\id 2TH - Nooni 
\h 2 Tɛsalonika 
\toc1 2 Tɛsalonika 
\toc2 2Tɛs 
\toc3 2Tɛs 
\mt2 Ŋwa' wvu bokaŋ bofɛɛ wvù Baul to saŋɛɛ ɛ̂ kentaashɛ ke 
\mt1 Tɛsalonika 
\imt1 Fiɛɛ fì nu ɛ̂ Ŋwa' wvu Tɛsalonika wvu bokaŋ bofɛɛ wvun e 
\ip No Baul to cim saŋɛɛ ŋwa' wvu fwe fô bonyii bo mbee le bo Tɛsalonika le ɛkumɛ lɛ bó ecɛyte yî nyɛkeey e, kefew kè Jisos nu ke ekase eto le, ɛ bvufee mɛy kɛ no bvuuŋke bó yî saaka wvudvu le. Ɛ Baul mum saŋ ŋwa' wvu bokaŋ bofɛɛ wvun keejeme ɛkumɛ no bonyii to kpwaake wase lɛ diuu di nto Tata le didvu nu ɛ jo wase bvudvuu. Wvú to nu ɛ nɛle ŋkpwawcɛ wvun duŋcɛ lɛ ɛ́ nto Klistu sɛ jo bvudvuu nu ɛ kebefɛ bô mwɛɛm mvu buwyɛɛn nu ke eduu efesɛn lo. 
\is1 Bikuu bi mwɛɛm e ɛ̂ ŋwa' wvun 
\io1 1:1-2 Keŋkɛwcɛ 
\io1 1:3-12 Ɛ Baul bɛnse bvuu tom kentaashɛ ke bonyii bo mbee le 
\io1 2:1-17 Ntefe ɛkumɛ nto Klistu 
\io1 3:1-15 Ntefe ɛkumɛ nce wvu bonyii bò ɛ̀ nu bo Klistu le 
\io1 3:16-18 Kemɛse 
\c 1  
\p  
\v 1 \x - \xo 1:1 \xt 1Tɛs 1:1\x*Ɛ̀ nu me wvù Baul, ɛ me nu bee Silas noo Timatio. Me nsaaŋke ŋwa' wvun fô kentaashɛ ke bonyii bo mbee le ke Tɛsalonika le kè nu ɛ taashɛ ɛ no nu yî Nyo' Icee wesebeene bô Tata Jisos Klistu le. 
\p  
\v 2 Nyo' Icee wesebeene bô Tata Jisos Klistu ebuw ben bô kembonɛn ebvuu enya ben bô nyɛkeey. 
\s1 Ŋgɛw bô mmawcɛ wvù nu ke enu kefew kè Klistu nu ke ekase eto le 
\p  
\v 3 \x - \xo 1:3 \xt 2:13; 1Tɛs 1:2-3\x*Boom bo bwee wese le, bese kɛŋke keenyaa keyoone ɛ̂ Nyo' sekecii ɛkumɛ ben. Ɛ fí nu lɛŋ nonɛn, njefo mbee wene kuu kɛ gɛne lo fwe fwe, ɛ keŋkoŋɛn kè wee mwaaŋ mwaaŋ kɛŋke fô wee noo wee le gɛne kɛ lo tɛn fwe fwe.  
\v 4 \x - \xo 1:4 \xt 1Tɛs 2:19-20; 3:3, 7\x*Nonɛn, bese kebɛɛ ké no saale ye bô ben ɛ̂ bintaashɛ bi bonyii bo mbee le bi Nyo' le bimew e. Bese ké no saale ɛkumɛ no ben leeme tɛmyi bô ɛkumɛ no bonyii bone bikaa ɛ̂ ben ɛjim ɛ ben jici kɛ mbee wene le, noo ɛkumɛ boŋgɛw bò ben yɛne kuule kɛ shém e.  
\v 5 \x - \xo 1:5 \xt Fili 1:28\x*Fifin nu fiɛɛ fì duŋci lɛ Nyo' nu ke esaw bonyii ɛ̂ je yi teytey e, wvu lɛ ben ke enu ɛ ben ɛ kocɛn bonyii bo bvunfon bvu Nyo' le bvù ben yɛne boŋgɛw ban nje bvú le.  
\v 6 \x - \xo 1:6 \xt Lum 12:19; Mwm 18:6\x*No Nyo' nu wee wvu teytey, wvú nu ke etfuse naa ŋgɛw wvù bonyii nyaa ɛ̂ ben bô ŋgɛw,  
\v 7 \x - \xo 1:7 \xt Mat 25:31; 1Tɛs 5:1-2\x*enya nlɛɛtɛn ɛ̂ ben bò yɛne ŋgɛw noo ɛ̂ bese tɛn. Fifin nu ke ekooy seke Tata Jisos nu ke ebuynɛn fowe etoo ɛ̂ leme di ŋguy e dì saasaa le. Wvú nu ke etoo nonɛn bô bonceendaa bew bò tɛmyi.  
\v 8 \x - \xo 1:8 \xt Yɛsa 66:15; Lum 2:8; 1Bi 4:17\x*Wvú nu ke etfuse ɛnvukɛ ɛ̂ bonyii bò maa lo Nyo' noo bò baa bee saaka wvù jee wvu ɛkumɛ Tata Jisos e kɛ.  
\v 9 Bó nu ke elɛse bó ɛ́ bó ekɛŋke ŋgɛw wvù mɛy lo, ɛ́ bó egawsɛn bó bô bo Tata fo bó eto fwe dvu wvú noo fô bvukukɛ bwew bvu baay e.  
\v 10 Fifin nu ke ekooy ɛbvubwɛ bvù wvú nu ke eto wvu lɛ bonyii bò ɛ̀ nu bew etumte moŋkum mew, ɛ́ bonyii bocii bò nu ɛ lese fitele yî ye le ekɛŋke lo ŋghaw bô wvú. Ɛ ben tɛn nu ke enu bó le njefo ben to nu ɛ bee saaka we wvù bese to jemyɛɛ ɛ̂ ben e.  
\v 11 \x - \xo 1:11 \xt 1Tɛs 1:2-3; 5:24\x*Ɛ̀ nɛɛ fiɛɛ fì bese bunlee kɛ fô ben e sekecii lɛ Nyo' wese ege ɛ́ ben enù ɛ ben ɛ kocɛn kfuu bonyii bò wvú teŋe lɛ ben enù le. Bese bunlee tɛn lɛ wvú efi ben yî mvuŋgay mwew e, ɛ́ ben ege fiɛɛ fì jee ficii fì ben shieele noo lemme dicii dì ben gee nje fitele fì ben nu ɛ lese yî Klistu le.  
\v 12 Bese bunlee tɛn nonɛn wvu lɛ diee di Tata wesebeene wvù Jisos e, ekɛŋkè mbense ɛ̂ ben ɛntelɛŋ, ɛ ben tɛn kɛŋke mbense yî ye le. Fifin nu nje fitele fì jee fì Nyo' wesebeene bô Tata Jisos Klistu kɛŋke fô ben e. 
\c 2  
\s1 Ɛkumɛ wee wɛ wvù ŋgoyte nci Nyo' 
\p  
\v 1 \x - \xo 2:1 \xt 1Tɛs 4:15-17; 5:1-2\x*Boom bo bwee wese le, fi ɛkumɛ nto Tata wesebeene wvù Jisos Klistu bô no beene nu ke etaashɛ keegɛn enu beene ɛ bó, nu ɛ me nlɛke lɛ,  
\v 2 \x - \xo 2:2 \xt 2:15\x*fo ben ke enɛ ɛ́ bvufee emum ebvuŋ kɛ lo ben nɛn ncɛw, \f + \fr 2:2 \ft Kɛnɛɛ lɛ, “… esɛsɛ ɛ́ bvufee ebvuŋ ben,”\f* kɛnɛɛ enɛ emum etuwtene lɛ ben nu ɛ yuw njeme mvu lɛ wvú nɛn'yi fô Keyoy ke Yuule le, kɛnɛɛ lɛ bese nu ɛ jeme, kɛnɛɛ lɛ bese nu ɛ saŋ ŋwa' lɛ diuu di nto Tata le nu ɛ to wase kɛ.  
\v 3 \x - \xo 2:3 \xt 1Tim 4:1; 1Jon 2:18\x*Fo ben ecinɛ ɛ́ wee ke elɛɛ ben ɛ ɛ̀ cim nu naa ɛ̂ je yì nɛɛ le kɛ. Ben ekeè lɛ kɛ diuu di nto Tata le didvu nu ke ekocɛn sɛ kefew kiɛ kè bonyii nu ke enɛ ebewci bô bo Nyo' ɛ yaw wase ɛ to, noo sɛ wee wɛ wvù ŋgoyte nci Nyo' ɛ buynɛn tɛn kɛ. Ɛ ɛ̀ nu wvú wvù bó nu ke elɛse lo.  
\v 4 \x - \xo 2:4 \xt Ɛsek 28:2; Dan 11:36; Mwm 13:5-6\x*Ɛ̀ nu wvú wvù nu ke ebense ɛkolɛ kew emum ekicine lo fiɛɛ ficii fì bó teŋe lɛ nyo' kɛnɛɛ fì bó bunlee fí. Nonɛn, emum egɛn eley eshii yew ncese Nyo' le emum eteŋe ɛkolɛ kew lɛ ɛ̀ nu wen Nyo'.  
\v 5 Kɛ ben kumyi lɛ seke me nto nu beene, nu ɛ me nto nsee fiɛɛ fin ɛ̂ ben? 
\p  
\v 6 Ben kee wase keseen fiɛɛ fì jici wvú le wvu lɛ wvú ke ebuynɛn kɛ wase ɛ ɛ̀ nu ɛ̂ kefew kè bó nu ɛ ŋgɛɛ ɛ̂ wvú le.  
\v 7 Ben ekeè lɛ mvuŋgay mwew mvù wvú ŋgoyte nci Nyo' dvú lemte wase keseen ɛjim ɛjim, ɛ ɛ̀ nu kɛ lɛ wee wvù baaŋke mvú nu ke ebaaŋke kɛ nonɛn egɛn ebuy seke bó ke ecake wvú ɛ̂ je.  
\v 8 \x - \xo 2:8 \xt Yɛsa 11:4; Mwm 19:15\x*Bó nu ke dioo ɛ cake, ɛ́ wee wvù ŋgoyte nci Nyo' wɛ emum ebuynɛn, ɛ́ Tata Jisos emum efɛfe lo wvú bô keyoy ke ɛ̂ wvú ɛmvu, efiwsɛ lo bô nlawkɛn wvù wvú nu ke etoo dvú.  
\v 9 \x - \xo 2:9 \xt Mat 24:24; Mwm 13:11-13\x*Wee wvudvu wvù ŋgoyte nci nu ke etoo ɛ̂ mvuŋgay mvu Satan e, kɛŋke mvuŋgay mvunciim, gee mwɛɛm mvù duŋci mvuŋgay mwew bô mwɛɛm mvu diuw wvù yumɛɛn e mvù ɛ̀ nu mvu kenlɛɛma le mvunciim.  
\v 10 Ɛ wvú nu ke etoo tɛn bô kfuu mwɛɛm mvù befe mvunciim keelɛɛle bonyii bò laa wase dvú. Ɛ bó laa njefo bó nu ɛ faŋ keekooŋke kecɛɛy wvu lɛ bó ke eboy.  
\v 11 \x - \xo 2:11 \xt 2Tim 4:4\x*No bó baa kooŋke kecɛɛy nonɛn, Nyo' ɛ mum ɛ ge bó ɛ no looci jeeŋke lo wvu lɛ bó ebeŋe kɛ wase ɛ ɛ̀ nu fiɛɛ fì nu fi mbiay e.  
\v 12 \x - \xo 2:12 \xt 1:6-8\x*Ɛ Nyo' to ge nonɛn wvu lɛ wen ke elese bó bocii yî ŋgɛw e bò baa bee kecɛɛy e, yuuke njoŋ keegee mwɛɛm ɛ ɛ̀ nu kɛ mvù yaa nu kɛ teytey e. 
\s1 Nyo' to caw ben keeboyse ben 
\p  
\v 13 \x - \xo 2:13 \xt 1:3\x*Geenɛn boom bo bwee wese le bò Tata kooŋke naa ntay, bese kɛŋke kɛ keenyaa keyoone ɛ̂ Nyo' sekecii ɛkumɛ ben, njefo Nyo' to nu ɛ caw wase ben foŋkɛw keeke eboyse ben fele yî lemme dì Keyoy ke Yuule gee lɛ ben eyuule le, bô yî mbee wvù ben nu ɛ bee kecɛɛy e.  
\v 14 \x - \xo 2:14 \xt 1Tɛs 5:9\x*Wvú to teŋe ben yî fifin e fele yî saaka wvù jee wvù bese to fewci le, wvu lɛ ben ke ekɛŋkɛ fô bvukukɛ bvu Tata wesebeene wvù Jisos Klistu le.  
\v 15 \x - \xo 2:15 \xt 3:6; 1Kol 11:2\x*Nonɛn boom bo bwee wese le, ben eleemè tɛmyi, jicì nce wvù bese to nyaɛ ɛ̂ ben e, kɛnɛɛ ɛ̀ nu wvù bese to yɛɛyɛɛ lo ben dvú bô diuw, kɛnɛɛ ɛ̀ nu wvù bese to saŋɛɛ lo ɛ̂ ben.  
\v 16 \x - \xo 2:16 \xt 1Tɛs 1:4\x*Bese lɛke lɛ Tata wesebeene wvù Jisos Klistu kebɛɛ noo Nyo' Icee wesebeene wvù to koŋɛɛ beene no lɛɛse shém yesebeene sekecii sɛ ŋka, ebvuu enya beene bô fiɛɛ fì jee fì beene taale fwe yî dvú le nje fitele fiew fì jee.  
\v 17 Wvú eyvuwsɛ mvuntelem mvunɛn, ege ɛ́ mvú etɛmyi yî lemme dì jee le dicii dì ben gee bô yî fiɛɛ ficii fì ben jemyi le. 
\c 3  
\s1 Ɛ Baul lɛkɛ lɛ bonyii bo mbee le ebunleè fô bowen e 
\p  
\v 1 \x - \xo 3:1 \xt Lem 2:4; Lum 15:30; 1Tɛs 5:25\x*Keemɛɛse, boom bo bwee wese le, ben ebunleè tɛn fô bese le. Ben ebunleè lɛ diɛw Tata elewtè gɛne lo fwe ɛ bonyii wvumte diɛw yidvu kɛ no ben to geɛ.  
\v 2 Ben ebunleè tɛn lɛ bese ke eboy can bonyii bò kɛŋke mvuntelem mvù befe gee mwɛɛm mvù befe le, njefo kɛ ɛ̀ nu bonyii bocii bò kɛŋke mbee kɛ.  
\v 3 \x - \xo 3:3 \xt 1Kol 10:13; 1Jon 5:18\x*Geenɛn Tata ké no leeme kɛ yî diɛw ye le. Wvú nu ke enya ben bô mvuŋgay, ebvuu egemgeme ben fo ben ke eley can wee kebefɛ le.  
\v 4 \x - \xo 3:4 \xt 1Kol 4:16; Gal 5:10\x*Bese nu ɛ gɛɛ bvufee bvusɛse yî Tata le ɛkumɛ ben lɛ ben gee wase fiɛɛ fì bese gayte, ɛ ben nu ke emɛy kɛ egee.  
\v 5 Bese lɛke lɛ Tata eleke mvuntelem mvunɛn ɛ́ mvú enu yî keŋkoŋɛn kè ke Nyo' le ebvuu ege ɛ́ ben ekuulè shém no Klistu to kule. 
\s1 Wee kɛŋke keelemte sɛ diee 
\p  
\v 6 \x - \xo 3:6 \xt 3:12; 1Tɛs 5:14\x*Boom bo bwee wese le, bese gayte lo ɛ̂ ben ɛ̂ diee di Tata wesebeene wvù Jisos Klistu le lɛ, ben enjɛmkesè ye ben ɛ boom bo bwee wesebeene le bò laame kɛ lo yaa cee kɛ bii nce wvù bese to duŋcɛɛ ɛ̂ ben e kɛ.  
\v 7 Me njemyi nɛn, njefo ben kebɛɛ kee no ben kɛŋke keebeŋene bese. Kɛ bese to ké no laame seke bese to nu beene kɛ.  
\v 8 \x - \xo 3:8 \xt 1Tɛs 2:9\x*Kɛ bese to diee fiɛɛ fi wee le sɛ bese ɛ law kɛ. Bese to lemte jimtene ɛntaŋ bô ɛmvunsheeŋ wvu lɛ fo bese ke egɛɛ bvujitɛ yî wee mvu ben e kɛ.  
\v 9 \x - \xo 3:9 \xt Lem 18:3; 1Tɛs 1:6; \xt 1Kol 9:4\x*Kɛ bese to gee nonɛn lɛ kɛ ɛ̀ nu bvudvuu bvusɛse keebiite mwɛɛm ɛ̂ ben kɛ. Ɛ̀ to nu wvu lɛ bese eduŋcì yî gee disɛse le wvu lɛ ben ebeŋenè bese.  
\v 10 \x - \xo 3:10 \xt 1Tɛs 4:11\x*Ben ekeè lɛ naa seke bese to nu beene nu ɛ bese to nya nci wvun ɛ̂ ben lɛ, “Ɛ́ wee nu lɛ kɛ wen nu elemtè, fo bó enya wvú bô fiɛɛ fidien kɛ.”  
\v 11 \x - \xo 3:11 \xt 1Tim 5:13\x*Me njemyi nɛn njefo bese yuuke lɛ ben bomew shee laame kɛ lo yaa lemte kɛ, lɛne kɛ lo leese dew fô mwɛɛm mvu bonyii bomew e.  
\v 12 \x - \xo 3:12 \xt Ɛfɛ 4:28\x*Boba bonyii nu ɛ bese gayte bvuu ciise lo ɛ̂ bó ɛ̂ diee di Tata Jisos Klistu le lɛ bó eshii fokuse elemtè keekɛŋke fiɛɛ fì bó edieè.  
\v 13 \x - \xo 3:13 \xt Gal 6:9\x*Fô ben e, boom bo bwee wese le, fo ben ke ewɛle keegee gee dì jee kɛ. 
\p  
\v 14 \x - \xo 3:14 \xt 1Kol 5:9, 11\x*Ɛ́ wee tun keeyuw fiɛɛ fì bese jemyi ɛ̂ ŋwa' wvun e, ɛ́ ben ciise wvú. Fo ben ebvuu ekɛŋke lo fiɛɛ keege bô wvuwɛ wee kɛ, wvu lɛ wvú ewuumɛn.  
\v 15 \x - \xo 3:15 \xt Mat 18:15-17; 1Tɛs 5:14\x*Geenɛn, fo ben ejoò wvú diɛwɛ wee bvuban e kɛ. Ben etefe lo wvú diɛwɛ waa bwee wene le. 
\s1 Ŋgayma wvu fokemɛse 
\p  
\v 16 \x - \xo 3:16 \xt 2Kol 13:11\x*Tata wvù nu wvu nyɛkeey enyaà ben bô nyɛkeey sekecii ɛ̂ jé le yicii. Tata enù ben ɛ bó bocii. 
\p  
\v 17 \x - \xo 3:17 \xt 1Kol 16:21\x*Me wvù Baul nsaaŋke ŋgayma wvun bô kebo kem. Fin nu nciise wɛm wvù me ŋgee ɛ̂ boŋwa' bem e bocii. Ɛ ɛ̀ nu no me ŋké no nsaaŋke.  
\v 18 \x - \xo 3:18 \xt Gal 6:18\x*Tata wesebeene wvù Jisos Klistu ebuw ben bocii bô kembonɛn kew ɛ́ kí enù ben ɛ bó.