviana nzili yavio. Litengeni ku vantu ava. 
\v 6 Omuo vamo vavo vakalingi vingila viavo viakukovela mu vinjivo via vantu nakukuata vampuevo vaje vakuzeya, vaje vali na viteli via vipi kaha vanashulu na miyati yoshe ya viuma via mazilo, 
\v 7 vaje vakevuilila kuli muntu uoshe vuno honi kuvasa kuheta hatsimbu ya kutantekeya mana a vusunga. 
\v 8 Ngue Njane na Njambele valuisile Mosesa, mukemo vene na vantu ava valuisa vusunga, vantu va mana a civembulu kaha vaka kuhonoua mu lutsilielo. 
\v 9 Vuno honi kuvasa kuya kulutue, omuo vulema vuavo vukasholoka ku vantu voshe, ngue vua vaje vamala vavali.
\s Vishika via Kumanusuila kuli Timateo
\p
\v 10 Honi yeni munakavangeya vilongesa viange, nakatumamesi kange, na vutumbe vua vuyoye vuange, na lutsilielo luange, na kusimpa cange, na cizango cange, na lukakateya luange, 
\v 11 na mapakeso ange, na tuyando tuange, na viuma vije vialingiuile kuli yange ku Antioke, naku Ikoniyame naku Lisitala, mapakeso akukomouesa aje anjatambuile, vuno honi Muene uanjohielele kuli vakevo voshe. 
\v 12 Cilivene uoshe uje atonda kuyoya vuyoye vua vunjambi muli Kilistu Yesu vaka vapakesa, 
\v 13 oku vantu vaka vupi na vaka mantseno vakatualelelaho kulinga vupi cikuma, kukuisa vakuavo na vakuavo naua vakavakuisa. 
\v 14 Vuno honi yove tualelelaho kuli vije unalilongesa kaha kolesa mukutsiliela omuo uatantekeya uje kuualilongeselelevio, 
\v 15 kuhuma ku vuanike vuove uatantekeya vilongesa via kulela vije viasa kukutuamenena ku kuovoka kuhitila mu lutsilielo muli Kilistu Yesu. 
\v 16 Visoneka vioshe Njambi uavihuiminine kaha vili naseho mukulongesa, na mukushulisisa, na mukuhilula, na mukuhana vilongesa mu vusunga, 
\v 17 linga muntu ua Njambi apue uamutuntu, nakushula mu vipangi vioshe viacili.
\c 4
\s Kusompa cili nakuija honi Lingeni muacili Vipangi vieni
\p
\v 1 Njikushika ha mesho a Njambi na Kilistu Yesu vaje vakasompo vaka kuyoya na vaka kutsa, kaha mukusholoka cendi na vumuene vuendi, 
\v 2 ambulula lizi, livuahesele vualumo mu vintsimbu viacili cipue via vipi, sungamesa, tenukila, takamesa, longesa na lukakateya, keti uhonoue mukuvandamena namukulongesa. 
\v 3 Omuo ntsimbu ilinakuija omo vantu kuvakahakela mana kuvilongesa via vusunga vuno honi hakukala na matuitui akujua, vakalitondela vakevo vavenia valongisi linga vakalinge vije vivatonda. 
\v 4 Kaha vakalikela kuvuilila ku vusunga nakuputuka kuvuilila visimo via makuli. 
\v 5 Vuno honi yove ntsimbu yoshe livuahesele vualumo, kolesa mu tuyando, linga vipangi viakuambulula muzimbu uacili, shulisisa mu vipangi viove.
\p
\v 6 Omuo yange njalivuahesela vualumo kunjilinga nkombelo, ntsimbu yange yakukatuka inahete. 
\v 7 Njinalu nzita yacili, njinashatuka nakumanusula seteko yange, njinaniungu lutsilielo. 
\v 8 Honi kuli cilongo ca vusunga civananjitulikila, cije Muene ikeye muka kusompa ua vusunga akanjihanaco ha Litangua lije, kaha keti yange lika vuno honi na vaje voshe vazangele kusholoka cendi.
\s Mezi Ange
\p
\v 9 Linga muoshe muuasela linga uije kuli yange vuavuno. 
\v 10 Omuo Ndemase nazange mavu aua aliko, nanjiseze nakuya ku Tesalonika, na Kelesenese nayi ku Ngalatiya, na Tito nayi ku Ndalematiya. 
\v 11 Kuvanga lika Luka likaliendi ikeye ali nange. Ambata Mako linga uije nendi, omuo ikeye ali naseho mukunjipangela. 
\v 12 Njatumu Taikikase ku Efeso. 
\v 13 Omo uija, ija na kazaku kaje kajasezele kuli Kapasi ku Tolouase, na mavulu, kaha cikuma kuma mikanda yange ije yakuzenga ya vilambu. 
\v 14 Elekizanda uje muka kufula nanjilingi muamupi cikuma, Muene akamuhana fueto kuya ku vipangi viendi. 
\v 15 Litenge kuli ikeye, omuo ualuisile muzimbu uetu na nzili. 
\v 16 Ha kuliluila cange cakulivanga, naumo uahi uanjikuasele, voshe vanjisezele. Keti vavahisileco! 
\v 17 Vuno honi Muene uakele nange nakunjikolesa mukuambulula muzimbu mukushula, linga na vaje voshe keti Vayunda vauvue. Kaha uanjovuele naku kanua ka ndumba. 
\v 18 Muene akanjohiela ku via vipi vioshe nakunjohiela ku vumuene vuendi vua muilu. Kuli ikeye kukale vumpau ku miaka yoshe ya yaye. Ameni.
\s Vihindu Viakumanusuila
\p
\v 19 Cihindu kuli Pulisila na Akuila nakuli vaka ntanga ya Onesifolase. 
\v 20 Elasitase uasalele ku Kolinte, kaha njasezele Tolofimase ku Miletase oku avavala. 
\v 21 Linga muoshe muuasela linga uije ntsimbu kanda cisika cihete. Eumbulase natumu vihindu kuli yove hamo na Pundenisi na Linase na Kalaundiya na vaka kutsiliela voshe vanatumu vihindu. 
\v 22 Muene akale na cimbembesi cove. Kavumbi kakale nove.