\id PHP - Naro NT [nhr] -Botswana 2012 (DBL 2014) 
\h FILIPI NE 
\toc2 FILIPI NE 
\toc1 Filipi ne 
\toc3 Flp 
\mt1 FILIPI NE  
\mt2 Paulom dis tcgãya sa  
\mt2 Filipi ne koe  
\imt1 Téé-cookg'ai sa  
\ip Kerekes Filipi koe hàna sa kò tc'ãà dis kerekes Yuropa koe hànas ga si i.  
\ip Paulo ba kò ncẽes tcgãya sa qáéèam hãa x'aè ka góá. C'ẽe ne dtcòm̀-kg'ao ne di ne tséé-kg'ao ne kò Paulo ba ntcoe, i kò tshúù-ntcõa di xgaa-xgaan hàna Filipi koe. Gatà i kò ii igabam kò Paulo kaisa qãè-tcaoan cgoa hẽé naka tcoman ka hẽéthẽé góá - Jeso Krestem koe guua hãa dtcòm̀an cgoa.  
\ip Ncẽes tcgãya sam góá hãa, Filipi di ne dtcòm̀-kg'ao nem gha qãè-tcaoa máá domka, ncẽe ne kò ẽem ko hùian qaa x'aè ka tsééa máá mes abas domka. Me ko ncẽem x'aè ba tséékagu a bìría cgáé-cgae ne, ẽeta ii zi qóḿ zi koem hãa igaba ne gha ghùi-ghui tcáósea hãa, a tcoman úúa hãa ka (tcee tsara tc'ãà di ba hẽé naka 4 di ba hẽéthẽé di tsara koe).  
\ip Dtcàrà nem kò, gane dim tc'ẽe ba méém Jesom dim khama ii sa, ncẽe kò cg'áré-cg'arese ba, naka nea gane ka c'ẽe ne, gane ka cgáése séè (2 dim tceem koe)  
\ip Tc'ẽe-tc'ẽesekagu nem kò, gane dis kg'õès Krestem di sa abas Nqarim di cgóm̀kuan di ii sa, ncẽe ne dtcòm̀an koe guu a hòòa hãa sa, Moshem di x'áèan komsana ka tamase (3 dim tceem koe).  
\ip 4 dim tceem koem ko qãè-tcaoan hẽé naka tòókuan hẽéthẽé Nqarim máà nea hãa ka kg'ui.  
\ip Ncẽes tcgãya sa ko x'áí, Paulom kò kerekes Filipi ne dis ka úúa hãas ncàm̀kus ka.  
\ib  
\ip Qaa-qaasa kg'uia ne:  
\ili1 - qãè-tcao sa  
\ili1 - ntcoeku sa hẽé naka kaikaguku sa hẽéthẽé e  
\ib  
\ip Tcgãyas q'oo koe hàna zi:  
\io1 - Téé-cookg'ai sa \ior (1:1-11) \ior*  
\io1 - Paulom hãa cgoa zi qóḿ zi \ior (1:12-26) \ior*  
\io1 - Krestem khama ma kg'õè \ior (1:27–2:18) \ior*  
\io1 - Paulo ba gha Timoteo ba hẽé naka Epaferadito ba hẽéthẽé tsara tsééa úú \ior (2:19-30) \ior*  
\io1 - Dqàèkuan hẽé naka qãè-tcaoan hẽéthẽé e \ior (3:1–4:9) \ior*  
\io1 - Paulo ba Filipi di ne khóè ne qãè-tcaoa máá \ior (4:10-23) \ior*  
\c 1  
\ms1 Téé-cookg'ai sa (1:1-11)  
\s1 Tsgám̀kaguku zi  
\p
\v 1 Paulo ra a, a Timoteom cgoa hàna, Jeso Krestem di tsam qãà tsam, \fig Filipi dim x'áé-dxoo ba|src="HK00363.tif" size="span" ref="1:1" \fig*  
\p a tsam a ko \add ncẽes tcgãya sa\add* wèé ne khóè ne ncẽe Jeso Krestem koe tcom-tcomsa ii ne, ncẽe Filipi koe hàna ne góá máá, tc'ãà-cookg'ai xu hẽé naka hùi-kg'ao xu hẽéthẽé cgoa, a ko máá:   
\p
\v 2 Nqarim gatá ka Xõò ba hẽé naka X'aigam Jeso Kreste ba hẽéthẽé tsara koe guua hãa cgóm̀kuan hẽé naka tòókuan hẽéthẽé méé i gatu cgoa hãa, témé.   
\s1 Paulo ba ko dtcòm̀-kg'ao ne Filipi di ne còrèa máá  
\p
\v 3 Wèé x'aèan ẽer ko tc'ẽe-tc'ẽese tu u kar ko Nqarim tiri ba qãè-tcaoa máá,  
\v 4 a ra a ko gataga wèé x'aèan ẽer ko còrè ka wèéa tu ga qãè-tcaoase còrèa máá,  
\v 5 ẽe tu ko tíí cgoa tsééa xg'ae, a Jesom di qãè tchõàn \add khóè ne koe úú\add* ka, tc'ãà dim cáḿ \add ẽe tu kò dtcòm̀\add* koe guu a, a hàà ncẽem cáḿ koe tcãà ka.  
\v 6 \add Nqari\add* ba qãès tséé sa tshoa-tshoaà gatu koe. Ra kaisa tcoman úúa, xg'ara-xg'ara sim gha sa, Jeso Krestem \add ko ka̱bise a hààm\add* cáḿ ka.   
\p
\v 7 Tcáóa te koe tu hàna khama i qãèa máá tea, ncẽetar gha ma wèéa tu tc'ẽea máá sa. Wèé tsééan ẽe Nqarim kò Gam di cgóm̀kuan koe máà tea tu kò tíí cgoa xg'aea hãa: qáéèa ra kò hãa ka hẽé, naka Nqarim di qãè tchõà ner ko tééa máána hãa x'aè ka hẽé, naka ẽer kò Nqarim di qãè tchõàn tseegu ii sa x'áía hãa ka hẽéthẽé e.  
\v 8 Nqarim ga ba q'ana khama, tseegua ner ko nxàe sa, ẽer kò ko máá: Jeso Krestem dis tcáós koer guu a wèéa tu xgónèa hãa, témé ne.   
\p
\v 9 Ncẽea tiri còrè e, gatu dis ncàm̀kus gha kaisase càùse di i, q'ãan koe hẽé naka qãèse bóòa q'ãas koe hẽéthẽé e,  
\v 10 qãè zi gúù zi tu gha nxãasega bóòa tcg'òó, a tu a gha q'ano ii a káà chìbi ii ka, me gha nxãakg'aiga síí Krestem dim cáḿ ba tcãà.  
\v 11 \add Ra ko gataga còrè,\add* Jeso Krestem koe tu gha guu a tchàno zi tséé zi ka cg'oè-cg'oeè sa, nxãasegam gha Nqari ba x'áàkaguè a dqo̱m̀mè ka.   
\ms1 Paulom tc'áró di zi qóḿ zi (1:12-26)  
\s1 Krestem ka méé i xgaa-xgaaè  
\p
\v 12 Q'ãa tu ghas gúù sar ko tc'ẽe, tíí qõe ga tuè, ncẽe kúrúse cgae teas gúù sa qãè tchõàn qõòkagua khama.  
\v 13 I hàà ncẽeska wèé kòre-kg'aoan x'aigam dim nquum di hẽé naka wèé ne khóè ne koe hẽéthẽé q'ãasea, Krestem domkar qáéèa sa.  
\v 14 Tiri qáékua ne ko tíí qõea ne káí ne X'aigam \add Nqarim\add* koe hàna ne kúrú ne tcoman úú, a \add Nqarim dim\add* kg'ui ba q'áò tamase kg'ui, kgoarasease hẽéthẽé e.   
\p
\v 15 Eẽta ne ko ma c'ẽe ne Krestem ka ko tauan hẽé naka mẽékuan hẽéthẽé cgoa xgaa-xgaa, igaba ne ko c'ẽe ne qãè tc'ẽean cgoa Gam ka xgaa-xgaa.  
\v 16 Ncẽe \add Gam ka ko qãè tc'ẽean cgoa ko xgaa-xgaa\add* ne ko ncàm̀kuan cgoa kúrú u, qãè tchõàn tééa máá dise ra ncẽe koe tòóèa hãa sa ne q'ana khama.  
\v 17 Igaba ne ko \add mẽékuan di ne\add* Krestem ka xgaa-xgaa q'ano-tcáó cgoa tamase, cúía ga ne cgáékaguse kg'oana hãa domka, tiris qáékus koe ne gha qarian cgoa qgóókukagu te ka.   
\p
\v 18 Ka ra gha kháé nxãaska nta méé? Eẽta ga i wèé qgáìan koe ga ii ka, tshúù-ntcõase ga igaba, kana tseeguse ga igaba, i ko Krestem ka xgaa-xgaaè. Ra ko ncẽes gúùs domka qãè-tcao, eè, a ra a gha kg'amaga qanega qãè-tcao.  
\v 19 Eè, q'ana raà, gatu di còrèan ka hẽé naka Jeso Krestem dim Tc'ẽem di hùian ka hẽéthẽés gha ncẽe kúrúse cgae teas gúù sa \add tiri\add* kgoarakuan koe ka̱bise sa.  
\v 20 \add Kreste ba kò\add* wèé x'aè ka \add kaikaguè\add*, ra ko wèé tcáóa te cgoa ga tcom a ko nqòò, cúí gúù kagar sau-cgaekaguè tite sa, igabagam gha Kreste ba ncẽeskaga igaba cgáé-q'ooa te koe kgoarasease kaikaguè, kg'õèa ra ga hãa kana ra ga x'óóa hãa igaba.  
\v 21 Tíí ko bóò ka kg'õè sa Kreste Me e, si x'oo sa ka̱bisea mááku si i khama.  
\v 22 Ncẽè qanegar kò cgàam koe kg'õèa ne, hùigas tséé si i gha ii tíí koe, igaba dùú sar gha nxárá tcg'òóa mááse sar c'úùa.  
\v 23 Qóḿs xháés cám̀ gúù sara dis koer hàna. Tc'ẽer ko, x'óór gha a Krestem cgoa síí hãa sa, nxãa sa kaisase qãè si i khama.  
\v 24 Igaba cgàam koer gha hãa sa ko kaisase qaase gatu domka.  
\v 25 Tcoms ncẽer úúas kar q'ana, gatu cgoar gha hãa sa, a ra a gha wèéa tu cgoa qanega hẽé, gatu \add di dtcòm̀an\add* gha còoka qõò ka, naka gatu di dtcòm̀an di qãè-tcaoan hẽéthẽé e.  
\v 26 A ncẽè gaicarar kò gatu cgoa hàna ne tu gha tíí domka Jeso Kreste ba kaisase dqo̱m̀.   
\ms1 Krestem khama ma kg'õè (1:27–2:18)  
\s1 Krestem koe méé tu kg'õè  
\p
\v 27 Igaba kaisase ko qaase sa, kg'õèa tu di kg'óòan méé i Krestem di qãè tchõàn kg'anoa hãa. Hàà ra ga ko hàà bóò tu u, kana ra ga káà ra a igaba méér kóḿ, kg'õè-q'ooa tua qarika cúím tc'ẽem koe hàna sa, tu ko gataga qãè tchõàn di dtcòm̀an koe cúís tcáós cgoa qarika tséé sa.  
\v 28 Ra kóḿ kg'oana, cuiskaga tu ntcoeko ne ka q'aekaguè tite sa. Ncẽe sa bóòsekos x'áí si i gane di kaàkaguèan di sa, igabas gatu di kgoarakuan di si i. Si ncẽe sa Nqarim koe guua.  
\v 29 Cgóm̀kuan tu máàèa hãa khama, Krestem koe tu gha dtcòm̀s ka cúí tamase, igaba gataga Gam domka xgàrases ka hẽéthẽé e.  
\v 30 Gatu hẽé naka tíí hẽéthẽé ta ko cúís ncõo sa x'ãà khama. Ncìísegar kò ncẽes ncõo sa x'ãà, ncẽe tu ko ma bóò khama, a ra a ko ncẽe tu ko ma kóḿ khamaga ma qanega ncẽeska x'ãà si.   
\c 2  
\s1 Krestem di cg'áré-cg'aresean hẽé naka Gam di kaian hẽéthẽé e  
\p
\v 1 Kreste ba ko ghùi-ghui tcáó tu u. Si ko Gam dis ncàm̀ku sa qgài-qgai tcáó tu u, Tcom-tcomsam Tc'ẽe ba ko xg'ae-xg'ae tu u, tu thõò-xama-mááku sa hẽé naka cgóm̀ku sa hẽéthẽé úúa hãa.  
\v 2 \add Ncẽe zi gúù zi tu kò úúa hãa\add* ne méé tu nxãaska tiri qãè-tcaoan kaisakagu, cúíta ma tc'ẽean ka, naka tu ncàm̀ku naka cúíta cúíga xám̀, naka tua cúís tcáó sa úú.  
\v 3 Táá méé tu cẽè di guu, naka bóòse guu, igaba méé tu cg'áré-cg'arese, naka gatu ka c'ẽe ne, gatu ka cgáése séè.  
\v 4 Wèém khóè ba méém táá gam di zi gúù zi cúí zi q'õé guu, igabaga méém c'ẽe ne khóè ne di zi gúù zi gataga q'õé.   
\p
\v 5 Gatu dim tc'ẽe ba méém Jeso Krestem dim khama ii.   
\q1
\v 6 Ncẽe xg'ao Nqarim dis iis koe hàna  
\q1 a Gam cgoa cúí ii ba,  
\q1 igabam ko Nqarim cgoa tòóa xg'aesean táá qgóóa qari, kúrúm gas gúù sa.   
\q1
\v 7 Igabam xg'ao cg'ãa-cg'anasekaguse  
\q1 a qãàm dis téé-q'oo sa séè,  
\q1 a khóèm dis iis koe ábàèa.  
\q1 Eẽm ko khóèan di iian koe sao-xg'aeè   
\q1
\v 8 kam kò cg'áré-cg'arese,  
\q1 a x'ooan koe ga igaba máàse,  
\q1 xgàus dis x'oos koe ga igaba. \fig Jesom di tshàua nea spikirim ka qhàeèa hãa xgàus koe|src="HK00322.tif" size="col" ref="2:8" \fig*   
\q2
\v 9 Gaas gúùs domkam kò Nqari ba kaisase kaikagu Mea,  
\q2 a ba a wèé zi cg'õè zi ka kaias cg'õè sa máà Mea.   
\q2
\v 10 Nxãasegam gha wèém qúrù ba Jesom dis cg'õè sa qo̱m̀a máá ka,  
\q2 wèé gúùan nqarikg'ai di hẽé,  
\q2 naka nqõómkg'ai di hẽé,  
\q2 naka nqõóm ka nqãaka hànan hẽéthẽé e.   
\q2
\v 11 Nxãasega zi gha wèé zi ta̱m zi gataga nxàe,  
\q2 Jeso Kreste ba X'aiga Me e sa ka,  
\q2 Nqarim Xõòm gha x'áàkaguè ka.   
\s1 Nqõómkg'ai di x'áàn khama méé tu x'áà  
\p
\v 12 Ncàm̀-ncamsa tu tiri tuè, wèé x'aè ka tu kò komsana, ẽer hàna hãa ka cúí tamase, igaba kaisase káà ra a x'aè kaga. Ke méé tu ncẽeska gatu di kgoarasean koe tséé, q'áòan hẽé naka cgùruan hẽéthẽé cgoa.  
\v 13 Nqari ba ko gatu koe tséé, tc'ẽe tu kos koe hẽé naka kúrú tu kos koe hẽéthẽé e, qãè-tcaokaguèm gha ka.   
\p
\v 14 Wèé zi gúù zi méé tu kg'ui-kg'uise tamase kana mẽéku tamase kúrú,  
\v 15 naka tua gha nxãasega káàn chìbi naka q'ano ii, qãè tu cóá tu Nqarim di tu iise, tshúù caus qhàòs ho̱àra hãas xg'aeku koe. Gane xg'aeku koe méé tu x'áà, nqarikg'ai di tco̱nòan khama ma,  
\v 16 kg'õèan dim kg'ui ba qgóóa hãase. Ncẽeta tu kò hẽé ner gha Krestem dim cáḿ ka \add gatu\add* ka dqo̱m̀se. \add X'áí i gha\add* tiri qgóéan kò kg'amaga di tama sa, i kò qóḿ tsééan tiri kõ̱ès di tama a sa.  
\v 17 A ncẽè tiri c'áòan kò dàòa-máákus dis gúùs khama ma ntcã̱aguè ne, ncẽe gatu dis dtcòm̀s ko Nqari ba kúrúa máá sa, gatà i kò ii ner gha qãè-tcao, a gha tiri qãè-tcaoan gatu wèé tu cgoa xg'aea máá.  
\v 18 Gatu igaba méé tu gatà ma qãè-tcao. Naka tua tíí cgoa gataga qãè-tcao.   
\ms1 Paulo ba gha Timoteo ba hẽé naka Epaferadito ba hẽéthẽé tsara tsééa úú (2:19-30)  
\p
\v 19 X'aigam Jesom koer nqòòan úúa hãa, Timoteo bar gha gatu koe qháése tsééa úú di i, nxãasega ra gha ẽem ko ka̱bise ne tíí igaba qãè-tcao ka, gatu kam gha hàà bìrí te khama.  
\v 20 Gam khama ii tcáó khóèr úú tama, tseegukaga gha gatu di zi gúù zi tc'ẽe-tc'ẽese e.  
\v 21 Wèéa ne ga ko gane di zi gúù zi cúí zi qaa khama, Jeso Krestem di zi tamase.  
\v 22 Gatu igaba tu q'ana, ntam kò ma gam ka x'áíse sa, cóám xõò ba ko tsééa máám khamam kò ma tíí cgoa Nqarim di qãè tchõàn koe tséé.  
\v 23 Ra gaa domka nqòòan úúa, gaam ga bar gha tsééa úú di i, ẽer kò ko gúù zi ko ma tíí ka qõò sa q'ãa ne.  
\v 24 Ra X'aigam koe tcoman úúa hãa, tíí igabar gha qháése síí sa.   
\p
\v 25 Igabar kò bóò, kaisase i ko tc'ẽese sa, Epaferodito bar gha gatu koe tsééa úú sa, ncẽe tíí qõe ba, a tíí khama ma tséé-kg'ao ba, a tíí khama ma ncõo-kg'ao ba, ncẽe gatu dim tséé-khoe ba gataga, ncẽe tu kò tsééa óá ba, hààm gha ẽer ko tcào zi q'õé ka ba.  
\v 26 Wèéa tu gam xgónèa hãa, a ba a gataga thõò-tcaoa hãa, tsàam ko sa tu kóḿa hãas gúùs domka.  
\v 27 Tseegukagam kò ko tsàa a ba a kò x'oos qàe koe hãa, Me kò Nqari ba thõò-xama máá me, gaam cúím tamase igabaga tíí ga ra hẽéthẽé e, nxãasegar gha táá gaia c'ẽes tshúù-tcaos tshúùs koe hãa ka.  
\v 28 Ra kò ncẽes gúùs domka qháése tsééa úú me, nxãasega tu gha ẽe tu ko bóò me ne qãè-tcao ka, nakar gha nxãasega gataga tiri tshúù-tcaoan ka kaà cgaeè.  
\v 29 Ke méé tu kaisas qãè-tcaos cgoa Nqarim koe qãèse hààkagu me, naka tua ẽeta ii khóèan tcom,  
\v 30 gam dis kg'õè sam kò cg'ãè zi qgáì zi koe tcãà, a ba a kò Krestem di tsééan domka x'óó ka hẽé, gatu kúrúa máá tea hãa tite tsééan kúrú koe.   
\c 3  
\ms1 Dqàèkuan hẽé naka qãè-tcaoan hẽéthẽé e (3:1–4:9)  
\s1 Tseegu di tchànoan ncẽe Nqarim koe guua a  
\p
\v 1 Còo dis ka, tíí qõe ga tuè, Nqarim koe qãè-tcao! Cúís gúùs ncẽer ko góá máá tu u sa xhõekagu te tama, a sa a gha qãèa máá tu u.  
\v 2 Q'õése méé tu ha̱ghuan koe, naka q'õése cg'ãè cau ne koe, naka q'õése cgàan ko gáò ne khóè ne koe.  
\v 3 Gatáa tseeguka q'ãe nqãa-qgai khòoèa ta ta a khama, gatá Nqari ba kò Tcom-tcomsam Tc'ẽem koe dqo̱m̀ a Jeso Krestem koe koase ta, a cgàa ba dtcãàse tama.   
\p
\v 4 Tíí igabar ga koase. Tíí xòè za ka, ncẽè c'ẽem khóèm kò cgàan koe dtcãàsea hãa, ner gha tíí igaba kaisa dtcãàsean úúa:  
\v 5 Q'ãe nqãa-qgai khòoèa raa 8 dim cáḿ ka, Iseraele dis qhàòs koer guua, Benjamenem dis qhàòs koe. Heberar tc'áró-tc'aro. \add Moshem di\add* x'áèan xùri koe ra Farasai ra a.  
\v 6 Wèé tcáóa te koer kò kerekes cgoa x'ãàkua. X'áèan koe tsi kòo chìbia te qaa ne tsi gha bóò ra chìbi úú tama.   
\p
\v 7 Igabaga wèés gúùs ẽer ko bóò si ga ka̱bisea máá te sa, nxãa sar ko káà hùi iise bóò Krestem domka.  
\v 8 Eè, tseegukar ko wèé zi gúù zi káà hùise séè, Jeso Krestem tirim X'aiga ba q'ãa nea gaa zi gúù zi ka kaisase cgáé e khama. Gaam domkar wèé gúùan aagua, a ra a ko cg'uri khama ma séè e, nxãasegar gha Krestem \add cúí\add* ba hòò ka,  
\v 9 a ra a gha Gam koe hànase sao-xg'aeè ka. Nqarim di x'áèa ner kò kúrús gúùs koer guu a tchàno iise bóòè tama, igabaga Krestem koe dtcòm̀an ka a. Nqarim koe guua tchànoan ga ncẽe e, dtcòm̀an di i.  
\v 10 Kreste bar q'ãa kg'oana, tẽe-q'ooa ba di qarian ka hẽé, naka Gam di xgàrasean ka hẽéthẽé e. Gam khamar ii kg'oana Gam dis x'oos koe,  
\v 11 a ra a gha nxãasega x'ooan koe tẽean hàà sao-xg'ae ka.   
\s1 Tcg'òó tcúú sa qàròa máá  
\p
\v 12 Sao-xg'ae ta ga ra hãa, a ra a qanega tc'ãò tama. Gabagar ko ncẽes gúù sa qgóó a qaa, Jeso Kreste ba gaas ka qgóó tea khama.  
\v 13 Tíí qõe ga tuè, qgóóar xg'ara tar méé tama. Igabagar ko cúís gúù sa kúrú. Ncẽetar ko méé: kháóka hàna zi gúù zir ko q'aa cgoa, a ra a ko kóé còoka hàna zi gúù zi.  
\v 14 Còokar ko qarika kúrú xám̀, tcg'òó tcúúr gha ka. Nqari ba tc'amaka \add hãas kg'õès ncẽes koe\add* tciia úú tea hãa Jeso Krestem koe.   
\p
\v 15 Gatá ncẽe \add dtcòm̀an koe\add* kaia hãa ta méé ta gatà ma tc'ẽe. Igabaga ncẽè c'ẽes gúùs ka tu kò tãáka zi tc'ẽe zi úúa hãa nem gha Nqari ba gaas gúù sa thẽé x'áí tu u.  
\v 16 Igaba méé ta ẽe ta sao-xg'aeam dàòm cgoa cúí ga còoka qõò.   
\p
\v 17 Tíí qõe ga tuè, wèé tu méé tu serè te, naka tua khóè ne ẽe ko sixae dis x'áís khama ma kg'õè ne xaèa kg'ónò.  
\v 18 Káí q'oror ncẽes gúù sa bìrí tua, ra ko ncẽeska tcgáí-tshàran cgoa bìrí tu u, a ko máá: káí ne khóè ne hãa, Krestem dis xgàuku sa hòrea ne, témé.  
\v 19 Gane dis chõò-q'oo sa kaàkaguè si i. Gane dis nqárì sa ẽe tc'áróa ne ko tc'ẽes gúùs ga si i\f + \fr 3:19 \fk ẽe tc'áróa ne ko tc'ẽes gúù si i - \ft Gerika sa ko máá: “gane dis ncãà sa,” témé.\f*. Saucgae di gúùan koe ne ko dqo̱m̀se. Nqõómkg'ai di gúùan koe i tc'ẽea ne tẽe.  
\v 20 Igabas gatá dis x'áé sa nqarikg'ai koe hàna, ncẽe Kgoara-kg'aom gatá dim X'aigam Jeso Kreste ba ta ko guu a qãà koe.  
\v 21 Gabá gha kg'amka tc'áróa ta, Gam dim tc'áróm x'áàkom cgáém khama ma kúrúa ka̱bi i. Ncẽe gúùa nem gha kúrú, qaria nem úúa wèé gúùa nem gha Gam dòm̀ q'oo koe tòó di i khama.   
\c 4  
\s1 Tãáka zi x'áè-kg'áḿ zi  
\p
\v 1 Ke méé tu ncẽeska, ncàm̀-ncamsa tuè, X'aigam \add Nqarim\add* koe qarika téé! Tíí qõe ga tu u, ncàm̀ar hãa a xgónèa tu, qãè-tcaokagu te tu ko, a tu a gataga dqo̱m̀kuan dis cábás khamaga ii.   
\p
\v 2 Odia sa hẽé naka Sentuke sa hẽéthẽé sara ra ko wèé tcáóa te cgoa dtcàrà, a ko máá, méé sara cúí tcáóa sara cgoa X'aigam \add Nqarim\add* koe x'ãè, témé.  
\v 3 Eè, tsáá igaba ra ko dtcàrà tsi, tcom-tcomsa tsi joko xgàm-kg'ao tsi, khóè sara ẽe sara hùi, qãè tchõàn \add Nqarim di\add* koe sara tíí cgoa tsééa hãa, Kelemente ba hẽé, naka c'ẽe ne tséé-kg'ao ne hẽéthẽé e, ncẽe gane di cg'õèan tcgãyas kg'õèan dis koe hàna ne.   
\p
\v 4 Wèé x'aè ka méé tu X'aigam koe qãè-tcao. Gaiar ko ncẽeta méé: qãè-tcao tu!  
\v 5 Gatu di qãè cauan méé i wèé ne khóè ne koe q'ãaè. X'aigam \add Nqari\add* ba cúù Me e ke.  
\v 6 Táá méé tu cúí gúù kaga káíse tc'ẽe-tc'ẽese guu, igaba méé tu wèés gúùs koe gatu di dtcàràn kúrú nakam Nqari ba q'ãa a, còrèan koe hẽé naka dtcàràn koe hẽéthẽé e, qãè-tcaoa-máákuan cgoa.  
\v 7 I gha kóḿa q'ãan ka tc'amaka hãa tòókuan Nqarim di, tcáóa tu hẽé naka tc'ẽea tu hẽéthẽé Jeso Krestem koe kòre.   
\p
\v 8 Còo dis ka, tíí qõe ga tuè: tc'ẽea tu méé tu cg'oè-cg'oe qãè zi gúù zi hẽé naka dqo̱m̀kuan kg'anoa hãa zi gúù zi hẽéthẽé cgoa: wèé zi gúù zi tseegu di zi hẽé, naka wèé zi dqo̱m̀mè ko zi gúù zi hẽé, naka wèé zi tchàno zi gúù zi hẽé, naka wèé zi gúù zi q'ano zi hẽé, naka wèé zi ncàm̀-ncamsa zi gúù zi hẽé, naka wèé zi gúù zi qãè zi iise ko nxàeè zi hẽéthẽé cgoa.  
\v 9 Tíí koe tu xgaa-xgaasea zi gúù zi hẽé, a gataga máàèa zi gúù zi hẽé, a tu a gataga kóḿa zi hẽé, a tíí koe bóòa zi hẽéthẽé méé tu tséékagu, nxãaskam gha tòókuan dim Nqari ba hãa cgoa tu u.   
\ms1 Paulo ba Filipi di ne khóè ne qãè-tcaoa máá (4:10-23)  
\p
\v 10 Kaisaser ko Nqarim koe qãè-tcao, tíí ka tu gha tc'ẽe-tc'ẽese di x'aèan tu gaia hòòa khama. Kg'aiga tu kò tc'ẽe-tc'ẽese te, igaba tu ko x'aèan úú tama.  
\v 11 Ncẽes gúù sar ko méé kar máá, qaar kos gúù si i témé tama. Wèés téé-q'oos ẽer hãas koer gha qãè-tcaoa hãa sar xgaa-xgaasea hãa khama.  
\v 12 Tòó dìbiku sar q'ana hãa; a ra a gataga tòó ghùiku sa q'ana hãa. Ncẽes kàa sar xgaa-xgaasea: wèé qgáì hẽé naka wèé x'aè hẽé kar gha qãè-tcao ka. Xg'ãà ra ga hãa kana xàbà ra ga hãa igaba, q'õòa ra ga hãa kana ra ga káà gúù ra a igaba.  
\v 13 Wèé zi gúù zir gha ẽe ko qari-qari tem cgoa kgoana.   
\p
\v 14 Eẽta i ii igabaga tu qãèse hẽéa, a kò tíí cgoa xg'aea máána, qgóóar kò hãa qóḿa ne.  
\v 15 Gatu igaba tu q'ana, gatu Filipi tu, qãè tchõàn kò tc'ãà a gatu koe hàà x'aè ka, Maketonia koer ko tcg'oa, kas kò cúís kerekes ga sa káà si i, tíí cgoa ko tòókua sa aban marian di ka kò hùi te sa, gatu ka oose.  
\v 16 Tesalonika koe igaba tu xg'ao ẽer tcàoa hãa koe hùian úúa máá te, x'aèan ko ma ntcõóa xùriku khama.  
\v 17 Aba ner ko qaas tama si i, igabar ko tc'ẽe, khóè ne gha kaisase koa tu u sa, qãè tsééan ncẽe tu kúrúa hãa káí domka.  
\v 18 Wèé aban ẽe tu kò Epaferoditom cgoa tsééa máá tea hãa ra hòòa, i kaisase tc'ãò tea, a tc'ãòa nqáéa. Dàòa-máákus \add Nqarim dis\add* qãè hm̀m̀ xg'ãòs \add khama zi xám̀\add*, ncẽe Nqarim koe ko qaase sa, Nqari ba ko qãè-tcaokagu sa.  
\v 19 Igabagam gha tirim Nqarim, ncẽe qguùa hãa ba, Gam di x'aian koe guu a wèés gúùs ẽe tu tcàoa hãa sa máà tu u, Jeso Krestem koe.  
\v 20 Gatá dim Nqarim Xõò ba méém chõò tamase dqo̱m̀mè! Amen.   
\s1 Còo di zi tsgám̀kaguku zi  
\p
\v 21 Tsgám̀kagu wèém Jeso Krestem koe tcom-tcomsa ba. Tíí qõe ga ne tíí cgoa hàna nea ko tsgám̀kagu tu u.  
\v 22 Wèé ne tcom-tcomsa ne khóè nea ko tsgám̀kagu tu u, \add Roma ne dim x'aigam\add* Kaesaram dim nquum di ne tc'áró ga.   
\p
\v 23 X'aigam Jeso Krestem di cgóm̀kuan méé i gatu di tc'ẽean cgoa hãa.